གསར་འགྱུར།

ཉེ་ཆར་ཟླ་བ་འདིའི་ཕྱི་ཚེས་ ༡༡ ཉིན་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་གཙོ་སྐྱོང་གནང་ཐོག་བོད་ནང་གི་ཆེས་ཞན་པའི་ཆོས་དད་རང་དབང་གི་གནས་སྟངས་ཐོག་རྒྱལ་སྤྱིའི་ཆོས་དད་རང་དབང་མཐུན་སྒྲིག་ཚོགས་འདུ་ཐེངས་གཉིས་པ་ཚོགས་ཡོད་པ་དང་། དེའི་ནང་རྒྱ་གར་ལྷོ་ཕྱོགས་སྦེལ་ཀོབ་ཏུ་རྟེན་གཞི་བྱས་པའི་སེར་སྨད་གྲྭ་ཚང་གི་མཁན་རིན་པོ་ཆེ་དགེ་བཤེས་བཀྲིས་ཚེ་རིང་ལགས་དང་། ཨེ་མོ་རི་གཙུག་ལག་སློབ་གཉེར་ཁང་གི་དགེ་བཤེས་དགྲ་འདུལ་རྣམ་རྒྱལ་ལགས་བཅས་བོད་པའི་སྐུ་ཚབ་གཉིས་ཀྱིས་གཙོས་པའི་འཛམ་གླིང་རྒྱལ་ཁབ་འདྲ་མིན་ ༣༠ ཙམ་གྱི་སྐུ་ཚབ་ནས་མཉམ་ཞུགས་གནང་འདུག རྩ་བའི་རྒྱལ་སྤྱིའི་ཆོས་དད་རང་དབང་མཐུན་སྒྲིག་ལྷན་ཚོགས་འདི་སྐུ་ཞབས་ Sam Brownback མཆོག་གིས་སྣེ་ཁྲིད་པའི་འོག་སྔ་ལོའི་ཕྱི་ཟླ་ ༢ པའི་ནང་གསར་འཛུགས་གནང་བ་ཞིག་དང་འཛམ་གླིང་སྟོབས་ཆེན་རྒྱལ་ཁབ་རྣམས་ཀྱི་ནུས་པ་མཉམ་དཔུང་ཐོག་ཆོས་དད་རང་དབང་ལ་དམ་དྲག་བྱེད་མཁན་དག་ལ་གདོང་ལེན་དང་དྲག་རྩུབ་དང་མཉའ་གནོན་མྱོང་མཁན་རྣམས་ལ་སྲུང་སྐྱོབ་དང་འཛམ་གླིང་ཁྱོན་ཡོངས་ལ་ཆོས་དད་རང་དབང་གོང་འཕེལ་གཏང་ཕྱིར་གསར་འཛུགས་གནང་བ་ཞིག་རེད། སྔ་ལོར་མཐུན་སྒྲིགས་གསར་འཛུགས་དང་འབྲེལ་ཚོགས་འདུ་ཐེངས་དང་པོའི་ཐོག་ཨ་རིའི་ཕྱི་སྲིད་བློན་ཆེན་སྐུ་ཞབས་ Mike Pompeo མཆོག་ཆེད་ཕེབས་ཀྱིས་ཨ་རི་གཞུང་གིས་རྒྱལ་སྤྱིའི་ཆོས་དད་རང་དབང་མཐུན་སྒྲིག་དེ་འཛམ་གླིང་ཁྱོན་ཡོངས་སུ་ཆོས་དད་རང་དབང་གོང་འཕེལ་ཐད་ཧ་ཅང་གལ་ཆེན་པོ་ངོས་འཛིན་གནང་བཞིན་ཡོད་པ་སོགས་གསུངས་ཡོད་པ་རེད། སྐབས་དེར་སེར་སྨད་མཁན་པོ་དགེ་བཤེས་བཀྲིས་ཚེ་རིང་ལགས་ཀྱིས་བོད་ནང་གི་ཆེས་ཞན་པའི་ཆོས་དད་རང་དབང་གི་གནས་སྟངས་སྐོར་ངོ་སྤྲོད་དང་འབྲེལ། བོད་ནང་དུ་ནང་པའི་དགོན་སྡེ་ཁག་མང་དག་ཅིག་གཏོར་བཤིག་བཏང་དང་གཏོང་མུས་ལ་བོད་བརྒྱུད་ནང་བསྟན་གྱི་བསླབ་པ་སློབ་གཉེར་བྱེད་ས་མེད་པའི་དཀའ་ངལ་ཆེན་པོ་འཕྲད་བཞིན་པ་དང་བོད་བརྒྱུད་ནང་བསྟན་གྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཆོས་ཉན་པ་དང་༸སྐུ་པར་ཉར་བ་སོགས་ལ་ཡང་དམ་དྲག་གིས་འཛིན་བཟུང་བཙོན་འཇུག་བྱེད་བཞིན་ཡོད་པ་སོགས་མངོན་གསལ་གནང་འདུག དེ་བཞིན་སྐབས་དེར་དགེ་བཤེས་དགྲ་འདུལ་རྣམ་རྒྱལ་ལགས་གས་ཀྱིས་༸གོང་ས་མཆོག་གིས་ལམ་སྟོན་མཛད་པའི་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་གཉེར་བརྒྱུད་ནས་འཛམ་གླིང་ཁྱོན་ཡོངས་ལ་བྱམས་བརྩེ་གོང་འཕེལ་གཏོང་བཞིན་སྐོར་ངོ་སྤྲོད་དང་འབྲེལ། རྒྱ་གཞུང་གིས་བོད་རྒྱུད་ནང་བསྟན་རྩ་མེད་གཏོང་བཞིན་པ་དེས་བོད་མི་ཙམ་མ་ཡིན་པར་འཛམ་གླིང་ཁྱོན་ཡོངས་ལ་གྱོང་གུད་ཆེན་པོ་ཕོག་བཞིན་ཡོད་པ་སོགས་མངོན་གསལ་གནང་འདུག དེ་བཞིན་ཚོགས་བཅར་བའི་དྲི་བར་རྒྱ་གཞུང་གིས་བོད་མིའི་དད་གུས་ཤུགས་ཆེ་ཞུ་སའི་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་གུང་ལོ་ ༦ ལ་འཛིན་བཟུང་བཙོན་འཇུག་གིས་ད་བར་གར་སོང་ཆ་མེད་དུ་གྱུར་ནས་ལོ་ངོ་ ༢༥ ཙམ་འགྲོ་བཞིན་ཡོད་པ་སོགས་རྒྱ་གཞུང་ནས་བོད་ནང་བོད་མིའི་ཆོས་དད་རང་དབང་ལ་བརྩི་མེད་རྡོག་རོལ་ཇི་ལྟར་གཏོང་བཞིན་ཡོད་པ་སོགས་མངོན་གསལ་གནང་འདུག རྒྱལ་སྤྱིའི་ཆོས་དད་རང་དབང་མཐུན་སྒྲིག་ཚོགས་འདུ་འདི་མ་འཚོགས་པའི་ཉིན་གཅིག་གི་སྔ་རོལ་ཨ་རིའི་ཕྱི་སྲིད་ལས་ཁུངས་ཀྱི་ཕྱི་ལོ་ ༢༠༡༩ ལོའི་རྒྱལ་སྤྱིའི་ཆོས་དད་རང་དབང་གནས་སྟངས་ཐོག་ལོ་འཁོར་སྙན་ཐོ་འདོན་སྤེལ་གནང་བའི་ནང་དུ་རྒྱ་ནག་རྒྱལ་ཁབ་ཀྱི་རྩ་ཁྲིམས་ནང་མང་ཚོགས་ལ་ཆོས་དད་རང་དབང་ཡོད་པ་བཀོད་ཡོད་ཀྱང་། ཆོས་མེད་སྨྲ་བའི་རྒྱ་ནག་དམར་ཤོག་གཞུང་གིས་ བོད་མི་དང་ཡུ་གུར་བ་སོགས་གྲངས་ཉུང་མི་རིགས་གཙོ་བོར་གྱུར་པའི་མང་ཚོགས་ཀྱི་ཆོས་དད་རང་དབང་ལ་དྲྭ་རྒྱའི་ལྟ་སྲུང་དང་མཉེན་ཆས་སོགས་བརྒྱུད་ནས་དམ་དྲག་བྱེད་ཀྱི་ཡོད་པ་དང་། ལྷག་པར་དུ་བོད་ནང་བོད་པའི་དགོན་སྡེ་ཁག་ཏུ་ཀྲུང་གོའི་ཁྱད་ཆོས་ལྡན་པའི་ནང་ཆོས་ཞེས་ཆབ་སྲིད་སློབ་གསོ་སྤེལ་བཞིན་པ་དང་དགོན་སྡེ་ཁག་གི་བཏང་འཛིན་ཡོངས་རྫོགས་ལ་བྱུས་གཏོགས་བྱས་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གཙོ་གྱུར་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་བདམ་རྒྱུའི་སྲིད་བྱུས་ལག་བསྟར་བྱེད་བཞིན་པ་སོགས་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་མངོན་གསལ་གནང་ཡོད་པ་རེད། ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Samuel Brownback མཆོག་གིས་རྒྱ་ནག་གཞུང་གིས་མི་རིགས་དབྱེ་འབྱེད་དང་དམ་དྲག་སོགས་ཀྱི་སྲིད་བྱུས་ལག་བསྟར་བྱས་པ་མ་ཟད་རང་གི་གྲངས་ཉུང་མི་རིགས་ཐོག་ངོ་གདོང་ར་ཕྲོད་ཀྱི་འཕྲུལ་ཆས་དང་ལྟ་སྲུང་མཉེན་ཆས། དེ་བཞིན་དྲྭ་ཐོག་ Social Crediting System ཞེས་གཞུང་ལ་དགའ་ཞེན་ཇི་ཙམ་ཡོད་མེད་ལ་དཔག་པའི་འཚོ་བའི་གནས་སྟངས་ཇི་ཆགས་ཐག་གཅོད་བྱས་ཡོད་པ་སོགས། དྲག་གནོན་ཞེས་པའི་མ་འོངས་གནས་བབས་གང་ཆགས་རྒྱུ་ཡིན་པ་རྒྱ་གཞུང་གིས་ད་ལྟ་ནས་གསལ་འདོན་གནང་གི་ཡོད་པ་གསུངས་ཡོད།

རིང་མིན་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲདས་ ༨༥ ལ་ཕེབས་པའི་༸སྐུའི་འཁྲུངས་སྐར་དུས་ཆེན་སླེབས་ལ་ཉེ་བ་དང་བསྟུན་ཁ་སང་དགོང་དྲོའི་ཆུ་ཚོད་ ༩ ཐོག་རྒྱ་གར་གྱར་གྱི་ NDTV གསར་ཁང་ཆེད་འཛུགས་གནང་མཁན་གསར་འགོད་པ་རྒན་གྲས་སྐུ་ཞབས་ Prannoy Roy ལགས་ཀྱི་མགོན་པོ་༸གང་ཉིད་མཆོག་ལ་དམིགས་བསལ་བཅར་འདྲི་ཞུས་པའི་ལེ་ཚན་ཞིག་རྒྱང་བསྲིངས་ཞུས་ཡོད་པ་དང་། ལེ་ཚན་དེའི་ཐོག་གསར་འགོད་པས་མགོན་པོ་༸གང་ཉིད་མཆོག་ལ་༸སྐུའི་འཁྲུངས་སྐར་ལ་འཚམས་འདྲི་ཞུས་པར་མགོན་པོ་མཆོག་ནས་ངའི་ཕྱིའི་ལུས་པོ་འདི་རྒྱ་གར་གྱི་འབྲས་དང་དྷ་ལིས་འཚར་བ་ཞིག་ཡིན་པ་མ་ཟད། ནང་གི་ཀླད་པ་དང་བསམ་བློ་དེ་དག་རྒྱ་གར་ནས་དར་བའི་དཔལ་ནཱ་ལེནྡཱའི་རིག་གཞུང་ལ་བརྟེན་ནས་འཚར་བ་ཞིག་ཡིན་སྟབས། ང་ནི་རྒྱ་གར་གྱི་བུ་ཞིག་ཡིན་ལ་དེ་ལ་སྤོབས་པ་ཡང་ཡོད་ཅེས་བཀའ་བསྩལ་ཡོད།  དེ་བཞིན་གསར་འགོད་པས་མགོན་པོ་༸གང་ཉིད་མཆོག་གིས་འདས་པའི་ལོ་དུས་མང་པོའི་རིང་ལ་ནང་ཆོས་དང་ཚན་རིག་དབར་གྱི་འབྲེལ་བའི་སྐོར་མཛད་རྫེས་བསྐྱངས་པའི་ཐད་ལ་བཀའ་འདྲི་ཞུས་པར་མགོན་པོ་༸གང་ཉིད་མཆོག་ནས་སྤྱིར་ཚན་རིག་གྱི་ཐོག་ནས་ཕྱི་དངོས་པའི་གནས་ལུགས་ལ་དོ་སྣང་ཆེ་བ་གནང་གི་ཡོད་ཀྱང་། དུས་རབས་ཉི་ཤུའི་མཇུག་ཙམ་ནས་ཚན་རིག་པ་མི་ཉུང་བ་ཞིག་གིས་ནང་ཆོས་ནས་གསུངས་པའི་སེམས་ཁམས་ཀྱི་རྣམ་གཞག་ཐོག་ལ་དམིགས་བསལ་གྱི་དོ་སྣང་དང་དེ་ནས་རིམ་པས་ཚད་རྡུལ་དངོས་ཁམས་རིག་པའི་ཚན་རིགས་མཁས་པ་ཚོས་ཀྱང་ནང་ཆོས་ནང་གསུངས་པའི་གཞི་དངོས་པོའི་གནས་ལུགས་དང་། རྟེན་འབྲེལ་གྱི་རྣམ་གཞག་སོགས་ཀྱི་ཐད་དམིགས་བསལ་དོ་སྣང་གསར་པ་གནང་ཐུབ་པ་བྱུང་ཡོད་པར་བཀའ་བསྩལ་འདུག ལྷག་པར་དུ་སྐབས་དེའི་བཀའ་ལན་ལས་འཕྲོས་ཏེ་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་ལྷན་སྐྱེས་སུ་ཡོད་པའི་བྱམས་བརྩེ་དང་སྙིང་རྗེའི་སེམས་ཚོར་དེ་དག་ཕྱིའི་སྣང་ཚུལ་ཙམ་མིན་པར་འགྲོ་བ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་མཁན་གཅིག་མཚུངས་ཡིན་པ་དེ་ཡང་སེམས་ཀྱི་ཀུན་སློང་དང་རྒྱུ་མཚན་ཡང་དག་ལ་བརྟེན་ནས་བྱུང་གི་ཡོད་པ་དང་། ཁོང་ཁྲོ་དང་འཇིགས་སྣང་། དེ་བཞིན་ཕྲག་དོག་སོགས་སེམས་ཚོར་དྲག་པོའི་ཆ་དེ་དག་ཞིབ་ཏུ་བརྟག་ན་མིའི་བསམ་བློའི་སྒྲོ་འདོགས་ལ་བརྟེན་པ་ཞིག་ཡིན་སྟབས་དེ་ལ་གཞི་རྩ་གང་ཡང་ཡོད་མ་རེད་ཅེས་བཀའ་བསྩལ་འདུག གསར་འགོད་པས་ད་ལྟའི་ཏོག་དབྱིབས་རིམས་ནད་ཀྱི་དཀའ་ངལ་གཙོས་ཛ་དྲགས་ཀྱི་གནད་དོན་མང་པོ་ཞིག་བེུད་འགོ་ཁྲིད་ཚོས་གདོང་ལེན་བཟང་བ་གནང་བཞིན་པའི་སྐོར་བཀའ་འདྲི་ཞུས་པར་མགོན་པོ་༸གང་ཉིད་མཆོག་ནས་ང་ཚོས་འདས་པའི་རྒྱལ་རབས་ལ་ཕྱིར་བལྟ་ཞིག་གནང་ན་མི་བསད་ཁྲག་སྦྱོར་གྱི་དོན་རྐྱེན་མང་དག་ཅིག་སྐྱེས་པའི་འགོ་ཁྲིད་ཐོག་ནས་བྱུང་བ་ཞིག་ཡིན་པར་ཡོངས་གྲགས་ཡིན་པ་དང་། དོན་དངོས་ཐོག་བསམ་བློ་འཁྱེར་སྟངས་ཡང་དེང་སྐབས་ཚན་རིག་མཁས་པ་ཚོས་ཀྱང་བེུད་རྣམས་ལ་འགྲོ་བ་མིའི་རང་བཞིན་ལྷན་སྐྱེས་སུ་ཡོད་པའི་བྱམས་བརྩེ་དང་གཞན་ཕན་གྱི་བསམ་་བློ་ཆེ་བ་ཡོད་པ་ཡོངས་གྲགས་སུ་གནང་བཞིན་པ་དང་། ང་རང་ཚོའི་མིའི་མི་ཚེའི་ནང་མཚོན་ཡང་ཨ་མ་ནི་ལྷད་མེད་བྱམས་བརྩེའི་བདག་ཉིད་ཡིན་པ་སོགས་བཀའ་འགྲེལ་དང་སྦྲགས། འཛབ་གླིང་འདིའི་ཐོག་བེུད་ཀྱི་འགོ་ཁྲིད་མང་བ་འཐོན་ཐུབ་ན་འཚེ་བ་དང་འབྲེལ་བའི་དཀའ་ངལ་རྣམས་ཉུང་དུ་གཏང་ཐུབ་ངེས་ཡིན་པ་བཀའ་བསྩལ་འདུག དེ་བཞིན་སྐབས་དེར་༸གོང་ས་མཆོག་གིས་༸སྐུའི་ཐུགས་བསྐྱེད་དམ་བཅའ་བཞི་དང་འབྲེལ་བཀའ་ལན་མཛད་སྐབས་འཛམ་གླིང་འདིའི་ཐོག་འཕྲད་བཞིན་པའི་དཀའ་ངལ་མང་དག་ཅིག་ངའི་རྒྱལ་ཁབ་དང་ངའི་ཆོས་སོགས་བདག་འཛིན་གྱི་བསམ་བློ་ཆེ་དྲགས་པའི་དབང་གིས་ཡོང་གི་ཡོད་པར་བཀའ་བསྩལ་དང་ཆབས་ཅིག ང་ཚོ་ཚང་མས་བསམ་བློ་རྙིང་པ་དེ་དོར་ཏེ་འགྲོ་བ་མི་གཅིག་གྱུར་བསམ་བློ་གོང་མཐོར་གཏོང་དགོས་གལ་ཡིན་པ་དང་། ཆོས་ལུགས་མཐུན་འབྲེལ་གི་ཆ་ནས་རྒྱ་གར་འདི་འཛམས་གླིང་ཐོག་དམིགས་དཔེ་འོས་པ་ཞིག་ཡིན་རེད་ཅེས་བཀའ་བསྩལ་འདུག ༸སྐུའི་ཐུགས་བསྐྱེད་གསུམ་པ་བོད་ཀྱི་རིག་གཞུག་དང་ཁོར་ཡུལ་སྲུང་སྐྱོབས་ཀྱི་གནད་དོན་དང་འབྲེལ། བོད་འདི་འཛམ་གླིང་གི་མཐོ་སྒང་ཞེས་བཤད་སྲོལ་ཡོད་པ་ལྟར། བོད་ཀྱི་རྒྱུག་ཆུ་ཆེ་ཁག་རྣམས་རྒྱ་གར་དང་པ་ཀི་སི་ཏན། དེ་བཞིན་རྒྱ་ནག་སོགས་ཨེ་ཤ་ཡའི་རྒྱལ་ཁབ་ཁག་གི་ཆུའི་འབྱུང་ཁུངས་ཆགས་ཀྱི་ཡོད་སྟབས། བོད་ཀྱི་སྣོད་བཅུད་ཆགས་སྟངས་དང་ཁོར་ཡུག་གི་གནས་བབས་སྲུང་སྐྱོབ་ཐད་མགོན་པོ་༸གང་ཉིད་མཆོག་ནས་དམིགས་བསལ་ཐུགས་སྣང་མཛད་བཞིན་པ་ལྟར་མང་ཚོགས་རྣམས་ནས་ཀྱང་དེའི་ཐོག་དགོངས་པ་བཞེས་རྒྱུ་གལ་ཆེན་པོ་ཡིན་པར་ལམ་སྟོན་མཛད་འདུག ལྷག་པར་དུ་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་པ་སྟེ་རྒྱ་གར་གྱི་གནའ་བོའི་རིག་གཞུང་བསྐྱར་གསོ་མཛད་རྒྱུ་དེ་ནི་དེང་གི་འཛམ་གླེང་འདིར་དགོས་མཁོ་ཡོད་པ་ཞིག་ཡིན་པ་དང་། ཐུན་མོང་མ་ཡིན་པའི་རིག་གནས་དེ་དག་ཐོག་མར་རྒྱ་གར་ནས་དར་བ་ཞིག་ཡིན་ཡང་རྒྱ་གར་གྱི་མི་རབས་གསར་པ་ཚོས་དེའི་ཐོག་དེ་ཙམ་དོ་སྣང་མ་གནང་བར་ཕྱི་དངོས་པོར་དོ་སྣང་ཆེ་བ་གནང་བཞིན་ཡོད་པ་སོགས་བཀའ་འགྲེལ་དང་སྦྲགས། རྒྱ་གར་གྱི་མི་རབས་གསར་པ་ཚོས་ཐུན་མོང་མ་ཡིན་པའི་རིག་གནས་དེ་ལ་དོ་སྣང་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་ཕྱི་རྒྱལ་ནས་དེར་བའི་རྒྱ་གར་གྱི་ཤེས་ཡོན་སློབ་གསོ་ལ་འགྱུར་བ་ཞིག་བཏང་ནས་དེང་དུས་ཀྱི་ཤེས་ཡོན་དང་གནའ་བོའི་རིག་གནས་ནང་གསུངས་པའི་སེམས་ཁམས་ཀྱི་རྣམ་གཞག་དང་བྱམས་བརྩེའི་ཉམས་ལེན་སོགས་སོགས་ཟུང་འབྲེལ་ཐོག་ནས་སློབ་ཁྲིད་གནང་ཐུབ་ན་དང་ཐོག་རྒྱ་གར་ནང་དང་དེ་ནས་རྒྱལ་སྤྱི་ལ་དམིགས་དཔེ་བསྟན་ཐུབ་ངེས་རེད་ཅེས་ལམ་སྟོན་མཛད་འདུག དེ་བཞིན་སྐབས་བཅར་འདྲིའི་ཁྲོད་༸གོང་ས་མཆོག་གི་༸སྐུའི་འཕྲོད་བཞེས་དང་མགོན་པོ་༸གང་ཉིད་མཆོག་ཐོག་མར་བཙན་བྱོལ་དུ་ཕེབས་སྐབས་སོགས་ཀྱི་ལོ་རྒྱུས་དྲན་གསོ་གནང་བ་དང་འབྲེལ། མགོན་པོ་༸གང་ཉིད་མཆོག་ནས་ད་ལྟའི་ཆར་༸སྐུ་གཟུགས་གསལ་ཐང་ཡིན་པ་མ་ཟད། གཟིགས་ལམ་དང་མཚན་མ་ཁག་ལ་གཞིགས་ན་དགུང་ལོ་ ༡༡༣ བར་བཞུགས་རྒྱུའི་ཐུགས་རེ་ཡོད་ཅེས་བཀའ་བསྩལ་ཡོད་པ་དང་། སྐབས་དེར་གསར་འགོད་པ་རྒན་གྲས་སྐུ་ཞབས་ Prannoy Roy ལགས་ཀྱིས་མགོན་པོ་༸གང་ཉིད་མཆོག་དགུང་གྲངས་ ༡༡༣ ལས་མང་བ་བཞུགས་རོགས་ཞེས་གསོལ་འདེབས་ཞུས་ཡོད་པ་དང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ Okay ཞེས་བཀའ་བཞེས་བཟང་པོ་སྨིན་བསྩལ་མཛད་པ་དང་ཆབས་ཅིག དེ་ལྟར་ཡོང་བར་རྒྱ་གར་གྱི་གྲོགས་པོ་རྣམས་ནས་རྒྱ་གར་གྱི་གནའ་བོའི་རིག་གནས་བསྐྱར་གསོ་མཛད་རྒྱུའི་དགོངས་བཞེད་ཐོག་འབད་བརྩོན་གནང་རོགས་ཞེས་ནན་སྐུལ་མཛད་ཡོད་པ་རེད། ཕྱོགས་མཚུངས་ཉེ་ཆར་དབྱིན་ཇིའི་གསར་ཁང་ BBC ཡི་ངོས་ནས་ཀྱང་བརྙན་འཕྲིན་བརྒྱུད་༸གོང་ས་མཆོག་ལ་དམིགས་བསལ་བཀའ་འདྲི་ཞུས་པའི་ལེ་ཚན་ཞིག་རྒྱང་སྲིང་ཞུས་འདུག་པ་དང་། དེའི་ནང་༸གོང་ས་མཆོག་གིས་འགྲོབ་མི་གཅིག་གྱུར་གྱི་འདུ་ཤེས་གོང་མཐོར་གནང་གལ་སོགས་ཀྱི་ལམ་སྟོན་མཛད་པ་མ་ཟད། ལྷག་པར་དུ་ད་ལྟ་ཏོག་དབྱིབས་རིམས་ནད་ཁྱབ་གདལ་གྱི་ཛ་དྲག་དུས་སྐབས་འདིར་གོ་ལ་ཁྱོན་ཡོངས་ལ་དཀའ་ངལ་ཆེན་པོ་འཕྲད་བཞིན་ཡོད་ཀྱང་། ཕྱོགས་གཞན་ཞིག་ནས་དཀའ་ངལ་ཆེ་བའི་དུས་སྐབས་འདིར་སོ་སོའི་བདེ་སྡུག་བློས་བཏང་གནང་སྟེ་གཞན་ལ་ཕན་པ་བསྒྲུབ་རྒྱུའི་བློ་རྒྱ་འཕར་མ་ཞིག་བྱུང་ཡོད་པ་སོགས་བཀའ་བསྩལ་འདུག  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ཆར་ས་ག་ཟླ་བའི་ཚེས་པ་ ༡༥ ཉིན་བཞུགས་སྒར་༸རྒྱལ་བའི་ཕོ་བྲང་ནས་བརྙན་འཕྲིན་བརྒྱུད། སོག་པོ་སྤྱི་མཐུན་རྒྱལ་ཁབ་ཀྱི་རྒྱལ་ས་ཨུ་ལན་བྷ་དྷར་དུ་ཚོགས་པའི་རྒྱལ་སྤྱིའི་ནང་པོའི་ཆོས་ཚོགས་ཀྱི་ཚོགས་བཅར་བ་དད་ལྡན་ཡོངས་ལ་བཀའ་སློབ་བཀའ་དྲིན་སྩལ་བ་དང་སྦྲགས། སངས་རྒྱས་ཀྱི་བསྟན་པ་བཤད་སྒྲུབ་ཟུང་འབྲེལ་གྱི་ཐོག་ནས་འཛིན་སྐྱོང་གནང་དགོས་པའི་ལམ་སྟོན་བཀའ་དྲིན་ཆེ་བ་བསྩལ་འདུག མགོན་པོ་༸གང་ཉིད་མཆོག་གིས་སྟོན་པ་སངས་རྒྱས་བཅོམ་ལྡན་འདས་ཀྱིས་ངའི་ཆོས་འདི་བྱང་ནས་བྱང་དུ་དར་ཡོང་ཞེས་བཀའ་སྩལ་ཡོད་པ་ལྟར་འདས་པའི་ལོ་དུས་ནང་ལ་སོག་པོའི་ཡུལ་དུ་ཕ་མེས་རྣམས་ཀྱིས་ནང་ཆོས་ལ་དམིགས་བསལ་དོ་སྣང་གནང་སྟེ་མཁས་པ་མང་པོ་ཐོན་ཡོད་པ་མ་ཟད། མཁས་པ་དེ་དག་གིས་སངས་རྒྱས་བསྟན་པ་སྤྱི་དང་ལྷག་པར་དུ་དཔལ་ནཱ་ལེནྡྲའི་་ཆོས་བརྒྱུད་ལ་ཞབས་འདེབས་རླབས་པོ་ཆེ་བསྒྲུབས་ཡོད་པ་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ད་ལྟའི་ཆར་དཔལ་ནཱ་ལེནྡྲའི་ཆོས་བརྒྱུད་འདིར་འཛམ་གླིང་སྤྱི་ཡོངས་ནས་དོ་སྣང་གསར་པ་ཞིག་སླེབས་བཞིན་ཡོད་སྟབས། སོག་པོའི་ཆོས་གྲོགས་རྣམས་ནས་སངས་རྒྱས་ཀྱི་བསྟན་བཤད་སྒྲུབ་ཟུང་འབྲེལ་གྱི་ཐོག་ནས་འཛིན་སྐྱོང་གནང་དགོས་པའི་ལམ་སྟོན་མཛད་པ་དང་ཆབས་ཅིག སོག་ཡུལ་དུ་ཡོད་པའི་དགོན་པ་ཁག་ཙམ་མིན་པར་མི་སྐྱ་ཕོ་མོ་ཚོས་ཀྱང་ནང་པའི་ལྟ་གྲུབ་ཀྱི་རྣམ་གཞག་ཐོག་སློབ་གཉེར་གནང་ཐུབ་ན་དགེ་མཚན་ཆེན་པོ་ཡོད་པ་བཀའ་བསྩལ་འདུག མགོན་པོ་༸གང་ཉིད་མཆོག་གིས་ནང་ཆོས་ནང་གསུངས་བའི་བློ་རིག་དང་རྟགས་རིག་གི་རྣམ་གཞག་དེ་དག་ས་གནས་ཀྱི་སློབ་གྲྭ་ཁག་ཏུ་ཤེས་ཡོན་གྱི་ངོ་བོའི་ཐོག་ནས་སློབ་ཁྲིད་གནང་ཐུབ་ན་སློབ་མའི་མི་ཚེ་ལ་དོན་དངོས་ཀྱི་ཕན་ཐོགས་འབྱུང་ངེས་ཡིན་པ་མ་ཟད། སོག་པོ་ཧོར་གྱི་ཡུལ་ལ་ཨེ་ཤ་ཡའི་ཁུལ་དུ་ཡོད་པའི་ནང་པའི་རྒྱལ་ཁབ་དང་། དེ་ནས་རིམ་པས་རྒྱལ་སྤྱིར་ནང་ཆོས་ཀྱི་ཤེས་ཡོན་ཐོག་ནས་ཕན་ཐོགས་བསྒྲུབ་རྒྱུའི་གོ་སྐབས་ལྡན་ཡོད་སྟབས། རྒྱལ་སྤྱིའི་ནང་པོའི་ཆོས་ཚོགས་ལྟ་བུའི་ཚོགས་ཆེན་བརྒྱུད་ག་ཚོད་ཐུབ་ཐུབ་ཀྱིས་ཕན་ཐོགས་སྒྲུབ་དགོས་བ་སོགས་ལམ་སྟོན་མཛད་འདུག གཞི་རྩའི་ས་ག་ཟླ་བའི་དུས་ཚིགས་ཁྱད་པར་ཅན་དང་བསྟུན་སོག་ཡུལ་དུ་ཚོགས་པའི་རྒྱལ་སྤྱིའི་ནང་པོའི་ཆོས་ཚོགས་ཐོག་སོག་པོའི་མཁན་རིན་པོ་ཆེ་དབུས་དད་ལྡན་མི་ཉུང་བ་ཞིག་ལྷན་ཞུགས་གནང་འདུག

དེ་རིང་ Twitter བཟོ་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གིས་དྲ་དམག་བཏང་ནས་སྤྱི་ཚོགས་དྲ་རྒྱའི་ནང་དུ་མཉམ་རུབ་ཀྱི་ཐོག་ནས་གནས་ཚུལ་རྫུན་བསྒྲགས་དང་འཁྱོགས་བརྗོད་རྒྱ་ཆེར་སྤེལ་གི་ཡོད་པ་ཤེས་རྟོགས་བྱུང་སྟེ།  བཟོ་ལས་ཁང་དེའི་ངོས་ནས་ Twitter དྲ་རྒྱུའི་ལམ་ནས་ཧོང་ཀོང་གི་ངོ་རྒོལ་དང་དམར་ཤོག་སྲིད་གཞུང་གིས་ཏོག་དབྱིབས་རིམས་ནད་ལ་ལན་འདེབས་བྱེད་སྟངས་སོགས་ལ་རམ་འདེགས་ཀྱིས་འཁྱོགས་བརྗོད་ཀྱི་གནས་ཚུལ་སྤེལ་མཁན་༢༣༠༠༠ ལྷག་བཟོ་ལས་ཁང་དེའི་དྲ་གནས་ལས་ཕྱིར་ཕུད་བཏང་ཡོད་པ་ཡོངས་གྲགས་གནང་འདུག དེ་བཞིན་ Twitter བཟོ་ལས་ཁང་གིས།  རྒྱ་ནག་གི་དྲིལ་བསྒྲགས་བསྐྱར་སྤེལ་བྱེད་མཁན་དང་དེར་དགའ་རྟགས་གནོན་མཁན་གྱི་དྲ་དམག་གཅིག་ཁྲི་ལྔ་སྟོང་ལྷག་ཀྱང་ཕྱིར་འཐེན་གནང་ཡོད་པར་མངོན་གསལ་གནང་བ་ལྟར། ཉེ་སྔོན་ཨ་རིའི་ New York Times གསར་ཁང་གིས་ཀྱང་དྲ་རྒྱའི་སྟེང་དུ་རྒྱ་ནག་གི་དྲ་དམག་ ༤༦༠༠ ལྷག་གིས་རྒྱ་ནག་གི་གསར་གནས་ཁག་གི་གནས་ཚུལ་ཁྱབ་སྤེལ་ལ་གཞོག་འདེགས་བྱེད་ཀྱི་ཡོད་ལུགས་བརྗོད་ཡོད་པ་ལྟར།  ཐེངས་འདིར་ Twitter བཟོ་ལས་ཁང་གིས་ཀྱང་གནས་ཚུལ་འཁྱོགས་བརྗོད་བྱེད་མཁན་གྱི་རྒྱ་ནག་གི་དྲ་དམག་མང་པོ་དངོས་སུ་ཕྱིར་ཕུད་བཏང་ཡོད་པ་རེད་འདུག དེ་བཞིན་New York Time  ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན།   ཨ་རིའི་ངོས་ནས་རྒྱ་ནག་གིས་འདི་ལོའི་ཏོག་དབྱིབས་ཀྱི་ནད་དུག་དེར་ཐོག་མར་སྟངས་འཛིན་མ་ཐུབ་པར་ཁྱབ་བརྡལ་ཆེན་པོ་བྱུང་ཡོད་པར་བརྗོད་བཞིན་ཡོད་ནའང་།  རྒྱ་ནག་གི་དྲ་དམག་གིས་སྤྱི་ཚོགས་དྲ་གནས་གང་སར་ཁུངས་སྐྱེལ་གང་ཡང་མེད་པར་གནས་ཚུལ་རྫུན་སྒྲིག་གིས། ཏོག་དབྱིབས་ནད་དུག་དེ་ཐོག་མར་ཨ་རི་ནས་ཁྱབ་བརྡལ་བྱུང་ཡོད་པའི་འཁྱོགས་བརྗོད་ཀྱི་དྲིལ་བསྒྲགས་རྫུན་མ་སྤེལ་གྱི་ཡོད་པ་ཤེས་རྟོགས་བྱུང་འདུག འོན་ཀྱང་། Stanford’s Internet Observatory   ཞེས་པའི་དྲ་གནས་ཞུབ་འཇུག་ཚོགས་པས་ཤེས་རྟོགས་བྱུང་བ་ལྟར་ན།  རྒྱ་ནག་གི་དྲ་དམག་དེ་དག་གིས་རྗེས་སུ་རྒྱ་ནག་རྒྱལ་ཁབ་ཀྱིས་རིམས་ནད་སྔོན་འགོག་འཐུས་ཚང་བསྒྲུབས་ཡོད་པར་བསྙད་ནས་རྒྱ་ནག་ལ་བསྔགས་བརྗོད་བྱས་བ་དང་ལྷན་དུ།    ཨ་རིའི་ངོས་ནས་ཆབ་སྲིད་ཀྱི་དབྱེ་འབྱེད་ཀྱི་རིགས་གནས་སྐབས་སུ་ཟུར་དུ་བཞག་ནས།   རྒྱ་ནག་གིས་རིམས་ནད་སྔོན་འགོག་བྱེད་སྟངས་ལ་མིག་དཔེ་བལྟ་དགོས་བ་སོགས་ཀྱི་ཟུར་ཟ་བྱས་ཡོད་པ་ཡང་མངོན་གསལ་གནང་འདུག དེ་བཞིན་རྒྱལ་སྤྱིའི་དྲ་རྒྱའི་སྲིད་བྱུས་ལྟེ་གནས་ཁང་གི་འགན་འཛིན།་སྐུ་ཞབས་ Fergus Hanson ལགས་ཀྱིས། རྒྱ་ནག་གིས་སྲིད་གཞུང་གི་དབང་ཆ་ལ་ཕྱི་ལོག་གི་ཉེན་ཁ་དང་གནོན་ཤུགས་མི་ཡོང་བའི་ཆེད་དུ་དྲ་དམག་གིས་གནས་ཚུལ་རྫུན་བསྒྲགས་ཀྱི་ལས་གཞི་སྤེལ་གྱི་ཡོད་པར་ཡོངས་གྲགས་གནང་འདུག  གཞན་ཡང་Twitter བཟོ་ལས་ཁང་གིས་གིས། རྒྱ་ནག་གི་ནང་དུ་ Twitter དྲ་གནས་དེ་བཀག་འགོག་བྱས་ཡོད་སྟབས།  རྒྱ་ནག་གི་གནས་ཚུལ་རྫུན་བསྒྲགས་བྱེད་མཁན་གྱི་དྲ་དམག་རྣམས་ཀྱིས་སྲིད་གཞུང་གི་ཆོག་མཆན་ཡོད་པའི་ཐོག་ནས་དྲ་གནས་གཅིག་བརྒྱུད་ནས་ Twitter མཉེན་ཆས་མང་པོ་དུས་གཅིག་ཏུ་སྒོ་འབྱེད་བྱེད་ཀྱི་ཡོད་ཡང་ཤེས་རྟོགས་བྱུང་འདུག གསར་ཁང་གིས། སྔོན་ཆད་ཨ་རིའི་སྲིད་འཛིན་གྱི་འོས་བསྡུས་སྐབས་སུ་ཨུ་རུ་སུས་དྲ་གནས་སུ་འཇབ་རྒོལ་བྱས་ཡོད་པ་ལྟར། ད་ཆ་རྒྱ་ནག་གིས་དྲ་དམག་མང་པོ་བཏང་ནས། སྤྱི་ཚོགས་དྲ་ལམ་གང་སར་ཐེ་ཝན་དང་ཧོང་ཀོང་སོགས་ཀྱི་གནད་དོན་དང་། དེ་བཞིན་འདི་ལོའི་ཏོག་དབྱིབས་རིམས་ནད་ཀྱི་འབྱུང་ཁུངས་སོགས་ཀྱི་ཐད་ནས་གནས་ཚུལ་རྫུན་སྒྲིག་བྱེད་ཀྱི་ཡོད་པ་ཤེས་རྟོགས་གསལ་བོ་བྱུང་ཡོད་པ་ཕྱིར་བསྒྲགས་གནང་འདུག་

རྒྱ་ནག་དམར་ཤོག་སྲིད་གཞུང་གིས།   ལོ་རབས་དགུ་བཅུ་བ་ནས་བཟུང་བོད་ཁུལ་དུ་བཙན་ཤེད་ཀྱིས་༼ ཕྱུག་སྐྱུར་རྩྭ་འདེབས།༽ ༼ འབྲོག་པ་གྲོང་སྙེགས། ༽ དང་༼ ནུབ་རྒྱུད་གསར་གཏོད།༽ སོགས་ཀྱི་དྲིལ་བསྒྲགས་འདྲ་མིན་གྱི་འོག་ནས་བོད་ཁུལ་གང་སར་འདུས་སྡོད་ཀྱི་ཁང་པ་མང་པོ་གསར་རྒྱག་བྱས་ཏེ།   ཁ་འཐོར་གྱི་འབྲོག་ཁྱིམ་པང་པོ་གྲོང་བརྡལ་དུ་གནས་སྤོེར་བྱེད་ཀྱི་ཡོད་པ་རེད། གོང་གི་གནས་ཚུལ་དེ་དང་འབྲེལ་ནས། མིང་བརྗོད་འདོད་མེད་པའི་འབྲེལ་ཡོད་ཅིག་གིས་ཁ་སང་འདི་གའི་རྒྱ་ཡིག་སྡེ་ཚན་ལ་གནས་ཚུལ་མཁོ་སྤྲོད་བྱས་པའི་ནང་།   འདི་ལོའི་ཟླ་བ་དང་པོའི་ནང་རྒྱ་ནག་གི་ཆིན་ཧཱ་སློབ་ཆེན་གྱི་ནང་དུ་བོད་ཁུལ་གྱི་༼ དབུལ་སྒྲོལ་འགག་སྒྲོལ་དང་གྲོང་གསེབ་བཅོས་སྒྱུར།༽ ཞེས་པའི་བརྗོད་གཞིའི་ཐོག་ཚོགས་འདུ་འཚོགས་སྐབས། བོད་ཁུལ་གྱི་ཞིབ་འཇུག་པ་དང་རྒྱ་ནག་གི་ཆེད་མཁས་པ་མང་པོས་རྒྱ་ནག་གིས་བོད་ཁུལ་དུ་འབྲོག་ཁྱིམ་གནས་སྤོར་བྱེད་དུ་བཅུག་སྟེ།  བོད་ཡུལ་གྱི་འབྲོག་པའི་ཕྱུགས་འཚོ་སྟངས་རྩིས་སྤྲོད་དོ་དམ་གྱི་སྲིད་བྱུས་སྤེལ་བཞིན་པ་དེས་བོད་ཀྱི་རིག་གཞུང་རྩ་གཏོར་དང་སྣོད་བཅུད་དོ་མཉམ་མེད་པར་བཟོ་བཞིན་པའི་གཅིག་གྱུར་གྱིས་སྡོམ་རྒྱབ་ཡོད་འདུག ཡིན་ནའང་། གནས་ཚུལ་མཁོ་སྤྲོད་པས་བརྗོད་པ་ལྟར་ན།  ད་ལྟའི་བར་རྒྱ་ནག་གིས་ཉེ་སྔོན་ཚོགས་པའི་ཞིབ་འཇུག་གི་སྙན་ཐོ་དེ་གཞུང་འབྲེལ་གྱི་དྲ་གནས་གང་དུ་ཡང་བཀོད་མེད་པ་མ་ཟད། ད་དུང་ཡང་བོད་ཁུལ་གྱི་ས་གནས་གང་སར་འབྲོག་པ་གནས་སྤོར་གྱི་ལས་གཞི་རྒྱ་ཆེར་སྤེལ་བཞིན་པ་དང་སྦྲགས།  ལས་གཞི་དེ་ནི་རྩྭ་ཐང་སྲུང་སྐྱོང་དང་འབྲོག་པའི་འཚོ་བའི་ཆུ་ཚད་མཐོ་རུ་གཏོང་ཆེད་ཡིན་པར་དྲིིལ་བསྒྲགས་བྱེད་བཞིན་ཡོད་པར་ངོ་སྤྲོད་གནང་འདུག དེ་བཞིན་ན་ནིང་རྒྱ་ནག་གི་ནང་དུ་སློབ་གྲྭ་ཆེན་མོ་འགྲིམ་བཞིན་པའི་བོད་རིགས་སློབ་མ་ཞིག་གིས་ཀྱང་འདི་ག་རླུང་འཕྲིན་ཁང་ལ་མཚོ་སྔོན་འབའ་རྫོང་གི་འབྲོག་ཁུལ་དུ་ཡང་རྒྱ་ནག་གིས་འབྲོག་ཁྱིམ་གནས་སྤོར་གྱི་སྲིད་བྱུས་ལག་བསྟར་བྱེད་བཞིན་པའི་གནས་ཚུལ་མཁོ་སྤྲོད་བྱས་པའི་ནང་།   བོད་ཀྱི་འབྲོག་པ་གནས་སྤོར་གྱི་སྲིད་བྱུས་དེའི་འོག་ན་མི་མངོན་པའི་རལ་གྲི་ཞིག་སྦས་ཡོད་ཅེས་ངོ་སྤྲོད་གནང་སྟེ།  ད་ལྟའི་ཆར་བོད་ཁུལ་དུ་འབྲོག་པ་གནས་སྤོར་གྱི་སྲིད་བྱུས་ལག་བསྟར་བྱས་པ་ནས།    ཞིང་འབྲོག་མང་ཚོགས་མང་པོ་གྲོང་བརྡལ་དུ་གནས་སྤོར་བྱས་ཡོད་པ་དང་སྔོན་ཆད་རྩེད་དགའ་དང་འདུ་འཛི་ཆེ་བའི་འབྲོག་ཐང་དུ་ད་ལྟའི་ཆར་རྒན་རྒོན་འགའ་ལས་ལྷག་མེད་པར་མ་ཟད། འབྲོག་ཁུལ་གྱི་རིག་གཞུང་དང་སྔོན་ཆད་ཀྱི་འབྲེལ་འདྲིས་ཟབ་པའི་འཚོ་བ་དེ་ད་ལྟ་ཛ་དྲག་ཅན་དུ་གྱུར་ཡོད་པར་བརྗོད་པ་དང་ལྷན་དུ།  རྒྱ་ནག་གིས་འབྲོག་ཁུལ་གྱི་རྩ་སར་བདག་བཟུང་བྱས་ནས་མ་འོངས་པར་གཏེར་ཁ་སྔོག་འདོན་བྱེད་རྩིས་ཡོད་པ་དང་།   དེ་བཞིན་འབྲོག་པ་མང་ཚོགས་ཀྱི་མི་རིགས་ཀྱི་བསམ་བློར་བསྒྱུར་བཅོས་གཏོང་རྒྱུའི་དམིགས་ཡུལ་ཡོད་པར་ངོ་སྤྲོད་གནང་ཡོད། དེ་བཞིན་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་ཀྱིས་ཀྱང་ཉེ་སྔོན་འདི་ག་རླུང་འཕྲིན་ཁང་ལ་འབྲོག་ཁྱིམ་གནས་སྤོར་དང་འབྲེལ་ནས།རྒྱ་ནག་གི་སྲིད་བྱུས་དེའི་དམིགས་འབེན་གཙོ་བོ་ནི་ཞིང་འབྲོག་མང་ཚོགས་གནས་སྤོར་དུ་བཅུག་ནས་ཐོན་ཁུངས་སྐྱེལ་འདྲེན་དང་ཆུ་གློག་འཛུགས་སྐྲུན་སོགས་ཀྱིས་མཚོན་པའི་རྒྱ་ནག་རང་གི་ཁེ་ཕན་འབའ་ཞིག་གི་ཆེད་དུ་སྲིད་བྱུས་དེ་ལག་བསྟར་བྱེད་བཞིན་ཡོད་པ་དང་།   དམིགས་བསལ་དུ་ཉེ་བའི་ལོ་འགའི་རིང་ལ་བོད་ཁུལ་གྱི་སྙི་མོ་རྫོང་དང་ཅོ་ནེ་ཁུལ། དེ་བཞིན་འཇོ་མདའ་རྫོང་སོགས་སུ་འབྲོག་པ་གནས་སྤོར་གྱི་སྲིད་བྱུས་ལག་བསྟར་ནན་མོ་བྱས་ཡོད་པ་ཡོངས་གྲགས་ཀྱིས།    ད་སྐབས་ས་ཁུལ་དེ་དག་གི་ཞིང་འབྲོག་མི་མང་གི་མིག་སྔའི་འཚོ་གནས་ལ་དཀའ་ངལ་ཆེས་ཆེར་འཕྲད་བཞིན་ཡོད་པར་ངོ་སྤྲོད་གནང་ཡོད།

ཁ་ཉིན་ཡོ་རོབ་གྲོང་ཁྱེར་སྦར་སིལ་ནང་དུ་ཡོ་རོབ་མཐུན་ཚོགས་དང་རྒྱ་ནག་གཉིས་དབར་ཐབས་བྱུས་གྲོས་མོལ་ཐེངས་ ༡༠ སྟ་གོན་གྱི་གྲོས་སྡུར་ཐོག་ཡོ་རོབ་མཐུན་ཚོགས་ཀྱི་ཕྱི་འབྲེལ་དང་བདེ་འཇགས་ཀྱི་གཙོ་འཛིན་གྱིས་རྒྱ་ནག་ནང་ཆེས་ཇེ་སྡུག་ཏུ་འགྲོ་བཞིན་པའི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་ཏེ་བོད་ཀྱི་གནད་དོན་གླེང་སློང་གནང་འདུགད་ཆ་རྒྱལ་སྤྱིའི་ཁྱོན་དུ་ Covid19 འམ་ཏོག་དབྱིབས་གཉན་རིམས་ཁྱབ་བརྡལ་འགྲོ་མུས་རྐྱེན་པས་ཛ་དྲག་གི་གནས་སྟངས་ཁྲོད་ཁ་ཉིན་ཕྱི་ཚེས་ ༩ ཉིན་ཡོ་རོབ་རྒྱལ་ཁབ་སྦེལ་འཇམ་གྱི་རྒྱལ་ས་དང་ཡོ་རོབ་མཐུན་ཚོགས་ཀྱི་བསྟི་གནས་སྦར་སིལ་ནང་ཡོ་རོབ་མཐུན་ཚོགས་ཀྱི་ཕྱི་འབྲེལ་དང་བདེ་འཇགས་ཀྱི་ཚོགས་གཙོ་སྐུ་ཞབས་ Josep Borrell ལགས་དང་རྒྱ་ནག་གི་ཕྱི་སྲིད་བློན་ཆེན་ Wang Yi དབར་དྲྭ་ལམ་བརྒྱུད་རྒྱལ་ཁབ་གཉིས་དབར་ཐབས་བྱུས་གྲོས་མོལ་ཐེངས་བཅུ་པའི་གྲ་སྒྲིག་དང་འབྲེལ་གྲོས་བསྡུར་གནང་སྟེ་ཕྱོགས་གཉིས་དབར་གྱི་གནད་དོན་འདྲ་མིན་ཐོག་འབྲེལ་ལམ་ཇེ་བཟང་དུ་གཏང་རྒྱུའི་ཐབས་ཤེས་བྱ་རྒྱུར་ཞལ་བཞེས་གནང་ཡོད་པ་རེད། རྒྱལ་ཁབ་ཕྱོགས་གཉིས་ཀྱི་གྲོས་མོལ་དེ་གྲུབ་རྗེས་སྐུ་ཞབས་ Josep Borell ལགས་ཀྱིས་གསར་འགོད་ལྷན་ཚོགས་བསྐོང་ཚོགས་གནང་སྟེ་སྔ་ལོ་རྒྱ་གཞུང་གིས་ཡོ་རོབ་མཐུན་ཚོགས་དང་རྒྱ་ནག་དབར་གྱི་ལོ་འཁོར་ལྷན་ཚོགས་ཐོག་ཁས་ལེན་ཞུས་ཁག་ལག་བསྟར་དོན་འཁྱོལ་གནང་ནས་ཕྱོགས་གཉིས་དབར་དབྱེ་འབྱེད་མེད་པར་དྲང་བདེན་དང་ཕྱི་གསལ་ནང་གསལ། དེ་བཞིན་ཞལ་གསང་ཐུགས་དྲང་གི་འབྲེལ་ལམ་གནང་དགོས་པའི་གཞེན་བསྐུལ་གནང་ཡོད་སྐོར་གསུངས་པ་མ་ཟད། འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ཏེ་སྐུ་ཞབས་ཁོང་གིས་ཡོ་རོབ་མཐུན་ཚོགས་ཀྱིས་དུས་དང་རྣམ་པ་ཀུན་ཏུ་རྒྱ་ནག་གཞུང་ལ་གྲངས་ཉུང་མི་རིགས་ཁག ལྷག་དོན་བོད་དང་ཡུ་ཡུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་ཐུགས་ཚབས་ཆེན་པོ་གནང་བཞིན་ཡོད་པ་དང་ཆབས་ཅིག དེ་འབྲེལ་དམིགས་བསལ་གྱི་གནད་དོན་ཁག་ཅིག་ཐེར་འདོན་གྱིས་གླེང་ཡོད་པ་གསུངས་འདུགདེ་བཞིན་ཁོང་གིས་གྲོས་མོལ་དེའི་ཐོག་ཧོང་ཀོང་ནང་གི་ཆེས་ཛ་དྲག་གནས་སྟངས་སྐོར་གླེང་སློང་གནང་སྟེ་རྒྱ་ནག་གཞུང་ནས་རྒྱལ་སྤྱིའི་ཐོག་ཁས་ལེན་ཞུས་ཁག་དང་ལྷག་ཧོང་ཀོང་གི་གཞི་རྩའི་ཁྲིམས་ལ་བརྩི་བཀུར་ཞུ་ཐོག་ཧོང་ཀོང་ནང་གི་ད་ལྟའི་ཆེས་ཛ་དྲག་གནས་སྟངས་དེ་ཞི་འཇམ་བརྟན་ལྷིང་ཡོང་བའི་ཐབས་ཤེས་གང་ཐུབ་གནང་དགོས་པའི་རེ་སྐུལ་གནང་བ་མ་ཟད། ཏོག་དབྱིབས་གཉེན་རིམས་ཁྱབ་གདལ་རྐྱེན་པས་འགྲུལ་བཞུད་སོགས་བཀག་སྡོམ་བྱས་དང་བྱེད་མུས་ཀྱི་ལས་དོན་ཁག་ལྷོད་ཡངས་རྗེས་ཡོ་རོབ་མཐུན་ཚོགས་དང་རྒྱ་ནག་དབར་འགྲོ་བ་མིའི་ཐོབ་ཐང་གི་བགྲོ་གླེང་དེ་རྒྱུན་ལྡན་བཞིན་འཚོགས་ཐུབ་པའི་རེ་བ་ཡོད་ཅེས་གསུངས་འདུག

དེང་སྐབས་དར་སྲོལ་ཆེན་པོ་ཡོད་པའི་ Zoom ཐད་གཏོང་གླེང་སྟེགས་བཟོ་ལས་ཁང་གིས་རྒྱ་ནག་གནམ་སྡེ་སྒོ་མོ་ཆེའི་གནད་དོན་དང་འབྲེལ་ཏེ་ Humanitarian China ཞེས་རྒྱ་ནག་འགྲོ་བ་མིའི་རང་དབང་འཐབ་རྩོད་ཚོགས་པའི་མིང་བྱང་སྒོ་བཀག་སྡོམ་བྱས་འདུགཉེ་ལམ་ཕྱི་ཟླ་ ༥ ཚེས་ ༣༡ ཉིན་ཨ་རིར་རྟེན་གཞི་བྱས་པའི་  Humanitarian China ཞེས་རྒྱ་ནག་འགྲོ་བ་མིའི་རང་དབང་འཐབ་རྩོད་ཚོགས་པས་ Zoom ཐད་གཏོང་གླེང་སྟེགས་བརྒྱུད་རྒྱ་ནག་གནམ་སྡེ་སྒོ་མོ་ཆེའི་དོན་རྐྱེན་བྱུང་ནས་ལོ་ངོ་ ༣༡ འཁོར་བའི་དུས་ཚིགས་དྲན་གསོ་དང་འབྲེལ་ཐད་སྟོང་གི་གླེང་མོལ་ལས་རིམ་ཞིག་གོ་སྒྲིག་གནང་ཡོད་སྟབས། ཛུམ་ཐད་གཏང་གླེང་སྟེགས་བཟོ་ལས་ཁང་གིས་རྒྱ་ནག་འགྲོ་བ་མིའི་རང་དབང་འཐབ་རྩོད་ཚོགས་པའི་ངོས་ནས་ Zoom ཐད་གཏོང་གླེང་སྟེགས་སྒོ་བྱང་ཉིན་ཤས་རིང་སྤྱོད་རྒྱུ་མེད་པ་བཟོས་འདུག རྩ་བའི་སྐབས་དེའི་ཐད་སྟོང་གླེང་མོལ་གྱི་ལས་རིམ་ཐོག་དེ་སྔ་རྒྱ་ནག་གནམ་སྡེ་སྒོ་མོ་ཆེའི་དོན་རྐྱེན་སྐབས་དངོས་སུ་ལས་འགུལ་ནང་ཞུགས་མྱོང་ཡོད་པ་རྒྱ་ནག་འགྲོ་བ་མིའི་རང་དབང་འཐབ་རྩོད་ཚོགས་པ་གསར་འཛུགས་གནང་མཁན་ Zhou Fengsuo ལགས་གཙོས་དོན་རྐྱེན་དེའི་ཁྲོད་ཚེ་སྲོག་ཤོར་བའི་སློབ་ཕྲུག་རྣམས་ཀྱི་ཨ་མ་ལགས། དེ་བཞིན་ཧོང་ཀོང་ནང་ཡོད་པའི་དྲུག་བཞི་དོན་རྐྱེན་རྗེས་དྲན་ཚོགས་པའི་སྐུ་ཚབ་སོགས་མི་སྣ་ ༢༥༠ ཙམ་ལྷན་ཞུགས་གནང་སྟེ་དུས་ཚིགས་དེ་དྲན་གསོ་ཞུས་པ་དང་ཆབས་ཅིག རྒྱ་ནག་གཞུང་གིས་དོན་རྐྱེན་དེའི་སྐོར་ཕྱི་གསལ་ནང་གསལ་བཟོ་དགོས་པ་སོགས་གླེང་ཡོད་པ་རེད།སྐུ་ཞབས་ Zhou ལགས་ཀྱིས་རྒྱལ་སྤྱིའི་བརྒྱུད་ལམ་ཁག་ཏུ་འགྲེལ་བརྗོད་གནང་གསལ་སྐབས་དེའི་ལས་རིམ་ཐོག་རྒྱ་ནག་ནང་ཡོད་པའི་འབྲེལ་ཡོད་མི་སྣ་མི་ཉུང་བ་ཞིག་གདན་ཞུ་གནང་ཡོད་ཀྱང་། Zoom ཐད་གཏོང་གླེང་སྟེགས་བཟོ་ལས་ཁང་གི་ངོས་ནས་ཁོང་རྣམ་པའི་གླེང་སྟེགས་ཀྱི་སྒོ་བྱང་སྤྱོད་རྒྱུ་མེད་པ་བཟོས་ཡོད་སྐོར་གསུངས་པ་དང་འདི་བཞིན་ཛུམ་ཐད་གཏོང་གླེང་སྟེགས་བཟོ་ལས་ཁང་གི་བྱེད་སྟངས་དེ་ནི་རྒྱ་ནག་གཞུང་དང་ལག་འབྲེལ་གྱིས་མི་མང་གི་བསམ་བློ་ལས་རྒྱ་ནག་གནམ་སྡེ་སྒོ་མོ་ཆེའི་དོན་རྐྱེན་དང་འབྲེལ་བའི་དྲན་ཤེས་རྣམས་མེད་པ་བཟོ་ཐབས་བྱེད་ཀྱི་ཡོད་པར་གསུངས་འདུག དེ་མཚུངས་སུ་ Pen America ཞེས་པའི་ཨ་རིའི་སྨྱུ་གུ་ཚོགས་པས་ Zoom ཐད་གཏོང་གླེང་སྟེགས་བཟོ་ལས་ཁང་ནས་ད་ལྟའི་ཛ་དྲག་དུས་སྐབས་འདིར་མི་མང་ཕན་ཚུན་དབར་འབྲེལ་ལམ་མཐུད་སའི་བརྒྱུད་ལམ་བཟང་པོ་ཞིག་ཆགས་ཐུབ་པ་དགོས་ཡོད་ཀྱང་། དོན་དངོས་ཐོག་བརྒྱུད་ལམ་འདི་རྒྱ་ནག་སྲིད་གཞུང་གི་ལས་དོན་སྒྲུབ་བཞིན་ཡོད་པར་སྐྱོན་བརྗོད་བྱས་ཡོད།ད་ཆ་བརྒྱུད་ལམ་ཁག་ཏུ་གནད་དོན་དེ་སྐོར་གླེང་སློང་ཆེན་པོ་གནང་བཞིན་ཡོད་སྟབས་ཁ་སང་ཛུམ་ཐད་གཏོང་གླེང་སྟེགས་བཟོ་ལས་ཁང་གིས་སྤྱི་བསྒྲགས་ཤིག་སྤེལ་ཏེ་རྒྱལ་སྤྱིའི་ཚོང་གི་སྒྲིག་ལམ། རྒྱལ་ཁབ་སོ་སོའི་ཁྲིམས་སྒྲིག་གཞིར་བཟུང་ Humanitarian China ཞེས་རྒྱ་ནག་འགྲོ་བ་མིའི་རང་དབང་འཐབ་རྩོད་ཚོགས་པ་དང་ཚོགས་ཞུགས་པ་ཁག་ཅིག་གིས་ཛུམ་གླེང་སྟེགས་མིང་བྱང་བཀག་སྡོམ་བྱས་ཡོད་པ་དང་ད་ཆར་ཨ་རིར་ཡོད་པའི་ཚོགས་པ་དེའི་མིང་བྱང་བསྐྱར་གསོ་བྱེད་ཀྱི་ཡོད་ཅེས་གསལ་བཤད་བྱས་འདུག རྩ་བའི་ Zoom ཐད་གཏོང་གླེང་སྟེགས་དེ་ཨ་རིར་ཡོད་པའི་རྒྱ་རིགས་  Eric Yuan ཀྱིེས་གསར་བཟོ་བྱས་པ་ཞིག་དང་། འདས་པའི་དུས་ཚོད་ནང་ཛུམ་གླེང་སྟེགས་ཐོག་གི་ལས་རིམ་ནང་རྒྱ་ནག་གི་གསང་མྱུལ་བྱེད་བཞིན་ཡོད་པར་ཐེར་འདོན་དང་། རྒྱལ་སྤྱིའི་ངོས་ནས་བཟོ་ལས་ཁང་དེར་སྐྱོན་བརྗོད་ཤུགས་ཆེ་བྱས་ཡོད་པ་མ་ཟད་ཐེ་ཝན་དང་འཇར་མ་ནི། དེ་བཞིན་ཨ་རིའི་གྲོས་ཚོགས་འཐུས་མི་རྣམས་ནས་དོགས་ཟོན་གནང་བ་དང་། ཆབས་ཅིག་ཏུ་ཛུམ་ཐད་གཏོང་གླེང་སྟེགས་དེ་ལས་ཁུངས་དང་གཞུང་འབྲེལ་ལས་དོན་སོགས་གནང་སྐབས་སྤྱོད་རྒྱུ་མིན་ཞེས་གསུངས་ཡོད་པ་རེད།

སུད་སི་ནང་ཁྱིམ་སྡོད་བཀའ་རྒྱ་ཡོངས་རྫོགས་གྲོལ་པའི་རྗེས་སུ་འདིར་གནས་སྡོད་བོད་མི་ཁྱིམ་ཚང་ལྔས་མ་སྐུལ་དང་བླངས་ཀྱིས་སྤེལ་བཞིན་ཡོད་པའི་རྒྱལ་ཚོགས་ལ་ཞུ་གཏུགས་དང་བོད་མིའི་སྐྱིད་སྡུག་མཉམ་མྱོང་ལས་འགུལ་མུ་མཐུད་རྒྱུན་སྐྱོང་གནང་འགོ་བཙུགས་སོང་། ལས་འགུལ་དེ་ཡང་ཕྱི་ལོ་༢༠༡༢ ཟླ་ ༡༢ ཚེས་ ༡༠རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་སུད་སི་གནས་སྡོད་བོད་མི་སྟག་ཚང་དཀོན་མཆོག་ལགས་དང་ལྷུན་གྲུབ་ཚང་ཀརྨ་བཀྲ་ཤིས་ལགས་བཅས་ཁྱིམ་ཚང་གཉིས་ཀྱིས་འགོ་བཙུགས་གནང་ཏེ།  ད་ལྟའི་ཆར་སྟག་ཚང་དཀོན་མཆོག་ལགས་ཀྱི་ཁྱིམ་ཚང་གཙོས་འདི་གར་གནས་སྡོད་མདུན་ཆུ་ཚེ་རིང་རྒྱལ་པོ་ལགས་དང། ངག་དབང་ཚང་ངག་དབང་དཔལ་ལྡན་ལགས། རྒྱལ་བ་ཚང་བཀྲིས་ལྷ་མོ་ལགས། དེ་བཞིན་ཡེ་ཤེས་ལྷ་མོ་ལགས་བཅས་བོད་མི་ཁྱིམ་ཚང་ལྔས། ལས་ཀ་དང་དུས་ཚོད། འགྲོ་གྲོན་སོགས་ལ་མ་ལྟོས་པར་འདི་ག་ཇི་ནི་ཝའི་རྒྱལ་ཚོགས་མདུན་ངོས་སུ་ཟླ་རེར་རེས་གཟའ་ལྷག་པ་གཉིས་པ་ནམ་ཡིན་ལ་རྒྱུན་མི་ཆད་པར་བོད་དོན་ཞུ་གཏུགས་ཀྱི་ལས་འགུལ་སྤེལ་བཞིན་ཡོད་ཀྱང་། ཕྱི་ཟླ་གསུམ་པར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་རྐྱེན་པས་ལས་འགུལ་རེ་ཞིག་མཚམས་འཇོག་གནང་དགོས་བྱུང་ཡོད་པ་རེད། འོན་ཀྱང་བདུན་ཕྲག་སྔོན་མ་ནས་བཟུང་སུད་སི་རྒྱལ་ཡོངས་ཁྱིམ་སྡོད་བཀའ་རྒྱ་ཡོངས་རྫོགས་གྲོལ་པའི་རྗེས། ཁོང་རྣམས་ནས་ཁ་སང་རེས་གཟའ་ལྷག་པའི་ཕྱི་ཚེས་༡༠ ཉིན་སུད་སི་གྲོང་ཁྱེར་ཇི་ནི་ཝའི་མཉམ་འབྲེལ་རྒྱལ་ཚོགས་ཀྱི་སྒྱུ་རྩལ་རང་བཞིན་ལྡན་པའི་རྐུབ་སྟེགས་རྐང་ཆག་གི་མདུན་ཐང་དུ་བོད་མིའི་སྐྱིད་སྡུག་མཉམ་མྱོང་གི་ལས་འགུལ་ཐེངས་ ༡༠༡ དེ་སྤེལ་གནང་སོང་།  སྐབས་དེར་ལས་འགུལ་དེའི་ནང་མཉམ་ཞུགས་གནང་མཁན་སྟག་ཚང་ཆོས་སྒྲོན་ལགས་ཀྱིས་ད་ཆ་རང་ཉིད་རང་དབང་ལུང་པའི་ནང་སླེབས་ཡིན་དུས་རང་དབང་གི་གོ་སྐབས་ལོངས་སུ་སྤྱོད་དེ་བོད་ཀྱི་གནད་དོན་ཐོག་ལས་དོན་སྒྲུབ་རྒྱུ་ནི་བོད་མི་ཞིག་ཡིན་པའི་འགན་འཁྲི་ཞིག་ལ་ངོས་འཛིན་བྱེད་ཀྱི་ཡོད་པ་འདི་ག་རླུང་འཕྲིན་ཁང་ལ་འགྲེལ་བརྗོད་གནང་ཡོད་པ་རེད། དེ་བཞིན་བོད་མིའི་སྐྱིད་སྡུག་མཉམ་མྱོང་གི་ལས་འགུལ་བ་རྣམས་ནས་རྒྱལ་ཚོགས་ནང་བཞག་པའི་བོད་དོན་གྲོས་ཆོད་ཁག་ལག་བསྟར་དོན་འཁྱོལ་དགོས་པ་དང་། བོད་མི་རང་ལུས་མེར་བསྲེགས་གནང་མཁན་རྣམ་པ་གཙོས་གཞི་བཞུགས་བོད་མིའི་མངོན་འདོད་རྒྱལ་སྤྱིའི་ཐོག་བརྒྱུད་བསྒྲགས་བྱ་རྒྱུ་དང་།  བོད་ཡུལ་འདི་སྔར་བཞིན་རང་དབང་ལྡན་པའི་ཞི་བདེ་བག་ཕེབས་ཀྱི་ཡུལ་ཞིག་ཏུ་བསྐྲུན་རྒྱུ། ༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་དབུས་པའི་བོད་མི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པའི་ཐོག་གློད་བཀྲོལ་དགོས་པ། བོད་མིའི་སྒྲིག་འཛུགས་དང་རྒྱ་གཞུང་དབར་ཐད་ཀར་ཞི་མོལ་འགོ་འཛུགས་ཀྱིས་བོད་ཀྱི་བདེན་དོན་གསལ་ཐབས་སོགས་དགོས་འདུན་དོན་ཚན་བརྒྱད་ཀྱི་ཐོག་ད་བར་ལས་འགུལ་སྤེལ་བཞིན་ཡོད་པ་རེད། དེ་ཡང་སྐབས་དེར་ལས་འགུལ་དེའི་ནང་མཉམ་ཞུགས་གནང་མཁན་ངག་དབང་དཔལ་ལྡན་ལགས་ཀྱི་འགྲེལ་བརྗོད་གནང་ཡོད་པ་རེད།ཡང་བོད་མིའི་ལས་འགུལ་འདིའི་ཐོག་རྒྱུན་དུ་རྒྱབ་སྐྱོར་མཚོན་ཆེད་དུ་མཉམ་ཞུགས་གནང་ནས་ཕེབས་མཁན་དགུང་གྲངས་༨༤ སོན་པའི་སུད་སི་མི་སེར་ཡིན་པའི་ཨ་མ་ Elizabeth ལགས་ཀྱིས་ང་ཕྱི་ལོ་༡༩༧༠ཙམ་ནས་བོད་ཀྱི་གནད་དོན་ཐོག་རྒྱབ་སྐྱོར་དང་ད་བར་བཙན་བྱོལ་ནང་དུ་བོད་ཕྲུག་ཧ་ཅང་མང་པོ་ཞིག་ལ་སྦྱིན་བདག་བྱེད་མྱོང་། ད་ཆ་ཁོང་ཚང་མ་ཆེན་པོ་ཆགས་ཚར་བ་རེད། བོད་ཀྱི་འཐབ་རྩོད་ནི་བདེན་པའི་འཐབ་རྩོད་ཅིག་རེད། རྒྱ་ནག་གི་བོད་མིའི་ཐོག་སྤེལ་བའི་བྱ་སྤྱོད་འདི་ཚོ་མི་སྤྱོད་ལས་འདས་པ་རེད། ད་བར་བོད་དོན་ལས་འགུལ་གང་དུ་སྤེལ་བ་ཡིན་ན་ང་རང་རྒྱབ་སྐྱོར་གྱིས་མཉམ་ཞུགས་བྱེད་ཀྱི་ཡོད།སྤྱིར་ལས་འགུལ་དེའི་ཁྲོད་ཁོང་རྣམས་ནས་ད་བར་བོད་ཕྱི་ནང་གཉིས་སུ་བོད་དོན་ཆེད་རང་ལུས་མེར་བསྲེགས་གནང་མཁན་རྣམ་པའི་འདྲ་པར་དང་འབོད་སྒྲ། ཞལ་ཆེམས། བོད་ནང་གི་དངོས་ཡོད་གནས་སྟངས་གསལ་བའི་ཤོག་བྱང། དེ་བཞིན་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་ལོ་རྒྱུས་རྒྱབ་ལྗོངས་སོགས་བོད་དོན་དང་འབྲེལ་བའི་ཡིག་ཆ་བཅས་རྒྱལ་ཚོགས་ཀྱི་མདུན་ཐང་དུ་གཤམས་ནས། དེའི་མཐའ་དཀྱིལ་དུ་བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་རྣམ་པ་མཚོན་ཆེད་དུ་བོད་ཀྱི་རྒྱལ་དར་ཆུང་ཆུང་གྲངས་༡༧༠ ལྷག་སྒྲེང་འཛུགས་དང་། གཞན་ཡང་རྒྱལ་ཚོགས་གཙོས་གྲོང་ཁྱེར་ཇི་ནི་ཝའི་མེ་འཁོར་དང་རླང་འཁོར་འབབ་ཚུགས་ཁག་ཏུ་ཆེད་བསྐྱོད་ཀྱིས་ཕྱི་ནང་གི་མང་ཚོགས་ཁྲོད་བོད་དོན་དྲིལ་བསྒྲགས་ཀྱི་ཡིག་ཆ་བགོ་འགྲེམས་སོགས་གནང་གི་འདུག  

རྒྱ་ནག་ནས་ཁྱབ་གདལ་སོང་བའི་ཏོག་དབྱིབས་རིམས་ནད་རྐྱེན་གྱིས་ད་ཆ་རྒྱལ་སྤྱིའི་ཁྱོན་ཡོངས་ལ་དཀའ་ངལ་དང་། ལྷག་པར་དུ་ཉེ་ཆར་རྒྱ་གར་འབྲས་ལྗོངས་དང་ལ་དྭགས་ཁུལ་དུ་ཆགས་པའི་རྒྱ་དཀར་ནག་གཉིས་ཀྱི་ས་མཚམས་ས་ཁུལ་དུ་རྩོད་རྙོག་ཆེན་པོ་འཕྲད་བཞིན་པའི་ཁྲོད་འདིར་རྒྱ་གར་ལ་དྭགས་ནས་ཡིན་པ་ཤེས་ཡོན་སློབ་གསོ་བ་དང་གསར་གཏོད་པ། དེ་བཞིན་ཁོར་ཡུལ་སྲུང་སྐྱོབ་ལས་འགུལ་བ་བསོད་ནམས་དབང་ཕྱུག་ལགས་ཀྱིས་ Boycott China ཞེས་རྒྱ་ནག་གི་དངོས་ཟོག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་རྒྱ་གར་མང་ཚོགས་ལ་འབོད་སྐུལ་གྱི་ལས་འགུལ་ཞིག་དབུ་འཛུགས་གནང་ཡོད་པ་རེད།རྩ་བའི་རྒྱ་ནག་གི་དངོས་ཟོག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་འདི་ནི་བཙན་བྱོལ་བོད་མིའི་རང་དབང་འཐབ་རྩོད་ཁྲོད་དེ་སྔ་སྤེལ་ཟིན་པའི་གནས་སྟངས་ཤིག་ཆགས་ཀྱི་ཡོད་ཀྱང་། ད་ཆ་བསོད་ནམས་དབང་ཕྱུག་ལགས་ཀྱིས་ལས་འགུལ་དེའི་འབོད་སྒྲ་དང་མེ་ལྕེ་སླར་གསོ་གནང་སྟེ་རྒྱ་གར་གཙོ་བོར་གྱུར་པའི་རྒྱལ་སྤྱིའི་མང་ཚོགས་རྣམས་ནས་ལས་འགུལ་འདིར་མཉམ་ཞུགས་གནང་དགོས་པའི་འབོད་སྐུལ་གནང་བཞིན་པ་ལྟར་ལས་འགུལ་དེ་དེང་སྐབས་རྒྱ་གར་མང་ཚོགས་ཁྲོད་ལ་ཚོར་ཤུགས་ཆེན་པོའི་ཐོག་ནས་ཁྱབ་འཕེལ་འགྲོ་བཞིན་པ་རེད། བསོད་ནམས་དབང་ཕྱུག་ལགས་སུ་རླུང་འཕྲིན་ཁང་གིས་ད་རེས་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་པའི་ལས་འགུལ་སྤེལ་བའི་རྒྱུ་མཚན་སོགས་དང་འབྲེལ་བའི་བཀའ་འདྲི་ཁག་ཅིག་ཞུས་ཡོད། ཐོག་མར་ངས་ད་རེས་བོད་སྐད་ཐོག་ནས་བཤད་མ་ཐུབ་པ་དེར་དགོངས་གསལ་ཞུ་རྒྱུ་དང་། མ་འོངས་པར་བོད་སྐད་ཐོག་ནས་ཞུ་རྒྱུར་འབད་བརྩོན་ཞུ་ཡི་ཡིན། ད་རེས་ཀྱི་ལས་འགུལ་འདི་རྒྱ་ནག་གིས་བོད་བཙན་འཛུལ་བྱས་པ་དང་དེ་ནས་རིམ་པས་ ༡༩༦༢ ནས་ད་བར་ལ་དྭགས་ཀྱི་ས་མཚམས་ས་ཁུལ་དུ་ཡང་ཡང་རྩོད་རྙོག་བླངས་ཏེ་རྒྱ་གར་མི་མང་རྣམས་ལ་སུན་པོ་བཟོས་པ་མ་ཟད་ལྷག་པར་ལ་དྭགས་ཡུལ་མི་དང་སྒོ་ཕྱུག་སེམས་ཅན་གསོ་སྐྱོང་ཐོག་འཚོ་བ་སྐྱེལ་བཞིན་པའི་མི་མང་གི་འཚོ་བར་དཀའ་ངལ་བསྟུད་མར་སྤྲོད་བཞིན་པ། དེ་བཞིན་རྒྱལ་སྤྱིའི་ཁྱོན་ཡོངས་སུ་ཏོག་དབྱིབས་རིམས་ནད་ཁྱབ་སྤེལ་བཏང་བའི་འགན་འཁུར་རྩ་བ་ནས་མ་འཁུར་བ་སོགས་ཀྱི་བྱ་སྤྱོད་ལ་གཞིགས་ཏེ་ད་རེས་རྒྱ་ནག་ལ་དཔལ་འབྱོར་གྱི་གྱོང་གུད་བཏང་ནས་གདོང་ལན་གནང་རྒྱུའི་ལས་འགུལ་འདི་དབུ་འཛུགས་གནང་བ་ཞིག་ཡིན་སྐོར་ངོ་སྤྲོད་གནང་སོང་བ་དང་ཆབས་ཅིག ལས་འགུལ་འདི་དང་ཐོག་རྒྱ་གར་མི་མང་ལ་འབོད་སྐུལ་ཞུས་ནས་དབུ་འཛུགས་གནང་རྒྱུ་དང་དེ་ནས་རིམས་པས་རྒྱལ་སྤྱིའི་སྡིངས་ཆའི་ཐོག་སྤེབས་ཏེ་རྒྱལ་སྤྱི་ཁྱོན་ཡོངས་ནས་རྒྱ་ནག་གྱི་དངོས་ཟོག་ཉོ་ཚོང་དང་བེད་སྤྱོད་གནང་རྒྱུ་མེད་པ་བཟོ་ཐབས་ཤིག་ཡིན་པ་སོགས་གསུངས་ཡོད།ཁོང་གིས་ལས་འགུལ་འདིར་རྐང་རྒྱ་གར་གྱི་མི་མང་རྣམས་ནས་ཆ་ཤས་བཞེས་དགོས་པའི་འབོད་སྐུལ་ཞུ་དགོས་དོན་ནི་མི་མང་གི་ལས་འགུལ་དེར་ཆ་ཤས་ཆེན་པོ་བཞེས་ཚེ་རིམ་པས་གཞུང་ལ་གནོན་ཤུགས་སྤྲོད་རྒྱུ་ལས་པོ་ཆགས་པ་མ་ཟད་གཞུང་གི་ངོས་ནས་ཀྱང་མི་མང་གི་མངོན་འདོད་དང་མཐུན་པས་སྲིད་བྱུས་གཏན་འབེབས་གནང་ངེས་ཡིན་སྟབས། ངའི་ལས་འགུལ་གྱི་ཐབས་བྱུས་དེ་གོང་མས་དམངས་ལ་བཀའ་བཏང་རྒྱུ་མིིན་པར་འོག་མའི་ནུས་སྟོབས་ཀྱིས་གཞུང་ལ་རང་དབང་མེད་པར་མཉམ་ཁྲིད་ཐུབ་པ་ཞུ་རྒྱུ་དེ་རེད་ཅེས་གསུངས་སོང་། དེ་བཞིན་བསོད་ནམས་དབང་ཕྱུག་ལགས་སུ་ Boycott China ཞེས་རྒྱ་ནག་གི་དངོས་ཟོག་ཉོ་ཚོང་བྱེད་རྒྱུ་མེད་ཅེས་པའི་ལས་འགུལ་འདི་བཙན་བྱོལ་བོད་མིའི་མང་ཚོགས་ནང་དེ་སྔ་ནས་སྤེལ་བཞིན་པའི་གནས་སྟངས་ལུང་འདྲེན་དང་སྦྲགས། ལས་འགུལ་འདི་ལྟ་བུ་སྤེལ་བ་བརྒྱུད་རྒྱ་ནག་གྱི་དཔལ་འབྱོར་ཐོག་དོན་དམ་པའི་དོ་ཕོག་གང་འདྲ་ཞིག་གཏང་ཐུབ་དམ་ཞེས་བཀའ་འདྲི་ཞུས་བོད་མིའི་ལས་འགུལ་དེ་དག་གི་མང་ཉུང་དང་ཆེ་ཆུང་ལ་མ་བལྟོས་པར་རྒྱ་ནག་གི་དཔལ་འབྱོར་ལ་དོ་ཕོག་བཏང་ཐུབ་ཡོད་པ་དེ་གསལ་པོ་རེད། འོན་ཀྱང་ད་ལྟའི་རྒྱ་ནག་གི་གནས་བབས་དེ་ལ་བོད་པ་གཅིག་པོ་དང་ཡང་ན་རྒྱ་གར་གཅིག་པོས་ལས་འགུལ་སྤེལ་བས་འདངས་ཀྱི་མ་རེད། ང་ཚོས་རྒྱལ་སྤྱིའི་མི་མང་དང་ད་ལྟ་ཚོར་བ་རྣོ་བའི་དུས་སྐབས་འདིར་རྒྱ་ནག་ལ་སྡང་ཟུག་ཆེན་པོ་བྱེད་བཞིན་པའི་རྒྱལ་ཁབ་ཁག་གི་མི་སེར་ལ་ Boycott China ཞེས་རྒྱ་ནག་གི་དངོས་ཟོག་ཉོ་ཚོང་བྱེད་རྒྱུ་མེད་ཅེས་པའི་ལས་འགུལ་འདིའི་ནང་མཉམ་ཞུགས་གནང་རོགས་ཞེས་འབོད་སྐུལ་ཞུ་དགོས་པ་དང་འདི་ནི་དུས་ཚོད་ཀྱི་ཆ་ནས་འོས་འཚམས་ཤིག་ཀྱང་རེད་ཅེས་གསུངས་ཡོད། ད་དུང་ལས་འགུལ་འདི་ནི་མི་མང་གི་རང་དབང་རྡོག་རོལ་བཏང་མཁན་རྒྱ་ནག་སྲིད་གཞུང་ལ་དམིགས་པ་ཞིག་ཡིན་སྟབས་སྲིད་གཞུང་དེའི་འོག་ཐད་ཀར་དཀའ་སྡུག་མྱོང་བཞིན་པའི་རྒྱ་རིགས་རྣམས་ལ་གདུང་སེམས་མཉམ་བསྐྱེད་དང་། ཁོང་རྣམ་པ་ཚོ་ལ་ཐེ་ཝེན་དང་སིངྒྷ་པུར་ལྟ་བུ་དབང་ཆ་གཅིག་བསྡུས་རིང་ལུགས་ཀྱི་གཞུང་འོག་ལ་མིན་པར་མང་གཙོ་དང་རང་དབང་ལྡན་པའི་གཞུང་འཛིན་འོག་ལ་དཔལ་འབྱོར་གྱི་གནས་བབས་ཚད་མཐོ་པོ་ཆགས་ཐུབ་རྒྱུ་ཡོད་པའི་རེ་བ་དང་ཡིད་ཆེས་དེ་བསྐྲུན་དགོས་པ་དང་། དེ་ལྟར་ཐུབ་ཚེ་རྒྱ་ནག་མི་མང་གི་ངོས་ནས་ཀྱང་རྒྱ་ནག་སྲིད་གཞུང་གི་བྱེད་སྟངས་ལ་མི་འདོད་པའི་འགྱུར་དང་ངོ་རྒོལ་གྱི་རྣམ་པ་ཆེ་རུ་འགྲོ་ངེས་རེད་ཅེས་གསུངས་སོང་།བསོད་ནམས་དབང་ཕྱུག་ལགས་སུ་དོན་ངོ་མའི་ཐོག་ལ་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་འདི་དངོས་སུ་ཡོང་སྲིད་པ་ཞིག་རེད་དམ་ཞེས་བཀའ་འདྲི་ཞུས་པར་དུས་ཚོད་གང་འཚམས་ཤིག་འགོར་སྲིད་ཀྱང་། ང་ཚོས་དང་ཐོག་དེར་བྱེད་ཐུབ་པ་དེ་ནི་རྒྱ་ནག་གྱི་མཉེན་ཆས་ཁག་སོ་སོའི་ལག་ཐོགས་ཁ་པར་ནས་ཕྱིར་འཐེན་བྱེད་རྒྱུ་དང་། རིམ་པས་དངོས་སུ་སྤྱི་ཚོགས་ནང་ཡོད་པའི་ཅ་ལག་ཁག་མེད་པ་བཟོ་ཚེ་དེ་ལྟར་རྩ་བ་མེད་པ་བཟོ་ཐུབ་རྒྱུ་ཡོད་པའི་ལས་འགུལ་ཞིག་ཡིན་པ་དང་། རྒྱ་གར་གྱི་ཁྲོམ་རའི་འཁོར་ཡུག་ཀྱང་མི་མང་གི་འདོད་མོས་ལ་གཞིགས་ཏེ་རང་བཞིན་གྱིས་འགྱུར་བ་འགྲོ་ངེས་རེད་ཅེས་གསུངས་སོང་། གཞི་རྩའི་བསོད་ནམས་དབང་ཕྱུག་ལགས་ནི་ལ་དྭགས་ཀྱི་ཡུལ་མི་ཞིག་དང་རང་ཉིད་ཀྱི་སློབ་སྦྱོང་ཁག་གནང་གྲུབ་མཚམས་ས་གནས་ཀྱི་སློབ་མ་དང་། ཞིང་པའི་བདེ་དོན། དེ་བཞིན་འཁོར་ཡུལ་སྲུང་སྐྱོབ་སོགས་ཀྱི་ཐོག་ཕྱག་ལས་སྣ་མང་གནང་ཡོད་པ་མ་ཟད། ཁོང་གི་ཕྱག་ལས་དེ་དག་ལ་རྒྱལ་སྤྱིའི་ཚོགས་སྡེ་འདྲ་མིན་ནས་ཆེ་བསྟོན་ཀྱི་གཟེངས་རྟགས་ཀྱང་ཕུལ་ཡོད་པ་རེད། ད་རེས་ཁོང་གིས་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་གྱི་འབོད་སྒྲ་སླར་གསོ་གནང་སྟེ་བདུན་ཕྲག་གཉིས་ཙམ་འགྲོ་བཞིན་པའི་ཁྲོད་དེར་རྒྱ་གར་གྱི་གློག་བརྙན་ཁྲབ་རྩེད་པ་དང་། ཤེས་ལྡན་མི། དེ་བཞིན་མང་ཚོགས་མང་དག་ཅིག་ནས་རྒྱབ་སྐྱོར་གྱིས་ལག་ཐོགས་ཁ་པར་ནས་རྒྱ་ནག་གི་མཉེན་ཆས་ཕྱིར་འཐེན་དང་། ཅ་ལག་བེད་སྤྱོད་མི་གནང་བའི་ཁས་ལེན་གནང་བཞིན་འདུག ལྷག་པར་དུ་བརྒྱུད་རིམ་འདིའི་ཁྲོད་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བོད་མིའི་རང་དབང་འཐབ་རྩོད་པ་ཁག་ཅིག་རྒྱ་གར་རྒྱལ་ཡོངས་ཀྱི་བརྙན་འཕྲིན་བགྲོ་གླེང་ལས་རིམ་ཁག་ཅིག་གི་ཐོག་ལྷན་ཞུགས་གནང་ཡོད་པ་དང་། སྲིད་སྐྱོང་མཆོག་གིས་ད་ཆ་རྒྱ་ནག་གིས་ས་མཚམས་ས་ཁུལ་ཁག་ཏུ་བཙན་འཛུལ་བྱེད་བཞིན་པ་དེ་ནི་དེ་སྔ་ལོ་ ༦༠ ལྷག་གི་གོང་ལ་བོད་ནང་ལག་བསྟར་བྱས་ཟིན་པ་ཞིག་ཡིན་སྟབས། རྒྱ་གར་གཙོས་པའི་ཉེ་འཁོར་ཁྱིམ་མཚེས་རྒྱལ་ཁབ་ཁག་ནས་བོད་ཀྱི་གནད་དོན་ཐོག་ནས་སློབ་གསོ་བླངས་དགོས་པ་དང་། ད་ཆ་རྒྱ་གར་ནང་ཚོར་ཤུགས་ཆེན་པོས་སྤེལ་བཞིན་པའི་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་ཐད་རྒྱ་གར་གཞུང་ནས་དེ་འབྲེལ་སྲིད་བྱུས་གཏན་འབེབས་སོགས་གནང་ཆོག་ཀྱང་། དང་ཐོག་དེར་རྒྱ་གར་གྱི་གློག་བརྙན་ཁྲབ་རྩེད་པ་སོགས་ སྙན་གྲགས་ཡོད་པའི་མི་སྣ་ཚོས་རྒྱ་ནག་གི་ཅ་ལག་ཁྱབ་བསྒྲགས་གནང་མཚམས་འཇོག་དགོས་པ་སོགས་གསུངས་ཡོད།མཐར་བསོད་ནམས་དབང་ཕྱུག་ལགས་ཀྱིས་ཐེངས་འདིའི་བཀའ་འདྲི་ལེ་ཚན་བརྒྱུད་དེ་བོད་མིའི་འཐབ་རྩོད་འདི་ནི་འཛམ་གླིང་ཐོག་དངོས་སུ་མཐོང་རྒྱུ་ཡོད་པའི་འཐབ་རྩོད་ངོ་མ་ཞིག་ཆགས་ཀྱི་ཡོད་པ་སྟབས། བོད་མི་རྣམས་ནས་སེམས་ཤུགས་མ་ཆག་པར་འཐབ་རྩོད་མུ་མཐུད་རྒྱུན་སྐྱོང་གནང་དགོས་པའི་སྐུལ་མ་གནང་བ་མ་ཟད། ད་ལྟའི་ཆར་རྒྱ་ནག་སྲིད་གཞུང་ལ་ངོམས་རྒྱུ་གཅིག་ཡོད་པ་དེ་ནི་དཔལ་འབྱོར་ཆགས་ཀྱི་ཡོད་པར་བརྟེན་བོད་མི་གཙོས་རྒྱལ་སྤྱིའི་མང་ཚོགས་ནས་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་པའི་ལས་འགུལ་འདི་ཁྱབ་སྤེལ་དང་ལག་བསྟར་ནན་པོ་གནང་ཐུབ་ཚེ་རྒྱ་ནག་ལ་འགྱུར་བ་ཞིག་གཏང་ཐུབ་ངེས་རེད་ཅེས་གསུངས་ཡོད།