༸གོང་ས་མཆོག

དེ་རིང་ཕྱི་ཟླ་ ༨ ཚེས་ ༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་བོད་རིགས་གཞོན་སྐྱེས་རྣམས་ལ་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་ཉིན་གཉིས་པའི་སྐབས་ཆོས་རྒྱུ་མཚན་དུ་མ་བྱས་པར་སེམས་ཁམས་རིག་པའི་གནས་ཚུལ་ཤེས་པའི་སྒོ་ནས་གཞན་ལ་ཕན་བཏགས་པ་དང་། མི་ཚེ་འདིར་རང་སྐྱིད་པོ་ཞིག་ཡོང་རྒྱུའི་རྒྱུ་མཚན་དུ་བྱས་ནས་བཟང་པོ་གནང་རྒྱུ་དེ་ཆོས་དང་མ་འབྲེལ་བའི་བཟང་སྤྱོད་རེད་ཅེས་ལམ་སྟོན་བསྩལ་སོང་།མགོན་པོ་༸གང་ཉིད་ཆོག་གིས་ཁ་སང་གི་བཀའ་ཆོས་འཕྲོ་སྐྱོང་མཛད་མཚམས་སུ་སློབ་ཕྲུག་རྣམས་ལ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་བཀའ་དྲིན་ཆེ་བར་བསྩལ་དོན་ལྟར་ཅོན་ཏ་རཱ་བོད་ཁྱིམ་སློབ་གྲྭའི་སློབ་མ་བསྟན་སྒྲོལ་ལགས་ཀྱིས་ཆོས་ལུགས་དང་འབྲེལ་བའི་བཟང་སྤྱོད། ཆོས་ལུགས་དང་མ་འབྲེལ་བའི་བཟང་སྤྱོད་ཅེས་པ་གཉིས་ཀྱི་དབྱེ་མཚམས་ཇི་ལྟར་འཇོག་དགོས་སམ་ཞེས་བཀའ་འདྲི་ཞུས་པར་མགོན་པོ་མཆོག་གིས་ཆོས་རྒྱུ་མཚན་དུ་བྱས་ནས་སྐྱེ་བ་སྔ་ཕྱི་དང་དགེ་སྡིག་སོགས་ཀྱི་སྒོ་ནས་གཞན་ལ་ཕན་བཏགས་པ་དང་བཟང་པོ་བྱེད་པ་ནི་ཆོས་དང་འབྲེལ་བའི་བཟང་སྤྱོད་ཅིག་ཡིན་པ་དང་། ཆོས་རྒྱུ་མཚན་དུ་མ་བྱས་པར་སེམས་ཁམས་རིག་པའི་གནས་ཚུལ་ཤེས་པའི་ཐོག་ནས་མིའི་ལྷན་སྐྱེས་སུ་ཡོད་པའི་བཟང་པོའི་རང་བཞིན་གྱི་བློ་དེ་སྤྱོད་ནས་མི་ཚེ་འདིར་སྐྱིད་པ་དང་འཛམ་གླིང་སྤྱི་ལ་ཕན་ཐོགས་གནང་རྒྱུ་དེ་ཆོས་དང་མ་འབྲེལ་བའི་བཟང་སྤྱོད་རེད་ཅེས་ལམ་སྟོན་མཛད་སོང་། སྐབས་དེར་སློབ་ཕྲུག་གཞན་ཞིག་གིས་རང་རྒྱལ་གཞན་ཕམ་གྱི་བློ་མེད་པའམ་གཞན་གཅེས་པར་འཛིན་པའི་བློའི་ཐོག་ནས་འགྲན་བསྡུར་གནང་ཐབས་ཡོད་དམ་ཞེས་བཀའ་འདྲི་ཞུས་པར་མགོན་པོ་མཆོག་གིས་སྤྱིར་འགྲན་བསྡུར་ལ་གནོད་སེམས་དང་། རང་རྒྱལ་གཞན་ཕམ་གྱི་འགྲན་བསྡུར་ཞིག་དང་། ཕན་སེམས་ཀྱི་འགྲན་བསྡུར་ཞེས་གཉིས་ཡོད་པ་ལྟར་རང་རྒྱལ་གཞན་ཕམ་མིན་པར་ཕ་རོལ་པོའི་བློ་གྲོས་ཡར་རྒྱས་འགྲོ་རྒྱུར་དམིགས་པའི་འགྲན་བསྡུར་དེ་དགོས་ངེས་ཅན་ཞིག་ཡིན་པར་བཀའ་བསྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གི་ཆོས་འབྲེལ་ཐོག་དེང་དུས་ཀྱི་བོད་ཕྲུག་ཡིན་པ་གང་ཞིག་དངོས་པོ་ཡང་རྒྱས་ཁོ་ན་ལ་བསམ་བློ་བཏང་མཁན་ཚོས་འཕྲོད་བསྟེན་ཞེས་བརྗོད་སྐབས་གཟུགས་ཀྱི་འཕྲོད་བསྟེན་ལས་སེམས་ཀྱི་འཕྲོད་བསྟེན་སྐོར་སྐད་ཆ་བཤད་མཁན་ཞིག་མེད་པར་བཀའ་བསྩལ་བ་དང་འབྲེལ། སེམས་ཀྱི་འཕྲོད་བསྟེན་དེ་རྒྱ་གར་གྱི་གནའ་བོའི་རིག་གཞུང་ལས་སྤྱོད་པ་འཚེ་བ་མེད་པ་དང་བྱམས་བརྩེ་སོགས་དང་འབྲེལ་བའི་སེམས་ཁམས་རིག་པའི་ལྟ་བ་ཁོ་ནས་ཁ་གསབ་ཐུབ་པ་ལས་དེང་དུས་ཀྱི་རིག་གཞུང་ལས་ཡོང་ཐབས་མེད་སྟབས་དེར་དོ་སྣང་བྱེད་དགོས་གལ་ཡིན་པར་བཀའ་བསྩལ་ཡོད། མགོན་པོ་༸གང་ཉིད་མཆོག་གིས་སྤྱིར་ཆོས་ལུགས་ཀུན་ལ་ལྟ་སྤྱོད་གཉིས་ཡོད་པ་ལྟར་སངས་རྒྱས་པའི་ཆོས་ཀྱི་སྙིང་པོ་ལའང་ལྟ་བ་དང་སྤྱོད་པ་གཉིས་ཡོད་པ་དང་། ལྟ་བ་དེ་ཚན་རིག་དང་འབྲེལ་བའི་ལྟ་བ་རྟེན་འབྱུང་དང་། སྤྱོད་པ་ཞེས་བརྗོད་སྐབས་འཛམ་གླིང་གི་ཞི་བདེ་དང་འབྲེལ་ནས་སྤྱོད་པ་འཚེ་བ་མེད་པ་ཞེས་གཉིས་ཡོད་པ་སློབ་ཕྲུག་ཚོས་ངེས་པར་དུ་ཤེས་དགོས་གནད་ཡིན་པར་ལམ་སྟོན་བཀྲིན་ཆེ་བ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ན་ལེནྡཱའི་ཆོས་བརྒྱུད་ནི་རིག་པའི་ལམ་ནས་གཏན་ལ་དབབ་ནས་བཤད་རྒྱུ་ཡོད་པ་མ་ཟད་ཚན་རིག་དང་མཉམ་དུ་འགྲོ་རྒྱུ་ཡོད་པ་ཞིག་ཡིན་པ་བཀའ་བསྩལ་བ་དང་སྦྲགས། དེ་ནི་བོད་པའི་ཐུན་མིན་གྱི་རིག་གཞུང་ཞིག་ཡིན་པ་དང་། དཔལ་ན་ལེནྡཱའི་ཆོས་བརྒྱུད་ཀྱི་གཞུང་ཆེན་དག་ལ་ཆེད་གཉེར་གནང་དགོས་བྱུང་ཚེ་བོད་པའི་སྐད་ཡིག་འདི་མེད་དུ་མི་རུང་བ་ཅིག་ཆགས་ཡོད་སྟབས། ན་ལེནྡཱའི་རིག་གཞུང་ནི་བོད་པའི་རིག་གཞུང་ཞིག་ཡིན་པ་བཀའ་བསྩལ་སོང་བ་དང་ཆབས་ཅིག རིག་གཞུང་འདི་བརྒྱུད་ནས་མ་འོངས་པར་རྒྱ་ནག་དང་མཉམ་དུ་འཆམ་མཐུན་ངང་སྡོད་རྒྱུ་བྱུང་ཚེ་རྒྱ་ནག་གི་ནང་པ་ཚོ་ལའང་ཞབས་འདེགས་ཞུ་ཐུབ་ངེས་ཡིན་པ་བཀའ་བསྩལ་སོང་།

བྱང་ཨར་ལན་ཌི་དང་ཨིན་ཡུལ་གཞུང་གཉིས་དབར་ཞི་བའི་ཆིངས་ཡིག་བཞག་སྟེ་ཕྱོགས་གཉིས་ཀྱི་ལོ་ངོ་བཅུ་ཕྲག་འགའི་དཀའ་ངལ་རྣམས་སེལ་མཁན་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ John Hume མཆོག་ཁ་སང་ཟླ་ ༨ ཚེས་ ༣ ཉིན་ སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུན་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་དམ་པ་ཁོང་གི་སྐུ་ཟླ་ Patricia Hume མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་འདུགདེའང་དགུང་གྲངས་ ༨༣ ཐོག་སྐུ་ཚེའི་འཕེན་པ་རྫོགས་པའི་སྐུ་ཞབས་ John Hume མཆོག་ཡུན་རིང་ནད་མནར་རྗེས་ཁ་སང་བྱང་ Ireland ཁུལ་གྱི་ Londonderry གྲོང་ཁྱེར་གྱི་སྨན་ཁང་དུ་སྐུ་ཚེའི་འཕེན་པ་རྫོགས་འདུག ཁོང་ནི་དེ་སྔ་ Ireland ཁུལ་དུ་ནང་འཁྲུག་སྐབས་སུ་གྲོས་མོལ་དང་འགྲིག་འཇགས་ཀྱི་ཐོག་ནས་ངལ་བ་དག་སེལ་མཁན་ཞིག་ཡིན་སྟབས། ཕྱི་ལོ་ ༡༩༩༨ ལོར་ Good Friday Deal ཞེས་དམ་པ་དེ་ཉིད་ནས་སྣེ་ཁྲིད་དེ་བྱང་ཨར་ལན་ཌི་དང་ཨིན་ཡུལ་གཞུང་གཉིས་དབར་ཞི་བའི་ཆིངས་ཡིག་བཞག་སྟེ་ཕྱོགས་གཉིས་ཀྱི་ལོ་ངོ་བཅུ་ཕྲག་འགའི་དཀའ་ངལ་རྣམས་སེལ་ཐུབ་པ་བྱུང་བར་བརྟེན་ལོ་དེར་ཁོང་ལ་ནོ་བེལ་ཞི་བདེའི་གཟེངས་རྟགས་ཀྱང་འབུལ་བཞེས་གནང་མྱོང་ཡོད་པ་རེད། དམ་པ་ཁོང་དགོངས་པ་རྫོགས་པའི་གནས་ཚུལ་གསན་པ་དང་འབྲེལ་དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་གི་ཤུལ་ལུས་སྐུ་འཁོར་ཡོངས་ལ་ཐུགས་གསོའི་གསུང་འཕྲིན་ཞིག་བསྩལ་འདུག་པའི་ནང་།  མགོན་པོ་མཆོག་དེ་སྔ་བྱང་ Ireland ནང་དུ་ཐེངས་ཁ་ཤས་ཆིབས་བསྒྱུར་མཛད་མྱོང་ཡོད་པ་དང་། སྐབས་དེ་དུས་སྐུ་ཞབས་ John Hume དམ་པ་ཁོང་དང་མཇལ་འཕྲད་མཛད་རྒྱུའི་གོ་སྐབས་བྱུང་ཡོད་སྐོར་བཀའ་བསྩལ་དང་སྦྲགས། ཁོང་ནི་གྲོས་མོལ་དང་འགྲིག་འཇགས་ཀྱི་ཐོག་ནས་རྩོད་རྙོག་གི་ངལ་བ་སེལ་རྒྱུའི་ནུས་པར་ཡིད་ཆེས་དང་ཆོད་སེམས་བརྟན་པོ་གནང་མཁན་ཞིག་ཡིན་པ་དང་། ཁོང་གིས་དབུ་ཁྲིད་དང་གྲོས་མོལ་གྱི་ནུས་པར་ཡིད་ཆེས་ལྷད་མེད་གནང་བ་དེས་དེ་སྔ་ Good Friday Agreement ལྟ་བུའི་ལོ་རྒྱུས་ཀྱི་རང་བཞིན་ལྡན་པའི་གྲོས་མཐུན་དེ་འཇོག་ཐུབ་པ་བྱུང་ཡོད་སྐོར་བཀའ་བསྩལ་འདུག ༸གོང་ས་མཆོག་གིས་ད་དུང་དམ་པ་དེ་ཉིད་ཀྱིས་དོན་དངོས་ཐོག་མི་ཚེ་དོན་དང་ལྡན་པ་བསྐྱལ་ཡོད་པར་བཀའ་བསྩལ་བ་དང་ཁོང་གི་ཆོད་སེམས་དང་ཕྱག་ལས་གཡོ་བ་མེད་པར་གནང་བ་དེ་ང་ཚོའི་དམིག་དཔེ་འོས་པ་ཞིག་ཆགས་ཡོད་པ་མ་ཟད། དཀའ་ངལ་དང་རྙོག་གྲ་ཇི་ཙམ་ཡོད་ཀྱང་ཞི་བདེ་དང་གྲོས་མོལ་གྱི་ལམ་ནས་སེལ་རྒྱུ་ཡོད་པར་གཙིགས་ཆེར་ངོས་བཞེས་གནང་དོན་ལྟར་དེ་དག་མུ་མཐུད་ནས་གནས་རྒྱུ་ཡིན་པ་བཀའ་བསྩལ་འདུག སྐུ་ཞབས་ John Hume མཆོག་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་འབྲེལ། ཨིན་ཡུལ་གྱི་སྲིད་བློན་ལས་ཟུར་དང་ཨ་རིའི་སྲིད་འཛིན་ཟུར་སྐུ་ཞབས་པ་ Bill Clinton མཆོག་སོགས་ཨིན་ཡུལ་དང་རྒྱལ་སྤྱིའི་དབུ་ཁྲིད་མང་དག་ཅིག་ནས་ཁོང་གི་མཛད་རྗེས་ལ་ཆེ་བསྟོད་དང་འབྲེལ། སྐུ་ཚེའི་འཕེན་པ་རྫོགས་པར་ཆེས་ཐུགས་ཕམ་གནང་བཞིན་འདུག

འདི་ལོའི་ཟླ་བ་ ༧ ཚེས་ ༢༠ ནས་ཕྱི་ཟླ་ ༨ ཚེས་ ༣ སྟེ་དེ་རིང་གི་བར་དུ། ཉིན་གྲངས་ ༡༥ རིང་སྦིར་བོད་ཚོགས་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་སྤྱི་ནོར་ ༧གོང་ས་༧སྐྱབས་མགོན་ཆེན་པོ་མཆོག་༸སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དོན་མཐའ་དག་ལྷུན་གྱིས་འགྲུབ་པ་དང་རྒྱ་ནད་ཏོག་དབྱིབས་རིམས་ནད་འདི་མྱུར་དུ་ཡལ་ཏེ་འཛམ་གླིང་སྔར་བཞིན་བདེ་སྐྱིད་ལྡན་པར་ཡོང་ཆེད་སྒྲོལ་མ་འབུམ་གསོག་གི་ཞབས་རིམ་བསྒྲུབས་གནང་འདུག སྦིར་བོད་ཚོགས་ས་གནས་གཞོན་ནུའི་ཚོགས་གཙོ་བློ་གྲོས་དཔལ་ལྡན་ལགས་ཀྱིས་འདི་ག་རླུང་འཕྲིན་ཁང་ལ་འདི་ལོར་རྒྱ་ནད་ཀྱི་རྐྱེན་ནས་ཀྱིས་མི་མང་རང་ཁྱིམ་དུ་བཀག་སྡོམ་བྱས་ཡོད་སྟབས། ཐེངས་འདིར་ས་གནས་གཞོན་ནུའི་ཐོག་ནས་སྒྲོལ་མ་འབུམ་སྒྲུབ་ཀྱི་ལས་འགུལ་ཞིག་སྤེལ་སྐབས་རྒས་འཁོགས་རྣམས་ཀྱིས་དགའ་མོས་ཆེན་པོའི་ངང་ནས་འཛུལ་ཞུགས་བྱས་ཡོད་པར་ངོ་སྤྲོད་དང་། འདི་ལོ་དབུས་བོད་མིའི་སྒྲིག་འཛུགས་ཀྱིས་༸གོང་ས་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་པར་བརྟེན་སྒྲོལ་མ་འབུམ་གསོག་གི་ལས་འགུལ་ཞིག་སྤེལ་བར་དགའ་སྤྲོ་ཆེན་པོ་བྱུང་ཞེས་གསུངས་སོང་། དེ་བཞིན་དབུས་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ཀྱིས་འདི་ལོ་བོད་མི་ཡོངས་ཀྱིས་ཐུན་མོང་གི་ཐོག་ནས་༸གོང་ས་སྐྱབས་མགོན་རིན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་སྟབས་དབུས་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་མགོན་པོ་༸གང་ཉིད་མཆོག་ལ་བཀའ་དྲིན་རྗེས་དྲན་གྱི་ཆེད་དུ་ཆོས་ཕྱོགས་ཀྱི་བྱ་བ་བསྒྲུབ་རྒྱུ་དང་། དེ་བཞིན་སྤྱི་ཚོགས་ཞབས་ཞུའི་ལས་རིམ་ཁག་ཅིག་ཀྱང་གྲ་སྒྲིག་གནང་ཡོད་པར་ངོ་སྤྲོད་ཀྱིས་མང་ཚོགས་སྤྱི་ཡོངས་ཀྱི་ངོས་ནས་ཀྱང་གནད་དོན་དེར་ཐུགས་བསམ་བཞེས་ཏེ་༸རྒྱལ་བ་དགྱེས་པའི་ལས་དོན་བསྒྲུབ་རྒྱུ་གལ་ཆེན་པོ་ཡིན་པའི་དྲན་སྐུལ་གནང་སོང་། གཞི་རྩའི་ཐེངས་འདིའི་སྦིར་ས་གནས་གཞོན་ནུ་ཚོགས་པའི་ལས་འཆར་ལྟར་ན། སྒྲོམ་མ་འབུམ་གཅིག་གསོག་སྒྲུབ་གནང་རྒྱུར་རེ་བ་བྱས་ཡོད་ནའང་། ས་གནས་མི་མང་གི་འཛུལ་ཞུགས་དང་རོགས་སྐྱོར་གྱི་འོག་ནས་ཐོག་མིའི་དམིགས་ཚད་ལས་བརྒལ་ཏེ་དེ་རིང་གི་བར་དུ་སྒྲོལ་མ་འབུམ་གསུམ་ལྷག་བསགས་གནང་སྟེ་དེ་རིང་བོད་ལུགས་ཀྱི་ཚེས་ ༡༥ ཉིན་ཞབས་རིམ་གྱི་ལས་འགུལ་དེ་མཇུག་སྒྲིལ་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་གྱི་སྲིད་འཛིན་ཟུར་པ་སྐུ་ཞབས་ Lee Teng-hui མཆོག་དགོངས་པ་རྫོགས་པའི་ཡིད་སྐྱོའི་གནས་ཚལ་ཐོན་པར་ཐུགས་གསོའི་གསུང་འཕྲིན་ཞིག་བསྩལ་བ་དང་འབྲེལ། དམ་པ་དེ་ཉིད་ལ་རྗེས་དྲན་ཞུ་རྒྱུ་ཡག་ཤོས་དེ་ནི་ཁོང་གི་སྙིང་སྟོབས་དང་ཆོད་སེམས་རྗེས་སུ་དྲན་པའི་ཐོག་ནས་མང་གཙོ་གོང་འཕེལ་སླད་ཕྱག་ལས་རླབས་ཆེན་གནང་ཁག་མུ་མཐུད་རྒྱུན་སྐྱོང་གནང་རྒྱུ་དེ་རེད་ཅེས་བཀའ་བསྩལ་འདུགསྐུ་ཞབས་ Lee Teng-hui མཆོག་ནི་མང་ཚོགས་ཀྱིས་འོས་འདེམས་གནང་བའི་ཐེ་ཝན་གྱི་སྲིད་འཛིན་ཐོག་མ་དང་། ཁོང་ལ་ཡོང་གྲགས་སུ་ཐེ་ཝན་གྱི་མང་གཙོའི་སྲོལ་གཏོད་པ་པོའི་ཡབ་ཆེན་ཞེས་འབོད་སྲོལ་ཡོད་པ་མ་ཟད། ཁོང་ནི་ཕྱི་ལོ་ ༡༩༩༧ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཚོ་གླིང་དེའི་ནང་ཆེས་ཐོག་མ་གདན་འདྲེན་ཞུ་མཁན་དེ་ཡིན་པ་རེད། ཁོང་ཁ་སང་རེས་གཟའ་ཕུར་བུ་ཉིན་ཐེ་ཝན་རྒྱལ་ས་ཐེ་པེའི་ Veterans General Hospital ཞེས་པའི་སྨན་ཁང་དུ་སྙུང་གཞིའི་རྐྱེན་གྱིས་དགུང་ལོ་ ༩༧ ཐོག་འདས་གྲོངས་སུ་གྱུར་བའི་གནས་ཚུལ་ཐོན་པ་དང་བསྟུན། ༸གོང་ས་མཆོག་གིས་དམ་པ་དེ་ཉིད་ཀྱི་སྐུ་ཟླ་ལྕམ་སྐུ་ Tseng Wen-hui མཆོག་གིས་གཙོས་པའི་ནང་མི་སྐུ་འཁོར་ཡོངས་ལ་ཐུགས་གསོའི་གསུང་འཕྲིན་བསྩལ་བའི་ནང་མགོན་པོ་༸གང་ཉིད་མཆོག་ཕྱི་ལོ་ ༡༩༩༧ ལོར་ཐེ་ཝན་དུ་ཆེས་ཐོག་མ་ཕེབས་སྐབས་དམ་པ་དེ་ཉིད་མཇལ་འཕྲད་བྱུང་ཐེངས་དང་པོ་དེ་མཛད་རྒྱུའི་གོ་སྐབས་བྱུང་བ་མ་ཟད། རྗེས་སུ་མཚོ་གླིང་དེའི་ནང་སླར་ཡང་ཆིབས་བསྒྱུར་མཛད་སྐབས་དང་གཞན་ཡང་ཞི་བདེའི་གླེང་སྟེགས་ཁ་ཤས་ཐོག་ལྷན་མཇལ་བྱུང་སྐོར་ཐུགས་དྲན་གསོས་པ་དང་འབྲེལ། ༸གོང་ས་མཆོག་གིས་སྐུ་ཞབས་ཁོང་ནི་༸སྐུའི་མཛའ་གྲོགས་ལ་ངོས་བཞེས་མཛད་ཀྱི་ཡོད་སྐོར་བཀའ་བསྩལ་འདུགདེ་བཞིན་༸གོང་ས་མཆོག་གིས་སྐུ་ཞབས་ Lee Teng-hui དམ་པ་མཆོག་གིས་རང་ཉིད་སྐུ་འཚོ་བཞུགས་སྐབས་སྐུལ་ལས་བསྐྱོན་པར་བརྟེན་ཐེ་ཝན་གྱི་མང་གཙོ་གོང་འཕེལ་ཐོག་ཁྱད་དུ་འཕགས་པའི་མཛད་རྗེས་འཇོག་ཡོད་པ་དང་། ད་ལྟའི་ཆར་ཐེ་ཝན་རྒྱལ་ཁབ་འདི་ནི་རང་ཉིད་ཀྱི་ཕ་མེས་ནས་ཡོད་པའི་གཅེས་ནོར་ཕྱུག་པོ་དག་དང་ལྷན་དུ་མང་གཙོའི་ལམ་སྲོལ་ཆེས་ཆེར་གོང་འཕེལ་དུ་འགྲོ་བཞིན་པར་བཀའ་བསྩལ་བ་དང་ཆབས་ཅིག ང་ཚོའི་ངོས་ནས་དམ་པ་ཁོང་ལ་རྗེས་དྲན་ཞུ་རྒྱུ་ཡག་ཤོས་དེ་ནི་ཕལ་ཆེར་ཁོང་གིས་མང་གཙོའི་ཆེད་དུ་ཞུམ་པ་མེད་པའི་སྙིང་སྟོབས་ཆེན་པོས་ཐུགས་ཐག་གཙང་བཅད་ཀྱིས་བཞེངས་ཕྱོགས་དེའི་ཐོག་ནས་ཕྱག་ལས་མུ་མཐུད་གནང་རྒྱུ་དེ་རེད་ཅེས་བཀའ་བསྩལ་འདུག མགོན་པོ་༸གང་ཉིད་མཆོག་གིས་གསུང་འཕྲིན་གྱི་མཐའ་མཇུག་དེར་ཐེ་ཝན་གྱི་སྲིད་འཛིན་ཟུར་པ་སྐུ་ཞབས་ Lee Teng-hui དམ་པ་མཆོག་ནི་བོད་མི་མང་ཚོགས་ཀྱི་མཛའ་གྲོགས་ཤིག་ཡིན་པ་དང་། ཁོང་ནས་རང་ཉིད་སྐུ་འཚོ་བཞུགས་སྐབས་བོད་དོན་ཐོག་རང་ནུས་གང་ཐུབ་ཅི་ཐུབ་ཀྱིས་རྒྱབ་སྐྱོར་གནང་ཡོད་སྐོར་བཀའ་བསྩལ་འདུགདེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུས་གནས་མཆོག་གིས་ཀྱང་དམ་པ་ཁོང་་གི་ནང་མི་སྐུ་འཁོར་ཡོངས་ལ་བོད་མིའི་སྒྲིག་འཛུགས་དང་བོད་མིའི་ཚབ་ཞུས་ཏེ་ཐུགས་གསོ་ཞུས་པ་དང་སྦྲགས། ཕྱི་ལོ་ ༡༩༩༧ ལོར་དམ་པ་དེ་ཉིད་སྲིད་འཛིན་ཡིན་སྐབས་༸གོང་ས་༸སྐྱབས་མགོན་ཆེན་པོ་མཆོག་ཐེ་ཝན་ནང་ཆེས་ཐོག་མར་གདན་འདྲེན་ཞུས་པ་དེ་ནི་ལོ་རྒྱུས་ཀྱི་རང་བཞིན་ལྡན་པ་ཞིག་ཆགས་ཡོད་པ་དང་། ལྷག་དོན་སྐབས་དེར་༸གོང་ས་མཆོག་གིས་ཐེ་ཝན་གྱི་སྲིད་འཛིན་གཞོན་པ་ཟུར་པ་ Lien Chan མཆོག་དང་མཇལ་འཕྲད་ཀྱིས་དབུ་མའི་ལམ་གྱི་སྲིད་བྱུས་དེ་ཐེ་ཝན་མི་མང་ལ་ངོ་སྤྲོད་མཛད་སྐོར་དྲན་གསོ་དང་སྦྲགས། ༸གོང་ས་མཆོག་དང་སྲིད་འཛིན་ཟུར་པ་སྐུ་ཞབས་ལི་ཏིང་ཧུ་མཆོག་རྣམ་གཉིས་མཇལ་འཕྲད་གནང་ནས་བོད་དང་ཐེ་ཝན་མི་མང་དབར་གདུང་སེམས་མཉམ་བསྐྱེའི་འབྲེལ་ལམ་གསར་པ་ཞིག་བསྐྲུན་ཡོད་པ་གསུངས་འདུགསྲིད་སྐྱོང་མཆོག་གིས་ད་དུང་སྐུ་ཞབས་ Lee Teng-hui མཆོག་ནི་ཕུགས་བསམ་ཅན་དང་དཔལ་འབྱོར་རིག་པ་བ། ལྷག་དོན་ལོ་རྒྱུས་ཀྱི་ཐོག་ནས་དམ་པ་དེ་ཉིད་ནི་ཐེ་ཝན་རྒྱལ་ཁབ་ཀྱི་མང་གཙོ་སྲོལ་གཏོད་པ་པོའི་ཡབ་ཆེན་ཡིན་པ་དང་། སྲིད་འཛིན་དམ་པ་ཁོང་གི་མཛད་རྗེས་རྣམས་ང་ཚོས་མུ་མཐུད་ནས་རྒྱུན་སྐྱོང་ཞུ་ངེས་རེད་ཅེས་གསུངས་པ་མ་ཟད། ཚོགས་གཙོ་མཆོག་གིས་དམ་པ་དེ་ཉིད་དགོངས་པ་རྫོགས་པ་ནི་ཐེ་ཝན་གྱི་མི་མང་ཙམ་མིན་པར་བོད་མི་མང་ཚོགས་ལའང་དེ་མཚུངས་གྱོང་གུད་ཆེན་པོ་ཆགས་ཡོད་སྐོར་གསུངས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་བྱམས་བརྩེའི་ཐོག་ཆུ་ཚོད་གཅིག་ལྷག་ཙམ་གྱི་རིང་བཀའ་སློབ་བསྩལ་བ་དང་སྦྲགས། སྐབས་དེར་༸གོང་ས་མཆོག་གིས་རྙོག་ཟིང་ཆེ་བའི་དུས་ཚིགས་སུ་དཀའ་ངལ་རིགས་འཕྲད་ཚེ་རྒྱ་གར་གྱི་གནའ་བོའི་རིག་གནས་ལས་གསུངས་པའི་སེམས་ཞི་བདེ་སྐྲུན་ཐབས་སོགས་ལ་དགོངས་པ་བཞེས་དགོས་གལ་ཡིན་པ་བཀའ་བསྩལ་སོང་།དེ་རིང་ཕྱི་ཟླ་ ༧ ཚེས་ ༢༩ ཉིན་གྱི་སྔ་དྲོ་ཚོུད་ ༩ ཐོག་རྒྱ་གར་གྱི་ཤེས་ཡོན་སྡེ་ཁག་འདྲ་མིན་ཁག་གིས་ཇི་ལྟར་གསོལ་འདེབས་ཞུས་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་བརྩེ་ནི་ད་ལྟའི་འཇིག་རྟེན་གྱི་དཀའ་རྙོག་དེ་སེལ་བའི་ཐབས་ལམ་ཡིན་ཞེས་པའི་བརྗོད་གཞིའི་ཐོག་བཀའ་སློབ་དང་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་ཡོད་པ་རེད།སྐབས་དེར་མགོན་པོ་༸གང་ཉིད་མཆོག་གིས་སློབ་དཔོན་ཞི་བ་ལྷས་མཛད་པའི་བྱང་ཆུབ་སེམས་པའི་སྤྱོད་པ་ལ་འཇུག་པའི་གཞུང་ནང་དཀའ་ཚེགས་ཀྱི་དུས་སྐབས་སུ་བསམ་བློ་འཁྱེར་ཕྱོགས་ཀྱི་དགོངས་པ་བཞེས་ཚུལ་གང་བསྟན་པ་ལུང་འདྲེན་གྱིས་སྐབས་རེ་ང་ཚོར་ངལ་བ་རིགས་འཕྲད་ཚེ་བསམ་བློ་རྒྱ་ཆེ་ས་ནས་བཏང་ནས་དཀའ་ངལ་དེར་གདོང་ལེན་གནང་དགོས་པ་དང་སྤྱིར་འཇིག་རྟེན་གྱི་ཆོས་རྣམས་སྐྱེ་བའི་མཐའ་མར་འཇིག་རྒྱུའི་ཆོས་ཉིད་ཡིན་སྟབས། ད་ལྟའི་ནད་ཡམས་དེ་ཡང་མེད་པ་གྱུར་རྒྱུ་ངེས་ཡིན་པས་ངེད་ཅག་ཚང་མས་ནད་ཡམས་དེར་བློ་མི་ཞུམ་པར་གདོང་ལེན་དང་ལྷག་པར་དུ་རྒྱ་ནག་གི་གནའ་བོའི་སྨན་བཅོས་ཆེད་ལས་པ་དང་། རྒྱ་གར་གྱི་ཚད་དཔྱད་རིག་པ། དེ་བཞིན་བོད་ཀྱི་གསོ་བ་རིག་པའི་སྨན་པ། ཚན་རིག་པ་བཅས་མཉམ་འབྲེལ་གྱིས་གཉན་རིམས་ཞི་བར་གོ་བསྡུར་གནང་དགོས་སྐོར་ལམ་སྟོན་མཛད་ཡོད། དེ་བཞིན་༸གོང་ས་མཆོག་གིས་དེང་དུས་རྙོག་ཟིང་ཆེ་བའི་འཛམ་གླིང་ནང་དཀའ་ངལ་རིགས་འཕྲད་ཚེ་ང་ཚོས་ཐུན་མོང་མ་ཡིན་པའི་ལོ་ངོ་ ༣༠༠༠ ལྷག་གི་རྒྱ་གར་གྱི་གནའ་བོའི་རིག་གཞུང་ལས་གསུངས་པའི་སེམས་ཞི་བདེ་སྐྲུན་ཐབས་སོགས་ལ་དགོངས་པ་བཞེས་དགོས་པ་དང་སྒོས་རྒྱ་གར་གྱི་གནའ་བོའི་རིག་གནས་དེ་ད་ཆ་འཛམ་གླིང་སྤྱི་ཡོངས་ལ་དགོས་ངེས་ཤིག་ཆགས་ཡོད་སྟབས། རྒྱ་གར་གྱི་ཐུན་མོང་མ་ཡིན་པའི་གནའ་བོའི་རིག་གནས་དང་དེང་དུས་ཀྱི་ཤེས་ཡོན་ཟུང་འབྲེལ་གནང་རྒྱུའི་ནུས་པ་དེ་རྒྱ་གར་བ་ཚོར་ཡོད་པར་བརྟེན་ད་ཆ་རྒྱ་གར་བ་ཚོས་རང་ཉིད་ཀྱི་གནའ་བོའི་རིག་གནས་དེར་ཐུགས་སྣང་མང་ཙམ་གནང་རྒྱུའི་དུས་ལ་བབ་འདུག་ཅེས་བཀའ་བསྩལ་སོང་།མགོན་པོ་༸གང་ཉིད་མཆོག་གིས་ཐོག་མར་རྒྱ་གར་དུ་བཙན་བྱོལ་ལ་༸ཞབས་སོར་འཁོད་སྐབས་ཕྱོགས་གཅིག་ནས་ཐུགས་ཕམ་པ་བྱུང་བ་དང་ཕྱོགས་གཞན་ཞིག་ནས་རྒྱ་གར་འཕགས་པའི་ཡུལ་དེ་བོད་བརྒྱུད་ནང་བསྟན་ཆོས་བརྒྱུད་ཀྱི་འབྱུང་ཁུངས་གཙོ་བོ་ཞིག་ཆགས་སྟབས། དེར་དགའ་ཚོར་བྱུང་ཞེས་བཀའ་བསྩལ་བ་དང་སྦྲགས། རྒྱ་གར་གྱི་མང་གཙོའི་ལམ་ལུགས་ལ་ཡི་རངས་བསྔགས་བརྗོད་དང་འབྲེལ། མགོན་པོ་༸གང་ཉིད་མཆོག་རྒྱ་གར་བཙན་བྱོལ་དུ་བཞུགས་རིང་རྒྱ་གར་གྱི་གཞུང་མང་གཉིས་ནས་༸གོང་ས་མཆོག་དང་བོད་མི་སྤྱིར་གཟིགས་རྟོག་ཧ་ཅང་ལེགས་པོ་གནང་དང་གནང་མུས་ཡིན་སྟབས་རྒྱ་གར་གཞུང་མང་གཉིས་ཀྱི་བཀའ་དྲིན་ཐུགས་བཅངས་ཀྱིས་གནའ་བོའི་རིག་གནས་དེ་དག་བསྐྱར་གསོ་མཛད་རྒྱུའི་ཞལ་བཞེས་མཛད་ཡིན་སྐོར་བཀའ་བསྩལ་ཡོད།༸གོང་ས་མཆོག་གི་བཀའ་སློབ་བསྩལ་གྲུབ་མཚམས་སུ་སློབ་གྲྭའི་སློབ་སྤྱི་གཙོས་སློབ་མ་རྣམས་ནས་སེམས་ཞི་བདེ་སྐྲུན་ཐབས་དང་༸གོང་ས་མཆོག་གི་༸སྐུའི་མྱོང་ཚོར་དང་འབྲེལ། ད་ལྟའི་སློབ་སྦྱོང་སྤྲོད་སྟངས་ལ་འགྱུར་ལྡོག་གང་འདྲ་གཏང་དགོས་སྐོར་སོགས་དང་འབྲེལ་བཀའ་འདྲི་ཁག་ཅིག་ཞུས་ཡོད་པ་དང་། མགོན་པོ་༸གང་ཉིད་མཆོག་གིས་སེམས་ཞི་བདེ་མེད་པ་བཟོ་མཁན་དེ་ཕྱིའི་གོ་མཚོན་མིན་པ་དང་དེ་ནི་ནང་བསམ་བློའི་ཞེད་སྣང་དང་དངངས་སྐྲག་སོགས་ཕྱིན་ཅི་ལོག་གི་བློ་ལས་བྱུང་བ་ཞིག་ཡིན་སྐོར་དང་། དེ་བཞིན་རྒྱ་གར་ལྟ་བུའི་ཤེས་ཡོན་ལམ་ལུགས་ནང་ངེས་པར་དུ་ང་ཚོའི་ཉོན་མོངས་ཅན་གྱི་བློར་གཉེན་པོ་བསྟེན་ཐབས་སོགས་ཀྱི་སློབ་ཚན་འཇོག་གནད་ཡིན་པ་སོགས་ལམ་སྟོན་དང་ཆབས་ཅིག་ཏུ་རིམ་པས་གོ་ལ་ཁྱོན་ལ་ཁྱབ་པའི་ནང་སེམས་དང་འབྲེལ་བའི་བསླབ་གཞི་འཇོག་གལ་ཡིན་སྐོར་བཀའ་བསྩལ་སོང་། གཞི་རྩའི་དྲྭ་ལམ་ཐད་གཏོང་བརྒྱུད་བཀའ་ཆོས་དང་བཀའ་སློབ་དེ་དག་དབྱིན་ཇི། ཧིཾདཱི། རྒྱ་སྐད། ཧྥི་རེན་ཆི། ར་ཤི་ཡ། སི་པེན། ཝི་ཏ་ནམ། ཉི་འོང་། སོག་པོ། ཀོ་རི་ཡ། འཇར་མི་ནི། པོར་ཇུ་གྷལ་དང་ཨི་ཊ་ལིའི་བཅས་ཀྱི་སྐད་རིགས་ནང་གསུང་སྒྱུར་གནང་ཡོད་པ་རེད།

རིང་མིན་ཟླ་བ་འདིའི་ཕྱི་ཚེས་ ༢༩ དང་ཕྱི་ཟླ་ ༨ ཚེས་ ༤ ནས་ ༦ དེ་བཞིན་ཕྱི་ཟླ་ ༩ ཚེས་ ༤ ནས་ ༦ བར་བཅས་སོ་སོར་རྒྱ་གར་གྱི་སློབ་མ་ཁག་ཅིག བོད་རིགས་གཞོན་སྐྱེས་རྣམས་དང་ཨེ་ཤ་ཡའི་ཚོགས་སྡེ་ཁག་བཅས་ཀྱིས་ཇི་ལྟར་གསོལ་འདེབས་ཞུས་དོན་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱ་བརྒྱུད་ནས་བཀའ་ཆོས་དང་བཀའ་སློབ་བསྩལ་གཏན་ཁེལ་འདུགདེ་ཡང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་དྷ་རམ་ས་ལའི་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་དྲྭ་རྒྱ་བརྒྱུད་བཀའ་ཆོས་དང་བཀའ་སློབ་ཁག་ཅིག་བསྩལ་གཏན་ཁེལ་བའི་གསལ་བསྒྲགས་ཤིག་སྤེལ་འདུག་པ་དང་།  དེའི་ནང་ཀུན་གྱིས་དགོངས་མངའ་བཞིན་རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་གཉན་རིམས་གསར་པའི་གློ་ཚད་རིམས་ནད་ COVID-19 ཀྱི་གནས་ཚུལ་ཛ་དྲག་ཆེ་བར་བརྟེན་ཕྱི་ཟླ་ ༧ ཚེས་ ༢༩ ཉིན་གྱི་སྔ་དྲོ་ཚོུད་ ༩ ནས་ ༡༠ བར་ཚོུད་གཅིག་གི་རིང་རྒྱ་གར་གྱི་ཤེས་ཡོན་སྡེ་ཁག་འདྲ་མིན་ཁག་གིས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་དེང་དུས་ཀྱི་རྙོག་ཟིང་ཆེ་བའི་འཛམ་གླིང་ཞེས་པའི་བརྗོད་གཞི་དང་འབྲེལ་བྱམས་བརྩེའི་ཐོག་བཀའ་སློབ་དང་རྒྱ་གར་གྱི་སློབ་མ་ཁག་ནས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་ཡིན་པ་དང་།དེ་བཞིན་ཕྱི་ཟླ་ ༨ ཚེས་ ༤ ནས་ ༦ ཉིན་སོ་སོའི་སྔ་དྲོ་ཚོུད་ ༩ ནས་ ༡༠ བར་ཁྱོན་ཉིན་གྲངས་གསུམ་གྱི་རིང་བོད་རིགས་གཞོན་སྐྱེས་རྣམས་ཀྱིས་ཇི་ལྟར་གསོལ་བ་བཏབ་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་སྩལ་རྒྱུ་དང་། དེ་རྗེས་ཆུ་ཚོད་ ༡༠ ནས་ ༡༠༌༣༠ བར་ཚོགས་པ་དེའི་ཚོགས་མི་རྣམས་ནས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་རེད་འདུགགཞན་ཡང་ཕྱི་ཟླ་ ༩ ཚེས་ ༤ ནས་ ༦ ཉིན་སོ་སོའི་སྔ་དྲོ་ཚོུད་ ༩ ནས་ ༡༠ བར་ཁྱོན་ཉིན་གྲངས་གསུམ་གྱི་རིང་ཨེ་ཤ་ཡའི་ཚོགས་སྡེ་ཁག་ཅིག་ནས་ཇི་ལྟར་གསོལ་བ་བཏབ་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཆོས་ཤིག་བསྩལ་རྒྱུ་དང་ཚོགས་པའི་ཚོགས་མི་རྣམ་པས་བཀའ་འདྲི་དགོངས་སྐོར་ཞུ་ཁག་ལ་བཀའ་ལན་བསྩལ་རྒྱུ་བཅས་ཀྱི་མཛད་འཆར་ཐུགས་གཏན་ཁེལ་འདུག གཞི་རྩའི་དྲྭ་ལམ་ཐད་གཏོང་བརྒྱུད་བཀའ་ཆོས་དང་བཀའ་སློབ་དེ་དག་དབྱིན་ཇི། ཧིཾདཱི། བལ་སྐད། རྒྱ་སྐད། ཧྥི་རེན་ཆི། ར་ཤི་ཡ། སི་པེན། ཝི་ཏ་ནམ། ཉི་འོང་། སོག་པོ། ཀོ་རི་ཡ། འཇར་མི་ནི། པོར་ཇུ་གྷལ་དང་ཨི་ཊ་ལིའི་བཅས་ཀྱི་སྐད་རིགས་ནང་གསུང་སྒྱུར་གནང་སྟེ་ཐད་གཏོང་གནང་གི་འདུག དོན་གཉེར་ཅན་ཕྱི་ནང་གི་མང་ཚོགས་རྣམས་ནས་༸དཔལ་ལྡན་དགའ་ལྡན་ཕོ་བྲང་གི་དྲྭ་ཚིགས་དང་༸གོང་ས་མཆོག་གི་ངོ་དེབ་ནང་ཐད་ཀར་གསན་གཟིགས་ཞུ་རྒྱུ་ཡོད་པ་ལྟར། དད་ལྡན་མང་ཚོགས་ཚོས་ས་གནས་སོ་སོར་བཅད་པའི་སྤྱི་ཚོགས་རྒྱང་བཀྱེད་ཀྱི་བཀའ་རྒྱ་ལས་མི་འདའ་བར་གསན་གཟིགས་གནང་དགོས་པའི་གཞེན་སྐུལ་གནང་ཡོད་པ་རེད།

དེ་རིང་༸གོང་ས་སྐྱབས་མགོན་རིན་པོ་ཆེ་མཆོག་གིས་དྲ་ལམ་བརྒྱུད་ནས ཨ་རི་དང་དབྱིན་ཡུལ། དེ་བཞིན་ཁ་ན་ཌ་དང་ཨོ་གླིང་། གཞན་ཡང་སེངྒ་པོར་དང་ཤི་རི་ལང་ཀ་སོགས་ཀྱི་སྨན་པ་མང་པོ་ཞིག་ལ་སྨན་བཅོས་ལག་ལེན་ཁྲོད་ཀྱི་སྙིང་རྗེ་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་བསྩལ་ཏེ་འགྲོ་བ་མིའི་རིགས་ཀྱི་ནང་སེམས་ཀྱི་ཞི་བདེ་ནི་ལུས་སེམས་གཉིས་ཀྱི་འཕྲོད་བསྟེན་ལ་འབྲེལ་བ་ཆེན་པོ་ཡོད་པར་བསྟེན། སྨན་པ་རྣམས་ཀྱིས་ཞལ་ངོ་མཛུམ་གྱིས་ཁེངས་ནས་ནད་པར་ལྟ་སྐྱོང་བྱེད་རྒྱུ་གལ་ཆེན་པོ་ཡིན་སྐོར་བཀའ་བསྩལ་སོང་།དེ་རིང་གི་དྲ་ལམ་གྱི་བཀའ་སློབ་དེ་འགོ་མ་ཚུགས་གོང་།  རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Apollo སྨན་ཁང་གི་སྨན་པ་དང་། རྒྱལ་སྤྱིའི་རྒྱ་གར་གྱི་སྨན་པ་ཚོགས་པའི་འགན་འཛིན།  སྨན་པ་ Anupam Sibal ལགས་ཀྱིས་དེ་རིང་གི་བཀའ་སློབ་ཀྱི་ལས་རིམ་ངོ་སྤྲོད་གནང་སྟེ།  མགོན་པོ་གང་གིས་དུས་རྒྱུན་ནས་སྙིང་རྗེ་ནི་རང་བཞིན་གྱིས་གྲུབ་ཡོད་པ་ཞིག་མ་ཡིན་པར། དེ་ནི་རང་གི་བྱེད་ལས་ནས་ཡོང་གི་ཡོད་སྟབས། གལ་ཏེ་ཁྱེད་ཀྱི་གཞན་ཞིག་ལ་བདེ་སྐྱིད་བསྐྲུན་བསམ་ན་སྙིང་རྗེ་ཕྱག་བསྟར་གནང་དགོས་བ་དང་། དེ་བཞིན་རང་ཉིད་ལ་བདེ་སྐྱིད་དགོས་ན་ཡང་སྙིང་རྗེ་ཕྱག་བསྟར་གནང་དགོས། ང་ཚོས་འཚོལ་བཞིན་པའི་བདེ་སྐྱིད་དེ་ནི་སྙིང་རྗེ་གོང་འཕེལ་གཏོང་བ་དང་གཞན་ལ་བསམ་ཤེས་བྱེད་པ་ཁོ་ནས་ལས་འབྱུང་གི་ཡོད་པར་གསུངས་ཡོད་པ་ལུང་འདྲེན་གྱིས།  ད་སྐབས་རྒྱ་ནག་གི་རིམས་ནད་ཀྱི་རྐྱེན་གྱིས་སྨན་པ་རྣམས་ལ་ཡང་ལས་བྲེལ་གྱི་ཁྲོད་དུ་སེམས་ཀྱི་གནོན་ཤུགས་ཆེན་པོ་ཡོང་གི་ཡོད་སྟབས། མགོན་པོ་གང་གིས་སྨན་བཅོས་ལག་ལེན་ཁྲོད་ཀྱི་སྙིང་རྗེ་སྐོར་གྱི་བཀའ་སློབ་སྩོལ་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུས་སོང་།སྐབས་དེར་༸གོང་ས་མཆོག་གིས། འགྲོ་བ་མིའི་རིགས་ཀྱི་འཕྲོད་བསྟེན་ནི་ཕྱི་གཟུགས་ཀྱི་གྲུབ་ཆ་དང་ནང་སེམས་ཀྱི་གྲུབ་ཆ་གཉིས་ཀྱིས་གྲུབ་ཡོད་པ་ཞིག་ཡིན་པར་བཀའ་གནང་སྟེ། བྱམས་བརྩེ་དང་སྙིང་རྗེ། དེ་བཞིན་ནང་སེམས་ཀྱི་སྟོབས་ཤུགས་དང་ཞི་བདེ་སོགས་ནི་ནང་སེམས་ཀྱི་འཕྲོད་བསྟེན་གལ་ཆེན་ཞིག་ཡིན་པ་དང་། ཕྱི་ལུས་པོའི་འཕྲོད་བསྟེན་གྱི་ཆ་ནས་དབུགས་སྦྱོང་བྱེད་རྒྱུ་གལ་ཆེན་ཡིན་པ་བཀའ་བསྩལ་བ་དང་འབྲེལ། དབུགས་སྦྱོང་ཉམས་ལེན་གནང་བ་ཡིན་ན་སེམས་འཚབ་དང་ཁོང་ཁྲོ་ཞི་བར་ཕན་ཐོག་འབྱུང་གི་ཡོད་པའི་ལམ་སྟོན་གནང་བ་དང་འབྲེལ། དབུགས་སྦྱོང་དེ་ཤེས་ཡོན་རང་ལ་ངོས་འཛིན་བྱས་པའི་ཐོག་ནས་འགྲོ་བ་མིའི་རིགས་ཀྱི་འཕྲོད་བསྟེན་ཇེ་རྒྱས་ཇེ་ལགས་སུ་གཏོང་བར་ཉམས་ལེན་བྱེད་རྒྱུ་གལ་ཆེན་པོ་ཡིན་པའི་ལམ་སྟོན་གནང་སོང་།མགོན་པོ་༸གང་གིས་རྒྱ་གར་གྱི་ནང་དུ་ལོ་ངོ་སྟོང་ཕྲག་གི་ལོ་རྒྱུས་ལྡན་པའི་འགྲོ་བ་མིའི་རིགས་ཀྱི་ནང་སེམས་ཀྱི་འཕྲོད་བསྟེན་དང་འབྲེལ་བའི་སྲོལ་རྒྱུན་བཟང་པོ་ཞིག་ཡོད་པར་བཀའ་གནང་སྟེ། བདག་ཉིད་ཆེན་པོ་གྷན་ངྷི་མཆོག་གིས་ཀྱང་དུས་རྒྱུན་ནས་འཚེ་མེད་ཞི་བ་དང་སྙིང་རྗེ་ཕྱག་ལེན་གནང་གི་ཡོད་པ་མ་ཟད། ཁོང་གིས་རྗེས་སུ་རྒྱ་གར་གྱི་རང་དབང་འཐབ་རྩོད་ཀྱི་སྐབས་སུ་ཡང་འཚེ་མེད་ཞི་བ་དང་སྙིང་རྗེ་ཕྱག་ལེན་གནང་ཡོད་པ་དེ་ནི་འཛམ་གླིང་གི་མིག་དཔེ་ལྟ་བུར་གྱུར་ཡོད་པར་བཀའ་གནང་བ་དང་འབྲེལ།  ༸མགོན་པོ་གང་གིས་ བདག་ཉིད་ཆེན་པོ་གྷན་ངྷི་མཆོག་ལ་སྐྱོན་བརྗོད་ཏོག་ཙམ་ཡོད་པའི་ཆ་དེ་ནི་ཁོང་གིས་རྒྱ་གར་ལ་རང་དབང་ཐོབ་མཚམས་སུ་རྒྱ་གར་གྱི་ནང་དུ་དབྱིན་ཇིའི་ཤེས་ཡོན་ལམ་ལུགས་རྒྱུན་འཛིན་གནང་རྒྱུར་ཁས་ལེན་གནང་ཡོད་པ་དེ་རེད།  དེའི་ཚབ་ཏུ་རྒྱ་གར་གྱི་གནའ་བོའི་རིག་གཞུང་ལ་དོ་སྣང་བྱེད་རྒྱུ་གལ་ཆེན་པོ་ཡིན་པར་བཀའ་བསྩལ་སོང་། སྐབས་དེར། ཨོ་གླིང་གི་སྨན་དཔྱད་རིག་པའི་ནོ་སྦེལ་གཟེགས་རྟགས་བཞེས་མྱོང་མཁན་གྱི་ལྕམ་སྐུ་ Elizabeth Blackburn ལགས་ཀྱིས་མགོན་པོ་གང་ཉིད་མཆོག་ལ་ལོ་ངོ་བཅུ་བཞིའི་སྔོན་མཇལ་མྱོང་བ་ཕྱིར་དྲན་གནང་བ་དང་འབྲེལ་ནས། མི་ཚེ་ནང་སེམས་ངལ་བྱུང་བ་ལ་བརྟེན་ནས་རེ་བ་བརླགས་པའི་མི་ལ་རོགས་རམ་ཅི་ལྟར་གནང་དགོས་བའི་སྐོར་ལ་བཀའ་འདྲི་གནང་བར་མགོན་པོ་གང་གིས། འཇིག་རྟེན་གྱི་བྱ་དངོས་ཡོད་ཚད་ལ་ཐོག་མཐའ་གཉིས་ཡོད་པའི་ཆོས་ཉིད་འབྲེལ་བརྗོད་གནང་བ་དང་འབྲེལ་ནས། འགྲོ་བ་མི་ཞིག་ལ་མཚོན་ནའང་སྐྱེ་འཆི་གཉིས་བརྒྱུད་དགོས་བར་བཀའ་གནང་སྟེ། སྤྱིར་འགྲོ་བ་མིའི་རིགས་ལ་མཚོན་ན་དཀའ་ངལ་ནི་ང་ཚོའི་འཚོ་བའི་ཆ་ཤས་ཤིག་ཡིན་སྟབས་གཞི་རྒྱ་ཆེ་ས་ནས་དགོངས་པ་བཞེས་རྒྱུ་གལ་ཆེན་པོ་ཡིན་པ་དང་།  གང་ཉིད་མཆོག་ཀྱང་སྤྱི་ལོ་ ༡༩༥༩ ལོ་ཟླ་༣ པའི་ཚེས་བཅུ་ ༡༧ གྱི་མཚན་མོར་ནོར་བུ་གླིང་ཀའི་དབྱར་གནས་ལས་བྲོས་བྱོལ་དུ་ཡོང་བའི་སྐབས་ཐོག་དེར་གང་ཉིད་ཀྱི་ཚེ་སྲོག་ལ་ཉེན་ཁ་ཆེན་པོ་འཕྲད་ཡོད་པར་བརྟེན་གནས་སྟངས་ཛ་དྲག་ཆགས་ཡོད་ནའང་། བློ་སེམས་བརྟན་པའི་ཐོག་ནས་དགོངས་པ་ཆེ་བཞེས་གནང་སྟེ་བྲོས་བྱོལ་དུ་ཕེབས་པའི་སྐོར་དྲན་གསོ་གནང་བ་དང་འབྲེལ།   མི་སུ་ཞིག་ཡིན་རུང་འདོད་རྔམ་ཆེན་པོ་དང་མིག་རྒྱང་ཐུང་ཐུང་། དེ་བཞིན་བསམ་བློ་གུ་དོག་པོ་བྱེད་རྒྱུ་མེད་པར། བྱ་བཞག་གང་ལ་ཐུག་ཀྱང་ཆོད་སེམས་བརྟན་པོ་གནང་དགོས་རྒྱུ་གལ་ཆེན་པོ་ཡིན་སྐོར་བཀའ་བསྩལ་སོང་།རྩ་བའི་དེ་རིང་གི་བཀའ་སློབ་ཀྱི་ལས་རིམས་འདི་ནི་རྒྱལ་སྤྱིའི་རྒྱ་གར་གྱི་སྨན་པ་ལྷན་ཚོགས་ཀྱིས་རིམས་ནད་ཀྱི་དུས་སྐབས་འདིར་སྨན་པ་རྣམས་ཀྱིས་ཆུ་ཚོད་མང་པོ་བཏང་ནས་ནད་པར་སྨན་བཅོས་བྱེད་ཀྱི་ཡོད་སྟབས།  ཁོང་རྣམས་ལ་སེམས་ཤུགས་འཕར་མ་ཞིག་སྩོལ་ཕྱིར་གོ་སྒྲིག་གནང་བ་ཞིག་རེད་འདུག

འདས་པའི་ཉིན་གྲངས་ལྔ་ཙམ་གྱི་གོང་ནས་ཡོ་རོབ་ Belgium གྱི་རྒྱལ་ས་ Brussels ནང་རྟེན་གཞི་བྱས་པའི་ཡོ་རོབ་མཐུན་ཚོགས་སུ་ཚོགས་མི་རྒྱལ་ཁབ་ ༢༧ གྱི་དབུ་ཁྲིད་དང་འབྲེལ་ཡོད་སྐུ་ཚབ་མི་སྣ་བཅས་ལྷན་ཞུགས་ཐོག་བར་སྐབས་རྒྱ་ནག་ནས་ཁྱབ་གདལ་སོང་བའི་ཏོག་དབྱིབས་གཉན་རིམས་རྐྱེན་གྱིས་ཡོ་རོབ་མཐུན་ཚོགས་ཀྱི་ཁྱབ་ཁོངས་རྒྱལ་ཁབ་ཀྱི་དཔལ་འབྱོར་གནས་བབས་ལ་གྱོང་གུད་དང་མི་མང་གི་འཚོ་བར་དོ་ཕོག་ཐེབས་ཁག་སླར་གསོ་གནང་རྒྱུར་དམིགས་ཏེ་གཉན་རིམས་ངལ་སེལ་གྱི་རོགས་དངུལ་གྲོས་མཐུན་གཏན་འབེབས་གནང་བཞིན་ཡོད་པ་ལྟར་ཁ་སང་རེས་གཟའ་མིག་དམར་ཉིན་ཡོ་རོབ་མཐུན་ཚོགས་ཀྱི་དབུ་ཁྲིད་ཚོས་གཉན་རིམས་ངལ་སེལ་གྱི་རོགས་དངུལ་ཡོ་སྒོར་ཐེར་འབུམ་ ༧༥༠ དངོས་སུ་གཏན་འབེབས་གནང་ཡོད་པ་རེད།ཡོ་རོབ་མཐུན་ཚོགས་ཀྱིས་གཉན་རིམས་ངལ་སེལ་གྱི་རོགས་དངུལ་གྲོས་མཐུན་དང་འབྲེལ་ཏེ་དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་བསྩལ་འདུག་པ་དང་། དེའང་ནང་ད་ལྟའི་གཉན་འཕྲང་ཅན་གྱི་དུས་སྐབས་འདིར་ཡོ་རོབ་མཐུན་ཚོགས་ཀྱིས་གཉན་རིམས་རྐྱེན་གྱིས་གྱོང་གུད་ཕོག་པའི་ཚོགས་མི་རྒྱལ་ཁབ་ཁག་གི་དཔལ་འབྱོར་སླར་གསོ་གནང་རྒྱུར་ད་བར་མཐུན་ཚོགས་ཀྱི་ལོ་རྒྱུས་ནང་བྱུང་མྱོང་མེད་པའི་མ་དངུལ་རོགས་སྐྱོར་གྱི་གྲོས་མཐུན་ཞིག་གཏན་འབེབས་ཐུབ་པར་ཐུགས་དགྱེས་ཚོར་ཆེན་པོ་བྱུང་ཞེས་བསྔགས་བརྗོད་མཛད་འདུགམགོན་པོ་༸གང་ཉིད་མཆོག་གིས་སླར་ད་རེས་ཡོ་རོབ་མཐུན་ཚོགས་ཀྱི་ཚོགས་མི་རྒྱལ་ཁབ་ཁག་ནས་གྲོས་མོལ་དང་བློས་བཏང་ཆེན་པོས་ཐུན་མོང་གི་དགོས་འདུན་ལེགས་གྲུབ་ཡོང་བར་ཆེད་དམིགས་ཀྱིས་ཕྱག་ལས་གནང་བ་དེ་ནི་ཚོགས་མི་རྒྱལ་ཁབ་རྣམ་པའི་རྣམ་དཔྱོད་དང་གཟི་བརྗིད་མཚོན་ཐུབ་པ་ཞིག་ཀྱང་རེད་ཅེས་བསྔགས་བརྗོད་མཛད་འདུག ༸གོང་ས་མཆོག་གིས་རྒྱུན་དུ་ཡོ་རོབ་མཐུན་ཚོགས་ཀྱི་སྒྲོམ་གཞི་འདི་ནི་རྒྱལ་ཁབ་གཞན་ཚོའི་ངོས་ནས་མིག་དཔེ་འོས་པའི་མཐུན་ཚོགས་ཤིག་ཡིན་པར་ཐུགས་སྨོན་མཛད་དོན་བཞིན་ད་རེས་ངལ་སེལ་གྱི་གྲོས་མཐུན་གཏན་འབེབས་བྱུང་བར་དགའ་བསུའི་འཚམས་འདྲི་དང་། སླད་མར་གོ་ལའི་གནམ་གཤེས་འགྱུར་ལྡོག་སོགས་དང་འབྲེལ་བའི་ལས་དོན་ཁག་ཀྱང་ཚགས་ཚུད་ཡོང་བའི་ཐུགས་སྨོན་ཡོད་ཅེས་བཀའ་བསྩལ་འདུགགཉན་རིམས་ངལ་སེལ་གྱི་རོགས་དངུལ་གྲོས་མཐུན་གཏན་འབེབས་གནང་སྐབས་གྲོས་འཐུས་ཕན་ཚུན་དབར་མ་དངུལ་གྱི་བསྡུ་ཆ་སོགས་ཀྱི་ཐད་བཀའ་བསྡུར་ལྷུག་པོ་བྱུང་ཡོད་ཀྱང་། མཐར་དངོས་སུ་གཏན་འབེབས་གནང་སྐབས་ཡོ་རོབ་མཐུན་ཚོགས་ཀྱི་འགན་འཛིན་སྐུ་ཞབས་  Charles Michel ལགས་ཀྱིས་རོགས་དངུལ་གྲོས་མཐུན་གཏན་འབེབ་བྱུང་བ་དེ་ནི་དུས་ཀྱི་དགོས་མཁོ་ཙམ་མ་ཟད་ཡོ་རོབ་མཐུན་ཚོགས་ཀྱི་དེ་བྱུང་ཁྲོད་གནས་ངེས་ཀྱི་གྲོས་མཐུན་གནད་ཆེ་ཞིག་ཀྱང་རེད་ཅེས་གསུངས་འདུགརྩ་བའི་ཡོ་རོབ་མཐུན་ཚོགས་ཀྱིས་གཉན་རིམས་ངལ་སེལ་གྱི་རོགས་དངུལ་ཡོ་སྒོར་ཐེར་འབུམ་ ༧༥༠ གཏན་འབེབས་གནང་བ་ལས་ཐེར་འབུམ་ ༣༩༠ ཏོག་དབྱིབས་གཉན་རིམས་ཁྱབ་གདལ་ཁྲོད་གྱོང་གུད་ཕོག་ཁག་ལ་གཞིགས་ཏེ་ཚོགས་མི་རྒྱལ་ཁབ་ཚོར་རོགས་སྐྱོར་གྱི་ངོ་བོའི་ཐོག་ནས་གནང་རྒྱུ་དང་ཐེར་འབུམ་ ༣༦༠ སྐྱེད་ཆུང་བུན་གཡར་ཐོག་ཚོགས་མི་རྒྱལ་ཁབ་ཁག་ལ་རོགས་སྐྱོར་གནང་རྒྱུ་ཡིན་པ་རེད། དེ་དང་འབྲེལ་ནས་དཔྱད་ཞིབ་པ་རྣམས་ཀྱིས་ཐེངས་འདིའི་རོགས་སྐྱོར་འདིས་ཏོག་དབྱིབས་གཉན་རིམས་ཀྱི་ཛ་དྲག་གནས་སུ་གྱུར་བ་སི་པན་དང་ཨི་ཊ་ལི་ལྟ་བུར་ཕན་ཐོགས་ཆེན་པོ་བྱུང་ངེས་ཡིན་པ་གསུང་བཞིན་འདུག

འདི་ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པ་དང་བསྟུན་ཟླ་བ་འདིའི་ཕྱི་ཚེས་ ༡༦ ཉིན་ཡོ་རོབ་མཐུན་ཚོགས་ཀྱི་ཕྱི་འབྲེལ་བློན་ཆེན་སྐུ་ཞབས་ Josep Borrell  མཆོག་གིས་རྒྱ་ནག་གཞུང་གིས་༸སྐུའི་ཡང་སྲིད་གནད་དོན་དང་འབྲེལ་བའི་བྱ་རིམ་ཁག་ལ་ཐེ་བྱུས་བྱེད་པར་ཡོ་རོབ་མཐུན་ཚོགས་ཀྱི་ངོས་ནས་བྱེད་ཕྱོགས་དེར་ངོས་ལེན་རྩ་བ་ནས་མེད་པའི་བཞེངས་ཕྱོགས་གསོར་ནས་ཡིན་པ་གསུངས་འདུགདེའང་སྐུ་ཞབས་ Josep Borrell  མཆོག་གིས་ཆོས་ལུགས་ཀྱི་དབུ་ཁྲིད་གང་ཞིག་འདེམས་སྒྲུག་གནང་སྐབས་དེ་འབྲེལ་ཆོས་ལུགས་ཀྱི་བྱ་རིམ་ཁག་ལ་གུས་བརྩི་ཞུས་ཏེ་གནང་དགོས་པ་ལས་སྲིད་གཞུང་གང་གིས་ཀྱང་དེར་ཐེ་གཏོགས་གནང་རྒྱུ་མེད་སྐོར་གསུངས་པ་དང་སྦྲགས། ཡོ་རོབ་མཐུན་ཚོགས་དང་རྒྱ་ནག་དབར་གྱི་འགྲོ་བ་མིའི་ཐོབ་ཐང་གི་གྲོས་མོལ་ནམ་བྱུང་ལ་ཡུ་རོབ་མཐུན་ཚོགས་ཀྱིས་རྒྱ་ནག་དམར་ཤོག་ཚོགས་པའི་སྲིད་གཞུང་ལ་བསྐྱར་བཤད་ཡང་བཤད་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཕེབས་ཕྱོགས་དང་འབྲེལ་བའི་གནང་སྒོ་ཁག་ལ་ཐེ་བྱུས་བྱེད་དབང་མེད་པར་སྐྱོན་བརྗོད་ནན་པོ་གནང་ཡོད་སྐོར་གསུངས་འདུག སྐུ་ཞབས་ Josep Borrell མཆོག་གི་བཀའ་མོལ་དེ་ནི་འདི་ལོའི་ལོ་སྟོད་དུ་ཡུ་རོབ་གྲོས་ཚོགས་ནང་པོར་ཆུ་གྷལ་དང་། བྷེལ་འཇམ། ཨོ་སི་ཊོ་ལི་ཡ། དེ་བཞིན་ལི་ཐོ་ནི་ཡ་བཅས་ཡོ་རོབ་ཆབ་སྲིད་ཤོག་ཁག་བཞིའི་གྲོས་ཚོགས་འཐུས་མི་ལྔས་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་བཀའ་འདྲི་ཞུས་ཁག་ལ་གསལ་བཤད་ཀྱི་ལན་འདེབས་གནང་བ་ཞིག་ཡིན་པ་རེད་འདུགཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱེད་པའི་རྒྱལ་སྤྱིའི་བོད་དོན་ལས་འགུལ་ཁང་གི་སྲིད་བྱུས་ངེས་སྟོན་པ་སྐུ་ཞབས་ Vincent Metten ལགས་ཀྱིས་བོད་མིའི་ཆོས་དད་རང་དབང་ལ་ཞལ་ཞེ་གཉིས་མེད་ཀྱི་རྒྱབ་སྐྱོར་མཚོན་པའི་སྐུ་ཞབས་ Borrell  མཆོག་གི་བཀའ་མོལ་དེར་དགའ་བསུ་ཞུས་པ་དང་འབྲེལ། ད་ནི་ཡོ་རུབ་མཐུན་ཚོགས་ཀྱི་ངོས་ནས་དེའི་ཚོགས་མི་རྒྱལ་ཁབ་ ༢༧ གྱི་སྐུ་ཚབ་ཀྱི་ངོ་བོའི་ཐོག་ནས་སྤྱི་བསྒྲགས་ཤིག་སྤེལ་ཏེ་གནད་འགག་ཅན་གྱི་གནད་དོན་ཐོག་ཡུ་རོབ་མཐུན་ཚོགས་ནས་གཅིག་གྱུར་གྱི་བཞེངས་ཕྱོགས་སོར་གནས་ཡིན་པ་གསལ་འདོན་གནང་རྒྱུ་ནི་དུས་ཀྱི་དགོས་མཁོ་ཞིག་ཆགས་ཡོད་པར་འགྲེལ་བརྗོད་གནང་འདུག གཞི་རྩའི་འདས་པའི་ལོ་ཤས་གོང་ནས་རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་བགྲེས་པོར་ཕེབས་པ་དང་བསྟུན་མ་འོངས་པའི་༸རྒྱལ་མཆོག་༸སྐུ་ཕྲེང་བཅུ་བཞི་པའི་༸སྐུའི་ཡང་སྲིད་ཕེབས་ཕྱོགས་དང་བོད་བརྒྱུད་ནང་བསྟན་བླ་སྤྲུལ་གྱི་ཡང་སྲིད་ངོས་འཛིན་ཇི་ལྟར་ཞུ་དགོས་མིན་གྱི་བདག་དབང་དང་ཐེ་གཏོགས་རྒྱ་ནག་གཞུང་ལ་ཡོད་སྐོར་འཁྱོག་བཤད་རབ་དང་རིམ་པ་སྤེལ་འགོ་བཙུགས་ཡོད་པ་མ་ཟད་དེ་འབྲེལ་ཁྲིམས་སྒྲིག་ཁག་ཅིག་གཏན་འབེབས་བྱས་པ་དེ་ལྟར་ཡང་། ཡོ་རོབ་མཐུན་ཚོགས་དང་།  བྷེལ་ཇམ། Netherlands བཅས་ཀྱིས་༸སྐུའི་ཡང་སྲིད་ཕེབས་ཕྱོགས་ཀྱི་གནད་དོན་ཐད་བདག་དབང་ཆ་ཚང་བོད་མི་རྣམས་ལ་ཡོད་སྐོར་འགྲེལ་བརྗོད་གནང་ཡོད་པ་མ་ཟད། འདི་ལོའི་ལོ་སྟོད་དུ་ཨ་རིའི་གྲོས་ཚོགས་ནང་བོད་དོན་ལ་རྒྱབ་སྐྱོར་གྱི་ཁྲིམས་འཆར་ཞིག་གཏན་འབེབས་གནང་ཡོད་པ་དང་། གལ་ཏེ་ཁྲིམས་འཆར་དེ་དངོས་སུ་ཁྲིམས་ལ་བཅད་ཐུབ་ཚེ་དེའི་ནང་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་བདག་དབང་ཡོང་རྫོགས་བོད་མི་རྣམས་ལ་ཡོད་པ་དང་། མ་འོངས་པར་རང་སྣང་གང་དྲན་གྱིས་༸སྐུའི་ཡང་སྲིད་འདེམས་སྒྲུག་བྱེད་མཁན་རྒྱ་ནག་གི་དཔོན་རིགས་རྣམས་ལ་སྲིད་དོན་ཉེས་པ་འགེལ་རྒྱུ་ཡིན་པ་གསལ་ཡོད་པ་རེད།སྤྱིར་འདས་ལོ་ནང་བཞུགས་སྒར་དུ་བོད་ཀྱི་ཆོས་བརྒྱུད་ཆེན་པོ་ཁག་གི་དབུ་ཁྲིད་བླ་ཆེན་རྣམ་པ་དང་དབུ་ཁྲིད་སྐུ་ཚབ་བཅས་ལྷན་འཛོམས་ཐོག་བཙན་བྱོལ་བོད་མིའི་ཆོས་ཚོགས་ཐེངས་བཅུ་བཞི་པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཕེབས་ཕྱོགས་དང་འབྲེལ་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་ཕེབས་ཕྱོགས་ཐག་གཅོད་གནང་རྒྱུའི་དབང་ཆ་ཡོངས་རྫོགས་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་༸གང་ཉིད་གཅིག་པུར་ཡོད་པ་ལས་གཞན་སྲིད་གཞུང་སོགས་སུ་ལའང་མེད་སྐོར་སོགས་གནད་འཁོད་སྤྱི་མོས་ཀྱིས་གྲོས་ཆོད་དོན་ཚན་གསུམ་ཅན་ཞིག་གཏན་འབེབས་གནང་ཡོདཔ་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་སླད་མར་༸སྐུའི་ཡང་སྲིད་དེ་རྒྱ་ནག་གཞུང་གིས་ངོས་འཛིན་བྱས་པ་གཅིག་དང་བྱེས་སུ་བོད་མིས་ངོས་འཛིན་བྱས་པ་གཅིག་བཅས་གཉིས་བྱུང་ངེས་ཡིན་པ་ལྟར་བོད་མིས་ངོས་འཛིན་ཞུས་པ་དེ་ལ་ངོས་བཞེས་གནང་དགོས་སྐོར་ལམ་སྟོན་བཀྲིན་ཆེ་བ་བསྩལ་ཡོད་པ་རེད།