གསར་འགྱུར།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་དང་མ་ཐུ་རའི་མཛད་འཆར་ཁག་ལེགས་གྲུབ་ཀྱིས་དེ་རིང་ཟླ་ ༩ ཚེས་ ༢༦ ཉིན་ཞོགས་པ་རྒྱལ་ས་ལྡི་ལི་ནས་མཁའ་ལམ་བརྒྱུད་གྷ་གྷལ་གནམ་ཐུང་དུ་ཆིབས་བསྒྱུར་མཛད་རྒྱུ་ཡིན་ཀྱང་། གནམ་ཤིས་རྐྱེན་པས་པན་ཇཱབ་ཀྱི་རྒྱལ་ས་ Amritsar གནམ་ཐང་དུ་ཆིབས་བསྒྱུར་དགོས་བྱུང་ཡོད་པ་དང་། Amritsar ནས་བཞུགས་སྒར་བར་དུ་ཆིབས་གྲུའི་བརྒྱུད་ཆིབས་བསྒྱུར་མཛད་ནས་ཉིན་དགུང་ཚོུད་ ༢༌༣༠ ཡོལ་ཙམ་ལ་བཞུགས་སྒར་དུ་༸ཞབས་སོར་བདེ་བར་འཁོད་སོང་། མགོན་པོ་༸གང་ཉིད་མཆོག་གི་གཟའ་འཁོར་གཅིག་ལྷག་གི་མཛད་འཕྲིན་བསྐྱངས་པའི་ཁྲོད་ཕྱི་ཚེས་ ༢༠ ཉིན་ལྡི་ལིར་རྟེན་གཞི་བྱས་པའི་ཤྲི་རཱམ་སློབ་གྲྭར་ Spic Macay མཛད་སྒོའི་ཐོག་སློབ་ཁག་མི་འདྲ་བ་ ༥༠ ནས་ཁྱོན་དགེ་སློབ་གྲངས་ ༢༣༠༠ ཙམ་ལ་སེམས་བཅོས་ཐབས་ཀྱི་ཤེས་ཡོན་ཐོག་བཀའ་སློབ་བསྩལ་ཡོད་པ་དང་། སྐབས་དེར་མགོན་པོ་མཆོག་གིས་༸སྐུ་ཉིད་མཆོག་གི་ཐུགས་བསྐྱེད་དམ་བཅའ་གཉིས་པ་དང་ཐུགས་བསྐྱེད་དམ་བཅའ་བཞི་པ་དང་འབྲེལ་ནས་རྒྱ་གར་འདི་མི་རིགས་སྣ་མང་དང་ཚོས་ལུགས་སྣ་མང་། སྐད་ཡིག་སྣ་མང་འཛོམས་པའི་རྒྱལ་ཁབ་ཅིག་ཡིན་ནའང་ཆོས་ལུགས་མཐུན་སྒྲིལ་དེ་བཞིན་རྒྱལ་ཁབ་གཞན་རྣམས་ལ་མིག་ལྟོས་འོས་པ་ཞིག་ཡིན་སྟབས། རྒྱ་གར་གྱི་ངོས་ནས་རྒྱལ་ཁབ་གཞན་ཚོར་ཆོས་ལུགས་མཐུན་སྒྲིལ་ཡོང་རྒྱུ་ཡོད་པའི་བརྡ་ལན་སྤྲོད་དགོས་པ་དང་། རྒྱ་གར་གྱི་གནའ་བོའི་རིག་གནས་ཏེ་ལོ་ངོ་ ༣༠༠༠ ལྷག་གི་ལོ་རྒྱུས་ལྡན་པའི་འཚེ་མེད་ཞི་བ་དང་སྙིང་རྗེ་གཞིར་བཞག་པའི་ལྟ་གྲུབ་ལ་སོགས་པའི་ཁོང་ཁྲོའི་གཉེན་པོ་བསྟན་ཕྱོགས་ཀྱི་སྐོར་ལ་གསུངས་ཡོད་པ་དེ་དག་གཞོན་སྐྱེས་ཚོས་འཛམ་གླིང་སྤྱིར་ཁྱབ་སྤེལ་བྱེད་དགོས་ཞེས་ལམ་སྟོན་མཛད་ཡོད་པ་རེད། དེ་བཞིན་ཕྱི་ཚེས་ ༢༡ ཉིན་༸གང་ཉིད་མཆོག་གི་བཞུགས་གནས་ཏཱཇ་གསོལ་མགྲོན་ཁང་དུ་གསོལ་མགྲོན་ཁང་དེས་གོ་སྒྲིག་འོག་ཕྱི་རྒྱལ་གཞུང་ཚབ་ཁག་གི་མི་སྣ་དང་། བརྒྱུད་ལམ་ཁག་གི་ལས་བྱེད། མཁས་དབང་།  ཤེས་ལྡན་མི་སྣ། དེ་བཞིན་ཚོང་པ་སྙན་གྲགས་ཅན་སོགས་ཁྱོན་མི་གྲངས་ ༡༥༠ ཙམ་ཞིག་ལ་མགོན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་བཀའ་སློབ་བསྩལ་ཡོད་པ་རེད། དེ་ནས་ཕྱི་ཚེས་ ༢༢ ཉིན་རྒྱ་གར་ UP མངའ་ཁུལ་གྱི་མ་ཐུ་ར་ནང་གི་ Sri Udasin Karshni Ashram དུ་ཆིབས་བསྒྱུར་གྱིས་ Krishna ལྷ་ཁང་ལ་གནས་གཟིགས་མཛད་པ་དང་སྦྲགས། ཧིན་དུའི་རྗེས་འབྲང་པ་ཚོས་རིག་བྱེད་ཀྱི་ཆོ་ག་འདོན་བཞིན་རྒྱ་གར་གྱི་གནའ་བོ་ལམ་སྲོལ་ཐོག་ནས་གསོལ་ཞོ་དང་ཆབ་ཞོ། གསོལ་མར་དང་གུར་ཀུམ་སོགས་ཀྱིས་ཞབས་བསིལ་ནས་རྒྱ་གར་ཧིན་དུའི་དགེ་སློང་དག་ལ་རྒྱ་གར་གྱི་ལེགས་སྦྱར་གྱི་སྐད་དེ་འཛམ་གླིང་རྒྱལ་སྤྱིའི་གནའ་བོའི་རིག་གནས་ཀྱི་ཁོངས་སུ་མདུན་དུ་སྐྱོད་མཁན་གྱི་ངོ་མཚར་ཅན་གྱི་གནའ་བོའི་རིག་གནས་ཤིག་ཡིན་པ་བཀའ་བསྩལ་ཡོད་པ་མ་ཟད། ཕྱི་ཉིན་དེར་ཧིན་དུའི་བླ་ཆེན་གཙོས་བླ་ཆེན་གཞན་ཁག་གཅིག་དང་ལྷན་དུ་ཕྱག་ཚོད་ཕྱེད་ཀ་ཙམ་གྱི་རིང་ལ་སྒོམ་སྒྲུབ་མཛད་པ་དང་། དེ་ནས་མཚམས་ཁང་གི་ཉེ་འཁྲིས་སུ་ཆགས་པའི་ཡ་མུ་ན་གཙང་པོའི་ཉེ་འདབས་སུ་ལ་མེའི་མཆོད་པ་དང་། ཁུལ་དེའི་ཚོགས་ཁང་ཞིག་གི་ནང་གསར་འགོད་པ་དང་མང་ཚོགས་ལ་བཀའ་སློབ་བསྩལ་ཡོད་པ་མ་ཟད། ཉིནརྒྱབ་ཏུ་ཧིན་དུའི་བླ་ཆེན་ཁག་གཅིག་དང་ལྷན་དུ་མཇལ་མོལ་ཡང་མཛད་ཡོད་པ་རེད། ཕྱོགས་མཚུངས་ཁ་སང་ཚེས་ ༢༥ ཉིན་རྒྱལ་ས་ལྡི་ལི་རྙིང་པར་རྟེན་གཞི་བྱས་པའི་གཱན་དྷཱི་མཚམས་ཁང་དུ་རྒྱ་གར་གྱི་མེས་པོ་དམ་པ་གཱན་དྷཱི་མཆོག་སྐུ་འཁྲུངས་ནས་མི་ལོ་ ༡༥༠ འཁོར་བའི་རྗེས་དྲན་དང་བསྟུན། Harijan Sevak Sangh དང་ Global Interfaith WASH Alliance ཞེས་པའི་ཚོགས་ཀྱིས་གོ་སྒྲིག་འོག་ཆོས་ལུགས་རིས་མེད་ཀྱི་ལྷན་ཚོགས་ཐོག་དབུ་བཞུགས་མཛད་ཡོད་པ་དང་། སྐབས་དེར་མགོན་པོ་མཆོག་གིས་ཆོས་ལུགས་ཚང་མས་གཅིག་མཚུངས་སུ་འདོད་པའི་བྱམས་པ་དང་སྙིང་རྗེ་གོང་སྤེལ་གནང་གི་ཡོད་པ་དང་། དེང་གི་དུས་སུ་ཆོས་ལུགས་རྐྱེན་པས་མི་གསོད་ཁྲག་སྦྱོར་གྱི་གནད་དོན་མང་དག་ཅིག་འབྱུང་བཞིན་པ་ནི་ཡིད་སྐྱོ་དགོས་པའི་གནད་དོན་ཞིག་ཡིན་པ་བཀའ་བསྩལ་བ་དང་འབྲེལ། རྒྱ་གར་འདི་ལོ་ངོ་ ༢༠༠༠ གི་གོང་ནས་ཆོས་ལུགས་སྣ་མང་འཛོམས་པའི་རྒྱལ་ཁབ་ཅིག་དང་། ལོ་ངོ་ ༣༠༠༠ གི་གོང་ནས་གྲངས་ཅན་པའི་ལྟ་གྲུབ་དེ་དར་ཟིན་པ་ཞིག་ཡིན་པ་དང་། ལྟ་གྲུབ་དེའི་ནང་གི་བརྡ་ལན་གཙོ་བོ་ནི་འཚེ་བ་མེད་པའི་ལྟ་གྲུབ་དང་སྙིང་རྗེ་གཞིར་ལ་བཞག་པའི་ལྟ་གྲུབ་དེ་གསུང་གི་ཡོད་སྟབས། རྒྱ་གར་གི་ངོས་ནས་རང་ཉིད་ལ་མངའ་བའི་ཆོས་ལུགས་མཐུན་སྒྲིལ་དེ་བདག་གཉེར་གནང་རྒྱུ་ཙམ་མིན་པར་འཛམ་བུ་གླིང་སྤྱི་ལ་རང་ཉིད་དཔེ་མཚོན་དུ་བཞག་ནས་ཆོས་ལུགས་མཐུན་སྒྲིལ་ཡོང་རྒྱུ་ཡོད་པའི་བརྡ་ལན་ཞིག་སྤྲོད་དགོས་པ་བཀའ་བསྩལ་བ་མ་ཟད་ཁོར་ཡུག་སྲུང་སྐྱོབ་དང་འབྲེལ་ནས་གོ་ལ་འདི་ནི་ང་ཚོའི་ཁྱིམ་ཚང་གཅིག་པོ་དེ་ཡིན་སྟབས་ནམ་ཞིག་ཁང་པ་དེ་མེར་ཤོར་ཚེ་ང་ཚོ་འགྲོ་ས་དང་སྡོད་ས་མེད་པར་ལུས་ངེས་ཡིན་པས་ཁོར་ཡུག་བདག་གཉེར་བྱ་རྒྱུའི་མཚོན་པས་ཆུ་འབགས་བཙོག་མི་བཟོ་བར་ཤིང་སྣ་འདེམས་འཛུགས་གནང་དགོས་གལ་ཡིན་པའི་ལམ་སྟོན་བསྩལ་ཡོད་པ་རེད།

ཁ་སང་སྤྱི་ཟླ་དགུ་བའི་ཚེས་ཉེར་ལྔའི་ཉིན་གྱི་ཞོགས་པའི་ཆུ་ཚོད་དྲུག་པའི་ཐོ་རངས་ཙམ་ལ། བོད་མདོ་སྨད་རེབ་ཀོང་རོང་བོ་དགོན་ཆེན་གྱི་དྲུང་ཡིག་བླ་བྲང་ལ་མེ་སྐྱོན་བྱུང་ནས་གྲྭ་ཕྲུག་གཉིས་དང་མི་སྐྱ་གཉིས་མེ་སྐྱོན་གྱི་དོན་རྐྱེན་གྱི་ཁྲོད་ནས་འདས་གྲོངས་སུ་ཕྱིན་ཡོད་འདུག   ད་ལྟའི་ཆར་གློག་ལམ་ལ་སྐྱོན་ཤོར་ནས་མེ་སྐྱོན་བྱུང་ཡོད་པར་དོགས་པ་བྱེད་བཞིན་པ་ལས་རྒྱུ་རྐྱེན་གསལ་བོ་ཤེས་རྟོགས་བྱུང་མི་འདུག ཐེངས་འདིའི་མེ་སྐྱོན་དང་འབྲེལ་ནས་རེབ་ཀོང་རོང་བོ་དགོན་ནས་ཡིན་པའི་མདོ་སྨད་ཀྱི་སྤྱི་ཟུར།  དགེ་བཤེས་རོང་བོ་བློ་བཟང་སྙན་གྲགས་ལགས་སུ་བཀའ་འདྲི་ཞུར་པར་ཁོང་གིས། ཐེངས་འདིའི་མེ་སྐྱོན་བྱུང་ས་དེ་དགོན་པའི་འདུ་ཁང་སོགས་མ་ཡིན་པར་དྲུང་ཡིག་བླ་བྲང་ཞིག་ཡིན་པ་དང་། དྲུང་ཡིག་བླ་བྲང་དེ་དུས་འགྱུར་གྱི་ཁྲོད་དུ་ལྷག་ཡོད་པའི་གནའ་ཤུལ་ཞིག་ཡིན་པར་ངོ་སྤྲོད་ཀྱིས།  མེ་སྐྱོན་གྱི་ཁྲོད་ནས་མི་བཞི་འདས་གྲོངས་སུ་ཕྱིན་ཡོད་པར་གསུངས་སོང་། དེ་བཞིན་ཐེངས་འདིའི་མེ་སྐྱོན་གྱི་ཁྲོད་དུ་དངུལ་དངོས་ཀྱི་གྱོང་གུད་ག་ཚད་ཅིག་ཐེབས་ཡོད་པར་བཀའ་འདྲི་ཞུས་པར་ཁོང་གིས།  རྩ་བའི་བླ་བྲང་དེ་རིག་གནས་གསར་བརྗེ་ཡི་ཤུལ་དུ་ལས་ཡོད་པའི་དགོན་རྙིང་ཞིག་ཡིན་པར་བརྟེན་རིན་ཐང་ཆེན་པོ་ཡིན་པ་དང་། དེ་བཞིན་ཉ་ཆར་རང་བླ་བྲང་དེར་ཞིག་གསོ་བྱས་ཏེ་བསྐྱར་བཞེངས་བྱས་སྟབས་འགྲོ་སོང་ཆེན་པོ་བཏང་ཡོད་པ་སོགས་ཀྱི་ཐད་ནས་ངོ་སྤྲོད་ཞུས་སོང་། རྩ་བའི་རོང་བོ་དགོན་པ་ནི་སྤྱི་ལོ་ ༡༣༤༢ ལོར་རོང་བོ་བླ་མ་བསམ་གཏན་རིན་ཆེན་གྱིས་ཐོག་མར་ཕྱག་བཏབ་པ་ཞིག་ཡིན་པ་དང་།  རྗེས་སུ་གྲུབ་ཆེན་སྐལ་ལྡན་རྒྱ་མཚོ་མཆོག་བོད་དབུས་ཁུལ་དུ་ཕེབས་ནས་སློབ་སྦྱོང་གནང་སྟེ་ཕྱིར་རེབ་ཀོང་དུ་ཕེབས་པ་དང་བསྟུན། སྥྱི་ལོ་ ༡༦༣༠ ལོར་རོང་བོ་དགོན་དུ་ཐོས་བསམ་རྣམ་པར་རྒྱལ་བའི་གྲྭ་ཚང་བཙུགས་ཏེ་གྲྭ་མང་གིས་བསླབ་པ་སློབ་གཉེར་འགོ་ཚུགས་འདུག   རིག་གནས་གསར་བརྗེ་ཡི་སྐབས་སུ་བོད་ཁུལ་གྱི་དགོན་པ་སྤྱི་ལྟར་རོང་བོ་དགོན་ཆེན་དུ་ཡང་གཏོར་བཤིག་ཆེན་པོ་ཐེབས་ཡོད་ནའང་།    རྗེས་སུ་རྒྱ་ནག་གིས་ཆོས་སྒོ་ཏོག་ཙམ་ཕྱེས་མཚམས་སུ་རོང་བོ་སྐྱབས་མགོན་སྐུ་ཕྲེང་བརྒྱད་པའི་འགོ་ཁྲིད་པའི་ཐོག་དགོན་མ་ལག་ཡོངས་སུ་བསྐྱར་བཞེངས་བྱས་ཏེ།   མདོ་སྨད་ཀྱི་ཕྱོགས་སུ་བསླབ་པ་སློབ་གཉེར་བྱེད་སའི་ལྟེ་གནས་གལ་ཆེན་ཞིག་ཆགས་པ་མ་ཟད།  ཡོངས་གྲགས་སུ་རེབ་ཀོང་རིག་པ་འབྱུང་བའི་གྲོང་ཁྱེར་ཞེས་འབོད་པའི་རྩ་བ་ཡང་དོན་དུ་རོང་བོ་དགོན་ཆེན་གྱི་བསླབ་པ་སློབ་གཉེར་ལ་རྟེན་ནས་བཏགས་པ་ཞིག་རེད་འདུག

རིང་མིན་ཕྱི་ཟླ་བཅུ་པའི་ཚེས་ ༡ ཉིན་རྒྱ་ནག་ཁྱོན་ཡོངས་སུ་རྒྱ་ནག་རྒྱལ་ཡོངས་ཉིན་མོ་ཞེས་རྒྱ་ནག་དམར་ཤོག་ཚོགས་པ་གསར་འཛུགས་བྱས་ཏེ་ལོ་ངོ་ ༧༠ འཁོར་བའི་ཉིན་མོ་སྲུང་བརྩི་ཞུ་འཆར་དང་བསྟུན། འདས་པའི་ཉིན་ཤས་ཁྲོད་རྒྱ་ནག་གཞུང་ནས་བོད་ཀྱི་དགོན་སྡེ་ཁག་ལ་དེ་འབྲེལ་བྱེད་སྒོ་ཁག་ཅིག་སྤེལ་བཞིན་འདུག དེ་ཡང་དེ་རིང་རྒྱ་ནག་གཞུང་འབྲེལ་གྱི་གསར་ཁང་ Global Times ཐོག་གནས་ཚུལ་སྤེལ་བར་གཞིགས་ན། རྒྱ་ནག་གཞུང་ནས་བོད་རང་སྐྱོང་ལྗོངས་གཙོས་པའི་བོད་ཀྱི་ས་ཁུལ་ཁག་ཏུ་ཡོད་པའི་དགོན་སྡེ་གྲ་ཚང་ཁག་གི་སྐུ་ཚབ་འདུ་སྐོང་ཐོག་འདས་པའི་ལོ་བདུན་ཅུའི་ནང་རྒྱ་ནག་དམར་ཤོག་གི་བཀའ་དྲིན་འོག་ནང་པའི་ཆོས་ལ་ཕན་ཐོག་བྱུང་ཡོད་སྐོར་དང་། མ་འོངས་རྒྱ་ནག་གི་ནང་ཆོས་ཡར་རྒྱས་གཏང་ཕྱོགས་སོགས་ཀྱི་ཐོག་ལ་བགྲོ་གླེང་གོ་སྒྲིག་ཞུས་ཡོད་པ་དང་། ལྷག་པར་དུ་བོད་ཁུལ་གྱི་དགོན་སྡེ་གྲ་ཚང་ཁག་ཅིག་ཏུ་རྒྱ་ནག་གི་རྒྱལ་དར་འཕྱར་ཏེ་རྒྱ་ནག་དམར་ཤོག་ཚོགས་པའི་རྒྱལ་གླུ་གཏོང་བཅུག་པ་སོགས་ཀྱི་བྱེད་སྒོ་སྤེལ་འདུག འདི་ག་རླུང་འཕྲིན་ཁང་ནས་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་འགན་འཛིན་ཚེ་རིང་མཚོ་མོ་ལགས་སུ་དེ་འབྲེལ་བཅར་འདྲི་ཁག་ཅིག་ཞུས་སྐབས། རྒྱ་གཞུང་གི་བྱེད་སྒོ་དེ་དག་བོད་མིའི་ཐུན་མོངས་མ་ཡིན་པའི་ངོ་བོ་དང་། མི་མང་གི་བློ་ཁ་རྣམས་རྒྱ་རིགས་ཀྱི་ངོ་བོ་དང་འདུ་ཤེས་ཅན་དུ་འགྱུར་རྒྱུའི་བྱ་ཐབས་ཤིག་ཡིན་པ་དང་། ལྷག་པར་དུ་དགོན་སྡེ་ཁག་ཏུ་བྱེད་སྒོ་སྤེལ་བཞིན་པ་དེ་ནི་ཞི་ཅིང་ཕིང་གི་འདས་པའི་ལོ་ཤས་ནས་ཆོས་ལུགས་ཚང་མ་རྒྱ་ནག་གི་ཁྱད་ཆོས་ལྡན་པ་བཟོ་དགོས་ཞེས་བརྗོད་པའི་སྲིད་བྱུས་དང་འབྲེལ་བ་ཡོད་པ་ཞིག་ཀྱང་རེད་ཅེས་གསུངས་སོང་། རྒྱ་ནག་རྒྱལ་ཡོངས་ཉིན་མོ་སྲུང་བརྩི་ཞུ་རྒྱུའི་ལས་གཞི་དང་འབྲེལ་བོད་ཀྱི་རྒྱལ་ས་ལྷ་སའི་ཇོ་ཁང་གི་རྒྱལ་སྒོའི་ཐོག་རླབས་ཆེན་གྱི་ཀྲུང་གོ་གུང་ཁྲན་ཏང་ཁྲི་ལོར་བརྟན་པ་ཤོག་ཞེས་འཁོད་པའི་འཕྲེད་དར་སྦྱར་བ་དང་། བོད་ཆབ་མདོ་བྱམས་པ་གླིང་དགོན་དུ་དགེ་འདུན་པ་རྣམས་གར་ཆམ་འཁྲབ་བཅུག་པ་དང་། རྒྱ་ནག་གི་རྒྱལ་གླུ་བླངས་བཅུག་པ་སོགས་ཀྱི་བརྙན་པར་ཁག་ཅིག་སྤྱི་ཚོགས་དྲ་ལམ་ Tweeter དང་ Instagram ཐོག་དངོས་སུ་མཇལ་རྒྱུ་འདུག གཞི་རྩའི་རྒྱ་ནག་གཞུང་ནས་རྒྱ་ནག་དམར་ཤོག་ཚོགས་པ་གསར་འཛུགས་བྱས་ཏེ་ལོ་ངོ་ ༧༠ འཁོར་བའི་ཉིན་མོ་སྲུང་བརྩི་དང་འབྲེལ་བོད་ནང་ཙམ་མ་ཟད། ཉེ་འཆར་རེས་གཟའ་ཉི་མའི་ཉིན་རྒྱ་ནག་ཁྱོན་ཡོངས་སུ་ཡོད་པའི་ཡི་ཤུའི་ཆོས་ལུགས་རྗེས་འབྲངས་པ་དང་། ཁ་ཆེའི་ཆོས་དད་པ་ས་ཡ་ལྷག་འདུ་སྐོང་ཐོག་རྒྱ་ནག་གི་རྒྱལ་དར་འཕྱར་ཏེ་རྒྱ་ནག་དམར་ཤོག་ཚོགས་པའི་རྒྱལ་གླུ་བླངས་བཅུག་པ་མ་ཟད། རྒྱ་ནག་གཞུང་ནས་རྒྱ་ནག་ནང་ཡོད་པའི་ཆོས་ལུགས་ཚང་མར་གཅིག་མཚུངས་ཀྱི་རྒྱབ་སྐྱོར་བྱེད་བཞིན་པ་སོགས་ཀྱི་གཏམ་བཤད་ཀྱང་བྱས་ཡོད།

དེ་རིང་ཟླ་ ༩ ཚེས་ ༢༥ ཉིན་གྱི་ཞོགས་པ་ཕྱག་ཚོད་ ༩༌༣༠ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ས་ལྡི་ལི་རྙིང་པར་རྟེན་གཞི་བྱས་པའི་གཱན་དྷཱི་མཚམས་ཁང་དུ་རྒྱ་གར་གྱི་མེས་པོ་དམ་པ་གཱན་དྷཱི་མཆོག་སྐུ་འཁྲུངས་ནས་མི་ལོ་ ༡༥༠ འཁོར་བའི་རྗེས་དྲན་དང་བསྟུན། Harijan Sevak Sangh དང་ Global Interfaith WASH Alliance ཞེས་པའི་ཆོས་ཚོགས་ཀྱིས་གོ་སྒྲིག་འོག་ཆོས་ལུགས་རིས་མེད་ཀྱི་ལྷན་ཚོགས་ཐོག་དབུ་བཞུགས་མཛད་སོང་། ལྷན་ཚོགས་ཐོག་ཐོག་སྐུ་མགྲོན་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་གཙོས་པའི་ཧིན་དུའི་བླ་ཆེན་ Swami Ramdev དང་ Morari Bapu བླ་ཆེན་ Chidanand Saraswati  ཨ་རི་འཚར་ལོངས་བྱུང་བའི་ཧིན་དུའི་བཙུན་མ་ Sadhvi Bhagawati Saraswati ཁ་ཆེའི་ཆོས་དཔོན་ Maulana Mahmood Madani དེ་བཞིན་ཡེ་ཤུའི་ཆོས་དཔོན་སོགས་ལྷན་འཛོམས་གནང་སོང་། སྐབས་དེར་མགོན་པོ་༸གང་ཉིད་མཆོག་ནས་དེ་རིང་གྱི་ལྷན་ཚོགས་སུ་ཆེད་ཕེབས་གནང་བའི་ཆོས་ལུགས་ཁག་གི་ཆོས་དཔོན་ཚོར་འཚམས་འདྲི་བསྩལ་བ་དང་སྦྲགས། ཆོས་ལུགས་ཚང་མས་གཅིག་མཚུངས་སུ་འདོད་པའི་བྱམས་པ་དང་སྙིང་རྗེ་གོང་སྤེལ་གནང་གི་ཡོད་པ་དང་། དེང་གི་དུས་སུ་ཆོས་ལུགས་རྐྱེན་པས་མི་གསོད་ཁྲག་སྦྱོར་གྱི་གནད་དོན་མང་དག་ཅིག་འབྱུང་བཞིན་པ་ནི་ཡིད་སྐྱོ་དགོས་པའི་གནད་དོན་ཞིག་ཡིན་པ་བཀའ་བསྩལ་བ་དང་འབྲེལ། རྒྱ་གར་འདི་ལོ་ངོ་ ༢༠༠༠ གི་གོང་ནས་ཆོས་ལུགས་སྣ་མང་འཛོམས་པའི་རྒྱལ་ཁབ་ཅིག་དང་། ལོ་ངོ་ ༣༠༠༠ གི་གོང་ནས་གྲངས་ཅན་པའི་ལྟ་གྲུབ་དེ་དར་ཟིན་པ་ཞིག་ཡིན་པ་དང་། ལྟ་གྲུབ་དེའི་ནང་གི་བརྡ་ལན་གཙོ་བོ་ནི་འཚེ་བ་མེད་པའི་ལྟ་གྲུབ་དང་སྙིང་རྗེ་གཞིར་ལ་བཞག་པའི་ལྟ་གྲུབ་དེ་གསུང་གི་ཡོད་སྟབས། རྒྱ་གར་གི་ངོས་ནས་རང་ཉིད་ལ་མངའ་བའི་ཆོས་ལུགས་མཐུན་སྒྲིལ་དེ་བདག་གཉེར་གནང་རྒྱུ་ཙམ་མིན་པར་འཛམ་བུ་གླིང་སྤྱི་ལ་རང་ཉིད་དཔེ་མཚོན་དུ་བཞག་ནས་ཆོས་ལུགས་མཐུན་སྒྲིལ་ཡོང་རྒྱུ་ཡོད་པའི་བརྡ་ལན་ཞིག་སྤྲོད་དགོས་པ་བཀའ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་ཆོས་ལུགས་མི་འདྲ་བ་དང་ལྟ་གྲུབ་མི་འདྲ་བ་འབྱུང་བཞིན་པ་ནི་དགོས་ངེས་ཅན་ཞིག་ཡིན་པ་དང་། མགོན་པོ་༸གང་ཉིད་མཆོག་ནས་དུས་ནམ་ཡང་ནང་པའི་ཆོས་དེ་ཡག་ཤོས་ཤིག་རེད་ཅེས་བཀའ་བསྩལ་མཛད་ཀྱི་མེད་སྐོར་བཀའ་བསྩལ་བ་དང་ཆབས་ཅིག ཆོས་ལུགས་མི་འདྲ་བ་དང་ལྟ་གྲུབ་མི་འདྲ་བའི་དབང་གིས་འཁྲུག་རྩོད་རིགས་འབྱུང་བཞིན་པ་ནི་མཐའ་གཅིག་ཏུ་ནོར་འཁྲུལ་ཞིག་ཡིན་པར་ལམ་སྟོན་མཛད་ཡོད། མགོན་པོ་༸གང་ཉིད་མཆོག་གིས་འཛམ་གླིང་ནང་གྱི་མི་ཐེར་འབུམ་བདུན་པོའི་ཁོངས་སུ་ཐེར་འབུམ་གཅིག་ཙམ་ཆོས་ཁས་མི་ལེན་མཁན་ཆགས་ཀྱི་ཡོད་ཀྱང་ཁོང་རྣམས་འགྲོ་བ་མི་གཅིག་མཚུངས་ཡིན་པར་བཀའ་བསྩལ་དང་འབྲེལ་ཏེ་རྒྱ་གར་གྱི་གནའ་བོའི་རིག་གནས་སུ་ཡོད་པའི་ཆོས་ལུགས་ལ་མ་བརྟེན་པའི་བཟང་སྤྱོད་དམ་སེམས་བཅོས་ཐབས་ཀྱི་ཞི་གནས་དང་ལྷག་མཐོང་གི་ལྟ་གྲུབ་དེ་དག་ལོ་ངོ་ ༣༠༠༠ གོང་ནས་ཡོད་པ་ཞིག་ཡིན་སྟབས། དེ་ནི་སེམས་མ་རུང་བར་གཉེན་པོའི་ཐབས་ལམ་ཡག་ཤོས་ཤིག་ཡིན་པ་དང་། ལྟ་གྲུབ་དེ་དག་ཆོས་ལུགས་ཤིག་ནས་ཆས་པ་ཞིག་ཡིན་ནའང་རང་ཉིད་ཀྱི་སེམས་བཅོས་ཐབས་ཀྱི་བསླབ་གཞིར་བཟུང་ནས་ཆོས་ཁས་ལེན་མིན་གང་ཡིན་རུང་ལོ་ངོ་སྟོང་ཕྲག་ལྷག་སོང་བའི་རྒྱ་གར་གྱི་གནའ་བོའི་རིག་གནས་དེ་ཉེར་བར་མཁོ་བ་ཞིག་ཆགས་ཡོད་པ་བཀའ་བསྩལ་སོང་། དེ་བཞིན་མགོན་པོ་༸གང་ཉིད་མཆོག་གིས་གོ་ལའི་ཚ་དྲོད་འཕེལ་རྐྱེན་དཀའ་ངལ་ཇེ་མང་དུ་འགྲོ་བཞིན་པ་ནི་ཛ་དྲག་གྱི་གནད་དོན་ཞིག་དང་། གོ་ལ་འདི་ནི་ང་ཚོའི་ཁྱིམ་ཚང་གཅིག་པོ་དེ་ཡིན་སྟབས་ནམ་ཞིག་ཁང་པ་དེ་མེ་ལ་ཤོར་བ་ཡིན་ན་ང་ཚོ་འགྲོ་ས་དང་སྡོད་ས་མེད་ལུས་ངེས་ཡིན་པས་ཁོར་ཡུག་བདག་གཉེར་བྱ་རྒྱུའི་མཚོན་པས་ཆུ་འབགས་བཙོག་མི་བཟོ་བར་ཤིང་སྣ་གང་མང་འདེམས་འཛུགས་གནང་དགོས་གལ་ཡིན་པའི་ལམ་སྟོན་བསྩལ་བ་མ་ཟད། དེ་སྔ་མགོན་པོ་མཆོག་བོད་ལ་བཞུགས་སྐབས་འཐུང་ཆུ་འབགས་བཙོག་ཤོར་བ་ཞིག་གསན་མྱོང་མེད་ནའང་རྒྱ་གར་དུ་ཆིབས་བསྒྱུར་རྗེས་འཐུང་ཆུ་ལ་འབགས་བཙོག་ཤོར་བས་མཆོད་མི་ཆོག་པ་དང་གཙང་མ་མཆོད་དགོས་ཞེས་བཀའ་མོལ་གསན་པ་ནས་བཟུང་རང་བྱུང་ཁམས་ཀྱི་གནད་དོན་དེ་ཐུགས་རྒྱུས་བྱུང་སྐོར་བཀའ་བསྩལ་བ་དང་འབྲེལ། འགྲོ་བ་སྤྱིའི་བདེ་འཇགས་ལ་དགོངས་བཞེད་མཁན་ཚོས་ངེས་པར་དུ་འཛམ་གླིང་གི་ཁོར་ཡུག་གི་གནད་དོན་ཐོག་ཐུགས་བསམ་བཞེད་དགོས་ཞེས་བཀའ་བསྩལ་ཡོད། གཞན་ཡང་མགོན་པོ་མཆོག་གིས་ཁོང་ཁྲོར་གཉེན་པོ་བསྟན་ཕྱོགས་སོགས་ཀྱི་སེམས་བཅོས་ཐབས་དང་འབྲེལ་བའི་སྐོར་ལ་ལོ་ངོ་ ༣༠༠ གོང་ནས་རྒྱ་གར་ལ་དར་ཟིན་པ་ཞིག་ཡིན་པ་མ་ཟད། དེ་ནི་རྒྱ་གར་གནའ་བོའི་རིག་གནས་ཤིག་ཡིན་པ་དང་། དེང་རབས་ཀྱི་ཤེས་ཡོན་ཁྲོད་སེམས་ཁམས་འཕྲོད་བསྟེན་ལ་དོ་སྣང་དེ་ཙམ་བྱེད་ཀྱི་མེད་པ་དང་། སྤྱིར་དེང་རབས་ཀྱིཤེས་ཡོན་དང་འབྲེལ་བའི་ཚན་རིག་དང་། དཔལ་འབྱོར་རིག་པ་ནི་གལ་ཆེན་པོ་ཡིན་ནའང་། དེང་རབས་ཀྱི་ཤེས་ཡོན་ནི་ཕྱི་དངོས་པོ་ཡར་རྒྱས་འགྲོ་རྒྱུ་ཁོ་ནར་དམིགས་པ་ཞིག་ཡིན་སྟབས། དེང་རབས་ཀྱི་ཤེས་ཡོན་དང་ལྷན་དུ་སེམས་ལ་བདེ་སྐྱིད་བསྐྲུན་ཐབས་ཀྱི་རྒྱ་གར་གནའ་བའི་རིག་གནས་དེ་ཟུང་དུ་འབྲེལ་ཐུབ་ཚེ་ཕྱོགས་གཉིས་ཀར་ཡར་རྒྱས་གོང་འཕེལ་ཡོང་ངེས་ཡིན་པ་ལམ་སྟོན་མཛད་སོང་། སྐབས་དེར་ཧིན་དུའི་བླ་ཆེན་ Swami Ramdev མཆོག་གིས་༸གོང་ས་མཆོག་གི་ཐུགས་ཀྱི་དགོངས་བཞེད་དང་བཀའ་དགོངས་ལམ་སྟོན་འོག་ཉེ་ལམརྒྱ་གར་སྲིད་བློན་མཆོག་གིས་གཙོས་བློན་ཆེན་དང་ལྷན་དུ་ Bharati education board ཞེས་པ་ཞིག་ཆེད་འཛུགས་ཀྱིས་དེང་རབས་དང་རྒྱ་གར་གྱི་གནའ་བོའི་རིགས་གནས་གཉིས་ཀར་སློབ་ཁྲིད་གནང་འཆར་ཡོད་པ་དང་། ཤེས་ཡོན་སློབ་གསོ་དེ་བརྒྱུད་ནས་རྒྱ་གར་རང་ཉིད་ཀྱི་གནའ་བོའི་རིག་གནས་གོང་སྤེལ་གནང་རྒྱུ་ཡིན་སྐོར་དང་དེ་ནི་མེས་པོ་དམ་པ་གཱན་དྷཱི་མཆོག་གི་དགོངས་པ་ཞིག་ཀྱང་ཡིན་པ་སྙན་སེང་ཞུས་སོང་། དེ་རིང་གི་མཛད་སྒོའི་ཐོག་ཆོས་ལུགས་ཚང་མའི་བླ་ཆེན་གྱི་ངོས་ནས་མགོན་པོ་མཆོག་ལྷན་ཚོགས་སུ་ཆིབས་བསྒྱུར་བཀའ་དྲིན་བསྐྱངས་པར་ཐུགས་རྗེ་ཆེ་ཞུས་པ་དང་༸གོང་ས་མཆོག་གིས་སྐྱེ་འགྲོ་སྤྱིའི་བདེ་དོན་སླད་དུ་གོ་ལ་ཁྱོན་ཀུན་ཏུ་མཛད་འཕྲིན་རྒྱ་ཆེར་བསྐྱངས་དང་སྐྱོང་བཞིན་པར་ཡི་རང་མངོན་བསྟོད་ཞུས་སོང་། སྐབས་དེར་ཧིན་དུའི་བླ་ཆེན་ Chidanand Saraswati  མཆོག་གིས་༸གོང་ས་༸སྐྱནས་མགོན་ཆེན་པོ་མཆོག་གིས་དུས་རྟག་ཏུ་ཆོས་ལ་སློབ་སྦྱོང་གནང་དགོས་ཞེས་ལམ་སྟོན་བཀའ་བསྩལ་དོན་ལྟར། ང་ཚོ་དུས་རྟག་དུ་ internet འམ་དྲྭ་རྒྱ་བཀོལ་སྤྱོད་བྱེད་མུས་བཞིན་ inner net འམ་ནང་སེམས་བཅོས་ཐབས་ཐོག་དགོངས་པ་བཞེད་དགོས་པ་དང་། དེ་བཞིན་ facebook འམ་ངོ་དེབ་ཡང་ཡང་བཀོལ་སྤྱོད་བྱེད་བཞིན་པ་ལྟར་ རང་ཉིད་ཀྱི་མི་ཚེའི་ངོ་དེབ་དེས་དེ་བས་ཀྱང་རྟོག་ཞིབ་བྱེད་དགོས་པ་གསུངས་ཡོད།  

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་ལྔ་པའི་ཐོག་ཤེས་རིག་ལས་ཁུངས་ཀྱི་ལོ་འཁོར་ལས་བསྡོམས་ཐོག་བགྲོ་གླེང་གནང་ཁྲོད་ཤེས་རིག་བཀའ་བློན་མཆོག་གིས་འདི་ལོ་ཤེས་རིག་ལས་ཁུངས་ནས་ཕྱི་རྒྱལ་ཡུལ་གྲུ་ཁག་ནང་གི་གཟའ་མཇུག་སློབ་གྲྭ་ཁག་གི་ཆེད་དུ་བསླབ་གཞི་རྩ་འཛིན་གཏན་འབེབས་གནང་ཐུབ་ཡོད་པ་གསུངས་སོང་། ཁ་སང་དཔལ་འབྱོར་ལས་ཁུངས་ཀྱི་ལོ་འཁོར་སྙན་ཐོའི་ཐོག་བགྲོ་གླེང་སོགས་ཀྱི་ལས་རིམ་ཡོངས་སུ་མཇུག་སྒྲིལ་གནང་རྗེས་ཉིན་རྒྱབ་ཀྱི་ཚོགས་དུས་ ༤ པའི་ཐོག་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་གིས་ཤེས་རིག་ལས་ཁུངས་ཀྱི་ཕྱི་ལོ་ ༢༠༡༨ ལོའི་ཟླ་ ༤ ཚེས་ ༡ ནས་ཕྱི་ལོ་ ༢༠༡༩ ཟླ་ ༣ ཚེས་ ༣༡ བར་གྱི་ལས་བསྡོམས་སྙིང་བསྡུས་འགོད་འབུལ་ཞུས་སོང་བ་དང་། སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་ཤེས་རིག་ལས་ཁུངས་ཀྱི་ལོ་འཁོར་ལས་སྡོམས་རྒྱས་པར་སྤྱི་འཐུས་རྒྱུན་ལས་ནས་ལྟ་ཞིབ་ཞུས་པའི་སྙན་ཐོ་སྒྲོག་སྦྱང་། དེ་བཞིན་ཤེས་རིག་བཀའ་བློན་མཆོག་གིས་སྤྱི་འཐུས་རྒྱུན་ལས་ཀྱི་སྙན་ཐོ་དང་འབྲེལ་བའི་བཀའ་འདྲི་ཕེབས་ཁག་ལ་ལན་འདེབས་གསལ་བཤད་གནང་སོང་། གྲོས་ཚོགས་འཐུས་མི་རྣམས་ནས་ཤེས་རིག་གི་ལས་སྡོམས་ཐོག་བགྲོ་གླེང་གི་ལས་རིམ་ཐོག་སྤྱི་འཐུས་ཁག་གཅིག་གིས་དེང་སྐབས་བོད་མིའི་མི་འབོར་ཤུགས་ཆེ་ཞིག་ཕྱི་རྒྱལ་ཁག་ཏུ་གཏན་སྡོད་བྱེད་ཀྱི་ཡོད་པ་དང་འབྲེལ། བོད་པའི་ཕྲུ་གུ་རྣམས་ལ་རང་གི་སྐད་དང་རིག་གཞུང་མ་ཤེས་པའི་དཀའ་ངལ་འཕྲད་ཀྱི་ཡོད་སྟབས། སློབ་ཕྲུག་དེ་དག་ལ་བོད་ཀྱི་སྐད་དང་ཡི་གེ་བསླབ་མཁན་གྱི་གཟའ་མཇུག་སློབ་གྲྭ་རྣམས་གལ་ཆེན་པོ་ཆགས་ཀྱི་ཡོད་པས་ད་ལྟའི་ཆར་སློབ་གྲྭ་དེ་རིགས་ག་ཚོད་ཡོད་པ་དང་དེ་དག་ནང་སློབ་ཞུགས་གནང་མཁན་གྱི་སློབ་མའི་གྲངས་འབོར་ཇི་ཡོད་སོགས་ཀྱི་ཐོག་ཤེས་རིག་ལས་ཁུངས་ཀྱི་ཐུགས་སྣང་དང་བཏང་འཛིན་གང་ལེགས་གནང་དགོས་པའི་དགོངས་འཆར་ཕེབས་པར་ཤེས་རིག་བཀའ་བློན་མཆོག་གིས་འདི་ལོའི་ཕྱི་ཟླ་ ༨ ཚེས་ ༢ དང་ ༣ ལ་ཨ་རི་སྐུ་ཚབ་དོན་ཁང་དང་ཤེས་རིག་ལས་ཁུངས་མཉམ་འབྲེལ་ཐོག་ཕྱི་རྒྱལ་ཁག་གི་གཟའ་མཇུག་སློབ་གྲྭའམ་བོད་ཀྱི་སྐད་ཡིག་དང་རིག་གཞུང་སློབ་གྲྭ་ཁག་གི་ཚོགས་ཆེན་ཐེངས་དང་པོ་དེ་གོ་སྒྲིག་གནང་ཡོད་པ་དང་། དེའི་ཐོག་ཕྱི་རྒྱལ་ཡུལ་གྲུ་ཁག་ཏུ་བོད་ཀྱི་སྐད་དང་རིག་གཞུང་སློབ་ཁྲིད་ཀྱི་བསླབ་གཞི་རྩ་འཛིན་གཏན་འབེབས་གནང་ཡོད་པ་གསུངས་ཡོད། རྩ་བའི་ཤེས་རིག་ལས་ཁུངས་ཀྱིས་གྲོས་ཚོགས་སུ་འགོད་འབུལ་ཞུས་པའི་ལས་བསྡོམས་སྙིང་བསྡུས་ནང་གསལ་ལྟར་ན། ད་ལྟའི་ཆར་ཤེས་རིག་ལས་ཁུངས་ཀྱི་ཁྱབ་ཁོངས་རྒྱ་བལ་གཉིས་ནང་གཏན་ཉིན་སློབ་གྲྭ་ཆེ་འབྲིང་ཆུང་གསུམ་བསྡོམས་གྲངས་ ༦༤ ཡོད་པའི་ནང་ལོ་འཁོར་འདིའི་ནང་སློབ་ཕྲུག་ཕོ་མོ་གྲངས་ ༡༦༥༡༣ ཡོད་པའི་ཁོངས་སུ་བོད་ཕྲུག་བརྒྱ་ཆ་ ༦༦ དང་ཧི་མཱ་ལ་ཡའི་རི་རྒྱུད་ཀྱི་བུ་ཕྲུག་བརྒྱ་ཆ་ ༢༦ དེ་བཞིན་ཡུལ་མིའི་བུ་ཕྲུག་བརྒྱ་ཆ་ ༨ ཡོད་པ་དང་། དགེ་རྒན་ལས་བྱེད་ཁྱོན་བསྡོམས་གྲངས་ ༡༩༥༧ ཡོད་པ་འཁོད་འདུག དེ་རིང་གྲོས་ཚོགས་སུ་སྤྱི་འཐུས་ཁག་གཅིག་ནས་བོད་པའི་སློབ་གྲྭ་ཁག་གི་ནང་ཧི་མཱ་ལ་ཡའི་རི་རྒྱུད་ཀྱི་སློབ་ཕྲུག་མང་དུ་འགྲོ་བ་དང་འབྲེལ་བོད་པའི་སློབ་ཕྲུག་རྣམས་ཀྱི་སྐད་ཡིག་བསྲེ་ལྷད་འགྲོ་བཞིན་པ་སོགས་ཀྱི་དགེ་སྐྱོན་སྐོར་གླེང་སློང་ཤུགས་ཆེ་གནང་ཡོད་པ་ལྟར་ཤེས་རིག་བཀའ་བློན་མཆོག་གིས་ཤེས་རིག་ལས་ཁུངས་ཀྱི་ངོས་ནས་དེའི་ཐོག་ཐུགས་སྣང་ངེས་པར་དུ་གནང་གི་ཡོད་པ་དང་། ད་ལྟའི་ཆར་སློབ་གྲྭ་ཁག་ཏུ་ཧི་མཱ་ལ་ཡའི་སློབ་ཕྲུག་གི་གྲངས་ཚད་ཚོད་འཛིན་གནང་བཞིན་ཡོད་པ་བཀའ་ལན་གནང་སོང་། ཤེས་རིག་གི་ལས་བསྡོམས་ཐད་བགྲོ་གླེང་ཁྲོད་སློབ་གྲྭ་ཁག་གི་ནང་དགེ་རྒན་ཆེད་ལས་ཡར་རྒྱས་ཀྱི་གནད་དོན་དང་འབྲེལ། ཁྱད་དུ་འཕགས་པའི་ཕྱག་ལས་གནང་མཁན་གྱི་དགེ་རྒན་རྣམས་ལ་གཟེངས་རྟགས་ཕུལ་དགོས་པའི་གནད་དོན་དང་བོད་སློབ་འཛིན་ཚོགས་ཀྱི་སློབ་གྲྭ་ཁག་རིམ་བཞིན་ཤེས་རིག་ལས་ཁུངས་ཀྱི་རྩིས་ལེན་པ་དང་འབྲེལ་སློབ་གྲྭ་དེ་དག་གི་སྤུས་ཚད་དང་ལས་དོན་ཁག་དེ་སྔ་ལས་ལྷག་པ་མེད་ཀྱང་དེ་སྔ་བཞིན་གནང་དགོས་གལ་སྐོར་སོགས་ཀྱི་དགོངས་ཚུལ་དང་དོགས་དྲི་ཞུས་ཡོད་པ་རེད། དེ་བཞིན་ཨ་རི་སོགས་ཕྱི་རྒྱལ་ཡུལ་གྲུ་ཁག་ཏུ་མཐོ་རིམ་སློབ་གཉེར་ཆེད་སློབ་ཡོན་གྱི་གནད་དོན་དང་འབྲེལ་ཏེ་འདི་ལོ་སློབ་མ་ཚུར་ཕྱིར་ལོག་གནང་བ་ཇི་ཙམ་བྱུང་ཡོད་པ་སོགས་ཀྱི་བཀའ་འདྲིར་འདི་ལོ་སློབ་ཕྲུག་གཅིག་ཕྱིར་ལོག་གནང་མེད་པ་དེས་མིང་རྗེས་སུ་འགོད་འབུལ་ཞུ་རྒྱུ་ཡིན་པ་གསུངས་སོང་། འབྲེལ་ཡོད་པར་ཕྱི་དྲིལ་ལས་ཁུངས།

ཁ་སང་ཕྱི་ཚེས་ ༢༤ ཉིན་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ཀྱིས་ཉེ་ཆར་ཚོགས་ཆུང་དེའི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Jim McGovern ལགས་ཀྱིས་གྲོས་ཚོགས་འོག་མའི་ནང་ཆེད་འདོན་གནང་བའི་ Tibetan Policy and Support Act of 2019 ཞེས་པའི་ཨ་རིའི་བོད་དོན་ཁྲིམས་འཆར་གསར་པ་དེ་གྲོས་ཚོགས་གོང་མར་ཆེད་འདོན་གནང་འདུག སྐབས་དེར་སྐུ་ཞབས་ Marco Rubio ལགས་ཀྱིས་རྒྱ་ནག་གཞུང་གི་བོད་མིའི་ཐོག་འགོག་རྐྱེན་འདྲ་མིན་བཟོ་བཞིན་པའི་དུས་སྐབས་འདིར་ཨ་རིའི་སྲིད་གཞུང་ནས་བོད་ཐོག་ཐོག་འཛིན་པའི་སྲིད་བྱུས་དེ་དུས་ཚོད་དང་མཐུན་པའི་ཁ་གསབ་གནང་རྒྱུ་གལ་ཆེན་པོ་ཡིན་སྟབས། བོད་དོན་ཁྲིམས་འཆར་གསར་པ་ཆེད་འདོན་གནང་བ་ཞིག་ཡིན་ཞེས་གསུངས་པ་དང་ཆབས་ཅིག དུས་རྒྱུན་དུ་ཨ་མི་རི་ཀའི་ངོས་ནས་རྒྱ་ནག་གཞུང་གིས་དྲག་གནོན་སྲིད་བྱུས་འོག་དཀའ་སྡུག་མྱོང་བཞིན་པའི་བོད་མིའི་གནས་སྟངས་ཐེར་འདོན་གནང་དགོས་པ་མ་ཟད་བོད་ཕྱི་ནང་གཉིས་སུ་བོད་མིའི་ཆོས་དད་རང་དབང་དང་སྐད་ཡིག ཐུན་མོང་མ་ཡིན་པའི་རིག་གཞུང་ཁག་སྲུང་སྐྱོབ་ཐུབ་ཐབས་སུ་ཐབས་བྱུས་འདྲ་མིན་ཆེད་འདོན་གནང་གལ་ཆེན་པོ་རེད་ཅེས་གསུངས་འདུག སྐུ་ཞབས་ Marco Rubio ལགས་ནས་ཆེད་འདོན་གནང་བའི་བོད་དོན་ཁྲིམས་འཆར་གསར་པ་དེར་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་གོང་མའི་འཐུས་མི་སྐུ་ཞབས་ Ben Cardin ལགས་དང་སྐུ་ཞབས་ Tom Cotton ལགས། ལྕམ་སྐུ་  Dianne Feinstein ལགས། སྐུ་ཞབས་ Lindsey Graham ལགས།  དེ་བཞིན་སྐུ་ཞབས་ Ed Markey ལགས་བཅས་ཁྱོན་གྲོས་ཚོགས་གོང་མའི་འཐུས་མི་ལྔས་རྒྱབ་སྐྱོར་གནང་ཡོད་པ་དང་། སྐུ་ཞབས་ Ben Cardin ལགས་ཀྱིས་བོད་དོན་ཁྲིམས་འཆར་གསར་པ་འདིས་ཨ་རིའི་ངོས་ནས་བོད་མིའི་གཞི་རྩའི་གྲོ་བ་མིའི་ཐོབ་ཐང་དང་རང་སྲིད་རང་སྐྱོང་གི་གནས་བབས་སོགས་ཀྱི་ཐོག་རྒྱབ་སྐྱོར་མཚོན་པ་མ་ཟད་རྒྱ་ནག་གཞུང་གིས་བོད་མིའི་ཆོས་དད་རང་དབང་དང་༸གོང་ས་མཆོག་གིས་དབུས་པའི་བླ་སྤྲུལ་ཡང་སྲིད་ཀྱི་གནད་དོན་ཐོག་ཐེ་བྱུས་བྱས་པར་ཨ་རིའི་ངོས་ནས་དུས་ནམ་ཡང་ཁ་ཁུ་སིམ་པོར་བཞུགས་ཀྱི་མ་རེད་ཅེས་གསུངས་འདུག དེ་བཞིན་སྐུ་ཞབས་ Lindsey Graham ལགས་ཀྱིས་རྒྱ་ནག་གཞུང་གིས་བོད་མིར་དྲག་གནོན་བྱེད་བཞིན་པར་ངོས་ལེན་ནམ་ཡང་ཞུ་ཐབས་མེད་སྐོར་གསུངས་འདུག་པ་མ་ཟད། ལྕམ་སྐུ་  Dianne Feinstein ལགས་ཀྱིས་ཀྱང་ཨ་རི་བོད་ཐོག་གཏན་འབེབས་གནང་བའི་ Tibetan Policy Act of 2002 ཞེས་ཨ་རི་བོད་ཐོག་འཛིན་པའི་སྲིད་བྱུས་དེ་གཏན་འབེབས་གནང་སྟེ་ད་ཆ་ལོ་ངོ་ ༡༧ ལྷག་འགྲོ་བཞིན་ཡོད་ཀྱང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་བཟང་ཕྱོགས་ཀྱི་འགྱུར་བ་མེད་པར་ལོ་རེ་བཞིན་ཆེས་ཇེ་སྡུག་ཏུ་ཕྱིན་ཡོད་པར་འགྲེལ་བརྗོད་གནང་བ་འབྲེལ་ཏེ་ཨ་རིའི་བོད་ཐོག་འཛིན་པའི་སྲིད་བྱུས་དེ་ངེས་པར་དུ་བསྐྱར་བཅོས་གནང་དགོས་པ་དང་། ད་རེས་བོད་དོན་ཁྲིམས་འཆར་གསར་དེར་གདེང་སྤོབས་ཆེན་པོས་རྒྱབ་སྐྱོར་ཞུ་ཡི་ཡིན་ཞེས་གསུངས་འདུག སྐུ་ཞབས་ Tom Cotton ལགས་ཀྱིས་རྒྱ་ནག་གཞུང་གིས་དེ་སྔ་བོད་ཀྱི་ཆོས་ཕྱོགས་ཀྱི་དབུ་ཁྲིད་དག་བཙན་ཁྲིད་བྱས་པ་མ་ཟད་ད་ཆ་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་བྱེད་བཞིན་སྐབས་འདིར་ཨ་རིའི་བོད་དོན་ཁྲིམས་འཆར་འདི་གཏན་འབེབས་བརྒྱུད་རྒྱ་གཞུང་གི་ཐེ་བྱུས་ཅན་གྱི་ལས་དོན་རྣམས་འགོག་ཐུབ་ངེས་ཡིན་སྐོར་གསུངས་འདུག སྐུ་ཞབས་ Ed Markey ལགས་ནས་ཨ་རིའི་གྲོས་ཚོགས་ནང་ཨ་རིའི་བོད་དོན་ཁྲིམས་འཆར་གསར་པ་དེ་གཏན་འབེབས་གནང་སྟེ་རྒྱ་ནག་གཞུང་ལ་ཨ་མི་རི་ཀའི་སྲིད་གཞུང་འདི་དབང་ཆ་གཅིག་བསྡུས་ཀྱི་རིང་ལུགས་ལ་རྒྱབ་སྐྱོར་མེད་པར་རང་དབང་ལ་དགའ་ཞེན་ཆེ་བའི་མི་མང་ཚོར་རྒྱབ་སྐྱོར་ཡོད་པའི་བརྡ་ལན་གསལ་པོ་ཞིག་གནང་དགོས་ཞེས་གསུངས་འདུག གཞི་རྩའི་ Tibetan Policy and Support Act of 2019 ཞེས་པའི་ཨ་རིའི་བོད་དོན་ཁྲིམས་འཆར་གསར་པ་དེ་ཟླ་ ༩ ཚེས་ ༡༣ ཉིན་སྐུ་ཞབས་ Jim McGovern ལགས་ཀྱིས་ཨ་རིའི་གྲོས་ཚོགས་འོག་མའི་ནང་ཆེད་འདོན་གནང་སྟེ་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་བདུན་ནས་རྒྱབ་སྐྱོར་གནང་ཐོག་ཨ་མི་རི་ཀའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་། ཁྲིམས་ལུགས་ཚོགས་ཆུང་གཉིས་སུ་ཁྲིམས་འཆར་གྱི་དོན་ཚན་ཁག་ལ་གྲོས་བསྡུར་དང་དཔྱད་ཞིབ་གནང་མུས་ཡིན་པ་དང་། སྐབས་དེར་རླུང་འཕྲིན་ཁང་གིས་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་སུ་ཞལ་པར་བརྒྱུད་བཀའ་འདྲི་ཁག་གཅིག་ཞུས་པར་ཨ་རིའི་གྲོས་ཚོགས་ནང་བོད་དོན་དང་འབྲེལ་བའི་ཁྲིམས་འཆར་གསར་པ་ཆེད་འདོན་གནང་བ་དེས་རྒྱ་ནག་གཞུང་ལ་ཆབ་སྲིད་ཀྱི་སྔོན་བརྡ་ཞིག་མཚོན་ཐུབ་ཀྱི་ཡོད་པ་གསུངས་ཡོད། གཞི་རྩའི་ཨ་རིའི་བོད་དོན་ཁྲིམས་འཆར་གསར་པའི་ནང་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིའི་བོད་ཐོག་འཛིན་པའི་སྲིད་བྱུས་ནང་གསལ་བའི་དོན་ཚན་ཁག་ལ་རྒྱས་བཤད་དང་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན། དེ་བཞིན་བོད་ཀྱི་རང་བྱུང་ཁོར་ཡུག་སྲུང་སྐྱོབ་དགོས་པ། ཨ་རི་གཞུང་ནས་བོད་མིར་རོགས་སྐྱོར་མུ་མཐུད་གནང་དགོས་པ་སོགས་དོན་ཚན་ཆེ་ཁག་ལྔ་འཁོད་འདུག ཨ་རིའི་གྲོས་ཚོགས་གོང་མའི་ནང་བོད་དོན་ཁྲིམས་འཆར་འདོན་འཇོག་གནང་བ་དང་དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཞུགས་སྒར་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་ཁྲིམས་འཆར་དེའི་ཐོག་ཕྱག་རོགས་གནང་མཁན་ཡོངས་ལ་ཐུགས་རྗེ་ཆེ་ཞུས་པ་མ་ཟད་ཁྲིམས་འཆར་དེ་ཁྲིམས་ཆགས་པར་བོད་མི་རྣམས་ནས་ཞུ་གཏུག་གནང་དགོས་པའི་ཞུ་སྐུལ་གནང་སོང་།

ཨ་རིའི་ནིའུ་ཡོག་གྲོང་ཁྱེར་དུ་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐེངས་ ༧༤ པ་འཚོགས་བཞིན་པ་དང་བསྟུན་ཁ་ཉིན་རེས་གཟའ་ཟླ་བའི་ཉིན་ཨ་རིའི་རྒྱལ་སྲིད་གཞུང་གིས་རྒྱལ་སྤྱིའི་ཆོས་དད་རང་དབང་ཀྱི་ཚོགས་འདུ་ཞིག་ཆེད་བསྐོང་གནང་བའི་ཁྲོད་ཨ་རིའི་སྲིད་འཛིན་སྐུ་ཞབས་ Donald Trump མཆོག་དང་སྲིད་འཛིན་གཞོན་པ Mike Pence མཆོག དེ་བཞིན་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་ Sam Brownback ལགས་དང་ཕྱི་སྲིད་བློན་ཆེན་ Mike Pompeo སོགས་ཀྱིས་གཙོས་པའི་རྒྱལ་སྤྱིའི་ཆོས་ལུགས་ཀྱི་དབུ་ཁྲིད་མང་དག་ཅིག་མཉམ་ཞུགས་གནང་ཡོད་པ་མ་ཟད། རྒྱལ་སྤྱིའི་ཐོག་ནས་ཆོས་ལུགས་དད་མོས་རྐྱེན་པས་སྡུག་སྦྱོང་མནར་གཅོད་མྱོང་མཁན་མང་པོ་གདན་འདྲེན་བྱས་ཡོད་པ་ལྟར་བོད་ཀྱི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་མ་མཆོག་གི་ཚ་མོ་ཉི་མ་ལྷ་མོ་ལགས་ཀྱང་གདན་ཞུ་གནང་འདུག  རྒྱལ་སྤྱིའི་ཆོས་རང་དབང་གི་ལྷན་ཚོགས་དེ་གྲོལ་མཚམས་སུ་ཨ་རིའི་སྲིད་གཞུང་གིས་གསར་འགོད་ལྷན་ཚོགས་ཤིག་བསྡུ་བསྐོང་གནང་བའི་ཁྲོད་ཉི་མ་ལྷ་མོ་ལགས་ཀྱིས་བོད་ནང་གི་ཆོས་དད་རང་མོས་ཀྱི་གནས་སྟངས་སྐོར་ལ་གསུང་བཤད་གནང་འདུག་པ་དང་། སྐབས་དེར་ཁོང་གིས་རྒྱལ་སྤྱིའི་ཚོགས་སྡེ་ཁག་ནས་ཆོས་དད་རང་མོས་ཀྱི་གནད་དོན་ཐོག་མཉམ་ལས་གནང་རྒྱུའི་དུས་ལ་བབ་ཡོད་པ་དང་། ཨ་རིའི་གཞུང་ ནས་ད་རེས་ཀྱི་ལྷན་ཚོགས་བརྒྱུད་ནས་གོ་སྐབས་འདི་བསྐྲུན་ཐུབ་ཡོད་པ་འགྲེལ་བརྗོད་གནང་འདུག འདི་ག་རླུང་འཕྲིན་ཁང་གིས་ཉི་མ་ལྷ་མོ་ལགས་སུ་ཞལ་པར་བརྒྱུད་བཅར་འདྲི་ཞུས་པར་ཁོང་གིས་བོད་ནང་གི་བོད་མི་རྣམས་ལ་ཆོས་ལུགས་དད་མོས་ཀྱི་རང་དབང་མེད་པའི་ཁར་གནས་ཚུལ་དེར་ཕྱི་ལ་བསྒྲགས་རྒྱུའི་ཐོབ་ཐང་ཡང་མེད་པར་བརྟེན་ད་རེས་ཁོང་གིས་གཞིས་ལུས་བོད་མི་རྣམས་ཀྱི་ཚབ་ཞུས་ཏེ་བོད་ནང་གི་ཆོས་དད་རང་དབང་སྤྱི་དང་རང་ལུས་མེར་བསྲེགས་ཀྱི་གནད་དོན། དེ་བཞིན་༸གོང་ས་མཆོག་བོད་ལ་གདན་འདྲེན་ཞུ་དགོས་པའི་སྐོར་སོགས་སྙན་གསེང་ཞུ་རྒྱུའི་གོ་སྐབས་ཐོབ་པར་དགའ་ཚོར་ཆེན་པོ་བྱུང་ཞེས་ངོ་སྤྲོད་གནང་སོང་། ཨ་རིའི་གཞུང་ནས་ཐེངས་འདིའི་ལྷན་ཚོགས་ཐོག་ཉི་མ་ལྷ་མོ་ལགས་དང་ལྷན་དུ་ཤིན་ཅང་ཡུ་གུར་མི་རིགས་ཀྱི་ཐོབ་ཐང་རྩོད་ལེན་པ་སྐུ་ཞབས་ Ilham Tohti ལགས་ཀྱི་བོུ་གཙོས་པའི་ཆོས་ལུགས་དད་མོས་དང་འབྲེལ་བའི་མནར་གཅོད་མྱངས་དང་མྱོང་མཁན་གྱི་མི་སྣ་ཁག་གཅིག་གདན་ཞུ་གནང་ཡོད་པ་རེད། རླུང་འཕྲིན་ཁང་གིས་ཉི་མ་ལྷ་མོ་ལགས་སུ་ཐེངས་འདིའི་ཆོས་དད་རང་དབང་ལྷན་ཚོགས་ཐོག་ཏུ་དམིགས་བསལ་གྱིས་ཁོང་གདན་འདྲེན་ཞུས་པ་དེར་གཟིགས་ཕྱོགས་ཇི་བྱུང་བཀའ་འདྲི་ཞུས་པར་གཙོ་བོ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་མཆོག་གིས་བོད་ནང་གི་ཆོས་དད་རང་དབང་གི་ཐད་ནས་ཕྱག་ལས་རྒྱ་ཆེར་གནང་སྟེ་མཐར་རྒྱ་ནག་གིས་ཁོང་ལ་མ་ཉེས་ཁ་གཡོགས་ཀྱིས་སྐུ་ཚེ་མ་ཟིན་པའི་གནས་སྟངས་ཤིག་བྱུང་ཡོད་པར་རྒྱལ་སྤྱིའི་ཐོག་ནས་ངོས་འཛིན་གསལ་པོ་ཡོད་པ་ཞིག་ཡིན་སྟབས་ཁོང་ལ་ཆ་མཚོན་ན་རིན་པོ་ཆེའི་གནད་དོན་དེ་དངོས་སུ་མཐོང་མྱོང་མཁན་གྱི་བདེན་དཔང་ལྟ་བུ་ཞིག་ཡིན་པས་ཐེངས་འདིའི་ལྷན་ཚོགས་ཐོག་གདན་འདྲེན་ཞུས་པ་ཞིག་ཆགས་ཡོད་པར་གསུངས་སོང་། རྩ་བའི་ཨ་རིའི་གཞུང་གིས་གོ་སྒྲིག་གནང་བའི་ཆོས་དད་རང་དབང་གི་ལྷན་ཚོགས་ཐོག་ཨ་རིའི་སྲིད་འཛིན་ཌོ་ནལ་ཊམ་མཆོག་གིས་ཁོང་ནི་འཛམ་གླིང་ནང་གི་ཆོས་ལུགས་རང་དབང་ཐད་ཚོགས་ཆེན་བསྡུ་བསྐོང་གནང་མཁན་ཨ་རིའི་སྲིད་འཛིན་ཐོག་མ་དེ་ཡིན་པ་གསུངས་པ་དང་འབྲེལ། ཨ་རིའི་ངོས་ནས་ཨ་སྒོར་ས་ཡ་ ༢༥ ལྷག་ཆེད་གཏོང་གིས་ཆོས་ལུགས་དད་མོས་རང་དབང་དང་ཆོལ་ལུགས་ཀྱི་གནའ་ཤུལ་སྲུང་སྐྱོབ་གནང་རྒྱུ་ཡིན་པ་མ་ཟད། ཆོས་ལུགས་སྲུང་སྐྱོབ་ཀྱི་ཚོགས་པ་ཞིག་ཀྱང་གསར་དུ་འཛུགས་རྒྱུ་ཡིན་པ་གསུངས་ཏེ་ཆོས་ལུགས་སྲུང་སྐྱོབ་གནང་རྒྱུ་ནི་ཨ་རིའི་དམིགས་འབེན་དང་པོ་ཡིན་པ་གསུངས་འདུག   འཛམ་གླིང་དབུ་ཁྲིད་ཚོས་ཆོས་དད་རང་དབང་ལ་དམ་དྲག་གི་ལས་དོན་ཡོངས་སུ་མཚམས་འཇོག་དགོས་པ་དང་ཆོས་ལུགས་དད་མོས་དང་འབྲེལ་བའི་བཙོན་པ་ཡོད་ཚད་གློད་བཀྲོལ་གཏོང་དགོས་པ། དེ་བཞིན་ཆོས་དད་རང་དབང་ལ་དམ་དྲག་བྱས་པའི་ཁྲིམས་སྒྲིག་ཡོངས་ལ་བསྒྱུར་བཅོས་གནང་དགོས་པའི་འབོད་སྐུལ་ཡང་གནང་ཡོད་པ་རེད། ཨ་རིའི་ངོས་ནས་ཐེངས་དང་པོར་དམིབས་བསལ་གྱིས་མཉམ་འབྲེལ་རྒྱལ་ཚོགས་ཀྱི་དབུས་སུ་ཆོས་ལུགས་དད་མོས་ཀྱི་རང་དབང་གི་སྐོར་ཚོགས་འདུ་བསྐོང་བ་དེའི་གལ་གནད་དང་འབྲེལ་ཏེ་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་གཞོན་པ་བུ་ཆུང་ཚེ་རིང་ལགས་སུ་བཀའ་འདྲི་ཞུས་པར་ཁོང་གིས་  ད་ལྟའི་གཞུང་འཛིན་གྱི་ཆབ་སྲིད་ཚོགས་པའི་ངོས་ནས་ཆོས་དད་དབང་དེ་གཙོ་ཆེར་འཛིན་བཞིན་པ་མ་ཟད་ཨ་རིའི་འཛིན་གཞོན་པ་སྐུ་ཞབས་ Mike Pence ལགས་དུས་རྒྱུན་ནས་ཆོས་དད་རང་དབང་གི་ཐོག་ཐུགས་སྣང་ཆེས་ཆེར་ཡོད་པའི་མི་སྣ་ཞིག་ཡིན་པ་བཤད་སྲོལ་ཡོད་པ་བཞིན་འདི་ལོའི་ཕྱི་ཟླ་ ༧ ནང་དུ་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་ཚོགས་འདུ་བསྡུ་བསྐོང་བྱས་ཡོད་པ་སོགས་ངོ་སྤྲོད་གནང་སོང་བ་དང་ཆབས་ཅིག་ཏུ་ཨ་རིའི་ངོས་ནས་ཆོས་དད་རང་དབང་གི་གནད་དོན་ལ་རྒྱབ་སྐྱོར་ཡོད་པ་གསལ་པོ་ཆགས་ཡོད་སྐོར་གསུངས་ཡོད། ཨ་རིའི་སྲིད་གཞུང་གིས་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་འཚོགས་བཞིན་པ་དང་བསྟུན་རྒྱལ་སྤྱིའི་ཆོས་དད་རང་མོས་ལ་འབོད་སྐུལ་ཞེས་པའི་བརྗོད་གཞིའི་འོག་ཉིན་གཉིས་ཀྱི་རིང་ཚོགས་འདུ་བསྡུ་བསྐོང་བྱས་ཡོད་པ་ལྟར་ཁ་སང་ཨ་རིའི་ཕྱི་སྲིད་བློན་ཆེན་གཞོན་པ་སྐུ་ཞབས་ John Sullivan ལགས་ཀྱིས་རྒྱ་ནག་ནང་གི་ཤིན་ཅང་ཁུལ་གྱི་འགྲོ་བ་མིའི་ཐོབ་ཐང་རྡོག་རོལ་ཞེས་པའི་བརྗོད་གཞི་ཐོག་དམིགས་བསལ་ཚོགས་འདུ་ཞིག་ཀྱང་བསྡུ་བསྐོང་གནང་བའི་ཁྲོད་འཇར་མན་དང་དབྱིན་ཡུལ་སོགས་ཀྱིས་མཚོན་པའི་རྒྱལ་ཁབ་ ༢༡ ནས་ཚོགས་ཞུགས་གནང་འདུག རྒྱལ་སྤྱིའི་རྒྱལ་ཁབ་ཡོངས་ཀྱི་ངོས་ནས་རྒྱ་ནག་ལ་གནོད་ཤུགས་སྤྲད་ཐོག་རྒྱ་ནག་སྲིད་གཞུང་གིས་ཤིན་ཅང་ཁུལ་དུ་མི་སྤྱོད་ལས་འདས་པའི་དམ་དྲག་བྱེད་བཞིན་པའི་གནས་བབ་དེ་འཕྲལ་དུ་མཚམས་འཇོག་བྱེད་དགོས་པའི་འབོད་སྐུལ་གནང་འདུག

བལ་ཡུལ་གྱི་གཞུང་འཛིན་དམར་ཤོག་ཚོགས་པས་ཡུལ་དེའི་འགོ་ཁྲིད་རྣམ་པར་རྒྱ་ནག་གི་སྲིད་འཛིན་ཞི་ཅིན་ཕིང་གི་ལྟ་གྲུབ་གཙོར་བཟུང་གིས་སྦྱོང་བརྡར་སྤྲད་འདུག་པ་དང་དེས་བལ་ཡུལ་ཕྱོགས་འགལ་ཆབ་སྲིད་ཚོགས་པའི་འགོ་ཁྲོད་སེམས་འཚབ་སློང་བཞིན་པར་ཆེས་མངོན་གསལ་གནང་འདུག རྒྱ་ནག་གི་སྲིད་འཛིན་ཞི་ཅིན་ཕིང་ཟླ་བ་རྗེས་མར་བལ་ཡུལ་དུ་གཞུང་འབྲེལ་ཕྱོགས་བསྐྱོད་ཆེད་སླེབས་ཀྱི་ཡོད་པ་དང་བསྟུན་བལ་ཡུལ་དམར་ཤོག་ཚོགས་པའི་སློབ་གྲྭ་སྡེ་ཚན་ནས་ཡུལ་དེའི་འགོ་ཁྲིད་རྣམ་པར་སྲིད་འཛིན་ཞི་ཅིན་ཕིང་གི་ལྟ་གྲུབ་གཙོ་བཟུང་གིས་སྦྱོང་བརྡར་ལས་རིམ་ཞིག་གོ་སྒྲིག་བྱས་ཡོད་པའི་ཆ་ཤས་སུ་བདུན་ཕྲག་འདིའི་རེས་གཟའ་ཟླ་བའི་ཉིན་རྒྱ་ནག་དམར་ཤོག་ཚོགས་པའི་རྒྱལ་སྤྱིའི་ལྷན་ཁང་གི་འགོ་གཙོ་ Song Tao ཡིས་སྣེ་ཁྲིད་པའི་དམར་ཤོག་གི་འགོ་ཁྲིདམི་སྣ་ ༥༠ སྐོར་ཞིག་རྒྱལ་ས་ Kathmandu ནང་འབྱོར་ཡོད་པ་དང་། རུ་ཁག་དེའི་ངོས་ནས་བལ་ཡུལ་དང་རྒྱ་ནག་གི་གྲོགས་འདྲིས་ཆེད་དོན་བགྲོ་གླེང་ཞེས་པའི་མིང་སྦྱང་འོག་བལ་ཡུལ་དམར་ཤོག་ཚོགས་པའི་འགོ་ཁྲིད་རྒན་གྲས་དང་ཚོགས་མི་ཁག་གཅིག་ལ་སྦྱོང་བརྡར་སྤྲད་རྒྱུ་ཡིན་པ་ཡོངས་བསྒྲགས་བྱས་པ་མ་ཟད། བལ་ཡུལ་གྱི་སྲིད་བློན་ KP Sharma Oli དང་ཐུག་འཕྲད་ཀྱིས་རྒྱ་གཞུང་ནས་བལ་ཡུལ་རྒྱལ་ཁབ་དེ་ཡར་རྒྱས་གོང་འཕེལ་ཡོང་བར་མཐུན་འགྱུར་སྦྱར་ངེས་ཡིན་པའི་ཁས་ལེན་ཡང་བྱས་འདུག སྦྱོང་བརྡར་སྒོ་འབྱེད་ཀྱི་གཏམ་བཤད་ནང་དམར་ཤོག་ཚོགས་པའི་སློབ་གྲྭའི་སྡེ་ཚན་གྱི་གཙོ་འཛིན་སྐུ་ཞབས་ Ishwar Pokhrel ཡིས་སྤྱིར་བལ་ཡུལ་དང་རྒྱ་ནག་གཉིས་ལ་དཔལ་འབྱོར་དང་སྤྱི་ཚོགས། ཆབ་སྲིད་དང་ས་བབས་གནས་སྟངས་ཀྱི་ཐུན་མོང་མ་ཡིན་པའི་ཁྱད་ཆོས་ཀྱི་ཆ་ནས་ཁྱད་པར་ཡོད་ཀྱང་མཐའ་མའི་དམིགས་ཡུལ་དེ་གཅིག་མཚུངས་ཡིན་པར་འགྲེལ་བརྗོད་བྱས་འདུག འོན་ཀྱང་ཡུལ་དེའི་ཕྱོགས་འགལ་ཀོང་རེ་སི་ཆབ་སྲིད་ཚོགས་པའི་ཚོགས་གཙོ་གཞོན་པ་སྐུ་ཞབས་ Bimalendra Nidhi ཡིས་བལ་ཡུལ་དང་རྒྱ་ནག་གི་སྤྱི་ཚོགས་དབར་ལ་རྩ་ཁྲིམས་དང་ཆབ་སྲིད་ཀྱི་གནས་སྟངས། དབང་འཛིན་ལམ་ལུགས་སོགས་ཀྱི་ཁྱད་པར་ཡོད་པ་དང་ལྷག་དོན་བལ་ཡུལ་གྱི་རྩ་ཁྲིམས་དང་ཆབ་སྲིད་ཀྱི་ཁྲིམས་ལུགས་རྣམས་མང་གཙོ་དང་སྤྱི་མཐུན་རིང་ལུགས། གུ་ཡངས་ལྡན་པའི་སྤྱི་ཚོགས་དང་མང་གཙོའི་གྲོས་ཚོགས་བཅས་ལ་གཞིར་བཞག་ཡོད་པ་དེ་ལྟར་ཡང་། ཆ་རྐྱེན་དེ་དག་ཐམས་ཅད་རྒྱ་ནག་གི་ལམ་ལུགས་ནང་ཚང་མེད་པ་དང་གལ་ཏེ་རྒྱ་ནག་གིས་བལ་ཡུལ་གྱི་གཞུང་འཛིན་ཚོགས་པའི་འགོ་ཁྲིད་དང་ལས་བྱེད་རྣམས་རྒྱ་ནག་གི་དཔོན་རིགས་འདྲ་མཚུངས་ཡོང་སླད་བཀོད་བྱུས་བྱ་ཚེ་དེ་ནི་ངོས་ལེན་བྱེད་ཐབས་རྩ་བ་ནས་མེད་ཅེས་ནན་བརྗོད་བྱས་འདུག བལ་ཡུལ་ཀོང་རེ་སི་འགོ་ཁྲིད་སྐུ་ཞབས་ NP Saud ལགས་ཀྱིས་ཀྱང་རྒྱ་གར་གྱི་སྲིད་བློན་ནརེནྡྲ་མོ་དཱི་མཆོག་བལ་ཡུལ་ནང་ཕེབས་འབྱོར་གནང་སྐབས་སྲིད་བློན་མཆོག་གིས་ཡུལ་དེའི་ཕྱི་འབྲེལ་སྲིད་བྱུས་དེ་རྒྱ་གར་གྱི་ BJP ཆབ་སྲིད་ཚོགས་པར་ཉེ་ཕྱོགས་འཛིན་མཁན་ཞིག་ཆགས་ཀྱི་ཡོད་པ་དང་། ནམ་ཞིག་རྒྱ་ནག་ནས་གཞུང་འབྲེལ་མི་སྣ་སླེབས་སྐབས་བལ་ཡུལ་གྱི་ཕྱི་འབྲེལ་སྲིད་བྱུས་དེ་གློ་བུར་དུ་རྒྱ་ནག་དམར་ཤོག་ལ་ཉེ་ཕྱོགས་འཛིན་མཁན་གྱི་ངོ་བོར་སྒྱུར་བཞིན་ཡོད་པ་ཟུར་ཟ་གནང་བ་མ་ཟད། ཀོང་རེ་སི་ཚོགས་པའི་འགོ་ཁྲིད་སྐུ་ཞབས་ Bal Krishna Khand ལགས་ཀྱིས་འཛན་གླིང་གི་རྒྱལ་ཁབ་སུ་ཞིག་ཡིན་རུང་རྒྱལ་ཁབ་གཞན་དང་ལྷན་དུ་མཛའ་མཐུན་གྱི་འབྲེལ་བ་ཞིག་ཡོད་ཆོག་ཀྱང་དེ་འབྲེལ་རྒྱལ་ཁབ་ནང་རྒྱལ་ཁབ་གཞན་གྱི་ཆབ་སྲིད་ལམ་ལུགས་ཐོག་ནས་བསླུ་ཐབས་བྱེད་པ་དང་ཡང་ན་ལྟ་གྲུབ་གྱི་སྦྱོང་བརྡར་སྤྲད་རྒྱུའི་ཐབས་ཤེས་དེ་ནི་སེམས་འཚབ་བྱ་རྒྱུའི་གནད་དོན་ཞིག་ཡིན་པར་སྐྱོན་བརྗོད་བྱས་པ་དང་ཆབས་ཅིག ད་ཆ་བལ་ཡུལ་གཞུང་འཛིན་ཚོགས་པས་རྒྱ་ནག་དམར་ཤོག་ཚོགས་པར་ཉེ་ཕྱོགས་ཀྱིས་མདུན་སྐྱོད་བྱེད་བཞིན་པ་ནི་བལ་ཡུལ་གྱི་བདག་དབང་ལ་ཉེན་འཚབས་ཆགས་རྒྱུ་ཡིན་པ་བརྗོད་འདུག བལ་ཡུལ་གྱི་གཞུང་འཛིན་ཚོགས་པའི་འགོ་ཁྲིད་རྣམས་ཀྱིས་བརྗོད་པར་ད་ཆ་བལ་ཡུལ་ནང་སླེབས་པའི་རྒྱ་ནག་གི་རུ་ཁག་དེའི་ངོས་ནས་ཉིན་གཉིས་ཀྱི་སྦྱོར་བརྡར་ལས་རིམ་ཁྲོད་གུ་ཡངས་ལྡན་པའི་སྤྱི་ཚོགས་བསྐྲུན་རྒྱུའི་ལས་གཞི་མཇུག་སྐྱོང་བྱས་པ་དང་དམར་ཤོག་གི་སྒྲིག་ཁྲིམས་ལག་ལེན་བསྟར་ཕྱོགས་བཅས་ཀྱི་བརྗོད་གཞི་ཁག་ཅིག་གི་ཐོག་ཡིག་ཆ་ངོ་སྤྲོད་བྱས་པ་མ་ཟད་ཕྱོགས་གཉིས་ཀྱི་ཆབ་སྲིད་འགོ་ཁྲིད་དབར་རྒྱུད་གཅིག་ལམ་གཅིག་ལ་སོགས་པའི་གནད་དོན་ཁག་ཅིག་དང་འབྲེལ་བར་གྲོས་བསྡུར་བྱས་ཡོད་པ་དང་ཁྱད་པར་དུ་སྦྱོང་བརྡར་གྱི་མཐའ་མཇུག་ཏུ་དམར་ཤོག་ཚོགས་པ་གཉིས་ནས་རྒྱལ་ཁབ་ཕན་ཚུན་གྱི་ཆབ་སྲིད་ཚོགས་པའི་འགོ་ཁྲིད་དང་སྒྲིག་གྲས་ལས་བྱེད་དབར་ལྟ་བའི་ཆེད་དོན་བགྲོ་གླེང་གོ་སྒྲིག་ཞུ་རྒྱུ་གཙོས་ཕན་ཚུན་འབྲེལ་ལམ་དང་སྲིང་མོའི་འདུ་ཤེས་འཛིན་ཕྱོགས་བཅས་ཀྱི་ཐད་ལ་ཁས་ལེན་དམ་བཅའ་བྱས་ནས་གན་རྒྱར་མིང་རྟགས་བཀོད་ཡོད་པ་རེད་འདུག

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པའི་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་དཔལ་འབྱོར་ལས་ཁུངས་དང་འབྲེལ་བའི་བོད་མིའི་ཡར་ཐོན་ཚོང་ལས་རམ་འདེགས་ཀྱི་ལས་གཞི་དང་། བེུད་ནུས་སྟོབས་གོང་སྤེལ་ལས་དོན། གངས་ལྗོངས་དཔལ་འབྱོར་ཞབས་ཞུ་ཁང་གི་ལས་དོན། བོད་མིའི་ཁྱད་ལས་དང་བླངས་ཞབས་ཞུ་དང་བོད་མིའི་འཛིན་སྐྱོང་བདེ་དོན་ལྷན་ཚོགས་སོགས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༡༨ ནས་ ༢༠༡༩ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་སྦྲགས་སྤྱི་འཐུས་རྣམ་པས་ཞིབ་གཤེར་དང་བགྲོ་གླེང་ལས་དོན་ཐོག་ཕེབས་སོང་།  སྐབས་དེར་བོད་མི་མང་སྤྱི་འཐུས་ཁག་གཅིག་ནས་བཙན་བྱོལ་བོད་མིའི་རང་དབང་གཅེས་འཛིན་དང་བླངས་དཔྱ་དངུལ་ལག་དེབ་དང་འབྲེལ་དཔྱ་དངུལ་ལག་དེབ་བོར་བརླག་བྱུང་བ་ཚོར་གསར་བཟོ་གནང་སྟངས་དང་། དཔྱ་དངུལ་གྱི་བསྡུ་བྱ་དེ་བཞིན་རྒྱ་བལ་འབྲུག་གསུམ་དང་ཕྱི་རྒྱལ་ཁག་ལ་བཞུགས་པ་ཚོའི་དབར་ཆ་སྙོམས་བཟོ་དགོས་པ། ལྷག་པར་དུ་ཕྱི་རྒྱལ་ཁག་ནས་དཔྱ་དངུལ་བསྡུ་བྱ་སྔར་ལྷག་ཡོང་ཐབས་སུ་དྲྭ་ཐོག་ནས་བསྡུ་རྒྱུ་ཡོད་པ་ཞིག་བཟོ་གལ་ཡིན་པ་སོགས་ཀྱི་ཐོག་དགོངས་ཚུལ་ཤུགས་ཆེན་པོ་ཕེབས་ཡོད་དང་། སྐབས་དེར་དཔལ་འབྱོར་བཀའ་བློན་མཆོག་ནས་བཙན་བྱོལ་བོད་མིའི་དང་བླངས་དཔྱ་དངུལ་དེ་དྲྭ་ཐོག་བརྒྱུད་ནས་བསྡུ་རྒྱུའི་ཚོད་ལྟའི་ལས་གཞི་དབུ་འཛུགས་གནང་འཆར་ཡོད་པ་གསུངས་ཡོད། དེ་བཞིན་སྤྱི་འཐུས་ཁག་གཅིག་གིས་དཔལ་འབྱོར་ལས་ཁུངས་ཀྱི་ཁྱབ་ཁོངས་གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་སྟངས་དང་ལས་གཞི་ཇི་སྤེལ་སོགས་ཀྱི་ཐད་ལ་བཀའ་འདྲི་ཁག་གཅིག་ཞུས་སོང་བ་དང་། བཀའ་བློན་མཆོག་གིས་གངས་ལྗོངས་དཔལ་འབྱོར་ཞབས་ཞུ་ཁང་གསར་འཛུགས་གནང་རྗེས་ད་ལྟའི་ཆར་རྒྱ་གར་དངུལ་ཁང་ཆེན་མོ་ནས་བུན་གཡར་སོགས་དང་འབྲེལ་བའི་ལས་གཞི་སྤེལ་ཆོག་པའི་ཁྲིམས་མཐུན་གྱི་ལག་འཁྱེར་ཐོབ་ཡོད་པ་མ་ཟད། འདས་ལོའི་ནང་བོད་མི་སུད་ཚོང་བ་གྲངས་ ༡༣༡༦ དང་རྒྱན་ཆ་ཙག་གི་ཙིག་གི་ཚོང་པ་ ༡༩༡ དེ་བཞིན་རྟ་དྲེལ་ཁྱིམ་ཚང་ ༤༢ དང་གླ་རྒྱུག་སྣུམ་འཁོར་གཏོང་མཁན་ ༡༨༠ དབྱར་ཚོང་གནང་མཁན་ཁྱིམ་ཚང་ ༡༠༣ སོགས་ལ་བུན་གཡར་གྱི་ལས་གཞི་སྤེལ་ཏེ་ཕན་ཐོགས་ཆེན་པོ་བྱུང་ཡོད་པ་སོགས་འགྲེལ་བརྗོད་གནང་བ་དང་ཆབས་ཅིག རིམ་པས་ཚོང་ཆེན་པོ་གནང་མཁན་ཚོར་འབུམ་བཅུ་དང་བཅོ་ལྔའི་བར་གྱི་བུན་གཡར་ལས་གཞི་སྤེལ་འཆར་ཡོད་པ་དང་སླད་མར་ད་ལྟའི་བཀའ་ཤག་འདི་འཁྱུར་བའི་སྐབས་སུ་གངས་ལྗོངས་དཔལ་འབྱོར་ཞབས་ཞུ་ཁང་གི་མ་དངུལ་གནས་ཚད་དེ་བྱེ་བ་བརྒྱ་བཟོ་རྒྱུའི་དམིགས་ཚད་འཛིན་བཞིན་ཡོད་པ་གསུངས་ཡོད། སུད་ཚོང་གནང་མཁན་ཚོའི་ཚོང་གི་བདེ་འཇགས་དང་ས་ཆའི་དཀའ་ངལ་སེལ་ཐབས་སོགས་ཀྱི་ཐོག་བཀའ་འདྲི་ཁག་གཅིག་ཕེབས་ཡོད་པ་ལྟར། དཔལ་འབྱོར་ལས་ཁུངས་ནས་འདས་པའི་ལོ་དུས་ནང་དགུན་ཚོང་གནང་མཁན་ཚོར་དངུལ་ཟོག་གྱི་ཁྲལ་བབས་དང་། ངེས་སྲུང་། དེ་བཞིན་ཚོང་ཟོག་འོར་འདྲེན་གྱི་གྱན་རྒྱ་སོགས་དང་འབྲེལ་བའི་ཟབ་སྦྱོང་དང་། དགོས་ངེས་ཀྱི་ལམ་སྟོན་གནང་མུས་ཡིན་པ། དགུན་ཚོང་བའི་དཀའ་ངལ་དེ་དག་སེལ་ཐབས་སུ་ཚོང་ལས་དེ་དག་ཁྲིམས་དང་མཐུན་པ་ཞིག་གནང་དགོས་གལ་ཡིན་པ་གསུངས་ཡོད།  གཞན་ཡང་སྐབས་དེར་སྤྱི་འཐུས་ཁག་ལ་ལས་བེུད་ནུས་སྟོབས་གོང་སྤེལ་ལས་གཞིའི་ཐོག་བཀའ་འདྲི་ཁག་གཅིག་ཞུས་པ་བརྒྱུད་ནས་ཚན་པ་དེའི་ལས་དོན་ཚགས་ཚུད་ཡོང་ཐབས་སུ་གོ་གནས་ཡོད་པའི་སྲི་ཞུ་བ་ཞིག་སྡེ་ཚན་དེའི་འགན་འཛིན་དུ་ངེས་བསྐོ་གནང་དགོས་པ་དང་། བེུད་རྣམས་ནུས་སྟོབས་འཕེལ་ཐབས་སུ་ཟབ་སྦྱོང་གི་ལས་གཞི་ཁག་ཏུ་སྐྱེས་པ་ཚོས་ཀྱང་མཉམ་ཞུགས་གནང་བ། དེ་བཞིན་གཙོ་བོ་མིའི་བསམ་བློ་ལ་འགྱུར་བ་ཐེབས་པ་ཞིག་གནང་གལ་ཡིན་པ་སོགས་ཀྱི་དགོངས་ཚུལ་ཕུལ་སོང་།  གཞི་རྩའི་དེ་རིང་ཉིན་འཁྱོངས་རིང་ལ་དཔལ་འབྱོར་ལས་ཁུངས་ཀྱི་ལས་བསྡོམས་དང་འབྲེལ་སྤྱི་འཐུས་ཁག་ ༢༠ ལྷག་ནས་བགྲོ་གླེང་གི་ཆ་ཤས་བླངས་བཞེས་ཏེ་ཕྱིའི་རོགས་ཚོགས་ཁག་གི་རོགས་དངུལ་གནས་བབས་དང་། བོད་མིའི་ཁྱད་ལས་དང་བླངས་ཞབས་ཞུ་ཁང་། དེ་བཞིན་བོད་མིའི་ཡར་ཐོན་ཚོང་ལས་རམ་འདེགས་ལས་དོན་སོགས་དཔལ་འབྱོར་ལས་ཁུངས་དང་འབྲེལ་བའི་ལས་ཁུངས་མ་ལག་དང་བཅས་པའི་ལས་གཞི་མང་དག་ཐོག་བཀའ་བསྡུར་གཟབ་རྒྱས་གནང་ཡོད།