འདི་ལོ་བོད་ཀྱི་གློག་བརྙན་དུས་ཆེན་ཐེངས་ ༧ གློག་བརྙན་འགྲན་བསྡུར་ནང་རྒྱ་གར་བྱང་ཕྱོགས་རཱཇ་པུར་ནས་ཡིན་པའི་གྲྭ་ཀུན་དགའ་རིན་ཆེན་ལགས་ཀྱིས་བཟོ་སྐྲུན་གནང་པའི་གློག་བརྙན་བག་ལེབ་ཕྱེད་ཀ་ཞེས་པར་ཨང་དང་པོའི་
བྱ་དགའ་ཐོབ་སོང་།
དེ་ཡང་ལོ་ལྟར་བོད་ཀྱི་རློག་བརྙན་དུས་སྟོན་ཐོག་བོད་ཕྱི་ནང་གཉིས་ནས་བཟོ་སྐྲུན་གནང་པའི་བོད་ཀྱི་གློག་བརྙན་ཁག་ཅིག་གཟིགས་འཕུལ་ཞུས་པ་ཙམ་མ་ཡིན་པར། བོད་རིགས་ན་གཞོན་རྣམས་ལ་གློག་བརྙན་བཟོ་སྐྲུན་དང་འབྲེལ་བའི་དོ་དབྱིངས་འཕར་མ་བསྐྲུན་ཐབས་སུ་བརྗོད་གཞི་འདྲ་མིན་ཐོག་སྐར་མ་ལྔ་ཅན་གྱི་གློག་ཐུང་ངུ་འགྲན་བསྡུར་ཞིག་ཀྱང་གནང་སྲོལ་ཡོད་པ་ལྟར། འདི་ལོ་ ༢༠༡༦ ལོའི་བོད་ཀྱི་གློག་བརྙན་དུས་ཆེན་གྱི་གློག་བརྙན་འགྲན་བསྡུར་དེ་ Food འམ་ཁ་ཟས་ཞེས་པའི་བརྗོད་གཞིའི་ཐོག་གནང་ཡོད་པ་མ་ཟད། འགྲན་བསྡུར་དེའི་ནང་ཁྱོན་བསྡོམས་གློག་བརྙན་འདྲ་མིན་ཁག་བདུན་ནས་མཉམ་ཞུགས་གནང་ཡོད་པ་རེད།
འགྲན་བསྡུ་དེའི་ཁྲོད་གྲྭ་ཀུན་དགའ་རིན་ཆེན་ལགས་ཀྱིས་བཟོ་སྐྲུན་གནང་པའི་གློག་བརྙན་བག་ལེབ་ཕྱེད་ཀ་ཞེ
ས་པ་དེར་ཨང་དང་པོའི་བྱ་དགའ་ཐོབ་སྟབས། འདི་ག་རླུང་འཕྲིན་ཁང་གི་གསར་འགོད་པས་ཁོང་ལ་གློག་བརྙན་དང་འབྲེལ་བའི་བཅར་འདྲི་ཞུས་པར་ཁོང་གིས་བག་ལེབ་ཕྱེད་ཀ་ཞེས་པའི་གློག་བརྙན་དེ་ནི་ཆོས་ཕྱོགས་ནས་གསུང་པའི་སྦྱིན་པ་དང་འབྲེལ་ཏེ་བཟོ་སྐྲུན་གནང་པ་ཞིག་ཡིན་པ་དང་། ལྷག་དོན་ང་ཚོས་རྣམ་ཀུན་ཁ་ཟས་གང་བཟའ་རུང་ཀུན་སློང་བཟང་པོའི་ཐོག་ནས་སྤྱོད་དགོས་གལ་ཡིན་པ་མངོན་གསལ་གནང་འདུག་པ་མ་ཟད། མ་འོངས་པར་ཁོང་གིས་མུ་མཐུད་ཐུན་མོང་མ་ཡིན་པའི་ཆོས་ཀྱི་བསླབ་བྱ་རྣམས་གློག་བརྙན་བརྒྱུད་གཟིགས་འབུལ་ཞུ་རྒྱུ་འཆར་གཞི་ཡོད་སྐོར་ཡང་གསུངས་སོང་།
གཞི་རྩའི་ད་རེས་ཀྱི་འགྲན་བསྡུར་དེའི་ཐོག་ཨང་དང་པོ་སོན་མཁན་ལ་ཨ་སྒོར་ $ ༥༠༠ དང་། ཨང་གཉིས་པར་ཨ་སྒོར་ $ ༣༠༠ དེ་བཞིན་ཨང་གསུམ་པ་ལ་ཨ་སྒོར་ $ ༢༠༠ བཅས་ཀྱི་བྱ་དགའ་དང་ལྷན་སུད་སིར་བཅར་བཞུགས་བོད་རིགས་སྒྱུ་རྩལ་བ་ཐུབ་བསྟན་ལགས་ཀྱིས་འབུར་བརྐོས་གནང་པའི་གཡག་གཟུགས་གཅིག་རེ་གནང་འདུག་པ་མ་ཟད། མང་ཚོགས་ནས་དགའ་མོས་ཆེ་ཤོས་གནང་བའི་གློག་བརྙན་མོག་མོག་
ཞེས་པར་ཨ་སྒོར་ $ ༢༠༠ ཐམ་པའི་བྱ་དགའ་ཞིག་ཀྱང་གནང་ཡོད་པ་རེད།
སྤྱིར་དེ་སྔའི་གློག་བརྙན་དུས་སྟོན་འགྲན་བསྡུར་གནང་སྟངས་དང་བསྡུར་ན་འདི་ལོའི་གློག་བརྙན་འགྲན་བཞུགས་གནང་མཁན་ཉུང་བ་ཆགས་ཡོད་སྟབས་གོ་སྒྲིག་གནང་མཁན་ཁོངས་ནས་དབང་པོ་བཀྲས་མཐོང་ལགས་སུ་དེ་འབྲེལ་བཅར་འདྲི་ཞུས་པར་ཁོང་གིས་བོད་པའི་གཞོན་སྐྱེས་ཁྲོད་གློག་བརྙན་བཟོ་བསྐྲུན་གནང་ཕྱོགས་ལ་དོ་སྣང་རྒྱ་ཆེ་ཡོང་བར་བོད་སློབ་ཁག་ཏུ་གློག་བརྙན་བཟོ་བསྐྲུན་གྱི་ཟབ་ཁྲིད་གནང་གལ་ཡིན་པ་གསུངས་སོང་།
རྩ་བའི་ད་རེས་ཀྱི་གློག་བརྙན་འགྲན་བསྡུར་དེའི་ཁྲོད་སུད་སི་ནས་ཡིན་པའི་བོད་ཕག་ལགས་ཀྱིས་བཟོས་པའི་གློག་བརྙན་སི་པན་ཞེས་པར་ཨང་གཉིས་པ་དང་། རྡོ་རྗེ་གླིང་ནས་ཡིན་པའི་བུ་མོ་བདེ་ཆེན་ལགས་ཀྱིས་བཟོས་པའི་གློག་བརྙན་ Sweet Hunger ཞེས་པར་ཨང་གསུམ་པ་བཅས་ཀྱི་བྱ་དགའ་ཐོབ་འདུག
