རྒྱ་ནག

རྒྱ་ནག་གིས་རྒྱ་གར་བྱང་ཕྱོགས་ལ་དྭགས་སྤང་གོང་མཚོའི་ཉེ་འགྲམ་ཆུ་ཤུལ་ས་ཁུལ་ཉེ་སར་ Mobile Tower འམ་ཁ་པར་གྱི་ལྕོག་མཁར་གསུམ་གསར་རྒྱག་བྱེད་བཞིན་པ་མངོན་གསལ་གནང་འདུགཁ་སང་རྒྱ་གར་གྱི་ Hindustan Times དང་ Times Now སོགས་བརྒྱུད་ལམ་ཆེ་ཁག་གིས་གནས་ཚུལ་སྤེལ་བར་ཁ་ཉིན་རྒྱ་གར་བྱང་ཕྱོགས་ལ་དྭགས་མངའ་ཁུལ་གྱི་ཆུ་ཤུལ་ས་གནས་འཐུས་མི་སྐུ་ཞབས་དཀོན་མཆོག་བསྟན་འཛིན་ལགས་ཀྱིས་རང་ཉིད་ཀྱི་འཕྲུལ་སྒྲ་ཐོག་ཆུ་ཤུལ་ཉེ་འགྲམ་གྱི་རྒྱ་ནག་ཕྱོགས་ཀྱི་ས་ཁུལ་དུ་རྒྱ་ནག་གིས་ལག་ཐོགས་ཁ་པར་གྱི་ལྕོག་མཁར་གསུམ་གསར་རྒྱག་བྱས་ཡོད་པའི་འདྲ་པར་དང་བཅས་མངོན་གསལ་གནང་བ་དང་འབྲེལ། རྒྱ་ནག་ཕྱོགས་ནས་ས་མཚམས་ཉེ་འགྲམ་གྱི་ས་ཁུལ་ཁག་ཏུ་འཛུགས་སྐྲུན་གྱི་ལས་གཞི་རྒྱ་ཆེན་པོ་སྤེལ་བཞིན་པའི་ཁྲོད། ཉེ་ཆར་ཆུ་ཤུལ་ཉེ་འགྲམ་གྱི་སྤང་གོང་མཚོ་ཐོག་ཏུ་ཟམ་ཆེན་འཛུགས་སྐྲུན་བྱས་ཟིན་པའི་རྗེས་སུ་ད་ཆ་ས་མཚམས་ས་ཁུལ་གྱི་ཐག་ཉེ་སར་ལག་ཐོགས་ཁ་པར་གྱི་ལྕོག་མཁར་གསུམ་གསར་རྒྱག་བྱས་ཡོད་སྐོར་བཀོད་པ་དང་ཆབས་ཅིག རྒྱ་གར་ཕྱོགས་ཀྱི་ཆུ་ཤུལ་ས་ཁུལ་གྱི་གྲོང་ཚོ་ཁག་ ༡༡ ནང་ད་ཆ་ 4G ལག་ཐོགས་ཁ་པར་འབྲེལ་གཏུག་གི་མཐུན་རྐྱེན་བསྐྲུན་ཡོད་སྟབས། རྒྱ་གར་ངོས་ནས་དེར་སེམས་འཚབ་ཀྱི་གནད་དོན་ཞིག་མ་རེད་དམ་ཞེས་དྲི་བ་བཏང་འདུགརྩ་བའི་སྤང་གོང་མཚོ་ཐོག་ཏུ་རྒྱ་ནག་གིས་ཟམ་ཆེན་གསར་རྒྱག་བྱས་ཡོད་པའིས་ཁུལ་དེའང་དེ་སྔོན་ཕྱི་ལོ་ ༡༩༦༢ ལོའི་རྒྱ་དཀར་ནག་གཉིས་དབར་གྱི་དམག་འཁྲུག་ཁྲོད་རྒྱ་ནག་གིས་ཁྲིམས་འགལ་ཐོག་བཙན་བཟུང་བྱས་པའི་ས་ཁུལ་ཞིག་ཡིན་པ་རེད། ཁོང་གི་ངོས་ནས་འདས་པའི་དུས་ཡུན་ནང་རྒྱ་ནག་གིས་ས་མཚམས་ཁུལ་དུ་འཛུགས་སྐྲུན་གྱི་ལས་གཞི་མང་དག་ཅིག་སྤེལ་བཞིན་ཡོད་པའི་ཐུགས་སྣང་བྱུང་སྐོར་གསུངས་པ་དང་སྦྲགས། ཉེ་ཆར་རྒྱ་ནག་གིས་སྤང་གོང་མཚོ་ཐོག་ཏུ་ཟམ་ཆེན་གསར་རྒྱག་དང་། ད་ཆ་རྒྱ་གར་གྱི་ས་ཐོག་ནས་མཐོང་རྒྱུ་ཡོད་པའི་ལ་དྭགས་སྤང་གོང་མཚོའི་ཉེ་འགྲམ་ཆུ་ཤུལ་ས་ཁུལ་ཉེ་སར་ Mobile Tower འམ་ཁ་པར་གྱི་ལྕོག་མཁར་གསུམ་གསར་རྒྱག་བྱེད་བཞིན་པ་དེས་རྒྱ་གར་ལ་སེམས་འཚབ་ཀྱི་གནད་དོན་ཞིག་ཆགས་ཀྱི་ཡོད་སྐོར་གསུངས་འདུག རྒྱ་ནག་གི་ངོས་ནས་ས་མཚམས་ས་ཁུལ་དུ་འཛུགས་སྐྲུན་ལས་གཞི་གང་ཞིག་སྤེལ་བ་ཡིན་ཀྱང་། དང་པོ་མི་མང་དཀྱུས་མ་བསྡད་བཅུག་ནས་དེ་རྗེས་དམག་མི་བསྡད་ས་བཟོ་ཡི་ཡོད་པར་བརྟེན་ལས་གཞི་རྣམས་གོ་ཉིས་ཆོད་ཀྱི་དམིགས་ཡུལ་ཐོག་ནས་སྤེལ་བཞིན་ཡོད་སྟབས། རྒྱ་གར་ཕྱོགས་ནས་གནད་དོན་དེར་དོ་སྣང་ཆེན་པོ་གནང་སྟེ་རྒྱ་གར་གྱི་ངོས་ནས་ཀྱང་ས་ཁུལ་དེ་དག་ཏུ་འཛུགས་སྐྲུན་གྱི་ལས་གཞི་མང་ཙམ་སྤེལ་དགོས་གལ་ཡིན་པ་གསུངས་འདུགགཞི་རྩའི་རྒྱ་ནག་གི་རྒྱལ་ཁོངས་རྒྱ་སྐྱེད་ཀྱི་སྲིད་བྱུས་འོག་ཏུ་བོད་ཀྱི་ས་ཁག་ཁུལ་བརྒྱུད་ནས་རྒྱ་གར་དང་བལ་ཡུལ། དེ་བཞིན་འབྲུག་སོགས་དང་ས་འབྲེལ་ཡོད་པའི་མཐའ་མཚམས་ཁག་ཏུ་འཛུགས་སྐྲུན་གྱི་ལས་གཞི་སྣ་མང་སྤེལ་བཞིན་པ་མ་ཟད་མཐའ་མཚམས་ཁུལ་དུ་གྲོང་ཚོ་གསར་རྒྱག་གིས་མི་འབོར་ཕོན་ཆེ་འོར་འདྲེན་བྱེད་བཞིན་པའི་ཁྲོད་ད་བར་རྒྱ་དཀར་ནག་གི་བར་དུ་གྲོས་མོལ་ཐེངས་བཅུ་བཞི་ཙམ་བྱས་པའི་རྗེས་སུའང་མཐའ་མཚམས་ཀྱི་དཀའ་རྙོག་དང་འབྲེལ་ནས་གྲོས་མོལ་གྱི་ཐོག་མཇུག་སྐྱོང་བྱེད་རྒྱུ་ཡིན་པར་གྲོས་མཐུན་བྱུང་བ་ཙམ་ལས་དོན་དངོས་ཐོག་ཕྱོགས་གཉིས་དབར་གནད་སྨིན་གྱི་གྲུབ་འབྲས་གང་ཡང་སོན་མེད་པ་རེད།

ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས། རྒྱ་ནག་གཞུང་གིས་ཉེ་ཆར་བོད་ཀྱི་ཆབ་སྲིད་བཙོན་ཟུར་མཆོག་སྤྲུལ་ཟླ་བ་རིན་པོ་ཆེ་མཆོག་དགུང་ལོ་གྱ་དྲུག་ཐོག་དགོངས་པ་རྫོགས་པའི་པའི་སྔ་རྗེས་ཀྱི་གནད་དོན་ལ་གསང་རྒྱ་དང་། རིན་པོ་ཆེའི་འདས་མཆོད་ལ་དམ་དྲག་བྱེད་སྟངས་ལ་གཞིགས་ཚེ། རྒྱ་གཞུང་ངོས་ནས་དྲག་གནོན་བརྒྱུད་༸གོང་ས་མཆོག་གི་ཤུགས་རྐྱེན་བཙན་འགོག་དང་། བོད་བརྒྱུད་ནང་བསྟན་དང་འབྲེལ་བའི་བྱེད་སྒོ་དག་ལ་ཚད་མཐོའི་སྟངས་འཛིན་བྱེད་བཞིན་པ་གསལ་པོ་ཡིན་པ་ར་སྤྲོད་གནང་འདུགདེའང་ཚོགས་པ་དེས་ཁ་སང་སྤེལ་བའི་གནས་ཚུལ་ནང་དུ། རྒྱ་ནག་གིས་བོད་ཁུལ་དུ་དྲག་གནོན་གྱིས་བོད་ཀྱི་གནད་དོན་ཕྱི་ཕྱོགས་སུ་ཁྱབ་སྤེལ་བྱེད་རྒྱུར་བཀག་སྡོམ་བྱེད་མུས་ཡིན་ཡང་། ཉེ་ཆར་ཆབ་སྲིད་བཙོན་ཟུར་མཆོག་སྤྲུལ་ཟླ་བ་རིན་པོ་ཆེ་མཆོག་དགུང་ལོ་གྱ་དྲུག་གི་ཐོག་ལྷ་སར་དགོངས་པ་རྫོགས་པའི་གནས་ཚུལ་དང་། ལྷག་པར་གནས་ཚུལ་དེའི་ཐོག་རྒྱ་ནག་གིས་གསང་རྒྱ་ཤུགས་ཆེ་བྱས་པའི་གནད་དོན་དེ་ཕྱི་ལ་ཐོན་ཡོད་པར་འགྲེལ་བརྗོད་ཀྱིས། རིན་པོ་ཆེ་དགོངས་རྫོགས་ཀྱི་སྔ་རྗེས་གནས་ཚུལ་ཞིབ་ཕྲ་ཡོང་གྲགས་གནང་འདུག གནས་ཚུལ་དེའི་ནང་གསལ་ལྟར་ན།  ནག་ཆུའི་ཤག་རོང་པོ་དགོན་དགའ་ལྡན་དར་རྒྱས་གླིང་གི་མཆོག་སྤྲུལ་ཟླ་བ་རིན་པོ་ཆེ་མཆོག་སྤྲུལ་ཕྱི་ལོ ༢༠༡༠ ལོའི་ཕྱི་ཟླ་ ༥ པའི་ནང་འཛིན་བཟུང་བྱས་པ་དང་། དེའང་གཙོ་བོ་རིན་པོ་ཆེ་མཆོག་གིས་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་དང་འབྲེལ་བའི་གནད་དོན་ཐད་་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་ལམ་སྟོན་ཞུས་པའི་ནག་ཉེས་འོག་འཛིན་བཟུང་གིས་ལོ་བདུན་ལ་བཙོན་འཇུག་ཁྲིམས་ཐག་བཅད་དེ་ནམ་ཡང་ཕྱིར་རང་དགོན་དུ་ཕེབས་མི་ཆོག་པའི་བཀའ་རྒྱ་བཏང་ཡོད་པ་མ་ཟད། དགོན་པའི་ནང་ཆབ་སྲིད་སློབ་གསོ་ཤུགས་ཆེར་སྤེལ་བའི་ཁྲོད། གྲྭ་བ་བགྲས་སོང་ཞིག་གིས་རང་སྲོག་བཅད་པའི་གནད་དོན་ཡང་བྱུང་ཡོད་པ་རེད་འདུགགནད་དོན་དེ་དང་འབྲེལ་ནས་ཤག་རོང་པོ་དགོན་དུ་ཕྱི་ལོ་ ༢༠༡༣ ལོར་གྲྭ་མང་གིས་རྒྱ་གཞུང་ལ་ངོ་རྒོལ་གྱི་ལས་འགུལ་བརྩམས་པར་རྒྱ་ནག་གིས་དྲག་གནོན་ཆེས་ཆེར་བྱས་ཏེ་མི་ལྔ་བཅུ་ཙམ་འཛིན་བཟུང་བྱས་པ་ཟད། ཤག་རོང་པོ་དགོན་པའི་དགེ་འདུན་པ་མང་པོ་ཕྱི་ལ་བྲོས་བྱོལ་དུ་ཕྱིན་རྗེས་རྒྱ་ནག་གིས་དགོན་པ་གནས་སྐབས་སྒོ་བརྒྱབ་ཀྱང་བདུན་ཤས་རྗེས་དགོན་པ་བསྐྱར་དུ་སྒོ་འབྱེད་བྱས་ཏེ་རྒྱ་ནག་གིས་ངོས་འཛིན་བྱས་པའི་ཤག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་ཁྲི་སར་བཀོད་ཡོད་པ་སོགས་བཀོད་འདུག རྒྱ་ནག་གིས་མཆོག་སྤྲུལ་ཟླ་བ་རིན་པོ་ཆེ་མཆོག་ལ་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་ཀྱང་། དམ་པ་ཁོང་གི་དགུང་ནའི་བབ་དང་སྐུ་གཟུགས་འཕྲོད་བསྟེན་སོགས་ཞན་པའི་རྐྱེན་གྱིས་ལྷ་སར་བཟང་བཙོན་དུ་བཞག་ཡོད་པའི་ཁྲོད།  ཕྱི་ལོ་ ༢༠༡༤ ལོར་ཐེངས་གཅིག་ཁོང་གི་མ་དགོན་དུ་ཕྱིར་ཕེབས་སུ་བཅུག་རྗེས་སྔར་བཞིན་བཟང་བཙོན་འོག་བཅུག་ཡོད་པར་གསལ་འདུག འདི་ལོའི་ཟླ་བ་དང་པོའི་ཚེས་སུམ་ཅུའི་ཉིན་དམ་པ་ཁོང་དགོངས་པ་རྫོགས་འཕྲལ། རྒྱ་ནག་གིས་ལྷ་ས་ཁུལ་དུ་ཡོད་པའི་ཁོང་གི་དད་ལྡན་རྗེས་འཇུག་པ་རྣམས་སྐུ་གདུང་ལ་མཇལ་བཅར་ཞུ་རུ་བཅུག་པ་ལས།  ཁོང་གི་མ་དགོན་གྱི་དད་ལྡན་མང་ཚོགས་དང་སློབ་མ་རྣམས་སྐུ་གདུང་ལ་མཇལ་བཅར་ཞུ་རུ་བཅུག་མེད་པ་མ་ཟད།  དམ་པ་ཁོང་གི་དགོངས་རྫོགས་ཀྱི་གནད་དོན་དང་པར་རིས་སོགས་སྤྱི་ཚོགས་དྲ་ལམ་ནས་ནག་གསུབ་བཏང་བ་དང་། སྐུ་གདུང་མཇལ་མཁན་རྣམ་པས་པར་སོགས་བརྒྱབ་ན་བཙོན་འཇུག་ཉེས་ཆད་གཅོད་རྒྱུ་ཡིན་པའི་བཙན་བཀའ་བཏང་བ་བརྒྱུད།  དམ་པ་ཁོང་གི་སྐུ་གདུང་ཤག་རོང་པོ་དགོན་དུ་ཞུགས་འབུལ་བྱེད་དུ་བཅུག་ཡོད་ཀྱང་མང་ཚོགས་འདས་མཆོད་དུ་ཞུགས་བཅུག་མེད་པ་མ་ཟད།  འདས་མཆོད་སྒྲུབ་མཁན་གྱི་དགེ་འདུན་པ་རྣམས་ཀྱི་ལུས་པོར་ཞིབ་བཤེར་ནན་པོ་བྱས་ཡོད་པ་མངོན་གསལ་གནང་འདུགའགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་གིས་ད་རེས་མཆོག་སྤྲུལ་ཟླ་བ་རིན་པོ་ཆེ་མཆོག་གི་སྐུ་གདུང་ཞུགས་འབུལ་ལ་དམ་དྲག་དང་། ཤག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་ཁྲི་སྟོན་བྱེད་སྟངས་བཅས་ཀྱི་གནད་དོན་ལ་གཞིགས་ན། རྒྱ་ནག་གིས་བོད་བརྒྱུད་ནང་བསྟན་དང་འབྲེལ་བའི་༸གོང་ས་མཆོག་གི་ཤུགས་རྐྱེན་དག་བཙན་འགོག་དང་། ཆོས་ལུགས་ཀྱི་ལས་དོན་སྤྱི་ལ་ཚད་མཐོའི་སྟངས་འཛིན་སླད་མང་ཚོགས་ལ་དྲག་གནོན་དང་། འཇིགས་སྐུལ། སོ་མྱུལ་སོགས་བྱ་རྒྱུར་ཐེ་ཚོམ་མེད་པ་གསལ་པོ་ཡིན་པ་དང་། སྲོལ་རྒྱུན་གྱི་ལམ་ལུགས་ཁག་མ་འོངས་པར་མུ་མཐུད་རྡོག་རོལ་དང་དྲག་གནོན་བྱ་ངེས་ཡིན་པ་གསལ་སྟོན་བྱས་འདུག གཞི་རྩའི་མཆོག་སྤྲུལ་ཟླ་བ་རིན་པོ་ཆེ་མཆོག་ཕྱི་ལོ་ ༡༩༣༧ ལོར་ནག་ཆུ་ས་ཁུལ་ཁམས་སྟོད་རུ་གསར་དུ་འཁྲུངས་པ་དང་། ཕྱི་ལོ་ ༡༩༦༠ ལོར་རྒྱ་ནག་གིས་བོད་ལ་དབང་བསྒྱུར་བྱེད་སྐབས་རྒྱ་ལ་ཁ་གཏད་ལངས་པའི་ཉེས་འཛུགས་ཀྱིས་དམངས་གཙོ་བཅོས་བསྒྱུར་ཟེར་བའི་སྐབས་སུ་འཛིན་བཟུང་དང་། ལན་མང་འཐབ་རྩོད་དང་རྡུང་རྡེག་ཚབ་ཆེན་བཏང་སྟེ་བཙོན་འཇུག་ལོ ༥ དང་། གཞན་ཡང་རིག་གནས་གསར་བརྗེ་སྐབས་ལས་མི་རུ་ཁག་ཟེར་བའི་ནང་ནས་སླར་ཡང་འཛིན་བཟུང་བྱས་ཏེ་འཐབ་རྩོད་དང་མནར་གཅོད་བཟོད་བཀའ་བ་བཏང་སྟེ་ལོ་ ༧ བཙོན་འཇུག་བྱས་ཡོད་པ་རེད། དེ་རྗེས་ཕྱི་ལོ་ ༢༠༡༠ ཟླ་ ༥ ཚེས་ ༢༠ ཉིན་མདོ་ཁམས་ཤག་རོང་པོ་ཁུལ་དུ་སླར་ཡང་རྒྱ་གཞུང་གིས་ལྔ་ཉི་ཤུའི་དོན་རྐྱེན་ཟེར་བའི་འོག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་སྐོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བ་ཡོད་པའི་ནག་ཉེས་བཙུགས་ཏེ་སླར་ཡང་ལོ་ ༧ བཙོན་འཇུག་ཁྲིམས་ཐག་བཅད་ཡོད་པ་ཞིག་ཡིན་པ་རེད།

སྔར་ལོ་རྒྱ་ནག་གིས་དམར་ཤོག་ཚོགས་པ་བཙུགས་ནས་ལོ་བརྒྱ་འཁོར་བ་དང་བོད་ཞི་བའི་བཅིངས་གྲོལ་ཞེས་པ་ཚུགས་ནས་ལོ་བདུན་ཅུ་འཁོར་བའི་དུས་དྲན་ཁྲོད། རྒྱ་ནག་གིས་ས་བགོས་བྱས་པའི་བོད་རང་སྐྱོང་ལྗོངས་ཁོངས་ཀྱི་བྱིས་པ་མང་པོ་ཞིག་བཙན་ཤེད་ཀྱི་བཅིངས་གྲོལ་དམག་ཁོངས་སུ་བཅུག་ནས་སྦྱོང་བརྡར་སྣ་མང་སྤྲད་ཡོད་པ་ལྟར། ད་ལྟ་ཡང་ལས་གཞི་དེ་མི་མཐུད་དུ་ལག་བསྟར་བྱེད་བཞིན་ཡོད་པའི་གནས་ཚུལ་ཐོན་འདུག དེ་རིང་རྒྱ་གར་གྱི་ Times now ཞེས་པའི་གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གི་གསང་བའི་གནས་ཚུལ་དང་འབྲེལ་ནས། འཕགས་བོད་མཐའ་མཚམས་དང་ས་འབྲེལ་ཡོད་པའི་བོད་ཀྱི་ས་ཁུལ་ཌེམ་ཆོག་དང་བཀྲ་ཤིས་སྒང་། དེ་བཞིན་ལྕགས་སྒང སོགས་ནས་བོད་ཀྱི་བྱིས་པ་༡༢༠ ལྷག་བཙན་ཤེད་ཀྱིས་བཅིངས་གྲོལ་དམག་ཁོངས་སུ་བཅུག་ཡོད་པ་མ་ཟད། ཐ་ན་ལོ་ན་དྲུག་ཅན་གྱི་བྱིས་པ་རྣམས་ཀྱང་པེ་ཅིན་གྱི་བཅའ་སྡོད་སློབ་གྲྭར་བཙན་ཁྲིད་བྱས་ཟིན་པ་མངོན་གསལ་གནང་འདུག དེ་བཞིན་གསར་ཁང་གིས། རྒྱ་གཞུང་གིས་གཞན་ཡང་ལོ་ན་བཅུ་ནས་བཅོ་བརྒྱད་བར་གྱི་སློབ་མ་མང་པོ་ཞིག་ Shiqanhe ཞེས་མངའ་རིས་ས་ཁུལ་སེང་གེ་ཁ་འབབ་གྲོང་རྡལ་གྱི་དམག་ཁུལ་དུ་བཅུག་ཏེ་ཕྱོགས་གཅིག་ནས་དམག་སྦྱོང་དང་ཕྱོགས་གཞན་ཞིག་ནས་རྒྱ་སྐད་རྒྱ་ཡིག་སློབ་ཁྲིད་དང་མཉམ་དུ་ཧིན་སྐད་ཡིག་ཀྱང་ཟབ་ཁྲིད་བྱད་བཞིན་ཡོད་པར་འཁོད་འདུག མ་ཟད་འཛིན་རིམ་བཅུ་གཅིག་དང་བཅུ་གཉིས། དེ་བཞིན་དེ་དང་ཚད་མཉམ་གྱི་བོད་ཀྱི་སློབ་མ་རྣམས་ལོ་ངོ་གསུམ་ནས་ལྔ་བར་གྱི་དུས་བཀག་བཟོས་ཏེ་བཅིངས་གྲོལ་དམག་ཁོངས་སུ་འཇུག་བཞིན་ཡོད་པ་དང་། ལོ་ལྔའི་རྗེས་སུ་བོད་སློབ་དེ་དག་ལ་གདམ་གསེས་སྤྲད་དེ་དམག་ཁོངས་སུ་འདུག་འདོད་ཡོད་རིགས་ལ་མཐོ་རིམ་གྱི་སློབ་སྦྱོང་སྤྲོད་མུས་ཡིན་པར་གསལ་འདུག གཞི་རྩའི་རྒྱ་ནག་གིས་བོད་པའི་སློབ་ཕྲུག་རྣམས་རྒྱ་ནག་གི་བཅིངས་གྲོལ་དམག་ཁོངས་སུ་འཇུག་དགོས་དོན་ནི། འདས་བའི་ལོ་ངོ་གཉིས་ཀྱི་ནང་དུ་རྒྱ་དཀར་གཉིས་ཀྱི་དབར་མཐའ་མཚམས་དང་འབྲེལ་བའི་དཀའ་ངལ་བསྟུད་མར་བྱུང་བའི་ཁྲོད་རྒྱ་ནག་གི་དམག་མི་རྣམས་ཀྱིས་འཕགས་བོད་མཐའ་མཚམས་ཀྱི་ས་མཐོའི་གནམ་གཤིས་ལ་བསྟུན་འགྱུར་བྱེད་མ་ཐུབ་པར་ནད་གཅོང་དུ་འགྱུར་བཞིན་ཡོད་པར་བརྟེན། མཐོ་སྒང་གི་གྲང་ངར་དང་ས་བབ་ལ་བསྟུན་འགྱུར་བྱེད་ཐུབ་མཁན་དང་། བོད་མཐོ་སྒང་གི་ས་གཤིས་ལ་རྒྱུས་མངའ་ཡོད་པའི་བོད་སློབ་དག་དམག་ཁོངས་སུ་བཅུག་པ་ཡིན་ན་ཕན་ཐོག་ཡོང་གི་ཡོད་པར་ངོས་འཛིན་བྱེད་བཞིན་ཡོད་པ་རེད། Times now གསར་ཁང་གིས་སྤེལ་བའི་གནས་ཚལ་དེའི་ནང་གསལ་ལྟར་ན། ད་ལྟའི་ཆར་རྒྱ་གཞུང་གིས་འབྲས་སྤུངས་དགོན་པའི་ཉེ་འཁྲིས་སུ་འགྲེམས་འཇོག་བྱས་པའི་བཅིངས་གྲོལ་དམག་ནང་བོད་དམག་ཆིག་སྟོང་ལྷག་ཡོད་པ་དང་། དེ་བཞིན་ལྷ་སའི་གཡས་གཡོན་དུ་ཡང་བཅིངས་གྲོལ་དམག་ཁོངས་ནས་དམག་སྦྱོང་སྣ་མང་ཐོབ་ཡོད་པའི་བོད་མི་ ༢༡༦ ཙམ་འགྲེམས་འཇོག་བྱས་པར་ངོ་སྤྲོད་ཀྱིས། སྤྱིར་བོད་སློབ་རྣམས་ཀྱིས་བཅིངས་གྲོལ་དམག་ཁོངས་སུ་འཛུལ་ཞུགས་བྱེད་རྒྱུར་དགའ་མོས་བྱེད་ཀྱི་མེད་ཀྱང་། རྒྱ་ནག་གིས་ཨུ་ཚུགས་མཐར་སྐྱེལ་གྱིས་ད་དུང་ཡང་བོད་སློབ་མང་པོ་བཙན་དབང་གིས་དམག་ཁོངས་སུ་འཇུག་བཞིན་པ་ཡོངས་གྲགས་གནང་འདུག རྩ་བའི་སྔར་ལོར་ཟླ་ ༩ ནང་བོད་རང་སྐྱོང་ལྗོངས་ཟེར་བའི་ཁྱབ་ཁོངས་ནག་ཆུ་ཁུལ་གྱི་གྲོང་སྡེ་ལས་ཁུངས་དང་སློབ་གསོ་ལས་ཁུངས། སྤྱི་བདེ་ལས་ཁུངས། དེ་བཞིན་མེ་འགོག་རུ་ཁག་བཅས་ཀྱིས་ནག་ཆུ་ཁུལ་གྱི་གཏན་སྡོད་སློབ་གྲྭར་ལོ་ན་ ༡༣ ནས་ ༡༩ བར་གྱི་བོད་རིགས་བྱིས་པ་ ༥༠༠ ཙམ་ལ་དམག་གི་སྦྱོང་བརྡར་ཐེངས་མང་སྤྲད་ཡོད་པ་དང་། དེ་བཞིན་ཀོང་པོ་ཁུལ་གྱི་བྲག་གསུམ་མཚོའི་སར་དབྱར་ཁའི་གུང་སེང་ལ་ཕེབས་པའི་ལྷ་སའི་ཁུལ་གྱི་སློབ་ཆུང་དང་སློབ་འབྲིང་ནང་སློབ་གཉེར་གནང་མཁན་ལོ་ངོ་༨ ནས་ ༡༦ བར་གྱི་བོད་པའི་བྱིས་པ་བརྒྱ་ཕྲག་གཅིག་ལ་གངས་ལྗོངས་ཁྲ་ཕྲུག་དམག་དོན་དབྱར་སྒར་ཞེས་པའི་མིང་ཐོག་ནས་དམག་སྦྱོང་སྤྲད་པའི་གནས་ཚུལ་ཕྱི་ལ་ཐོན་ཡོད་པ་དང་། དམག་སྦྱོང་ཁྲོད་ཀྱི་སློབ་མ་རྣམས་རྒྱལ་སྲུང་དང་འབྲེལ་བའི་སློབ་སྦྱོང་བྱེད་སའི་བསྟི་གནས་སུ་ཁྲིད་དེ་རྒྱལ་ཞེན་དང་རྒྱལ་ཁབ་བདེ་སྲུང་། དྲག་པོའི་དམག་གི་རིང་ལུགས་སོགས་ཀྱི་སྐོར་ལ་སྦྱོང་བརྡར་སྤྲད་དེ་རྒྱ་ནག་ལ་དགའ་ཞེན་ཆེ་བའི་དཔུང་ཁག་ཅིག་གསར་འཛུགས་བྱེད་ཐབས་སུ་དམིགས་པ་ཞིག་ཡིན་ར་སྤྲོད་བྱུང་ཡོད་པ་རེད།

དེ་རིང་ཕྱི་དྲོ་ཕྱག་ཚོད་བཞི་བའི་སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ།  སྲིད་སྐྱོང་དང་བཀའ་བློན་ལྷན་རྒྱས། གཞན་ཡང་སྤྱི་འཐུས་རྒྱུན་ལས་རྣམས་དང་ལྷན་ཁང་ཁག་གི་དྲུང་ཆེ་རྣམས་ཀྱི་དབུས་བའི་སྲི་ཞུ་ལས་བྱེད་ཡོངས་སུ་ལྷན་འཛོམས་ཀྱིས།  ཁ་ཉིན་ཕྱི་ཟླ་ ༣ ཚེས་ ༢༧ ཉིན་གྱི་ཞོགས་པའི་ཆུ་ཚོད་ལྔ་པ་ཡས་མས་སུ་རང་ལོ་ ༨༡ ཡིན་པའི་བཀྲ་ཕུན་ལགས་ཀྱིས་རྔ་པ་ཀིརྟི་དགོན་པར་ལྟ་རྟོག་བྱེད་མཁན་གྱི་ཉེན་རྟོག་ལས་ཁུངས་མདུན་དུ་རང་ལུས་མེར་སྲེག་བཏང་ནས་འདས་གྲོངས་སུ་གྱུར་བའི་རྒྱལ་གཅེས་ཁོང་ལ་གདུང་སེམས་མཉམ་སྐྱེད་ཀྱི་ཆེད་དུ་མཆོད་འབུལ་སྨོན་ལམ་ཞིག་ཚོགས་སོང་།སྐབས་དེར་དགེ་འདུན་པ་རྣམས་ཀྱི་དབུས་བའི་སྲི་ཞུ་ལས་བྱེད་ཡོངས་ཀྱིས་ཞལ་འདོན་བསྔོ་སྨོན་གསུང་འདོན་གནང་རྗེས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱལ་གཅེས་བ་བཀྲ་ཕུན་དམ་པ་དེ་ཉིད་ཀྱི་ལོ་རྒྱུས་སྒྲོག་སྦྱོང་གནང་བ་དང་སྦྲགས།  ད་ལྟའི་ཆར་རྒྱ་ནག་གི་དྲག་གནོན་གྱི་རྐྱེན་གྱིས་ཁོང་གི་སྐུ་ཕུང་ནང་མིར་རག་སོན་བྱུང་མིན་གྱི་ཐད་ནས་གནས་ཚུལ་ཤེས་རྟོགས་དཀའ་བའི་གནས་སུ་གྱུར་ཡོད་པར་འགྲེལ་བརྗོད་ཀྱིས། དམ་པ་ཁོང་དང་ཁོང་གི་ནང་མི་ཡོངས་ལ་གདུང་སེམས་མཉམ་སྐྱེད་ཡོད་པར་གསུངས་སོང་། རྩ་བའི་བཀྲ་ཕུན་ལགས་ནི་རྔ་པའི་འབྲོག་སྡེ་རྨེའུ་རུ་མའི་རུ་ཆེན་གསུམ་པའི་ཕུར་རྩ་ཚང་ནས་ཡིན་པ་དང་། དུས་རྟག་ཏུ་བོད་དོན་ལ་སེམས་ཁུར་དང་ལ་རྒྱ་ཡོད་མཁན་ཞིག་ཡིན་པ་དང་། ལྷག་པར་དུ་ཁོང་གིས་ ༢༠༢༡ ལོར་བརྒྱད་ཅུའི་གྱ་སྟོན་སྐབས་སུ་༸རྒྱལ་བ་རིན་པོ་ཆེའི་ཐུགས་རྗེ་བྱིན་རླབས་ཀྱིས། བོད་ལ་སྐྱིད་པའི་ཉི་མ་ཞིག་ཤར་རྒྱུ་ཡོད་པ་གཏན་འཁེལ་ཡིན་པས་ན་ཆུང་གཞོན་ནུ་ཚོའི་སེམས་ཤུགས་མ་ཆགས་ཞེས་གཏམ་བཤད་སྤེལ་མྱོང་ཡོད་པ་རེད་འདུག གཞི་རྩའི་འདས་པའི་ཉིན་ཤས་ནང་བོད་ཁམས་སྐྱེ་རྒུ་མདོ་གྲོང་ཁྱེར་གྱི་ཁུལ་རིམ་པའི་ཉེན་རྟོག་ལས་ཁུངས་མདུན་དུ་བོད་མི་ཞིག་གིས་རང་ལུས་མེར་བསྲེགས་གནང་ཡོད་པའི་གནས་ཚུལ་ཐོན་ཡོད་ལ། དེའི་གོང་སྟེ་ཕྱི་ཟླ་ ༢ པའི་ནང་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏྭ་ལའི་མདུན་དུ་བོད་ཀྱི་གཞས་པ་གྲགས་ཅན་ཚེ་དབང་ནོར་བུ་ལགས་ཀྱིས་རང་ལུས་མེར་བསྲེགས་བགཏང་སྟེ་ཁོང་རྗེས་སུ་སྨན་ཁང་ནང་འདས་གྲོངས་སུ་འགྱུར་བའི་གནས་ཚུལ་ཐོན་ཡོད་པ་དེ་ལྟར་ཡང་། རྒྱ་གཞུང་གིས་ཆེས་དམ་དྲག་གི་གནས་སྟངས་འོག སྐྱེ་རྒུ་མདོ་གྲོང་ཁྱེར་ནང་རང་ལུས་མེར་བསྲེགས་བཏང་མཁན་སུ་ཡིན་གྱི་ཞིབ་ཕྲའི་གནས་ཚུལ་དང་། དེ་བཞིན་ཚེ་དབང་ནོར་བུ་ལགས་ཀྱིས་རང་ལུས་མེར་བསྲེགས་དང་འབྲེལ་བའི་སྔ་རྗེས་གནས་ཚུལ་ཁ་གསལ་ཞིག་ཐོན་ཁག་པོར་གྱུར་ཡོད་པ་རེད། དེའི་ཁྲོད་དེ་རིང་ Nextshark ཞེས་པའི་གསར་ལམ་དུ་ཐོན་པའི་གནས་ཚུལ་ཞིག་གི་ནང་།  ཕྱི་ཕྱོགས་ཀྱི་གསར་ཁང་མང་པོས་ཟླ་ ༢ པའི་ཚེས་ ༢༥ ཉིན་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏཱ་ལའི་མདུན་ཐང་དུ་རྒྱ་གཞུང་ལ་ངོ་རྒོལ་གྱིས་སྐུ་ལུས་མེར་བསྲེགས་གནང་མཁན་གྲགས་ཅན་ན་གཞོན་གཞས་བ་ཚེ་དབང་ནོར་བུ་ལགས་ཀྱི་སྐོར་ནས་གླེང་སློང་དང་འདྲི་རྩད་མང་པོ་བྱུང་བའི་མཚམས་འདིར། རྒྱ་ནག་གི་ཕྱི་སྲིད་ལས་ཁུངས་ཀྱིས་ཚེ་དབང་ནོར་བུ་ལགས་ད་ལྟ་གྲོངས་མེད་པར་སྨན་བཅོས་བྱེད་བཞིན་པར་བརྗོད་པ་ཞིག་ལུང་འདྲེན་བྱས་འདུག དེ་ཡང་རྒྱ་ནག་གི་ཕྱི་སྲིད་བློན་ཆེན་ལས་ཁུངས་ཀྱི་གནས་ཚུལ་སྤེལ་བ་དེའི་ནང་དུ།  རང་ལུས་མེར་བསྲེགས་གཏང་མཁན་གང་ཟག་དེར་དེ་སྔོན་ནས་སེམས་ཁམས་དང་འབྲེལ་བའི་ནད་གཞི་ཞིག་ཡོད་པ་མ་ཟད།  ཁོང་གིས་ཐེངས་ཁ་ཤས་ལ་རང་སྲོག་བཅད་ཐབས་བྱས་མྱོང་ཡོད་པ་དང་། ཁོང་ད་ལྟའང་འདས་གྲོངས་སུ་གྱུར་མེད་པར་སྨན་བཅོས་བྱེད་མུས་ཡིན་པར་འགྲེལ་བརྗོད་བྱས་འདུག གཞི་རྩའི་ཕྱི་ཕྱོགས་སུ་གནས་ཚུལ་འབྱོར་ཁག་ལ་གཞིགས་ན། རྒྱལ་གཅེས་པ་དམ་པ་དེ་ཉིད་ལྷ་ས་གྲོང་ཁྱེར་ནང་གི་རང་སྐྱོང་ལྗོངས་མི་མང་སྨན་ཁང་དུ་གཟུགས་གཞི་མིས་ཚིག་དྲག་པས་རྐྱེན་གྱིས་འདས་གྲོངས་སུ་གྱུར་ཡོད་པའི་གནས་ཚུལ་ཐོན་པ་མ་ཟད། བཞུགས་སྒར་ཁུལ་གྱི་ཚོགས་སྐྱིད་ཁག་གིས་དམ་པ་ཁོང་གི་འདས་རྐྱེན་དང་འབྲེལ་ནས་གདོང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་གནང་བ་མ་ཟད། ཟླ་བ་སྔོན་མའི་ཚེས་ ༡༤ ཉིན།   བོད་མིའི་སྒྲིག་འཛུགས་ཆོས་རིག་ལས་ཁུངས་ནས་དམ་པ་དེ་ཉིད་སྐུ་འདས་གྲོངས་སུ་གྱུར་བའི་གནས་ཚུལ་དང་འབྲེལ་ནས་ཆེད་དུ་གདུང་སེམས་མཉམ་སྐྱེད་ཀྱི་མྱ་ངན་རྗེས་དྲན་སླད་མཆོད་འབུལ་སྨོན་ལམ་ཞིག་ཚོགས་གནང་ཡོད་པ་རེད།གང་ལྟར་ཐེངས་འདི་རྔ་པའི་ནང་སླར་ཡང་རང་ལུས་མེར་བསྲེགས་ཀྱི་གནས་ཚུལ་ཐོན་པ་དང་སྦྲགས།ཁ་སང་ཨ་རིའི་ཁུལ་གྱི་ནེའུ་ཡོག་དང་ནེའུ་ཇིར་སི་ས་གནས་སུ་བོད་ཀྱི་གཞོན་ནུ་ཚོགས་པ་དང་བོད་རིགས་སྤྱི་མཐུན་ཚོགས་པ་སོགས་ཀྱིས་ཉེ་ཆར་རང་ལུས་མེར་བསྲེགས་བཏང་བའི་རྒྱལ་གཅེས་བ་གསུམ་གྱི་ཆེད་རྒྱ་ནག་གི་གཞུང་ཚབ་ཁང་གི་མདུན་དུ་མར་མེ་ཁྲོམ་སྐོར་དང་ཞི་བའི་རྔམ་སྟོན་ཁྲོམ་སྐོར་གནང་སྟེ་རྒྱལ་གཅེས་བ་གསུམ་ལ་གདུང་སེམས་མཉམ་སྐྱེད་གནང་བ་བརྒྱུད། རང་ལུས་མེར་བསྲེགས་ཀྱི་གནད་དོན་དེ་ལས་བོད་ནང་གི་རྒྱ་ནག་གི་གདུག་རྩུབ་ཀྱི་སྲིད་བྱུས་དེ་གསལ་བོར་ཕྱི་ལ་མངོན་ཡོད་པ་ཞིག་ཡིན་པའི་གཏམ་བཤད་གནང་སྟེ། བོད་མི་རྣམས་ས་གནས་གང་དུ་ཡོད་མེད་ལ་ལྟོས་མེད་ཀྱིས་བོད་སྤྱི་བའི་རྩ་དོན་འཐབ་རྩོད་ལ་འགན་འཁྲི་ལེན་དགོས་བའི་གཞེན་སྐུལ་གནང་འདུག

ཕྱི་ཟླ་ ༣ ཚེས ༣༡ ཉིན་ CECC ཞེས་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་ཕྱི་ལོ་ ༢༠༢༡ ལོའི་རྒྱ་ནག་ཐོག་སྤེལ་བའི་ལོ་འཁོར་སྙན་ཐོ་ཞིག་འདོན་སྤེལ་གནང་བའི་ནང་རྒྱ་ནག་དམར་ཤོག་གཞུང་གིས་བོད་མིའི་ཆོས་དད་རང་དབང་ལ་མུ་མཐུད་དྲག་གནོན་ཙམ་མ་ཟད། གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་པ་བཀོད་འདུག དེ་ཡང་ཨ་རིར་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་རྒྱ་ནག་དང་འབྲེལ་བའི་སྐོར་ལ་འདོན་སྤེལ་གནང་བའི་སྙན་ཐོའི་ནང་དོན་བཀོད་པའི་ནང་། རྒྱ་ནག་གཞུང་གིས་༸གོང་ས་སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ངོས་འཛིན་གནང་རྒྱུ་རྒྱ་ནག་ཁོ་ནར་ཡོད་སྐོར་བརྗོད་བཞིན་པ་དང་འབྲེལ། རྒྱ་ནག་གཞུང་གིས་མགོན་པོ་༸གང་ཉིད་མཆོག་ལ་དད་གུས་ཞུ་མཁན་རྣམས་ལ་ཉེས་ཆད་གཅོད་བཞིན་པ་དང་།  བོད་ཕྱི་ནང་གཉིས་སུ་འབྲེལ་ལམ་བྱ་རྒྱུ་དམ་དྲག་ཤུགས་ཆེར་བྱེད་རྒྱུ་དང་ལྷག་པར་དུ་ཕྱི་ཕྱོགས་སུ་ཡོད་པའི་བོད་མི་དང་འབྲེལ་ལམ་བྱེད་མཁན་ཀུན་ལ་གདུག་རྩུབ་མནར་གཅོད་གཏོང་གི་ཡོད་པ་མ་ཟད། རྒྱ་ནག་གཞུང་གིས་འཕྲུལ་རིགས་མ་ལག་བརྒྱུད་ཨ་རིའི་མི་སེར་ལའང་སོ་མྱུལ་བྱེད་ཀྱི་ཡོད་པ་སོགས་ལུང་འདྲེན་དང་སྦྲགས། ཨ་རིའི་སྲིད་འཛིན་བྷ་ཊན་མཆོག་གི་སྲིད་གཞུང་ནས་ Tibetan Policy and Support Act of 2020 ཞེས་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དེ་བརྒྱུད་དེ་བོད་མིའི་ཆོས་དང་རིག་གཞུང་། དེ་བཞིན་ངོ་བོ་བཅས་སྲུང་སྐྱོབ་གནང་དགོས་པ་མ་ཟད། ཕྱི་འབྲེལ་མི་སྣས་༸གོང་ས་སྐུ་ཕྲེང་ ༡༥ པ་མཆོག་གི་གནད་དོན་ཐོག་རྒྱ་ནག་གཞུང་གིས་ཐེ་བྱུས་མི་ཡོང་བར་འབད་བརྩོན་གནང་དགོས་པ་གསུངས་ཡོད་པ་བཀོད་འདུག ད་དུང་ཚོགས་ཆུང་དེས་ཨ་རིའི་འཛིན་སྐྱོང་དང་གྲོས་ཚོགས་ནས་རྒྱ་ནག་གཞུང་ལ་གནོན་ཤུགས་སྤྲད་པ་བརྒྱུད་དེ་སྔ་གར་སོང་ཆ་མེད་དུ་གྱུར་བའི་ཀུན་གཟིགས་པཎ་ཆེན་རིན་པོ་ཆེ་མཆོག་དང་རྒྱལ་སྤྱིའི་ཚོགས་སྡེ་ཁག་གི་སྐུ་ཚབ་མི་སྣ་དང་ལྷན་དུ་མཇལ་མོལ་གནང་དུ་འཇུག་དགོས་བའི་ཞུ་སྐུལ་གནང་དགོས་པ་མ་ཟད། སྙན་ཐོ་འདི་བརྒྱུད་དེ་དེ་སྔ་ཨ་རིས་གཏན་འབེབས་གནང་པའི་ The Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་གནང་དགོས་རྒྱུ་དང་། འཛིན་སྐྱོང་དང་གྲོས་ཚོགས་འཐུས་མི་རྣམས་ནས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོང་གནང་རྒྱུའི་སླད་རྒྱལ་སྤྱིའི་གྲོས་ཚོགས་འཐུས་མི་གཞན་དང་ལྷན་དུ་རྒྱལ་སྤྱི་རང་བཞིན་ལྡན་པའི་མཉམ་རུབ་ཀྱི་ནུས་པ་སྤུངས་རྒྱུ་ཙམ་མ་ཟད། བཙན་བྱོལ་ནང་གི་དབུས་བོད་མིའི་སྒྲིག་འཛུགས་ཀྱི་འགོ་ཁྲིད་དང་ལྷན་དུ་དུས་ནས་དུས་སུ་བཀའ་མོལ་གནང་དགོས་པ་གསུངས་འདུག སྙན་ཐོ་འདི་དང་འབྲེལ་ནས་རྒྱལ་སྤྱི་བོད་དོན་ལས་འགུལ་ཁང་གི་སྲིད་གཞུང་དང་འབྲེལ་ལམ་འཇོག་མཁན་གྱི་ངེས་སྟོན་པ་ Franz Matzner ལགས་ཀྱིས་རྒྱ་ནག་གཞུང་གིས་བོད་ནང་སྤེལ་བཞིན་པའི་གདུག་རྩུབ་ཅན་གྱི་སྲིད་བྱུས་འོག་བོད་མིའི་ཆོས་དང་རིག་གཞུང་། དེ་བཞིན་གཞི་རྩའི་འགྲོ་བ་མིའི་ཐོབ་ཐང་ཁག་ནག་གསུབ་གཏོང་བཞིན་ཡོད་སྟབས། ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་ནས་འདོན་སྤེལ་གནང་བའི་སྙན་ཐོའི་ནང་གསལ་ལྟར། རྒྱལ་སྤྱིའི་ཚོགས་སྡེ་ཁག་ཀྱིས་ཀྱང་རྒྱལ་སྤྱིའི་བདེ་འཇགས་དང་། གཞི་རྩའི་འགྲོ་བ་མིའི་ཐོབ་ཐང་། དེ་བཞིན་ཆོས་དད་རང་དབང་སོགས་ཀྱི་གནད་དོན་ཀྱི་ཐོག་ནས་མཉམ་རུབ་གནང་དགོས་པ་གསུངས་འདུག

ཉེ་ཆར་ཡུ་རོབ་མཐུན་ཚོགས་དང་རྒྱ་ནག་དབར་དྲ་བརྙན་བརྒྱུད་ཆེས་མཐོའི་ལྷན་ཚོགས་ཚོགས་ཡོད་པ་དེའི་ཐོག་གཙོ་བོ་ཡུག་རེན་ནང་གི་དམག་འཁྲུག་གི་གནད་དོན་དང་ལྷན་དུ་རྒྱ་གཞུང་གིས་བོད་ནང་གི་བོད་མི་དང་དེ་བཞིན་ཤིན་ཅང་དང་ནང་སོག་གི་གྲངས་ཉུང་མི་རིགས་ཐོག་འཛིན་པའི་དྲག་པོའི་སྲིད་བྱུས་སྐོར་གླེང་འདུགདེ་ཡང་ཟླ་བ་འདིའི་ཚེས་ ༡ ཉིན་ཡུ་རོབ་མཐུན་ཚོགས་དང་རྒྱ་ནག་དབར་དྲ་བརྙན་བརྒྱུད་ཆེས་མཐོའི་ལྷན་ཚོགས་ཤིག་ཚོགས་ཡོད་པ་དང་བསྟུན་ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་ Charles Michel ལགས་ཀྱིས་ལྷན་ཚོགས་དེའི་ཐད་བསྒྲགས་གཏམ་ཞིག་སྤེལ་བའི་ནང་དུ། ཐེངས་འདིའི་ལྷན་ཚོགས་དེ་ནི་རྒྱུན་ལྡན་གྱི་ཚོང་འབྲེལ་སྐོར་མིན་པར་དེ་ནི་ཨུ་རུ་སུས་ཡུག་རེན་ནང་དུ་དམག་འཁྲུག་བྱུང་བཞིན་པའི་དུས་སྐབས་ཀྱི་ལྷན་ཚོགས་ཤིག་ཆགས་ཀྱི་ཡོད་པ་དང་ང་ཚོ་ཚང་མ་ཡུ་རོབ་ནང་དུ་རྒྱལ་སྲུང་ཀྱི་ངལ་བ་ཚབས་ཆེན་འོག་གནས་བཞིན་ཡོད་སྟབས་ཡུ་རོབ་མཐུན་ཚོགས་ཀྱི་ལས་དོན་གལ་ཆེ་ཤོས་དེ་ཡུཀ་རེན་ནང་གི་དམག་འཁྲུག་མཚམས་འཇོག་གིས་ཡུལ་དེའི་མང་ཚོགས་ལ་སྲུང་སྐྱོབ་གནང་རྒྱུ་ཡིན་པར་གསུངས་འདུག ལྷག་དོན་ལྷན་ཚོགས་དེའི་ཐོག་རྒྱལ་ཁབ་ཕྱོགས་གཉིས་ད་བར་གོ་ལའི་འཕྲོད་བསྟེན་གྱི་གནད་དོན་གཙོས་ཡོངས་ཁྱབ་རིམས་ནད་ཀྱི་སྔོན་འགོག་དང་ཛ་དྲག་གི་གྲ་སྒྲིག་དང་གདོང་ལེན་བཅས་ཀྱི་ཐོག་ལ་གླེང་སློང་གནང་བའི་ཁྲོད་རྒྱ་ནག་དང་ལྷན་དུ་གཅིག་གྱུར་གྱིས་གོ་ལ་སྲུང་སྐྱོབ་ཐད་མཉམ་ལས་གནང་རྒྱུ་དང་དེ་བཞིན་རྒྱ་གཞུང་ལ་ཁོར་ཡུག་དང་རྒྱལ་སྤྱིའི་སྣ་མང་སྐྱེ་དངོས་སྲུང་སྐྱོབ་བཅས་ཀྱི་ཐད་ལས་འགུལ་མང་ཙམ་སྤེལ་དགོས་པའི་ཞུ་འབོད་གནང་བ་མ་ཟད། གནད་དོན་ཁག་ཅིག་གི་ཐོག་ལ་ཕྱོགས་གཉིས་དབར་དགོངས་ཚུལ་མི་མཐུན་པ་བྱུང་བའི་ཁོངས་སུ་ཡུ་རོབ་མཐུན་ཚོགས་ཀྱིས་རྒྱ་གཞུང་ལ་བོད་ནང་གི་བོད་མི་དང་གཞན་ཡང་ཤིན་ཅང་དང་ནང་སོག་བཅས་ཀྱི་གྲངས་ཉུང་མི་རིགས་ཐོག་དྲག་གནོན་བྱེད་བཞིན་པ་དང་སྒོས་སུ་ཧོང་ཀོང་གི་རྒྱལ་ཁབ་གཅིག་ལ་ལམ་ལུགས་གཉིས་ཟེར་བའི་སྲིད་བྱུས་ལ་རྡོག་རོལ་གཏོང་ཐབས་བྱེད་བཞིན་པའི་ཐད་སེམས་འཚབ་ཀྱི་རྣམ་པ་ཆེད་བཏོན་གནང་སྟེ། འགྲོ་བ་མིའི་ཐོབ་ཐང་དང་འབྲེལ་ནས་སྒེར་ཁག་ཅིག་གི་གནད་དོན་ཡང་གླེང་སློང་གིས་རྒྱ་གཞུང་ལ་ཕྱོགས་གཉིས་དབར་གྱི་འགྲོ་བ་མིའི་ཐོབ་ཐང་གི་གྲོས་མོལ་བསྐྱར་གསོ་དགོས་པའི་འབོད་སྐུལ་ཞུས་དོན་ལྟར་སྲིད་བློན་ Li Keqiang གྱིས་དེ་འབྲེལ་གྲོས་མོལ་གང་མགྱོགས་འགོ་འཛུགས་བྱ་རྒྱུའི་ཁས་ལེན་བྱས་ཡོད་འདུག སྤྱིར་ད་ལན་གྱི་ལྷན་ཚོགས་འདི་བཞིན་གཙོ་བོ་ཡུག་རེན་ནང་གི་དམག་འཁྲུག་སྐོར་ལ་གླེང་སློང་གནང་རྒྱུ་དེ་ཆགས་ཀྱི་ཡོད་སྟབས། ཡུ་རོབ་མཐུན་ཚོགས་ཀྱིས་ད་ལྟའི་དཀའ་ཚེགས་ཆེ་བའི་དུས་སྐབས་འདིར་ཕྱོགས་གཉིས་དབར་གྲོས་མོལ་གནང་གལ་ཆེ་བ་ཡིན་དང་འདིའི་ཐད་དམིགས་བཀར་གྱིས་དམག་འཁྲུག་དེ་ཉིད་གང་མགྱོགས་མཚམས་འཇོག་ཡོང་སླད་ཐབས་ཤེས་གང་ཡོངས་གནང་བཞིན་པ་འགྲེལ་བརྗོད་དང་འབྲེལ།  ཡུ་རོབ་མཐུན་ཚོགས་དང་རྒྱ་ནག་གཉིས་ནས་ད་ལྟའི་དམག་འཁྲུག་དེ་ཉིད་གོ་ལ་སྤྱིའི་ཉེན་སྲུང་དང་དཔལ་འབྱོར་གནས་བབ་ལ་ཉེན་ཚབས་ཆེན་པོར་གྱུར་ཡོད་པར་མོས་མཐུན་གནང་བཞིན་ཡོད་པ་དང་ང་ཚོ་འཛམ་གླིང་ཞི་བདེ་དང་བརྟན་ལྷིང་ཡོང་སླད་གོ་ལའི་འགན་འཁུར་མི་སྣའི་ཕྱག་ལས་གནང་མཁན་ཡང་ཆགས་ཀྱི་ཡོད་སྟབས། རྒྱ་ནག་གཞུང་ནས་ཨུ་རུ་སུས་རྒྱལ་སྤྱིའི་ཁྲིམས་ལ་རྩིས་མེད་རྡོག་རོལ་གཏོང་བཞིན་པའི་གནད་དོན་དག་ལ་མིག་ལོང་བ་ལྟར་སྣང་མེད་དུ་གཏོང་རྒྱུ་མེད་པར་འགྲེལ་བརྗོད་ཀྱིས་ཡུ་རོབ་མཐུན་ཚོགས་དང་ལྷན་དུ་ཡུག་རེན་ནང་གི་དམག་འཁྲུག་དེ་ཉིད་མཚམས་འཇོག་ཡོང་སླད་རོགས་པ་གནང་དགོས་པའི་འབོད་སྐུལ་ཞུས་འདུག དེ་བཞིན་ཡུ་རོབ་མཐུན་ཚོགས་དང་རྒྱ་ནག་དབར་གྱི་ཆེས་མཐོའི་ལྷན་ཚོགས་ཐོག་ཕྱོགས་གཉིས་ཀྱི་ཚོང་འབྲེལ་དང་དཔལ་འབྱོར་འབྲེལ་ལམ་དེ་ཉིད་དྲང་བདེན་བརྒྱུད་ཕན་ཚུན་གཉིས་ཕན་ཡོང་སླད་གྲོས་བསྡུར་ལྷུག་པོ་གནང་བའི་ཁྲོད། རྒྱ་གཞུང་གིས་ལཱི་ཐི་ནི་ཡར་ཁ་གཏད་གཅོག་བྱེད་ཀྱིས་དབྱེ་འབྱེད་ཚོང་འབྲེལ་བྱས་པ་གཙོས་ཐེ་ཝན་དང་ ཨཧྥ་གྷན་དང་འབར་མ།   དེ་བཞིན་ཀོ་རི་ཡ་སོགས་ཀྱི་ནང་དཀའ་ངལ་གང་འཕྲད་སྐོར་དང་འབྲེལ་བའི་རྒྱལ་སྤྱིའི་གནད་དོན་ཁག་ཅིག་གི་ཐོག་ལའང་གྲོས་བསྡུར་གནང་འདུག རྩ་བའི་ཡུ་རོབ་མཐུན་ཚོགས་དང་རྒྱ་ནག་དབར་དྲ་བརྙན་བརྒྱུད་ཚོགས་པའི་ཆེས་མཐོའི་ལྷན་ཚོགས་དེའི་ཐོག་ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་ Charles Michel ལགས་དང་མཐུན་ཚོགས་ཀྱི་འཛིན་སྐྱོང་ལྷན་ཁང་གི་ཚོགས་གཙོ་ལྕམ་ Ursula von der Leyen ལགས། དེ་བཞིན་ཡུ་རོབ་མཐུན་ཚོགས་ཀྱི་ཕྱི་སྲིད་དང་བདེ་སྲུང་བློན་ཆེན་སྐུ་ཞབས Josep Borrell ལགས་བཅས་རྣམ་པ་གསུམ་དབུ་བཞུགས་ཐོག་ཚོགས་འདུ་གཙོ་སྐྱོང་གནང་སྟེ་རྒྱ་ནག་གི་སྲིད་འཛིན་ཞི་ཅིན་ཕིང་དང་སྲིད་བློན་ Li Keqiang གཉིས་ནས་དེར་མཉམ་ཞུགས་གནང་ཡོད་པ་རེད།  

བདུན་ཕྲག་འདིའི་རེས་གཟའ་ཟླ་བའི་ཉིན་ཨ་རིའི་རྒྱལ་སྲུང་ལས་ཁུངས་ཀྱིས་ཡུལ་དེའི་རྒྱལ་སྲུང་གི་འཐབ་བྱུས་དང་འབྲེལ་བའི་སྙན་ཐོ་ཞིག་གྲོས་ཚོགས་ལ་ཕུལ་བའི་ནང་དུ། རྒྱ་ནག་ནི་ཨ་རིའི་རྒྱལ་སྲུང་བདེ་འཇགས་ཀྱི་ཉེན་ཁ་དང་པོ་དེ་ཆགས་ཡོད་པ་མངོན་གསལ་གྱིས། ཨ་རིའི་ངོས་ནས་རྒྱ་ནག་དང་མཉམ་དུ་འཐབ་བྱུས་རང་བཞིན་གྱི་འགྲན་རྩོད་ལ་ཕྱོགས་ཡོངས་ནས་ཁ་གཏད་གཅོག་རྒྱུ་ཡིན་པ་ཡོངས་གྲགས་གནང་འདུགདེ་ཡང་སྙན་ཐོ་དེའི་ནང་དུ། ཨ་རིའི་རྒྱལ་སྲུང་དང་འབྲེལ་ནས་ཉེན་ཁ་ཆེན་པོ་བཞི་གསལ་བསྒྲགས་གནང་བའི་ནང་དུ། རྒྱ་ནག་ནི་ཕྱོགས་ཡོངས་ནས་ཨ་རིར་ཉེན་ཁ་བཟོ་མཁན་དང་པོ་དེ་ཆགས་ཡོད་པ་དང་། ཨ་རིའི་ཉེན་ཁ་བཞི་ལས་གསུམ་པའི་ཁོངས་སུ། ཨ་རིས་ཨ་རྒྱ་གཉིས་ཀྱི་དཀའ་རྙོག་ཁྱབ་བརྡལ་དང་འབྲེལ་ནས་རྒྱ་ནག་གི་བཙན་ཤེད་ལ་ནུས་ཤུགས་ལྡན་པའི་སྒོ་ནས་ཁ་གཏད་གཅོག་རྒྱུ་དང་། ཨ་རིའི་རྒྱལ་སྲུང་བདེ་འཇགས་ཀྱི་ཉེན་ཁ་གཉིས་བའི་ཁོངས་སུ་ཨུ་རུ་སུའི་སྲིད་འཛིན་ Vladimir Putin གྱིས་ཡུག་ཀི་རེན་ལ་བཙན་འཛུལ་བྱས་པ་དེ་ཆགས་ཡོད་པར་མངོན་གསལ་གྱིས། ཨ་རིའི་ངོས་ནས་ཨུ་རུ་སུའི་ཨུ་ཚུགས་རང་བཞིན་གྱི་ཉེན་ཁ་ཡི་གཙོ་བྱས་པའི་བྱང་ཀོ་རི་ཡ་དང་། དེ་བཞིན་ཨེ་རན་དང་དྲག་སྤྱོད་རིང་ལུགས་ལ་ཁ་གཏད་གཅོག་རྒྱུ་ཡིན་པར་བསྒྲགས་འདུགགཞན་ཡང་ཨ་རིའི་སྙན་ཐོ་དེའི་ནང་གཙིག་ཆེན་དུ་བརྩི་བའི་ལས་གཞི་གཞན་ཞིག་ནི་ཨ་རིའི་ཕྱོགས་གཏོགས་ཀྱི་རྒྱལ་ཁབ་རྣམས་ལ་ཕྱོགས་གཞན་ནས་འཐབ་བྱུས་རང་བཞིན་གྱི་དྲག་རྒོལ་བྱེད་བཞིན་པ་དེ་ཡིན་པར་ལུང་འདྲེན་གྱིས། ཨ་རིའི་ངོས་ནས་ཕྱོགས་གཏོགས་རྒྱལ་ཁབ་རྣམས་དང་མཉམ་འབྲེལ་གྱི་ནུས་པ་སོར་ཆུད་ཡོང་རྒྱུར་ཤུགས་སྣོན་བྱེད་རྒྱུ་ཡིན་པར་བསྒྲགས་འདུགཨ་རིའི་རྒྱལ་སྲུང་གི་འཐབ་བྱུས་དང་འབྲེལ་བའི་སྙན་ཐོ་ཆ་ཚང་ད་ལྟའི་ཆར་ཨ་རིའི་གྲོས་ཚོགས་ལ་ཕུལ་བ་མ་གཏོགས་སྙན་ཐོའི་ནང་དོན་ཆ་ཚང་ཡོང་གྲགས་གནང་མེད་པ་དང་། ཨ་རིའི་རྒྱལ་སྲུང་ལས་ཁུངས་ཀྱི་སྲིད་བྱུས་དང་འབྲེལ་བའི་དྲུང་གཞོན་ལས་རོགས་སྐུ་ཞབས Colin Kahl ལགས་ཀྱིས་རང་ཉིད་ཀྱི་འཕྲུལ་སྒྲའི་ཐོག་གནས་ཚུལ་སྤེལ་བའི་ནང་དུ།  སྙན་ཐོ་དེའི་ཆ་ཤས་ཤིག་རིང་མིན་ཟླ་བ་ཁ་ཤས་ནང་དུ་ཨ་རིའི་མང་ཚོགས་ལ་ཡོངས་གྲགས་ཀྱི་ཐོག་ནས་འདོན་སྤེལ་བྱེད་རྒྱུ་ཡིན་པར་བསྒྲགས་འདུག གཞི་རྩའི་ཨ་རིའི་རྒྱལ་སྲུང་གི་འཐབ་བྱུས་དེ་ནི་རྒྱལ་སྲུང་ལས་ཁུངས་ཀྱི་འཐབ་བྱུས་ཀྱི་ལམ་སྟོན་གཙོ་བོ་ཞིག་ཆགས་ཀྱི་ཡོད་པ་དང་། ལམ་སྟོན་དེར་བདེ་འཇགས་དང་འབྲེལ་བའི་ཨ་རིའི་དམག་མིའི་འགན་འཁྲི་གསལ་ཡོད་པ་མ་ཟད། ཨ་རིའི་སྲིད་འཛིན་གྱིས་གཞི་རྒྱ་ཆེ་བའི་རྒྱལ་སྲུང་གི་འཐབ་བྱུས་ཇི་ལྟར་ལག་ལེན་བསྟར་ཕྱོགས་ཀྱང་གསལ་བོར་འཁོད་ཡོད་པ་དང་། ཨ་རིའི་སྲིད་འཛིན་སྐུ་ཞབས་བྷ་ཊན་ལགས་ཀྱིས་རྒྱལ་སྲུང་གི་བར་བརྒལ་འཐབ་བྱུས་ཀྱང་ལོ་སྔོན་མའི་ཟླ་བ་གསུམ་པའི་ནང་ཕྱིར་བསྒྲགས་བྱས་ཡོད་པ་རེད། ཨ་རིའི་རྒྱལ་སྲུང་དང་འབྲེལ་བའི་སྙན་ཐོ་ཕྱི་ལ་ཐོན་པ་དང་འབྲེལ་ནས། ཉིན་དེར་ཨ་རིའི་གཞུང་འཛིན་གྱི་ངོས་ནས་གྲོས་ཚོགས་ཀྱི་དབུས་སུ་རྒྱལ་སྲུང་བདེ་འཇགས་དང་འབྲེལ་ནས་ཨ་སྒོར་ཐེར་འབུམ་༧༧༣ ལྷག་གི་སྔོན་རྩིས་འཆར་འབུལ་ཞུས་ཡོད་པ་དང་དང་། མ་དངུལ་དེ་དག་ཀྱང་གཞི་རྩའི་རྒྱ་ནག་གི་ཉེན་ཁར་དམིགས་ནས་མཁོ་འདོན་བྱས་པ་ཞིག་ཡིན་པར་གསལ་འདུག

ཡུ་རོབ་མཐུན་ཚོགས་དང་རྒྱ་ནག་དབར་གྱི་ཆེས་མཐོའི་ལྷན་ཚོགས་ཐོག་བོད་མིའི་རང་ཐག་རང་གཅོད་ཀྱི་རང་དབང་དང་འགྲོ་བ་མིའི་ཐོབ་ཐང་གི་གནད་དོན་གཉིས་བགྲོ་གླེང་གི་གྲོས་གཞིའི་ཁོངས་སུ་བཅུག་དགོས་པའི་འབོད་སྐུལ་ཞུས་འདུགརིང་མིན་ཟླ་བ་རྗེས་མའི་ཚེས་ ༡ ཉིན་ཡུ་རོབ་མཐུན་ཚོགས་དང་རྒྱ་ནག་དབར་དྲ་བརྙན་བརྒྱུད་ཆེས་མཐོའི་ལྷན་ཚོགས་ཚོགས་ཀྱི་ཡོད་པ་དང་དེའི་ཐོག་ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་ Charles Michel ལགས་དང་ཡུ་རོབ་མཐུན་ཚོགས་ཀྱི་འཛིན་སྐྱོང་ལྷན་ཁང་གི་ཚོགས་གཙོ་ལྕམ་ Ursula von der Leyen ལགས། དེ་བཞིན་ཡུ་རོབ་མཐུན་ཚོགས་ཀྱི་ཕྱི་སྲིད་དང་བདེ་སྲུང་བློན་ཆེན་སྐུ་ཞབས Josep Borrell ལགས་བཅས་རྣམ་པ་གསུམ་དབུ་བཞུགས་ཐོག་ཚོགས་འདུ་གཙོ་སྐྱོང་གནང་སྟེ་རྒྱ་ནག་གི་སྲིད་འཛིན་ཞི་ཅིན་ཕིང་དང་སྲིད་བློན་ Li Keqiang མཉམ་དུ་བགྲོ་གླེང་གནང་གི་ཡོད་པ་ལྟར། ཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་བསྒྲགས་གཏམ་ཞིག་སྤེལ་བ་བརྒྱུད་ཐེངས་འདིའི་ལྷན་ཚོགས་སྐབས་ཡུ་རོབ་མཐུན་ཚོགས་ཀྱི་འགོ་ཁྲིད་རྣམས་ནས་རྒྱ་གཞུང་གིས་བོད་གཙོས་རྒྱ་ནག་དང་ཤིན་ཅང་། ནང་སོག ཧོང་ཀོང་སོགས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་ཤུགས་ཆེ་གཏོང་བཞིན་པར་ངོ་རྒོལ་གྱིས་བོད་རྒྱ་འབྲེལ་མོལ་བསྐྱར་གསོ་དང་རྒྱ་གཞུང་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་ལ་ལག་བསྟར་བརྒྱུད་རྒྱལ་སྤྱིའི་རྒྱལ་ཁབ་ཁག་གི་ཕྱི་འབྲེལ་མི་སྣ་གཙོས་གྲོས་ཚོགས་འཐུས་མི་དང་རྒྱལ་ཚོགས་ཀྱི་ཆེད་མཁས་མི་སྣ། དེ་བཞིན་གསར་འགོད་པ་དང་གཞུང་འབྲེལ་མིན་པའི་ཚོགས་པ་སོགས་གང་མང་བོད་གཙོས་རྒྱ་ནག་རྒྱལ་ནང་དུ་རང་དབང་ངང་ཕེབས་ཆོག་པའི་འགན་ལེན་གནང་དགོས་པའི་ཞུ་སྐུལ་གནང་འདུག ལྷག་དོན་རྒྱལ་སྤྱིའི་བོད་དོན་ལས་འགུལ་ཁང་ནས་རྒྱ་ནག་གཞུང་གིས་བོད་ནང་འཆར་གཞི་ལྡན་པའི་སྒོ་ནས་བོད་མི་མང་ཚོགས་ཀྱི་འགྲོ་བ་མིའི་ཐོབ་ཐང་བརྩིེ་མེད་རྡོག་རོལ་ཤུགས་ཆེ་གཏོང་བཞིན་པ་མ་ཟད་བོད་མིའི་ངོ་བོ་དང་འབྲེལ་བའི་ཆོས་དང་རིག་གཞུང་། སྐད་ཡིག་བཅས་པ་རྩ་མེད་བཟོ་རྒྱུའི་ལས་གཞི་མང་དག་ཅིག་སྤེལ་བཞིན་པར་ཐུགས་འཚབ་ཀྱི་རྣམ་པ་བསྟན་པ་དང་སྦྲགས། ཡུ་རོབ་མཐུན་ཚོགས་ཀྱིས་དེ་སྔ་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་གསར་པ་བསྐོ་གཞག་བྱས་པ་ Wang Junzheng གཙོས་རྒྱ་གཞུང་གི་དཔོན་རིགས་ཁག་ཅིག་ལ་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་སྲིད་དོན་གྱི་ཉེས་ཆད་བཏང་ཡོད་པ་ལུང་འདྲེན་གནང་སྟེ། ད་ཆ་མཐུན་ཚོགས་དེས་དེ་སྔ་གཏན་འབེབས་གནང་བའི་ཉེས་ཆད་བཏང་བའི་སྲིད་བྱུས་བརྒྱུད་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་ནག་གི་དཔོན་རིགས་གཞན་ཁག་ཅིག་ལའང་སྲིད་དོན་གྱི་ཉེས་ཆད་འགེལ་དགོས་པ་དང་ཆབས་ཅིག ད་ཆ་རྒྱའི་བཀག་ཉར་འོག་ཡོད་པའི་རྡོ་རྗེ་བཀྲིས་ལགས་དང་སྒོ་ཤེས་རབ་རྒྱ་མཚོ་ལགས། དེ་བཞིན་གྲྭ་རིན་ཆེན་ཚུལ་ཁྲིམས་ལགས་གསུམ་ཆ་རྐྱེན་གང་ཡང་མེད་པར་འཕྲལ་མར་དུ་གློད་བཀྲོལ་གཏོང་དགོས་པའི་ཞུ་སྐུལ་བསྐྱར་ནན་གནང་ཡོད་པ་རེད། རྩ་བའི་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱོགས་གཉིས་དབར་གྱི་ལྷན་ཚོགས་སྔ་རོལ་དུ་འགྲོ་བ་མིའི་ཐོབ་ཐང་དང་འབྲེལ་བའི་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ཁག་ཅིག་དང་ཟུང་འབྲེལ་གྱིས་ཡུ་རོབ་མཐུན་ཚོགས་ཀྱི་འགོ་ཁྲིད་རྣམ་པར་ཞུ་ཡིག་ཅིག་ཕུལ་ཟིན་ཡོད་པའི་ནང་དུ་ཐེངས་འདིའི་ལྷན་ཚོགས་ཐོག་ངེས་པར་དུ་རྒྱ་གཞུང་ནས་ཡུལ་དེའི་ནང་དང་སྒོས་ཕྱི་ཕྱོགས་རྒྱལ་ཁབ་ཁག་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཐོག་གླེང་སློང་གིས་དུས་ཚོད་འདང་ངེས་ཤིག་གཏོང་དགོས་པའི་དགོས་འདུན་ཆེད་འབུལ་ཞུས་པ་དང་ཆབས་ཅིག རྒྱ་ནག་ནང་དུ་དོན་དངོས་ཐོག་བཟང་ཕྱོགས་ཀྱི་འགྱུར་བ་ཞིག་མ་འགྲོ་བར་དུ་ཕྱོགས་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་གནང་རྒྱུ་མེད་པའི་འབོད་སྐུལ་གནང་ཡོད།

ཨོ་གླིང་གི་སྲིད་བློན་ Scott Morrison ལགས་ཀྱིས་རྒྱ་ནག་དང་ཨོ་གླིང་གཉིས་ཀྱི་ཕྱི་འབྲེལ་གྱི་གནས་བབ་ལ་ཡར་རྒྱས་མ་ཕྱིན་བར་དུ་ཁོང་ནས་ཨོ་གླིང་གི་གྲོང་ཁྱེར་Canberra ཁུལ་དུ་བཅའ་བཞུགས་རྒྱ་ནག་གི་གཞུང་ཚབ་པ་གསར་བ་ Xiao Qian ལགས་སུ་ཐུག་འཕྲད་བྱེད་རྒྱུ་དེ་འོས་འཚམས་ཤིག་མིན་པར་བརྗོད་འདུགགཞི་རྩའི་ཕྱི་ལོ་ ༢༠༢༠ ལོར་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་ཡོངས་ལ་ཁྱབ་བརྡལ་བྱུང་སྐབས།  ཨོ་གླིང་སྲིད་གཞུང་གིས་རྒྱ་ནག་ནང་གི་ཏོག་དབྱིབས་རིམས་ནད་ཀྱི་འགོ་ཁུངས་ལ་ཞིབ་འཇུག་བྱེད་དགོས་བའི་རྩོད་སྒྲུབ་བྱས་པ་དང་འབྲེལ་ནས།  རྒྱ་ནག་གིས་ཨོ་གླིང་གི་ཚོང་ལས་རིགས་གཅིག་ལ་བཀག་སྡོམ་བྱས་པ་བརྒྱུད་ནས་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཏེ་ཕན་ཚུན་གྱི་མཐོ་རིམ་དཔོན་རིགས་བར་དུ་ཐུག་འཕྲད་དང་གྲོས་མོལ་གང་ཡང་བྱུང་མེད་པ་རེད། ཕྱོགས་གཉིས་ཀྱི་ཕྱི་འབྲེལ་གྱི་གནས་བབ་དང་འབྲེལ་ནས་ད་རེས་ཨོ་གླིང་གི་བརྒྱུད་ལམ་ཁག་ནས་ཡུལ་དེའི་སྲིད་བློན་མཆོག་ལ་རྒྱ་ནག་གི་གཞུང་ཚབ་པ་གསར་པར་ཐུག་འཆར་ཡོད་མེད་ཀྱི་ཐད་ནས་བཀའ་འདྲི་ཞུས་པར་ཁོང་གིས།   རྒྱ་ནག་གི་ནང་དུ་ཡོད་པའི་ཨོ་གླིང་གི་གཞུང་ཚབ་པ་ཡང་རྒྱ་ནག་གི་སྲིད་འཛིན་ཞི་ཅིན་ཕིང་དང་ཐུག་འཕྲད་བྱས་མེད་དུས།   ཁོང་ཡང་རྒྱ་ནག་གི་གཞུང་ཚབ་པར་ཐུག་འཕྲད་བྱེད་ཐབས་མེད་པ་ཞིག་ཡིན་པར་བརྗོད་འདུག གཞན་ཡང་ཁོང་གིས། དུས་རྒྱུན་ནས་གཞུང་ཚབ་པ་རྣམས་འབྲེལ་ཡོད་སྲིད་གཞུང་གི་འགོ་ཁྲིད་ལ་ཐུག་འཕྲད་བྱེད་སྲོལ་མེད་པ་ཞིག་ཡིན་པར་འགྲེལ་བརྗོད་བརྗོད་བྱས་པ་མ་ཟད།   རྒྱ་ནག་གིས་དེང་སྐབས་རྒྱལ་ཁབ་ཕྱོགས་གཉིས་ཀྱི་བློན་ཆེན་རང་བཞིན་གྱི་གྲོས་མོལ་བཀག་སྡོམ་བྱས་ཡོད་སྟབས།   རྒྱ་ནག་གིས་དེ་ལྟ་བུའི་བཀག་སྡོམ་དེ་ཕྱིར་བསྡུ་མ་བྱས་བར་དུ་རྒྱ་ནག་གི་གཞུང་ཚབ་པར་ཐུག་འཕྲད་བྱེད་རྒྱུ་དེ་འོས་འཚམས་ཤིག་མིན་པར་གསུངས་འདུག སྤྱིར་རྒྱ་ནག་གིས་ཉེ་སྔོན་ Pacific མངའ་ཁུལ་གྱི་རྒྱལ་ཁབ་ Solomon དང་འབྲེལ་བ་བཙུགས་ནས། ཁུལ་དེའི་བདེ་འཇགས་ལ་ཉེན་སྲུང་བྱ་རྒྱུར་ཐག་གཅོད་བྱས་པ་བརྒྱུད་ནས།   ཨོ་གླིང་དང་ཨ་རི་སོགས་ཀྱི་མཐུན་ཕྱོགས་ཀྱི་རྒྱལ་ཁབ་ཁག་ཅིག་གིས་གནད་དོན་དེར་སེམས་འཚབ་བྱེད་ཤུགས་ཆེ་རུ་གྱུར་ཡོད་པ་རེད།གཞི་རྩའི་རྒྱ་ནག་གི་གཞུང་ཚབ་པ་ Xiao Qian ཟེར་བ་དེ་ཟླ་བ་དང་པོ་ནས་ལས་ཁུར་ཞུས་ཏེ་ཨོ་གླིང་སྲིད་གཞུང་ལ་འབྲེལ་ལམ་འཛུགས་རྒྱུར་ཐབས་ཤེས་སྣ་མང་བྱེད་བཞིན་ཡོད་ཀྱང་།  ཨོ་གླིང་གི་སྲིད་བློན་Scott Morrison ལགས་ཀྱིས་རྒྱ་ནག་གི་གཞུང་ཚབ་པར་ཐུག་འཕྲད་བྱས་མེད་པ་དང་།  གནད་དོན་དེར་དཔྱད་བརྗོད་པས་འགྲེལ་བརྗོད་བྱས་པ་ལྟར་ན། ཨོ་གླིང་སྲིད་གཞུང་གིས་རྒྱ་ནག་ལ་ཁ་གཏད་གཅོག་རྒྱུ་དེ་ནི་སྲིད་བློན་ Scott Morrison ལགས་ཀྱི་འོས་བསྡུ་དང་འབྲེལ་བའི་འཐབ་བྱུས་ཤིག་ཡིན་པ་དང་། ཁོང་གིས་ད་དུང་མི་མཐུད་དེ་རྒྱ་ནག་གིས་ཨོ་གླིང་ཁུལ་དུ་ཤུགས་རྐྱེན་ཐེབས་རྒྱུར་འགོག་རྒོལ་བྱེད་བཞིན་པའི་རྣམ་འགྱུར་སྟོན་བཞིན་པ་ཞིག་ཡིན་པར་འགྲེལ་བརྗོད་གནང་འདུག ཨོ་གླིང་དུ་རྟེན་གཞི་བྱས་པའི་རྒྱ་རིགས་ཚོགས་པའི་ཚོགས་གཙོ།  Chen Hong ཟེར་བས་སྲིད་བློན་ Scott Morrison ཡིས་རྒྱ་ནག་གི་གཞུང་ཚབ་པར་མཇལ་འཕྲད་མ་བྱས་པ་དེ་ནི་གཞུང་ཚབ་པར་བརྩི་བཀུར་མ་བྱས་པ་ཁོ་ན་ཞིག་མིན་པར། རྒྱ་ནག་སྤྱི་ཡོངས་ལ་གུས་བརྩི་མ་བྱས་པའི་གནད་དོན་ཞིག་ཡིན་པར་བརྗོད་འདུག