གསར་འགྱུར།

ཡོ་རོབ་མཐུན་ཚོགས་ཀྱིས་རྒྱ་ནག་གཞུང་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་༸སྐུའི་ཡང་སྲིད་ལ་གུས་བརྩི་ཞུ་དགོས་པ་དང་༸སྐུའི་ཡང་སྲིད་དེ་ཡང་བོད་བརྒྱུད་ནང་བསྟན་གྱི་ལམ་སྲོལ་གཞི་བཞག་ཐོག་ངོས་འཛིན་ཞུ་དགོས་ཞེས་ནན་བརྗོད་གནང་འདུགཡོ་རོབ་གྲོས་ཚོགས་འཐུས་མི་ཁག་ཅིག་གིས་ཉེ་སྔོན་ཡོ་རོབ་གྲོས་ཚོགས་བརྒྱུད་ཡུ་རོབ་སྤྱི་མཐུན་ཚོགས་པའི་ཚོགས་གཞོན་དང་ཕྱི་འབྲེལ་གཙོ་འཛིན་དང་ཡུ་རོབ་ལྷན་ཚོགས་ཀྱི་ཚོགས་གཞོན་སྐུ་ཞབས་ Joesp Borrell མཆོག་ལ་ཡིག་ཐོག་ནས་དྲི་བ་ཞིག་ཕུལ་འདུག་པ་དང་དེའི་ནང་གཙོ་བོ་ཡོ་རོབ་གྲོས་ཚོགས་འཐུས་མི་ཁག་ནས་ཉེ་ཆར་རྒྱ་ནག་གཞུང་གིས་ལོ་ངོ་སྟོང་ཕྲག་ལྷག་གི་ལོ་རྒྱུས་ལྡན་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་རྒྱུའི་ལམ་སྲོལ་དེར་རྡོག་རོལ་བཏང་བ་མ་ཟད། ལྷག་དོན་༸གོང་ས་ཏཱ་ལའི་བླ་མའི་མ་འོངས་པར་༸སྐུའི་ཡང་སྲིད་ངོས་འཛིན་ཞུ་ཕྱོགས་ཐད་ལའང་ཐེ་བྱུས་བྱ་རྒྱུ་ཡིན་པ་གསལ་པོ་ཡིན་པ་སོགས་ལུང་འདྲེན་གྱིས་ཡུ་རོབ་སྤྱི་མཐུན་ཚོགས་པའི་ངོས་ནས་༸གོང་ས་མཆོག་གི་མ་འོངས་པའི་ཡང་སྲིད་གནད་དོན་ཐོག་ལངས་ཕྱོགས་གང་འདྲ་ཞིག་འཛིན་བཞིན་ཡོད་ཅེས་འདྲི་རྩད་ཞུས་ཡོད་པ་རེད། ཉེ་ཆར་ཕྱི་ཟླ་ ༤ ཚེས་ ༣  ཉིན་ཡུ་རོབ་ལྷན་ཚོགས་ཀྱི་ཚོགས་གཞོན་སྐུ་ཞབས་ Joesp Borrell མཆོག་གིས་ཉེ་སྔོན་གྲོས་ཚོགས་འཐུས་མི་རྣམ་པའི་དྲི་བར་ཡིག་ཐོག་ནས་ལན་འདེབས་གནང་བར་ཁོང་གིས་ཡོ་རོབ་འཐུན་ཚོགས་ཀྱིས་དུས་དང་རྣམ་པ་ཀུན་ཏུ་རྒྱ་ནག་གཞུང་ལ་གྲངས་ཉུང་མི་རིགས་ཁག་དང་ལྷག་དོན་བོད་དང་ཡུ་གུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་ཐུགས་འཚབ་གནང་གི་ཡོད་པ་མ་ཟད་གྲངས་ཉུང་མི་རིགས་ཁག་དང་བོད་དང་ཡུ་གུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་བརྩི་བཀུར་ཞུ་དགོས་པའི་སྐུལ་འདེད་གནང་བཞིན་ཡོད་པ་དང་ཆབས་ཅིག ཡོ་རོབ་མཐུན་ཚོགས་ནས་དེ་ལྟ་བུའི་ལངས་ཕྱོགས་གཞི་བཞག་ཐོག་ད་བར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་རྒྱལ་ཚོགས་ཀྱི་སྤྱི་ཁྱབ་ལྷན་ཚོགས། དེ་མིན་རྒྱ་ནག་གཞུང་གི་འབྲེལ་ཡོད་འགོ་ཁྲིད་དང་འབྲེལ་མོལ་བཅས་ཁག་སོ་སོར་ལའང་ཡོངས་གྲགས་ཐོག་གླེང་སློང་གནང་བཞིན་ཡོད་ཅེས་གསུངས་འདུགསྐུ་ཞབས་ Joesp Borrell མཆོག་གིས་ད་དུང་ཡོ་རོབ་མཐུན་ཚོགས་ཀྱི་ངོས་ནས་༸གོང་ས་མཆོག་གི་ཡང་སྲིད་གནད་དོན་ཐོག་སྔ་ལོའི་ཡོ་རོབ་མཐུན་ཚོགས་དང་རྒྱ་ནག་དབར་གྱི་འགྲོ་བ་མིའི་ཐོབ་ཐང་འབྲེལ་མོལ་སྒྲོམ་གཞི་འོག་ཡོ་རོབ་མཐུན་ཚོགས་ཀྱིས་རྒྱ་ནག་གཞུང་ལ་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་ཡང་སྲིད་གནད་དོན་སྐོར་གླེང་སློང་བྱས་ཡོད་པ་དང་མ་འོངས་པ་ཡང་མུ་མཐུད་ནས་དེ་ལྟར་གླེང་སློང་གནང་རྒྱུ་ཡིན་པ་མ་ཟད་རྒྱ་ནག་གཞུང་གི་ངོས་ནས་མ་འོངས་པའི་༸སྐུའི་ཡང་སྲིད་ལ་གུས་བརྩི་ཞུ་དགོས་པ་དང་ཡང་སྲིད་དེ་ཡང་བོད་བརྒྱུད་ནང་བསྟན་གྱི་ལམ་སྲོལ་གཞི་བཞག་ངོས་འཛིན་ཞུ་དགོས་ཞེས་ནན་བརྗོད་གནང་འདུག སྤྱིར་ཐེངས་འདིའི་ཡུ་རོབ་ལྷན་ཚོགས་སུ་བོད་ནང་གི་ཆོས་དད་རང་དབང་དང་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་གནད་དོན་སྐོར་ལ་འདྲི་རྩད་གནང་བ་དེ་གཙོ་བོ་ཡོ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཡུ་རོབ་གྲོས་ཚོགས་ཀྱི་གྲོས་ཚོགས་འཐུས་མི་ Petras Auštrevičius མཆོག་དང་། Aušra Maldeikienė མཆོག Hannes Heide མཆོག དེ་བཞིན་ Francisco Guerreiro མཆོག Petra De Sutter མཆོག་བཅས་ནས་གནད་དོན་དེ་འབྲེལ་སྙན་སེང་ཞུས་ཡོད་པ་རེད། གཞི་རྩའི་ཉེ་བའི་ལོ་ཤས་ནང་དུ་རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་༸སྐུའི་ཡང་སྲིད་ངོས་འཛིན་ཞུ་ཕྱོགས་ཐད་ཐེ་བྱུས་བྱ་རྒྱུ་རྒྱལ་སྤྱིའི་ཐོག་ཡོངས་གྲགས་བྱས་པ་ནས་བཟུང་ཉེ་ཆར་ཨ་རི་དང་ནི་ཐར་ལན་ཌི་དང་། དེ་བཞཱིན་བྷེལ་འཇམ་བཅས་ནས་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་གནད་དོན་དང་འབྲེལ་བའི་ནང་བླ་སྤྲུལ་ཡང་སྲིད་གནད་དོན་དེ་ནི་བོད་མིའི་གཞི་རྩའི་ཆོས་དད་རང་དབང་དང་འབྲེལ་བ་ཡོད་སྟབས་བོད་མི་ཁོ་ནར་དེ་འབྲེལ་ཐོག་ཇི་ལྟར་གནང་རྒྱུའི་རང་དབང་ཡོད་པ་ལས་རྒྱ་ནག་གཞུང་ལ་དེ་ལྟར་མེད་ཅེས་བརྗོད་ཡོད་པ་རེད།

རྒྱ་ནག་གྲོང་ཁྱེར་ཝུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་དེ་ད་ཆ་འཛམ་གླིང་གི་རྒྱལ་ཁབ་ཉིས་བརྒྱ་ལྷག་ནང་ཁྱབ་གདལ་འགྲོ་བཞིན་པར་བརྟེན་རིམས་ནད་དེར་གདོང་ལེན་དང་བཅོས་ཐབས་སོགས་ཀྱི་ཆེད་རྒྱལ་ཁབ་སོ་སོ་ནས་དམིགས་བསལ་མ་དངུལ་མཁོ་སྒྲུབ་གནང་གི་ཡོད་པ་རེད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་ཆོས་བརྒྱུད་ཆེན་པོ་ས་དགེ་བཀའ་རྙིང་གཙོས་གཡུང་དྲུང་བོན་སོགས་རིས་མེད་ཀྱི་བླ་སྤྲུལ་ཁག་དང་བོད་པའི་ཚོགས་སྒེར་ཁག་གིས་རྒྱ་གར་དབུས་གཞུང་དང་མངའ་སྡེར་ཏོག་དབྱིབས་རིམས་ནད་ལ་གདོང་ལེན་སླད་དངུལ་དངོས་ཀྱི་ཞལ་འདེབས་མང་དག་ཅིག་གནང་བཞིན་ཡོད་པ་དང་དུས་ད་ལྟའང་དེ་ལྟར་ཞལ་འདེབས་ཕུལ་མཁན་ཇེ་མང་དུ་འགྲོ་བཞིན་འདུགརྒྱ་གར་ལྷོ་ཕྱོགས་སུ་རྟེན་གཞི་བྱས་པའི་༸སྐྱབས་རྗེ་པད་ནོར་རིན་པོ་ཆེ་མཆོག་གི་དགེ་རྩ་ཚོགས་པས་ཀ་ན་ཊ་ཀའི་མངའ་སྡེའི་བློན་ཆེན་གྱི་མཚན་ཐོག་ཏུ་ཕྱག་བྲིས་ཕུལ་བའི་ནང་ད་ཆ་ཏོག་དབྱིབས་རིམས་ནད་རྐྱེན་པས་མི་མང་དག་ཅིག་ནད་དེས་མནར་བཞིན་པ་དང་དེ་བཞིན་དུ་མ་ཞིག་འདས་གྲོངས་སུ་གྱུར་ཡོད་པས་དེར་ཐུགས་ཕམ་ཡོད་པ་གསུངས་པ་དང་སྒོས་རིམས་ནད་དེ་འགོག་ཐབས་སླད་རྒྱ་གར་གྱི་སྲིད་བློན་སྐུ་ཞབས་མོ་དཱི་མཆོག་གི་དབུ་ཁྲིད་འོག་དབུས་དང་མངའ་སྡེ་གཞུང་། འཕྲོད་བསྟེན་གྱི་འབྲེལ་ཡོད་ལས་བྱེད་སོགས་ནས་ཉིན་མཚན་བལྟོས་མེད་ཕྱག་ལས་གནང་བཞིན་པ་མ་ཟད་ལྷག་པར་ཀ་ན་ཊ་ཀ་མངའ་སྡེས་ས་གནས་ཀྱི་ཡུལ་མི་རྣམས་རིམས་ནད་དེ་ལས་སྐྱོབ་སླད་ལས་དོན་རྒྱ་གང་ཆེ་གནང་པར་རྒྱབ་སྐྱོར་མཚོན་ཕྱིར་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་བཅུ་ཞལ་འདེབས་ཕུལ་བ་དང་ནད་ཡམས་དེ་མགྱོགས་མྱུར་ཞི་བར་སྨོན་འདུན་གནང་འདུགདེ་བཞིན་རྒྱ་གར་བྱང་ཕྱོགས་སྒང་ཏོག་ཏུ་རྟེན་གཞི་བྱས་པའི་མཚུར་ཕུ་བླ་བྲང་གིས་ཏོག་དབྱིབས་ནད་ལ་གདོང་ལེན་སླད་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་གསུམ་ཞལ་འདེབས་ཕུལ་འདུག དེ་དང་ཕྱོགས་མཚུངས་ཁ་སྔོན་ཚེས་ ༨ ཉིན་རྒྱ་གར་བྱང་ཕྱོགས་ལྡེ་ར་ལྡུན་གྲོང་ཁྱེར་ནང་རྟེན་གཞི་བྱས་པའི་འབྲི་གུང་བཀའ་བརྒྱུད་གཙུག་ལག་སློབ་གཉེར་ཁང་གིས་ཁུལ་དེའི་མངའ་སྡེ་གཞུང་གི་ཕྱག་ལས་གནང་ཁག་ལ་བསྔགས་བརྗོད་དང་སྦྲགས། མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་ལྔ་ཞལ་འདེབས་གནང་ཡོད་པ་དང་གཙུག་ལག་སློབ་གཉེར་ཁང་གི་དགེ་ལས་སློབ་མ་སོགས་ཀྱི་སར་ནས་དབུལ་ཕོངས་ཉམ་ཐག་ཚོར་ཟས་སྦྱིན་སླད་ཞལ་འདེབས་ཧིན་སྒོར་འབུམ་གཉིས་ལྷག་བསྡུ་རུབ་གནང་འདུགརྒྱ་གར་ལྷོ་ཕྱོགས་སུ་རྟེན་གཞི་བྱས་པའི་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་གིས་ཁ་སང་ཚེས་ ༩ ཉིན་ནད་ཡམས་འགོག་བཅོས་ཀྱི་ལས་གཞིའི་ཆ་ཤས་སུ་རྒྱ་གར་དབུས་གཞུང་ལ་ཧིན་སྒོར་འབུམ་བདུན་དང་ཁྲི་ལྔ་དང་མངའ་སྡེ་གཞུང་ལ་ཧིན་སྒོར་འབུམ་གསུམ་དང་ཁྲི་ལྔ། དེ་བཞིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་སུ་འབུམ་གཉིས་དང་ཁྲི་ལྔ། མོན་གྷོ་འདོད་རྒུ་གླིང་གི་བོད་མིའི་ས་གནས་སུ་ཧིན་སྒོར་འབུམ་གཅིག་བཅས་ཞལ་འདེབས་གནང་འདུག བློ་གསལ་གླིང་གྲྭ་ཚང་གིས་མངའ་སྡེ་གཞན་ནས་ཡོང་བའི་རྒྱ་གར་ལས་མི་དང་ས་གནས་བོད་མི་གཙོས་པའི་རྒྱ་གར་བ་དཔལ་འབྱོར་ཞན་པའི་ཁྱིམ་ཚང་ཁག་ལ་བཟའ་ཆས་སོགས་ཀྱི་རོགས་སྐྱོར་གནང་མུས་རེད་འདུགཁ་སང་ཕྱི་ཚེས་ ༩ ཉིན་རྒྱ་གར་བྱང་ཕྱོགས་ཧི་མཱ་ཅལ་མངའ་ཁོངས་སྦིར་བོད་ཚོགས་ནས་ཀྱང་མངའ་སྡེ་ནས་རིམས་ནད་དེར་གདོང་ལེན་གནང་ཕྱོགས་ལ་རྒྱབ་སྐྱོར་དང་སྦྲགས་ཏེ་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་གཅིག་དང་།  དེ་བཞིནཀཱངྒ་རཱ་རྫོང་དཔོན་གྱི་ངལ་སེལ་ཐེབས་རྩར་ཁྲི་ལྔ་ཞལ་འདེབས་གནང་འདུགགཞི་རྩའི་ཉེ་ལམ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མི་རྣམས་ནས་དང་བླངས་ཐོག་རང་རང་སོ་སོའི་མངའ་སྡེ་དང་དེ་བཞིན་སྲིད་བློན་མཆོག་གི་མཚན་ཐོག་ཏུ་ཡོད་པའི་ངལ་སེལ་ཐེབས་རྩར་ཞལ་འདེབས་རྒྱ་གང་ཆེ་གནང་དགོས་པའི་གཞེན་བསྐུལ་གནང་ཡོད་པ་དང་འདས་པའི་ཉིན་ཤས་ནས་བོད་པའི་བླ་སྤྲུལ་ཁག་དང་དགོན་སྡེ་གྲྭ་ཚང་། གཞིས་ཆགས་སོ་སོ་ནས་མངའ་སྡེ་དང་དབུས་གཞུང་གཉིས་སུ་རིམས་ནད་དེར་གདོང་ལེན་དང་གཞུང་གི་ལས་དོན་ལ་རྒྱབ་སྐྱོར་མཚོན་ཕྱིར་ཞལ་འདེབས་དང་དབུལ་ཕོངས་ཉམ་ཐག་ཚོར་ཟས་སྦྱིན་སོགས་རྣམ་དཀར་དགེ་བའི་ཕྱག་ལས་གནང་མུས་ཡིན་པ་རེད།རྩ་བའི་ཏོག་དབྱིབས་རིམས་ནད་རྐྱེན་པས་ད་བར་འཛམ་གླིང་གི་མི་གྲངས་ས་ཡ་གཅིག་ལྷག་ལ་ནད་དེ་ཕོག་ཡོད་པ་དང་ཁྲི་དགུ་ལྷག་ཙམ་འདས་གྲོངས་སུ་གྱུར་བ། འབུམ་གསུམ་ལྷག་དྲག་སྐྱེད་བྱུང་ཡོད་པ་རེད། ལྷག་དོན་རྒྱ་གར་ནང་རིམས་ནད་དེ་ཕོག་མཁན་གྱི་གྲངས་འབོར་ཉིན་རེ་བཞིན་ཇེ་འཕར་འགྲོ་གི་ཡོད་པ་དང་ད་བར་གྱི་གྲངས་ཐོར་གཞིགས་ན་རྒྱ་གར་ནང་མི་དྲུག་སྟོང་ལྷག་ལ་རིམས་ནད་དེ་ཕོག་ཡོད་པ་དང་ཉིས་བརྒྱ་ལྷག་འདས་གྲོངས་གྱུར་ཡོད་པ་རེད། དེ་བཞིན་མང་ཚོགས་ལྔ་བརྒྱ་ལྷག་ཙམ་དྲག་སྐྱེད་དུ་བྱུང་ཡོད་པ་རེད།

བོད་ནང་གི་རྒྱ་ནག་གི་གཞུང་འབྲེལ་གྱི་ཀྲུང་གོའི་བོད་ལྗོངས་དྲྭ་གནས་སུ་གནས་ཚུལ་འཁོད་པ་ལྟར་ན་ཟླ་འདིའི་ཚེས ༧ ཉིན་རྒྱ་ནག་གི་མེ་འཁོར་ལྕགས་ལམ་གྱི་ཨང་རྟགས་དགུ་བའི་འཛུགས་སྐྲུན་གྱི་ལས་གཞིའི་ཁྲོད་ལྷ་ས་ནས་ཉིང་ཁྲི་ཁུལ་གྱི་ལམ་བར་དུ་སྨན་གླིང་ཕུག་ལམ་དང་གཙང་དཀར་ཕུག་ལམ་གཉིས་ཉིན་གཅིག་ནང་བདེ་བླག་ངང་སྦྲེལ་མཐུད་བྱུང་ཞིང་། ད་ལྟའི་བར་ཟི་ཁྲོན་ནས་ཉིང་ཁྲིའི་་ལྕགས་ལམ་འཛུགས་སྐྲུན་གྱི་ལས་གཞིའི་ཁྲོད་དེའི་ཁྱོན་སྤྱི་ལེ་ ༢༡༦ གྱི་ལྕགས་ལམ་ཁུལ་དུ་ཕུག་ལམ་ ༤༧ ཙམ་འབྲེལ་མཐུད་བྱུང་ཡོད་པར་འཁོད་འདུག ཐེངས་འདིའི་བོད་ཁུལ་གྱི་སྨན་གླིང་ཕུག་ལམ་གྱི་ཆ་སྙོམས་ཀྱི་ས་བབ་མཐོ་ཚད་ལ་སྨི་ ༣༡༠༠ ཡོད་པ་དང་སྤྱིའི་རིང་ཚད་ལ་སྨི་ ༡༡༥༦༠ ཡོད་པ་འཁོད་པ་དང་སྦྲགས། ཁུལ་འདིའི་ཨར་སྐྲུན་ལས་ཀའི་དཀའ་ཚེགས་ཆེ་ཤོས་ཀྱི་སྨི་ཁྲི་ལྷག་ཡོད་པའི་ཕུག་ལམ་དྲུག་ཁྲོད་ཀྱི་གཅིག་ཡིན་སྟབས་ས་གཤིས་ཀྱི་ཆ་རྐྱེན་རྙོག་འཛིང་ཆེ་བ་དང་བདེ་འཇགས་ཀྱི་རིམ་པའི་ཉེན་ཁ་ཧ་ཅང་ཆེ་བའི་ཕུག་ལམ་ཞིག་ཡིན་པ་དང་ཀྲུང་གོའི་ལྕགས་ལམ་འཛུགས་སྐྲུན་གྱི་བཀོད་འདོམས་པ་ཧཱོ་ཞུས་ཀྱིས་ངོ་སྤྲོད་བྱས་པར་ཕུག་ལམ་ཨར་ལས་ཁྲོད་བྲག་རི་གས་གཏོང་བཏང་བ།འཁྱགས་རོམ་གྱི་བང་རིམ་བརྒལ་བ་དེ་བཞིན་རླུང་བསགས་བྱེ་ཕུང་སོགས་བརྒྱུད་ནས་ལྕགས་ལམ་འཛུགས་སྐྲུན་བྱས་ཡོད་པར་འཁོད་འདུགདེ་བཞིན་ཐེངས་འདིའི་ལྷ་སའི་ཉིང་ཁྲི་ཁུལ་གྱི་ལྕགས་ལམ་ནི་བོད་རང་སྐྱོང་ལྗོངས་ཀྱི་གློག་ཤུགས་ཅན་གྱི་ལྕགས་ལམ་ཐོག་མ་དེ་ཡིན་ཞིང་། ལམ་ཐིག་ཧྲིལ་པོའི་རིང་ཚད་ལ་སྤྱི་ལེ་ ༤༣༥ ཡོད་པ་དང་ཆུ་ཚོད་རེའི་མྱུར་ཚད་སྤྱི་ལེ་ ༡༦༠ བར་འགྲོ་ཐུབ་པར་བྱུས་འགོད་བྱས་ཡོད་པ་དང་ཐེངས་འདིའི་ཕུག་ལམ་ ༤༧ མཉམ་སྦྲེལ་བྱུང་བའི་ཁྲོད་དུ་སྤྱི་ལེ་ ༡༠ ཡན་གྱི་ཕུག་ལམ་རིང་ཤོས་དྲུག་ཡོད་པ་རེད། ཟམ་པ་ ༡༢༠ འཛུགས་སྐྲུན་བྱེད་འཆར་ཡོད་པའི་ཁྲོད་ཟམ་པ་ ༡༡༩ ལེགས་གྲུབ་ངང་སྐྲུན་ཟིན་པ་དང་སྔོན་དཔག་བྱས་ན་ ༢༠༢༠ ལོའི་ལོ་མཇུག་ཏུ་ལྕགས་ལམ་ཧྲིལ་པོ་འདིང་ཚར་རྒྱུ་ཡིན་པ་དང་། ༢༠༢༡ ལོར་ལྕགས་ལམ་ཡོངས་སུ་ལེགས་གྲུབ་ཀྱིས་མེ་འཁོར་ཤར་གཏོང་ཐུབ་རྒྱུ་ཡིན་པར་ཆེད་བཀོད་བྱས་འདུག རྩ་བའི་བོད་ཁུལ་ནི་ས་བབ་མཐོ་ཞིང་གནམ་གཤིས་ཡག་ཅིང་མཁའ་དབུགས་ཆེས་གཙང་བའི་འཛམ་གླིང་གི་ཡང་རྩེ་ཡིན་ནའང་རྒྱ་ནག་གིས་བོད་ས་བཙན་བཟུང་བྱས་པ་ནས་བཟུང་བོད་མཐོ་མཐོ་སྒང་འཛུགས་སྐྲུན་གྱི་ལས་གཞི་ཞེས་པའི་མིང་བྱང་གི་འོག་ཆུ་གློག་དང་དང་མེ་འཁོར་ལྕགས་ལམ་འཛུགས་སྐྲུན་གྱི་ལས་གཞི་རྒྱ་ཆེར་སྤེལ་ཡོད་པ་ལས། གཙོ་བོ་བོད་ནང་གི་རང་བྱུང་ཐོན་ཁུངས་ཁག་རྒྱ་ནག་ཏུ་འབོར་འདྲེན་བྱེད་རྒྱུ་དང་།   བོད་མཐོ་སྒང་དེ་རྒྱ་ནག་གི་ཡུལ་སྐོར་སྤྲོ་འཁྱམ་གྱི་ས་གནས་ཤིག་ཏུ་བསྒྱུར་ནས་རྒྱ་ནག་གི་མི་འབོར་མང་པོ་བོད་ཁུལ་དུ་འབོར་འདྲེན་གྱིས་བོད་མི་རྣམས་རང་ས་ནས་གྲངས་ཉུང་མི་རིགས་སུ་བསྒྱུར་རྒྱུ་ཙམ་དུ་མ་ཟད་བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས་གཙོས་པའི་སྐད་ཡིག་དང་བཅས་པ་རྒྱར་བསྒྱུར་བྱེད་རྒྱུ་དམིགས་པ་ཞིག་ཡིན་པ་རེད། ཉེ་བའི་ལོ་ཤས་ནང་བོད་མཐོ་སྒང་དུ་འཛུགས་ཀྱི་ལས་གཞི་མང་དྲགས་རྐྱེན་གནམ་གཤིས་ལ་འགྱུར་ལྡོག་ཆེན་པོ་འགྲོ་བཞིན་པ་དང་། རི་ཉིལ་བ་དང་ཆུ་ལོག་རྒྱུགས་པ་སོགས་ཀྱི་གནད་དོན་རིམས་པ་ཐོན་ཡོད་པའི་ཁྲོད་ ཕྱི་ཕྱོགས་ཀྱི་ཁོར་ཡུག་ཆེད་མཁས་བ་མང་པོས་དེ་ནི་རྒྱ་ནག་གི་འཛུགས་སྐྲུན་ལས་གཞི་ལ་བརྟེན་ནས་བྱུང་གི་ཡོད་པར་ཐེར་འདོན་གནང་ཡོད།

ཁ་ཉིན་ཚེས་ ༦ ཉིན་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་བདུན་གྱིས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres མཆོག་གི་མཚན་ཐོག་ཏུ་ཕྱག་ཡིག་ཅིག་ཕུལ་ཏེ་རྒྱ་ནག་མཉམ་འཐུས་ཚབ་པ་ Jiang Duan རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱས་པར་སྐྱོན་བརྗོད་ནན་པོ་གནང་འདུགཁོང་ཚོའི་ཕྱག་བྲིས་དེའི་ནང་རྒྱ་ནག་ནི་རང་རྒྱལ་གྱི་ཕྱི་ནང་གཉིས་སུ་འགྲོ་བ་མིའི་ཐོབ་ཐང་གི་གནས་བབས་ཆེས་ཞན་ཤོས་ཀྱི་རྒྱལ་ཁབ་ཅིག་ཡིན་པར་བརྟེན་ཐེངས་འདིར་རྒྱ་ནག་མཉམ་འབྲེལ་རྒྱལ་ཚོགས་ཀྱི་ཤུགས་རྐྱེན་ཆེ་བའི་ལས་དོན་ཚོགས་ཆུང་དུ་བསྐོ་བཞག་བྱས་པར་ངོས་ལེན་རྩ་བ་ནས་མེད་པ་མ་ཟད་རྒྱལ་ཚོགས་ཀྱིས་རྒྱ་ནག་དེ་ལས་དོན་ཚོགས་ཆུང་ནས་ཕྱིར་ཕུད་གནང་དགོས་པའི་དགོས་འདུན་ཆེད་བཏོན་གནང་འདུགདེ་བཞིན་ཞུ་སྙན་དེའི་ནང་ཐེངས་འདིར་རྒྱ་ནག་གི་སྐུ་ཚབ་འགྲོ་བ་མིའི་ཐོབ་ཐང་གི་ལས་དོན་ཚོགས་ཆུང་དུ་བསྐོ་གཞག་བྱས་པ་དེས་སྤྱི་ཡོངས་ཀྱི་འགྲོ་བ་མིའི་ཐོབ་ཐང་དུ་འབྲེལ་ནས་རང་དབང་གི་རྟོག་ཞིབ་པ་ ༡༧ ལྷག་འདེམས་སྒྲུག་གནང་གི་ཡོད་ལུགས་ལུང་འདྲེན་གྱིས་ས་མིག་དེ་དག་གི་ཁྲོད་རྒྱ་ནག་གིས་དུས་རྒྱུན་ནས་ལག་བསྟར་བྱེད་བཞིན་པའི་སྨྲ་བརྗོད་རང་དབང་ལ་དམ་དྲག་དང་གང་བྱུང་དུ་འཛིན་བཟུང་། གར་སོང་ཆ་མེད་དུ་གྱུར་བ་སོགས་ཀྱི་གནད་དོན་ལ་རྟོག་ཞིབ་གནང་མཁན་མི་སྣ་མང་པོར་དམ་དྲག་ཤུགས་ཆེ་བྱས་པར་བརྟེན་རྒྱལ་ཚོགས་ཀྱིས་རྒྱ་ནག་གི་འཐུས་པ་པ་ལས་དོན་ཚོགས་ཆུང་དུ་བསྐོ་གཞག་བྱས་པར་བློ་ཕམ་ཆེན་པོ་ཡོད་པ་འཁོད་འདུགདེ་བཞིན་གྲོས་ཚོགས་འཐུས་མི་རྣམས་ཀྱིས་རྒྱ་ནག་གིས་འདི་ལོའི་རྒྱ་ནག་གི་གྲོང་ཁྱེར་ཝུ་ཧྲན་ནས་ཁྱབ་བརྡལ་བྱུང་བའི་ཉེན་ཚབས་ཀྱི་ཐད་ནས་འཛམ་གླིང་ཧྲིལ་པོར་མགོ་སྐོར་བཏང་ཡོད་པར་མ་ཟད་ནད་ཡམས་ཁྱབ་བརྡལ་གྱི་སྐབས་སུ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་གཉན་རིམས་ཁྱབ་བརྡལ་ལ་གསལ་འདེབས་བྱེད་མཁན་གྱི་སྨན་པ་རྣམས་ལ་ཉེས་ཆད་བཅད་པ་དང་རིམས་ནད་ཀྱི་གནས་ཚུལ་ཡོད་ཚད་ལ་དྲྭ་ཐོག་ནས་བཀག་སྡོམ་བྱས་ཏེ་ད་ཆ་འཛམ་གླིང་ཡོངས་ལ་ནད་ཡམས་ཁྱབ་བརྡལ་འགྲོ་བཞིན་པ་སོགས་མངོན་གསལ་གནང་བ་དང་ཆབས་ཅིག་ཏུ་རྒྱ་ནག་གི་འཐུས་ཚབ་པ་མཉམ་འབྲེལ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་གནང་རྒྱུ་རྩིས་མེད་གཏོང་དགོས་པའི་འབོད་སྐུལ་གནང་འདུག  གནས་ཚུལ་དེ་དང་འབྲེལ་ཏེ་རྒྱ་ནག་གིས་ཡུ་གུར་མི་མང་ས་ཡ་གཅིག་ལྷག་བཀག་བསྐྱིལ་གྱིས་གྲངས་ཉུང་མི་རིགས་གཙང་བཟོ་བྱེད་རྒྱུའི་སྲིད་བྱུས་ལག་བསྟར་བྱེད་ཀྱི་ཡོད་པ་གསལ་པོ་ཆགས་ཡོད་པ་དང་ཁ་ཆེ་མི་རིགས་ནི་རྒྱ་ནག་གི་ནང་མི་སེར་རིམ་པ་གཉིས་ལ་ལྟ་བུའི་ངོ་བོར་གནས་ཡོད་ལུགས་ལུང་འདྲེན་གནང་སྟེ་དེ་ལྟ་བུའི་བྱེད་བབ་དེ་ནི་འགྲོ་བ་མིའི་རིགས་སྤྱིར་གནོད་འཚབ་ཆེ་བའི་ནག་ཉེས་ཤིག་ཡིན་པ་གསུངས་བ་མ་ཟད་རྒྱ་ནག་དེ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱེད་ཐབས་མེད་པ་ཡོངས་གྲགས་གནང་འདུགམཉམ་འབྲེལ་རྒྱལ་ཚོགས་ནི་འགྲོ་བ་མིའི་རིགས་ཀྱི་དཀའ་རྙོག་བསྐྱར་བཟློས་མི་ཡོང་བ་དང་མིའི་རིགས་ཀྱི་བདེ་རྩར་དམིགས་ནས་ཆེད་འཛུགས་བྱས་པ་ཞིག་ཡིན་པ་གསལ་འདེབས་གནང་བ་དང་ལྷན་དུ་ང་ཚོས་ངེས་པར་དུ་མཉམ་འབྲེལ་རྒྱལ་ཚོགས་ཀྱི་དབུ་ཁྲིད་དང་ཚོགས་མིའི་རྒྱལ་ཁབ་ཁག་ནས་ལེགས་ཕྱོགས་ལ་རེ་བ་བྱས་ཏེ་ང་ཚོའི་ཐུན་མོང་གི་རིན་ཐང་དང་ཆེ་མཐོང་གཙུག་ཏུ་བཟུང་ཐོག་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་གྱི་རྒྱ་ནག་གི་འཐུས་ཚབ་པ་ལས་དོན་ཚོགས་ཆུང་ནས་ཕྱིར་ཕུད་གཏོང་དགོས་པའི་འབོད་སྐུལ་ནན་བརྗོད་གནང་འདུགགཞི་རྩའི་ཕྱི་ཟླ་ ༤ ཚེས་ ༡ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ཚོང་ཆུང་གི་ནང་རྒྱ་ནག་ཨེ་ཤ་ཡའི་ཞི་བདེ་རྒྱ་མཚོའི་ཁུལ་གྱི་འཐུས་མིར་བསྐོས་ཡོད་པར་བརྟེན་ཨ་རིའི་གྲོས་ཚོགས་འཐུས་མི་དང་རྒྱལ་ཚོགས་གནད་དོན་ལྟ་ཞིབ་ཁང་སོགས་ནས་སྨྲ་བརྗོད་རང་དབང་དང་ཆོས་དད་རང་དབང་སོགས་རྡོག་རོལ་གཏོང་མཁན་ཆེས་སྡུག་ཤོས་ཀྱི་རྒྱ་ནག་གི་འཐུས་ཚབ་པ་རྒྱལ་ཚོགས་ཀྱི་ལས་དོན་ཚོགས་ཆུང་ནང་བསྐོ་གཞག་བྱུང་བར་སྐྱོན་བརྗོད་ཤུགས་ཆེ་གནང་ཡོད་པ་རེད། ལྷག་པར་དུ་བོད་མིའི་སྒྲིག་འཛུགས་དྲིལ་བསྒྲགས་དྲུང་ཆེ་ཚེ་དབང་རྒྱལ་པོ་ཨརྱ་ལགས་ཀྱིས་རྒྱ་ནག་དམར་པོའི་སྲིད་གཞུང་ནི་འཛམ་གླིང་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་དམ་དྲག་ཤུགས་ཆེ་ཤོས་བྱེད་མཁན་དང་བསམ་ཚུལ་བརྗེ་ལེན་དང་སྨྲ་བརྗོད་རང་དབང་བརྡལ་བཤིག་གཏོང་མཁན་གྱི་རྒྱལ་ཁབ་གཙོ་བོ་ཞིག་ཡིན་པ་ཡོངས་གྲགས་ཡིན་བཞིན་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ལམ་སྟོན་ཚོགས་ཆུང་གི་ཚོགས་མིའི་ཁོངས་སུ་བསྐོ་གཞག་བྱས་པ་དེ་ནི་བློ་ཕམ་གྱི་གནས་ཤིག་ཡིན་པ་དང་། གནང་བབས་དེས་རང་དབང་དང་དྲང་བདེན་ལ་དགའ་བའི་རྒྱལ་སྤྱིའི་སྤྱི་ཚོགས་ནང་བརྡ་ལན་ལོག་པ་ཞིག་བཏང་བ་མ་ཟད་རྒྱལ་སྤྱིའི་ཐོག་འགྲོ་བ་མིའི་ཐོབ་ཐང་གི་གནས་སྟངས་ཐོག་འགྲེལ་བརྗོད་བྱེད་སྟངས་ལའང་ཤུགས་རྐྱེན་ངན་པ་ཐེབས་རྒྱུ་ཡིན་པ་སོགས་འགྲེལ་བརྗོད་གནང་བ་དང་སྦྲགས། ད་ཆ་དཀའ་སྡུག་མྱོང་བཞིན་པའི་མི་རིགས་དེ་དག་གི་ངོས་ནས་རེ་བ་བཅོལ་ཡུལ་རྒྱལ་སྤྱིའི་སྒྲིག་འཛུགས་ནང་ཉེས་ཅན་པ་རང་ཉིད་སྒྲིག་འཛུགས་སྲུང་མིར་བསྐོས་པ་ནི་སྤྱང་ཀི་ལུག་རྫིར་བསྐོས་པའི་དཔེ་ལྟར་རེད་ཅེས་གསུངས་འདུག

ད་ཆ་རྒྱ་ནག་ཝུ་ཧན་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་རྐྱེན་གྱིས་རྒྱལ་སྤྱིའི་གཞུང་དང་མང་ཚོགས་སྤྱིའི་གནས་སྟངས་ལ་དཀའ་ངལ་རབས་དང་རིམ་པ་འཕྲད་བཞིན་པའི་ཁྲོད་འདིར་༧སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་རྒྱ་གར་གྱི་ཡུལ་མི་ཉམ་ཐག་མང་པོའི་ཛ་དྲག་གི་གནས་སྟངས་ལ་གདུང་སེམས་མཉམ་བསྐྱེད་དང་། ངལ་བ་ཁག་སེལ་སླད་རྒྱ་གར་གྱི་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་ཧིན་སྒོར་འབུམ་ ༡༠ གསོལ་བསྩལ་གནང་འདུག རིན་པོ་ཆེ་མཆོག་གིས་ད་ཆ་འཛམ་གླིང་ས་ཕྱོགས་གང་སར་ཏོག་དབྱིབས་རིམས་ནད་ཁྱབ་བརྡལ་ཕྱིན་ནས་སྐྱེ་འགྲོ་མང་པོ་སྡུག་བསྔལ་གྱིས་མནར་བཞིན་པར་ཐུགས་བརྩེ་ཆེན་པོས་ཐུགས་སྨོན་གནང་བཞིན་ཡོད་པ་དང་གོ་ལ་སྤྱི་ལ་ཁྱབ་བཞིན་པའི་གོད་ཆག་འདིའི་འོག་མི་མང་དཀྱུས་མ་ས་ཡ་མང་པོ་ནད་ཀྱིས་མནར་བ་དང་འདས་གསོན་ཁ་བྲལ་བྱུང་བ། ཡོང་འབབ་དང་འཚོ་རྟེན་ཤོར་ནས་དཀའ་སྡུག་ཚད་མེད་མྱོང་དགོས་པའི་གནས་སུ་ལྷུང་བཞིན་ཡོད་པ་དང་། འཛམ་གླིང་ཀུན་ལ་ཁྱབ་པའི་ཁ་ཡོད་ལག་ཡོད་ཀྱི་རོགས་སྐྱོར་ཆེན་པོ་ཞིག་བྱ་ཐབས་དཀའ་ཡང་རྒྱ་གར་གྱི་ཡུལ་མི་ཉམ་ཐག་མང་པོའི་ཛ་དྲག་གི་ངལ་བ་སེལ་སླད་ཧིན་སྒོར་འབུམ་ ༡༠ ཞལ་འདེབས་སུ་གསོལ་བསྩལ་མཛད་རྒྱུ་ཡིན་ཞེས་བཀའ་བསྩལ་འདུགརིན་པོ་ཆེ་མཆོག་གིས་ད་དུང་རྒྱ་གར་རླབས་ཆེན་གྱི་རྒྱལ་ཁབ་འདིས་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་པའི་བོད་མི་རྣམས་ལ་སྐྱབས་བཅོལ་གྱི་རོགས་རམ་གནང་བ་སོགས་རྒྱ་གར་འཕགས་པའི་ཡུལ་གྱི་བཀའ་དྲིན་ཁག་དྲན་གསོ་དང་བསྦྲགས། ད་ལྟའི་ཛ་དྲག་གི་དུས་སྐབས་འདིར་སྲིད་བློན་མོ་དཱི་མཆོག་གིས་རིམས་ནད་འགོག་ཐབས་དང་། མ་འོངས་པར་ནད་ཡམས་དེའི་རིགས་འབྱུང་ཚེ་ཁ་གཏད་གདོང་ལེན་བྱ་ཐབས། དེ་བཞིན་མི་སེར་ལ་རོགས་སྐྱོར་དང་འབྲེལ་བའི་ཛ་དྲག་ངལ་སེལ་དགེ་རྩ་གསར་འཛུགས་གནང་བ་སོགས་ལ་རྒྱབ་སྐྱོར་ཡོད་ཅེས་བཀའ་བསྩལ་བ་དང་ཆབས་ཅིག སྲིད་བློན་མཆོག་གིས་བཙུགས་པའི་ཛ་དྲག་ངལ་སེལ་གྱི་དགེ་རྩས་མགོན་མེད་སྐྱབས་མེད་ཀྱི་མང་ཚོགས་དག་ལ་ལྟ་རྟོག་དང་རོགས་སྐྱོར་གྱི་བྱ་བ་སྒྲུབ་བཞིན་པ་ཐམས་ཅད་བདེ་བླག་ཉིད་དུ་ལེགས་གྲུབ་ཐུབ་པའི་ཐུགས་སྨོན་དང་། རྒྱ་གར་གཞུང་ནས་ཏོག་དབྱིབས་ནད་ཡམས་ཁྱབ་བཞིན་པ་དེ་འགོག་ཐབས་དང་མང་ཚོགས་ཀྱི་ཚེ་སྲོག་སྲུང་སྐྱོབ་སོགས་གནང་བཞིན་པར་ཡི་རང་བསྔགས་བརྗོད་མཛད་འདུགགཞི་རྩའི་རིམས་ནད་ཀྱི་ཛ་དྲག་གནས་སྟངས་ཁྲོད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གིས་དབུས་པའི་གཡུང་དྲུང་བོན་གྱི་འཛིན་སྐྱོང་ལྷན་ཚོགས་དང་ལྷོ་ཕྱོགས་བཀྲ་ཤིས་ལྷུན་པོ་དགོན་པ། ས་སྐྱ་མཐོ་སློབ་དང་ས་སྐྱ་སྨོན་ལམ་ཐེབས་རྩ་ཁང་། སྒྲོལ་མ་ཕོ་བྲང་ཚོགས་པ། ས་སྐྱ་དབུས་ལྟེ་གནས་ཁང་སོགས་བོད་པའི་དགོན་སྡེ་གྲྭ་ཚང་དང་གཞིས་སྒར་ཁག དེ་བཞིན་བོད་མི་མང་ཚོགས་སོགས་ནས་ཉེ་འཁོར་གྱི་རྒྱ་གར་ཡུལ་མི་རྣམས་ལ་ཟས་སྦྱིན་དང་མངའ་སྡེ་སོ་སོའི་སྤྱི་ཁྱབ་བློན་ཆེན་དང་རྒྱ་གར་གྱི་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་བཅས་ལ་གང་ནུས་ཀྱིས་ཞལ་འདེབས་གནང་མཁན་མང་པོ་བྱུང་ཡོད་པ་རེད།

བོད་མའི་སྒྲིག་འཛུགས་ཀྱི་སྲིད་སྐྱོང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་རྣམ་གཉིས་ཀྱིས་རྒྱ་གར་དཀྱིལ་ཤར་གྱི་མངའ་སྡེ་ Madhya Pradesh ཡི་སྤྱི་ཁྱབ་བློན་ཆེན་སྐུ་ཞབས་ Shivraj Singh Chouhan མཆོག་བསྐྱར་དུ་མངའ་སྡེ་བློན་ཆེན་ལ་འོས་འདེམས་བྱུང་བར་འཚམས་འདྲི་གནང་འདུགདེ་རིང་བོད་མིའི་སྒྲིག་འཛུགས་ཀྱི་དྲྭ་གནས་སུ་གནས་ཚུལ་སྤེལ་བར་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ཚབ་གནང་སྟེ་སྤྱི་ཁྱབ་བློན་ཆེན་མཆོག་བསྐྱར་དུ་འོས་འདེམས་བྱུང་བར་འཚམས་འདྲི་ཞུས་པ་དང་སྦྲགས། ཛ་དྲག་ཀྱི་དུས་སྐབས་འདིར་སྐུ་ཞབས་མཆོག་བསྐྱར་དུ་མང་མོས་ཀྱིས་འོས་འདེམས་བྱུང་སྟེ་མངའ་སྡེའི་དབུ་ཁྲིད་མཛད་རྒྱུའི་རེ་འབོད་གནང་བ་དེས་ཁོང་གི་དམིགས་བསལ་གྱི་དབུ་ཁྲིད་ཀྱི་ཁྱད་ཆོས་ཤིག་མཚོན་ཡོད་པར་མངོན་གསལ་གྱིས་དེང་སྐབས་རྒྱ་ནག་ཝུ་ཧན་གྱི་རིམས་ནད་རྐྱེན་པས་རྒྱལ་ཁབ་མང་པོ་ཞིག་ལ་དཀའ་ངལ་འཕྲད་བཞིན་པར་བརྟེན། བོད་མི་རྣམས་ཀྱིས་རྒྱ་གར་གྱིས་རིམས་ནད་འདིར་གདོང་ལེན་གནང་བཞིན་པར་རམ་འདེགས་དང་གང་མགྱོགས་ནད་ཡམས་ཞི་བའི་སྨོན་ལམ་འདེབས་བཞིན་ཡོད་པར་བསྒྲགས་འདུག གཞན་ཡང་ཁོང་གིས་རྒྱ་གར་ནང་རིམས་ནད་ཁྱབ་བརྡལ་འབྱུང་བཞིན་པར་གདུང་སེམས་མཉམ་བསྐྱེད་ཡོད་པ་གསུངས་འདུགམངའ་སྡེ་སྤྱི་ཁྱབ་བློན་ཆེན་མཆོག་གིས་ལོ་ངོ་བཅུ་གྲངས་ལ་ཁུལ་དེར་དབུ་ཁྲིད་མཛད་པའི་ཉམས་མྱོང་གིས་ཛ་དྲག་གི་དུས་སྐབས་འདིར་མི་མང་ལ་ཕན་རླབས་ངེས་ཅན་ཞིག་ཐོབ་པར་ཡིད་ཆེས་ཡོད་པ་གསུངས་འདུག་པར་མ་ཟད། སྲིད་སྐྱོང་མཆོག་གིས་བློན་ཆེན་མཆོག་སྔ་ལོར་བོད་མིའི་སྒྲིག་འཛུགས་སུ་ཆེད་བཅར་གནང་བ་དྲན་གསོདང་སྦྲགས་ཏེ་མཱདྱ་མངའ་སྡེ་སྲིད་གཞུང་གིས་ཁུལ་དེར་དགུན་ཚོང་གཉེར་བཞིན་པའི་བོད་མི་རྣམས་ལ་དུས་རྒྱུན་ནས་རྒྱབ་སྐྱོར་ཆེན་པོ་གནང་བཞིན་པར་བཀའ་དྲིན་ཆེ་ཞུས་པ་དང་ལྷན་དུ་བློན་ཆེན་མཆོག་གི་དབུ་ཁྲིད་འོག་མངའ་སྡེ་དེའི་བྱ་གཞག་ཀུན་དོན་སྨིན་སོན་པའི་སྨོན་འདུན་ཞུས་འདུགདེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་མཆོག་གིས་ཀྱང་སྤྱི་ཁྱབ་བློན་ཆེན་སྐུ་ཞབས་མཆོག་བསྐྱར་དུ་འོས་འདེམས་བྱུང་བར་འཚམས་འདྲི་ཞུས་པ་དང་སྦྲགས། དེང་སྐབས་འཛམ་གླིང་ཡོངས་ལ་ཏོག་དབྱིབས་གཉན་རིམས་ཁྱབ་བརྡལ་འགྲོ་བཞིན་པའི་སྐབས་འདིར་བློན་ཆེན་མཆོག་གིས་སོ་སོའི་མངའ་སྡེའི་ནང་ནད་ཡམས་སྔོན་འགོག་གི་ལས་འགུལ་སྤེལ་བཞིན་པར་ཡི་རངས་བསྔགས་བརྗོད་དང་ནད་ཡམས་འདི་ཉིད་འཛམ་གླིང་ནས་གང་མགྱོགས་ཞི་བའི་སྨོན་འདུན་ཞུས་འདུག ཚོགས་གཙོ་མཆོག་གིས་ད་དུང་སྤྱི་ཁྱབ་བློན་ཆེན་གྱི་དུས་ཡུན་གསར་པ་དབུ་འཛུགས་དང་འབྲེལ་སྐུ་ཉིད་མཆོག་ལ་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་ལྷན་དུ་རྒྱ་གར་གཞུང་མང་གཉིས་ནས་ད་བར་བོད་དོན་དང་བཙན་བྱོལ་བོད་མི་རྣམས་ལ་འདས་པའི་ལོ་ངོ་ ༦༠ རིང་རྒྱབ་སྐྱོར་གྱིས་མཐུན་འགྱུར་རོགས་རམ་གནང་དང་གནང་བཞིན་པར་ཐུགས་རྗེ་ཆེ་ཞུས་ཏེ་སྤྱི་ཁྱབ་བློན་ཆེན་མཆོག་གི་དབུ་ཁྲིད་ཀྱི་འོག་མངའ་སྡེ་གང་དེའི་བྱ་གཞག་ཡོད་ཚད་སྔར་བཞིན་དར་ཞིང་རྒྱས་པའི་སྨོན་འདུན་ཞུས་འདུག 

དེ་སྔ་ཕྱི་ལོ་ ༢༠༡༥ ལོར་བོད་མདོ་སྨད་རྔ་བ་ནང་༸གོང་ས་མཆོག་གི་༸སྐུ་པར་ཡོད་པའི་འཛམ་གླིང་ཞི་བདེའི་དར་ཆ་འཕྱར་རྐྱེན་འཛིན་བཟུང་བྱས་པའི་བོད་མི་ཆབ་སྲིད་བཙོན་པ་བསོད་ནམས་དར་རྒྱས་ལགས་ཉེ་ཆར་ཕྱི་ཟླ་ ༣ ཚེས་ ༣༠ ཉིན་བཙོན་གྲོལ་ཐོབ་འདུགདེ་རིང་མཚན་བརྗོད་འདོད་མེད་པའི་བོད་མི་ཞིག་གིས་རླུང་འཕྲིན་ཁང་ལ་བོད་ནང་གི་ཁུངས་ལྡན་གནས་ཚུལ་ངོ་སྤྲོད་གནང་བར་བསོད་ནམས་དར་རྒྱལ་ལགས་ཉེ་ཆར་ཕྱི་ཟླ་ ༣ ཚེས་ ༣༠ ཉིན་བཙོན་གྲོལ་ཐོབ་སྟེ་རྔ་བ་བསུ་བ་སྡེ་བར་རང་གི་ཕ་མའི་སར་འབྱོར་ཡོད་པ་དང་དེ་སྔ་ཁོང་འཛིན་བཟུང་བྱས་རྗེས་ཁོང་གི་བཟའ་ཟླ་དབྱངས་འཛོམས་ལགས་རྔ་བ་ཀིརྟི་དགོན་པའི་རྒྱབ་ངོས་ཀྱི་བློན་ཚང་གྲོང་བརྡལ་ཆ་བོ་ར་སྡེ་བར་རང་གི་ཕ་མའི་འགྲམ་དུ་བཞུགས་བཞིན་ཡོད་པ་ལྟར། དེ་རིང་བསོད་ནམས་དར་རྒྱས་ལགས་རང་གི་ཕ་མའི་ཁྱིམ་ནས་ཆ་བོ་ར་སྡེ་བར་བཟའ་ཟླའི་ཁྱིམ་ལ་ཕེབས་བཞིན་ཡོད་སྐོར་གསུངས་སོང་བར་མ་ཟད་ཁོང་བཙོན་གྲོལ་སྐབས་སྐུ་གཟུགས་ཀྱི་གནས་སྟངས་ཡག་པོ་ཡོད་པ་མངོན་རྒྱུ་ཡོད་འདུག བསོད་ནམས་དར་རྒྱས་ལགས་ནི་མདོ་སྨད་རྔ་བ་རྫོང་བསུ་བ་སྡེ་བའི་ཕ་མཆོག་གོ་དང་མ་རི་ལུ་གཉིས་ཀྱི་བུ་ཡིན་པ་དང་། བཟའ་ཟླའི་མིང་ལ་དབྱངས་འཛོམས་དང་ཁོང་གཉིས་ལ་ཕྲུ་གུ་ ༣ ཡོད་པ་རེད་འདུག ཁོང་འཛིན་བཟུང་མ་གནང་སྔོན་ཁོང་བཟའ་ཚང་གཉིས་མགོ་ལོག་པདྨ་རྫོང་ཐོག་ཏུ་ཚོང་ལས་གཉེར་བཞིན་ཡོད་པ་རེད་འདུགབསོད་ནམས་དར་རྒྱས་ལགས་ཀྱིས་དེ་སྔོན་ ༢༠༡༥ ལོའི་རྔ་བ་སྒོ་མང་དགོན་པའི་ཆོ་འཕྲུལ་སྨོན་ལམ་ཆེན་མོའི་ཚེས་ ༡༤ ཡི་འཆམ་གྱི་ཉིན་འཛམ་གླིང་ཞི་བདེའི་དར་ཆའི་སྟེང་༧གོང་ས་མཆོག་གི་དང་སློབ་དཔོན་ཟམ་གདོང་རིན་པོ་ཆེ་མཆོག དེ་བཞིན་སྲིད་སྐྱོང་བློ་བཟང་སེང་གེ་མཆོག་གི་སྐུ་པར་འཕྱར་བའི་གནད་དོན་དང་འབྲེལ་བ་བཏགས་ཏེ་ལོ་དེའི་ཕྱི་ཟླ་ ༤ པའི་ཟླ་མཇུག་སྔོན་ལ་རྔ་བ་རྫོང་གི་ཚོང་ར་ནས་ཉེན་རྟོག་པས་འཛིན་བཟུང་བཙན་ཁྲིད་བྱས་ནས་ལོ་ལྔའི་རིང་བཙོན་འཇུག་ཁྲིམས་ཐག་བཅད་ཡོད་པ་རེད། ཤེས་རྟོགས་བྱུང་བར་ཉེ་ཆར་ཁོང་བཙོན་གྲོལ་སྐབས་ཉེན་རྟོག་པས་མི་གསུམ་ལས་མང་བ་བསུ་བར་ཡོང་མི་ཆོག་པའི་བཙན་བཀའ་བཏང་བར་བརྟེན་ཁོང་གི་ནང་མི་ཉེ་འབྲེལ་གསུམ་བཙོན་ཁང་དུ་བསུ་བར་ཕེབས་འདུག་པ་དང་།དེ་རིང་ཁོང་གི་བཟའ་ཟླའི་སར་ཕེབས་སྐབས་མང་ཚོགས་ནས་ལམ་བར་དུ་དཀར་གཙང་གི་མཇལ་དར་དང་ལྷ་བསངས་སོགས་གནང་སྟེ་ཁོང་ལ་བསུ་བ་གནང་ཡོད་པ་རེད།

ཉེ་ཆར་རྒྱ་ནག་གཞུང་གིས་སྤྱི་ཚོགས་ཁྲོད་ Pornography འམ་འཆལ་སྤྱོད་དང་ཁྲིམས་འགལ་གྱི་གནད་དོན་བརྒྱུད་སྤེལ་འགོག་ཐབས་ཀྱི་ཁྲིམས་སྒྲིག་གསར་པ་ངོ་སྤྲོད་བྱེད་བཞིན་འོག་བོད་ཆེན་པོ་དང་ཚད་མཐོའི་རང་སྐྱོང་གི་གནས་བབས། དེ་བཞིན་དབུ་མའི་ལམ་སོགས་བོད་དོན་དང་འབྲེལ་བའི་གནད་དོན་གླེང་སློང་གནང་བ་རྣམས་ཁྲིམས་འགལ་དུ་ངོས་འཛིན་གྱིས་གླེང་སློང་དང་དཔེ་དེབ་དཔར་སྐྲུན། པར་དང་བརྙན་སོགས་ཀྱི་ཐོག་ནས་བརྒྱུད་སྤེལ་གནང་བ་འམ་རང་གི་ཁ་པར་ནང་སོགས་ལ་དེ་འབྲེལ་སྒྲིག་གཤོམ་གནང་བ་ཐམས་ཅད་ཁྲིམས་འགལ་ཡིན་པ་དང་། བྱ་སྤྱོད་དེ་དག་སྤེལ་མཁན་སྐོར་ཉེན་རྟོག་པར་གནས་ཚུལ་མཁོ་སྤྲོད་བྱེད་མཁན་རྣམས་ལ་དངུལ་འབོར་ཆེན་གྱི་བྱ་དགའ་སྤྲད་རྒྱུ་ཡིན་པའི་གསལ་བསྒྲགས་སྤེལ་འདུག ཁ་སང་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གཞུང་གིས་སྔ་ལོའི་ཕྱི་ཟླ་ ༩ ཚེས་ ༡༢ ཉིན་རྒྱ་ནག་གཞུང་འབྲེལ་དྲྭ་རྒྱར་འཆལ་སྤྱོད་གཙོས་པའི་ཁྲིམས་འགལ་གྱི་གནད་དོན་རིགས་བརྒྱུད་སྤེལ་འགོག་ཐབས་ཀྱི་ཁྲིམས་སྒྲིག་གསར་པ་ཞིག་གཏན་འབེབས་བྱས་ཡོད་སྐོར་གནས་ཚུལ་སྤེལ་རྗེས་འདི་ལོའི་ཕྱི་ཟླ་ ༣ པའི་ནང་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ནང་ཁྲིམས་གཞི་དེ་ལག་བསྟར་བྱེད་རྒྱུའི་གསལ་བསྒྲགས་ནང་བོད་ལ་རང་སྐྱོང་གི་གནས་བབས་དང་དབུ་མའི་ལམ་སོགས་བོད་དོན་དང་འབྲེལ་བའི་གནད་དོན་རིགས། རྒྱ་ནག་གཞུང་གི་ངོས་ནས་བོད་ཐོག་འཛིན་་པའི་སྲིད་བྱུས་ལ་སྐྱོན་བརྗོད་བྱེད་མཁན་རྣམས་རྒྱལ་ཁབ་ཀྱི་ཆིག་སྒྲིལ་ལ་གནོད་འཚེ་བཟོ་མཁན་དང་གཞུང་ནས་གྲངས་ཉུང་མི་རིགས་ཀྱི་འཛིན་སྐྱོང་ལ་ཁ་གཏད་ལངས་པར་ངོས་འཛིན་རྒྱུ་ཡིན་པར་མ་ཟད་རྒྱ་ནག་གཞུང་དང་འགོ་ཁྲིད། རྒྱ་ནག་གི་སྤྱི་ཚོགས་རིང་ལུགས་ཀྱི་ཁྱད་ཆོས་བཅས་ལ་སྐྱོན་བརྗོད་བྱེད་མཁན་གཙོས་པའི་རྒྱ་གཞུང་གི་ལྟ་སྤྱོད་དང་མི་མཐུན་པའི་བྱ་སྤྱོད་སྤེལ་མཁན་དག་ལ་ཁྲིམས་འགལ་དུ་ངོས་འཛིན་རྒྱུ་དང་དེ་འབྲེལ་གནས་ཚུལ་མཁོ་སྤྲོད་བྱེད་མཁན་འབྱུང་ཚེ་དེ་དག་ལ་གསང་རྒྱའི་སྲུང་སྐྱོབ་བྱས་ནས་རྒྱ་སྒོར་ཆིག་སྟོང་ནས་འབུམ་གཅིག་བར་བྱ་དགའ་སྤྲད་རྒྱུ་ཡིན་པ་སོགས་འཁོད་འདུགརྒྱལ་སྤྱིའི་བོད་དོན་ལས་འགུལ་ཁང་གིས་ད་དུང་ཉེ་ཆར་ཕྱི་ཟླ་ ༣ ཚེས་ ༢༠ ཉིན་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ Wu Yingjie ཡིས་བོད་ནང་དཔལ་འབྱོར་དང་བརྟན་ལྷིང་གོང་འཕེལ་གཏང་ཆེད་ཏཱ་ལའི་ཁ་བྲལ་རུ་ཚོགས་ལ་ཁ་གཏད་གཅོག་རྒྱུའི་དབུས་གཞུང་གི་སྲིད་བྱུས་ལག་བསྟར་དོན་འཁྱོལ་བྱེད་དགོས་པ་དང་། མང་ཚོགས་ཀྱིས་དམར་ཤོག་གཞུང་དང་སྤྱི་ཚོགས་ལ་བརྩེ་སེམས་བཅངས་ནས་རྒྱལ་ཁབ་ཀྱི་ཆིག་སྒྲིལ་སྲུང་སྐྱོབ་བྱེད་དགོས་སྐོར་བཤད་པ་ལུང་འདྲེན་དང་སྦྲགས་ཏེ་རྒྱ་ནག་གཞུང་གི་ངོས་ནས་གཞུང་ལ་དགའ་ཞེན་ཡོད་མེད་ལ་གཞིགས་ནས་ལས་དོན་གང་གཉེར་བ་དེ་དག་ཁྲིམས་འགལ་ཡིན་མིན་ཐག་གཅོད་བཞིན་ཡོད་པ་ལྟར་བྱ་སྤྱོད་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཡོངས་ཁྱབ་ཀྱི་ཁྲིམས་སྒྲིག་དང་སྒོས་ཁྲིམས་སྒྲིག་དེའི་དོན་ཚན་ ༡༩ དང་ཡོངས་སུ་འགལ་གྱི་ཡོད་པ་དང་། བོད་མི་མང་ཚོགས་དབར་ཡིད་ཆེས་མེད་པའི་གནས་སྟངས་སྐྲུན་བཞིན་ཡོད་པར་ཐེར་འདོན་དང་འབྲེལ། རྒྱ་ནག་གཞུང་གི་ངོས་ནས་ཁྲིམས་གཞི་གསར་པ་དེར་བཅོས་བསྒྱུར་བཏང་ནས་རྒྱལ་སྤྱིའི་ཁྲིམས་དང་མཐུན་པ་བཟོ་དགོས་པ་དང་། བོད་མི་རྣམས་ལ་རང་གི་ནང་མི་དང་གྲོགས་པོ། དེ་བཞིན་རང་གི་སྤྱི་ཚོགས་ལ་གནོད་པའི་ལས་དོན་གཉེར་བར་བྱ་དགའ་དེ་ལྟར་སྤྲད་རྒྱུ་མཚམས་འཇོག་དང་བོད་དོན་དང་འབྲེལ་བའི་གནད་དོན་གླེང་སློང་གནང་བར་ཁྲིམས་འགལ་དུ་ངོས་འཛིན་བྱེད་རྒྱུའི་སྲིད་བྱུས་དེའང་མཚམས་འཇོག་བྱེད་དགོས་པའི་ཞུ་སྐུལ་གནང་འདུག

རྒྱ་ནག་ཝུ་ཧན་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་རྐྱེན་གྱིས་འཛམ་གླིང་གང་སར་གཞུང་མང་གཉིས་ལ་དཀའ་ངལ་རབས་དང་རིམ་པ་འཕྲད་མུས་ཡིན་པ་ལྟར་བཙན་བྱོལ་བོད་མིའི་གནས་ཚང་རྒྱལ་ཁབ་རྒྱ་གར་ལ་མཚོན་ནའང་ད་ཆ་རིམས་ནད་རྐྱེན་པས་མི་མང་གི་ཉིན་རེའི་བྱེད་ལས་ཁག་ལ་བཀག་སྡོམ་བྱས་ཏེ་རང་ཁྱིམ་དུ་སྡོད་མུས་ཡིན་པའི་སྐབས་འདིར་བོད་མི་མང་ཚོགས་སྤྱི་དང་དགོན་སྡེ་གྲྭ་ཚང་སོགས་ཀྱིས་རང་རང་སྡོད་སའི་ཉེ་འཁོར་གྱི་རྒྱ་གར་ཡུལ་མི་རྣམས་ལ་ཟས་སྦྱིན་གནང་བ་དང་དེ་བཞིན་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་བཅས་ལ་ཞལ་འདེབས་གནང་མཁན་མང་པོ་བྱུང་འདུག གཡུང་དྲུང་བོན་འཛིན་སྐྱོང་ལྷན་ཚོགས་ཀྱིས་གནས་ཚུལ་སྤེལ་བར་ད་ཆ་རྒྱ་ནག་གི་ཏོག་དབྱིབས་རིམས་ནད་ཁྱབ་བརྡལ་རྐྱེན་པས་རྒྱལ་སྤྱིའི་ཁྱོན་འདིར་འགྲོ་བ་མིའི་རིགས་ལ་དཀའ་ངལ་ཆེན་པོ་འཕྲད་བཞིན་པ་མ་ཟད་མི་མང་པོ་ཞིག་རིམས་ནད་འདིའི་རྐྱེན་གྱིས་འདས་གྲོངས་སུ་གྱུར་ཡོད་པར་ཡོངས་གྲགས་གནང་སྟེ་རྒྱ་གར་དབུས་གཞུང་དང་མངའ་སྡེ་གཞུང་། དེ་བཞིན་སྨན་ཁང་ཁག་དང་ཉེན་རྟོག་རུ་ཁག་བཅས་ཀྱིས་རྒྱ་གར་ནང་རིམས་ནད་ཁྱབ་བརྡལ་ལ་གདོང་ལེན་གནང་བཞིན་པར་བཀའ་དྲིན་ཆེ་ཞུས་པ་དང་སྦྲགས། གཡུང་དྲུང་བོན་གྱི་སྨན་རི་ཁྲི་འཛིན་མཆོག་གིས་ལམ་སྟོན་ཕེབས་པ་བཞིན་གཡུང་དྲུང་བོན་གྱི་འཛིན་སྐྱོང་ལྷན་ཚོགས་ཀྱིས་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་ཧིན་སྒོར་འབུམ་གཉིས་དང་དེ་བཞིན་ཧི་མཱ་ཅལ་མངའ་སྡེ་གཞུང་གི་རིམས་ནད་ངལ་སེལ་ཐེབས་རྩར་ཧིན་སྒོར་འབུམ་གསུམ་བཅས་གནང་བ་མ་ཟད། ས་གནས་ཀྱི་ཡུལ་མིའི་ཁྱིམ་ཚང་ ༢༠༠ མ་ཟིན་ཙམ་ལ་ཉེར་མཁོའི་ཟས་རིགས་ཀྱི་སྦྱིན་པ་གནང་འདུག དེ་བཞིན་ཧི་མཱ་ཅལ་གྱི་མངའ་ཁོངས་སུ་གནས་པའི་དཔལ་སྤུངས་ཤེས་རབ་གླིང་དགོན་པས་ཀྱང་རྒྱ་གར་དབུས་གཞུང་དང་མངའ་སྡེ་གཞུང་གི་རིམས་ནད་ཀྱི་ངལ་སེལ་ཚོགས་པར་ཞལ་འདེབས་ཧིན་སྒོར་འབུམ་བཅོ་ལྔ་གནང་ཡོད་པ་ཟད་ནད་ཡམས་དོགས་གཞིའི་ཟུར་བཀག་གི་ལྟེ་གནས་སུ་ཡང་ཉེར་མཁོའི་བཟའ་བཅའ་རིགས་གནང་བ་དང་། གལ་ཏེ་ཛ་དྲག་ཆགས་པ་ཡིན་ན་དགོན་པའི་ངོས་ནས་རང་ལོ་སུམ་ཅུའི་འོག་གི་ན་གཞོན་དང་བླངས་པ་ ༣༠ ལྷག་གྲ་སྒྲིག་གིས་དགོས་ངེས་ཀྱི་རོགས་རམ་གནང་རྒྱུ་ཡིན་པར་ཡོངས་གྲགས་གནང་འདུག དེ་བཞིན་སྦིར་ཚོགས་པ་ཁག་གིས་ཀྱང་ཞལ་འདེབས་བསྡུ་རུབ་ཀྱིས་རྒྱ་གར་གཞུང་ལ་ཧིན་སྒོར་འབུམ་བཞིའི་ཞལ་འདེབས་གནང་འདུག གཞན་ཡང་ཧི་མཱ་ཅལ་མངའ་ཁོངས་ཀྱི་ཁམས་སྒར་གྲྭ་ཚང་། བཤད་གྲྭ། བྱང་ཆུབ་ལྗོངས་རྡོ་རྫོང་དགོན། བཙུན་དགོན་དོན་བརྒྱུད་གླིང་། བཀྲ་ཤིས་ལྗོངས་ཀྱི་གཞིས་ཆགས་ལས་ཁུངས་བཅས་མཉམ་རུབ་ཀྱིས་རྒྱ་གར་དབུས་དང་མངའ་སྡེ་གཞུང་ལ་ཧིན་སྒོར་འབུམ་དྲུག་གི་ཞལ་འདེབས་གནང་བ་མ་ཟད། མགོན་མེད་ཉམ་ཐག་གི་རིགས་ལ་ཉིན་རེའི་བཟའ་བཅའ་བཅས་ཀྱི་ཞལ་འདེབས་གནང་སྟེ་ཐེངས་འདིའི་རིམས་ནད་དོན་རྐྱེན་ཁྲོད་མདུན་བསྐྱོད་ཀྱིས་ཕྱག་ལས་གནང་མཁན་སྤྱི་དང་དེ་བཞིན་འཛིན་སྐྱོང་གི་ཐོག་ནས་རིམས་ནད་སྔོན་འགོག་གི་ཕྱག་ལས་གནང་མཁན་ཡོངས་ལ་ཐུགས་རྗེ་ཆེ་ཞུས་འདུག དེ་བཞིན་ལྷོ་ཕྱོགས་བཀྲ་ཤིས་ལྷུན་པོ་དགོན་པས་ཀྱང་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩར་ཧིན་སྒོར་འབུམ་གཅིག་དང་ཕྱེད་ཀ་དང་ཀ་ན་ཊ་ཀའི་མངའ་སྡེ་གཞུང་ལ་ཧིན་སྒོར་འབུམ་གཅིག་བཅས་ཀྱི་ཞལ་འདེབས་གནང་བ་མ་ཟད་ཁུལ་དེའི་ཉམ་ཐག་པ་རྣམས་ལ་བཟའ་བཅའ་རིགས་ཀྱི་རོགས་རམ་གནང་འདུག རྒྱ་གར་བྱང་ཕྱོགས་ཀྱི་བོད་རིགས་འདུས་སྡོད་ཀྱི་ས་ཁུལ་ལྡེ་ར་ལྡུན་ཁུལ་དུ་ས་སྐྱ་མཐོ་སློབ། ས་སྐྱ་སྨོན་ལམ་ཐེབས་རྩ་ཁང་། དེ་བཞིན་སྒྲོལ་མ་ཕོ་བྲང་ཚོགས་པ་དང་ས་སྐྱ་དབུས་ལྟེ་གནས་ཁང་སོགས་ཀྱིས་མཉམ་རུབ་ཀྱི་ཐོག་ནས་ཨོ་ཊྲར་ཁཱན་ཌ་མངའ་སྡེ་གཞུང་གི་བློན་ཆེན་གྱི་མཚན་ཐོག་ཏུ་ཧིན་སྒོར་འབུམ་ ༢༣ ལྷག་གི་ཞལ་འདེབས་གནང་སྟེ་མངའ་སྡེ་གཞུང་གི་འབྲེལ་ཡོད་ཀུན་གྱིས་རིམས་ནད་སྔོན་འགོག་གི་ཕྱག་ལས་རྒྱ་ཆེར་གནང་བཞིན་པར་བཀའ་དྲིན་ཆེ་ཞུས་འདུག དེ་མཚུངས་སུ་རྡོར་གདན་བཀའ་བརྒྱུད་སྨོན་ལམ་ཆེན་མོའི་ཐེབས་རྩ་ཚོགས་པའི་ངོས་ནས་བི་ཧཱར་མངའ་སྡེའི་བློན་ཆེན་མཆོག་གི་ཐེབས་རྩ་བརྒྱུད་དེ་ཧིན་སྒོར་བུམ་ལྔ་དང་རྒྱ་གར་གྱི་སྲིད་བློན་མཆོག་གི་ཐེབས་རྩར་ཧིན་སྒོར་འབུམ་ལྔ་ཕུལ་འདུག དེ་བཞིན་དྷ་སར་རྟེན་གཞི་བྱས་པའི་ནོར་བུ་བཀྲ་ཤིས་ལགས་ཀྱིས་ཀྱང་རྒྱ་གར་གྱི་ཡུལ་མི་བརྒྱ་ལྷག་ལ་གྲོ་ཕྱེ་དང་འབྲས། དེ་བཞིན་སྣུམ་དང་ཚལ་རིགས་བཅས་ཀྱི་རོགས་རམས་གནང་བཞིན་འདུག ཁོང་གིས་གསར་འགོད་པར་མི་ཚང་མར་མང་ཉུང་ལ་མ་བལྟས་པར་གཞན་ལ་རོགས་རམ་བྱེད་རྒྱུའི་ནུས་པ་ཡོད་སྟབས་ཛ་དྲག་གི་སྐབས་སུ་རོགས་བྱེད་རྒྱུ་དེ་ནི་རང་ཉིད་ནང་པ་ཞིག་ཡིན་པ་དང་༸གོང་ས་མཆོག་གི་དགོངས་གཞི་ཡིན་པར་འགྲེལ་བརྗོད་གནང་སོང་། གཞན་ཡང་ལ་དྭགས་ཁུལ་གྱི་ཀརྨ་སྒྲུབ་བརྒྱུད་དགོན་གྱིས་ཀྱང་རྒྱ་གར་དབུས་གཞུང་གི་ཐད་གར་སྟངས་འཛིན་འཛིན་སྐྱོང་ལས་ཁུངས་སུ་ཧིན་སྒོར་འབུམ་གཅིག་གི་ཞལ་འདེབས་གནང་སྟེ་གང་མགྱོགས་རིམས་ནད་ཞི་བའི་སྨོན་འདུན་ཡོད་པར་གསུངས་འདུག གཞི་རྩའི་རྒྱ་ནག་ཝུ་ཧན་གྱི་རིམས་ནད་དེ་འཛམ་གླིང་གི་ས་ཁུལ་གང་སར་ཁྱབ་བརྡལ་ཕྱིན་པ་དང་ལྷན་དུ་གཞུང་དང་མི་མང་ཡོངས་ཀྱིས་ནུས་ཤུགས་གཅིག་ཏུ་སྒྲིལ་ནས་རིམས་ནད་ལ་སྔོན་འགོག་གནང་བཞིན་པའི་ཁྲོད། བོད་མི་མང་ཚོགས་ཀྱིས་ཀྱང་རང་གི་འཇོག་ནུས་ལ་དཔག་པའི་ཞལ་འདེབས་དང་བཟའ་བཅའ་སོགས་ཀྱི་རོགས་རམ་གནང་མཁན་མང་པོ་བྱུང་གི་ཡོད་པ་ལྟར། རླུང་འཕྲིན་ཁང་གིས་མང་ཚོགས་ཀྱིས་འགན་རང་འཁུར་གྱིས་དངུལ་དངོས་ཀྱི་ཞལ་འདེབས་གནང་བ་དང་དེ་བཞིན་དཔལ་འབྱོར་གྱི་འཁོས་ཁ་ཞན་པའི་ཉམ་ཐག་རིགས་ལ་སྡོད་གནས་མཁོ་སྤྲོད་བྱེད་བཞིན་པ་སོགས་ཀྱི་གནད་དོན་ཁག་ཅིག་དེ་སྔ་ནས་བཏང་ཟིན་པ་བཞིན་དེ་རིང་བསྐྱར་དུ་བོད་རིགས་འདུས་སྡོད་ཀྱི་ས་ཁུལ་ཁག་ཅིག་གིས་རོགས་རམས་གནང་བཞིན་པའི་གནས་ཚུལ་ཕྱོགས་བསྡུས་ཞུས་ཡོད།