Tibetan Royal Year of 2151 | Year of the Wood Dragon

བོད།

རྒྱ་ནག་གི་དགའ་སྟོན་ཁྲོད་བོད་མིའི་སེམས་ནང་གི་ན་ཟུག་ཕྱིར་མངོན་པ།

འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་མི་ལོ་བརྒྱ་འཁོར་བའི་དུས་དྲན་དང་། དེ་བཞིན་རྒྱ་ནག་གིས་བོད་ས་དབང་བསྒྱུར་བྱས་ནས་མི་ལོ་བདུན་ཅུ་འཁོར་བའི་དུས་ཚིགས་གཉིས་དང་འབྲེལ། རྒྱ་ནག་གིས་བོད་དབུས་ཁུལ་གྱི་གཙོ་བྱས་པའི་བོད་ས་སྤྱི་ཡོངས་ལ་དམ་དྲག་སྔར་ལྷག་བྱེད་མུས་ཁྲོད། ཁ་སང་རྒྱ་ནག་གིས་ཕོ་བྲང་པོ་ཏ་ལའི་མདུན་དུ་རྒྱ་ནག་དམར་ཤོག་གཞུང་ཚུགས་ནས་མི་ལོ་བརྒྱ་འཁོར་བར་སྤྲོ་སེམས་ཁོལ་བའི་ངང་ནས་རྟེན་འབྲེལ་ཞུ་ཞེས་འཕྲེད་དར་ཆེན་པོ་ཞིག་སྦྱར་བ་མ་ཟད། བོད་མི་རྣམས་མཆོད་མཇལ་དུ་བསྐྱོད་རྒྱུར་ཡང་དམ་དྲག་ཤུགས་ཆེར་བྱེད་བཞིན་འདུག དེའང་མདང་དགོང་སྤྱི་ཚོགས་དྲ་ལམ་དུ་པོ་ཏ་ལའི་མདུན་ཐང་ནས་སྐྱོན་པའི་བརྙན་ཞིག་ཁྱབ་སྤེལ་ཆེས་ཆེར་འགྲོ་བཞིན་པའི་ནང་དུ། མཆོད་མཇལ་ལ་ཕེབས་བཞིན་པའི་བོད་པའི་བུད་མེད་ཅིག་གིས་ཚོར་ཤུགས་དྲག་པོའི་ཐོག་ནས་ངུ་འབོད་དང་བཅས། པོ་ཏ་ལའི་གཡས་གཡོན་ཡོངས་རྫོགས་རྒྱ་མིས་ཁེངས་པ་དང་། བོད་མི་རྣམས་ཕྱག་སྐོར་ལ་འགྲོ་རྒྱུར་ཡང་དམ་དྲག་བྱས་པའི་གནས་སྟངས་ཕྱིར་བསྒྲགས་བྱས་པ་མ་ཟད། པོ་ཏ་ལའི་གྱང་ངོས་སུ་རྒྱ་ནག་དམར་ཤོག་གཞུང་ཚུགས་ནས་མི་ལོ་བརྒྱ་འཁོར་བར་རྟེན་འབྲེལ་གྱི་སྦྱར་ཡིག་བཤམ་སྟོན་བྱས་པ་ཕྱིར་མངོན་དང་འབྲེལ་ད་ཆ་བོད་ཁུལ་དེ་རྒྱ་ནག་ལྟ་བུར་འགྱུར་བཞིན་པར་འ་ཆད་འུ་ཐུག་ཀྱིས་སེམས་ཀྱི་སྡུག་གསལ་སྟོན་གནང་འདུག རྩ་བའི་རྒྱ་ནག་གིས་ཏོག་དབྱིབས་ནད་དུག་ལ་ཁ་གཡར་ནས་འདི་ལོའི་ས་ག་ཟླ་བའི་སྐབས་བོད་མི་རྣམས་ཕོ་བྲང་པོ་ཏའི་ཁུལ་དུ་མཆོད་མཇལ་དང་ཕྱི་སྐོར་ལ་ཕེབས་རྒྱུར་དམ་དྲག་བྱས་པ་མ་ཟད། མཆོད་མཇལ་གྱི་དུས་ཚོད་སྔ་དྲོ་ཚོུད་ ༩ ནས་ ༢ བར་མ་གཏོགས་མེད་པའི་ཚད་འཛིན་བཟོས་ཀྱང་། ཕྱོགས་གཞན་ནས་ཡུལ་སྐོར་སྤྲོ་འཆམ་པ་རྣམས་པོ་ཏ་ལར་མུ་མཐུད་བསྐྱོད་བཅུག་ཏེ་ད་ཆ་རྒྱ་ནག་གི་དུས་སྟོན་བསླེབ་ལ་ཉེ་བ་དང་བསྟུན་ནས་ཕོ་བྲང་པོ་ཏ་ལའི་ཁུལ་དུ་རྒྱ་ནག་ཧན་མི་རིགས་ཀྱི་ཡུལ་སྐོར་སྤྲོ་འཆམ་པ་སྔར་ལས་ཇེ་མང་དུ་འགྲོ་བཞིན་པ་རེད་འདུག མདང་དགོང་གི་ཕོ་བྲང་པོ་ཏ་ལའི་མདུན་ཐང་གི་ཡུལ་དངོས་ཀྱི་བརྙན་དེ་སྤྱི་ཚོགས་དྲ་ལམ་དུ་ཁྱབ་སྤེལ་བྱུང་བ་དང་བསྟུན། བོད་མི་རྣམས་ཀྱིས་བློ་ཕམ་ཆེན་པོ་དང་བཅས་རྒྱ་ནག་གི་གཞུང་མང་ནས་དམར་ཤོག་ཚོགས་པ་ཚུགས་ནས་ལོ་བརྒྱ་འཁོར་བའི་དུས་དྲན་ལ་རྟེན་འབྲེལ་ཞུ་བཞིན་ཡོད་ཀྱང་། བོད་ནང་གི་བོད་མི་རྣམས་དཀའ་སྡུག་ཚད་མེད་མྱངས་དང་མྱོང་བཞིན་ཡོད་སྐོར་འགྲེལ་བརྗོད་གནང་བ་མ་ཟད། ལྷ་སའི་ནང་གི་བརྙན་དེ་ལེན་མཁན་བུད་མེད་དེའི་གནས་སྟངས་ཅི་ཆགས་ལ་ཐུགས་འཚབ་ཆེན་པོ་གནང་བཞིན་པ་རེད་འདུག འདི་གའི་གསར་འགོད་པས་བཞུགས་སྒར་དུ་རྟེན་གཞིི་བྱས་པའི་བོད་གནས་ལྟ་ཞིབ་ཁང་གི་འགན་འཛིན་དབང་ལྡན་སྐྱབས་ལགས་སུ་བརྙན་ནང་གསལ་བའི་ལྷ་སའི་གནས་སྟངས་སྐོར་ལ་བཀའ་འདྲི་ཞུ་སྐབས། འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་ལོ་བརྒྱ་འཁོར་བ་དང་། རྒྱ་ནག་གིས་བོད་ས་དབང་བསྒྱུར་བྱས་ནས་ལོ་བདུན་ཅུ་འཁོར་བའི་དུས་ཚིགས་དང་འབྲེལ་ནས། རྒྱ་ནག་གིས་སྔར་ལོ་ནས་བོད་ཁུལ་གྱི་དགོན་པ་གྲྭ་ཚང་དང་སློབ་གྲྭ དེ་བཞིན་བོད་མིའི་སྤྱི་ཚོགས་གང་སར་དྲིལ་བསྒྲགས་ཀྱི་ལས་རིགས་སྣ་མང་ཞིག་གཉེར་བཞིན་པ་ལུང་འདྲེན་གནང་བ་དང་སྦྲགས། ད་ཆ་རྒྱ་ནག་གིས་བོད་མི་རྣམས་མཆོད་མཇལ་དང་བསང་གསོལ་སོགས་ཀྱི་མཚོན་པའི་འདུ་འཛོམས་ཀྱི་རིགས་ལ་བཀག་སྡོམ་བྱེད་ཤུགས་ཆེ་རུ་གཏོང་བཞིན་པ་དེ་ཡིས། རྒྱ་ནག་གིས་བོད་མི་རྣམས་ཀྱིས་ས་བྱི་ལོའི་ཞི་རྒོལ་ལྟ་བུའི་རྔམ་སྟོན་ཁྲོམ་སྐོར་རིགས་ཡོང་བར་དོགས་ནས་ཕྱོགས་ཡོངས་ནས་སྔ་ས་ནས་དམ་དྲག་བྱེད་བཞིན་པ་ཞིག་ཡིན་སྐོར་ངོ་སྤྲོད་གནང་སོང་། གཞན་ཡང་ཁོང་གིས། རྒྱ་ནག་གིས་འདི་ལོའི་དམར་ཤོག་གཞུང་བཙུགས་ནས་ལོ་བརྒྱ་འཁོར་བའི་དུས་དྲན་དང་བསྟུན་ནས་བོད་ཁུལ་དུ་དྲིལ་བསྒྲགས་ཀྱི་རིགས་མང་པོ་སྤེལ་བཞིན་ཡོད་པའི་ཁོངས་ནས། ཁ་སང་གི་བརྙན་ལམ་གྱི་ཕོ་བྲང་པོ་ཏ་ལའི་སྟེང་དུ་འཕྲེད་དར་ཆེན་པོ་སྦྱར་ཡོད་པ་དེ་ཙམ་མིན་པར། བོད་ཁུལ་གྱི་དགོན་སྡེ་མང་པོའི་ནང་དུ་རྒྱ་ནག་གི་རྒྱལ་དར་སྒྲེང་འཛུགས་དང་རྒྱ་ནག་གི་དུས་སྟོན་ལ་དགའ་བསུ་ཡོད་པའི་ཚིག་སྦྱོར་འཁོད་པའི་འཕྲེད་དར་ཆེན་པོ་སྦྱར་བ་དང་། དེ་བཞིན་གྲྭ་མང་གི་ལག་ཏུ་ཡང་རྒྱ་ནག་གི་དྲིལ་བསྒྲགས་ཀྱི་འཕྲེད་དར་དེ་ཚོ་བཞག་ནས་པར་དང་བརྙན་བླངས་ནས་སྤྱི་ཚོགས་དྲ་ལམ་དུ་ཁྱབ་སྤེལ་བྱེད་བཞིན་ཡོད་པ་སོགས་ཀྱང་འགྲེལ་བརྗོད་གནང་ཡོད།  གཞི་རྩའི་རྒྱ་ནག་གིས་བོད་ཁུལ་དུ་འཛུགས་སྐྲུན་གྱི་ལས་གཞི་སྣ་མང་སྤེལ་བ་དང་ལྷན་དུ། རྒྱ་ནག་གི་ཧན་མི་རིགས་ས་ཡ་མང་པོ་བོད་ཁུལ་དུ་ཡུལ་སྐོར་སྤྲོ་འཆམ་ལ་ཡོང་བཞིན་ཡོད་པ་ལྟར། ཕྱི་ལོ་ ༢༠༡༩ ལོར་རྒྱ་ནག་གི་ཡུལ་སྐོར་བ་ས་ཡ་ ༤༠ ལྷག་བོད་ཁུལ་དུ་འབྱོར་ཡོད་པའི་གནས་ཚུལ་གསར་ལམ་ཁག་ཏུ་ཐོན་པ་ལྟར། ད་ཆ་བོད་མི་རྣམས་རང་ས་རང་ཡུལ་དུ་གྲངས་ཉུང་མི་རིགས་ཆགས་བཞིན་པ་མ་ཟད། རྒྱ་ནག་གི་སྲིད་བྱུས་འདྲ་མིན་གྱི་འོག་ཏུ་བོད་མིའི་ཆོས་དང་རིག་གཞུང་ལ་དོ་ཕོག་ཆེན་པོ་ཐེབས་བཞིན་ཡོད་པའི་ཐད་ནས། ཕྱི་ལོག་གི་ཉམས་ཞོབ་པ་རྣམས་ཀྱིས་བོད་ཁུལ་ནི་དུས་རབས་ཉེར་གཅིག་ནང་གི་མི་སེར་སྤེལ་ཡུལ་གྱི་ས་ཁུལ་ཞིག་ཆགས་ཡོད་པར་མངོན་གསལ་གནང་ཡོད་པ་རེད།

གྲྭ་རིན་ཆེན་ཚུལ་ཁྲིམས་ལགས་སི་ཁྲོན་ཞིང་ཆེན་གྱི་ Mianyang བཙོན་ཁང་དུ་བཙོན་འཇུག

ཕྱི་ལོ་ ༢༠༡༩ ལོའི་ཕྱི་ཟླ་ ༧ ཚེས་ ༢༧ ཉིན་འཛིན་བཟུང་གིས་ད་བར་ལོ་ངོ་གཅིག་དང་ཕྱེད་ཀ་ལྷག་ཙམ་གྱི་རིང་གར་སོང་ཆ་མེད་དུ་གྱུར་བའི་གྲྭ་རིན་ཆེན་ཚུལ་ཁྲིམས་ལགས་ད་ཆ་སི་ཁྲོན་ཞིང་ཆེན་གྱི་ Mianyang བཙོན་ཁང་དུ་གཞན་ལ་འབྲེལ་ལམ་གནང་ས་མེད་པར་བཙོན་འཇུག་བྱས་ཡོད་པ་མངོན་གསལ་གནང་འདུགགྲྭ་རིན་ཆེན་ལགས་ཀྱི་ནང་མིས་ཁོང་གི་གནས་སྟངས་དང་ས་གནས་གང་དུ་ཡོད་མེད་སོགས་ཀྱི་ཐོག་ལ་འདྲི་རྩད་ལན་མང་བྱས་པའི་རྗེས་སུ་འདི་ལོའི་ཕྱི་ཟླ་ ༣ ཚེས་ ༢༣ ཉིན་རྔ་བ་ཁུལ་གྱི་མི་མང་བདེ་འཇགས་ལས་ཁུངས་ནས་གྲྭ་རིན་ཆེན་ཚུལ་ཁྲིམས་ལགས་སུ་ལོ་ངོ་བཞི་དང་ཕྱེད་ཀའི་བཙོན་འཇུག་གི་ཉེས་ཆད་ཕོག་ཡོད་སྐོར་གྱི་བརྡ་ཁྱབ་འབྱོར་ཡོད་པ་དང་། ད་ཆ་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཁོང་ Mianyang བཙོན་ཁང་དུ་བཙོན་འཇུག་བྱས་ཡོད་པ་ཤེས་རྟོག་བྱུང་ཡོད་པ་དེ་ལྟར་ཡང་། ཁོང་ལ་ཁྲིམས་བཤེར་སོགས་བྱས་པའི་ཞིབ་ཕྲའི་གནས་ཚུལ་གང་ཡང་ཐོན་མེད་པ་རེད། སྤྱིར་རིན་ཆེན་ལགས་ཀྱི་གནས་སྟངས་དང་འབྲེལ་ནས་གཟའ་འཁོར་སྔོན་མའི་ནང་རྒྱལ་སྤྱིའི་ཉེས་ཡངས་ཚོགས་པས་རིན་ཆེན་ལགས་ཀྱི་གནས་བབ་གཙོས་ཁོང་གི་ནང་མི་དང་ཁྲིམས་རྩོད་པ་རྣམས་ཁོང་དང་ཐུག་འཕྲད་གནང་མི་ཆོག་པའི་ངལ་བ་འཕྲད་སྐོར་ལ་གླེང་སློང་རིམ་པ་གནང་ཡོད་པ་རེད། རྒྱལ་སྤྱིའི་བོད་དོན་ལས་འགུལ་ཁང་གིས་རྔ་བ་ཁུལ་གྱི་མི་མང་བདེ་འཇགས་ལས་ཁུངས་ནས་ཕྱི་ཟླ་གསུམ་པའི་ནང་ཁོང་གི་ནང་མི་འབོད་སྒུག་བྱེད་སྐབས་གྲྭ་རིན་ཆེན་ལགས་སུ་ཁ་བྲལ་གཏོང་ཐབས་ཀྱི་དོགས་སློང་འོག་ཉེས་འཛུགས་བྱས་ཡོད་པ་དང་། རིན་ཆེན་ལགས་ཀྱི་འཕྲོད་བསྟེན་གྱི་གནས་བབ་དང་ཉེས་ཆད་ཀྱི་གནས་བབ་སོགས་ཀྱི་སྐོར་ལ་བཀའ་མོལ་གནང་སླད་ཁོང་གི་པཱ་ལགས་དང་ནང་མིས་བཙོན་ཁང་དུ་ཆེད་བཅར་ཞུ་རྒྱུར་འབད་བརྩོན་དང་ཞུ་སྐུལ་ལན་མང་ཞུས་ཀྱང་ད་བར་དེ་ལྟར་བྱུང་མེད་པ་མ་ཟད། ཉེས་ཆད་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་བྱུང་མེད་སྟབས་ཁོང་གི་གནས་སྟངས་དེ་ཛ་དྲག་གི་རང་བཞིན་དུ་འགྱུར་བཞིན་ཡོད་པར་གསལ་བཏོན་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རི་ San Francisco ལ་རྟེན་གཞིར་བྱས་པའི་ Dui Hua Foundation ཞེས་པའི་ཐེབས་རྩ་ཁང་གིས་རྒྱ་ནག་གཞུང་གིས་ཁྲིམས་ལུགས་སྐྱོང་སྟངས་དང་དཔྱད་ཁྲ་གཏོང་སྟངས་ཀྱི་སྐོར་ལ་ཉམས་ཞིབ་གནང་བའི་ཞིབ་འཇུག་སྙན་ཐོ་ཞིག་ལུང་འདྲེན་གནང་བར་བོད་དཀར་མཛེས་དང་རྔ་བ་ཁུལ་དུ་ཁྲིམས་ཐག་གཅོད་སྟངས་དེ་བཞིན་ཆེས་ཛ་དྲག་དང་ཉེན་ཁ་ཆེ་ཤོས་ཀྱི་ས་གནས་གཙོ་བོ་ཡིན་པར་གསལ་བཏོན་གནང་བ་དང་ས་ཁུལ་དེ་དག་ལ་ཆབ་སྲིད་དང་འབྲེལ་བའི་ཐོག་ལ་ཁྲིམས་ཀྱི་ཉེས་ཆད་ཆེན་པོ་འཕོག་ཉེན་ཡོད་པ་མ་ཟད། ཁ་བྲལ་རིང་ལུགས་སོགས་ཀྱི་ཉེས་མིང་དང་སྦྱར་ནས་ཉེས་འཛུགས་བྱེད་ཀྱི་ཡོད་པ་དང་། Dui Hua Foundation ཡིས་ཆབ་སྲིད་བཙོན་པའི་ཐོ་གཞུང་གི་སྐོར་ལ་གསལ་བཏོན་གནང་བར་དཀར་མཛེས་ཁུལ་དུ་རྒྱལ་ཁབ་བདེ་འཇགས་ཀྱི་གྱོད་གཞི་དང་འབྲེལ་ནས་གྱོད་གཞི་ ༢༨ ཁོངས་སུ་ ༢༦ དེ་ཁ་བྲལ་རིང་ལུགས་ཀྱི་ནག་ཉེས་འཛུགས་པའི་ཁྲིམས་ཆད་ཆགས་ཀྱི་ཡོད་པ་མ་ཟད་རྔ་བ་ཁུལ་དུའང་གྱོད་གཞི་ ༢༠ ཡི་ཁོངས་སུ་ ༡༣ ཁ་བྲལ་གྱི་ཉེས་འཛུགས་ཆགས་ཀྱི་ཡོད་སྐོར་བཀོད་ཡོད་པ་དང་། བརྒྱ་ཆར་གཞིགས་ན་ཆབ་སྲིད་ཀྱི་གནད་དོན་དང་འབྲེལ་ནས་བོད་རིགས་ཁོ་ནར་ཁ་བྲལ་གྱི་ཉེན་འཛུགས་བྱས་པ་བརྒྱ་ཆ་ ༦༠ ཆགས་ཀྱི་ཡོད་པར་ལུང་འདྲེན་གནང་འདུག Mianyang བཙོན་ཁང་དེ་སི་ཁྲོན་ཞིང་ཆེན་གྱི་རྒྱལ་ས་ཁྲེང་ཏུའི་ནང་དུ་ཡོད་པ་དང་བཙོན་ཁང་དེའི་ནང་བོད་ཤར་ཕྱོགས་ཁུལ་གྱི་བོད་མི་རྣམས་བཙོན་འཇུག་བྱེད་ས་དང་། དེ་སྔ་བོད་ཀྱི་ཆབ་སྲིད་བཙོན་པ་ཆོས་སྐྱིད་ལགས་བཙོན་ཁང་དེའི་ནང་མནར་གཅོད་མྱངས་ནས་ཕྱི་ལོ་ ༢༠༡༩ ཕྱི་ཟླ་ ༡ ནང་གློད་བཀྲོལ་བཏང་ཡོད་ཀྱང་། བཙོན་ཁང་ནང་གི་སྡུག་སྦྱོང་མནར་གཅོད་ཀྱི་རྐྱེན་གྱིས་ཕྱི་ལོ་ ༢༠༢༠ ལོར་འདས་གྲོངས་སུ་གྱུར་ཡོད་པ་བཀོད་འདུག

བོད་རིགས་དམར་ཤོག་ཚོགས་མིར་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་གསར་བསྒྲགས།

སྤྱི་ཚོགས་དྲ་ལམ་བརྒྱུད་འདི་གར་གནས་ཚུལ་བཏང་འབྱོར་བྱུང་བར་གཞིགས་ན། རྒྱ་ནག་དམར་ཤོག་གཞུང་གིས་འདི་ལོའི་ཟླ་བ་བཞི་བའི་ནང་བོད་རང་སྐྱོང་ལྗོངས་ཀྱི་ཏང་ཡོན་ལས་བྱེད་དམ་དམར་ཤོག་ཚོགས་མི་རྣམས་ལ་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་ཞེས་པ་ཞིག་བཀྲམས་པའི་ནང་དུ། སྤྱི་ཡོངས་ཀྱི་ཆོས་ལུགས་ཀྱི་བྱེད་སྒོ་ཡོངས་ལ་འབྲེལ་ཐག་བཅད་ནས་མར་ཁེ་སི་རིང་ལུགས་ཀྱི་དངོས་གཙོ་སྨྲ་བ་དང་ལྷ་མེད་སྨྲ་བ་མཐའ་འཁྱོངས་ལག་བསྟར་བྱེད་དགོས་བར་སྐུལ་མ་བཏང་འདུགརྩ་བའི་ཐེངས་འདིར་རྒྱ་ནག་གིས་སློབ་སྦྱོང་གི་ཡིག་ཆའི་ཆ་ཤས་འོག་བོད་རིགས་དམར་ཤོག་ཚོགས་མི་རྣམས་ལ་བཏང་བའི་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་ཞེས་པ་དེ་ཀྲུང་གོའི་གུང་ཁྲན་ཏང་གི་སྒྲིག་ཡིག་དང་།  གནས་བབ་གསར་པའི་འོག་གི་ཏང་ནང་གི་ཆབ་སྲིད་འཚོ་བའི་སྐོར་གྱི་ཚད་གཞི་འགའ་ཞིག  དེ་བཞིན་ཀྲུང་གོའི་གུང་ཁྲན་ཏང་གི་ཏང་ཡོན་ལ་སློབ་གསོ་དང་དོ་དམ་བྱེད་པའི་ལས་ཀའི་སྲོལ་ཡིག་གི་ཁྲིམས་སྲོལ་གཞིར་བཟུང་། བོད་རང་སྐྱོང་ལྗོངས་ཟེར་བའི་དོན་དངོས་དང་ཟུང་འབྲེལ་བྱས་ནས་ཚོད་ལྟའི་ཚུལ་དུ་བཟོས་པ་ཞིག་ཡིན་ཚུལ་བསྒྲགས་འདུག ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་དེ་དག་གི་ནང་དུ། བོད་རིགས་དམར་ཤོག་ཚོགས་མི་རྣམས་ཀྱིས། ཏཱ་ལ་སྐུ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་ཟེར་བ་དང་དབྱེ་མཚམས་གསལ་པོ་མཐའ་གཅིག་ཏུ་ཕྱེ་ནས་དར་ཆ་གསལ་སྟོན་གྱིས་ཏཱ་ལའི་རུ་ཚོགས་ཀྱིས་ཆོས་ལུགས་ལ་བརྟེན་ནས་བཟོས་པའི་ལྡོག་ཕྱོགས་ཀྱི་ཤུགས་རྐྱེན་ངན་པ་མེད་པ་བཟོ་དགོས་པ་མ་ཟད། ཕྱི་རྒྱལ་དུ་བསྐྱོད་དེ་ཏཱ་ལ་སྐུ་ཕྲེང་བཅུ་བཞི་པར་མཇལ་བའམ་ཡང་ན་ཏཱ་ལ་སྐུ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་ཀྱིས་གཉེར་བའི་ཆོས་ཚོགས་དང་། ཆོས་ལུགས་བྱེད་སྒོ་སྤེལ་རིགས་ནང་ཞུགས་པར་དུས་ཐོག་ཏུ་བཀག་འགོག་བྱ་དགོས་པ། དེ་བཞིན་ཁྱིམ་ཚང་དུ་མཆོད་གཤོམ་མི་འཛུགས་པ་དང་། བག་སྟོན་དང་གཤིན་པོ་དུར་སྐྱེལ་གྱི་མཛད་སྒོ་སོགས་དམངས་སྲོལ་བྱེད་སྒོའི་སྐབས་ཆོས་ལུགས་མི་སྣ་གདན་དྲངས་ནས། ཆོས་ལུགས་ཀྱི་བྱེད་སྒོ་སྤེལ་བར་ངེས་པར་དུ་སྔོན་ནས་གོང་རིམ་ལ་སྙན་སེང་ཞུ་དགོས་པ། ལུས་ཐོག་ཏུ་ཆོས་ལུགས་ཀྱི་མཚོན་རྟགས་མི་བརྐོ་བ་སོགས་ཆོས་ལུགས་དང་ཡོངས་སུ་འབྲེལ་ཐག་གཅོད་དགོས་པའི་བཀའ་རྒྱ་བཏང་བ་མ་ཟད། ཕྱི་རུ་ཡོད་དུས་ཡིད་མི་ཆེས་ཀྱང་ནང་དུ་སླེབས་དུས་ཡིད་ཆེས་པ། ལས་གནས་སུ་ཡོད་དུས་ཡིད་མི་ཆེས་ཀྱང་ལས་འཁྱུར་ངལ་གསོ་བཞག་དུས་ཡིད་ཆེས་བ་བཅས་ཀྱི་བྱ་སྤྱོད་ལ་གཏན་འགོག་མཐའ་གཅིག་ཏུ་བྱ་དགོས་པའི་བཀའ་རྒྱ་བཏང་འདུག ད་དུང་བོད་རིགས་དམར་ཤོག་ཚོགས་མི་རྣམས་ཀྱིས་རྣམ་པ་ཅི་རིགས་ཀྱི་སྒོ་ནས་ཆོས་ལུགས་དང་འབྲེལ་ཐག་གཅོད་དགོས་བ་མ་ཟད། རང་འགུལ་ངང་དམར་ཤོག་གི་མཚན་རྟགས་འདོགས་པ་དང་། ཕྲེང་བ་དང་སྐུ་འདྲ་སོགས་ཆོས་ལུགས་ཀྱི་མཚོན་རྟགས་མི་འདོགས་པ། གྲྭ་བཙུན་རྣམས་གདན་དྲངས་ནས་མོ་འདེབས་སུ་འཇུག་རྒྱུ་དང་ཕྲུ་གུར་མིང་འདོགས་པ་བཅས་ལ་མཐའ་གཅིག་ཏུ་དགག་གཞག་ནན་མོ་བྱེད་དགོས་པ་མ་ཟད། ཁྲིམས་ལྟར་ནར་མ་སོན་པའི་བུ་ཕྲུག་རྣམས་དགོན་པ་གྲྭ་ཚང་དུ་ཆོས་སྒོར་ཞུགས་སུ་མི་འཇུག་པའི་ངན་སྐུལ་བྱས་འདུག དེ་བཞིན་བོད་ཁུལ་གྱི་སྲོལ་རྒྱུན་གྱི་ལམ་ལུགས་སྟེ། བག་སྟོན་དང་གཤིན་པོ་དུར་སྐྱེལ་གྱི་མཚོན་པའི་དམངས་སྲོལ་གྱི་ནང་དུ་ཆོས་ལུགས་ཀྱི་མི་སྣ་གདན་འདྲེན་ཞུ་རྒྱུ་མེད་པར། ཆོས་ལུགས་དང་འབྲེལ་བའི་བྱེད་སྒོར་འཛུལ་ཞུགས་བྱེད་དགོས་ན་ངེས་བར་དུ་རྒྱ་ནག་གི་གོང་རིམ་དཔོན་རིགས་ལ་ཡར་ཞུ་བྱེད་དགོས་བའི་བླངས་བྱ་བཏོན་ཏེ། ནང་མི་གཉེན་འབྲེལ་རྣམས་རྒྱ་གར་དུ་སྐྱོད་ནས་༸གོང་ས་མཆོག་ལ་མཇལ་བཅར་ཞུ་རྒྱུའི་བྱ་བ་ལ་དངོས་སུ་དགག་གཞག་གནང་དགོས་བ་དང་། མི་སུ་ཞིག་གིས་རེ་ཞུ་དེར་ངོས་ལེན་མ་བྱས་ཚེ་འཕྲལ་དུ་གོང་རིམ་ལ་གནས་ཚུལ་ཡར་ཞུ་བྱེད་དགོས་བ་སོགས་ཀྱི་རེ་སྐུལ་བྱས་འདུག  མ་ཟད་སྤྱི་ཚོགས་ཀྱི་ལས་དོན། དཔལ་འབྱོར། རིག་གནས། སྤྱི་ཚོགས་ཀྱི་བྱ་གཞག་བཅས་ལ་ཐེ་གཏོགས་མི་བྱེད་པ་དང་གནས་རི་དང་ལྷ་མཚོ་ལ་བརྟེན་ནས། རྒྱལ་ཁབ་ཀྱི་འཛུགས་སྐྲུན་རྣམ་གྲངས་ལ་འགོག་རྐྱེན་མི་བཟོ་བ་བྱེད་དགོས་པར་གསལ་འདུག གཞི་རྩའི་སྔར་ལོར་ལོར་འདི་ག་གསར་ཁང་ལ་བོད་ནས་གནས་ཚུལ་མཁོ་སྤྲོད་བྱས་པ་ལྟར་ན། བོད་ཁུལ་དུ་རྒྱ་ནག་གིས་ཆེད་དུ་དམར་ཤོག་གི་ཚོགས་མི་རྩ་འཛུགས་བྱེད་བཞིན་པ་དང་འབྲེལ་ནས།  མཚོ་སྔོན་པོའི་གཡས་གཡོན་དང་བྲག་དཀར་རྫོང་ཁོངས་སོགས་ཀྱི་ས་གནས་གང་སར་ཁོར་ཡུག་གཙང་བཟོ་ལ་ཁ་གཡར་ནས། གཞུང་ལམ་དང་ཐག་ཉེ་བའི་ཆོས་ལུགས་ཀྱི་མཚོན་བྱེད་དེ། མ་ཎི་རྡོ་བརྐོས་དང་དར་ལྕོག། དེ་བཞིན་བསང་ཁྲི་སོགས་གཙང་བཟོ་བྱེད་དགོས་བའི་བཀའ་བཏང་བ་ལྟར། བོད་རིགས་དམར་ཤོག་ཚོགས་མི་རྣམས་ཀྱིས་དངོས་སུ་གོང་རིམ་གྱི་བཀའ་རྒྱ་དེ་ལག་བསྟར་བྱས་ཏེ། མ་ཎི་རྡོ་བརྐོས་དང་དར་ལྕོག་སོགས་རྨང་ནས་རྩ་གཏོར་བྱས་ཡོད་པར་འགྲེལ་བརྗོད་བྱས་ཡོད།

རྒྱ་གར་ལ་དམག་སྟོབས་ཀྱི་ཆ་ནས་ཚུར་རྒོལ་བྱེད་མཁན་ཡོངས་ལ་གདོང་ལེན་བྱ་རྒྱུའི་ནུས་པ་ལྡན་ཡོད།

རྒྱ་གར་གྱི་བདེ་སྲུང་བློན་ཆེན་སྐུ་ཞབས་Rajnath Singh མཆོག་གིས་རྒྱ་གར་ངོས་ནས་སྔར་ལོ་ལ་དྭགས་གྷལ་ཝན་ཁུལ་གྱི་ས་མཚམས་ཀྱི་རྩོད་རྙོག་ཁྲོད་ཚེ་སྲོག་ཤོར་བའི་རྒྱ་གར་གྱི་མཐའ་མཚམས་དམག་མི་རྣམ་པའི་བློས་གཏོང་དེ་ནམ་ཡང་བརྗེད་རྒྱུ་མིན་སྐོར་འགྲེལ་བརྗོད་དང་འབྲེལ། རྒྱ་གར་ལ་དམག་སྟོབས་ཆ་ནས་ཡུལ་འདིར་ཚུར་རྒོལ་བྱེད་མཁན་ཡོངས་ལ་གདོང་ལེན་བྱ་རྒྱའི་ནུས་པ་ཡོད་སྐོར་གསུངས་འདུགདེའང་རྒྱ་གར་གྱི་བརྒྱུད་ལམ་ཁག་ཏུ་ཐོན་པའི་གནས་ཚུལ་ནང་གསལ་ལྟར་ན། སྐུ་ཞབས་ Rajnath Singh མཆོག་རྒྱ་གར་གྱི་དམག་སྤྱི་ཆེན་མོ་ Gen. Manoj Mukund Naravane ལགས་དང་ལྷན་རྒྱ་གར་བྱང་ཕྱོགས་ལ་དྭགས་ཁུལ་དུ་གཞུང་འབྲེལ་གྱིས་ཆེད་ཕེབས་གནང་སྟེ་ཉིན་གསུམ་རིང་ལ་ས་ཁུལ་དེར་ཡོད་པའི་རྒྱ་གར་གྱི་མཐའ་དམག་གི་དཔོན་རིགས་རྣམས་དང་ཐུག་འཕྲད་ཀྱིས་ས་མཚམས་ཁུལ་གྱི་དམག་དོན་ཐད་གཟིགས་ཞིབ་གནང་བཞིན་ཡོད་པ་མ་ཟད། ཁོང་གིས་ཁ་སང་ལ་དྭགས་ཀྱི་དམག་མི་རྣམས་ལ་གཏམ་བཤད་གནང་བའི་སྐབས། གཞི་རྩའི་རྒྱ་གར་ནི་དུས་རྒྱུན་ནས་ཁྱིམ་མཚེས་རྒྱལ་ཁབ་ཁག་དང་ལྷན་དུ་དཀའ་ངལ་ཡོད་ཚད་གྲོས་མོལ་བརྒྱུད་ནས་སེལ་རྒྱུར་ཡིད་ཆེས་བྱེད་མཁན་ཞིག་ཡིན་རུང་། ཚུར་རྒོལ་བྱེད་མཁན་རིགས་ལ་བཟོད་བསྲན་བྱེད་ཐབས་བྲལ་བ་དང་། དམགས་སྟོབས་ཆ་ནས་རྒྱ་གར་ལ་ཚུར་རྒོལ་དེའི་རིགས་ལ་གདོང་ལེན་བྱ་རྒྱུའི་ནུས་པ་ཆ་ཚང་ཡོད་པ་གསུངས་འདུགདེ་བཞིན་ཁོང་གིས། རྒྱ་གར་གྱིས་ད་ལྟའི་བར་དུ་རྒྱལ་ཁབ་གཞན་སུ་ཞིག་ལ་ཡང་དཔུང་འཇུག་བྱེད་མ་མྱོང་ཞིང་གཞན་གྱི་ས་སོར་གང་ཙམ་ཡང་དབང་བསྒྱུར་བྱེད་མྱོང་མེད་པར་མངོན་གསལ་གྱིས། རྒྱ་གར་གྱིས་དུས་རྒྱུན་རྒྱལ་ཁབ་གཞན་ཞིག་ལས་རྣམ་པར་རྒྱལ་འདོད་ཀྱི་དམིགས་འབེན་བཅིངས་མྱོང་མེད་སྐོར་གསུངས་འདུག རྩ་བའི་རྒྱ་གར་གྱི་བདེ་སྲུད་བློན་ཆེན་མཆོག་གིས་ཐེངས་འདིའི་ལ་དྭགས་ཁུལ་གྱི་གཞུང་འབྲེལ་ཕྱོགས་བསྐྱོད་དང་འབྲེལ། ཁ་སང་རེས་གཟའ་ཟླ་བའི་ཉིན་དྲ་ལམ་ནས། མཐའ་མཚམས་ཀྱི་གཞུང་ལམ་འཛུགས་སྐྲུན་དོ་དམ་ལས་ཁུངས་ཀྱིས་གསར་རྒྱག་བྱས་པའི་ཟམ་ཆེན་ཁྱོན་ ༦༣ དབུ་འབྱེད་གནང་ཡོད་པ་དང་། དེའང་ལ་དྭགས་ནང་གི་ཟམ་ཆེན་ ༡༡ དང་། ཨ་རུ་ན་ཅལ་ནང་ ༢༩ ཨུ་ཊ་ར་ཁན་ཁུལ་དུ་ཟམ་ཆེན་ ༦ Jammu Kashmir ནང་ ༤ ཧི་མ་ཅལ་ནང་གསུམ། འབྲས་ལྗོངས་ནང་དྲུག གཞན་ཡང་ Manipur དང་ Nagaland ནང་གཅིག་རེ་བཅས་དབུ་འབྱེད་གནང་འདུག ཟམ་ཆེན་དེ་དག་གི་བཟོ་བསྐྲུན་འཆར་འགོད་པས་གསར་ལམ་ཁག་ལ། ཐེངས་འདིའི་ཟམ་ཆེན་དེ་དག་གིས་མཐའ་དམག་ཙམ་མ་ཡིན་པར་ས་གནས་ཡུལ་མི་དང་ཡུལ་སྐོར་སྤྲོ་འཆམ་པ་བཅས་ལ་ཕན་ནུས་ཆེན་པོ་ལྡན་རྒྱུ་ཡིན་པ་གསུང་ཡོད་པ་རེད་འདུག དེའི་བར་ན་ཟླ་འདིའི་ཚེས་༢༥ཡིན། རྒྱ་ནག་དམར་ཤོག་སྲིད་གཞུང་བཙུགས་ནས་མི་ལོ་ཧྲིལ་བོ་བརྒྱ་འཁོར་གྱི་ཡོད་པའི་རྒྱལ་སྟོན་དུས་ཆེན་དང་བསྟུན་ནས།  རྒྱ་ནག་སྲིད་གཞུང་གིས་ལྷ་ས་ནས་ཉིང་ཁྲི་བར་གྱི་ལྷ་ཉིང་ལྕགས་ལམ་དངོས་སུ་སྒོ་འབྱེད་ཀྱིས་བོད་ཁུལ་གྱི་ཆེས་ཐོག་མའི་གློག་རླངས་ཅན་གྱི་ཤུགས་འགྲེམས་མེ་འཁོར་ཐོག་མ་དེ་བོད་ཁུལ་དུ་ཆེད་གཏོང་བྱས་ཡོད་པ་རེད།ཐེངས་འདིའི་བོད་ཁུལ་གྱི་ལྷ་ཉིང་གི་མེ་འཁོར་ལྕགས་ལམ་དེར་ཕུག་ལམ་༤༩ དང་ཟམ་ཆེན་ ༡༢༡ ལྷག་གིས་གྲུབ་ཡོད་པ་མ་ཟད། ལྷ་ས་དང་ཉིང་ཁྲི་བར་དུ་སྤྱི་ལེ་ ༡༧༠༠ ལྷག་ཡོད་པའི་འགྲིམ་འགྲུལ་དེ་ཆུ་ཚོད་ ༤༨ ནས་ཆུ་ཚོད་ ༡༣ རིང་གི་འགྲུལ་ལམ་དུ་བཟོ་སྐྲུན་བྱས་ཡོད་པར་བསྒྲགས་འདུག རྒྱ་ནག་གི་གཞུང་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ལྷ་ཉིང་ལྕགས་ལམ་འདི་ཉིད་ལྷ་ས་དང་ལྷོ་ཁ། ཉིང་ཁྲི་བཅས་གྲོང་ཁྱེར་གསུམ་དུ་ཁྱབ་ཡོད་ཅིང་། ལམ་རྒྱུད་དུ་བོད་ལྗོངས་ཀྱི་མི་འབོར་སྟུག་པོའི་ས་ཁོངས་བརྒྱུད་དགོས་པ་དང་། ལྕགས་ལམ་ཤར་གཏོང་ཐུབ་པ་དེས་ལྷ་ས་དང་ལྷོ་ཁ། ཉིང་ཁྲི་བཅས་ཀྱི་བར་དུ་འགྲོ་སྐྱོད་བྱེད་པའི་དུས་ཚོད་སྔར་བས་ཇེ་ཐུང་དུ་གཏོང་རྒྱུ་ཡིན་པ་མ་ཟད། དངོས་ཟོག་སྐྱེལ་འདྲེན་སྔར་ལྷག་ཤུགས་ཆེར་གཏོང་རྒྱུ་ཡིན་སྐོར་འཁོད་འདུག ཐེངས་འདིའི་རྒྱ་ནག་གིས་ཤར་གཏོང་བྱས་པའི་ལྷ་ཉིང་གི་མེ་འཁོར་དེ་ནི་ལྷོ་བོད་ཁུལ་གྱི་ས་མཚམས་སུ་ཁེལ་གྱི་ཡོད་སྟབས། རྒྱ་གར་གྱི་བྱང་ཤར་གྱི་མངའ་སྡེ་འབྲས་ལྗོངས་དང་ས་ཐག་ཉེ་བའི་འཕགས་བོད་ཀྱི་མཐའ་མཚམས་ཁུལ་གྱི་གློག་རླངས་ཀྱི་མེ་འཁོར་དང་པོ་དེ་ཆགས་ཀྱི་ཡོད་པ་རེད་འདུགགཞི་རྩའི་སྔར་ལོའི་འཕགས་བོད་ས་མཚམས་ཀྱི་གྷལ་ཝན་ལུང་གཤོངས་སུ་རྒྱ་དཀར་ནག་གི་དམག་མིའི་བར་གདོང་ཐུག་བྱུང་སྟེ་ཕྱོགས་གཉིས་ཀྱི་མཐའ་དམག་ཤི་རྨས་ཐེབས་པའི་གནད་དོན་དང་འབྲེལ་ནས། ད་བར་ཕྱོགས་གཉིས་ཀྱི་དམག་དོན་སྐུ་ཚབ་བར་ལ་གྲོས་མོལ་ཐེངས་ ༡༡ བྱས་ཟིན་ནའང་ད་དུང་མཐའ་མཚམས་ཁག་གི་དམག་མི་རྣམས་ཡོངས་སུ་ཕྱིར་འཐེན་བྱེད་རྒྱུར་གྲོས་འཆམ་བྱུང་མེད་སྟབས། ད་ལྟའི་ཕྱོགས་གཉིས་ནས་འཕགས་བོད་མཐའ་མཚམས་ཁུལ་དུ་འཛུགས་སྐྲུན་གྱི་ལས་གཞིའི་རྣམ་གྲངས་ཤུགས་ཆེ་རུ་བཏང་སྟེ་ཕྱོགས་སོ་སོའི་མཐའ་དམག་གི་དཔུང་ཁག་ངོམ་བཞིན་པ་རེད་འདུག  

རྒྱ་ནག་གཞུང་གིས་བོད་ཀྱི་གནམ་གཤིས་འགྱུར་ལྡོག་ལ་གདོང་ལེན་དགོས་བའི་ཞུ་སྐུལ།

བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཚན་པའི་གོ་སྒྲིག་འོག་ཉེ་ལམ་ཚེས་ ༢༥ ནས་ ༢༧ བཅས་ཉིན་གྲངས་གསུམ་རིང་བོད་ཀྱི་ཁོར་ཡུག་གི་ཚོགས་ཆེན་ཐེངས་གསུམ་པ་ཚོགས་འདུག་པ་དང་སྦྲགས།  ཚོགས་ཆེན་དེའི་ཐོག་སྐྱབས་རྗེ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གི་དབུས་པའི་ཡུ་རོབ་ཁུལ་གྱི་གྲོས་ཚོགས་འཐུས་མི་དང་།   རྒྱལ་ཁབ་འདྲ་མིན་བརྒྱད་ནས་ཕེབས་པའི་ཁོར་ཡུག་ཆེད་མཁས་པ་གྲགས་ཅན་ ༡༥  ནས་ལྷན་ཞུགས་ཀྱིས་བོད་ཀྱི་ཁོར་ཡུག་གི་གནས་སྟངས་ཐད་རྒྱལ་སྤྱིའི་དྲ་ཐོག་ཚོགས་འདུ་ཚོགས་ཡོད་པ་རེད། ཉིན་གྲངས་གསུམ་རིང་གི་ཚོགས་ཆེན་ཐོག་ཚོགས་ཞུགས་པ་རྣམས་པས་བོད་མཐོ་སྒང་གི་ཁོར་ཡུག་གི་གལ་འགངས་ཤེས་རྟོགས་དང་། གོ་ལ་ཧྲིལ་པོའི་གནམ་གཤིས་འགྱུར་ལྡོག་གི་འབྲེལ་བ།    ས་མཚམས་ལས་བརྒལ་བའི་ཆུ་བོ་དང་། བོད་མཐོ་སྒང་ནས་འབབ་བཞིན་པའི་ཆུ་བོ་ཁག་གི་གནས་བབ།  དེ་བཞིན་ཁོར་ཡུག་སྲུང་སྐྱོབ་ཁྲོད་འགྲོ་བ་མིའི་ཐོབ་ཐང་གི་འོས་འགན་ཞེས་པའི་བརྗོད་གཞི་ཐོག་བགྲོ་གླེང་གནང་འདུག སྐབས་དེར་ཚོགས་ཞུགས་པས་བོད་ཀྱི་ཁོར་ཡུག་སྲུང་སྐྱོབ་ཐད་ཕྱི་ཕྱོགས་ཀྱི་རྒྱལ་ཁབ་དང་ས་གནས་ཡུལ་མི་ནས་ག་རེ་གནང་ཐུབ་མིན་དང་།   བོད་ཀྱི་ཆུ་བོའི་གལ་གནད།  དེ་བཞིན་བོད་ཀྱི་འཁྱགས་རོམས་ཀྱི་ཞུ་ཚད་ཧ་ཅང་མྱུར་པོ་ཆགས་བཞིན་པའི་སྐོར་བཅས་བོད་ཀྱི་ཁོར་ཡུག་གི་ཆེས་ཛ་དྲག་གི་གནས་སྟངས་སྐོར་བགྲོ་གླེང་གནང་འདུག  མ་ཟད།   གནམ་གཤིས་འགྱུར་ལྡོག་ཕྱིན་པ་དེས་བོད་ཀྱི་ས་གནས་མང་ཚོགས་ཀྱི་འཚོ་བ་དང་སྣོད་བཅུད་རྟེན་འབྲེལ་ལ་ཤུགས་རྐྱེན་སྤྲོད་པ་དང་ལྷག་པར་དུ་ཉེ་དུས་ནས་བོད་མཐོ་སྒང་དུ་རང་བྱུང་གོད་ཆགས་ཀྱི་རྐྱེན་ངན་ཇེ་མང་དུ་འགྲོ་བཞིན་པ་སོགས་གླེང་སློང་གནང་འདུག ཚོགས་ཆེན་གྱི་ཉིན་གསུམ་དང་འབྲེལ་འདི་ག་རླུང་འཕྲིན་ཁང་ནས་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཚན་པའི་འགན་འཛིན་འཛམ་ལྷ་བསྟན་པ་རྒྱལ་མཚན་ལགས་སུ་བཀའ་འདྲི་ཞུས་སྐབས།  བོད་མཐོ་སྒང་གི་ཁོར་ཡུག་དང་གོ་ལའི་གནམ་གཤིས་འགྱུར་ལྡོག་གི་འབྲེལ་བ་དང་།  དེ་བཞིན་ཕན་ཚུན་ཤུགས་རྐྱེན་གང་སྤྲོད་མིན་ལྷག་པར་དེར་གདོང་ལེན་ཇི་ལྟར་་གནང་དགོས་པ་དང་།    རྒྱལ་སྤྱིའི་ཐོག་བོད་མཐོ་སྒང་གི་ཁོར་ཡུག་དེ་གལ་ཆེན་ཡིན་པ་ངོ་སྤྲོད་སོགས་ནི་ཚོགས་ཆེན་གྱི་དམིགས་ཡུལ་ཡིན་པར་གསུངས་སོང་། དེ་བཞིན་ཐེངས་འདིའི་ཚོགས་ཆེན་ཐོག་མཁས་དབང་དང་དཔྱད་ཞིབ་པ་ཚོས་བོད་ཀྱི་ཁོར་ཡུག་སྲུང་སྐྱོབ་ཐད་དགོངས་ཚུལ་ག་རེ་ཕེབས་སོང་ཞེས་བཀའ་འདྲི་ཞུས་སྐབས་ཁོང་གིས། ཚོགས་ཆེན་ཐོག་གསུང་བཤད་པ་ཚོས་བོད་མཐོ་སྒང་གི་ཁོར་ཡུག་སྲུང་སྐྱོབ་བྱེད་རྒྱུ་དེ་བོད་ཙམ་མིན་པར་ཨེ་ཤ་ཡའི་རྒྱལ་ཡོངས་དང་ལྷག་པར་འཛམ་གླིང་གོ་ལ་ཧྲིལ་པོར་གལ་ཆེན་ཆགས་ཀྱི་ཡོད་པ་དང་།  དེ་བཞིན་ཚན་རིག་པ་དང་རྒྱལ་ཁབ་ཚང་མ་མཉམ་འབྲེལ་གྱིས་བོད་མཐོ་སྒང་གི་ཁོར་ཡུག་གནས་སྟངས་ཐད་ཞིབ་འཇུག་བྱེད་དགོས་པ།  ལྷག་པར་བོད་ཀྱི་ཁོར་ཡུག་སྲུང་སྐྱོབ་སླད་བོད་མིའི་ཡུལ་སྲོལ་གོམས་གཤིས་དང་སྔར་ཡོད་པའི་ཤེས་བྱ་ལ་གུས་རྩི་དགོས་པ་དང་།  རྒྱ་གཞུང་གིས་བོད་ནང་གི་གནམ་གཤིས་འགྱུར་ལྡོག་གི་ཤུགས་རྐྱེན་ལ་རྒྱུས་ལོན་གྱིས་དེར་གདོང་ལེན་བྱེད་པར་དེར་འབྲེལ་གྱི་སྲིད་བྱུས་ཁ་ཡོད་ལག་ཡོད་ཀྱིས་ལག་བསྟར་དགོས་པ་དང་།   ས་གནས་བོད་མི་ནས་གནམ་གཤིས་འགྱུར་ལྡོག་ལ་གདོང་ལེན་གནང་དགོས་པ་སོགས་ཀྱི་དོན་ཚན་དྲུག་ལ་འགྲེལ་བརྗོད་གནང་སོང་། གཞི་རྩའི་ད་ལན་གྱི་ཚོགས་ཆེན་གྱི་ཉིན་དང་པོར་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་དང་། ཅེཀ་གྲོས་ཚོགས་ཀྱི་ཁོར་ཡུག་ཚོགས་ཆུང་གི་ཚོགས་གཙོ་ལྕམ་སྐུ་ Dana Balcarova  ལགས་དང་།  ཉིན་གཉིས་པའི་ཐོག་དབྱིན་ཡུལ་གྲོས་ཚོགས་འཐུས་མི་སྐུ་ཞབས་ Tim Loughton ལགས་ཆེད་དུ་གསུང་བཤད་གནང་བར་མགྲོན་འབོད་གནང་འདུག་པ་དང་།  ཉིན་མཐའ་མའི་ཚོགས་འདུའི་ཐོག་སྐྱབས་རྗེ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གིས་བཀའ་སློབ་གནང་འདུག

ཁམས་འབྲི་རུའི་བོད་མི་ཁག་ཅིག་འཛིན་བཟུང་།

འདི་ལོའི་ཕྱི་ཟླ་ ༤ པ་ཡས་མས་ལ་རྒྱ་དམར་གྱིསཁམས་འབྲི་རུ་ནས་ཡིན་པའི་བོད་མི་ཁག་ཅིག་ འཛིན་བཟུང་བྱས་འདུགཁམས་འབྲི་རུ་ནི་རྒྱ་གཞུང་གིིས་འདས་པའི་ལོ་མང་ནས་དམིགས་བསལ་དམ་དྲག་དང་དྲག་གནོན་ཆེས་ཆེར་བྱེད་བཞིན་པའི་ས་ཁུལ་ཞིག་ཆགས་ཀྱི་ཡོད་པ་རེད། བཙན་བྱོལ་ནང་དུ་གནས་བཞུགས་བོད་མི་ཡར་དར་ལགས་ཀྱིས་གནས་ཚུལ་གནང་བར་གཞིགས་ན་བོད་རང་སྐྱོང་ལྗོངས་ཟེར་བའི་ནག་ཆུ་ས་ཁུལ་གྱི་ཁོངས་སུ་ཡོད་པའི་འབྲི་རུ་རྫོང་ཙཱ་ལ་ཡུལ་ཚོ་མེ་རི་གྲོང་ཚོ་ནས་ཡིན་པའི་བརྒྱ་བྱིན་ལགས་ཀྱིས་ཕྱི་ཕྱོགས་སུ་ཡོད་པའི་རང་ཉིད་ཀྱི་སྤུན་ཉེ་འབྲེལ་ལ་འབྲེལ་བ་གནང་བ་བརྟེན་འཛིན་བཟུང་བྱས་པ་མ་ཟད་ཁོང་དང་ལྷན་དུ་བོད་མི་གཞན་ཁག་ཅིག་ཀྱང་འཛིན་བཟུང་བྱས་འདུག འབྲི་རུ་ནང་དམ་དྲག་ཆེ་བའི་གནས་སྟངས་ཁྲོད་སྐབས་ཐོག་གི་གནས་ཚུལ་རྒྱུས་ལོན་ཐུབ་རྒྱུ་ཧ་ཅང་ཁག་པོ་ཡིན་པ་ལྟར་བརྒྱ་བྱིན་ལགས་དང་ལྷན་དུ་བོད་མི་ག་ཚོད་འཛིན་བཟུང་དང་རྒྱུ་མཚན་གང་ཡིན། བཙོན་ཁང་གང་དུ་ཡོད་མེད་སོགས་ཞིབ་ཕྲའི་གནས་ཚུལ་ཁ་གསལ་ཤེས་རྟོགས་ཐུབ་མི་འདུགབརྒྱ་བྱིན་ལགས་ནི་ཕྲུ་གུ་གསུམ་གྱི་ཨ་ཕ་ཡིན་པ་དང་ཁོང་གིས་ཕྱི་ཕྱོགས་སུ་ཡོད་པའི་སྤུན་ཉེ་དང་ལྷན་དུ་ཁ་པར་བརྒྱུད་འབྲེལ་བ་གནང་བར་ཁ་གཡར་འདུག ལོ་ཤས་ནང་རྒྱ་དམར་གཞུང་གིས་བོད་ནག་ཆུ་ཁུལ་གྱི་ཤར་ཕྱོགས་སུ་ཡོད་པའི་རྫོང་ཁག་གསུམ་སྟེ་སྦྲ་ཆེན་དང་སོག་རྫོང་། འབྲི་རུ་རྫོང་བཅས་གསུམ་པོར་དྲག་གནོན་ཚད་ལས་བརྒལ་བ་བྱེད་བཞིན་པ་དང་ཁུལ་དེ་ནས་མི་མང་པོ་ཉེས་མེད་འོག་འཛིན་བཟུང་གིས་སྡུག་སྦྱོང་མནར་གཅོད་བཏང་བའི་རྐྱེན་གྱིས་བོད་མི་མི་ཉུང་བའི་ཚེ་སྲོག་ཤོར་བའི་གནས་ཚུལ་ཡང་བྱུང་ཡོད་པ་རེད།

རྒྱལ་ཚོགས་ཀྱི་ཚོགས་ཆེན་དང་བསྟུན་བོད་མིའི་ཞི་རྒོལ།

ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༤༧ པ་དང་བསྟུན་ཇེ་སྡུག་ཏུ་འགྲོ་བཞིན་པའི་བོད་ནང་འགྲོ་བ་མིའི་ཐོབ་ཐང་གི་གནས་སྟངས་མངོན་གསལ་དང་འབྲེལ་བོད་མི་ཚོས་རྒྱལ་ཚོགས་ཀྱི་མདུན་ཐང་དུ་ཞི་བའི་སྐད་འབོད་དང་རྒྱལ་ཚོགས་སུ་ཞུ་གཏུག་ཀྱི་ལས་འགུལ་སྤེལ་ཡོད་པ་རེད།དེ་རིང་ཕྱི་ཚེས་ ༢༥ ཉིན་འདི་ག་སུད་སི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་ངོས་སུ་ཡོད་པའི་ལོ་རྒྱུས་ཀྱི་རང་བཞིན་ལྡན་པའི་ཞབས་སྟེགས་ཞབས་ཆག་གི་མདུན་ཐང་དུ་སུད་སི་དང་ལིག་ཏེན་སིཊཡན་བོད་རིགས་མི་མང་གི་སྣེ་ཁྲིད་འོག་བོད་མི་དང་བོད་དོན་རྒྱབ་སྐྱོར་བ་རྣམས་ནས་ཕྱག་ཏུ་བོད་ཀྱི་རྒྱལ་དར་བསྣམས་ཤིང་། བོད་རྒྱལ་ཁབ་ཆེན་པོའི་རྒྱལ་གླུ་བླངས་པ་དང་བོད་ལ་རང་དབང་དགོས། རྒྱ་གཞུང་ནས་བོད་ནང་འགྲོ་བ་མིའི་ཐོབ་ཐང་རྡོག་རོལ་མཚམས་འཇོག་དགོས། རྒྱལ་ཚོགས་གཉིད་སད་ཤོགས་ཞེས་སོགས་ཀྱི་དགོས་མདུན་འཁོད་པའི་ཤོག་འཕྲིན་དང། སྐད་འབོད་གནང་སྟེ་ཞི་བའི་ངོ་རྒོལ་གྱི་ལས་འགུལ་སྤེལ་ཡོད་པ་རེད།སྐབས་དེར་ལས་འགུལ་སྣེ་ཁྲིད་གནང་མཁན་སུད་སི་དང་ལིག་ཏེན་སིཊཡན་བོད་རིགས་མི་མང་གི་ཚོགས་གཙོ་ཀརྨ་ཆོས་སྐྱིད་ལགས་སུ་བཅར་འདྲི་ཞུས་པར་ལས་འགུལ་ཐོག་ལ་སུད་སི་བོད་ཀྱི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གཙོས་པའི་སུད་སི་དང་ལིག་ཏེན་སིཊཡན་བོད་རིགས་མི་མང་། ས་གནས་གཞུང་འབྲེལ་མིན་པའི་སྐུ་ཚབ། དེ་བཞིན་བོད་དོན་རྒྱབ་སྐྱོར་བ་བཅས་མཉམ་ཞུགས་གནང་ཡོད་པར་གསུངས་ཡོད། སྤྱིར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་དེ་ཟླ་ ༦ ཕྱི་ཚེས་ ༢༡ ནས་འཚོགས་བཞིན་ཡོད་པ་དང་བསྟུན་བོད་མི་ཚོས་དེ་རིང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་གཙོ་འཛིན་ལྕམ་སྐུ་ Michelle Bachelet མཆོག་གི་མཚན་ཐོག་ལ་བོད་ནང་གི་ཆོས་དད་རང་དབང། སྐད་ཡིག་རང་དབང། སྨྲ་བརྗོད་རང་དབང། འདུ་འཛོམས་རང་དབང་སོགས་ཀྱི་གནས་བབ་མངོན་གསལ་གནང་བའི་ཞུ་སྙན་ཞིག་ཕུལ་བ་མཟད་ལྷག་པར་དུ་གཙོ་འཛིན་མཆོག་ནས་བོད་ཀྱི་གནད་དོན་ཐོག་ཁུ་སིམ་པོར་མ་བཞུགས་པར་ཚོགས་ཆེན་ཐོག་གླེང་སློང་གནང་རྒྱུའི་དུས་ལ་བབས་འདུག་ཅེས་ཞུ་འབོད་ཀྱང་གནང་ཡོད་པ་རེད།

རྒྱལ་ཚོགས་ལྷན་ཚོགས་ཐོག་རྒྱལ་ཁབ་ཞེ་བཞིས་བོད་ཐོག་བསྒྲགས་གཏམ་སྤེལ་བ།  

ཟླ་བ་འདིའི་ཕྱི་ཚེས་ ༢༡ ཇི་ནི་ཝར་འཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་ཐེངས་ ༤༧ ཐོག་ཁེ་ན་ཌས་དབུ་ཁྲིད་པའི་རྒྱལ་ཚོགས་ཀྱི་ཚོགས་མི་རྒྱལ་ཁབ་ ༤༤ ནས་མཉམ་འབྲེལ་གནང་བ་གཙོས་ཡོ་རོབ་མཐུན་ཚོགས་བཅས་ཀྱིས་རྒྱ་ནག་གི་བཙན་འོག་ཏུ་ཡོད་པའི་བོད་དང་ཤར་ཏུར་ཀི་སི་ཐན། ཧོང་ཀོང་བཅས་ཀྱི་ནང་འགྲོ་བ་མའི་ཐོབ་ཐང་གི་གནས་སྟངས་ཐོག་བློ་འཚབ་གནང་སྟེ་བསྒྲགས་གཏམ་སྤེལ་ཡོད་པ་རེད།ཏོག་དབྱིབས་ནད་ཡམས་རྐྱེན་པས་ཐེངས་འདིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༧ པ་དེ་ཡང་དྲྭ་ཐོག་བསྐོང་ཚོགས་གནང་ཡོད་པ་དང། ཁ་སང་ལྷན་ཚོགས་ཀྱི་ཉིན་གཉིས་པའི་སྔ་དྲོའི་ཚོགས་དུས་ཐོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་མཆོག་གིས་སྤེལ་བའི་འགྲོ་བའི་མིའི་ཐོབ་ཐང་གི་ལོ་འཁོར་སྙན་ཐོ་དང་འབྲེལ་བའི་བགྲོ་གླེང་ལས་རིམ་སྐབས་ཁེ་ན་ཌའི་རྒྱུན་བཞུགས་སྐུ་ཚབ་ལྕམ་ Leslie E.Norton ལགས་ཀྱིས་ཐེངས་འདིའི་ཁེ་ན་ཌའི་རྒྱལ་ཁབ་ཀྱིས་དབུ་ཁྲིད་པའི་རྒྱལ་ཚོགས་ཀྱི་ཚོགས་མི་རྒྱལ་ཁབ་ཞེ་བཞི་མཉམ་འབྲེལ་ཐོག་སྤེལ་བའི་བསྒྲགས་གཏམ་དེ་ལྷན་ཚོགས་ཐོག་སྒྲོག་སྦྱང་གནང་ཡོད་དང། བསྒྲགས་གཏམ་དེའི་ནང་གཙོ་བོ་རྒྱ་ནག་གཞུང་གིས་ཤར་ཏུར་ཀི་སི་ཐན་ནང་ཡུ་གུར་གྱིས་གཙོས་པའི་གྲངས་ཉུང་མི་རིགས་ཀྱི་གཞི་རྩའི་འགྲོ་བ་མིའི་ཐོབ་ཐང་ཐོག་དམ་དྲག་དང། བཙན་ཁྲིད་བཀག་ཉར། བཙན་དབང་གིས་བེུད་ཀྱི་སྐྱེ་སྒོ་བཀག་པ། རྩུབ་སྤྱོད། དེ་བཞིན་མི་སྤྱོད་ལས་འདས་པའི་སྡུག་སྦྱོང་གནར་གཅོད་མྱོང་བཞིན་པའི་གནད་སོགས་ལ་སེམས་འཚབ་ཡོད་ཅེས་བརྗོད་འདུག ལྷག་པར་དུ་ཚོགས་མི་རྒྱལ་ཁབ་དེ་དག་ནས་སྤེལ་བའི་བསྒྲགས་ནང་ཇེ་ཞན་ཇེ་སྡུག་ཏུ་འགྲོ་བཞིན་པའི་བོད་དང་ཧོ་ཀོང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་མུ་མཐུད་ནས་སེམས་འཚབ་ཆེན་པོ་བྱེད་བཞིན་ཡོད་ཅེས་གསུངས་པ་མ་ཟད་རྒྱ་ནག་གཞུང་གི་ངོས་ནས་ཁས་ལེན་བྱས་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འབྲུ་དོན་དོན་འཁྱོལ་ལག་བསྟར་དགོས་པའི་ནན་སྐུལ་ཡང་གནང་འདུག དེ་བཞིན་ཁ་ཉིན་ལྷན་ཚོགས་ཀྱི་ཉིན་དང་པོར་རྒྱལ་ཚོགས་ཀྱི་ཆེས་མཐོའི་འགྲོ་བའི་ཐོབ་ཐང་གཙོ་འཛིན་མཆོག་དང་ཁ་སང་གི་ལྷན་ཚོགས་ཐོག་ལྕམ་ Leslie E. Norton ལགས་ཀྱིས་བསྒྲགས་གཏམ་དེ་བརྒྱུད་རྒྱ་ནག་གཞུང་གི་ངོས་ནས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་མཆོག་གིས་གཙོས་པའི་རང་དབང་རྟོག་ཞིབ་སྡེ་ཚན་ཤར་ཏུར་ཀི་སི་ཐན་ནང་དངོས་ཡོད་གནས་སྟངས་རྒྱུས་ལོན་ཆེད་མགྲོན་འབོད་བྱེད་དགོས་ཞེས་འབོད་སྐུལ་ཡང་གནང་འདུག འོན་ཀྱང་ཁ་སང་ཇི་ནི་ཝར་ཡོད་པའི་རྒྱ་ནག་གཞུང་གི་རྒྱུན་བསྡད་ངོ་ཚབ་ནས་ཧོང་ཀོང་དང་ཤར་ཏུ་སི་ཐན་ནང་དུ་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་ཕེབས་རྒྱུ་དེ་ནི་རྒྱ་ནག་གཞུང་གི་ངོས་ནས་འཆམ་འཐུན་གྱི་ངོ་བོར་གཟིགས་སྐོར་ཙམ་ལས་རྟོག་ཞིབ་ཀྱི་ངོ་བོར་ངོས་ལེན་མེད་པ་མ་ཟད། གནད་དོན་དེ་ནི་རྒྱ་ནག་གི་བདག་དབང་དང་རྒྱལ་ནང་གི་གནད་དོན་ཡིན་པར་བརྟེན་ཕྱི་ཕྱོགས་ནས་ཐེ་བྱུས་མེད་སྐོར་བརྗོད་འདུག རྩ་བའི་ད་ལན་རྒྱལ་ཚོགས་ཀྱི་ལྷན་ཚོགས་ཐོག་རྒྱལ་ཁབ་ ༤༤ མཉམ་འབྲེལ་གྱིས་སྤེལ་བའི་བསྒྲམས་དེ་ཡང། ཁེ་ན་ཌ་གཙོས་སྣེ་ཁྲིད་པའི་ G7 སྟོབས་ཆེན་རྒྱལ་ཁབ་བདུན་དང། སུདསི། ཨོ་སི་ཀྲོ་ལོ་ཡ། ཅེཀ་སྤྱི་མཐུན་རྒྱལ་ཁབ། ནིའུ་ཛ་ལན་ཌི། དེ་བཞིན་རྒྱལ་ཚོགས་འཆར་འགོད་བྱས་པའི་ཤར་ཡོ་རོབ་མངའ་ཁུལ་རྒྱལ་ཁབ་ཁག་དང་ཨེ་ཤ་ཡ་དང་ཞི་བདེ་མངའ་ཁུལ་རྒྱལ་ཁབ་སོགས་ཆགས་ཀྱི་འདུག སྤྱིར་བདུན་ཕྲག་སྔོན་མར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་མི་སྣ་ཁག་ནས་རྒྱ་ནག་གཞུང་གིས་བོད་མིའི་ཆབ་སྲིད་བཙོན་པ་དང་ཆབ་སྲིད་ཀྱི་ལྟ་བ་མི་འདྲ་བའི་མི་སྣ་དང་གྲངས་ཉུང་མི་རིགས་ལ་བཙན་ཤེད་ཀྱིས་མིའི་ལུས་རྟེན་ནང་གི་ནང་འཁྲོལ་དབང་པོ་གཅོད་བྲེགས་ཀྱིས་སྔོག་འདོན་བྱེད་ཀྱི་ཡོད་སྐོར་མངོན་གསལ་བྱས་ཡོད་པ་མ་ཟད། དེ་བཞིན་ཉེ་སྔོན་ཨ་རི་དང་ཡུ་རོབ་མཐུན་ཚོགས་གཉིས་མཉམ་འབྲེལ་གྱིས་རྒྱ་ནག་གི་དབང་སྒྱུར་འོག་བོད་ནང་གི་གནས་སྟངས་གཙོས་རྒྱ་ནག་ནང་གི་འགྲོ་བ་མིའི་ཐོབ་ཐང་སྤྱི་ཡོངས་ལ་སེམས་འཚབ་ཡོད་པར་སྤྱིར་བསྒྲགས་ཤིག་ཀྱང་སྤེལ་ཡོད་པ་རེད།

རྒྱལ་སྤྱིའི་དབུ་ཁྲིད་གཙོས་རྩེད་འགྲན་པ་ཚོས་པེ་ཅིང་གི་དགུན་དུས་ཨོ་རྩེད་ལ་རྒྱབ་སྐྱོར་གནང་མཚམས་འཇོག་དགོས།

དེ་རིང་རྒྱལ་སྤྱིའི་ཨོ་ལམ་པིཀ་ཉིན་མོ་དང་བསྟུན་བོད་མི་གཙོས་ཡུ་གུར་བ་དང་ཧོང་ཀོང་། ལྷོ་སོག ཐེ་ཝན། དེ་བཞིན་རྒྱ་རིགས་བཅས་ཐུན་མོང་ནས་རྒྱལ་སྤྱིའི་རྒྱལ་ཁབ་རྣམ་པའི་དབུ་ཁྲིད་དང་རྒྱལ་ཁབ་ཀྱི་ཨོ་ལམ་པིཀ་ཚོགས་པ། ཨོ་ལམ་པིཀ་རྩེད་འགྲན་གྱི་སྦྱིན་བདག་ཚོར་ཕྱི་ལོ་ ༢༠༢༢ ལོའི་པེ་ཅིང་གི་དགུན་དུས་ཨོ་ལམ་པིཀ་རྩེད་འགྲན་ལ་རྒྱབ་སྐྱོར་གནང་རྒྱུ་མཚམས་འཇོག་དགོས་ཞེས་བསྒྲགས་གཏམ་སྤེལ་བ་དང་སྦྲགས་ཏེ་རྒྱལ་སྤྱིའི་ས་གནས་གང་སར་དེ་འབྲེལ་ལས་འགུལ་འདྲ་མིན་སྤེལ་མུས་རེད་འདུགབོད་མི་གཙོས་རྒྱ་ནག་གི་གཉའ་གནོན་འོག་ཡོད་པའི་མི་རིགས་རྣམས་ཀྱིས་ཕྱི་ལོ་ ༢༠༢༢ ལོའི་པེ་ཅིང་གི་དགུན་དུས་ཨོ་ལམ་པིཀ་རྩེད་འགྲན་ལ་ངོ་རྒོལ་གྱི་བསྒྲགས་གཏམ་ nobeijing2022.org ཞེས་པའི་དྲྭ་ལྗོངས་སུ་སྤེལ་འདུག་པ་དང་། བསྒྲགས་གཏམ་ནང་ད་རེས་འཛམ་གླིང་ས་ཕྱོགས་གང་སར་ནས་མི་སྟོང་ཕྲག་མང་པོ་འདུ་འཛོམས་ཀྱིས་རྒྱ་ནག་གཞུང་གིས་ཡུ་གུར་དང་ཊར་ཀིཀ་ཁ་ཆེའི་མི་རིགས་རྩ་བརླག་བཏང་བ་དང་། བོད་མི་གཙོས་ལྷོ་སོག་གི་ངོ་བོ་རྩ་མེད་གཏོང་ཐབས་བྱེད་བཞིན་པ་དང་ཧོང་ཀོང་གི་མང་གཙོ་རྡོག་རོལ་བཏང་བ། དེ་བཞིན་ཐེ་ཝན་ལ་ཡུལ་བབ་ཀྱི་སྲིད་བྱུས་ཐད་ཐུབ་ཚོད་སོགས་བཏང་བར་བརྟེན་པེ་ཅིང་གི་དགུན་དུས་ཨོ་ལམ་པིཀ་རྩེད་འགྲན་ལ་ངོ་རྒོལ་གནང་གི་ཡོད་པ་མ་ཟད། རྒྱལ་སྤྱིའི་དབུ་ཁྲིད་དང་ཨོ་ལམ་པིཀ་རྩེད་འགྲན་ཚོགས་པ་རྣམས་ནས་དགུན་དུས་ཨོ་ལམ་པིཀ་རྩེད་འགྲན་དེ་པེ་ཅིང་དུ་འཚོགས་རྒྱུར་རྒྱབ་སྐྱོར་གནང་མཚམས་འཇོག་དགོས་པའི་དགོས་འདུན་བཏོན་འདུག རྒྱལ་སྤྱིའི་ཨོ་རྩེད་ལྷན་ཚོགས་ནས་ལོ་ངོ་བཅུ་ཕྲག་རིང་རྒྱ་ནག་ནས་ཨོ་ལམ་པིཀ་རྩེད་འགྲན་གྱི་ཁྲིམས་དང་སྒྲིག་གཞི། དེ་བཞིན་གཞི་རྩའི་ལྟ་གྲུབ་ལ་གུས་བརྩི་བྱེད་དགོས་པའི་དགོས་འདུན་བཏོན་པར་གོ་སྐབས་བྱུང་ཡོད་ཀྱང་རྩེད་འགྲན་ལྷན་ཚོགས་ཀྱི་ངོས་ནས་སོ་སོའི་དབང་ཚད་བཟང་ཕྱོགས་ཐོག་བེད་སྤྱོད་གནང་ཐུབ་མེད་པར་གསུངས་འདུག ལྷག་པར་ཕྱི་ལོ་ ༢༠༢༢ ལོའི་ཨོ་ལམ་པིཀ་རྩེད་འགྲན་དེ་གོ་སྒྲིག་ཞུས་ན་དེས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་པ་ཁག་ཁྲིམས་མཐུན་ཁས་ལེན་གནང་བ་ལྟ་བུ་མཚོན་གྱི་ཡོད་པར་གསུངས་པ་མ་ཟད། དེ་སྔ་ཕྱི་ལོ་ ༢༠༠༨ ལོར་པེ་ཅིང་གི་ཨོ་ལམ་པིཀ་སྐབས་རྒྱ་ནག་གིས་འགྲོ་བ་མིའི་ཐོབ་ཐང་དང་འབྲེལ་ཁས་ལེན་ཁག་ཅིག་བྱས་ཡོད་ནའང་མུ་མཐུད་ནས་བོད་མིས་གཙོས་པའི་ཡུ་གུར་བ། དེ་བཞིན་གཞུང་ལ་སྐྱོན་འཛུགས་གནང་མཁན་གྱི་རྒྱ་རིགས་ལ་དྲག་གནོན་མནར་གཅོད་སོགས་ཀྱི་བྱ་སྤྱོད་སྤེལ་མུས་ཡིན་པ་དང་ཆབས་ཅིག དུས་ཡུན་འདིའི་ཁྲོད་རྒྱལ་སྤྱིའི་ཨོ་ལམ་པིཀ་ལྷན་ཚོགས་ནས་རྒྱ་གཞུང་ལ་གང་ཡང་གསུངས་མེད་སྐོར་འཁོད་འདུག  སྒོས་ད་ཆ་རྒྱ་ནག་གཞུང་གི་དབང་སྒྱུར་འོག་ཡོད་པའི་མི་རིགས་རྣམ་པའི་འགྲོ་བ་མིའི་ཐོབ་ཐང་གི་གནས་བབ་ཛ་དྲག་འོག་ཏུ་ལྷུང་ཡོད་སྟབས། གཞུང་དང་ཨོ་ལམ་པིཀ་ཚོགས་པ། ཨོ་ལམ་པིཀ་རྩེད་འགྲན་གྱི་སྦྱིན་བདག དེ་བཞིན་རྩེད་འགྲན་པ་རྣམས་ནས་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་ལ་ངོ་རྒོལ་གནང་དགོས་ཞེས་གསུངས་འདུག གཞི་རྩའི་དེ་རིང་གི་ཉིན་མོ་དང་བསྟུན་རྒྱལ་སྤྱིའི་ས་ཁུལ་མང་པོར་བོད་མི་གཙོས་ཡུ་གུར་བ། ཧོང་ཀོང་། ལྷོ་སོག ཐེ་ཝན། དེ་བཞིན་རྒྱ་རིགས་བཅས་འདུ་འཛོམས་ཀྱིས་ཕྱི་ལོ་ ༢༠༢༢ ལོའི་པེ་ཅིང་གི་དགུན་དུས་ཨོ་ལམ་པིཀ་རྩེད་འགྲན་ལ་ངོ་རྒོལ་གྱི་ Global Action day ཞེས་ལས་འགུལ་སྤེལ་གྱི་ཡོད་པ་རེད། དེ་རིང་ཨོ་སི་ཀྲོ་ལི་ཡའི་ནང་ Sydney དང་ Canberra  གཙོས་པའི་གྲོང་ཁྱེར་ཁག་ཏུ་ལས་འགུལ་སྤེལ་ཡོད་པ་མ་ཟད་ལས་འགུལ་ནང་མཉམ་ཞུགས་གནང་མཁན་ཚོས་རང་རྒྱལ་ཁབ་ཀྱི་རྒྱལ་དར་དང་། པེ་ཅིང་དགུན་དུས་ཨོ་ལམ་པིཀ་ཕྱིར་འཐེན་དགོས་ཞེས་ཕྲེད་དར་བསྣམས་ཏེ་ངོ་རྒོལ་གནང་འདུགདེ་བཞིན་ནིའུ་ཛི་ལན་ཌི་གནས་སྡོད་བོད་མི་རྣམས་ནས་ཀྱང་དེ་འབྲེལ་གྱི་ལས་འགུལ་སྤེལ་འདུག་པ་མ་ཟད་ཁེ་ན་ཊ་གཙོས་ཨ་རི་ནིའུ་ཡོག་དང་ནིའུ་འཇར་སི།  བྷོས་ཊོན།  ཡོ་རོབ་སོགས་ཀྱི་ནང་དུའང་དེ་རིང་ལས་འགུལ་སྤེལ་རྒྱུ་དང་རྒྱ་གར་གྱི་རྒྱལ་ས་ལྡི་ལི་གཙོས་ས་གནས་ཁག་ཏུ་ས་རྟགས་བསྡུ་རུབ་སོགས་ཀྱིས་ལས་འགུལ་སྤེལ་མུས་རེད་འདུག གཞན་ཡང་ཐེ་ཝན་གྱི་གཞུང་འབྲེལ་མིན་པའི་ཚོགས་པ་བཅུ་དྲུག་གིས་གསར་འགོད་བསྒྲགས་གཏམ་ཞིག་སྤེལ་བར་རྒྱ་ནག་དམར་ཤོག་ཚོགས་པས་བོད་དང་ཤར་ཏུར་ཀི་སི་ཐན། ལྷོ་སོག  ཧོང་ཀོང་། དེ་བཞིན་རྒྱ་ནག་ནང་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་མ་ཟད་ཐེ་ཝན་ནང་བཙན་དབང་གིས་ཧམ་བཟུང་བྱེད་ཐབས་བྱེད་ཀྱི་ཡོད་སྟབས་རྒྱ་གཞུང་གི་བྱེད་ཕྱོགས་དེས་ཨོ་ལམ་པིཀ་རྩེད་འགྲན་གྱི་ཞེ་བདེ་དང་མཐུན་འབྲེལ་གཞི་རྩའི་ལྟ་གྲུབ་དང་འགལ་གྱི་ཡོད་པས་རྒྱ་ནག་ལ་ཨོ་རྩེད་གོ་སྒྲིག་གི་ཆ་རྐྱེན་ཚང་མེད་པར་སྐྱོན་བརྗོད་གནང་འདུགཚོགས་པ་དེ་དག་གིས་རྒྱལ་སྤྱིའི་ཨོ་ལམ་པིཀ་ལྷན་ཚོགས་ནས་རྩེད་འགྲན་པའི་རང་དབང་དང་ཐོབ་ཐང་སྲུང་སྐྱོབ་སླད་ ༢༠༢༢ དགུན་དུས་ཨོ་ལམ་པིཀ་རྩེད་འགྲན་ཚོགས་ས་དེ་ས་གནས་གཞན་ལ་སྤོས་དགོས་པ་དང་།  ཐེ་ཝན་གྱི་གྲོས་ཚོགས་ནས་པེ་ཅིང་དགུན་དུས་ཨོ་ལམ་པིཀ་རྕེད་འགྲན་ཕྱིར་འཐེན་དགོས་པའི་གྲོས་ཆོད་གཏན་འབེབས་དགོས་པ་མ་ཟད་ཐེ་ཝན་གཞུང་ནས་དེར་རྒྱབ་སྐྱོར་གནང་དགོས་པ།  གལ་ཏེ་དགུན་དུས་ཨོ་ལམ་པིཀ་པེ་ཅིང་ནང་འཚོགས་ན་དེར་ཐེ་ཝན་གྱི་སྐུ་ཚབ་གཏང་རྒྱུ་མེད་པ་དང་དགུན་དུས་ཨོ་རྩེད་ལ་སྦྱིན་བདག་གནང་མཁན་ཚོས་རྒྱབ་སྐྱོར་གནང་མཚམས་འཇོག་དགོས་སྐོར་གྱི་དགོས་འདུན་བཏོན་འདུག རྒྱལ་སྤྱིའི་བོད་དོན་འབྲེལ་མཐུད་ལས་ཁང་གཙོས་བོད་རང་བཙན་སློབ་ཕྲུག་ཚོགས་པ་དང་བོད་ཀྱི་བུད་མེད་དང་གཞོན་ནུ་ལྷན་ཚོགས།  བོད་ཀྱི་རྒྱལ་ཡོངས་མང་གཙོ་ཚོགས་པ།  བོད་ཀྱི་དགུ་བཅུ་གསུམ་ལས་འགུལ་ཚོགས་པ། ཧིན་བོད་མཛའ་འབྲེལ་ཚོགས་པ། འཕགས་བོད་འབྲེལ་མཐུད་ཚོགས་པ་བཅས་ཚོགས་པ་བརྒྱད་ཀྱིས་རྒྱ་གར་གྱི་ཨོ་ལམ་པིཀ་ཚོགས་པའི་འགན་འཛིན་མཆོག་གི་མཚན་ཐོག་ཏུ་ཞུ་སྙན་ཕུལ་འདུག་པ་དང་།  དེའི་ནང་རྒྱ་གཞུང་གིས་བོད་མི་གཙོས་ཡུ་གུར་མི་རིགས་ཐོག་སྤེལ་བའི་བྱུས་ངན་གྱི་སྲིད་བྱུས་ལག་བསྟར་བྱེད་བཞིན་པའི་གནད་དོན་དང་དེ་བཞིན་རྒྱ་ནག་གིས་རྒྱ་གར་གྱི་མཐའ་མཚམས་ལ་ཧམ་འཛུལ་གྱིས་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོས་ཡོད་པས་རྒྱ་ནག་ནས་ ༢༠༢༢ ལོའི་དགུན་དུས་ཨོ་ལམ་པིཀ་གོ་སྒྲིག་ཞུ་ཐབས་བྲལ་བ་ཡིན་སྐོར་སོགས་གསུངས་འདུག རྩ་བའི་ད་རེས་ཀྱི་ལས་འགུལ་དེ་རྒྱལ་སྤྱིའི་བོད་དོན་འབྲེལ་མཐུད་ལས་ཁང་དང་བོད་མི། ཡུ་གུར།  སོག་པོ།  ཧོང་ཀོང་།  རྒྱ་རིགས། ཐེ་ཝན་བཅས་ཀྱི་ཚོགས་པ་ཐུན་མོང་གིས་གནང་བ་ཞིག་དང་དགུན་དུས་ཨོ་ལམ་པིཀ་པེ་ཅིང་ནས་ཕྱིར་འཐེན་མ་གནང་བར་སྤེལ་གནང་རྒྱུ་རེད་འདུག

Latest news