གསར་འགྱུར།

ཕ་རན་སིའི་རྒྱལ་ས་པེ་རིས་ནང་དུ་བཅའ་བཞུགས་བོད་མི་ངག་དབང་ཚེ་འཕེལ་ལགས་ཀྱིས་པེ་རི་སི་ནས་སུད་སིའི་གྲོང་ཁྱེར་ཇི་ནི་ཝར་ཡོད་པའི་རྒྱལ་ཚོགས་ལས་ཁུངས་བར་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དབུ་འཛུགས་གནང་འདུགསྐུ་ཞབས་ངག་དབང་ཚེ་འཕེལ་ལགས་ཀྱིས་ཁ་སང་རྒྱ་ནག་གཞུང་ཚབ་ལས་ཁུངས་མདུན་དུ་ཕྱག་ཚོད་དང་པོ་དང་ཕྱེད་ཀ་ཐོག་ཞི་རྒོལ་གྱི་ལས་འགུལ་སྤེལ་རྗེས་དེ་རིང་སྔ་དྲོ་ཕྱག་ཚོད་ ༥ ཐོག་པེ་རིས་ནས་ཕེབས་ཐོན་གྱིས་སུད་སིའི་གྲོང་ཁྱེར་ཇི་ནི་ཝ་བར་སྤྱི་ལེ་ ༦༠༠ ལྷག་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་འདུག རྩ་བའི་ངག་དབང་ཚེ་འཕེལ་ལགས་ནི་པེ་རིས་ནང་དུ་དབུགས་སྦྱོང་སློབ་ཁྲིད་གནང་མཁན་ཡིན་པ་དང་། ད་རེས་ཁོང་གིས་རྐང་འཁོར་སྐྱོར་སྐྱོད་ཀྱི་ལས་འགུལ་བརྒྱུད་རྒྱ་ནག་གཞུང་གིས་བོད་གཙོ་བོར་གྱུར་པའི་ཤར་ཏུར་ཀི་སི་ཐན། དེ་བཞིན་ཧོང་ཀོང་བཅས་ཀྱི་ནང་དུ་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་སྟེ་དྲག་པོའི་སྲིད་བྱུས་ལག་བསྟར་བྱེད་བཞིན་ཡོད་པ་ངོ་སྤྲོད་དང་སྦྲགས། རྒྱལ་ཚོགས་ལ་དོན་ཚན་བརྒྱད་ཅན་གྱི་དགོས་འདུན་འཁོད་པའི་ཞུ་སྙན་ཞིག་ཕུལ་འདུག་པའི་ནང་བོད་དང་ཤིན་ཅང་། ཧོང་ཀོང་བཅས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་སྲུང་ཞུ་དགོས་པ། བོད་མི་དང་ཡུ་གུར་བ། དེ་བཞིན་ཧོང་ཀོང་ནང་གི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་གློད་བཀྲོལ་དགོས་པ། བོད་རྒྱ་ཞི་མོལ་བསྐྱར་གསོ་དགོས་པ། རྒྱ་ནག་གིས་གོ་ལ་ཁྱོན་ལ་ཏོག་དབྱིབས་རིམས་ནད་ཁྱབ་བརྡལ་བཏང་བའི་འགན་ཡོངས་རྫོགས་འཁུར་འཇུག་དགོས་པ། བོད་མི་དང་ཡུ་གུར་བ་ཚོ་རང་གི་ས་ཁུལ་ནང་དུ་རང་དབང་ངང་འགྲུལ་སྐྱོད་ཆོག་པའི་ཐོབ་ཐང་སྤྲོད་དགོས་པ། དེ་བཞིན་བོད་ནང་གཏེར་ཁ་སྔོག་འདོན་གྱི་ལས་གཞི་སོགས་འཕྲལ་མར་མཚམས་འཇོག་དགོས་པ་བཅས་ཆེད་འདོན་གནང་འདུག རླུང་འཕྲིན་ཁང་གིས་ངག་དབང་ཚེ་འཕེལ་ལགས་སུ་ལས་འགུལ་དང་འབྲེལ་བའི་བཅར་འདྲི་ཁག་ཅིག་ཞུས་པར་ཁོང་གིས་དེང་སྐབས་འཛམ་གླིང་རྒྱལ་ཁབ་ཚང་མས་རྒྱ་ནག་གི་བྱ་སྤྱོད་རྣམས་གསལ་པོ་ཤེས་པར་བརྟེན་སྐྱོན་བརྗོད་གནང་བཞིན་པའི་གོ་སྐབས་དམ་འཛིན་གྱིས་ལས་འགུལ་སྤེལ་བཞིན་ཡོད་པ་རེད། དེས་ན་ཐེངས་འདིའི་བོད་དོན་ལས་འགུལ་ཁྲོད་གྲོང་གསེབ་དང་གྲོང་ཁྱེར་འདྲ་མིན་ནང་དུ་ལས་ཁུངས་ཁག་གི་མདུན་དུ་བོད་ཀྱི་རྒྱལ་དར་འཕྱར་རྒྱུ་དང་བོད་དོན་གོ་རྟོགས་ཀྱི་ཡིག་ཆ་འགྲེམས་སྤེལ་གནང་འཆར་ཡོད་པ་སོགས་གསུངས་སོང་།

དབྱིན་ཡུལ་དུ་རྟེན་གཞི་བྱས་པའི་ The Economist གསར་ཁང་གིས་རྒྱ་ནག་གིས་འཁྱོག་བརྗོད་དྲིལ་བསྒྲགས་སྤེལ་སའི་གསར་ཤོག་གི་ China focus ཞེས་པའི་ས་བཅད་དེ་ཕྱིར་འཐེན་བྱས་འདུགདེ་རིང་ Free Tibet ཞེས་པའི་དབྱིན་ཡུལ་གྱི་བོད་རང་དབང་ཚོགས་པས་གནས་ཚུལ་སྤེལ་བར་རྒྱ་ནག་གིས་ཕྱི་ཕྱོགས་ཀྱི་གསར་ཤོག་གྲགས་ཅན་རིགས་མང་པོར་དངུལ་དངོས་ཀྱི་ཁེ་ཕན་ཆེན་པོ་སྤྲད་ནས་རྒྱ་ནག་གི་ཆབ་སྲིད་ཀྱི་འཁྱོག་བརྗོད་དྲིལ་བསྒྲགས་རིགས་སྤེལ་སའི་ས་བཅད་ཉོས་ཡོད་པ་ལྟར། Free Tibet དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གཉིས་ཀྱིས་དེར་འབྲེལ་གྱི་གནད་དོན་ཁག་ཕྱིར་བསྒྲགས་བྱས་པ་བརྒྱུད་ད་ཆ་The Economist གསར་ཁང་གིས་རྒྱ་ནག་གིས་འཁྱོག་བརྗོད་དྲིལ་བསྒྲགས་སྤེལ་སའི་ས་བཅད་དེ་ཕྱིར་འཐེན་བྱས་ཡོད་པ་མངོན་གསལ་གནང་འདུག རྩ་བའི་ The Economist ཞེས་པའི་དཔལ་འབྱོར་གྱི་དཔྱད་བརྗོད་སྤེལ་སའི་དབྱིན་ཡུལ་གྱི་གསར་ཤོག་དེས་འདས་པའི་ལོ་གཉིས་ཙམ་ནས་དེ་གའི་གསར་ཤོག་ཐོག་ China Focus ཞེས་རྒྱ་ནག་གི་འཁྱོག་བརྗོད་དྲིལ་བསྒྲགས་སྤེལ་སའི་ས་བཅད་ཅིག་བཀོད་ཡོད་པ་དང་། ས་བཅད་དེའི་ནང་དོན་རྣམས་ Beijing review འམ་པེ་ཅིང་བསྐྱར་ཞིབ་ཅེས་རྒྱ་ནག་དམར་ཤོག་ཚོགས་པས་ཐད་ཀར་སྟངས་འཛིན་འོག་ཡོད་པའི་དྲིལ་བསྒྲགས་ཚན་པས་བྲིས་པ་ཞིག་ཡིན་པ་མ་ཟད། དེ་དག་ནང་རྒྱ་ནག་གཞུང་གིས་ཏོག་དབྱིབས་རིམས་ནད་ལ་གདོང་ལེན་བྱེད་ཕྱོགས་ཐད་བསྔགས་བརྗོད་ཀྱི་དཔྱད་གཏམ་དང་བརྒྱུད་གཅིག་ལམ་གཅིག་སོགས་རྒྱ་ནག་གི་རྒྱལ་སྤྱིའི་ཚོང་ལས་དང་འབྲེལ་བའི་ལས་འཆར་མང་པོ་སྤེལ་བྱེད་བཞིན་ཡོད་པ་རེད། གསར་འགོད་པ་ Dean Sterling Jones ཟེར་བ་ཞིག་གིས་ཞིབ་འཇུག་བྱས་པ་ལྟར་ན། The Economist གསར་ཁང་གིས་ཟླ་བ་སྔོན་མའི་ཚེས་ ༢༦ ནས་བཟུང་རྒྱ་ནག་གི་འཁྱོག་བརྗོད་དྲིལ་བསྒྲགས་སྤེལ་སའི་ས་བཅད་དེ་ཕྱིར་འཐེན་བྱས་ཡོད་པར་གསུངས་འདུག དེ་བཞིན་བོད་རང་དབང་ཚོགས་པའི་དྲིལ་བསྒྲགས་འགན་འཛིན་སྐུ་ཞབས་John Jones ལགས་ཀྱིས་ The Telegraph དང་ the Economist གསར་ཁང་གཉིས་ཀྱིས་རྒྱ་ནག་གི་འཁྱོག་བརྗོད་དྲིལ་བསྒྲགས་སྤེལ་སའི་ས་བཅད་དེ་ཕྱིར་འཐེན་བྱས་པ་དེ་ནི་བོད་མི་རྣམས་ལ་མཚོན་ན་རྒྱལ་ཁ་ཆེན་པོ་ཞིག་ཡིན་པར་ཡོངས་གྲགས་གནང་སྟེ་ད་ཆ་ Wall Street Journal གསར་ཤོག་གིས་ཀྱང་རྒྱ་ནག་གི་འཁྱོག་བརྗོད་དྲིལ་བསྒྲགས་རིགས་སྤེལ་མི་འཇུག་པའི་རེ་སྐུལ་གནང་གི་ཡོད་པར་གསུངས་འདུག དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་རྒྱལ་སྤྱིའི་འབྲེལ་མཐུད་པ་བསྟན་འཛིན་འཇིགས་བྲལ་ལགས་ཀྱིས་ཀྱང་ཐེངས་འདིར་ The Economist གསར་ཁང་གིས་རྒྱ་ནག་གི་དྲིལ་བསྒྲགས་རིགས་སྤེལ་སའི་ས་བཅད་དེ་ཕྱིར་འཐེན་བྱས་པ་དེ་ནི་བོད་མི་དང་ཡུ་གུར་བ། དེ་བཞིན་ཧོང་ཀོང་མི་མང་སོགས་ཀྱིས་ཡུན་རིང་ནས་ངང་སྒུག་བྱས་པའི་རྒྱལ་ཁ་ཆེན་པོ་ཞིག་རེད་ཅེས་འགྲེལ་བརྗོད་གནང་བ་དང་སྦྲགས། གསར་ཁང་ཞིག་ཡིན་ན་དྲང་བདེན་མིན་པའི་གནད་དོན་དང་འགྲོ་བ་མིའི་ཐོབ་ཐང་རྡོལ་རོལ་གྱི་གནད་དོན་ནམ་ཐོན་ལ་དུས་ཐོག་ཏུ་གནས་ཚུལ་བརྒྱུད་བསྒྲགས་བྱེད་དགོས་པ་ལས་རྒྱ་ནག་གི་མགྲིན་ཚབ་ལྟ་བུ་བྱེད་རྒྱུ་མེད་པར་གསུངས་ཏེ་གང་མགྱོགས་གསར་ཁང་གཞན་དག་གིས་ཀྱང་རྒྱ་ནག་དང་ལག་འབྲེལ་བྱས་ཡོད་པའི་དྲིལ་བསྒྲགས་ཀྱི་ས་བཅད་རིགས་ཡོངས་སུ་ཕྱིར་འཐེན་གནང་དགོས་པའི་རེ་སྐུལ་ཞུས་འདུགདེ་བཞིན་བོད་རང་དབང་ཚོགས་པས། The Economist གསར་ཁང་ནི་རྒྱ་ནག་གིས་དངུལ་དངོས་སྤྲད་ནས་གནས་ཚུལ་སྤེལ་མཁན་གྱི་གསར་ཁང་མང་པོའི་ནང་གི་གཅིག་ཡིན་པ་དང་། ད་ལྟའི་ཆར་ཨ་རིའི་ The Wall Street Journal དང་། ཨོ་གླིང་གི་ The Sydney Morning Herald དེ་བཞིན་ཕ་རན་སིའི་  Le Figaro སོགས་ཀྱི་རྒྱལ་སྤྱིའི་གསར་ཁང་  ༢༥ ལྷག་གིས་ད་དུང་ཡང་རྒྱ་ནག་སྲིད་གཞུང་གིས་སྟངས་འཛིན་བྱེད་བཞིན་པའི་ China Daily ཞེས་པའི་རྒྱ་ནག་གི་ཉིན་རེའི་གསར་ཤོག་ལས་གནས་ཚུལ་བརྒྱུད་སྤེལ་བྱེད་བཞིན་པར་ལུང་འདྲེན་གྱིས་ རྒྱ་ནག་གིས་གསར་ཁང་དེ་དག་ལ་སྒོར་སྟོང་ཕྲག་མང་པོ་སྤྲད་ཡོད་པ་ཡང་ཡོངས་གྲགས་གནང་འདུག བོད་རང་དབང་ཚོགས་པས་ཐེངས་འདིར་རྒྱ་ནག་གི་འཁྱོག་བརྗོད་དྲིལ་བསྒྲགས་སྤེལ་སའི་ས་བཅད་གཅིག་སྒོ་རྒྱབ་པ་དེ་ནི་རྒྱལ་ཁ་ཆེན་པོ་ཞིག་ཡིན་པར་ལུང་འདྲེན་གྱིས་རྒྱ་ནག་སྲིད་གཞུང་གིས་ཐད་ཀར་སྟངས་འཛིན་བྱེད་ཀྱི་ཡོད་པའི་པེ་ཅིན་དཔྱད་ཞིབ་ཅེས་པ་དེ་ནི་ཕྱི་ལོ་ ༡༩༥༨ ལོར་རྒྱ་ནག་གི་སྲིད་བྱུས་ཕྱི་ལ་བསྒྲགས་བྱེད་དུ་གསར་འཛུགས་བྱས་ཡོད་པ་མངོན་གསལ་དང་། ལོ་ཤས་ནས་ནས་རྒྱ་ནག་གིས་ཆེད་དུ་བོད་ནང་གི་མང་གཙོ་བཅོས་བསྒྱུར་ཞེས་པ་ཞིག་གསལ་འདོན་བྱེད་ཀྱི་ཡོད་པ་ལྟར། ཉེ་ཆར་ནས་ཤིན་ཅང་ས་ཁུལ་དེ་མི་སེར་ས་ཡ་གཅིག་ལྷག་བཀག་སྐྱིལ་བྱས་ཡོད་པ་དེ་ནི་བཟོ་ལས་དང་འབྲེལ་བའི་སྦྱོང་བརྡར་ལྟེ་གནས་ཤིག་ཡིན་པར་དྲིལ་བསྒྲགས་བྱས་པ་སོགས་ལ་བརྟེན་ན་ཕྱི་ཕྱོགས་སུ་དངོས་བདེན་མིན་པའི་གནས་ཚུལ་དྲིལ་བསྒྲགས་བྱེད་ཀྱི་ཡོད་པར་ཆེས་མངོན་གསལ་གནང་འདུག འདི་ལོའི་ཟླ་ ༣ པ་ནས་བཟུང་ The Telegraph ཞེས་པའི་གསར་ཁང་གིས་ཀྱང་རྒྱ་ནག་དང་ལྷན་དུ་ལག་འབྲེལ་བྱེད་རྒྱུ་མཚམས་འཇོག་བྱས་པ་ཡོད་པ་ལྟར་གསར་ཁང་ཆེ་གྲས་གཞན་རྣམས་ཀྱིས་གང་མགྱོགས་རྒྱ་ནག་གི་དྲིལ་བསྒྲགས་རིགས་སྤེལ་རྒྱུ་ཡོངས་སུ་མཚམས་འཇོག་གནང་དགོས་པར་འཁོད་འདུག

ཨ་རིའི་ཞི་བདེ་བསྟི་གནས་སློབ་གཉེར་ཁང་དབུ་འཛིན་ Nancy Linborg ལགས་ཀྱིས་གཙོས་པའི་འབྲེལ་ཡོད་ཁག་དང་སེམས་བསྲེ་བའི་ལས་འཆར་ཚོགས་པའི་ཚོགས་མི་རྣམས། དེ་བཞིན་ཨེ་ཤ་ཡའི་ཚོགས་སྡེ་ཁག་ཅིག ཐེ་ཝན་གྱི་དད་ལྡན་མི་མང་། རྒྱ་གར་གྱི་སྲིད་འཛིན་ཟུར་པ་སྐུ་གཤེགས་ཨེ་པི་ཇེ་ཨབ་དུལ་ཀ་ལཱམ་མཆོག་དགོངས་རྫོགས་རྗེས་དྲན་གོ་སྒྲིག་ཚོགས་ཆུང་བཅས་ཀྱིས་ཇི་ལྟར་གསོལ་འདེབས་ཞུས་དོན་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སང་ཉིས་ཟླ་ ༨ ཚེས་ ༡༢ ནས་དབུ་འཛུགས་ཀྱིས་ཟླ་ ༡༠ ཚེས་ ༡༥ བར་དྲྭ་རྒྱ་བརྒྱུད་ནས་བཀའ་ཆོས་དང་བཀའ་སློབ་ཀྱི་མཛད་འཆར་མི་འདྲ་བ་ལྔ་ཙམ་བསྐྱང་རྒྱུའི་ཐུགས་གཏན་འཁེལ་འདུགདེ་ཡང་༸དཔལ་ལྡན་དགའ་ལྡན་ཕོ་བྲང་གི་བོད་ཡིག་དྲྭ་རྒྱར་༸གོང་ས་༸སྐྱབས་མགོན་ཆེན་པོ་མཆོག་གིས་དྷ་རམ་ས་ལའི་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་དྲྭ་རྒྱ་བརྒྱུད་བཀའ་ཆོས་དང་བཀའ་སློབ་བསྩལ་གཏན་འཁེལ་བའི་གསལ་བསྒྲགས་སྤེལ་འདུག་པ་དང་། དེའི་ནང་ཀུན་གྱིས་དགོངས་མངའ་བཞིན་རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་གསར་པའི་གློ་ཚད་རིམས་ནད་ COVID-19 ཀྱི་གནས་ཚུལ་ཛ་དྲག་ཆེས་ཆེར་འགྲོ་བཞིན་ཡོད་སྟབས། སང་ཕྱི་ཟླ་ ༨ ཚེས་ ༡༢ ཉིན་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཨ་རིའི་ཞི་བདེའི་བསྟི་གནས་སློབ་གཉེར་ཁང་གི་དབུ་འཛིན་ Nancy Linborg ལགས་དང་། དེ་གའི་མི་རབས་འཕོ་འགྱུར་གྱི་ཉམས་ཞིབ་པ་ཁག་ཅིག་བཅས་ནས་རྙོག་ཟིང་དང་། གཉན་རིམས། བྱམས་བརྩེ་བཅས་ཀྱི་ཐད་དྲྭ་ཐོག་བགྲོ་གླེང་གནང་རྒྱུ་དང་། དེ་བཞིན་ཚེས་ ༢༥ ཉིན་སྔ་དྲོ་ཆུ་ཚོད་ ༩ ནས་ ༡༠ བར་བགྲོ་གླེང་འདི་བཞིན་སེམས་བསྲེ་བའི་ལས་འཆར་ཚོགས་པས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་མཆོག་དབུ་བཞུགས་ཐོག་དེང་རབས་ཀྱི་ཤེས་ཡོན་ལམ་ལུགས་ནང་ཆོས་ལུགས་དང་མ་འབྲེལ་བའི་སྤྱོད་བཟང་མཁོ་ཚུལ་གྱི་བགྲོ་གླེང་མཛད་རྒྱུ་དང་། ཚོགས་པའི་ཚོགས་མི་རྣམས་ནས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་རེད་འདུགཕྱི་ཟླ་ ༩ ཚེས་ ༤ ནས་ ༦ ཉིན་གྲངས་གསུམ་རིང་གི་སྔ་དྲོ་ཆུ་ཚོད་ ༩ ནས་ ༡༠ བར་༸གོང་ས་༸སྐྱབས་མགོན་ཆེན་པོ་མཆོག་གིས་ཨེ་ཤ་ཡའི་ཚོགས་སྡེ་ཁག་ཅིག་ལ་བཀའ་ཆོས་ཤིག་བསྩལ་རྒྱུ། དེ་རྗེས་ཆུ་ཚོད་ ༡༠ ནས་ ༡༠༌༣༠ བར་ཚོགས་པ་དེའི་ཚོགས་མི་རྣམས་ནས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་དང་། གཞན་ཡང་ཕྱི་ཟླ་ ༡༠ ཚེས་ ༢ ནས་ ༤ ཉིན་གྲངས་གསུམ་རིང་གི་སྔ་དྲོའི་ཆུ་ཚོད་ ༩ ནས་ ༡༠ བར་ཐེ་ཝན་གྱི་དད་ལྡན་མང་ཚོགས་ཚོས་ཇི་ལྟར་གསོལ་འདེབས་ཞུས་པ་བཞིན་༸གོང་ས་མཆོག་གིས་༸རྗེ་ཙོང་ཁ་པ་ཆེན་པོས་མཛད་པའི་དྲང་ངེས་ལེགས་བཤད་སྙིང་པོའི་བཀའ་ཆོས་བཀའ་དྲིན་བསྩལ་རྒྱུ་དང་། དེ་བཞིན་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་ཡིན་པ་མ་ཟད། ཟླ་བ་དེའི་ཕྱི་ཚེས་ ༡༥ ཉིན་རྒྱ་གར་གྱི་སྲིད་འཛིན་ཟུར་པ་སྐུ་གཤེགས་ཨེ་པི་ཇེ་ཨབ་དུལ་ཀ་ལཱམ་མཆོག་གི་རྒྱལ་སྤྱིའི་ཐེབས་རྩ་ལས་ཁང་ནས་གོ་བསྒྲིགས་ཞུས་པ་ལྟར་སྲིད་ཟུར་ཨབ་དུལ་ཀཱ་ལམ་མཆོག་འཁྲུངས་ནས་ལོ་ངོ་ ༨༩ འཁོར་བའི་དུས་དྲན་སྲུང་བརྩི་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་ཚོགས་འདུའི་སྐུ་མགྲོན་གཙོ་བོར་གདན་ཞུ་མགྲོན་འབོད་ཀྱིས་བཀའ་སློབ་དང་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་བཅས་ཀྱི་མཛད་འཆར་ཐུགས་གཏན་འཁེལ་འདུགགཞི་རྩའི་དྲྭ་ལམ་ཐད་གཏོང་བརྒྱུད་བཀའ་ཆོས་དང་བཀའ་སློབ་དེ་དག་དགའ་ལྡན་ཕོ་བྲང་གི་གཞུང་འབྲེལ་བརྒྱུད་ལམ་ཁག་ནས་བོད་དབྱིན་རྒྱ་སྐད་སོགས་སྐད་རིགས་སྣ་མང་ཐོག་གསུང་བསྒྱུར་གྱིས་ཐད་གཏོང་གནང་གི་ཡོད་པ་དང་། གསན་གཟིགས་གནང་མཁན་ཚོས་ས་གནས་སོ་སོར་བཅས་པའི་སྤྱི་ཚོགས་རྒྱང་བཀྱེད་ཀྱི་བཀའ་རྒྱ་ལས་མི་འདའ་བར་གསན་གཟིགས་གནང་དགོས་པའི་གཞེན་སྐུལ་གནང་འདུག་པས་དེ་དོན་དགོངས་འཇགས་ཞུ།

དེ་རིང་བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་ལ་གནས་ཚུལ་འབྱོར་བ་ལྟར་ན། ད་ཆ་རྒྱ་ནག་གིས་ལྷ་སའི་ཇོ་ཁང་གི་ནང་དུ་རྒྱ་རིགས་ཡུལ་སྐོར་སྤྲོ་འཆམ་པ་མང་པོ་གཏོང་གི་ཡོད་ནའང་། དམར་ཤོག་གཞུང་གི་བོད་མི་ལས་བྱེད་དང་བོད་པའི་སློབ་མ་སོགས་ཇོ་ཁང་གི་ནང་དུ་མཆོད་མཇལ་ལ་འགྲོ་རྒྱུར་བཀག་སྡོམ་བྱས་ཡོད་ལུགས་འཁོད་འདུག ལྷ་སར་གནས་སྡོད་བྱེད་མཁན་གྱི་བོད་མི་ཞིག་གིས་བོད་དོན་ལྟེ་གནས་ཁང་ལ་འགྲེལ་བརྗོད་གནང་པའི་ནང་དུ། རྒྱ་ནག་གི་དབང་འོག་ཏུ། བོད་མིའི་རིག་གཞུང་ནི་རྒྱ་ནག་གི་ཡུལ་སྐོར་སྤྲོ་འཆམ་པ་དག་ལ་སྟོན་རྒྱུའི་དངོས་ཟོག་ལྟ་བུ་ཞིག་ལས། རྒྱ་ནག་གིས་བོད་མི་རྣམས་ཀྱིས་རང་གི་ཆོས་དང་རིག་གཞུང་ལ་བདག་གཅེས་བྱེད་རྒྱུར་གོ་སྐབས་སྤྲོད་ཀྱི་མེད་པར་འཁོད་འདུག དེ་བཞིན། རྒྱ་ནག་གི་གསར་ཁང་ཁག་གིས་གནས་ཚུལ་སྤེལ་བའི་ནང་དུ། འདི་ལོའི་ལོ་ཕྱེད་ཅིག་གི་ནང་དུ། ཏོག་དབྱིབས་རིམས་ནད་ཁྱབ་བརྡལ་བྱུང་བའི་རྗེས་སུ་ལྷ་ས་ནི་རྒྱ་ནག་གི་ཡུལ་སྐོར་སྤྲོ་འཆམ་པ་འགྲོ་སའི་ས་ཁུལ་ལྟེ་བ་ལྟ་བུ་ཞིག་ཏུ་གྱུར་ཡོད་པར་འཁོད་པ་ལྟར། འདི་ལོའི་ནང་དུ་རྒྱ་རིགས་ཡུལ་སྐོར་སྤྲོ་འཆམ་པ་ས་ཡ་༨།༣ ལྷག་ལྷ་སར་ཕྱིན་ཡོད་པ་འཁོད་ཡོད་པ་དང་། སྔར་ལོ་དང་བསྡུར་ན། འདི་ལོའི་ཟླ་བ་དྲུག་པའི་བར་དུ། བོད་ཁུལ་དུ་སྔར་ལོ་ནས་རྒྱ་ནག་གི་ཡུལ་སྐོར་སྤྲོ་འཆམ་པ་བརྒྱ་ཆ་ ༣༦ ལྷག་མང་དུ་ཕྱིན་ཡོད་པ་ཡང་མངོན་གསལ་གནང་འདུག དེ་བཞིན་ལྷ་སའི་ཁུལ་གྱི་འབྲེལ་ཡོད་ཀྱིས་གསལ་བཤད་གནང་བ་ལྟར་ན། གཞི་རྩའི་རྒྱ་ནག་གི་ཡུལ་སྐོར་སྤྲོ་འཆམ་པ་ལྷ་སར་སླེབས་པ་དེས་ས་གནས་ཀྱི་དཔལ་འབྱོར་འཕེལ་རྒྱས་ལ་ཕན་ཐོག་འབྱུང་གི་ཡོད་ནའང་། ཡུལ་སྐོར་སྤྲོ་འཆམ་མ་མང་པོས་བོད་ཀྱི་དགོན་གྲོང་གི་རིག་གནས་དང་ཡུལ་སྲོལ་གོམས་གཤིས་ལ་སྣང་མེད་རྡོག་རོལ་ཐེབས་ཀྱི་ཡོད་པ་ལུང་འདྲེན་གྱིས། རྒྱ་རིགས་ཡུལ་སྐོར་སྤྲོ་འཆམ་པ་རྣམས་ཀྱིས་དགོན་པའི་ནང་དུ་གད་སྙིགས་གཡུགས་པ་དང་ཐ་མག་འཐེན་པ་སོགས་ཀྱི་སྣང་ཚུལ་གང་མང་འབྱུང་གི་ཡོད་པ་ཡང་འགྲེལ་བརྗོད་གནང་འདུག བོད་དོན་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས་ཀྱིས་རྒྱ་ནག་གིས་དུས་རྒྱུན་ནས་གྲངས་ཉུང་མི་རིགས་ཀྱི་ཆོས་དང་རིག་གཞུང་རྩ་གཏོར་གཏོང་ཐབས་སུ་ས་ཁུ་སོ་སོར་རྒྱ་ནག་གི་ཡུལ་སྐོར་སྤྲོ་འཆམ་པ་མང་པོ་ཆེད་གཏོང་བྱས་ཏེ་མི་སེར་སྤེལ་ཡུལ་གྱི་ལམ་ལུགས་རྒྱུན་འཁྱོངས་བྱེད་བཞིན་ཡོད་་པར་ངོ་སྤྲོད་གནང་སོང་། གཞི་རྩའི་རྒྱ་ནག་གིས་གྲངས་ཆུང་མི་རིགས་ཀྱི་ཆོས་དང་རིག་གཞུང་ལ་བརྩི་སྲུང་བྱེད་དགོས་བའི་ཁྱབ་བསྒྲགས་མང་པོ་བྱེད་བཞིན་ཡོད་ནའང་། དོན་དུ་བོད་ཁུལ་གྱི་དགོན་པ་གྲྭ་ཚང་ཁག་ཏུ་རྒྱ་གཞུང་གིས་གཏན་འབེབས་བྱས་པའི་བསླབ་གཞི་ཁག་ངོ་སྤྲོད་བྱེད་ཀྱི་ཡོད་པ་དང་། དེ་བཞིན་སློབ་མ་རྣམས་ཀྱང་རང་གི་སྐད་ཡིག་ཆེད་སྦྱོང་གི་ཕྱིར་རུ་དགོན་པ་གྲྭ་ཚང་དུ་ཟུར་སྦྱོང་ལ་འགྲོ་མི་ཆོག་པའི་བཀའ་རྒྱ་བཏང་ཐེངས་མང་བཏང་ཡོད་པ་མ་ཟད།། འདི་ལོ་ནས་མགོ་ལོག་ཁུལ་དང་མཚོ་སྔོན་པོའི་གཡས་གཡོན། དེ་བཞིན་བྲག་དཀར་རྫོང་སོགས་སུ་ཁོར་ཡུག་འབག་བཙོག་གི་གནད་དོན་དང་བསྙལ་ནས་གཞུང་ལམ་ཉེ་འཁྲིས་ཀྱི་མ་ཎི་རྡོ་བརྐོས་དང་དར་ལྕོགས་སོགས་ཡོངས་སུ་གཙང་ཕྱག་བྱེད་དུ་བཅུག་ཡོད་པའི་གནས་ཚུལ་ཡང་མང་པོ་ཐོན་ཡོད་པ་རེད།

གཟའ་འཁོར་སྔོན་མའི་རེས་གཟའ་པ་སངས་ཉིན་ཨ་མི་རི་ཀའི་གཞུང་གིས་ཧོང་ཀོང་གི་སྤྱི་ཁྱབ་ཀེ་རི་ལེམ་གཙོས་འགོ་ཁྲིད་ ༡༠ ནས་རྒྱ་གཞུང་གི་འགོ་ཁྲིད་དང་ལྷན་དུ་མཉམ་ལས་ཀྱིས་ཧོང་ཀོང་རང་སྐྱོང་གི་གནས་བབ་དང་མང་ཚོགས་ཀྱི་ཐོབ་ཐང་རྡོག་རོལ་བཏང་བར་སྐྱོན་བརྗོད་ཤུགས་ཆེ་དང་སྦྲགས་ཏེ་འགོ་ཁྲིད་དེ་དག་ཨ་རི་ནང་དུ་དཔལ་འབྱོར་དང་ཚོང་ལས་ཀྱི་ལས་གཉེར་ཐོབ་དབང་བཀག་སྡོམ་གྱིས་སྲིད་དོན་གྱི་ཉེས་ཆད་འགེལ་རྒྱུ་ཡིན་པ་དང་། ཁ་སང་རྒྱ་ནག་གཞུང་གིས་དེར་འཁོན་ལན་ཚུལ་དུ་ཨ་རིའི་གྲོས་ཚོགས་འཐུས་མི་ཁག་ཅིག་གཙོས་གཞུང་འབྲེལ་མིན་པའི་ཚོགས་པའི་འགོ་ཁྲིད་བཅས་མི་སྣ་ ༡༡ ཀྱི་མཚན་ཆེད་འདོན་གྱིས་ཉེས་ཆད་འགེལ་རྒྱུ་ཡིན་པ་བརྗོད་ཡོད་ཀྱང་ད་ཆ་ཉེད་ཆད་གང་ཡིན་ཞིབ་རྒྱས་མངོན་གསལ་མེད་པ་རེད། གནད་དོན་འདིའི་ཐད་རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པ་ Zhao Lijian ཡིས་ད་ལན་རྒྱ་གཞུང་གིས་ཨ་རིའི་གྲོས་ཚོགས་འཐུས་མི་དང་གཞུང་འབྲེལ་མིན་པའི་ཚོགས་མི་ཁག་ཅིག་གི་མཚན་ཆེད་འདོན་བྱས་པ་དེ་ནི་ཨ་རིའི་བྱེད་ཕྱོགས་དེར་ཡ་ལན་ཞིག་དང་མི་སྣ་དེ་དག་ནི་ཧོང་ཀོང་གི་གནད་དོན་ཐད་དགོས་མེད་ཐེ་བྱུས་བྱེད་མཁན་དང་སྐྱོན་བརྗོད་བྱེད་མཁན་འབའ་ཞིག་ཡིན་པར་བརྗོད་འདུག ད་དུང་ཨ་རི་ནས་ཧོང་ཀོང་གི་གནད་དོན་ཐད་ཐེ་བྱུས་བྱེད་པར་རྒྱ་ནག་ནས་དེར་མོས་མཐུན་མེད་པ་དང་སྒོས་ཧོང་ཀོང་དེ་རྒྱ་ནག་གི་ཡིན་པས་ཧོང་ཀོང་གི་གནད་དོན་དེ་རྒྱ་ནག་ནང་མོལ་གྱི་གནད་དོན་ཡིན་པར་བརྟེན་ཕྱི་ཕྱོགས་ནས་དེར་ཐེ་བྱུས་བྱེད་དབང་མེད་པར་བསྐྱར་བཤད་བྱས་ཡོད་པ་རེད།རྒྱ་གཞུང་གི་སྲིད་དོན་གྱི་ཉེས་ཆད་འགེལ་རྒྱུའི་མི་གཞུང་ཁོངས་སུ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Ted Cruz ལགས་དང་སྐུ་ཞབས་ Marco Rubio ལགས།   སྐུ་ཞབས་ Tom Cotton ལགས།   Josh Hawley  ལགས། Pat Toomey  ལགས། དེ་བཞིན་གྲོས་ཚོགས་འོག་མའི་འཐུས་མི་སྐུ་ཞབས་ Chris Smith ལགས་དང་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་སྤྱི་ཁྱབ་ངེས་སྟོན་པ་སྐུ་ཞབས་ Kenneth Roth ལགས། ཨ་རིའི་མང་གཙོ་གོང་སྤེལ་བསྟི་གནས་ཁང་གི་འགན་འཛིན་སྐུ་ཞབས་ Carl Gershman ལགས། རང་དབང་ཁང་པའི་འགན་འཛིན་ Michael Abramowitz ལགས་སོགས་གྲོས་ཚོགས་འཐུས་མི་དང་གཞུང་འབྲེལ་མིན་པའི་ཚོགས་པའི་འགོ་ཁྲིད་ཡོད་པ་རེད།

དེའང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འཇར་མན་ནིའི་ཁོར་ཡུག་སྲུང་སྐྱོབ་ཀྱི་གསར་འགོད་པ་སྐུ་ཞབས་ Franz Alt ལགས་རྣམ་གཉིས་ཟུང་འབྲེལ་གྱིས་ལྗགས་རྩོམ་མཛད་པའི་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་འཛམ་གླིང་ཡོངས་ལ་གཞེན་སྐུལ་གྱི་ཕྱག་དེབ་ Our Only Home: A Climate Appeal to the World ཞེས་ང་ཚོའི་ཁྱིམ་གཞིས་ཁོ་ན་ཉིད་ཅེས་པ་དེ་འདི་ལོའི་ཕྱི་ཟླ་ ༡༡ ཚེས་ ༡༢ ཉིན་དངོས་སུ་དཔར་སྐྲུན་གྱི་དབུ་འབྱེད་གནང་གཏན་འཁེལ་འདུག ཕྱག་དེབ་དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་རབས་གསར་པ་ཚོའི་མདུན་ལམ་ལ་ཆེད་དམིགས་ཀྱིས་འཛམ་གླིང་གི་སྲིད་དོན་དབང་ལྡན་དག་ལ་གོ་ལའི་གནམ་གཤིས་འགྱུར་ལྡོག་དང་ཁོར་ཡུག་སྲུང་སྐྱོབ་ཀྱི་གནད་དོན་དང་འབྲེལ་བའི་ངལ་སེལ་ཐད་འཛིན་པའི་འགལ་ཟླའི་ལྟ་ཚུལ་རྣམས་སྤངས་ནས་གོ་ལའི་གནམ་གཤིས་འགྱུར་ལྡོག་དང་ཁོར་ཡུག་སྲུང་སྐྱོབ་གནང་ཕྱིར་ཐུན་མོང་གིས་འབད་བརྩོན་གནང་དགོས་པའི་གཞེན་སྐུལ་མཛད་པའི་ཕྱག་དེབ་ཅིག་ཆགས་ཀྱི་ཡོད་པ་རེད་འདུགང་ཚོའི་ཁྱིམ་གཞིས་ཁོ་ན་ཉིད་ཅེས་པའི་ཕྱག་དེབ་དེ་ཡོ་རོབ་རྒྱལ་ཁབ་ཁག་གི་ནང་དཔར་སྐྲུན་གནང་མཁན་དབྱིན་ཇིའི་རྒྱལ་ས་ལོན་ཌོན་གྱི་ Bloomsbury Sigma དཔར་སྐྲུན་ཁང་དང་། ཨ་རི་དང་ཁེ་ན་ཌ་བཅས་བྱང་ཨ་རིའི་ཁུལ་དུ་འཛམ་གླིང་ཐོག་དཔར་སྐྲུན་ཁང་ཆེ་ཤོས་གྲས་ཡིན་པ་མ་ཟད། དབྱིན་ཡིག་གི་ཕྱག་དེབ་དཔར་སྐྲུན་གནང་མཁན་ཆེ་ཤོས་ལྔའི་ཁོངས་ནས་གཅིག་ཡིན་པ་ Harper Collins དཔར་སྐྲུན་ཁང་གཉིས་ཀྱིས་དཔར་སྐྲུན་གནང་གི་ཡོད་པ་རེད། Bloomsbury Sigma དཔར་སྐྲུན་ཁང་གི་རྩོམ་སྒྲིག་པ་སྐུ་ཞབས་ Jim Martin ལགས་ཀྱིས་ད་ཆ་ང་ཚོ་ཏོག་དབྱིབས་གཉན་རིམས་ཁྱབ་གདལ་གྱི་ཆེས་ཛ་དྲག་གྱི་རྒྱ་ལས་གྲོལ་ཉེ་བའི་མཚམས་འདིར་ང་ཚོས་ངེས་པར་དུ་ད་ལྟ་འཕྲད་བཞིན་གོ་ལའི་གནམ་གཤིས་འགྱུར་ལྡོག་གི་གནད་དོན་ཐོག་ཤུགས་སྣོན་རྒྱག་དགོས་པ་དང་ལྷག་དོན་ཕྱག་དེབ་འདིའི་ནང་༸གོང་ས་མཆོག་གིས་གནམ་གཤིས་འགྱུར་ལྡོག་གི་བྱ་བབ་ཁག་གི་ཐོག་དགོངས་འཆར་ཇི་གནང་དག་ལ་དོ་སྣང་རྒྱ་གང་ཆེ་གནང་དགོས་པའི་རེ་སྐུལ་གནང་འདུག སྤྱིར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་སྤྱི་དང་སྒོས་འཛམ་གླིང་ཁྱོན་གྱི་སྐྱེ་འགྲོ་རྣམས་ཀྱི་བདེ་ཐབས་ཁོ་ནར་དགོངས་པ་ཆེ་བཞེས་ཀྱིས་རང་རྣམ་དང་ནང་པའི་ལྟ་གྲུབ། ཆོས་ལུགས་རིས་མེད། འགྲོ་བ་མིའི་བཟང་སྤྱོད། བྱམས་བརྩེ། དེ་བཞིན་བདེ་སྐྱིད་སྐྲུན་ཐབས། འཛམ་གླིང་ལ་བཅངས་པའི་དགོངས་བཞེད་ལ་སོགས་པའི་ཕྱག་དེབ་ཇི་སྙེད་ཅིག་ལྗགས་རྩོམ་མཛད་ཡོད་པ་མ་ཟད། འདི་ལོའི་ཕྱི་ཟླ་ ༣ པའི་ནང་༸གོང་ས་མཆོག་གིས་མཛད་པའི་བྱིས་དེབ་བྱམས་བརྩེའི་ས་བོན་ཞེས་པ་དེ་དཔར་སྐྲུན་གནང་ཡོད་པ་རེད།

ཨ་རི་དང་ཐེ་ཝན་གཉིས་ཀྱི་ཚོང་འབྲེལ་དང་འཕྲོད་བསྟེན་ལས་གཞི་སོགས་རྒྱ་སྐྱེད་ལ་དམིགས་ཏེ་ཉེ་ཆར་རེས་གཟའ་ཉི་མའི་ཉིན་ཨ་རིའི་འཕྲོད་བསྟེན་དྲུང་ཆེ་སྐུ་ཞབས་ Alex Azar མཆོག་ཐེ་ཝན་ནང་གཞུང་འབྲེལ་འཚམས་གཟིགས་སུ་ཕེབས་སྐབས་ཡུལ་དེའི་ཕྱི་སྲིད་བློན་ཆེན་གཞོན་པ་ Tien Chung-kwang ལགས་ནས་དགའ་བསུའི་སྣེ་ལེན་ཞུས་པ་མ་ཟད། ཁ་སང་སྲིད་འཛིན་ Tsai Ing-wen མཆོག་དང་མཇལ་འཕྲད་ཀྱིས་གསར་འགོད་ལྷན་ཚོགས་སོགས་གནང་ཡོད་པ་རེད། གཞི་རྩའི་ད་རེས་ཨ་མི་རི་ཀའི་འཕྲོད་བསྟེན་དྲུང་ཆེ་སྐུ་ཞབས་ Alex Azar མཆོག་ཐེ་ཝན་ནང་གཞུང་འབྲེལ་འཚམས་གཟིགས་སུ་ཕེབས་པ་ནི་ཕྱི་ལོ་ ༡༩༧༩ རྗེས་སུ་ཨ་རིའི་ཆེས་མཐོའི་སྐུ་ཚབ་ཐེ་ཝན་ནང་ཕེབས་པ་ཐེངས་དང་པོ་དེ་ཆགས་ཀྱི་ཡོད་པ་དང་། ཁོང་གིས་གསར་འགོད་ལྷན་ཚོགས་ཐོག་སྐུ་ཞབས་ Alex Azar ལགས་ནས་སྲིད་འཛིན་ Tsai Ing-wen མཆོག་གིས་དབུས་པའི་ཐེ་ཝན་མང་ཚོགས་ནས་དགའ་བསུའི་སྣེ་ལེན་ཞུས་པར་ཐུགས་རྗེ་ཆེ་ཞུས་པ་དང་སྦྲགས། ཨ་རིའི་སྲིད་འཛིན་སྐུ་ཞབས་ Donald Trump མཆོག་ནས་ཐེ་ཝན་རྒྱལ་ཁབ་ལ་རྒྱབ་སྐྱོར་ཤུགས་ཆེ་གནང་བཞིན་ཡོད་པ་མ་ཟད་ཨ་རིའི་ངོས་ནས་ཐེ་ཝན་གྱི་མང་ཚོགས་དང་ཕྱི་གསལ་ནང་གསལ་ཐོག་ལས་དོན་གནང་བཞིན་པར་བསྔགས་བརྗོད་ཞུ་བཞིན་ཡོད་ཅེས་གསུངས་འདུག ལྷག་པར་དུ་སྐུ་ཞབས་མཆོག་ནས་ཏོག་དབྱིབས་རིམས་ནད་ཀྱི་དུས་སྐབས་འདིར་ཐེ་ཝན་ཕྱོགས་ནས་འབད་བརྩོད་གང་ཐུབ་གནང་བ་དང་བསྟུན་རིམས་ནད་སྔོན་འགོག་གི་ལས་དོན་ཚགས་ཚུད་གནང་བར་ཡི་རངས་བསྔགས་བརྗོད་དང་། ཨ་རི་དང་ཐེ་ཝན་གཉིས་ཀྱི་འབྲེལ་བ་འདི་བཞིན་དུས་ནས་དུས་སུ་ཇེ་བཟང་དུ་འགྲོ་བཞིན་ཡོད་སྐོར་གསུངས་འདུག སྐབས་དེར་ཐེ་ཝན་གྱི་སྲིད་འཛིན་ Tsai Ing-wen མཆོག་གིས་ཨ་རིའི་སྐུ་ཚབ་མཆོག་གི་འཚམས་གཟིགས་བརྒྱུད་ནས་ཐེ་ཝན་དང་ཨ་རི་གཉིས་ཀྱི་དབར་རིམས་ནད་སྔོན་འགོག་ཙམ་མིན་པར་གཉན་རིམས་དང་འབྲེལ་བའི་ཉམས་ཞིབ་དང་སྨན་སྦྱོར་གྱི་ལས་དོན་ཁག་གོང་མཐོར་གཏོང་ཐུབ་པ་མ་ཟད། ཞི་བདེ་རྒྱ་མཚོའི་མངའ་ཁུལ་གྱི་བདེ་འཇགས་ལས་དོན་སོགས་ཀྱི་ཐོག་མཉམ་ལས་ཐུབ་རྒྱུའི་གོམ་སྟབས་ཆེན་པོ་ཞིག་ཀྱང་རེད་ཅེས་གསུངས་འདུགལྷག་པར་དུ་སྲིད་འཛིན་མཆོག་ནས་དེ་སྔ་ཨ་རི་སྲིད་གཞུང་ནས་ཐེ་ཝན་འདི་འཛམ་གླིང་འཕྲོད་བསྟེན་སྒྲིག་འཛུགས་ཁོངས་སུ་ཚུད་རྒྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག རྒྱ་ནག་ཕྱོགས་ནས་གནད་དོན་དེ་ཆབ་སྲིད་དང་འབྲེལ་བ་བཏགས་ཏེ་ད་བར་སྐྱོན་བརྗོད་བྱེད་བཞིན་པ་དེ་ནི་རྒྱལ་སྤྱིའི་འཕྲོད་བསྟེན་ཐོབ་ཐང་གི་གཞི་རྩའི་རྩ་འཛིན་དང་ཡོངས་སུ་འགལ་བ་རེད་ཅེས་གསུངས་འདུག ཐེངས་འདིའི་ཨ་རིའི་ཆེས་མཐོའི་སྐུ་ཚབ་ཐེ་ཝན་ནང་འཚམས་གཟིགས་སུ་ཕེབས་པ་དང་བསྟུན། རྒྱ་ནག་ཕྱོགས་ནས་ཐེ་ཝན་གྱི་མཁའ་དབྱིངས་སུ་དམག་འཐབ་གནམ་གྲུ་བཏང་སྟེ་འཇིགས་སྐུལ་རིགས་བྱས་པ་མ་ཟད་ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་རྒྱ་ནག་ཕྱོགས་ནས་དེ་སྔ་ནས་ཨ་རི་དང་ཐེ་ཝན་དབར་གཞུང་འབྲེལ་གྲོས་མོལ་ཡོངས་རྗོགས་ལ་འགག་པ་བྱེད་བཞིན་ཡོད་པ་དང་། ལྷག་པར་དུ་ཐེ་ཝན་གྱི་གནད་དོན་དེ་ནི་རྒྱ་ནག་གི་ཚོར་བ་རྣོ་བའི་གནད་དོན་ཞིག་ཡིན་སྟབས་ཨ་རིའི་ངོས་ནས་ཀྱང་རྒྱ་ནག་གཅིག་གི་སྲིད་བྱུས་ལ་བརྩི་སྲུང་ཞུས་ཏེ་ཨ་རྒྱ་གཉིས་ཀྱི་འབྲེལ་བ་དམ་ཟབ་ལ་འབད་དགོས་ཞེས་བརྗོད་འདུགཐེངས་འདིའི་ཨ་རིའི་ཆེས་མཐོའི་སྐུ་ཚབ་ཐེ་ཝན་དུ་ཕེབས་པ་དང་འབྲེལ་ནས་དཔྱད་ཞིབ་པ་ཁག་ཅིག་ནས་འཚམས་གཟིགས་འདིས་ཨ་རི་དང་ཐེ་ཝན་དབར་འབྲེལ་བ་ཇེ་བཟང་དུ་འགྲོ་ངེས་ཡིན་སྐོར་གསུང་མཁན་འདུག་པ་དང་། ཡང་ལ་ལས་འདི་ནི་ཨ་རི་སྲིད་གཞུང་གིས་ཐེ་ཝན་སྤྱོད་ནས་རྒྱ་ནག་ལ་ཁ་གཏད་གཅོག་རྒྱུ་དང་། ལྷག་པར་དུ་སྲིད་འཛིན་ཊམ་མཆོག་གིས་ཏོག་དབྱིམས་རིམས་ནད་སྔོན་འགོག་ཐད་འཐུས་ཤོར་བྱུང་བ་རྣམས་སྦས་གསང་བྱེད་བཞིན་ཡོང་ལ་ཉེ་བའི་ཨ་རིའི་འོས་བསྡུའི་ལས་རིམ་ལ་ཁེ་ཕན་ཡོང་ཕྱིར་གནང་བ་རེད་སོགས་གསུང་མཁན་འདུག རྩ་བའི་ཐེངས་འདིའི་ཨ་རིའི་འཕྲོད་བསྟེན་དྲུང་ཆེ་སྐུ་ཞབས་ Alex Azar མཆོག་ཐེ་ཝན་ནང་འཚམས་གཟིགས་གནང་བའི་ཁྲོད་ཐེ་ཝན་འཕྲོད་བསྟེན་བློན་ཆེན་དང་ལྷན་དུ་འཕྲོད་བསྟེན་ལས་དོན་ཐོག་མཉམ་ལས་གནང་རྒྱུའི་གྲོས་མཐུན་ཁག་ཅིག་བཞག་གནང་ཡོད།

དབྱིན་ཡུལ་ནང་དུ་སྨན་ཞབས་པའི་ཕྱག་ལས་གནང་མཁན་བསྟན་འཛིན་བཟང་མོ་ལགས་དང་ཁོང་གི་སྐུ་ཟླ་བཀྲིས་དོན་གྲུབ་ལགས། དེ་བཞིན་བསོད་ནམས་ཚེ་རིང་ལགས། བསྟན་འཛིན་ཕུན་ཚོགས་ལགས་བཅས་བོད་མི་བཞིས་དང་བླངས་ཀྱིས་ཟླ་བ་འདིའི་ཚེས་ ༥ ཉིན་དབྱིན་ཡུལ་གྱི་གྲོང་ཁྱེར་ Bristol ནས་དབུ་འཛུགས་ཀྱིས་རྒྱ་ནག་གི་སྲིད་འཛིན་ནས་བོད་རྒྱ་ཞི་མོལ་སླར་གསོ་བྱེད་དགོས་པ་དང་རྒྱལ་སྤྱིའི་གཞུང་མང་ནས་རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་བཏང་བ་མ་ཟད་འཛམ་གླིང་ཡོངས་ལ་ཏོག་དབྱིབ་གཉན་རིམས་ཁྱབ་བརྡལ་བཏང་བའི་འགན་འཁྱེར་འཇུག་དགོས་པ། ༸ཀུན་གཟིགས་༸པཎ་ཆེན་རིན་པོ་ཆེ་མཆོག་དང་བཀྲིས་དབང་ཕྱུག་ལགས་གཙོས་པའི་བོད་མི་ཆབ་སྲིད་བཙོན་པ་རྣམས་གློད་བཀྲོལ་དགོས། དེ་བཞིན་དབྱིན་ཡུལ་གྲོས་ཚོགས་འཐུས་མི་རྣམས་ནས་བོད་ནང་དུ་ཕར་འགྲོ་ཚུར་འོང་གི་ཁྲིམས་འཆར་ལ་རྒྱབ་སྐྱོར་གནང་སྐྱོང་ཡོང་བ་སོགས་ཀྱི་དགོས་འདུན་དོན་ཚན་བཅུ་ཅན་བརྒྱུད་བསྒྲགས་གནང་སྟེ་རྒྱལ་ས་ལོན་ཌོན་བར་སྤྱི་ལེ་ ༡༡༧ ཙམ་ལ་བོད་དོན་ཞི་བའི་གོམ་བགྲོད་ཀྱི་ལས་འགུལ་སྤེལ་བ་དེ་ཁ་སང་ཕྱི་ཚེས་ ༡༠ ཉིན་མཇུག་སྒྲིལ་གནང་འདུགཁ་སང་ལོན་ཌོན་ནང་དུ་འབྱོར་མ་ཐག་ས་གནས་ཀྱི་བོད་རིགས་མང་ཚོགས་དང་བོད་དོན་རྒྱབ་སྐྱོར་བ་རྣམས་ནས་ས་གནས་འདྲ་མིན་དུ་ངང་སྒུག་གནང་བཞིན་ལས་འགུལ་བ་དག་ལ་ཕེབས་བསུ་གཟབ་རྒྱས་ཞུས་འདུག་པ་མ་ཟད།དེ་བཞིན་ལས་འགུལ་བ་རྣམས་དབྱིན་ཡུལ་གྱི་སྲིད་བློན་བཞུགས་གནས་ 10th Downing Street ལ་འབྱོར་སྐབས་སྐུ་ཚབ་དོན་གཅོད་བསོད་ནམས་ཚེ་རིང་ལགས་དང་དོན་ཁང་གི་ལས་བྱེད་གཙོས་དབྱིན་ཡུལ་བོད་རིགས་ཚོགས་པའི་ཚོགས་གཙོ་དང་ཚོགས་མི། དེ་བཞིན་བོད་རང་བཙན་སློབ་ཕྲུག་ཚོགས་པ། བོད་དོན་རྒྱབ་སྐྱོར་བ་སོགས་ཀྱི་ཚོགས་སྐྱིད་ཁག་གི་འཐུས་མིས་སྣེ་ལེན་ཞུས་ཡོད་པ་རེད།བསྟན་འཛིན་བཟང་མོ་ལགས་ཀྱིས་དབྱིན་ཡུལ་གྱི་སྲིད་བློན་མཆོག་གི་མཚན་ཐོག་ལ་ཞུ་སྙན་ཞིག་ཕུལ་འདུག་པ་དང་དེའི་ནང་དབྱིན་ཡུལ་གཞུང་གི་ངོས་ནས་བོད་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་རྒྱ་ནག་གི་དཔོན་རིགས་ཚོར་ Global Magnitsky Act ཞེས་པའི་རྒྱལ་སྤྱིའི་ཁྲིམས་ཀྱི་འོག་ནས་ཉེས་ཆད་འགེལ་དགོས་པ་དང་དབྱིན་ཡུལ་གཞུང་གིས་བོད་ནང་འདྲ་མཉམ་འགྲུལ་སྐྱོད་ཀྱི་ཁྲིམས་གཞི་གཏན་འབེབས་གནང་དགོས་པ། དེ་བཞིན་རྒྱ་གཞུང་གིས་ཁུངས་རྩི་སློབ་གླིང་བརྒྱུད་ནས་རྒྱ་ནག་གི་འཁྱོག་བཤད་དྲིལ་བསྒྲགས་སྤེལ་བ། ཤེས་ཡོན་གྱི་རང་དབང་དམ་དྲག་བྱེད་མུས་ལ་རྟོག་ཞིབ་དང་། ༸སྐུའི་ཡང་སྲིད་ཕེབས་ཕྱོགས་ཀྱི་༸སྐུ་དབང་ཡོངས་རྫོགས་༸གོང་ས་མཆོག་ལ་ཡོད་པ་ལས་དེ་མིན་སུ་གང་ལའང་མེད་པ་སོགས་ཀྱི་གནད་དོན་ལ་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་འདུགདེ་རྗེས་ལས་འགུལ་བ་རྣམས་རྒྱ་ནག་གཞུང་ཚབ་ལས་ཁུངས་མདུན་དུ་ཕེབས་ཏེ་རྒྱ་ནག་གཞུང་ལ་བོད་ཀྱི་གནད་དོན་སེལ་དགོས་པའི་ཞུ་སྙན་ཕུལ་བ་དང་འབྲེལ་ཐེངས་འདིའི་ལས་འགུལ་མཇུག་སྒྲིལ་གནང་འདུགརླུང་འཕྲིན་ཁང་གིས་བསྟན་འཛིན་བཟང་མོ་ལགས་སུ་ལས་འགུལ་དང་འབྲེལ་བའི་བཅར་འདྲི་ཁག་ཅིག་ཞུས་པར་ཁོང་གིས་ད་ལན་གྱི་ལས་འགུལ་སྤེལ་བའི་དམིགས་ཡུལ་ལྟར་ལམ་ལྷོངས་ལྡན་པ་དང་། བོད་དོན་དྲིལ་བསྒྲགས་ཧ་ཅང་ལེགས་པོ་བྱུང་ཞེས་དགའ་ཚོར་ཆེན་པོ་གནང་བ་དང་ཆབས་ཅིག བོད་མི་ཚོས་ངེས་པར་དུ་ད་ལྟའི་རྒྱལ་སྤྱིའི་ཆབ་སྲིད་གནས་སྟངས་ཀྱི་གོ་སྐབས་དམ་འཛིན་ཐོག་ནས་བོད་དོན་ལས་འགུལ་མང་ཙམ་སྤེལ་དགོས་པ་དང་། བོད་དོན་གྱི་ལས་འགུལ་སྤེལ་ཁག་ལ་རྒྱབ་སྐྱོར་གནང་དགོས་གལ་ཡིན་པ་གསུངས་སོང་།རྩ་བའི་བོད་དོན་གོམ་བགྲོད་ཀྱི་ལས་འགུལ་འདི་ནི་འདི་ལོའི་ནང་ཡོ་རོབ་རྒྱལ་ཁབ་ཁུལ་གྱི་བོད་མི་སྒེར་ནས་སྤེལ་བའི་བོད་དོན་གོམ་བགྲོད་ཀྱི་ལས་འགུལ་ཐེངས་གསུམ་པ་དེ་ཡིན་པ་རེད།

དེའང་རྒྱ་ནག་གི་ Wuhan གྲོང་ཁྱེར་ནས་ Corona virus ཞེས་པའི་ཏོག་དབྱིབས་རིམས་ནད་དེ་ཁྱབ་བརྡལ་བྱུང་བའི་རྐྱེན་གྱིས་ལོ་ངོ་ཆིག་སྟོང་སུམ་བརྒྱ་ལྷག་གི་ལོ་རྒྱུས་ལྡན་པའི་བོད་ཀྱི་རྒྱལ་ས་ལྷ་ས་ནང་གི་༸གོང་ས་༸སྐྱབས་མགོན་ཆེན་པོ་མཆོག་གི་དགུན་དུས་བཞུགས་གནས་ཕོ་བྲང་པོ་ཏ་ལ་དེ་བཞིན་འདི་ལོའི་ཕྱི་ཟླ་ ༡ ཚེས་ ༢༧ ཉིན་ནས་ཟླ་བ་ ༤ ལྷག་སྒོ་བརྒྱབ་པའི་གནས་སྟངས་བྱུང་ཡོད་པ་དེ་ལྟར་ཡང་། ཉེ་ལམ་ཕྱི་ཟླ་ ༦ ཚེས་ ༣ ནས་སླར་ཡང་སྒོ་མོ་ཕྱེས་ནས་ཉིན་རེར་ཡུལ་སྐོར་སྤྲོ་འཆམ་པ་ ༢༡༠༠ ལས་བརྒལ་བ་བསྐྱོད་ཆོག་གི་མེད་པ་བཟོས་པ་མ་ཟད། ཕོ་བྲང་པོ་ཏ་ལའི་དོ་དམ་ལས་ཁུངས་ཀྱིས་ཟླ་བ་འདིའི་ཚེས་ ༧ ཉིན་ཏོག་དབྱིབས་གཉན་རིམས་སྔོན་འགོག་འཐུས་ཚང་ཡོང་བར་ཆེད་དམིགས་ཀྱིས་དྲྭ་ཐོག་ནས་གནས་མཇལ་གྱི་ཕྱག་འཁྱེར་མངགས་དགོས་པ་དང་། ཉིན་ལྟར་མང་ཚོགས་ ༤༠༠༠ ལས་བརྒལ་བ་བཅར་མི་ཆོག་པའི་ཚད་འཛིན་གྱི་ཁྲིམས་སྒྲིག་ཡོངས་གྲངས་བྱས་འདུགད་དུང་ཕོ་བྲང་པོ་ཏ་ལའི་དོ་དམ་ལས་ཁུངས་ཀྱིས་གནས་མཇལ་བ་ཚོས་ངེས་པར་དུ་ཉིན་གཅིག་གི་སྔོན་ནས་ཕོ་བྲང་པོ་ཏ་ལའི་སྒོ་འཛིན་མངགས་པའི་མ་ལག་བརྒྱུད་གནས་མཇལ་གྱི་ཕྱག་ཁྱེར་མངགས་དགོས་པ་དང་ཕྱག་ཁྱེར་མངགས་རྗེས་ཕྱི་ཉིན་གནས་མཇལ་དེར་བསྐྱོད་ཆོག་ཀྱང་། མཆོད་མཇལ་གྱི་དུས་ཚོད་སྔ་དྲོ་ཚོུད་ ༩ ནས་ ༢ བར་ཡིན་པ་དང་། ཕྱག་ཁྱེར་མངགས་པའི་དུས་ཚོད་ནི་ཉིན་རེའི་ཞོགས་པའི་ཆུ་ཚོད་ ༨ པར་ཡིན་སྟབས་ཕོ་བྲང་པོ་ཏ་ལའི་དོ་དམ་ལས་ཁུངས་ཀྱི་སྐད་འཕྲིན་བརྒྱུད་དུས་ཚོད་བདམས་ཏེ་མིང་ངོ་མ་ཐོ་འགོད་དང་ཐོབ་ཐང་ལག་ཁྱེར་གྱི་ཨང་རྟགས་དང་རྒྱབ་མདུན་གྱི་པར་བསྐུར་དགོས་པ། དེ་བཞིན་ཁ་པར་ཨང་གྲངས་བརྒྱངས་རྗེས་བླུ་ཡོན་ཞུ་དགོས་པ་མ་ཟད། གནས་མཇལ་བ་ཚོས་མཆོད་མཇལ་ཞུ་རིང་ངེས་པར་དུ་བང་སྒྲིག་དགོས་པ་དང་བར་ཐག་སྨི་ ༡༌༥ ཡན་འཇོག་དགོས་པ། དུག་སེལ་བྱེད་དགོས་པ་མ་ཟད་ཁར་ཁ་རས་རྒྱག་དགོས་པ་སོགས་ཀྱི་དོན་ཚན་ཁག་ཅིག་ཆེད་འདོན་བྱས་འདུགཅི་སྟེ་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཇི་ལྟར་བྱེད་དགོས་པའི་བླང་དོར་སྒྲིག་གཞི་དང་འགལ་བ་གནས་མཇལ་བ་མང་དུ་སོང་ཚེ་གནས་ཚུལ་ལ་ཞིབ་དཔྱད་ཀྱིས་གནས་མཇལ་དག་ལ་ཚོད་འཛིན་བྱེད་པ་སོགས་ཀྱི་ཐག་གཅོད་རྒྱུ་ཡིན་སྐོར་བཀོད་འདུགགཞི་རྩའི་ཕྱི་ཟླ་ ༦ ཚེས་ ༢ ཉིན་ཕོ་བྲང་པོ་ཏ་ལའི་དོ་དམ་ལས་ཁུངས་ཀྱིས་རྒྱ་ནག་རྒྱལ་ནང་གི་ནད་ཡམས་གནས་ཚུལ་ཇེ་ལེགས་སུ་འགྲོ་བཞིན་པར་བརྟེན་གོང་རིམ་ནས་ཀྱང་ཕོ་བྲང་པོ་ཏ་ལ་སྒོ་ཕྱེ་ཆོག་པའི་ཆོག་མཆན་ཏག་དོན་ལྟར་ཚེས་ ༣ ཉིན་ནས་བཟུང་ཏོག་དབྱིབས་གཉན་རིམས་སྔོན་འགོག་འཐུས་ཚང་ཡོང་བར་ཆེད་དམིགས་ཀྱིས་དྲྭ་ཐོག་བརྒྱུད་གནས་མཇལ་གྱི་ཕྱག་འཁྱེར་བླུ་ཡོན་ཞུ་དགོས་པ་དང་། དེ་བཞིན་དུས་ཚོད་ཁག་དབྱེ་སོགས་ཀྱི་ཐོག་ནས་གནས་གཟིགས་སྒོ་ཕྱེ་རྒྱུ་ཡོང་གྲགས་བྱས་ཡོད་ཀྱང་། སེ་འབྲས་དགེ་གསུམ་གྱིས་གཙོས་པའི་ལྷ་སའི་ནང་གི་དགོན་སྡེ་ཁག་ད་དུང་ཡང་སྒོ་ཕྱེ་རྒྱུ་མིན་པར་ཡོངས་གྲགས་བྱས་པའི་གནས་ཚུལ་ཐོན་ཡོད་པ་རེད། སྤྱིར་རྒྱ་ནག་གིས་ཕོ་བྲང་པོ་ཏ་སྒོ་ཕྱེས་པ་དེ་ནི་རྒྱལ་སྤྱིའི་ཐོག་བོད་ཁུལ་དུ་ཞི་འཇགས་ཀྱི་འཚོ་བ་སྐྱེལ་གྱི་ཡོད་པའི་རྣམ་པ་ཕྱིར་སྟོན་ཐབས་གཙོ་བོ་བྱས་པ་ཞིག་ལས་དོན་དངོས་ཐོག་བོད་ཁུལ་དུ་བོད་རིགས་སློབ་ཕྲུག་དང་གཞུང་ཞབས་པ་རྣམས་དགོན་པ་གྲྭ་ཚང་ཁག་གི་ཐུན་མིན་ཆོས་ལུགས་ཀྱི་གནང་སྒོར་ཞུགས་མི་ཆོག་པར་སྟངས་འཛིན་ནན་པོ་བྱས་དང་བྱེད་བཞིན་པར་མ་ཟད་སྤྱི་ཡོངས་ཀྱི་ཆ་ནས་དགོན་སྡེ་ཁག་ལ་དམ་དྲག་བྱེད་བཞིན་པའི་གནས་སྟངས་དེ་ནི་རྒྱུན་ལྡན་ཞིག་ཡིན་པ་རེད།