བོད་མིའི་སྒྲིག་འཛུགས།

དབུས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་ནས་ཉེ་སྔོན་སྐབས་ ༡༦ པའི་བོད་པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་འདུས་ ༧ པའི་ཐོག་བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་དགོས་ངེས་ཀྱི་འོས་གྲངས་བརྒྱ་ཆ་ལོན་མེད་སྐོར་དང་འབྲེལ་ནས་ངོས་ལེན་གནང་མེད་པ་ཡོངས་བསྒྲགས་གནང་སོང་།རྩ་བའི་ཉེ་སྔོན་ཉེ་སྔོན་གྲོས་ཚོགས་ཚོགས་དུས་ ༧ པའི་ལས་ཉིན་ ༤ པ། ཕྱི་ཟླ་ ༣ ཚེས་ ༢༢ ཉིན་སྤྱི་འཐུས་ལྷན་ཚོགས་སུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༢ གཞིར་བཟུང་སྲིད་སྐྱོང་བློ་བཟང་སེང་གེ་མཆོག་ནས་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་མིར་གྲོས་ཚོགས་ནང་ངོ་སྤྲོད་ཀྱིས་དགག་བྱ་ཡོད་མེད་གཟིགས་སྐབས། དགག་བྱ་གནང་བར་བརྟེན་གསང་བའི་འོས་བསྡུ་གནང་རྗེས་སྤྱི་འཐུས་ ༢༡ གིས་རྒྱབ་སྐྱོར་གནང་ནས་བཀའ་བློན་དུ་བདམས་ཐོན་བྱུང་བར་གསལ་བསྒྲགས་གནང་ཡོད་ཀྱང་། དེ་ཉིན་ཆེས་མཐོའི་ཁྲིམས་ཞིབ་ཁང་ནས་ཚོགས་གཙོ་སྦྲེལ་པོའི་མཚན་ཐོག་ལ་ཕྱག་བྲིས་ཤིག་ཕུལ་ཏེ་རྒྱབ་སྐྱོར་འོས་ཤོག་ ༢༡ ཐོབ་པ་དེ་ངོ་ཡོད་སྤྱི་འཐུས་ ༤༣ གྱི་བརྒྱ་ཆ་ ༥༠ ལས་ཉུང་བ་ཡིན་སྐོར་དང་འབྲེལ་བའི་ཛ་དྲག་གི་ཕྱག་བྲིས་ཕུལ་ཡོད་པ་དེ་ལྟར་ཡང་། ཚེས་ ༢༣ ཉིན་སྤྱི་འཐུས་ཚོགས་གཙོ་མཆོག་གིས་གནད་དོན་དེའི་སྐོར་གསར་འགོད་པར་དོགས་དྲི་བཀའ་ལན་གནང་སྐབས་རྩ་བའི་སྤྱི་འཐུས་ལྷན་ཚོགས་ཀྱི་ལས་དོན་བྱེད་ཕྱོགས་དང་བཀའ་མོལ་གནང་ཕྱོགས། དེ་བཞིན་འོས་འཕེན་ཕྱོགས་སོགས་ཁྲིམས་ཞིབ་ཁང་གང་གི་ཁྱབ་འོག་ཏུ་མེད་པ་དེ་ལྟར་ཡང་། ད་ལན་ཆེས་མཐོའི་ཁྲིམས་ཞིབ་ཁང་གི་ཕྱག་བྲིས་འབྱོར་བ་བཞིན་ལན་འདེབས་ཕུལ་བའི་ནང་དེ་སྔའི་གྲོས་ཚོགས་ནང་བརྒྱ་ཆ་བགོ་ཕྱོགས་ཀྱི་འགྲོ་ལུགས་གཞིར་བཟུང་ངོ་ཡོད་སྤྱི་འཐུས་ ༤༣ གྱི་བརྒྱ་ཆ་ ༥༠ དེ་ ༢༡ དང་གྲངས་ཆུང་ ༥༠ ཡིན་པ་ལྟར། བཀའ་བློན་གྱི་འོས་འདེམས་དང་འབྲེལ་བའི་སྒྲིག་གཞི་དོན་ཚན་ ༨༦ གཞིར་བཟུང་བཀའ་བློན་གྱི་འོས་མིར་དགག་བྱ་བྱུང་ཚེ་བགྲོ་གླེང་མི་དགོས་པར་ངོ་ཡོད་སྤྱི་འཐུས་ཀྱི་གསང་བའི་འོས་ཤོག་འཕང་ཐོག་འོས་འདེམས་བྱ་དགོས་པ་དང་། དེར་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མ་ཉུང་བའི་འོས་ཤོག་ཐོབ་དགོས་སྐོར་གསལ་ཡོད་ཀྱང་། དེ་ཉིན་སྤྱི་འཐུས་ ༤༣ ཡོད་སྟབས་བརྒྱ་ཆ་ ༥༠ ཐོབ་པར་སྤྱི་འཐུས་ ༢༡་༥ དགོས་ཀྱི་ཡོད་པ་དང་། ཚོགས་གཙོ་མཆོག་གིས་བཅའ་ཁྲིམས་དོན་ཚན་ ༤༩ པའི་ནང་སྤྱི་འཐུས་རྩ་འབོར་དང་ངོ་ཡོད་ཆ་དགོས་རྩིས་སྐོར་སྐབས་འཕྲོས་ལྷག་དཀར་ཆ་རྩིས་མ་དགོས་ཞེས་པ་དེ་ལུང་འདྲེན་གྱིས་བརྒྱ་ཆ་ ༥༠ ལོན་པར་ངོས་འཛིན་གནང་གི་ཡོད་པ་དེའི་ཐོག་གནས་ཀྱི་ཡོད་ཅེས་གསུངས་པ་མ་ཟད། ཚོགས་གཙོས་མཇུག་སྡོམ་གསུང་བཤད་ནང་དུའང་དེ་རང་ནན་བརྗོད་གནང་ཡོད་པ་རེད།དེ་རིང་ཕྱི་ཚེས་ ༤ སྔ་དྲོ་ཚོུད་ ༡༠ ཐོག་ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་ཁྲིམས་དྲུང་བཀྲིས་རྒྱ་མཚོ་ལགས་དབུ་བཞུགས། ཟུང་དྲུང་ཐུབ་བསྟན་ཚེ་རིང་ལགས་ཀྱིས་ཆེས་མཐོའི་ཁྲིམས་ཞིབ་ཁང་གི་བཀའ་བློན་ལ་ངོས་བཞེས་གནང་མེད་པའི་གསར་འགོད་གསལ་བསྒྲགས་སྒྲོག་སྦྱང་གནང་བའི་ནང་ཉེ་སྔོན་གྲོས་ཚོགས་ནས་བཀའ་བློན་འོས་འདེམས་ཀྱི་གསལ་བསྒྲགས་སྤེལ་མ་ཐག ཆེས་མཐོའི་ཁྲིམས་ཞིབ་ཁང་གི་ངོས་ནས་ཚོགས་གཙོ་སྦྲེལ་པོར་མང་མོས་བརྒྱ་ཆ་ ༥༠ ཡི་ཆ་རྐྱེན་ཚང་གི་མེད་སྐོར་གྱི་ཐུགས་ཞིབ་དགོས་པའི་ཕྱག་བྲིས་ཕུལ་ཡོད་པ་དང་། ཕྱག་བྲིས་ལ་བཀའ་ལན་འབྱོར་བ་དང་། ཚོགས་གཙོས་གསར་འགོད་པར་འགྲེལ་བརྗོད་གནང་བར་ཆེས་འཐོའི་ཁྲིམས་ཞིབ་ཁང་གི་ངོས་ལེན་མེད་པའི་ཐག་གཅོད་གནང་ཡོད་པ་དང་། དེ་རྗེས་ཚོགས་གཙོ་སྦྲེལ་པོས་རེ་འདུན་བཞིན་ཚོགས་གཙོ་སྦྲེལ་པོ་དང་ཁྲིམས་ཞིབ་པ་ཆེ་བ། སྲིད་སྐྱོང་བཅས་ཁྲིམས་ཞིབ་ཁང་དུ་བཞུགས་མོལ་ཚོགས་འདུ་ཚོགས་ཡོད་པ། དེ་རྗེས་བཀའ་ཤག་ཁྲིམས་ཞིབ་ཁང་ལ་བཅར་ནས་བཀའ་བསྡུར་གནང་རྗེས་བཀའ་དྲུང་ཡིག་ཚང་ནས་དམ་འབུལ་གྱི་ཞུ་སྐུལ་འབྱོར་ཡོད་པར་ཁྲིམས་ཞིབ་ཁང་ནས་བདམས་ཐོན་བཀའ་བློན་གསལ་བསྒྲགས་གནང་བའི་སྐྱེ་བོ་དེར་བཅའ་ཁྲིམས་ནང་གསལ་གྱི་ཆ་རྐྱེན་ཚང་གི་མེད་པས། དེའི་ཐོག་བཅའ་ཁྲིམས་དང་མཐུན་པའི་གནང་ཕྱོགས་ཤིག་མ་བྱུང་བར་དུ་བཅའ་ཁྲིམས་དོན་ཚན་ ༢༥ པ་ནང་གསལ་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཀྱི་ལས་རིམ་ཐོག་ཕེབས་ཐབས་མེད་པའི་ཐག་གཅོད་གནང་བ་སོགས་རྒྱུད་རིམ་ཆ་ཚང་ངོ་སྤྲོད་གནང་བ་བརྒྱུད་ཆེས་མཐོའི་ཁྲིམས་ཞིབ་ཁང་གི་ངོས་ནས་གཙོ་བོ་དོན་ཚན་ ༥ ཡི་ཐོག་ནས་ཐག་གཅོད་དང་རྒྱུ་མཚན་གསལ་བཤད་གནང་སོང་།དེའང་བཀའ་བློན་དུ་བདམས་ཐོན་བྱུང་བའི་དགོས་ངེས་གྲངས་ཚད་ཀྱི་ཆ་རྐྱེན་ནི་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མ་ཉུང་བའི་འོས་ཤོག་ཐོབ་དགོས་པ་དེར་འཕྲོས་ལྷག་སྐར་ཆ་བརྩི་མ་དགོས་པའི་ཆ་རྐྱེན་བཞག་མེད་པ་དང་། སྲིད་སྐྱོང་མཆོག་གིས་བཅའ་ཁྲིམས་དོན་ཚན་ ༢༢ གཞིར་བཟུང་སྤྱི་འཐུས་ལྷན་ཚོགས་སུ་བཀའ་བློན་འོས་གཞི་མིང་འདོན་གནང་བ་གང་ཞིག་བཅའ་ཁྲིམས་ནང་གསལ་དགོས་ངེས་ཀྱི་བརྒྱ་ཆའི་གྲངས་ཚད་ལོན་མེད་པ་མངོན་སུམ་དུ་གྲུབ་ཡོད་པའི་མང་མོས་མ་ཐོབ་པ་ཞིག་ལ་འོས་ཐོན་བྱུང་བའི་གསལ་བསྒྲགས་བྱས་པ་དེ་བཅའ་ཁྲིམས་དོན་ཚན་འདིའི་དགོངས་དོན་དང་འགལ་ཡོད་སྐོར་དང་འབྲེལ། བཅའ་ཁྲིམས་དོན་ཚན་ ༢༢ པའི་དགོངས་དོན་ལ་མངོན་གསལ་གྱི་གནོད་འགལ་བྱས་ཡོད་པ་གསུངས་སོང་།དེ་བཞིན་བཅའ་ཁྲིམས་དོན་ཚན་ ༢༢ རྩིས་གཞི་བརྒྱ་ཆ་ ༥༠ ཡིན་པ་དང་། དོན་ཚན་ ༤༩ ནང་གསེས་ ༡ རྩིས་གཞི་ནི་གྲངས་ཆ་གསུམ་ཆ་གཉིས་ཡིན་པ་ལྟར། སྔ་མ་ནི་བཀའ་བློན་གྱི་འོས་འདེམས་བྱེད་སྟངས་སྐོར་ཡིན་པ་དང་། ཕྱི་མ་ནི་སྤྱི་འཐུས་ལྷན་ཚོགས་དང་དེའི་རྒྱུན་ལས་སུ་སྤྱི་འཐུས་ཀྱི་ཉུང་ཚད་སྐོར་ཡིན་སྟབས་ཆ་རྐྱེན་དེ་དག་དོན་གནད་ཐ་དད་ཡིན་པ་ལས་བཀའ་བློན་འོས་ཐོན་གྱི་དགོས་ངེས་གྲངས་ཚད་ལ་སྦྱོར་མི་རུང་བ་ཡིན་པ་གསུངས་ཡོད།དེ་གཞིན་སྤྱི་འཐུས་ལྷན་ཚོགས་ནས་བདམས་ཐོན་བྱུང་བར་ངོས་འཛིན་བྱས་པའི་རྒྱབ་རྟེན་དུ་བརྒྱ་ཆ་འགོད་སྟངས་ཀྱི་རེའུ་མིག་གཞིར་བཟུང་གནང་ཡིན་པ་གསུངས་པ་དེ་ནི། ཁྲིམས་སྒྲིག་ཁག་ལ་བསྐྱར་བཅོས་སྐབས་སྤྱི་འཐུས་ལྷན་ཚོགས་ནང་མོས་མཐུན་རྒྱབ་སྐྱོར་ཇི་དགོས་ཀྱི་རེའུ་མིག་ཤོག་ངོས་གཉིས་ཅན་དང་། དེའི་མཉམ་སྤྱི་འཐུས་གྲངས་དང་བརྒྱ་ཆ་གསུམ་ཆ་ ༢ བརྒྱ་ཆ་ ༥༠ བརྒྱ་ཆ་བཞི་ཆ་གསུམ་ཞེས་པ་རེའུ་མིག་ཤོག་ངོས་གཅིག་ཅན་ཞིག་འདུག་པ་དེ་ཡིན་པ་དང་། བཀའ་བློན་གྱི་འོས་འདེམས་ཚང་མར་དེ་དོན་གནང་བ་བྱུང་ཡོད་ཅེས་བཀོདཡོད་སྟབས། དེའི་སྔའི་བཀའ་ཤག་སྐབས་ ༡༢ དང་ ༡༣  དེ་བཞིན་སྐབས་ ༡༤ དང་ ༡༥ བཅས་ཀྱི་གནད་དོན་ལུང་འདྲེན་དང་འབྲེལ་སྐབས་དེ་དག་ཐོག་བརྒྱ་ཆ་རྩིས་སྐོར་བྱེད་དགོས་པ་བྱུང་མེད་སྐོར་དང་འབྲེལ། རེའུ་མིག་དེ་ཁྲིམས་སྒྲིག་ཁག་ལ་བསྐྱར་བཅོས་སྐབས་སྤྱི་འཐུས་ལྷན་ཚོགས་ནང་མོས་མཐུན་རྒྱབ་སྐྱོར་ཇི་དགོས་ཀྱི་རེའུ་མིག་ཡིན་པ་ལས། བཀའ་བློན་གྱི་འོས་འདེམས་སྐབས་བརྒྱ་ཆ་བགོ་སྟངས་སྐོར་མིན་པ་རེའུ་མིག་འགོ་བརྗོད་ནས་རྟོགས་ཐུབ་ཀྱི་ཡོད་པ་ལྟར། སྤྱི་འཐུས་ལྷན་ཚོགས་ནས་ཡིག་ཆ་དེས་བཅའ་ཁྲིམས་དོན་ཚན་ ༢༢ ནང་གསལ་བཀའ་བློན་དུ་བདམས་ཐོན་ཡོང་བ་ལ་བརྒྱ་ཆ་ ༥༠ ལས་མ་ཉུབ་བ་དགོས་པའི་ཆ་རྐྱེན་འདིར་བསྒྱུར་བཅོས་གཏོང་ཐབས་མེད་ཅེས་ཚོགས་གཙོ་སྦྲེལ་པོར་གསལ་པོ་ཞུས་ཟིན་ཡོད་པ། ལྷག་པར་དུ་ཆེས་མཐོའི་ཁྲིམས་ཞིབ་ཁང་ནས་བཅའ་ཁྲིམས་དང་འགལ་བའི་བྱ་སྤྱོད་རྣམས་གསལ་འདོན་གནང་ཟིན་རྗེས་ད་དུང་མུ་མཐུད་ སྤྱི་འཐུས་ལྷན་ཚོགས་ནང་ལས་དོན་བྱེད་ཕྱོགས་དང་བཀའ་མོལ་གནང་ཕྱོགས། འོས་འཕེན་སྟངས་ཁྲིམས་ཞིབ་ཁང་གང་གི་ཡང་ཁྱབ་ཁོངས་ལ་ཡོད་མ་རེད་ཅེས་གསུངས་པ་ནི་བཅའ་ཁྲིམས་དོན་ཚན་ ༤༦ དང་ ༥༨ གཉིས་མཉམ་བསྲེས་བཏང་སྟེ་འགྲེལ་ལོག་གནང་བ་ཞིག་ཡིན་པ། བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་སྲུང་སྐྱོབ་བྱ་རྒྱུ་དེ་ཁྲིམས་ཞིབ་ཁང་གི་འདོར་དུ་མེད་པའི་ལས་འགན་ཡིན་སྟབས། འོས་ཐོན་མ་བྱུང་བའི་འོས་གཞི་དེར་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཡོང་བའི་ཞུ་སྐུལ་བྱུང་བ་ཡང་རང་བཞིན་གྱིས་ངོས་བཞེས་གནང་ཐབས་མེད་སྐོར་དང་། བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༦ ནང་གསལ་ལྟར། ཆེས་མཐོའི་ཁྲིམས་ཞིབ་ཁང་འདི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་དང༌། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན་པ་དང་། དེར་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་པའི་སྐུ་དབང་དང་། དེ་བཞིན་བཅའ་ཁྲིམས་དོན་ཚན་ ༥ ནང་གསལ་ལྟར་ཁྲིམས་ལུགས་དང་། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་རུང་ནུས་ལྡན་ཡིན་མིན་བཅའ་ཁྲིམས་ཀྱི་ཚད་འཛིན་ཐག་གཅོད་བྱེད་པའི་སྐུ་དབང་བཅས་བཙན་བྱོལ་བོད་མིའི་བཅའ་ཁྲིམས་ཀྱིས་ཆེས་མཐོའི་ཁྲིམས་ཞིབ་ཁང་ལ་བསྐུར་ཡོད་པས། ཀ་བ་གསུམ་གྱི་དབང་ཆའི་ས་མཚམས་ལས་མ་འགལ་བའི་ཐོག་ནས་ཐག་གཅོད་བྱས་པ་ཞིག་ཡིན་པ་དང་། བཅའ་ཁྲིམས་ཀྱིས་བསྐུར་བའི་འགན་དབང་རྣམས་ལག་བསྟར་བྱེད་སྐབས་སུ་བཅའ་ཁྲིམས་ཀྱི་དགོངས་དོན་ལ་དོ་ཕོག་དང་གནོད་འགལ་བྱེད་པའི་བྱ་སྤྱོད་མཐོང་བཞིན་དུ་དེར་སྣང་མེད་དམ། གུ་བཤངས་སམ། བབ་བསྟུན་ནམ། མཐུན་འགྱུར་བྱ་རྒྱུ་ནི་ཁྲིམས་ཞིབ་ཁང་གནས་དགོས་པའི་རྒྱུ་མཚན་དང་རྒྱབ་འགལ་ཡིན་པས། ཁྲིམས་ཞིབ་ཁང་ནས་བཅའ་ཁྲིམས་སྲུང་སྐྱོབ་ཀྱི་དམ་བཅའ་ནམ་ཡང་འདོར་ཐབས་མེད་པ་བཅས་གསུངས་སོང་། ཁྲིམས་ཞིབ་ཁང་གི་གསར་འགོད་ལྷན་ཚོགས་གྲུབ་རྗེས་གསར་འགོད་པ་རྣམས་ནས་སྤྱི་འཐུས་ཚོགས་གཙོ་པདྨ་འབྱུང་གནས་ལགས་སུ་འཀའ་འདྲི་ཞུས་པར་སྤྱི་འཐུས་ལྷན་ཚོགས་ཀྱི་ངོས་ནས་བཀའ་བློན་བདམས་མཐོན་གྱི་གསལ་བསྒྲགས་གནང་བའི་ཐོག་དེ་སྔ་བཅའ་ཁྲིམས་དགོངས་དོན་བཞིན་བརྒྱ་ཆ་ ༥༠ ལོན་པར་ངོས་འཛིན་ཐག་གཅོད་གནང་བ་དེའི་ཐོག་གནས་ཀྱི་ཡོད་པ་གསུངས་སོང་། དེ་བཞིན་ད་རེས་ཆེས་མཐོའི་ཁྲིམས་ཞིབ་ཁང་གི་སྤྱི་འཐུས་ལྷན་ཚོགས་ནས་བཅའ་ཁྲིམས་དོན་ཚན་ ༢༢ དགོངས་དོན་ལ་མངོན་གསལ་ཐོག་གནོད་འགལ་བྱས་ཡོད་སྐོར་གསུངས་པའི་ཐོག་ལན་འདེབས་གནང་ཡོད་པ་རེད། དེའི་བར་ན་བཀའ་བློན་གྱི་འོས་མི་བཀའ་དྲུང་རྫོང་ཁ་སྟོབས་རྒྱལ་ལགས་བཀའ་དྲུང་གི་ལས་གནས་ནས་རྩ་དགོངས་ཞུས་ཟིན་པ་ལྟར། ད་ལྟའི་འཕྲོད་བསྟེན་ལས་ཁུངས་ཀྱི་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས་བཀའ་དྲུང་ཡིག་ཚང་གི་དྲུང་ཆེར་བསྐོ་གཞག་གནང་ཡོད་པ་བཞིན་ཟླ་ ༤ ཚེས་ ༨ ནས་ལས་ཁུར་དབུ་འཛུགས་གནང་གི་ཡོད་པ་རེད།

དེ་རིང་ཟླ་ ༤ ཚེས་ ༢ ཉིན་སྔ་དྲོ་ཚོུད་ ༡༠ སྟེང་ བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོགས་ཁང་དུ་དཔལ་འབྱོར་ཚོང་ལས་ཡར་ཐོན་རམ་འདེགས་ལས་གཞི་ཚན་པ་དང་། ཨིན་ཡུལ་བོད་ཁང་ཐེབས་རྩ། དེ་བཞིན་ཁེ་ན་ཌ་མོན་ཁྲི་ཡོལ་དུ་རྟེན་གཞི་བྱས་པའི་བོད་པའི་གསར་གཏོད་ཚོགས་པ་བཅས་ཟུང་འབྲེལ་གྱིས་གསར་འགོད་གསལ་བསྒྲགས་ཤིག་གནང་བ་དང་སྦྲགས།  བཙན་བྱོལ་བོད་མིའི་གཞིས་ཆགས་ཁག་ཏུ་ཡོད་པའི་བོད་མི་གཞོན་སྐྱེས་ཚོ་རྒྱུན་གནས་དང་བོད་ཀྱི་ཡུལ་སྲོལ་གོམས་གཤིས་མི་ཉམས་ཡོང་སླད་གཞོན་སྐྱེས་རྣམས་ལ་ལས་ཀའི་གོ་སྐབས་བསྐྲུན་པའི་ལས་འཆར་འགྲན་བསྡུར་ཡོངས་ཁྱབ་དང་འགྲན་བསྡུར་དེའི་ཁྲོད་ལས་འཆར་རྩེ་ཕུད་སོན་པར་བོད་པའི་གསར་གཏོད་ཚོགས་པས་མ་དངུལ་ཧིན་སྒོར་ས་ཡ་བཅུ་གསོལ་རས་གནང་རྒྱུ་ཡིན་པ་གསལ་བསྒྲགས་གནང་སོང་། གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་དྲུང་ཆེ་ཡེ་ཤེས་དབང་མོ་ལགས་ལྷན་ཞུགས་ཐོག་ཨིན་ལེན་སྐུ་ཚབ་དོན་གཅོད་ཟུར་པ་ཐུབ་བསྟན་བསམ་གྲུབ་ལགས་ནས་ Skype དྲྭ་རྒྱ་ལམ་བརྒྱུད་མཉམ་ཞུགས་གནང་ཡོད་པ་དང་། སྐབས་དེར་བཀའ་བློན་མཆོག་གིས་ལས་འཆར་དེ་རྒྱ་གར་ནང་རྟེན་གཞི་བྱས་པའི་གཞིས་ཆགས་ཏུ་ཆེད་དམིགས་ཀྱིས་སྤེལ་དགོས་པ་དང་།   ལས་འཆར་དེ་བཙན་བྱོལ་བོད་མིའི་གཞིས་ཆགས་ཁག་ཏུ་ཡོད་པའི་བོད་མི་གཞོན་སྐྱེས་ཚོ་རྒྱུན་གནས་ཐུབ་ཐབས་དང་ཕུགས་རྒྱང་རིང་པོའི་ལས་ཀའི་གོ་སྐབས་བསྐྲུན་པའི་འཆར་གཞི་དང། ལས་འཆར་དེའི་འོག་ཉུང་མཐར་བོད་མི་ ༢༠ ལྷག་ལ་ལས་ཀ་བསྐྲུན་ཐུབ་ཐབས་སོགས་འབྲེལ་བརྗོད་དང་ངོ་སྤྲོད་གནང་ཡོད།ལས་འཆར་དེའི་ཐོག་འཛུལ་ཞུགས་པ་རྣམས་ཀྱིས་འཚང་སྙན་ཕྱི་ལོ་ ༢༠༡༩ ཟླ་ ༨ ཚེས་ ༡ ནང་ཚུད་དུ་བོད་ཀྱི་གསར་གཏོད་ཡིག་ཚང་དུ་སྙན་ཞུ་འབྱོར་ཐུབ་པ་དགོས། Yeti@tibetinnovations.org ཞེས་པའི་གློག་འཕྲིན་ཁ་བྱང་ཐོག་ཕུལ་དགོས་པ་དང། ལས་འཆར་དེ་འབྲེལ་ཞིབ་ཕྲའི་གནས་ཚུལ་རྣམས་དཔལ་འབྱོར་ལས་ཁུངས་ཀྱི་ཁྱབ་ཁོངས་ཡར་ཐོན་ཚོང་ལས་རམ་འདེགས་ཚན་པ་དང་བོད་པའི་གསར་གཏོད་ཟུང་འབྲེལ་གྱི་གསར་བཟོ་ཞུས་པའི་དྲྭ་རྒྱ་ www.tibetinnovations.org ཐོག་ནས་གཟིགས་གནང་དགོས་ཀྱི་འདུགགཞི་རྩའི་ལས་འཆར་འདི་ཕྱི་ལོ་ ༢༠༠༩ ལོར་ཁེ་ན་ཌ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་མཛད་སྐབས་བོད་མིའི་གཞིས་ཆགས་ཁག་ཏུ་གཞོན་སྐྱེས་ཚོར་ཡོངས་འབབ་ཡག་པོ་ཡོད་པའི་ལས་ཀ་འཚོལ་ཐབས་མེད་པར་ཕྱིའི་ལུང་པར་བསྐྱོད་ནས་གཞིས་ཆགས་རྒྱུན་གནས་ཐུབ་རྒྱུར་ལྡོག་ཕྱོགས་ཀྱི་ཤུགས་རྐྱེན་ཐེབས་བཞིན་པའི་ཐད་བཀའ་སློབ་ཕེབས་དོན་ལྟར་ལས་འཆར་འདི་བཀོད་སྒྲིག་གནང་བ་ཞིག་ཡིན་པ་རེད།

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་དགུ་པའི་སྔ་དྲོའི་ཚོགས་དུས་ཐོག་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དམིགས་བསལ་དང་རྒྱུན་གྲོན། དེ་བཞིན་ཟུར་བཀོལ་མ་དངུལ་གཏན་འབེབས་དང་ལས་དོན་གནང་ཕྱོགས་ཐོག་མུ་མཐུད་བགྲོ་གླེང་གནང་ཡོད་པ་རེད།སྐབས་དེར་བོད་མི་མང་སྤྱི་འཐུས་ཁག་ཅིག་ནས་སྐབས་བཅུ་བཞི་པ་དང་བཅོ་ལྔ་པའི་བཀའ་ཤག་གི་ངོས་ནས་བོད་ནས་གསར་དུ་ཕེབས་པའི་གསར་འབྱོར་བ་ཁག་ཅིག་ལ་སྡོད་ཁང་སོགས་ཀྱི་མཐུན་རྐྱེན་བསྐྲུན་ཡོད་ཀྱང་། ད་ལྟ་ཡང་བཞུགས་སྒར་གཙོས་པའི་ས་གནས་ཁག་ཏུ་བོད་པ་གསར་འབྱོར་མི་ཉུང་བ་ཞིག་ལ་འཚོ་སྡོད་ཀྱི་དཀའ་ངལ་དང་། སླར་བོད་ལ་ལོག་ན་ཆབ་སྲིད་ཀྱི་དཀའ་ངལ་འཕྲད་བཞིན་པ་སོགས་འགྲེལ་བརྗོད་དང་སྦྲགས། འབྲེལ་ཡོད་ལས་ཁུངས་དང་བཀའ་བློན་ཚོས་གསར་འབྱོར་བའི་དཀའ་སྡུག་གཟིགས་སྐྱོང་གནང་རྒྱུའི་དུས་ལ་བབས་འདུག་ཅེས་གསུངས་སོང་། སྐབས་དེར་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་ཐོག་མར་བདུན་བཅུ་དོན་གྲངས་དང་བརྒྱད་བཅུའི་ནང་ལ་བོད་ནས་ཕེབས་མཁན་ཉུང་ཉུང་ཡིན་པའི་སྐབས་ནས་གསར་འབྱོར་བ་རྣམས་ཀྱི་གནས་སྟངས་དེ་ཆབ་སྲིད་ཀྱི་གལ་གནད་ཅིག་ཏུ་བརྩིས་ཏེ་སྐུ་སྒེར་ཡིག་ཚང་རང་ནས་ཐུགས་འགན་བཞེས་ཡོད་པ་དང་། དེ་ནས་རིམ་པས་བོད་ནས་ཕེབས་མཁན་མང་དུ་ཕྱིན་སྟབས་༸གོང་ས་མཆོག་གི་བཀའ་དགོངས་ལྟར་སྣེ་ལན་འབྲེལ་མཐུད་ཁང་ཞེས་ཟུར་དུ་བཙུགས་ཏེ་བལ་ཡུལ་ས་འཚམས་སུ་འབྱོར་བ་ནས་བཟུང་མཐའ་མའི་སྒྲིག་ཁོངས་ཤིག་ཏུ་མ་ཞུགས་ཀྱི་བར་དུ། ང་དང་ཁོ་ཞེས་དབྱེ་འབྱེད་མེད་པར་འགྲོ་སོང་ཆ་ཚང་སྐབས་དེའི་བོད་གཞུང་གིས་བཏང་པའི་ཐོག་གཟིགས་སྐྱོང་གནང་ཡོད་པ་སོགས་འགྲེལ་བརྗོད་དང་སྦྲགས། སྒེར་གྱི་དཀའ་ངལ་རེ་ཟུང་ཙམ་མ་གཏོགས་སྤྱི་ཡོངས་ནས་བོད་མིའི་སྒྲིག་འཛུགས་ཀྱིས་གསར་འབྱོར་བ་ཚོར་གཟིགས་སྐྱོང་ཧ་ལས་པའི་བཀའ་དྲིན་ཆེན་པོ་གནང་ཡོད་ཅེས་གསུངས་སོང་། མ་ཟད་བཀའ་བློན་མཆོག་གིས། ད་ལྟའི་ཆ་ལ་ནང་སྲིད་ལས་ཁུངས་ལ་ཐོ་གཞུང་འབྱོར་བའི་ནང་དུ་བོད་ནས་ཕེབས་པའི་ཁྱིམ་ཚང་གཅིག་སྟོང་གསུམ་བརྒྱ་ཙམ་ཡོད་པ་དང་། དེ་ཚོའི་རིགས་ལ་ཡང་ནང་སྲིད་ལས་ཁུངས་ནས་རོགས་རམ་ག་ལ་གང་འཚམས་ཞུས་ཡོད་པ་དང་། ལྷག་པར་དུ་སྡོད་ཁང་ས་ཆ་བཞུགས་སྒར་ཁུལ་དུ་ཐོབ་ཐབས་སུ་ད་ལོའི་སྔོན་རྩིས་ནང་སྒོར་ས་ཡ་༥༠ ཙམ་ཞུས་ཏེ། བཀའ་ཤག་འདིའི་ལོ་དུས་མ་རྫོགས་གོང་ལ་སྡོད་ཁང་ཞིག་བསྐྲུན་རྒྱུའི་འབད་རྩོན་ཞུས་མུས་ཡིན་པས། རྒྱ་ཆེ་མང་ཚོགས་ཀྱི་ངོས་ནས་ཀྱང་ལས་གཞི་འདི་འགྲུབ་ཐབས་སུ་འགོག་རྐྱེན་བཟོ་རྒྱུ་མེད་པ་གསུངས་སོང་།  ད་དུང་ནང་སྲིད་ལས་ཁུངས་ཀྱི་ལས་དོན་དང་འབྲེལ། སྤྱི་འཐུས་ཁག་ཅིག་ནས་ཉམས་ཐག་བསྐྱར་ཞིབ་ཀྱི་ལས་དོན་དང་། བལ་ཡུལ་གློ་ཚེ་རོགས་རྣམ་རྒྱལ་གླིང་བོད་མིའི་གཞིས་སྒར། དེ་བཞིན་ལ་དྭགས་བྱང་ཐང་སོགས་མཐའ་མཚམས་ཀྱི་གཞིས་ཆགས་ཁག་གི་འབྱུང་བའི་དཀའ་ངལ་སེལ་ཐབས་ག་རེ་གནང་ཡོད་སོགས་ཀྱི་བཀའ་འདྲི་ཞུས་ཡོད། མ་ཟད་སྤྱི་འཐུས་ཁག་ཅིག་ནས་དེ་སྔ་བཙན་བྱོལ་བོད་མིའི་མཉམ་འབྲེལ་དེ་དག་བོད་པའི་སྤྱི་ཚོགས་ས་བརྟན་དང་། རང་ཁ་རང་གསོ་ཐུབ་ཐབས་སོགས་ལ་དམིགས་ཡོད་པ་འགྲེལ་བརྗོད་དང་སྦྲགས། ད་ལྟའི་ཆ་ལ་བཙན་བྱོལ་བོད་མིའི་མཉམ་འབྲེལ་ཁག་གི་གནས་བབས་གང་འདྲ་ཆགས་ཡོད་མེད་སོགས་ཀྱི་བཀའ་དྲི་ཞུས་སོང་བ་དང་། སྐབས་དེར་བཀའ་བློན་མཆོག་གིས། བཙན་བྱོལ་བོད་མིའི་མཉམ་འབྲེལ་དེ་དག་ཐོག་མའི་རེ་བ་བྱས་པ་གཞིར་བཟུང་ཡོང་གི་ཡོད་མེད་ཞུ་ཚོད་མ་ཐིག་པ་ཞིག་ཏུ་གྱུར་ཡོད་པ་དང་། སྒྲིག་འཛུགས་ཀྱི་ངོས་ནས་ཀྱང་དེའི་ཐད་བློ་ཚབ་ཡོང་གི་འདུག་ཅེས་གསུངས་སོང་། ཐེངས་འདིའི་ནང་སྲིད་ཀྱི་ལས་དོན་སོགས་ཀྱི་ཐད་བགྲོ་གླེང་དང་ལན་འདེབས་གསལ་བཤད་གནང་སྐབས་བཀའ་བློན་མཆོག་ནས། དེ་སྔ་གྲོས་ཚོགས་རིམ་པའི་ཐོག་བོད་པའི་སྤྱི་ཚོགས་ནང་སོ་ནམ་འདེབས་ལས་ཀྱི་ལས་གཞི་རྒྱུན་གནས་ཐུབ་ཐབས་སུ་ཕུལ་བྱུང་སོ་ནམ་གཟེངས་བསྟོད་ཀྱི་བྱ་དགའ་ཞིག་ཕུལ་དགོས་གལ་གྱི་བསམ་ཚུལ་མང་པོ་བྱུང་པ་ལྟར། འདི་ལོ་ནས་བོད་མིའི་སྒྲིག་འཛུགས་ཀྱི་མང་གཙོའི་དུས་ཆེན་ཉིན་སོ་ནམ་འདེབས་ལས་རྩེད་ཕུད་སོན་པ་ཞིག་དང་། ལོ་ན་བཞི་བཅུ་མན་གྱི་གཞོན་སྐྱེས་སོ་ནམ་འདེབས་ལས་གནང་མཁན་གཅིག་བཅས་ལ་སྒོར་འབུམ་རེ་རེ་དང་ཕྱག་ཁྱེར་བཅས་གནང་གཏན་འཁེལ་ཡོད་པ་གསུངས་སོང་།

སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བརྒྱད་པའི་ཉིན་རྒྱབ་ཚོགས་དུས་ཐོག་བོད་མིའི་སྒྲིག་འཛུགས་བཀའ་ཤག་ནས་ལྔ་དང་ལྔ་བཅུའི་བྱུང་རིམ་དང་། ད་བར་ཚོགས་པའི་ལྔ་དང་ལྔ་བཅུའི་ཚོགས་འདུའི་དགོས་དམིགས་སོགས་ཀྱི་ཐད་ལ་དམིགས་བསལ་གསལ་བཤད་ཀྱི་གོ་སྐབས་བླངས་ཐོག་ལྔ་དང་ལྔ་བཅུ་ཞེས་པ་དེ་ནི་༸གོང་ས་མཆོག་གི་གཟིམ་ཆུང་མཇལ་ཁ་རིམ་པའི་ཐོག་སྩལ་བའི་བཀའ་སློབ་ཀྱི་དགོངས་དོན་གཞི་རྩར་བཟུང་ནས་ལྔ་དང་ལྔ་བཅུ་ཞེས་པ་དེ་བྱུང་ཡོད་པ་གསུངས་སོང་།བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁོང་དེ་སྔ་སྲིད་སྐྱོང་གི་དམ་འབུལ་ཐོག་མར་ཕུལ་བའི་རྗེས་སུ་༸གོང་ས་མཆོག་གི་གཟིམ་ཆུང་མཇལ་ཁར་ཡང་ཡང་བཅར་སྐབས་མགོན་པོ་༸གང་ཉིད་མཆོག་ནས་ད་ཁྱེད་རང་ཆབ་སྲིད་ཀྱི་འགན་འཁྱེར་དགོས། ངོས་མེད་པ་ནང་བཞིན་བྱས་ནས་འཆར་གཞི་སྒྲིགས་ཤིག་ཞེས་བཀའ་ཡང་ཡང་ཕེབས་ཡོད་སྟབས། སེམས་ལྗིད་ཏིག་ཏིག་དང་སྐྱོང་ལྷང་ལྷང་ཡོང་མིན་ལ་ལྟོས་མེད། ༸གོང་ས་མཆོག་གི་བཀའ་སྒྲུབ་རྒྱུའི་འགན་དེ་བཀའ་ཤག་ལ་ཡོད་བསམ་པའི་ཐོག་ནས་བཀའ་ཤག་ལྷན་རྒྱས་དང་མང་ཚོགས་ཁྲོད་ལ་༸གོང་ས་མཆོག་ཡོད་པའི་སྐབས་ཀྱི་འཆར་གཞི་དང་མེད་པའི་སྐབས་ཀྱི་འཆར་གཞི་ཞེས་གསུང་ཕོད་པ་ཞིག་མེད་སྟབས། ལྔ་དང་ལྔ་བཅུ་ཞེས་ཕྱོགས་གཅིག་ནས་ལོ་ལྔ་དང་ལྔ་བཅུ། ཕྱོགས་གཉིས་ནས་འཕྲལ་དང་ཕུགས། ད་ལྟ་དང་མ་འོངས་བཅས་ལྔ་དང་ལྔ་བཅུའི་འཆར་སྣང་དང་། འཆར་གཞི། སྲིད་བྱུས་དང་ལག་བསྟར་བཅས་བྱུང་ཡོད་པ་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་བཞིན་རིམ་པས་བཟང་དུ་དང་ཡག་ཏུ་འགྲོ་རྒྱུའི་གདེང་ཚོད་ཆེན་པོ་ཡོད་པ་གསུངས་སོང་། སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མི་ལོ་བདུན་ཅུ་ཙམ་གྱི་ནང་གནང་བའི་བོད་མིའི་ཆེད་མཐོང་དང་། བོད་མིའི་སྒྲིག་འཛུགས་ཀྱི་གནས་བབས། དེ་བཞིན་བོད་ནང་གི་བོད་མི་ཚོའི་སྙིང་སྟོབས་བཅས་མི་ཉམས་གོང་འཕེལ་གནང་རྒྱུ་གལ་ཆེན་པོ་ཡིན་པ། མགོན་པོ་༸གང་ཉིད་མཆོག་དགུང་ལོའོ་བབས་ལ་གཞིགས་པའི་ཕྱིའི་རྒྱལ་ཁབ་ཁག་ཏུ་ཕེབས་རྒྱུ་ཁག་པོ་ཡིན་པ་སོགས་ཀྱི་བཀའ་སློབ་ཕེབས་ཁག་ལུང་འདྲེན་དང་སྦྲགས། ལྔ་དང་ལྔ་བཅུའི་འཆར་སྣང་འདིའི་ཐོག་ནས་བོད་པའི་རྩ་དོན་གྱི་འགན་དེ་བོད་མི་མང་ཚོགས་ནས་འཁྱེར་ཐུབ་དགོས་གལ་ཡིན་པ་གསུངས་ཡོད།  ལྷག་པར་དུ་སྲིད་སྐྱོང་མཆོག་ནས་༸གོང་ས་མཆོག་གིས་ད་བར་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་བཞི་གཙོ་གྱུར་མང་གཙོ་དར་སྤེལ་དང་ཁོར་ཡུག འགྲོ་བ་མིའི་ཐོབ་ཐང་སོགས་ཀྱི་ཐད་ལ་མཛད་འཕྲིན་རླབས་ཆེན་བསྐྱངས་པ་རྣམས་མུ་མཐུད་རྒྱུན་སྐྱོང་ཞུ་རྒྱུའི་འགན་དེ་ང་ཚོ་བོད་པ་ཚོར་ཡོད་སྟབས། ང་ཚོས་ག་ཚོད་སྒྲུབ་ཐུབ་ཀྱི་ཡོད་མེད་ལ་དགོངས་པ་བཞེས་གལ་ཡིན་པ་དང་། ༸གོང་ས་མཆོག་གི་བཀའ་དྲིན་ཐོག་ད་བར་རྒྱལ་སྤྱིའི་ཁྲོད་དབུ་མའི་ལམ་ལ་རྒྱབ་སྐྱོར་ཐོབ་པ་ཁག་གཙོ་གྱུར་བོད་ཀྱི་ཆབ་སྲིད་གནད་དོན་ཁག་རྒྱུན་སྐྱོང་ཞུ་རྒྱུའི་བོད་མི་ཚོར་འགན་ཡོད་སྟབས། གནད་དོན་དེ་དག་སྒྲུབ་ཐབས་སུ་ཐོག་མར་ཆབ་སྲིད་ཀྱི་ལྔ་དང་ལྔ་བཅུ་ཞེས་འགོ་འཛུགས་གནང་ཡོད་པ་གསུངས་སོང་།  སྐབས་དེར་སྲིད་སྐྱོང་མཆོག་ནས་ཆབ་སྲིད་ཀྱི་ལྔ་དང་ལྔ་བཅུའི་རྗེས་སུ་གཞོན་སྐྱེས་ལྔ་དང་ལྔ་བཅུ་དང་བཙན་བྱོལ་བོད་མིའི་སྤྱི་ཚོགས་སྲ་བརྟན་རྒྱུན་སྐྱོང་ལ་དམིགས་པའི་ལྔ་དང་ལྔ་བཅུ་བཅས་ཀྱི་ཚོགས་འདུ་རིམ་པ་ཚོགས་པ་ཁག་ངོ་སྤྲོད་དང་སྦྲགས། ལྔ་དང་ལྔ་བཅུ་འདི་ད་རེས་ཀྱི་བཀའ་ཤག་ནས་མཚམས་འཇོག་རྒྱུ་ཞིག་མིན་པར་མུ་མཐུད་གནང་དགོས་གལ་ཡིན་པ་གསུངས་ཡོད།  བཀའ་ཤག་གི་གསལ་བཤད་དེའི་ཁྲོད་སྲིད་སྐྱོང་མཆོག་ནས་ལྔ་དང་ལྔ་བཅུའི་འཕྲལ་ཕུགས་ཀྱི་ལས་དོན་སོགས་དང་འབྲེལ། ད་བར་འཛིན་སྐྱོང་ནས་ཆོས་རིག་དང་འབྲེལ་བའི་ཐོག་ལ་མཐའ་མཚམས་ཁག་ཏུ་ཡོད་པའི་དགོན་ཁག་རྣམས་ཉམས་གསོ་དང་དཔེ་ཁྲིད་དགེ་རྒན་བསྐོ་གཞག དེ་བཞིན་ནང་སྲིད་དང་འབྲེལ་བོད་པའི་གཞིས་ཁག་རྒྱ་གར་གཞུང་གྱི་ཁྲིམས་མཐུན་ངོས་ལེན་དང་སྲིད་བྱུས་ལྡན་པ། དེ་བཞིན་དཔལ་འབྱོར་དང་འབྲེལ་བའི་དངུལ་ཁང་དང་བུན་གཡར་ལས་གཞི་བརྒྱུད་སྒྲིག་འཛུགས་དང་མང་ཚོགས་གཉིས་ཀར་ཕན་པའི་ལས་གཞི། གཞན་ཡང་བདེ་སྲུང་གི་ལས་དོན་དང་འབྲེལ་༸གོངས་མཆོག་གི་༸སྐུ་ཕྱྭའི་སྲུང་སྐྱོབ་ཐོག་སྔར་ལྷག་ཚགས་ཚུད་དང་། ཤེས་ཡོན་དང་འབྲེལ། ཤེས་ཡོན་ལྷན་ཚོགས་གསར་འཛུགས་དང་ཤེས་ཡོན་སྲིད་བྱུས་ལག་བསྟར་གཙོས་དགེ་རྒན་གསོ་སྐྱོང་དང་ཟབ་སྦྱོང་རྒྱ་ཆེ་གནང་བ། འཕྲོད་བསྟེན་དང་འབྲེལ་ནས་སྨན་བཅོས་ལྟ་སྐྱོང་ལས་གཞི་སོགས་འཆར་གཞི་དང་ལྡན་པའི་ཐོག་ནས་གནང་ཐུབ་ཡོད་པ་སོགས་ཀྱང་གསུངས་ཡོད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ལས་ཉིན་  ༤ པའི་ཚོགས་དུས་དང་པོའི་ཐོག་སྲོད་སྐྱོང་མཆོག་ལ་བོད་རྒྱ་འབྲེལ་མོལ་དང་དབུ་མའི་ལམ་གྱི་སྲིད་བྱུས་ཐོག་སྐར་རྟགས་ཅན་གྱི་དྲི་བ་གཉིས་ཕུལ་ཡོད་པ་རེད།བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་སྐར་རྟགས་ཅན་གྱི་དྲི་བ་གཉིས་གནང་བ་ལས་གཅིག་སྲིད་སྐྱོང་མཆོག་གིས་བོད་རྒྱ་འབྲེལ་མོལ་དེ་ཕྱི་ལོ་ ༢༠༡༠ ལོ་ནས་ཆད་པ་རེད་ཅེས་གསུངས་ཡོད་པ་དང་། དེ་བཞིན་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་དེ་མིན་འབྲེལ་ཡོད་ཁག་གིས་ཕྱི་ལོ་ ༢༠༡༡ ལོ་ནས་འབྲེལ་མོལ་ཆད་ཡོད་སྐོར་གསུང་བཞིན་ཡོད་པ་ལྟར་དེ་གཉིས་ལས་གང་བདེན་མིན་བཀའ་འདྲི་ཞུས་པར་སྲིད་སྐྱོང་མཆོག་གིས་ཕྱི་ལོ ༢༠༡༠ ལོའི་ཕྱི་ཟླ་དང་པོ་ནང་བོད་རྒྱ་འབྲེལ་མོལ་གྱི་ཚོགས་འདུ་མཐའ་མ་དེ་གནང་བ་ནས་བཟུང་བོད་རྒྱའི་སྐུ་ཚབ་དབར་བསྐྱར་དུ་འབྲེལ་མོ་བྱུང་མེད་སྟབས། དུས་དེར་འབྲེལ་མོལ་གྱི་མཚམས་ཆད་པར་ངོས་འཛིན་གནང་གི་ཡོད་སྐོར་གསུངས་ཡོད།སྲིད་སྐྱོང་མཆོག་གིས་དེ་ལས་འཕྲོས་ཏེ་བོད་མི་མང་སྤྱི་འཐུས་ཁག་གཅིག་ནས་བོད་རྒྱ་འབྲེལ་མོལ་མ་བྱུང་བའི་འགན་དེ་བཀའ་ཤག་གི་སྐབས་གང་ལ་ཡོད་མེད་སྐོར་བཀའ་འདྲི་ཞུས་སྐབས་དེ་སྔའི་བཀའ་ཤག་གིས་འབད་བརྩོན་གནང་དོན་ལྟར་ད་ལྟའི་བཀའ་ཤག་ནས་དེ་ལྟར་གནང་བཞིན་ཡོད་པ་ལས་འཐུས་ཤོར་སོང་བར་ངོས་འཛིན་རྩ་བ་ནས་གནང་གི་མེད་པར་བཀའ་ལན་གནང་བ་མ་ཟད། ཆབ་སྲིད་ཀྱི་སྐུ་དབང་ཡོངས་རྫོགས་བཀའ་ཤག་ལ་གནང་བའི་རྗེས་སུ་ཆབ་སྲིད་ཀྱི་འགན་དེའང་བཀའ་ཤག་ལ་ཡོད་པ་ལྟར་༸གོང་ས་མཆོག་གི་ཐུགས་སྣང་འོག་བཀའ་ཤག་གིས་ཕྱག་ལས་གནང་མུས་ཡིན་ཞེས་གསུངས་ཡོད།སྤྱི་འཐུས་ཟླ་བ་ཚེ་རིང་ལགས་ཀྱིས་དབུ་མའི་ལམ་གྱི་སྲིད་བྱུས་ཀྱི་བདག་དབང་ཡོངས་རྫོགས་འཛིན་སྐྱོང་བཀའ་ཤག་གཅིག་པོར་ཡོད་པ་ལས་གཞན་སུ་ལའང་མེད་དམ་ཞེས་དང་དེ་བཞིན་མང་ཚོགས་ནས་མ་སྐུལ་དང་བླངས་ཀྱིས་ཚོགས་སྒེར་སུ་རུང་ནས་གཞུང་ལ་དབུ་འོག་དཔུང་འདེགས་གནང་ནས་འགན་ཁུར་གནང་ཚེ་འགྲིག་མིན་སྐོར་སྐར་རྟགས་ཅན་གྱི་དྲི་བ་ཕུལ་བར་སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་དེ་བོད་རྒྱ་ཞི་མོལ་ཡོང་ཐབས་སླད་དུ་བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་ལ་ཕབ་པའི་སྲིད་བྱུས་ཤིག་ཡིན་པ་དང་ལག་བསྟར་གནང་རྒྱུའི་འགན་ཁུར་བཀའ་ཤག་ལ་ཡོད་སྟབས་དེའི་བདག་དབང་བཀའ་ཤག་ལས་གཞན་སུ་གང་ལ་མེད་པ་དང་མང་ཚོགས་ནས་དབུ་འོག་དཔུང་འདེགས་གནང་ཚེ་མ་འགྲིག་པ་མེད་ཅེས་གསུངས་སོང་། སྲིད་སྐྱོང་མཆོག་གིས་ད་དུང་བཀའ་ཤག་ནས་འགྲེལ་བཤད་གནང་བའི་དབུ་མའི་ལམ་གྱི་སྲིད་བྱུས་དེ་གཞུང་འབྲེལ་ཆགས་ཀྱི་ཡོད་པ་དང་། ཚོགས་པ་གཞན་ཞིག་གིས་བཀའ་ཤག་གི་འགྲེལ་བཤད་ལས་བརྒལ་བའི་འགྲེལ་བཤད་གནང་ཚེ་དེ་བཀའ་ཤག་གི་འགྲེལ་བཤད་དེ་འགྲིག་པར་ངོས་འཛིན་དགོས་གནད་ཡིན་པ་གསུངས་ཡོད།རྩ་བའི་གྲོས་ཚོགས་ཚོགས་དུས་ ༧ པའི་ལས་ཉིན་ ༤ པའི་ཚོགས་དུས་དང་པོའི་ཐོག་སྐར་རྟགས་ཅན་གྱི་དྲི་བར་ལན་འདེབས་གྲུབ་མཚམས་སུ་བཀའ་ཤག་སྐབས་ ༡༥ ནང་བཀའ་བློན་འཕར་མ་ཞིག་བསྐོ་གཞག་དང་། དེ་རྗེས་ཕྱི་དྲིལ་ལས་ཁུངས་ཀྱི་ཁྱབ་ཁོངས་དོན་གཅོད་ཁག་གི་སྔོན་རྩིས་ཐོག་བགྲོ་གླེང་མུ་མཐུད་གནང་ཡོད་པ་རེད།

སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཞི་པའི་ཐོག་སྲིད་སྐྱོང་བློ་བཟང་སེང་མཆོག་གིས་ད་ལྟའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་བཀའ་ཤག་སྐབས་ ༡༥ པའི་བཀའ་བློན་དུ་མཚན་འདོན་གནང་དོན་བཞིན་ཁོང་ལ་མང་མོས་ཀྱིས་བཀའ་བློན་དུ་བདམས་ཐོན་གནང་སོང་།དེ་རིང་ཟླ་ ༣ ཚེས་ ༢༢ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བཞི་པ་དབུ་འཛུགས་གནང་བ་དང་འབྲེལ། བོད་རྒྱ་འབྲེལ་མོལ་དང་དབུ་མའི་ལམ་གྱི་སྲིད་བྱུས་ཐོག་སྐར་རྟགས་ཅན་གྱི་དྲི་བ་དང་ལན་འདེབས་ཀྱི་ལས་རིམ་གྲུབ་རྗེས། སྲིད་སྐྱོང་མཆོག་གིས་གྲོས་ཚོགས་སུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༡ པའི་དགོངས་དོན་བཀའ་དྲུང་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་མིར་མཚན་འདོན་གནང་ཡོད་པ་རེད། སྲིད་སྐྱོང་མཆོག་གིས་བཀའ་བློན་གྱི་འོས་མི་ངོ་སྤྲོད་གནང་གྲུབ་རྗེས་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་རང་ཉིད་ཀྱི་ལངས་ཕྱོགས་དང་ལྟ་གྲུབ་གཞིར་བཞག་ཐོག་ནས་དགག་བྱ་གནང་ཡོད་སྟབས། མཛོང་ཁ་སྟོབས་རྒྱལ་ཚེ་རིང་ལགས་སུ་སྤྱི་འཐུས་རྣམ་པས་གསང་བའི་འོས་ཤོག་འཕངས་རྗེས་སྤྱི་འཐུས་རྩ་འབོར་ ༤༣ ནས་འོས་པ་ ༢༡ དང་མི་འོས་པ་ ༡༨ སྟོང་པ་ ༢ དང་རྩིས་མེད་ ༡ བཅས་མང་མོས་ཐོག་ནས་སྐབས་ ༡༥ པའི་བཀའ་ཤག་ལྷན་ཚོགས་ཀྱི་བཀའ་བློན་དུ་བདམས་ཐོན་བྱུང་ཡོད་པ་རེད།སྤྱི་འཐུས་རྣམས་ནས་འོས་ཤོག་མ་འཕང་གོང་དུ་སྲིད་སྐྱོང་བློ་བཟང་སེང་གེ་མཆོག་གིས་ད་ལྟའི་བཀའ་བློན་འོས་མི་འདི་ལ་དགག་པ་གནང་མཁན་སྤྱི་འཐུས་གཅིག་བྱུང་ཡོད་ཀྱང་། ད་ལྟའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་ཐེགས་པ་རིམ་འཛེམས་ཀྱིས་དབུས་བོད་མིའི་སྒྲིག་འཛུགས་ནང་ལ་ཕྱག་ལས་ཡུན་རིང་གནང་མཁན་ལྷག་བསམ་ཅན་ཞིག་ཡིན་པ་དང་ཁོང་ལ་བཀའ་བློན་གྱི་འོས་ཆོས་ཚང་ཡོད་སྐོར་ནན་གསུངས་གནང་ཡོད།གསར་འགོད་པས་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་སུ་བཀའ་བློན་དུ་བདམས་ཐོན་བྱུང་བ་དང་འབྲེལ་བཅར་འདྲི་ཁག་ཅིག་ཞུས་པར་ཁོང་གིས་རིང་མིན་ཕྱི་ཟླ་དྲུག་པའི་ཟླ་མཇུག་ཙམ་ལ་ཁོང་གི་རྒས་ཡོལ་འཕར་འགྱངས་ཀྱི་དུས་ཚོད་རྫོགས་ཀྱི་ཡོད་སྟབས། སྲིད་སྐྱོང་མཆོག་ནས་ཁོང་བཀའ་ཤག་སྐབས་ ༡༥ པ་དབུ་འཛུགས་པ་ནས་ད་བར་བཀའ་དྲུང་གི་ཕྱག་ལས་གནང་མུས་ཡིན་པར་དགོངས་བཞེས་ཀྱིས་བཀའ་ཤག་སྐབས་ ༡༥ པའི་ཕྱག་ལས་གནང་རྒྱུ་ལྷག་བསྡད་ཁག་རྒྱུན་འཁྱོངས་གནང་དགོས་པར་བཀའ་ཕེབས་ལྟར་ངོས་བཞེས་གནང་ཡོད་སྐོར་གསུངས་སོང་།གཞི་རྩའི་མཛོངས་ཁ་སྟོབས་རྒྱལ་ཚེ་རིང་ལགས་ཕྱི་ལོ་ ༡༩༥༥ ཕྱི་ཟླ་ ༧ ཚེས་ ༡ ཉིན་འཁྲུངས་ཡོད་པ་དང་། ཕྱི་ལོ་ ༡༩༧༣ ལོར་རྒྱ་གར་རྒྱལ་ཡོངས་འབྲིང་རིམ་སློབ་གཉེར་ལེགས་པར་ཐོན་མ་ཐག་རང་གཞུང་གི་བཀའ་འབྲེལ་ལྟར་ཐོག་མར་བལ་ཡུལ་ཤར་ཁུམ་བུ་སློབ་གྲྭར་ལོ་བཞིའི་རིང་དགེ་ཆེ་གནང་བ་དང་། དེ་རྗེས་མུ་མཐུད་གཞུང་ཞབས་ལས་གནས་སུ་ཞུགས་པ་ལྟར་ད་བར་སྲི་ཞུའི་ལས་འགན་ཐོག་ལ་ཐེགས་པ་རིམ་འཛེགས་ཀྱིས་རྩིས་པ་དང་། དྲུང་ཡིག བཟོ་མགོ མཉམ་དྲུང་། ལ་སྤྱི། ས་གནས་འགོ་འཛིན། ནང་སྲིད་དང་འཕྲོད་བསྟེན་གཉིས་སུ་གཟུང་དྲུང་དང་དྲུང་འཕར། ཤེས་རིང་དྲུང་ཆེ་བཅས་ཀྱི་ལས་འགན་ཞུས་ཡོད་པ་དང་། ད་ལྟ་བཀའ་དྲུང་ལས་ཐོག་ཡིན་པ་བཅས་ཁྱོན་མི་ལོ་ ༤༠ ལྷག་གི་རིང་དབུས་བོད་མིའི་སྒྲིག་འཛུགས་ཀྱི་སྲི་ཞུའི་ཕྱག་ལས་གནང་བཞིན་ཡོད་པ་རེད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ལས་ཉིན་ ༢ པའི་སྔ་དྲོ་ཚོགས་དུས་ཐོག་ད་བར་བོད་དོན་ཆེད་སྐུ་སྲོག་བློས་བཏང་གནང་མཁན་རྒྱལ་གཅེས་པ་ཡོངས་ཀྱི་སྙིང་སྟོབས་ལ་ཆེ་བསྟོད་ཞུ་རྒྱུའི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་སྤྱི་འཐུས་རྣམ་པ་དང་འཛིན་སྐྱོང་བཀའ་ཤག་བཅས་ནས་མུ་མཐུད་བགྲོ་གླེང་གི་ཆ་ཤས་བཞེས་ཡོད་པ་རེད།གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་ཁ་སང་དང་དེ་རིང་སྔ་དྲོ་བཅས་སུ་བོད་མི་མང་སྤྱི་འཐུས་ ༢༥ ལྷག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བཅས་ནས་ཆ་ཤས་བཞེས་ཡོད་པ་དང་། སྐབས་དེར་སྲིད་སྐྱོང་མཆོག་གིས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ལ་རྒྱབ་སྐྱོར་དང་འབྲེལ་ཏེ་ཉེ་ལམ་བོད་མིའི་གསུམ་བཅུའི་དུས་དྲན་དེ་བཞུགས་སྒར་གཙོ་གྱུར་ས་གནས་གང་སར་སྲུང་བརྩི་ཚགས་ཚུད་གནང་བར་བསྔགས་བརྗོད་དང་ལས་འགུལ་དེའི་རིགས་མུ་མཐུད་སྤེལ་དགོས་གལ་ཡིན་པ་གསུངས་སོང་། སྲིད་སྐྱོང་མཆོག་གིས་སྤྱིར་རྒྱ་ནག་གི་ཆབ་སྲིད་དང་དཔལ་འབྱོར་གྱི་ནུས་སྟོབས་ཆེ་རུ་འགྲོ་བཞིན་ཡོད་ཀྱང་རྒྱ་ནག་གཞུང་གི་གནང་ལུགས་གནང་སྟངས་ཀྱི་ཐོག་ལ་རྒྱལ་སྤྱིའི་རྒྱལ་ཁབ་མང་པོ་ཞིག་ནས་དོགས་ཟོན་གནང་ཡུལ་ཞིག་ཏུ་གྱུར་ཡོད་པ་སོགས་འགྲེལ་བརྗོད་གནང་བ་མ་ཟད། རྒྱལ་སྤྱིའི་ཐོག་ནས་རྒྱ་ནག་ལ་ལྟ་སྟངས་ཀྱི་ཁོར་ཡུལ་ལའང་འགྱུར་བ་འགྲོ་བཞིན་སྐབས་ང་ཚོས་གོ་སྐབས་འདི་དམ་འཛིན་དང་དོ་སྣང་གནང་དགོས་གནད་ཡིན་པ་ལྟར་འཛིན་སྐྱོང་བཀའ་ཤག་གིས་ཀྱང་རྒྱལ་ཚོགས་ཐོག་བོད་དོན་ལས་འགུལ་ཚགས་ཚུད་ཡོང་སླད་ལས་བྱེད་མང་དུ་གཏང་རྒྱུའི་དགོངས་བཞེས་གནང་བཞིན་ཡོད་ཅེས་གསུངས་ཡོད། བོད་མི་མང་སྤྱི་འཐུས་བདུན་གྱིས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་དང་འབྲེལ་བོད་ནང་གི་ཛ་དྲག་གནས་སྟངས་དང་། རྒྱ་ནག་གི་གནོན་ཤུགས་ལ་གདོང་ལེན་གནང་དགོས་གལ་ཡིན་པ་མ་ཟད་གྲོས་ཆོད་ཀྱི་སྔོན་གླེང་དང་གྲོས་ཆོད་སོ་སོའི་ཐོག་འཁོད་པའི་ཐ་སྙད་དང་ནང་དོན་སོགས་ཀྱི་ཐོག་བགྲོ་གླེང་གནང་ཡོད་པ་རེད། སྤྱི་འཐུས་རྣམ་པའི་བགྲོ་གླེང་དང་སྲིད་སྐྱོང་མཆོག་གི་གསལ་བཤད་བཅས་གྲུབ་མཚམས་སུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གཏན་འབེབས་གནང་སྐབས་བོད་མི་མང་སྤྱི་འཐུས་བློ་བཟང་ཆོས་འབྱོར་ལགས་ཀྱིས་གྲོས་ཆོད་གྲོས་འཆར་དེར་རྒྱབ་སྐྱོར་གནང་མེད་སྟབས། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་དེ་མང་མོས་ཀྱིས་གཏན་འབེབས་གནང་ཡོད།གཞི་རྩའི་དེ་རིང་སྔ་དྲོའི་ཚོགས་དུས་སྐབས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གཏན་འབེབས་ཟིན་མཚམས་སུ་དཔལ་འབྱོར་བཀའ་བློན་མཆོག་གི་སྔོན་རྩིས་གསུང་བཤད་དང་སྔོན་རྩིས་ཚོད་དཔག་འཆར་ཟིན་ཚོགས་ཆུང་གི་སྙན་ཐོ་བཅས་ཀྱི་ཐོག་བགྲོ་གླེང་དང་ལན་འདེབས། དེ་བཞིན་ལས་ཁུངས་གོ་རིམ་བཞིན་སྔོན་རྩིས་ཐོག་བགྲོ་གླེང་དང་གཏན་འབེབས་གནང་གི་ཡོད་པ་རེད།

བོད་རྒྱལ་ལོ་ ༢༡༤༦ རབ་གནས་ས་ཕག་ལོ་འདི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུའི་དགུང་ཀེག་དངོས་གཞི་ཁེལ་བ་དང་བསྟུན།  དེ་རིང་བོད་མིའི་སྒྲིག་འཛུགས་བཀའ་ཤག་ནས་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་འདི་ལོའི་ཕྱི་ཟླ་ ༥ ཚེས་ ༡༧ ཉིན་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པ་ཡོངས་བསྒྲགས་གནང་སོང་། དེ་རིང་ཟླ་ ༣ ཚེས་ ༡༨ ཉིན་གྱི་ཉིན་དགུང་ཚོུད་  ༡༢ ཐོག་བཀའ་ཤག་ཡང་སྟེང་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་ལྷན་བཞུགས་ཐོག་གསར་འགོད་ལྷན་ཚོགས་གནང་སྟེ་འདི་ལོའི་གནམ་ལོ་བཞད་ཀྱི་ཚེས་བཅུའི་གཟབ་གསོལ་སྤྱན་འདྲེན་ཞུས་སྐབས་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོ་མཆོག་ནས་ཆོལ་གསུམ་ཆོས་བརྒྱུད་གཅིག་ཏུ་བསྒྲིལ་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་གསོལ་འདེབས་ཞུ་དགོས་པའི་བཀའ་ལུང་བསྩལ་ཡོད་པ་ལྟར། བོད་མིའི་སྒྲིག་འཛུགས་བཀའ་ཤག་ནས་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་ཆོག་པའི་གསོལ་འདེབས་ཞུས་པར་བཀའ་བཞེས་བཟང་པོ་སྨིན་བསྩལ་ཐོབ་ཐོག་བོད་ཟླ་ ༣ ཚེས་ ༡༤ ཕྱི་ལོ་ ༢༠༡༩ ཟླ་ ༥ ཚེས་ ༡༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་གཞིས་བྱེས་གཞུང་མང་ལྷ་མི་ཡོངས་ཀྱི་ངོས་ནས་མགོན་པོ་མཆོག་༸སྐུ་ཚེ་༸རྒྱལ་བ་ཚེ་མཐའ་ཡས་པའི་ངོ་བོར་བརྟན་པ་དང། ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་འགྲུབ་པའི་ཆེད་དུ་བརྟན་བཞུགས་བསྟར་འབུལ་ཞུ་གཏན་ཁེལ་འདུགབོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བརྟན་བཞུགས་དེ་ནི་བླ་མ་དང་སློབ་མའི་དབར་གྱི་དམ་ཚིག་གཙང་མ་དང་འགོ་ཁྲིད་དང་མི་མང་དབར་མཐུན་སྒྲིལ་ཡག་པོ་ཡོང་སླད་ཡིན་པ་དང་སྒོས་བོད་མི་མང་ཚོགས་ནས་༸གང་ཉིད་མཆོག་༸སྐུ་ཚེ་རིང་པོར་བཞུགས་ཐབས་སུ་སྨོན་ལམ་གསུང་འདོན་ཞུ་རྒྱུ་དང། ལྷག་པར་དུ་༸མགོན་པོ་མཆོག་གི་བཀའ་སློབ་རྣམས་ཡིད་ལ་བཅངས་པའི་ཐོག་ནས་བཀའ་གསུང་ཅི་བསྒྲུབ་གནང་དགོས་གལ་གནད་ཡིན་སྐོར་གསུངས་སོང་།བོད་མི་སེར་སྐྱ་ཐུན་མོང་ནས་སྤྱི་མཐུན་དགེ་ཚོགས་སླད་མི་རེ་ངོ་རེ་ནས་སོ་སོའི་གནས་ཡུལ་གྱི་སྒོར་ ༥༌༢༥ རེ་ཞལ་འདེབས་འབུལ་གནང་ཡོང་བའི་འབོད་སྐུལ་ཞུས་པ་མ་ཟད།  ཞལ་འདེབས་འབུལ་ཕྱོགས་དེ་རང་ཉིད་ཀྱི་ས་གནས་འགོ་འཛིན་ལས་ཁུངས་དང་སྐུ་ཚབ་དོན་གཅོད་ལས་ཁུངས་བརྒྱུད་ཕྱི་ལོ་ ༢༠༡༩ ཟླ་ ༥ ཚེས་ ༡ གོང་དུ་བཞུགས་སྒར་བོད་མིའི་སྒྲིག་འཛུགས་ཆོས་རིགས་ལས་ཁུངས་སུ་ཕུལ་ཟིན་དགོས་ཀྱི་འདུག རྩ་བའི་འདས་ལོའི་ཟླ་མཇུག་ཏུ་བོད་མིའི་སྒྲིག་འཛུགས་ནས་༸གོང་ས་མཆོག་གི་དགུང་ཀེག་སྔོན་འགྲོ་དང་བསྟུན་བརྟན་བཞུགས་རྒྱས་པ་ཞིག་གནས་མཆོག་རྡོ་རྗེ་གདན་དུ་ཕུལ་ཟིན་པ་མ་ཟད།  ཉེ་ཆར་ཕྱི་ཟླ་ ༢ པའི་ནང་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཀྱང་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་རེད།

བཀའ་སྤྱི་གཉིས་ནས་འདི་ལོའི་ཕྱི་ཟླ་ ༡༠ ཚེས་ ༣ ནས་ཚེས་ ༥ བར་བཞུགས་སྒར་དྷ་རྨ་ས་ལར་ཉིན་གྲངས་གསུམ་གྱི་རིང་དམིགས་བསལ་ཚོགས་ཆེན་བསྐོང་ཚོགས་གནང་རྒྱུའི་གསལ་བསྒྲགས་གནང་སོང་།དེ་རིང་ཟླ་ ༣ ཚེས་ ༡༥ ཉིན་གྱི་ཚོུད་ ༡༢༌༣༠ ཐོག་མེག་གྷན་དུ་རྟེན་གཞི་བྱས་པའི་ club house གསོལ་མགྲོན་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་རྣམ་གཉིས་དབུ་བཞུགས་ཀྱིས་གསར་འགོད་ལྷན་ཚོགས་ཤིག་གནང་སོང་བ་དང་། སྐབས་དེར་ཉེ་སྔོན་ཕྱི་ཟླ་ ༡ ཚེས་ ༡༡ ཉིན་བཀའ་ཤག་དང་སྤྱི་འཐུས་ཚོགས་གཙོ་སྦྲེལ་པོས་ཐུགས་ཐག་བཅད་དོན་ལྟར་འདི་ལོའི་ཕྱི་ཟླ་ ༡༠ ཚེས་ ༣ ནས་ཚེས་ ༥ བར་ཉིན་གྲངས་གསུམ་གྱི་རིང་དམིགས་བསལ་ཚོགས་ཆེན་བསྐོང་ཚོགས་གནང་རྒྱུ་ཡིན་པར་ཡོངས་ཁྱབ་གནང་ཡོད་པ་དང། ཚོགས་ཆེན་ཐོག་གཙོ་བོ་ལྔ་དང་ལྔ་བཅུའི་འཆར་སྣང་དང་འབྲེལ་མང་ཚོགས་ནས་དགོངས་ཚུལ་བསྡུ་ལེན་དང་། ༸རྒྱལ་བ་༸སྐུ་ཕྲེང་རིམ་བྱོན་དང་བོད་མིའི་དབར་གྱི་འབྲེལ་བ་ཞེས་པའི་བརྗོད་གཞི་གཉིས་ཀྱི་ཐོག་བཀའ་བསྡུར་གནང་རྒྱུ་རེད་འདུགཚོགས་གཙོ་པད་མ་འབྱུང་གནས་མཆོག་གིས་བོད་མིའི་སྒྲིགས་འཛུགས་ཀྱིས་སྔ་ལོར་ལྔ་དང་ལྔ་བཅུའི་འཆར་སྣང་དང་འབྲེལ་ནས་ཚོགས་འདུ་རིམ་པ་ཐེངས་གསུམ་ཚོགས་ཡོད་ཀྱང་། བཙན་བྱོལ་དུ་འབྱུང་འགྱུར་གྱི་ལོ་ངོ་ལྔ་དང་ལྔ་བཅུའི་རིང་གནས་དགོས་བྱུང་ཚེ་གནས་མཁན་དེ་རྒྱ་ཆེ་མང་ཚོགས་ཡིན་སྟབས། རྒྱ་ཆེ་མང་ཚོགས་ནས་ལྔ་དང་ལྔ་བཅུའི་འཆར་སྣང་དང་འབྲེལ་བའི་དགོངས་འཆར་བསྡུ་ལེན་གནང་རྒྱུ་དེ་གནད་ཆེར་ངོས་འཛིན་གྱི་ཡོད་ཅེས་གསུངས་པ་མ་ཟད། བོད་མི་དང་༸རྒྱལ་བ་༸སྐུ་ཕྲེང་རིམ་བྱོན་དབར་གྱི་འབྲེལ་བ། དེ་བཞིན་༸རྒྱལ་བ་༸སྐུ་འཕྲེང་རིམ་བྱོན་གྱི་སྒྲིག་འཛུགས་དེ་བོད་མིར་བཀའ་དྲིན་ཇི་ཙམ་ཆེ་སྐོར། བོད་མིའི་ལས་འགན་སོགས་ཀྱི་ཐོག་མང་ཚོགས་ནས་དགོངས་ཚུལ་བསྡུ་ལེན་གནང་རྒྱུར་དམིགས་ཏེ་བསྐོང་ཚོགས་གནང་རྒྱུ་ཡིན་སྐོར་སོགས་གསུངས་ཡོད།གསར་འགོད་གསལ་བསྒྲགས་གྲུབ་མཚམས་སུ་ཕྱི་ནང་གི་གསར་འགོད་པ་ཚོས་བཀའ་སྤྱི་གཉིས་ལ་ཐེངས་འདིའི་དམིགས་བསལ་ཚོགས་ཆེན་ཐོག་ཚོགས་བཅར་བའི་མི་འགྲོའི་སྐོར་ལ་བཅར་འདྲི་ཞུས་པར་དེ་སྔ་ཕྱི་ལོ་ ༢༠༡༢ ལོར་དམིགས་བསལ་ཚོགས་ཆེན་བསྐོོང་ཚོགས་གནང་སྐབས་ཚོགས་བཅར་བ་སྤྱི་ཟུར་རྣམ་པ་དང་། དང་བླངས་ཚོགས་བཅར་བ། དེ་བཞིན་བླ་ཆེན་རྣམ་པ་ཐེངས་འདིའི་ཚོགས་འདུར་ཕེབས་ཀྱི་མེད་པ་ལས་དེ་མིན་ཚོགས་བཅར་བ་གཞན་རྣམས་གཅིག་མཚུངས་ཡིན་པ་དང་། སྐུ་ཚབ་དོན་གཅོད་དང་ས་གནས་འགོ་འཛིན། རང་བདེན་ཚོགས་ཆུང་གི་སྐུ་ཚབ། ས་གནས་འཐུས་མིའི་སྐུ་ཚབ་སོགས་ཕེབས་འཆར་ཡོད་པར་བཀའ་གནང་ཡོད་།གཞི་རྩའི་ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་རྒོལ་ཆེན་མོའི་ལས་འགུལ་སྤེལ་རྗེས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སྤྱི་གཉིས་ལ་བོད་ནང་ཛ་དྲག་གནས་སྟངས་ཀྱི་བྱུང་རྐྱེན་དང་རྒྱལ་སྤྱིའི་གནས་བབས་བཅས་བོད་ཀྱི་རྩ་དོན་ཐོག་གོ་བསྡུར་བགྲོ་གླེང་ཞིབ་ལྷོད་ཅིག་གནང་ཆེད་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ ནང་གསེས་ཁག་གི་ཆ་རྐྱེན་འོག་དམིགས་བསལ་ཚོགས་ཆེན་ཞིག་བསྡུ་བསྐོང་དགོས་པའི་བཀའ་སློབ་ལམ་སྟོན་ཕེབས་པ་བཞིན། ཕྱི་ཟླ་ ༡༡ ནང་བཞུགས་སྒར་དྷ་རྨ་ས་ལར་དམིགས་བསལ་ཚོགས་ཆེན་ཐེངས་དང་པོ་ཚོགས་ཡོད་པ་དང་། དེ་རྗེས་ཕྱི་ལོ་ ༢༠༡༢ ཟླ་ ༩ ནང་བོད་ནང་གི་ཛ་དྲག་གནས་སྟངས་ལ་བོད་མིའི་སྒྲིག་འཛུགས་ཀྱི་གཞུང་མང་གཉིས་ནས་གདོང་ལེན་གནང་ཕྱོགས་སྐོར་གོ་བསྡུར་སླད་དམིགས་བསལ་ཚོགས་ཆེན་ཐེངས་གཉིས་པ་ཚོགས་ཡོད་པ་རེད།