རྒྱ་ནག་གིས་ཁོར་ཡུག་སྲུང་སྐྱོབ་དང་རྨ་འབྲུ་རྫ་གསུམ་གྱི་འགོ་ཁུངས་གཅེས་སྤྲོས་ཀྱི་འབོད་སྒྲའི་འོག་བོད་ཁུལ་དུ་ཞིང་འབྲོག་མང་ཚོགས་ཀྱི་ས་ཆ་བཙན་འའཕྲོག་གིས་ཞིང་གྲོང་དུ་སྡོད་ཁང་གནས་སྤོའི་སྲིད་བྱུས་སྤེལ་བཞིན་པ་ལྟར། འབའ་རྫོང་མགར་རྩེ་རྒྱལ་མོ་སྡེ་བར་སྲིད་གཞུང་གིས་སྲིད་བྱུས་དེ་ལག་བསྟར་བྱས་ནས་མང་ཚོགས་ལ་དཀའ་ངལ་མང་དག་ཅིག་འཕྲད་བཞིན་འདུག
འབའ་རྫོང་མགར་རྩེ་རྒྱལ་མོ་རྫོང་གི་ཡུལ་མི་ཞིག་གིས་དེ་རིང་འདི་གར་ཡུལ་དངོས་ཀྱི་གནས་ཚུལ་ངོ་སྤྲོད་གནང་བར་ཕྱི་ལོ་ ༢༠༡༡ ལོ་ནས་བཟུང་རྒྱལ་ཁབ་ཀྱི་བཀས་བཀོད་ལྟར་འབྲོག་ཁུལ་གྱི་རྩྭ་ས་ཚང་མ་རིན་མེད་ཀྱིས་ལྕགས་ར་སྐོར་ཏེ་ཕྱུགས་ཟོག་འཚོ་སྐྱོང་ཉུང་འཕྲི་བྱེད་དགོས་པའི་སྲིད་བྱུས་གཏན་འབེབས་བྱས་པར་བརྟེན། ཞིང་འབྲོག་མང་ཚོགས་མང་པོ་གྲོང་བརྡལ་དུ་གནས་སྤོར་བྱས་ཡོད་པ་དང་སྔོན་ཆད་རྩེད་དགའ་དང་འདུ་འཛི་ཆེ་བའི་འབྲོག་ཐང་དུ་ད་ལྟའི་ཆར་རྒན་རྒོན་འགའ་ལས་ལྷག་མེད་པར་མ་ཟད། འབྲོག་ཁུལ་གྱི་རིག་གཞུང་དང་སྔོན་ཆད་ཀྱི་འབྲེལ་འདྲིས་དེ་ཛ་དྲག་ཅན་དུ་གྱུར་ཡོད་པར་ངོ་སྤྲོད་གནང་སོང་།
དེ་བཞིན་རྒྱ་ནག་གིས་འབྲོག་ཁུལ་གྱི་རྩ་སར་བདག་བཟུང་བྱས་ནས་མ་འོངས་པར་གཏེར་ཁ་སྔོག་འདོན་བྱེད་རྩིས་དང་འབྲོག་པ་མང་ཚོགས་ཀྱི་མི་རིགས་ཀྱི་བསམ་བློར་བསྒྱུར་བཅོས་གཏོང་རྒྱུའི་དམིགས་ཡུལ་ཡོད་པར་བརྗོད་དེ་རྩྭ་ས་སྲུང་སྐྱོབ་ཀྱི་སྲིད་བྱུས་རྒྱབ་ལ་རྣོ་ངར་ལྡན་པའི་རལ་གྲི་ཞིག་སྦས་ཡོད་པ་རེད་ཅེས་ངོ་སྤྲོད་གནང་ཡོད།
རྩ་བའི་ཕྱི་ལོ་ ༢༠༠༣ ལོ་ནས་རྒྱ་ནག་གིས་བོད་ཁུལ་དུ་ཕྱུགས་སྐྱུར་རྩ་འདེབས་དང་འབྲོག་པ་གྲོང་བསྙེགས། དེ་བཞིན་ནུབ་རྒྱུད་གསར་གཏོད། ཁོར་ཡུག་སྲུང་སྐྱོབ་སོགས་ཀྱི་འབོད་སྒྲའི་འོག་འབྲོག་པ་མང་ཚོགས་ཀྱི་སྲོལ་རྒྱུན་གྱི་འཚོ་བའི་ལམ་ལུགས་ལ་བསྒྱུར་བཅོས་བཏང་སྟེ་རི་ལུང་ནས་གྲོང་བརྡལ་དུ་གནས་སྤོར་བྱེད་དགོས་པའི་སྲིད་བྱུས་ཤིག་གཏན་འབེབས་ཀྱིས་ལག་བསྟར་བྱེད་བཞིན་ཡོད་སྟབས། བོད་ཁུལ་གྱི་ཆོས་དང་རིག་གཞུང་། ཡུལ་སྲོལ་གོམས་གཤིས་དང་བཅས་ལ་ཉམས་ཉེས་ཆེན་པོ་འབྱུང་བཞིན་པའི་སྣང་ཚུལ་ས་ཕྱོགས་གང་སར་འབྱུང་བཞིན་ཡོད་པ་རེད།
གཞན་ཡང་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་འབྲོག་རི་གནས་སྤོའི་སྲིད་བྱུས་འདི་དུས་ནམ་ཞིག་ལ་འགོ་ཚུགས་ཤིང་ཡུལ་དངོས་ཀྱི་ཞིང་འབྲོག་མི་མང་ལ་ཤན་ཤུགས་ཅི་ཞིག་སྤྲད་ཡོད་སྐོར་བཅར་འདྲི་ཞུས་པར་ཁོང་གིས་རྒྱ་ནག་གིས་དམིགས་འབེན་གཙོ་བོ་ནི་ཞིང་འབྲོག་མང་ཚོགས་གནས་སྤོར་དུ་བཅུག་ནས་ཐོན་ཁུངས་སྐྱེལ་འདྲེན་དང་ཆུ་གློག་འཛུགས་སྐྲུན་སོགས་ཀྱིས་མཚོན་པའི་རྒྱ་ནག་རང་གི་ཁེ་ཕན་འབའ་ཞིག་གི་ཆེད་དུ་བོད་ཁུལ་གྱི་སྙི་མོ་རྫོང་དང་ཅོ་ནེ་ཁུལ། དེ་བཞིན་འཇོ་མདའ་རྫོང་སོགས་སུ་འབྲོག་པ་གནས་སྤོར་གྱིས་མཚོན་པའི་ས་གནས་མང་དག་ཅིག་བཙན་དབང་གིས་གནས་སྤོར་བྱེད་དུ་བཅུག་ཡོད་སྟབས། ཞིང་འབྲོག་མི་མང་གི་མིག་སྔའི་འཚོ་གནས་ལ་དཀའ་ངལ་ཆེས་ཆེར་འཕྲད་བཞིན་ཡོད་པར་ངོ་སྤྲོད་གནང་ཡོད།
