རྒྱལ་སྤྱི།

དེ་རིང་ཕྱི་ཟླ་ ༡༠ ཕྱི་ཚེས་ ༡ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་གསར་འཛུགས་བྱས་པའི་རྒྱ་ནག་གི་རྒྱལ་སྟོན་ཉིན་མོ་ཐེངས་ ༧༢ སྲུང་བརྩི་བྱེད་བཞིན་པ་དང་བསྟུན་བཞུགས་སྒར་དུ་རྟེན་གཞི་བྱས་པའི་རྒྱ་གར་བོད་རང་བཙན་སློབ་ཕྲུག་ཚོགས་པ་དང་བོད་རྒྱལ་ཡོངས་མང་གཙོ་ཚོགས་པ་གཉིས་ཟུང་འབྲེལ་གྱིས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་བ་དང་སྦྲགས། དེ་རིང་གི་ཉིན་མོ་འདི་ནི་སྲུང་བརྩི་ཞུ་རྒྱུ་ཞིག་མིན་པར་མྱ་ངན་གྱི་ཉིན་མོ་ཞིག་རེད་ཅེས་གསུངས་ཡོད།དེ་རིང་ཆུ་ཚོད་ ༡༢ ཙམ་ལ་བཞུགས་སྒར་གྱི་བྷག་སུ་ཁུལ་དུ་ཆགས་པའི་ Zip Line སྟེང་ཐོག་ Down with China, Free Tibet Now རྒྱ་ནག་ཉམས་རྒྱུད་དུ་སོང་ཤིག བོད་ལ་རང་དབང་རང་བཙན་དགོས་ཞེས་འཁོད་པའི་ཕྲེད་དར་འཕྱར་ཏེ་རྒྱ་ནག་གཞུང་གིས་ད་བར་བོད་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་དང་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གཏོང་བཞིན་པའི་བྱ་སྤྱོད་ཁག་འཕྲལ་མར་མཚམས་འཇོག་དགོས་པའི་ངོ་རྒོལ་གྱི་ལས་འགུལ་སྤེལ་སོང་། སྐབས་དེར་རྒྱ་གར་བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་བསྟན་འཛིན་པ་སངས་ལགས་ཀྱིས་དེ་རིང་གི་ཉིན་མོ་འདིར་རྒྱ་ནག་གཞུང་ནས་དགའ་སྟོན་གྱི་ངོ་བོར་སྲུང་བརྩི་བྱེད་བཞིན་ཡོད་ཀྱང་རྒྱ་ནག་དམར་ཤོག་སྲིད་གཞུང་གི་བཙན་འོག་ཏུ་ཡོད་པའི་བོད་དང་ཤིན་ཅང་། ཧོང་ཀོང་། ཐེ་ཝན་སོགས་ལ་ཆ་མཚོན་ན་མྱ་ངན་གྱི་ཉིན་མོ་ཞིག་ཆགས་ཀྱི་ཡོད་ཅེས་གསུངས་པ་དང་ཆབས་ཅིག རྒྱ་ གཞུང་ནས་བོད་མིའི་ཆབ་སྲིད་རང་དབང་འཕྲོག་པ་མ་ཚད་པར་འགྲོ་བ་མིའི་ཐབ་ཐང་ཁག་ལ་བརྩི་མེད་རྡོག་རོལ་མུ་མཐུད་ནས་གཏོང་བཞིན་ཡོད་པ་སོགས་ཐེར་འདོན་གནང་སྟེ་དེ་རིང་གི་ཉིན་མོ་བརྒྱུད་ནས་འགྲོ་བ་མིའི་ཐོབ་ཐང་ལ་བརྩི་སྲུང་མི་བྱེད་མཁན་རྒྱ་ནག་རྒྱལ་ཁབ་ནང་འཚོགས་གཏན་འཁེལ་བའི་ཨོ་ལམ་པིག་རྩེད་འགྲན་དེར་མཐའ་གཅིག་ཏུ་ངོ་རྒོལ་ཡོད་ཅེས་གསུངས་ཡོད།   དེ་བཞིན་བོད་རྒྱལ་ཡོངས་མང་གཙོ་ཚོགས་པའི་ལས་དྲུང་བཀྲིས་དོན་གྲུབ་ལགས་ཀྱིས་རྒྱ་ནག་གཞུང་གིས་རྒྱབ་ཤ་དཀར་པོའི་ཡིག་ཆ་རེ་འདོན་སྤེལ་བྱས་ཏེ་བོད་ཞི་བའི་བཅིངས་འགྲོལ་བཏང་བ་ཡིན་ཟེར་བ་དང་བོད་ནང་འཛུགས་སྐྲུན་རྒྱ་བསྐྱེད་བཏང་ཡོད་ལུགས་སོགས་བརྗོད་བཞིན་པ་དེ་ནི་འཁྱོག་བཤད་འབའ་ཤིག་ཡིན་པར་གསུངས་པ་དང་འབྲེལ་ཏེ། རྒྱལ་སྤྱིའི་མང་ཚོགས་ཀྱི་ངོས་ནས་རྒྱ་གཞུང་གིས་ད་ཆ་བོད་ནང་གི་དགོན་སྡེ་གྲྭ་ཚང་དང་སློབ་གྲྭ་ཁག་སྒོ་རྒྱག་བཞིན་པའི་བྱ་སྤྱོད་ཁག་ལ་གཟིགས་ནས་མ་བཞུགས་པར་ངལ་བ་དེ་སེལ་ཐབས་སུ་རྒྱབ་སྐྱོར་གནང་རོགས་ཞེས་འབོད་སྐུལ་ཞུས་སོང་། ཚོགས་ཁག་གཉིས་ཀྱིས་དེ་རིང་གི་ཉིན་མོ་དང་བསྟུན་སྤྱི་བསྒྲགས་ཤིག་སྤེལ་བར་ཕྱི་ལོ་ ༡༩༤༩ ལོར་རྒྱ་ནག་གཞུང་གིས་བོད་ནང་བཙན་འཛུལ་བྱས་པ་ནས་བཟུང་ད་བར་བོད་མི་ས་ཡ་གཅིག་ལྷག་གི་གནས་སྟངས་གང་ཡིན་ཤེས་རྟོགས་མེད་པར་གྱུར་བ་དང་། རྒྱ་གཞུང་གིས་ལག་བསྟར་བྱེད་བཞིན་པའི་རྒྱ་མི་རིགས་ཀྱི་ངོ་བོར་བསྒྱུར་རྒྱུའི་སྲིད་བྱུས་འོག་བོད་མིའི་རིག་གཞུང་དང་ངོ་བོ་བཅས་པ་རྩ་མེད་དུ་གཏོང་བཞིན་པ་སོགས་འགྲེལ་བརྗོད་དང་སྦྲགས། རྒྱལ་སྤྱིའི་སྲིད་གཞུང་ཁག་མཉམ་འབྲེལ་གྱིས་རྒྱ་ནག་གཞུང་གི་བྱེད་བབ་ལ་བརྡ་ལན་ནན་པོ་གཏོང་དགོས་པ་སོགས་འཁོད་འདུག དེ་རིང་བཞུགས་སྒར་ཙམ་མིན་པར་དབྱིན་ཡུལ་གཙོས་རྒྱལ་སྤྱིའི་ས་གནས་གཞན་ཁག་ཏུའང་བོད་མི་དང་ཡུ་གུར་བ། དེ་བཞིན་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་མཁན་སོགས་ཀྱིས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་རེད། གཞི་རྩའི་རྒྱ་ནག་གི་རྒྱལ་སྟོན་ཉིན་མོ་ཟེར་བ་དང་བསྟུན་ཁ་སང་བོད་མིའི་སྒྲིག་འཛུགས་ཀྱིས་དེ་སྔ་ཕྱི་ཟླ་ ༥ པའི་ནང་བོད་ཐོག་སྤེལ་བའི་རྒྱབ་ཤ་དཀར་པོའི་ཡིག་ཆར་ལན་འདེབས་དང་སྦྲགས་ཏེ་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་ནས་བོད་རྒྱའི་དཀའ་རྙོག་སེལ་འདོད་ཀྱི་བསམ་བློ་ཞིག་ཡོད་ཚེ་བོད་དང་འབྲེལ་བའི་འཁྱོག་བཤད་དྲིལ་བསྒྲགས་རིགས་སྤེལ་མཚམས་འཇོག་དགོས་པར་གསུངས་ཡོད།

དེ་རིང་སྔ་དྲོ་ཕྱག་ཚོད་ ༡༠ སྟེང་། ས་རཱབོད་ཀྱི་མཐོ་རིམ་རིག་གནས་སློབ་གཉེར་ཁང་གི་ཚོགས་ཁང་དུ། རྒྱལ་སྤྱིའི་ནང་པའི་ལྷན་ཚོགས་དང་རྒྱ་གར་གྱི་རིག་གཞུང་ལྷན་ཚོགས། དེ་བཞིན་བཞུགས་སྒར་གྱི་མཚན་ཉིད་གྲྭ་ཚང་གསུམ་གྱི་གོ་སྒྲིག་འོག  དཔལ་ནཱ་ལནྡཱའི་མཛད་རྗེས་དང་འབྲེལ་བའི་བསླབ་པ་སློབ་གཉེར་དང་ཉམས་ལེན་སོགས་ཀྱི་བརྗོད་གཞིའི་ཐོག་ཚོགས་འདུ་ཞིག་བསྡུ་སྐོང་གནང་སོང་།དེའང་རྒྱ་གར་གཞུང་གི་ངོས་ནས་འདི་ལོའི་ཕྱི་ཟླ་ ༡༡ ནང་རྒྱ་གར་གྱི་སྦི་ཧར་མངའ་སྡེའི་ནང་དུ་རྒྱལ་སྤྱིའི་རང་བཞིན་ལྡན་པའི་ནང་པའི་ལྷན་ཚོགས་ཤིག་འཚོགས་གཏན་འཁེལ་བ་དང་བསྟུན། བཞུགས་སྒར་རྡ་རམ་ས་ལ་གཙོས་པའི་རྒྱ་གར་རྒྱལ་ནང་གི་ས་ཁུལ་ལྔ་དང་། གཞན་ཡང་ཕྱིའི་རྒྱལ་ཁབ་ཁག་ཅིག་གི་ནང་དུ་སྔོན་འགྲོའི་ཚོགས་འདུ་ཁག་ཅིག་འཚོགས་འཆར་ཡོད་པ་ལྟར། རྡ་སའི་ཁུལ་གྱི་དེ་རིང་གི་ཚོགས་འདུ་དེ་ནི་ལས་གཞི་དེའི་ཆ་ཤས་ཤིག་ཆགས་ཀྱི་ཡོད་པ་རེད། དེ་རིང་གི་ཚོགས་འདུའི་ཐོག་ཏུ།  སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱི་དྲུང་ཆེ་འཆི་མེད་ཚེ་དབྱངས་ལགས་དང་།རྒྱལ་སྤྱིའི་ནང་པའི་ལྷན་ཚོགས་ཀྱི་དྲུང་ཆེ་འབུམ་རམས་པ་ Dhammapiyaལགས། དེ་བཞིན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། གཞན་ཡང་རྡ་ས་རིག་སློབ་དང་ས་རཱ་མཐོ་སློབ་མ་ལག་གཉིས་ཀྱི་སྤྱི་ཁྱབ་འགན་འཛིན་དགེ་བཤེས་བསམ་བརྟན་རྒྱ་མཚོ་ལགས་སོགས་ཀྱི་དབུ་བཞུགས་ཀྱི་ཐོག  ཕྱི་ནང་གི་འབྲེལ་ཡོད་དོན་གཉེར་བ་མི་གྲངས་བཞི་བཅུ་ལྷག་གིས་མཉམ་ཞུགས་གནང་སོང་།རྒྱལ་སྤྱིའི་ནང་པའི་ལྷན་ཚོགས་ཀྱི་དྲུང་ཆེ་མཆོག་གིས་སྐབས་དེར་དེ་རིང་གི་ཚོགས་འདུ་དེ་ངོ་སྤྲོད་དང་འབྲེལ་།འཇིག་རྟེན་གྱི་སྟེང་དུ་མི་ཙམ་མ་ཡིན་སྐྱེ་འགྲོ་རིགས་གྲངས་ལས་འདས་པ་ཞིག་ཡོད་པར་ལུང་འདྲེན་གྱིས། ནང་ཆོས་ཀྱི་སྙིང་པོ་དངོས་ནི་འགྲོ་བ་མིའི་རིགས་ཀྱིས་མི་ཙམ་མ་ཡིན་པར་སྐྱེ་འགྲོ་ཡོངས་ཀྱི་འཚོ་གནས་ལ་རྒྱབ་སྐྱོར་གྱིས་གཅིག་ལ་གཅིག་རྟེན་གྱི་འཇིག་རྟེན་འདི་ཕུན་སུམ་ཇེ་ཚོགས་སུ་བཏང་སྟེ། ཚང་མ་ཞི་བདེ་ངང་མཉམ་གནས་བྱེད་རྒྱུ་དེ་ཡིན་པར་གསུངས་སོང་། དེ་བཞིན་སྐབས་དེར་དགེ་བཤེས་ལྷག་རྡོར་ལགས་ཀྱིས་ཀྱང་གཏམ་བཤད་གནང་བའི་ནང་དུ། བོད་ཀྱི་བླ་ན་མེད་པའི་དབུ་ཁྲིད། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ལོ་ངོ་བཅུ་ཕྲག་གི་རིང་ལ་རྒྱ་གར་གྱི་གནའ་བོའི་རིག་གཞུང་བསྐྱར་གསོ་བྱེད་ཐབས་ལ་མཛད་པ་བསྐྱངས་ཡོད་པ་དང་སྦྲགས་ནས། དཔལ་ནཱ་ལནྡཱའི་བསླབ་པ་སློབ་གཉེར་གྱི་རིམ་པ་དེ་ཡང་མགོན་པོ་གང་ཉིད་མཆོག་གི་མཛད་འགན་དེའི་ཆ་ཤས་ཤིག་ཡིན་པར་གསུངས་ཏེ་ཚང་མས་གནད་དོན་དེར་ཤུགས་སྣོན་གྱིས་སློབ་སྦྱོང་བྱེད་དགོས་བའི་དུས་ལ་བབ་ཡོད་པའི་གསུངས་བཤད་གནང་ཡོད། འདི་གའི་གསར་འགོད་པའི་དེ་རིང་གི་ཚོགས་འདུ་དེའི་གལ་གནད་དང་འབྲེལ་ནས་དགེ་བཤེས་ལྷག་རྡོར་ལགས་སུ་བཀའ་འདྲི་ཞུས་པར་ཁོང་གིས་ལོ་ཤས་ཀྱི་གོང་ནས་རྒྱ་གར་གཞུང་གིས་ནང་ཆོས་སྤྱི་ཡོངས་ཀྱི་གཙོ་བྱས་པའི་དཔལ་ནཱ་ལནྡཱར་དོ་སྣང་བྱེད་ཤུགས་ཆེ་རུ་ཕྱིན་ཡོད་པ་དང་འབྲེལ་ནས། གཅིག་ནས་དཔལ་ནཱ་ལནྡཱའི་གཞུང་ལུགས་ཁག་རིག་པས་གཏན་ལ་ཕབ་པ་ཞིག་ཡིན་སྟབས་དེང་རབས་ཀྱི་སྤྱི་ཚོགས་ནང་དགོས་མཁོ་ཞིག་ཆགས་ཡོད་དང་ཕྱོགས་གཞན་ཞིག་ནས་རྒྱ་ནག་གིས་བོད་ནང་གི་དགོན་པ་གྲྭ་ཚང་ཁ་ལ་ཁྱེར་ནས་ནང་ཆོས་ཀྱི་བདག་དབང་དེ་རྒྱ་ནག་ལ་ཡོད་པར་བསྙད་འདོགས་བྱེད་བཞིན་པ་དེར་སྲིད་བྱུས་རང་བཞིན་གྱིས་ཁ་གཏད་ལྟ་བུ་ཞིག་གི་ཐོག་ནས་ནང་ཆོས་དང་འབྲེལ་བའི་ལས་གཞི་རྒྱ་བསྐྱེད་བྱེད་བཞིན་པ་ཞིག་ཀྱང་ཡིན་སྲིད་པར་གསུངས་སོང་། གཞན་ཡང་ཁོང་གིས་དེང་གི་དུས་སུ་དཔལ་ནཱ་ལནྡཱའི་ཆོས་བརྒྱུད་དེར་་ཉམས་པ་སླར་གསོ་དང་མི་ཉམས་གོང་སྤེལ་གནང་མཁན་དངོས་དེ་བོད་པའི་དགོན་སྡེ་ཁག་ཆགས་ཡོད་པ་དང་འབྲེལ་ནས། སྔོན་ཆད་རྒྱ་གར་གྱི་གནད་ཡོད་དཔོན་རིགས་ཤིག་གིས་ཀྱང་དགེ་བཤེས་ལགས་སུ་དཔལ་ནཱ་ལནྡཱའི་ཆོས་བརྒྱུད་ཀྱི་བདག་པོ་ངོ་མ་དེ་བོད་མི་ཚོ་ཆགས་ཡོད་སྟབས་བོད་མི་རྣམས་ཀྱིས་དེ་ཉིད་ཁྱབ་སྤེལ་གཏོང་དགོས་བར་སྐུལ་མ་གནང་ཡོད་པ་དྲན་གསོ་གནང་བ་ལུང་འདྲེན་གྱིས། བོད་མི་རྣམས་ཀྱིས་གོ་སྐབས་ནམ་ཤར་ལ་ནང་ཆོས་དང་འབྲེལ་བའི་རྒྱལ་སྤྱིའི་ཚོགས་ཆེན་ཁག་གི་ནང་དུ་མཉམ་ཞུགས་གནང་དགོས་བ་གལ་ཆེན་པོ་ཡིན་པར་གསུངས་སོང་། དེ་བཞིན་ཐེངས་འདིའི་ཚོགས་ཆེན་ཐོག་མཉམ་ཞུགས་གནང་མཁན་གྱི་རྒྱ་གར་བ་ཞིག་གིས་རྒྱ་གར་གྱི་ནང་དུ་དཔལ་ནཱ་ལནྡཱའི་ཆོས་བརྒྱུད་ཀྱི་མཚོན་པའི་གནའ་བོའི་རྒྱ་གར་གྱི་རིག་གནས་དེ་བསྐྱར་གསོ་བྱ་རྒྱུ་གལ་ཆེན་པོ་ཡིན་ལུགས་དང་འབྲེལ་ནས། བོད་བརྒྱུད་ནང་བསྟན་གྱི་གཞུང་ལུགས་ཁག་རྒྱ་གར་གྱི་སྐད་ཡིག་ཐོག་བསྒྱུར་ཐབས་གནང་རྒྱུ་གལ་འགངས་ཆེན་པོ་ཡིན་པར་གསུངས་སོང་། དེ་རིང་གི་ཉིན་གཅིག་རིང་གི་ཚོགས་འདུ་དེའི་ཐོག  ཕྱི་ནང་གི་འབྲེལ་ཡོད་ཀྱི་ཆེད་མཁས་པ་ཁག་ཅིག་གིས་ཉིན་རྒྱབ་ཏུ་བརྗོད་གཞི་སྣ་མང་ཞིག་གི་ཐོག་གཏམ་བཤད་སྤེལ་ཡོད་པའི་ཁོངས་སུ། དཔལ་ནཱ་ལནྡཱའི་ཆོས་བརྒྱུད་བོད་དུ་དར་ཁྱབ་བྱུང་བའི་སྐོར་དང་། ནང་པའི་ཀུན་སྤྱོད། དེ་བཞིན་དུས་རབས་ཉེར་གཅིག་ནང་གི་དཔལ་ནཱ་ལནྡཱའི་ཆོས་བརྒྱུད་ཀྱི་དགོས་མཁོ་སོགས་ཀྱི་ཐད་ནས་གསུངས་བཤད་གནང་ཡོད་པ་རེད།གཞི་རྩའི་ཐེངས་འདིའི་དཔལ་ནཱ་ལནྡཱའི་མཛད་རྗེས་དང་འབྲེལ་བའི་ཚོགས་འདུ་དེ་ནི་རྒྱ་གར་དབུས་གཞུང་གི་མཐུན་འགྱུར་གྱི་འོག་ཏུ་རྒྱལ་སྤྱིའི་ས་ཁུལ་དགུ་ཙམ་གྱི་ནང་དུ་འཚོགས་འཆར་ཡོད་པའི་ཁྲོད།  ཚོགས་འདུ་དེ་ཀོ་རི་ཡ་དང་ཐེ་ལན་ཊི། དེ་བཞིན་འཇར་པན་དང་ཀཱམ་བྷོ་ཊི་ཡ། དེ་བཞིན་རྒྱ་གར་གྱི་ནང་སོགས་སུ་འཚོགས་འཆར་ཡོད་པའི་ཁོངས་སུ། རྒྱ་གར་གྱི་ནང་དུ་ཡང་བཞུགས་སྒར་རྡ་རམ་ས་ལ་དང་ལྡི་ལི་སོགས་ཀྱི་མཚོན་པའི་ས་གནས་ལྔ་ནས་ཚོགས་འདུ་དེ་འཚོགས་རྒྱུ་ཡིན་པ་དང་། ཚོགས་ཆེན་དངོས་དེ་འདི་ལོའི་ཟླ་བ་༡༡ ནང་བྷི་ཧར་མངའ་སྡེ་ནང་འཚོགས་རྒྱུ་རེད་འདུག

རྒྱ་ནག་གཞུང་གིས་འཛིན་བཟུང་བྱས་པའི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་དང་གྲྭ་རིན་ཆེན་ཚུལ་ཁྲིམས་ལགས་རྣམ་གཉིས་ཀྱི་གནད་དོན་ཐད་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཁག་བཞིར་ལན་འདེབས་བྱས་པ་དེ་ནི་འགྲོ་བ་མིའི་ཐོབ་ཐང་ཚོགས་པ་ཁག་གིས་ཆབ་སྲིད་བཙོན་པ་རྣམ་གཉིས་ཀྱི་གནད་དོན་ཐོག་ད་བར་བློ་འཚབ་གནང་བ་དེ་རྒྱུ་མཚན་ལྡན་པ་ཞིག་ཡིན་པར་ར་འཕྲོད་བྱུང་སྐོར་མངོན་གསལ་གནང་འདུགརྒྱལ་སྤྱིའི་བོད་དོན་ལས་འགུལ་ཁང་གིས་གྲྭ་རིན་ཆེན་ཚུལ་ཁྲིམས་ལགས་རྒྱ་གཞུང་གིས་ཕྱི་ལོ་ ༢༠༡༩ ལོར་འཛིན་བཟུང་གིས་སྔ་ལོའི་ཟླ་ ༡༡ ནང་ཁ་བྲལ་ལ་བརྒྱུད་སྐུལ་གྱི་ཉེས་འཛུགས་འོག་ལོ་བཞི་དང་ཟླ་བ་དྲུག་གི་བཙོན་འཇུག་ཁྲིམས་ཐག་བཅད་ཡོད་པ་དང་སྐབས་དེར་རྒྱ་གཞུང་གིས་ཁོང་ལ་རྒྱ་ནག་གི་སྤྱི་ཚོགས་དྲ་ལམ་ Wechat ཞེས་པའི་སྐད་འཕྲིན་གླེང་སྟེགས་ཐོག་སྤེལ་བའི་གནས་ཚུལ་ཞིག་བརྒྱུད་སྤེལ་གནང་བ་བརྒྱུད་རྒྱལ་ཁབ་ཀྱི་ཆིག་སྒྲིལ་དང་བདག་དབང་། སྤྱི་ཚོགས་བརྟན་ལྷིང་སོགས་ལ་ཉེན་ཁ་བཟོས་ཡོད་ཚུལ་བརྗོད་ཡོད་པ་དེ་ལྟར་ཡང་ཉེ་ཆར་རྒྱ་གཞུང་དེ་འབྲེལ་གནད་དོན་ཐོག་རྒྱལ་ཚོགས་ཀྱི་ཆེད་མཁས་མི་སྣར་ལེན་འདེབས་བྱས་པའི་ནང་དུ་གྲྭ་རིན་ཆེན་ཚུལ་ཁྲིམས་ལགས་ཀྱིས་སྐད་འཕྲིན་ཐོག་སྤེལ་བའི་གནས་ཚུལ་དེ་རྒྱ་ནག་གི་ཁྲིམས་དང་འགལ་ཡོད་ཚུལ་ལ་བདེན་དཔང་ར་སྤྲོད་ཐུབ་མེད་པར་གསལ་བཏོན་གནང་བ་མ་ཟད། ད་ཆ་མང་ཚོགས་ཁྲོད་ཡོངས་གྲགས་གནང་བའི་འཕྲིན་སྟེགས་ཀྱི་གནས་ཚུལ་དེའི་ནང་ཁྲིམས་མཐུན་གྱི་སྨྲ་བརྗོད་དང་བསམ་བརྗོད་རང་དབང་བཅས་ཀྱི་གནད་དོན་ཡིན་པས་དེ་དག་རྒྱལ་སྤྱིའི་ཁྲིམས་དང་མཐུན་པ་ཞིག་ཡིན་པར་ནན་བརྗོད་གནང་འདུག རྒྱ་གཞུང་གིས་རྒྱལ་ཚོགས་ཀྱི་ཆེད་ལས་མི་སྣར་གྲྭ་རིན་ཆེན་ཚུལ་ཁྲིམས་ལགས་དང་རྩོམ་པ་པོ་སྒོ་ཤེས་རབ་རྒྱ་མཚོ་ལགས་རྣམ་གཉིས་ཀྱི་གནད་དོན་ཐད་ལན་འདེབས་གནང་བར་རྒྱ་གཞུང་གིས་གྲྭ་རིན་ཆེན་ཚུལ་ཁྲིམས་ལགས་སུ་ཁྲིམས་བཤེར་རྒྱུད་རིམ་ཀྱི་ཐོབ་ཐང་དང་འབྲེལ་བའི་དགོས་ངེས་ཀྱི་མཐུན་རྐྱེན་སྦྱོར་ཡོད་ཀྱང་བདེན་པར་ར་སྤྲོད་བྱ་རྒྱུར་ལམ་ལྷོངས་བྱུང་མེད་ཚུལ་བཀོད་འདུག འོན་ཀྱང་དེའི་རྒྱབ་འགལ་དུ་རྒྱལ་སྤྱིའི་བོད་དོན་ལས་འགུལ་ཁང་གིས་འགྲེལ་བརྗོད་གནང་བར་གྲྭ་རིན་ཆེན་ཚུལ་ཁྲིམས་ལགས་ཀྱི་ཁྲིམས་བཤེར་དེ་ཡོངས་གྲགས་ཤིག་མིན་པའི་ཁར་ཁོང་ལ་ཁྲིམས་ཀྱི་འགྲོ་ལུགས་གཞིར་བཞག་གི་ཁྲིམས་རྩོད་པ་གླ་མི་ཆོག་པ་མ་ཟད། ཁོང་འཛིན་བཟུང་བྱས་ནས་ད་ཆ་ལོ་གཉིས་ལྷག་འགྲོ་མུས་ཁྲོད་ཁོང་གི་ནང་མི་ཉེ་འབྲེལ་རྣམས་ནས་ཁོང་དང་ཐུག་འཕྲད་རྩ་བ་ནས་གནང་ཐུབ་ཀྱི་མེད་པའི་གནས་ཚུལ་སོགས་ལུང་འདྲེན་གནང་སྟེ། དེ་ནི་རྒྱལ་སྤྱིའི་ཁྲིམ་ལྟར་བཀག་སྐྱིལ་བྱེད་པོའི་ཐོབ་ཐང་ལ་བརྩི་མེད་རྡོག་རོལ་བཏང་བ་ཞིག་མཚོན་གྱི་ཡོད་པར་མངོན་གསལ་གནང་འདུག དེ་བཞིན་གཞིས་བཞུགས་རྩོམ་པ་པོ་སྒོ་ཤེས་རབ་རྒྱ་མཚོ་ལགས་ཀྱི་གནད་དོན་དང་འབྲེལ་ཏེ་རྒྱལ་སྤྱིའི་བོད་དོན་ལས་འགུལ་ཁང་ནས་རྒྱ་གཞུང་གིས་རྩོམ་པ་པོ་ཁོང་ལའང་ཁ་བྲལ་ལ་བརྒྱུད་སྐུལ་བྱས་པའི་དོགས་གཞིའི་འོག་ཁྲིམས་འགལ་གྱི་དོ་དམ་བཀག་ཉར་འོག་བཞག་ཡོད་པ་དང་འདི་ལོའི་ཕྱི་ཟླ་ ༡ ནང་རྒྱ་ནག་གི་གྲོང་ཁྱེར་ཁྲིན་ཏུ་རུ་བོད་ལྗོངས་ལྷ་ས་གྲོང་ཁྱེར་གྱི་འབྲིང་རིམ་མི་མང་ཁྲིམས་ཁང་ནས་ཁོང་གི་གནད་དོན་ཐད་ཁྲིམས་བཤེར་བྱས་ཀྱང་དེ་འབྲེལ་གྱི་དཔྱད་ཁྲ་གང་ཡང་བཏང་མེད་པ་མ་ཟད། རྒྱ་གཞུང་གིས་སྒོ་ཤེས་རབ་ལགས་ཀྱི་ནང་མི་ཉེ་འབྲེལ་ཚོར་ཁོང་དང་འབྲེལ་བའི་གནས་ཚུལ་ཁག་མཁོ་སྤྲོད་བྱས་ཡོད་ཚུལ་བཀོད་ཡོད་ཀྱང་དོན་དངོས་ཐོག་བཙོན་འཇུག་གི་དོན་རྐྱེན་གང་ཡིན་ཤེས་རྟོགས་མེད་པའི་ཁར་རྒྱ་གཞུང་གིས་ཁོང་གི་ནང་མི་རྣམས་ལ་དེ་འབྲེལ་གནས་ཚུལ་གསང་རྒྱ་དགོས་པ་དང་སྒོ་ཤེས་རབ་རྒྱ་མཚོ་ལགས་ཀྱི་གནད་དོན་དང་འབྲེལ་བའི་བདེན་དཔང་ར་སྤྲོད་ཀྱི་གནས་ཚུལ་མང་དག་ཅིག་གསང་ཉར་བྱེད་བཞིན་པ་མ་ཟད། ཐེངས་འདིའི་རྒྱ་གཞུང་གི་ལན་འདེབས་དེའང་ཁོང་གི་འགལ་ཟླར་སྤྱོད་བཞིན་པའི་བདེན་དཔང་ར་སྤྲོད་རྣམས་དང་མཐུན་གྱི་མེད་པ་དེ་ནི་ངེས་པར་དུ་དོ་སྣང་གནང་འོས་ཤིག་རེད་ཅེས་ནན་སྐུལ་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གིས་ད་རེས་རྒྱ་གཞུང་གིས་གྲྭ་རིན་ཆེན་ཚུལ་ཁྲིམས་ལགས་དང་རྩོམ་པ་པོ་སྒོ་ཤེས་རབ་རྒྱ་མཚོ་ལགས་རྣམ་གཉིས་ཀྱི་གནད་དོན་ཐད་ལེན་འདེབས་བྱས་པའི་དགོས་དམིགས་གཙོ་བོ་ནི་རྒྱ་གཞུང་གིས་ཁོང་གཉིས་ལ་རང་གི་སྨྲ་བརྗོད་དང་བསམ་བརྗོད་རང་དབང་བཅས་ཞི་བའི་ངང་ལོངས་སུ་སྤྱོད་པར་རང་སྣང་གང་དྲན་གྱིས་འཛིན་བཟུང་བྱས་པ་དེ་རེད་ཅེས་གསུངས་ཏེ་གྲྭ་རིན་ཆེན་ཚུལ་ཁྲིམས་ལགས་གང་མགྱོགས་གློད་བཀྲོལ་དགོས་པ་དང་དེ་བཞིན་སྒོ་ཤེས་རབ་རྒྱ་མཚོ་ལགས་གར་ཡོད་གནས་སྟངས་གསལ་བཟོ་དགོས་པ་མ་ཟད། ཉེས་མེད་ཉེས་འཛུགས་རྣམས་བདེན་དཔང་ར་སྤྲོད་མ་ཐུབ་ཚེ་གང་མགྱོགས་གློད་བཀྲོལ་དགོས་སྐོར་ནན་བརྗོད་གནང་སྟེ་རྒྱལ་སྤྱིའི་བོད་དོན་ལས་འགུལ་ཁང་གི་རྒྱལ་ཚོགས་ནང་གི་ཁྲིམས་དོན་ཞུ་གཏུག་འགན་འཛིན་སྐུ་ཞབས་ Kai Mueller ལགས་ཀྱིས་ཁོང་གཉིས་ཀྱི་གནད་དོན་དེས་རྒྱའི་བཙོན་འཇུག་འོག་ཡོད་པའི་བོད་མི་ཆབ་སྲིད་བཙོན་པ་མང་དག་ཅིག་གི་གནད་དོན་མཚོན་གྱི་ཡོད་སྟབས། རྒྱལ་སྤྱིའི་ཚོགས་སྡེ་ཁག་དང་གཞུང་། དེ་བཞིན་མཉམ་འབྲེལ་རྒྱལ་ཚོགས་སོགས་ཀྱིས་རྒྱ་གཞུང་ལ་གྲྭ་རིན་ཆེན་ཚུལ་ཁྲིམས་ལགས་དང་སྒོ་ཤེས་རབ་རྒྱ་མཚོ་ལགས་རྣམ་གཉིས་གང་མགྱོགས་གློད་བཀྲོལ་བཏང་ནས་བོད་མིའི་སྨྲ་བརྗོད་རང་དབང་དང་བསམ་བརྗོད་རང་དབང་། ཆོས་ལུགས་དད་མོས་རང་དབང་སོགས་ངེས་སྲུང་དགོས་པའི་དགོས་འདུན་ཤུགས་ཆེ་གནང་ཡོད།

རྒྱ་ནག་གི་མཐའ་དམག་བརྒྱ་ལྷག་རྒྱ་གར་བྱང་ཕྱོགས་ཀྱི་ Uttarakhand མངའ་སྡེ་ཁུལ་གྱི་འཕགས་བོད་ས་མཚམས་སུ་སིམ་འཛུལ་གྱིས་Barahoti ཞེས་པའི་ས་ཁུལ་དེར་ཡོད་པའི་ཟམ་ཆེན་ཞིག་གཏོར་བཅོམ་བཏང་ཡོད་པའི་གནས་ཚུལ་ཐོན་འདུགཁ་ཉིན་རྒྱ་གར་གྱི་ Economic Times ཞེས་པའི་གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གི་མཐའ་དམག་བརྒྱ་ལྷག་ Uttarakhand མངའ་སྡེ་ཁུལ་གྱི་ Tunjun ཞེས་པའི་ལ་བརྒྱུད་ནས་ཁུལ་དེའི་འཕགས་བོད་ས་མཚམས་སུ་སྤྱི་ལེ་ལྔ་ཙམ་བརྒལ་ནས་རྒྱ་གར་གྱི་ས་ཁོངས་སུ་བསླེབས་ཏེ་ཁུལ་དེའི་འཛུགས་སྐྲུན་ལས་གཞིར་གཏོར་བཅོམ་བཏང་རྗེས།  རྒྱ་གར་གྱི་ཕར་རྒོལ་མ་བྱས་གོང་ནས་ཕྱིར་ལོག་བྱས་ཡོད་པར་འཁོད་འདུག གསར་ཁང་གིས་རྒྱ་གར་གྱི་བདེ་སྲུང་གི་གནས་ཚུལ་ཡོང་ཁུངས་བརྒྱུད་དེ་ཤེས་རྟོགས་བྱུང་བའི་ནང་དུ།  རྒྱ་ནག་གི་བཅིངས་གྲོལ་དམག་མི་དེ་དག་གིས་མཐའ་མཚམས་ཁུལ་དུ་རྟ་ ༥༥ ལྷག་ཞོན་ནས་བསླེབས་ཡོད་པ་མ་ཟད། རྒྱ་གར་གྱི་ས་ཁོངས་སུ་འཛུལ་ནས་ཆུ་ཚོད་གསུམ་ལྷག་གི་རིང་བསྡད་དེ་ཁུལ་དེར་འཛུགས་སྐྲུན་བྱས་ཡོད་པའི་ཟམ་པ་ཞིག་གཏོར་བཅོམ་བཏང་ཡོད་པ་ལྟར། རྒྱ་གར་གྱིས་འཕགས་བོད་མཐའ་མཚམས་ཀྱི་མཐའ་དམག་ཁུལ་དེར་ཆེད་གཏོང་གི་གནས་ཚུལ་དེར་རྒྱུས་ལོན་བྱེད་བཞིན་པ་རེད་འདུགBarahoti ཞེས་པ་དེ་ Uttarakhand མངའ་སྡེ་ཡི་ Chamoli ཞེས་པའི་རྫོང་དུ་ཆགས་ཡོད་པ་དང་། ཕྱི་ལོ་ ༢༠༡༧ ལོར་ཡང་རྒྱ་ནག་གིས་འབྲོག་ལམ་གྱི་བཙན་འཛུལ་དང་འབྲེལ་ནས་ Barahoti ནང་དུ་ཐེངས་གཉིས་ཙམ་ལ་སིམ་འཛུལ་བྱས་ཡོད་པ་རེད་འདུག དེ་བཞིན་གསར་ཁང་གིས། རྒྱ་དཀར་ནག་གཉིས་ཀྱི་བར་དུ་སྔར་ལོར་གྷལ་ཝན་ལུང་གཤོང་དུ་དམག་འཐབ་བྱུང་བའི་རྗེས་སུ།  རྒྱ་ནག་གིས་ Uttarakhand མངའ་སྡེ་ནང་གི་ Barahoti ཞེས་པའི་ས་ཁུལ་དུ་རྒྱ་ནག་གི་དམག་མི་ ༣༥་ལྷག་ཆེད་གཏོང་གིས་ཁུལ་དེར་ལས་གཞི་གང་ཞིག་གྲ་སྒྲིག་བྱེད་བཞིན་པ་ཤེས་རྟོགས་བྱུང་སྟབས། རྒྱ་གར་གྱིས་སྔར་ལོའི་གྷལ་ཝན་ལུང་གཤོང་གི་གནད་དོན་དེ་ལྟ་བུ་ཞིག་མི་ཡོང་བའི་ཕྱིར་ཏུ་ཁུལ་དེར་རྒྱ་གར་གྱི་དམག་མི་མང་པོ་འགྲེམས་འཇོག་བྱས་ཡོད་པར་བསྒྲགས་འདུགའབྲེལ་ཡོད་ཀྱི་གནས་ཚུལ་གཞན་ཞིག་གི་ནང་དུ་རྒྱ་ནག་གིས་སྔར་ལོ་ནས་འཕགས་བོད་ས་མཚམས་ཀྱི་ས་བབ་དང་གནམ་གཤིས་སོགས་ལ་བརྟེན་ནས་ས་མཚམས་ཁག་ཏུ་བོད་དམག་མང་པོ་ཆེད་གཏོང་བྱེད་བཞིན་ཡོད་པའི་གནས་ཚུལ་རིམ་པ་བྱུང་ཡོད་པ་ལྟར། ཁ་སང་ཡང་རྒྱ་གར་གྱི་གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གིས་འཕགས་བོད་ས་མཚམས་སུ་བོད་དམག་འགྲེམས་འཇོག་བྱེད་ཤུགས་ཆེ་རུ་བཏང་ཡོད་པ་མ་ཟད། རྒས་ཡོལ་དུ་ཕྱིན་པའི་དམག་མི་དག་བརྒྱུད་ནས་འཕགས་བོད་ས་མཚམས་སོ་སོར་བོད་ཀྱི་ཡུལ་དམག་གསར་འཛུགས་བྱེད་བཞིན་པ་མ་ཟད། ཡུལ་དམག་དེ་དག་ལ་ས་གནས་ཀྱི་བླ་གྲྭ་རྣམས་ཀྱིས་བྱིན་རླབས་སྩོལ་ཏུ་འཇུག་བཞིན་ཡོད་པར་འཁོད་འདུགརྒྱ་ནག་གིས་ད་ཆ་འཕགས་བོད་མཐའ་མཚམས་སུ་བོད་དམག་ཆེད་འཛུགས་བྱེད་དོན་ནི། སྔར་ལོ་གྷལ་ཝན་ཁུལ་དུ་རྒྱལ་ཁབ་ཕྱོགས་གཉིས་ཀྱི་བར་དུ་འཕགས་བོད་མཐའ་མཚམས་སུ་གདོང་ཐུག་བྱུང་སྐབས། ས་བབ་ཀྱི་ཆ་ནས་རྒྱ་མཚོ་ལས་མཐོ་ཚད་ཕི་ཊི་ ༡༥༠༠༠ ལྷག་ཆགས་ཡོད་སྟབས་རྒྱ་ནག་གི་དམག་མི་མང་པོ་ཞིག་ལ་ས་མཐོའི་སྲོག་རླུང་གི་མ་འདང་བའི་དཀའ་ངལ་འཕྲད་པ་དང་འབྲེལ་བ་ཡོད་པ་ཞིག་ཡིན་སྐོར་མངོན་གསལ་གནང་འདུག གཞི་རྩའི་འདས་བའི་ལོ་འགའི་རིང་ནས་རྒྱ་ནག་གིས་རྒྱལ་ཁོངས་རྒྱ་བསྐྱེད་ཀྱི་སྲིད་བྱུས་ལག་བསྟར་གྱི་འོག་ནས་མཐའ་མཚམས་ཁག་ཏུ་གྲོང་ཚོ་གསར་འཛུགས་དང་འབྲོག་ཁྱིམ་གནས་སྤོར་གྱིས་ལས་གཞི་རྒྱ་བསྐྱེད་ཀྱིས། ཕྱོགས་ཡོངས་ནས་བོད་ཀྱི་མཐའ་མཚམས་ཁག་ཏུ་མ་དངུལ་མང་པོ་ཆེད་གཏོང་གིས་འཛུགས་སྐྲུན་གྱི་ལས་གཞི་སྣ་མང་སྤེལ་བཞིན་པ་མ་ཟད། བོད་དམག་བསྡུ་རུབ་ཀྱིས་ས་བབ་མཐོ་ཞིང་གནམ་གཤིས་འཁྱགས་པའིི་འཕགས་བོད་མཐའ་མཚམས་སུ་བོད་ཀྱི་ཡུལ་དམག་གསར་འཛུགས་བྱེད་བཞིན་པའི་གནས་ཚུལ་རིམ་ཕྱིར་ཐོན་ཡོད་པ་རེད།

བོད་མི་ཨ་རི་བ་དང་བོད་དོན་རྒྱབ་སྐྱོར་བ་རྣམས་ཀྱིས་འདི་ལོའི་བོད་དོན་ཞུ་གཏུག་དབུ་འཛུགས་ཀྱིས། བདུན་ཕྲག་འདིའི་ནང་དྲ་ལམ་བརྒྱུད་ས་ཁུལ་སོ་སོའི་གྲོས་ཚོགས་ཀྱི་འཐུས་མི་རྣམས་ལ་མཇལ་འཕྲད་ཀྱིས་རྒྱ་ནག་གིས་བོད་ནང་དུ་དྲང་བདེན་མིན་པའི་སྲིད་བྱུས་འདྲ་མིན་ལག་བསྟར་བྱེད་བཞིན་པའི་ཐད་ནས་ཞུ་སྐུལ་གནང་མུས་རེད་འདུགཁ་སང་ཨ་རིའི་ནང་གི་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བའི་ནང་དུ། ཁ་སང་དང་དེ་རིང་ཉིན་གཉིས་ཀྱི་ཞུ་སྐུལ་གྱི་སྐབས་འདིར།  ཨ་རིའི་ནང་གི་མངའ་སྡེ་ཉི་ཤུ་ལྷག་གི་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་དྲ་ལམ་ནས་གྲོས་ཚོགས་ཀྱི་འཐུས་མི་རྣམས་ལ་ཨ་རིའི་གཞུང་འཛིན་ཚོགས་པའི་ངོས་ནས་བོད་དོན་རྒྱབ་སྐྱོར་གྱི་གནས་བབ་ཇེ་མཐོར་བཏང་བའི་ཐོག་ནས་བོད་རྒྱ་གྲོས་མོལ་ལ་ཤུགས་སྣོན་གྱི་ཞུ་སྐུལ་གནང་རྒྱུ་ཡིན་པར་བསྒྲགས་འདུགརྒྱལ་སྤྱིའི་བོད་དོན་ལས་འགུལ་ཁང་གི་འབྲེལ་མཐུད་འགན་འཛིན་བསྟན་ཆོས་རྒྱ་མཚོ་ལགས་ཀྱིས་བོད་དོན་ཞུ་གཏུག་གི་ཉིན་མོ་འདིར། གྲོས་ཚོགས་ཀྱི་འཐུས་མི་རྣམས་ལ་ཨ་རིའི་ངོས་ནས་བོད་དོན་ལ་རྒྱབ་སྐྱོར་བྱེད་རྒྱུ་དེ་ནི་ཨ་རིའི་མངོན་འདོད་དང་རིན་ཐང་གི་ལྟ་བར་མཐུན་པ་ཞིག་ཡིན་པ་མ་ཟད། གྲོས་ཚོགས་འཐུས་མིའི་ཁྱབ་ཁོངས་ཀྱི་མི་མང་་དང་འབྲེལ་བའི་གནད་དོན་གལ་ཆེན་ཞིག་ཡིན་པར་པར་བསྒྲགས་ཏེ། ཐེངས་འདིའི་བོད་དོན་ཞུ་གཏུག་བརྒྱུད་ནས་ཨ་རིའི་གྲོས་ཚོགས་གོང་འོག་གཉིས་ཀྱིས་བོད་དོན་རྒྱབ་སྐྱོར་ཚད་མཐོ་རུ་གཏོང་རྒྱུ་དང་ཨ་རི་དང་རྒྱ་ནག་གཉིས་ཀྱི་འབྲེལ་ལམ་ཁྲོད་དང་དེ་བཞིན་རྒྱ་གར་དང་ཞི་བདེ་རྒྱ་མཚོའི་ཁུལ་གྱི་གནད་དོན་དང་འབྲེལ་ནས་བོད་དོན་དེ་དམིགས་ཚད་མཐོ་རུ་འཛིན་རྒྱུར་རེ་བ་ཆེན་པོ་གནང་གི་ཡོད་པར་གསུངས་འདུག ཐེངས་འདིའི་ཞུ་སྐུལ་གྱི་ནང་དུ་དོན་ཚན་མང་དག་ཅིག་འཁོད་ཡོད་པའི་ཁོངས་སུ། གཙོ་བོ་ཨ་རིའི་ངོས་ནས་བོད་དོན་རྒྱབ་སྐྱོར་གྱི་ཚད་གཞི་མཐོ་རུ་བཏང་བའི་ཐོག་ནས་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་བཞག་གནང་དགོས་རྒྱུ་དང་སྔར་ལོ་ཨ་རིའི་གྲོས་ཚོགས་སུ་བཞག་པའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་དང་ཕར་འགྲོ་ཚུར་འོང་གི་སྲིད་བྱུས་སོགས་ལག་བསྟར་དོ་ནན་གནང་རྒྱུ། བོད་ཀྱི་རང་བྱུང་ཁོར་ཡུག་ཉམས་ཉེས་དང་གནམ་གཤིས་ཚ་འགྱུར་སོགས་ལ་ཐུགས་ཞིབ་གནང་རྒྱུ།  གཞན་ཡང་ཨ་རིའི་ངོས་ནས་སང་ལོར་རྒྱ་ནག་ཏུ་འཚོགས་འཆར་གྱི་རྒྱལ་སྤྱིའི་ཨོ་རྩལ་འགྲན་ཚོགས་ཐོག་ཨ་རིའི་གནད་ཡོད་ཀྱི་གཞུང་འབྲེལ་མི་སྣ་ཕེབས་རྒྱུར་བཀག་སྡོམ་གནང་དགོས་བ་སོགས་ཀྱི་གནད་དོན་ཁག་ཅིག་མངོན་གསལ་གནང་འདུག བོད་དོན་ཞུ་གཏུག་གི་ཉིན་མོ་དང་འབྲེལ་ནས་རྒྱལ་སྤྱིའི་བོད་དོན་ལས་འགུལ་ཁང་གིས་ཉིན་མོ་འདི་ནི་ཨ་རིའི་མི་རིགས་ཡོངས་དང་བོད་མི། དེ་བཞིན་བོད་པའི་ཚོགས་སྡེ་ཁག་གིས་ས་ཁུལ་སོ་སོའི་གྲོས་ཚོགས་འཐུས་མི་རྣམས་ལ་བོད་དོན་དང་འབྲེལ་བའི་བརྡ་ལན་གསལ་བོར་འབུལ་རྒྱུའི་ཉིན་མོ་ཞིག་ཡིན་པར་མངོན་གསལ་གྱིས། འདི་ལོའི་ཞུ་གཏུག་བརྒྱུད་ནས་ཨ་རིའི་སྲིད་འཛིན་བྷ་ཊན་མཆོག་གི་གཞུང་འཛིན་ཚོགས་པས་བོད་དོན་རྒྱབ་སྐྱོར་གྱི་དམ་ཚིག་དོན་ལ་གནས་རྒྱུར་ཤུགས་སྣོན་སྐྱོན་རྒྱུ་ཡིན་པར་བསྒྲགས་འདུགགཞི་རྩའི་སྔར་ལོར་ཨ་རིའི་གྲོས་ཚོགས་ཀྱི་དབུས་སུ་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ Tibetan Policy and Support Act of 2020 ཞེས་གྲོས་ཚོགས་འཐུས་མིས་ཚད་མཐོ་བོའི་རྒྱབ་སྐྱོར་འོག་ཁྲིམས་སུ་བཅོས་ཡོད་པ་དང་། ཕྱི་ལོ་ ༢༠༡༨ ལོར་ཡང་བོད་དོན་རྒྱབ་སྐྱོར་གྱི་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་བྱས་ཡོད་པ་དང་བསྟུན་ནས།  ཨ་རིའི་ངོས་ནས་རྒྱལ་སྤྱིའི་སྤྱི་ཚོགས་ཀྱི་ཁྲོད་དུ་བོད་དོན་རྒྱབ་སྐྱོར་ལ་མིག་དཔེར་འོས་པའི་ཁྲིམས་འཆར་རིམ་པ་གཏན་འབེབས་གནང་བར་བོད་མི་སྤྱི་དང་བོད་དོན་རྒྱབ་སྐྱོར་བ་ཡོངས་ཀྱིས་བསྔགས་བརྗོད་གནང་བཞིན་པ་དང་བསྟུན་ནས། ད་ཆ་ཁྲིམས་འཆར་དེ་དག་དངོས་སུ་ལག་བསྟར་ཡོང་ཐབས་ལ་ཤུགས་སྣོན་རྒྱག་བཞིན་པ་རེད།

བོད་དོན་རྒྱབ་སྐྱོར་བ་དང་བོད་ཀྱི་གནས་བབ་ཅེས་པའི་དཔེ་དེབ་རྩོམ་པ་པོ་རྒྱལ་སྤྱིའི་རྩོད་རྙོག་འདུམ་འགྲིག་ཚོགས་པ་ Kreddha ཞེས་པའི་འཛིན་སྐྱོང་ཚོགས་གཙོ་སློབ་དཔོན་སྐུ་ཞབས་ Michael van Walt can Praag ལགས་ཀྱིས་ཡུ་རོབ་ཀྱི་རྒྱལ་ཁབ་ཁག་ཅིག་ནང་བོད་དོན་སྐོར་སྐྱོད་ཀྱི་ལས་འགུལ་དབུ་འཛུགས་དང་འབྲེལ་ཏེ་བོད་རྒྱ་གཉིས་ཀྱི་གནད་དོན་གསལ་ཐབས་གནང་དགོས་པའི་འབོད་སྐུལ་ཞུ་བཞིན་འདུགཉེ་ཆར་སྐུ་ཞབས་ Michael ལགས་ཀྱིས་ཡུ་རོབ་སྦེལ་ཇམ་གྱི་རྒྱལ་ས་ Brussels ནས་ Netherland ཡི་གྲོང་ཁྱེར་ Hague དང་དེ་ནས་ཕ་རན་སིའི་རྒྱལ་ས་ Paris བཅས་གསུམ་གྱི་ནང་བོད་དོན་གྱི་སྐོར་སྐྱོར་ལས་འགུལ་ཞིག་དབུ་འཛུགས་གནང་ཡོད་པ་ལྟར་ཁ་ཉིན་སྔ་དྲོར་ཁོང་སྦེལ་ཇམ་གྱི་རྒྱལ་ས་ Brussels ནང་ཡུ་རོབ་སྤྱི་མཐུན་ཚོགས་པའི་ཚོགས་མི་རྒྱལ་ཁབ་ཀྱི་གཞུང་འབྲེལ་མི་སྣ་ཁག་དང་མཇལ་འཕྲད་གནང་སྟེ་རྒྱ་གཞུང་གིས་ཁྲིམས་འགལ་ཐོག་བོད་དབང་སྒྱུར་བྱས་པའི་སྐོར་ཁྲིམས་དང་ལོ་རྒྱུས་ཀྱི་ལྟ་ཚུལ་ཐོག་ནས་འགྲེལ་བརྗོད་གནང་ཡོད་པ་མ་ཟད། ཡུ་རོབ་སྤྱི་མཐུན་ཚོགས་པའི་ཚོགས་མི་རྒྱལ་ཁབ་རྣམས་ཀྱི་གཞུང་འབྲེལ་སྐུ་ཚབ་རྣམས་ལ་རྒྱ་ནག་གིས་བོད་ཀྱི་གནད་དོན་སྐོར་འཛམ་གླིང་མི་མང་ལ་འཁྱོག་བཤད་ཀྱིས་དྲིལ་བསྒྲགས་སྤེལ་ཏེ་ལམ་ལོག་ཏུ་འཁྲིད་བཞིན་ཡོད་པ་དེ་ཡོ་བསྲང་གནང་དགོས་པའི་དགོངས་ཚུལ་སོགས་གསུངས་འདུག དེ་བཞིན་ཚེས་ ༢༧ ཉིན་རྒྱབ་སྐུ་ཞབས་ Michael ལགས་ཀྱིས་སྦེལ་ཇམ་བོད་ཀྱི་སྐུ་ཚབ་དོན་གཅོད་བཀྲིས་ཕུན་ཚོགས་ལགས་དང་དོན་ཁང་གི་ལས་བྱེད་རྣམ་པ། དེ་བཞིན་བོད་དོན་རྒྱབ་སྐྱོར་ཚོགས་པའི་སྐུ་ཚབ་དང་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ་བཅས་དབར་མཇལ་འཕྲད་གནང་སྟེ་སྐུ་ཞབས་ཁོང་གིས་ཉེ་ཆར་བརྩམས་པའི་ཕྱི་ལོ་ ༢༠༢༠ ལོའི་བོད་ཀྱི་གནས་ཚུལ་གནད་བསྡུས་ཞེས་པའི་སྐོར་ངོ་སྤྲོད་དང་སྦྲགས། བོད་ཀྱི་འགྲོ་བ་མིའི་ཐོབ་ཐང་གི་གནད་དོན་ནི་བོད་རྒྱ་གཉིས་ཀྱི་རྩོད་རྙོག་ལས་བྱུང་བ་ཞིག་ཡིན་སྟབས་རྒྱལ་སྤྱིའི་ཚོགས་སྡེ་ཁག་ནས་ངེས་པར་དུ་བོད་རྒྱ་གཉིས་ཀྱི་རྩོད་རྙོག་གི་འབྱུང་རྩ་གསལ་ཐབས་གནང་དགོས་པའི་ནན་སྐུལ་གནང་བ་དང་ཆབས་ཅིག བོད་མིའི་མངོན་འདོད་རང་དབང་ཐོབ་ཐབས་སུ་རྒྱབ་སྐྱོར་གནང་དགོས་ཞེས་གསུངས་ཡོད། སྐབས་དེར་སྐུ་ཞབས་ Michael ལགས་ཀྱིས་རྒྱ་གཞུང་གིས་བོད་མི་རྣམས་ལ་གྲངས་ཉུང་མི་རིགས་ཞེས་ཐ་སྙད་སྤྱོད་བཞིན་པའི་ཐད་ཡིད་གཟབ་གནང་དགོས་པ་དང་བོད་མི་རྣམས་མི་རིགས་ཤིག་ཡིན་པ་ལས་གྲངས་ཉུང་མི་རིགས་མ་རེད་ཅེས་གསུངས་འདུག གོང་གནས་དང་འབྲེལ་བའི་པར་གྱི་བདག་དབང་བོད་མིའི་སྒྲིག་འཛུགས་ལ་ཡོད།

ཟླ་བ་འདིའི་ཕྱི་ཚེས་ ༡༣ ཉིན་ནས་སུད་སི་གྲོང་ཁྱེར་ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༨ པ་འཚོགས་བཞིན་ཡོད་པ་ལྟར་ལྷན་ཚོགས་ཐོག་ཨི་རི་དང་འཇར་མི་ནི། ཌན་མག སུད་ཌན། ནི་ཐར་ལན་ཌི། སུད་སི་སོགས་རྒྱལ་ཁབ་ ༢༦ ལས་གྲུབ་པའི་ཡོ་རོབ་མཐུན་ཚོགས་བཅས་ཀྱིས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ལ་སྐྱོན་བརྗོད་ཀྱིས་བློ་འཚབ་ཀྱི་རྣམ་པ་ཆེད་བཏོན་གནང་ཡོད་པ་མ་ཟད་ཁ་སང་ལྷན་ཚོགས་ཐོག་གཞུང་འབྲེལ་མིན་པའི་སྐུ་ཚབ་ཀྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ནས་རྒྱལ་ཚོགས་ཀྱི་ཁེ་ལས་མི་སྣ་ ༥༠ ཙམ་ཞིག་གིས་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་ཀྱིས་རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བའི་བྱ་སྤྱོད་དག་ལ་བརྟག་ཞིབ་དང་ལྟ་སྲུང་ནན་པོ་བྱེད་དགོས་པའི་ཞུ་སྐུལ་ལ་ཐུགས་སྣང་དགོས་པ་གསུངས་འདུག འགྲོ་བ་མིའི་ཐོབ་ཐང་གི་གནས་སྟངས་ཐད་ཐུགས་སྣང་དགོས་པའི་ཚོགས་དུས་ཐོག་སུད་སི་དོན་གཅོད་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས་གཞུང་འབྲེལ་མིན་པའི་ཚོགས་པ་ society for Threatened people ཞེས་རྒྱལ་ཁབ་གཞན་གྱི་དབང་སྒྱུར་འོག་ལྷུང་བའི་གྲངས་ཉུང་མི་རིགས་ཀྱི་ཚོགས་པའི་མཚན་ཐོག་ནས་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་བཞིན་པའི་ཁྲོད་འདིར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ཛ་དྲག་ཐོག་ནས་རྒྱ་ནག་གིས་བྱ་སྤྱོད་དེ་མཚམས་འཇོག་བྱེད་ཐུབ་པ་བཟོ་དགོས་པ་དང་རྒྱ་ནག་གིས་བོད་མི་གཙོས་ཡུ་གུར་དང་སོག་པོའི་མི་རིགས་ཀྱི་ངོ་བོ་དང་རིག་གཞུང་མཚོན་པའི་རྗེས་ཤུལ་ཡོངས་མེད་པ་བཟོ་ཐབས་ཐད་ལ་འབད་བརྩོན་བྱེད་བཞིན་ཡོད་པ་ཡོངས་གྲགས་ཡིན་པར་གསུངས་འདུག དེ་བཞིན་ཁོང་གིས་འདས་པའི་ལོ་ངོ་ ༦༠ ལྷག་གི་རིང་རྒྱ་གཞུང་ནས་མུ་མཐུད་དེ་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་མུས་ཡིན་པ་དང་ལྷག་པར་དུ་ཉེན་རྟོག་པས་དུས་རྟག་ཏུ་བོད་མིར་ལྟ་སྲུང་ནན་པོས་དམ་དྲག་བྱེད་བཞིན་པ་མ་ཟད། སློབ་གྲྭ་ཁག་ཏུ་བོད་ཀྱི་སྐད་ཡིག་སློབ་རྒྱུར་དམ་དྲག་བྱེད་ཀྱི་ཡོད་པ་གསུངས་འདུག ཁོང་གིས་ཉེ་ལམ་རྫ་དབོན་པོ་ཁུལ་ནས་བོད་མི་ ༡༠༠ ལྷག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་ཉར་ཚགས་གནང་བའི་དབང་གིས་འཛིན་བཟུང་བྱས་ཡོད་སྐོར་དང་། དེ་བཞིན་རྒྱ་ནག་གིས་ལོ་ངོ་ ༢༦ ཙམ་ཞིག་རིང་རྒྱལ་ཚོགས་ལ་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་བའི་གནད་དོན་ཐད་ལན་འདེབས་ཁ་གསལ་གང་ཡང་ཞུས་མེད། བོད་ནང་གི་བོད་བརྒྱུད་ནང་བསྟན་གྱི་བསྟི་གནས་ཁག་དམར་ཤོག་ཚོགས་པའི་ཆབ་སྲིད་སློབ་གསོའི་བསྟི་གནས་ལ་གྱུར་ཡོད་པ་སོགས་འགྲེལ་བརྗོད་ཀྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་དེ་སྔ་རྒྱལ་ཚོགས་ཀྱི་ཁེ་ལས་མི་སྣ་ ༥༠ ཙམ་ཞིག་གིས་རྒྱ་ནག་གི་འགྲོ་བ་མིའི་ཐོབ་ཐང་ཐད་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་དགོས་པའི་ཐོག་རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་དག་ལ་དཔྱད་ཞིབ་དང་ལྟ་སྲུང་ནན་པོ་ དགོས་པའི་ཞུ་སྐུལ་ལ་ཐུགས་སྣང་གནང་རོགས། རྒྱ་གཞུང་ནས་བོད་མི་དང་ཡུ་གུར་བ། སོག་པོ། དེ་བཞིན་ཧོང་ཀོང་བའི་ཐོག་དྲག་གནོན་ཅན་གྱི་བྱ་སྤྱོད་སྤེལ་བཞིན་ཁག་མཚམས་འཇོག་དགོས་ཞེས་གསུངས་ཡོད་སྐོར་གསུངས་འདུགལྷན་ཚོགས་དེའི་ཐོག་གཞན་ཡང་། Helsinki Foundation for Human Rights ཞེས་གཞུང་འབྲེལ་མིན་པའི་སྐུ་ཚབ་ངོ་བོའི་ཐོག་རྒྱལ་སྤྱིའི་བོད་དོན་ལས་འགུལ་ཁང་གི་ Melanie Blondelle ལགས་ཀྱིས་ཟླ་བ་སྔོན་མར་རྒྱ་ནག་གཞུང་གིས་བོད་ནང་དུ་བོད་ཞི་བའི་བཅིངས་འགྲོལ་བཏང་སྟེ་ལོ་ངོ་ ༧༠ འཁོར་བ་ཡིན་ཟེར་བའི་དུས་སྟོན་ཞིག་ཚོགས་ཡོད་པ་ལྟར་དོན་དངོས་ཐོག་བོད་ནང་གི་གནས་སྟངས་དེ་རྒྱ་གཞུང་གི་དྲིལ་བསྒྲགས་བྱས་པ་ལས་འགལ་ཟླ་ཡོད་པར་གསུངས་འདུག ལྷག་དོན་རྒྱ་གཞུང་གིས་བོད་ནང་མུ་མཐུད་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྲིད་བྱུས་སྤེལ་བ་དང་ཆབས་ཅིག རང་དབང་ཅན་གྱི་བསམ་བློ་དང་རྒྱ་གཞུང་ལ་ངོ་རྒོལ་གྱི་ལས་དོན་རིགས་ལ་དམ་དྲག་བྱེད་ཀྱི་ཡོད་པས་ང་ཚོས་བོད་དེ་རྒྱལ་སྤྱིར་སྒོ་མོ་ཕྱེས་པའི་ཐོག་ཕྱི་གསལ་ནང་གསལ་དགོས་པའི་འབོད་སྐུལ་ཞུ་བཞིན་པ་ལྟར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་རྒྱ་ནག་གཞུང་གིས་ནོར་འཁྲུལ་ཅན་གྱི་སྲིད་བྱུས་སྤེལ་བ་དག་གླེང་སློང་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པ་དེར་ཐུགས་སྣང་གནང་དགོས་པ་དང་རྒྱལ་ཚོགས་ཀྱི་ཆེད་ལས་མི་སྣས་རྒྱ་ནག་ཐོག་ཞིབ་འཇུག་ཚོགས་ཆུང་ཆེད་འཛུགས་དགོས་པའི་ཐད་ལ་རྒྱལ་ཚོགས་ཀྱི་ཚོགས་མི་རྣམས་ནས་རྒྱབ་སྐྱོར་གནང་དགོས་སྐོར་གསུངས་འདུག གཞི་རྩའི་འདས་ལོ་ ༢༠༢༠ ལོར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ཡི་ཁེ་ལས་རྟོག་ཞིབ་མི་སྣ་ ༥༠ མན་མཉམ་འཐུས་ཀྱིས་རྒྱ་ནག་གཞུང་གིས་བོད་དང་ཧོང་ཀོང་། དེ་བཞིན་ཤར་ཏུར་ཀི་སི་ཐན་བཅས་ཀྱི་ས་ཁུལ་དེ་དག་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་རྡོག་རོལ་གཏོང་བཞིན་པའི་གནད་དོན་ཐོག་རྒྱལ་ཚོགས་ཀྱིས་བསྐྱར་ཞིབ་གནང་སྟེ་རྒྱ་ནག་རང་གི་ཐོག་དམིགས་བསལ་གྱི་ཚོགས་དུས་རྒྱལ་ཚོགས་ཀྱི་ངོས་ནས་བསྐོང་ཚོགས་གནང་དགོས་པ་དང་།  རྒྱལ་ཚོགས་ནས་རྒྱ་ནག་ཐོག་ཕྱོགས་ལྷུང་མེད་པའི་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་བྱེད་དགོས་པ། དེ་བཞིན་དམིགས་བསལ་ཁེ་ལས་སྐུ་ཚབ་བཅས་ཆེད་འཛུགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་སྤྱི་དང་སྒོས་བོད་དང་ཤར་ཏུར་ཀི་སི་ཐན། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཡོད་པའི་ས་ཁུལ་ཐོག་ལྟ་ཞིབ་དང་ཞིབ་འཇུག་གི་ལོ་འཁོར་སྙན་ཐོ་འདོན་སྤེལ་དགོས་པར་གསུངས་ཡོད།

ཐེ་ཝན་གྱི་རྒྱལ་ས་ཐེ་པཱེ་ནང་དུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པ་དང་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གཉིས་ཀྱི་གོ་སྒྲིག་གི་འོག   དེ་རིང་ནས་དབུ་འཛུགས་ཀྱིས་བདུན་ཕྲག་གཉིས་ཀྱི་རིང་ལ་ཁུལ་དེར་བོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་པའི་པར་རིས་འགྲེམས་སྟོན་གྱི་ལས་གཞི་ཞིག་དབུ་འཛུགས་གནང་འདུགཐེངས་འདིའི་འགྲེམས་སྟོན་གྱི་ལས་གཞིའི་ཁྲོད་དུ་བོད་ནང་དུ་བོད་དོན་གྱི་ཆེད་དུ་དཀའ་སྡུག་ཚད་མེད་མྱངས་བའི་ཆབ་སྲིད་བཙོན་ཟུར་འདས་གསོན་གཉིས་ཀྱི་གཙོ་བྱས་པའི་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་དོན་ལས་འགུལ་བ་རྣམས་ཀྱི་པར་རིས་རི་མོར་བྲིས་ཏེ། ཁོང་ཅག་གི་བོད་དོན་འཐབ་རྩོད་ཁྲོད་ཕྱག་ལས་གནང་བའི་ལོ་རྒྱུས་སྙིང་བསྡུས་སོགས་འཁོད་ཡོད་པའི་ཁོངས་སུ། བོད་ཀྱི་ཆབ་སྲིད་བཙོན་ཟུར་དམ་པ་གྲྭ་དཔལ་ལྡན་རྒྱ་མཚོ་ལགས་དང་ཨ་མ་ཨ་བདེ་ལགས། དེ་བཞིན་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་སོགས་དང་། དེ་བཞིན་བྱེས་ཀྱི་བོད་དོན་འཐབ་རྩོད་པ་ལྷ་བཟང་ཚེ་རིང་ལགས་དང་བསྟན་འཛིན་བརྩོན་འགྲུས་སོགས་ཀྱི་མི་བཅུ་དྲུག་ལྷག་གི་པར་རིས་བདམས་བྲིས་གནང་འདུགའདི་གའི་གསར་འགོད་པའི་ཞལ་པར་བརྒྱུད་ནས་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲ་ཤིས་ཚེ་རིང་ལགས་སུ་ཐེངས་འདིའི་ལས་གཞིའི་སྐོར་ནས་བཀའ་འདྲི་ཞུས་པར་ཁོང་གིས་གཞི་རྩའི་ལས་གཞི་དེ་དེ་རིང་ནས་དབུ་འཛུགས་གནང་གི་ཡོད་ཀྱང་ཁ་སང་གཟའ་ཉི་མ་ཡིན་སྟབས་ཐེ་ཝན་གྱི་གྲོས་ཚོགས་འཐུས་མི་ཁག་ཅིག་དང་དབུས་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་སོགས་དབུ་བཞུགས་ཀྱི་ཐོག་ནས་གསར་འགོད་བསྒྲགས་ཤིག་བསྐྱངས་ཏེ་བོད་མི་རྣམས་ཀྱིས་ནུས་ཤུགས་ཡོད་རྒུ་བཏོན་ནས་འཐབ་རྩོད་རྒྱུན་སྐྱོང་གནང་བའི་ཐད་ནས་ངོ་སྤྲོད་ཀྱི་ལས་རིམ་ཞིག་སྔོན་སོང་གིས། དེ་རིང་ནས་བོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་པའི་པར་རིས་འགྲེམས་སྟོན་གྱི་ལས་གཞི་དེ་དངོས་སུ་འགོ་འཛུགས་གནང་ཡོད་པ་དང་། ཐེ་ཝན་ཁུལ་གྱི་གསར་ཁང་དང་རླུང་འཕྲིན་ཁང་སོགས་ཀྱིས་ཀྱང་ལས་གཞི་འདིར་དོ་སྣང་ཆེན་པོའི་ཐོག་ནས་ལས་རིམ་བཟོས་ཡོད་པར་ངོ་སྤྲོད་གནང་སོང་། གཞན་ཡང་ཁོང་གིས་ངོ་ལོ་ཉི་ཤུ་ལྷག་ལ་ཐེ་ཝན་གྱི་ཁུལ་དུ་བོད་དོན་གྱི་ལས་འགུལ་སྣ་མང་ཞིག་སྤེལ་ཡོད་ཀྱང་། དེ་རིང་གི་པར་རིས་འགྲེམས་སྟོན་གྱི་ལས་འགུལ་དེ་ནི་གསར་གཏོད་ཀྱི་རྣམ་གྲངས་ལྟ་བུ་ཞིག་ཆགས་ཡོད་པ་མ་ཟད། མང་ཚོགས་ཀྱི་ཁྲོད་དུ་བོད་དོན་གྱི་སྐོར་ལ་ཤེས་རྟོགས་གང་འཚམས་ཡོད་ཀྱང་ལས་གཞི་དེ་བརྒྱུད་ནས་བོད་ཕྱི་ནང་གཉིས་ཀྱི་འཐབ་རྩོད་ཀྱི་གནས་བབ་དེར་ཞིབ་ཚགས་ཀྱིས་རྒྱུས་མངའ་ཟབ་མོ་བྱུང་ཡོད་རབས་བརྗོད་མཁན་མང་པོ་བྱུང་ཡོད་པར་འགྲེལ་བརྗོད་ཀྱིས། ལས་འགུལ་དེ་ཧ་ཅང་གི་ཐུགས་ཕན་སོས་བ་ཞིག་ཆགས་ཡོད་སྐོར་གསུངས་སོང་། གཞི་རྩའི་དེ་རིང་གི་པར་རིས་འགྲེམས་སྟོན་གྱི་ལས་གཞི་དེ་ནི་ཐེ་ཝན་ཁུལ་གྱི་བོད་རང་བཙན་སློབ་ཕྲུག་ཚོགས་པའི་རྒྱུན་ལས་ཤིག་གིས་དངོས་སུ་ཆུ་ཚོད་དང་མ་དངུལ་ཆེད་གཏོང་གིས་བོད་དོན་འཐབ་རྩོད་པ་རེ་རེའི་པར་རིས་ལག་བྲིས་གནང་སྟེ། ཁོང་གི་བོད་དོན་འཐབ་རྩོད་ཀྱི་བརྒྱུད་རིམ་གྱི་ལོ་རྒྱུས་ཕྱོགས་བསྡུས་གནང་བ་ཞིག་ཆགས་ཡོད་པ་དང་། རི་མོ་བ་ཁོང་གིས་བོད་འཐབ་རྩོད་པ་ཙམ་མ་ཡིན་པར། བཙན་བྱོལ་ནང་གི་ན་ཆུང་བུ་མོ་ཞིག་གིས་ལག་ཏུ་སྒྲོན་མེ་ཐོགས་པའི་པར་རིས་ཤིག་ཀྱང་བྲིས་གནང་སྟེ། པར་རིས་དེ་ནི་བོད་མི་རྣམས་ཀྱི་རང་དབང་འཐབ་རྩོད་ཀྱི་དཔལ་འབར་བརྒྱུད་སྤྲོད་ཀྱི་རྣམ་པ་ཞིག་ཡིན་པར་འགྲེལ་བརྗོད་གནང་འདུག

ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༤༨ པ་འཚོགས་བཞིན་པ་དང་བསྟུན་དེ་རིང་ཕྱི་ཚེས་ ༢༤ ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་གི་སྣེ་ཁྲིད་འོག་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཇེ་ཞན་ཇི་སྡུག་ཏུ་འགྲོ་བཞིན་པའི་བོད་ནང་འགྲོ་བ་མིའི་ཐོབ་ཐང་གི་གནས་སྟངས་མངོན་གསལ་གནང་བ་དང་འབྲེལ་བོད་མི་ཚོས་རྒྱལ་ཚོགས་ཀྱི་མདུན་ཐང་དུ་ཞི་བའི་སྐད་འབོད་དང་རྒྱལ་ཚོགས་སུ་ཞུ་གཏུག་ལས་འགུལ་ཞིག་སྤེལ་ཡོད་པ་རེད།སྐབས་དེར་ལས་འགུལ་བ་རྣམས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་ལས་ཁུངས་ཀྱི་མདུན་དུ་འདུ་འཛོམས་ཀྱིས་ཞི་བའི་སྐད་འབོད་གནང་གྲུབ་མཚམས་སུ་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་ཡོད་པའི་ལོ་རྒྱུས་ཀྱི་རང་བཞིན་ལྡན་པའི་ཞབས་སྟེགས་ཞབས་ཆག་གི་མདུན་ཐང་བར་ཞི་བའི་རྔམ་སྟོན་གནང་བ་མ་ཟད་རྒྱལ་ཚོགས་ཀྱི་མདུན་ཐང་དུ་བོད་ཀྱི་རྒྱལ་དར་བསྣམས་ཏེ་བོད་རྒྱལ་ཁབ་ཆེན་པོའི་རྒྱལ་གླུ་བླངས་པ་དང་། ད་བར་བོད་བསྟན་སྲིད་མི་རིགས་ཀྱི་དོན་དུ་སྐུ་སྲོག་བློས་བཏང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་བཏུད་ཞུས་པ་དང་སྦྲགས། བོད་མི་ཚོས་བོད་ལ་རང་དབང་དགོས། རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་འཕྲལ་མར་མཚམས་འཇོག་དགོས། རྒྱལ་ཚོགས་གཉིད་སད་ཤོག་སོགས་ཀྱི་ཞི་བའི་སྐད་འབོད་གནང་ཡོད།སུད་སི་བོད་ཀྱི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གཙོས་པའི་སུད་སི་དང་ལིག་ཏེན་སིཊཡན་བོད་རིགས་མི་མང་། གཞུང་འབྲེལ་མིན་པའི་ཚོགས་ཁག་གི་སྐུ་ཚབ། དེ་བཞིན་བོད་དོན་རྒྱབ་སྐྱོར་བ་བཅས་ནས་མཉམ་ཞུགས་གནང་ཡོད།སྤྱིར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༤༨ པ་དེ་ཕྱི་ཟླ་ ༩ ཚེས་ ༢༣ ནས་ཟླ་ ༡༠ ཆེས་༨ བར་ཚོགས་ཀྱི་ཡོད་པ་དང་བསྟུན་བོད་མི་ཚོས་དེ་རིང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་གཙོ་འཛིན་ལྕམ་སྐུ་ Michelle Bachelet མཆོག་གི་མཚན་ཐོག་ལ་བོད་ནང་གི་ཆོས་དད་རང་དབང་། སྐད་ཡིག་རང་དབང་། སྨྲ་བརྗོད་རང་དབང་། འདུ་འཛོམས་རང་དབང་སོགས་ཀྱི་ཆེས་ཡ་ང་བའི་གནས་བབ་མངོན་གསལ་གནང་བའི་ཞུ་སྙན་ཞིག་ཕུལ་ཡོད་པ་རེད།