Tibetan Royal Year of 2151 | Year of the Wood Dragon

གསར་འགྱུར།

 བོད་པའི་དྲྭ་དཔོན་བུད་མེད་ཅིག་རྒྱ་རིགས་ཁྱོ་གས་མེར་བསྲེགས་བཏང་འདུག

གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཟི་ཁྲོན་ཞིང་ཆེན་གྱི་རྒྱལ་རོང་ཁུལ་གྱི་བོད་རིགས་བུད་མེད་ལྷ་མོ་ལགས་ཁོང་གི་ཁྱོ་ག་སྔོན་མས་གཏུམ་སྤྱོད་ཀྱི་དྲག་སྤྱོད་འོག་གསོན་བསྲེགས་བྱས་ཏེ་རང་སྲོག་ཤོར་བར་མང་ཚོགས་ཀྱིས་སེམས་ཁྲལ་གྱིས།  གནད་དོན་དེ་ཁྲིམས་ལྟར་ཐག་གཅོད་ནན་པོ་གནང་རྒྱུ་དང་འབྲེལ། སྤྱི་ཡོངས་ཀྱི་རང་ཁྱིམ་གྱི་གཏུམ་སྤྱོད་ཀྱི་རིགས་དང་འབྲེལ་བའི་གླེང་སློང་བྱེད་མཁན་མང་དུ་འགྲོ་བཞིན་ཡོད་པར་འཁོད་འདུག 

ཤོག་ཁག་རྒོལ་རྡུང་གི་མིང་ཐོག་ནས་བོད་མི་བཅུ་ལ་དྲང་བདེན་མིན་པའི་ཁྲིམས་ཆད།

རྒྱལ་སྤྱིའི་བོད་དོན་ལས་འགུལ་ཁང་གིས། རྒྱ་ནག་གིས་ཤོག་ཁོག་རྒོལ་རྡུང་གི་མིང་ཐོག་ནས་བོད་ཨ་མདོ་བླ་བྲང་བསང་ཆུ་ཁུལ་གྱི་བོད་མི་བོད་མི་བཀྲ་ཤིས་རྒྱ་མཚོ་དང་ཚེ་དབང་སོགས་མི་བཅུ་ལ་ལོ་དགུ་ནས་བཅུ་བཞི་བར་གྱི་ཁྲིམས་ཐག་བཅད་ཡོད་པའི་གནས་ཚུལ་དང་འབྲེལ་ནས། རྒྱ་ནག་གིས་བོད་མི་རྣམས་ལ་དྲང་བདེན་གྱི་ཁྲིམས་བཤེར་བྱེད་དུ་མ་བཅུག་པར་ཁྲིམས་ཐག་གཅོད་བཞིན་ཡོད་སྐོར་མངོན་གསལ་གནང་འདུག

རྒྱ་ནག་མི་མང་སྤྱི་མཐུན་རྒྱལ་ཁབ་ཟེར་བའི་སྤྱི་མཐུན་དེ་ལ་བསམས་ནས་སྤྱི་མཐུན་ཡག་པོ་ཞིག་ཆགས་ཐབས་ལ་འབད་དགོས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཟླ་ ༡༠ ཚེས་ ༢ ཉིན་གྱི་སྔ་དྲོ་ཚོུད་ ༩ ཐོག་བཞུགས་སྒར་༸རྒྱལ་བའི་གཟིམ་ཁང་ནས་དྲྭ་ལམ་ཐད་གཏོང་བརྒྱུད་ཐེ་ཝན་གྱི་དད་ལྡན་མི་མང་གིས་ཇི་ལྟར་གསོལ་འདེབས་ཞུས་པ་བཞིན། རྗེ་ཙོང་ཁ་པ་ཆེན་པོས་མཛད་པའི་དྲང་ངེས་ལེགས་བཤད་སྙིང་པོ་དང་སློབ་དཔོན་ཟླ་བ་གྲགས་པས་མཛད་པའི་དབུ་མ་འཇུག་པ་གཉིས་ཀྱི་བཀའ་ཆོས་དབུ་འཛུགས་གནང་བ་དང་འབྲེལ། ཆོས་འགྲེལ་དངོས་གཞི་དབུ་འཛུགས་མ་གནང་གོང་རྒྱ་ནག་མི་མང་སྤྱི་མཐུན་རྒྱལ་ཁབ་ཟེར་བའི་སྤྱི་མཐུན་གྱི་ནང་དུ་བོད་རིགས་གཙོས་སོག་པོ་དང་ཤིང་ཅང། དེ་བཞིན་མན་ཇུ་སོགས་ཀྱིས་སྤྱི་མཐུན་ལ་བསམས་ནས་རྒྱ་ནག་རྒྱལ་ཁབ་ཀྱི་རིག་གཞུང་སླར་གསོ་གནང་རྒྱུ་གཙོས་ནང་པ་སངས་རྒྱས་པའི་ལྟ་གྲུབ་བརྒྱུད་སྤེལ་གནང་སྟེ་སྤྱི་མཐུན་དེ་ཡག་པོ་ཆགས་ཐབས་ལ་འབད་དགོས་སྐོར་བཀའ་བསྩལ་སོང་། ༸གོང་ས་སྐྱབས་མགོན་ཆེན་པོ་མཆོག་གིས་བར་སྐབས་ཤིག་ནས་ཐེ་ཝན་དང་རྒྱ་ནག་དབར་འབྲེལ་ལམ་ཆེ་རུ་འགྲོ་བཞིན་པ་དང་། ཐེ་ཝན་མི་མང་གིས་ངོས་ནས་རྒྱ་ནག་རྒྱལ་ཁབ་ཀྱི་ནང་དུ་ནང་ཆོས་བརྒྱུད་སྤེལ་གནང་རྒྱུ་དང་འབྲེལ་ནས་མགོན་པོ་༸གང་ཉིད་མཆོག་གིས་ད་བར་ཞི་བདེའི་གཟེངས་རྟགས་བཞེས་མཁན་གྱི་མི་སྣ་ཐམས་ཅད་དང་ལྷན་དུ་མ་འོངས་པར་རྒྱ་ནག་ལ་ཚོགས་འདུ་འཚོགས་རྒྱུའི་ཐུགས་རེ་གནང་བཞིན་ཡོད་པ་བཀའ་གནང་བ་དང་སྦྲགས། མགོན་པོ་མཆོག་གིས་ཆབ་སྲིད་དང་འབྲེལ་ནས་དུས་ནམ་ཡང་རང་བཙན་རྩོད་གནང་མཛད་ཀྱི་མེད་པ་བཀའ་བསྩལ་བ་དང་འབྲེལ། རྒྱ་ནག་མི་མང་སྤྱི་མཐུན་རྒྱལ་ཁབ་ཟེར་བའི་སྤྱི་མཐུན་གྱི་ནང་དུ་བོད་རིགས་གཙོས་སོག་པོ་དང་ཤིང་ཅང། དེ་བཞིན་མན་ཇུ་སོགས་ཀྱིས་སྤྱི་མཐུན་ལ་བསམ་ཚེ་ཕན་ཐོགས་ཆེ་བར་གཟིགས་གནང་མཛད་ཀྱི་ཡོད་པ་མ་ཟད། ཐེ་ཝན་ལྟ་བུ་བར་སྐབས་ཤིག་ནས་རྒྱ་ནག་སྐམ་ས་དང་འབྲེལ་བ་ཤུགས་ཆེར་བྱུང་བཞིན་ཡོད་སྟབས། ཐེ་ཝན་རྒྱལ་ཁབ་གཅིག་པོར་བསམ་རྒྱུ་ཙམ་མིན་པར་རྒྱ་ནག་རྒྱལ་ཁབ་ཀྱི་རིག་གཞུང་སླར་གསོ་གནང་རྒྱུ་གཙོས་ནང་པ་སངས་རྒྱས་པའི་ལྟ་གྲུབ་བརྒྱུད་སྤེལ་གནང་སྟེ་སྤྱི་མཐུན་དེ་ཡག་པོ་ཆགས་ཐབས་ལ་འབད་དགོས་པ་བཀའ་བསྩལ་སོང་། ད་དུང་༸གོང་ས་སྐྱབས་མགོན་ཆེན་པོ་མཆོག་གིས་རིག་པའི་ལམ་ནས་གཞི་ལམ་འབྲས་གསུམ་གྱི་རྣམ་བཞག་གཏན་ལ་དབབ་རྒྱུ་ཡོད་པའི་ནཱ་ལེནྡཱའི་ཆོས་བརྒྱུད་ལ་ནང་པ་ཙམ་མ་ཟད་ཚན་རིག་པ་ཚོས་དམིགས་བསལ་དོ་སྣང་བྱེད་ཀྱི་ཡོད་སྐོར་བཀའ་གནང་བ་དང་འབྲེལ། ཐེ་ཝན་གྱི་ཆོས་གྲོགས་གཙོས་རྒྱ་རིགས་ནང་པ་རྣམས་སྤྱིར་ནང་པའི་ཆོས་བྱེད་མཁན་ཞིག་དང་། ཡང་སྒོས་ནཱ་ལེནྡཱའི་ཆོས་བརྒྱུད་འཛིན་མཁན་ཞིག་ཡིན་པ་དང་། དུས་རབས་ཉེར་གཅིག་པ་འདིའི་ནང་དུ་ཆོས་བརྒྱུད་འཛིན་མཁན་མང་དག་ཅིག་གིས་རང་གི་ཆོས་ལ་དོ་སྣང་བྱ་རྒྱུ་ཆུང་དུ་འགྲོ་བཞིན་ཡོད་རུང། ནང་པའི་ཡུལ་གྲུ་ཁག་ཏུ་ནང་པའི་ཆོས་ལ་སློབ་གཉེར་དང་དོ་སྣང་བྱེད་མཁན་ཇེ་མང་དུ་འགྲོ་བཞིན་པ་དང་། ལྷག་པར་དུ་རྒྱ་རིགས་ནང་ནང་པའི་ཆོས་ལ་དོ་སྣང་བྱེད་མཁན་མང་དུ་འགྲོ་བཞིན་ཡོད་སྟབས། སླད་མར་རྒྱ་ནག་རྒྱལ་ཁབ་ཀྱི་ནང་དུ་སེམས་ཁམས་རིག་པ་དང་ལྟ་གྲུབ་ཀྱི་སྐོར་དེ་ཤེས་ཡོན་གྱི་སྡེ་ཚན་ནང་འཇོག་ཐབས་ལ་འབད་དགོས་པ་བཀའ་བསྩལ་སོང་། གཞན་ཡང་མགོན་པོ་༸གང་ཉིད་མཆོག་གིས་རྒྱ་གར་ལྟ་བུ་ལོ་ངོ་སྟོང་ཕྲག་གསུམ་གྱི་གོང་ན་སྤྱོད་པ་འཚེ་བ་མེད་པ་དང་། དེའི་རྩ་བ་སྙིང་རྗེའི་བློ་དེ་དར་ཟིན་པ་ཞིག་ཡིན་པ་ལྟར། སངས་རྒྱས་བཅོམ་ལྡན་འདས་ལོ་ངོ་ ༢༥༠༠ གོང་རྒྱ་གར་ལ་བྱོན་ནས་སྤྱོད་པ་འཚེ་བ་མེད་པ་དང་སྙིང་རྗེའི་བློ་ཞེས་པ་དེ་རྩ་བར་བཞག་ནས་ལྟ་གྲུབ་ཀྱི་རྒྱབ་རྟེན་ཞིབ་ཚགས་གསུངས་ཡོད་པ་ངོ་སྤྲོད་གནང་བ་དང་འབྲེལ། སངས་རྒྱས་པའི་ཆོས་དེ་དམིགས་བསལ་བ་ཞིག་དང་། ལྷག་པར་དུ་ལེགས་སྦྱར་པའི་ཆོས་བརྒྱུད་དེ་རིགས་པའི་ལམ་ནས་དཔྱད་རྒྱུ་ཡོད་པའི་ཆོས་བརྒྱུད་ཅིག་ཡིན་པ་བཀའ་བསྩལ་སོང་། རྩ་བའི་ཉིན་གྲངས་གསུམ་གྱི་རིང་ལ་༸གོང་ས་སྐྱབས་མགོན་ཆེན་པོ་མཆོག་གིས་བསྩལ་གནང་མཛད་རྒྱུའི་དྲང་ངེས་ལེགས་བཤད་སྙིང་པོ་དང་དབུ་མ་འཇུག་པའི་བཀའ་ཆོས་འདི་བཞིན་ཨིན་ཇི། རྒྱ་གར། བལ་ཡུལ། རྒྱ་ནག། ཧྥ་རན་སི། ར་ཤི་ཡ། སི་པེན། ཝེ་ཏི་ནམ། ཉི་ཧོང་། སོག་པོ། ཀོ་རི་ཡ། འཇར་མན། པོར་ཇུ་གྷལ། ཨི་ཊ་ལི་བཅས་ཀྱི་སྐད་རིགས་ནང་གསུང་སྒྱུར་གནང་གི་ཡོད་པ་རེད།

བོད་མིའི་སྒྲིག་འཛུགས་ཀྱིས་རྒྱ་གར་གྱི་མེས་པོ་དམ་པ་གྷཱཾ་དྷཱི་མཆོག་གི་འཁྲུངས་སྐར་ཉིན་མོ་སྲུང་བརྩི།

བཞུགས་སྒར་རྡ་སར་རྟེན་་གཞི་བྱས་པའི་བོད་མིའི་སྒྲིག་འཛུགས་ཀྱི་ངོས་ནས་གཞུང་འབྲེལ་མཛད་སྒོ་སྟབས་བདེ་ཞིག་གི་ཐོག་ནས། རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གྷཱཾ་དྷཱི་མཆོག་གི་སྐུའི་འཁྲུངས་སྐར་ཉིན་མོ་ ༡༥༡ པ་སྲུང་བརྩི་ཞུས་གནང་སོང་། དེ་ཡང་དེ་རང་སྔ་དྲོ་ཕྱག་ཚོད་ ༡༠ པའི་ཐོག འཛིན་སྐྱོང་བཀའ་ཤག་གི་མདུན་ཐང་དུ། སྲིད་ཚབ་ཆོས་རིགས་བཀའ་བློན་གཡུ་ཐོག་ཀརྨ་དགེ་ལེགས་མཆོག་གི་དབུས། ལྷན་ཁང་ཁག་གི་བཀའ་བློན་རྣམ་པ་དང་དྲུང་འཕར་ཡན་གྱི་སྲིད་ཞུ་བ་རྣམ་པ་ལྷན་འཛོམས་ཐོག སྲིད་ཚབ་མཆོག་གིས་རྒྱ་གར་རྒྱལ་དར་མཁའ་དབྱིངས་སུ་བསྒྲེངས་ཤིང་། རྒྱ་གར་རྒྱལ་གླུ་བླངས་བའི་ལས་རིམ་གྲུབ་རྗེས། བདག་ཉིད་ཆེན་པོ་གཱན་དྷི་མཆོག་གི་སྐུ་པར་མདུན་དུ་སྣང་གསལ་མར་མེ་ཞལ་ཕྱེ་དང་མཇལ་དར་ཕུལ་བའི་རྗེས་སུ། བཀའ་ཤག་གི་མཇལ་འཕྲད་ཁང་དུ་རྟེན་འབྲེལ་གྱི་མངར་ཟས་དང་གསོལ་ཇ་འདེགས་འབུལ་ཞུས་པ་བཅས་མཛད་སྒོ་སྟབས་བདེ་ཞིག་བརྒྱུད་ནས་མེས་པོ་དམ་པ་ཁོང་གི་སྐུའི་འཁྲུངས་སྐར་སྲུང་བརྩི་ཞུས་གནང་སོང་། སྐབས་དེར་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས། དེ་རིང་གིས་དུས་ཚིགས་དང་བསྟུན། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་རྒྱ་གར་གཞུང་མང་གཉིས་དང་གཞིས་བྱེས་བོད་མི་ཡོངས་ལ་འཚམས་འདྲི་ཞུས་པ་དང་འབྲེལ། ང་ཚོའི་ངོས་ནས་དེ་རིང་གི་ཉིན་མོ་དེར་མེས་པོ་དམ་པ་ཁོང་གི་བསླབ་བྱ་བཟང་པོ་རྣམས་ལག་བསྟར་གནང་རྒྱུ་དང་། ཁོང་གི་མཛད་རྗེས་ཁག་རྗེས་དྲན་གནང་བའི་ཐོག་ནས་སྲུང་བརྩི་གནང་དགོས་པའི་སྐུལ་མ་གནང་སོང་། དེ་བཞིན་སྐབས་དེར་གསར་འགོད་པའི་ཁོང་ལ་དེ་རིང་གི་ཉིན་མོ་དང་བསྟུན་ནས་རྒྱ་ནག་གཞུང་ལ་བརྡ་ལན་ག་རེ་ཡོད་པའི་སྐོར་གྱི་དྲི་བར་ལན་འདེབས་དང་འབྲེལ། འཚེ་བའི་ཐོག་ནས་དབང་འཛིན་བྱས་པ་སོགས་དེ་སྔའི་དུས་ཚོད་ཡོལ་ཟིན་པའི་སྐད་ཆ་ཡིན་སྟབས། རྒྱ་ནག་གཙོས་པའི་འཛམ་གླིང་རྒྱལ་ཁབ་སྟོབས་ཆེན་རྒྱལ་ཁབ་ཚང་མས་བདེན་པ་དང་འཚེ་བ་མེད་པའི་ལམ་བུའི་ཐོག་བསྐྱོད་དགོས་པ་དང་། ཁོང་གི་ངོས་ནས་མགྱོགས་མྱུར་བཟང་ཕྱོགས་ཀྱི་འགྱུར་བ་ཐེབས་པའི་ཐུགས་རེ་གནང་བཞིན་ཡོད་པ་གསུངས་སོང་། རྩ་བའི་སྔ་ལོ་ལྟ་བུར་ཆ་མཚོན་ན། དེ་རིང་གི་ཉིན་མོ་དེར་གཞུང་འབྲེལ་མཛད་སྒོ་དང་འབྲེལ། གཙང་བཟོའི་ལས་རིམ་ཐོག་ནས་མེས་པོ་དམ་པ་མཆོག་གི་འཁྲུངས་སྐར་སྲུང་བརྩི་གནང་ཡོད་པ་རེད།

འཛམ་གླིང་གི་ས་ཚིགས་དགུ་བཅུ་ཙམ་གྱི་ནང་ལ་རྒྱ་ནག་གི་རྒྱལ་སྟོན་ཉིན་མོར་ངོ་རྒོལ།

དེ་རིང་ཕྱི་ཟླ་ ༡༠ ཚེས་ ༡ གི་ཉིན་མོ་འདི་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་འགོ་ཚུགས་ནས་མི་ལོ་ ༧༡ འཁོར་བའི་ཉིན་མོ་ཡིན་སྟབས། འཛམ་གླིང་ཁྱོན་དུ་གནས་བཞུགས་བོད་མིས་གཙོས་ཡུ་གུར་བ་དང་ལྷོ་སོག།ཧོང་ཀོང་། རྒྱ་རིགས་མང་གཙོ་དོན་གཉེར་བ་བཅས་ཀྱི་མཚོན་པའི་རྒྱལ་སྤྱིའི་ཚོགས་སྡེ་ཁག་ ༡༨༠ ལྷག་ཙམ་གྱིས་དེ་རིང་གི་ཉིན་མོ་འདི་ཉིན་ནག་ཞིག་ཏུ་ངོས་འཛིན་དང་འབྲེལ། འཛམ་གླིང་གི་ཡུལ་གྲུ་གང་སའི་གྲོང་ཁྱེར་ཆེ་ཁག་ ༩༠ ལྷག་ཙམ་གྱི་ནང་ལ་རྣམ་པ་འདྲ་མིན་སྒོ་ནས་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་སྤེལ་བ་དང་ཆབས་ཅིག རྒྱལ་སྤྱིའི་གཞུང་ཁག་ནས་ནུས་པ་མཉམ་སྤུངས་ཀྱིས་རྒྱ་ནག་ལ་གདོང་ལེན་དགོས་པའི་ཞུ་སྐུལ་གནང་བཞིན་འདུགདེ་རིང་སྡ་དྲོ་མེག་གྷན་ཁྲོམ་གཞུང་གི་བཞི་མདོ་རུ་དབུས་བོད་ཀྱི་གཞོན་ནུ་ལྷན་ཚོགས་དང་བེུད་ལྷན་ཚོགས། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ། དེ་བཞིན་བོད་རྒྱལ་ཡོངས་མང་གཙོ་ཚོགས་པ་བཅས་གཞུང་འབྲེལ་མིན་པའི་ཚོགས་པ་ཁག་ལྔས་རྒྱ་དམར་སྲིད་གཞུང་གི་འཁྱོགས་བཤད་དང་བཙན་གནོན་འོག་རྒྱ་ནག་དམར་པོས་རྫུན་གཏམ་གྱིས་འཛམ་གླིང་མི་ཡི་ཚེ་སྲོག་འཕྲོག་ཅེས་པའི་འབོད་ཚིག་དང་འབྲེལ་ནས་ངོ་རྒོལ་གྱི་ལས་འགུལ་སྤེལ་སོང་།ལས་འགུལ་དེའི་ཐོག་རྒྱ་ནག་སྲིད་གཞུང་གིས་ད་བར་བོད་ནང་བོད་མི་ས་ཡ་མང་པོ་དམར་གསོད་བཏང་བ་རྣམས་མཚོན་ཆེད་དུ་ཕུང་གཟུགས་འདྲ་བཟོ་བྱས་པ་སྤུངས་ནས་དེའི་ཉེ་འཁྲིས་སུ་རྒྱ་ནག་གི་སྲིད་འཛིན་ཞི་ཅིན་ཕང་གི་གདོང་འབག་གྱོན་པའི་མི་ཞིག་གི་ལག་ཏུ་ལྕགས་ཐག་ཅིག་ཁྱེར་ནས་ལྕགས་ཐག་དེའི་སྣེ་མོ་རེར་བོད་མིའི་ལས་འགུལ་བ་བཀྲིས་དབང་ཕྱུག་ལགས་དང་། གནམ་སྡེ་སྒོ་མོ་ཆེ་ཡི་དོན་རྐྱེན་དང་འབྲེལ་བའི་ tank man ཞེས་པའི་འཐབ་མོ་བ། དེ་བཞིན་བོད་ནང་གི་ཆབ་སྲིད་བཙོན་པ་ཆ་ཚང་མཚོན་པའི་མི་གསུམ་བཅས་འདུག་པ་མ་ཟད། གཞུང་འབྲེལ་མིན་པའི་ཚོགས་པ་ལྔའི་ཚོགས་གཙོ་དང་ཚོགས་མི་གཙོས་དྷ་ས་ཁུལ་གྱི་མི་མང་ཁག་ཅིག་གིས་མཉམ་ཞུགས་གནང་བའི་ཐོག་མེག་གྷན་གྱི་ཁྲོམ་གཞུང་དུ་ངོ་རྒོལ་སྐད་འབོད་ཀྱི་ལམ་ནས་གོམ་བགྲོད་གནང་སོང་། སྐབས་དེར་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས་ཀྱིས་དེ་རིང་ཉིམ་མོ་དང་བསྟུན་ནས་ཚོགས་པ་ཁག་ལྔས་བསྒྲགས་གཏམ་སྒྲོག་སྦྱང་གནང་སྐབས། རྒྱལ་སྤྱིའི་རྒྱལ་ཁབ་ཀྱིས་རྣམས་ཀྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོགས་རོལ་གཏོང་བཞིན་པར་སྐྱོན་བརྗོད་དང་ངོ་རྒོལ་བྱ་དགོས་པའི་ཞུ་སྐུལ་གནང་སོང་བ་མ་ཟད། རྒྱལ་སྤྱིའི་རྒྱལ་ཁབ་ཁག་གི་སྲིད་གཞུང་རྣམས་མཉམ་འབྲེལ་གྱི་སྒོ་ནས་རྒྱ་ནག་ཐོག་ནུས་པ་ལྡན་པའི་བསྒྲགས་གཏམ་གསལ་པོ་ཞིག་སྤེལ་དགོས་པ་སྐོར་གསུངས་སོང་། དེ་བཞིན་རྒྱལ་སྤྱིའི་ཨོ་རྩལ་མཐུན་ཚོགས་ཀྱིས་ཕྱི་ལོ་ ༢༠༢༢ ལོར་རྒྱ་ནག་ཏུ་འཚོགས་འཆར་གྱི་ཨོོ་རྩལ་འགྲན་ཚོགས་དེ་ཕྱིར་འཐེན་བྱ་དགོས་པའི་ཞུ་སྐུལ་དང་། རྒྱ་གར་གཞུང་གི་ངོས་ནས་དེ་སྔའི་ནོར་འཁྲུལ་ཡོ་བསྲང་བྱེད་པའི་དུས་ལ་སླེབ་ཡོད་པ་མ་ཟད། བོད་ཀྱི་གནད་དོན་ཐག་གཅོད་བྱེད་པའི་བྱ་ཐབས་འཚོལ་རྒྱུར་སྣེ་ཁྲིད་དགོས་པའི་ཞུ་སྐུལ་གནང་སོང་། དེ་བཞིན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་དེ་རིང་གི་ཉིན་མོ་འདིར་རྒྱ་ནག་གཞུང་ངོས་ནས་དགའ་དགའ་སྤྲོ་སྤྲོ་བྱ་རྒྱུའི་དུས་ཚིགས་ཤིག་ལ་ངོས་འཛིན་བྱེད་བཞིན་ཡོད་རུང་། རྒྱ་ནག་དམར་པོའི་གཞུང་གིས་མི་ལོ་༧༡ གི་རིང་ལ་བོད་མི་ས་ཡ་ལས་འདས་པའི་ཚེ་སྲོག་འཕྲོག་ཡོད་པ་དང་། དགོན་སྡེ་ཁག་གཏོར་བཤིག་བཏང་བ། དེ་བཞིན་བདག་ཅག་གི་རྩ་བའི་བླ་མ་མི་ཡུལ་དུ་བཙན་བྱོལ་ལ་ཕེབས་དགོས་བྱུང་བ་མ་ཟད། གཞིས་བྱེད་གཉིས་སུ་གྱེས་བ་སོགས་ལ་བརྟེན་ནས་དེ་རིང་གི་ཉིན་མོ་དེ་ནི་ཉིན་ནག་ཞིག་ལ་ངོས་འཛིན་གནང་གི་ཡོད་པར་གསུངས་སོང་། གཞི་རྩའི་དེ་རིང་གི་དུས་ཚིགས་འདི་དང་བསྟུན་ནས་རྒྱ་ནག་གཞུང་གིས་གདུག་རྩུབ་ཅན་གྱི་སྲིད་བྱུས་དང་། བྱ་ངན་ལ་གདོང་ལེན་དང་ངོ་རྒོལ་ཆེད་ཐེ་ཝན་དང་ཨོ་སི་ཊོ་ལི་ཡ། ཉི་ཧོང་། ནི་ཐར་ལེནཊ། ཛུ་རིག་སོགས་སུ་བོད་རིགས་གཙོས་ཡུ་གུར་བ་དང། ལྷོ་སོག་པོ། ཤིན་ཅང་། རྒྱ་རིགས་མང་གཙོ་དོན་གཉེར་བ་བཅས་ནས་མཉམ་རུབ་ཀྱི་སྒོ་ནས་རྒྱལ་ཁབ་ ༢༥ དང་གྲོང་ཁྱེར་ ༩༠ ལྷག་ཙམ་གྱི་ནང་དུ་ཉིན་བརྒྱ་དུས་གཅིག་ཏུ་རྒྱ་ནག་གཞུང་ལ་ངོ་རྒོལ་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་ཏེ། རྒྱལ་སྤྱིའི་གཞུང་ཁག་ནས་ནུས་པ་མཉམ་སྤུང་གིས་རྒྱ་ནག་ལ་གདོང་ལེན་དགོས་པ་དང་། རྒྱལ་ཁབ་སོ་སོའི་རྒྱ་ནག་གཅིག་གི་སྲིད་བྱུས་ལ་བསྐྱར་ཞིབ་དགོས་པ། དེ་བཞིན་བོད་དང་ཤར་ Turkistan ནང་མི་རིགས་རྩ་མེད་ཀྱི་སྲིད་བྱུས་ཐད་རྒྱ་ནག་ལ་རོགས་འདེགས་བརྒྱུད་ཚོང་གི་ཁེ་ཕན་ལེན་མཁན་ཚོང་ལས་ཁང་ཁག་ལ་དཔལ་འབྱོར་དང་འབྲེལ་བའི་སྲིད་དོན་ཉེས་ཆད་འགེལ་དགོས་པ་སོགས་ཀྱི་དགོས་འདུན་ཁག་གཅིག་བཏོན་འདུག

བོད་ནང་གི་འགྲོ་བ་མིའི་ཐོབ་ཐང་དང་རྒྱལ་སྤྱིའི་ཁྲོད་བོད་ཀྱི་གནད་དོན་ཐོག་ཡ་ལན་གནང་ཕྱོགས་ཀྱི་ཉན་ཞིབ་ལས་རིམ་གནང་བ།

ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་བོད་ནང་གི་འགྲོ་བ་མིའི་ཐོབ་ཐང་དང་རྒྱལ་སྤྱིའི་ཁྲོད་བོད་ཀྱི་གནད་དོན་ཐད་ལ་ཡ་ལན་གནང་ཕྱོགས་སྐོར་ལ་ཉན་ཞིབ་ལས་རིམ་ཞིག་ཚོགས་གནང་བ་དང་། ལས་རིམ་དེའི་ཐོག་ཚོགས་ཚུང་དེས་ད་ལྟའི་ཆར་བོད་མིར་འཕྲད་བཞིན་པའི་དཀའ་ངལ་དང་རྒྱ་གཞུང་གིས་བོད་གཙོས་རྒྱ་ནག་གི་དབང་སྒྱུར་འོག་ཡོད་པའི་ས་ཁུལ་སོ་སོའི་སྐད་ཡིག་དང་ཆོས་དད་རང་དབང་ལ་དམ་དྲག་བྱེད་ཕྱོགས་སོགས་ཀྱི་གནད་དོན་རྟོག་ཞིབ་སླད་བྱེས་ཀྱི་གདན་ས་བཀྲིས་ལྷུན་པོའི་མཁན་ཐོག་ལྔ་པ་གཟིག་རྒྱབ་རིན་པོ་ཆེ་མཆོག་དང་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས། འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ལྕམ་སྐུ་ Sophie Rechardson ལགས། བོད་དོན་ལས་འགུལ་བསྟི་གནས་ཁང་གི་ཉམས་ཞིབ་པ་བསྟན་འཛིན་རྡོ་རྗེ་ལགས་བཅས་གདན་ཞུ་གནང་འདུག ཁ་སང་ཕྱི་ཚེས་ ༣༠ ཉིན་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་ཉན་ཞིབ་ལས་རིམ་ཐོག་གཟིག་རྒྱབ་རིན་པོ་ཆེ་མཆོག་གིས་༸པཎ་ཆེན་སྐུ་ཕྲེང་བཅུ་གཅིག་པ་༸ཀུན་གཟིགས་༸པཎ་ཆེན་རིན་པོ་ཆེ་མཆོག་རྒྱ་གཞུང་གིས་བཙན་ཁྲིད་བྱས་པ་ནས་བཟུང་ད་ཆ་མི་ལོ་ ༢༥ ལྷག་གི་རིང་གར་སོང་ཆ་མེད་དུ་གྱུར་ཡོད་པ་དང་སྒོས་ཨ་རིས་གཙོས་པའི་རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པས་༸པཎ་ཆེན་རིན་པོ་ཆེ་མཆོག་གློད་བཀྲོལ་སླད་འབད་རྩོན་ཤུགས་ཆེ་གནང་ཡོད་ཀྱང་། རྒྱ་གཞུང་གིས་རིན་པོ་ཆེ་མཆོག་གློད་བཀྲོལ་ཚབ་ཏུ་ཡང་སྲིད་གཞན་ཞིག་ངོས་འཛིན་བྱས་པས་དེར་ང་ཚོ་བོད་མི་གཙོས་འཛམ་གླིང་སྤྱི་ཡོངས་ནས་ངོས་འཛིན་ཞུ་ཐབས་བྲལ་བ་མ་ཟད། རྒྱ་གཞུང་གིས་ངན་བྱུས་དེས་མི་ལོ་ལྔ་བརྒྱ་ལྷག་གི་ལོ་རྒྱུས་ལྡན་པའི་རྩ་ཆེའི་དགོན་པ་ལ་གནོད་འཚེ་ཧ་ཅང་ཆེན་པོ་བཟོས་ཡོད་སྐོར་གསུངས་ཡོད།ལྷག་དོན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་ཐད་ལ་མགོན་པོ་༸གང་ཉིད་མཆོག་གི་དགོངས་པ་ལྟར་གནང་རྒྱུ་ལས་རྒྱ་གཞུང་ནས་ཐེ་བྱུས་བྱེད་དབང་མེད་པ་དང་། Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་གཙོས་པའི་བོད་དོན་དང་འབྲེལ་བའི་ཁྲིམས་འཆར་དེ་དག་ལ་མཇུག་སྐྱོང་དང་རྒྱབ་སྐྱོར་ཤུགས་ཆེ་གནང་དགོས་པ། ཨ་རིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་པས་༸པཎ་ཆེན་རིན་པོ་ཆེ་དང་སྐུ་འཁོར་ནང་མི་ལྷན་རྒྱས། དེ་བཞིན་བྱ་བྲལ་རིན་པོ་ཆེ་སོགས་ཀྱི་གནད་སྟངས་ཐོག་རྩད་ཞིབ་ནན་པོ་གནང་དགོས་པའི་རེ་སྐུལ་གསུམ་གནང་སོང་།   དེ་བཞིན་བསྟན་འཛིན་རྡོ་རྗེ་ལགས་ཀྱིས་འདས་པའི་ལོ་ངོ་བཅུ་ཕྲག་བདུན་ལྷག་རིང་རྒྱ་གཞུང་གིས་ཡ་ང་སྙིང་རྗེ་མེད་པར་བོད་མིའི་ངོ་བོ་དང་ཡུལ་སྲོལ་གོམས་གཤིས་རྩ་གཏོར་སླད་དྲག་སྤྱོད་དང་བཙན་འདེད་ཀྱི་ལས་འགུལ་སྤེལ་ཡོད་པ་དང་རྒྱ་ནག་དེ་རྒྱལ་སྤྱིའི་ཁྲོད་སྟོབས་ཤུགས་ཆེ་བའི་རྒྱལ་ཁབ་ཅིག་ཆགས་པ་དང་བསྟུན་ཨ་རི་ལྟ་བུ་རང་དབང་ཅན་གྱི་རྒྱལ་ཁབ་ལའང་རྒྱ་ནག་གིས་གསང་མྱུལ་དང་གསང་བ་རྐུ་འཁྱེར་སོགས་ཀྱི་བྱ་སྤྱོད་བརྒྱུད་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཟོས་ཡོད་པ་གསུངས་སོང་། དེ་བཞིན་ཁོང་གིས་རྒྱ་ནག་གིས་ཐབས་བྱུས་ལྡན་པའི་ཐོག་མང་ཚོགས་ལ་དྲག་གནོན་བྱེད་བཞིན་ཡོད་པ་མ་ཟད། སྐད་འཕྲིན་བརྒྱུད་རྒྱ་གཞུང་དང་ལྟ་སྤྱོད་མི་མཐུན་མཁན་གྱི་འཐབ་རྩོད་པར་མྱུལ་ཞིབ་བྱེད་ཀྱི་ཡོད་པར་འགྲེལ་བརྗོད་གནང་སོང་བ་དང་ཆབས་ཅིག་ཏུ་ཨ་རི་གྲོས་ཚོགས་ནས་རྒྱ་གཞུང་གི་གཞུང་ཚབ་ཡན་ལག་ཁང་ནས་བོད་ནང་བསྐྱོད་པར་བོད་མིའི་མཐོང་མཆན་ཐད་དམ་དྲག་གི་སྲིད་བྱུས་དང་ཨ་མི་རི་ཀའི་མང་ཚོགས་ལ་མྱུལ་ཞིབ་ཀྱི་བྱ་འགུལ་དག་མཚམས་འཇོག་བྱེད་བཅུག་དགོས་སྐོར་གསུངས་འདུག  ལྷག་པར་དུ་ ཨ་རི་གྲོས་ཚོགས་ཀྱིས་བོད་དེ་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ལ་ངོས་འཛིན་གནང་དགོས་པའང་གསུངས་ཡོད།ལས་རིམ་དེའི་ཐོག་སྐུ་ཞབས་ Meccaci  ལགས་དང་ལྕམ་སྐུ་ Richardson ལགས་རྣམ་གཉིས་ཀྱིས་རྒྱ་གཞུང་གིས་བོད་མིའི་ཐོག་མི་སྤྱོད་ལས་འདས་པའི་མནར་གཅོད་དང་དྲག་གནོན་ཅན་གྱི་སྲིད་བྱུས་ལག་བསྟར་གྱིས་བོད་ནང་གི་བོད་མིའི་སྐད་ཡིག་གཙོས་ཆོས་དད་རང་དབང་། འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་མ་ཟད། རྒྱ་གཞུང་གིས་བོད་མི་ས་ཡ་ཕྱེད་ཀ་ཙམ་བཙན་དབང་གིས་ངལ་རྩོལ་ནང་བཞུགས་བཅུག་གི་ཡོད་པའི་གནད་དོན་འགྲེལ་བརྗོད་དང་སྦྲགས་ཏེ་ཨ་རིའི་ངོས་ནས་ངེས་པར་དུ་བོད་ཐོག་འཛིན་པའི་སྲིད་བྱུས་ལ་བསྐྱར་བཅོས་ཀྱིས་བོད་གནས་འབྲེལ་མཐུད་པ་མྱུར་དུ་བསྐོ་གཞག་གནང་དགོས་སྐོར་གསུངས་སོང་།  ཨ་རི་གྲོས་ཚོགས་འཐུས་མི་སྐུ་ཞབས་ Marco Rubio ལགས་དང་སྐུ་ཞབས།  Chris Smith ལགས། སྐུ་ཞབས་ Angus King ལགས། སྐུ་ཞབས་ Tom Suozzi ལགས་སོགས་གྲོས་ཚོགས་འཐུས་མི་ཁག་ཅིག་ནས་བོད་ནང་གི་འགྲོ་བ་མིའི་ཐོབ་ཐང་དང་ཉེ་ཆར་འཛིན་བཟུང་བྱས་པའི་རྒྱ་ནག་གི་ཨ་རིའི་ཉེན་རྟོག་གསང་མྱུལ་བ་སོགས་ཀྱི་གནད་དོན་གླེང་སློང་དང་སྦྲགས། ཉན་ཞིབ་ཐོག་ཕེབས་མཁན་རྣམས་ལ་འདྲི་རྩད་སོགས་གནང་སྐབས་སྐུ་ཞབས་ Rubio ལགས་ཀྱིས་རྒྱ་གཞུང་གིས་བོད་མིའི་ཐོག་སྤེལ་བཞིན་པའི་དྲག་གནོན་ཅན་གྱི་སྲིད་བྱུས་བརྒྱུད་བོད་མི་རྣམས་ཀྱི་ངོ་བོ་རྩ་མེད་བཟོ་ཐབས་བྱེད་བཞིན་པ་དེ་དུས་ཡུན་རིང་པོ་གོང་ནས་ཡིག་ཆ་ཁག་ཏུ་འཁོད་ཡོད་པ་མ་ཟད་ང་ཚོས་བོད་ཀྱི་གནད་དོན་དེ་ནམ་ཡང་སྣང་མེད་དུ་འཇོག་ཐབས་མེད་ཅེས་གསུངས་ཡོད། ཉན་ཞིབ་ཀྱི་ལས་རིམ་གྲུབ་མཚམས་སུ་ཚོགས་ཆུང་དེའི་ཚོགས་གཙོ་ཨ་རི་གྲོས་ཚོགས་འོག་མའི་འཐུས་མི་སྐུ་ཞབས་ Jim Mcgovern ལགས་ཀྱིས་ཨ་རིའི་ཆབ་སྲིད་ཚོགས་པའི་ཚོགས་མི་རྣམས་ནས་༸གོང་ས་མཆོག་ལ་གུས་བརྩི་ཡོད་པ་དང་སྒོས་ང་ཚོས་ད་བར་རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་ཐད་ཁྲིམས་འཆར་ཁག་ཅིག་གཏན་འབེབས་གནང་སྟབས་སླད་མར་ཡང་མུ་མཐུད་གནང་རྒྱུ་ཡིན་ཞེས་གསུངས་སོང་། ལྷག་པར་དུ་རྒྱ་གཞུང་ནས་ཨ་རིའི་ངོས་ནས་བོད་མིའི་ཐོག་རྒྱབ་སྐྱོར་གནང་བ་དེ་དག་དུས་ཡུན་གང་འཚམས་རྗེས་དང་དེ་བཞིན་༸གོང་ས་མཆོག་༸སྐུ་འཚོ་བཞུགས་མེད་པའི་རྗེས་སུ་མཚམས་འཇོག་གནང་རྒྱུ་ཡིན་པའི་འཁྲུལ་སྣང་ཞིག་གི་འོག་བསྡད་ཡོད་པར་བརྟེན་དེ་ནི་རྒྱ་ནག་ཕྱོགས་ནས་ནོར་འཁྲུལ་ཅན་གྱི་བསམ་བློ་རེད་ཅེས་བསྐྱར་ནན་གསུངས་འདུགགཞི་རྩའི་ CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་ལོ་ལྟར་བཞིན་རྒྱ་ནག་ནང་གི་འགྲོ་བ་མིའི་ཐོབ་དང་ཁྲིམས་ལུགས་ལས་དོན་སོགས་དང་འབྲེལ་ཨ་རིའི་གྲོས་ཚོགས་ནང་ཉན་ཞིབ་ལས་རིམ་དང་།  ཁྲིམས་འཆར་འདོན་སྤེལ་དང་།  ལོ་འཁོར་སྙན་ཐོ་བཅས་འདོན་སྤེལ་གནང་གི་ཡོད་པ་ལྟར། ཚོགས་ཆུང་གིས་ཕྱི་ལོ་ ༢༠༡༩ ལོའི་སྙན་ཐོ་ནང་རྒྱ་ནག་གཞུང་གིས་བོད་ནང་གི་ཆོས་དད་རང་དབང་ལ་བརྡལ་བཤིག་གཏོང་བཞིན་པར་སྐྱོན་བརྗོད་དང་སྦྲགས། རྒྱ་གཞུང་ནས་༸གོང་ས་མཆོག་གི་མ་འོངས་པའི་༸སྐུའི་ཡང་སྲིད་ངོས་འཛིན་ཐད་ཐེ་བྱུས་བྱས་ཚེ་ཨ་རི་གཞུང་ནས་རྒྱ་གཞུང་གི་དེ་འབྲེལ་དཔོན་རིགས་ཚོར་ཉེས་འཆད་འགེལ་རྒྱུ་ཡིན་ཞེས་བརྗོད་ཡོད་པ་རེད།

རྒྱ་གར་ནང་ཟླ་བ་འདིའི་ཚེས་ ༡༥ ནས་བཟུང་ཤེས་ཡོན་གྱི་སྡེ་ཁག་དབུ་འཛུགས་གནང་ཆོག་པ།

རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ ༡༩ པ་དེ་འཛམ་གླིང་སྤྱིར་ཁྱབ་གདལ་བྱུང་བ་ནས་བཟུང་རྒྱལ་ཁབ་མང་པོས་དེ་མ་ཐག་ཏུ་གཉན་རིམས་སྔོན་འགོག་སླད་སྒོ་རྒྱ་དམ་བསྒྲགས་ཀྱི་ཀའ་རྒྱ་གནང་ཡོད་པ་ལྟར་རྒྱ་གར་ནང་དུའང་ཟླ་ ༣ ཚེས་ ༢༥ ནས་རྒྱལ་ཁབ་ཡོངས་སྒོ་རྒྱ་དམ་བསྒྲགས་གནང་ཡོད་པ་རེད།  འོན་ཀྱང་ཟླ་ ༦ པ་ནས་རིམ་པས་ Unlock ཞེས་སྒོ་རྒྱ་དམ་བསྒྲགས་ཀྱི་དུས་བཅད་ལ་གུ་ཡངས་ཀྱི་རིམ་པ་དང་པོ་དང་གཉིས་པ། དེ་བཞིན་གསུམ་པ་དང་བཞི་པ་བཅས་བཀོད་ཁྱབ་གནང་ཡོད་པ་མ་ཟད། ཁ་སང་ཕྱི་ཚེས་ ༣༠ ཉིན་རྒྱ་གར་དབུས་གཞུང་ནས་རྒྱ་གར་ནང་སྒོ་རྒྱ་དམ་བསྒྲགས་ལྷོད་ཡངས་ཐེངས་ ༥ པའི་བཀོད་ཁྱབ་གནང་བ་དང་འབྲེལ། བཀོད་ཁྱབ་དེའི་ནང་མཚན་གྱི་ཐེམ་སྤང་ལ་གུ་ཡངས་གཙོས་ཆེས་ཉེན་ཚབས་ཆེ་བའི་མངའ་ཁུལ་གྱི་རྒྱ་ལས་འདས་པའི་མངའ་སྡེ་དང་ས་ཁུལ་ཁག་ཏུ་སློབ་གྲྭ་དང་ལུས་སྦྱོང་ཁང་སོགས་རིམ་བཞིན་སྒོ་ཕྱེ་ནས་ལས་དོན་གཉེར་ཆོག་པ་དང་། དེ་མིན་ཆེས་ཉེན་ཚབས་ཆེ་བའི་མངའ་སྡེ་དང་ས་ཁུལ་ཁག་མུ་མཐུད་ཕྱིར་བཤོལ་གནང་རྒྱུའི་བཀོད་ཁྱབ་གནང་འདུགསྒོ་རྒྱ་དམ་བསྒྲགས་ལྷོད་ཡངས་ཐེངས་ ༥ པའི་གསལ་བསྒྲགས་དེའི་ནང་གཉན་རིམས་ཁྱབ་གདལ་གྱི་ཉེན་ཚབས་ཆེ་བའི་མངའ་སྡེ་དང་ས་གནས་ཁག་ཏུ་མུ་མཐུད་ཟླ་བ་འདིའི་ཟླ་མཇུག་བར་སྒོ་རྒྱ་བསྡམ་རྒྱུའི་བཀའ་རྒྱ་གནང་འདུག དེ་མིན་ཉེན་ཚབས་ཆེ་བའི་མངའ་ཁུལ་གྱི་རྒྱ་ལས་འདས་པའི་མངའ་སྡེ་དང་ས་ཁུལ་ཁག་ཏུ་མངའ་སྡེ་གཞུང་དང་རྒྱ་གར་དབུས་གཞུང་གི་ཐད་ཀར་སྟངས་འཛིན་འོག་ཡོད་པའི་མངའ་ཁུལ་སོ་སོས་ས་གནས་ཀྱི་གནས་བབ་ལ་གཞིགས་ཏེ་ཐག་གཅོད་འོག་གཙུག་ལག་སློབ་གཉེར་ཁང་དང་མཐོ་སློབ། དེ་བཞིན་སློབ་ཕྲུག་གི་ཕ་མས་མོས་མཐུན་གྱི་རྒྱབ་གཉེར་ཡོད་པ་བཅས་ཀྱི་ཆ་རྐྱེན་འཐུས་ཐོག་ཟླ་ ༡༠ ཚེས་ ༡༥ ནས་བཟུང་ཤེས་ཡོན་གྱི་སྡེ་ཁག་སྔར་རྒྱུན་བཞིན་དབུ་འཛུགས་སམ་འཚོགས་འཐུས་ཆོག་པར་མ་ཟད། དྲྭ་ལམ་སོགས་ཀྱི་ནས་སློབ་ཁྲིད་གནང་རྒྱུ་དེ་དག་སྔ་ལྟར་གནང་འཐུས་ཀྱི་བཀོད་ཁྱབ་གནང་འདུག དེ་བཞིན་སྤྱི་བསྒྲགས་དེའི་ནང་ཟླ་ ༡༠ ཚེས་ ༡༥ ནས་མངའ་སྡེ་གཞུང་དང་རྒྱ་གར་དབུས་གཞུང་གི་ཐད་ཀར་སྟངས་འཛིན་འོག་ཡོད་པའི་མངའ་ཁུལ་སོ་སོས་ཐག་གཅོད་ཀྱི་ཐོག་ནས་གཙུག་ལག་སློབ་གཉེར་ཁང་གི་ཚན་རིག་གི་ཉམས་ཞིབ་སློབ་མ་དང་ཉེ་བའི་གཙུག་ལག་རབ་འབྱམས་པའི་སློབ་མ་ཚོར་བརྟག་དཔྱད་ཁང་དང་ཉམས་གསོག་ཁང་སླར་གཉེར་ཆོག་པ་དང་། དེ་བཞིན་ཡོ་ག་དང་ལུས་སྦྱོང་ཁང་སོགས་དབུ་འཛུགས་གནང་ཆོག་པ་དེ་ལྟར་ཡང་། གློག་བརྙན་ཁང་དང་སྤྲོ་སེང་ས་ཁུལ། དེ་བཞིན་འཁྲབ་སྟོན་ཁང་སོགས་བརྒྱ་ཆ་ལྔ་བཅུ་ལས་མི་འགལ་བའི་མང་ཚོགས་འདུ་བསྐོང་ཐོག་གཉེར་ཆོག་པར་མ་ཟད། དཔལ་འབྱོར་ལྷན་ཁང་གི་བཀའ་འཁྲོལ་ཡོད་པའི་ཐོག་ནས་ཚབས་ཆེ་བའི་མངའ་ཁུལ་གྱི་རྒྱ་ལས་འདས་པའི་མངའ་སྡེ་དང་ས་ཁུལ་ཁག་ཏུ་ཚོང་གཉེར་གྱི་ལས་དོན་དང་འབྲེལ་ཏེ་འགྲེམས་སྟོན་རིགས་གཉེར་ཆོག་གི་འདུགཆབ་སྲིད་གཙོས་ཆོས་ཕྱོགས། ལེགས་བྱང་། རྩེད་རིགས། འཛིན་སྐྱོང་གི་མཛད་སྒོ་སོགས་ལ་མང་ཚོགས་བརྒྱ་ཐམ་པ་ལས་མ་འགལ་བའི་ཐོག་ནས་འདུ་འཛོམས་གནང་ཆོག་པ་དང་། གྲིམ་འགྲུལ་སོགས་ལ་གཞིགས་ན་ནང་སྲིད་ལས་ཁུངས་ཀྱི་ཆོག་མཆན་ཐོབ་པའི་ཐོག་ནས་ཕྱིའི་ཡུལ་གྲུ་ཁག་ཏུ་ཕེབས་རྒྱུའི་འགྲིམ་འགྲུལ་གནང་ཆོག་ཀྱང་། ཆེས་ཉེན་ཚབས་ཆེ་བའི་མངའ་ཁུལ་གྱི་རྒྱ་ལས་འདས་པའི་མངའ་སྡེ་དང་ས་ཁུལ་ཁག་ཏུ་ཟླ་བ་འདིའི་ཚེས་ ༣༡ བར་མུ་མཐུད་སྒོ་རྒྱ་དམ་བསྒྲགས་ཀྱི་བཀའ་རྒྱ་ལས་མི་འདའ་བའི་བཀོད་ཁྱབ་གནང་འདུག་པ་དང་། མང་ཚོགས་ཀྱིས་ངེས་པར་དུ་སྤྱི་ཚོགས་རྒྱང་བཀྱེད་དང་ཁ་རས་གྱོན་རྒྱུ་སོགས་གཉན་རིམས་སྔོན་འགོག་གི་ལས་དོན་ཁག་མུ་མཐུད་ཕྱག་བསྟར་གནང་དགོས་པ་གཞེན་སྐུལ་གནང་ཡོད་པ་རེད།རྩ་བའི་གཉན་རིམས་རྐྱེན་གྱིས་འདས་པའི་ཟླ་ཤས་ནས་སློབ་གྲྭ་དང་མཐོ་སློབ། གཙུག་ལག་སློབ་གཉེར་ཁང་སོགས་སྒོ་རྒྱག་དགོས་པའི་གནས་སྟངས་ཆགས་ཡོད་པ་ལྟར་བཙན་བྱོལ་དུ་ཡོད་པའི་བོད་སློབ་ཁག་ཀྱང་སྒོ་བརྒྱབ་པ་དང་བསྟུན་དྲྭ་ལམ་བརྒྱུད་ནས་དགེ་རྒན་ཚོས་སློབ་ཕྲུག་དག་ལ་སློབ་ཁྲིད་གནང་གི་ཡོད་པ་རེད།ཁ་སང་རྒྱ་གེ་དབུས་གཞུང་གིས་ཟླ་བ་འདིའི་ཚེས་ ༡༥ ནས་བཟུང་སྟེ་གཙུག་ལག་སློབ་གཉེར་ཁང་དང་མཐོ་སློབ། དེ་བཞིན་སློབ་གྲྭ་ཁག་སྔར་རྒྱུན་བཞིན་འཚོགས་ཆོག་པའི་བཀོད་ཁྱབ་ཕེབས་དོན་ལྟར། རླུང་འཕྲིན་ཁང་གིས་སཾ་བྷོ་ཊའི་ཤེ་ཡོན་འགན་འཛིན་ཚེ་རིང་དོན་གྲུབ་ལགས་སུ་དེ་འབྲེལ་བཅར་འདྲི་ཞུས་ཡོད།

བོད་སློབ་ཁག་ཏུ་འབྲེལ་ཐུག་ཞིབ་བཤེར་ཀྱི་ལས་བྱེད་ཆེད་འཛུགས་གནང་དགོས།

རྒྱ་གར་ནང་ཉིན་རེ་བཞིན་ཏོག་དབྱིབས་གཉན་རིམས་ ༡༩ ཕོག་མཁན་གྱི་གྲངས་འབོར་ཇེ་མང་དུ་འགྲོ་བཞིན་ཁྲོད་འདིར་གཟའ་འཁོར་འདིའི་ནང་རྒྱ་གར་དུ་གནས་བཞུགས་བཙན་བྱོལ་བོད་མིའི་སྤྱི་ཚོགས་ཁྲོད་གཉན་རིམས་ཕོག་མཁན་བོད་མི་ ༣༦ དང་གཉན་རིམ་དེའི་རྐྱེན་གྱིས་བོད་མི་ ༢ འདས་གྲོངས་ཕྱིན་འདུགབོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་དེ་རིང་ཕྱི་དྲོ་ཚོུད་ ༤༌༣༠ སྟེང་གོ་སྒྲིག་གནང་བའི་གསར་འགོད་གསལ་བསྒྲགས་ཐོག་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདིའི་ནང་བོད་མི་ ༣༦ ལ་ནད་གཞི་ཕོག་པའི་ཁོངས་ནས་ སོ་ན་ཌ་ནས་ ༢ ཅོན་ཏཱ་ར་ནས་ ༢ ཀོ་ལེ་གྷལ་ནས་ ༡ དི་ལྡི་ནས་ ༤ སྦེལ་ཀོབ་ནས་ ༤ བསྟན་འཛིན་སྒང་ནས་ ༡ མེའོ་ནས་ ༢ མེན་སྤར་ནས་ ༡ ཧུན་སུར་ནས་ ༡ རཱཀ་པུར་ནས་ ༡ མོན་གྷོ་འདོད་རྒུ་གླིང་ནས་ ༡༣ ཨུ་ཌི་ཤ་ནས་ ༢ སྡེ་ར་ལྡུན་ནས་ ༡ ལ་དྭགས་ནས་ ༡ བཅས་བོད་མིའི་གཞིས་ཆགས་ཀྱི་ཡོད་པ་གསུངས་སོང་།དེ་རིང་གི་གསར་འགོད་ལྷན་ཚོགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཀྱིས་སྒོ་རྒྱ་དམ་བསྒྲགས་ལྷོད་ཡངས་ཐེངས་བཞི་པ་དང་ལྔ་པར་དམིགས་ནས་བཀའ་ཤག་བརྒྱུད་མང་ཚོགས་ལ་དོན་ཚན་ ༡༤ ཅན་གྱི་འབོད་སྐུལ་གསོལ་འདེབས་ཞུས་ཡོད་པ་ངོ་སྤྲོད་དང་འབྲེལ། ད་རེས་སླར་ཡང་ ཁ་སང་རྒྱ་གར་དབུས་གཞུང་ནས་རྒྱ་གར་ནང་སྒོ་རྒྱ་དམ་བསྒྲགས་ལྷོད་ཡངས་ཐེངས་ ༥ པའི་བཀོད་ཁྱབ་གནང་དོན་ལྟར་ཉེན་ཚབས་ཆེ་བའི་མངའ་ཁུལ་གྱི་རྒྱ་ལས་འདས་པའི་མངའ་སྡེ་དང་ས་ཁུལ་ཁག་ཏུ་སློབ་གྲྭ་རིམ་བཞིན་སྒོ་ཕྱེ་ནས་ལས་དོན་གཉེར་ཆོག་པའི་བཀོད་ཁྱབ་ཕེབས་ཡོད་པ་བཞིན་བོད་སློབ་ཁག་གི་འབྲེལ་ཡོད་ཚོས་དང་ཐོག་དེར་འབྲེལ་ཐུག་ཞིབ་བཤེར་རམ་ Contract Tracing Staff ལས་བྱེད་ཆེད་བསྐོ་གནང་སྟེ་སྔོན་འགོག་གི་ལས་དོན་ཁག་འཐུས་ཚང་གནང་དགོས་པ་དང་། འཛིན་གྲྭ་དངོས་སུ་ཚོགས་སྐབས་དགེ་རྒན་རེ་མོས་བྱས་ནས་འཛིན་གྲྭར་ཕེབས་སྐབས་རྒྱང་ཐག་བསྟེན་དགོས་པ། སློབ་ཕྲུག་དེ་དག་སྡེ་ཚན་ཆ་བགོས་གནང་དགོས་པ་མ་ཟད། རེས་གཟའ་ཉི་མ་ལའང་སློབ་གྲྭ་རང་དུ་བཞུགས་བཅུག་དགོས་པ་དང་དགེ་རྒན་དགུང་ལོ་ ༦༥ ཡན་ཅན་ཚོས་སྔོན་འགོག་གི་གནང་སྒོ་ཁག་འཐུས་ཚང་གནང་དགོས་པ་སོགས་ཀྱི་དོན་གནད་གསུམ་གྱི་ཐོག་ནས་ལམ་སྟོན་གནང་སོང་། ཁོང་གིས་ད་དུང་འགོག་དབྱེ་ཟུར་འཇོག་ཁང་དུ་བཞུགས་རྒྱུར་འཇིགས་སྣང་གང་ཡང་གནང་མི་དགོས་པའི་ལམ་སྟོན་དང་། དེ་བཞིན་བོད་མིའི་གནས་སྡོད་གནང་ཡུལ་ས་གནས་གང་སར་གོ་སྒྲིག་ཞུས་པའི་འགོག་དབྱེ་ཟུར་འཇོག་ཁང་དུ་དགོངས་པ་ཆེ་བཞེས་ཀྱིས་བཞུགས་དགོས་གནད་ཡིན་པར་གཞེན་སྐུལ་ནན་པོ་གནང་ཡོད། གཞི་རྩའི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གཞིས་ཆགས་ཁག་ཏུ་གཟའ་ཁོར་འདིའི་ནང་བོད་མི་ ༣༦ ལྷག་ལ་ནད་རྟགས་ཡོད་མེད་ཀྱི་རྟོག་ཞིབ་གནང་བ་ལྟར་བོད་མི་ ༢༣ ལ་ནད་དེ་ཐོན་ཡོད་པ་དང་དེ་དག་ལས་མི་ ༡༣ ལ་ནད་རྟགས་གང་ཡང་མེད་པ་རེད་འདུག ད་ལྟའི་ཆར་རྒྱ་གར་དང་བལ་ཡུལ་ནང་གི་ས་གནས་འདྲ་མིན་ ༣༦ ནང་བོད་མི་ཁྱོན་ ༦༤༠༥ ལ་ནད་རྟགས་ཡོད་མེད་བརྟག་དཔྱད་གནང་འདུག་པ་དང་། ལོ་ན་ ༦༠ ཡན་གྱི་བོད་མི་ ༥༠༢༢ དང་། དེ་བཞིན་ཉེན་ཚབས་ཆེ་བའི་བོད་མི་ ༡༣༨༣ བཅས་ལ་དེ་ལྟར་གནང་ཐུབ་འདུག གངས་སྐྱིད་ཁུལ་དུ་མི་ ༡༨༨༨ ལ་རྟོག་ཞིབ་དང་སེམས་ཁམས་འཕྲོད་བསྟེན་དང་འབྲེལ་ནས་བོད་མི་ ༡༠༠ ལ་ལམ་སྟོན་གནང་བ་མ་ཟད། ད་བར་བོད་མི་ ༢༡༡༥༡ ལ་བོད་ཀྱི་གསོལ་སྨན་རིན་མེད་ཐོག་གནང་འདུག

གཞི་རྒྱ་ཆེ་བའི་དོགས་ཟོན་མྱུལ་ཞིབ་དང་བརྒྱུད་ལམ་ཞིབ་བཤེར་འོག་ཏུ་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ།

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ནང་གི་བརྒྱུད་ལམ་ཞིབ་བཤེར་དང་དོགས་ཟོན་མྱུལ་ཞིབ་ཅེས་པའི་དམིགས་བསལ་སྙན་མཐོ་ཞིག་འདོན་སྤེལ་གནང་འདུགརྒྱ་གཞུང་གིས་གཞི་རྒྱ་ཆེ་བའི་དོགས་ཟོན་མྱུལ་ཞིབ་དང་བརྒྱུད་ལམ་ཞིབ་བཤེར་ཤུགས་ཆེ་ལག་བསྟར་དང་། བོད་ནང་དུ་མུ་མཐུད་ཁྲིམས་འགལ་གྱི་ཐོག་ནས་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་ཡོད་པ་མ་ཟད། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་སྒེར་ལངས་རྗེས་སུ་རྒྱ་གཞུང་གིས་བོད་ནང་དམ་དྲག་སྟངས་འཛིན་ཤུགས་ཆེ་རུ་བཏང་ནས་ཞི་རྒོལ་ལས་འགུལ་དེའི་རིགས་བསྐྱར་འབྱུང་མི་ཐུབ་པ་བཟོ་བཞིན་ཡོད་པ་དང་། ཕྱི་ལོ་ ༢༠༡༢ ལོ་ནས་དམར་ཤོག་སྲིད་གཞུང་གིས་སྤྱི་ཚོགས་སྟངས་འཛིན་དོ་དམ་བྱེད་ཐབས་ཤུགས་ཆེ་རུ་བཏང་བ་དེས་བོད་ནང་གི་དངོས་ཡོད་གནས་སྟངས་མཐོང་ཐོས་མེད་པ་བཟོས་ཤིང་། བཙན་དབང་གིས་བོད་རྒྱ་སྒྱུར་བྱེད་ཐབས་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག ལྟེ་གནས་ཁང་གིས་དེ་རིང་དྲྭ་རྒྱར་གསར་དུ་བཏོན་པའི་སྙན་ཐོ་འདིའི་ནང་དུ་རྒྱ་གཞུང་གིས་“དྲ་མིག་ཅན་གྱི་དོ་དམ”དང“གཉིས་ལྡན་དུད་སྦྲེལ”ཟེར་བ་སོགས་གཞི་རྒྱ་ཆེ་བའི་དོགས་ཟོན་མྱུལ་ཞིབ་ཀྱི་བྱེད་ཐབས་སྣ་ཚོགས་འོག་ནས་བོད་ནང་ལོག་ཙམ་མ་ཟད། བཙན་བྱོལ་བོད་མིའི་སྤྱི་ཚོགས་ནང་དུའང་བོད་མི་ཚོ་ཕན་ཚུན་ལ་དོགས་ཟོན་དང་། ལྐོག་ཉན་ལྐོག་ཞུ་བྱེད་དུ་བཅུག་པ་སོགས་ཀྱི་བརྒྱུད་ནས་བོད་ཕྱི་ནང་གཉིས་ཀའི་བོད་ནང་དུ་བོད་མི་ཕན་ཚུན་དང་ཐ་ན་སོ་སོ་རང་ཉིད་ལའང་གཟབ་དགོས་བྱུང་བའི་གནས་སྟངས་ཆགས་ཡོད་སྐོར་དང་། བོད་མི་ཕན་ཚུན་དབར་ལྐོག་ཉན་ལྐོག་ཞུ་དང་ཕན་ཚུན་གཡོ་བཙོང་མ་བྱས་ན་མཇུག་འབྲས་ཚབས་ཆེན་འཁུར་དགོས་པའི་འགན་འཁྲི་བཀོད་ཁྱབ་བཏང་ཡོད་པ་སོགས། གང་ལྟར་རྒྱ་གཞུང་གིས་བོད་མི་ཕན་ཚུན་དབར་ལྐོག་ཉན་ལྐོག་ཞུ་བྱེད་དུ་བཅུག་ནས། བོད་མི་ཚོས་ཆབ་སྲིད་ཀྱི་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ཞི་རྒོལ་དང་ཡང་ན་སོ་སོའི་སྲིད་དོན་དང་རིག་གཞུང་ངོ་བོ་སོགས་གླེང་སློང་ཙམ་ཡང་བྱས་མི་ཆོག་པའི་འཇིགས་སྐུལ་བཏང་བའི་གནས་སྟངས་གསལ་བཀོད་ཀྱིས་བོད་མིའི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གཏོང་བཞིན་ཡོད་པ་སོགས་མངོན་གསལ་གནང་འདུགལྟེ་གནས་ཁང་ནས་གསར་དུ་བཏོན་པའི་སྙན་ཐོ་འདིའི་ནང་ད་དུང་རྒྱ་ནག་སྲིད་གཞུང་གིས་བཙན་དབང་དང་མངོན་འཛིང་ཁྲིམས་ཆད་མ་ཕོག་སྔོན་ནས་རང་གིས་རང་ལ་དམ་དྲག་བྱས་པའི་ཁོར་ཡུག་བསྐྲུན་པའི་འོག རང་དང་རང་གི་ནང་མི་སྤུན་མཆེད་སོགས་ལ་བཙོན་འཇུག་མནར་གཅོད་ཀྱི་ཉེས་ཆད་འགེལ་རྒྱུའི་འཇིགས་སྣང་འོག འདོད་མོས་མེད་བཞིན་དུ་རྒྱ་ནག་དམར་ཤོག་སྲིད་གཞུང་གི་ཁེ་ཕན་སྲུང་སྐྱོབ་དང་རང་གིས་རང་ལ་དམ་དྲག་བྱེད་བཞིན་ཡོད་པ་ནི་ཧ་ཅང་བློ་འཚབ་སྐྱེ་གཞི་ཞིག་ཆགས་ཡོད་པ་དང་། དེ་ནི་རྒྱ་ནག་གཞུང་གིས་བོད་མི་རྣམས་དམར་ཤོག་སྲིད་གཞུང་ལ་ཡིད་རྟོན་བློ་དཀར་ཡོང་ཆེད་ཆབ་སྲིད་ཀྱི་ཐབས་བྱུས་གྲས་ཤིག་ཡིན་པ་དང་། རྒྱ་གཞུང་གི་དྲ་མིག་ཅན་གྱི་དོ་དམ་སྲིད་བྱུས་འོག་དོགས་ཟོན་མྱུལ་ཞིབ་བྱས་ནས་དོགས་ཡོད་ས་གནས་ཁག་ཏུ་དམངས་ཕན་ཉེན་རྟོག་ལས་དོན་ཞབས་ཞུ་ས་ཚིགས་ཟེར་བ་སྟོང་ཁྲག་མང་པོ་ཆེད་འཛུགས་ཀྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་ཞིབ་བཤེར་བྱེད་མུས་ཡིན་པར་མ་ཟད། བོད་ནང་གི་གཞི་རིམ་གྱི་ས་ཁུལ་ནས་ཞིང་ཆེན་རིམ་པའི་ས་ཁུལ་ཁྱོན་ ༥༤༦༤ ནང“དམངས་ཕན་ཉེན་རྟོག་ལས་དོན་ཞབས་ཞུ་ས་ཚིགས”འཛུགས་འཆར་ཡོད་པ་དང་དེའི་བརྒྱུད་བོད་ས་ཡོངས་སུ་ཏང་དང་རྒྱལ་ཁབ་ཀྱི་དབང་ཤུགས་མ་ཁྱབ་པ་མེད་པ་བཟོ་རྒྱུར་དམིགས་བཞིན་ཡོད་པ་མངོན་གསལ་གནང་འདུགལྟེ་གནས་ཁང་གི་ངོས་ནས་བོད་ལྗོངས་ཀྱི་གྲོང་ཁྱེར་ཆེ་ཤོས་ཨང་གསུམ་པ་ཆབ་མདོ་གྲོང་ཁྱེར་ནང་དུ་མང་ཚོགས་ཀྱི་ DNA འམ་རིགས་རྫས་འདུ་ལེན་དང་འབྲེལ་བའི་ལས་གཞིའི་མ་ལག་ཆེད་འཛུགས་ཀྱིས་ས་གནས་ཀྱི་བོད་མི་མང་ཚོགས་ཀྱི་མཛུབ་རྗེས་དང་། ཁྲག་རིགས་མིག་བཤེར་སོགས་ཚུད་པའི་ཆ་འཕྲིན་འདུ་ལེན་བྱེས་པའི་དཔེ་ཚོན་དང་འབྲེལ། རྒྱ་ནག་དེ་དོགས་ཟོན་མྱུལ་ཞིབ་ཀྱི་ཚན་རྩལ་སྔོན་ཐོན་རྒྱལ་ཁབ་ཅིག་ཏུ་བསྐྲུན་ཐབས་བྱེད་བཞིན་ཡོད་པ་མངོན་གསལ་གནང་འདུག དེ་བཞིན་སྙན་ཐོ་དེར་བོད་ནང་ཕེབས་མྱོང་ཡོད་མཁན་སོགས་བོད་མི་མང་པོར་བཅར་འདྲི་དང་ཡིག་ཆ་སོགས་ལག་སོན་བྱུང་ཁག་ཕྱིར་བསྒྲགས་དང་འབྲེལ། རྒྱ་ནག་གཞུང་གིས་བོད་མིིའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་། བཙན་དབང་གིས་རང་གིས་རང་ལ་དམ་དྲག་བྱེད་དུ་བཅུག་པ་དེ་དག་ནི་བོད་ཙམ་མ་ཡིན་པར་རྒྱ་ནག་རྒྱལ་ཡོངས་གཙོས་ཕྱིའི་རྒྱལ་ཁབ་ཁག་ཏུའང་ཁྱབ་སྤེལ་ཕྱིན་ཡོད་པ་དང་། དེ་ནི་རྒྱ་གཞུང་གིས་དབང་ཤུགས་རྒྱ་སྐྱེད་གཏོང་ཐབས་ལ་བརྟེན་ནས་བྱུང་ཡོད་སྐོར་ར་གསུངས་པ་དང་འབྲེལ། རྒྱལ་སྤྱིའི་སྤྱི་ཚོགས་ཀྱི་གཞུང་ཚོགས་ཁག་ནས་ནུས་པ་མཉམ་སྤུངས་ཀྱིས་གདོང་ལེན་གནང་དགོས་པའི་རེ་སྐུལ་གནང་འདུག

Latest news