བོད་མིའི་སྒྲིག་འཛུགས།

དེ་ཡང་འདི་ལོ་ཟླ་ ༣ ཚེས་ ༣༡ ཉིན་ནས་དེ་རིང་ཟླ་ ༤ ཚེས་ ༡༠ བར་རྒྱ་གར་ལྷོ་ཕྱོགས་བོད་མིའི་གཞིས་སྒར་སྦེལ་ཀོབ་བདེ་སྐྱིད་སླར་གསོའི་རྩེད་ཐང་གསར་པར་བོད་མིའི་རྐང་རྩེད་སྤོ་ལོ་རྩེད་འགྲན་རུ་ཁག་ཕན་ཚུན་དབར་༸རྒྱལ་ཡུམ་ཆེན་མོ་དྲན་རྟེན་རྐང་སྤོལ་རྩེད་འགྲན་ཐེངས་ ༢༤ པ་དེ་རྩེད་འགྲན་གནང་ཡོད་པ་དང་། དེ་རིང་ཟླ་ ༤ ཚེས་ ༡༠ ཉིན་མོན་གྷོ་རྐང་སྤོལ་རུ་ཁག་དང་སྒང་ཏོག་རྐང་སྤོལ་རུ་ཁག་གཉིས་དབར་རྩེད་འགྲན་མཐའ་མ་གནང་བ་ལས་མོན་གྷོ་རུ་ཁག་ལ་སྤོ་ལོ་གཉིས་དང་སྒང་ཏོག་རུ་ཁག་ལ་སྤོ་ལོ་ཀླད་ཀོར་བཅས་ ༢༠༡༨ ལོའི་རྒྱལ་ཡུམ་ཆེན་མོའི་རྐང་སྤོལ་གསེར་གྱི་གཟེངས་རྟགས་རྩེད་འགྲན་ཐེངས་ ༢༤ པའི་རྒྱལ་ཁ་མོན་གྷོ་རུ་ཁག་ལ་ཐོབ་སོང་། རྩ་བའི་ཁ་སང་ཚེས་ ༩ ཉིན་རྩེད་འགྲན་རིམ་པ་གསུམ་པ་ semi-final རྩེད་ཡོད་པ་ལྟར། རྩེད་འགྲན་དང་པོ་དེ་མོན་གྷོ་རྐང་སྤོལ་རུ་ཁག་དང་ཆོལ་གསུམ་རྐང་སྤོལ་རུ་ཁག་གཉིས་དབར་རྩེད་འགྲན་གནང་བ་ལས་སྤོ་ལོ་གཅིག་དང་ཀླད་ཀོར་ཐོག་ནས་མོན་གྷོ་རྐང་སྤོལ་རུ་ཁག་ལ་རྒྱལ་ཁ་ཐོབ་པ་དང་འདི་བཞིན་རྩེད་འགྲན་གཉིས་པ་དེ་དོན་གྲུབ་གླིང་རྐང་སྤོལ་རུ་ཁག་དང་སྒང་ཏོག་རུ་ཁག་གཉིས་དབར་རྩེད་འགྲན་གནང་བ་ལས་སྤོ་ལོ་གསུམ་དང་ཀླད་ཀོར་ཐོག་ནས་སྒང་ཏོག་རུ་ཁག་ལ་རྒྱལ་ཁ་ཐོབ་ཡོད་སྟབས། མོན་གྷོ་རྐང་སྤོལ་རུ་ཁག་དང་སྒང་ཏོག་རྐང་སྤོལ་རུ་ཁག་གཉིས་པོ་༸རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་མཐའ་མའི་ནང་ཚུད་ཡོད་པ་རེད། ལོ་རྗེས་མའི་བོད་རྒྱལ་ཡོངས་རྐང་རྩེད་སྤོ་ལོའི་རྩེད་འགྲན་ཐེངས་ ༢༥ པ་དེ་བཞུགས་སྒར་རྡ་རམ་ས་ལར་རྩེད་འཆར་ཡོད་པ་རེད་འདུག གཞི་རྩའི་རྩེད་འགྲན་དེ་ཐོག་མར་ཕྱི་ལོ་ ༡༩༨༡ ལོར་སྤྱི་ནོར་༸གོང་ས་༸སྐྱབས་མགོན་སྐུ་འཕྲེང་བཅུ་བཞི་པ་ཆེན་པོ་མཆོག་གི་༸རྒྱལ་ཡུམ་ཆེན་མོའི་བཀའ་དྲིན་རྗེས་དྲན་ཞུ་ཕྱིར་དབུ་འཛུགས་གནང་ཡོད་པ་དང་། བོད་མིའི་སྤྱི་ཚོགས་ཁྲོད་ནས་དགའ་མོས་ཆེན་པོ་ཞུ་བཞིན་ཡོད་པ་རེད།

དེ་རིང་ཟླ་ ༤ ཚེས་ ༩ ཉིན་རྒྱ་གར་ལྷོ་ཕྱོགས་སྦེལ་ཀོབ་བདེ་སྐྱིད་སླར་གསོའི་རྩེད་ཐང་གསར་པར་༸རྒྱལ་ཡུམ་ཆེན་མོ་དྲན་རྟེན་རྐང་སྤོལ་རྩེད་འགྲན་ཐེངས་ ༢༤ པའི་རྩེད་འགྲན་རིམ་པ་གསུམ་པ་ semi-final དེ་རྩེད་བཞིན་ཡོད་པ་དང་། དེའང་མོན་གྷོ་གཞིས་སྒར་གྱི་རྐང་སྤོལ་རུ་ཁག་དང་ཆོལ་གསུམ་རྐང་སྤོལ་རུ་ཁག་གཉིས་དབར་རྩེད་འགྲན་གནང་བ་ལས་སྤོ་ལོ་གཅིག་དང་ཀླད་ཀོར་ཐོག་ནས་མོན་གྷོ་བོད་མིའི་གཞིས་སྒར་གྱི་རྐང་སྤོལ་རུ་ཁག་༸རྒྱལ་ཡུལ་ཆེན་མོའི་རྐང་སྤོལ་རྩེད་འགྲན་མཐའ་མའི་ནང་ཚུད་ཐུབ་པ་བྱུང་ཡོད་པ་རེད། དེ་བཞིན་རྩེད་འགྲན་གཉིས་པ་དེ་དོན་གྲུབ་གླིང་རྐང་སྤོལ་རུ་ཁག་དང་སྒང་ཏོག་རུ་ཁག་གཉིས་དབར་མུ་མཐུད་རྩེད་འགྲན་གནང་བཞིན་ཡོད་པ་རེད། གཞི་རྩའི་རྩེད་འགྲན་དེ་ཐོག་མར་ཕྱི་ལོ་ ༡༩༨༡ ལོར་སྤྱི་ནོར་༸གོང་ས་༸སྐྱབས་མགོན་སྐུ་འཕྲེང་བཅུ་བཞི་པ་ཆེན་པོ་མཆོག་གི་༸རྒྱལ་ཡུམ་ཆེན་མོའི་བཀའ་དྲིན་རྗེས་དྲན་ཞུ་ཕྱིར་དབུ་འཛུགས་གནང་ཡོད་པ་དང་། བོད་མིའི་སྤྱི་ཚོགས་ཁྲོད་ནས་དགའ་མོས་ཆེན་པོ་ཞུ་བཞིན་ཡོད་པ་རེད།

བོད་ཀྱི་ཟློས་གར་ཚོགས་པས་གོ་སྒྲིག་འོག་ཟླ་ ༤ ཚེས་ ༡༨ ཉིན་དབུ་འཛུས་ཀྱིས་བཞུགས་སྒར་རྡ་རམ་ས་ལ་གཙོས་པའི་ཉེ་འཁོར་ནོར་བུ་གླིང་ཁ་དང་། ཅོན་ཏཱ་ར་བོད་མིའི་གཞིས་སྒར་བཅས་སུ་བོད་ཀྱི་ཞོ་སྟོན་རྒྱས་པ་ཐེངས་ ༢༣ སྲུང་བརྩི་ཞུ་རྒྱུ་རེད་འདུག བོད་ཀྱི་ཞོ་སྟོན་ཐེངས་ ༢༣ དེ་ཕྱི་ཟླ་ ༤ ཚེས་ ༡༨ ནས་ ༢༣ བར་ཉིན་གྲངས་དྲུག་རིང་ཚོགས་ཀྱི་ཡོད་པ་དང་། དུས་སྟོན་དེའི་སྐབས་སུ་སྦེལ་ཀོབ་དང་། ཨོ་རི་ས། ཀ་སྦུག མན་སྤར། ཀོ་ལི་གྷར། བྷན་དྷ་ར། མ་སུ་རི་བོད་ཁྱིམ། བོད་ཀྱི་ཟློས་གར། བལ་ཡུལ། མོན་གྷོ་ཌ། ཅོན་ཏཱ་ར་བོད་ཁྱིམ། དེ་བཞིན་སྤོན་ཊ་ཆོལ་གསུམ་གཞིས་སྒར་སོགས་བཙན་བྱོལ་ནང་གི་བོད་མིའི་ལྷ་མོ་ཚོགས་པ་བཅིུས་ནས་མཉམ་ཞུགས་གནང་གི་འདུག ཉིན་གྲངས་དྲུག་རིང་གི་དུས་སྟོན་དེའི་ཁྲོད་ལྷ་མོ་ཚོགས་པ་ཁག་ནས་མཁས་སློབ་ཆོས་གསུམ་དང་། སྣང་ས་འོད་འབུམ། གཟུགས་ཀྱི་ཉི་མ། དྲི་མེད་ཀུན་ལྡན། འགྲོ་བ་བཟང་མོ། བྱ་མགྲིན་སྔོན་ཟླ་བ། ཆོས་རྒྱལ་ནོར་བཟང་། དེ་བཞིན་རྒྱ་བཟའ་དང་བལ་བཟའ་བཅས་ལྷ་མོའི་འཁྲབ་གཞུང་མི་འདྲ་བ་བརྒྱད་གཟིགས་འབུལ་ཞུ་རྒྱུ་རེད་འདུག བོད་ཀྱི་ཟློས་གར་ཚོགས་པའི་ངོས་ནས་ཕྱི་ཚེས་ ༡༨ ཉིན་བོད་ཀྱི་ཞོ་སྟོན་རྒྱས་པའི་དབུ་འབྱེད་མཛད་སྒོའི་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་མགྲོན་གཙོ་བོར་གདན་ཞུའི་གསོལ་འདེབས་ཞུས་པ་ལྟར་མགོན་པོ་༸གང་ཉིད་མཆོག་༸ཞབས་སོར་བཀྲིན་གྱི་རེ་ཁ་དཔལ་ལ་མངོན་པ་བསྐྱང་གནང་མཛད་ཀྱི་ཡོད་པ་རེད་འདུག རླུང་འཕྲིན་ཁང་གིས་བོད་ཀྱི་ཟློས་གར་ཚོགས་པའི་འགན་འཛིན་དབང་འདུས་ཚེ་རིང་ལགས་སུ་བོད་ཀྱི་ཞོ་སྟོན་རྒྱས་པ་ཐེངས་ ༢༣ སྲུང་བརྩི་དང་འབྲེལ་བའི་བཅར་འདྲི་ཁག་ཅིག་ཞུས་པར་ཅོན་ཏཱ་ར་ས་གནས་ནས་ཞལ་པར་བརྒྱུད་འགྲེལ་བརྗོད་གནང་དོན་དེ་སྔའི་འཆར་བཞུགས་སྒར་དུ་བོད་ཀྱི་ཞོ་སྟོན་སྲུང་བརྩི་ཞུ་སྐབས་བོད་ཀྱི་ཟློས་གར་ཚོགས་པ་ཁོ་ནས་ལྷ་མོའི་འཁྲབ་གཞུང་ཁག་གཟིགས་འབུལ་གྱིས་ཞོ་སྟོན་སྲུང་བརྩི་ཞུ་གྱི་ཡོད་ཀྱང་། འདི་ལོའི་བོད་ཀྱི་ཟློས་གར་ཚོགས་པས་གོ་སྒྲིག་འོག་དམིགས་བསལ་བཞུགས་སྒར་རྡ་རམ་ས་ལ་གཙོས་པའི་ཉེ་འཁོར་ནོར་བུ་གླིང་ཁ་དང་། ཅོན་ཏཱ་ར་བོད་མིའི་གཞིས་སྒར་བཅས་སུ་ལྷ་མོའི་ཚོགས་པ་འཆར་འགོད་ཀྱིས་ལྷ་མོའི་འཁྲབ་གཞུང་ཁག་གཟིགས་འབུལ་བརྒྱུད་ཞོ་སྟོན་སྲུང་བརྩི་ཞུ་རྒྱུ་ཡིན་པ་གསུངས་སོང་། རྩ་བའི་ལོ་ངོ་བརྒྱ་ཕྲག་གོང་ནས་བོད་མི་ཚོས་སྲུང་བརྩི་ཞུ་སྲོལ་ཡོད་པའི་བོད་ཀྱི་ཞོ་སྟོན་ཞེས་པའི་ཐ་སྙད་དང་དུས་ཆེན་དེའི་མིང་འདོགས་ཚུལ་ལ་གཞིགས་ན། སྔར་དུས་རབས་བཅོ་ལྔ་པའི་ནང་རི་བོ་དགེ་ལྡན་པའི་གྲུབ་མཐའ་སྲོལ་གཏོད་པ་པོ་༸རྗེ་ཙོང་ཁ་པ་ཆེན་པོ་བློ་བཟང་གྲགས་པ་དཔལ་བཟང་པོ་མཆོག་གི་སློབ་མ་འཇམ་དབྱངས་ཆོས་ཀྱི་རྗེ་བཀྲིས་དཔལ་ལྡན་མཆོག་གིས་བོད་མེ་ཕོ་སྤྲེལ་གྱི་ལོ་ ༡༤༡༦ ལོར་བོད་ཀྱི་གདན་ས་འབྲས་སྤུངས་དགོན་པ་ལེགས་གྲུབ་ཟིན་པའི་མཛད་སྟོན་དང་བསྟུན། ཁུལ་དེའི་འབྲོག་པ་ཚོས་རྟེན་འབྲེལ་གྱི་མཛད་སྟོན་ཐོག་དགེ་འདུན་པ་དང་སྐུ་མགྲོན་རྣམ་པར་གསོལ་ཚིགས་སུ་ཞོ་འདེགས་འབུལ་ཞུས་པའི་དུས་དེ་ནས་བཟུང་སྟེ་ལོ་ལྟར་བོད་མི་ཚོས་བོད་ཟླ་ ༦ ཚེས་ ༣༠ ཉིན་དབུ་འཛུགས་གནང་ཐོག་གསོལ་ཚིགས་དཀར་སྐྱོང་ཞོ་འབྲས་གཏོང་བར་བརྟེན་ཞོ་སྟོན་ཞེས་ཐ་སྙད་ཆགས་ཡོད་པ་རེད། ༸གོང་ས་ལྔ་པ་ཆེན་པོ་ངག་དབང་བློ་བཟང་རྒྱ་མཚོ་མཆོག་གི་༸སྐུའི་དུས་སུ་ཞོ་སྟོན་གནང་སྲོལ་ལ་རྒྱ་བསྐྱེད་ཀྱང་ཕྱིན་ཡོད་པ་རེད། འོན་ཀྱང་བོད་ལ་དུས་འགྱུར་བྱུང་རྗེས་བཙན་བྱོལ་ནང་གི་ཞོ་སྟོན་སྲུང་བརྩི་ཞུ་དུས་ལའང་འགྱུར་བ་ཕྱིན་པ་དང་། དེ་ཡང་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་བཀའ་དགོངས་བཞིན་ཕྱི་ལོ་ ༡༩༩༣ ལོ་ནས་བཟུང་བྱེས་སུ་བོད་ཀྱི་ཟློས་གར་ཚོགས་པས་རྐང་བཞེས་ཐོག་ལོ་ལྟར་ཕྱི་ཟླ་བཞི་པའི་ནང་བཞུགས་སྒར་དབུས་པའི་བཙན་བྱོལ་བོད་མིའི་གཞིས་སྒར་ཁག་ཏུ་རེ་མོས་ཀྱིས་བོད་ཀྱི་ཞོ་སྟོན་རྒྱས་པ་ཞེས་སྲུང་བརྩི་ཞུ་གནང་གི་ཡོད་པ་རེད།

ཉེ་ཆར་ཟླ་ ༤ ཚེས་ ༢ ནས་དབུ་འཛུགས་ཀྱིས་ཁ་སང་ཚེས་ ༥ བར་འཚོགས་པའི་ཧི་མཱ་ལ་ཡའི་བོད་བརྒྱུད་ནང་བསྟན་གྱི་དགོན་སྡེ་ཁག་གི་ཆེད་དུ་རང་བྱུང་ཁོར་ཡུག་སྲུང་སྐྱོབ་ཀྱི་ཚོགས་འདུ་ཐེངས་ ༩ ཐོག་སྐྱེ་ལྡན་སོ་ནམ་དང་གད་སྙིགས་དོ་དམ། དེ་བཞིན་ཤིང་སྣ་འདེབས་འཛུགས་ཀྱི་ལས་གཞི་གསར་པ་ཁག་ཅིག་སྤེལ་རྒྱུར་ཐག་གཅོད་བྱུང་འདུག ཁོར་ཡུག་ལྷན་ཚོགས་གོ་སྒྲིག་གནང་མཁན་ཀུན་སྐྱོང་དགེ་རྩ་ཚོགས་པའི་ལས་གཞི་འགན་འཛིན་ལྷག་པ་ཚེ་རིང་ལགས་ཀྱིས་ལྷན་ཚོགས་དེ་དང་འབྲེལ་ཡོད་རྒྱ་བལ་འབྲུག་གསུམ་གྱི་དགོན་སྡེ་ཁག་ ༥༥ ཙམ་ཡོད་པ་དེ་དག་ལས་ཐེངས་འདིའི་ལྷན་ཚོགས་ཐོག་དགོན་ཁག་ ༣༤ འི་དགེ་བཙུན་ཁྱོན་ ༩༠ ཙམ་དང་གཞུང་འབྲེལ་མ་ཡིན་པའི་ཚོགས་པ་ཁག་ཅིག དེ་བཞིན་ས་གནས་ཀྱི་སློབ་གྲྭ་ཁག་ཅིག་བཅས་ནས་མཉམ་ཞུགས་གནང་ཡོད་པ་གསུངས་སོང་། དེ་བཞིན་ཐེངས་འདིའི་ལྷན་ཚོགས་དེ་ཁ་སང་མཇུག་སྒྲིལ་གནང་བ་དང་སྦྲགས་ཏེ་བོད་བརྒྱུད་ནང་བསྟན་གྱི་དགོན་སྡེ་ཁག་དེ་དག་ནང་དུ་དེ་སྔར་ཡོད་བཞིན་པའི་ཁོར་ཡུག་སྲུང་སྐྱོབ་ཀྱི་ལས་གཞི་ཐོག་གད་སྙིགས་དོ་དམ་དང་ཤིང་སྣ་འདེབས་འཛུགས་སོགས་ཀྱི་ལས་གཞི་གསར་པ་ཁག་ཅིག་དབུ་འཛུགས་གནང་རྒྱུར་ཐག་གཅོད་བྱུང་ཡོད་སྐོར་གསུངས་ཡོད། རྩ་བའི་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་ནས་ཁོར་ཡུག་གི་གནད་དོན་ཛ་དྲག་ཐོག་ཐུགས་འཚབ་ཆེན་པོ་གནང་བ་དང་འབྲེལ། ཕྱི་ལོ་ ༢༠༠༥ ལོར་ཁོར་ཡུག་ལྷན་ཚོགས་དེ་ཐོག་མར་དབུ་འཛུགས་གནང་བ་ལྟར། ལོ་ལྟར་རིན་པོ་ཆེ་མཆོག་དབུ་བཞུགས་ཐོག་ཚོགས་འདུ་ཚོགས་གནང་གི་ཡོད་ཀྱང་། འདི་ལོ་༸ཀརྨ་པ་རིན་པོ་ཆེ་མཆོག་ལྷན་ཚོགས་ཐོག་ཆིབས་བསྒྱུར་གནང་ཐུབ་མེད་ནའང་རིན་པོ་ཆེ་མཆོག་ནས་ལྷན་ཚོགས་དེའི་ཐོག་མཉམ་ཞུགས་གནང་མཁན་ཀུན་ལ་འཚམས་འདྲིའི་གསུང་འཕྲིན་ཞིག་བསྩལ་ཡོད་པ་རེད། གསུང་འཕྲིན་དེའི་ནང་ཁོར་ཡུག་སྲུང་སྐྱོབ་ཀྱི་ལས་འགུལ་དང་དམ་པའི་ཆོས་ཀྱི་ཉམས་ལེན་གཉིས་ཟུང་དུ་འབྲེལ་ཐོག་ཕྱག་ལས་གནང་ཐུབ་ཚེ་ཕན་རླབས་གཞན་དང་མི་འདྲ་བ་ཞིག་ཡོང་ངེས་ཡིན་པར་ལམ་སྟོན་མཛད་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་ཏེ་ལོ་ངོ་ ༦༠ འཁོར་བའི་དུས་ཚིགས་དང་བསྟུན།  དབུས་བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༡༨ ལོ་འཁོར་མོའི་རིང་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་མཛད་རིམ་སྣ་མང་ཞིག་གོ་སྒྲིག་གནང་རྒྱུའི་ཐུགས་གཏན་ཁེལ་ཡོད་པ་ལྟར། རྒྱ་གར་གྱི་རྒྱལ་ས་ལྡི་ལིར་ཉེ་སྔོན་ཟླ་ ༤ ཚེས་  ༢ ཉིན་དབུ་འཛུགས་ཀྱིས་ཚེས་ ༤ བར་ཉིན་གྲངས་གསུམ་རིང་བོད་ཀྱི་རིག་གཞུང་དུས་སྟོན་ཞིག་ཚོགས་ཡོད་པ་རེད། དུས་སྟོན་དེའི་ཁོངས་སུ་བོད་ཀྱི་ཆོས་དང་རིག་གཞུང་མཚོན་པའི་བོད་ཀྱི་ནང་ཆོས་ངོ་སྤྲོད་དང་། རིག་གཞུང་དང་འབྲེལ་བའི་གཞས་སྣ་འཁྲབ་སྟོན། བོད་ཀྱི་གསོ་བ་རིག་པའི་སྐུ་ཐང་དང་རྡུལ་ཚོན་གྱི་དཀྱིལ་འཁོར་བཞེང་སྐྲུན། སྨན་རྩིས།  ལྕགས་དང་ཤིང་རྐོས་སྒྱུ་རྩལ། བོད་དོན་དངོས་བྱུང་གློག་བརྙན། འཐག་ལས་ལག་ཤེས། པང་གདན། བོད་ཀྱི་ཡིག་གཟུགས་སྒྱུ་རྩལ། ཁ་ཟས་སྒྱུ་རྩལ། བོད་དོན་པར་རིས་འགྲེམས་སྟོན། དེ་བཞིན་བོད་མིའི་འབྲོག་པ་རྣམས་ཀྱི་འཚོ་བའི་དངོས་ཆས་སོགས་འགྲེམས་སྟོན་གནང་ཡོད་པ་བཞིན། ཁ་སང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བོད་ཀྱི་རིག་གཞུང་དུས་སྟོན་གྱི་མཇུག་སྡོམ་མཛད་སྒོའི་ཐོག་ཆེད་ཕེབས་དང་བསྟུན། དུས་སྟོན་དེའི་སྐབས་ཆ་ཤས་ལེན་མཁན་ཚོར་ཐུགས་རྗེ་ཆེ་ཞུས་པ་དང་སྦྲགས་ཉིན་གྲངས་གསུམ་རིང་གི་རྒྱལ་ས་ལྡི་ལིའི་བོད་ཀྱི་དུས་སྟོན་དེ་མཇུག་སྒྲིལ་གནང་ཡོད་པ་རེད། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ང་ཚོ་བོད་མི་ཚོས་དུས་སྟོན་འདི་ལྟ་བུ་སྲུང་བརྩི་ཞུས་པ་དང་འབྲེལ་ངེས་པར་དུ་འདས་པའི་དུས་ཚོད་ལ་དྲན་གསོ་བསྐྱར་ཞིབ་གནང་དགོས་སྐོར་གསུངས་པ་དང་འབྲེལ། བོད་ནང་གི་ད་ལྟའི་ཆོས་དང་རིག་གཞུང་། སྐད་ཡིག།ཁོར་ཡུག།འགྲོ་བ་མིའི་ཐོབ་ཐང་བཅས་ཀྱི་ཡ་ང་བའི་གནས་སྟངས་དང་། བཙན་བྱོལ་ནང་དུའང་གཞི་རྩའི་བོད་ཀྱི་སྐད་ཡིག་ལ་བརྟེན་པའི་ནང་པ་སངས་རྒྱས་པའི་རིག་གཞུང་སོགས་ཀྱི་ཁྱད་ནོར་ཁག་མི་ཉམས་རྒྱུན་འཛིན་གང་ཙམ་གནང་ཐུབ་ཡོད་ཀྱང་། ད་ལྟའི་གནས་སྐབས་འདིར་སློབ་གྲྭ་དང་དགོན་སྡེ་ཁག་ཏུ་གྲྭ་རྒྱུན་ཉུང་བའི་དཀའ་ངལ་སོགས་དཔེ་མཚོན་དུ་དྲན་སྐུལ་གནང་བ་མ་ཟད།  དེ་དག་ལ་གདོང་ལེན་གནང་ཕྱོགས་སོགས་ཀྱི་ཐད་ལ་གསུངས་པ་ཆབས་ཅིག བོད་མི་ཚོས་རྒྱུན་དུ་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གོ་རྟོགས་ཡག་པོ་ཡོང་བ་ཞིག་དང་། དེའི་ཐོག་ནས་སོ་སོའི་ཉམས་ལེན་བྱས་པ་ཙམ་མ་ཟད་གཞན་ལའང་གོ་རྟོགས་ཁྱབ་སྤེལ་གནང་ཐུབ་ཐབས་སུ་འབད་དགོས་པར་འབོད་སྐུལ་གནང་སོང་། གཞི་རྩའི་ཁ་སྔོན་ཕྱི་ཚེས་ ༢ ཉིན་ནས་དབུ་འཛུགས་ཞུས་པའི་བོད་ཀྱི་དུས་སྟོན་དེ་བོད་མིའི་སྒྲིག་འཛུགས་ཀྱི་ཕྱི་འབྲེལ་ལས་ཁུངས་ཀྱིས་རྐང་འགན་བཞེས་པ་ཞིག་ཡིན་པ་དང་།  དུས་སྟོན་དེའི་ཁོངས་སུ་ཕྱི་འབྲེལ་ལས་ཁུངས་ཀྱི་འགྲེམས་སྟོན་ཁང་དང་།  བོད་ཀྱི་སྨན་རྩིས་ཁང་།   བོད་ཀྱི་ཟློས་གར་ཚོགས་པ།  བདེ་སྐྱིད་གླིང་བོད་མིའི་གཞིས་ཆགས།   རཇ་པུར་བུད་མེད་མཉམ་ལས་བཟོ་གྲྭ།     ལ་དྭགས་བྱང་ཐང་།   ལྡི་ལི་བོད་ཁང་།   རྒྱུད་སྟོད་གྲྭ་ཚང་།   ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་བཅས་ནས་མཉམ་ཞུགས་གནང་ཡོད་པ་རེད།

བོད་མིའི་སྒྲིག་འཛུགས་ཀྱིས་བཞུགས་སྒར་དུ་ཆེད་ཕེབས་གནང་བའི་ཨ་མི་རི་ཀའི་གྲོས་ཚོགས་འོག་མའི་འཐུས་མི་ལྕམ་ Ros Lehtinen མཆོག་དང་ ClaudiaTenney མཆོག་རྣམ་གཉིས་ལ་དགའ་བསུའི་སྣེ་ལེན་གཟབ་རྒྱས་ཞུས་སོང་བ་དང། ལྕམ་ Lehtinen མཆོག་གིས་སྐབས་དེར་བོད་ཀྱི་གནད་དོན་དེ་ནི་ཁོ་མོའི་སྙིང་དང་ཧ་ཅང་ཉེ་བའི་གནད་དོན་ཞིག་ཡིན་པ་དང་། ཁོང་རིང་མིན་རྒས་ཡོལ་དུ་ཕེབས་ཀྱི་ཡོད་ཀྱང་བོད་ཀྱི་གནད་དོན་ནམ་ཡང་བློས་རྒྱུ་མིན་ཞེས་གསུངས་སོང་། དེ་རིང་ཟླ་ ༤ ཚེས་ ༤ ཉིན་རྒྱབ་ཚོུད་ ༤།༣༠ ཙམ་ལ་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་ཚོགས་ཁང་གསར་པར་ཚོགས་པའི་སྣེ་ལེན་མཛད་སྒོ་དེའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲིད་ཞུ་བ། དེ་བཞིན་དྷ་ས་ཁུལ་གྱི་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་བཅས་ཁྱོན་མི་གྲངས་སུམ་བརྒྱ་ལྷག་ཕེབས་འདུག སྲིད་སྐྱོང་བློ་བཟང་སེང་གེ་མཆོག་གིས་སྐབས་དེར་སྐུ་མགྲོན་རྣམ་པ་གཉིས་ལ་ཐོག་མར་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་རེ་རེ་བཞིན་ངོ་སྤྲོད་དང་འབྲེལ། ༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་བཟང་པོའི་འོག་བཙན་བྱོལ་བོད་མིས་ནུས་པ་ལྡན་པའི་སྒོ་ནས་ཐོུང་མ་ཡིན་པའི་མང་གཙོའི་ལམ་ལུགས་ཕྱག་བསྟར་གནང་བཞིན་ཡོད་པ་གསལ་བཏོན་གནང་བ་མ་ཟད། ཁོང་རྣམ་པ་གཉིས་ལྟ་བུ་བོད་དོན་ལ་རྒྱབ་སྐྱོར་གནང་མཁན་ཁག་ཅིག་གི་བཀྲིན་ལ་བརྟེན་ནས་ཉེ་ལམ་ཨ་མི་རི་ཀའི་གྲོས་ཚོགས་ནས་བོད་མིར་རྒྱབ་སྐྱོར་རོགས་རམ་ཇེ་མང་དུ་གནང་བར་ཐུགས་རྗེ་ཆེ་ཞུས་སོང་། ལྷག་དོན་བོད་མིའི་ངོས་ནས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་ལ་མིང་དོན་མཚུངས་པའི་རང་སྲིད་རང་སྐྱོང་གི་ཁེ་དབང་རྩོད་བཞིན་པ་ངོ་སྤྲོད་དང་སྦྲགས། ཨ་མི་རི་ཀའི་གཞུང་ནས་སྲིད་བྱུས་དེར་རྒྱབ་སྐྱོར་གནང་བཞིན་པར་བཀྲིན་བསམ་ཤེས་གནང་བ་མ་ཟད། བོད་ནང་གི་གནས་སྟངས་ཧ་ཅང་ཛ་དྲག་ཆེ་བའི་སྐབས་འདིར་ཁོང་རྣམ་པ་གཉིས་འདི་གར་ཆེད་ཕེབས་གནང་བ་འདིས་བོད་མི་ཚོར་སེམས་སྐུལ་གྱི་རང་བཞིན་དང་ཧ་ཅང་སྐལ་པ་བཟང་པོ་ཞིག་རེད་ཅེས་གསུངས་འདུག ལྕམ་སྐུ་ RosLehtinen མཆོག་གིས་སྐབས་དེར་ཁོང་ལོ་ན་བརྒྱད་སོན་སྐབས་ Cuba ནང་གི་དམར་པོའི་གཞུང་གི་དྲག་གནོན་ལས་བྲོས་བྱོལ་ཆེད་ཨ་རིར་ཕེབས་པ་ཞིག་ཡིན་སྐོར་འགྲེལ་བརྗོད་གནང་སོང་བ་དང་། བོད་ཀྱི་གནད་དོན་དེ་ཁོང་གི་མི་ཚེ་ནང་གི་ཧ་ཅང་སྙིང་ཉེ་བའི་གནད་དོན་ཞིག་ཡིན་པ་མ་ཟད། ཁོང་རིང་མིན་རྒས་ཡོལ་དུ་ཕེབས་ཀྱི་ཡོད་ཀྱང་བོད་ཀྱི་གནད་དོན་ནམ་ཡང་བློས་རྒྱུ་མིན་ཞེས་གསུང་སོང་། ཁོང་གིས་ད་དུང་རྒྱ་ནག་གཞུང་ནས་བོད་ནང་དྲག་གནོན་ཤུགས་ཆེ་རུ་གཏོང་བཞིན་པ་མ་ཟད། ཨ་རིའི་མི་སེར་རྣམས་བོད་ལ་བསྐྱོད་རྒྱུའི་ཐོག་ལའང་དམ་དྲག་ཤུགས་ཆེ་བྱེད་བཞིན་པའི་གནད་དོན་ཁག་ཅིག་གསུངས་པ་དང་ཆབས་ཅིག་ཏུ་དེང་སྐབས་རྒྱལ་སྤྱིའི་གཞུང་མང་པོས་རྒྱ་ནག་ལ་གདོང་ལེན་བྱ་རྒྱུ་ལས་ལྡོག་ནས་རྒྱ་ནག་གཞུང་གི་སྟོབས་ཤུགས་ལ་ཞེད་སྣང་ཆེན་པོ་བྱེད་བཞིན་པ་ནི་ཧ་ཅང་བློ་ཕམ་གྱི་གནད་དོན་ཞིག་རེད་ཅེས་གསུངས་ཡོད། རྩ་བའི་ལྕམ་ Ros Lehtinen མཆོག་ནི་དེ་སྔ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་མི་རི་ཀའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་གནང་དགོས་པར་གྲོས་འཆར་འདོན་མཁན་གཙོ་བོ་ཞིག་ཆགས་ཡོད་པ་དང་། དེ་རིང་མཛད་སྒོའི་ཐོག་ཁོང་དང་ཕྱག་རོགས་ཁག་ཅིག་ནས་སྔར་ལོ་ཨ་མི་རི་ཀའི་གཞུང་ནས་བོད་ཐོག་འཛིན་པའི་སྲིད་བྱུས་ཁ་གསལ་ཞིག་དགོས་པའི་གྲོས་འཆར་ཐོག་ཕྱག་ལས་གནང་ཡོད་པ་མ་ཟད་ད་དུང་ཡང་འབད་བརྩོན་མུ་མཐུད་ཞུ་རྒྱུ་ཡིན་སྐོར་གསུངས་ཡོད། ལྕམ་སྐུ་ Claudia Tenney མཆོག་གིས་ཁོང་ད་རེས་ལྕམ་སྐུ་ Lehtinen མཆོག་དང་ལྷན་རྒྱས་བཞུགས་སྒར་དུ་ཐེངས་དང་པོ་ཆེད་ཕེབས་གནང་ཐུབ་པ་དེ་ཧ་ཅང་སྐལ་པ་བཟང་པོ་ཞིག་ཡིན་སྐོར་གསུངས་པ་སྦྲགས། ཁོང་ཨ་རིར་ཕྱིར་ཕེབས་རྗེས་ས་གནས་བོད་མི་དང་འབྲེལ་བ་གནང་ནས་བོད་ཀྱི་གནད་དོན་ཐོག་མུ་མཐུད་ཕྱག་ལས་གནང་རྒྱུའི་འདུན་པ་ཡོད་སྐོར་གསུངས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱ་བལ་གཉིས་ཀྱི་གཏན་ཉིན་སློབ་གྲྭ་ཁག་གི་རྒན་བདག་རྣམས་ལ་འགོ་ཁྲིད་གནང་ཕྱོགས་ཀྱི་ཟབ་སྦྱོང་ཐེངས་དྲུག་པ་གནང་བཞིན་པའི་ཐོག་བོད་པའི་སློབ་མ་ཚོའི་ངོས་ནས་མ་འོངས་པར་བོད་མི་རིགས་ཀྱི་འགན་ཁུར་རྒྱུའི་ག་སྒྲིག་ཡོད་དགོས་གལ་ཡིན་པ་གསུངས་སོང་། དེ་རིང་ཟླ་ ༤ ཚེས་ ༤ ཉིན་གཏན་ཉིན་སློབ་གྲྭའི་རྒན་བདག་རྣམས་ཀྱི་འགོ་ཁྲིད་ཟབ་སྦྱོང་ཉིན་གསུམ་པའི་སྔ་དྲོ་ལས་རིམ་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་དང་བལ་ཡུལ་ཁུལ་གྱི་གཏན་ཉིན་སློབ་གྲྭ་ཁག་ ༡༨ ཀྱི་རྒན་བདག་ཕོ་མོ་ཁྱོན་མི་གྲངས་ ༣༦ ལ་འགོ་ཁྲིད་ཀྱི་ཁྱད་ཆོས་དང་ཡོན་ཏན། དེ་བཞིན་གདོང་ལེན་སོགས་ཀྱི་ཐོག་གསུང་བཤད་གནང་བ་དང་། བོད་ཕྲུག་སློབ་མ་ཚོའི་ངོས་ནས་མ་འོངས་བོད་མི་རིགས་ཀྱི་འགན་ཁུར་རྒྱུའི་གྲ་སྒྲིག་དགོས་གལ་ཡིན་པ་མ་ཟད།  དུས་དང་རྣམ་པ་ཀུན་ཏུ་བོད་ཀྱི་གནད་དོན་ཐོག་དོ་སྣང་དང་། ཕྱོགས་ཡོངས་ཀྱི་གནས་ཚུལ་ཆ་ཚང་བ་ཞིག་ཤེས་དགོས་པ། ལྷག་པར་དུ་འགོ་ཁྲིད་ཞིག་ཡིན་པའི་ཆ་ནས་དཀའ་ངལ་གང་ཞིག་འཕྲད་ཀྱང་དེར་ལ་གདོང་ལེན་གནང་ཐུབ་མཁན་ཞིག་གནང་དགོས་གནད་ཡིན་པ་གསུངས་ཡོད། སློབ་མ་ཚོས་རྣམ་ཀུན་ནས་རང་ཉིད་བོད་མི་ཡག་པོ་ཞིག་དང་བོད་ཀྱི་རྩ་དོན་ཐོག་ལས་ཀ་བྱེད་ཀྱི་ཡིན་བསམ་པའི་དམ་བཅའ་བརྟན་པོ་བཟུང་དགོས་ཞེས་ལམ་སྟོན་གནང་སོང་། སྐབས་དེར་སྲིད་སྐྱོང་མཆོག་གིས་ཚོུད་ཕྱེད་ཀ་མན་ཙམ་རིང་གསུང་བཤད་གནང་གྲུབ་མཚམས་སུ་སློབ་མ་ཚོའི་ངོས་ནས་དོགས་དྲི་ཞུ་བ་ལས་སློབ་མ་གཅིག་གིས་ཉེ་བའི་ཆར་བོད་ཁྱིམ་སློབ་གྲྭ་ཁག་ཏུ་བོད་ནས་ཡོང་མཁན་བོད་ཕྲུག་སློབ་མ་ཉུང་རུ་ཕྱིན་པ་དང་ཧི་མཱ་ལ་ཡའི་རི་རྒྱུད་སློབ་མ་ཇེ་མང་དུ་འགྲོ་བཞིན་སྐབས་འདིར་སློབ་གྲྭའི་ནང་བོད་དོན་དང་འབྲེལ་བའི་གཏམ་བཤད་སྤེལ་བར་སེམས་ནང་མ་བདེ་བའི་ཚོར་བ་ཞིག་ཡོང་གི་ཡོད་པ་དང་། དེ་བཞིན་སྲིད་སྐྱོང་མཆོག་ལ་རྒྱུན་དུ་སྒེར་དང་ལས་དོན་གཉིས་ཀའི་ཐོག་དཀའ་ངལ་འཕྲད་ཚེ་དེ་ལ་གདོང་ལེན་གནང་རྒྱུའི་ཐབས་བྱུས་གང་ཞིག་ཡོད་མེད་སོགས་ཀྱི་དྲི་བ་ཁག་ཅིག་ཞུས་ཡོད་པ་རེད། གཞི་རྩའི་ཟླ་ ༤ ཚེས་ ༢ ཉིན་དབུས་འཛུགས་ཀྱིས་ཚེས་ ༧ བར་ཉིན་གྲངས་དྲུག་རིང་འཚོགས་རྒྱུའི་འགོ་ཁྲིད་ཀྱི་ཟབ་སྦྱོང་དེའི་སྐབས་གཙོ་བོ་འགོ་ཁྲིད་ཀྱི་རྩལ་དང་ཁྱད་ཆོས་མི་འདྲ་བ། འབྲེལ་ལམ་གྱི་རྩལ། རྩོད་རྙོད་འདུམ་འགྲིག་གནང་ཕྱོགས། ཆོས་ལུགས་ལ་མ་བརྟེན་པའི་བཟང་སྤྱོད། མང་ཚོགས་ཀྱི་གཏམ་བཤད་སྤེལ་ཕྱོགས། མཉམ་རུབ་ལས་དོན་གནང་ཕྱོགས། ཕོ་མོའི་ཤེས་བྱ། སྲིད་སྐྱོང་མཆོག་དང་ལྷན་དུ་དྲི་བ་དྲིས་ལན་གནང་རྒྱུ། དེ་བཞིན་བོད་མིའི་སྒྲིག་འཛུགས་ཀྱི་ལས་ཁུངས་ཁག་ལ་ལྟ་སྐོར་དང་ངོ་སྤྲོད་སོགས་ཀྱི་ལས་རིམ་བང་སྒྲིག་ཡོད་པ་རེད།

བདམས་ཐོན་བྱུང་བའི་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་གིས་དེ་རིང་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་དྲུང་ནས་ལས་འཁུར་དང་གསང་རྒྱའི་དམ་འབུལ་ཞུས་པ་དང་འབྲེལ། བོད་མི་རིགས་ཀྱི་སྐད་ཡིག་དང་རིག་གཞུང་གོང་འཕེལ་གཏོང་རྒྱུ་ནི་ལས་དོན་གལ་འགངས་ཆེ་ཤོས་ཤིག་ལ་ངོས་འཛིན་ཞུ་གནང་གི་ཡོད་ཅེས་གསུངས་སོང་། དེ་རིང་ཟླ་ ༤ ཚེས་ ༣ ཉིན་རྒྱབ་ཚོུད་ ༣ ཐོག་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་ཚོགས་ཁང་གསར་པར་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་དབུས་ཁྲིམས་ཞིབ་རྣམ་པ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་ཕྱགས་སྦྲེལ་བཀའ་བློན་རྣམ་པ། དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དབུས་སྤྱི་འཐུས་རྒྱུན་ལས་རྣམ་པ། གཞན་ཡང་ལྷན་ཁང་ཁག་གི་དྲུང་ཆེ་ཆུང་རྣམ་པ་བཅས་ལྷན་འཛོམས་སར་བདམས་ཐོན་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲི་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་ཏེ་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་དྲུང་ནས་ལས་འཁུར་དང་གསང་རྒྱའི་དམ་འབུལ་ཞུས་གནང་ཡོད་པ་རེད། དམ་འབུལ་གྱི་མཛད་སྒོ་གྲུབ་རྗེས་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་གིས་གསར་འགོད་པར་རང་ཉིད་བེུད་གཅིག་དང་ཉམ་ཐག་གཅིག་ཡིན་པའི་ཆ་ནས་བཀའ་བློན་གྱི་ལས་གནས་ཐོག་བསྐོ་གཞག་བྱུང་བར་སྤོབས་ཆེན་པོ་ཞིག་ཡོད་ཅེས་གསུངས་པ་དང་འབྲེལ། བོད་ཀྱི་བེུད་གཞན་ཚོ་ལའང་སེམས་ཤུགས་འཕར་མ་ཡོང་བར་ཁེ་ཕན་ཡོད་པ་ཞིག་ལ་དགོངས་སྐོར་གསུངས་ཡོད། ལྷག་པར་དུ་ཁོང་གིས་ཤེས་རིག་བཀའ་བློན་གྱི་དུས་ཡུན་ལོ་གསུམ་དེའི་ནང་བོད་མི་རིགས་ཀྱི་སྐད་ཡིག་དང་རིག་གཞུང་ཐོག་མུ་མཐུད་ཡར་རྒྱས་གོང་འཕེལ་གཏོང་རྒྱུའི་ལས་དོན་ནི་གལ་ཆེ་ཤོས་ཤིག་ལ་ངོས་འཛིན་ཞུ་ཡི་ཡོད་པ་གསུངས་སོང་། རྩ་བའི་ཉེ་ཆར་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་འབུམ་རམས་པ་པདྨ་དབྱངས་ཅན་མཆོག་བཀའ་ཤག་གི་བཀའ་བློན་འོས་མིར་མཚན་བཏོན་གནང་ཡོད་པ་དང་། སྐབས་དེར་སྤྱི་འཐུས་རྣམ་པས་གསང་བའི་འོས་ཤོག་འཕངས་རྗེས་སྤྱི་འཐུས་རྩ་འབོར་ ༤༤ ནས་འོས་པ་ ༢༦ དང་མི་འོས་པ་ ༡༥ བར་བཞུགས་གྲངས་ ༣ བཅས་ཁོང་ལ་མང་མོས་ཐོག་ནས་བཀའ་བློན་དུ་བདམས་ཐོན་བྱུང་ཡོད་པ་རེད། དེ་སྔའི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་འཛིན་སྐྱོང་བཀའ་ཤག་ནས་ཨ་རིའི་སྐུ་ཚབ་དོན་གཅོད་དུ་བསྐོ་གཞག་གནང་རྗེས། ད་བར་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཤེས་རིག་བཀའ་བློན་གྱི་ཐུགས་འགན་བཞེས་ཡོད་པ་རེད། ད་ལན་འབུམ་རམས་པ་པདྨ་དབྱངས་ཅན་མཆོག་གིས་ཤེས་རིག་བཀའ་བློན་གྱི་ལས་འཁུར་དམ་འབུལ་དངོས་སུ་བཞེས་གནང་ཡོད་པ་དང་། ཁོང་ནི་ད་ལྟའི་བཀའ་ཤག་སྐབས་ ༡༥ པའི་བཀའ་བློན་ཁོངས་ནས་བེུད་བཀའ་བློན་གཅིག་པོ་དེ་ཆགས་ཀྱི་ཡོད་པ་རེད། འབུམ་རམས་པ་པདྨ་དབྱངས་ཅན་མཆོག་ནི་ཕྱི་ལོ་ ༡༩༩༣ ལོ་ནས་ལྡི་ལི་དང་མ་ཌི་རས་མཐོ་སློབ་ནས་དབྱིན་སྐད་ཐོག་མཐོ་རིམ་དང་ཉེ་བའི་གཙུག་ལག་རབ་འབྱམས་པ་ཐོན་འདུག་པ་དང་། ཕྱི་ལོ་ ༡༩༩༦ ལོར་དགེ་འོས་ཐོན་རྗེས་སུ་ཇཱ་བོད་ཁྱིམ་སློབ་གྲྭར་དབྱིན་སྐད་དགེ་རྒན་གྱི་ཕྱག་ལས་གནང་འདུག ཕྱི་ལོ་ ༢༠༠༡ ནང་དུ་ཁོང་ཨ་རིར་ Fulbright སློབ་ཡོན་ཁོངས་སུ་ལོ་གཅིག་རིང་དབྱིན་ཇི་སློབ་ཁྲིད་ཐོག་སློབ་སྦྱོང་གནང་འདུག་པ་དང་དེའི་རྗེས་སུ་རིམ་པས་གཙུག་ལག་རབ་འབྱམས་པ་དང་མཐར་ཤེས་ཡོན་སློབ་ཁྲིད་ཐོག་འབུམ་རམས་པ་ཐོན། ཕྱི་ལོ་ ༢༠༡༢ ནས་ ༢༠༡༦ བར་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་སློབ་ཀྱི་སློབ་སྤྱི་གཞོན་པའི་ཐུགས་འགན་བཞེས་འདུག

རྒྱ་གར་གྱི་རྒྱལ་ས་ལྡི་ལིར་བཀའ་བློན་ཁྲི་ཟུར་མཁས་དབང་ཟམ་གདོང་རིན་པ་ཆེ་མཆོག་གིས་བོད་དང་རྒྱ་གར་གཉིས་ཀྱི་འབྲེལ་བ་ནི་ཆབ་སྲིད་དང་དཔལ་འབྱོར་སོགས་ཀྱི་འབྲེལ་བ་ཙམ་མིན་པར་སྲིད་པའི་དཔལ་ཡོན་གྱིས་བཅིངས་པའི་ཐུན་མིན་གྱི་འབྲེལ་བ་ཞིག་ཡིན་སྐོར་གསུངས་སོང་། དེ་ཡང་རྒྱལ་ས་ལྡི་ལིར་འཚོགས་བཞིན་པའི་བོད་ཀྱི་རིག་གཞུང་དུས་སྟོན་གྱི་ཆ་ཤས་སུ་ཁ་སང་བཞུགས་མོལ་བཀའ་བསྡུར་གྱི་ལྷན་ཚོགས་གནང་ཡོད་པ་དང་། ལྷན་ཚོགས་དེའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་བཀའ་ཁྲི་ཟུར་པ་མཁས་དབང་ཟམ་གདོང་རིན་པོ་ཆེ་མཆོག ལྕམ་སྐུ་ Kapila Vatsyayan མཆོག དེ་བཞིན་ལྕམ་སྐུ་ Sondhi མཆོག་བཅས་ནས་བོད་དང་རྒྱ་གར་གཉིས་ཀྱི་གནའ་དེང་འབྲེལ་ལམ་ཐད་ལ་བཀའ་བསྡུར་གནང་ཡོད་པ་རེད། སྐབས་དེར་བཀའ་ཁྲི་ཟུར་པ་མཁས་དབང་ཟམ་གདོང་རིན་པོ་ཆེ་མཆོག་ནས་ཧིན་དི་ཐོག་འཕགས་བོད་གཉིས་ཀྱི་འབྲེལ་བ་དེ་ནི་རྒྱལ་ཁབ་ཕྱོགས་ཕན་ཚུན་གཉིས་སམ་ཡང་ན་ཆོས་ཀྱི་འབྲེལ་བ་རྐྱང་པ་ཙམ་མིན་པར་འཕགས་བོད་གཉིས་ཀྱི་འབྲེལ་བ་ནི་དུས་རབས་མང་པོའི་གོང་ནས་ཡོད་པའི་ལོ་རྒྱུས་ཀྱི་རང་བཞིན་ལྡན་པའི་སྲིད་པའི་དཔལ་ཡོན་གྱིས་གཅུས་སྒྲིམ་བཞག་པའི་འབྲེལ་བ་ཞིག་རེད། དེང་སྐབས་སུའང་བོད་མི་ཚོའི་ངོས་ནས་ལོ་རྒྱུས་ཀྱི་གོད་ཆག་ཆེན་པོ་དེར་བལྟོས་མེད་སོ་སོའི་ཆོས་དང་རིག་གཞུང་། མི་རིགས་ཀྱི་ངོ་བོ་བཅས་མི་ཉམས་རྒྱུན་འཛིན་གནང་ཐོག་རྒྱ་གར་གཞུང་མང་གིས་ཀྱང་བོད་མི་ཚོར་ཕྱོགས་གང་ས་ནས་གང་འོས་ཀྱི་མཐུན་འགྱུར་གནང་བཞིན་པ་བཅས་ནི་འཕགས་བོད་གཉིས་ཀྱི་སྲིད་པའི་དཔལ་ཡོན་གྱིས་བཅིངས་པའི་འབྲེལ་བ་དེ་ལ་ཐུག་ཡོད་པ་གསུངས་ཡོད། ལྷག་པར་དུ་བོད་མི་ཚོ་བཙན་བྱོལ་དུ་འབྱོར་བའི་རྗེས་སུའང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་འོག་ད་ལྟའི་འཛམ་བུ་གླིང་འདིར་ཤིན་ཏུ་ནས་མཁོ་བའི་འཕགས་བོད་གཉིས་ཀྱི་ཕ་མེས་ནས་ཡོད་པའི་མིའི་བཟང་སྤྱོད་ཀྱི་རིན་ཐང་དང་། བློ་སྦྱོང་སོགས་ཀྱི་ཡོན་ཏན་དེ་དག་བསྐྱར་གསོ་ཐུབ་པ། ༸གང་ཉིད་མཆོག་གིས་ཆོས་ལུགས་དང་མ་འབྲེལ་བའི་བཟང་པོའི་རིན་ཐང་དེ་དག་མིའི་དགོས་མཁོར་གཟིགས་ཏེ་ཀུན་ཁྱབ་ཀྱི་འགན་འཁུར་ངོ་བོའི་ཐོག་ནས་ལམ་སྟོན་བཀྲིན་སྩོལ་བཞིན་ཡོད་པ་དེ་དག་ནི་འཕགས་བོད་གཉིས་ཀྱི་མི་རིགས་ལ་ཕ་མེས་ནས་ཡོད་པའི་རྒྱུན་ལྡན་འཚོ་བའི་ཆ་ཤས་ཤིག་དང་། སྲིད་པའི་དཔལ་ཡོན་གྱིས་བཅིངས་པའི་ཐུན་མིན་གྱི་འབྲེལ་བ་ཞིག་ཡིན་སྐོར་གསུངས་ཡོད་པ་རེད། དེ་བཞིན་བོད་དོན་ལ་ཞལ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་སློབ་དཔོན་ ML Sondhi མཆོག་གི་སྐུ་ཟླ་ལྕམ་སྐུ་མཁས་དབང་ Sondhi མཆོག་ནས་ཀྱང་བརྗོད་གཞི་དེ་དང་འབྲེལ་ཏེ། དེང་སྐབས་རྒྱ་ནག་ཕྱོགས་ནས་འཛམ་བུ་གླིང་ཁྱོན་ཡོངས་སུ་དེང་དུས་ཀྱི་སྒྱུ་རྩལ་ཁག་ཅིག་སྤྱོད་ནས་ལོ་རྒྱུས་ལ་འཁྱོག་བཤད་དང་བཟོ་བཅོས་ཀྱིས་རྒྱལ་ཁབ་གཞན་ནང་རྒྱ་སྐྱེད་བཙན་འཛུལ་གྱི་ཐབས་ཤེས་བྱེད་མུས་ཡིན་སྟབས། དེང་སྐབས་མང་གཙོའི་རིང་ལུགས་ཀྱི་རྒྱལ་ཁབ་ཚོས་རྒྱ་ནག་ལྟ་བུའི་སྲིད་དབང་སྒེར་གཅོད་ཀྱི་རྒྱ་སྐྱེད་རིང་ལུགས་ཀྱི་བསམ་བློ་ཐོག་བགྲོ་གླེང་མང་པོ་ཞིག་ཡོང་བཞིན་པ་ལྟར་། རྒྱ་གར་དང་བོད་མིའི་ཆབ་སྲིད་ཀྱི་འབྲེལ་ཡོད་མི་སྣ་དང་ཐབས་བྱུས་པ། མཁས་དབང་བཅས་ནས་མང་གཙོའི་ལམ་ལུགས་ལོངས་སུ་སྤྱོད་མཁན་རྒྱལ་ཁབ་གཞན་དང་ཟུང་འབྲེལ་ཐོག་རྒྱ་ནག་གི་རྒྱལ་རབས་ལོ་རྒྱུས་ལ་ཕྱིར་མིག་བལྟས་ནས་ངལ་བར་གདོང་ལེན་ཡོང་ཐབས་གནང་དགོས་སྐོར་སོགས་གསུངས་ཡོད། རྒྱལ་ས་ལྡི་ལིའི་བོད་ཀྱི་དུས་སྟོན་གྱི་ཆ་ཤས་སུ་གོ་སྒྲིག་ཞུས་པའི་བགྲོ་གླེང་དེའི་ཐོག་རྒྱ་གར་དབུས་གཞུང་གི་ཕྱི་འབྲེལ་དང་ཤེས་ཡོན་། འཛིན་སྐྱོང་སོགས་ཀྱི་ཐད་ལ་ཕྱག་ལས་ཡུན་རིང་གནང་མྱོང་ཡོད་པ་དང། ལྷག་པར་དུ་བོད་མི་ཚོ་བཙན་བྱོལ་དུ་ཐོག་མར་འབྱོར་སྐབས་སློབ་གྲྭ་གསར་འཛུགས་སོགས་ཀྱི་ལས་དོན་དང་ཐད་ཀར་འབྲེལ་ཡོད་མཁས་དབང་ལྕམ་སྐུ་ Kapila Vatsyayan མཆོག་ནས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་ཐོག་མར་གསར་འཛུགས་སྐབས་མཁས་དབང་ཟམ་གདོང་རིན་པོ་ཆེ་མཆོག་ནས་སྐུ་ལས་ཇི་ཙམ་བསྐྱོན་ཡོད་སྐོར་ལོ་རྒྱུས་ཁག་ངོ་སྤྲོད་དང་སྦྲགས། བོད་མི་ཚོའི་ངོས་ནས་སློབ་གཉེར་ཁང་དེ་ལྟ་བུ་བརྒྱུད་ནས་རྒྱ་གར་གྱི་ཕ་མེས་ནས་ཡོད་པའི་བཟང་པོའི་ཡོན་གཏན་དེ་དག་མི་ཉམས་རྒྱུན་འཛིན་གནང་གི་ཡོད་སྐོར་སོགས་གསུངས་པ་དང་ཆབས་ཅིག ཁྱད་པར་དུ་བོད་མི་ཚོའི་ངོས་ནས་ལོ་འཁོར་མོར་དུས་སྟོན་འདི་ལྟ་བུ་གནང་ཐོག་རྒྱ་གར་གཞུང་མང་ལ་ཐུགས་རྗེ་ཆེ་ཞུ་གནང་གི་ཡོད་ནའང་དོན་དངོས་ཐོག་རྒྱ་གར་གཞུང་མང་ནས་བོད་མི་ཚོར་ཐུགས་རྗེ་ཆེ་ཞུ་དགོས་སྐོར་སོགས་གསུངས་ཡོད། བཞུགས་མོལ་དེའི་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་བོད་དང་རྒྱ་གར་བར་ཁོར་ཡུག་དང་ཆབ་སྲིད། རིག་གཞུང་། སྐད་ཡིག་སོགས་ཀྱི་འབྲེལ་ལམ་ཁག་ངོ་སྤྲོད་དང་འབྲེལ། བོད་མི་ཚོའི་ངོས་ནས་རྒྱ་གར་གཞུང་མང་ལ་ཞལ་ཙམ་མིན་པར་བོད་ཀྱི་དུས་སྟོན་འདི་ལྟ་བུ་བརྒྱུད་ནས་བོད་མིའི་ངོས་ནས་རྒྱ་གར་གྱི་རྩ་ཆེའི་རིག་གཞུང་ཁག་མི་ཉམས་རྒྱུན་འཛིན་གནང་ཡོད་པ་དེ་འགྲེམས་སྟོན་ཞུ་ཐོག་སྙིང་དབུས་ནས་རྒྱ་གར་གཞུང་མང་ལ་ཐུགས་རྗེ་ཆེ་ཞུ་རྒྱུ་ཡིན་པ་གསུངས་ཡོད།