Tibetan Royal Year of 2151 | Year of the Wood Dragon

གསར་འགྱུར།

རྒྱལ་ཚོགས་སུ་ཞུ་གཏུག་དང་ཞི་བའི་རྔམ་སྟོན་བརྒྱུད་བོད་དོན་ལས་འགུལ་མཇུག་སྒྲིལ།

བོད་མི་མིག་དམར་ལགས་ཀྱིས་གཙོས་པའི་སྦན་ནས་ཡིན་པ་པདྨ་ལགས། ཉེ་ཆར་བོད་དོན་གོམ་བགྲོད་ལས་འགུལ་སྣེ་ཁྲིད་གནང་མཁན་བློ་བཟང་ལགས། དེ་བཞིན་སྦར་སིལ་ནས་ཡིན་པ་བློ་བཟང་ལགས། བསོད་ནམས་ལགས་བཅས་བོད་མི་དང་བླངས་པ་ལྔས་ཟླ་ ༦ ཚེས་ ༤ ཉིན་ཛུག་ནས་རྒྱལ་སྤྱིའི་གཞུང་མང་ལ་རྒྱ་ནག་གི་ཏོག་དབྱིབས་གཉན་རིམས་རྐྱེན་པས་འཛམ་གླིང་ཀུན་ལ་དོ་ཕོག་བཏང་བའི་འགན་ཡོངས་རྫོགས་རྒྱ་གཞུང་ནས་འཁྱེར་དགོས་པ་བཟོ་རྒྱུ་གཙོས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་དང། ༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་ནང་གི་ཆབ་སྲིད་བཙོན་པ་གློད་བཀྲོལ། ༸གོང་ས་མཆོག་བོད་ལ་གདན་འདྲེན་ཞུ་དགོས་པ་བཅས་ཀྱི་དགོས་འདུན་དོན་ཚན་བཞི་ཅན་ཞིག་བརྒྱུད་བསྒྲགས་ཐོག་བོད་དོན་རྐང་འཁོར་སྐྱོད་ཀྱི་ལས་འགུལ་སྤེལ་ཡོད་ཅིང། ཁ་སང་ཕྱི་ཚེས་ ༧ ཉིན་རྐང་འཁོར་སྐོར་སྐྱོད་ཀྱི་ལས་འགུལ་བ་རྣམས་སྐོར་སྐྱོད་གནང་ཡུལ་ས་ཚིགས་མཐའ་མ་སུད་སིའི་གྲོང་ཁྱེར་ཇི་ནི་ཝར་བདེ་འབྱོར་དང་འབྲེལ་ཏེ་ལས་འགུལ་བ་རྣམས་ནས་ས་གནས་སུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་ངོས་སུ་ཞི་བའི་རྔམ་སྟོན་གནང་བ་དང་ཆབས་ཅིག ཐེངས་འདིའི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་མཇུག་སྒྲིལ་གནང་ཡོད་པ་རེད།སྐབས་དེར་རྒྱལ་ཚོགས་ཀྱི་མདུན་དུ་ཡོད་པའི་ལོ་རྒྱུས་རང་བཞིན་ལྡན་པའི་ཞབས་སྟེགས་ཞབས་ཆག་མདུན་དུ་བོད་དོན་ལས་འགུལ་བ་རྣམས་ནས་རྐང་འཁོར་བཞོན་བཞིན་བོད་དང་རྒྱ་གར། དེ་བཞིན་སུད་སི་བཅས་ཀྱི་རྒྱལ་དར་འཕྱར་ཞིང། རྒྱ་ནག་གཞུང་ནི་དྲག་སྤྱོད་པའི་གཞུང་ཡིན་པ་དང། ཏོག་དབྱིབས་གཉན་རིམས་ནི་རྒྱ་ནག་གིས་བཟོས་པ་ཞིག་རེད། རྒྱ་ནག་གི་ཚོང་ཟོག་ཉོ་ཚོང་མཚམས་འཇོག་དགོས། དེ་བཞིན་གཉན་རིམས་ཁྱབ་གདལ་གྱི་ནག་ཉེས་ཡོངས་རྫོགས་རྒྱ་གཞུང་ནས་ཁྱེར་དགོས། རྒྱལ་ཚོགས་གཉིད་སད་ཤོག བོད་མིར་དྲང་བདེན་དགོས་པ་སོགས་ཀྱི་ཞི་བའི་རྔན་སྟོན་གནང་སོང་།བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྣེ་ཁྲིད་གནང་མཁན་མིག་དམར་ཚེ་རིང་ལགས་ཀྱིས་ཉེ་ལམ་སུད་སི་གནས་སྡོད་བོད་མི་དབང་འདུས་ཚེ་རིང་ལགས་ཀྱིས་བོད་ཀྱི་རྒྱལ་དར་འཁྱེར་ནས་ཇི་ཝའི་རྒྱལ་ཚོགས་བར་ཞི་བའི་གོམ་བགྲོད་ཀྱི་ལས་འགུལ་སྤེལ་བ་ནས་བཟུང་བོད་ཀྱི་བདེན་པའི་འཐབ་རྩོད་ཀྱི་ལས་འགུལ་ལ་མར་མེ་ཞིག་སྤར་ཡོད་པ་དང། སུད་སིར་གནས་སྡོད་བོད་མི་ཚོས་ཁོང་གིས་སྤར་བའི་བོད་དོན་ལས་འགུལ་གྱི་མར་མེ་དེ་མུ་མཐུད་རྒྱུན་སྐྱོང་གནང་དགོས་ཞེས་འབོད་སྐུལ་གནང་སོང་།སྤྱིར་ཉིན་གྲངས་བཞིའི་རིང་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དེའི་ནང་བོད་མི་དང་བླངས་པ་མིག་དམར་ཚེ་རིང་ལགས་གཙོས་སྦན་ནས་ཡིན་པ་སྤེན་པ་ཚེ་རིང་ལགས། ཉེ་ཆར་བོད་དོན་གོམ་བགྲོད་ལས་འགུལ་སྣེ་ཁྲིད་གནང་མཁན་བློ་བཟང་ལགས། དེ་བཞིན་སྦར་སིལ་ནས་བློ་བཟང་ནོར་བུ་ལགས། བསོད་ནམས་རྣམ་རྒྱལ་ལགས་བཅས་ཀྱིས་སུད་སི་ས་གནས་ Zug ནས་དབུ་འཛུགས་ཀྱིས་ལུ་ཛན་དང། ཨརའོ།  སྦན། ཕྷིར་སྦུག ལའོ་ཛན། དེ་ནས་ཁ་སང་ཇི་ནི་ཝ་བཅས་སུད་སིའི་གྲོང་ཁྱེར་ཆེ་ཁག་དྲུག་ནང་བོད་དོན་རྐང་འཁོར་སྐོར་སྐྱོད་གནང་སྟེ་ས་གནས་གཞུང་མང་དག་ལ་བོད་ནང་གི་དངོས་ཡོད་གནས་སྟངས་དང་རྒྱ་གཞུང་གི་གདོང་རིགས་ངོ་མ་གསལ་འདོན་གྱི་ཡིག་ཆ་ཁག་ཅིག་འགྲེམས་སྤེལ་གནང་ཡོད་པ་རེད།ཁ་སང་ཁོང་རྣམས་ཇི་ནི་ཝའི་རྒྱལ་ཚོགས་མདུན་ངོས་སུ་འབྱོར་སྐབས་སུད་སི་སྐུ་ཚབ་དོན་གཅོད་གཙོས་ཇི་ནི་ཝའི་བོད་རིགས་ཚོགས་པའི་ཚོགས་གཙོ་དང་རྒྱུན་ལས་བཅས་ཀྱིས་ཕེབས་བསུའི་སྣེ་ལེན་ཞུས་པ་དང་། ཇི་ནི་ཝའི་ཚོགས་གཙོ་ཁྲོ་རྒྱལ་ལགས་ཀྱིས་ས་གནས་དང་སུད་སི་བོད་མི་རིགས་མི་མང། སུད་སི་ས་གནས་བེུད་ལྷན་ཚོགས་བཅས་ཀྱི་ཚབ་ཞུས་ནས་ཕེབས་བསུའི་མཇལ་དར་སྒྲོན་པ་དང་། སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ལས་འགུལ་བ་རྣམས་ཀྱི་སེམས་ཤུགས་དང་འགན་ཁུར་ལ་བསྔགས་བརྗོད་གནང་བ་དང་འབྲེལ། བོད་དོན་ཐོག་ཕྱི་མི་ནས་རྒྱབ་སྐྱོར་གནང་མཁན་ཡོད་ཀྱང་དོན་དངོས་ཐོག་བོད་མི་རང་ཉིད་མདུན་ལ་ཐོན་ནས་འགན་ཁུར་དགོས་གལ་ཡིན་སྐོར་གསུངས་སོང་།བོད་མི་ཚོས་རྒྱུན་དུ་སྤྱི་ཚོགས་ནང་ཐོབ་ཐང་དང་རང་དབང་གཅིག་པོ་མ་རྩོད་པར་བོད་མིར་ལས་འགན་གང་ཡོད་པ་དེ་དག་མཉམ་དུ་འཁུར་དགོས་པ་དང་། ལྷག་པར་དུ་བོད་པའི་གཞོན་སྐྱེས་ཚོས་བོད་ཀྱི་གནད་དོན་ཐོག་འགན་མ་འཁུར་བར་དེ་ལས་རང་ཉིད་ཀྱི་འཚོ་རྟེན་ཁོ་ནར་བསམ་བློ་བཏང་ནས་བཞུགས་ཚེ་སླད་མར་འགྱོད་པའི་གནས་སུ་ལྷུང་ངེས་ཡིན་པ་གསུངས་ཡོད།དེ་བཞིན་ཁ་སང་ལས་འགུལ་དེར་རྒྱབ་སྐྱོར་ཚུལ་དུ་ཕེབས་པ་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་དགུང་ལོ་ ༧༣ ལ་ཕེབས་པ་སུད་བོད་མཛའ་འབྲེལ་ཚོགས་པའི་ཚོགས་མི་པལ་ལ་སྦོ་ལོངཤ་ལགས་ཀྱིས་ངས་ཕྱི་ལོ་ ༡༩༧༠ ནས་བོད་དོན་ལ་རྒྱབ་སྐྱོར་ཞུ་འགོ་བཙུགས་པ་རེད། སྐབས་དེར་རྒྱ་ནག་གཞུང་གིས་བོད་ནང་གི་བོད་མིར་དྲང་བདེན་མེད་པར་མནར་གཅོད་ཚད་མེད་བཏང་བ་བཅས་མི་སྤྱོད་ལས་འདས་པའི་བྱ་སྤྱོད་ཁག་སེལ་བར་རྒྱབ་སྐྱོར་ཞུས་པ་ཡིན། ཕྱིས་སུ་ང་རང་ཆོས་ལུགས་དེ་བོད་བརྒྱུད་ནང་བསྟན་ལ་བརྗེ་བ་ཡིན། ད་ལྟའི་ཆར་ས་གནས་སུ་བོད་དོན་ལས་འགུལ་གང་འདྲ་ཞིག་སྤེལ་རུང་དེར་མཉམ་ཞུགས་གནང་བཞིན་ཡོད་སྐོར་སོགས་གསུངས་ཡོད། ཁ་སང་བོད་དོན་རྐང་འཁོར་སྐོར་སྐྱོད་ལས་འགུལ་བ་རྣམས་ནས་ལས་འགུལ་མཇུག་སྒྲིལ་དང་ལྷན་རྒྱ་ནག་གི་ཏོག་དབྱིབས་གཉན་རིམས་རྐྱེན་པས་འཛམ་གླིང་ཀུན་ལ་དོ་ཕོག་བཏང་བའི་འགན་ཡོངས་རྫོགས་རྒྱ་གཞུང་ནས་ཁྱེར་དགོས་པ་གཙོས་དགོས་འདུན་དོན་ཚན་བཞི་ཅན་ཞུ་སྙན་ཞིག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་མཆོག་གི་མཚན་ཐོག་ཏུ་སུད་སི་དོན་ཁང་བརྒྱུད་ཕུལ་ཡོད་པ་རེད། སྤྱིར་སུད་སི་ནང་རྒྱལ་ཡོངས་སུ་ཁྱིམ་སྡོད་བཀའ་རྒྱ་ལྷོད་ཡངས་བཏང་རྗེས་ཐོག་མར་སུད་སི་གནས་སྡོད་བོད་མི་ཚེ་རིང་དབང་འདུས་ལགས་ཀྱིས་བོད་དོན་ལས་འགུལ་དབུ་འཛུགས་གནང་བ་དང་། དེ་རྗེས་ཉེ་ཆར་བོད་མི་བློ་བཟང་ལགས་ཀྱིས་སྣེ་ཁྲིད་འོག་བོད་དོན་གོམ་བགྲོད་ཀྱི་ལས་འགུལ་སྤེལ་ཡོད་པ་མ་ཟད། དེ་བཞིན་སླར་ཡང་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་བཅས་བོད་མི་སྒེར་ནས་སྤེལ་བའི་བོད་དོན་ལས་འགུལ་ཐེངས་གསུམ་པ་དེ་ཆགས་ཀྱི་ཡོད་པ་རེད།

༸གོང་ས་མཆོག་གིས་ཐུགས་དགྱེས་ཚོར་ཆེན་པོས་འཚམས་འདྲི་ཞུ་མཁན་ཡོངས་ལ་ཐུགས་རྗེ་ཆེ་ཞུའི་གསུང་འཕྲིན་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་ཟླ་ ༧ ཚེས་ ༦ ཉིན་མགོན་པོ་༸གང་ཉིད་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ཉིན་མོར་འཛམ་གླིང་ས་ཕྱོགས་གང་ས་ནས་ཕྱི་ནང་གི་དད་ལྡན་མང་ཚོགས་དུ་མས་དགའ་དད་སྤྲོ་གསུམ་འཁོལ་བའི་ངང་ནས་མགོན་པོ་༸གང་ཉིད་མཆོག་ལ་དགའ་བསུའི་འཚམས་འདྲི་ཞུས་པར་བརྟེན་དེ་རིང་ཕྱི་ཚེས་ ༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་དགྱེས་ཚོར་ཆེན་པོས་འཚམས་འདྲི་ཞུ་མཁན་ཡོངས་ལ་ཐུགས་རྗེ་ཆེ་ཞུའི་གསུང་འཕྲིན་ཞིག་བསྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་དེའི་ནང་བརྩེ་བའི་མཆེད་གྲོགས་ཕོ་མོ་ལྷན་རྒྱས་ལ། ཁྱེད་རྣམས་ཀྱིས་ངོས་བགྲང་བྱ་ ༨༥ འཁོར་བའི་སྐྱེས་སྐར་གྱི་དུས་དྲན་ལ་འཚམས་འདྲི་གནང་བ་དང་། དེ་བཞིན་ཉིན་དེར་འཛམ་གླིང་གི་ས་གནས་གང་ས་ནས་དུས་དྲན་སྲུང་བརྩི་གནང་མཁན་ཡོངས་ལ་ཐུགས་རྗེ་ཆེ་ཞེས་ཞུ་རྒྱུ་དང་། ཁྱེད་རྣམས་ཀྱི་བརྩེ་སེམས་ཀྱིས་ངོས་ལ་སེམས་འགུལ་ཆེན་པོ་ཐེབས་བྱུང་། ངོས་རང་བདེ་ཐང་ངང་གནས་ཡོད་ལ། འགྲོ་བ་མིའི་བདེ་དོན་ཆེད་མི་ཚེ་རིང་ཙམ་འཚོ་ཐུབ་པའི་བློའི་འཕེན་པ་གཏོང་བཞིན་ཡོད། དེང་སྐབས་རང་རེ་འཚོ་སྡོད་བྱ་སའི་འཛམ་བུ་གླིང་འདིའི་ནང་། རྒྱལ་ཁབ་རྣམས་སྔར་ལས་ལྷག་པར་ཕན་ཚུན་ལྟོས་ཏེ་ཡོད་པས། གཞན་ལ་ལྟོས་མེད་རང་རྐྱ་འཕེར་བའི་ངོ་བོར་གནས་མི་ཐུབ་པས། འགྲོ་བ་མི་གཅིག་གྱུར་གྱི་འདུ་ཤེས་སྔར་ལྷག་གོང་འཕེལ་གཏོང་དགོས་ལ། རང་བདེ་བ་འདོད་ཅིང་སྡུག་བསྔལ་མི་འདོད་པ་ལྟར་གཞན་ཡང་དེ་དང་མཚུངས་པ་ཡིན། ད་ལྟ་འཕྲད་བཞིན་པའི་གནམ་གཤིས་འགྱུར་ལྡོག་དང་། ནད་ཡམས་སོགས་ཀྱི་དཀའ་ངལ་ཐད་རང་ཅག་ཚང་མས་མཉམ་རུབ་ཀྱིས་འབད་བརྩོན་བྱས་ན་ཐུན་མོང་གི་མངོན་འདོད་ཞི་བདེ་དང་བྱམས་བརྩེ་ལྡན་པའི་འཛམ་གླིང་ཞིག་བསྐྲུན་ཐུབ་པའི་དྲན་སྐུལ་བྱེད་ཀྱི་ཡོད། འཚམས་འདྲི་དང་སྐྱབས་སྨོན་བཅས་ཏཱ་ལའི་བླ་མས་ཕྱི་ལོ་ ༢༠༢༠ ཟླ་ ༧ ཚེས་ ༧ ལ་ཞེས་འཚམས་འདྲི་ཞུ་མཁན་ཡོངས་ལ་ཐུགས་རྗེ་ཆེ་ཞུའི་གསུང་འཕྲིན་ཞིག་བསྩལ་འདུག

བོད་མིའི་སྒྲིག་འཛུགས་གཙོས་བོད་མི་ཚོས་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་པ།

ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ཉིན་མོར་བོད་མིའི་སྒྲིག་འཛུགས་དབུས་བཙན་བྱོལ་བོད་མིའི་ཚོགས་སྒེར་ཚོས་ལྷ་བསངས་དང་མ་ཎི་གསོག་སྒྲུབ། དེ་བཞིན་རྐང་བྲོ་གླུ་གཞས་བཅས་ཀྱི་དཔལ་ལ་རོལ་བཞིན་དགའ་དད་སྤྲོ་གསུམ་གྱི་ངང་ནས་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་འདུགདེང་སྐབས་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་མང་ཚོགས་ཕོན་ཆེན་འདུ་འཛོམས་ཀྱིས་མཛད་སྒོ་རིགས་གཉེར་མི་ཆོག་པ་ལྟར། ཁ་སང་སྔ་དྲོ་བོད་མིའི་སྒྲིག་འཛུག་ཀྱི་ཚོགས་ཁང་གསར་པར་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཁོ་ན་ལྷན་འཛོམས་ཐོག་བོད་གཞུང་ཟློས་གར་ཚོགས་པས་ཆོལ་གསུམ་ཐུན་མོང་མ་ཡིན་པའི་རྐང་བྲོ་གླུ་གཞས་ཁག་ཅིག་གཟིགས་འབུལ་དང་། དེ་བཞིན་བོད་ཀྱི་ཆོས་བརྒྱུད་ཁག་གི་བླ་ཆེན་དབུ་ཁྲིད་དང་སྐུ་ཚབ་བཅས་ནས་བརྙན་པར་བརྒྱུད་གསུང་འཕྲིན་བསྩལ་བ། རྒྱ་གར་དུ་ཡོད་པའི་ཨ་རིའི་གཞུང་ཚབ་མི་སྣས་གཙོས་པའི་རྒྱལ་ཁབ་འདྲ་མིན་གྱི་གནད་ཡོད་མི་སྣ་ལས་ཟུར་འདྲ་མིན་གྱིས་༸གོང་ས་མཆོག་ལ་དྲྭ་ཐོག་བརྒྱུད་འཚམས་འདྲི་ཞུས་པའི་བརྙན་པར་ཁག་གཟིགས་འབུལ་ཐོག་༸སྐུའི་འཁྲུངས་སྐར་ཉིན་མོ་དེ་སྲུང་བརྩི་གཟབ་རྒྱས་ཞུས་འདུགསྐབས་དེར་སྲིད་སྐྱོང་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་ཆེད་ཐུགས་འགན་བཞེས་པ་ནས་བཟུང་ད་ཆ་དགུང་གྲངས་ ༨༥ ལ་མ་ཕེབས་བར་དུ་བོད་གཞིས་བྱེས་གཉིས་ཀྱི་བོད་མི་ཡོངས་ལ་སོ་སོའི་ཕ་མ་ལྟ་བུའི་གཟིགས་སྐྱོང་གནང་བ་དང་སྒོས་སུ་འཛམ་བུ་གླིང་ཡོངས་ལ་ཞི་བདེ་དང་བྱམས་བརྩེ་གོང་འཕེལ་མཛད་ཁག་གི་མཛད་འཕྲིན་ཁག་དྲན་གསོ་དང་དེ་དག་ལ་འཛམ་གླིང་ཁྱོན་ཡོངས་ནས་བསྔགས་བརྗོད་དང་དགའ་བསུ་ཞུ་བཞིན་ཡོད་པ་དང་། འདི་ལོ་བོད་མིའི་སྒྲིག་འཛུགས་ཀྱིས་ལོ་འཁོར་མོ་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་མུས་ལྟར། བོད་མི་རྣམས་ནས་མགོན་པོ་མཆོག་གི་བཀའ་དྲིིན་མ་བརྗེད་པར་༸གོང་ས་མཆོག་གི་བཀའ་སློབ་ཁག་ཉམས་ལེན་གནང་དགོས་པ་དང་། མགོན་པོ་༸གང་ཉིད་མཆོག་གི་ཐུགས་བསྐྱེད་ཆེན་པོ་བཞི་པོ་དེ་དག་གང་ཡིན་དང་དགོས་དམིགས་སོགས་གོ་ལ་ཁྱོན་ལ་ཁྱབ་ཐུབ་པ་གནང་གནད་ཡིན་པར་སྐུལ་མ་གནང་ཡོད།དེ་རྗེས་སྲིད་སྐྱོང་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་གིས་༸སྐུ་ཚེ་ཧྲིལ་པོའི་མཛད་པ་འཕྲིན་ལས་རྣམས་དྲན་གསོ་དང་འབྲེལ་བོད་མི་སྤྱི་བོ་གནམ་བསྟན་ཡོངས་ནས་༸རྒྱལ་བའི་བཀའ་དྲིན་དྲན་པའི་ཐོག་ནས་༸གོང་ས་མཆོག་གི་བཀའ་དགོངས་བཞིན་ཕྱག་ལས་གནང་ཡིན་པ་དང་། ད་རེས་ཀྱི་གོ་སྐབས་འདི་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཛམ་གླིང་སྤྱིར་སྨན་པའི་རླབས་ཆེན་གྱི་དགོངས་གཞི་དེ་དག་བསྒྲུབ་ཐབས་སུ་ཁ་ཞེ་གཉིས་མེད་ཀྱིས་རྒྱབ་སྐྱོར་དང་། མཐུན་འགྱུར་གནང་མཁན་བཅས་དང་། བོད་དོན་ལ་རྒྱ་གར་དབུས་ས་གཉིས་ཀྱིས་གཙོས་པའི་རྒྱབ་སྐྱོར་གནང་མཁན་རྒྱལ་ཁབ་དང་། གྲོས་ཚོགས། ཚོགས་སྒེར་ཡོངས་ལ་བོད་མིའི་སྒྲིག་འཛུགས་ཀྱི་ངོས་ནས་ཐུགས་རྗེ་ཆེ་ཞུས་འདུགདེ་བཞིན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་༸སྐུའི་འཁྲུངས་སྐར་ཉིན་སྤྱི་འཐུས་ལྷན་ཚོགས་ཀྱི་གསུང་འཕྲིན་ལྗགས་ཀློག་གནང་བའི་ནང་༸གོང་ས་མཆོག་གི་མཛད་པ་འཕྲིན་ལས་རྣམས་ཞིབ་རྒྱས་སུ་ངོ་སྤྲོད་གནང་བ་དང་འབྲེལ། མགོན་པོ་མཆོག་གིས་ལམ་སྟོན་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་འོག་དེང་སྐབས་འཛམ་གླིང་རྒྱལ་ཁབ་མང་པོའི་སྲིད་གཞུང་གཙོས་སྤྱི་སྒེར་ཡོངས་ནས་བོད་དོན་ལ་རྒྱབ་སྐྱོར་གང་ལེགས་ཐོབ་བཞིན་པ་མ་ཟད། རྒྱ་ནག་ནང་གི་ཤེས་ཡོན་ཅན་གྱི་མི་སྣ་མང་པོས་ཀྱང་དགའ་མོས་གནང་སྟེ་རྒྱབ་སྐྱོར་ཐོབ་དང་ཐོབ་བཞིན་ཡོད་པ་སོགས་གསུངས་སོང་། མགོན་པོ་༸གང་ཉིད་མཆོག་གི་བསྩལ་བའི་གལ་ཆེའི་བཀའ་སློབ་རིམ་ཕེབས་ཁོངས་ནས་ཁག་གཉིས་ལུང་འདྲེན་གནང་བའི་ཐོག་མང་ཚོགས་ལ་གཞེན་སྐུལ་གནང་སོང་།ཁ་སང་༸སྐུའི་འཁྲུངས་སྐར་གྱི་མཛད་སྒོ་དང་བསྟུན་ཕྱི་དྲིལ་ལས་ཁུངས་ནས་༸རྒྱལ་བའི་བཀའ་དྲིན་རྗེས་དྲན་གྱི་ལས་གཞི་དང་འབྲེལ་ཕྱོགས་བསྒྲིགས་ཞུས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལུང་ཚིག་ Quotation གྲངས་ ༡༡༣ གྱི་དཔེ་དེབ་ཅིག་དབུ་འབྱེད་དང་། བོད་མིའི་སྒྲིག་འཛུགས་ཀྱི་སྲི་ཞུ་བ་ལས་བྱེད་ལས་རྒྱུན་ཞབས་ལོ་ ༢༥ ཧྲིལ་པོ་ལོན་པའི་ལས་བྱེད་རྒན་གྲས་གྲངས་ ༣ ལ་ལས་བྱེད་འདེམས་ལྷན་ནས་ལེགས་གསོའི་གཟེངས་རྟགས་ཕྱག་འཁྱེར་གནང་བ་དང་། ད་བཞིན་བོད་མིའི་སྒྲིག་འཛུགས་ཀྱི་སྲིད་ཞུའི་ལས་བྱེད་ཁོངས་དམིགས་གསལ་ཧུར་བརྩོན་དང་གཟེངས་སུ་ཐོན་པའི་ཕྱག་ལས་གནང་མཁན་ལས་བྱེད་གཉིས་ལ་གཟེངས་རྟགས་སོགས་གནང་ཡོད་པ་རེད།ཁ་སང་དང་ཁ་ཉིན་བཅས་ལ་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཀྱི་གནས་སྟངས་ལ་ལྟོས་མེད་འཛམ་གླིང་ཡུལ་གྲུ་གང་སར་ཡོད་པའི་བཙན་བྱོལ་བོད་མི་རྣམས་ནས་༸སྐུའི་འཁྲུངས་སྐར་ལ་དགའ་བསུའི་འཚམས་འདྲིའི་བརྙན་པར་འདོན་སྤེལ་དང་། ༸གོང་ས་མཆོག་ལ་དབྱངས་ཀྱི་བསྟོད་གླུ་ཕུལ་བ། དེ་བཞིན་རོལ་དབྱངས་འདུ་འཛོམས་ལ་སོགས་པའི་རྣམ་པ་འདྲ་མིན་བརྒྱུད་དེ་ཉིན་མོ་དེ་སྲུང་བརྩི་ཞུས་པ་མ་ཟད། སྤྱི་ཚོགས་རྒྱང་ཐག་དང་ཁ་རས་གྱོན་རྒྱུ་དང་ལག་པ་གཙང་ཉར་སོགས་ཡིད་ཟབ་གནང་ཐོག་བཙན་བྱོལ་བོད་མིའི་གནས་སྡོད་གང་སར་མངར་ཟས་བགོ་འགྲེམས་དང་། དབུལ་པོར་ཟས་སྦྱིན། ཤིང་སྣ་འདེབས་འཛུགས་ལ་སོགས་པའི་གནང་སྒོ་སྤེལ་ནས་༸སྐུའི་འཁྲུངས་སྐར་ཉིན་མོ་སྲུང་བརྩི་གཟབ་རྒྱས་ཞུས་ཡོད་པ་རེད། འབྲེལ་ཡོད་པར་ཁག་བོད་མིའི་སྒྲིག་འཛུགས།

རྒྱལ་སྤྱིའི་གནད་ཡོད་མི་སྣ་མང་པོས་༸གོངས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་པ།

ཁ་སང་ཕྱི་ཚེས་ ༦ ཉིན་བོད་མི་གཙོས་ནང་པ་དང་རྒྱལ་སྤྱིའི་མང་ཚོགས་དུ་མས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་དུས་ཆེན་ཉིན་མོ་སྲུང་བརྩི་གཟབ་རྒྱས་ཞུས་ཡོད་པ་ལྟར། ཨ་རི་དང་རྒྱ་གར་གཙོས་རྒྱལ་སྤྱིའི་རྒྱལ་ཁབ་འདྲ་མིན་གྱི་གནད་ཡོད་མི་སྣ་མང་དག་ཅིག་ནས་སྤྱི་ཚོགས་དྲྭ་ལམ་བརྒྱུད་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་དུས་ཆེན་ལ་དགའ་བསུའི་འཚམས་འདྲི་ཞུས་འདུགཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་༸སྐུའི་འཁྲུངས་སྐར་ཉིན་མོར་བསྒྲགས་གཏན་ཞིག་སྤེལ་ཏེ་༸གོང་ས་མཆོག་ནི་འཛམ་གླིང་འདིའི་ཐོག་བྱམས་སྙིང་རྗེ་དང་འགྲོ་བ་མིའི་བཟང་སྤྱོད་ཀྱི་རིན་ཐང་། དེ་བཞིན་ཆོས་ལུགས་མཐུན་འབྲེལ། འགྲོ་བ་མིའི་ཐོབ་ཐང་། ལྷག་དོན་བོད་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་སྲུང་སྐྱོབ་གོང་འཕེལ་ཐོག་༸སྐུ་ལས་སྐྱོན་མཁན་གྱི་ཆོས་ཕྱོགས་དབུ་ཁྲིད་བླ་ན་མེད་པ་ཞིག་རེད་ཅེས་གསུངས་པ་དང་ཆབས་ཅིག མགོན་པོ༸་གང་ཉིད་མཆོག་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ལ་དགའ་བསུའི་འཚམས་འདྲི་ཞུས་འདུགལྕམ་སྐུ་མཆོག་ནས་ད་དུང་རྒྱ་ནག་སྲིད་གཞུང་གི་དྲག་པོའི་སྲིད་བྱུས་རྐྱེན་གྱིས་ད་ལྟ་ཡང་༸གོང་ས་མཆོག་གིས་དབུས་པའི་བོད་མི་རྣམས་ཀྱི་མངོན་འདོད་ཁག་ཅིག་བསྒྲུབ་ཐུབ་མེད་པར་གདུང་སེམས་མཉམ་བསྐྱེད་དང་སྦྲགས། ཨ་རིའི་ངོས་ནས་དུས་དང་རྣམ་པ་ཀུན་ཏུ་རྒྱ་གཞུང་གི་དྲག་གནོན་ལ་ངོ་རྒོལ་དང་བོད་མི་གཙོས་ཡུ་གུར་དང་ཧོང་ཀོང་སོགས་རྒྱ་གཞུང་གི་དྲག་པོའི་སྲིད་བྱུས་འོག་དཀའ་སྡུག་མྱོང་བཞིན་པ་རྣམས་ལ་རྒྱབ་སྐྱོར་ཡོད་པ་དང་། ལྷག་པར་དུ་འདས་པའི་དུས་ཚོད་ནང་ཨ་རིའི་གྲོས་ཚོགས་འོག་མར་ཚད་མཐོའི་མང་མོས་ཐོག་གཏན་འབེབས་གནང་བའི་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་ཨ་རིའི་གྲོས་ཚོགས་གོང་མས་གང་མགྱོགས་གཏན་འབེབས་གནང་དགོས་པའི་སྐུལ་མ་སོགས་གནང་འདུགདེ་བཞིན་བལ་ཡུལ་ནང་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Randy Berry ལགས་ནས་ Twitter ཐོག་༸སྐུའི་འཁྲུངས་ལ་འཚམས་འདྲི་ཞུས་འདུག་པ་དང་། ལྷག་པར་དུ་རྒྱལ་ས་ལྡི་ལིར་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Kenneth Juster ལགས་ཀྱིས་ཨ་རི་སྲིད་གཞུང་དང་མི་མང་ཡོངས་ཀྱི་ངོ་ཚབ་ཞུས་ཏེ་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་ལ་འཚམས་འདྲི་དང་སྦྲགས། ༸གོངས་མཆོག་གིས་འཛམས་གྱི་མི་སེར་མང་པོ་བཟང་ཕྱོགས་སུ་སེམས་འགུལ་སྤེལ་ཡོད་པ་མ་ཟད་མགོན་པོ་མཆོག་ནི་འཚེ་མེད་ཞི་བ་དང་དྲང་བདེན་གྱི་བདག་ཉིན་ཆེན་པོ་ཡོན་པར་མངོན་བསྟོད་ཞུས་ཡོད། ཁོང་ནས་ཨ་རིའི་སྲིད་འཛིན་དམ་པ་སྐུ་ཞབས་ Franklin Roosevelt ལགས་ཀྱིས་༸གོང་ས་མཆོག་ལ་ཕྱག་ཚོད་ཅིག་ཕུལ་བ་སོགས་ཕྱོགས་གཉིས་ཀྱི་མཛའ་གྲོགས་དྲན་གསོ་ཞུས་པ་དང་འབྲེལ། སྐབས་དེ་ནས་བཟུང་སྟེ་ཨ་རིའི་སྲིད་འཛིན་རིམ་བྱོན་དང་ཆབ་སྲིད་ཚོགས་པ་གཉིས་ཀས་༸གོང་ས་མཆོག་ལ་ཆེ་བསྟོན་གཟེངས་རྟགས་ཕུབ་བ། བོད་མིའི་རིག་གཞུང་སྲུང་སྐྱོབ་དང་འཐབ་རྩོད་ལ་རྒྱབ་སྐྱོར་གནང་བཞིན་པ་སོགས་ངོ་སྤྲོད་ཞུས་པ་མ་ཟད་ཁྱད་པར་དུ་མགོན་པོ་༸གང་ཉིད་མཆོག་ནི་ཞི་བདེའི་མཚོན་དོན་ངོ་མ་ཞིག་ཡིན་པ་སོགས་གསུངས་འདུགཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་ཀྱིས་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་དང་མགོན་པོ་མཆོག་གི་མཛད་རྗེས་ལ་ཆེ་བསྟོན་ཞུས་འདུག་ལ། ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ Arif Virani ལགས་ནས་༸གོང་ས་མཆོག་༸སྐུ་ཚེ་བརྟན་ཅིང་མ་འོངས་པར་ཕོ་བྲང་པོ་ཏ་ལར་༸སྐུའི་འཁྲུངས་སྐར་སྲུང་བརྩི་ཞུ་ཐུབ་རྒྱུའི་རེ་སྨོན་ཞུ་བཞིན་ཡོད་པ་མ་ཟད། མགོན་པོ་མཆོག་ནས་འཛམ་གླིང་འདིར་ཞི་བདེ་དང་བྱམས་རྩེའི་སློབ་གསོ་གང་མང་གནང་བར་བཀའ་དྲིན་ཆེ་ཞེས་གསུངས་འདུག དེ་བཞིན་རྒྱ་གར་ནང་ལ་མཚོན་ན་རྒྱ་གར་གཞུང་འཛིན་ཚོགས་པ་ BJP རྒྱལ་ཡོངས་དྲུང་ཆེ་སྐུ་ཞབས་ Ram Madhav  ལགས་ནས་༸སྐུའི་འཁྲུངས་སྐར་ལ་འཚམས་འདྲི་དང་ལོ་ངོ་ ༦༡ གོང་ལ་༸གོང་ས་མཆོག་བཙན་བྱོལ་བའི་ངོ་བོ་ཐོག་རྒྱ་གར་ནང་ཕེབས་ཡོད་ཀྱང་། ད་ཆ་༸གོང་ས་མཆོག་ནི་རྒྱ་གར་གྱི་ཡུལ་མི་ཚང་མའི་ནང་ནས་མི་རྒན་པ་ཞིག་ཏུ་ངོས་འཛིན་ཞུ་བཞིན་ཡོད་ཅེས་གསུངས་འདུག་པ་དང་། ཁོང་དེ་སྔ་༸གོང་ས་མཆོག་གི་འཁྲུངས་གཞི་སྟག་འཚེར་དང་ཕོ་བྲང་པོ་ཏ་ལ་གཉིས་སུ་ཕེབས་སྐབས་ས་གནས་བོད་མི་ཚོས་མགོན་པོ་མཆོག་ལ་དད་གུས་ཆེན་པོ་ཞུ་བཞིན་སོགས་ངོ་སྤྲོད་གནང་འདུག དེ་བཞིན་རྒྱ་གར་རྩེད་རིགས་བློན་ཆེན་སྐུ་ཞབས་ Kiren Rijiju ལགས་ནས་ཀྱང་འཚམས་འདྲི་དང་སྦྲགས་མགོན་པོ་༸གང་ཉིད་མཆོག་༸སྐུ་ཚེ་བསྐལ་བརྒྱར་བརྟན་པའི་སྨོན་ལམ་ཞུས་འདུག་པ་དང་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་ལགས་ཀྱིས་༸སྐུའི་འཁྲུངས་ལ་འཚམས་འདྲི་དང་ས་གནས་སུ་༸སྐུའི་འཁྲུངས་སྐར་དང་བསྟུན་ཤིང་སྣ་འདེབས་འཛུགས་ཀྱི་ལས་འགུལ་སྤེལ་འདུགཐེངས་འདིའི་༸སྐུའི་འཁྲུངས་དུས་ཆེན་དང་བསྟུན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ Shanta Kumar ལགས་དང་གྲོས་ཚོགས་འཐུས་མི་སྐུ་ཞབས་ Kishan Kapoor ལགས་ནས་རྒྱ་གར་དབུས་གཞུང་ནས་༸གོང་ས་མཆོག་ལ་རྒྱ་གར་གྱི་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་དགོན་འདུན་ཆེད་འདོན་གནང་འདུག དེ་བཞིན་ཁ་སང་༸སྐུའི་འཁྲུངས་སྐར་དང་བསྟུན་མགོན་པོ་༸གང་ཉིད་མཆོག་གི་མཚན་སྔགས་དང་ཐུགས་སྨོན་ལས་གྲུབ་པའི་  Inner World འམ་ནང་སེམས་ཀྱི་འཛམ་གླིང་ཞེས་པའི་རོལ་དབྱངས་ཀྱི་འཁོར་ཐོག་འདོན་སྤེལ་གནང་ཡོད་པ་དང་འཁོར་ཐག་འདི་བཟོ་སྐྲུན་གནང་མཁན་New Zealand གི་རོལ་མོ་བ་ Junelle ལགས་དང་ཁོང་གི་སྐུ་ཟླ་ Abraham Kunin ལགས་གཉིས་ཀྱིས་ཡུལ་དེའི་སྔ་དྲོའི་གླེང་མོལ་ཞེས་པའི་ལས་ཚན་ཞིག་གི་ཐོག་འཁོར་ཐག་འདི་ནི་རྐང་༸གོང་ས་མཆོག་གིས་ལྗགས་ཀློག་མཛད་པའི་མཚན་སྔགས་ཁག་ཕྱོགས་བསྒྲིགས་གནང་བ་ཞིག་ཡིན་པ་དང་། མཚན་སྔགས་དེ་དག་གིས་འགྲོ་བ་མིའི་སེམས་ཞི་བར་གནས་ཐབས་སོགས་ལ་ཕན་ནུས་ངེས་ཅན་ཞིག་ཡོད་སྐོར་འགྲེལ་བརྗོད་གནང་འདུག ནིའུ་ཛར་ལན་ཌི་ཡི་གྲོང་ཁྱེར་ Auckland ནང་ཡོད་པའི་རྡོ་རྗེ་འཆང་ཆོས་ཚོགས་སུ་༸སྐུའི་འཁྲུངས་སྐར་སྲུང་བརྩི་སྐབས་སུ་ཁོང་རྣམ་གཉིས་མཉམ་ཞུགས་གནང་ཡོད་པ་མ་ཟད། ས་གནས་བོད་མི་ཚོས་ཁོང་གཉིས་ནས་ནང་སེམས་ཀྱི་འཛམ་གླིང་ཞེས་པའི་རོལ་དབྱངས་ཀྱི་འཁོར་ཐོག་འདོན་སྤེལ་གནང་བར་དགའ་བསུ་ཞུས་འདུགདེ་བཞིན་ཁ་སང་ Inner World ་ཞེས་པའི་ངོ་དེབ་ཐོག་ཐད་གཏོང་རོལ་དབྱངས་བརྒྱུད་༸སྐུའི་འཁྲུངས་སྐར་སྲུང་བརྩི་ཞུས་འདུག་པ་དང་ལས་རིམ་སྟེང་བོད་དོན་རྒྱབ་སྐྱོར་བ་སྐུ་ཞབས་ Richard Gere ལགས་ནས་༸གོང་ས་མཆོག་ལ་དགའ་བསུའི་འཚམས་འདྲི་དང་སྦྲགས། མགོན་པོ་༸གང་ཉིད་མཆོག་འགྲོ་བའི་དོན་དུ་སླར་ཡང་དགུང་གྲངས་ ༨༥ ལྷག་༸སྐུ་བརྟན་པའི་སྨོན་ལམ་སོགས་ཞུས་འདུགལས་རིམ་དེའི་ཐོག་སྒྱུ་རྩལ་བ་ Anoushka Shankar ལགས་དང་ Russell Brand ལགས་སོགས་ནས་མཉམ་ཞུགས་ཀྱིས་མགོན་པོ་མཆོག་ལ་འཚམས་འདྲི་དང་རོལ་དབྱངས་ཀྱི་མཆོད་སྤྲིན་ཕུལ་འདུག གཞི་རྩའི་འདི་ལོ་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་དབང་གིས་༸སྐུའི་འཁྲུངས་སྐར་དུས་ཆེན་མང་ཚོགས་མང་པོ་ལྷན་འཛོམས་ཐོག་སྲུང་བརྩི་ཞུ་རྒྱུ་དཀའ་བའི་གནས་སུ་གྱུར་ཡོད་ཀྱང་། མང་ཚོགས་དུ་མས་དྲྭ་ཐོག་ནས་མགོན་པོ་༸གང་ཉིད་མཆོག་ལ་དགའ་བསུ་དང་བཀྲིས་པའི་འཚམས་འདྲི་དང་། གཞས་སྣ་འཁྲབ་སྟོན། དེ་བཞིན་ས་གནས་སོ་སོའི་གནས་བབས་ལ་གཞིགས་ཏེ་དགེ་སྦྱོར་གྱི་བྱ་བར་རོལ་བ་སོགས་རྣམ་པ་འདྲ་མིན་བརྒྱུད་སྲུང་བརྩི་གཟབ་རྒྱས་ཞུས་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་ཐེ་ཝན་ནང་ཆིབས་བསྒྱུར་བསྐྱང་བར་དགའ་བསུ་ཡོད།

ཁ་སང་ཐེ་ཝན་ཕྱི་སྲིད་ལྷན་ཁང་གི་མགྲིན་ཚབ་པས་བཙན་བྱོལ་དུ་གནས་པའི་བོད་མིའི་ཆོས་ཕྱོགས་ཀྱི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་ཐེ་ཝན་ནང་འཚམས་གཟིགས་སུ་ཕེབས་རྒྱུར་དགའ་བསུ་ཞུ་རྒྱུ་ཡིན་ཞེས་གསུང་འདུག ཉེ་ཆར་རེས་གཟའ་ཉི་མའི་ཉིན་༸གོང་ས་མཆོག་གིས་དྲྭ་ཐོག་བརྒྱུད་ཐེ་ཝན་གྱི་དད་ལྡན་ཆོས་ཞུ་ཚོར་གསུང་ཆོས་བསྩལ་བ་དང་ཆབས་ཅིག ཐེ་ཝན་གྱི་གྲོགས་པོ་ཚོར་མགོན་པོ་༸གང་ཉིད་མཆོག་སླར་ཡང་ཐེ་ཝན་ནང་འཚམས་གཟིགས་སུ་ཕེབས་རྒྱུའི་ཐུགས་རེ་ཡོད་པ་དང་ལྷག་དོན་ཐེ་ཝན་ནང་ཆབ་སྲིད་ཀྱི་གནས་སྟངས་ལ་འགྱུར་བ་འགྲོ་བཞིན་པའི་རྐྱེན་གྱིས་༸སྐུ་ཉིད་མཆོག་ཕལ་ཆེར་གྲོགས་པོ་ཚོ་དང་སླར་ཐེ་ཝན་དུ་མཇལ་ཐུབ་པའི་ཐུགས་རེ་མཛད་བཞིན་ཡོད་པ་ལྟར་དུས་རྟག་ཏུ་ཁྱེད་རང་ཚོ་དང་འབྲེལ་བ་མུ་མཐུད་གནང་རྒྱུ་ཡིན་ཞེས་བཀའ་བསྩལ་ཡོད་པ་རེད། ད་རེས་༸གོང་ས་མཆོག་གིས་སླར་ཡང་ཐེ་ཝན་དུ་ཆིབས་བསྒྱུར་མཛད་རྒྱུར་ཐུགས་རེ་གནང་བཞིན་ཡོད་སྐོར་བཀའ་བསྩལ་བའི་གནས་ཚུལ་ཐོན་འབྲེལ། ཁ་སང་ཐེ་ཝན་ཕྱི་སྲིད་ལྷན་ཁང་གི་མགྲིན་ཚབ་པ་ལྕམ་ Joanne Ou ལགས་ཀྱིས་ཐེ་ཝན་ངོས་ནས་༸གོང་ས་ཏཱ་ལའི་བླ་མ་མཆོག་ཐེ་ཝན་ལ་འཚམས་གཟིགས་སུ་ཕེབས་རྒྱུར་དགའ་བསུ་ཞུ་རྒྱུ་ཡིན་ཞེས་གསུངས་འདུག ཐེ་ཝན་གཞུང་ལ་ད་ལྟའི་ཆར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེར་ཆིབས་བསྒྱུར་བསྐྱང་ཆོག་པའི་སྙན་ཞུ་རིགས་གང་ཡང་འབྱོར་མེད་ཀྱང་ནམ་ཞིག་དེ་འབྲེལ་གནས་ཚུལ་བྱུང་ཚེ་སྐབས་དོན་གྱི་ཁྲིམས་སྲོལ་དང་མཐུན་པའི་ཕྱག་བསྟར་གནང་རྒྱུ་ཡིན་སྐོར་གསུངས་པ་མ་ཟད། ལྷག་པར་དུ་ཕན་ཚུན་གཉིས་མོས་ཀྱི་ཆེ་མཐོང་ལྟ་ཚུལ་དང་དུས་སྐབས་དང་བསྟུན་ཏེ་༸གོང་ས་མཆོག་ཐེ་ཝན་ནང་སླར་གདན་ཞུ་གནང་ཐོག་ནང་ཆོས་ཁྱབ་གདལ་མཛད་རྒྱུ་ཡིན་ཞེས་གསུངས་འདུགརྩ་བའི་ལྕམ་སྐུ་ Tsai Ing wen ཐེ་ཝན་གྱི་སྲིད་འཛིན་དུ་འཁོད་པ་ནས་བཟུང་ད་བར་༸གོང་ས་མཆོག་ཐེ་ཝན་ནང་འཚགས་གཟིགས་སུ་ཕེབས་མྱོང་མེད་པ་དང་མགོན་པོ་༸གང་ཉིད་མཆོག་ཐེ་ཝན་ནང་འཚམས་གཟིགས་མཐའ་མ་དེ་ཕྱི་ལོ་ ༢༠༠༩ ལོར་གནང་ཡོད་པ་རེད།  འོན་ཀྱང་ཐེ་ཝན་ཕྱི་སྲིད་ལྷན་ཁང་གིས་༸གོང་ས་ཏཱ་ལའི་བླ་མ་མཆོག་ཐེ་ཝན་ལ་འཚམས་གཟིགས་སུ་ཕེབས་རྒྱུར་དགའ་བསུ་ཞུ་རྒྱུ་ཡིན་ཞེས་ལན་གནང་བ་དེས་རྒྱ་གཞུང་ལ་ཁོང་ཁྲོ་སློང་ངེས་ཡིན་པར་ཚོད་དཔག་གནང་གི་འདུགདེའི་བར་ན་ཟླ་ ༧ ཚེས་ ༡ ཉིན་རྒྱ་ནག་གཞུང་གི་ངོས་ནས་ཧོང་ཀོང་བདེ་འཇགས་ཀྱི་ཁྲིམས་གཞི་ཞེས་པ་ཞིག་གཏན་འབེབས་བྱས་པ་དེས་ཧོང་ཀོང་ནང་གི་མི་སེར་མང་པོས་རྒྱ་ནག་གི་ཁྲིམས་གཞིར་ངོ་རྒོལ་སྐད་འབོད་དང་རྒྱལ་ཁབ་མང་པོས་དེར་སྐྱོན་བརྗོད་ཀྱིས་བསྐྱར་ཞིབ་བྱེད་དགོས་པའི་འབོད་སྐུལ་གནང་ཡོད་པ་མ་ཟད། ཨ་རིའི་གྲོས་ཚོགས་ནས་ཉེ་ཆར་ཁྲིམས་གཞི་དེར་སེམས་འཚབ་དང་བཅས་ཧོང་ཀོང་གི་རང་སྐྱོང་ཁྲིམས་འཆར་ཞེས་པ་ཞིག་ཀྱང་སྤྱི་མོས་ཀྱིས་གཏན་འབེབས་གནང་ཡོད་པའི་ཁྲོད་འདིར་མང་ཚོགས་ཁག་ཅིག་ནས་ཧོང་ཀོང་རྒྱལ་ཁབ་ཀྱི་བདེ་འཇགས་ཁྲིམས་གཞི་གསར་པ་དེར་བློ་འཚབ་ཀྱི་རྣམ་པ་དང་བསྟན་པ་དང་འབྲེལ། ཁྲིམས་གཞི་དེས་མང་གཙོའི་རིན་ཐང་ལ་ཉེན་ཚབས་ཆེན་པོ་འགྱུར་ངེས་ཡིན་སྟབས་རྒྱ་གཞུང་གིས་བྱ་སྤྱོད་འདིར་ཨ་རི་མང་གཙོའི་རྒྱལ་ཁབ་ཅིག་ཡིན་པའི་ངོས་ནས་ཚོར་ཤུགས་ཆེན་པོས་ལན་འདེབས་གསལ་པོ་གནང་དགོས་པའི་དགོས་འདུན་གནང་བཞིན་པ་མ་ཟད། ཐེངས་འདིར་ཨ་རིའི་གྲོས་ཚོགས་སུ་ཧོང་ཀོང་གི་རང་སྐྱོང་ཁྲིམས་འཆར་གཏན་འབེབས་གནང་བ་བརྒྱུད་དེ་ཧོང་ཀོང་གི་རང་སྐྱོང་གནས་བབ་བརྩི་མེད་རྡོག་རོལ་བྱེད་མཁན་དང་ཁུལ་དེར་དྲག་གནོན་གྱི་བྱ་སྤྱོད་སྤེལ་མཁན། ལྷག་དོན་དུ་ངན་པ་ལག་འབྲེལ་བྱེད་མཁན་གྱི་དངུལ་ཁང་རྣམས་ལ་ཉེས་ཆད་གཏང་གཏན་འཁེལ་ཡོད་ཀྱང་། རྒྱ་གཞུང་གིས་མུ་མཐུད་སྤྱོད་བཞིན་པའི་བྱ་སྤྱོད་ལ་ཉེས་ཆད་དེ་དག་གི་འདང་གི་མེད་པ་དང་དེར་འགྲན་ཟླ་མེད་པའི་ལན་འདེབས་ཁ་གསལ་ཞིག་གནང་ཆེད་ཨ་རིའི་སྲིད་འཛིན་ Donald Trump མཆོག་ངེས་པར་ཐེ་ཝན་ལ་ཕེབས་ནས་ཨ་རི་རྒྱལ་ཁབ་ཀྱི་ངོས་ནས་དུས་རྟག་ཏུ་མང་གཙོའི་ལངས་ཕྱོགས་ལ་རྩ་ཆེར་འཛིན་བཞིན་ཡོད་པའི་བརྡ་ལན་གནང་དགོས་པའི་འབོད་སྐུལ་ཞུས་འདུགགལ་ཏེ་སྲིད་འཛིན་ཊམ་མཆོག་ཐེ་ཝན་ནང་བསྐྱོད་མ་ཐུབ་ཚེ་ཨ་རིའི་སྲིད་འཛིན་གཞོན་པ་སྐུ་ཞབས་ Mike Pence མཆོག་ཐེ་ཝན་ནང་ཆེད་གཏོང་གནང་དགོས་པ་དང་སྐུ་ཞབས་ Pence མཆོག་ནས་དེ་སྔོན་ Indo Pacific ས་ཁུལ་ནང་གཟིགས་སྐོར་ཐེངས་གསུམ་ཙམ་གནང་མྱོང་ཡོད་པ་མ་ཟད། ཁོང་གིས་རྒྱ་ནག་དེ་དུས་རབས་འདིའི་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་སྡུག་ཤོས་ཀྱི་རྒྱལ་ཁབ་དེ་རེད་ཅེས་རྒྱ་ནག་དམར་ཤོག་སྲིད་གཞུང་ལ་མུ་མཐུད་སྐྱོན་བརྗོད་ནན་པོ་གནང་མཁན་ཞིག་ཀྱང་ཆགས་ཀྱི་ཡོད་སྟབས། ད་ཆ་ཧོང་ཀོང་ནང་གི་ཆེས་གཉན་འཕྲང་གི་དུས་སྐབས་འདིར་རྒྱལ་ཁབ་གཞན་གྱིས་རྒྱབ་སྐྱོར་དགོས་རྒྱུ་ཧ་ཅང་གལ་ཆེན་པོ་ཆགས་ཡོད་པའི་མཚམས་སུ་ཨ་རིའི་སྲིད་འཛིན་ནམ་སྲིད་འཛིན་གཞོན་པ་གང་རུང་ཐེ་ཝན་དུ་ངེས་ཕེབས་གནང་རྒྱུ་དེས་ཡུལ་དེར་ཨ་རིའི་རྒྱབ་སྐྱོར་ཡོད་པའི་ཡིད་ཆེས་སླར་གསོ་གནང་ངེས་ཡིན་པར་འགྲེལ་བརྗོད་གནང་འདུག

དབྱིན་ཡུལ་གྲོས་ཚོགས་སུ་བོད་ནང་དུ་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་ཀྱི་ཞུ་སྐུལ།

ཁ་སང་རེས་གཟའ་ཟླ་བའི་ཉིན། དབྱིན་ཡུལ་གྱི་གྲོས་ཚོགས་ཀྱི་ནང་དུ།  བསྐྱར་བཅོས་ཁྲིམས་འཆར་ཞིག་གི་ཐོག་ནས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་མི་སྒེར་གྱི་ཚོགས་སྡེ་མང་པོ་ཞིག    Magnitsky ཞེས་པའི་ཁྲིམས་གཞིའི་འབྲུ་དོན་ལྟར་དབྱིན་ཡུལ་གྱི་ནང་དུ་འགྲོ་སྐྱོད་བྱེད་རྒྱུར་བཀག་འགོག་བྱེད་གཏན་འཁེལ་བ་དང་འབྲེལ། གྲོས་ཚོགས་འཐུས་མི་རྣམས་ནས་དེའི་ཐོག་བགྲོ་གླེང་གནང་སྐབས།   དབྱིན་ཡུལ་གྲོས་ཚོགས་ཀྱི་འཐུས་མི་སྐུ་ཞབས Tim Loughton  ལགས་ཀྱིས་རྒྱ་ནག་གིས་བོད་དང་ཤིན་ཅང་། དེ་བཞིན་ཧོང་ཀོང་བཅས་ཀྱི་ཁུལ་དུ་འགྲོ་བ་མིའི་ཐོབ་ཐང་ལ་རྡོག་རོལ་ཚབ་ཆེན་གཏོང་གི་ཡོད་པ་མངོན་གསལ་གྱིས། རྒྱ་ནག་གི་དཔོན་རིགས་རྣམས་ཀྱང་དབྱིན་ཡུལ་གྱི་ནང་དུ་ཡོང་རྒྱུར་བཀག་འགོག་བྱེད་དགོས་བའི་གླེང་སློང་གནང་བ་དང་འབྲེལ། དབྱིན་ཡུལ་སྲིད་གཞུང་གིས་བོད་ནང་དུ་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་དགོས་བའི་ཞུ་སྐུལ་གནང་འདུགཐེངས་འདིའི་དབྱིན་ཡུལ་གྱི་གྲོས་ཚོགས་ནང་དུ། Mignitsky ཞེས་པའི་ཁྲིམས་གཞིའི་འོག་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་རྣམས་དབྱིན་ཡུལ་དུ་འགྲོ་སྐྱོད་བྱེད་རྒྱུར་བཀག་སྡོམ་བྱེད་དགོས་བའི་སྤྱི་མོས་ཀྱི་གྲོས་མཐུན་བྱུང་བའི་ཁྲོད།  ཨུ་རུ་སུ་དང་ཨ་རབ་རྒྱལ་ཁབ། དེ་བཞིན་ཀོ་རི་ཡ་དང་འབར་མ་རྒྱལ་ཁབ་སོགས་ཀྱི་མི་སྒེར་དང་ཚོགས་སྡེ་ ༤༩ ཙམ་དབྱིན་ཡུལ་དུ་འགྲོ་སྐྱོད་བྱེད་རྒྱུར་བཀག་སྡོམ་བྱས་ཡོད་པ་མ་ཟད། ཚོགས་སྡེ་དང་མི་སྒེར་དེ་དག་གིས་དངུལ་དངོས་ཀྱི་འབྲེལ་ལམ་ཡོངས་སུ་བཀག་འགོག་བྱེད་རྒྱུ་ཡིན་པར་འཁོད་ཡོད་པ་རེད། དབྱིན་ཡུལ་གྱི་ཕྱི་སྲིད་དྲུང་ཆེ་སྐུ་ཞབས་ Dominic Rabb ལགས་ཀྱིས་ཐཻངས་འདིའི་ཐག་གཅོད་དེ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་རྣམས་ལ་བརྡ་ལན་གསལ་པོ་ཞིག་ཆགས་ཀྱི་ཡོད་སྐོར་གསུངས་བ་མ་ཟད། BBC གསར་ལམ་གྱིས་གསུང་ན། ད་རེས་ཀྱི་ཚོགས་སྡེ་ ༤༩ དེ་དག་ནི་དབྱིན་ཡུལ་ངོས་ནས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏང་མཁན་ལ་ཉེས་ཆད་གཅོད་བའི་རིམ་པ་དང་པོ་དེ་ཡིན་པ་དང་། རིམ་བཞིན་ཐོ་གཞུང་གཞན་འདོན་འཆར་ཡོད་པ་ལྟར་གྲོས་ཚོགས་འཐུས་མི་མང་པོས་དེའི་ཁོངས་སུ་རྒྱ་ནག་གི་དཔོན་རིགས་རྣམས་ཀྱང་འཇུག་དགོས་པའི་དགོངས་འཆར་འདོན་བཞིན་ཡོད་པ་རེད་འདུགརྩ་བའི་ Magnitsky ཞེས་པའི་ཁྲིམས་གཞི་འདི་ནི་ཐོག་མར་ཕྱི་ལོ་ ༢༠༡༢ ལོར་ཨ་རིའི་གྲོས་ཚོགས་འོག་མའི་ནང་གཏན་འབེབས་བྱས་པའི་རྒྱལ་སྤྱིའི་རང་བཞིན་གྱི་ཁྲིམས་གཞི་ཞིག་ཡིན་པ་དང། ཁ་ན་ཊའི་ངོས་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་རྣམས་ལ་བཀག་སྡོམ་བྱས་ནས་ཁོང་ཅག་གི་ཚོང་དོན་དང་འགྲུལ་བཞུད་སོགས་ལ་ཚད་གཞི་བཟོས་པའི་ཁྲིམས་གཞི་དེ་སྤྱི་ལོ་ ༢༠༡༧ ལོར་དངོས་སུ་ལག་བསྟར་བྱས་ཡོད་པ་རེད། ཡང་དེའི་བར་དུ། ཨ་རིའི Bloomberg་གསར་ལམ་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཚེས་གཅིག་གི་ཉིན་རྒྱ་ནག་གིས་ཧོང་ཀོང་རྒྱལ་ཁབ་བདེ་འཇགས་ཀྱི་ཁྲིམས་འཆར་ཞེས་པ་ལག་བསྟར་བྱས་པ་ནས།  ཧོང་ཀོང་གི་ནང་དུ་ཟིང་ཆ་ཆེ་རུ་འགྲོ་བཞིན་པ་མ་ཟད། ད་ཆ་ཧོང་ཀོང་གི་དམག་མིས་ཁུལ་དེའི་མང་གཙོའི་ལས་འགུལ་བ་རྣམས་འཛིན་བཟུང་བྱས་པ་བརྒྱུད་ནས།     ཁོང་རྣམས་ཀྱི་ལུས་ཐོག་ནས་ཁྲག་བཏོན་དེ་རིགས་རྫས། ༼DNA ༽ གསོག་ཉར་བྱེད་ཀྱི་ཡོད་ལུགས་དང་།  རིགས་རྫས་བརྒྱུད་ནས་འཛིན་བཟུང་བྱས་པའི་མི་དེ་དག་ལ་མཚོན་ཆ་ཡོད་པ་དང་། ཡང་ན་སྲིད་གཞུང་གི་རྒྱུ་ནོར་ལ་མེ་སྐྱོན་ཆེན་པོ་གཏོང་བའི་དམིགས་འབེན་ཡོད་པ་ཤེས་རྟོག་བྱུང་ཡོད་ལུགས་སོགས་ཀྱི་ནག་ཉེས་འགེལ་གྱི་ཡོད་པ་ཡང་མངོན་གསལ་གནང་བ་མ་ཟད།   རིགས་རྫས་བརྒྱུད་ནས་འཛིན་བཟུང་བྱས་པའི་ལས་འགུལ་བ་རྣམས་ཀྱི་ནང་མི་རྣམས་ཀྱང་བརྟག་དཔྱད་བྱེད་ཀྱི་ཡོད་ལུགས་ངོ་སྤྲོད་བྱས་འདུག དེ་བཞིན་དབྱིན་ཡུལ་དུ་རྟེན་གཞི་བྱས་པའི་ The telegraph ཞེས་པའི་གསར་ལམ་དུ་གནས་ཚུལ་ཐོན་པ་ལྟར་ན། ད་ཆ་ཧོང་ཀོང་གི་དཔོན་རིགས་རྣམས་ཀྱིས་ཧོང་ཀོང་གི་བདེ་འཇགས་ཞེས་པའི་ཁྲིམ་གཞི་དེ་དང་འབྲེལ་ནས་ཁུལ་དེར་ཡོད་པའི་སློབ་གྲྭ་ཁག་གི་བསླབ་གཞི་རྣམས་ལ་བསྐྱར་ཞིབ་བྱེད་དགོས་བ་མ་ཟད། བསླབ་ཁག་གི་ནང་དུ་ཡོད་པའི་རང་བཙན་དང་རང་སྐྱོང་གི་འབོད་ཚིག་རྣམས་ཕྱིར་བསྡུ་བྱེད་དགོས་བའི་བཀའ་ཕབ་ཡོད་པ་ཡོངས་གྲགས་གནང་འདུགགོང་གི་གནས་ཚུལ་དེ་དང་འབྲེལ་ནས། ཨ་རིའི་ རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་ཀྱིས། རྒྱ་ནག་གིས་ཧོང་ཀོང་བདེ་འཇགས་ཞེས་པའི་ཁྲིམས་གཞི་གཏན་འབེབས་ཀྱི་ཡིག་ཆའི་ངོས་ནས་སྣག་ཚ་ཡང་སྐམ་ཡོད་མེད་ཀྱི་དུས་སྐབས་འདིར། རྒྱ་ནག་གིས་ཧོང་ཀོང་གི་དཔེ་མཛོད་ཁང་ཁག་གི་ནང་དུ་རྒྱ་ནག་དམར་ཤོག་སྲིད་གཞུང་ལ་སྐྱོན་བརྗོད་ཀྱི་དཔེ་ཆ་ཁག་ཕྱིར་བསྡུ་དང་། ཆབ་སྲིད་ཀྱི་འབོད་ཚིག་ཁག་བཀག་འགོག དེ་བཞིན་སློབ་གྲྭ་ཁག་གི་བསླབ་གཞི་ལ་བསྐྱར་བཅོས་བྱེད་རྒྱུའི་འགོ་ཚུགས་ཡོད་སྐོར་ཡོངས་གྲགས་ཀྱིས།  རྒྱ་ནག་གི་ཁྲིམས་གཞི་གསར་བ་འདིའི་འོག་ནས། ཧོང་ཀོང་མི་མང་གི་བསམ་བློ་དང་སྨྲ་བརྗོད་རང་དབང་ཡོངས་སུ་བརླགས་འགོ་ཚུགས་སོང་ཞེས་གསུངས་ཏེ། ཁོང་གིས་རྒྱ་ནག་གི་བྱེད་བབ་དེར་མཐའ་གཅིག་ཏུ་ངོ་རྒོལ་ཡོད་པར་བསྒྲགས་འདུག

༸སྐུའི་འཁྲུངས་སྐར་སྲུང་བརྩི་དང་འབྲེལ་བོད་དོན་རྐང་འཁོར་སྐོར་སྐྱོད་མཇུག་སྒྲིལ།

ཟླ་བ་སྔོན་མའི་ཕྱི་ཚེས་ ༢༩ ཉིན་འཇར་འཁོད་བོད་རིགས་ཚོགས་པའི་ངོས་ནས་འཇར་མི་ནི་གཞུང་མང་གཉིས་ཀྱིས་ལ་བོད་ནང་གི་དངོས་ཡོད་གནས་སྟངས་ར་སྤྲོད་དང་རྒྱ་གཞུང་གིས་གདོང་རིས་དང་བྱ་སྤྱོད་ངོ་མ་ཐེར་འདོན་གནང་རྒྱུ་དང་འབྲེལ་དགོས་འདུན་དོན་ཚན་དྲུག་ཆེད་འདོན་ཐོག་བོད་དོན་རྐང་འཁོར་སྐོར་སྐྱོད་གནང་མཁན་ལས་འགུལ་བ་རྣམས་ཁ་སང་ཟླ་ ༧ ཚེས་ ༦ ༸རྒྱལ་བའི་འཁྲུངས་སྐར་ཉིན་འཇར་མ་ནི་རྒྱལ་ས་ Berlin དུ་བདེ་འབྱོར་བྱུང་སྟེ་ཁུལ་དེའི་སྲིད་བློན་ལས་ཁུངས་ཀྱི་མདུན་དུ་བོད་དོན་ལས་འགུལ་བ་གཙོ་བོར་གྱུར་པའི་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་པ་དང་འབྲེལ། ཐེངས་འདིའི་བོད་དོན་རྐོང་འཁོར་སྐོར་སྐྱོད་ཀྱི་ལས་འགུལ་མཇུག་སྒྲིལ་གནང་འདུག སྤྱིར་བོད་དོན་རྐང་འཁོར་སྐོར་སྐྱོད་བ་རྣམས་ནས་ད་ལན་འཇར་མན་གཞུང་མང་གཉིས་ལ་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་རྒྱུའི་ལམ་སྲོལ་དང་དེ་བཞིན་བོད་མིའི་ཆོས་དད་རང་དབང་ཐོག་རྒྱ་གཞུང་ལ་ཐེ་བྱུས་བྱ་རྒྱུའི་ཐོབ་ཐང་མེད་པའི་གྲོས་ཆོད་ཅིག་འཇར་མན་གྲོས་ཚོགས་ནང་གཏན་འབེབས་གནང་དགོས་པ་དང་། རྒྱ་ནག་གཞུང་ནས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་༸སྐུ་དངོས་གང་དུ་བཞུགས་ཡོད་མེད་ཡོངས་ཁྱབ་ཞུ་དགོས་པ། བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་དགོས་པ། འཇར་མན་གྲོས་ཚོགས་ནས་རྒྱ་ནག་ནང་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་གནང་དགོས་པ། གཉིས་སྨན་དབུ་མའི་ལམ་གྱི་ཐོག་༸གོང་ས་མཆོག་གི་སྐུ་ཚབ་ལྷན་དུ་གྲོས་མོལ་གནང་བར་རྒྱ་ནག་གཞུང་ལ་ཤུགས་གནོན་སྤྲོད་དགོས་པ། རྒྱ་གཞུང་གིས་བོད་ནང་བཟང་ཕྱོགས་ཀྱི་འགྱུར་བ་མ་གཏང་ཚེ་རྒྱ་ནག་དང་མཉམ་དུ་ཚོང་འབྲེལ་མཚམས་འཇོག་དགོས་པ། དེ་བཞིན་རྒྱ་ནག་ནས་བྱུང་བའི་ཏོག་དབྱིབས་གཉན་རིམས་རྐྱེན་གྱིས་འཛམ་གླིང་ཡོངས་ལ་གོད་ཆག་ཕོག་པའི་རྒྱུ་རྐྱེན་རྒྱ་ནག་ཡིན་པ་ར་སྤྲོད་གནང་དགོས་པ་བཅས་ཆེད་བཀོད་གནང་ཡོད་པ་རེད།གཞི་རྩའི་ཐེངས་འདིའི་བོད་དོན་རྐང་འཁོར་སྐོར་སྐྱོད་དེ་ཟླ་ ༦ ཚེས་ ༢༩ ནས་ཁ་སང་བར་ཁྱོན་ཉིན་གྲངས་ ༨ ཀྱི་རིང་ཁུལ་དེའི་མངའ་སྡེ་ཆེ་ཁག་བཞི་དང་གྲོང་ཁྱེར་ཆེ་ཁག་གསུམ། དེ་བཞིན་གྲོང་རྡལ་ཁག་ ༢༥ ལྷག་དང་གྲོང་སྡེ་ལས་ཁུངས། འཇར་མན་གྱི་སྲིད་བློན་གཙོས་གནད་ཡོད་མི་སྣ་དང་བློན་ཆེན་ལས་ཁུངས། གྲོས་ཚོགས་ཚོགས་གཙོ་གཙོས་འཐུས་མི་རྣམས་ལ་གོང་གསལ་དགོས་འདུན་དོན་ཚན་དྲུག་ལ་རྒྱབ་སྐྱོར་གྱི་ཞུ་གཏུག་གནང་ཡོད་པ་དང་། ཁ་སང་ཕྱི་ཟླ་ ༧ ཚེས་ ༦ ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ཉིན་མོར་འཇར་མན་གྱི་རྒྱལ་ས་ Berlin སྲིད་བློན་ལས་ཁུངས་ཀྱི་མདུན་དུ་ལས་འགུལ་མཇུག་སྒྲིལ་དང་འདི་བཞིན་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུས་འདུག

༸སྐུའི་འཁྲུངས་སྐར་ཉིན་ཕྱག་རྟགས་ཡག་ཤོས་དེ་མ་ཎི་གསོག་སྒྲུབ་གནང་དགོས་སྐོར་བཀའ་བསྩལ་བ།

སང་ཟླ་ ༧ ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་ཀྱི་ཡོད་སྟབས། དེ་རིང་༸མགོན་པོ་མཆོག་གིས་ཐེ་ཝན་མང་ཚོགས་ནས་༸སྐུའི་འཁྲུངས་སྐར་སྔ་ནུར་གྱིས་སྲུང་བརྩི་ཞུས་པའི་ལས་རིམ་ཐོག  ངོས་ཀྱི་སྐྱེས་སྐར་ལ་ཕྱག་རྟགས་ཡག་ཤོས་དེ་ནི་ཁྱེད་ཚོའི་མ་ཎི་ཏོག་ཙམ་གསོག་སྒྲུབ་བྱེད་ཐུབ་ན་ཡག་པོ་འདུག་ཅེས་བཀའ་བསྩལ་སོང་། དེ་རིང་རྒྱ་གར་གྱི་དུས་ཚོད་སྔ་དྲོ་ཕྱག་ཚོད་ ༡༠།༣༠ ཐོག་༸གོང་ས་མཆོག་གིས་དྲྭ་ལམ་ཐད་སྲིང་བརྒྱུད་ཐེ་ཝན་རྒྱལ་ས་ཐེ་པི་ནང་རྟེན་གཞི་བྱས་པའི་དགའ་ལྡན་ཤར་རྩེའི་ནང་ཆོས་སློབ་གཉེར་ཁང་གིས་གོ་སྒྲིག་འོག་མང་ཚོགས་ནས་༸རྒྱལ་བའི་འཁྲུངས་སྐར་སྔ་ནུར་གྱིས་སྲུང་བརྩི་དང་བསྟུན། བཀའ་གདམས་པའི་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་བཀའ་ཆོས་བསྩལ་བ་དང་འབྲེལ། སྐབས་དེར་༸གོང་ས་མཆོག་གིས། ༸གང་ཉིད་མཆོག་སྐུ་ཚེ་བསྐལ་བརྒྱར་བརྟན་ཕྱིར་དད་ལྡན་མང་ཚོགས་ནས་མ་ཎི་གསོག་སྒྲུབ་གནང་རྒྱུ་དང་སྒོས་མ་ཎི་བགྲང་བའི་སྐབས་བླང་དོར་ཚིག་བརྒྱད་ཀྱི་དོན་ལ་བསམ་བློ་གཏང་ཐུབ་ན་སོ་སོར་ཕན་ངེས་དང་ལྷག་པར་དུ་དེ་འབྲེལ་གྱི་དགེ་བ་དེས་༸གོང་ས་མཆོག་དགུང་གྲངས་ ༡༡༠ བཞུགས་རྒྱུར་བསྔོ་སྨོན་གནང་དགོས་ཞེས་བཀའ་བསྩལ་སོང་། དེ་བཞིན་སླད་མར་ཆབ་སྲིད་ཀྱི་གནས་སྟངས་ལ་འགྱུར་བ་ཕྱིན་ཚེ་མགོན་པོ་༸གང་ཉིད་མཆོག་ཐེ་ཝན་དུ་ཕེབས་རྒྱུའི་རེ་བ་མཛད་ཀྱི་ཡོད་པ་དང་ད་ཆ་དངོས་སུ་༸སྐུ་དངོས་ཐོག་ཐེ་ཝན་དུ་ཕེབས་ཐུབ་ཀྱང་རུང་མ་ཐུབ་ཀྱང་རུང་ང་ཚོའི་བསམ་བློའི་ནང་སེམས་ཐག་ཉེ་པོ་བྱས་ནས་བཞུགས་ཡོད་པ་བཀའ་བསྩལ་སོང་།  སྤྱིར་ད་རེས་བློ་སྦྱོང་ཚིག་བརྒྱད་མའི་བཀའ་ཆོས་ཐད་ཀར་རྒྱང་སྲིང་གི་ལས་རིམ་དེར་མང་ཚོགས་སྟོང་ཕྲག་ནས་གསན་གཟིགས་གནང་ཡོད་པ་མ་ཟད། སྐབས་དེར་༸གང་ཉིད་མཆོག་གིས་བྱང་ཆུབ་སེམས་ཀྱི་ཕན་ཡོན་སྐོར་བཀའ་བསྩལ་བ་དང་འབྲེལ། མགོན་པོ་༸གང་ཉིད་མཆོག་ནས་འདས་པའི་ལོ་ངོ་ ༥༠ ཙམ་ཞིག་ནས་སྤྱོད་འཇུག་གཙོ་བོ་བཟུང་ནས་བྱང་ཆུབ་སེམས་ལ་ཉིན་ལྟར་དགོངས་བཞེས་གནང་སྐོར་དང་། རྩ་བའི་བྱང་ཆུབ་སེམས་ཟེར་བ་དེ་ནི་སྣང་སྲིད་ཀྱི་སེམས་ཅན་ཐམས་ཅད་ལ་གཉེན་དུ་མངོན་པའི་ཐོག་དེ་དག་ལ་བརྩེ་བའི་སེམས་སྐྱེས་པ་དང་ཆབས་ཅིག དེར་སྟོང་ཉིད་ཀྱི་ལྟ་བས་གྲོགས་བྱས་ནས་སེམས་ལ་སྤོབས་པ་དང་ཞི་བདེ་འཕེལ་ངེས་ཡིན་པར་བཀའ་བསྩལ་ཡོད།དེ་བཞིན་༸གོང་ས་མཆོག་གིས་འཛམ་བུ་གླིང་འདིའི་ནང་རྙོག་ཁྲ་བཟོ་མཁན་གཙོ་བོ་ནི་རིམ་པ་གཉིས་པའི་དབང་དུ་སོང་རྐྱེན་ཡོང་བ་ཞིག་ཡིན་པས་ངའོ་སྙམ་པའི་བློ་དེ་ཤུགས་ཆུང་དུ་བཏང་ན་སོ་སོའི་སེམས་སྐྱིད་པ་དེ་བཞིན་འཛམ་གླིང་འདིའི་སྟེང་དུ་རྙོག་ཁྲ་བཟོ་རྒྱུ་དེ་ཡང་ཉུང་དུ་འགྲོ་རྒྱུར་ཁྱད་པར་ཡོད་ཅེས་བཀའ་བསྩལ་སོང་། གཞི་རྩའི་༸རྒྱལ་བའི་འཁྲུངས་སྐར་སྔ་ནུར་སྲུང་བརྩི་དང་སྦྲགས། ཐེ་ཝན་ནང་ཁས་ས་ཡང་མང་ཚོགས་འདུ་འཛོམས་ཀྱིས་གཞས་སྣ་འཁྲབ་སྟོན་དང་མ་ཎི་གསོག་སྒྲུབ་གནང་ཡོད་པ་དང་། དེ་རིང་ཡང་༸གང་ཉིད་མཆོག་གི་༸སྐུའི་འཁྲུངས་སྐར་སྔ་ནུར་གྱི་དུས་ཚིགས་སུ་མང་ཚོགས་འདུ་འཛོམས་ཀྱིས་སྤྱི་ཚོགས་རྒྱང་བཀྱེད་བསྟེན་པའི་ཐོག་༸གོང་ས་མཆོག་གི་བློ་སྦྱོང་ཚིག་བརྒྱད་མའི་བཀའ་ཆོས་ཞུས་ཡོད་པ་དང་། ལྷག་པར་དུ་དགའ་ལྡན་ཤར་རྩེ་ནང་ཆོས་སློབ་གཉེར་ཁང་ནས་ལོ་ལྟར་༸རྒྱལ་བའི་འཁྲུངས་སྐར་དང་བསྟུན་མེ་གསོད་ཚན་པར་༸གོང་ས་མཆོག་གི་མཚན་ཐོག་ཏུ་ཛ་དྲག་མྱུར་སྐྱོབ་སྣུམ་འཁོར་ཞལ་འདེབས་འབུལ་སྲོལ་ཡོད་པ་བཞིན་ད་རེས་ཡང་ཐེ་པིའི་མེ་གསོད་ཚན་པར་ཛ་དྲག་མྱུར་སྐྱོབ་ཀྱི་སྣུམ་འཁོར་ཞལ་འདེབས་གནང་སོང་།  ད་ལན་༸གོང་ས་མཆོག་གིས་བློ་སྦྱོང་ཚིག་བརྒྱད་མའི་བཀའ་ཆོས་དེ་བཞིན་བོད་དབྱིན་རྒྱ་གཙོས། ཧྥི་རན་ཅེ་དང་། ཝི་ཏི་ནམ། ཉི་ཧོང་། ཨི་ཊ་ལི་སོགས་སྐད་ཡིག་ ༡༤ ཐོག་གསུང་སྒྱུར་གནང་ཡོད།  

རྒྱ་གར་གྱི་ནང་པའི་ཆོས་ལུགས་ལྟར་ཆོས་འཁོར་དང་པོའི་དུས་དྲན་སྲུང་བརྩི་ཉིན་མོར་གསུང་འཕྲིན་བསྩལ་བ།

དེ་རིང་ཕྱི་ལོ་ ༢༠༢༠ ཟླ་ ༧ ཚེས་ ༤ ཉིན་འཕགས་པ་གནས་བརྟན་སྡེ་པའི་ལུགས་ལྟར་བདག་ཅག་གི་སྟོན་པ་མཉམ་མེད་ཤཱཀྱ་སེང་གེ་མཆོག་གིས་ཆོས་འཁོར་དང་པོ་བསྐོར་བའི་དུས་ཆེན་ཁེལ་བ་དང་བསྟུན། International Buddhist Confederation ཞེས་རྒྱལ་སྤྱིའི་ནང་པའི་མཐུན་ཚོགས་ཀྱི་ངོས་ནས་ Dharma Chakra Day ཞེས་དྲྭ་ལམ་བརྒྱུད་ཆེས་ཐོག་མ་ཆོས་འཁོར་དང་པོའི་དུས་ཆེན་དེ་སྲུང་བརྩི་གཟབ་རྒྱས་ཞུ་བཞིན་ཡོད་པ་ལྟར། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཕྱོགས་ཀྱི་དུས་སྟོན་འདིའི་ཐོག་དགའ་བསུའི་འཚམ་འཕྲིན་ཞིག་བསྩལ་འདུགའཕགས་པ་གནས་བརྟན་སྡེ་པའི་ལུགས་ལྟར་བཅོམ་ལྡན་འདས་ཀྱིས་ཆོས་འཁོར་དང་པོ་བསྐོར་བའི་དུས་ཆེན་དེའི་ཐོག་རྒྱ་གར་གྱི་སྲིད་འཛིན་མཆོག་གིས་གཙོས་པའི་རྒྱལ་ཁབ་ཀྱི་དབུ་འཁྲིད་ཁག་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་ནང་པའི་རྒྱལ་ཁབ་ཀྱི་ཆེས་མཐོའི་དབུ་ཁྲིད་བླ་ཆེན་ཁག་ནས་གསུང་བཤད་གནང་ཡོད་པ་མ་ཟད། གནས་མཆོག་ཝཱ་རཱ་ཎ་སཱི་ནས་ཝཱ་ཎ་དབུས་བོད་ཀྱི་གཙུག་ལག་སློབ་ཁང་དང་འཕགས་པ་གནས་བརྟན་སྡེ་པའི་ཚོགས་སྡེ་ཁག་ཟུང་འབྲེལ་གྱིས་སྨོན་ལམ་གསུང་འདོན་གནང་རྒྱུ་བཅས་ཀྱི་མཛད་རིམ་ཁག་ཐད་སྲིང་གནང་ཡོད་པ་རེད།༸གོང་ས་༸སྐྱབས་མགོན་ཆེན་པོ་མཆོག་གིས་འཚམ་འཕྲིན་དེའི་ནང་དུ་རྒྱལ་སྤྱིའི་ནང་པའི་མཐུན་ཚོགས་ཀྱིས་གོ་སྒྲིག་འོག་འཕགས་པ་གནས་བརྟན་སྡེ་པའི་ལུགས་ལྟར་གནས་མཆོག་ཝཱ་རཱ་ཎ་སཱིར་བཅོམ་ལྡན་འདས་ཀྱིས་ཆོས་འཁོར་དང་པོ་བསྐོར་བའི་ཉིན་མོ་ཞེས་སྲུང་བརྩི་གནང་བ་དེ་ཧ་ཅང་ཡག་པོ་རེད་ཅེས་དགའ་བསུའི་འཚམས་འདྲི་བསྩལ་བ་དང་སྦྲགས། སྐབས་དེ་དང་དེའི་ཚེ་རྒྱ་གར་ནང་དུ་ཆོས་ལུགས་མི་འདྲ་བ་མང་དག་ཅིག་ཡོད་སྟབས་བདག་ཅག་གི་སྟོན་པ་བཅོམ་ལྡན་འདས་ཀྱིས་ཐོག་མར་མངོན་པར་རྫོགས་པ་སངས་རྒྱས་ནས་ཞག་བདུན་གྱི་རིང་བཀའ་ཆོས་གང་ཡང་མ་བསྩལ་བར་བཞུགས་པ་དང་། དེ་རྗེས་འཁོར་གྱི་ཐོག་མ་ལྔ་སྡེ་བཟང་པོར་གནས་མཆོག་ཝཱ་རཱ་ཎ་སྀར་བདེན་བཞིའི་ཆོས་ཀྱི་འཁོར་ལོ་བསྐོར་སྐོར་བཀའ་བསྩལ་འདུག་པ་མ་ཟད། ཆོས་འཁོར་དེའང་བདེན་པ་བཞི་པོ་རེ་རེ་ལ་རྣམ་པ་བཞི་བཞིར་དབྱེ་བས་བསྔལ་བདེན་པའི་རྣམ་པ་བཞི་དང༌། ཀུན་འབྱུང་བདེན་པའི་རྣམ་པ་བཞི་དང༌། འགོག་པའི་བདེན་པའི་རྣམ་པ་བཞི་དང༌། ལམ་གྱི་བདེན་པའི་རྣམ་པ་བཞི་བཅས་ཀྱི་ཐོག་ནས་བསྩལ་སྐོར་ཞིབ་རྒྱས་ངོ་སྤྲོད་མཛད་འདུགད་དུང་མགོན་པོ་༸གང་ཉིད་མཆོག་གིས་སངས་རྒྱས་བཅོམ་ལྡན་འདས་ཀྱིས་ནང་གི་རྟེན་འབྲེལ་ཏེ་བཅུད་ཀྱི་སེམས་ཅན་རྣམས་འབྱུང་བའི་ཚུལ་གྱི་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་བློ་ཕྱིན་ཅི་ལོག་གི་གཉེན་པོ་ཇི་ལྟར་བསྟན་ཚུལ་གྱི་རྣམ་གཞག་ཟབ་རྒྱས་བསྟན་ཡོད་པ་བཀའ་བསྩལ་འདུག ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གིས་ནང་པའི་གཞུང་ཆེན་ཁག་གི་ཕྱག་དཔེ་གཟིགས་པའི་དོན་རྣམས་རང་གི་གཤིས་རྒྱུད་ལ་འཇགས་ཐབས་བྱེད་དགོས་པ་དང་སློབ་གཉེར་གནང་བ་དེའང་ཚན་རིག་དང་མཐུན་པ་བྱེད་དགོས་གལ་ཡིན་པར་ལམ་སྟོན་མཛད་ཡོད། གཞི་རྩའི་དེ་སྔ་ཕྱི་ལོ་ ༢༠༡༡ ལོར་རྒྱ་གར་གྱི་རྒྱལ་ས་ལྡི་ལིར་རྒྱ་གར་དབུས་གཞུང་ནས་འཛམ་གླིང་ནང་པའི་ཚོགས་སྡེ་རྣམས་ཀྱི་ཚོགས་ཆེན་ཞིག་བསྡུ་བསྐོང་གནང་ཡོད་པ་དང་། ཚོགས་ཆེན་སྟེང་ནས་འཛམ་གླིང་ནང་པའི་ཚོགས་སྡེ་རྣམས་ཀྱི་མཉམ་མཐུན་སྒྲིག་འཛུགས། རྒྱལ་སྤྱིའི་ནང་པའི་སྤྱི་མཐུན་ལྷན་ཚོགས་ ཞེས་པ་ཞིག་གསར་འཛུགས་དང་སྦྲགས། ནང་པ་སངས་རྒྱས་པའི་ལྟ་སྒོམ་སྤྱོད་གསུམ་གྱི་བསླབ་བྱའི་སྒོ་ནས་འཛམ་གླིང་སྐྱེ་འགྲོ་ཡོངས་ལ་ཕན་བདེ་སྤེལ་ཐབས་ཀྱི་ཕྱག་ལས་མང་དག་ཅིག་སྤེལ་དང་སྤེལ་བཞིན་ཡོད་པ་དང་། དེ་རིང་འཕགས་པ་གནས་བརྟན་སྡེ་པའི་ལུགས་ལྟར་བཅོམ་ལྡན་འདས་ཀྱིས་ཆོས་འཁོར་དང་པོ་བསྐོར་བའི་དུས་ཆེན་དང་བསྟུན་བདེན་བཞི་ཆོས་འཁོར་གྱི་བསླབ་བྱ་སྙིང་པོ་གོ་རྟོགས་དང་ཉམས་ལེན་ཐུབ་ཐབས་ལ་ཆེད་དམིགས་གནང་བ་དང་ཆབས་ཅིག འཕྲལ་དུ་གཉན་རིམས་ཀྱི་སྡུག་བསྔལ་གདོང་ལེན་གནང་ཐུབ་ཐབས་དང་དེ་བཞིན་ཕུགས་སུ་རང་གི་མི་ཚེ་དོན་ལྡན་ཡོང་ཐབས་བཅས་ལ་ཆེད་དམིགས་གནང་བ་ཞིག་ཆགས་ཀྱི་འདུག

Latest news