Tibetan Royal Year of 2151 | Year of the Wood Dragon

གསར་འགྱུར།

ཨ་རིའི་གྲོས་ཚོགས་འོག་མར་བོད་ཐོག་གྲོས་ཆོད་གྲོས་འཆར་གསར་པ་ཞིག་ཆེད་འདོན།

ཨ་རིའི་རྒྱལ་ས་ Washington DC ནང་ཨ་རིའི་གྲོས་ཚོགས་འོག་མའི་ནང་གྲོས་ཚོགས་ཀྱི་ཚོགས་དུས་ ༡༡༦ འཚོགས་བཞིན་པ་དང་བསྟུན་དེ་སྔ་ཕྱི་ལོ་ ༢༠༠༢ ལོར་ཡུལ་དེའི་གྲོས་ཚོགས་སུ་གཏན་འབེབས་གནང་བའི་ Tibet Policy Act 2002 ཞེས་ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུའི་གྲོས་ཆོད་གྲོས་འཆར་གསར་པ་ཞིག་ཆེད་འདོན་གནང་འདུག ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུའི་གྲོས་ཆོད་གྲོས་འཆར་གསར་པ་དེ་བདུན་ཕྲག་སྔོན་མའི་རེས་གཟའ་པ་སངས་ཟླ་ ༩ ཕྱི་ཚེས་ ༡༣ ཉིན་ཡུལ་དེའི་གྲོས་ཚོགས་འོག་མའི་ནང་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་ནས་ཆེད་འདོན་གནང་ཡོད་པ་དང་། སྐབས་དེར་གྲོས་ཚོགས་འཐུས་མི་སྐུ་ཞབས་ Christopher H. Smith ལགས་དང་ལྕམ་ Marcy Kaptur ལགས། སྐུ་ཞབས་ Brad Sherman ལགས། སྐུ་ཞབས་ Mark Meadows ལགས། སྐུ་ཞབས་ Tom Suozzi ལགས། སྐུ་ཞབས་ Tom Malinowski ལགས། དེ་བཞིན་སྐུ་ཞབས་ Ben McAdams ལགས་བཅས་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་བདུན་ནས་རྒྱབ་སྐྱོར་གནང་འདུག ད་ལྟའི་ཆར་གྲོས་ཆོད་གྲོས་འཆར་གསར་པའི་ཐོག་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་ཁྲིམས་ལུགས་ཚོགས་ཆུང་གཉིས་སུ་ཕུལ་ནས་གྲོས་བསྡུར་དང་དཔྱད་ཞིབ་གནང་མུས་ཡིན་པ་རེད། གཞི་རྩའི་ Tibet Policy Act 2002 ཞེས་ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུའི་གྲོས་ཆོད་གྲོས་འཆར་གསར་པ་དེ་དངོས་སུ་ཨ་་རིའི་གྲོས་ཚོགས་གོང་འོག་གཉིས་སུ་གཏན་འབེབས་ཐུབ་ཐབས་སུ་རྒྱལ་སྤྱིའི་བོད་དོན་ལས་འགུལ་ཁང་དང་ཨ་རི་བོད་ཀྱི་སྐུ་ཚབ་དོན་གཅོད་སོགས་ས་གནས་སུ་ཞུ་གཏུག་ལས་འགུལ་འདྲ་མིན་སྤེལ་མུས་ཡིན་པ་མ་ཟད། ཉེ་ཆར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཀྱང་ཨ་རི་ནང་གཞུང་འབྲེལ་འཚམས་གཟིགས་བརྒྱུད་ཡུལ་དེའི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་ཀྱིས་གྲོས་ཆོད་གྲོས་འཆར་གསར་པར་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཡང་ཞུས་ཡོད།

བཙན་བྱོལ་བའི་གནས་སྟངས་འོག་སྨན་བཅོས་ལྟ་སྐྱོང་གི་ལས་གཞི་བཟོ་ཐུབ་པ་ནི་དགའ་སྤོབས་འོས་པ་ཞིག་རེད།

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གོ་སྒྲིག་གནང་ཐོག་དེ་རིང་ཟླ་ ༩ ཚེས་ ༡༦ སྔ་དྲོ་ཚོུད་ ༩༌༣༠ ཡོལ་ཙམ་ལ་དྷ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་བཙན་བྱོལ་བོད་མིའི་སྨན་བཅོས་ལྟ་སྐྱོང་གི་ཕྱི་ལོ་ ༢༠༡༠ དང་ ༢༠༢༡ ལོའི་ལས་གཞི་གོ་སྤེལ་དང་ཚོགས་མི་ཐོ་འགོད་ཞུ་ཕྱོགས་ཀྱི་ཟབ་སྦྱོང་དབུ་འབྱེད་ཀྱི་མཛད་སྒོ་ཚོགས་སོང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་སྐུ་མགྲོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག འཕྲོད་བསྟེན་དྲུང་ཆེ་དང་འབྲེལ་ཡོད་ལས་བྱེད། ཕྱོགས་མཐའ་ཁག་ནས་ཕེབས་པའི་ས་གནས་ ༣༣ གྱི་སྨན་པ་དང་སྨན་ཞབས་པ། ས་གནས་འབྲེལ་ཡོད་ལས་ཁུངས་ཀྱི་ལས་བྱེད་སོགས་ཁྱོན་མི་གྲངས་ ༤༠ ལྷག་ཙམ་ཚང་འཛོམས་གནང་ཡོད་པ་རེད། སྐབས་དེར་སྲིད་སྐྱོང་མཆོག་གིས་སྨན་བཅོས་ལྟ་སྐྱོང་ལས་གཞིའི་བརྒྱུད་རིམ་དང་འབྲེལ།  འདི་ལོར་སྨན་བཅོས་ལྟ་སྐྱོང་ལས་གཞི་ནང་མཉམ་ཞུགས་གནང་མཁན་གི་མི་གྲངས་མང་དུ་སོང་ཡོད་པ་དང་།  མི་མང་མཉམ་ཞུགས་ཀྱི་གྲངས་འབོར་ལོ་རེ་བཞིན་འཕེལ་བར་གཞིགས་ཚེ་ལས་གཞི་དེ་མང་ཚོགས་ལ་ཕན་ཐོགས་ཀྱི་ཡོད་པ་མངོན་པ་མ་ཟད་སྤྱིར་འཛམ་གླིང་གི་མི་འབོར་བརྒྱ་ཆ་ ༥༠ ཙམ་ལ་སྨན་བཅོས་ཀྱི་མཐུན་སྐྱེན་མེད་ཀྱང་། ང་ཚོ་བོད་མི་ཚོ་བཙན་བྱོལ་བའི་གནས་སྟངས་འོག་སྨན་བཅོས་ལྟ་སྐྱོང་གི་ལས་གཞི་བཟོ་ཐུབ་པ་ནི་དགའ་སྤོབས་བྱེད་འོས་པ་ཞིག་དང་སྒོས་ལས་གཞི་དེ་ཚགས་ཚུད་དུ་གནང་རྒྱུར་འབད་དགོས་པ་གསུངས་སོང་། སྲིད་སྐྱོང་མཆོག་གིས་ད་དུང་ཉེ་ལམ་ལྔ་དང་ལྔ་བཅུའི་ཚོགས་འདུ་དང་དེ་བཞིན་གཞིས་ཆགས་ཁག་ཏུ་ཕེབས་སྐབས་སྤྱི་ཚོགས་ཁྲོད་སེམས་ཁམས་ཀྱི་འཕྲོད་བསྟེན་བདེ་མིན་རྐྱེན་པས་ནང་མི་གཙོས་པའི་འབྲེལ་ཡོད་དག་ལ་ངལ་བ་འཕྲད་པའི་གནད་དོན་ཡོང་གི་ཡོད་པ་དང་། དེ་འབྲེལ་དཀའ་ངལ་སེལ་བར་སེམས་ཁམས་ཀྱི་སྨན་ཁང་འམ་ Mental Health Institute ཆེད་འཛུགས་གནང་ཐུབ་ན་སྤྱི་ཚོགས་ཁྱོན་ལ་ཐུགས་ཕན་གསོས་ངེས་ཡིན་པ་ཆབས་ཅིག འདིར་ཕེབས་པའི་ས་གནས་འཕྲོད་བསྟེན་ཐོག་འགན་ཁུར་བཞེས་མཁན་དང་འཕྲོད་བསྟེན་ལས་ཁུངས་ནས་གནད་དོན་དེའི་ཐོག་བཀའ་བསྡུར་གནང་རྒྱུར་དགོངས་བཞེས་རོགས་ཞེས་གཞེན་སྐུལ་གནང་ཡོད། དེ་སྔ་འཕྲོད་བསྟེན། དཔལ་འབྱོར། ཤེས་རིག རིག་གཞུང་སོགས་ཀྱི་ཐད་ལྔ་དང་ལྔ་བཅུའི་ཚོགས་འདུ་ཚོགས་པ་བཞིན་ལོ་རྗེས་མར་འཕྲོད་བསྟེན་རང་གི་ཐོག་ལ་དེ་ལྟར་འཚོགས་ཐུབ་ཚེ་དགེ་མཚན་ཆེན་པོ་ཡོད་པ་ལམ་སྟོན་གནང་སོང་། འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་ལས་གཞི་དེ་སྨན་བཅོས་འགན་བཅོལ་འམ་ Insurance ལྟ་བུ་མིན་པར་མི་མང་གི་བདེ་རྩ་ཁོ་ན་ཆེད་དུ་ཡིན་སྐོར་གསུངས་པ་དང་ཆབས་ཅིག་ཏུ་ལས་གཞི་དེ་བརྒྱུད་ནས་འཕྲོད་བསྟེན་ལས་ཁུངས་དང་ས་གནས་འཕྲོད་བསྟེན་ལ་མ་དངུལ་ཕྲན་བུ་ཡོང་ཐབས་ཀྱི་དགོངས་པ་གང་ཡང་བཞེས་མྱོང་མེད་སྐོར་ནན་བརྗོད་གནང་སོང་། དེ་བཞིན་རང་དབང་ལྡན་པའི་རྒྱལ་ཁབ་གཞན་ཁག་ཏུ་ལས་གཞི་དེ་ལྟར་བཟོ་ཐུབ་ཀྱི་མེད་པ་དང་ང་ཚོའི་ངོས་ནས་དེར་སྤོབས་པ་ཞུས་འོས་ཤིག་དང་ཤུགས་སྣོན་བསྐྱོན་གོ་ཆོད་པ་ཡིན་པར་ལམ་སྟོན་གནང་ཡོད། རྩ་བའི་ལས་གཞི་དེ་དབུ་འཛུགས་གནང་བ་ནས་བཟུང་ད་བར་མི་གྲངས་ ༡༠༣༩༠ ཙམ་ལ་སྨན་བཅོས་ཀྱི་ཁེ་ཕན་ཐོབ་ཡོད་པ་དང་།  ཚོགས་ཞུགས་ཀྱང་ལོ་རེ་བཞིན་འཕར་ཆ་བྱུང་སྟབས་ད་ལྟའི་ཆར་ལས་གཞི་དེའི་ཁོངས་སུ་ཚོགས་མི་གྲངས་ ༢༧༤༩༦ ལྷག་ཡོད་པ་རེད།

ཧོང་ཀོང་གི་ཡུལ་སྐོར་སྤྲོ་འཁྱམ་པ་བོད་དུ་འགྲོ་མི་ཆོག་པའི་གསལ་བསྒྲགས་སྤེལ་བ།  

རྒྱ་ནག་གཞུང་གི་སྟངས་འཛིན་བྱེད་བཞིན་པའི་བྷན་མ་ཡུལ་སྐོར་སྤྲོ་འཁྱམ་ཁང་གིས་ཧོང་ཀོང་གི་ཡུལ་སྐོར་སྤྲོ་འཁྱམ་པ་རྣམས་རྒྱ་ནག་གིས་ས་བགོས་བྱས་པའི་བོད་རང་སྐྱོང་ལྗོངས་དང་བོད་ཤར་ཕྱོགས་ཀྱི་མཚོ་སྔོན་ཞིང་ཆེན་དང་ཟི་ཁྲོན་ཞིང་ཆེན་སོགས་སུ་འགྲོ་སྐྱོད་བྱེད་མི་ཆོག་པའི་གཞུང་འབྲེལ་གྱི་གསལ་བསྒྲགས་སྤེལ་འདུག ཁ་སང་ཨ་རིར་རྟེན་གཞི་བྱས་པའི་ Free Tibet ཞེས་བོད་དོན་ལས་འགུལ་ཁང་གིས་པད་མ་རྫོང་བོད་ཀྱི་རིག་གཞུང་སྤྲོ་འཆམ་ལས་ཁང་གིས་ཟླ་ ༨ ཚེས་ ༢༦ ཉིན་གསལ་བསྒྲགས་ཞིག་སྤེལ་བ་གནས་ཚུལ་སྤེལ་ཏེ་བོད་རང་སྐྱོང་ལྗོངས་ཀྱིས་གཙོས་པའི་མཚོ་སྔོན་ཞིང་ཆེན་དང་ཟི་ཁྲོན་ཞིང་ཆེན་སོགས་སུ་འགྲོ་སྐྱོད་བྱེད་མཁན་ཧོང་ཀོང་གི་ཡུལ་སྐོར་སྤྲོ་འཆམ་པ་སུ་ལའང་སྤྲོ་འཆམ་ལས་ཁང་དེས་དང་ལེན་ཞུ་རྒྱུ་མིན་པའི་ཉེན་བརྡ་བཏང་ཡོད་པ་དང་། བོད་གནས་ལྟ་ཞིབ་ཁང་གིས་གསལ་བསྒྲགས་དེར་ཞིབ་འཇུག་གནང་རྗེས་གསལ་བསྒྲགས་དེ་རྒྱ་ནག་གི་གཞུང་འབྲེལ་གྱིས་སྤེལ་བའི་ཡིག་ཆ་ཞིག་ཡིན་པ་ཤེས་རྟོགས་བྱུང་སྐོར་བཀོད་འདུག རྩ་བའི་རྒྱ་ནག་གཞུང་འབྲེལ་གྱི་གསལ་བསྒྲགས་དེ་ནི་རྒྱ་ནག་གཞུང་དང་ཧོང་ཀོང་གི་མང་གཙོའི་ཡར་ལངས་པའི་བར་དུ་འགལ་འདུ་དྲག་པོ་འགྲོ་བཞིན་པའི་གནས་སྐབས་སུ་སྤེལ་བ་ཞིག་ཡིན་པ་རེད། ཧོང་ཀོང་གི་ནང་འདི་ལོའི་སྤྱི་ཟླ་དྲུག་པ་ནས་བཟུང་ཉེས་ཅན་རྩིས་སྤྲོད་དགོས་པའི་ཁྲིམས་འཆར་ལ་ངོ་རྒོལ་གྱིས་རྔམ་སྟོན་ཁྲོམ་སྐོར་རབ་དང་རིམ་པ་འབྱུང་བཞིན་པའི་ཁྲོད་ཉེ་བའི་ཆར་ཧོང་ཀོང་གི་གཙུག་ལག་སློབ་གྲྭ་བཅུ་གྲངས་ཤིག་གི་སློབ་མ་ཁག་གཅིག་རི་བོ་ཇོ་མོ་གླང་མར་ལྟ་སྐོར་ཏུ་ཕྱིན་ནས་ཀོང་ཧོང་ལ་བཅིངས་ཀྲོལ་དགོས་པའི་སྐད་འབོད་གནང་བར་བརྟེན་ཁོང་རྣམས་རྒྱ་ནག་སྲིད་གཞུང་གིས་འཛིན་བཟུང་བཀག་ཉར་བྱས་པའི་གནས་ཚུལ་བྱུང་ཡོད་པ་རེད། འདི་ལོའི་ཟླ་བ་བརྒྱད་པའི་མགོ་སྟོད་དུ་རྒྱ་གཞུང་གིས་བོད་ཁུལ་དུ་སྐད་འཕྲིན་ལ་དམ་དྲག་དང་འབྲེལ་བའི་གསལ་བསྒྲགས་ཤིག་སྤེལ་བར་རྒྱ་གཞུང་གིས་ཧོང་ཀོང་ནང་གི་གནད་དོན་དང་འབྲེལ་བའི་གསལ་བསྒྲགས་ཕྱི་ལ་མ་སྤེལ་བའི་སྔོན་དུ་སྐད་འཕྲིན་ནང་ཧོང་ཀོང་གི་གནད་དོན་དང་འབྲེལ་བའི་ཡིག་ངག་གི་གནས་ཚུལ་འདོན་སྤེལ་བྱ་ཚེ་ལོ་བརྒྱད་ཀྱི་ཁྲིམས་ཐག་གཅོད་ངེས་ཡིན་པའི་ཉེན་བརྡ་བཏང་བ་ཡང་འཁོད་ཡོད་པ་རེད།

བོད་རིགས་ཡིན་པའི་འདུ་ཤེས་ཐོག་ནས་ལྷག་བསམ་སྙིང་སྟོབས་ཞུམ་པ་མེད་པར་བསྡད་རྒྱུ་དེ་བརྟན་བཞུགས་ངོ་མ་རེད།

ཤང་དགའ་ལྡན་ཆོས་འཁོར་གླིང་དང་བོད་མིའི་སྤྱི་མཐུན་མཉམ་སྦྲེལ། སྨན་ཤོད་གོ་འཇོ་མི་མང་། འབྲུག་སྡོད་བོད་མི། མདོ་ཁམས་ཆུ་བཞི་སྒང་དྲུག ཞབས་ཟུར་རབ་སྒང་བསོད་ནམས་དཔལ་འབྱོར་ནང་མི་བཅས་ནས་དེ་རིང་ཟླ་ ༩ ཚེས་ ༡༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མགོན་པོ་༸གང་ཉིད་མཆོག་༸སྐུ་ཚེ་༸ཞབས་པད་ཡུན་དུ་བརྟན་ཕྱིར་སྨིན་གླིང་གཏེར་བདག་གླིང་པའི་གཏེར་ཆོས་ཀྱི་ནང་ནས་ཚེ་སྒྲུབ་ཡོངས་སྙིང་ཀུན་བསྡུས་ཆོ་གའི་སྒོ་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུས་སོང་བ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་ཡིན་པའི་འདུ་ཤེས་ཐོག་ནས་ལྷག་བསམ་སྙིང་སྟོབས་ཞུམ་པ་མེད་པར་བསྡད་རྒྱུ་དེ་བརྟན་བཞུགས་ངོ་མ་རེད་ཅེས་བཀའ་བསྩལ་མཛད་སོང་། དེ་རིང་ཟླ་ ༩ ཚེས་ ༡༣ ཉིན་སྔ་དྲོ་ཚོུད་ ༦ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཡང་སྟེང་དུ་རྙིང་མ་ཐེག་ཆེན་རྣམ་གྲོལ་གླིང་གི་༸་སྐྱབས་རྗེ་གྱང་ཁང་མཆོག་སྤྲུལ་རིན་པོ་ཆེ་མཆོག་དབུ་བཞུགས་ཐོག་དགེ་འདུན་འདུས་མང་ནས་༸སྐུའི་ཚེ་སྒྲུབ་གནང་གྲུབ་མཚམས་སུ་ཚོུད་ ༨༌༣༠ ཐོག་བོད་མིའི་ཚོགས་ཁག་དེ་དག་གི་རང་ཁོངས་ཀྱི་ཕེབས་བསུ་བ་རྣམས་ནས་ཕེབས་བསུ་ཞུ་ཐོག་བོད་ཀྱི་ཟློས་གར་ཚོགས་པས་རོལ་ཆ་འབུལ་བཞིན་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་༸རྒྱལ་བའི་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་མཛད་ཡོད། གཞིས་བཞུགས་བོད་མི་གཙོ་བོར་གྱུར་པའི་འཛམ་བུ་གླིང་ཕྱོགས་བཞི་མཚམས་བརྒྱད་དུ་ཡོད་པའི་བོད་རིགས་ཚང་མས་རང་ཉིད་བོད་རིགས་ཤིག་ཡིན་བསམ་པའི་འདུ་ཤེས་འཛིན་ཐོག་སོ་སོའི་ཆོས་དང་རིག་གཞུང་ལ་དགའ་ཞེན་གནང་ནས་ལྷག་བསམ་སྙིང་སྟོབས་ཞུམ་པ་མེད་པར་བསྡད་རྒྱུ་དེ་མགོན་པོ་༸གང་ཉིད་མཆོག་ལ་བརྟན་བཞུགས་ངོ་མ་ཆགས་ཀྱི་རེད་ཅེས་བཀའ་བསྩལ་སོང་། དེ་བཞིན་མགོན་པོ་མཆོག་གིས་བོད་མི་རྣམས་ནས་གཅིག་གྱུར་གྱི་ཐོག་ནས་མགོན་པོ་མཆོག་ལ་བློ་གཏད་ནས་བསྡད་ཡོད་པའི་ཁྲོད་ཐོག་མར་བཙན་བྱོལ་དུ་འབྱོར་བ་ནས་བཟུང་ད་བར་མི་ལོ་ ༦༠ ལྷག་ཙམ་ཕྱིན་པའི་རྗེས་སུའང་རྡོག་རྩ་གཅིག་ཏུ་དྲིལ་ནས་བསྡད་མཁན་བོད་མི་ལྟར་བཙན་བྱོལ་བ་གཞན་མེད་སྐོར་བཀའ་བསྩལ་བ་དང་འབྲེལ། རྒྱ་གར་གཞུང་གི་མཐུན་འགྱུར་དང་བཀའ་འདྲིན་ལ་བརྟེན་ནས་བཙན་བྱོལ་ནང་ཐོག་མར་ཤེས་ཡོན་དང་དེ་རྗེས་གཞིས་ཆགས་སྲ་བརྟན་བཅས་བོད་མིའི་མི་རབས་རྒན་གཞོན་ཚང་མས་རྒྱུན་འཛིན་ཐུབ་པའི་ཕྱག་ལས་གནང་སྟེ་བོད་སྤྱིའི་བསྟན་སྲིད་ཀྱི་སེམས་ཁུར་བླངས་ནས་ས་གནས་གང་དུ་ཕྱིན་ཡང་བོད་ཀྱི་ཚབ་བྱས་ཏེ་གང་ཡོང་ཅི་ཡོང་གནང་ཡོད་པ་དང། བོད་ཀྱི་ཆོས་རྒྱལ་རྣམས་དང་མཁན་ཆེན་ཞི་བ་འཚོ་གཙོ་གྱུར་མཁན་སློབ་ཆོས་གསུམ་བཅས་ནས་ཕྱི་ནང་གི་རྒྱུ་རྐྱེན་དུ་མར་གདོང་ལེན་གནང་སྟེ་དཔལ་ནཱ་ལེནྡཱའི་ཆོས་བརྒྱུད་ཟབ་པ་དང་རྒྱ་ཆེ་བའི་སངས་རྒྱས་གཞུང་ཆེན་མོ་དག་ཐོས་བསམ་སྒོམ་གསུམ་ཡ་མ་བྲལ་བ་བོད་དུ་དར་སྤེལ་གནང་ཡོད་པ་ལྟར། དེང་སྐབས་འཛམ་གླིང་ཐོག་ནང་པའི་གཞི་ལམ་འབྲལ་གསུམ་གྱི་རྣམ་གཞག་འགྲེལ་བཤད་རྒྱག་ཐུབ་མཁན་ཡག་ཤོས་དེ་བོད་ཀྱི་སྐད་ཡིག་ཆགས་ཡོད་སྟབས། བོད་མི་ཚོས་སོ་སོའི་ཆོས་དང་རིག་གཞུང་བདག་གཅེས་གནང་བ་ཙམ་མིན་པར་འཛམ་བུ་གླིང་སྤྱི་ལ་སྨིན་པའི་ནུས་པ་དང་ཆ་རྐྱེན་ཡོད་པ་བཞིན་ཚང་མས་སྔར་བཞིན་ཐུགས་ཁུར་བླངས་ཏེ་ས་དགེ་དཀའ་རྙིང་བོན་དང་བཅས་པ་རིས་མེད་ཚང་མས་སྔར་བཞིན་ཧུར་སྐྱེད་གནང་དགོས་པའི་ལམ་སྟོན་བཀྲིན་བསྩལ་ཡོད། བརྟན་བཞུགས་བསྟར་འབུལ་སྐབས་རྙིང་མ་ཐེག་ཆེན་རྣམ་གྲོལ་གླིང་གི་༸་སྐྱབས་རྗེ་གྱང་ཁང་མཆོག་སྤྲུལ་རིན་པོ་ཆེ་མཆོག་རྡོ་རྗེ་སློབ་དཔོན་གནང་སྟེ་སྨིན་གླིང་གཏེར་བདག་གླིང་པའི་གཏེར་ཆོས་ཀྱི་ནང་ནས་ཚེ་སྒྲུབ་ཡོངས་སྙིང་ཀུན་བསྡུས་ཆོ་གའི་སྒོ་ནས་༸གོང་ས་མཆོག་ལ་གསོལ་འདེབས་ཞུས་གནང་སོང་བ་དང་། སྐབས་དེར་བོན་གྱི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག འོག་མིན་ཨྱོན་སྨིན་གྲོལ་གླིང་གི་མཁོ་ཁྱིམ་རིན་པོ་ཆེ་མཆོག བཀའ་བརྒྱུད་འཛི་སྒར་དགོན་པའི་འཛི་སྒར་མཆོག་སྤྲུལ་རིན་པོ་ཆེ་མཆོག ས་སྐྱ་རྫོང་སར་བཤད་གྲྭའི་གདོང་ཚང་ཞབས་དྲུང་རིན་པོ་ཆེ་མཆོག དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་བཅས་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་སྤྲུལ་སྐུ་ཚབ་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་ཚོགས་པ་ཁག་གི་འཐུས་མི། དེ་བཞིན་གཉུག་མར་གནས་པ་དང་བློ་བུར་ལྷགས་པའི་སེར་སྐྱ་མང་ཚོགས་བཅས་སོགས་ཕེབས་འདུག བརྟན་བཞུགས་ཀྱི་མཛད་རིམ་ཡོངས་སུ་གྲུབ་པ་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རེས་བོད་རྒྱ་ཆེ་མང་ཚོགས་ཡོངས་ཀྱི་ཚབ་བྱས་ཏེ་ལྷག་བསམ་དཀར་པོའི་ཐོག་ནས་བརྟན་བཞུགས་བསྟར་འབུལ་ཞུས་པར་ཐུགས་རྗེ་ཆེ་ཞེས་བཀའ་བསྩལ་བ་དང་སྦྲགས། ཉེ་ཆར་མགོན་པི་༸གང་ཉིད་མཆོག་གི་༸སྐུའི་འཕྲོད་བཞེས་བརྟག་དཔྱད་གནང་བའི་ཁྲོད་མགོན་པོ་མཆོག་གི་༸སྐུ་གཟུགས་ཀྱི་གནས་སྟངས་ཡག་པོ་ཡོད་པ་ལྟར། དགུང་ལོ་བརྒྱ་ཕྲག་བར་བཞུགས་རྒྱུའི་སེམས་ཤུགས་དང་ཡིད་ཆེས་ཡོད་པ་ལྟར་ཚང་མ་བློ་བདེ་པོ་བྱས་ནས་སྡོད་ཨ་ཞེས་ཐུགས་བརྩེ་བ་ཆེན་པོས་བཀའ་བཞེས་བཟང་པོ་སྨིན་བསྩལ་མཛད་སོང་། ༸སྐུ་པར་དཔལ་ལྡན་དགའ་ལྡན་ཕོ་བྲང་།    

རྒྱལ་ཚོགས་ཀྱི་ལྷན་ཚོགས་ཐོག་བླ་རུང་སྒར་དང་ཡ་ཆེན་སྒར་གྱི་གནད་དོན་གླེང་བ།

ཇི་ནི་ཝའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༢ ཐོག་རྒྱ་ནག་གཞུང་གི་སྟོར་བཤིག་གཏོང་བཞིན་པའི་བོད་ཀྱི་ནང་བསྟན་སློབ་གླིང་ཆེ་གྲས་བླ་རུང་སྒར་དང་ཡ་ཆེན་སྒར་གྱི་གནས་བབས་སྙན་སེང་ཞུས་པ་དང་འབྲེལ། ཡ་ཆེན་སྒར་དང་བླ་རུང་སྒར་གཙོས་པའི་བོད་ཀྱི་ས་ཁུལ་ཁག་ཏུ་སྤེལ་བཞིན་པའི་འཛུགས་སྐྲུན་གྱི་ལས་གཞི་ཁག་ལ་དོ་སྣང་གནང་སྐྱོང་ཡོང་བའི་ནན་སྐུལ་ཞུས་འདུག ཁ་སང་རྒྱལ་ཚོགས་ཀྱི་འཛུགས་སྐྲུན་དང་རང་དབང་མཁས་ལས་རྟོག་ཞིབ་པས་འཛམ་གླིང་ནང་ཡུལ་གྲུ་ཁག་ཏུ་གཞུང་སྒེར་ཁག་ནས་སྤེལ་བཞིན་པའི་འཛུགས་སྐྲུན་ལས་གཞིའི་ཐོག་ཞིབ་འཇུག་སྙན་ཐོ་རྒྱལ་ཚོགས་ཀྱི་ལྷན་ཚོགས་སུ་འགོད་འབུལ་ཞུས་ཏེ་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ཁག་ནས་གླེང་སློང་བྱ་རྒྱུའི་ཚོགས་དུས་ཐོག་བོད་མིའི་སྒྲིག་འཛུགས་ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་འགན་འཛིན་འབྲུག་ལྡན་སྐྱིད་ལགས་ཀྱིས་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ Helsinki Foundation མཚན་ཐོག་ནས་བོད་ནང་རྒྱ་གཞུང་གི་འཛུགས་སྐྲུན་ལས་གཞིའི་ཐོག་བོད་ཀྱི་ས་གནས་མང་ཚོགས་ཀྱི་སྤྱི་ཚོགས་དང་དཔལ་འབྱོར། རིག་གཞུང་སྲུང་སྐྱོབ་ཀྱི་རང་དབང་ལ་རྩིས་མེད་རྡོག་རོལ་གཏོང་བཞིན་ཡོད་སྐོར་སྙན་སེང་ཞུས་འདུག ཁོང་ནས་རྒྱ་གཞུང་གིས་འཛུགས་སྐྲུན་ལས་གཞིའི་མིང་ཐོག་ནས་བོད་ཀྱི་ས་ཁུལ་དུ་གཏེར་ཁ་སྔོག་འདོན་དང་། ཆུ་རགས་ལས་གཞི་སོགས་ཀྱི་ཐོག་ནས་བོད་པའི་འབྲོག་པ་ས་ཡ་གཉིས་ཀྱི་རྩྭ་ཐང་ནས་གནས་སྤོས་བྱས་ཡོད་པ་དང་། ལྷག་པར་དུ་ཉེ་སྔོན་བོད་འབྲི་རུ་རྫོང་གི་རྒྱ་གཞུང་གིས་གཏེར་འདོན་ལས་གཞིར་ཞི་རྒོལ་འོག་འཛིན་བཟུང་བྱས་པའི་བོད་མི་དེ་དག་ད་ཆ་གང་དུ་ཡོད་མེད་ཀྱི་གནས་སྟངས་ཁ་གསལ་ཤེས་རྟོགས་དགོས་པ། རྒྱལ་ཚོགས་ཀྱི་ལྷན་ཚོགས་ཀྱི་ངོས་ནས་རྒྱ་གཞུང་ལ་ད་བར་ཡར་ཆེན་སྒར་དང་བླ་རུང་སྒར་བཅས་ནས་གྲྭ་བཙུན་ཕྱིར་ཕུད་བཏང་བའི་ཞིབ་ཕྲའི་གྲངས་ཐོ་གསལ་འདོན་བྱ་རྒྱུར་ནན་སྐུལ་གནང་དགོས་པ་ཞུས་འདུག དེ་དང་ཕྱོགས་མཚུངས་ཇི་ནི་ཝའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༢ པ་དང་བསྟུན། ཁ་སང་ཕྱི་ཚེས་ ༡༢ ཉིན་ཕྱི་དྲོ་རྒྱལ་ཚོགས་ཀྱི་ཚོགས་ཁང་དུ་བོད་ནང་རྒྱ་ནག་གཞུང་གིས་འཛུགས་སྐྲུན་དང་གཏོར་སྐྱོན་ཞེས་པའི་བརྗོད་གཞི་ཐོག་ཟུར་ཚོགས་ཤིག་ཆེད་བསྐོང་གནང་སོང་བ་དང། འདིའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་རྒྱ་གཞུང་གིས་བོད་ནང་སྤེལ་བཞིན་པའི་དཔལ་འབྱོར་ཡར་རྒྱས་དང་འཛུགས་སྐྲུན་ལས་གཞིས་བོད་ནང་གི་ས་གནས་མང་ཚོགས་དང་རང་བྱུང་ཁོར་ཡུག་ལ་ཕན་ཐོགས་པ་ལས་དོ་ཕོག་ཆེ་བ་བཏང་ཡོད་ཅེས་གསུངས་སོང་། དྭགས་པོ་བསོད་ནམས་ནོར་བུ་ལགས་ཀྱིས་བོད་དེ་ས་བབ་ཀྱི་ཆ་ནས་འཛམ་གླིང་ཡར་རྩེར་ཆགས་ཡོད་སྟབས་འཛུགས་སྐྲུན་གྱི་ལས་གཞི་གང་འདྲ་ཞིག་སྤེལ་རུང་བོད་ཀྱི་རང་བྱུང་ཁོར་ཡུག་ལ་དོ་ཕོག་འགྲོ་ཡི་ཡོད་པ་དང་། འོན་ཀྱང་ད་བར་རྒྱ་ནག་གཞུང་གིས་བོད་མི་མང་ཚོགས་ཀྱི་མངོན་འདོད་དང་བོད་མི་རིགས་ཀྱི་རིག་གཞུང་། དེ་བཞིན་འཚོ་བའི་གོམས་སྲོལ་བཅས་ལ་རྩིས་འཇོག་མེད་པར་བོད་ཀྱི་ས་གནས་ཁག་ཏུ་གཏེར་ཁ་སྔོག་འདོན་དང། ཆུ་རགས་གསར་རྒྱག མེ་འཁོར་ལྕགས་ལམ་གསར་འཛུགས། འབྲོག་པོ་གནས་སྤོས། དགོན་སྡེ་གཏོར་སྐྱོན། དེ་བཞིན་བོད་ཀྱི་ས་གནས་ཁག་ཏུ་རྒྱ་རིགས་མི་འབོར་དབོར་འདྲེན་བཅས་ཀྱི་དཔལ་འབྱོར་འཛུགས་སྐྲུན་ལས་གཞི་དེ་དག་གིས་ད་ལྟའི་ཆར་བོད་མཐོ་སྒང་གི་རང་བྱུང་ཁོར་ཡུག་དང་བོད་མིའི་ངོ་བོ། རིག་གཞུང་བཅས་པར་སྲུང་སྐྱོབ་ལ་ཕན་ཐོགས་པ་ལས་དོ་ཕོག་ཆེ་བ་བཏང་ཡོད་ཅེས་གསུངས་ཡོད། ལྷག་པར་དུ་རྒྱ་ནག་གཞུང་གིས་བོད་ཀྱི་ས་ཁུལ་ཁག་ཏུ་དཔལ་འབྱོར་དང་འཛུགས་སྐྲུན་གྱི་ལས་གཞི་ལག་བསྟར་བྱེད་བཞིན་པ་དེ་དག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འབྲུ་དོན་དང་སྒོས་རྒྱ་གཞུང་གི་རང་ཉིད་ཀྱི་རྩ་ཁྲིམས་ནང་གསལ་བའི་ཁྲིམས་སྒྲིག་དང་ཡོངས་སུ་འགལ་ཡོད་པར་གསུངས་སོང་། ཟུར་ཚོགས་དེའི་ཐོག་གསུང་བཤད་གནང་མཁན་འཇར་མ་ནི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་ Kai muller ལགས་ཀྱིས་ད་བར་རྒྱ་ནག་གཞུང་གིས་བོད་ནང་སྤེལ་བཞིན་པའི་འཛུགས་སྐྲུན་སྲིད་བྱུས་འོག་བོད་ནང་གི་ཞིང་འབྲོག་ཁག་གི་མང་ཚོགས་ལ་དོ་ཕོག་ཧ་ཅང་གི་ཆེན་པོ་ཐེབས་ཡོད་པ་དང་། བོད་ཀྱི་ས་ཁུལ་དུ་འཛུགས་སྐྲུན་གྱི་ལས་གཞི་གང་འདྲ་ཞིག་སྤེལ་རུང་རྒྱ་གཞུང་གི་ཁེ་ཕན་ཁོ་ནའི་ཆེད་དང་བཙན་དབང་འོག་ནས་མ་ཡིན་པར་ས་གནས་བོད་མིའི་གོམས་སྲོལ་དང་རིག་གཞུང་། ཁོར་ཡུག་ལ་གུས་རྩིས། ལྷག་པར་དུ་འགྲོ་བ་མིའི་ཐོབ་ཐང་གཞིར་བཞག་ཐོག་སྤེལ་དགོས་ཞེས་གསུངས་ཡོད་པ་རེད། ཐེངས་འདིའི་རྒྱལ་ཚོགས་ཀྱི་ཚོགས་ཁང་དུ་ཚོགས་པའི་བོད་དོན་ཟུར་ཚོགས་ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གི་གཞུང་ཚབ་མི་སྣ་དང་། རྒྱལ་སྤྱིའི་གཞུང་འབྲེལ་མིན་པའི་ཚོགས་པའི་སྐུ་ཚབ། དེ་བཞིན་མི་དང་རྒྱ་རིགས་བཅས་ཁྱོན་མི་གྲངས་ ༥༠ ཙམ་འདུ་བྱུང་འདུག

རྒྱ་ནག་གི་གྲོང་ཁྱེར་ Wuxi Huishan དང་ཨོ་གླིང་གི་གྲོང་ཁྱེར་ Maribyrnong གཉིས་ཀྱི་སྤྲུན་སྲིང་གི་གྲོས་གཞི་ཕྱིར་འཐེན།

ཁ་སང་ཨ་རིར་རྟེན་གཞི་བྱས་པའི་ The Epoch Times གསར་ཁང་གིས་ཁ་ཉིན་ཕྱི་ཚེས་ ༡༠ ཉིན་ཨོ་གླིང་ Melbourne ཁུལ་གྱི་གྲོང་ཁྱེར་ Maribyrnong དང་རྒྱ་ནག་གི་ Wuxi Huishan གྲོང་ཁྱེར་གཉིས་ཀྱི་བར་དུ་སྤྲུན་སྲིང་གི་འབྲེལ་ལམ་འཛུགས་རྒྱུའི་ཚོགས་འདུ་ཚོགས་སྐབས་ཝེ་ཏི་ནམ་དང་བོད་མིའི་མཚོན་པའི་ཨེ་ཤ་ཡ་མི་མང་བརྒྱ་སྐོར་ཞིག་གིས་ཚོགས་འདུ་དེར་ངོ་རྒོལ་བྱས་པར་བརྟེན། གྲོང་ཁྱེར་ Maribyrnong གྲོང་སྡེ་སྤྱི་ཁྱབ་པ་སྐུ་ཞབས་ Martin Zakharov ལགས་ཀྱིས་སྐབས་དེའི་ངོ་རྒོལ་བའི་མི་མང་ལ་དགོངས་སེལ་ཞུས་ཏེ་སྤྲུན་སྲིང་གྲོང་ཁྱེར་གྱི་འབྲེལ་ལམ་འཛུགས་རྒྱུ་དེ་ཕྱིར་འཐེན་གནང་ཡོད་པ་ཡོངས་བསྒྲགས་གནང་འདུག   སྐབས་དེའི་ངོ་རྒོལ་སྐད་འབོད་སྐབས་སུ་ཝེ་ཏི་ནམ་གྲོང་སྡེའི་འགོ་ཁྲིད་གཞོན་པ་ཀྱང་ལས་འགུལ་དེའི་ནང་ཞུགས་ཡོད་པ་མ་ཟད་ཁོང་གིས་གསར་ཁང་ལ་ Maribyrnong གྲོང་ཁྱེར་གྱི་ས་གནས་སྲིད་གཞུང་གིས་རྒྱ་ནག་གི་དམ་དྲག་འོག་ནས་མནར་གཅོད་མྱོང་མཁན་རྣམས་ཀྱི་འབོད་སྒྲ་ལ་ཉན་དགོས་པ་དང་། དེ་ལས་སློབ་སྦྱོང་ལེན་དགོས་པའི་འབོད་སྐུལ་ཞུས་པ་དང་སྦྲགས། སྲིད་གཞུང་གིས་འོས་འཕེན་མཁན་མི་མང་གི་སེམས་ཚོར་ལ་ཞིབ་ནན་གྱིས་བསམ་བློ་གཏོང་དགོས་ཞེས་བརྗོད་ཡོད་པ་འཁོད་འདུག གཞན་ཡང་སྐབས་དེར་ Fu Feng ཟེར་བའི་ངོ་རྒོལ་བ་ཞིག་གིས་གྲོས་ཆོད་གང་འཇོག་གི་ཡོད་ན་སྔོན་འགྲོའི་ཆ་རྐྱེན་དེ་འགྲོ་བ་མིའི་ཐོབ་ཐང་གི་གནད་དོན་ཆགས་ཀྱི་ཡོད་པ་བརྗོད་དེ། གྲོང་སྡེའི་སྤྱི་ཁྱབ་པས་ཐེངས་འདིའི་གྲོས་གཞི་དང་འབྲེལ་ནས་མི་མང་གི་བསམ་ཚུལ་ལ་རྒྱུས་ལོན་བྱས་མེད་པར་བརྗོད་པ་དང་སྦྲགས་ཏེ་རྒྱ་ནག་དམར་ཤོག་སྲིད་གཞུང་གིས་སྟོབས་ཤུགས་དང་སྒོར་མོ་སྤྱད་ནས་ཅི་ཡང་ཉོ་ཐུབ་ཀྱི་ཡོད་པར་བསམ་བཞིན་ཡོད་ནའང་། དོན་དངོས་དེ་འདྲ་ཞིག་མ་རེད། ང་ཚོ་མང་གཙོའི་སྲིད་གཞུང་ནང་བསྡད་ཡོད་སྟབས་སྲིད་གཞུང་གིས་གྲོས་གཞི་དེ་ཡོངས་སུ་ཕྱིར་འཐེན་མ་བྱས་བར་དུ་ང་ཚོས་སྲིད་གཞུང་ལ་བཏང་འཛིན་བྱེད་ངེས་ཡིན་བརྗོད་ཡོད་པ་མ་ཟད་དམར་ཤོག་སྲིད་གཞུང་གིས་རྒྱ་ནག་མི་མང་གི་ངོ་ཚབ་མཚོན་ཐུབ་ཀྱི་མ་རེད་ཅེས་སྐྱོབ་བརྗོད་གནང་འདུག དེ་བཞིན་ཨོ་གླིང་གི་གྲོང་ཁྱེར་ Melbourne ནང་དུ་རྟེན་གཞི་བྱས་པའི་གནམ་སྡེ་སྒོར་མོ་ཆེའི་དུས་བབ་གསར་ཁང་གི་སྤྱི་ཁྱབ་རྩོམ་སྒྲིག་པ་སྐུ་ཞབས་ Zhai Jie ལགས་ཀྱིས་རྒྱ་ན་གིས་དུས་རྒྱུན་ནས་རྒྱལ་སྤྱིའི་མཉམ་གནས་ཀྱི་འབྲེལ་ལམ་ཞེས་པ་བརྒྱུད་ནས་ནུབ་ཕྱོགས་ཀྱི་སྤྱི་ཚོགས་ཁྲོད་དུ་དམར་ཤོག་གི་ལྟ་བ་དང་དེའི་ལྐོག་ཟ་རུལ་སུངས་ཀྱི་ཤན་ཤུགས་ཁྱབ་སྤེལ་གཏོང་ཐབས་བྱས་ཏེ་མང་གཙོའི་ལམ་ལུགས་ལ་གཏོར་བཅོམ་གཏོང་རྒྱུའི་དམིགས་ཡུལ་བཅངས་ཡོད་པ་བརྗོད་འདུག སྐབས་དེར་ངོ་རྒོལ་སྐད་འབོད་ལ་ཞུགས་ཡོད་པའི་ཨོ་གླིང་གི་མངའ་སྡེ་ Victoria ཡི་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐུ་ཞབས་བསྟན་འཛིན་ཁང་གསར་ལགས་ཀྱིས་ཀྱང་གཏམ་བཤད་སྤེལ་ནས་དེ་རིང་ང་ཚོ་མི་མང་གི་སྟོབས་ཤུགས་གཅིག་ཏུ་སྒྲིལ་ཏེ་སླར་རྒྱ་ནག་གི་བཙན་འཛུལ་ལ་ཁ་གཏད་བཅག་ཡོད་པ་གསུངས་ཡོད་པ་དང་། ཝེ་ཏི་ནམ་གྱི་སྤྱི་མཐུན་ཚོགས་པའི་ཚོགས་གཙོས་ཀྱང་ཨོ་གླིང་སྲིད་གཞུང་གིས་རྒྱ་ནག་གི་རྒྱུད་གཅིག་ལམ་གཅིག་གི་སྲིད་བྱུས་ལ་མོས་མཐུན་གྱི་མཚན་རྟགས་བཀོད་ཡོད་སྟབས། ང་ཚོ་མི་མང་གིས་སྲིད་གཞུང་ལ་གནོད་ཤུགས་སྤྲད་ནས་གྲོས་མཐུད་དེ་ཕྱིར་འཐེན་བྱེད་དུ་འཇུག་རྒྱུའི་འགན་འཁྲི་ཡོད་པ་སོགས་ཀྱང་དྲན་གསོ་གནང་འདུག དེ་བཞིན་ཨོ་གླིང་དུ་རྒྱ་ནག་གི་ཁུང་ཙི་སློབ་གླིང་ཡོད་པ་རྣམས་ཀྱང་འཕྲད་དུ་སྒོ་རྒྱག་དགོས་བ་སོགས་ཀྱི་སྐྱོན་བརྗོད་བྱེད་མཁན་ཡང་བྱུང་འདུག  རླུང་འཕྲིན་ཁང་གིས་ཁུལ་དེའི་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐུ་ཞབས་བསྟན་འཛིན་ཁང་གསར་ལགས་སུ་གནས་ཚུལ་དེ་འབྲེལ་བཅར་འདྲི་ཞུས་པར་ཁོང་གིས་ཐེངས་འདིར་ཝེ་ཏི་ནམ་དང་བོད་རིགས་གཉིས་ཀྱིས་གཙོས་པའི་ཚོགས་པ་མང་པོས་དུས་གཅིག་ལ་ཡུལ་དངོས་སུ་གྲོས་གཞི་དེར་ངོ་རྒོལ་སྐད་འབོད་གནང་རྗེས་གྲོས་གཞི་དེ་ཕྱིར་འཐེན་གནང་ཡོད་པ་དང་། མ་འོངས་པར་ཡང་མངའ་སྡེ་གཞུང་གིས་རྒྱ་ནག་གི་རྒྱུད་གཅིག་ལམ་གཅིག་གི་སྲིད་བྱུས་ལ་རྒྱབ་སྐྱོར་བྱེེད་བཞིན་པ་དེར་མུ་མཐུད་ནས་ཞུ་གཏུགས་བྱས་ཏེ་ཕྱིར་འཐེན་བྱེད་ཐུབ་པར་རེ་ཆེན་པོ་ཡོད་པར་གསུངས་སོང་།

བོད་ཀྱི་གློག་བརྙན་དུས་སྟོན་ཐོག་དོན་གྲུབ་དབང་ཆེན་ལགས་ལྷན་ཞུགས།

འཇིགས་བྲལ་གློག་བརྙན་ཞེས་པ་བཟོ་སྐྲུན་གནང་རྐྱེན་ལོ་དྲུག་རིང་རྒྱ་ནག་གི་བཙོན་ཁང་དུ་བཙོན་འཇུག་གནང་མྱོང་ཡོད་པའི་བོད་མི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དངོས་སུ་ལྷན་ཞུགས་ཐོག་སུད་སི་ནང་བོད་ཀྱི་གློག་བརྙན་དུས་སྟོན་དབུ་བརྙེས་ནས་མི་ལོ་བཅུ་འཁོར་བར་སྲུང་བརྩི་ཞུས་སོང་། རྩ་བའི་བོད་ཀྱི་གློག་བརྙན་དུས་སྟོན་འམ་ Filming For Tibet ཞེས་པའི་དུས་སྟོན་དེ་ནི་ཕྱི་ལོ་ ༢༠༠༨ པེ་ཅིང་ཨོ་ལམ་པིག་རྩེད་འགྲན་ཚོགས་སྐབས་ལོ་དེར་བོད་ནང་ཆེད་བསྐྱོད་ཀྱིས་དངོས་འབྱུང་གློག་བརྙན་འཇིགས་བྲལ་ཞེས་པ་བཟོ་སྐྲུན་གནང་མཁན་དོན་གྲུབ་དབང་ཆེན་ལགས་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་རྗེས་སུད་སི་གནས་སྡོད་ཁོང་གི་སྤུན་མཆེད་འཇམ་དབྱངས་ཚུལ་ཁྲིམས་ལགས་ཀྱིས་དོན་གྲུབ་དབང་ཆེན་ལགས་ཀྱི་ཕུགས་བསམ་དང་བོད་ནང་གི་བོད་མིའི་མངོན་འདོད་རྣམས་རྒྱལ་སྤྱིའི་ཐོག་གློག་བརྙན་བརྒྱུད་ནས་དྲིལ་བསྒྲགས་གོ་རྟོགས་སྤེལ་ཆེད་དུ་དབུ་འཛུགས་གནང་བའི་གློག་བརྙན་དུས་སྟོན་ཞིག་ཡིན་པ་རེད། སུད་སིར་རྟེན་གཞི་བྱས་པའི་བོད་ཀྱི་གློག་བརྙན་དུས་སྟོན་ཚོགས་པའི་ངོས་ནས་ལོ་ལྟར་སུད་སི་གྲོང་ཁྱེར་ཛུ་རིག་དང་དེ་བཞིན་བཞུགས་སྒར་དྷ་རྨ་ས་ལ་གཉིས་སུ་གློག་བརྙན་དུས་སྟོན་དེ་ཚོགས་ཀྱི་ཡོད་པ་དང་། ལྷག་པར་དུ་དོན་གྲུབ་དབང་ཆེན་ལགས་རྒྱ་ནག་གི་བཙོན་ཁང་ནས་བཙོན་གྲོལ་ཐོབ་རྗེས་ད་རེས་གློག་བརྙན་དུས་སྟོན་ཐོག་དངོས་སུ་ལྷན་ཞུགས་གནང་བ་ཆེས་ཐོག་མ་ཆགས་ཀྱི་ཡོད་པ་རེད། འདི་ག་རླུང་འཕྲིན་ཁང་གིས་ཐེངས་འདིའི་གློག་བརྙན་དུས་སྟོན་དང་བསྟུན་དོན་གྲུབ་དབང་ཆེན་ལགས་སུ་བཅར་འདྲི་ཞུས་པར་ཕྱི་ལོ་ ༢༠༠༨ རྗེས་ནས་བོད་ས་ཡོངས་རྫོགས་ཀྱི་གནས་སྟངས་སྡུག་ཏུ་ཕྱིན་ནས་བོད་དེ་ད་ཆ་འཛམ་གླིང་གི་བཙོན་ཁང་ཆེ་ཤོས་ལྟ་བུར་གྱུར་ཡོད་ཅེས་གསུངས་པ་ཆབས་ཅིག རྒྱ་གཞུང་གིས་ད་བར་བོད་ནང་གི་བོད་མིའི་ཐོག་འཛིན་པའི་ནོར་འཁྲུལ་ཅན་གྱི་སྲིད་བྱུས་ལ་ངོས་འཛིན་གྱིས་བསྒྱུར་བཅོས་གཏོང་དགོས་པ་གསུངས་སོང་། འདི་ལོར་བོད་ཀྱི་གློག་བརྙན་དུས་སྟོན་དབུ་བརྙེས་ནས་ལོ་བཅུ་འཁོར་བའི་མཛད་སྒོ་དེ་དེ་རིང་ཟླ་ ༩ ཚེས་ ༡༢ ཉིན་སུད་སི་གྲོང་ཁྱེར་ཛུ་རིག་ནང་བོད་ཀྱི་གློག་བརྙན་དུས་སྟོན་ཚོགས་པ་དང་ཡོ་རོབ་བོད་ཀྱི་གཞོན་ནུ་མཐུན་ཚོགས་ཀྱིས་གོ་སྒྲིག་གནང་གི་ཡོད་པ་རེད། བོད་མི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་ཁོང་གི་སྐུ་ཟླ་ལྷ་མོ་མཚོ་ལགས་དང་། བོད་ཀྱི་གློག་བརྙན་དུས་སྟོན་གྱི་ཚོགས་གཙོ་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས། དེ་བཞིན་བཙན་བྱོལ་ནང་གི་བོད་མི་བོད་གློག་བརྙན་བཟོ་སྐྲུན་པ་ཁག་གཅིག་བཅས་ལྷན་འཛོམས་བྱུང་འདུག དེ་བཞིན་དེ་རིང་ནས་ཕྱི་ཚེས་ ༡༥ བར་སུད་སི་གྲོང་ཁྱེར་ཛུ་རིག་ནང་དུ་འཚོགས་བཞིན་པའི་བོད་ཀྱི་གློག་བརྙན་དུས་སྟོན་ཐོག་བོད་ནང་ཕྱི་ནང་གཉིས་ཀྱི་བོད་མི་གློག་བརྙན་བཟོ་སྐྲུན་པ་ཁག་གནས་བཟོ་སྐྲུན་ཞུས་པའི་གློག་བརྙན་གཡང་མདའ་དང། འཇིགས་བྲལ། ཐར་ལོ། སྐྱོ་དབྱངས་མངར་མོ། དཔའ་བོ་སོགས་གློག་བརྙན་རིང་མཐུང་མི་འདྲ་བ་ཁག་༢༢ལྷག་གཟིགས་འབུལ་དང། དེ་བཞིན་བོད་མི་གློག་བརྙན་བཟོ་སྐྲུན་པ་ཁག་གཅིག་ཆེད་འབོད་ཀྱིས་གློག་བརྙན་གྱི་སྒྱུ་རྩལ་བགྲོ་གླེང་གནང་རྒྱུའི་ལས་རིམ་བཅས་འདུག རྩ་བའི་བོད་ཀྱི་གློག་བརྙན་དུས་སྟོན་ཚོགས་པས་བཙན་བྱོལ་བོད་མིའི་སྤྱི་ཚོགས་ནང་གློག་བརྙན་སྒྱུ་རྩལ་ལ་དོ་སྣང་དང་དགའ་མོས་ཡོད་མཁན་ཚོའི་སྒྱུ་རྩལ་ནུས་པ་གོང་འཕེལ་ཡོང་ཕྱིར་ལོ་ལྟར་བཙན་བྱོལ་སྤྱི་ཚོགས་ཁྲོད་ནས་བཟོ་སྐྲུན་ཞུས་པའི་དུས་ཐུང་གློག་བརྙན་ལེགས་ཤོས་ཞེས་པའི་འགྲན་རྩོད་ལམ་ནས་འདེམས་སྒྲུག་གནང་གི་ཡོད་པ་དང། འདི་ལོའི་དུས་ཐུང་གློག་བརྙན་རྩེ་ཕུད་ལྔ་འདེམས་སྒྲུག་བརྒྱུད་མང་ཚོགས་ལ་གཟིགས་འབུལ་དང། དེ་ནས་ཟུར་དཔང་གི་འདེམས་སྒྲུག་བྱས་པའི་རྩེ་ཕུད་གློག་བརྙན་ལ་ཨ་སྒོར་ ༡༠༠༠ ཐམ་པའི་བྱ་དགའ་དང། དེ་བཞིན་མང་ཚོགས་ཀྱི་དགའ་མོས་ཆེ་ཤོས་ཐོབ་མཁན་གློག་བརྙན་ལ་ཨ་སྒོར་༣༠༠ ཐམ་པའི་བྱ་དགའ་གནང་རྒྱུ་རེད་འདུག

རྒྱལ་ཚོགས་ཀྱི་ལྷན་ཚོགས་ ༤༢ ཐོག་༸པཎ་ཆེན་སྐུ་ཕྲེང་བཅིུག་པའི་སྐོར་གླེང་བ།

ཇི་ནི་ཝའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༢ ཐོག་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཏེ་གར་ཡོད་ཤེས་རྟོགས་མེད་པར་གྱུར་བའི་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གི་སྐོར་གླེང་བ་དང་འབྲེལ། རིན་པོ་ཆེ་མཆོག་གར་ཡོད་ཤེས་རྟོགས་མེད་པར་གྱུར་བའི་གནད་དོན་འདིས་རྒྱ་ནག་གཞུང་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམ་སྒྲིག་འབྲུ་དོན་རྩིས་མེད་རྡོག་རོལ་བཏང་བ་ཅིག་མཚོན་གྱི་ཡོད་པ་གསུངས་སོང་། ཕྱི་ཟླ་ ༩ ཚེས་ ༩ ནས་སུད་སི་གྲོང་ཁྱེར་ཇི་ནི་ཝའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༢ འཚོགས་བཞིན་ཡོད་པ་དང། ཁ་སང་ཕྱི་ཚེས་ ༡༡ ཉིན་རྒྱབ་རྒྱལ་ཚོགས་ཚོགས་དུས་ ༨ ཐོག་འཛམ་གླིང་ཁྲོད་གར་སོང་ཆ་མེད་དུ་གྱུར་པའི་མི་སྣ་ཁག་ཐོག་རྟོག་ཞིབ་གནང་མཁན་རྒྱལ་ཚོགས་ཀྱི་ལས་དོན་ཚོགས་ཆུང་གི་སྙན་ཐོ་ལྷན་ཚོགས་ལ་སྙན་སྒྲོན་ཞུས་ཏེ་རྒྱལ་སྤྱིའི་གཞུང་འབྲེལ་མིན་པའི་ཚོགས་ཁག་གིས་གླེང་སློང་གནང་རྒྱུའི་ཚོགས་དུས་ཐོག་ཏུ་འཇར་མ་ནི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་ Kai muller ལགས་ཀྱིས་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ Helsinki Foundation མཚན་ཐོག་ནས་རྒྱ་གཞུང་གིས་བཙན་ཁྲིད་འོག་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་གར་སོང་ཆ་མེད་དུ་གྱུར་བའི་བོད་མི་ཁག་གི་གནད་དོན་རྒྱལ་ཚོགས་སུ་སྙན་སེང་ཞུས་ཡོད་པ་རེད། སྐབས་དེར་སྐུ་ཞབས་ Kai muller ལགས་ཀྱིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་དྲུག་ནས་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཏེ་ད་བར་གར་ཡོད་ཤེས་རྟོགས་མེད་པར་གྱུར་ནས་ལོ་ངོ་ ༢༤ འཁོར་གྱི་ཡོད་སྟབས་སྐབས་དེར་རྒྱལ་ཚོགས་ལ་བསྐྱར་ནན་དྲན་སྐུལ་ཞུས་པ་དང་འབྲེལ། ད་བར་རྒྱལ་ཚོགས་ཀྱི་གཙོ་འཛིན་མཆོག་གིས་གཙོས་གར་སོང་ཆ་མེད་དུ་གྱུར་བའི་ལས་དོན་ཚོགས་ཆུང་དང་བྱིས་པའི་ཐོབ་ཐང་ཚོགས་ཆུང། དེ་བཞིན་རྒྱལ་ཚོགས་ཀྱི་དམིགས་བསལ་མཁས་ལས་རྟོག་ཞིབ་པ་གཙོས། རྒྱལ་སྤྱིའི་གཞུང་ཁག་ནས་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་དང་ཐུག་འཕྲད་བྱ་རྒྱུའི་སྐོར་ཞུ་སྐུལ་རིམ་པ་བྱས་ཡོད་ཀྱང། ད་བར་རྒྱ་གཞུང་གིས་རིན་པོ་ཆེ་མཆོག་དང་ཐུག་འཕྲད་ཞུ་བཅུག་མེད་པ་མ་ཟད། ད་ཆ་རྒྱ་ནག་གཞུང་གིས་བོད་མི་གཙོས་རྒྱལ་སྤྱིའི་མང་ཚོགས་རྣམས་ལ་རིན་པོ་ཆེ་མཆོག་༸སྐུ་འཚོ་བཞུགས་ཡོད་མེད་བློ་འཚབ་དང་ཚོད་དཔག་དཀའ་བའི་གནས་སྟངས་འོག་ལྷུང་བཅུག་ཡོད་ཅེས་གསུངས་ཡོད་པ་རེད། ལྷག་པར་དུ་ཁོང་གིས་༸པཎ་ཆེན་རིན་པོ་ཆེ་མཆོག་གར་ཡོད་ཤེས་རྟོགས་མེད་པར་གྱུར་བའི་གནད་དོན་འདི་ནི་རྒྱ་ནག་གཞུང་གིས་བོད་བརྒྱུད་ནང་བསྟན་ལམ་སྲོལ་ལ་ཐེ་བྱུས་དང་ཁྱད་གསོད་བྱས་པ་ཞིག་མཚོན་གྱི་ཡོད་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་འབྲུ་དོན་རྩིས་མེད་རྡོག་རོལ་བཏང་བ་ཞིག་ཀྱང་མཚོན་གྱི་ཡོད་ཅེས་གསུངས་སོང། སྐུ་ཞབས་ Muller ལགས་ཀྱིས་ཉེ་ཆར་རྒྱ་ནག་གཞུང་བོད་རྔ་པ་ཁུལ་གྱི་འཛིན་བཟུང་བཙན་ཁྲིད་བྱས་ཏེ་གར་ཡོད་ཤེས་རྟོགས་མེད་པར་གྱུར་པའི་གྲྭ་བློ་བཟང་རྡོ་རྗེ་ལགས་དང། གྲྭ་བློ་བཟང་ཐབས་མཁས་ལགས། དེ་བཞིན་གྲྭ་ཐུབ་པ་ལགས་བཅས་གསུམ་གྱི་གནད་དོན་རྒྱལ་ཚོགས་སུ་སྙན་སེང་ཞུས་པ་དང་འབྲེལ། རྒྱ་ནག་མི་དམངས་སྤྱི་མཐུན་རྒྱལ་ཁབ་མངའ་ཁོངས་སུ་བོད་མི་ཚོ་རྒྱ་ནག་གཞུང་གིས་འཛིནབཟུང་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་གནས་ཚུལ་རྒྱུན་མི་ཆད་པ་ཡོང་བཞིན་ཡོད་པ་དང། དེ་བཞིན་བོད་རྔ་པ་ཁུལ་དུ་ཕྱི་ལོ་ ༢༠༠༩ ནས་རང་ལུས་མེར་བསྲེགས་ཀྱི་གནས་ཚུལ་རིམ་པ་བྱུང་རྗེས་ད་ཆ་ས་ཁུལ་དེ་རྒྱ་ནག་གཞུང་ནས་དམ་དྲག་བྱེད་ཡུལ་ཞིག་ཆགས་ཡོད་ཅེས་གསུངས་འདུག དེ་བཞིན་སྐུ་ཞབས་ Muller ལགས་ཀྱིས་དུས་ཡུན་སྐར་མ་གཉིས་ནང་ཚུད་ལ་ལྷན་ཚོགས་སུ་སྙན་སེང་ཞུ་རྒྱུའི་གོ་སྐབས་དེ་བརྒྱུད་ནས་གར་སོང་ཆ་མེད་དུ་གྱུར་བའི་མི་སྣ་ཁག་གི་ཐོག་རྟོག་ཞིབ་གནང་མཁན་རྒྱལ་ཚོགས་ཀྱི་ལས་དོན་ཚོགས་ཆུང་ནས་ད་བར་གར་སོང་ཆ་མེད་དུ་གྱུར་བའི་བོད་མིའི་ཐོག་རྒྱུན་མི་ཆད་པར་ཐུགས་ཁུར་གནང་བཞིན་ཡོད་པར་ཐུགས་རྗེ་ཆེ་ཞུས་པ་དང་འབྲེལ། དེས་གར་སོང་ཆ་མེད་དུ་གྱུར་བའི་བོད་མིའི་གནད་དོན་དེ་མ་བརླག་པར་གསོན་པོར་གནས་ཡོད་པར་ཡིད་ཆེས་ཤིག་སྐྲུན་ཡོད་ཅེས་གསུངས་སོང་བ་མ་ཟད། ལྷག་པར་དུ་ཁོང་གིས་གར་སོང་ཆ་མེད་དུ་གྱུར་བའི་མི་སྣ་ཁག་གི་ཐོག་རྟོག་ཞིབ་གནང་མཁན་རྒྱལ་ཚོགས་ཀྱི་ལས་དོན་ཚོགས་ཆུང་གཙོས་འབྲེལ་ཡོད་ཚོགས་ཆུང་ཁག་ནས་ད་བར་རྒྱ་གཞུང་གིས་བཙན་ཁྲིད་བྱས་པའི་འོག་གར་སོང་ཆ་མེད་དུ་གྱུར་བའི་བོད་མི་སྤྱི་དང་སྒོས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་ཤེས་རྟོགས་ཡོང་རྒྱུར་རྟོག་ཞིབ་མུ་མཐུད་གནང་སྐྱོང་ཡོང་བའི་འབོད་སྐུལ་ཡང་ཞུས་ཡོད་པ་རེད།

ནི་ཐར་ལན་ཌི་གཞུང་གིས་རྒྱ་ནག་དང་འབྲེལ་བའི་སྲིད་བྱུས་ནང་བོད་དོན་བཀོད་དགོས།

འདི་ལོ་ཕྱི་ཟླ་ ༥ ཚེས་ ༡༥ ཉིན་ནི་ཐར་ལན་ཌི་གཞུང་གིས་རྒྱ་ནག་ཐོག་འཛིན་པའི་སྲིད་བྱུས་ཀྱི་ཡིག་ཆ་ཞིག་འདོན་སྤེལ་གནང་ཡོད་པ་དང་། རིང་མིན་ཟླ་ ༩ ཚེས་ ༣༠ ཉིན་ཡུལ་དེའི་གྲོས་ཚོགས་ཀྱི་ཚོགས་དུས་ཐོག་སྲིད་བྱུས་དེའི་ཐོག་བགྲོ་གླེང་དང་གཏན་འབེབས་སོགས་གནང་རྒྱུ་ཡིན་པ་ལྟར། ཉེ་ཆར་ཟླ་ ༩ ཚེས་ ༩ ཉིན་ Netherlands གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས་རྒྱ་ནག་ནང་གི་དངོས་ཡོད་གནས་སྟངས་རྒྱུན་ལོས་ཆེད་ཉན་ཞིབ་ཀྱི་ལས་རིམ་ཞིག་ཚོགས་པའི་ཐོག་ཡུལ་དེའི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྡེ་ཚན་གྱི་འགན་འཛིན་ཚེ་རིང་བྱམས་པ་ལགས་མཉམ་ཞུགས་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་ངོ་སྤྲོད་གནང་བ་མ་ཟད། Dutch གཞུང་གིས་རྒྱ་ནག་ཐོག་གི་སྲིད་བྱུས་ནང་བོད་ཀྱི་གནད་དོན་སྐོར་ཆེད་བཀོད་གནང་མེད་པར་བློ་ཕམ་ཡོད་པ་གསུངས་པ་དང་འབྲེལ་ཏེ་སྲིད་བྱུས་ནང་བོད་སྐོར་ངེས་པར་དུ་ཆེད་བཀོད་གནང་དགོས་པ་དང། ལྷག་དོན་ Dutch གཞུང་གི་མི་སྣ་དང་གྲོས་ཚོགས་འཐུས་མི་རྣམས་ནས་བོད་ནང་ཕེབས་ནས་དངོས་ཡོད་གནས་སྟངས་རྟོགས་ཐབས་གནང་དགོས་པ་དང་། རྒྱ་ནག་གཞུང་ལ་༸གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་མཐུད་བྱེད་དགོས་པའི་སྐུལ་མ་གནང་དགོས་པར་ཞུ་གཏུགས་གནང་འདུག ཚེ་རིང་བྱམས་པ་ལགས་སུ་དེ་འབྲེལ་བཅར་འདྲི་ཁག་གཅིག་ཞུས་པར་ཁོང་གིས་ཉེ་ཆར་ཉན་ཞིབ་ཀྱི་ལས་རིམ་དེའི་ཐོག་བོད་ཀྱི་གནས་སྟངས་སྙན་གསེང་དང་བོད་དོན་ཞུ་འབོད་གནང་བར་གྲོས་ཚོགས་འཐུས་མི་རྣམས་ནས་ངོས་ལེན་གནང་སྟེ་ཚེས་ ༣༠ ཉིན་བོད་གནད་ཐོག་ཐབས་ཤེས་གང་ཐུབ་ཞུ་རྒྱུའི་ཞལ་བཞེས་གནང་ཡོད་པ་དང་། དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གིས་གཙོས་པའི་ཁུལ་དེའི་བོད་རིག་ཚོགས་པ་དང་བོད་དོན་རྒྱབ་སྐྱོར་ཚོགས་པ་ཡོངས་ནས་ཕྱི་ཚེས་ ༣༠ བར་ཌར་ཅི་གཞུང་མང་གཉིས་ལ་ཞུ་འབོད་ཀྱི་ལས་འགུལ་སྤེལ་འཆར་ཡོད་པ་གསུངས་སོང་། རྩ་བའི་འདས་པའི་ལོ་ཤས་ནང་ Netherlands དང་རྒྱ་ནག་གཉིས་དབར་ཚོང་འབྲེལ་བྱེད་ཤུགས་ཇེ་ཆེར་ཕྱིན་ཡོད་པའི་ཁྲོད་ཕྱི་ལོ་ ༢༠༠༩ ལོར་རྒྱལ་ཁབ་ཕྱོགས་གཉིས་དབར་ཡོ་སྒོར་ཐེར་འབུམ་བཞི་དང་ཕྱེད་ཀ་ལྷག་གི་ཚོང་འབྲེལ་ཡོད་པ་དེ་འདས་པའི་ལོ་ཤས་ནང་བརྒྱ་ཆ་ ༤༤ ལྷག་ཙམ་ཕར་ཡོད་པ་དང་འབྲེལ་ད་ཆ་ནི་ཐར་ལན་ཌི་དེ་ཡོ་རོབ་རྒྱལ་ཁབ་ཁོངས་ནས་རྒྱ་ནག་དང་ཚོང་འབྲེལ་ཤུགས་ཆེ་ཤོས་བྱེད་མཁན་ཨང་གསུམ་པ་ཆགས་ཡོད་པ་རེད། འོན་ཀྱང་འདི་ལོའི་ཕྱི་ཟླ་ ༧ པའི་ནང་ནི་ཐར་ལན་ཌི་གཙོས་ རྒྱལ་ཚོགས་ཀྱི་ཚོགས་མི་རྒྱལ་ཁབ་ ༢༢ ཀྱི་གཞུང་ཚབ་པ་རྣམས་ནས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ལ་ཕྱག་ཡིག་ཞིག་ཕུལ་བའི་ནང་རྒྱ་ནག་གཞུང་གིས་ཤིན་ཅང་ཁུལ་དུ་ཡུ་གུར་མི་རིགས་གཙོ་གྱུར་གྲངས་ཉུང་མི་རིགས་གཞན་རྣམས་ལ་དྲག་གནོན་བྱེད་བཞིན་པར་སྐྱོན་བརྗོད་དང་སྦྲགས། རྒྱ་ནག་གཞུང་ལ་ཤིན་ཅང་ནང་གི་ཆབ་སྲིད་སློབ་གསོ་སྤེལ་ཡུལ་ངལ་རྩོལ་སྒྱུར་བཀོད་ཀྱི་རྭ་བ་རྣམས་འཕྲལ་དུ་སྒོ་རྒྱགདགོས་པའི་སྐུལ་མ་གནང་ཡོད་པ་རེད།

Latest news