དེའང་ཕྱི་ལོ་ ༢༠༡༥ལོའི་ཨ་རིའི་གཞུང་གིས་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་ཞིག་འདོན་སྤེལ་གནང་པ་དང་སྦྲགས། ད་ལྟའི་ཆར་རྒྱ་གཞུང་རང་གིས་བོད་མིའི་ཆོས་ཕྱོགས་ཀྱི་གནང་སྒོ་ཁག་ལ་ཐེ་བྱུས་བྱེད་ཤུགས་ཆེ་རུ་བཏང་ཡོད་པ་བརྗོད་འདུག ད་རེས་ཨ་རིའི་གཞུང་གིས་འདས་ལོའི་ནང་འཛམ་གླིང་གི་རྒྱལ་ཁབ་ཁྱོན་ ༢༠༠ ལྷག་ནང་གི་མང་ཚོགས་ཀྱི་ཆོས་དད་རང་དབང་ལ་རྟོག་ཞིབ་གནང་པ
འི་ལོ་འཁོར་སྙན་ཐོ་དེ་ཁ་སང་ཟླ་ ༨ ཚེས་ ༡༠ ཉིན་ཡོངས་བསྒྲགས་འདོན་སྤེལ་གནང་ཡོད་པ་རེད།
ཨ་རིའི་གཞུང་གིས་སྙན་ཐོ་དེའི་ནང་བོད་དང་རྒྱ་ནག་ཅེས་སྡེ་ཚན་གཉིས་བཀོད་པར་གཞིགས་ན། རྒྱ་གཞུང་གིས་རྩ་ཁྲིམས་ནང་དུ་བོད་རིགས་མི་མང་ཚོ་རྒྱུན་ལྡན་ཐོག་ཆོས་དད་རང་དབང་ལོངས་སུ་སྤྱོད་རྒྱུ་ཡོད་ལུགས་འཁོད་ཡོད་ཀྱང། དོན་དངོས་ཐོག་བོད་མི་ཚོས་རང་ཉིན་ཀྱི་ཆོས་ཕྱོགས་གནང་སྒོ་ཁག་ལ་རང་དབང་དང་སྲུང་སྐྱོབ་ཡོད་ཅེས་པ་དེ་གང་ཞིག་ལ་ངོས་འཛིན་གྱིས་ལག་བསྟར་བྱེད་ཀྱི་ཡོད་མེད་གསལ་ཁ་དོད་པོ་ཞིག་རྩ་ཁྲིམས་ནང་འགྲེལ་བརྗོད་བྱེད་མེད་པ་ཐེར་བཏོན་བྱས་པ་དང་འབྲེལ། ད་ལྟའི་ཆར་ཁྲིམས་སྒྲིག་དེའི་འོག་རྒྱ་གཞུང་གིས་བོད་མིའི་ཆོས་ཕྱོགས་ཀྱི་གནང་སྒོའི་ཐོག་ཐེ་བྱུས་བྱས་པ་དང་། ལྷག་པར་དུ་བོད་རིགས་ནང་པའི་དགོན་སྡེ་ཁག་ལ་དམ་དྲག། དེ་བཞིན་ཆོས་ཕྱོགས་དང་འབྲེལ་ཡོད་སེར་སྐྱ་མང་ཚོགས་ཀྱི་འགྲོ་སྡོད་སྤྱོད་གསུམ་ལ་རང་དབང་མེད་པ་བཟོས་པ་མ་ཟད། དེ་དག་གང་བྱུང་འཛིན་བཟུང་དང་རྒྱུན་རིང་བཀག་ཉར་བྱས་པས་གར་སོང་ཆ་མེད་དུ་གྱུར་པ། བཙོན་ཁང་ནང་མི་སྤྱོད་ལས་འདས་པའི་སྡུག་སྦྱོང་མནར་གཅོད་འོག་འདས་གྲོངས་སུ་གྱུར་བ། ཁྲིམས་མཐུན་གྱི་ཁྲིམས་ཐག་བཅད་ཀྱི་མེད་པ་བཅས་རྒྱ་གཞུང་གིས་བོད་ནང་གི་བོད་མིའི་ཆོས་རང་དབང་ལ་དམ་གནོན་བྱེད་བཞིན་པ་མངོན་གསལ་གནང་འདུག
ཨ་རི་གཞུང་གིས་རྒྱ་གཞུང་གིས་རྩ་ཁྲིམས་ནང་འགལ་ཐོག་བོད་ནང་བོད་མིའི་རྒྱུན་ལྡན་གྱི་ཆོས་ཕྱོགས་གནང་སྒོ་དང་དུས་ཆེན་ཁག ལྷག་པར་དུ་བོད་མིའི་མགོན་སྐྱབས་༸གོང་ས་ཏཱ་ལའི་བླ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་རྒྱུ་མཚོན་པའི་བོད་མིའི་སྲོལ་རྒྱུན་གྱི་གནང་སྒོ་ཁག་ལ་ཆབ་སྲིད་ཀྱི་ངོ་བོར་བསྒྱུར་ཏེ་དམིགས་བསལ་གྱིས་དམ་མནོན་ཤུགས་ཆེ་བྱེད་བཞིན་ཡོད་པ་འགྲེལ་བརྗོད་བྱས་པ་མ་ཟད། ལྷག་པར་དུ་དགོན་སྡེ་ཁག་དང་མང་ཚོགས་ནང་༸གོང་ས་མཆོག་གི་༸སྐུ་པར་སྒྲིག་གཤམ་བྱེད་མི་བཅུག་པ། དགེ་བཙུན་རྣམས་ལ་བཙན་དབང་གིས་རྒྱལ་གཅེས་ཆོས་གཅེས་ཀྱི་སློབ་གསོ་སྤྲོད་པ་དང་འབྲེལ། ༸གོང་ས་༸སྐྱབས་མགོན་ཆེན་པོ་མཆོག་ལ་ཚན་སྨད་ཞུ་བཅུག་པ་སོགས་ལ་བརྟེན། བོད་ནང་བོད་མི་ཚོས་རྒྱ་གཞུང་ལ་ཞི་རྒོལ་དང་རང་ལུས་མེར་སྲེག་གི་ལས་འགུལ་སྤེལ་བའི་གནས་ཚུལ་ཐོན་ཡོད་སྐོར་འགྲེལ་བརྗོད་གནང་ཡོད་པ་རེད།
དེ་བཞིན་ད་རེས་ཀྱི་སྙན་ཐོ་འདིའི་ནང་དུ་བོད་མིའི་ཆོས་ཕྱོགས་ཀྱི་གནང་སྒོ་ཁྱོན་ཡོངས་ལ་རྒྱ་གཞུང་རང་གིས་དོ་དམ་སུན་གཙེར་བྱེད་བཞིན་ཡོད་པ་དང་འབྲེལ། རྒྱ་ནག་དབུས་ཆོས་དོན་ལྷན་ཁང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བླ་ཆེན་རྣམ་པའི་མ་འོངས་པའི་ཡང་སྲིད་ངོས་འཛིན་གནང་ཕྱོགས་ཐད་ལ་སྒྲིག་གཞི་གསར་བ་གཏན་འབེབས་བྱས་ཏེ་དེའི་བདག་དབང་ཡོངས་རྫོགས་ལ་རྒྱ་ནག་དབུས་གཞུང་ལ་ཡོ
ད་པ་མ་གཏོགས་དེ་མིན་གཞན་སུ་ལའང་མེད་པ་བཟོས་ཡོད་པ་སོགས་རྒྱ་གཞུང་གིས་བོད་མིའི་ཆོས་དད་རང་དབང་ལ་དམ་དྲག་ཅན་གྱི་སྲིད་བྱུས་ལག་བསྟར་སྤེལ་བཞིན་ཡོད་པ་མངོན་གསལ་གནང་འདུག དེ་བཞིན་རྒྱ་གཞུང་གིས་བཙན་ཁྲིད་འོག་གར་སོང་ཆ་མེད་དུ་གྱུར་བའི་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན། སྔ་ལོ་རྒྱ་གཞུང་གི་བཙོན་ཁང་ཡུན་རིང་སྡུག་སྦྱོང་མནར་གཅོད་འོག་འདས་གྲོངས་སུ་གྱུར་བའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་གནད་དོན། རང་ལུས་མེར་སྲེག་གི་གནད་དོན། དེ་དག་དང་འབྲེལ་ཡོད་འཛིན་བཟུང་གིས་ཁྲིམས་ཐག་བཅད་པའི་གནད་དོན་སོགས་ཀྱང་ཞིབ་ཕྲ་བཀོད་ཡོད་པ་རེད།
སྤྱིར་ཁ་སང་ཨ་རིའི་གཞུང་གིས་ཐེངས་འདིའི་རྒྱལ་སྤྱིའི་ཆོས་དད་རང་དབང་གི་སྙན་ཐོ་འདོན་སྤེལ་གནང་པའི་ཐོག་ལ་ཨ་མི་རི་ཀའི་གཞུང་གི་དྲུང་ཆེ་གཞོན་པ་སྐུ་ཞབས་ Antony J. Blinken ལགས་ཀྱིས་རྒྱལ་ཁབ་གང་ཞིག་གི་ནང་ལ་མང་ཚོགས་ནས་རང་དབང་ཆ་ཚང་བ་ཞིག་ལོངས་སུ་སྤྱོད་རྒྱུ་ཡོད་ཚེ། སྤྱི་ཚོགས་དེའི་ནང་བརྟན་ལྷིང་དང། ཚགས་ཚུད། བདེ་འཇགས་ཀྱི་ཚོར་བ་ཡོང་རྒྱུ་ནི་བརྗོད་མི་དགོས་པ་ཡིན་པ་གསུངས་འདུག་ལ། དེ་ལས་ལྡོག་སྟེ་མང་ཚོགས་ཀྱི་ཆོས་དད་རང་དབང་ལ་བརྩི་མེད་རྡོག་རོལ་བཏང་ཚེ། སྤྱི་ཚོག
ས་དེའི་ནང་མི་གསད་ཁྲག་སྦྱོར་དང། མང་ཚོགས་ཀྱི་སེམས་ནང་དབྱེ་འབྱེད་དང་ཁྱེར་རྐྱང་གི་ཚོར་བ་སོགས་ཡོང་ངེས་ཡིན་སྟབས། རྒྱལ་ཁབ་གྱི་གཞུང་འཛིན་ཁག་གིས་སྤྱི་ཚོགས་སྟེང་གི་ཆོས་ལུགས་ཚང་མར་གུས་བརྩི་དང་། མང་ཚོགས་ཚོས་རང་དབང་གི་ཐོག་ནས་རང་ཉིད་ཀྱི་ཆོས་ལུགས་དད་མོས་དང་ཉམས་ལེན་བྱེད་བཅུག་དགོས་པ་རེད་ཅེས་བརྗོད་འདུག
རྩ་བའི་ད་ལན་གྱི་ཨ་རིའི་གཞུང་གིས་འདས་ལོའི་ནང་འཛམ་གླིང་གི་རྒྱལ་ཁབ་ཁྱོན་ ༢༠༠ ལྷག་ནང་གི་མང་ཚོགས་ཀྱི་ཆོས་རང་དབང་ལ་རྟོག་ཞིབ་གནང་པར་གཞིགས་ན། འཛམ་གླིང་གི་རྒྱལ་ཁབ་བརྒྱ་ཆ་ ༧༦ ནང་མང་ཚོགས་ཀྱི་ཆོས་དད་རང་དབང་གི་གནས་བབ་ལེགས་པོ་ཡོད་པ་དང། དེ་མིན་རྒྱལ་ཁབ་བརྒྱ་ཆ་ ༢༤ ནང་ད་དུང་ཡང་མང་ཚོགས་ཀྱི་ཆོས་དད་རང་དབང་གི་གནས་སྟངས་ཆེས་ཞན་པོ་ཡོད་པ་བཀོད་འདུག ལྷག་དོན་སྔ་ལོའི་ཟླ་ ༢ པའི་ནང་འདོན་སྤེལ་གནང་པའི་སྙན་ཐོ་ནང་International Religious Freedom Act འམ་རྒྱལ་སྤྱིའི་ཆོས་དད་རང་དབང་གི་ཁྲིམས་ཡིག་གཞི་བཟུང་འོག་འཛམ་གླིིང་ནང་ཆོས་དད་རང་དབང་རྡོལ་རོལ་འཚབ་ཆེན་གཏོང་མཁན་དང། དམིགས་བསལ་གྱིས་དོ་སྣང་བྱ་དགོས་པའི་རྒྱལ་ཁབ་བཅུའི་མིང་མངོན་གསལ་གནང་པ་ལས་རྒྱ་ནག་རྒྱལ་ཁབ་དེ་ཆེས་དངངས་འཚབ་ཆེ་བའི་ཨང་གཉིས་པར་མིང་བཏོན་བྱས་ཡོད་པ་རེད།
རྒྱ་གཞུང་གིས་བོད་མིའི་ཆོས་ཕྱོགས་ཀྱི་གནང་སྒོ་ཁག་ལ་ཐེ་བྱུས་བྱེད་ཤུགས་ཆེ་རུ་བཏང་ཡོད་པ་བརྗོད་འདུག
Tibetan News Headlines
- Dalai Lama meets with Estonian parliamentarians and Tibet support group delegation
- International community calls China to provide evidence of Panchen Lama’s whereabouts and wellbeing
- Its solely a pilgrimage and religious visit: Sakya Gongma Trichen rinpoche on recent visit to Bhutan
- Tibetan spiritual leader grants an audience to 200 devotees from Nepal
- Xi Jinping tells Antony Blinken US should avoid ‘vicious competition’ with China
- US jails Chinese man who threatened student activist
- Diaspora feature: Yeshi Thaye, hairdresser in Odisha Phuntsokling Settlement
རེས་གཟའ་པ་སངས། ༢༠༢༤།༠༤།༢༦
- ༸གོང་ས་མཆོག་གིས་ཨི་སི་ཏོ་ནི་ཡའི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་རྣམས་ལ་མཇལ་ཁ་སྩལ་བ།
- རྒྱལ་སྤྱིའི་སྤྱི་ཚོགས་ནས་རྒྱ་གཞུང་ལ་༸པཎ་ཆེན་རིན་པོ་ཆེ་གར་ཡོད་ཕྱིར་བསྒྲགས་དགོས་པའི་ནན་སྐུལ་གནང་འདུག
- འབྲུག་ཡུལ་དུ་ཆིབས་བསྒྱུར་མཛད་པ་ནི་ཆོས་ཕྱོགས་ཀྱི་ལས་དོན་ཁོ་ནའི་ཆེད་དུ་ཡིན་པ་བཀའ་བསྩལ་སོང་།
- ༸གོང་ས་མཆོག་གིས་བལ་པོའི་མི་སེར་༢༠༠ བརྒལ་བ་ལ་མཇལ་ཁ་སྩལ་བ།
- ཞི་ཅིན་ཕིང་གིས་ཨ་རྒྱ་གཉིས་མཐུན་གྲོགས་ལས་ཁ་གཏད་བྱ་མི་རུང་ཞེས་བརྗོད་འདུག
- མང་གཙོའི་ལས་འགུལ་བ་ཞིག་ལ་འཇིགས་སྐུལ་བྱས་རྐྱེན་རྒྱའི་སློབ་མ་ཞིག་ལ་ཁྲིམས་ཐག་བཅད་པ།
- བཙན་བྱོལ་བོད་མིའི་གནས་སྟངས་ངོ་སྤྲོད། ཨོ་རི་ས་ཕུན་ཚོགས་གླིང་དུ་གནས་སྡོད་སྐྲ་བཟོ་བ་ཡེ་ཤེས་མཐའ་ཡས།
