གསར་འགྱུར།

ཁ་ཉིན་རེས་གཟའ་ཉི་མ་ནས་བཞུགས་སྒར་གངས་སྐྱིད་ཚོགས་ཁང་གསར་པའི་ནང་འཚོགས་བཞིན་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པ་མཇུག་སྒྲིག་དང་སྦྲགས། བོད་དོན་ཐོག་ལག་བསྟར་དགོས་པའི་གྲོས་ཆོད་བརྒྱད་གཏན་འབེབས་ཀྱིས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པ་མཇུག་སྒྲིལ་གནང་སོང་། ཐེངས་འདིའི་ཚོགས་ཆེན་ཐོག་གྲོས་ཚོགས་འཐུས་མི་ཟུར་པ་དང་མང་གཙོ་དོན་གཉེར་བ། འགྲོ་བ་མིའི་ཐོབ་ཐང་ལས་འགུལ་བ། དེ་བཞིན་གཙུག་ལག་སློབ་གཉེར་ཁང་གི་སློབ་དཔོན་སོགས་རྒྱལ་སྤྱིའི་རྒྱལ་ཁབ་འདྲ་མིན་ ༤༢ ལྷག་ནས་ཚོགས་བཅར་བ་ཁྱོན་ ༡༨༠ ལྷག་ལྷན་ཞུགས་གནང་ཡོད་པ་དང་། ཚོགས་དུས་ཉིན་གྲངས་གསུམ་གྱི་རིང་ཚོགས་བཅར་བ་རྣམ་པ་སྡེ་ཚན་འཆར་འགོད་ཐོག་བོད་དོན་ཐད་ཆབ་སྲིད་ཀྱི་རྒྱབ་སྐྱོར་ཡོང་ཐབས་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར། དེ་བཞིན་བོད་ཀྱི་ཁོར་ཡུག་སྲུང་སྐྱོབ། བོད་མིའི་ཆོས་ཕྱོགས་དང་འབྲེལ་བའི་བླ་སྤྲུལ་ཡང་སྲིད་ཀྱི་གནད་དོན་སོགས་ཀྱི་ཐོག་གྲོས་བསྡུར་གནང་ཡོད་པ་རེད། དེ་རིང་ཚོགས་ཆེན་མཇུག་སྡོམ་མཛད་སྒོ་གྲུབ་མཚམས་སུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པ་གོ་སྒྲིག་ཞུ་མཁན་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་ཚོགས་གཙོ་སྐུ་ཞབས་ R K Khrimey ལགས་ཀྱིས་དབུས་པའི་བོད་དོན་རྒྱབ་སྐྱོར་བ་ཁག་གཅིག་ལྷན་ཞུགས་ཐོག་གསར་འགོད་ལྷན་ཚོགས་ཤིག་བསྐོང་ཚོགས་གནང་སྟེ་ཐེངས་འདིའི་ཚོགས་ཆེན་ཐོག་རྒྱལ་སྤྱིའི་སྡིང་ཆའི་ཐོག་ཁོར་ཡུག་དང་གནམ་གཤིས་གནས་སྟངས་སྐོར་གླེང་སྐབས་བོད་མཐོ་སྒང་གི་ཁོར་ཡུག་གནས་སྟངས་སྤྱི་དང་ལྷག་པར་དུ་རྒྱ་ནག་གཞུང་ནས་བོད་ནང་གཏེར་ཁ་སྔོག་འདོན་དང་ཤིང་ནགས་གཅོད་འབྲེག་བྱེད་བཞིན་པའི་སྐོར་ངེས་པར་དུ་གླེང་སློང་དགོས་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་མིའི་བླ་སྤྲུལ་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་ལ་ཐེ་བྱུས་གང་ཡང་བྱ་དབང་མེད་པ། ༸ཀུན་གཟིགས་པཎ་ཆེན་རིན་པོ་ཆེ་དང་བཀྲ་ཤིས་དབང་ཕྱུག་ལགས་རྣམ་གཉིས་གཙོས་བོད་ཀྱི་ཆབ་སྲིད་བཙོན་པའི་གནད་ཐོག་རྒྱ་ནག་ལ་འདྲི་རྩད་དང་། བོད་ཀྱི་སྐད་ཡིག་གཙོས་རིག་གཞུང་ཁག་སྲུང་སྐྱོབ་ཐུབ་རྒྱུར་རྒྱལ་སྤྱིའི་མང་ཚོགས་ནས་རྒྱབ་སྐྱོར་གནང་དགོས་པ། དེ་བཞིན་རྒྱལ་སྤྱིའི་རྒྱལ་ཁབ་ཁག་གི་གྲོས་ཚོགས་ནང་བོད་དོན་རྒྱབ་སྐྱོར་བ་རྒྱ་སྐྱེད་གནང་རྒྱུ་དང་། རྒྱ་གཞུང་གི་སྲིད་བྱུས་འོག་རྡོག་རོག་གཏོང་བཞིན་པའི་འགྲོ་བ་མིའི་ཐབ་ཐང་དང་མང་གཙོ་བཅས་སྲུང་སྐྱོབ་གནང་རྒྱུར་རྒྱལ་སྤྱིའི་མང་ཚོགས་ནས་ནུས་པ་མཉམ་སྤུངས་དགོས་པ་སོགས་བོད་ཀྱི་གནད་དོན་ཐོག་ལག་བསྟར་དགོས་པའི་གྲོས་ཆོས་ཁག་བརྒྱད་གཏན་འབེབས་གནང་ ཁག་ངོ་སྤྲོད་གནང་སོང་།   རྩ་བའི་ཐེངས་འདིའི་ཚོགས་ཆེན་མཇུག་སྡོམ་ཐོག་བོད་མིའི་སྒྲིགས་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ང་ཚོ་བོད་མི་ཚོའི་མངོན་འདོད་གཙོ་བོ་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་དྷརྨ་སཱ་ལཱ་ནས་བོད་ཀྱི་རྒྱལ་ས་ལྷ་སར་གདན་འདྲེན་ཞུ་རྒྱུ་དེ་ཡིན་པར་འགྲེལ་བརྗོད་དང་འབྲེལ།  ད་རེས་ཀྱི་ཚོགས་ཆེན་དེའི་ཐོག་ནས་ Action Plan ཞེས་ལག་བསྟར་དགོས་པའི་གྲོས་ཆོད་བརྒྱད་གཏན་འབེབས་གནང་བ་དེ་བརྒྱུད་དེ་རྒྱ་ནག་གཞུང་ལ་བརྡ་ལན་ཤུགས་ཆེ་ཞིག་འགྲོ་རྒྱུ་ཡིན་པ་དང་། བོད་དོན་རྒྱབ་སྐྱོར་བ་རྣམས་ནས་རང་ཡུལ་དུ་ཕྱིར་ཕེབས་རྗེས་འཆར་གཞི་དེ་དག་དོན་དམ་ཐོག་ལག་བསྟར་ཐུབ་སླད་འབད་བརྩོན་གང་ཐུབ་གནང་དགོས་པའི་ཞུ་སྐུལ་གནང་ཡོད། སྲིད་སྐྱོང་མཆོག་གིས་ད་དུང་བོད་ཀྱི་འཐབ་རྩོད་དེ་ད་ཆ་ལོ་ངོ་ ༦༠ སོང་ཟིན་པའི་རྗེས་སུའང་གསོན་པོར་གནས་ཡོད་པ་ནི་བོད་དོན་རྒྱབ་སྐྱོར་བ་རྣམ་པའི་བཀྲིན་ལ་བརྟེན་ནས་ཡིན་སྐོར་གསུངས་པ་མ་ཟད། ད་སྐབས་རྒྱ་ནག་གཞུང་གིས་ཕྱོགས་གཅིག་ནས་ཡུལ་དེ་གའི་ནང་སྲིད་གནད་དོན་ལ་ཐེ་བྱུས་བྱེད་ཆོག་གི་མེད་སྐོར་བརྗོད་བཞིན་པ་དེ་ལྟར་ཡང་།  ཕྱོགས་གཞན་ཞིག་ནས་རང་གི་དབང་ཤུགས་བེད་སྤྱོད་བརྒྱུད་འཛམ་གླིང་ཁྱོན་གྱི་ནང་སྲིད་གནད་དོན་ལ་ཐེ་བྱུས་བྱེད་བཞིན་པ་དང་། ལྷག་པར་དུ་འདས་པའི་ལོ་དུས་ནང་སྲིད་སྐྱོང་མཆོག་ཕྱི་རྒྱལ་ཁག་ཏུ་གཞུང་འབྲེལ་འཚམས་གཟིགས་ཀྱི་ལས་དོན་མང་དག་ཅིག་ལ་འགོག་རྐྱེན་བཟོས་པ་སོགས་ལུང་འདྲེན་དང་འབྲེལ། རྒྱ་ནག་གཞུང་གིས་དེ་སྔ་ང་ཚོར་སྣང་མེད་དང་། དེ་རྗེས་འཕྱ་སྨོད་བྱས་ཀྱང། ད་ཆ་ང་ཚོར་འཐབ་འཛིང་ཤུགས་ཆེ་བྱེད་བཞིན་པ་དེ་ནས་ང་ཚོའི་དྲང་བདེན་དང་འཚེ་མེད་ཞི་བའི་འཐབ་རྩོད་ལ་རྒྱལ་ཁ་ཐོབ་ངེས་ཡིན་པ་མངོན་གསལ་གནང་སོང་། རྩ་བའི་ཚོགས་ཆེན་མཇུག་སྡོམ་གྱི་མཛད་སྒོའི་ཐོག་ཧོན་བོད་མཛ་འབྲེལ་ཚོགས་པའི་ཚོགས་གཙོ་ Ajay Singh Mankotia ལགས་དང་བོད་མིའི་སྒྲིགས་འཛུགས་ཀྱི་འཕྲོད་བསྟེན་དང་དཔལ་འབྱོར་བཀའ་བློན། དེ་བཞིན་ཚོགས་བཅར་བ་བཅས་ལྷན་ཞུགས་གནང་ཡོད་པ་རེད།  

ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་དྷ་སར་ཆེད་ཕེབས་གནང་རྗེས་བལ་ཡུལ་དུ་ཕེབས་ཏེ་ཆོས་ལུགས་རང་དབང་གི་སྐོར་ལ་རྟོག་ཞིབ་གནང་བ་མ་ཟད་ཡུལ་དེའི་དབུ་ཁྲིད་དང་ལྷན་བོད་མིའི་གནད་དོན་སྐོར་ལ་བཀའ་མོལ་གནང་འདུག ཁ་སང་བལ་ཡུལ་གྱི་གསར་ཁང་གིས་གནས་ཚུལ་སྤེལ་བར་སྐུ་ཞབས་ Sam Brownback མཆོག་གིས་ཐེངས་འདིའི་འཚམས་གཟིགས་སྐབས་སུ་བལ་ཡུལ་ནང་ཡུལ་དེའི་ཆབ་སྲིད་དང་ཆོས་ཕྱོགས་ཀྱི་དབུ་ཁྲིད་ཁག་གཅིག་མཇལ་འཕྲད་གནང་བ་མ་ཟད་ཕྱི་ལོ་ ༢༠༡༥ ལོའི་ས་ཡོམ་སྐབས་ཞིག་རལ་དུ་གྱུར་བ་དང་ད་ཆ་ཨ་རིའི་གཞུང་ཚབ་ཀྱི་རོགས་རམ་མཐུན་འགྱུར་འོག་བསྐྱར་གསོ་གནང་བཞིན་པའི་ Krishna Temple ཞེས་པའི་ཧིཾ་དུའི་ལྷ་ཁང་ལ་གཟིགས་ཞིབ་གནང་འདུག སྐབས་དེར་གསར་ཁང་གིས་ད་ཆ་ཨ་རི་དང་རྒྱ་ནག་གཉིས་ཀྱི་དབར་འགལ་ཟླ་ཆེན་པོ་འགྲོ་བཞིན་པ་ཞིག་ཡིན་པར་བརྟེན། ཁོང་ཐེངས་འདིར་ཕྱོགས་སྐྱོད་དུ་ཕེབས་དོན་དེ་བལ་ཡུལ་ལས་ལྷག་པའི་བོད་མིའི་ཆེད་དུ་ཡིན་ནམ་ཞེས་བཀའ་འདྲི་ཞུས་པར་ཁོང་གིས་བལ་ཡུལ་གྱི་ཆེད་དུ་ཡིན་ཀྱང་། བོད་མི་རྣམས་ནི་གནས་ཚུལ་དེ་དང་འབྲེལ་བ་ཆགས་ཡོད་པ་གསུངས་འདུག ཁོང་གིས་བལ་ཡུལ་ནི་ལོ་རྒྱུས་ཀྱི་ཐོག་ནས་བོད་མི་སྐྱབས་བཅོལ་བ་རྣམས་ཡར་འགྲོ་མར་ཡོང་གི་འགྲུལ་ལམ་ཞིག་ཆགས་ཡོད་པ་དང་དེ་སྔོན་བལ་ཡུལ་གཞུང་གིས་དེའི་ཐད་བོད་མི་རྣམས་ལ་མཐུན་འགྱུར་གང་ལེགས་ཞུས་ཡོད་ཀྱང་།  ད་ཆ་རྒྱ་ནག་གི་གནོན་ཤུགས་ལ་བརྟེན་ནས་བོད་མིའི་འགྲུལ་བཞུད་ཐོག་དམ་དྲག་ཅུང་ཟད་ཆེ་བར་སོང་ཡོད་སྟབས་ཁོང་གིས་བལ་ཡུལ་གྱི་ཕྱི་འབྲེལ་བློན་ཆེན་དང་མཉམ་དུ་གནད་དོན་དེ་དང་གཞན་ཁག་གཅིག་གི་སྐོར་ལ་གླེང་མོལ་ཞུས་ཡོད་པ་བརྗོད་འདུག   དེ་བཞིན་ཁོང་གིས་སྐབས་དེར་ཨ་རིའི་རྒྱལ་ཁབ་ལ་མཚོན་ན་ཆོས་ལུགས་དད་མོས་ནི་ཚོར་བ་རྣོ་བའི་གནད་དོན་ཞིག་ཡིན་པ་ལྟར་ཨ་རིའི་ངོས་ནས་ཆོས་ལུགས་དད་མོས་གལ་ཆེན་ཞིག་ཏུ་བརྩིས་ནས་སྲུང་སྐྱོབ་བྱེད་ཀྱི་ཡོད་པར་བརྗོད་དེ་ཨ་རིའི་ལོ་རྒྱུས་ཀྱི་ཁྲོད་དུ་གྲངས་ཉུང་མི་རིགས་རྣམས་ལ་ངོས་འཛིན་བྱེད་སྟངས་ཀྱི་སྒང་ནས་ཡ་ང་བའི་གནས་ཚུལ་མང་པོ་ཡོད་པ་དང་། ཆོས་ལུགས་དད་མོས་ལ་སྲུང་སྐྱོབ་མ་བྱས་པ་ཡིན་ན་ཆོས་ལུགས་དབྱེ་འབྱེད་ནི་མི་མང་ཁོང་ཁྲོ་སློང་བྱེད་ཀྱི་རྒྱུ་གཙོ་བོ་ཞིག་ཡིན་པ་བརྗོད་དེ་ཨ་རིའི་ངོས་ནས་རྒྱལ་སྤྱིའི་རང་བཞིན་གྱི་ཆོས་ལུགས་དད་མོས་ཀྱི་མཐུན་ཕྱོགས་གསར་པ་ཞིག་སྐྲུན་ཐབས་ལ་འབད་བརྩོན་བྱེད་ཀྱི་ཡོད་པ་བརྗོད་འདུག རྩ་བའི་ཟླ་འདིའི་ཟླ་འགོར་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་བཞུགས་སྒར་དུ་ཕེབས་ཏེ་༸གོང་ས་མཆོག་ལ་མཇལ་བཅར་ཞུས་ཡོད་པ་མ་ཟད་ཁོང་གིས་རྒྱ་གཞུང་གིས་བོད་མིའི་ཆོས་དད་རང་དབང་ལ་རྩིས་མེད་རྡོག་རོལ་གཏོང་བཞིན་པར་སྐྱོན་བརྗོད་གནང་ཡོད་པ་རེད། བོད་མི་རྣམས་ལ་སོ་སོའི་ཆོས་ཕྱོགས་ཀྱི་དབུ་ཁྲིད་བདམ་རྒྱུའི་དབང་ཆ་ཚང་ཡོད་སྐོར་གསུངས་པ་མ་ཟད་༸གོང་ས་མཆོག་གི་༸སྐུའི་ཡང་སྲིད་ཀྱི་བདག་དབང་དང་འབྲེལ་བའི་ཐག་གཅོད་ནི་བོད་བོད་མི་དང་བོད་བརྒྱུད་ནང་བསྟན་པ་རྣམས་ལ་ཡོད་པའི་གསུང་བཤད་གནང་ཡོད་པ་རེད།

རྒྱ་ནག་གི་སྲིད་འཛིན་ཞི་ཅིན་ཕིང་དང་ཧོང་ཀོང་སྤྱི་ཁྱབ་ཀེ་རི་ལེམ་གཉིས་ཐུག་འཕྲད་ཀྱིས་འདས་པའི་རིང་ཧོང་ཀོང་ནང་དུ་མང་ཚོགས་ཀྱིས་བསྟུད་མར་ངོ་རྒོལ་བྱེད་བཞིན་པའི་གནད་དོན་གླེང་སློང་དང་སྦྲགས། སྤྱི་ཁྱབ་ཀེ་རི་ལེམ་གྱི་ངོས་ནས་ཧོང་ཀོང་གི་ཟིང་འཁྲུག་ཞི་འཇམ་བཟོ་ཐབས་སུ་གཞུང་གི་ལས་དོན་གནང་ཕྱོགས་ལ་རྒྱབ་སྐྱོར་ཡོད་ཅེས་གསུངས་འདུག  དེ་རིང་བརྒྱུད་ལམ་ཁག་ཏུ་གནས་ཚུལ་སྤེལ་བར་གཞིགས་ན་ཞི་ཅིན་ཕིང་དང་ཀེ་རི་ལེམ་གཉིས་ཀྱི་ཐུག་འཕྲད་དེ་ ཧོང་ཀོང་ནང་ཞི་རྒོལ་བྱུང་ནས་ཕན་ཚུན་དངོས་སུ་ཡོངས་བསྒྲགས་ཐོག་ནས་ཐུག་འཕྲད་བྱས་པ་ཐེངས་དང་པོ་ཆགས་ཀྱི་ཡོད་པ་དང་། ཐུག་འཕྲད་དེའང་ཁ་སང་རེས་གཟའ་ཟླ་བའི་ཉིན་རྒྱ་ནག་གི་གྲོང་ཁྱེར་ Shanghai ནང་བྱུང་འདུག སྐབས་དེར་ཞི་ཅིན་ཕིང་གིས་ཀེ་རི་ལེམ་གྱི་ལས་དོན་བྱེད་ཕྱོགས་ལ་རྒྱབ་སྐྱོར་ཡོད་པ་བཤད་པ་དང་འབྲེལ་ཏེ་གཞུང་ནས་མང་ཚོགས་ཀྱི་འཚོ་ཐབས་ཡར་རྒྱས་སླད་སྤྱི་ཚོགས་ཁྱོན་དང་གྲོས་བསྡུར་ལྷུག་པོ་བྱེད་དགོས་སྐོར་དང་སྒོས་ཧོང་ཀོང་གི་མང་ཚོགས་ནས་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་ལག་བསྟར་འཚམས་པོ་བྱེད་པའི་རེ་བ་དང་། ལྷག་པར་དུ་ཡུལ་དེའི་གཞི་རྩའི་ཁྲིམས་ལག་བསྟར་གྱིས་ཧོང་ཀོང་སྲུང་སྐྱོབ་སླད་མཉམ་རུབ་ཀྱིས་ལས་དོན་བྱེད་དགོས་པ་བརྗོད་འདུག ཚོགས་འདུའི་ཐོག་རྒྱ་ནག་གི་ཕྱི་སྲིད་བློན་ཆེན་ Wang Yi དང་རྒྱལ་ཁབ་བདེ་འཇགས་ལས་ཁུངས་ཀྱི་བློན་ཆེན་ Zhao Kezhi གཞུང་འབྲེལ་སྲིད་དོན་པ་ཁག་གཅིག་ཀྱང་ཡོད་པ་རེད་འདུག   གཞི་རྩའི་ཧོང་ཀོང་ནང་འདི་ལོའི་ཟླ་བ་དྲུག་པ་ནས་མང་ཚོགས་ཀྱི་གཞུང་ལ་ཉེས་ཅན་རྩིས་སྤྲོད་ཀྱི་ཁྲིམས་གཞི་གཙོས་པའི་ཀེ་རི་ལེམ་ལས་གནས་ནས་ཕྱིར་འཐེན་དང་། ཡུལ་དེའི་འགོ་ཁྲིད་མང་གཙོའི་སྒོ་ནས་འདེམས་སྒྲུག་དགོས་པ་དང་། ལས་འགུལ་ཁྲོད་འཛིན་བཟུང་བྱས་པ་རྣམས་གློད་བཀྲོལ་དགོས་པ་སོགས་དགོས་འདུན་ལྔ་པོ་བསྒྲུབ་དགོས་པ་བརྗོད་ཡོད་པ་མ་ཟད། ཉེས་ཅན་རྩིས་སྤྲོད་ཀྱི་ཁྲིམས་གཞི་དེ་དེ་སྔ་ཕྱིར་འཐེན་བྱས་ཡོད་ཀྱང་ཧོང་ཀོང་མང་ཚོགས་ནས་དགོས་འདུན་ལྔ་པོ་ཡོངས་རཛོགས་བསྒྲུབ་དགོས་པར་ངོ་རྒོལ་བསྟུད་མར་གནང་བཞིན་པའི་གནས་སྟངས་བྱུང་བ་རེད། ཉེ་ལམ་རེས་གཟའ་སྤེན་པའི་ཉིན་ཧོང་ཀོང་མང་ཚོགས་ ༣༠༠༠ ལྷག་འདུ་འཛོམས་ཀྱིས་གཞུང་ལ་དེ་འབྲེལ་ངོ་རྒོལ་བྱས་པ་དང་ངོ་རྒོལ་དེའང་རྒྱ་གཞུང་གིས་ཡུལ་དེའི་ནང་དམ་དྲག་སྔར་ལྷག་བྱ་འཆར་ཡོད་པར་ཐུགས་འཚབ་ཀྱིས་ངོ་རྒོལ་གནང་བ་ཞིག་ཡིན་པ་རེད། གཞི་རྩའི་རེས་གཟའ་པ་སངས་ཉིན་རྒྱ་གཞུང་གིས་ཧོང་ཀོང་གཞུང་གི་ལམ་ལུགས་ལ་ཁ་གཏད་གཅོག་མཁན་ཚོར་བཟོད་བསྲན་བྱེད་རྒྱུ་མེད་པ་ཕྱིར་བསྒྲགས་ཀྱིས་ཉེན་བརྡ་བཏང་བ་དང་སྦྲགས། མང་ཚོགས་ནས་ཅ་དངོས་ཉོས་སའི་ཁྲོམ་རའི་ནང་ངོ་རྒོལ་དང་ཉེན་རྟོག་པས་བསྐྱར་དུ་མིག་ཆུ་དུག་རླངས་གཏོར་བ། དེ་བཞིན་གཅིག་གིས་ས་གནས་ཀྱི་སྲིད་དོན་པ་ཞིག་གི་ཨམ་ཆོག་ལ་སོ་བརྒྱབ་པ་དང་ཁག་གཅིག་གིས་ཁུལ་དེར་ཡོད་པའི་རྒྱ་གཞུང་གི་གསར་ཁང་ལ་བཙན་རྒོལ་བྱས་པ་སོགས་གནས་ཚུལ་བྱུང་འདུག གནད་དོན་དེའི་ཐོག་རྒྱ་གཞུང་གིས་ཧོང་ཀོང་གཞུང་ནས་ངོ་རྒོལ་བ་ཚོར་དམ་དྲག་སྔར་ལྷག་བྱེད་དགོས་པའི་འབོད་སྐུལ་ཞུས་འདུག

ཀོ་རི་ཡའི་དད་ལྡན་སེར་སྐྱ་མང་ཚོགས་ཀྱིས་ཇི་ལྟར་གསོལ་འདེབས་ཞུས་དོན་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གྲངས་གསུམ་གྱི་རིང་ཤེས་རབ་སྙིང་པོ་དང་ལམ་གཙོ་རྣམ་གསུམ་གྱི་བཀའ་ཆོས་དབུ་འཛུགས་བཀའ་དྲིན་བསྐྱངས་སོང་། བཀའ་ཆོས་དངོས་གཞི་དབུ་འཛུགས་མ་གནང་གོང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཞེས་པ་ནི་སེམས་ལ་བཟོ་བཅོས་རྒྱག་རྒྱུ་དང་བདེ་སྡུག་ཞེས་པ་ནི་ཤེས་པའི་སྟེང་ནས་ཡོང་བ་ཞིག་ཡིན་ཀྱང་།  དེང་གི་དུས་སུ་ཕྱིའི་དངོས་པོ་ཁོ་ནར་བསམ་བློ་གཏོང་བ་ལས་ཤེས་པར་དོ་སྣང་བྱེད་ཀྱི་མེད་པ་དང་། སངས་རྒྱས་པའི་གཞུང་ལས་གསུངས་ཟིན་པའི་སེམས་ཁམས་ཀྱི་སྐོར་དེ་དག་གནད་འགག་ཆེན་པོ་ཆགས་ཡོད་པ་དང་། སེམས་ཁམས་ཀྱི་རྣམ་གཞག་དེ་དག་སྤྱིར་ཆོས་ཕྱོགས་ཀྱི་གཞུང་ལས་ཐོན་པ་ཞིག་ཡིན་ནའང་ཆོས་ཕྱོགས་ཀྱི་སྡེ་ཚན་དུ་མ་བཞག་པར་ Academy subject འམ་སློབ་སྦྱོང་བྱ་རྒྱུའི་ཁོངས་སུ་བཞག་སྟེ་དེར་དཔྱད་དགོས་གལ་ཡིན་པར་ལམ་སྟོན་བསྩལ་བ་དང་ཆབས་ཅིག་ཏུ་སངས་རྒྱས་པའི་ཆོས་དེ་སེམས་ཁམས་རིག་པའི་གཞུང་ཞིག་ཆགས་ཡོད་པ་བཀའ་བསྩལ་སོང་། དེ་བཞིན་མགོན་པོ་༸གང་ཉིད་མཆོག་གིས་ཕྱིའི་དངོས་པོ་ཡར་རྒྱས་སུ་འགྲོ་བཞིན་པའི་དུས་རབས་ཉེར་གཅིག་པའི་ནང་ཆོས་ཞེས་པ་དེའི་མི་ལ་ཕན་ཐོགས་པ་དང་ལྷག་པར་དུ་ཆོས་དང་ད་ལྟའི་དུས་རབས་གཉིས་ཀྱི་དབར་ལ་འབྲེལ་བ་གང་ཡོད་དམ་ཞེས་དྲི་བ་འདི་དང་འབྲེལ་ནས་ཆོས་ལུགས་ཚང་མའི་བསླབ་བྱ་གཙོ་བོ་ནི་བྱམས་བརྩེ་ཡིན་པ་ལྟར་མིའི་ལྷན་སྐྱེས་ཀྱི་རང་བཞིན་ཞིག་དང་དགོས་མཁོ་ཆེན་པོ་ཆགས་ཡོད་པ་སོགས་ལམ་སྟོན་བཀྲིན་ཆེ་བ་བསྩལ་ཡོད། ༸གོང་ས་མཆོག་གིས་འགྲོ་བ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་མཚུངས་ཡིན་ཀྱང་སྡུག་བསྔལ་གྱི་རྒྱུ་དེ་ཆགས་སྡང་གི་དབང་གིས་ཡོང་གི་ཡོད་པར་དོ་སྣང་མེད་པར་མ་སྐྱིད་པ་བྱུང་སྐབས་ལུས་པོའི་བདེ་སྡུག་ཁོ་ནར་བསམ་ནས་ཆང་རག་དང་མྱོས་རྫས་སོགས་ལོངས་སུ་སྤྱོད་ཀྱི་ཡོད་སྐོར་བཀའ་བསྩལ་དང་འབྲེལ། ཆོས་དང་སྐྱེ་བ་སྔ་ཕྱི་སོགས་ཁས་ལེན་མིན་ལ་བལྟོས་མེད་མ་སྐྱིད་པ་བཟོ་མཁན་དེ་ཆགས་སྡང་གཉིས་པོ་དེ་ཡིན་པ་དང་ཆགས་སྡང་གཉིས་ཀྱི་བློ་དེ་ཤུགས་ཆུང་དུ་ཕྱིན་སྐབས་སེམས་ཞི་བདེ་བག་ཕེབས་ཡོང་གི་ཡོད་པ་དང་དེ་གཉིས་དབང་དུ་སོང་ཚེ་སེམས་འཁྲུག་ནས་མ་སྐྱིད་པ་ཡོང་བ་ནི་གསལ་པོ་ཡིན་པར་བཀའ་བསྩལ་སོང་། ༸གོང་ས་མཆོག་གིས་དུས་རབས་བདུན་པའི་ནང་ཆོས་རྒྱལ་སྲོང་བཙན་གྱི་སྐུ་དུས་སུ་བོད་ཡིག་གསར་གཏོད་མཛད་དེ་ནང་ཆོས་རྒྱལ་ཁྲི་སྲོང་གི་སྐུ་དུས་སུ་མཁན་ཆེན་ཞི་བ་འཚོས་སྒྲ་བསྒྱུར་ལོ་པཎ་གླིང་ཞེས་པ་ཆེད་འཛུགས་གནང་ནས་བཀའ་བསྟན་འགྱུར་རྣམས་བསྒྱུར་གནང་ཡོད་པ་དང་། དེ་ནས་ཕྱིས་སུ་རྒྱ་གར་ནང་བཀའ་འགྱུར་བསྟན་འགྱུར་པོ་ཏི་ ༣༠༠ དེ་ཚན་རིག་དང་ལྟ་གྲུབ། ཆོས་སོགས་ཀྱི་སྡེ་ཚན་གསུམ་དུ་དབྱེ་ནས་ཕྱོགས་སྒྲིག་བྱེད་དགོས་པར་བཀའ་ཡོད་སྐོར་ངོ་སྤྲོད་དང་འབྲེལ། རྒྱ་སྐད་དུ་བསྒྱུར་བའི་ཚན་རིག་ཀུན་བཏུས་དེ་རྒྱ་ནག་གི་སློབ་གྲྭ་ཆེ་ཁག་གི་ནང་དུ་བཞག་ཡོད་སྐོར་དང་དེ་ལ་སློབ་གཉེར་གནང་མཁན་ཚོས་ནཱ་ལེནྡཱཌའི་ཆོས་བརྒྱུད་དེ་ཚན་མ་རིག་པ་དང་འབྲེལ་ནས་ཆས་པའི་བོད་ཀྱི་ཆོས་དེ་ཚན་རིག་དང་མཐུན་པ་ཞིག་ཡོད་པ་བཤད་མཁན་མང་དག་ཅིག་ཡོད་སྐོར་བཀའ་བསྩལ་ཡོད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་གྲུབ་མཚམས་སུ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ནས་མང་ཚོགས་ལ་ཆོས་འབྲེལ་བསྐྱར་བཤད་དང་མང་ཚོགས་ཀྱི་ཁྲོད་དུ་དོགས་འདྲི་ཡོད་པར་དྲི་བ་དྲིས་ལན་བཅས་གནང་ཡོད་པ་དང་། སང་ཉིན་༸གོང་ས་༸སྐྱབས་མགོན་ཆེན་པོ་མཆོག་ནས་ལམ་གཙོ་རྣམ་གསུམ་གྱི་བཀའ་ཆོས་བསྩལ་རྒྱུ་ཡིན་པ་རེད།

བཞུགས་སྒར་གངས་སྐྱིད་ཚོགས་ཁང་གསར་པར་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་ནང་མའི་སྡེ་ཚན་གྱིས་གོ་སྒྲིག་དང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་མཐུན་འགྱུར་འོག་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པ་དབུ་འཛུགས་གནང་སོང་། དབུ་འབྱེད་ཀྱི་མཛད་སྒོར་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་མི། ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་གཞོན་པ་ཟུར་པ་སྐུ་ཞབས་ Martin Bursik ལགས། ཨོ་སི་ཊོ་ལི་ཡའི་གྲོས་ཚོགས་འཐུས་མི་ཟུར་པ་སྐུ་ཞབས་ Michael Danby ལགས། ལྷོ་ཨ་ཕི་རི་ཀའི་གྲོས་ཚོགས་འཐུས་མི་སྐུ་ཞབས་ Mkhuleko Hlengwa ལགས་ཀྱིས་གཙོས་པའི་གྲོས་ཚོགས་འཐུས་མི། མང་གཙོ་དོན་གཉེར་བ། དེ་བཞིན་གཙུག་ལག་སློབ་གཉེར་ཁང་གི་སློབ་དཔོན་སོགས་རྒྱ་རིགས་གཙོས་རྒྱལ་སྤྱིའི་རྒྱལ་ཁབ་ ༤༢ ལྷག་ནས་ཚོགས་བཅར་བ་ཁྱོན་ ༡༨༠ ལྷག་ཕེབས་འདུག སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་བོད་མི་རྣམས་བཙན་བྱོལ་ནང་གྱར་ནས་མི་ལོ་ ༦༠ འགྲོ་བཞིན་ཡོད་ཀྱང་བོད་ཀྱི་འཐབ་རྩོད་གསོན་པོ་གནས་ཐུབ་པ་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་དང་བོད་དོན་རྒྱབ་སྐྱོར་བ་རྣམ་པའི་སྐུ་ལས་བསྐྱོན་པར་བརྟེན་ནས་ཡིན་སྐོར་གསུངས་པ་དང་སྦྲགས། ཨ་རིས་གཙོས་པའི་རྒྱལ་ཁབ་ཁག་གཅིག་ནས་བོད་ནང་ཕར་འགྲོ་ཚུར་འོང་གི་གྲོས་གཞི་གཏན་འབེབས་དང་ཨ་རིའི་བོད་དོན་ཁྲིམས་འཆར་གསར་པ་འདོན་སྤེལ་གནང་བ། ༸ཀུན་གཟིགས་པཎ་ཆེན་རིན་པོ་ཆེ་གཙོས་བོད་མི་ཆབ་སྲིད་བཙོན་པ་རྣམས་གློད་བཀྲོལ་སླད་ཡུལ་སོ་སོའི་གྲོས་ཚོགས་ནང་གནད་དོན་གླེང་བར་ཐུགས་རྗེ་ཆེ་ཞུས་སོང་།  ཚོགས་གཙོ་མཆོག་ནས་ད་དུང་བོད་དོན་རྒྱབ་སྐྱོར་བ་རྣམས་ནས་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་ལྷག་པར་དུ་རང་ཉིད་ཀྱི་གྲོས་ཚོགས་ནང་བོད་རྒྱ་གཉིས་དབར་ཡུན་རིང་ནས་ཆད་པའི་འབྲེལ་མོལ་དེ་བསྐྱར་གསོ་སླད་རྒྱ་གཞུང་ལ་རེ་སྐུལ་གནང་རོགས་ཞེས་གསུངས་ཡོད། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དེ་སྔ་ཕྱི་ལོ་ ༡༩༩༠ ལོར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དང་པོ་ཚོགས་ཡོད་པས་ལོ་དེར་ལྷོ་ཨ་ཕི་རི་ཀའི་སྲིད་འཛིན་དམ་པ་སྐུ་ཞབས་ Nelson Mandela བཙོན་ནས་གློད་བཀྲོལ་ཐོབ་ཡོད་པ་སོགས་འཛམ་གླིང་ཁྲོད་ལོ་རྒྱུས་ཀྱི་རང་བཞིན་ལྡན་པའི་གནས་ཚུལ་མང་པོ་ཞིག་བྱུང་བ་ལུང་འདྲེན་གྱིས་ད་ལྟའི་ཆར་འཛམ་བུ་གླིང་ཁྲོད་དེ་སྔ་བྱུང་བ་བཞིན་མང་ཚོགས་ཀྱིས་མང་གཙོ་དང་འགྲོ་བ་མིའི་ཐོབ་ཐང་རྩོད་པའི་ཐོག་ནས་རྒྱལ་ཁབ་སོ་སོའི་ལོ་རྒྱུས་ལ་བསྒྱུར་བཅོས་ཆེན་པོ་བཏང་དང་གཏོང་བཞིན་ཡོད་སྟབས་བོད་ཀྱི་འཐབ་རྩོད་ཁྲོད་དུ་དེ་འབྲེལ་བསྒྱུར་བཅོས་ངེས་པར་དུ་གཏང་རྒྱུ་ཡིན་པ་གསུངས་སོང་། ༸སྐུའི་ཡང་སྲིད་ཀྱི་གནད་དོན་དང་འབྲེལ་བླ་སྤྲུལ་ཡང་སྲིད་བདམ་ཕྱོགས་ནི་བོད་བརྒྱུད་ནང་བསྟན་གྱི་རིག་གཞུང་དང་བོད་མི་རང་ནས་གསར་གཏོད་གནང་བ་ཞིག་ཡིན་སྟབས་རྒྱ་གཞུང་ནས་༸སྐུའི་ཡང་སྲིད་བདམ་ཕྱོགས་ལ་ཐེ་བྱུས་བྱ་དབང་མེད་པ་སོགས་ནན་བརྗོད་གནང་ཡོད། ཚོགས་ཆེན་དབུ་འབྱེད་ཀྱི་ཐོག་མར་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ནང་མའི་སྡེ་ཚན་གྱི་འགན་འཛིན་རིན་ཆེན་མཁའ་འགྲོ་ཀེར་མཱེ་ལགས་ཀྱིས་ཚོགས་པ་འདིས་ད་བར་བོད་དོན་དཀའ་རྙོག་སེལ་བར་ལས་འགུལ་སྣ་མིན་སྤེལ་སྐོར་ངོ་སྤྲོད་དང་སྦྲགས། བོད་ཀྱི་འཐབ་རྩོད་དེ་ནི་དྲང་བདེན་དང་འཚེ་བ་མེད་པ། དེ་བཞིན་བྱམས་པ་བཅས་དང་འབྲེལ་བའི་འཐབ་རྩོད་ཅིག་ཡིན་པས་དྲང་བདེན་ལ་རྒྱལ་ཁ་འཐོབ་རྒྱུ་ཡོད་སྟབས་བོད་ལ་རང་དབང་གི་ཉི་མ་མགྱོགས་མྱུར་འཆར་རྒྱུ་ཡིན་པ་སོགས་གསུངས་སོང་།   ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པའི་ཚོགས་བཅར་བ་ཡོངས་ལ་དམིགས་བསལ་མཇལ་ཁ་དང་བཀའ་སློབ་བསྩལ་སྐབས་སུ་རྒྱ་གར་གྱི་གནའ་བོའི་རིག་གནས་ཀྱི་གལ་གནད་ངོ་སྤྲོད་དང་སྦྲགས། བོད་མི་ཚོས་ནཱ་ལེནྡཱའི་གཞུང་ལུགས་བདག་གཅེས་གནང་ཡོད་སྐོར་དང་། འདས་པའི་ལོ་རབས་ནང་རྒྱ་གཞུང་གིས་བོད་མིའི་སྐད་ཡིག་ལ་དམ་དྲག་དང་དྲག་གནོན་སོགས་བྱེད་བཞིན་ཡོད་ཀྱང་བོད་ནང་གི་བོད་མིའི་སྐད་ཡིག་དང་རིག་གཞུང་སྲུང་སྐྱོབ་ཐད་སེམས་ཤུགས་ནི་བརྗོད་དུ་མེད་པ་ཞིག་ཡོད་པ་བཀའ་བསྩལ་འདུག  དེ་བཞིན་མགོན་པོ་༸གང་ཉིད་མཆོག་གིས་༸སྐུའི་ཐུགས་བསྐྱེད་དམ་བཅའ་བཞིའི་ངོ་སྤྲོད་མཛད་པ་དང་འབྲེལ་ཏེ་བོད་ཀྱི་ཆོས་དང་རིག་གཞུང་ནི་འཛམ་གླིང་གི་སྤྱི་ནོར་ཞིག་ཆགས་ཡོད་པ་དང་། བོད་དོན་རྒྱབ་སྐྱོར་བ་རྣམས་ནས་དེ་འབྲེལ་གཞན་ལ་འགྲེལ་བརྗོད་གནང་དགོས་པ་དང་། ལྷག་དོན་བོད་དོན་རྒྱབ་སྐྱོར་བ་རྣམས་ནས་ཞལ་ཞེ་གཉིས་མེད་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞེས་བཀའ་བསྩལ་མཛད་ཡོད་པ་མ་ཟད་མགོན་པོ་༸གང་ཉིད་མཆོག་གིས་སླད་མར་བོད་ཀྱི་གནས་སྟངས་ལ་བསྒྱུར་བ་འགྲོ་བའི་ཐུགས་རེ་ཡོད་པ་དང་། ལྷག་དོན་སླད་མར་༸མགོན་པོ་མཆོག་རྒྱ་ནག་ནང་དུ་ཡོད་པའི་ནང་པའི་དགོན་སྡེ་ཁག་ཏུ་གནས་གཟིགས་སུ་ཆིབས་བསྒྱུར་བསྐྱང་འདོད་ཡོད་སྐོར་བཀའ་བསྩལ་འདུག   གཞི་རྩའི་ཁ་སང་དབུ་འབྱེད་མཛད་སྒོའི་ཐོག་རྒྱ་རིགས་ཉུག་ཧན་ཁྲེན་ལགས་ཀྱིས་བརྩམས་པའི་དཔེ་དེབ་བོད་དེ་གནའ་ནས་ད་ལྟའི་བར་དུ་རྒྱ་ནག་གི་ཆ་ཤས་ཤིག་གཏན་ནས་མིན་ཞེས་པའི་དཔེ་དེབ་དབུ་འབྱེད་གནང་སོང་། ཁ་སང་ཚེས་ ༣ ནས་འགོ་འཛུགས་ཀྱིས་ཚེས་ ༥ བར་འཚོགས་རྒྱུའི་ཚོགས་ཆེན་ཐོག་བོད་དོན་ཐད་ཆབ་སྲིད་ཀྱི་རྒྱབ་སྐྱོར་ཡོང་ཐབས་དང་བོད་ནང་གི་འགྲོ་བ་མིའི་ཐོབ་ཐང་། ཁོར་ཡུག་སྲུང་སྐྱོབ་སོགས་ཀྱི་བརྗོད་གཞི་ཐོག་ལ་ཚོགས་ཆ་བགོས་ཀྱིས་བཀའ་བསྡུར་གནང་གི་ཡོད་པ་རེད།  

ཁ་སང་ཟླ་ ༡༡ ཚེས་ ༢ ཉིན་བཞུགས་སྒར་དྷརྨ་ས་ལ་དང་ཨ་རིའི་ནིའུ་ཡོག་གཉིས་སུ་བོད་མི་དང་བླངས་བ་ཁག་གཅིག་གིས་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་དགུང་གྲངས་ ༨༠ བཞེས་པའི་༸སྐུའི་འཁྲུངས་སྐར་གཟབ་རྒྱས་ངང་སྲུང་བརྩི་ཞུས་ཡོད་པ་དང་། སྐབས་དེར་རིན་པོ་ཆེ་མཆོག་གིས་བོད་པའི་སྤྱི་ཚོགས་ནང་བཀྲིན་རྗེས་སུ་དྲན་དགོས་པ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་༸སྐུ་རྐྱང་མ་གཏོགས་གཞན་སུ་གང་ཡང་མེད་ཅེས་བཀའ་བསྩལ་སོང་། དེའང་ཁ་སང་ཕྱི་ཟླ་ ༡༡ ཚེས་ ༢ སྔ་དྲོ་ཚོུད་ ༡༠ ཐོག་བཞུགས་སྒར་བོད་ཀྱི་ཟློས་གར་ཚོགས་པའི་གར་གླུའི་རིག་རསྩལ་ཁང་དུ་༸སྐུའི་འཁྲུངས་སྐར་དུས་ཆེན་གྱི་སྐུ་མགྲོ་གཙོར་༸སྐྱབས་རྗེ་ཀུན་བདེ་གླིང་རྟ་ཚག་རྗེ་འབྲུང་རིན་པོ་ཆེ་མཆོག་དང་གནས་ཆུང་ཆོས་རྒྱལ་ཆེན་པོའི་སྐུ་རྟེན་ཐུབ་བསྟན་དངོས་གྲུབ་མཆོག བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག བཀའ་ཟུར་དང་བོད་མི་མང་སྤྱི་འཐུས་ལས་ཟུར་ཁག་གཅིག བོད་མིའི་སྒྲིག་འཛུགས་ཀྱི་སྲི་ཞུ་བ་ཁག་གཅིག གནས་ཆུང་སྒྲ་དབྱངས་གླིང་དང་རྣམ་གྲྭ་ཕན་བདེ་ལེགས་བཤད་གླིང་། ཀིརྟི་བྱེས་པ་གྲྭ་ཚང་བཅས་ཀྱི་སྐུ་ཚབ། དེ་བཞིན་གཉུག་མར་གནས་པ་དང་གློ་བུར་ལྷགས་པའི་སེར་སྐྱ་མང་ཚོགས་བཅས་འདུ་འཛོམས་ཐོག་༸སྐྱབས་རྗེ་ཟམ་གདོང་རིན་པོ་ཆེ་མཆོག་གི་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་སོང་། སྐབས་དེར་བཀའ་ཁྲི་ཟུར་པ་༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས་བོད་པའི་སྤྱི་ཚོགས་ནང་བཀྲིན་རྗེས་སུ་དྲན་དགོས་པ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་༸སྐུ་རྐྱང་མ་གཏོགས་གཞན་སུ་གང་ཡང་མེད་ཅེས་བཀའ་བསྩལ་བ་དང་འབྲེལ་ཏེ་༸གོང་ས་མཆོག་གི་འཕྲིན་ལས་ཀྱི་ཞབས་འདེགས་ཞུ་རྒྱུར་བོད་པ་དང་བོད་པ་མིན་པ་བཅས་རྒྱལ་སྤྱིའི་ཁྱོན་ནས་མི་མང་དག་ཅིག་ཡོད་པ་རེད། ༸གོང་ས་མཆོག་གི་འཕྲིན་ལས་ཀྱི་ཞོར་འདེགས་ཞུ་མཁན་ཚོའི་ངོས་ནས་ལས་དོན་གང་ཞིག་ལེགས་གྲུབ་བྱུང་བ་དེ་ནི་༸གོང་ས་མཆོག་གི་འཕྲིན་ལ་བརྟེན་ནས་བྱུང་བ་འབའ་ཞིག་ཡིན་སྐོར་བཀའ་བསྩལ་སོང་། རིན་པོ་ཆེ་མཆོག་གིས་ད་དུང་ང་དང་ང་འདྲ་བའི་མི་མང་དག་ཅིག་ཡོད་པ་ཚོས་༸གོང་ས་མཆོག་གི་མཚན་ལག་ཆར་སྤྱོད་ནས་བྱ་བ་བརྩམ་སྐབས་བྱ་བ་དེར་ནུས་པ་ཐོན་པ་ཞིག་བྱུང་ཡོད་པ་དང་། གལ་ཏེ་༸གོང་ས་མཆོག་གི་མཚན་དང་ནུས་པ་དེ་ང་ཚོའི་རྒྱབ་ཏུ་མེད་ཚེ་བོད་མིའི་ཆབ་དཔལ་རིག་གསུམ་གྱི་གནས་བབས་གཞན་འགྲན་མ་མཆིས་པ་དེ་ལྟར་ཡོང་ཐུབ་ཐབས་མེད་སྐོར་བཀའ་ནན་བསྩལ་སོང་། དེ་བཞིན་རིན་པོ་ཆེ་མཆོག་གིས་ང་ཚོ་བོད་མིའི་སྤྱི་ཚོགས་ཁྲོད་ནས་༸གོང་༸སྐྱབས་མགོན་ཆེན་པོ་མཆོག་ལ་དངོས་སུ་མཚན་སྨད་ཞུ་མཁན་དང་མཐའ་སྐོར་རི་སྐོར་གྱི་ཐོག་ནས་ཟུར་ཟ་དང་མཚན་སྨད་ཞུ་མཁན་ཇེ་མང་དུ་འགྲོ་བཞིན་ཡོད་སྟབས་སྙིང་རྗེའི་ཐོག་ནས་ལམ་སྟོན་གནང་དགོས་གལ་ཡིན་པ་བཀའ་བསྩལ་སོང་། དེ་བཞིན་མཛད་སྒོའི་སྐུ་མགྲོ་གཙོ་བོ་༸སྐྱབས་ཀུན་བདེ་གླིང་རྟ་ཚག་རྗེ་འབྲུང་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་པའི་བདག་ཉིད་ཆེན་པོ་༸སྐྱབས་རྗེ་ཟམ་གདོང་རིན་པོ་ཆེ་མཆོག་ལྟ་བུའི་༸སྐུའི་འཁྲུངས་སྐར་སྲུང་བརྩི་ཞུ་དགོས་གལ་ཡིན་པ་དང་རིན་པོ་ཆེ་མཆོག་ནི་འདུལ་བ་འཛིན་པའི་དགེ་སློང་རྣམ་དག་ཅིག་ཡིན་པ་སོགས་༸སྐུའི་ཚེའི་མཛད་རྣམ་ཁག་ངོ་སྤྲོད་གནང་ཡོད་པ་རེད། དེ་དང་ཕྱོགས་མཚུངས་སུ་ཨ་རིའི་ནིའུ་ཡོག་ཏུ་བཀའ་ཟུར་བློ་བཟང་སྙན་གྲགས་ལགས་དང་དྲུང་ཟུར་ཀུན་དགའ་བཀྲིས་ལགས་རྣམ་གཉིས་ཀྱིས་གཙོས་པའི་ཁུལ་དེར་གནས་བཞུགས་ཝཱཎའི་སློབ་ཟུར་ཚོས་ཕྱི་ཚེས་ ༢ ཉིན་བཀའ་བློན་ཁྲི་ཟུར་མཁས་དབང་༸སྐྱབས་རྗེ་ཟམ་གདོང་རིན་པོ་ཆེ་མཆོག་དགུང་གྲངས་ ༨༠ བཞེས་པའི་༸སྐུའི་འཁྲུངས་སྐར་གཟབ་རྒྱས་ངང་སྲུང་བརྩི་ཞུས་པ་དང་བསྟུན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཀྱང་འཚམ་འཕྲིན་ཞིག་གནང་འདུག་པ་དང་དེའི་ནང་དུ་རིན་པོ་ཆེ་མཆོག་ལ་འཚམ་འདྲི་ཞུས་པ་དང་སྦྲགས། རིན་པོ་ཆེ་མཆོག་ནི་སྐུ་ཚེ་ཧྲིལ་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་གི་བཀའ་སློབ་དགོངས་དོན་བཞིན་བཙན་བྱོལ་དུ་ཕེབས་མ་ཐག་ནས་བོད་ཀྱི་ཆོས་རིག་དང་འཛིན་སྐྱོང་། ཤེས་ཡོན་བཅས་ཀྱི་ཐོག་ལ་ངལ་བ་འཛེམས་མེད་ཀྱིས་ཕྱག་ལས་གནང་སྟེ་མཛད་རྗེས་ཅན་གྱི་མི་སྣ་ཞིག་ཡིན་པ་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འོག་དཔུང་འདེགས་ཀྱིས་ཆབ་སྲིད་ཀྱི་ལས་གནས་སུ་ཐུགས་འགན་བཞེས་ཏེ་ཕྱག་ལས་གནང་ཡོད་པ་མ་ཟད། བཀའ་ཁྲིའི་ལས་གནས་བཞག་རྗེས་སུའང་མགོན་པོ་༸གང་ཉིད་མཆོག་ལ་དད་དམ་གཡོ་བ་མེད་པར་མུ་མཐུད་༸གང་ཉིད་མཆོག་གི་ཐུགས་རྗེའི་གྲིབ་བསིལ་འོག་བཞུགས་ནས་ལྷག་བསམ་ཆེན་པོས་ཞབས་འདེགས་ཞུ་བཞིན་ཡོད་པའི་རླབས་ཆེན་གྱི་མཛད་པར་མངོན་བསྟོད་གནང་འདུག གཞི་རྩའི་བཀའ་ཁྲི་ཟུར་པ་༸སྐྱབས་རྗེ་ཟམ་གདོང་རིན་པོ་ཆེ་མཆོག་དགུང་གྲངས་ ༨༠ ལ་ཕེབས་པའི་༸གྱ་སྟོན་དང་འབྲེལ་ཝཱ་ཎ་དབུས་བོད་ཀྱི་གཙུལ་ལག་སློབ་གཉེར་ཁང་གིས་གཙོས་པའི་ཨ་རིའི་ནིའུ་ཡོག བཞུགས་སྒར་དྷ་ས། དེ་བཞིན་ཁེ་ན་ཌ་ཊོ་རན་ཊོ་ལ་སོགས་པའི་བོད་མིའི་གནས་ཡུལ་ས་གནས་འདྲ་མིན་ནང་དུ་༸སྐུའི་འཁྲུངས་སྐར་སྲུང་བརྩི་ཞུས་དང་ཞུ་མུས་ཡིན་པ་རེད། ༸སྐུ་པར་ཁག་དྲྭ་རྒྱ་གཞན་ལས་བཏུས།

བོད་རྒྱ་འབྲེལ་མོལ་བསྐྱར་གསོ་ཡོང་བའི་ཆེད་དུ་སྤྱི་ལེ་ ༢༥༠༠༠ ཙམ་ལ་སྣུམ་འཁོར་བཏང་ནས་ཟླ་བ་གཉིས་ལྷག་གི་རིང་རོབ་རྒྱལ་ཁབ་ཁག་ ༣༠ ནང་དུ་བོད་དོན་ཞུ་གཏུག་སྐོར་གནང་བཞིན་པ་ཡོ་རོབ་སྤྱི་འཐུས་གྲྭ་ཐུབ་བསྟན་དབང་ཆེན་ལགས་དང་ཁོང་གི་ཕྱག་རོག་སེ་པན་ཡིན་པ་སྐུ་ཞབས་ Javier Nogue ལགས། དེ་བཞིན་སྐུ་ཞབས་ Pau Nubiola ལགས་བཅས་ཁོང་གསུམ་ཁ་སང་ཕྱི་ཚེས་ ༣ ཉིན་གྱི་ཕྱི་དྲོ་མཐའ་མའི་བོད་དོན་ཞུ་གཏུག་སྐོར་བསྐྱོད་གནང་ཡུལ་གྱི་ཡོ་རོབ་རྒྱལ་ཁབ་སུད་སི་ནང་དུ་ཕེབས་འབྱོར་བྱུང་ཡོད་པ་རེད། སྐབས་དེར་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་ཡོ་རོབ་སྤྱི་འཐུས་ཟམ་མདོ་བྱམས་པ་ཚེ་རིང་ལགས། སུད་སི་དང་ལིག་ཏེན་སིཊཡན་བོད་རིགས་མི་མང་རྒྱུན་ལས་རྣམ་པ། དེ་བཞིན་ས་གནས་བོད་རིགས་མི་མང་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་པ་མ་ཟད་ལྷག་པར་དུ་སུད་སི་གྲོས་ཚོགས་ཀྱི་འཐུས་མི་སྐུ་ཞབས་ Niklaus Gugger ལགས་གཙོ་བཞུགས་ཐོག་ས་གནས་བོད་རིགས་མི་མང་འདུ་འཛོམས་ཀྱིས་བོད་དོན་ཞུ་གཏུག་སྐོར་བསྐྱོད་གནང་མཁན་ཁོང་རྣམ་པ་གསུམ་ལ་ཕེབས་བསུའི་སྣེ་ལེན་གྱི་གསོལ་སྟོན་བཤམས་ཡོད་པ་རེད། འདི་ག་རླུང་འཕྲིན་ཁང་ནས་ཡོ་རོབ་བོད་དོན་གྲོས་མོལ་ཞུ་གཏུག་གི་སྐོར་བསྐྱོད་གནང་མཁན་ཡོ་རོབ་སྤྱི་འཐུས་གྲྭ་ཐུབ་བསྟན་དབང་ཆེན་ལགས་སུ་གནས་འདྲི་ཞུས་པར་ཐེངས་འདིའི་བོད་དོན་སྐོར་སྐྱོད་ཀྱི་ལས་འགུལ་ནི་ཁོང་གིས་བོད་ནང་གི་དངོས་ཡོད་གནས་སྟངས་གསལ་འདོན་སྤྱི་དང་སྒོས་བོད་རྒྱ་གཉིས་དབར་གྲོས་མོལ་བསྐྱར་གསོ་མགྱོགས་མྱུར་ཡོང་བའི་ཆེད་དུ་འདི་ལོའི་བོད་མིའི་མང་གཙོའི་དུས་ཆེན་ཉིན་ནད་དབུ་འཛུགས་གནང་སྟེ་སེ་པན་གྱི་གྲོང་ཁྱེར་སྦར་སི་ལོ་ན་ཡོ་རོབ་རྒྱལ་ཁབ་སུམ་ཅུའི་ནང་དུ་སྐོར་སྐྱོད་གནང་ཡོད་ཅིང། སུད་སི་འདི་བོད་དོན་ཞུ་གཏུག་སྐོར་བསྐྱོད་གནང་ཡུལ་ཡོ་རོབ་རྒྱལ་ཁབ་མཐའ་མ་དེ་ཆགས་ཀྱི་ཡོད་པ་གསུངས་སོང་། འདས་པའི་ཟླ་བ་གཉིས་ལྷག་ཙམ་གྱི་རིང་བོད་དོན་སྐོར་བསྐྱོད་དེའི་ཁྲོད་སྐུ་ཞབས་ཐུབ་བསྟན་དབང་ཆེན་ལགས་ཡོ་རོབ་རྒྱལ་ཁབ་སོ་སོའི་གྲོས་ཚོགས་འཐུས་མི་དང་གཞུང་འབྲེལ་གནད་ཡོད་མི་སྣར་ཐུག་འཕྲད་ཀྱིས་བོད་དོན་ཞུ་གཏུག་དང། དེ་བཞིན་ཡུལ་ཁག་སོ་སོའི་ནང་གི་རྒྱ་ནག་གཞུང་ཚབ་ཁང་ཁག་གི་སྒོ་རྡུང་བཞིན་བོད་རྒྱ་འབྲེལ་མོལ་བསྐྱར་གསོའི་ཡོང་བའི་ཞུ་སྙན་སོགས་ཕུལ་བ་དང། ས་གནས་སོ་སོའི་གསར་ཁང་ཁག་ཏུ་བོད་དོན་བཅར་འདྲི་དང་ལེན་བཅས་གནང་ཡོད་པ་རེད། སང་ཉིན་ཕྱི་ཚེས་ ༥ ཉིན་སྐུ་ཞབས་ཐུབ་བསྟན་དབང་ཆེན་ལགས་ནས་སུད་སི་རི་ཀོན་ཆོས་སྐོར་གློང་དགོན་པ་དང་། གནངས་ཉིན་ཕྱི་ཚེས་ ༦ ཉིན་སུད་སི་རྒྱལ་ས་སྦན་ནང་གཞུང་འབྲེལ་གནད་ཡོད་མི་སྣ་ཐུག་འཕྲད་བརྒྱུད་ནད་བོད་དོན་ཞུ་གཏུག་དང་། རྒྱ་ནག་གཞུང་ཚབ་ལ་བོད་དོན་ཞུ་སྙན་ཕུལ་རྒྱུ། དེ་བཞིན་མཐར་ཟླ་བ་འདིའི་ཕྱི་ཚེས་ ༦ ཉིན་སུད་སི་གྲོང་ཁྱེར་ཇི་ནི་ཝའི་རྒྱལ་ཚོགས་ཀྱི་ཐང་ཆེན་དུ་ཐེངས་འདིའི་ཡོ་རོབ་རྒྱལ་ཁབ་སུམ་ཅུའི་ནང་གི་ཡོ་རོབ་གྲོལ་མོལ་ཞུ་གཏུག་གི་སྐོར་བསྐྱོད་ལས་འགུལ་དེ་མཇུག་སྒྲིལ་གནང་རྒྱུ་རེད་འདུག

དེ་རིང་སྔ་དྲོ་ཕྱག་ཚོད་བཅུ་པའི་ཐོག་བཞུགས་སྒར་ཉེ་འཁྲིས་སུ་རྟེན་གཞི་བྱས་པའི་༸དཔལ་ལྡན་རྒྱུད་སྟོད་གྲྭ་ཚང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་བར་དོ་ལོངས་སྤྱོད་རྫོགས་པའི་སྐུ་མངོན་དུ་བྱས་ནས་ལོ་དྲུག་བརྒྱ་འཁོར་བ་དང་༸རྗེ་བླ་མ་ཙོང་ཁ་པ་ཆེན་པོས་རྒྱུད་ཆེན་ཤེས་རབ་སེངྒེ་དཔལ་བཟང་པོ་མཆོག་ལ་རྒྱུད་འགྲེལ་ཆེན་མོའི་གླེགས་བམ་གནང་སྟེ་གསང་སྔགས་ཀྱི་བསྟན་པའི་བདག་པོར་མངའ་གསོལ་ནས་ལོ་དྲུག་བརྒྱ་འཁོར་བ། དེ་བཞིན་སྟོད་རྒྱུད་གྲྭ་ཚང་ཕྱག་བཏབ་མཁན་རྒྱུད་ཆེན་རྡོ་རྗེ་འཆང་༸རྗེ་བཙུན་ཀུན་དགའ་དོན་གྲུབ་དཔལ་བཟང་པོ་མཆོག་འཁྲུངས་ནས་ལོ་དྲུག་བརྒྱ་འཁོར་བ་བཅས་དུས་དྲན་གསུམ་འཛོམས་ཀྱི་མཛད་སྒོ་ཞིག་གཟབ་རྒྱས་ངང་སྲུང་བརྩི་ཞུས་སོང་། མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་འཇམ་མགོན་རྒྱལ་བའི་༸རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་༸རྗེ་རྣམ་གཉིས་མཆོག རྒྱུད་སྟོད་གྲྭ་ཚང་གི་མཁན་རིན་པོ་ཆེ་མཆོག བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག བཀའ་ཟུར་ཀིརྟི་རིན་པོ་ཆེ་མཆོག ཏཱའི་སུ་ཏུ་རིན་པོ་ཆེ་མཆོག དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ལྷན་ཞུགས་ཀྱིས་མཛད་སྒོའི་ཐོག་མར་༸དཔལ་ལྡན་རྒྱུད་སྟོད་གྲྭ་ཚང་དང་རྒྱུད་ཟུར་མཐུན་ཚོགས་གཉིས་ཀྱིས་ཟུང་འབྲེལ་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་མགོན་པོ་༸གང་ཉིད་མཆོག་༸སྐུ་ཚེ་ཞབས་པད་བསྐལ་བརྒྱར་བརྟན་པའི་བསྟན་བཞུགས་རྒྱས་པ་ཞིག་བསྟར་འབུལ་ཞུས་སོང་། སྐབས་དེར་མགོན་པོ་༸གང་ཉིད་མཆོག་གིས་མཛད་སྒོར་བཅར་བའི་མང་ཚོགས་ལ་༸རྗེ་རིན་པོ་ཆེས་སེར་ར་དགོན་དུ་རྒྱུད་འགྲེལ་ཆེན་པོ་གསུངས་ཏེ་རྒྱུད་འགྲེལ་དེ་བཤད་སྒྲུབ་གཉིས་ཀྱི་ཐོག་ནས་སུས་འཛིན་སྐྱོང་གནང་ཐུབ་བམ་ཞེས་བཀའ་འདྲི་གནང་མཚམས་སུ་༸རྗེ་བཙུན་ཤེས་རབ་སེང་གེ་མཆོག་གིས་ཞལ་བཞེས་གནང་སྐོར་དང་དེ་རྗེས་༸རྗེ་བཙུན་ཀུན་དགའ་དོན་གྲུབ་མཆོག་གིས་༸དཔལ་ལྡན་རྒྱུད་སྟོད་གྲྭ་ཚང་དེ་བོད་ཀྱི་གཙང་ཁུལ་དུ་ཕྱག་བཏབ་ཡོད་པ་བཅས་༸དཔལ་ལྡན་སྟོད་རྒྱུད་གྲྭ་ཚང་ཐོག་མར་ཅི་ལྟར་ཕྱག་བཏབ་ཚུལ་གྱི་ལོ་རྒྱུས་ཞིབ་ཕྲ་ངོ་སྤྲོད་བསྩལ་བ་དང་འབྲེལ། རྒྱུད་གྲྭ་སྟོད་སྨད་གཉིས་ཀས་ད་ཆ་བཙན་བྱོལ་དུ་མགོན་པོ་༸གང་ཉིད་མཆོག་གི་བཀའ་དགོངས་བཞིན་མཚན་ཉིད་སློབ་རྒྱུར་དམིགས་བསལ་གྱི་འབད་བརྩོན་ཤུགས་ཆེར་གནང་བར་ཡི་རང་བསྔགས་བརྗོད་མཛད་པ་མ་ཟད། དགོན་པའི་ངོས་ནས་མུ་མཐུད་མདོ་བསྔགས་ཡོངས་སུ་རྫོགས་པར་བསླབ་པ་སློབ་གཉེར་གནང་རྒྱུ་གལ་ཆེན་པོ་ཡིན་པའི་ལམ་སྟོན་བཀྲིན་ཆེ་བ་བསྩལ་ཡོད། རྩ་བའི་ཐེངས་འདིའི་དུས་ཚིགས་དང་འབྲེལ་ཏེ་རྒྱུད་ཟུར་བརྒྱ་ལྷག་ཙམ་འདུ་འཛོམས་གནང་ཡོད་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཁོང་རྣམས་ལ་དགེ་འདུན་པ་ཡང་དག་ཅིག་མཇུག་སྐྱེལ་ཐུབ་མེད་ཀྱང་། སྤྱི་ཚོགས་ནང་སངས་རྒྱས་ཀྱི་བསྟན་པ་ངོ་སྤྲོད་ཀྱིས་མཚོན་པའི་སྤྱི་ཚོགས་ལ་ཞབས་འདེགས་བསྒྲུབ་དགོས་པའི་ལམ་སྟོན་བསྩལ་བ་དང་སྒོས་སུ་སྦྱིན་བདག་རྣམ་པ་གཙོས་པའི་དགོན་པ་དང་འབྲེལ་ཡོད་རྣམས་ལའང་ཚེ་རབས་ནས་ཚེ་རབས་སུ་འཕགས་པ་སྤྱན་རིས་གཟིགས་ཀྱིས་རྗེས་སུ་འཛིན་ངེས་ཡིན་པར་བཀའ་བསྩལ་སོང་། ༸གོང་ས་མཆོག་གིས་ད་དུང་བོད་རྒྱ་ཆེའི་མི་མང་གིས་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་ལྟར་མགོན་པོ་མཆོག་གིས་ཀྱང་དུས་རྟག་ཏུ་༸སྐུ་ཚེ་ཡུན་རིང་བཞུགས་རྒྱུའི་སྨོན་ལམ་འདེབས་བཞིན་ཡོད་པ་མ་ཟད་རྟགས་དང་མཚན་མ་ཁག་ལ་གཞིགས་ཚེ་དགུང་ལོ་བརྒྱ་དང་བཅུ་གྲགས་ཤིག་ལ་བཞུགས་རྒྱུ་ཡིན་པའི་ཞལ་བཞེས་བསྐྱར་ནན་མཛད་ཡོད། གཞི་རྩའི་༸དཔལ་ལྡན་རྒྱུད་སྟོད་གྲྭ་ཚང་ནི་རབ་བྱུང་བརྒྱད་པའི་ཤིང་རྟ་ཕྱི་ལོ་ ༡༤༧༤ ལོར་མཁས་གྲུབ་ཆེན་པོ་རྒྱུད་ཆེན་ཀུན་དགའ་དོན་གྲུབ་མཆོག་གིས་དབུས་སྟོད་བྱམས་པ་གླིང་དུ་རྒྱུད་སྟོད་གྲྭ་ཚང་ ཕྱག་བཏབ་ཡོད་པ་དང་། ཕྱིས་སུ་རྒྱ་ནག་གིས་བོད་ས་བཙན་བཟུང་བྱས་རྗེས་དགོན་པ་འདི་རྒྱ་གར་བྱང་ཕྱོགས་ཧི་མཱ་ཅལ་གྱི་ཌལ་ཧོར་གཞིས་ཆགས་པ་དང་། དེ་ནས་ཕྱི་ལོ་ ༡༩༧༤ ལོར་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་འབུམ་སྡེ་ལ། བསྟན་འཛིན་སྒང་དུ་གཞིས་ཆགས་པ་དང་། བྱེས་སུ་བཞུགས་སྒར་ཉེ་འཁྲེས་ཀྱི་ནོར་གླིང་དུ་གནས་སྤོར་བྱས་ཏེ་ད་ཆ་གྲྭ་རྒྱུན་ལྔ་བརྒྱ་ཙམ་གྱིས་མདོ་སྔགས་ཟུང་ལ་སློབ་གཉེར་གནང་མུས་ཡིན་པ་རེད། དེ་རིང་༸གོང་ས་༸སྐྱབས་མགོན་རིན་པོ་ཆེ་མཆོག་གིས་རྒྱུད་ཆེན་རྗེས་དྲན་གྱི་ཆེད་དུ་གསར་བཞེངས་མཛད་པའི་༸སྐུ་གསུང་ཐུགས་རྟེན་རྣམས་ལ་རབ་གནས་བྱིན་རླབས་བསྩལ་བ་མ་ཟད། སྔགས་རིམ་ཆེན་མོ་དཔེ་བསྡུར་མ་དང་རྒྱུད་ཀྱི་ཊཱི་ཀྐ་སྒྲོལ་མ་རབ་ཏུ་གསལ་བར་བྱེད་པའི་རྩ་འབྲེལ་སྦྱར་མ། རྒྱུད་ཀྱི་ཊཱི་ཀྐ་རིམ་གཉིས་གཏེར་མཛོད་རྩ་འགྲེལ་སོགས་ཀྱི་ཕྱག་དེབ་ཁག་གཅིག་དབུ་འབྱེད་བཀྲིན་བསྐྱངས་པ་དང་། ཉིན་རྒྱབ་ཏུ་རྒྱུད་ཀྱི་ཊཱི་ཀའི་གསང་སྔགས་མཁས་པའི་བགྲོ་གླེང་ཆེན་མོ་གནང་ཡོད་པ་རེད། ༸སྐུ་པར་ཁག་གཅིག་༸དཔལ་ལྡན་དགའ་ལྡན་ཕོ་བྲང་།

ཅེཀ་སྤྱི་མཐུན་རྒྱལ་ཁབ་ཀྱི་གཞུང་འབྲེལ་ལས་བྱེད་བགྲེས་པ་ཞིག་གིས་བདུན་ཕྲག་འདིའི་ནང་རྒྱ་ནག་ནས་ཡོ་རོབ་རྒྱལ་ཁབ་ཀྱི་བདག་དབང་ལ་གུས་བརྩི་དགོས་པའི་ཉེན་བརྡ་བཏང་འདུག དེ་ཡང་ཟླ་ ༡༠ པའི་ཚེས་ ༣༠ ཉིན་ Aljazeera གཙོས་པའི་བརྒྱུད་ལམ་ཁག་ནས་ཐོན་པའི་གནས་ཚུལ་ལ་གཞིགས་ན་ཉེ་ལམ་ཚེས་ ༢༩ ཉིན་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཙོ་སྐུ་ཞབས་ Jaroslav Kubera ལགས་དང་ཅེཀ་ནང་གི་རྒྱ་ནག་གཞུང་ཚབ་ཁང་གི་སྐུ་ཚབ་ Zhang Jianmin གཉིས་དབར་ཐུག་འཕྲད་ཀྱིས་གནད་དོན་ཁག་གཅིག་གི་ཐོག་བསམ་ཚུལ་བརྗེ་ལེན་གནང་ཡོད་པ་དང་། སྐབས་དེར་ Zhang Jianmin གྱིས་སྐུ་ཞབས་ Kubera ལགས་ཟླ་ ༡༠ པའི་འགོ་སྟོད་དུ་ཐེ་ཝན་ནས་གོ་སྒྲིག་ཞུས་པའི་སྣེ་ལེན་གྱི་དགའ་སྟོན་ཐོག་ཏུ་མཉམ་ཞུགས་དང་སྦྲགས། ཕྱོགས་གཉིས་ཀྱི་དཔལ་འབྱོར་ཟུང་འབྲེལ་སྐོར་གསུང་བཤད་གནང་བ་དང་ཐེ་ཝན་གྱི་དཔལ་འབྱོར་དང་རིག་གཞུང་ལས་ཁུངས་ཀྱི་སྐུ་ཚབ་དང་ལྷན་དུ་སྐུ་པར་སྒྲོན་པ་སོགས་གནང་བར་སྐྱོན་བརྗོད་བྱས་ཡོད་པ་རེད། Zhang Jianmin གྱིས་རྒྱ་ནག་ནས་ཅེཀ་ནང་ཉེ་ལམ་ཡོ་རོབ་ཀྱི་སྒོར་མོ་ཐེར་འབུམ་ལྷག་འགྲོ་གྲོན་བཏང་ཡོད་སྟབས་ད་ཆ་ཅེཀ་ནས་རྒྱ་ནག་རྒྱལ་ཁབ་གཅིག་གི་སྲིད་བྱུས་ལ་ཕོག་ཐུག་འགྲོ་བའི་ལས་དོན་གཉེར་ན་དེས་ཡུལ་དེའི་དཔལ་འབྱོར་གྱི་གནས་བབ་ལ་གྱོད་གུད་དང་ཉེན་ཚབས་བཟོ་ངེས་ཡིན་པ་ཉེན་བརྡ་བཏང་འདུག འོན་ཀྱང་སྐུ་ཞབས་ Kubera ལགས་ཀྱིས་པེ་ཅིན་ནས་ཐེ་ཝན་དེ་རང་བཙན་གྱི་རྒྱལ་ཁབ་ཅིག་ཡིན་པར་ཁས་ལེན་བྱེད་ཀྱི་མེད་ཀྱང་རྒྱ་ནག་གིས་དེར་ཁས་ལེན་མ་བྱེད་པའི་རྒྱུ་རྐྱེན་ལ་བརྟེན་ནས་རང་ཉིད་ཅེཀ་གྲོས་ཚོགས་ཀྱི་སྐུ་ཚབ་ཞིག་ཡིན་པའི་ཆ་ནས་ཐེ་ཝན་གྱི་སྐུ་ཚབ་དང་བཀའ་མོལ་མ་གནང་ནས་བཞུགས་ན་རྒྱུ་མཚན་གང་ཡང་མ་མཐོང་བ་དང་སྒོས་ཐེ་ཝན་ནི་ཅེཀ་སྤྱི་མཐུན་རྒྱལ་ཁབ་ཀྱི་ཚོང་འབྲེལ་བཞག་སའི་ཨེ་ཤ་ཡའི་རྒྱལ་ཁབ་ཆེ་ཤོས་གསུམ་པ་དེ་ཡིན་པ་གསུངས་འདུག སྐུ་ཞབས་ Kubera ལགས་ཀྱིས་ང་ཚོས་རྒྱ་ནག་གི་བཞེངས་ཕྱོགས་ཤེས་ཀྱི་ཡོད་པ་བཞིན་རྒྱ་ནག་ནས་ང་ཚོའི་བཞེངས་ཕྱོགས་ཤེས་དགོས་པ་དང་ལྷག་པར་དུ་པེ་ཅིན་ནས་ཅེཀ་རྒྱལ་ཁབ་ལ་སྟོབས་ཤུགས་སྤྱད་ནས་སྡིག་ར་སྐུལ་རྒྱུ་མེད་པ་གསུངས་འདུག རྒྱ་ནག་དེ་སྔ་ཨུ་རུ་སུ་རྒྱལ་ཁབ་ཁ་གཏོར་ཕྱིན་པ་བཞིན་དེ་ལྟར་ཆགས་ངེས་ལ་འཇིགས་ནས་དེ་གའི་རྒྱལ་ཁབ་ཀྱི་ས་ཁོངས་ཀྱི་གནད་དོན་ལ་ཚོར་བ་སྐྱེན་པོ་ངང་རྣམ་འགྱུར་སྟོན་པ་དང་སྒོས་བོད་དང་ཐེ་ཝན་གྱི་གནད་དོན་མ་ཡིན་པར་གཙོ་བོ་རྒྱ་ནག་སྐམ་ས་ཆེན་པོ་མགོ་རྟིང་སློག་པར་ཞེད་སྣང་གིས་སེམས་འཚབ་བྱེད་བཞིན་པ་གསུངས་འདུག རྩ་བའི་ཉེ་ལམ་ཅེཀ་ཀྱི་རྒྱལ་ས་པྲཱག་གི་གྲོང་ཁྱེར་སྤྱི་ཁྱབ་སྐུ་ཞབས་ Zdenek Hrib ལགས་ནས་དེ་སྔ་ཡུལ་དེའི་ནང་ཕྱི་རྒྱལ་གཞུང་འབྲེལ་མི་སྣའི་ལྷན་སྐབས་རྒྱ་ནག་ནས་ཐེ་ཝན་གྱི་སྐུ་ཚབ་མཉམ་ཞུགས་གནང་རྒྱུའི་ཐད་ལ་ངོ་རྒོལ་བྱས་པ་དེ་ལྟར་ཡང་། སྐུ་ཞབས་ Hrib ལགས་ཀྱིས་དེར་ཁས་ལེན་ཞུས་མེད་པ་དང་དེ་སྔ་པྲཱག་དང་རྒྱ་ནག་གཉིས་བར་སྤུན་སྲིང་གི་གྲོང་ཁྱེར་གན་རྒྱ་འོག་རྒྱ་ནག་གཅིག་ལ་བརྩི་བཀུར་ཞེས་པའི་ཆ་རྐྱེན་དེ་ཕྱིར་འཐེན་དགོས་པའི་དགོས་འདུན་དང་དེ་ལྟར་མ་གནང་ཚེ་གན་རྒྱ་རྩིས་མེད་བཏང་རྒྱུའི་ཉེན་བརྡ་བཏང་ཡོད་པ་རེད། ད་དུང་དེ་སྔ་སྐུ་ཞབས་ཁོང་གིས་པྲཱག་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གདན་ཞུས་ཀྱིས་བོད་ཀྱི་རྒྱལ་དར་བསྒྲེངས་འཛུགས་དང་གྲོང་ཁྱེར་གྱི་ལྡེ་མིག་བཅས་ཀྱང་ཕུལ་ཡོད་པ་རེད།  ཉེ་ལམ་རྒྱ་ནག་གིས་ཡུལ་དེའི་ནང་ཅེཀ་ཀྱི་ Prague Philharmonic དང་ Prague Quartet དེ་བཞིན་ Prague Radio Symphony Orchestra སོགས་རོལ་རྩེད་རུ་ཁག་ནས་རོལ་དབྱངས་གཟིགས་འབུལ་ཞུ་སླད་ཕེབས་ཡོད་ཀྱང་རྒྱ་གཞུང་གིས་དེར་འཁོན་ལན་ཚུལ་དུ་རོལ་དབྱངས་ཚོགས་པ་དེའི་འཁྲབ་སྟོན་ཕྱིར་འགྱངས་བྱས་ཡོད་པ་རེད། སྐབས་དེར་ Zhang Jianmin ཀྱིས་གནད་དོན་དེར་ངོས་ལེན་མ་བྱས་པ་དང་རྒྱུ་མཚན་གཞན་བགྲངས་ཀྱང་། ཅེཀ་རིག་གཞུང་བློན་ཆེན་སྐུ་ཞབས་ Lubomír Zaorálek མཆོག་གིས་རྒྱ་གཞུང་གི་བྱ་སྤྱོད་དེས་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་དོ་ཕོག་གཏོང་གི་ཡོད་པར་སྐྱོན་བརྗོད་དང་འབྲེལ།  Zhang Jianmin  ཡིས་རྫུན་བཤད་ཀྱི་ཡོད་པ་གསུངས་ཡོད་པ་དང་། གང་ལྟར་བཞེངས་ཕྱོགས་མི་འདྲ་བ་བཅངས་བའི་སྒོ་ནས་ཕན་ཚུན་ལབ་གླེང་དང་དེས་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་འགྲོ་བཞིན་པ་རེད་འདུག ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་ Milos Zeman ནས་དེ་སྔ་ནས་བོད་དེ་རྒྱ་ནག་གི་ཆ་ཤས་སུ་ངོས་འཛིན་ཞུ་མཁན་དང་རྒྱ་ནག་དང་ལྷན་འབྲེལ་བ་དམ་ཟབ་བྱེད་འདོད་ཞིག་ཡོད་ཀྱང་། ཡུལ་དེའི་ Pirate ཆབ་སྲིད་ཚོགས་པ་ཞེས་ཆབ་སྲིད་ཚོགས་པ་ཤུགས་ཆེ་ཤོས་ཀྱི་འགོ་ཁྲིད་སྐུ་ཞབས་ JAKUB MICHALEK ལགས་ཀྱིས་ང་ཚོས་རྒྱ་ནག་དང་ལྷན་དོན་དམ་གྱི་འབྲེལ་ལམ་ལ་རྒྱབ་སྐྱོར་བྱེད་ཀྱི་ཡོད། འོན་ཀྱང་འགྲོ་བ་མིའི་ཐོབ་ཐང་དང་འབྲེལ་གནད་དོན་སྲུང་སྐྱོབ་དང་རྒྱལ་ཁབ་ཀྱི་ཆེ་མཐོང་ལ་དོ་ཕོག་གཏང་རྒྱུ་མེད་པ་མ་ཟད། ཅེཀ་ཀྱི་སྲིད་འཛིན་གོང་མ་སྐུ་ཞབས་ Vaclev Havel མཆོག་གི་འགྲོ་བ་མིའི་བདེ་རྩའི་སླད་ཕྱི་འབྲེལ་གྱི་སྲིད་བྱུས་ཆེད་འཛུགས་གནང་བ་དེ་རྒྱུན་མཐུད་རྒྱུ་ཡིན་པ་གསུངས་འདུག