རྒྱལ་སྤྱི།

Committee to protect journalist འམ་རྒྱལ་སྤྱིའི་གསར་འགོད་པ་སྲུང་སྐྱོབ་ཚོགས་པས་ཕྱི་ལོ་ ༢༠༢༡ ལོའི་སྙན་ཐོར་འདི་ལོ་རྒྱལ་སྤྱིའི་ཁྲོད་གསར་འགོད་པ་ཁྱོན་ ༢༩༣ ཙམ་ཞིག་གསར་འགོད་ཀྱི་ལས་རིགས་དང་འབྲེལ་བཙོན་འཇུག་བྱས་ཡོད་པ་མངོན་གསལ་གནང་བ་དང་འབྲེལ་ཏེ་རྒྱ་ནག་དེ་བསྐྱར་དུ་གསར་འགོད་པ་བཙོན་འཇུག་བྱེད་མཁན་གྱི་རྒྱལ་ཁབ་ཆེས་སྡུག་ཤོས་ཆགས་ཡོད་པར་ཐེར་འདོན་གནང་འདུག ཉེ་ལམ་ཕྱི་ཚེས་ ༩ ཉིན་རྒྱལ་སྤྱིའི་གསར་འགོད་པ་སྲུང་སྐྱོབ་ཚོགས་པའི་རྩོམ་སྒྲིག་འགན་འཛིན་ལྕམ་སྐུ་ Arlene Getz ལགས་ཀྱིས་ཕྱོགས་སྒྲིག་གནང་བའི་སྙན་ཐོར་འདི་ལོ་རྒྱལ་སྤྱིའི་ཁྲོད་གསར་འགོད་པ་ ༢༩༣ ཙམ་ཞིག་འཛིན་བཟུང་བཙོན་འཇུག་བྱས་པ་དང་དེ་བཞིན་ཉུང་མཐར་གསར་འགོད་པ་ ༢༤ ཙམ་ཞིག་དམར་གསོད་བཏང་བ། གསར་འགོད་པ་ ༡༨ ཙམ་གནས་སྟངས་ཁ་གསལ་མེད་པའི་ཐོག་རྐྱེན་འདས་སུ་གྱུར་ཡོད་པ་མངོན་གསལ་གནང་འདུག དེའི་ཁྲོད་འདི་ལོར་རྒྱ་ནག་གཞུང་གིས་གསར་འགོད་པ་ ༥༠ འཛིན་བཟུང་བཙོན་འཇུག་གིས་རྒྱ་ནག་དེ་ལོ་གསུམ་རིང་བསྟུད་མར་གསར་འགོད་པ་བཙོན་འཇུག་བྱེད་མཁན་གྱི་རྒྱལ་ཁབ་ཆེས་སྡུག་ཤོས་ཡིན་པར་མངོན་གསལ་གནང་འདུག་པ་མ་ཟད། གསར་འགོད་པ་བཙོན་འཇུག་བྱེད་མཁན་གྱི་རྒྱལ་ཁབ་སྡུག་ཤོས་ལྔ་པོ་ཁོངས་སུ་འབར་མ་དང་ཨི་ཇིཔཊ། ཝིཏི་ནམ། དེ་བཞིན་སྦེ་ལ་ར་ས་བཅས་ཡིན་པ་རེད། སྙན་ཐོ་ནང་རྒྱ་ནག་གིས་གསར་འགོད་པར་སྙིང་རྗེ་མེད་པར་བཙོན་འཇུག་བྱས་པ་ནི་གནད་དོན་གསར་པ་ཞིག་མིན་ནའང་ད་ལན་ཧོང་ཀོང་ནང་གསར་འགོད་པ་འཛིན་བཟུང་བྱས་པའི་གནད་དོན་བྱུང་བ་ནི་ཐོག་མ་ཆགས་པ་མ་ཟད་དོན་རྐྱེན་དེའང་རྒྱ་ནག་གིས་འདས་ལོར་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་གཞི་གསར་པ་ལག་བསྟར་བྱས་པའི་གྲུབ་འབྲས་ཞིག་ཀྱང་ཡིན་པར་གསུངས་འདུག ལྷག་པར་དུ་ཧོང་ཀོང་ནང་ Apple Daily གསར་ཁང་ཆེད་འཛུགས་གནང་མཁན་སྐུ་ཞབས་ Jimmy Lai ལགས་གཙོས་གསར་འགོད་པ་བདུན་འཛིན་བཟུང་བཙོན་འཇུག་བྱས་པ་ལུང་འདྲེན་གནང་བ་དང་སྦྲགས། ཁག་ཅིག་མི་ཚེ་གང་པོར་བཙོན་ནང་ལྷག་སྲིད་ཀྱི་རེད་ཅེས་གསུངས་འདུག་ལ། ཕྱོགས་མཚུངས་རྒྱ་ནག་སྐམ་ས་ཆེན་པོར་དེ་སྔ་རྒྱ་གཞུང་གིས་ཏོག་དབྱིབས་གཉན་རིམས་ལ་ཡ་ལན་སྤྲད་ཕྱོགས་དང་འབྲེལ་གནས་ཚུལ་འགོད་པར་འཛིན་བཟུང་བཙོན་འཇུག་བྱས་པའི་སྐོར་དང་། རང་དབང་ཅན་གྱི་གསར་ཁང་དང་འབྲེལ་བ་ཡོད་མཁན་ཚོར་རྒྱ་གཞུང་ནས་དམིགས་འབེན་བཟུང་གི་ཡོད་པ་སོགས་ཐེར་འདོན་གནང་ཡོད།ལྕམ་སྐུ་ Arlene Getz ལགས་ཀྱིས་གསར་འགོད་པ་ ༢༩༣ ཙམ་འཛིན་བཟུང་བཙོན་འཇུག་བྱས་པ་དེ་ནི་ད་བར་རྒྱལ་སྤྱིའི་ཁྲོད་གསར་འགོད་པ་ ༢༥༠ ལྷག་བསྟུད་མར་འཛིན་བཟུང་བྱས་པའི་ལོ་དྲུག་པ་དེ་ཆགས་ཀྱི་ཡོད་པ་དང་ལྷག་པར་གནད་དོན་དེ་དག་གིས་གཞུང་གོ་ངོས་ནས་རང་དབང་ཅན་གྱི་གསར་འགོད་ལ་བཟོད་མ་ཐུབ་པའི་རྣམ་པ་ཆེས་ཆེར་ཡོད་པ་གསལ་སྐོར་གསུངས་འདུག ཕྱོགས་མཚུངས་ཉེ་ལམ་ Reporters without Borders ཞེས་རྒྱལ་མཚམས་མེད་པའི་གསར་འགོད་པའི་ཚོགས་པས་ The Great Leap Backwards of Journalism in China ཞེས་རྒྱ་ནག་ནང་གསར་འགོད་དང་གནས་ཚུལ་མཁོ་སྒྲབ་ཀྱི་རང་དབང་ལ་དྲག་གནོན་སོགས་བྱས་པའི་ཤོག་གྲངས་ ༤༢ ཅན་གྱི་སྙན་ཐོ་ཞིག་འདོན་སྤེལ་གནང་བ་དང་། དེའི་ནང་ད་ལྟའི་ཆར་ཉུང་མཐར་གསར་འགོད་པ་ ༡༢༧ ཙམ་ཞིག་རྒྱ་གཞུང་གིས་འཛིན་བཟུང་བཀག་ཉར་འོག་ཡོད་པ་དང་ལྷག་པར་རྒྱ་གཞུང་གིས་གསར་འགོད་པ་ནི་སྲིད་གཞུང་གི་དྲིལ་བསྒྲགས་སྤེལ་མཁན་གྱི་ལག་ཆ་ལྟ་བུར་ངོས་འཛིན་གྱི་ཡོད་སྐོར་ཆེས་གསལ་གནང་འདུག  སྙན་ཐོ་ནང་རྒྱ་གཞུང་གིས་འཇིགས་སྐུལ་རིང་ལུགས་པར་གདོང་ལེན་ལ་ཁ་གཡར་ཏེ་ཡུ་གུར་གསར་འགོད་པ་ཉུང་མཐར་ ༧༡ ཙམ་འཛིན་བཟུང་བཀག་ཉར་བྱས་ཡོད་པ་དང་དེའི་ཁོངས་སུ་གསར་འགོད་པ་ཕྱེད་ཀ་ལྷག་རྒྱ་ནག་ནང་བཀག་ཉར་བྱས་ཡོད་པ་མངོན་གསལ་གནང་འདུག  ཆབས་ཅིག་ཏུ་རྒྱ་གཞུང་གིས་བོད་དང་ཐེ་ཝན། ལྐོག་ཟ་རུལ་སུངས་བཅས་ཀྱི་གནད་དོན་སྐོར་གནས་ཚུལ་སྤེལ་བར་དམ་དྲག་བྱེད་བཞིན་པར་དེང་སྐབས་རང་བྱུང་གོད་ཆག་དང་། #MeToo movement ཞེས་ཆགས་སྲེད་བརྙས་བཅོས་འགོག་ཐབས་ཀྱི་ལས་འགུལ་སྐོར། དེ་བཞིན་ཏོག་དབྱིབས་གཉན་རིམས་ལ་སྲིད་གཞུང་ནས་ཡ་ལན་བྱེད་ཕྱོགས་སྐོར་སོགས་གནད་དོན་མང་དག་ཅིག་གི་ཐོག་ལའང་གནས་ཚུལ་འགོད་པ་དང་ཕྱི་ཕྱོགས་ལ་བཤད་མཁན་ཚོར་བཀག་སྡོམ་དང་དམ་དྲག་བྱེད་ཀྱི་ཡོད་པར་མངོན་གསལ་གནང་འདུག ལྷག་པར་རྒྱ་ནག་སྲིད་གཞུང་གིས་ཏོག་དབྱིབས་གཉན་རིམས་ལ་ཡ་ལན་སྤྲད་ཕྱོགས་དང་འབྲེལ་ཕྱི་ལོ་ ༢༠༢༠ ལོར་གསར་འགོད་པ་དང་དྲ་རྒྱའི་ཐོག་དེ་འབྲེལ་བཀའ་མོལ་གནང་མཁན་མི་བཅུ་འཛིན་བཟུང་བྱས་པའི་སྐོར་དང་དེའི་ཁྲོད་རང་དབང་ཅན་གྱི་བརྙན་པར་གསར་འགོད་པ་ Zhang Zhan དང་ Fang Bin གཉིས་ད་དུང་ཡང་འཛིན་བཟུང་བཀག་ཉར་འོག་ཡོད་པར་ཐེར་འདོན་གནང་འདུག རྒྱ་ནག་གཞུང་གིས་སྙན་ཐོར་གསར་འགོད་པའི་ངོ་སྤྲོད་ལག་འཁྱེར་བསྐྱར་བཟོ་སླད་གསར་འགོད་པ་རྣམས་ཞི་ཅིན་ཕིང་གི་ལྟ་གྲུབ་སོགས་ཀྱི་ཐད་ཆུ་ཚོད་ ༩༠ འི་ལོ་འཁོར་སྦྱོང་བརྡར་བརྒྱུད་འགྲོ་དགོས་པ་དང་ལྷག་པར་ Study Xi, Strengthen the Country ཞེས་ཞི་ཅིན་ཕིང་གི་ལྟ་གྲུབ་དང་འབྲེལ་མཉེན་ཆས་ངེས་པར་དུ་ཕབ་ལེན་གནང་དགོས་པ་དང་མཉེན་ཆས་དེའི་བརྒྱུད་རྒྱ་གཞུང་གིས་སྒེར་གྱི་གནས་ཚུལ་རྣམས་མཁོ་སྒྲུབ་བྱེད་ཀྱི་ཡོད་པ་མ་ཟད། ཕྱི་ཕྱོགས་ཀྱི་གསར་འགོད་པ་ཚོར་གསང་མྱུལ་དང་མཐོང་མཆན་མ་སྤྲད་པའི་འཇིགས་སྐུལ་བྱས་ཏེ་ཕྱི་ལོ་ ༢༠༢༠ ལོར་གསར་འགོད་པ་ ༡༨ རྒྱ་ནག་བཞག་ནས་འགྲོ་དགོས་པ་བྱུང་སྐོར་སོགས་གསལ་འདོན་གྱིས་རྒྱ་ནག་ནི་འདི་ལོའི་གསར་འགོད་རང་དབང་ཐད་རྒྱལ་ཁབ་ ༡༨༠ མིང་འདོན་གནང་བའི་ཁོངས་སུ་ཆེས་སྡུག་ཤོས་གཤམ་འོག་ནས་རྩིས་པའི་ཨང་རིམ་བཞི་པ་སྟེ་ ༡༧༧ གྲས་སུ་བཞག་འདུག རྩ་བའི་རྒྱ་ནག་ལྟ་བུ་ལོ་ལྟར་ཆེས་རང་དབང་མེད་པ་དང་གསར་འགོད་པར་དམ་དྲག་ཆེ་ཤོས་བྱེད་མཁན་གྱི་རྒྱལ་ཁབ་ཁོངས་སུ་མིང་འདོན་བྱས་དང་བྱེད་བཞིན་ཡོད་པ་ནི་ཡོངས་གྲགས་ཤིག་ཆགས་ཡོད། ལྷག་པར་དུ་ཉེ་ལམ་རྒྱ་ནག་ཏུ་རྟེན་གཞི་བྱས་པའི་  Foreign Correspondents’ Club of China ཞེས་པའི་ཕྱིའི་རྒྱལ་ཁབ་ཁག་གི་གསར་འགོད་པའི་མཐུན་ཚོགས་ཀྱིས་རྒྱ་ནག་གཞུང་གིས་འཚོགས་ལ་ཉེ་བའི་དགུན་དུས་ཨོ་རྩལ་རྩེད་འགྲན་སྐོར་གནས་ཚུལ་སྤེལ་བར་ཕྱི་རྒྱལ་གྱི་གསར་འགོད་པ་རྣམས་ལ་འགོག་རྐྱེན་སྣ་ཚོགས་བཟོས་པ་དང་། རྩེད་འགྲན་དང་འབྲེལ་བའི་བྱེད་སྒོ་ཁག་ཕྱི་གསལ་ནང་གསལ་བཟོ་ཡི་མེད་པ་མ་ཟད་ཕྱིའི་བརྒྱུད་ལམ་ཁག་ནས་རྩེད་འགྲན་སྐོར་གནས་ཚུལ་སྤེལ་ཆོག་དང་མི་ཆོག་སྐོར་ད་བར་གསལ་པོ་བཟོ་མེད་པ་སོགས་ལ་སྐྱོན་བརྗོད་གནང་ཡོད། ཉེ་ལམ་རྒྱལ་མཚམས་མེད་པའི་གསར་འགོད་པའི་ཚོགས་པས་པེ་ཅིང་གི་དགུན་དུས་ཨོ་རྩལ་དང་འབྲེལ་གནས་ཚུལ་སྤེལ་མཁན་གྱི་གསར་ཁང་དང་གསར་འགོད་པ་ཚོས་རྒྱ་གཞུང་གི་གསང་མྱུལ་དང་ལྟ་སྲུང་ལས་རང་ཉིད་སྐྱོབ་དགོས་པའི་ཉེན་བརྡ་ཡང་བཏང་ཡོད་པ་རེད།

ད་ལྟ་སུད་སི་རྒྱལ་ས་སྦན་དུ་དགུན་དུས་གྲོས་ཚོགས་འཚོགས་བཞིན་པ་དང་བསྟུན་སུད་སིའི་གྲོས་ཚོགས་ཚོགས་ཁང་ཞིག་ཏུ་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་དང་བོད་མིའི་སྐུ་ཚབ་རྣམས་ལྷན་འཛོམས་ཐོག་བོད་ནང་གི་གནས་སྟངས་དང་མ་འོངས་ལས་འཆར་སྐོར་བཀའ་བསྡུར་གནང་འདུགཟླ་བ་འདིའི་ཕྱི་ཚེས་ ༧ ཉིན་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Nicholas Walder ལགས་ཀྱིས་གཙོ་སྐྱོང་གནང་སྟེ་གྲོས་ཚོགས་འཐུས་མི་ Fabian Molina ལགས་དང། Maya Graf ལགས། དེ་བཞིན་ Preliez-Huber ལགས་བཅས་ཀྱིས་དབུས་པའི་སུད་སི་བོད་ཀྱི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་དོན་ཁང་གི་འབྲེལ་ཡོད་ལས་བྱེད། སུད་སི་དང་ལིག་ཏེན་སིཌཡན་བོད་རིགས་མི་ཚོགས་གཙོ། སུད་བོད་མཐུན་ཚོགས་ཀྱི་སྐུ་ཚབ་བཅས་ལྷན་འཛོམས་གནང་འདུག ཚོགས་འདུ་ཐོག་གཙོ་བོ་ཉེ་བའི་ཆར་བོད་ནང་རྒྱ་ནག་གཞུང་གི་ངོས་ནས་འཆར་གཞི་དང་གོ་རིམ་ལྡན་པའི་ངང་བོད་མིའི་སྐད་ཡིག་དང་ངོ་བོ་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པའི་གནད་དོན་དང་དང་སུད་སི་གཞུང་ནས་ཨ་རིས་གཙོས་པའི་རྒྱལ་ཁབ་གཞན་ཁག་དང་གཅིག་མཚུངས་ཀྱིས་པེ་ཅིང་དགུན་དུས་ཨོ་རྩལ་མགྲན་ཚོགས་ཐོག་གཞུང་འབྲེལ་དཔོན་རིགས་མཉམ་ཞུགས་གནང་རྒྱུ་ཕྱིར་འཐེན་ཡོང་བའི་གནད་དོན་བཅས་གྲོས་ཚོགས་སུ་གླེང་སློང་གནང་བའི་ཞུ་འབོད་གནང་འདུག་པར་མ་ཟད། ད་ལྟའི་ཆར་སུད་སི་ནང་ཡིག་ཆ་མེད་པའི་བོད་མི་སྐྱབས་བཅོལ་བའི་ངལ་འཕྲད་དེ་སེལ་ཐབས་གནང་གལ་ཡིན་པ་སོགས་ཀྱི་སྐོར་ལ་བཀའ་བསྡུར་གནང་ཡོད། སུད་སི་སྐུ་ཚབ་དོན་གཅོད་འཆིེ་མེད་རིག་འཛིན་ལགས་ཀྱིས་ཁ་ཉིན་བོད་མིའི་སྐུ་ཚབ་ཀྱི་ངོས་ནས་གྲོས་ཚོགས་འཐུས་མི་ཚོ་དང་ལྷན་དུ་ཉེ་ཆར་བོད་ནང་རྒྱ་ནག་གཞུང་གི་ངོས་ནས་འཆར་གཞི་དང་གོ་རིམ་ལྡན་པའི་ངང་བོད་མིའི་སྐད་ཡིག་དང་ངོ་བོ་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པའི་གནད་དོན་ཐོག་བཀའ་བསྡུར་དང་དེ་དོན་གྲོས་ཚོགས་སུ་གླེང་ཡོང་བའི་འབོད་སྐུལ་ཞུས་པ་ལྟར་ཁ་སང་སུད་སི་གྲོས་ཚོགས་སུ་གོང་གསལ་གནད་དོན་ཐད་ལ་བགྲོ་གླེང་བྱུང་ཡོད་པར་འགྲེལ་བརྗོད་གནང་སོང་།སྤྱིར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་དེ་ལོ་ལྟར་ལོ་གཅིག་ནང་སུད་སི་དབུས་གྲོས་ཚོགས་འཚོགས་བཞིན་པ་དང་བསྟུན་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་རྣམ་པ་དང་དང་བོད་མིའི་སྐུ་ཚབ་བཅས་ལྷན་འཛོམས་ཀྱི་ཐོག་ནས་ཚོགས་འདུ་ཐེངས་གཉིས་ཚོགས་སྲོལ་ཡོད་པ་རེད། ད་རེས་ཀྱི་ཚོགས་འདུ་དེ་ཕྱི་ལོ་ ༢༠༢༡ ལོའི་ལྷན་འཛོམས་ཐེངས་གཉིས་པ་དེ་ཆགས་ཀྱི་ཡོད་པ་དང་ད་ཆར་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པར་སུད་སི་ཆབ་སྲིད་ཚོགས་པ་འདྲ་མིན་ནས་གྲོས་ཚོགས་འཐུས་མི་གྲངས་ ༢༥ ཙམ་ཡོད་པ་རེད། དེ་དང་ཕྱོགས་མཚུངས་ཕྱི་ཚེས་ ༧ ཉིན་གྲོས་ཚོགས་འཐུས་མི་རྣམ་པའི་ཚོགས་འདུ་གྲུབ་འཚམས་སུ་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་རྣམ་པས་གྲོས་ཚོགས་ཀྱི་ཕྱི་ཕྱོགས་སུ་ས་གནས་སུ་ཡོད་པའི་གཞུང་འབྲེལ་མིན་པའི་ཚོགས་ཁག་གི་རིང་མིན་པེ་ཅིང་དགུན་དུས་ཨོ་རྩལ་མགྲན་ཚོགས་ཐོག་སུད་སི་གཞུང་འབྲེལ་དཔོན་རིགས་མཉམ་ཞུགས་གནང་རྒྱུ་ཕྱིར་འཐེན་གནང་དགོས་པའི་ཞུ་འབོད་ལས་འགུལ་ཐོག་མཉམ་ཞུགས་ཀྱིས་རྒྱབ་སྐྱོར་ཡོད་པའི་རྣམ་པ་ཡང་བསྟན་འདུག

ཉེ་ལམ་ཨ་རིའི་གཞུང་ནས་རྒྱ་ནག་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བའི་བྱེད་ཕྱོགས་ཁག་ལུང་འདྲེན་གྱིས་འཚོགས་ལ་ཉེ་བའི་པེ་ཅིན་གྱི་ཨོ་རྩལ་འགྲན་ཚོགས་སྐབས་ཨ་རིའི་ཕྱི་འབྲེལ་མི་སྣ་གགཏོང་རྒྱུམེད་པ་ཡོངས་གྲགས་གནང་བ་དང་། རྒྱ་ནག་གཞུང་ནས་དེར་ངོ་རྒོལ་ཤུགས་ཆེར་བྱེད་བཞིན་པའི་ཁྲོད་ད་ཆ་ཨོ་གླིང་དང་དབྱིན་ཡུལ་ཁྱབ་ཁོངས་སུ་གཏོགས་པའི་སི་ཁོཊ་ལན་ཌི་གཞུང་ནས་ཀྱང་རྒྱ་ནག་གིས་བོད་མི་གཙོས་ཡུ་གུར་མི་རིགས་སོགས་ཀྱི་འགྲོ་བ་མིའི་ཐོབ་ཐང་རྕིས་མེད་རྡོག་རོལ་གཏོང་བཞིན་པར་ཐུགས་འཚབ་ཡོད་པ་དང་སྦྲགས། པེ་ཅིན་གྱི་དགུན་དུས་ཨོ་རྩལ་སྐབས་དེ་གའི་ཕྱི་འབྲེལ་མི་སྣ་གཏོང་རྒྱུ་མིན་པར་གསུངས་འདུག དེ་རིང་ The Scotsman གསར་ཁང་གིས་འདོན་སྤེལ་གནང་བའི་གནས་ཚུལ་ལ་གཞིགས་ན། སི་ཁོཊ་ལན་ཌི་ཡི་རྩེད་རིགས་བློན་ཆེན་ Maree Todd ལགས་ཀྱིས་ཁུལ་དེའི་ལྗང་ཁུ་ཚོགས་པའི་གྲོས་ཚོགས་འཐུས་མི་ Ross Greer ལགས་ཀྱིས་ཡིག་ཐོག་ནས་ཕུལ་བའི་དྲི་བ་ཞིག་ལ་བཀའ་ལན་གནང་སྐབས། སི་ཁོཊ་ལན་ཌི་གཞུང་ནས་རྒྱ་གཞུང་གིས་བོད་མི་དང་ཡུ་གུར། དེ་བཞིན་ཤིན་ཅང་ནང་གི་ཁ་ཆེ་མི་རིགས་གཞན་གཙོས་ཧོང་ཀོང་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ལ་ཆེས་ཐུགས་འཚབ་ཡོད་པ་དང་སྦྲགས། སི་ཁོཊ་ལན་ཌི་གཞུང་དང་བློན་ཆེན་རྣམས་པེ་ཅིན་གྱི་དགུན་དུས་ཨོ་རྩལ་ལ་ཚོགས་ཞུགས་གནང་རྒྱུའི་འཆར་གཞི་མེད་ཅེས་གསུངས་འདུག སྐུ་ཞབས་ Ross Greer ལགས་ཀྱིས་ད་ལན་སི་ཁོཊ་ལན་ཌི་ཡིས་ཐག་གཅོད་དེ་ཡིས་རྒྱ་ནག་ལ་རྒྱ་གཞུང་ནས་བོད་མི་གཙོས་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱེད་ཕྱོགས་ལ་ཁ་ཁུ་སིམ་མེར་བཞུགས་རྒྱུ་མིན་པའི་བརྡ་ལན་གསལ་པོ་སྤྲོད་ཐུབ་ཡོད་པ་གསུངས་པ་དང་། དེ་བཞིན་གྲོས་ཚོགས་འཐུས་མི་ Mercedes Villalba ལགས་ཀྱིས་པེ་ཅིན་གྱི་ཨོ་རྩལ་འགྲན་ཚོགས་ནང་ཚོགས་ཞུགས་བྱས་པ་དེས་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ལ་རྒྱབ་སྐྱོར་བྱས་པ་་ཞིག་ཆགས་ཀྱི་ཡོད་པ་མ་ཟད། སྤྱིར་མི་ཚང་མར་བཙན་དབང་གི་ཉེས་ཆད་ཀྱི་ཞེད་སྣང་མེད་པའི་ཐོག་བསམ་བརྗོད་ཀྱི་རང་དབང་དགོས་ཀྱང་། རྒྱ་ནག་གི་དབང་སྒྱུར་འོག་ཡོད་པའི་བོད་མི་གཙོས་གཞན་མི་རིགས་ཚོར་དེ་འབྲེལ་གྱི་རང་དབང་མེད་སྟབས། ང་ཚོས་གཞུང་ནས་པེ་ཅིན་གྱི་ཨོ་རྩལ་ལྟ་བུར་ཚོགས་ཞུགས་བྱེད་རྒྱུ་མེད་པ་དེ་ཧ་ཅང་གལ་ཆེན་ཆགས་ཡོད་ཅེས་གགསུངས་འདུག གཞི་རྩའི་ཉེ་ལམ་ཨ་རིའི་གཞུང་ནས་རྒྱ་ནག་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བའི་བྱེད་ཕྱོགས་ཁག་ལུང་འདྲེན་གྱིས་པེ་ཅིན་གྱི་ཨོ་རྩལ་འགྲན་ཚོགས་སྐབས་ཨ་རིའི་ཕྱི་འབྲེལ་མི་སྣ་གཏོང་རྒྱུ་མེད་པ་ཡོངས་གྲགས་གནང་ཡོད་པ་དང་། དེར་རྒྱ་ནག་གཞུང་གི་ཨ་རིའི་ཐག་གཅོད་ལ་འཁོན་ལན་ལོག་རྒྱུ་ཡིན་པའི་ཉེན་བརྡ་བཏང་ཡོད་པ་རེད། རྒྱ་གཞུང་གིས་ཉེན་བརྡ་ལ་ལྟོས་མེད་དེ་རིང་ཨོ་སི་ཀྲོ་ལི་ཡ་སྲིད་བློན་ Scott Morrison མཆོག་ནས་ཀྱང་པེ་ཅིན་གྱི་ཨོ་རྩལ་འགྲན་ཚོགས་སྐབས་དེ་གའི་རྩེད་འགྲན་པ་མ་གཏོགས་ཕྱི་འབྲེལ་མི་སྣ་གཏོང་རྒྱུ་མེད་པ་གསལ་བསྒྲགས་གནང་འདུག སྲིད་བློན་ Morrison མཆོག་གིས་པེ་ཅིན་གྱི་ཨོ་རྕལ་འགྲན་ཚོགས་སུ་ཕྱི་འབྲེལ་མི་སྣ་གཏོང་རྒྱུ་མིན་པའི་ཐག་གཅོད་དེ་བཞིན་ཨོ་གླིང་ནས་རྒྱ་ནག་གཞུང་དང་ལྷན་ཤིན་ཅང་ནང་གི་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་ཐད་གོ་བསྡུར་གནང་མ་ཐུབ་པ་དང་ཆབས་ཅིག ཚོང་འབྲེལ་ཐད་རྒྱ་གཞུང་གིས་ཨོ་གླིང་གི་ཚོང་ཟོག་རྣམས་རྒྱ་ནག་ནང་བཀག་སྡོམ་བྱས་པའི་རྐྱེན་གྱིས་དེ་ལྟར་གནང་བ་འགྲེལ་བརྗོད་གནང་འདུག གཞི་རྩའི་ཨོ་གླིང་ནས་དེ་སྔ་ཕྱི་ལོ་ ༢༠༡༨ ལོར་ 5G དྲྭ་རྒྱའི་ཚོང་ལས་ཐད་རྒྱ་ནག་གི་འཕྲུལ་ལས་ཚོང་གཉེར་ཁང་ Huawei བཀག་སྡོམ་བྱས་པ་མ་ཟད། དེའི་རྗེས་ཏོག་དབྱིབས་གཉན་རིམས་ ༡༩ བའི་བྱུང་རྐྱེན་རྒྱ་ནག་ནས་ཡིན་མིན་རྩད་ཞིབ་བྱེད་དགོས་པའི་ཐད་ཞུ་སྐུལ་གནང་ཡོད་པ་རེད། ཨོ་གླིང་གི་གནང་ཕྱོགས་དེར་རྒྱ་གཞུང་ནས་འཁོན་ལན་ཚུལ་དུ་ཨོ་གླིང་ནས་བྱུང་བའི་དངོས་ཟོག་རྡོ་སོལ་དང་། གླང་ཤ། དེ་བཞིན་ནས་དང་རྒུན་ཆང་སོགས་བཀག་སྡོམ་བྱས་ཡོད་པ་རེད། གནད་དོན་དེའི་རྐྱེན་གྱིས་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད་པ་དང་ ལྷག་པར་ད་རེས་ཨོ་གླིང་གིས་པེ་ཅིན་ཨོ་རྩལ་འགྲན་ཚོགས་སྐབས་དེ་གའི་ཕྱི་འབྲེལ་མི་སྣ་གཏོང་རྒྱུ་མིན་པའི་ཐག་གཅོད་དེས་སྔར་ཇེ་སྡུག་ཏུ་ཕྱིན་པའི་འབྲེལ་ལམ་དེ་ཛ་དྲག་ཏུ་འགྲོ་ངེས་ཡིན་པའི་ཉེན་འཚབ་ཡོད་པ་འཁོད་འདུག ཨོ་གླིང་གིས་ཨོ་རྩལ་འགྲན་ཚོགས་ཀྱིས་ད་ལན་གཞུང་ནས་པེ་ཅིན་གྱི་ཕྱི་འབྲེལ་མི་སྣ་གཏོང་རྒྱུ་མེད་པའི་ཐག་གཅོད་དེས་པེ་ཅིན་གྱི་ཨོ་རྩེད་ནང་མཉམ་ཞུགས་གནང་མཁན་གྱི་ཨོ་གླིང་གི་རྩེད་འགྲན་པ་ཚོར་ཤུགས་རྐྱེན་གང་ཡང་ཡོང་གི་མ་རེད་ཅེས་གསུངས་འདུག ཨོ་གླིང་གི་ཐག་གཅོད་དེར་ཨོ་གླིང་གི་བོད་དོན་རྒྱབ་སྐྱོར་ཚོགས་པས་དགའ་བསུ་ཞུས་པ་དང་སྦྲགས། ད་ལན་སྲིད་བློན་མཆོག་གིས་ཐག་གཅོད་དེས་རྒྱ་ནག་གི་བཙན་གནོན་འོག་ཡོད་པའི་མི་རིགས་ཚོར་གདུང་སེམས་མཉམ་སྐྱེད་གནང་བ་ཞིག་ཡིན་པ་མ་ཟད། རྒྱལ་ཁབ་གཞན་ནས་ཀྱང་བློ་སྤོབས་ལྡན་པའི་ཐོག་ནས་དེ་ལྟར་གནང་དགོས་པའི་དཔེ་མཚོན་བསྟན་ཡོད་པས། རྒྱལ་སྤྱིའི་རྒྱལ་ཁབ་རྣམས་ནས་པེ་ཅིན་གྱི་དགུན་དུས་ཨོ་རྩལ་ལ་ཕྱི་འབྲེལ་མི་སྣ་གཏོང་རྒྱུ་མིན་པའི་ཐག་གཅོད་གནང་དགོས་པའི་ཞུ་སྐུལ་གནང་འདུག

ཁ་སང་ཨ་རིའི་ཕོ་བྲང་དཀར་པོའི་གསར་འགོད་དྲུང་ཆེ་ལགས་ཀྱིས་རྒྱ་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེར་བཏང་དང་གཏོང་བཞིན་པའི་གནས་སྟངས་འོག་ཨ་རི་སྲིད་གཞུང་ངོས་ནས་པེ་ཅིང་དུ་འཚོགས་རྒྱུའི་སང་ལོའི་དགུན་དུས་ཀྱི་རྒྱལ་སྤྱིའི་ཨོ་རྩལ་དུ་གཞུང་འབྲེལ་མི་སྣ་གཏོང་རྒྱུ་མིན་སྐོར་གསལ་བསྒྲགས་སྤེལ་འདུག ཨ་རིའི་སྲིད་འཛིན་བྷ་ཊན Joe Biden མཆོག་གི་སྣེ་ཁྲིད་གནང་བའི་ཨ་རིའི་མང་གཙོ་ཚོགས་པ་དང་ཕྱོགས་འགལ་སྤྱི་མཐུན་ཚོགས་པ་གཉིས་ཀྱི་གྲོས་ཚོགས་འཐུས་མི་སོགས་ནས་སྲིད་འཛིན་བྷ་ཊན Biden མཆོག་ལ་རྒྱ་ནག་གི་དགུན་དུས་ཨོ་རྩལ་འགྲན་ཚོགས་ལ་གཞུང་འབྲེལ་མི་སྣ་ཆེད་གཏོང་མི་གནང་བར་ཕྱི་འབྲེལ་གྱི་ཐོག་ནས་ངོ་རྒོལ་གནང་དགོས་པའི་གནོན་ཤུགས་ཤུགས་ཆེར་སྤྲད་ཡོད་པའི་ཁྲོད་འདིར་ཁ་སང་ཨ་རིའི་ཕོ་བྲང་དཀར་པོའི་གསར་འགོད་དྲུང་ཆེ་ལྕམ་ Jen Psaki ལགས་ཀྱིས་གསར་འགོད་ལྷན་ཚོགས་ཤིག་སྐོང་གནང་སྟེ་ད་ལན་སྲིད་འཛིན་བྷ་ཊན་གྱི་གཞུང་འཛིན་ལྷན་ཁང་ནས་པེ་ཅིང་དུ་དགུན་དུས་ཀྱི་ཨོ་རྩལ་རྩེད་འགྲན་འཚོགས་ཀྱི་ཡོད་པ་དེའི་དབུ་འབྱེད་དང་མཇུག་སྡོམ་གྱི་མཛད་སྒོ་སོགས་ཀྱི་ཐོག་ཏུ་ཨ་རིའི་གཞུང་འབྲེལ་མི་སྣ་མཉམ་ཞུགས་གནང་རྒྱུ་མིན་པའི་གསལ་བསྒྲགས་སྤེལ་བ་དང་འབྲེལ་ཐག་གཅོད་དེ་ནི་རྒྱ་གཞུང་གིས་ཡུ་གུར་མི་རིགས་གཙོས་གྲངས་ཉུང་མི་རིགས་ཚོའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེར་གཏོང་བཞིན་པའི་བྱ་སྤྱོད་ལ་སྐྱོན་བརྗོད་ཀྱི་ཆེད་དུ་ཡིན་པ་གསུངས་འདུག ལྕམ་སྐུ་མཆོག་གིས་ཐེངས་འདིར་དགུན་དུས་ཀྱི་རྒྱལ་སྤྱིའི་ཨོ་རྩལ་འགྲན་ཚོགས་ཐོག་ཨ་རིའི་གཞུང་འབྲེལ་མི་སྣ་ཆེད་གཏོང་གནང་རྒྱུ་མིན་ནའང་། ཨ་རིའི་རྩེད་འགྲན་པ་ཚོ་རྩེད་འགྲན་ཁག་ནང་མཉམ་ཞུགས་གནང་རྒྱུ་དང་ཁོང་རྣམ་པར་ཨ་རིའི་གཞུང་གིས་ཚད་མཐོའི་རྒྱབ་སྐྱོར་ཡོད་པ་གསུངས་འདུག ད་རེས་སྲིད་འཛིན་ Biden གི་གཞུང་འཛིན་ལྷན་ཁང་གིས་གོང་ཞུས་ཐག་གཅོད་དེ་གསལ་བསྒྲགས་གནང་འཕྲལ་རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རིའི་གཞུང་འབྲེལ་མི་སྣ་ཚོ་པེ་ཅིང་གི་དགུན་དུས་ཨོ་རྩལ་འགྲན་ཚོགས་ཀྱི་མཛད་སྒོར་ཞུགས་རྒྱུ་མིན་པ་དེ་ནི་བཟང་སྤྱོད་དང་ཐབས་བྱུས་གཉིས་ཀ་ལྡན་པའི་ཐག་གཅོད་ཡང་དག་པ་ཞིག་ཡིན་སྟབས་དེ་ལྟའི་བུའི་བྱ་སྤྱོད་སྤེལ་རྒྱུ་དེས་ཨ་རིའི་ངོས་ནས་རྒྱ་གཞུང་གི་དྲག་གནོན་འོག་དཀའ་སྡུག་མྱོང་བཞིན་པའི་བོད་མི་གཙོས་ཡུ་གུར་ཁ་ཆེ་དང་ནང་སོག དེ་བཞིན་ཧོང་ཀོང་བ་སོགས་ལ་རྒྱབ་སྐྱོར་གྱིས་བརྡ་ལན་གལ་འགངས་ཆེ་བ་ཞིག་སྤྲད་པ་དང་མཉམ་དུ་ལོ་རྒྱུས་ཀྱི་དྲང་བདེན་ཕྱོགས་སུ་རང་སོར་གནས་པ་ཞིག་ཀྱང་མཚོན་གྱི་ཡོད་ཅེས་གསུངས་ཏེ་འཛམ་གླིང་གི་རྒྱལ་ཁབ་གཞན་ཚོས་ཨ་རིའི་རྗེས་སུ་འབྲང་དགོས་པ་དང་དེ་བཞིན་རྒྱལ་སྤྱིའི་ཨོ་རྩེད་ལྷན་ཚོགས་ངོས་ནས་རྒྱ་ནག་ལ་དེ་འབྲེལ་རྩེད་འགྲན་གོ་སྒྲིག་བྱེད་བཅུག་པར་འགན་ལེན་ཁུར་དགོས་པའི་ནན་བརྗོད་གནང་འདུག ལྷག་དོན་ཨ་རིའི་གཞུང་གིས་༢༠༢༢ ལོའི་དགུན་དུས་ཀྱི་རྒྱལ་སྤྱིའི་ཨོ་རྩལ་འགྲན་ཚོགས་སུ་གཞུང་འབྲེལ་མི་སྣ་གཏོང་རྒྱུ་མིན་པའི་གསལ་བསྒྲགས་ཐོག་ཏུ་ཨ་རིའི་གཞུང་གིས་བོད་དོན་ཁྲིམས་འཆར་གྱི་འབྲུ་དོན་བཞིན་ནུས་པ་ལྡན་པའི་བོད་དོན་དམིགས་བསལ་འབྲེལ་མཐུད་པ་ཞིག་གང་མགྱོགས་བསྐོ་གཞག་དགོས་པའི་སྐུལ་མ་གནང་བ་བརྒྱུད་བོད་རྒྱ་འབྲེལ་མོལ་བསྐྱར་གསོ་དགོས་པ་གསུངས་འདུག དེ་དང་ཆབས་ཅིག་དབྱིན་ཡུལ་དུ་རྟེན་གཞི་བྱས་པའི་ Free Tibet ཞེས་བོད་དོན་རྒྱབ་སྐྱོར་ཚོགས་པས་ཨ་རིའི་སྲིད་འཛིན་ Joe Biden གཞུང་འཛིན་ལྷན་ཁང་གི་ཐག་གཅོད་ལ་དགའ་བསུའི་འཚམས་འདྲི་གནང་པ་དང་འབྲེལ་ནས་དབྱིན་ཡུལ་གཞུང་ངོས་ནས་ཀྱང་གང་མགྱོགས་ཡུལ་དེའི་གཞུང་འབྲེལ་མི་སྣ་ཚོ་པེ་ཅིང་གི་དགུན་དུས་ཨོ་རྩལ་འགྲན་ཚོགས་ཐོག་ཞུགས་རྒྱུ་མིན་པའི་གཞུང་འབྲེལ་གསལ་བསྒྲགས་སྤེལ་དགོས་པའི་འབོད་སྐུལ་ཞུས་ཡོད་པ་རེད། རྩ་བའི་ཁ་སང་ཨ་རིའི་ངོས་ནས་ཐག་གཅོད་དེ་གསལ་བསྒྲགས་མ་གནང་བའི་གོང་དུ་གནད་དོན་དེའི་ཐད་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པས་ཨ་རིས་ཨོ་རྩལ་འགྲན་ཚོགས་ཐོག་གཞུང་འབྲེལ་མི་སྣ་གཏོང་རྒྱུ་མིན་པའི་བཀག་སྡོམ་གྱི་འབོད་སྒྲ་དེ་ནི་རྒྱལ་སྤྱིའི་ཨོ་རྩལ་གྱི་སྙིང་སྟོབས་ལ་འགྲེལ་བརྗོད་ལོག་པ་དང་ཆབ་སྲིད་ཀྱི་རྣམ་པར་འགྱུར་སྟོན་ཐབས་བྱས་པ་མ་ཟད། རྒྱ་རིགས་མང་ཚོགས་ལ་ཕོག་ཐུག་གཏོང་གི་ཡོད་ལུགས་བརྗོད་ནས་གལ་སྲིད་ཨ་རིའི་གཞུང་གིས་ཤེས་བཞིན་ཏུ་དེ་ལྟར་ཁྱད་གསོད་ཀྱིས་ལམ་ཁར་མུ་མཐུད་བསྐྱོད་ཚེ་རྒྱ་ནག་གཞུང་གིས་བློ་ཐག་ཆོད་པོས་རྒོལ་ལན་སློག་རྒྱུ་ཡིན་པ་བརྗོད་འདུག

ཇི་ནི་ཝར་ཚོགས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཁང་གི་གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་ཚོགས་ཐེངས་ ༡༤ ཐོག་བོད་མིའི་སྐུ་ཚབ་ཀྱིས་བོད་ནང་རྒྱ་ནག་གཞུང་གིས་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱས་དང་བྱེད་བཞིན་པའི་གནས་སྟངས་འོག་བོད་མིའི་ཆོས་རིག་དང་ལེགས་བྱང་། སྐད་ཡིག་བཅས་པ་རྩ་མེད་བཟོས་ཏེ་བོད་མི་རིགས་ཀྱི་ངོ་བོ་རྩ་བརླག་གཏོང་བཞིན་ཛ་དྲག་གནས་སྟངས་ཁག་སྙན་སེང་ཞུས་འདུག ཟླ་བ་འདིའི་ཕྱི་ཚེས་ ༢ དང་ ༣ བཅས་ཉིན་གྲངས་གཉིས་རིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གིས་གཙོ་འགན་བཞེས་ཐོག་ཚོགས་པའི་གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་ཚོགས་ཐེངས་ ༡༤ དེ་དེང་སྐབས་འཛམ་གླིང་ནང་གི་གྲངས་ཉུང་མི་རིགས་ཁག་གི་ཁྲོད་འཕྲད་བཞིན་པའི་གཞི་རྩའི་རྩོད་རྙོག་གི་བྱུང་རྐྱེན་དང་དེ་དག་ཁྲིམས་སྒྲིག་གི་སྒྲོམ་གཞིའི་འོག་ནས་སྔོན་འགོག་བྱེད་སྟངས་དང་གྲངས་ཉུང་མི་རིགས་ཁག་གི་རང་དབང་སྲུང་སྐྱོབ་དང་གོང་འཕེལ་བཅས་ཀྱི་གཙོ་གནད་ཐོག་ཚོགས་འདུ་ཚོགས་ཡོད་པ་རེད། ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཞབས་ Vicnet metten ལགས་ཀྱིས་ཚོགས་འདུ་ཐོག་འདས་པའི་ལོ་བདུན་ཅུ་ལྷག་གི་ནང་རྒྱ་གཞུང་གིས་བོད་ནང་བོད་མིའི་ཆབ་སྲིད་དང་སྤྱི་དམངས་ཐོབ་ཐང། སྤྱི་ཚོགས་དང་དཔལ་འབྱོར། དེ་བཞིན་ལེགས་བྱང་གི་རང་དབང་བཅས་རྡོག་རོལ་བཏང་ཡོད་པར་མ་ཟད་ལྷག་པར་དུ་སྲིད་འཛིན་ཞི་ཅིན་ཕིང་གི་སྣེ་ཁྲིད་འོག་བོད་ནང་བོད་མིའི་ཐོག་ལྟ་སྲུང་དང་དམ་དྲག་བྱེད་ཤུགས་ཆེ་རུ་གཏོང་བཞིན་པའི་གནད་དོན་དེས་བོད་ཡུལ་རྒྱ་ཡུལ་ལྟ་བུར་བཟོ་རྒྱུའི་སྲིད་བྱུས་ཤིག་ལག་བསྟར་བྱེད་བཞིན་ཁག་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་རྡོག་རོལ་བཏང་བའི་ཁར་རྩོད་རྙོག་ཆེ་རུ་གཏོང་བཞིན་པར་རྟེན་ཕྱི་ལོ་ ༢༠༠༩ ལོ་ནས་ད་བར་བོད་མི་ཚོས་ཞི་བའི་ངང་ནས་རྒྱ་གཞུང་གི་སྲིད་བྱུས་ལ་ངོ་རྒོལ་གྱིས་སྐུ་ལུས་ཞུགས་འབུལ་གནང་བའི་གནས་སྟངས་བྱུང་ཡོད་སྐོར་སྙན་སེང་ཞུས་ཡོད། ཁོང་གིས་ད་དུང་རྒྱ་ནག་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་ཡང་སྲིད་ཐོག་ཐེ་བྱུས་བྱེད་མཚམས་འཇོག་ནས་བོད་བརྒྱུད་ནང་བསྟན་ལམ་ལུགས་གཞིར་བཞག་ཡང་སྲིད་ངོས་འཛིན་ཞུ་རྒྱུའི་བོད་མིའི་རང་དབང་ལ་གུས་བརྩི་བྱེད་དགོས་པ་དང། བོད་རྒྱ་གཉིས་དབར་དཀའ་སེལ་ཐབས་སུ་རྒྱ་གཞུང་ནས་བོད་མིའི་སྐུ་ཚབ་སྲིད་སྐྱོང་སྤེན་པ་ཚེ་རིང་མཆོག་དང་ལྷན་གྲོས་མོལ་བྱེད་དགོས་པ་དང། དེ་བཞིན་དེ་སྔ་རྒྱལ་ཚོགས་ཀྱི་དམིགས་བསལ་ཁེ་ལས་སྡེ་ཁག་ ༥༠ ཡིས་ཆེད་བཏོན་གནང་བའི་བསམ་འཆར་གཞིར་བཞག་རྒྱ་ནག་གཙོས་བོད་དང་ཤར་ཏུ་ཀི་སི་ཐན། དེ་བཞིན་ཧོང་ཀོང་ནང་གི་འགྲོ་བ་མིའི་ཐོབ་ཐང་གི་གནད་དོན་་ཐོག་རྟོག་ཞིབ་ཆེད་རྒྱལ་ཚོགས་ནས་རང་དབང་ཅན་གྱི་དམིགས་བསལ་ཚོགས་ཆུང་ཆེད་འཛུགས་དགོས་པ་བཅས་རེ་འདུན་ཆེད་བཏོན་གནང་འདུག ཕྱོགས་མཚུངས་སུ་ཚོགས་འདུ་ཐོག་ཇི་ནི་ཝ་བོད་ཀྱི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་ནས་ Society for Threatened People གཞུང་འབྲེལ་མིན་པའི་ཚོགས་པའི་མིང་ཐོག་རྒྱལ་ཚོགས་ལ་རྒྱ་ནག་གཞུང་གིས་བོད་ནང་འཛིན་བཟུང་བྱེད་བཞིན་པའི་ད་ཡོད་སྤྱི་ཚོགས་སྒྲོམ་གཞི་དང་རྒྱ་རིགས་མི་འབོར་འཕེལ་རྒྱས་འཕོ་འགྱུར་ཁྲོད་བོད་མི་ཚོར་རང་མི་རིགས་ཀྱི་ལོ་རྒྱུས་དང་རིག་གཞུང་། སྐད་ཡིག་ཐོག་སློབ་གཉེར་བྱ་རྒྱུ་གོ་སྐབས་མེད་པ་བཟོ་བཞིན་པ་དང་། སྤྱི་ཚོགས་ཁྲོད་ཀྱི་ལས་རིགས་ཁག་གི་ནང་ལ་ས་གནས་བོད་མི་དང་མཐོ་སློབ་ཐོན་མཁན་བོད་རིགས་གཞོན་སྐྱེས་ཚོར་ལས་ཀའི་གོ་སྐབས་མེད་པ་སོགས། རྒྱ་གཞུང་གིས་མངོན་གསལ་མེད་པར་བོད་མིའི་ངོ་བོ་རྩ་མེད་གཏང་རྒྱུའི་སྲིད་བྱུས་ལ་བརྟེན་ནས་ད་བར་བོད་ནང་བོད་མི་ ༡༥༥ ནས་རྒྱ་གཞུང་ལ་ཞི་རྒོལ་གྱིས་རང་ལུས་མེར་བསྲེགས་གནང་བའི་གནས་ཚུལ་བྱུང་ཡོད་པ་རྒྱལ་ཚོགས་ལ་སྙན་སེང་ཞུས་འདུག ཁོང་གིས་བོད་ནང་གི་བོད་མི་ཚོའི་ཉིན་རེའི་འཚོ་བའི་ཁྲོད་ལ་རྒྱ་ནག་གཞུང་གིས་མི་རིགས་མཉམ་བསྲེས་ཀྱི་སྲིད་བྱུས་ལག་བསྟར་བྱེད་བཞིན་པ་དེས་བོད་མིའི་ངོ་བོ་རྩ་མེད་དུ་བཟོ་རྒྱུའི་ཉན་ཚབ་ཀྱི་གནད་དོན་དང་འབྲེལ་བ་ཡོད་སྟབས་རྒྱལ་ཚོགས་ཀྱི་ངོས་ནས་ཐུགས་སྣང་གནང་དགོས་པའི་རེ་འདུན་ཞུས་པ་དང་ཆབས་ཅིག ཐེངས་དེའི་གྲངས་ཉུང་མི་རིགས་ཀྱི་ཚོགས་འདུ་བརྒྱུད་བོད་ནང་བོད་མིའི་དཀའ་ངལ་སེལ་ཐབས་སུ་རྒྱ་གཞུང་ནས་བོད་ནང་བོད་མིའི་ཆོས་རིག་དང་ལེགས་བྱང་། སྐད་ཡིག དེ་བཞིན་ལོ་རྒྱུས་ཐོག་གུས་བརྩི་ཞུ་དགོས་པར་མ་ཟད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་མིའི་སྐུ་ཚབ་དང་ལྷན་དུ་དོན་སྙིང་ལྡན་པའི་འབྲེལ་མོལ་ཞུ་དགོས་པར་བསྐྱར་ནན་གནང་ཡོད།

ཁ་ཉིན་ཚེས་ ༣༠ ཉིན། ཡུ་རོབ་ཀྱི་ནི་ཐར་ལན་ཌིའི་གྲོས་ཚོགས་འོག་མའི་ནང་དུ་ཐེ་ཝན་དང་ལི་ཐོ་ནི་ཡར་རྒྱབ་སྐྱོར་གྱི་ཁྲིམས་འཆར་གཉིས་མང་མོས་ཀྱིས་གཏན་འབེབས་བྱས་ཏེ་རྒྱ་ནག་ནག་ལ་ཁ་གཏད་གཅོག་རྒྱུར་གྲོས་འཆམ་བྱུང་འདུག གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ནི་ཐར་ལན་ཌིའི་གྲོས་ཚོགས་ཀྱི་ནང་དུ། གྲོས་ཚོགས་ཀྱི་འཐུས་མི་ Raymond de Roon ལགས་ཀྱིས་གྲོས་འགོ་བཏོན་པ་བརྒྱུད་ནས། ད་ལྟའི་ཆར་རྒྱ་ནག་དང་ཐེ་ཝན་གཉིས་ཀྱི་འབྲེལ་ལམ་དངངས་འཚབ་ཀྱི་ཁྲོད་གནས་བཞིན་པའི་སྐབས་འདིར། ནི་ཐར་ལན་ཌིའི་སྲིད་གཞུང་གིས་རྒྱ་ནག་གི་ཁ་གཏད་དུ་ལངས་ནས་ཐེ་ཝན་ལ་མངོན་སུམ་གྱིས་རྒྱབ་སྐྱོར་བྱེད་རྒྱུའི་གྲོས་ཆོད་ཅིག་རྒྱབ་སྐྱོར་བ་ ༡༢༠ དང་ཁ་གཏད་པ་ ༣༠ ཐོག་ནས་མང་མོས་ཀྱིས་གཏན་འབེབས་གནང་འདུགདེ་བཞིན་གྲོས་ཚོགས་ཀྱི་འཐུས་མི་སྐུ་ཞབས་ Ruben Brekelmans དང་ Agnes Mulderལགས་གཉིས་ཀྱིས་གྲོས་འགོ་བཏོན་པ་བརྒྱུད་ནས། ལི་ཐོ་ནི་ཡའི་རྒྱལ་ནང་དུ་ཐེ་ཝན་གྱི་གཞུང་ཚབ་ཁང་ཞིག་བཙུགས་རྗེས་རྒྱ་ནག་གིས་རྒྱལ་ཁབ་དེར་ཕྱོགས་ཡོངས་ནས་གནོན་ཤུགས་སྤྲོད་བཞིན་པའི་ཁྲོད། ནི་ཐར་ལན་ཌིའི་སྲིད་གཞུང་གི་ངོས་ནས་རྒྱལ་ཁབ་དེར་རྒྱབ་སྐྱོར་དང་རྒྱ་ནག་ལ་ངོ་རྒོལ་གྱི་རྣམ་འགྱུར་བསྟན་པའི་གྲོས་གཞི་ཞིག་གྲོས་ཚོགས་འཐུས་མི་ ༡༧༧ གྱིས་རྒྱབ་སྐྱོར་དང་འཐུས་མི་ ༣༣ གྱིས་དགག་གཞག་བྱས་ཏེ་ཚད་མཐོའི་མང་མོས་ཀྱི་ཐོག་ནས་གཏན་འབེབས་བྱས་འདུགསྤྱིར་ནེ་ཐར་ལན་ཌིའི་ཕྱི་སྲིད་བློན་ཆེན་སྐུ་ཞབས Ben Knapen ལགས་ཀྱིས་དེ་སྔོན་ནེ་ཐར་ལན་ཌིའི་ངོས་ནས་རྒྱ་ནག་དང་ཐེ་ཝན་གཉིས་ཀྱི་ཛ་དྲག་གི་འབྲེལ་ལམ་དེ་ཚད་དམའ་རུ་གཏོང་རྒྱུའི་རེ་འདུན་བཏོན་ཡོད་པ་མ་ཟད། ཁོང་གིས་ཐེངས་འདིར་གྲོས་ཚོགས་ནང་དུ་ཡུ་རོབ་རྒྱལ་མཐུན་ཚོགས་ཀྱིས་དེ་སྔོན་ལི་ཐོ་ནི་ཡར་རྒྱབ་སྐྱོར་གྱི་ལངས་ཕྱོགས་གསལ་བོར་བཟོས་ཟིན་པར་བརྟེན། ཐེངས་འདིའི་ནི་ཐར་ལན་ཌིའི གྲོས་ཆོད་དེ་ཡིས་ཡུ་རོབ་མཐུན་ཚོགས་ཀྱི་ལངས་ཕྱོགས་དེ་མངོན་གསལ་བཟོས་ཡོད་པར་བསྒྲགས་འདུགནི་ཐར་ལན་ཌིའི་གྲོས་ཚོགས་སུ་ཐེ་ཝན་ལ་རྒྱབ་སྐྱོར་གྱི་གྲོས་ཆོད་གཏན་འབེབས་བྱས་མ་ཐག   ཁུལ་དེར་རྟེན་གཞི་བྱས་པའི་ཐེ་ཝན་གྱི་ཆེས་མཐོ་གཞུང་ཚབ་པ་སྐུ་ཞབས Chen Hsin-hsin ལགས་ཀྱིས་ཐེ་ཝན་མི་མང་གི་ཚབ་བྱས་ཏེ་ནི་ཐར་ལན་ཌིའི་གྲོས་ཚོགས་ལ་ཐུགས་རྗེ་ཆེ་ཞུས་ཡོད་པ་མ་ཟད། གྲོས་ཚོགས་འཐུས་མི་རྣམས་ཀྱིས་ཐེངས་འདིར་ཐེ་ཝན་དང་འབྲེལ་བའི་གྲོས་ཆོད་གཉིས་གཏན་འབེབས་བྱས་པ་དེ་ཡིས་ནི་ཐར་ལན་ཌིའི་སྲིད་གཞུང་ལ་ཚད་མཐོ་བའི་རྒྱབ་སྐྱོར་ཡོད་པ་མཚོན་ཡོད་པར་མངོན་གསལ་གནང་བ་བརྒྱུད་ནས། གྲོས་ཆོད་དེ་ཡིས་ཡུ་རོབ་མཐུན་ཚོགས་ཀྱི་རྒྱལ་ཁབ་གཞན་དག་གིས་ཀྱང་ཐེ་ཝན་གྱི་བདེ་འཇགས་དང་ཞི་བདེ་ལ་རྒྱབ་སྐྱོར་བྱེད་རྒྱུར་སྐུལ་མ་ཐེབས་རྒྱུའི་རེ་སྐུལ་གནང་འདུགགཞི་རྩའི་བདུན་ཕྲག་གཅིག་གི་སྔོན་དུ། ནི་ཐར་ལན་ཌིའི་གྲོས་ཚོགས་སུ་ཐེ་ཝན་སྐུ་ཚབ་རྒྱལ་སྤྱིའི་ཉེན་རྟོག་སྒྲིག་འཛུགས་སུ་ཞུགས་རྒྱུར་རྒྱབ་སྐྱོར་ཀྱི་གྲོས་ཆོད་བཞག་ཡོད་པ་དང་ཁ་སང་སྔར་བཞིན་ལངས་ཕྱོགས་བརྟན་པོའི་ཐོག་ནས་རྒྱ་ནག་ལ་ཁ་གཏད་ཀྱི་གྲོས་ཆོད་གཉིས་བཞག་ཡོད་པ་མ་ཟད། རྒྱ་ནག་གིས་ཐེ་ཝན་ལ་མཚོ་འགག་ནས་འཇིགས་སྐུལ་རིམ་པ་བྱེད་བཞིན་པའི་དུས་སྐབས་འདིར། བདུན་ཕྲག་སྔོན་མའི་ནང་དུ་ཨ་རིའི་གྲོས་ཚོགས་ཀྱི་འཐུས་མི་ལྔ་དང་ཁོང་ཅག་གི་ལས་རོགས་ཁག་ཅིག་གི་གཙོ་བྱས་པའི་གཞུང་འབྲེལ་གྱི་མི་སྣ་བཅུ་བདུན་ཐེ་ཝན་དུ་གཟིགས་སྐོར་ལ་ཕེབས་ཏེ་ཐེ་ཝན་གྱི་སྲིད་འཛིན་ལྕམ Tsai Ing-wen ལགས་དང་བདེ་སྲུང་གི་བློན་ཆེན་ལྕམ Chiu Kuo-chengལགས་སུ་མཇལ་འཕྲད་གནང་སྟེ་རྒྱལ་ཁབ་ཕྱོགས་གཉིས་ཀྱི་ཁེ་ཕན་དང་མངོན་འདོད་ལ་གྲོས་བསྡུར་བྱས་ཡོད་པ་རེད།

འདི་ལོའི་ཕྱི་ཟླ་བརྒྱད་པའི་ནང་ལ་ཨོ་སི་ཊོ་ལི་ཡའི་ཕྱི་སྲིད་བློན་ཆེན་ལྕམ་སྐུ་ Marise Payne ལགས་ཀྱིས་ སྲིད་བློན་སྐུ་ཞབས་ Scott Morrison ལགས་ཀྱིས་དབུ་ཁྲིད་པའི་སྲིད་གཞུང་གི་ངོས་ནས་དེ་སྔ་ཨ་རི་གཞུང་གིས་གཏན་འབེབས་བྱས་པའི་ Magnitsky Act ཞེས་པའི་རྒྱལ་སྤྱིའི་ཁྲིམས་ལྟ་བུ་ཞིག་གཏན་འབེབས་གནང་རྒྱུ་ཡིན་པར་ཡོངས་གྲགས་གནང་ཡོད་པ་དང་། ཁ་སང་ཨོ་སི་ཊོ་ལི་ཡའི་གྲོས་ཚོགས་གོང་མར་སྤྱི་མོས་ཐོག་ནས་ Magnitsky ལྟ་བུའི་ཁྲིམས་གཞི་དེ་གསར་དུ་གཏན་འབེབས་གནང་འདུགདེ་རིང་ཨོ་སི་ཊོ་ལི་ཡའི་ ABC གསར་ཁང་དང་ Sydney སྔ་དྲོའི་ཚགས་ཤོག་སོགས་ཀྱི་ཐོག་གནས་ཚུལ་སྤེལ་བར་གཞིགས་ན། ཁ་སང་ཉིན་རྒྱབ་ཡུལ་དེའི་གྲོས་ཚོགས་མའི་ནང་ལ་ཨ་སི་ཊོ་ལི་ཡའི་གནས་བབ་དང་འཚམས་པའི་ Magnitsky Act ཞེས་པའི་ཁྲིམས་འཆར་དེ་སྤྱི་མོས་གཏན་འབེབས་གནང་སྟེ་དེ་རིང་ཡུལ་དེའི་གྲོས་ཚོགས་འོག་མར་མཐའ་མའི་གཏན་འབེབས་ཀྱི་ལས་རིམ་ཐོག་ཕེབས་རྒྱུ་ཡིན་པ་བཀོད་འདུག གལ་སྲིད་ཁྲིམས་འཆར་དེ་ཕྱོགས་ཡོངས་ནས་གཏན་འབེབས་ལེགས་གྲུབ་བྱུང་ཚེ་ཨོ་སི་ཊོ་ལི་ཡའི་སྲིད་གཞུང་གི་ངོས་ནས་ཤིན་ཅང་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏང་མཁན་རྒྱ་ནག་གི་འགོ་ཁྲིད་ཁག་དང་འབྲེལ་ཡོད་ལས་བྱེད། དེ་བཞིན་ཨོ་སི་ཊོ་ལི་ཡའི་བདེ་འཛགས་དང་རྒྱལ་སྤྱིའི་འགྲོ་བ་མིའི་ཐོབ་ཐང་བརྩི་སྲུང་མི་བྱེད་མཁན་དང་རུལ་སུངས་བྱས་པའི་གནས་ཚུལ་ཡོད་མཁན་རུ་སུའི་སྲིད་འཛིན་ Vladimir Putin གཙོས་འབྲེལ་ཡོད་རྒྱལ་སྤྱིའི་མི་སྣ་སུ་འདྲ་ཞིག་ཡིན་ཀྱང་ཨོ་སི་ཊོ་ལི་ཡར་བསྐྱོད་རྒྱུའི་མཐོང་མཆན་བཀག་སྡོམ་དང་ཨོ་སི་ཊོ་ལི་ཡར་ཡོད་པའི་མི་སྣ་དེ་དག་གི་དཔལ་འབྱོར་དང་ཚོང་ལས་ཡོངས་རྫོགས་བཀག་སྡོམ་བྱ་རྒྱུ་ཡིན་པ་གསལ་འདུག དེ་བཞིན་ཨོ་སི་ཀྲོ་ལི་ཡའི་ Magnitsky Act ལྟ་བུའི་ཁྲིམས་དེའི་ནང་ལ་དུས་ཀྱི་དགོས་མཁོ་དང་སྟུན། ཕྱི་ནང་གི་མི་སྣ་སུ་འདྲ་ཞིག་ནས་དྲ་རྒྱའི་བརྒྱུད་ལམ་ཁག་བེད་སྤྱོད་ལོགས་པར་སྤྱོད་དེ་རྒྱལ་ཁབ་ཀྱི་བདེ་འཇགས་དང་གཏན་ལྷིང་ལ་གནོད་པའི་བྱ་སྤྱོད་རིགས་སྤེལ་བ་ར་འཕྲོད་བྱུང་ཚེ། ཁྲིམས་འཆར་དེའི་ནང་འཁོད་པའི་བཀག་སྡོམ་སོགས་ཀྱི་ཉེ་ཆད་ཁག་བསྐལ་རྒྱུ་ཡིན་པ་ཡང་གསལ་ཡོད་པ་རེད་འདུགད་རེས་ཨོ་སི་ཊོ་ལི་ཡའི་གྲོས་ཚོགས་གོང་མས་ Magnitsky Act ལྟ་བུའི་ཁྲིམས་འཆར་དེ་གཏན་འབེབས་གནང་མ་ཐག་དེ་སྔ་ཨ་རི་ནང་ལ་ Magnitsky Act ཞེས་པ་དེ་གཏན་འབེབས་གནང་དགོས་པའི་ཞུ་སྐུལ་གནང་མཁན་ཆབ་སྲིད་ལས་འགུལ་བ་སྐུ་ཞབས་ Bill Browder ལགས་ཀྱིས་དགའ་བསུ་གནང་བ་དང་སྦྲགས། ཁྲིམས་འཆར་དེས་འགྲོ་བ་མིའི་ཐོབ་ཐང་བརྩི་མེད་རྡོལ་རོལ་གཏང་མཁན་རྣམས་རང་དབང་ཐོག་ནས་རྒྱལ་སྤྱིའི་སྤྱི་ཚོགས་ནང་འགྲོ་སྐྱོད་བྱ་རྒྱུ་དང་ལྷག་པར་དུ་དཔལ་འབྱོར་གྱི་ཁེ་ཕན་སྣ་ཚོགས་སྒྲུབ་བཞིན་པའི་ལས་དོན་ལ་དོ་ཕོག་ཆེན་པོ་ཐེབས་ངེས་ཡིན་པར་གསུངས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ཨོ་སི་ཊོ་ལི་ཡའི་སྡེ་ཚན་གྱི་འགན་འཛིན་ Elaine Pearson ལགས་ནས་ཁྲིམས་འཆར་དེ་ནི་འགྲོ་བ་མིའི་ཐོབ་ཐང་ཐོག་ལ་འགན་ཁུར་བཞེས་དགོས་པའི་བརྡ་ལན་ཞིག་ཡིན་པར་མ་ཟད་རྒྱལ་ཁབ་ཀྱི་ཕྱི་འབྲེལ་སྲིད་བྱུས་ནང་ལ་འགྲོ་བ་མིའི་ཐོབ་ཐང་གི་གནད་དོན་དེ་གལ་ཆེན་པོ་ཡིན་པའི་རྣམ་པ་གསལ་པོ་བསྟན་ཐུབ་ཡོད་ཅེས་གསུངས་ཡོད།གྲོས་ཚོགས་འཐུས་མི་ James Paterson ལགས་ཀྱིས་ཁྲིམས་འཆར་གསར་པ་དེའི་ནང་ལ་འགྲོ་བ་མིའི་ཐོབ་ཐང་གི་གནད་དོན་ཁོ་ན་ཙམ་མིན་པར་དྲ་རྒྱའི་བདེ་འཇགས་དང་འབྲེལ་བའི་གནད་ཁག་ཁ་གསལ་བཀོད་ཐུབ་པ་དེ་ནི་སྤོབས་པ་བྱ་འོས་པ་ཞིག་རེད་ཅེས་གསུངས་འདུག གཞི་རྩའི་ Magnitsky Act ཞེས་པའི་ཁྲིམས་འཆར་དེ་དེ་སྔ་ཨུ་རུ་སུའི་ནང་དུ་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་ལྐོག་ཟ་རུལ་སུངས་ཀྱི་བྱ་སྤྱོད་ཐེར་འདོན་གནང་མཁན་ཡུལ་དེའི་ཁྲལ་བསྡུའི་སློབ་སྟོན་པ་ Sergei Magnitsky ལགས་ཕྱི་ལོ་ ༢༠༠༩ ལོར་ཨུ་རུ་སུའི་བཙོན་ཁང་ཞིག་གི་ནང་དུ་སྐུ་གྲོངས་པའི་དོན་རྐྱེན་ལ་དྲན་གསོ་མཚོན་ཆེད་དུ་ཨ་རིའི་སྲིད་འཛིན་སྐུ་ཞབས་ Obama མཆོག་གིས་ཕྱི་ལོ་ ༢༠༡༢ ལོར་ཨ་རི་ནང་དུ་ Magnitsky Act ཞེས་པ་ཞིག་གཏན་འབེབས་ཐོག་ཨུ་རུ་སུས་གཙོས་པའི་རྒྱལ་སྤྱི་ཁྱོན་ཡོངས་སུ་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏང་མཁན་དཔོན་རིགས་ཚོར་ཉེས་ཆད་གཏོང་བཞིན་ཡོད་པ་དང་། རིམ་བཞིན་ཁེ་ན་ཌ་དང་དབྱིན་ཡུལ། ཨིས་ཊོ་ནིཡ་སོགས་རྒྱལ་སྤྱིའི་རྒྱལ་ཁབ་ཁག་ཅིག་ཀྱིས་དེ་མཚུངས་ཁྲིམས་འཆར་གཏན་འབེབས་ཐོག་ནས་ཕྱག་བསྟར་གནང་མུས་ཡིན་པ་རེད།

རྒྱ་དཀར་ནག་གཉིས་ཀྱི་འཕགས་བོད་ས་མཚམས་ཀྱི་རྩོད་རྙོག་ཁྲོད་དུ་རྒྱ་ནག་གིས་ས་མཚམས་སུ་ས་འོག་གི་ཁང་པ་འཛུགས་སྐྲུན་སོགས་ཀྱི་དམག་དོན་ལས་གཞི་རྒྱ་ཆེར་སྤེལ་བ་དང་སྦྲགས།  རྒྱ་ནག་གཞུང་གིས་གཉེར་བའི་གསར་ཁང་གིས་འཕགས་བོད་མཐའ་མཚམས་ཁུལ་དུ་ལྟ་རྟོག་ཀྱི་འགན་ཡོད་པའི་ Western Theatre Command ཞེས་རྒྱ་ནག་བཅིངས་གྲོལ་དམག་གི་ནུབ་རྒྱུད་ཤོག་ཁག་ཟེར་བས་འོག་གི་དམག་དོན་ལས་གཞི་རྣམས་དམག་འགུལ་འཐབ་བྱུས་དང་།  དམག་དཔུང་དེ་བཞིན་གོ་མཚོན་སོགས་སྲུང་སྐྱོབ་སླད་རྒྱ་བསྐྱེད་བྱེད་མུས་ཡིན་པ་བཤད་འདུག དེ་ཡང་རྒྱ་ནག་གི་སྤྱི་ཚོགས་དྲ་ལམ་ཐོག་ས་འོག་དམག་དོན་གྱི་ལས་གཞིའི་པར་རིས་ཐོན་པ་དང་རྒྱ་ནག་གི་ཆེད་ལས་པས་ལས་གཞི་དེ་ཆེད་མངགས་གནམ་གྲུ་དང་མེ་ཤུགས་འཕུར་མདའ་འཇོག་ས་སོགས་ཀྱི་མཚོན་པའི་དམག་འགུལ་འཐབ་བྱུས་ཀྱི་ལྟེ་གནས་དང་དམག་དོན་དང་འབྲེལ་གོ་མཚོན་རིགས་འཇོག་སའི་ཆེད་བཟོས་པ་ཞིག་ཡིན་པར་བརྗོད་པ་མངོན་གསལ་བྱུང་འདུག  ཉམས་ཞིབ་པ་ Zhou Chenming ཟེར་བ་ཞིག་གིས་འཕགས་བོད་མཐའ་མཚམས་ཀྱི་མཐར་ས་འོག་དམག་དོན་གྱི་ལས་གཞི་སྤེལ་བ་དེ་ལུང་ཁུག་ཏུ་ཡོད་པའི་རྒྱ་ནག་བཅིངས་གྲོལ་དམག་མི་ཚོར་སྲུང་སྐྱོབ་དང་ལས་ཀ་བྱེད་བདེ་བའི་ཁོར་ཡུག་ཞིག་སྐྲུན་ཐབས་ཆེད་ཡིན་པ་དང་།  ལྷག་པར་རྒྱ་གར་གྱི་ཕྱོགས་ནས་རྒོལ་རྡུང་མི་ཡོང་བའི་ཆེད་དུ་ས་འོག་གི་དམག་མིའི་སྡོད་ཁང་རྣམས་རྒྱ་མཚོའི་ངོས་ནས་མཐོ་ཚད་ཕི་ཊི་ ༡༦༠༠༠ ཙམ་ལ་གསར་རྒྱག་བྱེད་བཞིན་ཡོད་སྐོར་བཤད་པ་མ་ཟད།  ཁོས་རྒྱ་ནག་བཅིངས་གྲོལ་དམག་མིའི་དམག་དཔུང་གི་བདེ་འཇགས་ཆེད་ས་འོག་གི་དམག་མིའི་སྡོད་ཁང་སོགས་རྒྱག་རྒྱུ་ནི་དེ་སྔ་རྒྱ་ནག་ནས་ཀོ་རི་ཡའི་དམག་སྐབས་ནས་བཟུང་བརྒྱབ་ཡོད་པར་བཤད་འདུག གཞི་རྩའི་ས་འོག་གི་དམག་དོན་དང་འབྲེལ་བའི་འཛུགས་སྐྲུན་རྣམས་ཕྱི་ཕྱོགས་ནས་བཟོ་དབྱིབས་བཅད་གཏུབ་བྱས་པ་ལྟ་བུར་མངོན་པ་དང་ལྷག་པར་རྒྱལ་སྒོ་ཁག་ཅིག་གི་མདོག་དེ་བཞིན་གཞན་ལ་གཡོ་བྱུས་སླད་ཚོན་བཏང་བའི་ཐོག་བཟོས་ཡོད་པ་རེད་འདུག    ཕྱོགས་མཚུངས་རྒྱ་ནག་གཞུང་གིས་གཉེར་བའི CCTV གསར་ཁང་ནས་འདོན་སྤེལ་བྱས་པའི་བརྙན་ནང་ཤིན་ཅང་ནང་དམག་གི་སྦྱོང་བརྡར་བྱས་པའི་སྐབས་དམག་མི་རྣམས་ས་འོག་ནས་ཐོན་པ་དང་དེ་བཞིན་རྒྱལ་སྒོ་ཐོན་ས་དེའང་གཡོ་བྱུས་ཀྱིས་ཚོན་བཏང་ཡོད་པའང་མཐོང་རྒྱུ་འདུག ཕྱོགས་མཚུངས་ཟླ་བ་དང་པོའི་ནང་ CCTV ལས་རིམ་ནང་འདོན་སྤེལ་བྱས་པའི་བརྙན་གཞན་ཞིག་གི་ནང་འབྲོག་ལམ་ཁུལ་དུ་དམག་མི་མང་དག་ཅིག་གི་སྡོད་ཁང་སོགས་ལ་ས་འོག་གི་མཐུན་རྐྱེན་སྦྱར་ཡོད་པའང་མཐོང་རྒྱུ་ཡོད་པ་དང་།   དེ་དོན་CCTV ཡིས་ཕྱི་ལོ་ ༢༠༡༧ ལོའི་འབྲོག་ལམ་གྱི་རྩོད་རྙོག་རྗེས་སུ་མཐའ་མཚམས་སུ་ས་འོག་གི་སྡོད་ཁང་སོགས་ཀྱི་མཐུན་རྐྱེན་སྦྱོར་རྒྱུ་དེ་རྒྱུན་ལྡན་ལྟ་བུ་ཞིག་ཆགས་ཡོད་པ་བཤད་ཡོད་པ་རེད།  སྤྱིར་ཕྱི་ལོ་ ༢༠༡༩ ལོར་ The Print གསར་ཁང་གིས་ཟུང་སྐར་བརྒྱུད་པར་རིས་ཞིག་འདོན་སྤེལ་གྱིས་རྒྱ་ནག་བཅིངས་གྲོལ་དམག་མིས་ལྷོ་ཁ་ནང་ས་འོག་འཛུགས་སྐྲུན་གྱི་ལས་གཞི་དེ་བཞིན་རྒྱ་བསྐྱེད་བཏང་ཡོད་པ་མངོན་གསལ་གནང་བ་དང་ཆབས་ཅིག  རྒྱ་ནག་གིས་ལོ་རབས་དགུ་བཅུའི་ལོ་མཇུག་ཏུ་འཛུགས་སྐྲུན་བྱས་པའི་ས་འོག་གི་སྡོད་ཁང་དེ་ཉེན་སྲུང་སོགས་ཀྱི་སླད་རྒྱ་བསྐྱེད་དུ་བཏང་ཡོད་པ་དང་ལྷག་པར་དེར་གོ་མཚོན་དང་མེ་ཤུགས་འཕུར་མདའ་སོགས་ཉར་ཚགས་དང་དེ་བཞིན་བོད་ཀྱི་དམག་དཔུང་གི་ལྟེ་གནས་ཞིག་ཀྱང་ཡིན་པར་ཚོད་དཔག་གནང་ཡོད་པ་རེད། རྩ་བའི་ལོ་རྒྱུས་ཁྲོད་རྒྱ་དཀར་ནག་གཉིས་དབར་འཕགས་བོད་ཀྱི་མཐའ་མཚམས་དང་འབྲེལ་རྙོག་གླེང་མི་ཉུང་བ་བྱུང་ཡོད་པ་དང་ཡང་སྒོས་སྔར་ལོར་རྒྱ་གར་བྱང་ཕྱོགས་ལ་དྭགས་གྷལ་ཝན་ལུང་གཤོང་དུ་རྒྱ་དཀར་ནག་གཉིས་ཀྱི་ས་མཚམས་དམག་མིའི་དབར་གདོང་ཐུག་གི་གནད་དོན་རིམ་པ་བྱུང་ཡོད་པ་རེད།  མཐའ་མཚམས་ཀྱི་གནད་དོན་དང་འབྲེལ་རྒྱ་ནག་གཞུང་གིས་བོད་མིའི་གཞོན་སྐྱེས་བསྡུ་སྐོང་གི་ལས་གཞི་སྤེལ་ཡོད་པ་དང་།  ལས་གཞི་དེའི་ཁོངས་སུ་རྒྱ་གཞུང་གིས་འཕགས་བོད་གཉིས་ཀྱི་ས་མཚམས་སུ་དམག་མི་ཆེད་གཏོང་སླད་བོད་པའི་ཁྱིམ་ཚང་རེ་རེ་ནས་ནང་མི་གཅིག་གམ་བོད་རིགས་གཞོན་སྐྱེས་གཅིག་བཅིངས་གྲོལ་དམག་མིའི་ཁོངས་སུ་ངེས་པར་དུ་ཞུགས་དགོས་པའི་བཙན་བཀའ་བཏང་ཡོད་པ་རེད།

རྒྱ་ནག་གི་གྲོང་ཁྱེར་ཧཱའི་ནེན་ (Henan) ནང་དུ་ཕྱིའི་གསར་འགོད་པ་དང་དོགས་གཞི་ཡོད་པའི་མང་ཚོགས་ལ་ལྟ་སྲུང་ནན་པོ་བྱ་ཕྱིར་གདོང་རིས་བཤེར་བའི་འཕྲུལ་ཆས་སྤྱོད་ནས་དམ་དྲག་ནན་པོ་བྱེད་བཞིན་ཡོད་པ་རེད་འདུགབི་བི་སི་གསར་ཁང་གིས་དེ་འབྲེལ་གྱི་གནས་ཚུལ་སྤེལ་བར་གཞིགས་ན། རྒྱ་ནག་གི་གྲོང་ཁྱེར་ཧཱའི་ནེན་ནང་དུ་ཕྱིའི་གསར་འགོད་པ་དང་དོགས་གཞི་ཡོད་པའི་མང་ཚོགས་ལ་ལྟ་སྲུང་བྱ་ཕྱིར་སྤྱོད་པའི་གདོང་རིས་བཤེར་བའི་འཕྲུལ་ཆས་དེ་འགྲིམ་འགྲུལ་གློག་བརྡ་ལྟ་བུར་བཟོ་བཀོད་ཀྱིས་དེར་དོགས་གཞི་ཆེ་འབྲིང་ཆུང་གསུམ་བཅས་རིམ་པ་གསུམ་ལ་དབྱེ་ཡོད་པ་དང་། གསར་ཁང་གི་ངོས་ནས་ཧཱའི་ནེན་གྲོང་ཁྱེར་སྤྱི་དམངས་བདེ་འཇགས་ལས་ཁུངས་ལ་གནད་དོན་དེའི་ཐད་འདྲི་རྩད་གནང་ཡང་དེར་ལན་འདེབས་གང་ཡང་བྱས་མི་འདུག ཨ་རིའི་ནང་རྟེན་གཞི་བྱས་པའི་ IPVM ཞེས་འཕྲུལ་ལས་དང་འབྲེལ་བའི་གསང་བའི་ལྟ་སྲུང་ལས་རིགས་ཁག་ལ་ཞིབ་འཇུག་གནང་མཁན་གྱི་ཚོགས་པར་རག་སོན་བྱུང་བའི་ཡིག་ཆར་གཞིགས་ན། ཧཱའི་ནེན་ས་གནས་གཞུང་གིས་ད་དུང་གདོང་རིས་བཤེར་བའི་འཕྲུལ་ཆས་དེ་རིམ་པས་ཕྱིའི་སློབ་གཉེར་བ་དང་ཕྱི་ནས་སྤོ་བཤུད་བྱས་པའི་བེུད་དག་ལའང་དེ་ལྟར་སྤྱོད་འཆར་ཡོད་པ་དང་། འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གིས་བྱེད་སྟངས་དེ་ནི་གཞུང་ཞིག་གི་ངོས་ནས་བྱེད་སྟངས་ཤིག་མ་རེད་ལ། ལྷག་པར་དུ་ཞི་བའི་ཐོག་ནས་གཞུང་ལ་འདྲི་རྩད་གནང་མཁན་ཚོར་དམ་དྲག་དེ་ལྟར་གནང་འོས་པ་ཞིག་མིན་སྐོར་གསུངས་འདུག་པར་མ་ཟད། ཚོགས་པ་དེའི་རྒྱ་ནག་ངེས་སྟོན་པ་ལྕམ་ Sophie Richardson ལགས་ཀྱིས་རྒྱ་ནག་གཞུང་གིས་མང་ཚོགས་ལ་ལྟ་སྲུང་དམ་དྲམ་དེ་ལྟར་བརྒྱུད་ནས་གཞུང་དེའི་ངོས་ནས་མང་ཚོགས་ཡོངས་ལ་ལྟ་སྲུང་བྱ་རྒྱུའི་ནུས་པ་ཡོད་པ་དེ་མང་ཚོགས་ནས་གསལ་པོ་རྟོགས་དགོས་པ་མ་ཟད། རང་ཉིད་ཀྱི་བྱེད་སྟངས་ཤིག་གི་རྐྱེན་གྱིས་དུས་ནམ་ཞིག་གཞུང་གིས་ཕར་རྒོལ་བྱ་མིན་ཐེ་འཚོམ་གྱི་གནས་ལ་བསྡད་དགོས་པ་ཆགས་ཡོད་པ་ནི་ཧ་ཅང་ཞེད་སྣང་ཅན་ཞིག་ཡིན་པར་གསུངས་འདུགགཞི་རྩའི་རྒྱ་ནག་གཞུང་གིས་མང་ཚོགས་ལ་ལྟ་སྲུང་བྱ་ཕྱིར་གདོང་རིས་བཤེར་བའི་འཕྲུལ་ཆས་འཛུགས་སྐྲུན་ཆེད་དུ་ཕྱི་ཟླ་ ༧ པ་ནང་ལ་བཟོ་གྲྭ་ཁག་ལ་གོ་སྐབས་སྤྲད་ཡོད་པ་ལྟར་ NeuSoft བཟོ་ལས་ཁང་ལ་བཟོ་སྐྲུན་གྱི་བདག་དབང་སྤྲད་ཡོད་པ་རེད། ད་ལྟའི་ཆར་རྒྱ་ནག་གི་གྲོང་ཁྱེར་ཁག་ལས་ཧཱའི་ནེན་གྲོང་ཁྱེར་ཁོ་ནར་སྤྱོད་ཀྱི་ཡོད་པ་དང་། དེའང་མི་དོགས་གཞི་ཆེན་པོ་ཡོད་པ་དང་ཉེས་པ་ཚབས་ཆེན་ཡོད་རིགས་ལ་སྤྱོད་ནས་འདྲི་རྩད་ནན་པོ་བྱེད་ཀྱི་ཡོད་པ་རེད། རྒྱ་ནག་གི་ཧཱའི་ནེན་གྲོང་ཁྱེར་དུ་ཕྱིའི་གསར་འགོད་པ་དང་དོགས་གཞི་ཡོད་པའི་མང་ཚོགས་ལ་ལྟ་སྲུང་བྱ་ཕྱིར་སྤྱོད་པའི་གདོང་རིས་བཤེར་བའི་འཕྲུལ་ཆས་དེ་འགྲིམ་འགྲུལ་གློག་བརྡ་ལྟ་བུར་བཟོ་བཀོད་ཀྱིས་དེར་རིམ་པ་གསུམ་ལ་དབྱེ་བར་མ་ཟད་འཕྲུལ་ཆས་དེ་རྒྱ་ནག་གཞུང་དང་ཐད་ཀར་མཐུད་ཡོད་པ་རེད། རིམ་པ་གསུམ་པོ་དེ་དག་ནི་དང་པོ། དམར་པོ་རྟགས་ཅན་བརྡ་སྟོན་གྱིས་ཕྱིའི་གསར་འགོད་པ་དོགས་གཞི་ཆེན་པོ་ཡོད་རིགས་མཚོན་པ་དང་། གཉིས་པ། སེར་པོ་རྟགས་ཅན་བརྡ་སྟོན་གྱིས་སྤྱིར་བཏང་དོགས་གཞི་ཡོད་རིགས་མཚོན་པ། གསུམ་པ། ལྗང་ཁུ་རྟགས་ཅན་བརྡ་སྟོན་གྱིས་གནོད་གཞི་མེད་རིགས་མཚོན་གྱི་ཡོད་པ་དང་། གདོང་རིས་བཤེར་ནས་དམར་པོ་དང་གསེར་པོ་བརྡ་སྟོན་ཁོངས་སུ་ཐོན་པ་ཞིག་ཧཱའི་ནེན་ནང་འགྲུལ་བཞུད་ཀྱི་འཛིན་ཤོག་མངགས་ཉོ་བྱས་པ་ཤེས་མ་ཐག་ཏུ་ས་གནས་གཞུང་ལ་ལན་སྐྱེལ་གྱི་ཡོད་པར་མ་ཟད་ཕྱིའི་ཕུལ་བྱུང་སློབ་མ་དང་སྤྱིར་བཏང་གི་ཆེད་ལས་མི་སྣ།གནད་ཡོད་མི་སྣ། དེ་བཞིན་གློ་བུར་དུ་ལྷགས་པ་སོགས་ལ་དེ་ལྟར་སྤྱོད་ཀྱི་འདུགཕྱོགས་མཚུངས་སུ་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་ལྟ་བུའི་ཆབ་སྲིད་ཀྱི་ཚོར་བ་རྣོ་བའི་དུས་སྐབས་ཁྲོད་དམིགས་བསལ་དོ་སྣང་གིས་དོགས་གཞི་ཆེན་པོ་ཡོད་པའི་ཕྱིའི་སློབ་མ་ཁག་གི་ལག་ཐོགས་ཁ་པར་བརྒྱུད་ནས་རྟོག་ཞིབ་བྱ་རྒྱུ་ཡིན་པ་བཀོད་འདུག་ལ། IPVM ཚོགས་པར་ལག་སོན་བྱུང་བའི་ཡིག་ཆར་གཞིགས་ཚེ་རྒྱ་ནག་གཞུང་གིས་ཕྱིའི་གསར་འགོད་པ་དང་ཕྱིའི་སློབ་གཉེར་བ་དོགས་གཞི་ཡོད་རིགས་སོགས་ལ་རྟོག་ཞིབ་ཆེད་དུ་ཁ་པར་དང་སྤྱི་ཚོགས་བརྒྱུད་ལམ་སྐད་འཕྲིན་དང་ཝིའི་བོ། འགྲུལ་འཁོར་གྱི་ཡིག་ཆ། མགྲོན་ཁང་། འགྲུལ་བཞུད་ཀྱི་ཕྱག་ཁྱེར། རྒྱུ་ནོར་གྱི་བདག་དབང་། པར་རིས་སོགས་ལ་ལྟ་ཞིབ་བྱ་རྒྱུ་རེད་འདུག རྒྱ་ནག་ནང་མང་ཚོགས་ཀྱི་གདོང་རིས་བཤེར་རྒྱུའི་འཕྲུལ་ཆས་རིགས་དེ་སྔོན་ནས་བེད་སྤྱོད་བྱས་ཟིན་ཡོད་པ་དང་། Washington Post གསར་ཤོག་གིས་སྤེལ་བའི་གནས་ཚུལ་ལ་གཞིགས་ན། རྒྱ་ནག་གི་ Huawei བཟོ་ལས་ཁང་གིས་ཀྱང་བཅོས་བཟོའི་མཉེན་ཆས་བརྒྱུད་ཤིན་ཅང་ནང་གི་གྲངས་ཉུང་མི་རིགས་ངོ་ཐག་བཅད་ནས་ཁོ་ཚོར་བཏང་འཛིན་དང་ཉེན་བརྡའི་ལྟ་སྲུང་གི་ལྟ་ཚོད་བྱས་ཡོད་པ་རེད།