གསར་འགྱུར།

དེ་རིང་སྔ་དྲོ་ཕྱག་ཚོད་ ༩ ཐོག་ཤེས་རབ་དགའ་ཚལ་སློབ་གླིང་གི་ཚོགས་ཁང་ཆེན་མོའི་ནང་དུ་སཾ་བྷོ་ཊ་བོད་སློབ་དབུ་ཚུགས་ནས་མི་ལོ་ ༢༠ འཁོར་བར་དུས་དྲན་སྲུང་བརྩི་ཞུས་སོང་། སྐབས་དེའི་མཛད་སྒོའི་ཐོག་སྐུ་མགྲོན་གྱི་གཙོ་བོ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་དང་དམིགས་བསལ་གྱི་སྐུ་མགྲོན་སཾ་བྷོ་ཊའི་སྤྱི་ཁྱབ་ཀྱི་འགན་འཛིན་ཟུར་པ་ཀརྨ་ཆུང་བདག་ལགས་གཉིས་ཀྱིས་གཙོས་པའི་ཤེས་རིག་གི་ལས་ཁུངས་ཀྱི་དྲུང་ཆེ་ཀརྨ་སེང་གེ་ལགས། བོད་ཁྱིམ་སྤྱི་ཁྱབ་འགན་འཛིན་ཐུབ་བསྟན་རྡོ་རྗེ་ལགས། གཞན་ཡང་ཞབས་ལོ་ ༢༠ འཁོར་བའི་ལས་བྱེད་བརྒྱད་ཅུ་ལྷག་ཅིག་མཉམ་འཛོམས་བྱུང་འདུག ཤེས་རིག་བཀའ་བློན་མཆོག་གིས་སྐབས་དེར་དེང་སྐབས་བཙན་བྱོལ་གྱི་ནང་དུ་སློབ་མའི་གྲངས་འབོར་ཉུང་དུ་འགྲོ་བཞིན་ཡོད་སྟབས་སློབ་གྲྭ་ཁག་གིས་ཤེས་ཡོན་སློབ་གསོའི་སྤུས་ཚད་གོང་མཐོང་གཏོང་རྒྱུ་གལ་ཆེན་ཡིན་པ་དང་། དེ་བཞིན་རྣམ་ཀུན་ནས་མགོན་པོ་༸གང་ཉིད་མཆོག་གིས་བཀའ་བསྩལ་ལམ་སྟོན་ཕེབས་པ་ལྟར་ཤེས་ཡོན་ཡོད་པ་གཅིག་པོའི་མི་འགྲིག་པར་སློབ་སྦྱོང་གི་དམིགས་ཚད་དེ་ཡ་རབས་ཀུན་སྤྱོད་ལྡན་པའི་བོད་མི་ཞིག་སྐྱེད་སྲིང་གནང་རྒྱུ་དེ་གཞན་ལས་ཁྱད་དུ་འཕགས་པའི་བོད་མི་རིགས་ཀྱི་ཁྱད་ཆས་ཤིག་ཡིན་པར་གསུངས་སོང་། སཾ་བྷོ་ཊའི་སྤྱི་ཁྱབ་འགན་འཛིན་རྣམ་རྒྱལ་ཡར་འཕེལ་ལགས་ཀྱིས་འདི་ག་རླུང་འཕྲིན་ཁང་ལ་སཾ་བྷོ་ཊ་བོད་སློབ་ཀྱི་རྒྱབ་ལྗོངས་དང་འབྲེལ་ཕྱི་ལོ་ ༡༩༩༩ ལོར་ཤེས་རིག་གི་ལས་ཁུངས་ཀྱི་ཐད་འཛིན་སློབ་གྲྭ་དམིགས་བསལ་བ་ཞིག་བཙུགས་ཡོད་པ་དང་། སྐབས་དེར་རྒྱ་གར་དུ་སློབ་གྲྭ་བཅོ་ལྔ་དང་འབྲུག་ཡུལ་དུ་སློབ་གྲྭ་བཞི་བཅས་གསར་འཛུགས་གནང་བ་ཞིག་ཡིན་སྐོར་ངོ་སྤྲོད་གནང་བ་དང་སྦྲགས། སྐབས་དེར་བོད་སློབ་ཚོགས་པ་དེ་ཤེས་རིག་ལས་ཁུངས་ཀྱི་ཁྱབ་ཁོངས་ཡིན་པ་གང་ཞིག་ལ་སྡེ་ཚན་མ་འདྲ་ཞིག་གསར་འཛུགས་གནང་ཡོད་པར་རྒྱུ་མཚན་གསུམ་ཡོད་སྐོར་གསུངས་སོང་། དེ་རིང་གི་མཛད་སྒོའི་ཐོག་ཤེས་རིགས་ལས་ཁུངས་དང་སཾ་བྷོ་ཊ་བོད་སློབ་འཛིན་ཚོགས་ཀྱི་ཁོངས་སུ་ཞབས་ལོ་ ༢༠ འཁོར་བའི་དགེ་ལས་ ༨༠ ཙམ་ལ་ཞབས་འདེགས་ཞུས་པར་ཐུགས་རྗེ་ལེགས་གསོལ་གྱི་རྟགས་མ་རེ་རེ་ཕུལ་ཡོད་པ་དང་། སང་ཉིན་སྔ་དྲོར་ཞབས་ལོ་ཉི་ཤུ་འཁོར་བའི་དགེ་ལས་ཡོངས་ལ་བཞུགས་སྒར་༸རྒྱལ་བའི་ཕོ་བྲང་དུ་༸གོང་ས་མཆོག་གི་དམིགས་བསལ་མཇལ་ཁ་ཞུ་རྒྱུ་རེད་འདུག   ཉིན་རྒྱབ་ཏུ་སཾ་བྷོ་ཊ་སློབ་ཚོགས་དང་ཁྱབ་ཁོངས་སློབ་ཁག་རྣམས་མཉམ་འཛོམ་གྱི་ཐོག་ནས་ཚོགས་འདུ་ཞིག་ཡོད་པ་དང་། སྐབས་དེར་འདས་པའི་མི་ལོ་ཉི་ཤུའི་རིང་གི་སློབ་གསོའི་དགེ་སྐྱོན་གླེང་སློང་གནང་སྟེ་མདུན་སྐྱོད་གསར་པའི་ལམ་ཁ་ཞིག་འཚོལ་རྒྱུ་དང་། དེ་བཞིན་བགྲས་ཡོལ་དུ་ཕེབས་ཟིན་པ་རྣམས་ཀྱི་བགྲས་ཕོགས་དང་འབྲེལ་བའི་བརྗོད་གཞི་གཉིས་ཀྱི་ཐོག་བགྲོ་གླེང་གནང་གི་ཡོད་པ་རེད་འདུག རྩ་བའི་ཕྱི་ལོ་ ༡༩༩༩ ལོར་སཾ་བྷོ་ཊ་སློབ་ཚོགས་ཏེ་ཤེས་རིག་ལས་ཁུངས་ཀྱི་ཁྱབ་ཁོངས་སུ་དབུ་བརྙེས་ནས་རྒྱ་གར་གྱིས་གཙོས་པའི་འབྲུག་ཡུལ་སོགས་སུ་སློབ་གྲྭ་ཁག་ ༡༩ ཙམ་ཆེད་འཛུགས་གནང་ཡོད་པ་དང་།  ཉེ་བའི་ལོ་ཤོས་ནས་བཟུང་རྒྱ་གར་དབུས་གཞུང་གི་འཛིན་སྐྱོང་འོག་ཡོད་པའི་བོད་རིགས་གྲྭ་ཁག་ཀྱང་ཚུར་རྩིས་བཞེས་པ་བརྒྱུད་ནས་ད་ཆ་ཤེས་རབ་དགའ་ཚལ་སློབ་གླིང་དང་དཔེ་སྟོན་སློབ་གྲྭ་སོགས་སྤྱི་ཡོངས་ཀྱི་ཆ་ནས་བོད་སློབ་འཛིན་ཚོགས་ཀྱི་ཁྱབ་ཁོངས་སུ་སློབ་གྲྭ་ཁག་ ༧༡ ཡོད་པ་རེད།

རྒྱ་གཞུང་གིས་དབྱེ་བའི་བོད་མདོ་སྨད་མཚོ་སྔོན་ནས་ཡིན་པ་པར་ལེན་པ་ Yongqing Bao ལགས་ཀྱིས་མཚོ་སྔོན་དང་ཀན་སུའི་ས་མཚམས་སུ་ཆགས་པའི་མདོ་ལ་རིང་མོ་རི་བརྒྱུད་ནས་ལེན་པའི་ཝ་མོས་སྡེར་ཤད་ཀྱིས་འཕྱི་བ་ཁ་གདངས་མིག་བགྲད་བྱས་པའི་སྐད་ཅིག་ཞེས་པའི་འདྲ་པར་ལ་ཕྱི་ལོ་ ༢༠༡༩ ལོའི་རི་སྐྱེས་སྲོག་ཆགས་ཀྱི་འདྲ་པར་རྩེ་ཕུད་ཀྱི་བྱ་དགའ་ཐོབ་འདུག དབྱིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་ Natural History Museum ཞེས་འགྲེམས་སྟོན་ཁང་གིས་གོ་སྒྲིག་ཞུས་པའི་འདི་ལོའི་རི་སྐྱེས་སྲོག་ཆགས་ཀྱི་འདྲ་པར་འགྲན་བསྡུར་ཐེངས་ ༥༥ ཐོག་རྒྱལ་ཁབ་ ༡༠༠ ལྷག་ཙམ་ནས་འཛུལ་ཞུགས་པ་ ༤༨༠༠༠ ལྷག་བྱུང་བའི་ཁོངས་སུ་འདི་ལོའི་རི་སྐྱེས་སྲོག་ཆགས་ཀྱི་འདྲ་པར་རྩེ་ཕུད་དེ་མཚོ་སྔོན་ནས་ཡིན་པ་པར་ལེན་པ་ Yongqing Bao ལགས་ཀྱིས་ལེན་པའི་ཝ་མོས་སྡེར་ཤད་ཀྱིས་འཕྱི་བ་ཁ་གདངས་མིག་བགྲད་བྱས་པའི་ཆེས་མཐོང་དཀའ་བའི་རྣམ་པ་མཚོན་པའི་འདྲ་པར་ལ་བྱ་དགའ་ཐོབ་ཡོད་པ་རེད། འདྲ་པར་དེའི་ཐོག་འགྲེམས་སྟོན་ཁང་གི་ངེས་སྟོན་པ་ Michael Dixon ལགས་ཀྱིས་འདྲ་པར་དེས་འཚོ་བའི་ཆེད་གདོང་ལེན་གྱིས་རང་བྱུང་ཁམས་ཀྱི་ཆོས་ཉིད་ཞིག་བསྟན་པ་དང་འདྲ་པར་ལེན་ས་བོད་ས་ཁུལ་མཚོན་པ་ཡིན་ན་འཛམ་བུ་གླིང་གི་ལྷོ་སྣེ་གསུམ་པར་འབོད་ཀྱི་ཡོད་པ་དང་ཕྱོགས་མཚུངས་ད་ཆ་གོ་ལའི་ཚ་དྲོད་རྐྱེན་གྱིས་བོད་ཀྱི་ཁོར་ཡུག་གི་གནས་སྟངས་ཆེས་ཉེན་ཁར་ལྷུང་ཡོད་སྟབས་དེར་ཡོད་པའི་སྲོག་ཆགས་དག་ལའང་གནམ་གཤིས་འགྱུར་ལྡོག་གི་ཤུགས་རྐྱེན་ཐེབས་ཀྱི་ཡོད་པས་འདྲ་པར་དེ་བརྒྱུད་ནས་ང་ཚོས་སྲུང་སྐྱོབ་དགོས་པའི་གནད་དོན་ཁག་གཅིག་དྲན་སྐུལ་བྱེད་ཀྱི་ཡོད་པ་གསུངས་འདུག དེ་བཞིན་ཐེངས་འདིའི་འདྲ་པར་རྩེ་ཕུད་གདམས་མཁན་ཚོགས་ཆུང་གི་ཚོགས་གཙོ་ཡིན་པའི་སྐུ་ཞབས་ Roz Kidman Cox ལགས་ཀྱིས་འདྲ་པར་དེ་ནི་ཧ་ཅང་ཡིད་འཕྲོག་པ་ཞིག་དང་སྤྱིར་བོད་མཐོ་སྒང་གི་རི་སྐྱེས་སྲོག་ཆགས་ཀྱིས་གཙོས་པའི་ཁོར་ཡུག་སོགས་ཀྱི་འདྲ་པར་ནི་མཐོང་རྒྱུ་ཧ་ཅང་དཀོན་པ་ཞིག་ཡིན་པ་དང་སྒོས་དེའི་ཁོངས་མཐོ་སྒང་གི་སྣོད་བཅུད་ཁོར་ཡུག་ལ་ཆེས་གལ་གནད་གྱུར་བའི་སྲོག་ཆགས་གཉིས་ཀྱི་མཐོང་དཀོན་པའི་བྱ་སྤྱོད་ཀྱི་འདྲ་པར་ལེན་ཐུབ་པ་ནི་ཐུན་མོང་མ་ཡིན་པ་ཞིག་ཡིན་པ་གསུངས་འདུག སྤྱིར་དུས་རྒྱུན་ཝ་མོས་རི་བོང་དང་འདྲ་བའི་སེམས་ཅན་ Pika ཞེས་པར་བརྟེན་གྱི་ཡོད་པ་མ་གཏོགས་འཕྱི་བ་བཟའ་ཡི་མེད་པ་རེད། བོད་ཀྱི་ཝ་མོ་དེ་བོད་མཐོ་སྒང་གཙོས་ལ་དྭགས་དང་བལ་ཡུལ། འབྲུག་ཁུལ་དུ་ཡོད་པ་དེ་ལྟར་ཡང་མཐོང་དཀའ་བའི་སྲོག་ཆགས་ཆགས་ཀྱི་ཡོད་སྟབས། དེ་དག་སྐོར་ཚན་རིག་དང་འབྲེལ་ཤེས་རྟོགས་བྱ་དགོས་པ་རྟོགས་རྒྱུ་ཞན་པ་དང་ལྷག་པར་དུ་ཝ་མོའི་འཚོ་རྟེན་ Pika ཞེས་པ་དེ་སྟོང་ཉེའི་རི་དྭགས་ཞིག་ཡིན་པ་དང་།  Pika སྟོང་ཉེའི་མཚམས་སུ་ཝ་མོ་ཡང་སྟོང་རྒྱུའི་ཉེན་ཁའི་མཚམས་ལ་བསླེབ་རྒྱུ་ཡིན་པ་གསུང་མཁན་ཡོད་པ་རེད། གཞི་རྩའི་ད་རེས་རྩེ་ཕུད་ཀྱི་བྱ་དགའ་དེ་ཆུའི་འོག་གི་སྲོག་ཆགས་དང་གྲོང་ཁྱེར་གྱི་རི་སྐྱེས་སྲོག་ཆགས་སོགས་རང་བྱུང་ཁམས་དང་རི་སྐྱེས་སྲོག་ཆགས་ཀྱི་རིམ་པ་འདྲ་མིན་མཚོན་པའི་སྡེ་ཚན་ ༡༩ ནས་བདམས་ཐོན་བྱུང་བ་ཞིག་དང་། Yongqing Bao ལགས་ཀྱིས་ལེན་པའི་འདྲ་པར་དེ་འགྲེམས་སྟོན་ཁང་ནང་རི་སྐྱེས་སྲོག་ཆགས་ཀྱི་འདྲ་པར་ ༩༨ ལྷག་དང་མཉམ་དུ་གཟིགས་འབུལ་ཞུ་རྒྱུ་རེད་འདུག རྩ་བའི་ Yongqing Bao ལགས་མཚོ་སྔོན་དུ་སྐྱེས་པ་དང་དུས་རྒྱུན་དུ་རང་ཉིད་སྐྱེས་སའི་ཁུལ་གྱི་རི་སྐྱེས་སྲོག་ཆགས་ལ་དོ་སྣང་ཡོད་མཁན་ཞིག་ཡིན་པ་དང་། ཁོང་ད་ཆ་མཚོ་སྔོན་དང་ཀན་སུའི་ས་མཚམས་སུ་ཆགས་པའི་མདོ་ལ་རིང་མོའི་རི་རྒྱུད་ཀྱི་རང་བྱུང་ཁོར་ཡུག་སྲུང་སྐྱོབ་མཐུན་ཚོགས་ཀྱི་ངེས་སྟོན་པ་ཞིག་ཡིན་པ་མ་ཟད། མཚོ་སྔོན་རི་སྐྱེས་སྲོག་ཆགས་པར་ལེན་མཐུན་ཚོགས་ཀྱི་སྤྱི་ཁྱབ་དྲུང་ཆེ་གཞོན་པ་ཀྱང་རེད་འདུག ཁོང་གི་པར་ལེན་གྱི་ལས་དོན་མང་དག་ཅིག་ཚགས་ཤོག་དང་བརྙན་དེབ་སོགས་ནང་ཐོན་ཡོད་པ་དང་ལྷག་པར་དུ་རྒྱལ་སྤྱིའི་འགྲན་བསྡུར་ཁོངས་སུ་ཡང་གཟེངས་རྟགས་དང་བྱ་དགའ་ཐོབ་མྱོང་ཡོད་པ་རེད། ཁོང་གིས་རང་ཉིད་ནས་ལོ་མང་རིང་རི་སྐྱེས་སྲོག་ཆགས་སོགས་ཀྱི་པར་ལེན་ཁྲོད་ཁོར་ཡུག་སྲུང་སྐྱོབ་ཐད་ད་དུང་ལས་དོན་གནང་རྒྱུ་མང་པོ་ཞིག་ལྷག་ཡོད་པ་ཚོར་བ་མ་ཟད་སྒོས་རང་ཉིད་པར་པ་ཞིག་ཡིན་པའི་ཆ་ནས་པར་བརྒྱུད་མང་ཚོགས་ལ་བདག་མེད་སེམས་ཅན་དང་མི་ནི་མེད་ཐབས་མེད་པའི་གྲོགས་པོ་ཞིག་ཡིན་པ་བསྟན་རྒྱུའི་ལས་འགན་ཡོད་པར་ཡིད་ཆེས་གནང་གི་ཡོད་པ་གསུངས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་པན་ཇབ་མངའ་སྡེ་ཅན་རྡི་གར་གྲོང་ཁྱེར་ནང་གི་མཛད་འཆར་ཁག་ལེགས་གྲུབ་ཀྱིས་དེ་རིང་ཕྱི་ཟླ་ ༡༠ ཚེས་ ༡༦ ཉིན་གྱི་སྔ་དྲོ་ཚོུད་ ༩ པ་ཡོལ་ཙམ་ལ་བཞུགས་སྒར་དུ་ཕྱིར་༸ཞབས་སོར་བདེ་བར་འཁོད་སོང་། མགོན་པོ་༸གང་ཉིད་མཆོག་གི་ཐེངས་འདིའི་པན་ཇབ་མངའ་སྡེ་ནང་གི་མཛད་འཕྲིན་ཁྲོད་ཁ་ཉིན་ཕྱི་ཚེས་ ༡༤ ཉིན་ཅིཏ་ཀ་རཱ་གཙུག་ལག་སློབ་གཉེར་ཁང་གི་གོ་ལའི་བདུན་ཕྲག་ཞེས་པའི་ལྷན་ཚོགས་དབུ་འབྱེད་མཛད་ཡོད་པ་མ་ཟད་གཙུག་ལག་སློབ་ཁང་དེས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་དང་སྦྲགས་ཏེ་སློབ་དཔོན་གྱི་མཚན་གནས་ཕུལ་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་གིས་ད་ལྟའི་ང་ཚོའི་ཤེས་ཡོན་གྱི་ལམ་ལུགས་དེ་ནུབ་ཕྱོགས་ནས་དར་ཁྱབ་བྱུང་བའི་ཕྱིའི་དངོས་པོ་གལ་ཆེར་རྩིས་པའི་ལམ་ལུགས་ཤིག་ཆགས་ཡོད་སྟབས་ད་ཆ་ང་ཚོར་བསམ་བློའི་འདུ་ཤེས་ཀྱི་སློབ་གསོའི་ལམ་ལུགས་ཤིག་ངེས་པར་དུ་དགོས་པ་ཞིག་ཆགས་ཡོད་པ་དང་རྒྱ་གར་ལ་ཕ་མེས་ནས་ཡོད་པའི་འཚེ་མེད་ཞི་བ་དང་སྙིང་རྗེ་གཞི་ལ་བཞག་པའི་རིག་གཞུང་བཟང་པོ་ཞིག་ཡོད་པ་དེ་རྒྱ་གར་གྱི་ངོས་ནས་ནུས་པ་ཆེད་འདོན་གནང་དགོས་པར་ལམ་སྟོན་བསྩལ་བ་དང་ཆབས་ཅིག མགོན་པོ་༸གང་ཉིད་མཆོག་ནས་ཀྱང་རྒྱ་གར་གྱི་རིག་གཞུང་བཟང་པོ་དེ་དག་བསྐྱར་གསོ་ཡོང་ཐབས་མཛད་བཞིན་ཡོད་པ་བཀའ་བསྩལ་ཡོད། དེ་བཞིན་ཁ་སང་ཕྱི་ཚེས་ ༡༥ ཉིན་རྒྱ་གར་གྱི་སིག་ཆོས་བརྒྱུད་ཀྱི་སྲོལ་གཏོད་པ་པོ་གུ་རུ་ནཱ་ནཀ་མཆོག་སྐུ་བལྟམས་ཏེ་ལོ་ངོ་ ༥༥༠ འཁོར་བའི་དུས་དྲན་ཐོག་པན་ཇབ་མངའ་སྡེའི་ཅན་རྡི་གར་གཙུག་ལག་སློབ་གཉེར་ཁང་ནས་ཇི་ལྟར་གསོལ་འདེབས་ཞུས་པ་ལྟར་མགོན་པོ་༸གང་ཉིད་མཆོག་གིས་སློབ་གཉེར་ཁང་གི་དགེ་ལས་སློབ་ཕྲུག་རྣམས་ལ་དེང་དུས་ཀྱི་ཤེས་ཡོན་ནང་བཟང་སྤྱོད་ཀྱི་སློབ་གསོ་དགོས་པའི་བརྗོད་གཞིའི་ཐོག་ལམ་སྟོན་བཀའ་སློབ་བཀྲིན་བསྩལ་ཡོད། གཙུག་ལག་སློབ་གཉེར་ཁང་དེས་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་ཞི་བདེ་དང་འགྲོ་བ་གཅིག་འགྱུར་གྱི་རླབས་ཆེན་མཛད་པ་བསྐྱངས་དང་སྐྱོང་བཞིན་པའི་དགོངས་གཞིར་ཡི་རངས་ཆེ་བསྟོད་ཞུས་ཏེ་གོ་ལའི་ཆོས་ཕྱོགས་དབུ་ཁྲིད་ཀྱི་བྱ་དགའ་ཞིག་ཀྱང་ཕུལ་ཡོད་པ་རེད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་༸གང་ཉིད་མཆོག་གི་ཐུགས་ཀྱི་དགོངས་གཞི་བཞི་པོ་ངོ་སྤྲོད་བཀྲིན་མཛད་དེ་བསམ་བློའི་འདུ་ཤེས་ཀྱི་ཐོག་ནས་ང་ཚོ་ཚང་མར་ཆུང་དུས་མའི་བྱམས་སྐྱོང་ལས་ཚར་བའི་བྱམས་པ་དང་སྙིང་རྗེ། གཅིག་ཕན་གཅིག་གྲོགས་ཀྱི་གཞི་རྩ་དེ་ལྡན་ཡོད་པར་མ་ཟད་ཚང་མར་མི་ཚེ་བདེ་སྐྱིད་ལྡན་པ་ཞིག་དགོས་པ་གཅིག་མཚུངས་ཡིན་པ་དང་། ལྷག་པར་དུ་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་དམིགས་ཡུལ་དེ་བྱམས་པ་དང་སྙིང་རྗེ་གཞན་ཕན་བཅས་གོང་འཕེལ་ཡོང་ཐབས་ཀྱི་དམིགས་ཡུལ་གཅིག་པ་ཡིན་པ་སོགས་ཀྱི་ལམ་སྟོན་བསྩལ་བ་དང་སྦྲགས། ད་ཆ་ང་ཚོ་ཚང་མས་གཞི་རྩའི་འགྲོ་བ་མིའི་རིན་ཐང་ཐོག་དགོངས་བཞེད་གནང་གལ་ཡིན་པ་བཀའ་བསྩལ་ཡོད། དེ་བཞིན་རྒྱ་གར་ནི་སྟོན་པ་བཅོམ་ལྡན་འདས་དང་སིག་གི་ཆོས་ལུགས་སྲོལ་གཏོད་པ་པོ་གུ་རུ་ནཱ་ནཀ་ལྟ་བུའི་ཆོས་བརྒྱུད་ཀྱི་རླབས་ཆེན་དབུ་ཁྲིད་མང་པོ་ཞིག་གི་འབྱུང་ཁུངས་ཡིན་པ་མ་ཟད་ལྷག་པར་དུ་སིག་ཆོས་ལུགས་ཀྱི་སྲོལ་གཏོད་པ་གུ་རུ་ནཱ་ནཀ་ལྟ་བུར་ཆ་མཚོན་ན་ཁོང་རང་ཉིད་ཆུང་དུས་སུ་ཧིན་དུའི་ཆོས་བརྒྱུད་པ་ཞིག་ནས་ Mecca ཁ་ཆེའི་གནས་སར་གནས་མཇལ་ལ་ཕེབས་པ་སོགས་ནི་ཆོས་ལུགས་མཐུན་འབྲེལ་ཐོག་རླབས་ཆེན་གྱི་དགོངས་གཞི་ཡོད་པ་ཞིག་ཡིན་པར་བཀའ་བསྩལ་མཛད་དེ་སིག་ཆོས་ལུགས་འཛིན་མཁན་གྱི་པན་ཇབ་ཀྱི་མི་རྣམས་རྒྱུན་དུ་དཀའ་ངལ་ལ་གདོང་ལེན་བྱེད་ཐུབ་མཁན་ཞིག་ཡིན་པར་བསྔགས་བརྗོད་དང་སྦྲགས། གུ་རུ་ནཱ་ནཀ་རྗེས་དྲན་ཞུས་པ་ཙམ་མིན་པར་བཀའ་ཇི་བཞིན་བསྒྲུབ་ཐབས་ཐད་ལ་འབད་བརྩོན་གནང་དགོས་པའི་ལམ་སྟོན་བསྩལ་ཡོད། ཅན་རྡི་གར་གྲོང་ཁྱེར་ནང་གི་ཉིན་གཉིས་ཀྱི་མཛད་འཆར་ཁག་ལེགས་གྲུབ་གནང་བའི་རྗེས་སུ་མགོན་པོ་མཆོག་ཁ་སང་གྲོང་ཁྱེར་དེ་ནས་ཆིབས་ཁ་བསྒྱུར་ནས་པན་ཇབ་མངའ་སྡེའི་ནངྒྷལ་དུ་མཚན་གཅིག་རིང་༸སྐུ་བཞུགས་མཛད་ཡོད་པ་དང་། དེ་རིང་་སྔ་དྲོ་ཚོུད་ ༩ པ་ཡོལ་ཙམ་ལ་བོད་མི་རྣམས་ནས་མགོན་པོ་༸གང་ཉིད་མཆོག་ལ་ཕེབས་བསུ་གཟབ་རྒྱས་ཞུ་ཐོག་བཞུགས་སྒར་དུ་ཕྱིར་༸ཞབས་སོར་བདེ་བར་འཁོད་ཡོད་པ་རེད།

ཁ་སང་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ Jiří Oberfalzer མཆོག་གིས་གྲོས་ཚོགས་གོང་མའི་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་གཞུང་འབྲེལ་སྣེ་ལེན་གཟབ་རྒྱས་ཞུས་པ་དང་སྦྲགས་ཏེ་གྲོས་ཚོགས་འཐུས་མི་རྣམས་ཀྱིས་རྒྱ་གཞུང་ནས་རྒྱལ་ཁབ་ཀྱི་རྩ་ཁྲིམས་ལ་བརྩི་བཀུར་ཞུ་ཐོག་བོད་མིར་མིང་དོན་མཚུངས་པའི་རང་སྐྱོང་གི་གནས་བབ་སྤྲོད་དགོས་པའི་རེ་སྐུལ་ཆེད་བཏོན་གནང་འདུག གཞུང་འབྲེལ་སྣེ་ལེན་མཛད་སྒོའི་ཐོག་གྲོས་ཚོགས་གོང་མའི་ཕྱི་སྲིད་ལྷན་ཁང་གི་ཚོགས་གཙོ་སྐུ་ཞབས་ Pavel Fischer མཆོག་དང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་སྐུ་ཞབས་ Přemysl Rabas སོགས་ཡོད་པ་དང་།  སྐབས་དེར་སྲིད་སྐྱོང་མཆོག་དང་གྲོས་ཚོགས་འཐུས་མི་རྣམ་པའི་དབར་བོད་མི་ནས་ཡུན་རིང་ངང་རྩོད་པའི་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་དང་བོད་རྒྱ་གཉིས་དབར་ཞི་འགྲིག་ཡོང་སླད་གྲོས་མོལ་གནང་རྒྱུ་སོགས་ཀྱི་བརྗོད་གཞི་མང་དག་ཐོག་བཀའ་བསྡུར་གནང་འདུག སྐབས་དེར་སྲིད་སྐྱོང་མཆོག་གིས་རྒྱ་ནག་གཞུང་གིས་འདས་པའི་ལོ་ངོ་ ༦༠ ནང་བོད་ནང་གི་ཆེས་རྫ་དྲག་གི་འགྲོ་བ་མིའི་ཐོབ་ཐང་གི་གནས་སྟངས་དང་དགོན་སྡེ་སོགས་གཏོར་བཤིག་དང་གྲྭ་བཙུན་དགོན་པ་ནས་ཕྱིར་འབུད་བཏང་བ། དེ་བཞིན་སྐད་ཡིག་སོགས་ལ་དམ་དྲག་བྱེད་བཞིན་པ་བརྒྱུད་ནས་བོད་མིའི་རིག་གཞུང་རྩ་མེད་གཏོང་ཐབས་དང་། ལྷག་པར་དུ་གཏེར་ཁ་སྔོག་འདོན་དང་འཛུག་སྐྲུན་གསར་རྒྱག་སོགས་ཀྱི་ལས་གཞིའི་འོག་བོད་ཀྱི་ཁོར་ཡུག་ལ་གནོད་སྐྱོན་ཤུགས་ཆེ་གཏོང་བཞིན་པའི་གནས་སྟངས་སོགས་འགྲེལ་བརྗོད་གནང་འདུག དེ་བཞིན་སྐུ་ཞབས་ Jiří Oberfalzer མཆོག་ནས་བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་ལ་ཤར་བསྐྱོད་གནང་བཞིན་པ་དང་མིང་དོན་མཚུངས་པའི་རང་སྲིད་རང་སྐྱོང་རྩོད་པའི་རེ་འདུན་དེ་ང་ཚོས་འཚམ་པོ་དང་།  ཁྲིམས་དང་མཐུན་པ། དེ་བཞིན་རྒྱ་ནག་གཞུང་གི་རྩ་ཁྲིམས་དང་མཐུན་པ་ཞིག་ཏུ་ངོས་འཛིན་གྱིས་དེར་མཐའ་གཅིག་ཏུ་རྒྱབ་སྐྱོར་ཡོད་པ་གསུངས་པ་དང་ཆབས་ཅིག་ཏུ་བོད་མིར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་སྤྲོད་དགོས་པའི་རེ་སྐུལ་ཤུགས་ཆེ་བཏོན་འདུག རྩ་བའི་ཐེངས་འདིར་སྲིད་སྐྱོང་མཆོག་གི་ཅེཀ་ནང་གི་འཚམས་གཟིགས་དེའི་ཁྲོད་ཁ་སྔོན་ཕྱི་དྲོར་པྲག་ནང་རྟེན་གཞི་བྱས་པའི་ Zofin Palace ནང་དུ་ཕྱི་ལོ་ ༢༠༠༠ ཐམ་པའི་གླེང་སྟེངས་ Forum 2000 ཐེངས་ ༢༣ པའི་ཐོག་ Responsibility as the Ultimate Measure of Human Action ཞེས་བརྗོད་གཞིའི་ཐོག་ཀོརོ་ཤ་ཡའི་ཕྱི་སྲིད་བློན་ཆེན་ཟུར་པ་སྐུ་ཞབས་ Vesna Pusic མཆོག་དང་།  Protection of Rights without Borders ཞེས་རྒྱལ་མཚམས་མེད་པའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པའི་ཚོགས་གཙོ་ Haykuhi Harutyunyan ལགས། དེ་བཞིན་པོ་ལེནཊ་གྱི་གསར་ཁང་ Gazeta Wyborcza ཞེས་པའི་གསར་ཁང་གི་སྤྱི་ཁྱབ་རྩོམ་སྒྲིག་པ་སྐུ་ཞབས་  Adam Michnik ལགས་བཅས་དང་ལྷན་བཞུགས་མོལ་བཀའ་བསྡུར་ནང་ལྷན་ཞུགས་གནང་ཡོད་པ་རེད། སྐབས་དེར་སྲིད་སྐྱོང་མཆོག་གིས་དེང་རབས་སྲིད་དོན་པ་འགས་རང་ཉིད་ཀྱི་ཆབ་སྲིད་ཚོགས་པའི་དམིགས་ཡུལ་དང་དགོས་མཁོ་སོགས་ལ་གལ་ཆེར་འཛིན་པ་དང་། རང་ཉིད་ལ་ཡོད་པའི་འོས་འགན་ཐོག་དེ་ཙམ་ཐུགས་སྣང་གནང་གི་མེད་པ་སོགས་སྲིད་དོན་པའི་འོས་འགན་དང་། སྒེར་གྱི་ལས་འགན་སྐོར་གསུངས་འདུག སྲིད་སྐྱོང་མཆོག་གིས་དེང་དུས་ཀྱི་ཤེས་ཡོན་ལམ་ལུགས་ནང་དེང་རབས་འཛམ་བུ་གླིང་ནང་འཕྲད་བཞིན་པའི་དཀའ་ངལ་དག་ལ་གདོང་ལེན་སླད་བཟང་སྤྱོད་ཀྱི་སློབ་གསོ་དགོས་སྐོར་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ SEE Learning ཞེས་སཱི་ཤེས་ཡོན་གྱི་བསླབ་གཞི་སྐོར་ངོ་སྤྲོད་གནང་འདུག ཡང་ཁ་སང་སྲིད་སྐྱོང་མཆོག་ Charles གཙུག་ལག་སློབ་གཉེར་ཁང་ནང་  Human Rights in the 21st Century Digital Surveillance State ཞེས་པའི་བརྗོད་གཞིའི་ཐོག་བགྲོ་གླེང་ཐོག་ཏུའང་ལྷན་ཞུགས་གནང་ཡོད་པ་དང་བགྲོ་གླེང་དེའི་ཐོག་ཡེ་ཤུའི་ཆོས་དཔོན་ Cardinal joseph མཆོག་དང་།  རྒྱལ་སྤྱིའི་ཡུ་གུར་ཚོགས་པའི་གཙོ་འཛིན་ Dolkun Isa སོགས་ནས་ལྷན་ཞུགས་གནང་ཡོད་པ་རེད། སྐབས་དེར་སྲིད་སྐྱོང་མཆོག་གིས་ཕྱི་ལོ་ ༡༩༨༩ ལོར་གནམ་སྡེ་སྒོར་མོའི་དོན་རྐྱེན་བྱུང་སྐབས་རྒྱ་གཞུང་གིས་ཕྱོགས་བཞི་མཚམས་བརྒྱད་ལ་དམ་བསྒྲགས་བྱས་ཡོད་ཀྱང་དོན་རྐྱེན་དེའི་སྔོན་ལ་བོད་ཀྱི་རྒྱལ་ས་ལྷ་སར་བོད་མི་ནས་རྒྱ་གཞུང་ལ་ངོ་རྒོལ་ཤུགས་ཆེ་གནང་སྐབས་རྒྱ་གཞུང་གིས་དེ་འབྲེལ་དམ་བསྒྲགས་ཤུགས་ཆེ་བྱས་སྐོར་དང་། ཕྱོགས་མཚུངས་ཤིན་ཅང་ནང་ཆབ་སྲིད་སློབ་གསོ་བསྟི་གནས་ཁང་དང་ད་ཆ་རྒྱ་ནག་སྤྱི་ཡོངས་ནང་གསང་ཞིབ་མྱུལ་ལྟའི་འཕྲུལ་རིག་སོགས་ལག་བསྟར་བྱེད་བཞིན་པ་དེ་དག་བོད་ནང་ཐོག་མ་བྱས་ཡོད་སྐོར། དེ་བཞིན་རྒྱ་གཞུང་གིས་བརྒྱུད་གཅིག་ལམ་གཅིག་གི་སྲིད་བྱུས་བརྒྱུད་བོད་ཧམ་བཟུང་བྱས་པ་སོགས་དེ་སྔ་བོད་ནང་གང་བྱུང་བ་དེ་རྒྱ་ནག་དང་འཛམ་བུ་གླིང་སྤྱི་ཡོངས་ལ་བྱུང་རྒྱུའི་ཉེན་བརྡ་དང་ང་ཚོ་མཉམ་རུབ་ཀྱིས་ཕྱག་ལས་གནང་སྟེ་དེར་གདོང་ལེན་གནང་དགོས་ཞེས་གསུངས་འདུག གཞན་ཡང་སྲིད་སྐྱོང་མཆོག་ཅེཀ་བོད་དོན་རྒྱབ་སྐྱོར་ཚོགས་པས་གོ་སྒྲིག་ཞུས་པའི་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་སྐུ་ཞབས་ Vaclav Havel མཆོག་ནས་༸གོང་ས་མཆོག་ཁུལ་དེར་ཕྱི་ལོ་ ༡༩༩༠ ལོར་ཐོག་མར་གདན་འདྲེན་ཞུས་པའི་དྲན་གསོ་དང་དེའི་བྱུང་འབྲས་སྐོར་བགྲོ་གླེང་ནང་ལྷན་ཞུགས་གནང་ཡོད་པ་དང་།  སྲིད་སྐྱོང་མཆོག་གིས་སྐུ་ཞབས་ Vaclav Havel མཆོག་གི་ཐུགས་འགན་དང་དྲང་བདེན་དེ་བཞིན་འགྲོ་བ་མིའི་ཐོབ་ཐང་སོགས་ཀྱི་ཐད་ལ་དགོངས་འཆར་རླབས་ཆེན་ཡོད་པར་ཡི་རངས་དང་། ལྷག་པར་དུ་སྐུ་ཞབས་ཁོང་ནས་རྒྱ་གཞུང་གི་གནོན་ཤུགས་ལ་ལྟོས་མེད་བོད་དོན་ལ་རྒྱབ་སྐྱོར་གཡོ་བ་མེད་པར་གནང་སྐོར་དྲན་གསོ་དང་སྦྲགས། ད་ཆ་ཅེཀ་སྤྱི་མཐུན་རྒྱལ་ཁབ་ནས་དེ་འབྲེལ་རྒྱབ་སྐྱོར་མུ་མཐུད་ནས་གནང་བཞིན་པ་དེར་ཐུགས་རྗེ་ཆེ་ཞེས་ཞུས་འདུག དེ་བཞིན་༸གོང་ས་མཆོག་གི་འགྲོ་བ་མིའི་རིགས་གཅིག་གྱུར་ཡིན་པའི་དགོངས་གཞི་དང་། བོད་དོན་ལ་རྒྱབ་སྐྱོར་གནང་མཁན་རྣམས་བོད་དོན་ཁོ་ནར་རྒྱབ་སྐྱོར་གནང་བ་མིན་པ་དེ་དག་དྲང་བདེན་ལ་རྒྱབ་སྐྱོར་གནང་མཁན་ཡིན་པར་བཀའ་སློབ་ཡང་ཡང་བསྩལ་བ་དག་ལུང་འདྲེན་གྱིས་གསུང་བཤད་གནང་མཁན་གཞན་ནས་༸གོང་ས་མཆོག་དང་སྐུ་ཞབས་ Vaclev མཆོག་གི་དགོངས་གཞི་ཐོག་བཀའ་བསྡུར་གནང་འདུག གཞི་རྩིའི་འདི་ལོར་སྲིད་སྐྱོང་མཆོག་ཟླ་ ༣ པའི་ནང་ཅེཀ་སྤྱི་མཐུན་རྒྱལ་ཁབ་ནང་ཕེབས་སྐབས་པྲག་གི་གྲོང་ཁྱེར་སྤྱི་ཁྱབ་སྐུ་ཞབས་ Zdeněk Hřib ལགས་ནས་ཕེབས་བསུ་སྣེ་ལེན་གཟབ་རྒྱས་ཞུས་པ་དང་འབྲེལ་ཏེ་སྲིད་སྐྱོང་མཆོག་ལ་ཆེ་བསྟོད་མཚོན་ཕྱིར་ Prague གྲོང་ཁྱེར་གྱི་ལྡེ་མིག་ཞིག་ཀྱང་གནང་ཡོད་པ་རེད།

བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་དེ་རིང་ Puzhal དབུས་བཙོན་ཁང་ནས་གློད་བཀྲོལ་བཏང་བ་དང་གཟའ་འཁོར་སྔོན་མར་རྒྱ་གར་ལྷོ་ཕྱོགས་ Mamallapuram གྲོང་ཁྱེར་ནང་རྒྱ་དཀར་ནག་གཉིས་ཀྱི་དབུ་ཁྲིད་དབར་ཆེས་མཐོའི་ནང་མོལ་ལྷན་འཛོམས་གནང་བའི་སྔ་རོལ་དུ་རྒྱ་གར་ཉེན་རྟོག་པས་བོད་མི་ཁྱོན་ ༤༠ ལྷག་ཙམ་སྔ་རྗེས་སུ་འཛིན་བཟུང་བྱས་པ་ཡོངས་རྫོགས་གློད་བཀྲོལ་ཟིན་འདུག དེའང་ཉེ་ལམ་ཟླ་བ་འདིའི་ཚེས་ ༡༢ དང་ ༡༣ བཅས་ཉིན་གཉིས་ཀྱི་རིང་རྒྱ་གར་གྱི་ལྷོ་ཕྱོགས་Tamil Nadu མངའ་སྡེའི་གྲོང་ཁྱེར་ Mamallapuram ནང་རྒྱ་གར་གྱི་སྲིད་བློན་ Narendra Modi དང་རྒྱ་ནག་གི་སྲིད་འཛིན་ Xi Jinping གཉིས་དབར་ Sino-Indo summit ཞེས་ལོ་རྒྱུས་ཀྱི་རང་བཞིན་ལྡན་པའི་ཆེས་མཐོའི་ནང་མོལ་ཚང་འཛོམས་གནང་བའི་ཉིན་ཤས་ཀྱི་སྔ་རོལ་དུ་ཞི་ཅིན་ཕིང་ལ་ངོ་རྒོལ་བྱ་སྲིད་པའི་དོགས་གཞིའི་འོག་མངའ་སྡེའི་ཉེན་རྟོག་པས་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་དང། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ། དེ་བཞིན་བོད་རང་བཙན་སློབ་ཕྲུག་ཚོགས་པའི་རིག་འཛིན་ཆོས་སྒྲོན་ལགས་བཅས་ཀྱིས་གཙོས་པའི་བོད་པའི་སློབ་མ་དང་ལས་འགུལ་བ་ཁྱོན་བོད་མི་ ༤༠ ལྷག་ཙམ་སྔ་རྗེས་སུ་འཛིན་བཟུང་གིས་ཁག་གཅིག་ Chennai གྲོང་ཁྱེར་གྱི་བཙོན་ཁང་དང་ཁ་ཤས་ Puzhal དབུས་བཙོན་ཁང་དུ་བཀག་བསྐྱིལ་བྱས་ཡོད་པ་རེད། ཤེས་རྟོགས་བྱུང་བར་གཞིགས་ན་རྒྱ་གར་ཉེན་རྟོག་པས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོས་གཙོས་པའི་ལས་འགུལ་བ་ ༢༥ རེས་གཟའ་ཉི་མའི་ཉིན་གློད་བཀྲོལ་བཏང་ཡོད་པ་ལྟར། སྦེང་ལོར་དང་ལྡི་ལི་ནས་ཡིན་པའི་ལས་འགུལ་བ་ ༡༦ རང་གནས་སུ་ཕྱིར་ལོག་ཟིན་པ་དང་ཁ་སང་ནས་དེ་རིང་བར་ Puzhal དབུས་བཙོན་ཁང་ནས་བསྟན་འཛིན་བརྩོན་འགྲུས་ལགས་གཙོ་གྱུར་ལས་འགུལ་བ་ ༡༤ ཡོད་པ་ཚང་མ་གློད་བཀྲོལ་ཟིན་པ་དེ་ལྟར་ཡང་། ཁོང་རྣམས་པ་ད་ལྟའི་ཆར་ Chennai ནས་ཉིན་བཅོ་ལྔ་རིང་ཕྱིར་ལོག་གནང་ཆོག་གི་མེད་པ་རེད་འདུག བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་སུ་རྒྱ་དཀར་ནག་གཉིས་དབར་གྱི་དབུ་ཁྲིད་རྣམ་པའི་མཇལ་འཕྲད་མ་གནང་གོང་དུ་ཁོང་ཉེན་རྟོག་པས་འཛིན་བཟུང་བྱས་པ་དེའི་ཐོག་ཚོར་སྣང་ཇི་བྱུང་བཀའ་འདྲི་ཞུས་པར་ ཁོང་གིས་ད་རེས་རྒྱ་གར་གྱིས་བོད་མིའི་ལས་འགུལ་བར་དམ་དྲག་དེ་ལྟར་གནང་བ་དེས་རྒྱ་གར་རྒྱལ་ཁབ་ནས་མང་གཙོའི་ལམ་ལུགས་དང་དེའི་ཐོབ་ཐང་ཁག་ལ་རྩིས་མེད་གནང་བ་ཞིག་ཆགས་ཡོད་སྐོར་གསུངས་སོང་། རྩ་བའི་རྒྱ་གར་གྱི་ཉེན་རྟོག་པས་རྒྱ་དཀར་ནག་གཉིས་ཀྱི་དབུ་ཁྲིད་གཉིས་དབར་མཇལ་འཕྲད་སྐབས་ཞི་ཅིན་ཕིང་ལ་ངོ་རྒོལ་བྱ་སྲིད་པའི་དོགས་གཞིའི་འོག་བོད་མི་ལས་འགུལ་བ་དང་སློབ་ཕྲུག་དེ་དག་ཉིན་ཤས་སྔོན་ནས་འཛིན་བཟུང་བཙོན་འཇུག་བྱས་པར་བརྟེན། བོད་མི་དང་བོད་དོན་རྒྱབ་སྐྱོར་བ། དེ་བཞིན་དཔྱད་ཞིབ་པ་མང་དག་ཅིག་གིས་དེའི་ཐོག་ཐུགས་འཚབ་ཆེན་པོ་ཡོད་པའི་རྣམ་པ་ཆེད་བཏོན་གནང་བ་མ་ཟད་ཕྱི་ཚེས་ ༡༠ ཉིན་མ་རྡ་ར་སི་གཙུག་ལག་སློབ་གཉེར་ཁང་གི་རྒྱལ་སྤྱིའི་འབྲེལ་ལམ་སྡེ་ཚན་གྱི་རྒྱ་གར་སློབ་ཕྲུག་ ༢༠ ཙམ་གྱིས་མཐོ་སློབ་དེའི་ Chepauk Campus དུ་ང་ཚོ་བོད་པའི་སློབ་ཕྲུག་ཚོ་དང་མཉམ་དུ་ཡོད་ཅེས་པའི་འབོད་ཚིག་འཁོད་པའི་ཤོག་བྱང་བསྣམས་ཏེ་རྒྱ་གར་ཉེན་རྟོག་པས་ཁོང་རྣམས་འཛིན་བཀག་བསྐྱིལ་དང་བསུན་བརྩེར་བྱས་པར་གདུང་སེམས་མཉམ་བསྐྱེད་ཀྱི་ལས་འགུལ་ཡང་སྤེལ་ཡོད་པ་རེད།

ཁ་སང་ཨ་རིའི་གྲོས་ཚོགས་འོག་ནང་སྤྱི་མོས་ཀྱི་ཐོག་ནས་ཧོང་ཀོང་ནང་གི་འགྲོ་བ་མིའི་ཐོབ་ཐང་དང་མང་གཙོ་ཞེས་པའི་ཁྲིམས་འཆར་གཏན་འབེབས་གནང་ཡོད་པ་དང་། གྲོས་ཚོགས་གོང་མས་ཀྱང་ཁྲིམས་གཞི་དེར་ངོས་བཞེས་གནང་ཐུབ་ཚེ་ཁྲིམས་འཆར་དེ་བརྒྱུད་ནས་ཨ་རིས་ལོ་ལྟར་ཧོང་ཀོང་ནང་གི་འགྲོ་བ་མིའི་ཐོབ་ཐང་ལ་བསྐྱར་ཞིབ་བྱས་ཏེ་རྒྱ་ནག་གིས་ཁུལ་དེའི་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་སྒྱུར་ལ་རྡོག་རོལ་གཏོང་གི་ཡོད་པ་ར་སྤྲོད་བྱུང་ཚེ་ད་ལྟའི་ཆར་ཧོང་ཀོང་དང་ཨ་རི་གཉིས་ཀྱི་བར་དུ་ཡོད་པའི་ཚོང་གི་འབྲེལ་ལམ་དམིགས་བསལ་བ་དེ་མཚམས་འཇོག་བྱེད་རྒྱུ་ཡིན་པ་རེད། གསར་ཁང་ཁག་གིས་ཨ་རིའི་གྲས་ཚོགས་གོང་མས་ཀྱང་ཁྲིམས་གཞི་དེ་གཏན་འབེབས་གནང་བ་ཡིན་ན་ཨ་རིའི་ཕྱི་སྲིད་ལྷན་ཁང་གི་ངོས་ནས་ལོ་རྟག་པར་ཧོང་ཀོང་དེ་རྒྱ་ནག་གི་སྟངས་འཛིན་འོག་ནས་རང་སྐྱོང་ཚད་ལྡན་ཞིག་ཡོང་གི་ཡོད་མེད་ཀྱི་སྙན་ཐོ་ཞིག་ཨ་རིའི་གྲོས་ཚོགས་ལ་འབུལ་དགོས་པ་མ་ཟད། རྒྱ་ནག་གིས་ཧོང་ཀོང་ནང་གི་སྤྱི་མང་གི་ཐོབ་ཐང་དང་ཁྲིམས་ཀྱི་སྟངས་འཛིན་རྣམས་ལ་གཏོར་རྒོལ་གཏོང་གི་ཡོད་མེད་སོགས་ཀྱི་ཐད་ནས་དུས་ལྟར་བསྐྱར་ཞིབ་བྱེད་དགོས་ལུགས་འཁོད་འདུག  ཁྲིམས་གཞི་དེ་དང་འབྲེལ་ནས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ཀྱིས་ཐེངས་འདིའི་ཧོང་ཀོང་གི་འགྲོ་བ་མིའི་ཐོབ་ཐང་དང་མང་གཙོའི་ཁྲིམས་གཞི་དེའི་དམིགས་འདུན་ནི་རྒྱ་ནག་གི་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་ཀྱི་འོག་ཏུ་ཧོང་ཀོང་མི་མང་སྤྱི་ལ་འགྲོ་བ་མིའི་ཐོབ་ཐང་ཚད་ལྡན་ཞིག་རག་རྒྱུའི་དམིགས་འབེན་ཡིན་པར་འགྲེལ་བརྗོད་གནང་འདུག འོན་ཀྱང་ཧོང་ཀོང་གི་སྤྱི་ཁྱབ་པ་ལྕམ་ Carrie Lam ཨ་རིའི་ཁྲིམས་གཞི་དེ་ནི་གྲོང་ཁྱེར་གྱི་ནང་ཁུལ་གྱི་བྱ་བཞག་ལ་ཐེ་གཏོགས་བྱས་པ་ཞིག་ཡིན་ཚུལ་འགྲེལ་བརྗོད་བྱས་ཡོད་ནའང་། ཧོང་ཀོང་གི་མང་གཙོ་དོན་གཉེར་གྱི་ལས་འགུལ་བ་སྐུ་ཞབས་ Joshua Wong ལགས་ཀྱིས་ཧོང་ཀོང་གི་ཡུལ་མི་ས་ཡ་ལྷག་གིས་ཁྲོམ་གཞུང་དུ་རྒྱ་ནག་གི་ཉེས་ཅན་རྩིས་སྤྲོད་ཀྱི་ཁྲིམས་འཆར་དེར་ངོ་རྒོལ་བྱས་བ་བརྒྱུད་ནས་མི་མང་གིས་ཨ་རིའི་རྒྱལ་གླུ་བླངས་ཏེ་རྒྱལ་དར་འཕྱར་ཡོད་པ་ངོ་སྤྲོད་བྱས་ཏེ་ཨ་རིའི་ཐེངས་འདིའི་འགྲོ་བ་མིའི་ཐོབ་ཐང་དང་མང་གཙོ་ཡི་ཁྲིམས་གཞི་དེས་ཧོང་ཀོང་གི་མང་གཙོ་ལ་སྲུང་སྐྱོབ་ཐུབ་ཐབས་ཀྱི་སྐོར་ནས་ངོ་སྤྲོད་བྱས་འདུག དེ་བཞིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས་ཨ་རིའི་ངོས་ནས་རང་གི་ཚོང་དོན་གྱི་ཁེ་དབང་ལ་བལྟས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཀྱི་སྐོར་ནས་སྐད་ཆ་མ་བཤད་པ་ཡིན། ཨ་རིའི་ངོས་ནས་འཛམ་གླིང་ནང་གི་ས་ཆ་གང་དུ་ཡང་སྐད་ཆ་བཤད་རྒྱུའི་ཀུན་སྤྱོད་ཀྱི་ཁེ་དབང་ཡོངས་སུ་བརླག་པ་ཞིག་རེད་ཅེས་བརྗོད་དེ་ཨ་རིས་ངེས་པར་དུ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཀྱི་སྐོར་ལ་བཀའ་མོལ་གནང་དགོས་པ་གསུངས་འདུག རྩ་བའི་འདི་ལོའི་སྤྱི་ཟླ་དྲུག་པ་ནས་བཟུང་རྒྱ་ནག་གིས་ཧོང་ཀོང་ནང་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་ཞིག་གཏན་འབེབས་བྱེད་རྩིས་ཀྱིས་མི་མང་ས་ཡ་མང་པོས་སྲིད་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་ལྟར།   ཐེངས་འདིའི་ཧོང་ཀོང་ནང་གི་མང་གཙོ་དང་འགྲོ་བ་མིའི་ཐོབ་ཐང་གི་ཁྲིམས་འཆར་དེ་ནི་འདི་ལོ་སྤྱི་ཟླ་དྲུག་པའི་ནང་དུ་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་དང་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ ChrisSmith ལགས་གཉིས་ཀྱིས་ངོ་སྤྲོད་གནང་བ་ཞིག་རེད་འདུག

རྒྱ་གར་གྱི་སིག་ཆོས་བརྒྱུད་ཀྱི་སྲོལ་གཏོད་པ་གུ་རུ་ནཱ་ནཀ་མཆོག་སྐུ་བལྟམས་ཏེ་ལོ་ངོ་ ༥༥༠ འཁོར་བའི་དུས་དྲན་དང་བསྟུན་འདི་ག་པན་ཇབ་མངའ་སྡེའི་ཅན་རྡི་གར་གཙུག་ལག་སློབ་གཉེར་ཁང་ནས་ཇི་ལྟར་གསོལ་འདེབས་ཞུས་པ་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ཅན་རྡི་གར་གྲོང་ཁྱེར་ནས་ཀི་ལོ་མི་ཀྲར་ ༢༠ ལྷག་གི་ས་ཐག་ཏུ་ཡོད་པའི་སློབ་གཉེར་ཁང་དེའི་དགེ་ལས་སློབ་ཕྲུག་རྣམས་ལ་དེང་དུས་ཀྱི་ཤེས་ཡོན་ནང་བཟང་སྤྱོད་ཀྱི་སློབ་གསོ་དགོས་པའི་བརྗོད་གཞིའི་ཐོག་ལམ་སྟོན་བཀའ་སློབ་བཀྲིན་བསྩལ་བ་མ་ཟད། གཙུག་ལག་སློབ་གཉེར་ཁང་དེའི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་ཞི་བདེ་དང་འགྲོ་བ་གཅིག་འགྱུར་གྱི་རླབས་ཆེན་མཛད་པ་བསྐྱངས་དང་སྐྱོང་བཞིན་པའི་དགོངས་གཞིར་ཡི་རངས་ཆེ་བསྟོད་ཞུས་ཏེ་གོ་ལའི་ཆོས་ཕྱོགས་དབུ་ཁྲིད་ཀྱི་བྱ་དགའ་ཞིག་འབུལ་བཞེས་མཛད་སོང་། དེ་རིང་སྔ་དྲོ་ཆུ་ཚོད་ ༡༡ ཙམ་ལ་ཅན་རྡི་གར་གཙུག་ལག་སློབ་གཉེར་ཁང་གི་དགེ་ལས་སློབ་ཕྲུག་དང་དོན་གཉེར་ཅན་བཅས་མི་གྲངས་ ༢༠༠༠ བརྒལ་བ་ཞིག་འདུ་མཛོམས་བྱུང་བའི་མཛད་སྒོ་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་མགོན་པོ་༸གང་ཉིད་མཆོག་གི་དགོངས་གཞི་བཞི་ཡོད་པ་དེ་དག་ངོ་སྤྲོད་བཀྲིན་མཛད་དེ། བསམ་བློའི་འདུ་ཤེས་ཀྱི་ཐོག་ནས་ང་ཚོ་ཚང་མར་ཆུང་དུས་མའི་བྱམས་སྐྱོང་ལས་ཚར་བའི་བྱམས་པ་དང་སྙིང་རྗེ། གཅིག་ཕན་གཅིག་གྲོགས་ཀྱི་གཞི་རྩ་དེ་ཡོད་པར་མ་ཟད་ཚང་མར་མི་ཚེ་བདེ་སྐྱིད་ལྡན་པ་ཞིག་དགོས་པ་གཅིག་མཚུངས་ཡིན་པ་དང་། ལྷག་པར་དུ་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་དམིགས་ཡུལ་དེ་བྱམས་པ་དང་སྙིང་རྗེ་གཞན་ཕན་བཅས་གོང་འཕེལ་ཡོང་ཐབས་ཀྱི་དམིགས་ཡུལ་གཅིག་པ་ཡིན་པ་སོགས་ཀྱི་ལམ་སྟོན་བསྩལ་བ་དང་སྦྲགས། ད་ཆ་ང་ཚོ་ཚང་མས་གཞི་རྩའི་འགྲོ་བ་མིའི་རིན་ཐང་ཐོག་དགོངས་བཞེད་གནང་གནད་ཡིན་པ་དང་། ང་ཚོར་ཡོད་པའི་ཤེས་ཡོན་ལམ་ལུགས་འདི་དབྱིན་ཇིའི་ནུབ་ཕྱོགས་ལམ་སྲོལ་གྱི་ཤེས་ཡོན་ལམ་ལུགས་དེའི་ཐོག་ནས་ཕྱིའི་དངོས་པོའི་བདེ་ཐབས་མ་གཏོགས་ནང་སེམས་ཀྱི་སྡུག་བསྔལ་འགོག་ཐབས་ཀྱི་ཐབས་ལམ་སྐོར་གང་ཡང་བསྟན་གྱི་མེད་སྟབས་རྒྱ་གར་ལ་ཕ་མེས་ནས་ཡོད་པའི་གནའ་རབས་ཀྱི་ལེགས་བཤད་འཚེ་མེད་ཞི་བ་དང་སྙིང་རྗེ་བཅས་ཀྱི་ཐོག་ནས་འཛམ་གླིང་ཀུན་ལ་ཞབས་འདེགས་རླབས་ཆེན་བསྒྲུབ་ཐུབ་པའི་ནུས་པ་ལྡན་ཡོད་པར་ལམ་སྟོན་སོགས་བཀའ་བསྩལ་ཏེ་རྒྱ་གར་ཚོའི་ངོས་ནས་དེའི་ཐོག་དམིགས་བསལ་གྱི་ནུས་པ་ཆེད་འདོན་གནང་དགོས་པའི་ལམ་སྟོན་བཀྲིན་བསྩལ་སོང་།   ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་རྒྱ་གར་ནང་ནས་སྟོན་པ་བཅོམ་ལྡན་འདས་དང་སིག་གི་ཆོས་ལུགས་སྲོལ་གཏོད་པ་གུ་རུ་ནཱ་ནཀ་ལྟ་བུའི་ཆོས་བརྒྱུད་ཀྱི་རླབས་ཆེན་དབུ་ཁྲིད་མང་པོ་ཞིག་གི་འབྱུང་ཁུངས་ཡིན་པ་མ་ཟད་ལྷག་པར་དུ་སིག་ཆོས་ལུགས་ཀྱི་སྲོལ་གཏོད་པ་གུ་རུ་ནཱ་ནཀ་ལྟ་བུར་ཆ་མཚོན་ན་ཁོང་རང་ཉིད་ཆུང་དུས་ཧིན་དུའི་ཆོས་བརྒྱུད་པ་ཞིག་ནས་ Mecca ཁ་ཆེའི་གནས་སར་གནས་མཇལ་ཕེབས་པ་སོགས་ནི་ཆོས་ལུགས་མཐུན་འབྲེལ་ཐོག་རླབས་ཆེན་གྱི་དགོངས་གཞི་ཡོད་པ་ཞིག་ཡིན་པར་བཀའ་བསྩལ་མཛད་དེ་སིག་ཆོས་ལུགས་ཀྱི་པན་ཇབ་མི་རྣམས་རྒྱུན་དུ་དཀའ་ངལ་ལ་གདོང་ལེན་བྱེད་ཐུབ་མཁན་ཞིག་ཡིན་པར་བསྔགས་བརྗོད་དང་འབྲེལ། གུ་རུ་ནཱ་ནཀ་རྗེས་དྲན་ཞུས་པ་ཙམ་མིན་པར་བཀའ་ཇི་བཞིན་བསྒྲུབ་ཐབས་ཐད་ལ་འབད་བརྩོན་གནང་དགོས་པའི་ལམ་སྟོན་བསྩལ་ཡོད། མི་རབས་གཞོན་པ་ཚོར་ཉེན་བརྡའི་ཚུལ་དུ་ད་ལྟ་དུས་རབས་ ༢༡ དུས་འགོ་དེ་ཡིན་སྟབས་དེང་དུས་དང་གནའ་རབས་རྒྱ་གར་གྱི་ལེགས་བཤད་དེ་དག་ཟུང་འབྲེལ་ཐོག་ཆོས་ཕྱོགས་ནས་མིན་པར་ཤེས་ཡོན་སློབ་གསོའི་ལམ་ནས་མ་འོངས་པའི་དུས་མཇུག་དེ་ཞི་བདེ་ལྡན་པ་ཞིག་ཡོང་ཐབས་གནང་དགོས་པ་དང་། མགོན་པོ་༸གང་ཉིད་མཆོག་གི་དགོངས་འཆར་གཅིག་ནི་འཛམ་གླིང་འདིའི་ཐོག་དམག་ཤུགས་ཀྱི་གོ་མཚོན་ཕྱིར་བསྡུ་ཡོང་བ་ཞིག་དང་དཀའ་ངལ་རིགས་གྲོས་མོལ་གྱི་ལམ་ནས་སེལ་ཐབས་ཡོང་བའི་དགོངས་གཞི་ཡོད་སྐོར་སོགས་བཀའ་བསྩལ་མཛད་སོང་། དེ་རིང་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་བཀྲིན་བསྩལ་ཡུལ་ཅན་རྡི་སྒར་གཙུག་ལག་སློབ་གཉེར་ནང་བོད་པའི་སློབ་ཕྲུག་ ༢༢ དང་གཞན་ཡང་འབྲུག་ཁུལ་ནས་སློབ་ཕྲུག་ ༣༠༠ བརྒལ་བ་ཞིག་སློབ་གཉེར་གནང་བཞིན་ཡོད་པ་ལྟར་མགོན་པོ་༸གང་ཉིད་མཆོག་ནས་མཛད་སྒོ་གྲུབ་བསྟུན་སློབ་ཕྲུག་དེ་དག་ལ་བོད་པའི་སྐད་ཡིག་དང་རིག་གཞུང་བཅས་ཀྱི་ཐོག་རྒྱུན་དུ་ནས་དོ་སྣང་ཆེ་ཙམ་གནང་དགོས་པ་སོགས་ཀྱི་ལམ་སྟོན་བསྩལ་སོང་། གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉིན་གྲངས་གཉིས་ཀྱི་མཛད་འཆར་ལྟར་ཁ་ཉིན་ཕྱི་ཚེས་ ༡༣ ཉིན་འདི་ག་ཅན་རྡི་སྒར་གྲོང་ཁྱེར་དུ་༸ཞབས་སོར་བདེ་བར་འཁོད་ཡོད་པ་དང་། དེ་རིང་ཅན་རྡི་སྒར་གཙུག་ལག་སློབ་གཉེར་ཁང་གི་མཛད་སྒོ་དེ་གྲུབ་བསྟུན་མགོན་པོ་༸གང་ཉིད་མཆོག་སང་ཉིན་བཞུགས་སྒར་དུ་ཆེབས་བསྒྱུར་མཛད་ཀྱི་ཡོད་པ་རེད།

འདི་ལོའི་རྒྱལ་སྟོན་དུས་ཆེན་དང་བསྟུན་བོད་ཁུལ་གྱི་ས་ཆ་གང་སར་དམ་དྲག་ཤུགས་ཆེར་བྱས་ཡོད་པ་དང་པ་ལྷན་དུ་བོད་ནག་ཆུ་ཁུལ་དུ་སྲིད་གཞུང་གི་དཔོན་རིགས་ལྟ་སྐོར་དུ་ཡོང་གི་ཡོད་པར་བརྗོད་ནས་དམིགས་བསལ་གྱི་དམ་དྲག་བྱས་ཏེ་མི་དྲུག་ཙམ་འཛིན་བཟུང་བཙན་ཁྲིད་བྱས་པའི་ཁྲོད་ནས་ནག་ཆུ་ས་ཁུལ་རྟར་ཆེན་ཤང་གི་ཡུལ་མི་ནོར་བཟང་ལགས་གར་སོང་ཆ་མེད་དུ་གྱུར་ཡོད་པའི་གནས་ཚུལ་ཐོན་ཡོད་པ་རེད། དེ་རིང་འདི་གར་འབྲེལ་ཡོད་ཀྱིས་གནས་ཚུལ་མཁོ་སྤྲོད་གནང་བར་ཁུལ་དེར་འཛིན་བཟུང་བྱས་པའི་མི་དྲུག་དེ་རིམ་པའི་ཀློད་དཀྲོལ་བྱས་ཡོད་ནའང་། ད་ལྟའི་ཆར་མི་གཅིག་གར་སོང་ཆ་མེད་དུ་གྱུར་འདུག མི་དེའི་མིང་ལ་ནོར་བཟང་དང་ད་ལྟར་རང་ལོ་ ༣༥ ཙམ་ཡིན་པ་དང་ཟླ་ ༩ ཚེས་ ༢༧ ཕྱི་དྲོར་གར་སོང་ཆ་མེད་དུ་གྱུར་ཡོད་པར་བརྗོད་འདུག ཉེ་སྔོན་འཛིན་བཟུང་བྱས་དོན་ནི་རྒྱལ་སྟོན་གྱི་སྐབས་སུ་རྟར་ཆེན་ཤང་དུ་སྲིད་གཞུང་གི་ལས་བྱེད་མི་སྣ་འགའ་ཞིག་སྐོར་སྐྱོད་ལ་ཡོང་གི་ཡོད་པར་བརྗོད་ནས་སྲིད་གཞུང་གིས་བསྐོ་གཞག་བྱས་པའི་མི་སྣས་གང་བྱུང་འདྲི་རྩད་བྱས་པར་རྣམ་འགྱུར་ཡག་པོ་མེད་པར་བསྙད་ནས་ཤང་དུ་འབོད་འགུག་བྱས་པར་བརྗོད་བཞིན་ཡོད་པ་དང་། ད་ལྟའི་ཆར་རྒྱ་ནག་གི་ནོར་བཟང་འཛིན་བཟུང་བྱེད་སའི་ཉེ་འཁྲིས་ཀྱི་གྲོང་ཚོ་རུ་ཉེན་རྟོག་རུ་ཁག་གི་རླང་འཁོར་མང་དུ་ཡོང་བཞིན་ཡོད་པ་མ་ཟད། དུས་ནས་དུས་སུ་རླང་འཁོར་གྱི་གློག་བརྡ་དམར་པོ་རྒྱབ་ནས་མི་མང་ལ་འཇིགས་སྐུལ་དང་དམ་དྲག་བྱེད་ཀྱི་ཡོད་པར་བརྗོད་སོང་། གཞན་ཡང་ཁུལ་དེར་རྒྱ་ནག་གཞུང་གིས་དགོན་པའི་བླ་གྲྭ་རྣམས་ཀྱང་རང་དགོན་དུ་འདུག་མ་བཅུག་པར་ཕྱིར་ཕུད་བཏང་བའི་གནས་ཚུལ་བྱུང་ཡོད་པ་ལྟར་ཡུལ་མི་རྣམས་ཀྱིས་སྲིད་གཞུང་ལ་རེ་སྐུལ་བྱས་ཏེ་བླ་མ་རྣམས་རང་དགོན་དུ་ཕེབས་སུ་འཇུག་རྒྱུའི་རེ་འདུན་བྱས་པ་རྣམས་ལ་ཡང་གཅར་རྡུང་དང་དམ་དྲག་བྱས་ཡོད་པ་མ་ཟད། ད་ཆ་ཁོང་རྣམས་ཐག་རིང་ཏུ་འགྲོ་ཆོག་པར་ཡུལ་བཙོན་ལྟ་བུའི་ངོ་བོར་གནས་ཡོད་པ་ཡང་འགྲེལ་བརྗོད་གནང་སོང་། རྒྱ་ནག་གཞུང་གིས་ཁུལ་དེར་ནག་སེལ་གཤེད་བཅོམ་གྱི་སྲིད་བྱུས་སྤེལ་ནས་མི་རེ་འགར་སྲིད་གཞུང་གིས་མིང་དང་དངུལ་སོགས་སྤྲད་ནས་བྱ་དགའ་གནང་བ་དང་། མི་རེ་འགའ་འཛིན་བཟུང་དམ་དྲག་བྱས་ཏེ་བོད་པའི་སྤྱི་ཚོགས་ཀྱི་ནང་དུ་འཆམ་མཐུན་གྱི་རྨང་གཞི་ཡོད་ཚད་གཏོར་ནས་འགལ་འདུའི་རྙོག་གླེང་རིགས་མང་དུ་སྐྲུན་ཡོད་པར་བརྟེན། མང་ཚོགས་ཀྱི་ནང་དུ་ཡང་རྙོག་དྲ་མང་པོ་ཞིག་ཡོང་གི་ཡོད་པ་རེད་འདུག རྩ་བའི་རྒྱ་གཞུང་གི་རྒྱལ་སྟོན་མཛད་སྒོ་ཚོགས་ལ་ཉེ་བའི་སྐབས་འདིར་ཡུལ་ལུང་མང་པོ་ཞིག་ནང་བཙན་དབང་གིས་རྒྱ་ནག་གི་རྒྱལ་དར་འཕྱར་དགོས་པ་དང་།  དེ་བཞིན་བསྟོད་གླུ་བླང་དགོས་པ་སོགས་བྱས་ཡོད་པ་ལྟར་ཉེ་ལམ་ནག་ཆུ་ས་ཁུལ་རྟར་ཆེན་གྲོང་བརྡལ་དུ་སྲིད་གཞུང་མི་སྣ་ལྟ་སྐོར་ཡོང་གི་ཡོད་པར་བརྗོད་ནས་དམ་དྲག་ཤུགས་ཆེ་བྱས་པ་མ་ཟད་གྲོང་བརྡལ་དེའི་ཁྱབ་ཁོངས་ནས་ཡིན་པའི་སྨན་པ་ཚེ་རྒྱལ་ལགས་དང་། དབྱངས་འཕེལ་ལགས། དེ་བཞིན་བདུད་འདུལ་ལྷ་རྒྱས་ལགས། ནོར་བཟང་ལགས། ཤེས་དབང་རྣམ་རྒྱལ་ལགས། སྲིད་ཐར་དབང་རྒྱལ་ལགས་བཅས་ནས་དེ་འབྲེལ་ཁས་ལེན་མ་བྱས་པའི་རྐྱེན་གྱིས་ཟླ་ ༡༠ ཚེས་ ༢༠ ཉིན་འཛིན་བཟུང་བཙན་ཁྲིད་བྱས་ཡོད་པ་ལྟར་མང་ཚོགས་ཀྱི་ནང་དུ་དུས་ནས་དུས་སུ་སློབ་གསོ་སྤེལ་ནས་གོང་རིམ་ལ་དགའ་ཞེན་དང་བསྟོད་གླུ་ལེན་དགོས་པའི་བཙན་བཀའ་གཏོང་འཇུག་བཞིན་ཡོད་པ་རེད།

དེ་རིང་ཕྱི་ཟླ་ ༡༠ ཚེས་ ༡༥ ཉིན་དགུང་ཚོུད་ ༡༢༌༣༠ ཐོག་དྷ་གཤོད་ Yatri Niwas མགྲོན་ཁང་དུ་ཧི་མཱ་ཅལ་མངའ་སྡེའི་བློན་ཆེན་ཟུར་པ་སྐུ་ཞབས་ Vijay Singh Makotia ལགས་ཀྱིས་གསར་འགོད་ལྷན་ཚོགས་ཤིག་གནང་སྟེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ International Gandhi peace prize འམ་རྒྱལ་སྤྱིའི་གྷཾ་དྷཱིའི་ཞི་བདེའི་གཟེངས་རྟགས་འབུལ་ལམ་ཞུ་དགོས་པ་གསུངས་སོང་། ཕྱི་ནང་གི་གསར་འགོད་པ་སུམ་ཅུ་ལྷག་ཞིག་ལྷན་འཛོམས་གནང་ཐོག་སྐུ་ཞབས་ Makotia ལགས་ཀྱིས་རིང་མིན་ཕྱི་ཟླ་ ༡༡ ཚེས་ ༧ ནས་ ༨ བར་དྷ་རྨ་ས་ལའི་ཁུལ་དུ་ Global investor meet ཞེས་པའི་ལྷན་ཚོགས་ཤིག་འཚོགས་གཏན་ཁེལ་ཡོད་པ་དང་ལྷན་ཚོགས་དེའི་དབུ་འབྱེད་མཛད་སྒོར་རྒྱ་གར་གྱི་སྲིད་བློན་མོ་དཱི་མཆོག་ཕེབས་ཀྱི་ཡོད་པ་མ་ཟད་རྒྱ་གར་གྱི་གནད་ཡོད་དཔོན་རིགས་ཁག་གཅིག་ཀྱང་ཆེད་ཕེབས་གཏན་ཁེལ་ཡོད་པ་དང་བསྟུན་སྐུ་ཞབས་ Makotia ལགས་ཀྱིས་ཁ་སང་ཕྱི་ཚེས ༡༤ ཉིན་སྲིད་བློན་མོ་དཱི་མཆོག་ལ་ཕྱག་ཡིག་ཞིག་ཕུལ་ཏེ་དྷ་རྨ་ས་ལ་ཞེས་རྒྱལ་སྤྱིའི་ས་ཁྲ་སྟེང་དུ་ཡོངས་ཁྱབ་བྱུང་བ་ནི་༸གོང་ས་མཆོག་གི་བཞུགས་གནས་ཤིག་དང་༸སྐུའི་མཛད་འཕྲིན་ལས་བྱུང་བ་ཞིག་ཡིན་སྟབས་འདི་ལོར་རྒྱ་གར་གྱི་ས་ཚིགས་གང་སར་མེས་པོ་དམ་པ་གྷཱཾ་དྷཱི་མཆོག་སྐུ་འཁྲུངས་ནས་ལོ་ངོ་ ༡༥༠ འཁོར་བའི་དུས་ཚིགས་སྲུང་བརྩི་ཞུ་བཞིན་ཡོད་པའི་ཁྲོད་ International Gandhi Peace Prize འམ་རྒྱལ་སྤྱིའི་གྷཱཾ་དྷཱིའི་ཞི་བདེའི་གཟེངས་རྟགས་དེ་༸གོང་ས་མཆོག་ལ་འབུལ་ལམ་ཞུ་རྒྱུ་ལས་འོས་བབས་གཞན་ཞིག་མ་མཆིས་པས་རྒྱ་གར་གཞུང་ནས་ལྷན་ཚོགས་དེ་མ་འཚོགས་གོང་དུ་༸གོང་ས་མཆོག་ལ་འབུལ་ལམ་ཞུ་རྒྱུའི་གསལ་བསྒྲགས་བསྐྱང་དགོས་པ་དང་། ལྷན་ཚོགས་ཀྱི་དབུ་འབྱེད་མཛད་སྒོར་༸གོང་ས་མཆོག་གདན་ཞུ་ཕུལ་ཏེ་རྒྱལ་སྤྱིའི་གྷཱཾ་དྷཱིའི་ཞི་བདེའི་གཟེངས་རྟགས་དེ་འབུལ་བཞེས་གནང་དགོས་པ་གསུངས་སོང་། ཁོང་གིས་སྲིད་བློན་མོ་དཱི་མཆོག་ལ་ཕུལ་བའི་ཕྱག་ཡིག་དེའི་ནང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་གཉིས་སྨན་དབུ་མའི་ལམ་གྱི་སྲིད་བྱུས་དགོངས་དོན་འོག་རང་སྐྱོང་གི་གནས་བབ་ཞིག་ལས་གཞན་གང་ཡང་རྩོད་གནང་གི་མེད་ཀྱང་བོད་ནང་རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་བརྒྱུད་དྲག་གནོན་ཚད་མེད་བཏང་དང་གཏོང་བཞིན་པ་སོགས་བོད་ཀྱི་གནད་དོན་ཞིབ་ཕྲ་འགྲེལ་བརྗོད་དང་འབྲེལ། རྒྱ་གར་གཞུང་ནས་རྒྱ་ནག་གཞུང་གི་དབང་སྒྱུར་འོག་མི་འགྲོ་བར་༸གོང་ས་མཆོག་ལ་གཟེངས་རྟགས་དེ་འབུལ་ལམ་ཞུ་རྒྱུར་ཚང་མས་འབད་བརྩོན་གནང་དགོས་གལ་ཡིན་པ་གསུངས་སོང་། སྐབས་དེར་གསར་འགོད་པས་ཁོང་གི་ཞུ་སྐུལ་ལ་རྒྱ་གར་གཞུང་གི་ངོས་ནས་ཡ་ལན་གང་འདྲ་ཞིག་གནང་བར་ཚོད་དཔག་གནང་གི་ཡོད་དམ་ཞེས་བཀའ་འདྲི་ཞུས་པར་ རྒྱ་གར་རྒྱལ་ཡོངས་ནང་༸གོང་ས་མཆོག་གི་རླབས་ཆེན་གྱི་མཛད་འཕྲིན་དག་ཁྱབ་སྤེལ་ཕྱིན་ཡོད་པ་དང་། གཟེངས་རྟགས་དེ་མགོན་པོ་༸གང་ཉིད་མཆོག་ལ་འབུལ་ལམ་ཞུ་རྒྱུ་ལས་འོས་བབས་གཞན་ཞིག་མ་མཆིས་པས་ཕུགས་རྒྱང་རིང་པོར་དགོངས་བཞེད་གནང་ཐུབ་མཁན་དང་བློ་སྟོབས་ཡོད་མཁན་སྲིད་བློན་མོ་དཱི་མཆོག་གིས་གཟེངས་རྟགས་དེ་༸གོང་ས་མཆོག་ལ་ངེས་འབུལ་ཞུ་བར་ཡིད་ཆེས་ཞུ་བཞིན་ཡོད་སྐོར་གསུངས་ཡོད།