གསར་འགྱུར།

ཁ་སང་ཡུ་རུབ་མཐུན་ཚོགས་ཀྱི་གྲོས་ཚོགས་འཐུས་མི་དང་ཕ་རན་སི། འཇར་མ་ནི། ལཊ་ཝི་ཡ། བྷལ་ཇམ། སུད་སི། ཨི་ཊ་ལི། པོར་ཆཱུ་གྷལ། དེ་བཞིན་སུད་ཌན། དབྱིན་ཡུལ་སོགས་ཡུ་རོབ་རྒྱལ་ཁབ་༡༩ ཡི་གྲོས་ཚོགས་འཐུས་མི་མཁྱོན་ ༥༧ གྱི་མཚན་རྟགས་བཀོད་པའི་དགོས་འདུན་ཡིག་ཆ་ཞིག་ཡུ་རོབ་བརྒྱུད་ལམ་ཁག་གི་ཐོག་ཡོངས་གྲགས་གནང་བའི་ནང་ཡུ་རོབ་རྒྱལ་ཁབ་རྣམས་ནས་རྒྱ་ནག་གི་དཔོན་རིགས་དང་སྐུ་ཚབ་རུ་ཁག དེ་བཞིན་མང་ཚོགས་སྒེར་བཅས་ལ་ཡུ་རོབ་ནང་བསྐྱོད་རྒྱུའི་ཐོངས་མཆན་སྤྲད་པ་མ་ཟད། ཡུ་རོབ་ནང་ཁོང་རྣམས་ཀྱི་འགྲུལ་སྐྱོད་ལ་དམ་དྲག་རིགས་གང་ཡང་བྱེད་ཀྱི་མེད་པ་ལྟར། རྒྱ་ནག་གཞུང་གི་ངོས་ནས་ཀྱང་ཡུ་རོབ་ཀྱི་གཞུང་འབྲེལ་མི་སྣ་དང་གསར་འགོད་པ། དེ་བཞིན་ཡུ་རོབ་ཁུལ་དུ་གནས་བཞུགས་བོད་མི་རྣམས་ལ་བཀག་སྡོམ་དང་དམ་དྲག་མེད་པར་བོད་ནང་རང་དབང་ཐོག་བསྐྱོད་འཇུག་དགོས་པ་གསུངས་འདུགཁ་སང་ཡུ་རོབ་རྒྱལ་ཁབ་འདྲ་མིན་གྱི་བརྒྱུད་ལམ་ཁག་གི་དྲ་གནས་ཐོག་གྲོས་ཚོགས་འཐུས་མི་རྣམས་ཀྱི་མཚན་རྟགས་བཀོད་པའི་དགོས་འདུན་ཡིག་ཆ་དེ་འདོན་སྤེལ་གནང་འདུག་པ་དང་རྒྱ་ནག་གཞུང་གིས་འཁྱོག་བཤད་དྲིལ་བསྒྲགས་དང་གནས་ཚུལ་དམ་དྲག་རྐྱེན་པས་ད་ལྟའི་ཆར་འཛམ་གླིང་ཁྱོན་ཡོངས་ལ་ཏོག་དབྱིབས་རིམས་ནད་ཀྱི་དཀའ་ངལ་ཧ་ཅང་ཆེན་པོ་འཕྲད་མུས་ཡིན་པ་བཞིན་རྒྱ་ནག་གཞུང་གིས་བོད་དེ་ཕྱི་ལ་སྒོ་མོ་རྒྱག་ནས་ཁེར་རྐྱང་བཞག་པ་དེས་མ་འོངས་པར་གོ་ལ་སྤྱི་ལ་གནོད་པའི་ཛ་དྲག་གནས་སྟངས་ཤིག་ཆགས་ཉེན་ཡོད་སྟབས། རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་གཞུང་གི་བྱ་སྤྱོད་དེར་ངོས་ལེན་བྱེད་ཐབས་མེད་པ་གསུངས་འདུག དེ་བཞིན་ཡུ་རོབ་རྒྱལ་ཁབ་ཕལ་མོ་ཆེས་རྒྱ་ནག་གི་མི་སེར་རྣམས་ལ་ཡུ་རོབ་ནང་དུ་རང་དབང་ཐོག་བསྐྱོད་འཇུག་བཞིན་ཡོད་ཀྱང་། ཡུ་རོབ་ཀྱི་མེ་སེར་བོད་ནང་བསྐྱོད་པར་དམ་དྲག་ཆེན་པོ་བྱེད་ཀྱི་ཡོད་པ་ཐེར་འདོན་དང་འབྲེལ།  རྒྱ་ནག་གིས་བོད་ཀྱི་གནད་དོན་ལ་ཐུག་སྐབས་ཡུ་རོབ་དང་ལྷན་ཕན་ཚུན་རང་དབང་འདྲ་མཉམ་གྱི་གནས་བབ་ཐོག་འབྲེལ་བ་རྩ་བ་ནས་བྱེད་ཀྱི་མེད་པ་མ་ཟད་རྒྱ་གཞུང་གི་གཞུང་འབྲེལ་མི་སྣ་ཡུ་རོབ་ཁུལ་དུ་སླེབས་སྐབས་’ཁྱོག་བཤད་དྲིལ་བསྒྲགས་མང་དག་ཅིག་མཉམ་དུ་ཁྱེར་ནས་ཡོང་གི་ཡོད་པ་དང་། ཡུ་རོབ་ནང་དུ་ཡོད་པའི་རྒྱ་ནག་གཞུང་གི་སྟངས་འཛིན་བྱས་ནས་བརྒྱུད་ལམ་ཁག་གི་ངོས་ནས་ཁོ་ཚོར་མཐུན་འགྱུར་ཡང་སྦྱོར་འཇུག་གི་ཡོད་པ་རེད། འོན་ཀྱང་ཡུ་རོབ་ཀྱི་གསར་འགོད་པ་སོགས་བོད་ནང་བསྐྱོད་དགོས་ན་དམིགས་བསལ་ཆོག་མཆན་ཞུ་དགོས་པ་དང་དེའང་ཧ་ཅང་རག་དཀའ་བ་ཡོད་པ་སོགས་ལུང་འདྲེན་གནང་འདུག དེ་བཞིན་བོད་ནང་ནང་མི་ཉེ་འབྲེལ་ཡོད་པའི་བཙན་བྱོལ་བོད་མི་རྣམས་རང་གི་ཕ་མ་རྒན་གྲས་དང་སྤུན་མཆེད་ཐུག་པར་འགྲོ་བར་ཐོངས་མཆན་ཞུ་བར་བསྐྱོད་སྐབས་རྒྱ་ནག་གཞུང་ཚབ་མི་སྣས་ཆེས་དབྱེ་འབྱེད་དང་མཐོང་ཆུང་སོགས་བྱེད་ཀྱི་ཡོད་པ་མངོན་གསལ་དང་སྦྲགས། མང་ཆེ་བར་ཐོངས་མཆན་རྩ་བ་ནས་སྤྲད་ཀྱི་མེད་པ་ལུང་འདྲེན་དང་རྒྱ་གཞུང་གིས་བོད་དེ་ཕྱི་ལ་སྒོ་མོ་རྒྱག་པ་དེ་རྩ་བ་ནས་འགྲིག་ཀྱི་མེད་པ་མ་ཟད་ལྷག་པར་དུ་བོད་མི་རྣམས་ལ་དམིགས་བསལ་གྱི་དཀའ་ངལ་འཕྲད་བཞིན་ཡོད་སྐོར་དང་འབྲེལ། གོ་ལ་སྤྱི་ལ་གནོད་པའི་གནད་དོན་ཞིག་མ་ཆགས་པའི་སྔོན་ལ་གསང་རྒྱ་དང་དབང་ཆ་གཅིག་བསྡུས་རིང་ལུགས་ཀྱི་རྒྱ་ནག་དམར་ཤོག་གཞུང་ལ་གདོང་ལེན་བྱེད་དགོས་པ་གསུངས་འདུག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་འཚེ་མེད་ཞི་བའི་འཐབ་རྩོད་ཀྱི་ལམ་སྟོན་འོག་ནས་བོད་མི་རྣམས་ཀྱི་ཞི་བའི་ཐོག་རང་གི་རྩ་དོན་རྩོད་བཞིན་ཡོད་སྟབས། ད་ཆ་༸གོང་ས་མཆོག་དགུང་ལོ་ ༨༥ ཕེབས་པ་དང་བསྟུན་རྒྱ་ནག་གི་༸སྐུའི་ཡང་སྲིད་ལ་ཐད་བྱུས་བྱེད་བཞིན་པ་ལྟར་མ་འོངས་པར་བོད་ནང་ཟིང་ཆ་ཆེན་པོ་ལངས་ཉེན་ཡོད་པ་དང་། དེས་བོད་ཙམ་མ་ཟད་དེ་ལས་རྒྱ་ཆེ་བའི་ས་ཁོངས་ཀྱི་བརྟན་ལྷིང་ལ་གནོད་འཚེ་བཟོ་ཉན་ཡོད་པ་ལྟར་བོད་ཀྱི་གནད་དོན་འདིས་ཏོག་དབྱིབས་རིམས་ནད་ལྟ་བུའི་གནོད་འཚེ་བཟོ་མི་སྲིད་ཀྱང་། དེས་འགྲོ་བ་མིའི་གཞི་རྩའི་ཐོབ་ཐང་གི་རིན་ཐང་ལ་ཉེན་ཆ་ཆགས་པ་སོགས་གསུངས་ཏེ་ང་ཚོའི་ངོས་ནས་དབང་ཆ་གཅིག་བསྡུས་དང་གསང་རྒྱ་ལྡན་པའི་རྒྱ་ནག་དམར་པོའི་གཞུང་གིས་གོ་ལ་སྤྱི་ལ་ཁྱབ་པའི་གནོད་འཚེ་མ་བཟོ་བའི་སྔོན་ལ་བཀག་འདོད་ཡོད་ཚེ་དེ་སྔོན་ཡུ་རོབ་མཐུན་ཚོགས་ཀྱི་དམིགས་བསལ་སྐུ་ཚབ་ལྕམ་ Federica Mogherini ལགས་ཀྱིས་རྒྱ་ནག་ལ་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་དགོན་འདུན་ཆེད་བཏོན་གནང་བ་ལྟར་ཡུ་རོབ་རྒྱལ་ཁབ་ཡོངས་ནས་དེ་ལྟར་གནང་དགོས་པ་གསུངས་འདུག ལྷག་པར་དུ་ཉེ་སྔོན་ཨ་རིའི་གཞུང་གིས་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་ཁྲིམས་གཞི་གཏན་འབེབས་གནང་བ་དང་དེས་འབྲུ་དོན་རྣམས་ལུང་འདྲེན་དང་འབྲེལ། དེ་ནི་རྒྱ་ནག་གཞུང་གི་མཁྲེགས་འཛིན་གྱི་སྲིད་བྱུས་ལ་རྒྱུན་ཤེས་ཀྱི་ལན་འདེབས་ཤིག་ཆགས་ཡོད་སྟབས་ཡུ་རོབ་རྒྱལ་ཁབ་རྣམས་ནས་ཀྱང་དེ་བཞིན་གནང་དགོས་པ་དང་། བོད་དེ་སྒོ་མོ་རྒྱག་ནས་ཁེར་རྐྱང་བཞག་པ་དེར་ངོས་ལེན་མེད་པའི་བརྡ་ལན་ནན་པོ་ཞིག་སྤྲད་དགོས་པ་མ་ཟད། བོད་ནང་བསྐྱོད་རྒྱུའི་རང་དབང་དགོས་པའི་དགོས་འདུན་ཆེད་བཏོན་དང་འབྲེལ། ཡུ་རོབ་དང་རྒྱ་ནག་དབར་འབྲེལ་ལམ་བསྐྱར་གཟོ་བྱེད་དགོས་པ་གསུངས་འདུགཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་ Access Denied ཞེས་པའི་སྙན་ཐོ་ཞིག་འདོན་སྤེལ་གནང་བ་དང་དེའི་ནང་རྒྱ་གཞུང་གིས་རྒྱལ་སྤྱིའི་རྒྱལ་ཁབ་ཁག་དང་ལྷན་དུ་འབྲེལ་ལམ་བྱེད་མུས་ཁྲོད་བོད་ནང་འགྲུལ་སྐྱོད་ལ་དམ་དྲག་བྱེད་བཞིན་པ་འཐེར་འདོན་དང་འབྲེལ། ཨ་རིའི་གཞུང་གིས་བོད་ནང་འདྲ་མཉམ་འགྲུལ་སྐྱོད་ཀྱི་ཁྲིམས་གཞི་གཏན་འབེབས་གནང་བ་བཞིན་ཡུ་རོབ་གཞུང་མང་ཁྲོད་ལ་ཡང་དེ་ལྟར་ཡོང་བར་དགོས་འདུན་ཤུགས་ཆེ་གནང་བཞིན་ཡོད་པ་མངོན་གསལ་གནང་འདུག དེ་ཡང་རྒྱལ་སྤྱི་བོད་དོན་ལས་འགུལ་ཁང་གིས་དེ་སྔ་ཕྱི་ལོ་ ༡༩༨༨ ཕྱི་ ༦ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ Strasbourg ནང་ཡུ་རོབ་གྲོས་ཚོགས་ཀྱི་འདུན་དུ་ མ་འོངས་བོད་ཀྱི་གནས་བབ་སྐོར་བཀའ་སློབ་བསྩལ་བ་དྲན་གསོ་དང་འབྲེལ། རྒྱ་གཞུང་གིས་བོད་ནང་ཚད་ལས་འགལ་བའི་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དེ་སྦས་ཐབས་དང་ བོད་ནང་ཕྱིའི་གཞུང་དང་མི་སྒེར་སོགས་བསྐྱོད་རྒྱུར་དམ་དྲག་ཆེན་པོ་བྱེད་བཞིན་ཡོད་པ་ལྟར་ཁྲིམས་གཞི་དེ་བརྒྱུད་ནས་བོད་དེ་སྒོ་མོ་ཕྱེ་ཚེ་ས་གནས་ས་ཐོག་གི་གནས་སྟངས་གང་ཡིན་ཕྱི་གསལ་ནང་གསལ་ཆགས་རྒྱུ་དང་རྒྱ་གཞུང་ནས་རྒྱལ་སྤྱིར་ལན་འདེབས་ཤིག་བྱེད་ཀྱི་ཡོད་པ་ཆགས་རྒྱུ་ཡིན་སྟབས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གྱི་གནད་དོན་ཡང་བཀག་སྡོམ་བྱེད་ཐུབ་རྒྱུ་ཡིན་པར་མངོན་གསལ་གནང་འདུག ལྷག་པར་དུ་འདས་པའི་ལོ་ ༡༠ ནང་ནུབ་ཕྱོགས་ཀྱི་སྐུ་ཚབ་རུ་ཁག་ཁག་ཅིག་རྒྱ་གཞུང་གི་སྟངས་འཛིན་ནན་པོའི་འོག་བོད་ནང་ཕེབས་རྒྱུ་བྱུང་ཡང་དེ་ལས་ལྡབ་གསུམ་གྱིས་མང་བ་བོད་རང་སྐྱོང་ལྗོང་ཟེར་བའི་སྐུ་ཚབ་ཕྱིའི་རྒྱལ་ཁབ་ལ་བསྐྱོད་དེ་རྒྱ་གཞུང་གི་འཁྱོག་བཤད་དྲིལ་བསྒྲགས་དང་༸གོང་ས་མཆོག་ལ་མཚན་སྨད་ཞུས་པ་ལུང་འདྲེན་དང་འབྲེལ། དེ་སྔོན་ཡུ་རོབ་མཐུན་ཚོགས་ཀྱི་སྐུ་ཚབ་ Federica Mogherini མཆོག་དང་དེ་རྗེས་ཡུ་རོབ་མཐུན་ཚོགས་ཀྱི་ཕྱི་སྲིད་བློན་ཆེན་སྐུ་ཞབས་ Josep Borrell ལགས་གཉིས་ཀྱིས་རྒྱ་ནག་ལ་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་དགོས་འདུན་ཆེད་བཏོན་དང་འབྲེལ། དེང་སྐབས་ཡུ་རོབ་ནང་དུ་བོད་ནང་འདྲ་མཉམ་འགྲུལ་སྐྱོད་ཀྱི་ཁྲིམས་འཆར་དགོས་པ་གསུང་མཁན་ཇེ་མང་དུ་འགྲོ་བཞིན་ཡོད་པ་འཐེར་འདོན་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྡེ་ཚན་འགན་འཛིན་ཚེ་རིང་བྱམས་པ་ལགས་ཀྱིས་ སྙན་ཐོའི་ནང་གི་འབྲུ་དོན་ལུང་འདྲེན་དང་སྦྲགས། འདྲ་མཉམ་གྱི་གནས་བབ་དེ་ཚོང་འབྲེལ་གཅིག་པོའི་ནང་མིན་པར་རང་དབང་དང་ཐོབ་ཐང་གི་ཐོག་ལ་དེ་ལྟར་དགོས་གནད་ཡིན་སྟབས་ཡུ་རོབ་རྒྱལ་ཁབ་རྣམས་ནས་རྒྱ་གཞུང་དང་ལྷན་དུ་འདྲ་མཉམ་མེད་པའི་འབྲེལ་ལམ་དེ་ཡོ་བསྲང་བྱ་ཕྱིར་ལོ་ངོ་དྲུག་ཅུ་ཙམ་གྱི་རིང་ལ་སྒོ་མོ་རྒྱག་པའི་བོད་ཙམ་མ་ཟད་རང་རྒྱལ་ཁབ་ཀྱི་སྤྱི་ཚོགས་ཀྱི་རང་དབང་ཆེད་དུ་ཕན་ཚུན་འབྲེལ་ལམ་ཐོག་འདྲ་མཉམ་གྱི་རང་དབང་དགོས་པ་གསུངས་འདུག

དེ་རིང་ཉིན་རྒྱབ་ཏུ། བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་སྤྱི་ལོ་ ༢༠༡༩ ལོའི་བོད་ནང་གི་འགྲོ་བ་མིའི་ཐོབ་ཐང་གི་ལོ་འཁོར་སྙན་ཐོ་ཤོག་གྲངས་བརྒྱ་ལྷག་ཡོད་པ་ཞིག་འདོན་སྤེལ་བྱས་ཏེ། རྒྱ་ནག་གིས་ཕྱོགས་ཡོངས་ནས་བོད་པའི་ཆོས་རིག་དང་སྐད་ཡིག་སོགས་སྤྱི་ཡོངས་ནས་རྒྱ་བསྒྱུར་བྱེད་བཞིན་ཡོད་པ་གསལ་འདོན་གནང་འདུག ཐེངས་འདིའི་ལོ་འཁོར་སྙན་ཐོའི་བསྒྲགས་ཡིག་གི་ནང་དུ། རྒྱ་ནག་དམར་ཤོག་སྲིད་གཞུང་གིས་དེ་སྔ་མོས་མཐུན་མིང་རྟགས་དང་ལག་བསྟར་ཆོག་མཆན་བཀོད་ཟིན་པའི་རྒྱལ་སྤྱིའི་གྲོས་ཆོད་ཁག་བརྩིས་མེད་གདལ་བཤིག་བཏང་ནས། བོད་ནང་དུ་དྲག་གནོན་དབང་སྒྱུར་གྱི་བསམ་སྦྱོར་དང་དེ་འབྲེལ་རྒྱལ་སྤྱི་རིམ་པའི་འགན་འཁྲི་ཁག་སྣང་མེད་དུ་དོར་ཏེ།  བོད་ཀྱི་ཆབ་དཔལ་རིག་གསུམ་ངོ་བོ་དང་བཅས་པ་རྩ་གཏོར་གཏོང་ཐབས་སུ་དུས་རྒྱུན་དུ་སྲིད་ཁྲིམས་བེད་སྤྱད་ནས་རྒྱ་གཞུང་རང་གི་ཆབ་སྲིད་ཀྱི་ལྟ་སྤྱོད་དང་འགལ་བ་ཚང་མར་ཡ་ང་བའི་དྲག་གནོན་བྱས་དང་བྱེད་བཞིན་པའི་གནས་སྟངས་འཁོད་འདུག སྙན་ཐོ་དེ་སྤྱི་ཡོངས་ཀྱི་ཆ་ནས་ཆབ་སྲིད་སློབ་གསོ་དང་སྐད་ཡིག་གི་རང་དབང་། ཆོས་ལུགས་དད་མོས་ཀྱི་རང་དབང་དང་ཁོར་ཡུག་གནད་དོན། གཞན་ཡང་སྨྲ་བརྗོད་དང་འགྲོ་འདུག་རང་དབང་བཅས་དོན་ཚན་ཆེན་པོ་ལྔ་ཡི་ནང་དུ་བསྡུས་ཡོད་པ་རེད།  འདི་ག་རླུང་འཕྲིན་ཁང་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་བཅར་དྲི་ཞུ་སྐབས། ཁོང་གིས་རྒྱ་ནག་གིས་རྒྱལ་སྤྱིའི་ཁྲིམས་ལུགས་དང་རྒྱ་ནག་རང་གི་རྩ་ཁྲིམས་སུ་འཁོད་པའི་གཞི་རྩའི་འགྲོ་བ་མིའི་ཐོབ་ཐང་ཁག་རྡོག་རོལ་ཚབ་ཆེན་གཏོང་གི་ཡོད་པ་ར་སྤྲོད་བྱས་ཏེ། རྒྱ་ནག་གི་ཁྲིམས་ཡིག་དང་ལག་ལེན་གཉིས་ལྡོག་ཕྱོགས་སུ་གྱུར་ཡོད་ལུགས་ངོ་སྤྲོད་གནང་སོང་། དེ་བཞིན་པདྨ་རྒྱལ་གྱིས།  སྔར་ལོ་རྒྱ་ནག་གིས་རྒྱལ་ཡོངས་རིམ་པའི་ལས་འགུལ།  ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ཟེར་བའི་རྡུང་རྡེག་ཚ་ནན་གཏོང་ཐབས་བེད་སྤྱད་ནས། བོད་དོན་ཞི་རྒོལ་བ་དང་འགྲོ་བ་མིའི་ཐོབ་ཐང་དོན་གཉེར་གནང་མཁན་ཚོར་ཁྱབ་ཆེ་ཞིང་འཆར་གཞི་དང་དམིགས་ཡུལ་ལྡན་པའི་ཐོག་ནས་དབང་ཡོད་གཉའ་གནོན་དང་སྡུག་སྦྱོང་མནར་གཅོད་བཏང་སྟེ་དྲག་རྡུང་འཐབ་རྩོད་ལས་འགུལ་ཤུགས་ཆེར་བཏང་བའི་ཁྲོད་དུ་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱ་འགུལ་རིགས་ཚང་མ་ཁྲིམས་འགལ་ཉེས་གསོག་གི་ངོ་བོར་བཙན་སྒྱུར་བྱས་པར་ངོ་སྤྲོད་ཀྱིས།  མཚོ་སྔོན་དང་བོད་རང་སྐྱོང་ལྗོངས་ཟེར་བ་སོགས་སུ་བོད་མི་༦༠༠ ཙམ་འཛིན་བཟུང་བཀག་ཉར་བྱས་ཡོད་པ་ཡང་ངོ་སྤྲོད་གནང་སོང་། དེ་བཞིན་ཁོང་གིས་སྤྱི་ཡོངས་ནས་སྔར་ལོའི་ལོ་འཁོར་སྙན་ཐོར་སྡོམ་རྒྱབ་པ་ཡིན་ན། གཅིག་ནས་རྒྱ་ནག་གིས་བོད་ཁུལ་དུ་བཟོ་ལས་འཛུགས་སྐྲུན་གྱི་ལས་གཞི་རྒྱ་ཆེར་སྤེལ་ནས་བོད་མི་མང་ཚོགས་ཀྱི་རྩ་བའི་འཚོ་ཐབས་ལ་གཏོར་བཅོམ་ཐེབས་པ་དང་། ཕྱོགས་གཞན་ཞིག་ནས་བོད་ཁུལ་དུ་ཆབ་སྲིད་ཀྱི་སློབ་གསོ་རྒྱ་ཆེར་སྤེལ་ནས་བོད་མིའི་ཆོས་རིག་སྐད་ཡིག་དང་བཅས་བ་རྒྱ་བསྒྱུར་གྱི་ལས་འགུལ་སྤེལ་ཏེ་བོད་མིའི་བསམ་བློ་རྒྱ་བསྒྱུར་བྱེད་ཀྱི་ཡོད་པར་ཐེར་འདོན་གནང་བ་དང་སྤྲགས། སྤྱི་ཡོངས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་གྱུར་ཡོད་པར་གསུངས་སོང་།

ཁ་སང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་དེ་རིང་མགོ་ལོག་དགའ་བདེ་ཁུལ་གྱི་བོད་ཀྱི་ཁོར་ཡུག་གི་ལས་འགུལ་བ་ཨ་ཉག་སེང་སྒྲ་ལགས་ལགས་སུ་ལོ་བདུན་གྱི་ཁྲིམས་ཐག་བཅད་པའི་ཐོག་ནས་ཁྲིམས་བཤེར་བྱེད་ཀྱི་ཡོད་པར་བརྟེན་རྒྱ་ནག་སྲིད་གཞུང་གིས་ཁོང་ལ་དྲང་བདེན་གྱི་ཁྲིམས་བཤེར་བྱེད་དགོས་པའི་རེ་སྐུལ་གནང་འདུག མགོ་ལོག་དགའ་བདེ་ཁུལ་ནས་ཡིན་པའི་ཨ་ཉག་སང་སྒྲ་ལགས་ཀྱིས་སྲིད་གཞུང་གིས་ལྐོག་ཟ་རུལ་སུངས་དང་རྒྱ་ནག་གི་ཁྲིམས་དང་མི་མཐུན་པའི་གཏེར་ཁ་སྔོག་འདོན་བྱས་ཏེ་རང་བྱུང་ཁོར་ཡུག་ལ་གཏོར་བཅོམ་ཐེབས་བཞིན་ཡོད་ལུགས་ཕྱིར་བསྒྲགས་བྱས་ཡོད་པ་ལྟར་རྒྱ་ནག་གཞུང་གིས་སྔ་ལོའི་ཕྱི་ཟླ་ ༡༢ ནང་ཁོང་གིས་ལྐོག་ཟ་རུལ་སུངས་ལ་རྒོལ་རྡུང་དང་ཁོར་ཡུག་སྲུང་སྐྱོབ་ཞེས་པའི་སྐད་འཕྲིན་གྱི་ཚོགས་པ་གཉིས་བཙུགས་ནས་མི་མང་བསྡུ་སྐོང་བརྒྱུད་སྲིད་གཞུང་གི་བཀའ་རྒྱ་ལ་གཏོར་བཤིག་དང་དེ་བཞིན་མང་ཚོགས་ཁྲོད་དཀྲོག་རྐྱེན་བཟོས་པའི་ཉེས་མིང་གི་འོག་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་རེད། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་རྒྱ་ནག་གཞུང་གིས་ཁོང་ལ་འཛུགས་པའི་ཉེས་འཛུགས་དེ་དག་ནི་དུས་རྒྱུན་ནས་བོད་མིའི་ལས་འགུལ་བ་དང་ཁོར་ཡུག་སྲུང་སྐྱོབ་པ་རྣམས་ལ་འབུར་འཇོམས་གཏོང་ཆེད་བེད་སྤྱོད་བྱེད་སྲོལ་ཡོད་པ་མངོན་གསལ་གནང་བ་མ་ཟད། འདི་ལོའི་ཕྱི་ཟླ་ ༥ ཚེས་ ༡༩ ཉིན་མཉམ་འབྲེལ་རྒྱལ་ཚོགས་ཀྱི་ཆེད་མཁས་པ་ལྔས་རྒྱ་ནག་གིས་ཨ་ཉག་སེང་སྒྲ་ལགས་ཀྱི་ཁྲིམས་མཐུན་གྱི་བྱེད་ལས་དེ་ནག་ཉེས་ཅན་དུ་བསྒྱུར་བར་སྐྱོན་བརྗོད་ཀྱིས་རྒྱ་ནག་གིས་རྒྱལ་སྤྱིའི་ཁྲིམས་ལུགས་བརྩི་སྲུང་བྱས་པའི་ཐོག་ཁོང་ལ་ཉེས་འདོགས་བྱས་པ་རྣམས་འཕྲལ་དུ་ཕྱིར་འཐེན་བྱེད་དགོས་ལུགས་འགྲེལ་བརྗོད་གནང་བ་དང་ཆབས་ཅིག ཁོང་གི་འཕྲོད་བསྟེན་གྱི་གནས་བབ་ཧ་ཅང་ཞན་པོ་ཡོད་པར་སེམས་འཚབ་ཀྱི་རྣམ་པ་ཆེད་བཏོན་གནང་ཡོད་པ་རེད།རྒྱལ་སྤྱིའི་བོད་དོན་འབྲེལ་མཐུད་ཁང་གི་བློ་བཟང་གཡང་མཚོ་ལགས་ཀྱིས་རྒྱ་ནག་གིས་དུས་རྒྱུན་ལས་གཡོ་བྱུས་ལྡན་ཐོག་གཞིས་ལུས་བོད་མི་རྣམས་ལ་ཉེས་འཛུགས་བྱེད་ཀྱི་ཡོད་ལུགས་དང་། དམིགས་བསལ་ཕྱི་ལོ་ ༢༠༡༨ ལོ་ནས་བཟུང་རྒྱ་ནག་སྲིད་གཞུང་གིས་བོད་ཁུལ་གྱི་བོད་མི་མང་པོ་ཉེས་འཛུགས་སྣ་མང་འོག་འཛིན་བཟུང་བྱེད་ཆོག་པའི་ཁྲིམས་སྒྲིག་ཅིག་ལག་བསྟར་བྱས་པ་དངསྔ་ལོར་རྒྱ་ནག་གིས་ནག་ཉེས་ཀྱི་དཔང་རྟགས་གཅིག་ཀྱང་སྟོན་རྒྱུ་མེད་པར་བོད་མི་ ༤༠༠ ལྷག་འཛིན་བཟུང་བྱས་པའི་ཁྲོད་ནས་ཨ་ཉག་སེང་སྒྲ་ལགས་ཡོད་པར་ཕྱིར་བསྒྲགས་གནང་འདུག དེ་བཞིན་ཁོང་གིས་རྒྱ་ནག་གིས་ཕྱི་ལོ་ ༢༠༡༨ ཟླ་ ༢ པ་ནས་བཟུང་བོད་ཁུལ་དུ་ནག་ཚོགས་གཙང་བཟོ་ཟེར་བའི་ལས་འགུལ་ཞིག་སྤེལ་བཞིན་ཡོད་པ་ལྟར་ནག་ཚོགས་ཞེས་པའི་ནང་བོད་ཀྱི་ཁོར་ཡུག་སྲུང་སྐྱོབ་ཀྱི་ལས་འགུལ་བ་དང་རྒྱ་ནག་སྲིད་གཞུང་དང་ལྟ་བ་མི་མཐུན་མཁན། དེ་བཞིན་བོད་མིའི་སྐད་ཡིག་དང་ཡུལ་སྲོལ་གོམས་གཤིས་སྲུང་སྐྱོབ་པ་ཚང་མ་ཚུད་ཡོད་པ་ཡང་ཕྱིར་བསྒྲགས་གནང་ཡོད། དབྱིན་ཡུལ་དུ་རྟེན་གཞི་བྱས་པའི་ Free TIbet ཞེས་པའི་བོད་དོན་ལས་འགུལ་ཁང་གི་དྲིལ་བསྒྲགས་དོ་དམ་པ་སྐུ་ཞབས་ John Jones ལགས་ཀྱིས་ཨ་ཉག་སེང་སྒྲ་ལགས་ཀྱི་ཁྲིམས་བཤེར་དང་འབྲེལ་ནས་རྒྱ་ནག་གི་དབང་སྒྱུར་འོག་ཏུ་ད་ཆ་བོད་ནི་དྲང་བདེན་གྱིས་སྟོང་བའི་གནས་བབ་ཅིག་ཏུ་ལྷག་ཡོད་སྐོར་བསྒྲགས་པ་དང་འབྲེལ། རྒྱ་ནག་གིས་བོད་ཁུལ་དུ་ཁོར་ཡུག་གཏོར་བཅོམ་དང་དབང་ཆ་ལོག་སྤྱོད་བྱེད་ཀྱི་ཡོད་པ་མ་ཟད། རྒྱ་ནག་གིས་ཨ་ཉག་སེང་སྒྲ་ལགས་ལ་གཞི་རྩ་གང་ཡང་མེད་པར་འཛིན་བཟུང་བྱས་པ་དེ་ནི་ངོ་ཚ་དགོས་བ་ཞིག་ཡིན་པར་མངོན་གསལ་གནང་བ་དང་། ཆབས་ཅིག་ཏུ་ཨ་ཉག་སེང་སྒྲ་ལགས་འཕྲལ་དུ་གློད་བཀྲོལ་བཏང་ནས་ཁོང་ཉིད་སྔར་འཇིགས་སྣང་མེད་པའི་ཐོག་ནས་རང་གི་སྤྱི་ཚོགས་ཀྱི་ཕྱག་ལས་དེར་འཇུག་ཐུབ་པ་བཟོ་དགོས་པའི་འབོད་སྐུལ་གནང་འདུག གཞི་རྩའི་ཨ་ཉག་སེང་སྒྲ་ལགས་ནི་མཚོ་སྔོན་ཞིང་ཆེན་མགོ་ལོག་དགའ་བདེ་རྫོང་རྐྱང་ཆད་ནས་ཡིན་པ་དང་ཕྱི་ལོ་ ༢༠༡༩ ཟླ་ ༡༢ ཚེས་ ༦ ཉིན་རྒྱ་ནག་སྲིད་གཞུང་གིས་ཁོང་གིས་སྤྱི་ཚོགས་དཀྲུག་པའི་ཉེས་མིང་འོག་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།

ད་ཆ་རྒྱ་ནག་སྲིད་གཞུང་གིས་ཏོག་དབྱིབས་རིམས་ནད་འདི་འཛམ་གླིང་ཁྱོན་ཡོངས་སུ་ཁྱབ་གདལ་བཏང་སྟེ་མི་སེར་མང་པོའི་ཚེ་སྲོག་འཕྲོག་དང་འཕྲོག་བཞིན་པ་མ་ཟད་རྒྱལ་ཁབ་སོ་སོའི་དཔལ་འབྱོར་དང་མི་མང་གི་འཚོ་ཐབས་ལ་དོ་ཕོག་ཤུགས་ཆེན་པོ་གཏོང་བཞིན་པའི་སྐབས་འདིར་རྒྱལ་སྤྱིའི་རྒྱལ་ཁབ་དང་མང་ཚོགས་མང་པོས་རྒྱ་ནག་གཞུང་ལ་ངོ་རྒལ་གྱི་རྣམ་འགྱུར་ཆེས་བཏོན་གནང་བཞིན་པའི་ཁྲོད་འདིར་དབུས་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་གི་ཅ་དངོས་ཉོ་ཚོང་དང་བེད་སྤྱོད་གནང་མཚམས་འཇོག་དགོས་པའི་རྒྱལ་སྤྱིའི་ལས་འགུལ་འགོ་འཛུགས་གནང་སོང་།དེ་རིང་སྔ་དྲོ་ཆུ་ཚོད་ ༡༡ ཐོག་དྷ་ས་མེག་ལོཊ་ཁྲོམ་གཞུང་དུ་དབུས་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ལས་རྣམ་པ་དང་ས་གནས་མི་མང་ཁག་ཅིག་མཉམ་ཞུགས་ཐོག་རྒྱ་ནག་གི་ཅ་དངོས་ཉོ་ཚོང་དང་བེད་སྤྱོད་མཚམས་འཇོག་དགོས་པའི་རྒྱལ་སྤྱིའི་ལས་འགུལ་དབུ་འཛུགས་གནང་བ་་དང་སྦྲགས་མང་ཚོགས་དང་ས་གནས་ཀྱི་ཡུལ་མི་ཁག་ནས་རྒྱ་ནག་གི་ཅ་དངོས་བེད་སྤྱོད་གནང་མཚམས་འཇོག་རྒྱུའི་མཚན་རྟགས་ཆེད་བཀོད་གནང་སོང་བ་མ་ཟད། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དགོན་པོ་དོན་གྲུབ་ལགས་ཀྱིས་སྤྱིར་ལས་འགུལ་འདི་སྤེལ་དགོས་པའི་རྒྱུ་མཚན་མང་དག་ཅིག་ཡོད་ཀྱང་རྒྱུ་མཚན་གཙོ་བོ་གསུམ་ཡོད་པ་ནི་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དང་དམག་དོན་གྱི་གོ་མཚོན་རྒྱ་སྐྱེད་བཏང་སྟེ་རྩོད་རྙོག་ཡོད་པའི་ས་མཚམས་ཁག་ཏུ་འཇིགས་སྐུལ་གྱི་དམག་སྦྱོང་བྱས་པ། དེ་བཞིན་རྒྱ་ནག་གཞུང་གིས་ཐོག་མ་ཉིད་ནས་ཏོག་དབྱིབས་རིམས་ནད་དང་འབྲེལ་བའི་གནས་ཚུལ་སྦས་གསང་བྱས་ཏེ་ད་ཆ་རྒྱལ་སྤྱིའི་ཡུལ་གྲུ་གང་སར་དཀའ་ངལ་ཆེན་པོ་བཟོས་པ་བཅས་ཀྱི་བྱ་སྤྱོད་ལ་གཞིགས་ཏེ་ཐེངས་འདིའི་ལས་འགུལ་བརྒྱུད་དེ་རྒྱ་ནག་གི་དཔལ་འབྱོར་ལ་གྱོང་གུད་སྤྲོད་ཐུབ་པ་གནང་རྒྱུ་དེ་ཡིན་ཞེས་གསུངས་སོང་།   དེ་བཞིན་ལས་འགུལ་དང་འབྲེལ་བའི་གསར་འགོད་བསྒྲགས་གཏམ་ནང་ད་ཆ་འཛམ་གླིང་ཐོག་ནད་ཡམས་དང་འབྲེལ་བའི་དཀའ་ངལ་ཆེན་པོ་བཟོས་པའི་ནག་ཉེས་དང་འགན་ཆ་ཚང་རྒྱ་ནག་གཞུང་ནས་ཁུར་དགོས་པ་དང་རྒྱལ་སྤྱིའི་མི་མང་ནས་རྒྱ་ནག་གཞུང་ལ་ཡིད་ཆེས་བློ་འགེལ་བྱེད་མི་རུང་བ། དེ་བཞིན་རྒྱ་ནག་གཞུང་ནས་འཛམ་གླིང་མི་མང་ལ་གྱོང་གུད་དང་དཀའ་ངལ་སྤྲད་པའི་འགན་ཁུར་དང་ལེན་ཐོག་གུན་གསབ་ངེས་པར་དུ་སྤྲོད་དགོས་པ་སོགས་ཀྱི་དགོས་འདུན་ཁག་ཅིག་ཆེད་བཏོན་གནང་ཡོད།   རྩ་བའི་བོད་ཀྱི་གཞོན་ནུ་ལྷན་ཚོགས་ཀྱི་དབུས་ས་གཉིས་ནས་ཏོགས་དབྱིབས་རིམས་ནད་ཁྱབ་གདལ་གྱི་ཛ་དྲག་གནས་སྟངས་ཁྲོད་ཟླ་ ༥ ཚེས་ ༢༣ ནས་དབུ་འཛུགས་གནང་སྟེ་ཉིན་གྲངས་བཅུའི་རིང་དྲྭ་ཐོག་བརྒྱུད་ཏོག་དབྱིབས་རིམས་ནད་ཁྱབ་གདལ་ཆེས་ཆེར་སོང་བའི་ནག་ཉེས་དང་དེའི་འགན་ཡོངས་རྫོགས་རྒྱ་གཞུང་གིས་ཁུར་དགོས་པའི་ལས་འགུལ་ཀྱང་སྤེལ་ཡོད་པ་རེད།ད་ལྟའི་ཆར་ཚོར་བ་རྣོ་བའི་ཛ་དྲག་དུས་སྐབས་འདིར་བོད་པ་ཙམ་མ་ཟད་རྒྱ་གར་ལ་དྭགས་ནས་ཡིན་པ་ཤེས་ཡོན་སློབ་གསོ་བ་དང་ཁོར་ཡུལ་སྲུང་སྐྱོབ་ལས་འགུལ་བ་བསོད་ནམས་དབང་ཕྱུག་ལགས་ཀྱིས་ Boycott China ཞེས་རྒྱ་ནག་གི་ཅ་དངོས་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་འབོད་སྐུལ་གྱི་ལས་འགུལ་དེར་རྒྱ་གར་མང་ཚོགས་མང་དག་ཅིག་གིས་ཚོར་ཤུགས་ཆེན་པོས་མཉམ་ཞུགས་གནང་བཞིན་ཡོད་པ་རེད།

འདས་ལོར་ཧོང་ཀོང་སྤྱི་ཁྱབ་ཀེ་རི་ལེམ་གྱིས་རྩོད་རྙོག་ཅན་གྱི་ཉེས་ཅན་རྩིས་སྤྲོིད་ཀྱི་ཁྲིམས་འཆར་འདོན་སྤེལ་བྱས་པ་དང་སྦྲགས་ཏེ་ཧོང་ཀོང་མང་ཚོགས་སྟོང་ཕྲག་མང་པོས་ཟླ་ཤས་རིང་དེར་ངོ་རྒོལ་གནང་བ་དང་ཕྱིས་སུ་ཁྲིམས་འཆར་དེ་ཕྱིར་འཐེན་བྱས་ཡོད་ཀྱང་། མང་ཚོགས་ཀྱིས་བསྟུད་མར་དགོས་འདུན་ཁག་ཅིག་ཆེད་འདོན་གྱིས་གཞུང་ལ་ངོ་རྒོལ་གནང་ཡོད་པ་རེད།ཉེ་ལམ་ཟླ་ ༦ ཚེས་ ༡༢ ཉིན་ཁྲིམས་འཆར་དེ་འདོན་སྤེལ་དང་མང་ཚོགས་ཀྱིས་ལོ་རྒྱུས་རང་བཞིན་ལྡན་པའི་ངོ་རྒོལ་གནང་ནས་ལོ་འཁོར་མོ་གཅིག་འཁོར་བར་ཧོང་ཀོང་མང་ཚོགས་ཀྱིས་དུས་ཚིགས་དེ་རྗེས་དྲན་ཞུས་པའི་ཐོག་བོད་མི་རྣམས་ཀྱིས་ལས་འགུལ་དེར་མཉམ་ཞུགས་གནང་འདུག ཕྱི་ཚེས་ ༡༢ ཉིན་ཧོང་ཀོང་གི་ Mong Kok ཁྲོམ་ར་དང་ Causeway Bay ཁུལ་དེ་བཞིན་ས་ཁུལ་གཞན་ཁག་ཏུ་དགོང་མོ་མང་ཚོགས་སྟོང་ཕྲག་འདུ་འཛོམས་ཀྱིས་ངོ་རྒོལ་གྱི་གླུ་གྱེར་ནས་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་སྤེལ་བྱས་ཏེ་ལོ་འཁོར་མོ་འཁོར་བའི་དུས་ཚིགས་དྲན་གསོ་ཞུས་ཡོད་པ་མ་ཟད། ལས་འགུལ་བ་རྣམས་ཀྱིས་རྒྱ་ནག་གཞུང་ལ་ངོ་རྒོལ་གྱི་འབོད་སྒྲ་སྣ་མིན་འཁོད་པའི་སྦྱར་པང་བསྣམས་ཏེ་ངོ་རྒོལ་གནང་ཡོད་ཀྱང་། ཉེན་རྟོག་པས་འདུ་འཛོམས་དེ་ཁྲིམས་འགལ་ཡིན་པར་ཉེན་བརྡ་བཏང་བ་དང་ཆབས་ཅིག་ལས་འགུལ་བ་ ༣༥ ལྷག་འཛིན་བཟུང་བྱས་འདུག དེ་ཉིན་ཉིན་དགུང་ཙམ་ལ་མི་བརྒྱ་ལྷག་འདུ་འཛོམས་ཀྱིས་ཧོང་ཀོང་ལ་རང་བཙན་དགོས་ཞེས་པའི་དར་ཆ་བསྣམས་འདུག་པ་དང་མང་ཚོགས་ནས་འཆི་རྒྱུར་ཞེད་སྣང་མེད་པས་གཞུང་ནས་དེ་འབྲེལ་གྱི་འཇིགས་སྐུལ་ཅི་ཕྱིར་བྱེད་ཀྱི་ཡོད་ཅེས་པའི་འཕྲེད་དར་སོགས་བསྣམས་ཏེ་ངོ་རྒོལ་བྱས་ཡོད་པ་རེད། གཞི་རྩའི་ཧོང་ཀོང་གི་ལས་འགུལ་ལ་བོད་མི་གཙོས་པའི་ཐེ་ཝན་དང་རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པ་ཁག་ནས་རྒྱ་གཞུང་ལ་སྐྱོན་བརྗོད་དང་འབྲེལ། ཧོང་ཀོང་གི་འཐབ་རྩོད་ལ་རྒྱབ་སྐྱོར་མུ་མཐུད་གནང་ཡོད་པ་དང་ཉེ་ལམ་ཡང་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་སྤེལ་གྱིས་ལོ་གཅིག་འཁོར་བའི་དུས་ཚིགས་སུ་ཐེ་ཝན་གྱི་རྒྱལ་ས་ཐེ་པེ་ནང་བོད་མི་གཙོས་ཚོགས་པ་འདྲ་མིན་ནས་ཉིན་མོ་དེ་རྗེས་དྲན་ཞུས་ཡོད་པ་དང་། ལས་འགུལ་ནང་མཉམ་ཞུགས་གནང་མཁན་བོད་མིས་བོད་ཀྱི་རྒྱལ་དར་བསྣམས་ཏེ་བོད་དང་ཤིན་ཅང་། ཧོང་ཀོང་། དེ་བཞིན་རྒྱ་ནག་ལ་རང་དབང་དགོས་ཞེས་པའི་སྦྱར་པང་སོགས་བསྣམས་འདུག  ལས་འགུལ་གོ་སྒྲིག་གནང་མཁན་ནས་དགོས་འདུན་བཞིའི་སྒོ་ནས་གསར་འགོད་བསྒྲགས་གཏམ་སྤེལ་འདུག་པ་དང་དེ་བརྒྱུད་ཧོང་ཀོང་ནི་ཧོང་ཀོང་གི་མི་རིགས་ལ་བདག་གི་ཡོད་པས་རྒྱ་གཞུང་ལ་ངེས་པར་དུ་ངོ་རྒོལ་བྱེད་དགོས། ཐེ་ཝན་ནས་ཧོང་ཀོང་གི་ཉེན་རྟོག་པར་ཐེ་ཝན་ནང་ཡོང་རྒྱུར་བཀག་འགོག་དང་དེ་བཞིན་ཐེ་ཝན་ནས་ཧོང་ཀོང་གི་ཡུལ་མི་ཁུལ་དེར་གནས་སྤོ་སླད་ད་ལྟ་ནས་གྲ་སྒྲིག་གནང་དགོས་ཞེས་བཤད་འདུག ཨོ་གླིང་གི་བྷིར་སི་བྷན་ནང་ཧོང་ཀོང་རྒྱབ་སྐྱོར་བ་ཨོ་གླིང་གི་མི་རིགས་དང་བོད་མི། དེ་བཞིན་ཡུ་གུར། ཝེ་ཏི་ནམ་སོགས་ནས་ཉིན་མོ་དེ་དྲན་གསོ་དང་སྦྲགས། རྒྱལ་སྤྱིའི་གཞུང་ཁག་ནས་རྒྱ་གཞུང་ནས་རྡོག་རོལ་གཏོང་བཞིན་པའི་བྱ་སྤྱོད་དེ་དག་ཐད་གང་ཡང་མ་གསུང་པར་བཞུགས་ན་འགྲིག་ཐབས་མེད་པ་དང་།  ད་ཆ་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་གཞུང་གི་འབྲེལ་ཡོད་ལས་བྱེད་རྣམས་ངེས་པར་དུ་འགན་ཁུར་བ་ཞིག་བཟོ་དགོས་པས་དེ་འབྲེལ་ཐད་ཨོ་གླིང་ནས་ Magnitsky Act ཞེས་པའི་ཁྲིམས་འཆར་གཏན་འབེབས་གནང་དགོས་ཞེས་གསུངས་ཏེ་དགོས་འདུན་ཆེད་བཏོན་གྱིས་ལས་འགུལ་སྤེལ་འདུག རྩ་བའི་ཧོང་ཀོང་མང་ཚོགས་ནས་འདས་ལོའི་ཟླ་བ་ ༦ པའི་ནང་ཉེས་ཅན་རྩིས་སྤྲོད་ཀྱི་ཁྲིམས་འཆར་ལ་ངོ་རྒོལ་གནང་སྟེ་རིམ་པས་ངོ་རྒོལ་དེ་དགོས་འདུན་བཞི་ཆེད་བཏོན་ཐོག་ངོ་རྒོལ་བསྟུད་མར་སྤེལ་ཀྱང་འདས་ལོར་ཟླ་མཇུག་ནས་རྒྱ་ནག་ཝུ་ཧན་གྲོང་ཁྱེར་ལས་ཏོག་དབྱིབས་གཉན་རིམས་ཁྱབ་གདལ་དུ་སོང་བ་དང་བསྟུན་བར་ལམ་ལས་འགུལ་མཚམས་འཇོག་བྱེད་དགོས་བྱུང་ཡོད་པ་རེད།  འོན་ཀྱང་ཉེ་ལམ་རྒྱ་ནག་གཞུང་ནས་ཧོང་ཀོང་བདེ་འཇགས་ཟེར་བའི་ཁྲིམས་འཆར་དེ་འདོན་སྤེལ་སྐབས་སླར་ཡང་ཧོང་ཀོང་ནང་མི་མང་གིས་ངོ་རྒོལ་ལས་འགུལ་དེ་དབུ་འཛུགས་གནང་ཡོད། སྤྱིར་རྒྱ་ནག་གི་ཁྲིམས་འཆར་གསར་པ་དེའི་ཐོག་རྒྱལ་སྤྱིའི་གཞུང་དང་ཚོགས་སྡེ་ཁག་ནས་སྐྱོན་བརྗོད་ཤུགས་ཆེ་བྱས་ཡོད་པ་དང་། རྒྱ་ནག་ནས་དུས་རྟག་ཏུ་ཧོང་ཀོང་གི་གནད་དོན་དེ་རྒྱ་ནག་ནང་མོལ་གྱི་གནད་དོན་ཡིན་པས་དེར་ཕྱི་ཕྱོགས་ནས་ཐེ་བྱུས་བྱེད་ཆོག་གི་མེད་ཅེས་བརྗོད་ཀྱི་ཡོད་པ་རེད། དེའི་ཁྲོད་བྱེས་བཞུགས་བོད་མི་ལས་འགུལ་བ་ཁག་ཅིག་གིས་རྒྱ་གཞུང་ནས་ཏོག་དབྱིབས་གཉན་རིམས་ཀྱི་དུས་ཚིགས་དམ་འཛིན་གྱིས་ཧོང་ཀོང་ཐོག་དབང་ཆ་དྲག་ཏུ་གཏང་རྒྱུ་བྱེད་བཞིན་ཡོད་པ་གསུངས་འདུག རྒྱ་གར་དུ་ཡོད་པའི་བོད་རང་བཙན་སློབ་ཕྲུག་ཚོགས་པའི་འགན་འཛིན་རིག་འཛིན་ཆོས་སྒྲོན་ལགས་ཀྱིས་རྒྱ་གཞུང་ནས་ཧོང་ཀོང་ཐོག་བཀོད་ཁྱབ་གཏོང་བའི་སྲིད་བྱུས་དེ་དག་བོད་ལྟ་བུའི་ནང་དེ་སྔ་ནས་བཀོལ་སྤྱོད་བྱས་ཡོད་པ་དང་། ད་ལྟའི་ཧོང་ཀོང་ནང་གི་གནས་སྟངས་དེ་དག་ང་ཚོའི་ངོས་ནས་ཡག་པོ་ཞིག་ཤེས་ཀྱི་ཡོད་སྟབས་ང་ཚོས་དུས་རྟག་ཏུ་ཧོང་ཀོང་གི་ལས་འགུལ་བ་ཚོར་རྒྱབ་སྐྱོར་བྱེད་ཀྱི་ཡོད་ཅེས་གསུངས་འདུགད་དུང་ཁོང་གིས་རྒྱ་གཞུང་ནས་བོད་མི་མང་གཙོ་དོན་གཉེར་བ་དང་ཁོར་ཡུག་སྲུང་སྐྱོབ་གནང་མཁན་ཡོངས་ཀྱི་འབོད་སྒྲ་ལ་སྣང་མེད་བཏང་དང་གཏོང་མུས་ཡིན་པ་དང་ཆབས་ཅིག་ཏུ་ད་ཆ་རྒྱ་གཞུང་ནས་གཉན་རིམས་ཀྱི་དུས་ཚིགས་དམ་འཛིན་གྱིས་ཧོང་ཀོང་གཙོས་བོད་དང་ཤར་ཏུར་ཀི་སི་ཏན་སོགས་ལ་དྲག་གནོན་ཇེ་ཆེར་བྱེད་བཞིན་ཡོད་པ་སོགས་གསུངས་འདུག དེ་མཚུངས་སུ་བོད་མིའི་ལས་འགུལ་ཁག་ཅིག་གིས་རྒྱ་ནག་ནས་ཧོང་ཀོང་བདེ་འཇགས་ཀྱི་ཁྲིམས་འཆར་གསར་པ་གཏན་འབེབས་བྱས་པ་དེ་རྒྱ་ནག་གི་སྲིད་འཛིན་ཞི་ཅིན་ཕིང་གིས་རིམ་བཞིན་རྒྱལ་ཁབ་གཞན་དབང་སྒྱུར་ཐབས་ཀྱི་སྲིད་བྱུས་འཛིན་པར་ངོས་འཛིན་དང་ལྷག་པར་དུ་ཐབས་བྱུས་འདི་ལྟ་བུ་ཞིག་གི་འོག་ནས་མང་གཙོ་དོན་གཉེར་བར་སྔར་ལྷག་དམ་དྲག་བྱེད་ངེས་ཡིན་པར་སེམས་ཚབས་ཆེན་པོ་གནང་བཞིན་འདུག

འདས་པའི་ལོ་འགའི་སྔོན་ནས་བཟུང་རྒྱ་ནག་གིས་རྨ་འབྲུ་རྫ་གསུམ་གྱི་མགོ་ཁུངས་སྲུང་སྐྱོབ་ཅེས་པའི་མིང་ཐོག་ནས་བོད་ཁུལ་གྱི་ཞིང་འབྲོག་མང་པོ་བཙན་ཤེད་ཀྱིས་གནས་སྤོ་བྱེད་དུ་འཇུག་བཞིན་པ་ལྟར་ད་ལྟའི་ཆར་བོད་མདོ་སྨན་ཁུལ་གྱི་མཚོ་སྔོན་པའི་ཉེ་འགྲམ་གྱི་འབྲོག་ཁྱིམ་མང་པོ་ཡང་རྒྱལ་ཁབ་རིམ་པའི་བཀའ་རྒྱ་བཏང་ནས་ས་གནས་ཀྱི་ཡུལ་མི་རྣམས་མཚོ་ཁ་ནས་གནས་སྤོ་བྱེད་དུ་འཇུག་བཞིན་པ་མ་ཟད་ཡུལ་སྐོར་སྤྲོ་འཁྱམ་གྱི་གནས་སུ་གྱུར་བའི་མཚོ་སྔོན་པོའི་ཉེ་འགྲམ་གྱི་ས་ཆ་མང་པོ་ཞིག་རྒྱ་ནག་སྲིད་གཞུང་གིས་བཙན་འཕྲོག་བྱས་ཏེ་རྒྱ་ནག་གི་ཚོང་པ་ཆེ་གྲས་ཚོར་ཚོང་བསྒྱུར་བྱེད་བཞིན་པ་ཡོད་པ་རེད།རླུང་འཕྲིན་ཁང་གིས་ཉེ་ཆར་བོད་ནས་གསར་དུ་ཕེབས་པའི་བོད་མི་ཞིག་ལ་དམིགས་བསལ་བཅར་འདྲི་ཞུས་པར་ ཁོང་གིས་ད་ལྟའི་བོད་མཚོ་སྔོན་ཁུལ་གྱི་འབྲོག་པ་རྣམས་ལ་ཕྱོགས་མང་པོ་ནས་དཀའ་ངལ་འཕྲད་བཞིན་ཡོད་པའི་ཁྲོད་ནས་ཁོར་ཡུག་སྲུང་སྐྱོབ་ཀྱི་དཀའ་ངལ། དཔལ་འབྱོར་གྱི་དཀའ་ངལ། ས་ཆའི་བདག་དབང་སོགས་ཀྱི་ཐད་ནས་དཀའ་ངལ་མང་པོ་འཕྲད་ཀྱི་ཡོད་པ་ངོ་སྤྲོད་དང་འབྲེལ།  ཁོར་ཡུག་སྲུང་སྐྱོབ་ཀྱི་ཐད་ནས་ས་གནས་ཀྱི་བོད་རིགས་ཡུལ་མི་རྣམས་ཀྱིས་རང་གི་ས་ཆར་བདག་གཅེས་ཀྱི་ཚོགས་པ་གསར་འཛུགས་བྱས་པར་རྒྱབ་ཁབ་ཀྱི་རྒྱབ་སྐྱོར་མེད་པ་དང་ཁུལ་དེར་རྒྱ་རིགས་མང་པོའི་ཁྲིམས་འགལ་གྱིས་ས་གནས་ཀྱི་ཉེན་རྟོག་པ་དང་ངན་པ་ལག་འབྲེལ་བྱས་ཡོད་སྟབས་བོད་རིགས་མང་ཚོགས་ཀྱིས་རྒྱ་ནག་མི་མང་ལ་རྒོལ་ལན་སློག་ཐུབ་ཀྱི་མེད་པ་དང་། གནས་ཚུལ་དེ་དང་འབྲེལ་ནས་མཚོ་སྔོན་པའི་ཆུ་ལ་འབག་བཙོག་ཤོར་བ་ཡིན་ན་རང་བཞིན་གྱིས་མཚོ་སྔོན་པོའི་ཁུལ་གྱི་རྩྭ་དང་རྩི་ཤིང་ལའང་གནོད་སྐྱོན་གྱིས་ས་བཅུད་ཉམས་ངེས་ཡིན་སྟབས། རྩྭ་ཐང་ལ་བརྟེན་པའི་ཕྱུགས་ཟོག་འཚོ་སྐྱོང་གི་ཐོག་ནས་ཀྱང་གནད་དོན་འབྱུང་གི་ཡོད་སྟབས་འབྲོག་པ་མང་ཚོགས་ལ་དཀའ་ངལ་འཕྲད་ཀྱི་ཡོད་སྐོར་ངོ་སྤྲོད་གནང་སོང་།དེ་བཞིན་ཁོང་གིས་མཚོ་སྔོན་པའི་འགྲམ་རྒྱུད་དེ་ད་ཆ་ཡུལ་སྐོར་སྤྲོ་འཁྱམ་གྱི་ལྟེ་གནས་གལ་ཆེན་ཞིག་ཏུ་གྱུར་ཡོད་རྐྱེན་རྒྱ་ནག་གིས་བཙན་དབང་གིས་ས་གནས་སུ་མཚོ་ངོས་ལས་ས་ཁྱོན་གང་འཚམས་ཤིག་ལ་ཕྱུགས་ཟོག་འཚོ་སྐྱོང་དང་སྒེར་གྱི་ཚོང་ལས་ཀྱི་ངོ་བོར་བསྒྱུར་མི་ཆོག་པའི་བཀའ་རྒྱ་བཏང་ནས་འབྲོག་པ་མང་ཚོགས་ཀྱི་རྩྭ་ས་བཙན་འཕྲོག་བྱས་ཏེ་མཚོ་སྔོན་པོའི་བྱ་གླིང་སོགས་ཀྱི་ས་ཚུགས་འདྲ་མིན་དུ་རྒྱ་ནག་སྲིད་གཞུང་རང་གི་ཡུལ་སྐོར་ལྟེ་གནས་གསར་འཛུགས་ཀྱིས་ཁུལ་དེར་ཡུལ་སྐོར་སྤྲོ་འཁྱམ་པ་སྟོང་ཕྲག་མང་པོ་ཉིན་རེ་བཞིན་ནང་འདྲེན་བྱས་པ་མ་ཟད། མི་གཅིག་ལ་སྒོར་ཉིས་བརྒྱ་ནས་སུམ་བརྒྱ་དང་དམིགས་བསལ་དུ་ཕྱི་གླིང་པ་རྣམས་ལ་རྒྱ་སྒོར་ལྔ་བརྒྱ་ནས་དྲུག་བརྒྱ་བྱས་ཏེ་འཛིན་བྱང་མང་པོ་བཙོང་བཞིན་ཡོད་པ་རེད་འདུག འོན་ཀྱང་བོད་མི་ས་བདག་རྣམས་ལ་དཔལ་འབྱོར་གྱི་ཐོན་ཁུངས་དེ་ལས་ཁེ་བཟང་གཅིག་ཀྱང་རག་གི་མེད་པ་དང་ས་བདག་རང་ཉིད་ཁུལ་དེར་ལྟ་སྐོར་དུ་སོང་ན་ངེས་པར་དུ་མི་གཞན་ལྟར་འཛིན་བྱང་ཉོ་དགོས་པ་མ་ཟད། གལ་ཏེ་བོད་རིགས་མང་ཚོགས་ཀྱིས་ཀྱང་ཡུལ་སྐོར་སྤྲོ་འཁྱམ་གྱི་གུར་སོགས་ཕུགས་ནས་དཔལ་འབྱོར་འཚོལ་སྒྲུབ་བྱས་པ་ཡིན་ན་ས་གནས་ཉེན་རྟོག་པས་ཡུལ་སྐོར་སྤྲོ་འཁྱམ་གྱི་འཛུགས་སྐྲུན་གྱི་ཆ་རྐྱེན་ཚང་མེད་པར་བསྙད་ནས་དཔལ་འབྱོར་འཚོལ་སྒྲུབ་བྱེད་དུ་འཇུག་གི་མེད་སྟབས་ས་གནས་ཀྱི་བོད་མི་རྣམས་ཀྱིས་རང་གི་ས་ཐོག་ནས་རྟ་དང་གཡག་རེ་ཟུང་ཡུལ་སྐོར་སྤྲོ་འཁྱམ་པ་རྣམས་ལ་པར་ལེན་པ་ལྟ་བུ་ལས་རང་གི་ས་ཆའི་ཐོན་ཁུངས་དང་འབྲེལ་བའི་གནད་འགག་ཆེ་བའི་ཚོང་ལས་གཅིག་ཀྱང་གཉེར་ཐུབ་ཀྱི་མེད་པ་ངོ་སྤྲོད་གནང་སོང་། ལྷག་དོན་ས་ཆའི་བདག་དབང་དང་འབྲེལ་བའི་དཀའ་ངལ་ཆེན་པོ་འཕྲད་བཞིན་པ་ཡོད་པ་ལྟར་མཚོ་སྔོན་པོའི་ཉེ་འགྲམ་ནས་ཡུལ་སྐོར་སྤྲོ་འཁྱམ་གྱི་ལྟེ་གནས་མང་པོ་ཡོད་ནའང་བོད་མི་ཞིག་གིས་ས་ཆ་བདག་བཟུང་བྱས་ནས་ཚོང་ལས་འཛུགས་སྐྲུན་བྱེད་ན་ངེས་པར་དུ་རྒྱ་ནག་སྲིད་གཞུང་གི་ཆོག་མཆན་དགོས་པར་བརྟེན་འཛུགས་སྐྲུན་གྱི་ལས་གཞི་གཉེར་ཐུབ་ཀྱི་མེད་པ་དང་། ཡུལ་སྐོར་ལྟེ་གནས་ཀྱི་ས་ཚུགས་གལ་ཆེན་ཁག་རྒྱ་ནག་གི་ཚོང་པ་ཆེན་པོ་རྣམས་ཀྱིས་སྲིད་གཞུང་དང་མཉམ་འབྲེལ་གྱིས་ཉོས་ཟིན་སྟབས་བོད་མི་རྣམས་ཀྱིས་རང་གི་ས་ཆའི་བདག་དབང་ཡོངས་རྫོགས་ཤོར་ཟིན་པར་བརྟེན་རང་བཞིན་གྱི་མཚོ་མཐའི་ས་ཆ་རྣམས་རྒྱ་ནག་གིས་བདག་བཟུང་བྱས་ཏེ་བོད་མི་རྣམས་མཐར་བགྲོད་གཏོང་གི་ཡོད་པ་ངོ་སྤྲོད་གནང་ཡོད།ཁོང་གིས་ད་དུང་ད་ལྟའི་ཆར་ཆོས་ལུགས་ཀྱི་ཤུགས་རྐྱེན་འོག་ནས་རྒྱ་ནག་གི་ཚོང་པ་ཆེན་པོ་རྣམས་ཀྱིས་མཚོ་ནང་དུ་གཏེར་མང་པོ་འཕེན་གྱི་ཡོད་པ་དང་། གཏེར་འཕེན་པ་དེ་ཚོང་རྫས་ཀྱི་ངོ་བོར་གྱུར་དུས་ས་རྡོ་སོགས་ཀྱིས་མཚོན་པའི་རྫས་འདྲ་མིན་ཆུ་ནང་དུ་ཤོར་གྱི་ཡོད་སྟབས་མཚོ་ལ་མི་གཙང་བ་ཆགས་ཀྱི་ཡོད་པ་དང་མཚོ་ལ་རྟེན་པའི་ཉ་རིགས་མང་པོ་ཤི་རྨས་སུ་འགྱུར་བཞིན་ཡོད་པ་མ་ཟད་མཚོ་འགྲམ་དུ་དྲི་ངན་དྲོ་བ་སོགས་ཀྱི་གནོད་པ་ཆེན་པོ་ཐེབས་བཞིན་ཡོད་པ་ངོ་སྤྲོད་གནང་སོང་།འདས་པའི་ལོ་ཤས་རིང་ནས་རྒྱ་ནག་གིས་བོད་ཁུལ་དུ་ཕྱུགས་སྐྱུར་རྩྭ་འདེབས་ཀྱི་སྲིད་བྱུས་ལག་བསྟར་གྱིས་འབྲོག་པ་མང་ཚོགས་ཀྱི་ཕྱུག་ཟོག་འཚོ་སྐྱོང་བྱེད་སའི་རྩྭ་ས་མང་པོ་ཁོར་ཡུག་སྲུང་སྐྱོབ་ཀྱི་མིང་ཐོག་ནས་བདག་བཟུང་བྱས་ཏེ་འབྲོག་པ་མང་ཚོགས་ལ་གུབ་གསབ་ཉུང་ངུ་སྤྲད་དེ་གྲོང་བརྡལ་དུ་གནས་སྤོ་བྱེད་བཞིན་ཡོད་སྟབས། བོད་ཁུལ་སྤྱི་ཡོངས་ནས་འབྲོག་ལས་ཀྱིས་མཚོན་པའི་རིག་གནས་ཀྱི་རྒྱབ་ལྗོངས་མང་པོ་ཞིག་རང་བཞིན་གྱིས་རྩ་བརླག་ཏུ་འགྲོ་བཞིན་པ་མ་ཟད་བོད་མིའི་སྲོལ་རྒྱུན་གྱི་འཚོ་བ་དང་སེམས་ཁམས། ཐ་ན་སྐད་ཡིག་ཚུན་ཆད་ཀྱང་རྒྱ་མིའི་ངོ་བོར་འགྱུར་བཞིན་ཡོད་པ་ཚོར་ཤུགས་ཆེན་པོས་ངོ་སྤྲོད་གནང་ཡོད།

ཉེ་ཆར་ཟླ་བ་འདིའི་ཕྱི་ཚེས་ ༡༡ ཉིན་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་གཙོ་སྐྱོང་གནང་ཐོག་བོད་ནང་གི་ཆེས་ཞན་པའི་ཆོས་དད་རང་དབང་གི་གནས་སྟངས་ཐོག་རྒྱལ་སྤྱིའི་ཆོས་དད་རང་དབང་མཐུན་སྒྲིག་ཚོགས་འདུ་ཐེངས་གཉིས་པ་ཚོགས་ཡོད་པ་དང་། དེའི་ནང་རྒྱ་གར་ལྷོ་ཕྱོགས་སྦེལ་ཀོབ་ཏུ་རྟེན་གཞི་བྱས་པའི་སེར་སྨད་གྲྭ་ཚང་གི་མཁན་རིན་པོ་ཆེ་དགེ་བཤེས་བཀྲིས་ཚེ་རིང་ལགས་དང་། ཨེ་མོ་རི་གཙུག་ལག་སློབ་གཉེར་ཁང་གི་དགེ་བཤེས་དགྲ་འདུལ་རྣམ་རྒྱལ་ལགས་བཅས་བོད་པའི་སྐུ་ཚབ་གཉིས་ཀྱིས་གཙོས་པའི་འཛམ་གླིང་རྒྱལ་ཁབ་འདྲ་མིན་ ༣༠ ཙམ་གྱི་སྐུ་ཚབ་ནས་མཉམ་ཞུགས་གནང་འདུག རྩ་བའི་རྒྱལ་སྤྱིའི་ཆོས་དད་རང་དབང་མཐུན་སྒྲིག་ལྷན་ཚོགས་འདི་སྐུ་ཞབས་ Sam Brownback མཆོག་གིས་སྣེ་ཁྲིད་པའི་འོག་སྔ་ལོའི་ཕྱི་ཟླ་ ༢ པའི་ནང་གསར་འཛུགས་གནང་བ་ཞིག་དང་འཛམ་གླིང་སྟོབས་ཆེན་རྒྱལ་ཁབ་རྣམས་ཀྱི་ནུས་པ་མཉམ་དཔུང་ཐོག་ཆོས་དད་རང་དབང་ལ་དམ་དྲག་བྱེད་མཁན་དག་ལ་གདོང་ལེན་དང་དྲག་རྩུབ་དང་མཉའ་གནོན་མྱོང་མཁན་རྣམས་ལ་སྲུང་སྐྱོབ་དང་འཛམ་གླིང་ཁྱོན་ཡོངས་ལ་ཆོས་དད་རང་དབང་གོང་འཕེལ་གཏང་ཕྱིར་གསར་འཛུགས་གནང་བ་ཞིག་རེད། སྔ་ལོར་མཐུན་སྒྲིགས་གསར་འཛུགས་དང་འབྲེལ་ཚོགས་འདུ་ཐེངས་དང་པོའི་ཐོག་ཨ་རིའི་ཕྱི་སྲིད་བློན་ཆེན་སྐུ་ཞབས་ Mike Pompeo མཆོག་ཆེད་ཕེབས་ཀྱིས་ཨ་རི་གཞུང་གིས་རྒྱལ་སྤྱིའི་ཆོས་དད་རང་དབང་མཐུན་སྒྲིག་དེ་འཛམ་གླིང་ཁྱོན་ཡོངས་སུ་ཆོས་དད་རང་དབང་གོང་འཕེལ་ཐད་ཧ་ཅང་གལ་ཆེན་པོ་ངོས་འཛིན་གནང་བཞིན་ཡོད་པ་སོགས་གསུངས་ཡོད་པ་རེད། སྐབས་དེར་སེར་སྨད་མཁན་པོ་དགེ་བཤེས་བཀྲིས་ཚེ་རིང་ལགས་ཀྱིས་བོད་ནང་གི་ཆེས་ཞན་པའི་ཆོས་དད་རང་དབང་གི་གནས་སྟངས་སྐོར་ངོ་སྤྲོད་དང་འབྲེལ། བོད་ནང་དུ་ནང་པའི་དགོན་སྡེ་ཁག་མང་དག་ཅིག་གཏོར་བཤིག་བཏང་དང་གཏོང་མུས་ལ་བོད་བརྒྱུད་ནང་བསྟན་གྱི་བསླབ་པ་སློབ་གཉེར་བྱེད་ས་མེད་པའི་དཀའ་ངལ་ཆེན་པོ་འཕྲད་བཞིན་པ་དང་བོད་བརྒྱུད་ནང་བསྟན་གྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཆོས་ཉན་པ་དང་༸སྐུ་པར་ཉར་བ་སོགས་ལ་ཡང་དམ་དྲག་གིས་འཛིན་བཟུང་བཙོན་འཇུག་བྱེད་བཞིན་ཡོད་པ་སོགས་མངོན་གསལ་གནང་འདུག དེ་བཞིན་སྐབས་དེར་དགེ་བཤེས་དགྲ་འདུལ་རྣམ་རྒྱལ་ལགས་གས་ཀྱིས་༸གོང་ས་མཆོག་གིས་ལམ་སྟོན་མཛད་པའི་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་གཉེར་བརྒྱུད་ནས་འཛམ་གླིང་ཁྱོན་ཡོངས་ལ་བྱམས་བརྩེ་གོང་འཕེལ་གཏོང་བཞིན་སྐོར་ངོ་སྤྲོད་དང་འབྲེལ། རྒྱ་གཞུང་གིས་བོད་རྒྱུད་ནང་བསྟན་རྩ་མེད་གཏོང་བཞིན་པ་དེས་བོད་མི་ཙམ་མ་ཡིན་པར་འཛམ་གླིང་ཁྱོན་ཡོངས་ལ་གྱོང་གུད་ཆེན་པོ་ཕོག་བཞིན་ཡོད་པ་སོགས་མངོན་གསལ་གནང་འདུག དེ་བཞིན་ཚོགས་བཅར་བའི་དྲི་བར་རྒྱ་གཞུང་གིས་བོད་མིའི་དད་གུས་ཤུགས་ཆེ་ཞུ་སའི་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་གུང་ལོ་ ༦ ལ་འཛིན་བཟུང་བཙོན་འཇུག་གིས་ད་བར་གར་སོང་ཆ་མེད་དུ་གྱུར་ནས་ལོ་ངོ་ ༢༥ ཙམ་འགྲོ་བཞིན་ཡོད་པ་སོགས་རྒྱ་གཞུང་ནས་བོད་ནང་བོད་མིའི་ཆོས་དད་རང་དབང་ལ་བརྩི་མེད་རྡོག་རོལ་ཇི་ལྟར་གཏོང་བཞིན་ཡོད་པ་སོགས་མངོན་གསལ་གནང་འདུག རྒྱལ་སྤྱིའི་ཆོས་དད་རང་དབང་མཐུན་སྒྲིག་ཚོགས་འདུ་འདི་མ་འཚོགས་པའི་ཉིན་གཅིག་གི་སྔ་རོལ་ཨ་རིའི་ཕྱི་སྲིད་ལས་ཁུངས་ཀྱི་ཕྱི་ལོ་ ༢༠༡༩ ལོའི་རྒྱལ་སྤྱིའི་ཆོས་དད་རང་དབང་གནས་སྟངས་ཐོག་ལོ་འཁོར་སྙན་ཐོ་འདོན་སྤེལ་གནང་བའི་ནང་དུ་རྒྱ་ནག་རྒྱལ་ཁབ་ཀྱི་རྩ་ཁྲིམས་ནང་མང་ཚོགས་ལ་ཆོས་དད་རང་དབང་ཡོད་པ་བཀོད་ཡོད་ཀྱང་། ཆོས་མེད་སྨྲ་བའི་རྒྱ་ནག་དམར་ཤོག་གཞུང་གིས་ བོད་མི་དང་ཡུ་གུར་བ་སོགས་གྲངས་ཉུང་མི་རིགས་གཙོ་བོར་གྱུར་པའི་མང་ཚོགས་ཀྱི་ཆོས་དད་རང་དབང་ལ་དྲྭ་རྒྱའི་ལྟ་སྲུང་དང་མཉེན་ཆས་སོགས་བརྒྱུད་ནས་དམ་དྲག་བྱེད་ཀྱི་ཡོད་པ་དང་། ལྷག་པར་དུ་བོད་ནང་བོད་པའི་དགོན་སྡེ་ཁག་ཏུ་ཀྲུང་གོའི་ཁྱད་ཆོས་ལྡན་པའི་ནང་ཆོས་ཞེས་ཆབ་སྲིད་སློབ་གསོ་སྤེལ་བཞིན་པ་དང་དགོན་སྡེ་ཁག་གི་བཏང་འཛིན་ཡོངས་རྫོགས་ལ་བྱུས་གཏོགས་བྱས་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གཙོ་གྱུར་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་བདམ་རྒྱུའི་སྲིད་བྱུས་ལག་བསྟར་བྱེད་བཞིན་པ་སོགས་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་མངོན་གསལ་གནང་ཡོད་པ་རེད། ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Samuel Brownback མཆོག་གིས་རྒྱ་ནག་གཞུང་གིས་མི་རིགས་དབྱེ་འབྱེད་དང་དམ་དྲག་སོགས་ཀྱི་སྲིད་བྱུས་ལག་བསྟར་བྱས་པ་མ་ཟད་རང་གི་གྲངས་ཉུང་མི་རིགས་ཐོག་ངོ་གདོང་ར་ཕྲོད་ཀྱི་འཕྲུལ་ཆས་དང་ལྟ་སྲུང་མཉེན་ཆས། དེ་བཞིན་དྲྭ་ཐོག་ Social Crediting System ཞེས་གཞུང་ལ་དགའ་ཞེན་ཇི་ཙམ་ཡོད་མེད་ལ་དཔག་པའི་འཚོ་བའི་གནས་སྟངས་ཇི་ཆགས་ཐག་གཅོད་བྱས་ཡོད་པ་སོགས། དྲག་གནོན་ཞེས་པའི་མ་འོངས་གནས་བབས་གང་ཆགས་རྒྱུ་ཡིན་པ་རྒྱ་གཞུང་གིས་ད་ལྟ་ནས་གསལ་འདོན་གནང་གི་ཡོད་པ་གསུངས་ཡོད།

རིང་མིན་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲདས་ ༨༥ ལ་ཕེབས་པའི་༸སྐུའི་འཁྲུངས་སྐར་དུས་ཆེན་སླེབས་ལ་ཉེ་བ་དང་བསྟུན་ཁ་སང་དགོང་དྲོའི་ཆུ་ཚོད་ ༩ ཐོག་རྒྱ་གར་གྱར་གྱི་ NDTV གསར་ཁང་ཆེད་འཛུགས་གནང་མཁན་གསར་འགོད་པ་རྒན་གྲས་སྐུ་ཞབས་ Prannoy Roy ལགས་ཀྱི་མགོན་པོ་༸གང་ཉིད་མཆོག་ལ་དམིགས་བསལ་བཅར་འདྲི་ཞུས་པའི་ལེ་ཚན་ཞིག་རྒྱང་བསྲིངས་ཞུས་ཡོད་པ་དང་། ལེ་ཚན་དེའི་ཐོག་གསར་འགོད་པས་མགོན་པོ་༸གང་ཉིད་མཆོག་ལ་༸སྐུའི་འཁྲུངས་སྐར་ལ་འཚམས་འདྲི་ཞུས་པར་མགོན་པོ་མཆོག་ནས་ངའི་ཕྱིའི་ལུས་པོ་འདི་རྒྱ་གར་གྱི་འབྲས་དང་དྷ་ལིས་འཚར་བ་ཞིག་ཡིན་པ་མ་ཟད། ནང་གི་ཀླད་པ་དང་བསམ་བློ་དེ་དག་རྒྱ་གར་ནས་དར་བའི་དཔལ་ནཱ་ལེནྡཱའི་རིག་གཞུང་ལ་བརྟེན་ནས་འཚར་བ་ཞིག་ཡིན་སྟབས། ང་ནི་རྒྱ་གར་གྱི་བུ་ཞིག་ཡིན་ལ་དེ་ལ་སྤོབས་པ་ཡང་ཡོད་ཅེས་བཀའ་བསྩལ་ཡོད།  དེ་བཞིན་གསར་འགོད་པས་མགོན་པོ་༸གང་ཉིད་མཆོག་གིས་འདས་པའི་ལོ་དུས་མང་པོའི་རིང་ལ་ནང་ཆོས་དང་ཚན་རིག་དབར་གྱི་འབྲེལ་བའི་སྐོར་མཛད་རྫེས་བསྐྱངས་པའི་ཐད་ལ་བཀའ་འདྲི་ཞུས་པར་མགོན་པོ་༸གང་ཉིད་མཆོག་ནས་སྤྱིར་ཚན་རིག་གྱི་ཐོག་ནས་ཕྱི་དངོས་པའི་གནས་ལུགས་ལ་དོ་སྣང་ཆེ་བ་གནང་གི་ཡོད་ཀྱང་། དུས་རབས་ཉི་ཤུའི་མཇུག་ཙམ་ནས་ཚན་རིག་པ་མི་ཉུང་བ་ཞིག་གིས་ནང་ཆོས་ནས་གསུངས་པའི་སེམས་ཁམས་ཀྱི་རྣམ་གཞག་ཐོག་ལ་དམིགས་བསལ་གྱི་དོ་སྣང་དང་དེ་ནས་རིམ་པས་ཚད་རྡུལ་དངོས་ཁམས་རིག་པའི་ཚན་རིགས་མཁས་པ་ཚོས་ཀྱང་ནང་ཆོས་ནང་གསུངས་པའི་གཞི་དངོས་པོའི་གནས་ལུགས་དང་། རྟེན་འབྲེལ་གྱི་རྣམ་གཞག་སོགས་ཀྱི་ཐད་དམིགས་བསལ་དོ་སྣང་གསར་པ་གནང་ཐུབ་པ་བྱུང་ཡོད་པར་བཀའ་བསྩལ་འདུག ལྷག་པར་དུ་སྐབས་དེའི་བཀའ་ལན་ལས་འཕྲོས་ཏེ་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་ལྷན་སྐྱེས་སུ་ཡོད་པའི་བྱམས་བརྩེ་དང་སྙིང་རྗེའི་སེམས་ཚོར་དེ་དག་ཕྱིའི་སྣང་ཚུལ་ཙམ་མིན་པར་འགྲོ་བ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་མཁན་གཅིག་མཚུངས་ཡིན་པ་དེ་ཡང་སེམས་ཀྱི་ཀུན་སློང་དང་རྒྱུ་མཚན་ཡང་དག་ལ་བརྟེན་ནས་བྱུང་གི་ཡོད་པ་དང་། ཁོང་ཁྲོ་དང་འཇིགས་སྣང་། དེ་བཞིན་ཕྲག་དོག་སོགས་སེམས་ཚོར་དྲག་པོའི་ཆ་དེ་དག་ཞིབ་ཏུ་བརྟག་ན་མིའི་བསམ་བློའི་སྒྲོ་འདོགས་ལ་བརྟེན་པ་ཞིག་ཡིན་སྟབས་དེ་ལ་གཞི་རྩ་གང་ཡང་ཡོད་མ་རེད་ཅེས་བཀའ་བསྩལ་འདུག གསར་འགོད་པས་ད་ལྟའི་ཏོག་དབྱིབས་རིམས་ནད་ཀྱི་དཀའ་ངལ་གཙོས་ཛ་དྲགས་ཀྱི་གནད་དོན་མང་པོ་ཞིག་བེུད་འགོ་ཁྲིད་ཚོས་གདོང་ལེན་བཟང་བ་གནང་བཞིན་པའི་སྐོར་བཀའ་འདྲི་ཞུས་པར་མགོན་པོ་༸གང་ཉིད་མཆོག་ནས་ང་ཚོས་འདས་པའི་རྒྱལ་རབས་ལ་ཕྱིར་བལྟ་ཞིག་གནང་ན་མི་བསད་ཁྲག་སྦྱོར་གྱི་དོན་རྐྱེན་མང་དག་ཅིག་སྐྱེས་པའི་འགོ་ཁྲིད་ཐོག་ནས་བྱུང་བ་ཞིག་ཡིན་པར་ཡོངས་གྲགས་ཡིན་པ་དང་། དོན་དངོས་ཐོག་བསམ་བློ་འཁྱེར་སྟངས་ཡང་དེང་སྐབས་ཚན་རིག་མཁས་པ་ཚོས་ཀྱང་བེུད་རྣམས་ལ་འགྲོ་བ་མིའི་རང་བཞིན་ལྷན་སྐྱེས་སུ་ཡོད་པའི་བྱམས་བརྩེ་དང་གཞན་ཕན་གྱི་བསམ་་བློ་ཆེ་བ་ཡོད་པ་ཡོངས་གྲགས་སུ་གནང་བཞིན་པ་དང་། ང་རང་ཚོའི་མིའི་མི་ཚེའི་ནང་མཚོན་ཡང་ཨ་མ་ནི་ལྷད་མེད་བྱམས་བརྩེའི་བདག་ཉིད་ཡིན་པ་སོགས་བཀའ་འགྲེལ་དང་སྦྲགས། འཛབ་གླིང་འདིའི་ཐོག་བེུད་ཀྱི་འགོ་ཁྲིད་མང་བ་འཐོན་ཐུབ་ན་འཚེ་བ་དང་འབྲེལ་བའི་དཀའ་ངལ་རྣམས་ཉུང་དུ་གཏང་ཐུབ་ངེས་ཡིན་པ་བཀའ་བསྩལ་འདུག དེ་བཞིན་སྐབས་དེར་༸གོང་ས་མཆོག་གིས་༸སྐུའི་ཐུགས་བསྐྱེད་དམ་བཅའ་བཞི་དང་འབྲེལ་བཀའ་ལན་མཛད་སྐབས་འཛམ་གླིང་འདིའི་ཐོག་འཕྲད་བཞིན་པའི་དཀའ་ངལ་མང་དག་ཅིག་ངའི་རྒྱལ་ཁབ་དང་ངའི་ཆོས་སོགས་བདག་འཛིན་གྱི་བསམ་བློ་ཆེ་དྲགས་པའི་དབང་གིས་ཡོང་གི་ཡོད་པར་བཀའ་བསྩལ་དང་ཆབས་ཅིག ང་ཚོ་ཚང་མས་བསམ་བློ་རྙིང་པ་དེ་དོར་ཏེ་འགྲོ་བ་མི་གཅིག་གྱུར་བསམ་བློ་གོང་མཐོར་གཏོང་དགོས་གལ་ཡིན་པ་དང་། ཆོས་ལུགས་མཐུན་འབྲེལ་གི་ཆ་ནས་རྒྱ་གར་འདི་འཛམས་གླིང་ཐོག་དམིགས་དཔེ་འོས་པ་ཞིག་ཡིན་རེད་ཅེས་བཀའ་བསྩལ་འདུག ༸སྐུའི་ཐུགས་བསྐྱེད་གསུམ་པ་བོད་ཀྱི་རིག་གཞུག་དང་ཁོར་ཡུལ་སྲུང་སྐྱོབས་ཀྱི་གནད་དོན་དང་འབྲེལ། བོད་འདི་འཛམ་གླིང་གི་མཐོ་སྒང་ཞེས་བཤད་སྲོལ་ཡོད་པ་ལྟར། བོད་ཀྱི་རྒྱུག་ཆུ་ཆེ་ཁག་རྣམས་རྒྱ་གར་དང་པ་ཀི་སི་ཏན། དེ་བཞིན་རྒྱ་ནག་སོགས་ཨེ་ཤ་ཡའི་རྒྱལ་ཁབ་ཁག་གི་ཆུའི་འབྱུང་ཁུངས་ཆགས་ཀྱི་ཡོད་སྟབས། བོད་ཀྱི་སྣོད་བཅུད་ཆགས་སྟངས་དང་ཁོར་ཡུག་གི་གནས་བབས་སྲུང་སྐྱོབ་ཐད་མགོན་པོ་༸གང་ཉིད་མཆོག་ནས་དམིགས་བསལ་ཐུགས་སྣང་མཛད་བཞིན་པ་ལྟར་མང་ཚོགས་རྣམས་ནས་ཀྱང་དེའི་ཐོག་དགོངས་པ་བཞེས་རྒྱུ་གལ་ཆེན་པོ་ཡིན་པར་ལམ་སྟོན་མཛད་འདུག ལྷག་པར་དུ་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་པ་སྟེ་རྒྱ་གར་གྱི་གནའ་བོའི་རིག་གཞུང་བསྐྱར་གསོ་མཛད་རྒྱུ་དེ་ནི་དེང་གི་འཛམ་གླེང་འདིར་དགོས་མཁོ་ཡོད་པ་ཞིག་ཡིན་པ་དང་། ཐུན་མོང་མ་ཡིན་པའི་རིག་གནས་དེ་དག་ཐོག་མར་རྒྱ་གར་ནས་དར་བ་ཞིག་ཡིན་ཡང་རྒྱ་གར་གྱི་མི་རབས་གསར་པ་ཚོས་དེའི་ཐོག་དེ་ཙམ་དོ་སྣང་མ་གནང་བར་ཕྱི་དངོས་པོར་དོ་སྣང་ཆེ་བ་གནང་བཞིན་ཡོད་པ་སོགས་བཀའ་འགྲེལ་དང་སྦྲགས། རྒྱ་གར་གྱི་མི་རབས་གསར་པ་ཚོས་ཐུན་མོང་མ་ཡིན་པའི་རིག་གནས་དེ་ལ་དོ་སྣང་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་ཕྱི་རྒྱལ་ནས་དེར་བའི་རྒྱ་གར་གྱི་ཤེས་ཡོན་སློབ་གསོ་ལ་འགྱུར་བ་ཞིག་བཏང་ནས་དེང་དུས་ཀྱི་ཤེས་ཡོན་དང་གནའ་བོའི་རིག་གནས་ནང་གསུངས་པའི་སེམས་ཁམས་ཀྱི་རྣམ་གཞག་དང་བྱམས་བརྩེའི་ཉམས་ལེན་སོགས་སོགས་ཟུང་འབྲེལ་ཐོག་ནས་སློབ་ཁྲིད་གནང་ཐུབ་ན་དང་ཐོག་རྒྱ་གར་ནང་དང་དེ་ནས་རྒྱལ་སྤྱི་ལ་དམིགས་དཔེ་བསྟན་ཐུབ་ངེས་རེད་ཅེས་ལམ་སྟོན་མཛད་འདུག དེ་བཞིན་སྐབས་བཅར་འདྲིའི་ཁྲོད་༸གོང་ས་མཆོག་གི་༸སྐུའི་འཕྲོད་བཞེས་དང་མགོན་པོ་༸གང་ཉིད་མཆོག་ཐོག་མར་བཙན་བྱོལ་དུ་ཕེབས་སྐབས་སོགས་ཀྱི་ལོ་རྒྱུས་དྲན་གསོ་གནང་བ་དང་འབྲེལ། མགོན་པོ་༸གང་ཉིད་མཆོག་ནས་ད་ལྟའི་ཆར་༸སྐུ་གཟུགས་གསལ་ཐང་ཡིན་པ་མ་ཟད། གཟིགས་ལམ་དང་མཚན་མ་ཁག་ལ་གཞིགས་ན་དགུང་ལོ་ ༡༡༣ བར་བཞུགས་རྒྱུའི་ཐུགས་རེ་ཡོད་ཅེས་བཀའ་བསྩལ་ཡོད་པ་དང་། སྐབས་དེར་གསར་འགོད་པ་རྒན་གྲས་སྐུ་ཞབས་ Prannoy Roy ལགས་ཀྱིས་མགོན་པོ་༸གང་ཉིད་མཆོག་དགུང་གྲངས་ ༡༡༣ ལས་མང་བ་བཞུགས་རོགས་ཞེས་གསོལ་འདེབས་ཞུས་ཡོད་པ་དང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ Okay ཞེས་བཀའ་བཞེས་བཟང་པོ་སྨིན་བསྩལ་མཛད་པ་དང་ཆབས་ཅིག དེ་ལྟར་ཡོང་བར་རྒྱ་གར་གྱི་གྲོགས་པོ་རྣམས་ནས་རྒྱ་གར་གྱི་གནའ་བོའི་རིག་གནས་བསྐྱར་གསོ་མཛད་རྒྱུའི་དགོངས་བཞེད་ཐོག་འབད་བརྩོན་གནང་རོགས་ཞེས་ནན་སྐུལ་མཛད་ཡོད་པ་རེད། ཕྱོགས་མཚུངས་ཉེ་ཆར་དབྱིན་ཇིའི་གསར་ཁང་ BBC ཡི་ངོས་ནས་ཀྱང་བརྙན་འཕྲིན་བརྒྱུད་༸གོང་ས་མཆོག་ལ་དམིགས་བསལ་བཀའ་འདྲི་ཞུས་པའི་ལེ་ཚན་ཞིག་རྒྱང་སྲིང་ཞུས་འདུག་པ་དང་། དེའི་ནང་༸གོང་ས་མཆོག་གིས་འགྲོབ་མི་གཅིག་གྱུར་གྱི་འདུ་ཤེས་གོང་མཐོར་གནང་གལ་སོགས་ཀྱི་ལམ་སྟོན་མཛད་པ་མ་ཟད། ལྷག་པར་དུ་ད་ལྟ་ཏོག་དབྱིབས་རིམས་ནད་ཁྱབ་གདལ་གྱི་ཛ་དྲག་དུས་སྐབས་འདིར་གོ་ལ་ཁྱོན་ཡོངས་ལ་དཀའ་ངལ་ཆེན་པོ་འཕྲད་བཞིན་ཡོད་ཀྱང་། ཕྱོགས་གཞན་ཞིག་ནས་དཀའ་ངལ་ཆེ་བའི་དུས་སྐབས་འདིར་སོ་སོའི་བདེ་སྡུག་བློས་བཏང་གནང་སྟེ་གཞན་ལ་ཕན་པ་བསྒྲུབ་རྒྱུའི་བློ་རྒྱ་འཕར་མ་ཞིག་བྱུང་ཡོད་པ་སོགས་བཀའ་བསྩལ་འདུག  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ཆར་ས་ག་ཟླ་བའི་ཚེས་པ་ ༡༥ ཉིན་བཞུགས་སྒར་༸རྒྱལ་བའི་ཕོ་བྲང་ནས་བརྙན་འཕྲིན་བརྒྱུད། སོག་པོ་སྤྱི་མཐུན་རྒྱལ་ཁབ་ཀྱི་རྒྱལ་ས་ཨུ་ལན་བྷ་དྷར་དུ་ཚོགས་པའི་རྒྱལ་སྤྱིའི་ནང་པོའི་ཆོས་ཚོགས་ཀྱི་ཚོགས་བཅར་བ་དད་ལྡན་ཡོངས་ལ་བཀའ་སློབ་བཀའ་དྲིན་སྩལ་བ་དང་སྦྲགས། སངས་རྒྱས་ཀྱི་བསྟན་པ་བཤད་སྒྲུབ་ཟུང་འབྲེལ་གྱི་ཐོག་ནས་འཛིན་སྐྱོང་གནང་དགོས་པའི་ལམ་སྟོན་བཀའ་དྲིན་ཆེ་བ་བསྩལ་འདུག མགོན་པོ་༸གང་ཉིད་མཆོག་གིས་སྟོན་པ་སངས་རྒྱས་བཅོམ་ལྡན་འདས་ཀྱིས་ངའི་ཆོས་འདི་བྱང་ནས་བྱང་དུ་དར་ཡོང་ཞེས་བཀའ་སྩལ་ཡོད་པ་ལྟར་འདས་པའི་ལོ་དུས་ནང་ལ་སོག་པོའི་ཡུལ་དུ་ཕ་མེས་རྣམས་ཀྱིས་ནང་ཆོས་ལ་དམིགས་བསལ་དོ་སྣང་གནང་སྟེ་མཁས་པ་མང་པོ་ཐོན་ཡོད་པ་མ་ཟད། མཁས་པ་དེ་དག་གིས་སངས་རྒྱས་བསྟན་པ་སྤྱི་དང་ལྷག་པར་དུ་དཔལ་ནཱ་ལེནྡྲའི་་ཆོས་བརྒྱུད་ལ་ཞབས་འདེབས་རླབས་པོ་ཆེ་བསྒྲུབས་ཡོད་པ་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ད་ལྟའི་ཆར་དཔལ་ནཱ་ལེནྡྲའི་ཆོས་བརྒྱུད་འདིར་འཛམ་གླིང་སྤྱི་ཡོངས་ནས་དོ་སྣང་གསར་པ་ཞིག་སླེབས་བཞིན་ཡོད་སྟབས། སོག་པོའི་ཆོས་གྲོགས་རྣམས་ནས་སངས་རྒྱས་ཀྱི་བསྟན་བཤད་སྒྲུབ་ཟུང་འབྲེལ་གྱི་ཐོག་ནས་འཛིན་སྐྱོང་གནང་དགོས་པའི་ལམ་སྟོན་མཛད་པ་དང་ཆབས་ཅིག སོག་ཡུལ་དུ་ཡོད་པའི་དགོན་པ་ཁག་ཙམ་མིན་པར་མི་སྐྱ་ཕོ་མོ་ཚོས་ཀྱང་ནང་པའི་ལྟ་གྲུབ་ཀྱི་རྣམ་གཞག་ཐོག་སློབ་གཉེར་གནང་ཐུབ་ན་དགེ་མཚན་ཆེན་པོ་ཡོད་པ་བཀའ་བསྩལ་འདུག མགོན་པོ་༸གང་ཉིད་མཆོག་གིས་ནང་ཆོས་ནང་གསུངས་བའི་བློ་རིག་དང་རྟགས་རིག་གི་རྣམ་གཞག་དེ་དག་ས་གནས་ཀྱི་སློབ་གྲྭ་ཁག་ཏུ་ཤེས་ཡོན་གྱི་ངོ་བོའི་ཐོག་ནས་སློབ་ཁྲིད་གནང་ཐུབ་ན་སློབ་མའི་མི་ཚེ་ལ་དོན་དངོས་ཀྱི་ཕན་ཐོགས་འབྱུང་ངེས་ཡིན་པ་མ་ཟད། སོག་པོ་ཧོར་གྱི་ཡུལ་ལ་ཨེ་ཤ་ཡའི་ཁུལ་དུ་ཡོད་པའི་ནང་པའི་རྒྱལ་ཁབ་དང་། དེ་ནས་རིམ་པས་རྒྱལ་སྤྱིར་ནང་ཆོས་ཀྱི་ཤེས་ཡོན་ཐོག་ནས་ཕན་ཐོགས་བསྒྲུབ་རྒྱུའི་གོ་སྐབས་ལྡན་ཡོད་སྟབས། རྒྱལ་སྤྱིའི་ནང་པོའི་ཆོས་ཚོགས་ལྟ་བུའི་ཚོགས་ཆེན་བརྒྱུད་ག་ཚོད་ཐུབ་ཐུབ་ཀྱིས་ཕན་ཐོགས་སྒྲུབ་དགོས་བ་སོགས་ལམ་སྟོན་མཛད་འདུག གཞི་རྩའི་ས་ག་ཟླ་བའི་དུས་ཚིགས་ཁྱད་པར་ཅན་དང་བསྟུན་སོག་ཡུལ་དུ་ཚོགས་པའི་རྒྱལ་སྤྱིའི་ནང་པོའི་ཆོས་ཚོགས་ཐོག་སོག་པོའི་མཁན་རིན་པོ་ཆེ་དབུས་དད་ལྡན་མི་ཉུང་བ་ཞིག་ལྷན་ཞུགས་གནང་འདུག