གསར་འགྱུར།

ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་ gallup ཞེས་མང་ཚོགས་ཀྱི་བསམ་ཚུལ་བསྡུ་རུབ་སོགས་ཀྱི་ཐད་ཕྱག་ལས་གནང་མཁན་ནས་འདོན་སྤེལ་གནང་བའི་འདི་ལོ་ ༢༠༡༩ ལོའི་འཛམ་གླིང་ནང་གི་སྐྱེས་བོ་དགའ་མོས་ཆེ་ཤོས་བྱ་ཡུལ་ཁོངས་སུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བདམས་ཐོན་བྱུང་འདུག ཚོགས་པ་དེས་ཕྱི་ལོ་ ༢༠༡༩ རྗོགས་ལ་ཉེ་བའི་མཚམས་འདིར་དྲྭ་ཐོག་བརྒྱུད་དེ་མང་ཚོགས་ཁྲོད་འདི་ ༢༠༡༩ ལོའི་ནང་གི་སྐྱེས་ཕོ་མོ་དགའ་མོས་ཆེ་ཤོས་བྱ་ཡུལ་གྱི་འོས་གྲངས་བསྡུ་རུབ་གནང་བ་ཞིག་ཡོངས་ཁྱབ་གནང་འདུག་པ་ལྟར་དེའི་ནང་༸གོང་ས་༸སྐྱབས་མགོན་ཆེན་པོ་མཆོག་འདི་ལོ་མང་ཚོགས་ཀྱི་དགའ་མོས་ཆེ་ཤོས་ཞུ་ཡུལ་གྱི་སྐྱེས་པ་ཨང་དགུ་པར་བདམས་ཐོན་བྱུང་འདུག འོས་གྲངས་དེའི་ཁྲོད་ཨང་དང་པོར་ཨ་མི་རི་ཀའི་སྲིད་འཛིན་ཟུར་པ་སྐུ་ཞབས་ Barack Obama མཆོག་དང་སྲིད་འཛིན་ལས་ཐོག་སྐུ་ཞབས་ Donald Trump གཉིས་ལ་འོས་གྲངས་གཅིག་པ་ཐོབ་འདུག་པ་དང་། ཨང་གཉིས་པར་ཨ་རིའི་སྲིད་འཛིན་ཟུར་པ་སྐུ་ཞབས་ Jimmy Carter ལགས་དང་ཨང་གསུམ་པར་བར་སྣང་འཕྲུལ་རིགས་དང་སྣུམ་འཁོར་གྱི་ཡོ་ཆས་བཟོ་ལས་ཁང་ SpaceX ལགས་དང་ Tesla ཞེས་པའི་ཚོང་གཉེར་བ་སྐུ་ཞབས་ Elon Musk ལགས་བཅས་ཆགས་ཀྱི་འདུག དེ་བཞིན་ ༢༠༡༩ ལོར་མང་ཚོགས་ཀྱི་དལའ་མོས་ཆེ་ཤོས་བྱེད་སའི་བེུད་ཁོངས་ནས་ཨང་དང་པོར་ཨ་རིའི་སྲིད་འཛིན་ཟུར་པ་སྐུ་ཞབས་ Barack Obama མཆོག་གི་སྐུ་ཟླ་ Michelle Obama ལགས་དང་ཨང་གཉིས་པར་སྲིད་འཛིན་ Trump མཆོག་གི་སྐུ་ཟླ་ Melania Trump ལགས། དེ་བཞིན་ཨང་གསུམ་པར་ཨ་རིའི་སྒྱུར་རྩལ་བ་དང་སྤྱི་ཚོགས་ཞབས་ཞུ་གནང་མཁན་ལྕམ་ Oprah Winfrey ལགས་བཅས་ཆགས་ཀྱི་འདུག གཞི་རྩའི་འོས་ཤོག་འདིའི་ནང་ཆ་ཤས་བླངས་མཁན་མང་ཆེ་བ་ཨ་རིའི་མི་སེར་ཆགས་ཀྱི་ཡོད་སྟབས་ཡུལ་དེའི་ཆབ་སྲིད་ཀྱི་བཞེངས་ཕྱོགས་ཐད་ནས་མང་ཚོགས་ཀྱི་བསམ་ཚུལ་ལ་ཤུགས་རྐྱེན་ཆེན་པོ་ཐེབས་ཡོད་སྐོར་བརྒྱུད་ལམ་ཁག་ཏུ་གསུང་བཞིན་འདུག ༸གོང་ས་སྐྱབས་མགོན་པོ་མཆོག་ད་རེས་ཙམ་མ་ཟད་དེ་སྔ་ཡང་མང་ཚོགས་ཀྱི་དགའ་མོས་ཆེ་ཤོས་གནང་སའི་ཁོངས་སུ་བསྟུད་མར་བདམས་ཐོན་བྱུང་ཡོད་པ་རེད།

༸དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་གིས་ཁ་སང་ Fundación Sakya ཞེས་པའི་ཆོས་ཚོགས་ཀྱི་དྲྭ་ལམ་བརྒྱུད་ནས་འཛམ་གླིང་གི་ས་ཕྱོགས་གང་སར་གནས་པའི་བོད་རིགས་རྣམས་ཀྱིས་གཙོས་པའི་སྐྱེ་འགྲོ་ཡོངས་ལ་སྟོང་ལོ་ཉི་ཤུའི་ལོ་གསར་པ་ཚེས་བར་བཀྲ་ཤིས་པའི་འཚམས་འཕྲིན་ཞིག་བསྩལ་ཏེ་གཞན་སེམས་བསྐྱེད་ན་བདེ་སྐྱིད་འབྱུང་ངེས་པའི་ལམ་སྟོན་གནང་འདུག རིན་པོ་ཆེ་མཆོག་གི་འཚམས་འཕྲིན་དེའི་ནང་དུ་དུས་ཀྱིི་འགྱུར་བའི་ཁྲོད་ནས་ལོ་གསར་པ་རྟག་ཏུ་ཚེས་བཞིན་ཡོད་སྟབས་འཛམ་གླིང་གི་སྐྱེ་འགྲོ་ཡོངས་ཀྱིས་རང་ཉིད་ཆོས་ཁས་ལེན་མཁན་ཞིག་ཡིན་མིན་ལ་མ་བལྟས་པར་ལོ་གསར་པའི་ནང་དུ་རང་ཉིད་ཀྱིས་བྱ་གཞག་ཡག་པོ་ཞིག་བསྒྲུབ་རྒྱུའི་དམ་བཅའ་འཇོག་པ་དང་། དེ་བཞིན་རང་ཉིད་ལ་བདེ་སྐྱིད་འབྱུང་རྒྱུའི་ཐུགས་རེ་གནང་གི་ཡོད་པ་བཀའ་བསྩལ་གནང་སྟེ་མི་ལ་བདེ་སྐྱིད་དགོས་རྒྱུ་དེ་གལ་ཆེན་པོ་ཡིན་ཀྱང་། སྐྱེ་འགྲོ་མང་པོ་ཞིག་གིས་དོན་དངོས་ཀྱི་བདེ་སྐྱིད་དེ་གང་ཞིག་ཏུ་འབྱུང་གི་ཡོད་པའི་གནས་ལུགས་དེ་རྟོགས་གི་མེད་པ་མ་ཟད་བདེ་སྐྱིད་ནི་ཕྱི་དངོས་བོའི་མཐུན་རྐྱེན་ཙམ་ལས་འབྱུང་གི་ཡོད་པར་བསམ་མཁན་མང་པོ་ཡོད་པ་བཀའ་བསྩལ་བ་དང་འབྲེལ། ཕྱི་དངོས་ཀྱི་མཐུན་རྐྱེན་གྱིས་ང་ཚོའི་ལུས་པོར་འཕྲལ་གསལ་གྱི་བདེ་བ་ཙམ་མ་གཏོགས་སྤྲོད་ཐུབ་ཀྱི་མེད་པ་དང་དོན་དངོས་ཀྱི་བདེ་སྐྱིད་ནི་ནང་ཆོས་ཉམས་ལེན་བྱས་པ་བརྒྱུད་ནས་ཞི་བདེ་དང་མཛའ་བརྩེའི་ཁྲོད་ནས་ཡོང་གི་ཡོད་སྟབས་རང་ཉིད་གཅིག་པོར་བདེ་བ་འདོད་པའི་རང་གཅེས་འཛིན་གྱི་བསམ་བློ་སྐྱེ་རྒྱུ་ཙམ་མིན་པར་འཛམ་གླིང་གི་སྐྱེ་འགྲོ་ཡོངས་ཀྱི་བདེ་སྐྱིད་ལ་དམིགས་པ་བསྐྱེད་རྒྱུ་དེ་གལ་ཆེན་པོར་ངོས་འཛིན་པའི་བྱམས་སེམས་རང་བཞིན་གྱི་གཞི་རྒྱ་ཆེ་བའི་དགོངས་པ་ཞིག་བསྐྱེད་ཐུབ་ཚེ་ང་ཚོས་དོན་དངོས་ཀྱི་བདེ་སྐྱིད་དེ་རང་སྟེང་དུ་ཉམས་སུ་མྱོང་ཐུབ་སྐོར་བཀའ་བསྩལ་འདུག གཞན་ཡང་རིན་པོ་ཆེ་མཆོག་གིས་སྤྱི་ལོ་གསར་ཚེས་འདིའི་ནང་དུ་སྐྱེ་འགྲོ་ཡོངས་ཀྱིས་གཞི་རྒྱ་ཆེ་བའི་བྱམས་བརྩེ་རང་བཞིན་གྱི་དགོངས་པ་བསྐྱེད་དེ་གཞན་ལ་ཕན་སེམས་བསྐྲུན་ཐུབ་པའི་སྐྱེ་འགྲོ་ཞིག་ཏུ་འགྱུར་བར་བརྩོན་རྒྱུའི་ཐུགས་རེ་གནང་བ་དང་ཆབས་ཅིག་ཏུ་ཀུན་གྱི་སྤྱི་ལོ་གསར་པའི་རྨི་ལམ་ཡོད་ཚད་མངོན་འགྱུར་ཡོང་པའི་སྨོན་འདུན་མཛད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དན་དུ་རྒྱ་རིགས་ཆོས་ཞུ་བ་ཁག་གཅིག་ལ་མཇལ་ཁ་བསྩལ་སྐབས་སུ་མགོན་པོ་༸གང་ཉིད་མཆོག་ནས་རྒྱ་རིགས་ནང་པ་ཚོ་དང་ལྷན་མཇལ་འཕྲད་གནང་རྒྱུའི་ཐུགས་རེ་ཆེན་པོ་ཡོད་པ་དང། ལོ་ཤས་ནང་༸གང་ཉིད་མཆོག་རྒྱ་ནག་གི་གནས་ཆེན་རི་བོ་རྩེ་ལྔར་ཆིབས་བསྒྱུར་བསྐྱང་ཐུབ་པའི་ཐུགས་རེ་ཆེན་པོ་མཛད་བཞིན་པ་བཀའ་བསྩལ་འདུག ༸དཔལ་ལྡན་དགའ་ལྡན་ཕོ་བྲང་གི་བོད་ཡིག་དྲྭ་རྒྱའི་ཐོག་གནས་ཚུལ་སྤེལ་བར་གཞིགས་ཚེ་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་ཚེས་ ༢༩ ཉིན་གནས་མཆོག་རྡོ་རྗེ་གདན་དགའ་ལྡན་འཕེལ་རྒྱས་གླིང་གཟིམ་ཆུང་དུ་རྒྱ་གར་གྱི་དཔོན་རིགས་ཁག་གཅིག་དང་། རྒྱ་རིགས་མི་མང་ཁག་གཅིག གཞན་ཡང་རྒྱལ་ཁབ་འདྲ་མིན་ནས་བཅར་བའི་མཇལ་ཞུ་བ་ཁག་གཅིག་ལ་མཇལ་ཁ་བསྩལ་བ་མ་ཟད། རྒྱ་རིགས་མཇལ་བཅར་བ་རྣམས་ལ་སྐབས་དེར་ནང་སེམས་ཀྱི་བདེ་སྐྱིད་དང་། དཔལ་ནཱ་ལེནྡྲའི་ཆོས་བརྒྱུད་ཀྱི་སྐོར། དེ་བཞིན་དེང་གི་འཛམ་གླིང་འདིའི་ནང་དབུལ་ཕྱུག་གི་དཀའ་ངལ་སེལ་ཐབས་ལ་འབད་དགོས་པ་སོགས་ཀྱི་སྐོར་ལ་ཟུར་དུ་བཀའ་སློབ་ལམ་སྟོན་བསྩལ་འདུག སྐབས་དེར་མགོན་པོ་༸གང་ཉིད་མཆོག་གིས་རྒྱ་ནག་གི་ཆབ་སྲིད་ལ་རིམ་བཞིན་འགྱུར་བ་འགྲོ་བཞིན་ཡོད་སྟབས་ལོ་ཤས་ནང་རྒྱ་ནག་གི་རི་བོ་རྩེ་ལྔར་གནས་གཟིགས་དང་རྒྱ་རིགས་ནང་པ་ཚོར་མཇལ་འཕྲད་གནང་ཕྱིར་ཆིབས་བསྒྱུར་མཛད་ཐུབ་པའི་ཐུགས་རེ་ཡོད་སྐོར་བཀའ་བསྩལ་བ་དང་འབྲེལ། མགོན་པོ་མཆོག་གིས་དུས་རྟག་ཏུ་མང་ཚོགས་ལ་དུས་རབས་ཉི་ཤུ་རྩ་གཅིག་པའི་ནང་པ་ཞིག་བྱེད་དགོས་པ་དང་། དེ་ཡང་དམིགས་བསལ་རྒྱུ་མཚན་མེད་པར་སྐྱབས་སུ་མཆི་ཞེས་པའི་གསོལ་འདེབས་བྱས་པ་གཅིག་པུས་འགྲིག་གི་མེད་པར་བཀའ་བསྩལ་བཞིན་ཡོད་སྐོར་བཀའ་འགྲེལ་གནང་བ་དང་ཆབས་ཅིག དུས་རབས་ཉེར་གཅིག་པའི་ནང་པ་ནི་དད་པ་གཅིག་པུ་མ་ཡིན་པར་ནང་ཆོས་དང་ཚན་རིག ལྟ་གྲུབ་སོགས་ལ་སློབ་སྦྱོང་བྱས་ཏེ་རྒྱུ་མཚན་གྱི་ཐོག་ནས་དད་པ་ཐོབ་པ་ཞིག་དགོས་ཀྱི་ཡོད་པ་དང་། དེ་ནི་དབང་རྣོན་ཆོས་ཀྱི་རྗེས་འབྲང་ཞིག་ཆགས་ཀྱི་ཡོད་པ་བཀའ་བསྩལ་འདུག ད་དུང་༸གོང་མཆོག་གིས་རྒྱ་ནག་དེ་བཞིན་ལོ་རྒྱུས་ཀྱི་ཐོག་ནས་ནང་པའི་རྒྱལ་ཁབ་ཅིག་ཡིན་པ་དང་། སངས་རྒྱས་པའི་ཆོས་སམ་ཐང་ཟིན་བླ་མས་བསླབ་པའི་ནཱ་ལེནྡྲའི་ཆོས་བརྒྱུད་འདི་ནི་རིགས་པ་དང་ལྡན་ཞིང་། བྱམས་བརྩེ་དང་སྟོང་ཉིད་ཀྱི་ལྟ་བ་རྩལ་དུ་བཏོན་ནས་རིགས་པའི་ལམ་ནས་བཤད་རྒྱུ་ཡོད་པ་ཧ་ཅང་གི་རྩ་ཆེན་པོ་ཞིག་ཡིན་པ་མ་ཟད། ནང་པའི་ཆོས་བརྒྱུད་ནི་ཚན་རིག་དང་མཉམ་དུ་འགྲོ་ཐུབ་མཁན་གྱི་ཆོས་བརྒྱུད་གཅིག་པུ་དེ་ཡིན་སྟབས།  མགོན་པོ་ཀླུ་སྒྲུབ་ཀྱི་བསྟན་པ་མཇལ་བར་སྐལ་བ་བཟང་པོ་ཞིག་ཡིན་བསམ་དགོས་པ་བཀའ་བསྩལ་འདུག ༸གོང་ས་མཆོག་གིས་བཀའ་འགྱུར་དང་བསྟན་འགྱུར་པོ་ཏི་སུམ་བརྒྱ་ལ་བརྗོད་བྱའི་ཆ་ནས་སྡེ་ཚན་གསུམ་དུ་དབྱེ་རྒྱུ་ཡོད་པ་ལས་ཚན་རིག་གི་སྡེ་ཚན་དང་། ལྟ་གྲུབ་ཀྱི་སྡེ་ཚན། ཆོས་ཕྱོགས་ཀྱི་སྡེ་ཚན་བཅས་ཡོད་པར་བཀའ་གནང་སྟེ་རྒྱ་རིགས་ཀྱི་ཁྲོད་དུ་ནང་པའི་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པ་ཡོད་པ་མ་ཟད། གཙུག་ལག་སློབ་གྲ་ཁ་ཤས་ཀྱིས་དེར་དོ་སྣང་གནང་གི་ཡོད་པ་གཟིགས་ཚུལ་བྱུང་ཞེས་བཀའ་གནང་བ་དང་སྦྲགས། དཔལ་ནཱ་ལེནྡྲའི་ཆོས་བརྒྱུད་ནི་ཆོས་གཅིག་པུའི་སྐད་ཆ་ཞིག་མ་ཡིན་པར་སེམས་ཁམས་རིག་པ་དང་། ཚད་མ་རིགང་པ། ལྟ་གྲུབ་སོགས་ཀྱི་སྒོ་ནས་བཤད་ཀྱི་ཡོད་སྟབས། དེ་དག་ཤེས་ཡོན་གྱི་སྡེ་ཚན་ནང་དུ་བཞག་ནས་ཡར་རྒྱས་གཏོང་ཐུབ་པ་ཞིག་བྱུང་ན་ཧ་ཅང་ཕན་ཐོགས་ཆེན་པོ་ཡོད་པ་བཀའ་སློོབ་བཀའ་དྲིན་ཆེ་བ་བསྩལ་འདུག གཞི་རྩའི་༸གོོས་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་ཀྱི་མཛད་འཕྲིན་ཁག་ལེགས་གྲུག་ཀྱིས་ཟླ་བ་འདིའི་ཕྱི་ཚེས་  ༢༤ ཉིན་གནས་མཆོག་རྡོ་རྗེ་གདན་དུ་༸ཞབས་སོར་བདེ་བར་འཁོད་ཡོད་པ་དང་། ཕྱི་ཚེས་ ༢༥ ཉིན་གནས་མཆོག་རྡོ་རྗེ་གདན་གྱི་དྲི་གཙང་ཁང་དུ་གནས་གཟིགས་མཛད་ཡོད་པ་རེད། མཛད་འཆར་ལྟར་ན། ༸གོང་ས་མཆོག་གིས་ཕྱི་ལོ་ ༢༠༢༠ ལོའི་ཟླ་ ༡ ཚེས་ ༢ ཉིན་དད་ལྡན་ཆོས་ཞུ་བར་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་གསུང་ཆོས་དང་ཕྱི་ཚེས་ ༣ ཉིན་སྤྱན་རས་གཟིགས་ཀྱི་བཀའ་དབང་། དེ་བཞིན་ཕྱི་ཚེས་ ༤ ནས་ ༦ བར་དུ་འདི་ལོའི་མགོ་སྟོད་དུ་གནས་མཆོག་རྡོ་རྗེ་གདན་དུ་བསྩལ་བའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་མཛད་གནང་རྒྱུ་ཡིན་པ་རེད།

དཔལ་ལྡན་འབྲས་སྤུངས་སྒོ་མང་གྲྭ་ཚང་དུ་སློབ་གཉེར་གནང་མྱོང་ཡོད་པའི་ Tuva སྤྱི་མཐུན་རྒྱལ་ཁབ་ཀྱི་ནང་པའི་བླ་མ་མཚན་གནས་མཐོ་ཤོས་ཡིན་པ་ Kamby བླ་མ་ཁྲི་ཐོག་བརྒྱད་པ་འཇམ་དཔལ་བློ་གྲོས་མཆོག་ཟླ་བ་འདིའི་ཕྱི་ཚེས་ ༡༩ ཉིན་ཐུ་ཝའི་རྒྱལ་སར་རྟེན་གཞི་བྱས་པའི་ the House of Folk Art ཞེས་པའི་རིག་གཞུང་ལྷན་ཁང་དུ་ཐུ་ཝའི་དབུ་བླར་ཁྲི་འདོན་གྱི་མཛད་སྒོ་ཚོགས་གནང་འདུག རྩ་བའི་ Kamby བླ་མ་ཁྲི་ཐོག་བརྒྱད་པ་ Jampel Lodoy མཆོག་ནི་ Ustuu-Khuree དགོན་པའི་མཁན་རིན་པོ་ཡིན་ཞིང་། འདི་ལོའི་ཕྱི་ཟླ་ ༡༡ ཚེས་ ༢༩ ཉིན་བརྩེ་ཆེན་གླིང་དགོན་པར་ཨུ་རུ་སུའི་སྤྱི་མཐུན་རྒྱལ་ཁབ་ཀྱི་བླ་མའི་མཚན་གནས་ཆེས་མཐོ་ཤོས་སུ་འོས་འདེམས་གནང་ཡོད་པ་དང་། དེ་ནི་ཁོང་ཨུ་རུ་སུའི་བླ་མའི་མཚན་གནས་ཆེས་མཐོ་ཤོས་ཀྱི་ལོ་ལྔའི་རིང་འོས་འདེམས་གནང་བ་ཐེངས་གཉིས་པ་དེ་ཆགས་ཀྱི་ཡོད་པ་རེད། Kamby བླ་མ་ཁྲི་ཐོག་བརྒྱད་པ་འཇམ་དཔལ་བློ་གྲོས་མཆོག་གིས་ལོ་ལྔའི་མཚན་གནས་བཞེས་པའི་མཛད་སྒོར་ཐུ་ཝ་སྤྱི་མཐུན་རྒྱལ་ཁབ་ཀྱི་ཆབ་སྲིད་ཀྱི་གནད་ཡོད་དཔོན་རིགས་དང་ཨུ་རུ་སུའི་ཡི་ཤུའི་ཆོས་དཔོན། ཁྱིམ་མཚེས་རྒྱལ་ཁབ་ར་ཤི་ཡའི་དགེ་འདུན་པ་ཁག་གཅིག དེ་བཞིན་ཐུ་ཝའི་ཁོངས་ནས་ནང་པའི་རྗེས་འཇུག་པ་ཆེད་འཛོམས་གནང་ཐོག་མཎྡྲལ་འདེགས་འབུལ་དང་ཞལ་འདོན་གསུང་འདོན་གནང་སྟེ་ཁྲི་སྟོན་གནང་འདུག Tuva གཞུང་གི་ཚོགས་གཙོ་སྐུ་ཞབས་ Sholban Kara-ool  ལགས་ཀྱིས་ཁྲི་སྟོན་མཛད་སྒོར་ཆེས་ཕེབས་ཀྱིས་ Kamby བླ་མ་ཁྲི་ཐོག་བརྒྱད་པ་འཇམ་དཔལ་བློ་གྲོས་མཆོག་གིས་དབུ་བླའི་མཚན་གནས་མཐོ་ཤོས་དེ་བཞེས་རིང་ལ་ཐུ་ཝའི་མང་ཚོགས་ཀྱི་སེམས་རྒྱུད་ལ་བྱམས་བརྩེ་དང་སྙིང་རྗེ། ཕན་ཚུན་གུ་ཡངས་ཀྱི་བསམ་ཤེས་བཅས་ཀྱི་གོ་རྟོགས་སླར་ལྷག་སྤེལ་ཐུབ་པའི་ཐུགས་རེ་ཡོད་པ་གསུངས་པ་དང་སྦྲགས། འཇམ་དཔལ་བློ་གྲོས་མཆོག་ནི་མཁྱེན་མཛངས་ལྡན་པའི་བླ་མ་ཞིག་ཡིན་པ་དང་། ལྷག་དོན་ཐུ་ཝ་ནང་དུ་ཤེས་ཡོན་དང་ནང་པའི་ཆོས་དར་ཁྱབ་གནང་གི་ཡོད་པ་མ་ཟད་འདི་བཞིན་ཁོང་ལ་མང་ཚོགས་ཀྱི་ངོས་ནས་རེ་འདུན་ཆེན་པོས་དེ་ལྟར་བསྐོ་གཞག་དོན་གང་ཡིན་སོགས་གསལ་པོ་མཁྱེན་གྱི་ཡོད་སྐོར་གསུངས་འདུག དེ་བཞིན་སྐུ་ཞབས་ Sholban ལགས་ཀྱིས་ Kamby བླ་མ་ཁྲི་ཐོག་བརྒྱད་པ་འཇམ་དཔལ་བློ་གྲོས་མཆོག་གིས་ལོ་ལྔའི་མཚན་གནས་བཞེས་རིང་ལ་མང་ཚོགས་ཀྱི་རེ་འདུན་ཁག་ལེགས་གྲུབ་གནང་རྒྱུར་ཐུགས་རེ་ཡོད་པ་དང་། བླ་མ་ཁོང་གིས་ཆོས་ཕྱོགས་དང་འབྲེལ་བའི་ཕྱག་ལས་ཁག་སེམས་ཤུགས་གསར་པ་དང་དགོས་འདུན་གསར་པ་བཅས་ཀྱི་དགོངས་བཞེད་ཐོག་ནས་ཕྱག་ལས་གནང་བ་ཁག་ལ་མང་ཚོགས་ནས་ཀྱང་ཕྱར་བ་གྲུ་འདེགས་ཞུ་དགོས་གལ་ཡིན་པ་གསུངས་འདུག་པ་དང་ཆབས་ཅིག་ཏུ་ཁོང་གིས་དེ་སྔ་༸གོང་ས་༸སྐྱབས་མགོན་ཆེནཔོ་མཆོག་གིས་དབུ་འབྱེད་རབ་གནས་མཛད་པའི་ནང་པའི་དགོན་པའི་ཕྱག་ལས་རྒྱུན་སྐྱོང་གནང་རྒྱུ་དེ་དག་གི་ཐད་ལ་མང་ཚོགས་ཚོས་ཆིག་སྒྲིག་གིས་ཞབས་འདེགས་ཞུ་གལ་ཡིན་པ་སོགས་གསུངས་ཡོད་པ་རེད། གཞི་རྩའི་ Kamby བླ་མ་ཁྲི་ཐོག་བརྒྱད་པ་འཇམ་དཔལ་བློ་གྲོས་མཆོག་ནི་ཕྱི་ལོ་ ༡༩༧༥ ཟླ་ ༨ ཚེས་ ༢༡ ཉིན་ Hondergey གྲོང་གསེབ་ཀྱི་ Dzun-Khemchiks མངའ་སྡེར་སོ་ནམ་པའི་ཁྱིམ་དུ་འཁྲུངས་ཡོད་པ་དང་། ཕྱི་ལོ་ ༡༩༩༢ ལོར་ཁོང་གིས་ཐུ་ཝའི་ནང་དུ་རྟེན་གཞི་བྱས་པའི་དགའ་ལྡན་ཕུན་ཚོགས་གླིང་དུ་ནང་པའི་གཞུང་ལ་སློབ་གཉེར་དབུ་འཛུགས་གནང་ཞིང་། རྗེས་སུ་ཁོང་རྒྱ་གར་ལྷོ་ཕྱོགས་བོད་མིའི་གཞིས་སྒར་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དཔལ་ལྡན་འབྲས་སྤུངས་སྒོ་མང་གྲྭ་ཚང་དུ་ལོ་དགུའི་རིང་ལ་ནང་པའི་གཞུང་ཆེན་དག་ལ་བསླབ་པ་སློབ་གཉེར་མཐིལ་ཕྱིན་གནང་ཡོད་པ་རེད། བླ་མ་འཇམ་དཔལ་བློ་གྲོས་མཆོག་རྒྱ་གར་ནང་དུ་ནང་པའི་གཞུང་ཆེན་དག་ལ་སློབ་གཉེར་གནང་གྲུབ་རྗེས་ཕྱིར་རང་ཡུལ་དུ་ཕེབས་ནས་ཕྱི་ལོ་ ༢༠༠༥ ནས་ ༢༠༡༠ བར་ Kamby བླ་མ་ཁྲི་ཐོག་གི་མཚན་གནས་བཞེས་ཏེ་ Kalmykia དང་དེ་བཞིན་Buryatia བཅས་ཀྱི་ནང་དུ་ནང་པའི་དགོན་པ་གསར་བཞེངས་དང་ཡུལ་མི་ཚོ་དང་མཉམ་དུ་ཟུང་འབྲེལ་གྱི་ཕྱག་ལས་རྒྱ་ཆེ་གནང་མྱོང་ཡོད་པ་རེད། ཨུ་རུ་སུའི་ཁྱབ་ཡོངས་ Kalmykia དང་། Buryatia དེ་བཞིན་ Tuva བཅས་ཀྱི་ནང་དུ་རིམ་བཞིན་ཆབ་སྲིད་ཀྱི་འགྱུར་འགྲོས་རང་དབང་ལྡན་པ་ཞིག་གི་ངོ་བོར་གྱུར་བར་བརྟེན་དེ་དག་གི་ནང་དུ་ནང་པ་སངས་རྒྱས་པའི་བསྟན་པར་བསླབ་པ་སློབ་གཉེར་གྱི་གོ་སྐབས་བཟང་པོ་བྱུང་དོན་བཞིན་བོད་བརྒྱུད་ནང་བསྟན་ལ་སློབ་གཉེར་གནང་བ་མ་ཟད། ལྷག་དོན་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེར་འབྲས་དགའ་གསུམ་གྱིས་གཙོས་པའི་དགོན་སྡེ་གྲྭ་ཚང་ཆེ་ཁག་ཏུ་ནང་པའི་གཞུང་ཆེན་དག་ལ་སློབ་གཉེར་གནང་དང་གནང་མུས་ཡིན་པ་ལྟར། ཉེ་ཆར་ཟླ་བ་འདིའི་ནང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་བོད་མིའི་གཞིས་སྒར་མོན་གྷོ་འདོད་རྒུ་གླིང་དུ་ཆིབས་བསྒྱུར་དང་སྦྲགས། དཔལ་ལྡན་འབྲས་སྤུངས་སྒོ་མང་བཀྲིས་གྲྭ་ཚང་གི་ཆོས་ར་གསར་པ་དབུ་འབྱེ་སྐབས་སུ་བོད་སོག་དབར་གྱི་ཆོས་ཕྱོགས་ཀྱི་ཐོག་ནས་ཐུན་མིན་འབྲེལ་བའི་སྐོར་ལ་དམིགས་བསལ་བཀའ་སློབ་བསྩལ་བ་མ་ཟད་འདི་བཞིན་སོག་རིག་ཚོས་ནང་པའི་གཞུང་ཆེན་རྣམས་ལ་བསླབ་པ་སློབ་གཉེར་གནང་དགོས་གལ་ཡིན་པའི་ལམ་སྟོན་བཀྲིན་ཆེ་བ་བསྩལ་ཡོད་པ་རེད།

བྱང་ཨ་རིའི་སྐུ་ཚབ་དོན་བཅོད་ཟུར་པ་ཚོགས་ཟུར་སྤེན་པ་ཚེ་རིག་ལགས་ཀྱི་སྲིད་སྐྱོང་བློ་བཟང་སེང་དགེ་མཆོག་བརྒྱུད་འཛིན་སྐྱོང་བཀའ་ཤག་གི་ཁོང་ལ་མ་ཉེས་ཁག་གཡོགས་བྱས་པའི་ཁ་མཆུ་ ༢༠ པའི་ཐོག་ཆེས་མཐོའི་ཁྲིམས་ཞིབ་ཁང་གི་དཔྱད་ཁྲ་བཏང་བ་བཞིན། བཀའ་ཤག་གིས་ཆེས་མཐོའི་ཁྲིམས་ཞིབ་ཁང་གི་དཔྱད་ཁྲའི་དགོངས་དོན་བཞིན་བཟོད་གསོལ་ཞུ་ཡི་ཡོད་གསུངས་འདུག དེ་ཡང་ཆེས་མཐོའི་ཁྲིམས་ཞིབ་ཁང་ནས་ཟླ་བ་སྔོན་མའི་ཕྱི་ཚེས་ ༢༢ ཉིན་ཁ་མཆུ་ཨང་ ༢༠ པའི་རྩོད་ལེན་པ་བཀའ་ཤག་གི་མཚན་ཐོག་ལ་བཀོད་ཁྱབ་ཞིག་བཏང་ཡོད་པའི་ནང་དུ། དེ་རིང་ཕྱི་ཟླ་ ༡༢ པའི་ཚེས་ ༢༧ བར་དཔྱད་ཁྲ་ཉམས་ལེན་གནང་རྒྱུའི་གོ་སྐབས་མཐའ་མ་ཞིག་གནང་སྟེ། དེ་ལྟར་མ་བྱུང་ཚེ་སྲིད་སྐྱོང་གཙོ་བྱས་པའི་བཀའ་ཤག་གི་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་རྒྱུ་ཡིན་སྐོར་བཀོད་པ་བཞིན། དེ་རིང་ཉིན་རྒྱབ་ཕྱག་ཚོད་ ༤ པའི་ཐོག་བཀག་ཤག་གི་ངོས་ནས་དེ་གའི་གཞུང་འབྲེལ་དྲ་གནས་ཐོག་གསལ་བསྒྲགས་ཤིག་འདོན་སྤེལ་གནང་བའི་ནང་དུ། ཆེས་མཐོའི་ཁྲིམས་ཞིབ་ཁང་གིས་ཕྱི་ལོ་ ༢༠༡༩ ཟླ་ ༡༠ ཚེས་ ༡༤ ཉིན་སྤེལ་བའི་བཅད་ཁྲའི་ནང་། བཀའ་ཤག་ནས་བྱང་ཨ་རི་དོན་གཅོད་སྤེན་པ་ཚེ་རིང་ལགས་འཕོ་འགྱུར་དང་། དེའི་རྗེས་འབྲེལ་གསལ་བཤད་དོན་ཚན་ ༡༠ གསལ་བསྒྲགས་བྱས་པ་དེ། གནས་ཚུལ་ཡོང་ཁུངས་ངེས་གཏན་མེད་པ་དང་། ཁ་ཡིན་ལ་གོ་ནོར་ཐེབས་པའི་དབང་གིས། སྤེན་པ་ཚེ་རིང་གི་ལྷག་བསམ་དང་། འཇོན་ཐང་། བཟང་སྤྱོད་བཅས་ལ་མ་ཉེས་ག་གཡོགས་ཤོར་བ་དང་། སྤྱི་ཚོགས་ནང་དངོས་བདེན་མ་ཡིན་པའི་གནས་ཚུལ་ཁྱབ་འགྲེམས་སོང་བའི་སྐོར་ཆེས་མཐོ་ཁྲིམས་ཞིབ་ཁང་གིས་ཐག་གཅོད་བཅད་ཁྲ་ཁྱབ་བསྒྲགས་གནང་འདུག་པར་བརྟེན། བཀའ་ཤག་གིས་སྤེན་པ་ཚེ་རིང་ལ་བཟོད་གསོལ་ཞུ་རྒྱུ་ཡིན།”ཞེས་བརྗོད་བྱ་འདི་རང་བཀོད་དགོས་པའི་བཅད་ཁྲའི་དགོངས་དོན་བཞིན་བཟོད་གསོལ་ཞུ་ཡི་ཡོད་ཅེས་འཁོད་འདུག གཞི་རྩའི་ཁ་མཆུ་ཨང་ ༢༠ ཞེས་པ་དེ་ནི་གཙོ་བོ་། དབུས་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གིས་ཕྱི་ལོ་ ༢༠༡༧ ཟླ་ ༡༡ ཚེས་ ༧ ཉིན་སྐབས་དེའི་བྱང་ཨ་རིའི་སྐུ་ཚབ་དོན་གཅོད་སྐུ་ཞབས་སྤེན་པ་ཚེ་རིང་ལགས་ལས་གནས་ནས་འཕོ་འགྱུར་དང་འབྲེལ་དོན་ཚན་བཅུ་ཅན་གྱི་གསལ་བཤད་ཅིག་འདོན་སྤེལ་གནང་སྟེ་ཁོང་གིས་བཀའ་ཤག་གི་ཐུགས་རེ་བཞིན་ལས་དོན་གནང་མ་ཐུབ་པ་དང་། ཡིད་ཆེས་བློས་འགེལ་མི་ཐུབ་པ། དེ་བཞིན་འཛིན་སྐྱོང་ལ་བྱ་སྤུ་གནོན་གྱི་གོ་རིམ་ལ་ལྟོས་མེད་གནང་ཡོད་པ་བཅས་ཀྱི་རྒྱུ་མཚན་ལ་བརྟེན་ནས་ཐག་གཅོད་དེ་ལྟར་གནང་དགོས་བྱུང་ཡོད་པ་སོགས་གསལ་བཤད་གནང་རྗེས། སྤེན་པ་ཚེ་རིགས་ལགས་ཀྱིས་ ཁོང་གི་ལས་དོན་ལ་འཐུས་ཤོར་ཕྱིན་པ་སོགས་ཀྱི་གནད་དོན་ཁག་ལ་ངོས་ལེན་མེད་པ་དང་། ལྷག་དོན་སྲིད་སྐྱོང་མཆོག་གིས་གྲོས་ཚོགས་དང་མང་ཚོགས་ཁྲོད་ཐག་གཅོད་དེ་ཁྲིམས་དང་མཐུན་པ་ཞིག་བྱུང་ཡོད་མེད་ཐག་གཅོད་གནང་བར་ཆེས་མཐོའི་ཁྲིམས་ཞིབ་ཁང་ལ་ཕེབས་རྒྱུ་མ་གཏོགས་ཐབས་ལམ་གཞན་མེད་པར་འགྲེལ་བརྗོད་གནང་ཡོད་པ་བཞིན་ཁོང་གིས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུག་ཞུས་ཡོད་པ་ཞིག་ཡིན་པ་རེད། དེ་རྗེས་ཆེས་མཐོའི་ཁྲིམས་ཞིབ་ཁང་གིས་འདི་ལོའི་ཕྱི་ཟླ་ ༦ ཚེས་ ༥ ནས་དབུ་འཛུགས་ཀྱིས་ཕྱི་ཟླ་ ༨ ཚེས་ ༢༡ བར་ཁ་མཆུ་དེ་དང་འབྲེལ་གནད་དོན་གསལ་བཟོའི་ཉན་ཞིབ་ཅིག་དང་། གནད་དོན་གཏན་འབེབས་ཀྱི་ཉན་ཞིབ་གཉིས། དེ་བཞིན་ཞིབ་གཅོད་ཉན་ཞིབ་དགུ་བཅས་ཁྱོན་ཉིན་ ༡༢ རིང་ཉན་ཞིབ་ཚོགས་པའི་རྗེས་ཕྱི་ཟླ་ ༡༠ ཚེས་ ༡༤ ཉིན་ཤོག་གྲངས་ ༡༠༢༨ ཅན་གྱི་བཅད་ཁྲ་འདོན་སྤེལ་གནང་སྟེ། ཁ་མཆུ་འདིའི་བརྒྱུད་རིམ་ཁྲོད་གྱོད་ཡ་ཞུ་སྦྱོར་བས་ཁུངས་སྐྱེལ་དགོས་པ་ཁག་ཐུབ་པ་དང་། རྩོད་ལེན་པ་སྲིད་སྐྱོང་བློ་བཟང་སེང་གེ་མཆོག་གིས་སྣེ་ཁྲིད་པའི་བཀའ་ཤག་སྐབས་ ༡༥ པས་ཁུངས་སྐྱེལ་དགོས་པ་ཁག་མ་ཐུབ་པར་བརྟེན། བཀའ་ཤག་ནས་སྐུ་ཞབས་སྤེན་པ་ཚེ་རིང་ལགས་ལས་གནས་ནས་འཕོ་འགྱུར་དང་དེའི་རྗེས་འབྲེལ་གསལ་བཤད་དོན་ཚན་བཅུ་གསལ་བསྒྲགས་བྱས་པ་དེ། གནས་ཚུལ་ཡོང་ཁུངས་ངེས་གཏན་མེད་པ་དང་། ཁ་ཡིན་ལ་གོ་ནོར་ཐེབས་པའི་དབང་གིས་སྤེན་པ་ཚེ་རིང་གི་ལྷག་བསམ་དང་འཇོན་ཐང་། བཟང་སྤྱོད་བཅས་ལ་མ་ཉེས་ཁ་གཡོགས་ཤོར་བ་སོགས་ཐག་གཅོད་གནང་སྟེ་བཀའ་ཤག་ནས་སྤེན་པ་ཚེ་རིང་ལགས་ལ་བཟོད་གསོལ་ཞུ་རྒྱུ་ཡིན་ཞེས་བརྗོད་བྱ་འདི་རང་བཀོད་པའི་དགོངས་སེལ་ཞུ་ཡིག་ཞིག་དབྱིན་བོད་སྐད་ཡིག་གཉིས་ཀའི་ནང་བོད་མིའི་སྒྲིག་འཛུགས་ཀྱི་གཞུང་འབྲེལ་གསར་འགྱུར་བརྒྱུད་ལམ་ཐོག་འདོན་འགྲེམས་གསལ་བསྒྲགས་བྱས་ཏེ་དེ་དག་གི་ཡིག་ཆ་རྣམས་ཞུ་སྦྱོར་བར་སྤྲོད་ཆེད་ཆེས་མཐོའི་ཁྲིམས་ཞིབ་ཁང་ལ་འབུལ་དགོས་པ་དང་། བཀའ་ཤག་གིས་ཞུ་སྦྱོར་བའི་ཁྲིམས་རྩོད་པའི་གླ་ཡོན་སྤྲོད་དམིགས་ཧིན་སྒོར་ ༩༨༠༠༠ ཕྱི་ལོ་ ༢༠༡༩ ཟླ་ ༡༡ ཚེས་ ༡༥ ནང་ཚུན་ཆེས་མཐོའི་ཁྲིམས་ཞིབ་ཁང་ལ་འབུལ་དགོས་པའི་བཅད་ཁྲ་བཏང་བ་དེ་ལྟར་ཡང་། བཀའ་ཤག་གིས་དུས་བཀག་ནང་ཚུད་དཔྱད་ཁྲའི་དགོངས་དོན་ཉམས་ལེན་མ་ཞུས་སྟབས། ཆེས་མཐོའི་ཁྲིམས་ཞིབ་ཁང་གིས་སླར་ཡང་ཟླ་བ་སྔོན་མའི་ཕྱི་ཚེས་ ༢༢ ཉིན་བཀདོ་ཁྱབ་ཞིག་བཏང་སྟེ། རྩོད་ལེན་པ་བཀའ་ཤག་གི་ངོས་ནས་དེ་རིང་ཕྱི་ཟླ་ ༡༢ ཚེས་ ༢༧ ཕྱི་འདྲོ་ཕྱག་ཚོད་ ༤ པའི་སྔོན་ཚུད་དུ་དཔྱད་ཁྲ་ཉམས་ལེན་མ་བྱས་ཚེ། བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༥༡ གཞིར་བཟུང་། སྲིད་སྐྱོང་གཙོ་བྱས་པའི་བཀའ་ཤག་གི་བཀའ་བློན་རྣམ་པ་ཚང་མས་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་རྒྱུ་ཡིན་པའི་བཀོད་ཁྱབ་བཏང་ཡོད་པ་རེད། འདི་ག་རླུང་འཕྲིན་ཁང་ནས་དེ་རིང་བཀའ་ཤག་གི་བཟོད་གསོལ་གསལ་བསྒྲགས་འདི་དང་འབྲེལ། བཀའ་ཤག་ལ་འབྲེལ་བ་ཞུ་ཐབས་བྱས་ཀྱང་བཀའ་དྲུང་དང་སྲིད་ཚབ་བཅས་ཀྱིས་བཅར་འདྲིར་དྭངས་ལེན་གནང་མེད་ལ། ཞལ་པར་བརྒྱུད་སྐུ་ཞབས་སྤེན་པ་ཚེ་རིང་ལགས་སུའང་འབྲེལ་བ་ཞུ་ཐབས་བྱས་ཀྱང་འབྲེལ་བ་མཐུད་ཐུབ་མ་སོང་། གང་ལྟར་ཁ་མཆུ་ཨང་ ༢༠ ཞེས་པ་དེ་ནི་བཙན་བྱོལ་བོད་མིའི་སྤྱི་ཚོགས་ཁྲོད་ཉེ་བའི་དུས་ཡུན་ནང་ཧ་ཅང་རྩོད་གླེང་ཆེ་བའི་གནད་དོན་ཞིག་ཏུ་གྱུར་ཡོད་པ་དང་། བོད་མི་ཁག་ཅིག་གིས་གནད་དོན་དེར་དགྲ་དགའ་གཉེན་སྡུག་གི་ངོ་བོར་གཟིགས་མཁན་ཡོད་ཀྱང། ཁག་གཅིག་གིས་དེ་ནི་མང་གཙོའི་རྒྱལ་ཁ་ཞིག་ལ་ངོས་འཛིན་གནང་མཁན་ཡོད་པ་རེད། རྩོད་ལེན་པ་བཀའ་ཤག་ངོས་ནས་དེ་སྔོན་ཆེས་མཐོའི་ཁྲིམས་ཞིབ་ཁང་གིས་ཁ་མཆུ་དེའི་ཐོག་མཐའ་མའི་དཔྱད་ཁྲ་བཏང་སྐབས་བཀའ་ཤག་གི་ངོས་ནས་དཔྱད་ཁྲ་དེ་འདོད་བློ་ཁེངས་བ་ཞིག་བྱུང་མེད་པའི་འགྲེལ་བརྗོད་གནང་བ་དེ་ལྟར་ཡང་། ཞུ་སྦྱོར་བ་སྤེན་པ་ཚེ་རིང་ལགས་དང་ཁོང་གི་ཁྲིམས་རྩོད་པ་རྣམ་རྒྱལ་ཚེ་སྐྱིད་ལགས་ཀྱིས་དེ་ནི་མང་གཙོ་དང་དྲང་བདེན་ལ་རྒྱལ་ཁ་ཐོབ་པ་ཞིག་ཆགས་ཡོད་སྐོར་གསུངས་ཡོད་པ་རེད།

དེ་རིང་སྔ་དྲོ།   རྒྱ་གར་བོད་དོན་རྒྱབ་སྐྱོར་ཚོགསཔའི་སྡེ་ཚན་ནང་མའི་གོ་སྒྲིག་གི་འོག  ནུབ་བྷེང་ཀལ་མངའ་སྡེའི་Kolkata གྲོང་ཁྱེར་ནང་རྒྱ་གར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས། དེ་བཞིན་ནུབ་བྷེང་ཀལ་མངའ་སྡེའི་སྲིད་སྐྱོང་Shri. Jagdeep Shanka མཆོག་དང་མངའ་སྡེ་དེ་ཡི་གྲོས་ཚོགས་ཀྱི་འཐུས་མི།  གཞན་ཡང་རྒྱ་གར་གྱི་ཆབ་སྲིད་ཀྱི་ལྟ་གྲུབ་འདྲ་མིན་ཁག་གི་ཚོགས་ཁག་བཅུ་གཉིས་ཀྱི་འཐུས་ཚབ་མི་སྣ་སོགས་ལྷན་འཛོམས་ཀྱི་ཐོག་ནས།  རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་ཆེན་ཚོགས་ཐེངས་དང་པོ་ཚོགས་ནས་མི་ལོ་དྲུག་ཅུ་འཁོར་བར་དྲན་གསོ་དང་སྦྲགས། བོད་དོན་རྒྱབ་སྐྱོར་སྔར་ལགས་ཇེ་ཆེར་གཏོང་རྒྱུའི་ཚོགས་འདུ་ཚོགས་འདུག  དེ་རིང་གི་ཚོགས་འདུ་དང་འབྲེལ་ནས། འདི་གའི་གསར་འགོད་པས་འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་འཇིགས་མེད་ཚུལ་ཁྲིམས་ལགས་སུ་བཀའ་འདྲི་ཞུས་པར་ཁོང་གིས།  གཙོ་བོ་རྒྱ་གར་གྱི་འཐབ་རྩོད་པ་གྲགས་ཅན་སྐུ་ཞབས་ Prakash Narayan མཆོག་གི་དབུ་ཁྲིད་འོག་ནས་བོད་མི་རྣམས་ཐོག་མར་༡༩༥༩ ལོར་རྒྱ་གར་དུ་འབྱོར་མཚམས་སུ་ཀོལ་ཀ་ཏ་གྲོང་ཁྱེར་ནང་རྒྱ་གར་བོད་དོན་རྒྱབ་སྐྱོར་གྱི་ཚོགས་འདུ་སྐོང་བའི་ལོ་རྒྱུས་ཀྱི་དུས་ཚིགས་དེར་དྲན་གསོ་ཞུས་པའི་ཐོག་ནས།  སྔོན་མའི་དམིགས་ཡུལ་ལྟར་རྒྱ་གར་གྱིས་བོད་དོན་ལ་རྒྱབ་སྐྱོར་བྱེད་ཕྱོགས་སྐོར་གྱི་ཐད་ནས་གོ་བསྡུར་གནང་ཡོད་པ་ངོ་སྤྲོད་གནང་སོང་། གཞན་ཡང་ཁོང་ལ་དེ་རིང་ཚོགས་ཆེན་དེ་བརྒྱུད་ནས་དམིགས་བསལ་གྱི་བོད་དང་འབྲེལ་བའི་གྲོས་ཆོད་ག་རེ་བཞག་ཡོད་མེད་ཀྱི་ཐད་ནས་བཀའ་དྲི་གནང་བར་ཁོང་གིས།   ཚོགས་ཆེན་གྱི་གྲོས་ཆོད་ནང་དུ་ཕྱོགས་གཅིག་ནས་སྤྱི་ནོར་༸གོང་ས་སྐྱབས་མགོན་མཆོག་ལ་རྒྱ་གར་གྱི་མི་སེར་གཟེངས་རྟགས་མཐོ་ཤོས། Bharat Ratna ཞེས་པ་དེ་འབུལ་བཞེས་གནང་རྒྱུར་ཤུགས་སྣོན་རྒྱག་རྒྱུ་དང་། དེ་བཞིན།  རྒྱ་གར་གྱི་སྤྱི་ཚོགས་ཀྱི་ཁྲོད་དུ་བོད་དོན་གོ་རྟོགས་ཀྱི་ལས་དོན་ཤུགས་ཆེར་སྤེལ་བ་བརྒྱུད་ནས་སྔར་ལས་ལྷག་པའི་བོད་དོན་རྒྱབ་སྐྱོར་ཡོང་ཐབས་སོགས་ཀྱི་གྲོས་ཆོད་བཞག་ཡོད་པར་གསུངས་སོང་། ཁོང་གིས་ད་དུང་། རྩ་བའི་ནུབ་བྷེང་ཀལ་མངའ་སྡེ་ནི་རྒྱ་གར་གྱི་ནང་དུ་དམར་ཤོག་གི་ཆབ་སྲིད་ཚོགས་པ་ཆེ་ཁག་གི་ས་ཁུལ་ཞིག་ལ་འཁེལ་གྱི་ཡོད་སྟབས།  བོད་དོན་དང་འབྲེལ་བའི་ལས་འགུལ་ཤུགས་ཆེར་སྤེལ་རྒྱུར་འགལ་རྐྱེན་སྣ་མང་ཞིག་ཡོད་ནའང་།  དེ་རིང་འདིར་རྒྱ་གར་གྱི་སྤྱི་ཚོགས་ཀྱི་འགོ་ཁྲིད་མང་པོ་ཆེད་དུ་འཛོམས་ནས་ཧིན་བོད་གཉིས་ཀྱི་མཛའ་འབྲེལ་ལ་གཞིགས་པའི་བོད་དོན་རྒྱབ་སྐྱོར་བྱེད་ཕྱོགས་ཀྱི་ཚོགས་འདུ་ཆེན་པོ་ཞིག་ཚོགས་ཡོད་པ་དེས་རྒྱ་ནག་དམར་གཞུང་ལ་བརྡ་ལན་གསལ་བོ་ཞིག་སྤྲད་ཡོད་སྐོར་ཡང་གསུངས་སོང་། རྩ་བའི་རྒྱ་གར་གྱི་འཐབ་རྩོད་པ་གྲགས་ཅན་Jai Prakash Narayan མཆོག་གི་དབུ་ཁྲིད་འོག་ཕྱི་ལོ་ ༡༩༥༩ ཟླ་ ༥ ཚེས་ ༣༠ ནས་ ༣༡ བར་རྒྱ་གར་གྱི་གྲོང་ཁྱེར་ཀོལ་ཀ་ཏར་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་ཆེན་ All India Convention on Tibet ཞེས་པ་དེ་ཆེས་ཐོག་མར་ཚོགས་ནས་འདི་ལོར་ལོ་ངོ་ ༦༠ འཁོར་བའི་དུས་དྲན་སྲུང་བརྩི་དང་སྟབས་བསྟུན་གྱིས་ཕྱོགས་ཡོངས་ནས་བོད་དོན་རྒྱབ་སྐྱོར་གོང་སྤེལ་གྱི་ཆེད་དུ་ཐེངས་འདིའི་ཚོགས་འདུ་དེ་ཚོགས་པ་ཞིག་རེད་འདུག པར་དབང་། འཕགས་བོད་འབྲེལ་མཐུད་ལས་ཁུངས།

དེ་རིང་སྔ་དྲོ་ཕྱག་ཚོད་ ༨ པ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་བྷི་ཧར་མངའ་སྡེ་གྷ་ཡ་རྫོང་དུ་རྟེན་གཞི་བྱས་པའི་བདག་ཅག་གི་སྟོན་པ་མངོན་པར་རྫོགས་ཏེ་སངས་རྒྱས་པའི་གནས་མཆོག་ཁྱད་པར་ཅན་རྡོ་རྗེ་གདན་གྱི་བྱང་ཆུབ་མཆོད་རྟེན་དུ་གནས་མཇལ་མཛད་པ་དང་སྦྲགས།  ༸གོང་ས་མཆོག་གིས་དྲང་བདེན་ནི་མེ་མདའི་དབང་ཚད་ལས་སྟོབས་ཤུགས་ཆེ་བ་ཡོད་སྐོར་བཀའ་བསྩལ་འདུག གཞི་རྩའི་དུས་རྒྱུན་འཆར་ཅན་༸གོང་ས་མཆོག་གནས་མཆོག་རྡོ་རྗེ་གདན་དུ་ཞབས་སོར་འཁོད་པ་དང་སྦྲགས།  བྱང་ཆུབ་མཆོད་རྟེན་དུ་གནས་གཟིགས་མཛད་གནང་བཞིན་ཡོད་པ་ལྟར།  དེ་རིང་ཡང་༸གང་ཉིད་མཆོག་གིས་བྱང་ཆུབ་མཆོད་རྟེན་གྱི་སྟོན་པ་ཐུབ་པའི་དབང་པོའི་སྐུ་བརྙན་གྱི་དྲུང་དུ་མཆོད་མཇལ་དང་འཛམ་གླིང་ཞི་བདེ་དང་བོད་མི་ཡོངས་ཀྱི་སྤྱི་མཐུན་བསོད་ནམས་གསོག་སླད་ཐུགས་སྨོན་སྐྱབས་འཇུག་མཛད་པ་མ་ཟད། སྐབས་དེར་ཕྱི་ནང་གི་གསར་འགོད་པ་ཁག་ཅིག་གིས་༸མགོན་པོ་མཆོག་ལ་འཛམ་གླིང་ཞི་བདེའི་དགོངས་བཞེད་དང་འབྲེལ་བོད་ཀྱི་ཆོས་དང་རིག་གཞུང་རྒྱུན་འཛིན་སོགས་ཀྱི་སྐོར་བཀའ་འདྲི་ཞུས་སྐབས།   ༸གང་ཉིད་མཆོག་གིས་སྐབས་དེར།   རྒྱ་གར་གྱི་གནའ་བོའི་ལེགས་བཤད་བསྐྱར་གསོ་དང་སྦྲགས་༸སྐུའི་ཐུགས་བསྐྱེད་དམ་བཅའ་ཆེན་པོ་བཞིའི་སྐོར་ངོ་སྤྲོད་མཛད་ཡོད་པ་རེད་འདུག ད་དུང་གསར་འགོད་པ་རྣམས་ཀྱིས་༸གང་ཉིད་མཆོག་ལ་རྒྱ་གཞུང་ལ་བརྡ་ལན་ཇི་ཡོད་སྐོར་བཀའ་འདྲི་ཞུས་སྐབས།  ༸མགོན་པོ་མཆོག་གིས་རྒྱ་ནག་ནི་ནང་པའི་རྒྱལ་ཁབ་ཅིག་ཡིན་པ་མ་ཟད།   རྒྱ་ནག་གི་རྒྱལ་ཁབ་ཀྱི་ནང་དུ་ནང་པའི་གྲངས་འབོར་ཡང་ད་ཆ་འཕེལ་བཞིན་ཡོད་སྐོར་བཀའ་བསྩལ་འདུག   ལྷག་པར་དུ་འཐབ་རྩོད་ལ་ཆ་མཚོན་ན་རྒྱ་ནག་ལ་མེ་མདའི་སྟོབས་ཤུགས་ཡོད་ཀྱང་བོད་མིར་དྲང་བདེན་གྱི་རྒྱབ་རྟེན་ཡོད་པས།   དུས་ཀྱི་མཐའ་མར་དྲང་བདེན་དེ་ཡུན་གནས་སུ་ཐུབ་རྒྱུ་ཡིན་པ་བཀའ་བསྩལ་འདུག གཞི་རྩའི་༸མགོན་པོ་གང་ཉིད་མཆོག་ཁ་སང་ཉིན་གུང་ཕྱག་ཚོད་ ༡ པོ་ཙམ་ལ་རྒྱ་གར་ལྷོ་ཕྱོགས་མོན་གྷོ་འདོད་རྒྱུ་གླིང་དུ་རྟེན་གཞི་བྱས་པའི་གདན་ས་དགའ་འབྲས་གཉིས་ནང་གི་མཛད་འཆར་ཁག་ལེགས་པར་གྲུབ་པ་དང་བསྟུན།  རྡོ་རྗེ་གདན་དུ་ཞབས་སོར་འཁོད་ཡོད་པ་དང་།  ད་ལྟའི་མཛད་འཆར་ལྟར་ན།  ༸གོང་ས་མཆོག་གིས་ཕྱི་ལོ་ ༢༠༢༠ ལོའི་ཟླ་བ་༡ པོའི་ཚེས་༢ ཉིན་དད་ལྡན་ཆོས་ཞུ་བར་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་གསུང་ཆོས་དང་།   ཕྱི་ཚེས་ ༣ ཉིན་སྤྱན་རས་གཟིགས་ཀྱི་བཀའ་དབང་།   དེ་བཞིན་ཕྱི་ཚེས་ ༤ ནས་ ༦ བར་འདི་ལོའི་མགོ་སྟོད་དུ་གནས་མཆོག་རྡོ་རྗེ་གདན་དུ་བསྩལ་བའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་མཛད་གནང་རྒྱུ་ཡིན་པ་རེད།  ཐེངས་འདིའི་ཆིབས་བསྒྱུར་དང་བསྟུན།  གྷ་ཡ་རྫོང་གི་ཉེན་རྟོག་པས།  ༸གོང་ས་མཆོག་རྡོ་རྗེ་གདན་དུ་བཞུགས་པའི་རིང་མངའ་སྡེ་དང་ས་གནས་རྫོང་ནས་༸སྐུ་ཕྱའི་སྲུང་སྐྱོབ་སླད་ཕྱོགས་ཡོངས་ལ་ཉིན་མཚན་བསྟུད་མར་ཉེན་རྟོག་པ་འགྲེམས་འཇོག་གནང་ཡོད་པ་དང་།  ལྷག་པར་དུ་ཆོས་ཞུ་བ་ཚོར་གཟིགས་རྟོགས་སླད་ཡར་འགྲོ་མར་འགྲོ་སོགས་ཀྱི་འགྲིམ་འགྲུལ་སྟབས་བདེ་བཟོས་ཡོད་པ་རེད། མ་ཟད། བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་དྲུང་ཆེ་སྐར་མ་རིན་ཆེན་ལགས་ཀྱིས་ཀྱང་འདི་གའི་གསར་འགོད་པར་ཐེངས་འདིར་སྔར་རྒྱུན་གཞིན་ ༸སྐུ་ཕྱའི་སྲུང་སྐྱོབ་ཡག་པོ་གནང་ཡོད་པར་གསུངས་སོང་། པར་དབང་། དགའ་ལྡན་ཕོ་བྲང་།

རྒྱ་ནག་གི་སྲིད་འཛིན་ཞི་ཅིན་ཕིང་གིས་རྒྱལ་སྲུང་སྲིད་བྱུས་ཞེས་པའི་འོག ཕྱིའི་འཛམ་བུ་གླིང་དང་བོད་དབར་དེང་དུས་ཀྱི་ཆ་རྐྱེན་ལྡན་པའི་འགག་སྒོ་མཁྲེགས་པོ་ཞིག་བཟོ་བསྐྲུན་བྱེད་དགོས་པའི་དམིགས་ཡུལ་གྱི་འོག་ནས་བོད་ཀྱི་མཐའ་མཚམས་ས་ཁུལ་ཁག་ཏུ་རྒྱལ་ཁབ་སྲུང་སྐྱོབ་ཀྱི་གྲོང་ཚོ་ཞེས་པའི་འཛུགས་སྐྲུན་ལས་གཞི་དེ་འདི་ལོ་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག དེ་ཡང་ཨ་རིའི་རྒྱལ་ས་ Washington DC ནང་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཁ་ཉིན་གནས་ཚུལ་སྤེལ་བའི་ནང་དུ། རྒྱ་ནག་གཞུང་གིས་འདི་ལོ་བོད་ཀྱི་ས་མཚམས་ས་ཁུལ་དུ་རྒྱལ་ཁབ་སྲུང་སྐྱོབ་ཀྱི་གྲོང་ཚོ་འཛུགས་བསྐྲུན་ཞེས་པའི་ལས་གཞི་དེ་ཤུགས་ཆེ་རུ་བཏང་བའི་འོག   གྲོང་འཚོ་དེ་དག་གི་ནང་དུ་རྒྱ་ནག་དམར་ཤོག་ཚོགས་པའི་ལས་བྱེད་པ་ཆེད་འཛུགས་ཀྱིས་༸གོང་ས་མཆོག་ལ་དད་གུས་བྱེད་མཁན་བོད་མི་ཚོ་གཙོ་བྱས་པའི་ཕྱིའི་སྟོབས་ཤུགས་སིམ་འཛུལ་གྱི་རིགས་ལ་འགོག་རྒོལ་གྱི་ལས་གཞི་སྤེལ་བཞིན་པ་དང། དེའི་ཁྲོད་བོད་ཀྱི་མཐའ་མཚམས་ས་ཁུལ་ཁག་གི་གྲྭ་བཙུན་རྣམས་ལ་༸གོང་ས་མཆོག་གི་ཤུགས་རྐྱེན་ལ་འགོག་རྒོལ་བྱེད་ཕྱོགས་ཀྱི་དམིགས་གསལ་སྦྱོང་དར་སྤྲད་པ་དང། དེ་བཞིན་བོད་ཀྱི་རྒྱལ་ས་ལྷ་ས་ནས་ཟི་ཁྲོན་ཞིང་ཆེན་བར་དུ་མེ་འཁོར་ལྕགས་ལམ་དང་ཕུག་ལམ་འཛུགས་སྐྲུན་བྱས་ཟིན་པ་སོགས་ཐེར་འདོན་གནང་འདུག ལས་འགུལ་ཁང་གིས་རྒྱ་ནག་གཞུང་འབྲེལ་བརྒྱུད་ལམ་རང་གི་ཐོག་ཐོན་པའི་གནས་ཚུལ་ལ་གཞིགས་ཏེ། རྒྱ་གཞུང་གིས་ཕྱི་ལོ་་༢༠༡༧ ལོ་ནས་ཕྱི་ལོ ༢༠༢༠ བར་གྱི་བོད་ཀྱི་མཐའ་མཚམས་ས་ཁུལ་ཁག་ཏུ་རྒྱལ་སྲུང་གྲོང་ཚོ་འཛུགས་སྐྲུན་གྱི་ལས་གཞི་ཕྱིར་བསྒྲགས་བྱས་པའི་ནང་དུ། བོད་ཀྱི་མཐའ་མཚམས་ས་ཁུལ་ཁག་ཏུ་གྲོང་ཚོ་འདིའི་རིགས་ ༦༢༤ ཙམ་འཛགས་སྐྲུན་བྱེད་འཆར་ཡོད་པ་དང་། དེ་དག་རྒྱ་གར་གྱི་ཨ་རུ་ན་ཅལ་མངའ་སྡེ་དང་ས་ཐག་ཉེ་བའི་ཉིང་ཁྲི་ས་ཁུལ་དང་། དེ་བཞིན་གཞིས་ཀ་རྩེ་བཅས་ཀྱི་ནང་དུ་འཛུགས་སྐྲུན་བྱེད་འཆར་ཡོད་པ་དང། གྲོང་ཚོ་དེ་དག་ནི་མི་འབོར་ཤུགས་ཆེན་པོ་མེད་པའི་ས་ཁུག་ཁག་དང་། བོད་ནང་གི་བོད་མི་རྣམས་བལ་ཡུལ་དང་རྒྱ་གར་ལ་བྲོས་བྱོལ་ཡོང་སའི་ས་ཁུལ་ཁག་ཏུ་འཛུགས་སྐྲུན་བྱེད་བཞིན་པ་མངོན་གསལ་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་གཞུང་གི་ངོས་ནས་རྒྱ་དཀར་ནག་གཉིས་ཀྱི་ས་མཚམས་ནས་ས་ཐག་རིང་ཐུང་ལ་གཞིགས་ཏེ་སྲུང་སྐྱོབ་ཀྱི་རིམ་པ་དང་པོ་དང་། རིམ་པ་གཉིས་པ་ཞེས་མིང་བཏགས་ཡོད་པ་དང་། ད་ལྟའི་ཆར་རིམ་པ་དང་པོའི་ས་ཁུལ་ཁག་གི་ནང་དུ་གྲོང་ཚོ་ ༤༢༧ འཛུགས་སྐྲུན་ཟིན་པ་དང། དེ་ནས་རིམ་པ་གཉིས་པའི་ས་ཁུལ་ནང་དུ་ད་བར་གྲོང་ཚོ་གསར་པ་༢༠༡ འཛུགས་སྐྲུན་བྱས་ཟིན་པ། དེ་བཞིན་འཛུགས་སྐྲུན་གྱི་ལས་གཞི་དེའི་འོག་ས་གནས་བོད་མི་རྣམས་བཙན་དབང་གིས་གཞིས་སྤོར་བྱེད་དུ་བཅུག་ཡོད་པར་གསུངས་པ་དང་འབྲེལ། རྒྱ་གཞུང་གིས་ས་མཚམས་ཁག་ཏུ་རྒྱལ་སྲུང་གྲོང་ཚོ་གསར་སྐྲུན་གྱི་ལས་གཞིར་དོ་སྣང་ཆེན་པོ་བྱེད་དགོས་དོན་གཅིག་ནི། ས་གནས་བོད་རིགས་འགོ་ཁྲིད་རྣམས་ལ་དམར་ཤོག་ཚོགས་པར་བློ་གཏད་བྱེད་དགོས་པ་དང་། དམར་ཤོག་ཚོགས་པའི་སྟངས་འཛིན་འོག་སྡོད་དུ་འཇུག་རྒྱུའི་ཆེད་དུ་ཡིན་པ་མངོན་རྒྱུ་ཡོད་པ་གསུངས་འདུག དེ་བཞིན་རྒྱ་གཞུང་གིས་རྒྱ་ནག་མི་དམངས་བཅིངས་གྲོལ་དམག་མིའི་དབང་ཚད་རྒྱ་ཆེ་རུ་བཏང་སྟེ་བོད་ཀྱི་ས་མཚམས་བརྒལ་ནས་རྒྱ་གར་དང་བལ་ཡུལ་སོགས་ཀྱི་ནང་དུའང་ཉམས་ཞིབ་བྱེད་དུ་འཇུག་བཞིན་ཡོད་པ་དང་། རྒྱལ་སྲུང་གྲོང་ཚོའི་ནང་གི་དམར་ཤོག་ཚོགས་པའི་ལས་བྱེད་པ་རྣམས་ལ་ཡང་རྒྱ་གར་དང་བལ་ཡུལ་གྱི་ས་མཚམས་ས་ཁུལ་དུ་འབྲེལ་བ་བྱས་པ་བརྒྱུད་རྒྱ་ནག་གི་ཤུགས་རྐྱེན་ཆེ་རུ་གཏོང་རྒྱུའི་ལས་འགན་སྤྲད་ཡོད་པ་ཐེར་འདོན་གནང་འདུག འདི་གའི་གསར་འགོད་པས་གནད་དོན་དེའི་ཐོག་ཕྱི་ལོ་་༢༠༡༧ ཙམ་ནས་ཉམས་ཞིབ་གནང་བཞིན་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་པདྨ་རྒྱལ་ལགས་སུ་བཀའ་འདྲི་ཞུས་པར་ཁོང་གིས་རྒྱ་གཞུང་གིས་རྩ་བའི་རྒྱལ་ཁབ་ཀྱི་ས་མཚམས་སྲུང་སྐྱོབ་ཀྱི་མིག་ཐོག་ནས་བོད་མིའི་ཐོག་དམ་དྲག་བྱེད་རྒྱུ་དང་། འདི་ལོ་རྒྱ་ནག་གིས་པཎ་ཆེན་རྒྱལ་མཚན་ནོར་བུ་སྐྱིད་རོང་ཁུལ་དུ་སླེབས་སྐབས་བལ་ཡུལ་ནས་སླེབས་པའི་མི་མང་ཁག་ཅིག་ལ་གཏམ་བཤད་སྤེལ་བ་སོགས་ལ་གཞིགས་ཏེ།  རྒྱ་གཞུང་གི་དམིགས་ཡུལ་གཞན་གཅིག་ནི་ལས་གཞི་དེའི་འོག་རྒྱ་གར་དང་བལ་ཡུལ་གྱི་ས་མཚམས་སུ་གནས་བའི་མི་སེར་རྣམས་རྒྱ་ནག་གི་མི་སེར་ལ་བསྒྱུར་ཐབས་སོགས་ཡིན་པ་གསུངས་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་སྒར་དུ་རྟེན་གཞི་བྱས་པའི་གདན་ས་འབྲས་སྤུངས་དང་དགའ་ལྡན་ནང་གི་མཛད་འཆར་ཁག་ལེགས་པར་གྲུབ་སྟེ། དེ་རིང་ཉིན་གུང་ཙམ་ལ་མགོན་པོ་གང་ཉིད་མཆོག་གནས་མཆོག་རྡོ་རྗེ་གདན་དུ་ཞབས་གསོ་བདེ་བར་འཁོད་གནང་མཛད་འདུག དེ་ཡང་༸གོང་ས་སྐྱབས་མགོན་ཆེན་པོ་མཆོག་དེ་རིང་སྔ་དྲོ་ཆུ་ཚོད་བདུན་པ་ཡོལ་ཙམ་ལ་དགའ་ལྡན་བྱང་རྩེ་གྲྭ་ཚང་གི་རྟེན་གཙོ་བོར་གནས་གཟིགས་མཛད་རྗེས་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་གཉིས། དེ་བཞིན་གྲྭ་ཚང་གི་དགེ་འདུན་འདུས་མང་བཅས་དང་ལྷན་དུ་འདུ་ཁང་གི་སྒོ་འགྲམ་དུ་སྐུ་པར་ལྷན་སྒྲོན་མཛད་རྗེས། ཁུལ་དེའི་ཉེ་འཁྲིས་སུ་ཆགས་པའི་ཧོབ་ལིའི་གནམ་ཐང་བརྒྱུད་གནས་མཆོག་རྡོ་རྗེ་གདན་དུ་ཆིབས་༸ཞལ་སྒྱུར་གནང་མཛད་ཡོད་པ་དང་། མགོན་པོ་གང་ཉིད་མཆོག་ཉིན་མོའི་ཆུ་ཚོད་དང་པོ་ཡོལ་ཙམ་ལ་གནས་མཆོག་རྡོ་རྗེ་གདན་དུ་ཞབས་གསོ་འཁོད་སྐབས་ས་གནས་སུ་ཡོད་པའི་དད་ལྡན་མང་ཚོགས་ཡོངས་ཀྱིས་ཕེབས་བསུ་གཟབ་རྒྱས་ཞུས་འདུག མཛད་འཆར་ལྟར་བྱས་ན་༸གོང་ས་སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་གསུངས་ཆོས་ར་བའི་ནང་དུ་ཕྱི་ལོ་ ༢༠༢༠ ལོའི་ཟླ་ ༡ ཚེས་ ༢ ཉིན་དད་ལྡན་མང་ཚོགས་ཡོངས་ལ་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་གསུང་ཆོས་དང་། ཕྱི་ཚེས་ ༣ ཉིན་སྤྱན་རས་གཟིགས་ཀྱི་བཀའ་དབང་། དེ་བཞིན་ཕྱི་ཚེས་ ༤ ནས་ ༦ བར་ཉིན་གྲངས་གསུམ་རིང་འདི་ལོའི་མགོ་སྟོད་གནས་མཆོག་རྡོ་རྗེ་གདན་དུ་སྩལ་བའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་བཀའ་དྲིན་མཛད་གནང་གི་ཡོད་པ་རེད། གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་བཅུ་གཉིས་ནས་ལྷོ་ཕྱོགས་མོན་གྷོ་འདོད་རྒྱུ་གླིང་བོད་མིའི་གཞིས་སྒར་དུ་རྟེན་གཞི་བྱས་པའི་གདན་ས་འབྲེ་སྤུངས་དང་གདའ་ལྡན་སོ་སོའི་དགོན་ཁག་ཏུ་དད་ལྡན་ཆིག་ཁྲི་བརྒལ་བར་ནང་ཆོས་ངོ་སྤྲོད་དང་ཚེ་དབང་བཅས་བཀའ་དྲིན་བསྩལ་བ་མ་ཟད། དགོན་སྡེ་ཁག་གི་རྟགས་གསལ་ལ་གཟིགས་ཞིབ། ལྷག་པར་དུ་རྗེ་ཙོང་ཁ་པ་ཆེན་པོ་སྐུ་མྱ་ངན་ལས་འདས་ནས་ལོ་དྲུག་བརྒྱ་འཁོར་བའི་རྒྱལ་སྤྱིའི་མཁས་པའི་བགྲོ་གླེང་དང་། རྗེ་ཙོང་ཁ་པ་ཆེན་པོ་མཆོག་གི་དགོངས་རྫོགས་མཆོད་འབུལ་འདུ་འཛོམས་སོགས་སུ་དབུ་བཞུགས་ཀྱིས་བཀའ་སློབ་བཀའ་དྲིན་སྩལ་བ་སོགས་ཁྱོན་ཉིན་གྲངས་ ༡༤ ལྷག་གི་རིང་ལ་མཛད་འཕྲིན་རྒྱ་ཆེར་བསྐྱངས་གནང་མཛད་ཡོད་པ་རེད།