Tibetan Royal Year of 2151 | Year of the Wood Dragon

གསར་འགྱུར།

རྒྱ་གར་རྒྱལ་ཡོངས་སུ་མཐོ་སློབ་ཁག་ཕྱི་ཟླ་བརྒྱད་པ་བར་སྒོ་ཕྱེ་རྒྱུ་རེད་མི་འདུག

རྒྱ་ནག་གི་ཏོག་དབྱིབས་ནད་དུག་ཁྱབ་བརྡལ་གྱི་རྐྱེན་གྱིས་འདི་ལོའི་ཟླ་ ༣ ཚེས་ ༡༦ ནས་བཟུང་རྒྱ་གར་གཞུང་གིས་བཀའ་རྒྱ་བསྒྲགས་དོན་ལྟར་རྒྱ་གར་རྒྱལ་ཡོངས་སུ་སློབ་གྲྭ་ཆེ་འབྲིང་ཆུང་གསུམ་གཅིག་གྱུར་གྱིས་དུས་ཡུན་ངེས་མེད་དུ་སྒོ་བརྒྱབ་སྟེ་རིམས་ནད་སྔོན་འགོག་ལག་བསྟར་བྱས་ཡོད་པ་རེད།   ཁ་སང་རྒྱ་གར་གྱི་མཐོ་སློབ་ཁག་གི་ UGC ཞེས་པའི་ཚོགས་པས་ཐག་གཅོད་བྱས་པར་རྒྱ་གར་གྱི་ནང་དུ་མཐོ་སློབ་ཁག་ཟླ་བ་བརྒྱད་པའི་ནང་མ་གཏོགས་སྒོ་ཕྱེ་རྒྱུུ་མིན་པར་སྤྱི་བསྒྲགས་ཤིག་གནང་ཡོད་པ་དང་། དེ་བཞིན་ལྷོ་ཕྱོགས་ཅཱེ་ནེ་ཁུལ་དུ་ཟླ་ ༩ པ་བར་མཐོ་སློབ་ཁང་སྒོ་ཕྱེ་རྒྱུ་མིན་པའི་གནས་ཚུལ་ཕྱིར་བསྒྲགས་གནང་འདུགམཐོ་སློབ་ཀྱི་ཁག་ག་སྒོ་ཕྱེ་རྒྱུ་མིན་པའི་གསར་འགྱུར་དེའི་ནང་མཐོ་སློབ་ཁག་གི་སློབ་མཐར་སོན་པའི་སློབ་མ་རྣམས་འདི་ལོའི་ཟླ་ ༧ པ་ནང་ཡིག་རྒྱུགས་ལ་ཞུགས་དགོས་པ་བཀོད་ཡོད་ཀྱང་ཡིག་རྒྱུགས་དེ་དྲྭ་ཐོག་ནས་ལེན་དགོས་པ་དང་ཡང་ན་མཐོ་སློབ་སོ་སོར་ལེན་རྒྱུ་སོགས་ཀྱི་ཐག་གཅོད་དེ་གཙུག་ལག་སློབ་གཉེར་ཁང་སོ་སོ་ནས་སློབ་མ་སྤྱིའི་ཁེ་ཕན་དང་དགོས་ངེས་ཀྱི་མཐུན་རྐྱེན་བཅས་ལ་གཞིགས་ཏེ་གནང་དགོས་པ་གསུངས་འདུག གཞི་རྩའི་རིམས་ནད་རྐྱེན་པས་མཐོ་སློབ་ཀྱི་སློབ་སྐབས་དང་པོ་དང་གཉིས་པའི་སློབ་མ་རྣམས་ཡིག་རྒྱུགས་ལ་ཞུགས་ཐུབ་མེད་ཀྱང་། སློབ་སྐབས་སྔ་མའི་ཡིག་རྒྱུགས་ལ་གཞིར་བཞག་གིས་ལོ་རིམ་འཕར་ཆོག་པའི་ཆོག་མཆན་གནང་ཡོད་པ་དང་། དེ་བཞིན་འདི་ལོའི་མཐོ་སློབ་གསར་ཞུགས་ཀྱི་སློབ་མ་རྣམས་ཀྱིས་ཕྱི་ཟླ་ ༨ པ་ནང་མཐོ་སློབ་སོ་སོར་ཐོ་འགོད་བྱེད་ཆོག་པར་བསྒྲགས་འདུག རྒྱལ་ས་ལྡི་ལིའི་ནེཧ་རུ་གཙུག་ལག་སློབ་གཉེར་ཁང་དུ་རྒྱལ་སྤྱིའི་འབྲེལ་ལམ་རིག་པའི་ཐོག་སློབ་སྦྱོང་བྱེད་བཞིན་པའི་བོད་རིགས་སློབ་མ་ངག་དབང་ནོར་བུ་ལགས་སུ་སློབ་ཞུགས་ཕྱིར་འགྱངས་དང་འབྲེལ་ནས་བཅར་འདྲི་ཞུས་པར་ཁོང་གིས་ནེཧ་རུ་གཙུག་ལག་སློབ་གཉེར་ཁང་གི་སློབ་སྦྱོང་གི་ཁོར་ཡུག་ཕུན་སུམ་ཚོགས་པ་ཞིག་ཡོད་པ་རེད། འོན་ཀྱང་རིམས་ནད་ཀྱི་རྐྱེན་གྱིས་འཛིན་གྲྭ་འཚོགས་མ་ཐུབ་པ་མ་ཟད་སློབ་གྲྭའི་དཔེ་མཛོད་ཁང་ཡང་བེད་སྤྱོད་བྱེད་མ་ཐུབ་པས་ཞིབ་འཇུག་གི་སློབ་སྦྱོང་ལ་བར་ཆད་ཆེན་པོ་ཞིག་བཟོས་ཡོད་པ་དང་། རང་སྦྱོང་གི་ཁྲོད་ནས་སློབ་ཚན་མང་པོ་ཞིག་གི་གོ་དོན་ཇི་བཞིན་མ་རྟོགས་པ་དང་ཞིབ་འཇུག་གི་ལོ་རིམ་མཐའ་མའི་ཁྲོད་སློབ་སྦྱོང་ལ་ཤུགས་སྣོན་འཕར་མ་ཞིག་རྒྱག་རྒྱུའི་གོ་སྐབས་འཕྲོ་བརླག་སུ་ཕྱིན་པ་སོགས་ཀྱི་དཀའ་ངལ་མང་པོ་འཕྲད་ཀྱི་ཡོད་པར་འགྲེལ་བརྗོད་གནང་སོང་། དེ་བཞིན་སྦེང་ལོར་དུ་ཁྲིམས་ལུགས་རིག་པའི་སློབ་སྦྱོང་བྱེད་བཞིན་པའི་བོད་རིགས་སློབ་མ་བྱམས་པ་གཡང་མཚོ་ལགས་སུ་མཐོ་སློབ་ཀྱི་སློབ་དུས་ཕྱིར་འགྱངས་དང་འབྲེལ་ནས་དཀའ་ངལ་ཅི་ཞིག་འཕྲད་ཀྱི་ཡོད་དམ་ཞེས་བཅར་འདྲི་ཞུས་པར་དེང་སྐབས་བོད་ནས་ཡོང་བའི་སློབ་མ་རྣམས་ནས་ཕ་ཡུལ་དང་འབྲེལ་བ་བྱེད་མ་ཐུབ་སྟབས་ཟས་སོང་དང་ཁང་གླ་སོགས་ཀྱི་དཀའ་ངལ་འཕྲད་ཀྱི་ཡོད་མ་ཟད་དྲྭ་ཐོག་གི་འཛིན་གྲྭར་ཞུགས་དུས་ཀྱང་སྐུད་མེད་དྲྭ་བ་མེད་དུས་རྒན་ལགས་ཀྱི་སློབ་ཁྲིད་མ་གོ་བ་སོགས་དཀའ་ངལ་མང་པོ་ཞིག་འཕྲད་བཞིན་ཡོད་པར་ངོ་སྤྲོད་གནང་སོང་།

བོད་ཀྱི་འགྲེམས་སྟོན་ཁང་དབུ་བརྙེས་ནས་མི་ལོ་ ༢༠ འཁོར་བ།

དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འགྲམ་དུ་ཡོད་པའི་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་འགྲེམས་སྟོན་ཁང་གསར་འཛུགས་གནང་ནས་མི་ལོ་ ༢༠ འཁོར་བའི་དུས་ཚིགས་སྲུང་བརྩི་ཞུས་ཡོད་པ་རེད།རླུང་འཕྲིན་ཁང་གིས་བོད་ཀྱི་འགྲེམས་སྟོན་ཁང་གི་འགན་འཛིན་བཀྲིས་ཕུན་ཚོགས་ལགས་སུ་འདས་པའི་མི་ལོ་ ༢༠ རིང་ལ་འགྲེམས་སྟོན་ཚན་པའི་ལས་འཆར་གྱི་འཕེལ་རིམ་དང་དེ་བཞིན་འགྲེམས་སྟོན་ཁང་བརྒྱུད་ནས་རྒྱལ་སྤྱིའི་ཐོག་ནུས་པ་ཇི་ཙམ་ཐོན་ཡོད་པ་སོགས་དང་འབྲེལ་བའི་དམིགས་བསལ་བཅར་འདྲི་ཞུས་ཡོད།

རྒྱ་ནག་བྱེ་བྲག་ཏུ་དོ་སྣང་བྱ་ཡུལ་གྱི་རྒྱལ་ཁབ་ཁོངས་སུ་མིང་འདོན།

ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་ཐེངས་ ༢༡ པ་དེ་ཁ་སང་འདོན་སྤེལ་གནང་བ་དང་སྦྲགས་ཏེ་རྒྱ་ནག་བྱེ་བྲག་ཏུ་དོ་སྣང་བྱ་ཡུལ་གྱི་རྒྱལ་ཁབ་ཁོངས་སུ་མིང་འདོན་བྱས་འདུག ད་ལན་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཕྱི་ལོ་ ༢༠༢༠ ལོའི་སྙན་ཐོ་ནང་ཆོས་དད་རང་དབང་རྡོག་རོལ་ཐད་བྱེ་བྲག་ཏུ་དོ་སྣང་བྱ་ཡུལ་གྱི་རྒྱལ་ཁབ་ཁག་གཅིག་དང་དེ་བཞིན་དམིགས་བསལ་དོ་སྣང་བྱེད་དགོས་པའི་རྒྱལ་ཁབ་བཅས་སྡེ་ཚན་གཉིས་ལ་འབྱེ་ཡོད་པ་རེད། སྙན་ཐོ་བརྒྱུད་ནས་ཨ་རི་ཕྱི་སྲིད་ལས་ཁུངས་ནས་བྷར་མ་དང་རྒྱ་ནག དེ་བཞིན་ཨི་རན། བྱང་ཀོ་རི་ཡ། ཨུ་རུ་སུ། པ་ཀིས་ཏན། སཱའུ་ཌན་ཨ་ར་བྷི་ཡ་སོགས་ཆོས་དད་རང་དབང་རྡོག་རོལ་ཐད་བྱེ་བྲག་ཏུ་དོ་སྣང་བྱེད་དགོས་པའི་རྒྱལ་ཁབ་དང་། དེ་བཞིན་སུ་ཌན་དང་ཊར་ཀི། ཨི་རག ཁུ་བྷ། ཨུཛ་བྷེ་ཀིས་ཏན་སོགས་དམིགས་བསལ་དོ་སྣང་གནང་དགོས་པའི་རྒྱལ་ཁབ་ཀྱི་སྡེ་ཚན་ཁོངས་སུ་མིང་འདོན་དགོས་པ་བརྗོད་འདུག རྒྱལ་ཁབ་དེ་དག་ཁྲོད་རྒྱ་ནག་ལྟ་བུར་མཚོན་ན་འདས་ལོར་རྒྱ་གཞུང་གིས་དེས་དབང་སྒྱུར་འོག་ཡོད་པའི་མི་རིགས་རྣམས་ལ་གསང་མྱུལ་ལྟ་ཞིབ་དང་ངོ་གདོང་ངོས་འཛིན་གྱི་འཕྲུལ་ཆས་བེད་སྤྱོད་ཀྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་ལྟ་ཞིབ་ནན་པོ་བྱེད་ཀྱི་ཡོད་པ་མ་ཟད་ལྷག་པར་ཟླ་བ་ ༤ ཚེས་ ༡ ཉིན་ཁྲིམས་སྒྲིག་གསར་པ་ལག་བསྟར་འོག་ཆོས་ལུགས་ཀྱི་ལྟེ་གནས་ཁག་ཏུ་ཁྲིམས་ཐོག་ནས་སྐུ་ཚབ་དགོས་པ་སོགས་ཀྱི་སྒྲིག་གཞི་ལག་བསྟར་བྱེད་ཀྱི་ཡོད་པའི་གནས་ཚུལ་སྤེལ་འདུག སྙན་ཐོ་ནང་རྒྱ་གཞུང་ནས་མུ་མཐུད་བོད་མི་ཚོར་རང་ཉིད་ཀྱི་ཆོས་ཕྱོགས་ཀྱི་ཆོ་ག་ཕྱག་ལེན་ལག་བསྟར་ཐད་དམ་དྲག་དང་ལྷག་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་གཙོས་བོད་བརྒྱུད་ནང་བསྟན་གྱི་བླ་སྤྲུལ་འདེམས་ཕྱོགས་ལ་ཐེ་བྱུས་དང་སྟངས་འཛིན་བྱེད་པ་སྒོས་རྒྱ་གཞུང་གིས་སྲིད་བྱུས་ལ་དང་ལེན་མ་བྱེད་མཁན་གྱི་གྲྭ་བཙུན་ཚོར་དགོན་སྡེ་ནས་ཕྱིར་འབུད་དང་བཙོན་འཇུག་བྱས་ཡོད་པ་སོགས་གསལ་འདོན་བྱས་འདུག ཕྱི་ལོ་ ༢༠༡༩ ལོའི་དབྱར་དུས་སྐབས་ཡ་ཆེན་སྒར་གྱི་གྲྭ་བཙུན་རྣམས་ཀྱི་ཤག་སྟོང་ཕྲག་མང་པོ་གཏོར་བཅོམ་བཏང་བ་དང་༸གོང་ས་མཆོག་གི་སྐུ་པར་ཉར་མཁན་ཚོར་འཛིན་བཟུང་སློབ་ཕྲུག་རྣམས་གུང་སེང་སྐབས་ཆོས་ཕྱོགས་ཀྱི་བྱེད་སྒོར་མཉམ་ཞུགས་གནང་རྒྱུར་བཀག་སྡོམ་བྱས་པའི་གནས་ཚུལ་སོགས་ཐེར་འདོན་བྱས་འདུགཉེ་བའི་ལོ་ནང་རྒྱ་གཞུང་གིས་ཡེ་ཤུའི་ལྷ་ཁང་བཙན་དབང་གིས་སྒོ་བརྒྱབ་པ་དང་ཆོས་དཔོན་རྣམས་འཛིན་བཟུང་བྱས་པ། དེ་བཞིན་མཆོད་ཁང་ནང་རྒྱ་ནག་གི་སྲིད་འཛིན་ཞི་ཅིན་ཕིང་གི་འདྲ་པར་སོགས་བཞག་དགོས་པ་སོགས་ཀྱི་གནད་དོན་དང་ལྷག་པར་ཧྥ་ལུན་གྷོང་ཉམས་ལེན་བྱེད་མཁན་ཚོར་གང་བྱུང་འཛིན་བཟུང་དང་དེ་བཞིན་ཡུ་གུར་དང་། ཀ་ཛཀ། ཀིར་གྷིཛ་དང་གཞན་ཁ་ཆེ་མི་རིགས་ས་ཡ་གཅིག་ལྷག་ཙམ་ཞིག་ཤིན་ཅང་གི་ཆབ་སྲིད་སློབ་གསོ་བསྟི་གནས་ཁང་ ༡༣༠༠ ལྷག་ནང་བཀག་ཉར་བྱས་ཡོད་པའི་གནད་དོན་སོགས་ཆེད་འདོན་གནང་འདུག རྒྱ་གཞུང་གིས་ཆོས་ལུགས་རང་དབང་ཐད་རྡོག་རོལ་མུ་མཐུད་གཏོང་བར་བརྟེན་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་ཨ་རིའི་ཕྱི་སྲིད་ལས་ཁུངས་ནས་རྒྱ་ནག་དེ་བྱེ་བྲག་ཏུ་དོ་སྣང་བྱེད་དགོས་པའི་རྒྱལ་ཁབ་ཁོངས་སུ་བཞག་དགོས་པ་དང་ཆོས་དད་རང་དབང་རྡོག་རོལ་གཏོང་མཁན་དམར་ཤོག་ཚོགས་པའི་དྲུང་ཆེ་ Chen Quanguo དང་། Zhu Hailun སོགས་རྒྱ་གཞུང་གི་དཔོན་རིགས། གཞུང་ཚབ་ལས་ཁང་སོགས་ཨ་རི་ནང་འགྲུལ་བསྐྱོད་སླད་བཀག་སྡོམ་དང་རྒྱ་གཞུང་གིས་མུ་མཐུད་ཆོས་ལུགས་རང་དབང་ཐད་རྡོག་རོལ་གཏང་ཚེ་ཨ་རིའི་གཞུང་གི་ལས་བྱེད་ཚོས་ཨོ་རྩེད་འགྲན་ཚོགས་ཐོག་མཉམ་ཞུགས་གནང་རྒྱུ་མེད་པ་དང་དེ་འབྲེལ་གྱི་གནད་དོན་ཐད་ཡོངས་གྲགས་སྒོ་ནས་ཐུགས་འཚབ་གནང་དགོས་པ་བརྗོད་འདུགལྷག་པར་དུ་ཨ་རི་གྲོས་ཚོགས་ནས་ Tibetan Policy and Support Act of 2019 ཞེས་ཨ་རིའི་བོད་དོན་ཁྲིམས་འཆར་གསར་པ་དང་གཞན་ཆོས་ལུགས་རང་དབང་གོང་མཐོར་སླད་ཁྲིམས་འཆར་དེ་དག་དང་དེ་བཞིན་ Uyghur Forced Labor Prevention Act ཞེས་ཡུ་གུར་ངལ་རྩོལ་འགོག་ཐབས་ཀྱི་ཁྲིམས་འཆར་ལ་རྒྱབ་སྐྱོར་དགོས་པའི་ཞུ་སྐུལ་གནང་འདུག་པ་མ་ཟད། ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་ཟུར་དང་འགན་འཛིན་གྲས་སུ་ཡོད་པ་སྐུ་ཞབས་བསྟན་འཛིན་རྡོ་རྗེ་ལགས་ཀྱིས་ཉེ་ལམ་རང་དབང་ཁང་པའི་སྙན་ཐོ་ནང་བོད་དེ་ཆོས་ལུགས་རང་དབང་དང་འགྲོ་བ་མིའི་ཐོབ་ཐང་གི་གནས་སྟངས་ཐད་ཆེས་ཞན་ཤོས་གཉིས་པའི་ཁོངས་སུ་ཆེད་འདོན་གནང་བ་དང་བོད་ནང་གི་གནས་སྟངས་དེ་བྱང་ཀོ་རི་ཡའི་གནས་སྟངས་ལས་ཆེས་ཞན་པ་ཡོད་པར་ལུང་འདྲེན་གནང་བ་དང་སྦྲགས་ཏེ་རྒྱ་གཞུང་གིས་བོད་མི་དང་ཡུ་གུར་མི་རིགས་རྣམས་ཀྱི་བྱ་སྤྱོད་ལ་དམ་དྲག་དང་སློབ་ཕྲུག་ཚོར་རང་གི་སྐད་ཡིག་དང་ཆོས་ཕྱོགས་སྐོར་སློབ་ཁྲིད་གནང་རྒྱུར་བཀག་སྡམ་བྱེད་བཞིན་ཡོད་སྟབས་ཨ་རི་སྲིད་གཞུང་ནས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ངེས་པར་དུ་ཕྱག་བསྟར་དང་ཨ་རིའི་ནང་བོད་གནས་འབྲེལ་མཐུད་པ་གང་མགྱོགས་བསྐོ་གཞག་གནང་དགོས་པར་འབོད་སྐུལ་ཞུས་གནང་འདུག གཞི་རྩའི་ཤོག་གྲངས་ ༡༠༤ ཡོད་པའི་སྙན་ཐོ་དེའི་ནང་འདས་ལོར་རྒྱལ་ཁབ་ ༢༩ ལྷག་གི་ནང་ཆོས་ལུགས་རང་དབང་རྡོག་རོལ་བཏང་བའི་གནད་དོན་ཞིབ་ཕྲ་འདོན་སྤེལ་དང་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ནས་དེ་འབྲེལ་ཨ་རིའི་སྲིད་གཞུང་ལ་གནད་དོན་ཁག་གཅིག་ཀྱང་ཞུ་སྐུལ་གནང་འདུག རང་དབང་ཁང་པའི་སྙན་ཐོ་གཙོས་པའི་གཞུང་དང་གཞུང་འབྲེལ་མིན་པའི་སྙན་ཐོ་ཁག་གི་ནང་མུ་མཐུད་རྒྱ་ནག་ནང་གི་ཆོས་དད་རང་དབང་གཙོས་འགྲོ་བ་མིའི་ཐོབ་ཐང་གི་གནས་སྟངས་ཆེས་ཞན་ཤོས་ཁོངས་སུ་ཐོན་གྱི་ཡོད་པསའགྲོ་བ་མིའི་ཐོབ་ཐང་དཔྱད་ཞིབ་པ་ཚོས་དུས་ནས་དུས་སུ་དེ་འབྲེལ་གྱི་གནད་དོན་ཐད་ཐུགས་འཚབ་དང་སྦྲགས་ཏེ་ཞུ་གཏུག་གི་ལས་འགུལ་སོགས་སྤེལ་མུས་ཡིན་པ་རེད།

རྒྱ་ནག་གིས་ཨོ་གླིང་རྒྱལ་ཁབ་ནས་ཏོག་དབྱིབས་རིམས་ནད་ལ་ཞིབ་འཇུག་བྱ་རྒྱུར་འཇིགས་སྐུལ།

དེ་རིང་ཨ་རིར་རྟེན་གཞི་བྱས་པའི་ Dailywire གསར་ཁང་གིས་གནས་ཚུལ་སྤེལ་བར་ད་ཆ་རྒྱལ་སྤྱིའི་སྒང་དུ་ཨ་རི་དང་ཨོ་གླིང་གི་དབུ་ཁྲིད་པའི་ཐོག་ཏོག་དབྱིབས་རིམས་ནད་ཀྱི་འབྱུང་ཁུངས་ལ་ཞིབ་འཇུག་མཐིལ་ཕྱིན་པ་ཞིག་བྱེད་རྒྱུའི་ལས་གཞི་ཞིག་འགྲོ་མུས་ཡིན་པར་བརྟེན་རྒྱ་ནག་གིས་ཨོ་གླིང་གིས་ལས་གཞི་དེ་མཚམས་འཇོག་དགོས་པའི་འཇིགས་སྐུལ་བྱས་ཡོད་པར་འཁོད་འདུག ཨོ་གླིང་ནང་གི་རྒྱ་ནག་གི་གཞུང་ཚབ་པ་ Cheng Jingye ཡིས་ཨོ་གླིང་གི་རྒྱལ་ཁབ་ཀྱིས་ད་དུང་མུ་མཐུད་དུ་ཏོག་དབྱིབས་ནད་ཡམས་ཀྱི་འབྱུང་ཁུངས་འཚོལ་ཞིབ་ཀྱི་ལས་གཞི་དེ་མཇུག་བསྐྱངས་བ་ཡིན་ཚེ་དེས་ཕྱོགས་གཉིས་ཀྱི་རྒྱལ་ཁབ་ཀྱི་འབྲེལ་ལམ་སྤྱི་དང་སྒོས་སུ་ཨོ་གླིང་གི་དངོས་ཟོག་ཕྱིར་ཚོང་དང་རྒྱ་ནག་གི་ཡུལ་སྐོར་སྤྲོ་འཁྱམ་པ་ཨོ་གླིང་གི་ཁུལ་དུ་འགྲོ་རྒྱུ། དེ་བཞིན་རྒྱ་ནག་གི་སློབ་ཕྲུག་མང་པོ་ཨོ་གླིང་དུ་སློབ་སྦྱོང་བྱེད་དུ་གཏོང་རྒྱུ་སོགས་ཀྱི་འབྲེལ་ལམ་ལ་དོ་ཕོག་འགྲོ་རྒྱུ་ཡིན་པར་བརྗོད་དེ་ཨོ་གླིང་གིས་ཨ་རི་དང་མཉམ་འབྲེལ་གྱིས་ཏོག་དབྱིབས་རིམས་ནད་ཀྱི་འབྱུང་ཁུངས་འཚོལ་ཞིབ་ཀྱི་ལས་གཞི་དེ་འཕྲལ་དུ་མཚམས་འཇོག་བྱེད་དགོས་པའི་ཉེན་བརྡ་བཏང་འདུག རྒྱ་ནག་གིས་ཨོ་གླིང་ལ་འཇིགས་སྐུལ་བྱེད་བཞིན་པའི་དུས་སྐབས་འདིར་ Sky News ཞེས་པའི་གསར་ཁང་གིས་ཨོ་གླིང་གི་ཆབ་སྲིད་པ་མང་པོས་མཉམ་འབྲེལ་གྱིས་རྒྱལ་སྤྱིའི་ཐོག་རྒྱ་ནག་ནས་ཐོག་མར་མཆེད་པའི་ཏོག་དབྱིབས་ནད་རིམས་ལ་ཞིབ་འཇུག་བྱེད་རྒྱུ་ཡིན་པར་ཡོངས་གྲགས་གནང་འདུག དེ་བཞིན་གསར་ཁང་གིས་ Financial Review ཞེས་པའི་དཔལ་འབྱོར་བསྐྱར་ཞིབ་ཁང་གིས་ཨོ་གླིང་ནང་གི་རྒྱ་ནག་གི་སྐུ་ཚབ་ལ་བཅར་འདྲི་བྱས་པར་ཁོས་རྒྱ་ནག་གིས་ཏོག་དབྱིབས་ནད་དུག་དང་འབྲེལ་ནས་ཕྱིར་བསྒྲགས་དེ་ཕྱོགས་ཡོངས་ནས་ཆ་ཚང་བ་ཞིག་མིན་པར་ཁས་ལེན་གྱིས་ཨོ་གླིང་གིས་རྒྱལ་སྤྱིའི་སྒང་ནས་རིམས་ནད་འདིའི་འབྱུང་ཁུངས་ལ་ཞིབ་འཇུག་དགོས་པའི་ལས་གཞི་དེ་ནི་རྒྱ་ནག་ལ་སྡང་སེམས་ཆེ་བའི་ཨ་རིའི་མི་ཁག་ཧཅིག་གིས་འགོ་འཛུགས་བྱས་པ་ཞིག་ཡིན་པ་དང་ལས་འགུལ་དེ་ནི་རྒྱ་ནག་ལ་ཁ་གཏད་གཅོག་ཐབས་ཀྱི་ཆབ་སྲིད་དྲིལ་བསྒྲགས་ཤིག་ཡིན་པར་བརྗོད་འདུག གཞན་ཡངཨོ་གླིང་ལས་གཞི་དེས་རྒྱ་ནག་གི་མི་སེར་མང་པོ་ཞིག་ལ་དངངས་འཚབ་དང་བློ་ཕམ་ཆེན་པོ་སྐྲུན་གྱི་ཡོད་ལུགས་འགྲེལ་བརྗོད་བྱས་པ་དང་སྦྲགས། ཨོ་གླིང་གིས་ད་དུང་ལས་གཞི་དེ་མུ་མཐུད་དུ་མཇུག་སྐྱོང་གནང་བྱས་པ་ཡིན་ན་རྒྱ་ནག་གི་མི་སེར་རྣམས་ཀྱིས་རྗེས་སུ་ཨོ་གླིང་ལ་སྤྲོ་འཁྱམ་དུ་འགྲོ་རྒྱུར་དོ་ཕོག་འགྲོ་ངེས་ཡིན་པར་བརྗོད་པ་མ་ཟད་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་རྒྱུ་ཡིན་པར་བརྗོད་འདུག གསར་འགོད་པས་གཞི་རྩའི་ཨ་རིའི་སྲིད་འཛིན་གྱི་འཛིན་སྐྱོང་གིས་རྒྱ་ནག་གི་ཏོག་དབྱིབས་ནད་ཡམས་དང་འབྲེལ་བའི་ལངས་ཕྱོགས་བརྟན་པོ་བཟུང་ཡོད་ཀྱང་། རྒྱ་ནག་གི་གནོད་ཤུགས་འོག་ཡོ་རོབ་རྒྱལ་ཁབ་རྣམས་ཀྱིས་ཐད་ཀར་རྒྱ་ནག་གི་ཏོག་དབྱིབས་ནད་དུག་དང་འབྲེལ་བའི་གླེང་གཞི་དེར་མངོན་གསལ་དོད་པོའི་ཐོག་ནས་གླེང་མོལ་གནང་ཐུབ་ཀྱི་མེད་པར་ཡོངས་གྲགས་གནང་སྟེ་རྒྱ་ནག་གིས་རྒྱལ་ནང་གི་སྨན་པ་དང་གསར་འགོད་པ་རྣམས་ཀྱི་ཁ་འགོག་ཐབས་སུ་ཏོག་དབྱིབས་རིམས་ནད་དེ་དང་ཐོག་ཨ་རིའི་དམག་མི་ལས་བྱུང་བར་བརྗོད་པ་དང་དེ་བཞིན་རིམས་ནད་ཀྱི་ཁྲོད་རྐྱེན་འདས་སུ་ཕྱིན་པའི་མི་གྲངས་ཕྱིར་བསྒྲགས་ལ་གསང་རྒྱ་བྱེད་བཞིན་པ། གཞན་ཡང་རྒྱ་ནག་གི་ནང་དུ་ཏོག་དབྱིབས་རིམས་ནད་དང་འབྲེལ་བའི་གནས་ཚུལ་ལ་སྟངས་འཛིན་ནན་མོ་བྱེད་བཞིན་པ་ཡོངས་གྲངས་གནང་འདུག

བོད་ནང་གི་འགྲོ་བ་མིའི་ཐོབ་ཐང་དང་༸པཎ་ཆེན་རིན་པོ་ཆེའི་གནད་དོན་ཐོག་ཐུགས་འཚབ་ཆེན་པོ་ཡོད་ཅེས་གསུངས་འདུག

ཉེ་ཆར་ཟླ་བ་འདིའི་ཕྱི་ཚེས་ ༨ ཉིན་ཡོ་རོབ་སྦེལ་ཇམ་རྒྱལ་ཁབ་ཀྱི་གྲོས་ཚོགས་འཐུས་མི་དང་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་ Samuel Cogolati མཆོག་གིས་སྦེལ་ཇམ་ཕྱི་སྲིད་ལས་ཁུངས་ཀྱིས་རྒྱ་ནག་གཞུང་ལ་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ཆ་རྐྱེན་གང་ཡང་མེད་པར་མགྱོགས་མྱུར་གློད་བཀྲོལ་དགོས་པའི་བརྡ་ལན་གསལ་པོ་སྤྲོད་དགོས་པ་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་སྦེལ་ཇམ་གཞུང་གི་འགན་འཁུར་གང་འདྲ་བཞེས་ཀྱི་ཡོད་མེད་སོགས་དང་འབྲེལ་བའི་འདྲི་རྩད་ཅན་གྱི་བསྒྲགས་གཏན་ཞིག་སྤེལ་ཡོད་པ་རེད། གྲོས་ཚོགས་འཐུས་མིའི་འདྲི་རྩད་ཅན་གྱི་བསྒྲགས་གཏན་དེའི་ཐད་ཕྱི་ཚེས་ ༢༥ སྟེ་༸ཀུན་གཟིགས་༸པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་པའི་༸སྐུའི་འཁྲུངས་སྐར་ཉིན་སྦེལ་ཇམ་ཕྱི་སྲིད་བློན་ཆེན་སྐུ་ཞབས Philippe Goffin མཆོག་གིས་ལན་འདེབས་ཤིག་གནང་བ་བརྒྱུད་ནས་སྦེལ་ཇམ་གཞུང་ནས་དུས་རྟག་ཏུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་པར་དུ་ལོ་ངོ་ ༢༥ ལྷག་གི་རིང་ལ་རྒྱ་གཞུང་གིས་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་བོད་མའི་ཆབ་སྲིད་བཙོན་པ་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་ད་ལྟའི་གནས་སྟངས་གང་འདྲ་ཡོད་མེད་སོགས་ཀྱི་ཐོག་ཐུགས་འཚབ་ཆེན་པོ་གནང་བཞིན་ཡོད་ཅེས་གསུངས་འདུག ཕྱི་སྲིད་བློན་ཆེན་མཆོག་གིས་༸ཀུན་གཟིགས་༸པཎ་ཆེན་རིན་པོ་ཆེའི་གནད་དོན་དེ་ནི་བོད་མིའི་ཆོས་ཕྱོགས་དང་འབྲེལ་བ་ཡོད་སྟབས། རྒྱ་ནག་གཞུང་ནས་དེ་ལ་ཐད་བྱུས་རིགས་བྱེད་རྒྱུའི་ཐོབ་ཐང་ཡོད་མ་རེད་ཅེས་ནན་པོ་གནང་འདུག་པ་མ་ཟད་འདས་པའི་ལོ་དུས་ནང་ལ་བོད་ནང་གི་དངོས་ཡོད་གནས་སྟངས་ཤེས་ཐབས་སུ་སྦེལ་ཇམ་གཞུང་གིས་རྒྱ་ནག་དང་ལྷན་དུ་ཕྱོགས་གཉིས་ཀྱི་འབྲེལ་མོལ་མང་དག་ཅིག་གནང་བ་བརྒྱུད་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་གནང་ཡོད་པ་མ་ཟད། རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱ་ནག་ཐོག་གི་དུས་བཀག་བསྐྱར་ཞིབ་ཀྱི་ལས་རིམ་ཐོག་རྒྱ་ནག་གྱི་སྐུ་ཚབ་ལ་དངོས་སུ་འདྲི་རྩད་སོགས་ཀྱང་བྱེད་ཡོད་པ་ལུང་འདྲེན་དང་སྦྲགས། བོད་ཀྱི་གནད་དོན་ཐོག་བློན་ཆེན་སྐུ་སྒེར་གྱི་ངོས་ནས་མུ་མཐུད་དམིགས་བསལ་གྱི་ཐུགས་སྣང་གནང་གི་ཡིན་སྐོར་གསུངས་འདུག དེ་བཞིན་རྒྱ་ནག་གཞུང་གི་རྒྱལ་ཚོགས་ཀྱི་ལྷན་ཚོགས་ཁག་ནས་གྲངས་ཉུང་མི་རིགས་ཀྱི་གནད་དོན་སོགས་ཀྱི་ཐད་འདྲི་རྩད་བྱས་པ་ཁག་ལ་ལན་འདེབས་གནང་སྟངས་དང་། རྒྱལ་ཚོགས་ཀྱི་སྐུ་ཚབ་མི་སྣ་རྒྱ་ནག་དང་བོད་ཁུལ་དུ་ཕེབས་རྒྱུའི་རེ་སྐུལ་ཁག་ནར་འགྱངས་བྱེད་བཞིན་པ་སོགས་འགྲེལ་བརྗོད་དང་སྦྲགས། སྦེལ་ཇམ་གཞུང་ནས་ཡོ་རོབ་མཐུན་ཚོགས་དང་རྒྱལ་སྤྱིའི་མཉམ་འབྲེལ་རྒྱལ་ཚོགས་དང་ཟུང་འབྲེལ་ཐོག་རྒྱ་ནག་སྤྱི་དང་ལྷག་པར་དུ་བོད་དང་ཤིན་ཅང་ཁུལ་གྱི་འགྲོ་བ་མིའི་ཐོབ་ཐང་། དེ་བཞིན་ཆོས་དད་རང་དབང་གི་གནས་སྟངས་སོགས་ཀྱི་ཐད་མུ་མཐུད་ཐུགས་སྣང་གང་ཐུབ་གནང་གི་ཡིན་ཅེས་གསུངས་འདུག གཞི་རྩའི་ད་རེས་སྦེལ་ཇམ་ཕྱི་སྲིད་བློན་ཆེན་སྐུ་ཞབས Philippe Goffin མཆོག་གིས་ལན་འདེབས་འདི་མ་གནང་བའི་གོང་དུ་ཡོ་རོབ་གྲོས་ཚོགས་འཐུས་མི་ ༣༢ ཀྱིས་ཟུང་འབྲེལ་ཐོག་ཡོ་རོབ་ཕྱི་འབྲེལ་ལས་དོན་ཚོགས་ཆུང་གི་གཙོ་འཛིན་སྐུ་ཞབས་ Josep Borrel མཆོག་ལ་ཡང་ཞུ་སྙན་ཞིག་ཕུལ་ནས་རྒྱ་ནག་གཞུང་གི་ངོས་ནས་ཆ་རྐྱེན་གང་ཡང་མེད་པར་༸པཎ་ཆེན་རིན་པོ་ཆེ་༸སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་དགོས་པའི་ཤུགས་གནོན་སྤྲོད་རྒྱུའི་རེ་སྐུལ་ཞུས་ཡོད་པ་རེད།

ཏོག་དབྱིབས་ནད་ཡམས་དང་འབྲེལ་ནས་འཛིན་བཟུང་བྱས་པའི་གསར་འགོད་པ་རྣམས་གློད་བཀྲོལ་དགོས།

ཁ་སང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་རྒྱ་ནག་གིས་ད་ཆ་ཏོག་དབྱིབས་ནད་ཡམས་གནས་སྟངས་ཀྱི་ཐད་ནས་གནས་ཚུལ་བརྒྱུད་སྤེལ་བྱེད་མཁན་རྣམས་གང་བྱུང་དུ་འཛིན་བཟུང་བཀག་ཉར་བྱེད་བཞིན་ཡོད་པར་སྐྱོན་བརྗོད་ཀྱིས་ཉེ་ཆར་རྒྱ་ནག་གིས་ཏོག་དབྱིབས་ནད་དུག་གི་གནས་ཚུལ་དང་འབྲེལ་ཏེ་གསར་འགོད་པ་ Chen Qiushi དང་ Fang Bin སོགས་ཀྱི་མི་གསུམ་གང་བྱུང་དུ་འཛིན་བཟུང་བཀག་ཉར་བྱས་ཡོད་པ་རྣམས་ཆ་རྐྱེན་གང་ཡང་མེད་པར་གློད་བཀྲོལ་གཏོང་དགོས་པའི་འབོད་སྐུལ་གནང་འདུག གནས་ཚུལ་དེ་དང་འབྲེལ་འགྲོ་བ་མིའི་ཐོབ་ཐང་ལྟ་ཞིབ་ཁང་དུ་རྒྱ་ནག་ལ་ཞིབ་འཇུག་བྱེད་བཞིན་པའི་ Yaqiu Wang ཟེར་བ་ཞིག་གིས་ད་ཆ་རྒྱ་ནག་གིས་རྒྱལ་སྤྱིའི་ཐོག་རྒྱ་ནག་གི་ནང་དུ་ཏོག་དབྱིབས་ནད་ཡམས་ལ་གདོང་ལེན་བྱས་ནས་ལེགས་གྲུབ་བྱུང་ཡོད་པར་དྲིལ་བསྒྲགས་ཆེན་པོ་བྱེད་ཀྱི་ཡོད་ཀྱང་ཕྱོགས་གཞན་ཞིག་ནས་རྒྱ་ནག་གིས་ཏོག་དབྱིབས་ནད་དུག་དང་འབྲེལ་བའི་དངོས་ཡོད་གནས་ཚུལ་སྤེལ་མཁན་རྣམས་གང་བྱུང་དུ་འཛིན་བཟུང་བྱེད་ཀྱི་ཡོད་སྟབས། ཏོག་དབྱིབས་ནད་དུག་གི་དངོས་ཡོད་གནས་སྟངས་མང་པོ་ཞིག་ནམ་ཡང་ཤེས་ཐབས་མེད་པར་ལྷག་སྲིད་པར་བརྗོད་འདུག དེ་བཞིན་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་རྒྱ་ནག་གིས་ཟླ་བ་འདིའི་ ༡༩ ཉིན་མིང་ལ་ Cai དང་Tang ཟེར་བའི་མི་གཉིས་འཛིན་བཟུང་བྱས་ཡོད་པ་ཡོངས་གྲགས་ཀྱིས་རྒྱ་ནག་གིས་རྒྱལ་ནང་དུ་སྲིད་གཞུང་གིས་རྟོག་ཞིབ་བཀའ་རྒྱ་བཏང་ཡོད་པར་ཡ་ལན་སློག་པའི་ཉེས་འཛུགས་འོག་ཁོང་གཉིས་འཛིན་བཟུང་བྱས་ཡོད་པ་ཞིག་ཡིན་པར་བསྒྲགས་ཏེ་ད་ཆ་སྲིད་གཞུང་གིས་མི་སུ་ཞིག་གཞུང་གི་བཀའ་རྒྱའི་འོག་འཛིན་བཟུང་བྱས་པ་ཡིན་ཚེ་ཟླ་བ་དྲུག་གི་རིང་ལ་འཛིན་བཟུང་བྱས་པའི་མི་དེ་དག་གི་གནས་སྟངས་ཕྱིར་བསྒྲགས་བྱེད་མི་དགོས་པའི་ཁྲིམས་སྒྲིག་ཅིག་ལག་བསྟར་བྱེད་ཀྱི་ཡོད་པར་འཁོད་འདུག རྒྱ་ནག་གིས་ཏོག་དབྱིབས་ནད་དུག་དང་འབྲེལ་ནས་འཛིན་བཟུང་བཀག་ཉར་བྱས་པ་རྣམས་ལས་མི་མང་པོ་ཞིག་ནི་ཏོག་དབྱིབས་རིམས་ནད་ཐོག་ནས་གནས་ཚུལ་ཕྱིར་འདོན་བྱེད་ནཁན་གྱི་ཚོགས་པ་ Terminus 2049 ཞེས་པའི་གསང་ཚིག་བརྒྱུད་དེ་གནས་ཚུལ་མཁོ་འདོན་བྱེད་མཁན་གྱི་ཚོགས་པའི་ཚོགས་མི་ Cai Wei དང་ Chen Mei སོགས་ཡིན་ཞིང་། རྒྱ་ནག་གིས་ཚོགས་པ་དེའི་ཚོགས་མི་ཁག་ཅིག་འཛིན་བཟུང་བྱས་པར་བརྟེན་ད་ཆ་ཚོགས་པ་དེའི་གནས་ཚུལ་མཁོ་འདོན་བྱེད་ཐབས་མེད་པར་སྒོ་བརྒྱབ་ཡོད་པ་མངོན་གསལ་གནང་འདུག རྩ་བའི་རྒྱ་ནག་གིས་ཏོག་དབྱིབས་གནས་ཚུལ་ཕྱིར་བསྒྲགས་དང་འབྲེལ་ནས་མི་མང་པོ་འཛིན་བཟུང་བྱས་ཡོད་པ་ལས་གཙོ་བོ་ཁྲིམས་རྩོད་པ་དང་གསར་འགོད་པ། དེ་བཞིན་ཏོག་དབྱིབས་ནད་དུག་ཐོག་མར་ཁྱབ་སྐབས་གྲོང་ཁྱེར་ཝུ་ཧན་གྱི་སྨན་ཁང་ཁག་གི་གནས་ཚུལ་བརྙན་ལམ་ནས་ཕྱིར་བསྒྲགས་བྱེད་མཁན་གྱི་མི་སེར་དཀྱུས་མ་སོགས་མང་པོ་ཞིག་འཛིན་བཟུང་བྱས་ཡོད་པ་ཐེར་འདོན་གྱིས་འགྲོ་བ་ཐོབ་ཐང་གི་ཞིབ་འཇུག་པ་ Yaqiu Wang ལགས་ཀྱིས་རྒྱ་ནག་གི་ནང་དུ་གནས་ཚུལ་ཁྱབ་སྤེལ་འགྲོ་བར་རང་དབང་མེད་པར་བརྟེན་ཏོག་དབྱིབས་ནད་ཡམས་དེ་འཛམ་གླིང་དུ་ཁྱབ་ཡོད་པར་ལུང་འདྲེན་གྱིས་ད་ཆ་ཕྱི་ལོག་གི་སྲིད་གཞུང་ཁག་གིས་རྒྱ་ནག་ལ་གནོད་ཤུགས་སྤྲད་པ་བརྒྱུད་པ་ནས་ཏོག་དབྱིབས་ནད་དུག་དང་འབྲེལ་ནས་ཉེས་མེད་ཀྱི་ཁྲིམས་རྩོད་པ་དང་གསར་འགོད་པ་མང་པོ་ཞིག་རྒྱ་ནག་གིས་འཛིན་བཟུང་བཀག་ཉར་བྱས་ཡོད་པ་རྣམས་འཕྲལ་དུ་གློད་བཀྲོལ་གཏོང་རྒྱུར་ཤུགས་སྣོན་རྒྱག་དགོས་པའི་འབོད་སྐུལ་གནང་འདུག

ཇར་མ་ནི་གཞུང་གིས་རྒྱ་གཞུང་ནས་རིམས་ནད་འགོག་ཐབས་ཀྱི་ལས་དོན་དང་འབྲེལ་བའི་རེ་སྐུལ་ལ་ངོས་བཞེས་གནང་མེད།

ཉེ་ཆར་ཡུ་རོབ་ཁུལ་གྱི་གཞུང་འབྲེལ་བརྒྱུད་ལམ་ཐོག་རྒྱ་ནག་གཞུང་གིས་གནོན་ཤུགས་འོག་ཡུ་རོབ་མཐུན་ཚོགས་ཀྱིས་རྒྱ་ནག་གཞུང་ནས་ཏོག་དབྱིབས་རིམས་ནད་ཁྱབ་བརྡལ་འགོག་ཐབས་ཁྲོད་རྫུན་གཏམ་དང་གནས་ཚུལ་སྦས་བསྐུངས་བྱས་པའི་སྙན་ཐོའི་ནང་རྒྱ་གཞུང་གིས་ནོར་འཁྲུལ་དེ་ཙམ་མེད་པའི་རྣམ་པ་བསྟན་ཡོད་སྐོར་ཐོན་པ་དང་འབྲེལ་ནས་ཇར་མ་ནི་གཞུང་གིས་རྒྱ་ནག་གཞུང་ནས་ཇར་མན་གཞུང་ལ་རིམས་ནད་འགོག་ཐབས་ཐོག་གང་ཐུབ་བྱས་ཡོད་པའི་བཟང་ཕྱོགས་ཀྱི་ལྟ་ཚུལ་བཤད་དགོས་པར་སྐུལ་མ་ཞུས་ཡོད་ཀྱང་དེར་དང་ལེན་གནང་མེད་པ་གསུངས་འདུགཁ་སང་ལྷོ་རྒྱ་ནག་སྔ་དྲོའི་ཆ་འཕྲིན་གྱི་དྲྭ་གནས་ཐོག་གནས་ཚུལ་སྤེལ་བར་ཉེ་ཆར་ཇར་མ་ནི་ལྗང་ཁུ་ཚོགས་པའི་གྲོས་ཚོགས་འཐུས་མི་དང་རྒྱ་གཞུང་ལ་སྐྱོན་བརྗོད་ཤུགས་ཆེ་བྱེད་མཁན་གྲོས་ཚོགས་འཐུས་མི་ Margarete Bause ལགས་ཀྱི་ཡུལ་དེའི་གཞུང་ལ་དྲི་བ་ཕུལ་བ་ལྟར་ཇར་མ་ནི་ནང་སྲིད་ལྷན་ཁང་གི་ངོས་ནས་ཚེས་ ༢༢ ཉིན་གྲོས་ཚོགས་ལ་ཡིག་ཐོག་ནས་ལན་འདེབས་གནང་འདུག་པ་དང་དེའི་ནང་རྒྱ་ནག་གཞུང་འབྲེལ་མི་སྣ་ཁག་ཅིག་གིས་ཏོག་དབྱིབས་རིམས་ནད་འགོག་ཐབས་ཐད་རྒྱ་ནག་གཞུང་གིས་ལས་དོན་ཚགས་ཚུད་སྤེལ་ཡོད་པའི་བཟང་ཕྱོགས་ཀྱི་ལྟ་ཚུལ་བཤད་དགོས་པར་སྐུལ་མ་ཞུས་ཡོད་ཀྱང་ཇར་མན་གཞུང་གིས་འབོད་སྐུལ་དེར་དང་ལེན་གནང་མེད་པ་གསུངས་འདུག རྩ་བའི་ཟླ་བ་འདིའི་ཕྱི་ཚེས་ ༡༢ ཉིན་ Welt am Sonntag ཞེས་པའི་ཇར་མན་བརྒྱུད་ལམ་ཐོག་རྒྱ་ནག་གཞུང་འབྲེལ་མི་སྣས་ཇར་མ་ནི་གཞུང་ལ་དེ་ལྟར་འབོད་སྐུལ་བྱས་ཡོད་སྐོར་གྱི་གནས་ཚུལ་སྤེལ་ཡོད་སྟབས་སྐབས་དེར་རྒྱ་ནག་གཞུང་ཚབ་ལས་ཁུངས་ཀྱི་ངོས་ནས་རིམས་ནད་ཁྱབ་བརྡལ་འགོག་ཐབས་ཐོག་རྒྱ་ནག་གཞུང་གིས་ལས་དོན་ལེགས་པོ་གཉེར་ཡོད་པ་རྒྱལ་སྤྱིའི་གཞུང་ཚོགས་ཁག་ཚང་མས་ཁས་ལེན་གྱི་ཡོད་སྟབས། བརྒྱུད་ལམ་གཅིག་གིས་དེ་འབྲེལ་གནས་ཚུལ་རྫུན་བཟོ་བྱེད་ཐུབ་ཀྱི་མ་རེད་ཅེས་བཤད་དེ Welt am Sonntag བརྒྱུད་ལམ་ཐོག་སྤེལ་བའི་གནས་ཚུལ་དེ་བདེན་པ་མིན་པ་དང་འགན་ཁུར་མེད་པའི་གནས་ཚུལ་ཞིག་ཡིན་སྐོར་བརྗོད་ཡོད་པ་རེད། འོན་ཀྱང་ཁ་ཉིན་རེས་གཟའ་ཉི་མ་ཉིན་ཇར་མན་གཞུང་གིས་གྲོས་ཚོགས་ལ་ཕུལ་བའི་ཕྱག་བྲིས་ནང་རྒྱ་ནག་གཞུང་འབྲེལ་མི་སྣས་རིམས་ནད་ཀྱི་གནད་དོན་ཐད་རྒྱབ་སྐྱོར་སླད་ཇར་མ་ནིར་འབྲེལ་བ་ཞུས་པ་ལས་ར་ཕྲོད་བྱུང་ཡོད་པ་མ་ཟད་སྤྱིར་ཇར་མ་ནི་གཞུང་གིས་རྒྱ་ནག་གིས་ཕྱི་ཟླ་ ༡ ཚེས་ ༢༣ ནས་བཟུང་རིམས་ནད་དེ་འགོག་ཐབས་ཐོག་ལས་དོན་གཉེར་ཡོད་པ་ངོས་ལེན་གནང་ཡོད་ཀྱང་དེ་རྗེས་རྒྱལ་སྤྱི་ཐོག་ཛ་དྲག་རང་བཞིན་གྱི་ནད་ཡམས་འགོག་ཐབས་ཐོག་ཕྱི་གསལ་ནང་གསལ་གནང་གལ་ཆེ་བ་ཡིན་སྐོར་གསུངས་ཡོད་པ་རེད། ཇར་མ་ནི་ནང་རྟེན་གཞི་བྱས་པའི་ Mercator Institute of China Studies ཞེས་པའི་རྒྱ་ནག་ཐོག་གི་སྲིད་བྱུས་ཉམས་ཞིབ་ཁང་གི་འགན་འཛིན་སྐུ་ཞབས་ Mikko Huotari ལགས་དང་ Global Public Policy Institute ཞེས་པའི་སྲིད་བྱུས་ཉམས་ཞིབས་ཁང་གི་འགན་འཛིན་སྐུ་ཞབས་ Thorsten Benner ལགས་གཉིས་ཀྱིས་ད་ལན་ཇར་མན་གཞུང་གིས་ལན་འདེབས་གསལ་བཤད་དེ་འདོད་བློ་ཁེངས་པ་ཞིག་གནང་མེད་པ་མ་ཟད་རྒྱ་ནག་ལ་གདོང་ལེན་བྱ་འཆར་མེད་པའི་རྣམ་པ་མངོན་རྒྱུ་ཡོད་པར་སྐྱོན་བརྗོད་བྱས་འདུག གཞི་རྩའི་བདུན་ཕྲག་སྔོན་མའི་ནང་ཡོ་རོབ་མཐུན་ཚོགས་ཀྱི་ངོས་ནས་རིམས་ནད་ཁྱབ་བརྡལ་འགོག་ཐབས་ཐོག་རྒྱ་ནག་གིས་འཁྱོག་བཤད་དྲིལ་བསྒྲགས་སྤེལ་བཞིན་པ་དང་འབྲེལ་བའི་སྙན་ཐོ་ཞིག་སྤེལ་ཡོད་པ་དེར་འགྱུར་ཕྲན་བཏང་ཡོད་པ་དེ་ལྟར་ཡང་ཡོ་རོབ་མཐུན་ཚོགས་ཀྱིས་རྒྱ་ནག་གཞུང་ནས་སྙན་ཐོ་དེ་སྤེལ་རྒྱུ་མེད་པའི་རེ་སྐུལ་ཤུགས་ཆེ་ཞུས་པར་ལྟོས་མེད་སྙན་ཐོ་ཕྱིར་སྤེལ་གྱིས་རྒྱ་ནག་གི་གནོན་ཤུགས་འོག་ཚུད་མེད་པར་འགྲེལ་བརྗོད་བྱས་འདུག དེའི་བར་ན་དབྱིན་ཡུལ་ནང་རྙིང་ཞེན་ཚོགས་པའི་གྲོས་ཚོགས་འཐུས་མི་ཁག་ཅིག་གིས་སྣེ་ཁྲིད་འོག་དབྱིན་ཡུལ་དང་རྒྱ་ནག་ཕྱོགས་གཉིས་དབར་གྱི་འབྲེལ་ལམ་དང་འབྲེལ་བའི་སྲིད་བྱུས་ལ་བསྐྱར་ཞིབ་བྱེད་དགོས་པའི་གྲོས་བསྡུར་གནང་བཞིན་ཡོད་པ་རེད་འདུག རྩ་བའི་རྒྱ་ནག་གི་ཝུ་ཧན་གྲོང་ཁྱེར་དུ་སྔ་ལོའི་ཕྱི་ཟླ་ ༡༢ ནང་རིམས་ནད་དེ་ཁྱབ་བརྡལ་བྱུང་་ཡོད་པ་དང་ཕྱི་ཟླ་ ༡ ཚེས་ ༢༣ ཉིན་རྒྱ་ནག་གཞུང་གིས་རིམས་ནད་ཁྱབ་བརྡལ་འགོག་ཐབས་སུ་ཝུ་ཧན་གྲོང་ཁྱེར་ཡོངས་རྫོགས་ཕྱི་ལ་སྒོ་བརྒྱབ་ཡོད་པ་རེད། ཝུ་ཧན་གྲོང་ཁྱེར་སྤྱི་ཁྱབ་ཀྱིས་ཕྱི་ཟླ་ ༡༢ ནས་ཕྱི་ཟླ་ ༡ ཚེས་ ༢༣ བར་མི་ས་ཡ་ ༢ ཙམ་ཝུ་ཧན་གྲོང་ཁྱེར་ནས་ཕྱི་ལ་བསྐྱོད་ཟིན་ཡོད་པར་བརྗོད་ཡོད་པ་རེད། དེའི་ཁྲོད་ད་ལྟའི་ཆར་རིམས་ནད་དེ་འཛམ་གླིང་རྒྱལ་ཁབ་ ༢༡༣ ཙམ་གྱི་ནང་ཁྱབ་བརྡལ་ཕྱིན་པའི་འོག་མི་ས་ཡ་གཉིས་དང་ཕྱེད་ཀ་ལྷག་ལ་ནད་གཞི་དེ་ཕོག་པ་དང་མི་འབུམ་གཅིག་དང་སྟོང་ཕྲག་བརྒྱད་ཅུ་ལྷག་རྐྱེན་འདས་སུ་ཕྱིན་ཡོད་པ་རེད། ད་ལྟའི་ཆར་ཨ་རི་དང་ཨོ་སི་ཊོ་ལི་ཡ། དེ་བཞིན་སི་པེན་སོགས་རྒྱལ་ཁབ་མང་དག་ཅིག་གིས་རིམས་ནད་ཁྱབ་བརྡལ་ཕྱིན་ནས་མི་རྒྱུ་གཉིས་ཀར་དཀའ་ངལ་འཕྲད་པའི་འགན་ཆ་ཚང་རྒྱ་ནག་ལ་ཡོད་སྐོར་གསུངས་པ་དང་འབྲེལ། རྒྱ་ནག་གི་ངོས་ནས་གནད་དོན་དེའི་གུན་གསབ་སྤྲོད་དགོས་པ་གསུང་མཁན་མང་དག་ཅིག་ཡོད་པ་རེད། ད་ལྟའི་ཆར་རྒྱལ་སྤྱིའི་གཞུང་ཚོགས་དང་ཉམས་ཞིབ་པ་མང་པོས་ཏོག་དབྱིབས་ནད་དུག་གསར་པ་དེ་རྒྱ་ནག་གིས་ཆེད་བསྐྲུན་བྱས་པ་ཞིག་ཡིན་སྐོར་གསུང་མཁན་ཡང་མང་དུ་འགྲོ་བཞིན་ཡོད་པ་རེད།

༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་དགོས་པའི་འབོད་སྐུལ།

༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་པའི་༸སྐུའི་འཁྲུངས་སྐར་དུས་ཆེན་དང་བསྟུན་ཨ་རིའི་གྲོས་ཚོགས་ཀྱི་རྒྱ་ནག་འཛིན་སྐྱོང་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Jim Mcgovern ལགས་ཀྱིས་རྒྱ་ནག་གཞུང་གིས་འཛིན་བཟུང་བྱས་ཏེ་ད་ཆ་གར་སོང་ཆ་མེད་དུ་གྱུར་བའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་དགོས་པའི་ཡོངས་ཁྱབ་ཀྱི་བརྙན་ཐུག་ཞིག་སྤྱི་ཚོགས་དྲྭ་ལམ་བརྒྱུད་སྤེལ་གནང་འདུགཨ་རིའི་ཕོ་བྲང་དཀར་པོའི་མདུན་ཐང་ནས་སྤེལ་བའི་བརྙན་ཐུང་དེའི་ནང་སྐུ་ཞབས་ Jim Mcgovern ལགས་ཀྱིས་རྒྱ་ནག་ནས་ཁྱབ་བརྡལ་བྱུང་བའི་ཏོག་དབྱིབས་ནད་ཡམས་དེའི་རྐྱེན་པས་ད་ཆ་འཛམ་གླིང་ཁྱོན་ཡོངས་ལ་དཀའ་ངལ་ཆེན་པོ་ཞིག་འཕྲད་བཞིན་ཡོད་པའི་ཁར་ནད་དུག་དེ་ཡང་མི་མང་འདུ་འཛོམས་ཀྱི་ཁྲོད་དུ་ཁྱབ་བརྡལ་ཆེན་པོ་འགྲོ་བཞིན་ཡོད་པ་ལྟར་དེ་ནི་རྒྱ་ནག་གཞུང་གི་བཀག་སྐྱིལ་ཁང་དང་བཙོན་ཁང་དག་ལ་དེ་བས་ཀྱང་ཆེས་ཛ་དྲག་གི་གནས་སྟངས་ཤིག་ཆགས་ཡོད་སྟབས། འཛམ་གླིང་འཕྲོད་བསྟེན་ལྷན་ཚོགས་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ངོས་ནས་ཆབ་སྲིད་བརྩོན་པ་རྣམས་མགྱོགས་མྱུར་གློད་བཀྲོལ་དང་། ལྷག་པར་དུ་ལོ་ངོ་དྲུག་ལ་འཛིན་བཟུང་བྱས་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་ཡོང་ཐབས་སུ་གནོན་ཤུགས་སྤྲོད་དགོས་པ་གསུངས་འདུགཁོང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥ ལོར་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་མཛད་པ་ནས་ཉིན་གསུམ་གྱི་རྗེས་སུ་རྒྱ་ནག་གཞུང་གིས་ཆུང་སྲིད་རིན་པོ་ཆེ་དང་ཁོང་གི་ཡབ་ཡུམ་བཅས་བཙན་ཁྲིད་གསང་ཉར་བྱས་སྟབས་མི་མང་གིས་ད་བར་ལོ་ངོ་ ༢༥ རིང་ཀུན་གཟིགས་པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡིན་སྐོར་བཤད་པ་དེ་ལྟར་ཡང་ད་བར་མིག་མཐོང་རྣ་ཐོས་ཡོད་མཁན་སུ་གང་བྱུང་མྱོང་མེད་སྟབས་རྒྱ་གཞུང་གི་བཤད་པར་ཡིད་ཆེད་རྩ་བ་ནས་བྱེད་ཐབས་མེད་པར་འགྲེལ་བརྗོད་གནང་བ་དང་སྦྲགས། མི་སྣ་སུ་རུང་ཞིག་བཙན་ཁྲིད་བྱས་ནས་མི་ཚེ་ཧྲིལ་པོ་བཀག་སྐྱིལ་འོག་གནས་སུ་བཅུག་པ་ནི་རྒྱལ་སྤྱི་ཐོག་ནས་ཁྲིམས་འགལ་ཞིག་དང་ལྷག་པར་དུ་རིན་པོ་ཆེ་མཆོག་ལ་གཞི་རྩའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་། དེ་བཞིན་སྨྲ་བརྗོད་རང་དབང་སོགས་ནི་རང་བཞིན་ལྷན་རྒྱས་སུ་ལྡན་ཡོད་སྟབས། རང་དབང་དེ་དག་ལོངས་སུ་སྤྱོད་འཇུག་དགོས་པ་མ་ཟད་ཆུང་སྲིད་རིན་པོ་ཆེ་མཆོག་ལྟ་བུར་མཚོན་ན་ད་ཆ་སྐུ་གཞོན་པའི་དུས་སྐབས་ཤིག་ཆགས་ཀྱི་ཡོད་སྟབས་ངེས་པར་དུ་མགྱོགས་མྱུར་གློད་བཀྲོལ་དགོས་པ་གསུངས་འདུགརྩ་བའི་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་དུས་ཆེན་དང་བསྟུན་འཛམ་གླིང་ས་ཕྱོགས་གང་སར་གནས་པའི་བོད་མིའི་ཚོགས་སྒེར་ཁག་ནས་དུས་ཆེན་དེ་སྲུང་བརྩི་དང་འབྲེལ། ཐེམ་སྤང་གི་དུས་སྐབས་འདིར་དབུས་བོད་ཀྱི་གཞོན་ནུ་ལྷན་ཚོགས་ཀྱིས་གཙོས་པའི་ས་གནས་གཞོན་ལྷན་ཡན་ལག་ཁག་གིས་༸སྐུའི་འཁྲུངས་སྲུང་བརྩི་རྣམ་པ་འདྲ་མིན་གྱི་བརྒྱུད་དེ་ཞུས་ཡོད་པའི་ཁྲོད་མི་ནི་སོ་ཊའི་བོད་ཀྱི་གཞོན་ནུ་ལྷན་ཚོགས་ནས་ཁྱིམ་མེད་རྣམས་ལ་ཞལ་ལག་སྦྱིན་གཏོང་གནང་འདུགདབུས་བོད་ཀྱི་བེུད་ལྷན་ཚོགས་ནས་བསང་གསོལ་དང་དྷ་སའི་ཁུལ་དུ་ཡོད་པའི་བོད་མིའི་ཁྱིམ་ཚང་རྣམ་ལ་མཆོད་མར་ཞལ་འདེབས་ཕུལ་ནས་རང་ཁྱིམ་དུ་རིན་པོ་ཆེ་མཆོག་མགྱོགས་མྱུར་གློད་བཀྲོལ་ཡོང་ཐབས་སུ་མཆོད་མེ་ཕུལ་དགོས་པའི་གཞེན་བསྐུལ་གནང་སོང་བ་དང་དེ་བཞིན་ས་གནས་བེུད་ལྷན་ཚོགས་རྣམས་ནས་ཀྱང་ཉིན་མོ་དེ་རྣམ་པ་འདྲ་མིན་བརྒྱུད་དེ་སྲུང་བརྩི་ཞུས་ཡོད།ཕྱོགས་མཚུངས་སྤྱི་ཚོགས་དྲྭ་ལམ་ཁག་ཏུ་ཆུང་སྲིད་རིན་པོ་ཆེ་མཆོག་གི་༸སྐུའི་འཁྲུངས་སྐར་དུས་ཆེན་ཉིན་བོད་རིགས་གཞོན་སྐྱེས་དང་ལྷག་པར་དུ་སློབ་ཕྲུག་རྣམས་ནས་ཀྱང་དོ་སྣང་ཆེན་པོས་རང་ནུས་གང་ལྕོགས་ཀྱིས་རང་ཁྱིམ་དུ་བགྲོ་གླེང་དང་། སྙན་ངག་གྱེར་འདོན། བསྟོད་དབྱངས་ཕུལ་བ་སོགས་རྣམ་པ་འདྲ་མིན་ཐོག་ནས་སྲུང་བརྩི་ཞུས་པའང་མངོན་རྒྱུ་འདུག

༸པཎ་ཆེན་རིན་པོ་ཆེ་མཆོག་མགྱོགས་མྱུར་གློད་བཀྲོལ་དགོས་པའི་ཞུ་སྐུལ།

ཁ་སང་ཕྱི་ཚེས་ ༢༤ ཉིན་ཡོ་རོབ་གྲོས་ཚོགས་འཐུས་མི་ ༣༢ ཀྱིས་ཟུང་འབྲེལ་ཐོག་ཡོ་རོབ་ཕྱི་འབྲེལ་ལས་དོན་ཚོགས་ཆུང་གི་གཙོ་འཛིན་སྐུ་ཞབས་ Mr Josep Borrel མཆོག་ལ་ཞུ་སྙན་ཞིག་ཕུལ་ནས་རྒྱ་ནག་གཞུང་གི་ངོས་ནས་ཆ་རྐྱེན་གང་ཡང་མེད་པར་༸པཎ་ཆེན་རིན་པོ་ཆེ་༸སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་དགོས་པའི་ཤུགས་གནོན་སྤྲོད་རྒྱུའི་རེ་སྐུལ་ཞུས་འདུགདེའང་ཡོ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Mikulas Peksa ལགས་ཀྱིས་སྣེ་ཁྲིད་པའི་ཐོག་ཕུ་ལ་བའི་ཞུ་སྙན་དེའི་ནང་། དེ་རིང་ཕྱི་ཚེས་ ༢༥ ཉིན་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༡ ལ་ཕེབས་པའི་༸སྐུའི་འཁྲུངས་སྐར་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་དགེ་འདུན་ཆོས་ཀྱི་ཉི་མ་པཎ་ཆེན་སྐུ་འཕྲེང་བཅུ་པའི་ཡང་སྲིད་འཁྲུལ་བྲལ་ཡིན་པར་ངོས་འཛིན་དང་ཡོངས་ཁྱབ་གསལ་བསྒྲགས་མཛད་ནས་ཉིན་གསུམ་གྱི་རྗེས་རྒྱ་ནག་གཞུང་གིས་ཆུང་སྲིད་རིན་པོ་ཆེ་མཆོག་དང་ཁོང་གི་ཡབ་ཡུམ་གཙོས་པའི་སྐུ་འཁོར་ལྷན་རྒྱས་བཅས་པ་བཙན་ཁྲིད་གསང་ཉར་བྱས་ནས་ད་བར་ལོ་ངོ་ ༢༥ འགྲོ་གི་ཡོད་པ་མ་ཟད། ལྷག་དོན་རྒྱ་ནག་གཞུང་གིས་ཆུང་སྲིད་རིན་པོ་ཆེ་མཆོག་བཙན་ཁྲིད་གསང་ཉར་བྱས་སྟབས་མི་མང་གིས་ད་བར་ལོ་ངོ་ ༢༥ རིང་༸ཀུན་གཟིགས་༸པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་༸སྐུ་འཚོ་བཞུགས་ཡིན་སྐོར་བཤད་པ་དེ་ལྟར་ཡང་ད་བར་མང་ཚོགས་ཁྲོད་ནས་མིག་མཐོང་རྣ་ཐོས་ཡོད་མཁན་སུ་གང་བྱུང་མྱོང་མེད་པ་རེད། འོན་ཀྱང་རིན་པོ་ཆེ་མཆོག་༸སྐུ་འཚོ་བཞུགས་ཡིན་པར་ཡིད་ཆེས་ཞུ་བཞིན་ཡོད་སྐོར་འཁོད་འདུག དེ་བཞིན་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ཆེད་ལས་མཁས་པའི་ཚོགས་ཆུང་ལ་ཕྱི་ལོ་ ༡༩༩༥ ལོར་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གནད་དོན་དེབ་སྐྱེལ་ཞུས་ཡོད་པ་ལྟར། ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་དེ་གར་སོང་ཆ་མེད་དུ་གྱུར་བའི་གནད་དོན་རྙིང་གྲས་ལས་གཅིག་ཆགས་ཀྱི་ཡོད་པ་དང་རིན་པོ་ཆེ་མཆོག་ནི་འཛམ་གླིང་ནང་གི་ཆབ་སྲིད་བཙོན་པ་དུས་ཡུན་རིང་ཤོས་དང་ལོ་ན་ཆུང་ཤོས་དེ་ཆགས་ཀྱི་ཡོད་པ་གསུངས་འདུགཡོ་རོབ་གྲོས་ཚོགས་ཀྱི་འཐུས་མི་དེ་དག་གི་གཞན་ཡང་འགྲོ་བ་མིའི་ཐོབ་ཐང་དང་རང་དབང་སོགས་ཀྱི་རྨང་གཞིའི་ཐོག་ནས་བོད་ནི་འཛམ་གླིང་ནང་གི་རང་དབང་ཆེས་ཞན་ཤོས་སིརྱའི་རྗེས་སུ་ས་ཁུལ་ཨང་པ་གཉིས་པ་དེ་ཡིན་པར་མངོན་གསལ་གནང་འདུག་པ་མ་ཟད། རྒྱ་ནག་གཞུང་གིས་བོད་མིའི་ཐོག་དྲག་གནོན་དང་དམ་དྲག་ཆེས་ཆེར་བྱས་དང་བྱེད་བཞིན་ཡོད་པས་ད་ལྟའི་ཆར་བོད་འདི་ལོ་བཅུ་ཕྲག་དྲུག་ལྷག་གི་རིང་ལྕགས་ཚུར་དམ་པོ་བཅིངས་པའི་གནས་བབས་འོག་གནས་ཡོད་པ་རེད། རྒྱ་ནག་གཞུང་གི་ངོས་ནས་ད་བར་བོད་མིའི་འགྲོ་བ་མིའི་ཐོབ་ཐང་གི་རང་དབང་ལ་རྩིས་མེད་རྡོག་རོལ་ཇི་ཙམ་བཏང་ཡོད་པའི་དཔེ་མཚོན་ཡག་ཤོས་ནི་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གནད་དོན་དེ་ཆགས་ཡོད་པར་མངོན་གསལ་གནང་འདུག མཐའ་མཇུག་དེར་གྲོས་ཚོགས་འཐུས་མི་དེ་དག་གིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྲིད་བྱུས་དེ་དག་འཕྲལ་མར་བཀག་སྡོམ་བྱེད་དགོས་པ་དང་། ཡོ་རོབ་མཐུན་ཚོགས་ཀྱིས་བོད་ནང་ལ་ཆོས་དད་རང་དབང་ཡོང་བར་རྒྱ་གཞུང་ནས་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་དབུས་པའི་ཡབ་ཡུམ་སྐུ་འཁོར་རྣམ་པ་དང་དེ་བཞིན་བོད་མིའི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་ངེས་པར་དུ་གློད་བཀྲོལ་དགོས་པའི་ཞུ་སྐུལ་ནན་པོ་གནང་འདུགགཞན་ཡང་ཉེ་ཆར་ཟླ་ ༤ ཚེས་ ༨ ཉིན་སྦེལ་ཇམ་དབུས་གྲོས་ཚོགས་འོག་མིའི་འཐུས་མི་དང་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་སེ་མུལ་ཁོ་གྷོ་ལ་ཊི་ Samuel Cogolati མཆོག་གིས་ཀུན་གཟིགས་པཎ་ཆེན་སྐུ་འཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༡ ལ་ཕེབས་ཀྱི་ཡོད་པའི་སྐུའི་འཁྲུངས་སྐར་དང་འབྲེལ་བའི་བསྒྲགས་གཏམ་ཞིག་སྤེལ་བའི་ནང་རྒྱ་ནག་གཞུང་གིས་ལོ་ངོ་ ༦༠ སྔོན་ལ་བོད་དེ་བཙན་བཟུང་བྱས་པའི་རྗེས་སུ་བོད་ནང་ཆེས་དྲག་གནོན་གྱི་སྲིད་བྱུས་ལག་བསྟར་བྱས་དང་བྱེད་བཞིན་པའི་ཁྲོད་བོད་དེ་འཛམ་གླིང་ནང་དམ་དྲག་ཆེས་ཤོས་ཀྱི་ས་ཁུལ་གྲས་སུ་ངོས་འཛིན་བྱེད་བཞིན་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་དགེ་འདུན་ཆོས་ཀྱི་ཉི་མ་པཎ་ཆེན་སྐུ་འཕྲེང་བཅུ་པའི་ཡང་སྲིད་འཁྲུལ་བྲལ་ཡིན་པར་ངོས་འཛིན་དང་ཡོངས་ཁྱབ་གསལ་བསྒྲགས་མཛད་ནས་ཉིན་གསུམ་གྱི་རྗེས་རྒྱ་ནག་གཞུང་གིས་ཆུང་སྲིད་རིན་པོ་ཆེ་དང་ཁོང་གི་ཡབ་ཡུམ་བཅས་བཙན་ཁྲིད་གསང་ཉར་བྱས་ནས་ད་བར་ལོ་ངོ་ ༢༥ འགྲོ་གི་ཡོད་པ་གསུངས་ཡོད་པ་མ་ཟད། རྒྱ་་གཞུང་གིས་རིན་པོ་ཆེ་མཆོག་སྐུ་འཚོ་བཞུགས་ཡིན་སྐོར་བཤད་པར་ཡིད་ཆེད་རྩ་བ་ནས་བྱེད་ཐབས་མེད་པ་བཞིན་གནད་དོན་དེ་གཙོས་པའི་རྒྱ་གཞུང་གིས་བོད་མིའི་ཐོག་དྲག་གནོན་ཚད་མེད་བྱེད་བཞིན་པ་དེ་དག་གི་ཐོག་གླེང་སློང་གནང་རྒྱུ་གལ་ཆིན་པོ་ཡིན་སྐོར་གསུངས་འདུག དེ་བཞིན་ཁོང་གིས་སྦེལ་ཇམ་གྲོས་ཚོགས་ནང་ཡུལ་དེའི་བདེ་སྲུང་དང་ཕྱི་སྲིད་བློན་ཆེན་སྐུ་ཞབས་ Phillipe Goffin མཆོག་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནད་དོན་ཐོག་སྦེལ་ཇམ་གཞུང་གི་བཞེངས་ཕྱོགས་གང་འདྲ་ཡོད་དམ་ཞེས་འདྲི་བརྩད་ཀྱང་གནང་ཡོད་པ་རེད།རྩ་བའི་རྒྱ་ནག་གྲོང་ཁྱེར་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་བརྡལ་རྐྱེན་པས་ད་ཆ་རྒྱ་གར་རྒྱལ་ཡོངས་ཟླ་བ་གཅིག་ལྷག་ཐེམ་སྤང་གི་བཀག་རྒྱའི་འོག་གནས་ཡོད་པ་ལྟར། རྒྱལ་སྤྱིའི་ཁྲོན་དུ་གཞུང་དང་གཞུང་འབྲེལ་མིན་པའི་ལས་ཁུངས་ཡོངས་སུ་སྒོ་བརྒྱབ་ཏེ་མང་ཚོགས་ཀྱི་འགྲོ་འདུག་ལ་ཚད་བཀག་གནང་བའི་དུས་སྐབས་འདིར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་མིས་གཙོས་བོད་མི་དང་བོད་དོན་ཐོག་སེམས་ཁུར་ལྡན་པའི་རྒྱལ་སྤྱིའི་སྤྱི་ཚོགས་དང་སྒེར་བཅས་ནས་རིན་པོ་ཆེ་མཆོག་མགྱོགས་མྱུར་གློད་བཀྲོལ་སླད་ཞུ་གཏུག་གི་ལས་འགུལ་སྤེལ་ཐབས་གནང་དགོས་པའི་འབོད་སྐུལ་གནང་ཡོད་པ་དང་། བོད་མིའི་སྒྲིག་འཛུགས་ཀྱི་ངོས་ནས་ཀྱང་དེ་རིང་ཕྱི་ཚེས་ ༢༥ ཉིན་༸པཎ་ཆེན་༸སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༡ ལ་ཕེབས་པའི་༸སྐུའི་འཁྲུངས་སྐར་དང་། རྒྱ་ནག་གཞུང་གིས་ཆུང་སྲིད་རིན་པོ་ཆེ་མཆོག་དང་སྐུ་འཁོར་ལྷན་རྒྱས་བཙན་ཁྲིད་གསང་ཉར་བྱས་སྟབས་ད་བར་ལོ་ངོ་ ༢༥ འཁོར་བའི་ཉིན་མོ་དང་བསྟུན་དྲྭ་རྒྱ་ཐོག་ནས་རིན་པོ་ཆེ་མཆོག་གློད་བཀྲོལ་ཡོང་བའི་ཞུ་གཏུག་གི་ལས་འགུལ་རབ་དང་རིམ་པ་སྤེལ་མུས་ཡིན་པ་རེད།

Latest news