རྒྱལ་སྤྱི།

ཁ་ཉིན་ཨ་རིའི་གྲོང་ཁྱེར་ནིའུ་ཡོག་ཏུ་༸ཀུན་གཟིགས་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུས་པ་དང་འབྲེལ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འཕྲིན་གྱི་ཕྱག་ཡིག་སྩལ་ཏེ་རིན་པོ་ཆེ་མཆོག་གི་ཞལ་མཇལ་གསུང་ཐོས་མྱུར་དུ་ཡོང་བའི་སྨོན་འདུན་ཡོད་ཅེས་བཀའ་སྩལ་མཛད་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འཕྲིན་དེའི་ནང་གདན་ས་ཆེན་པོ་བཀྲིས་ལྷུན་པོ་ནས་གྲོང་ཁྱེར་ནིའུ་ཡོག་ཏུ་༸པཎ་ཆེན་སྐུ་ཕྲེང་བཅིུག་པའི་འཁྲུངས་སྐར་སྲུང་བརྩི་ཞུས་པར་ཡིད་སྤྲོ་དང་བཅས་བཀའ་དྲིན་ཆེ་ཞུས་པ་དང་འབྲེལ། རྒྱལ་པཎ་རིམ་བྱོན་བླ་སློབ་ཀྱི་འབྲེལ་བ་འདི་ཐུན་མོང་མིན་པ་ཞིག་ཏུ་མ་ཟད། ༸པཎ་ཆེན་སྐུ་ཕྲེང་བཅུ་པ་སྐུ་ན་ཆུང་དུས་ནས་མགོན་པོ་༸གང་ཉིད་མཆོག་དང་འབྲེལ་འདྲིས་ཟབ་པས་དམིགས་བསལ་འབྲེལ་བ་ཞིག་ཡོད་ཅེས་བཀའ་སྩལ་མཛད་འདུག ༸པཎ་ཆེན་སྐུ་ཕྲེང་བཅུ་པ་དགོངས་པ་གཞན་དོན་དུ་གཤེགས་པ་ནས་ཡང་སྲིད་རྩད་གཅོད་སོགས་༸གང་ཉིད་མཆོག་ལ་དམ་ཚིག་དང་ལོ་རྒྱུས་ཀྱིས་དཀྲིས་པའི་ལས་འགན་རྣམས་ཧུར་ཐག་གིས་བསྒྲུབས་ཀྱང་ཆབ་སྲིད་གེགས་བར་གྱི་གཞན་དབང་དུ་སོང་བ་ཕངས་པ་ལྟར་སྣང་ཡོད་པར་བཀའ་སྩལ་མཛད་དེ། ད་ལན་ཡང་སྲིད་རིན་པོ་ཆེ་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་རྒྱས་ཤིག་འབྲེལ་ཡོད་ཁྱེད་རྣམས་ནས་ཨ་རིའི་ནིའུ་ཡོག་ཏུ་ཚོགས་པར་བཀྲིས་བདེ་ལེགས་དང་མཆོག་སྤྲུལ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཀྱི་ཞལ་མཇལ་གསུང་ཐོས་མྱུར་དུ་ཡོང་བའི་སྨོན་ལམ་ཡོད་ཅེས་ཀའ་སྩལ་འདུག དེ་རིང་ཕྱི་ཟླ་ ༤ ཚེས་ ༢༥ ཉིན་མོ་སྟེ་༸ཀུན་གཟིགས་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཡིན་པ་དང་བསྟུན་འཛམ་གླིང་ས་ཕྱོགས་གང་སར་གནས་སྡོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་རྒྱ་གཞུང་ལ་ངོ་རྒོལ་གྱི་ལས་འགུལ་རྣམ་པ་འདྲ་མིན་བརྒྱུད་ནས་སྤེལ་ཏེ་སྲུང་བརྩི་ཞུ་བཞིན་ཡོད་པ་ལྟར་ཁ་ཉིན་ཕྱི་ཚེས་ ༢༣ ཉིན་གདན་ས་ཆེན་པོ་བཀྲིས་ས་ལྷུན་པོས་གོ་སྒྲིག་ཞུས་པའི་འོག་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་སྡེ་བཞིར་༸པཎ་ཆེན་རིན་པོ་ཆེའི་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་འདུག མཛད་སྒོ་ཐོག་གདན་ས་བཀྲིས་ལྷུན་པོའི་༸སྐྱབས་རྗེ་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས་དབུས་པའི་སྐུ་མགྲོན་གཙོ་བོ་བྱང་ཨ་རི་སྐུ་ཚབ་དོན་གཅོད་དང་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་དང་བཀའ་ཟུར་གཙོས་པའི་སྐུ་མགྲོན་རྣམ་པ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མང་ཚོགས་བཅས་ལྷན་འཛོམས་ཀྱིས་༸རྒྱལ་བ་ཡབ་སྲས་གཉིས་ཀྱི་༸སྐུ་ཕྱྭའི་ཞབས་རིམ་གསོག་སྒྲུབ་དང་མཎྡྲལ་འདེགས་འབུལ། དེ་བཞིན་སྤྲི་སྒོར་བགོས་འགྲེམས་སོགས་གནང་སྟེ་བོད་ལུགས་དང་ཕྱི་ལུགས་གཉིས་ཀྱི་ཐོག་ནས་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་པ་མ་ཟད། ༸སྐྱབས་རྗེ་མཁན་རིན་པོ་ཆེ་མཆོག་གིས་གདན་ས་བཀྲིས་ལྷུན་པོའི་ངོས་ནས་རིན་པོ་ཆེའི་༸སྐུའི་འཁྲུངས་ཉིན་མོར་ཡོངས་ཁྱབ་བསྒྲགས་གཏམ་སྤེལ་བ་སྒྲོག་སྦྱང་གནང་སྟེ། རྒྱ་གཞུང་ལ་ནན་ཏན་གྱིས་དོན་ཚན་གསུམ་གྱི་ཐོག་ནས་ཉེས་མེད་བཙན་འཁྲིད་བྱས་པའི་ཀུན་གཟིགས་༸པཎ་ཆེན་རིན་པོ་ཆེ་ཡབ་ཡུམ་སྐུ་མཆེད་དང་ཡང་སྲིད་འཚོལ་ཞིབ་ཚོགས་ཆུང་གི་འགན་འཛིན་དང་གདན་ས་བཀྲིས་ལྷུན་པོའི་དབུ་འཛིན་གཅིག་ལྕོགས་སྐུ་ཞབས་བྱ་བྲལ་རིན་པོ་ཆེ་བཅས་འཕྲལ་དུ་གློད་བཀྲོལ་དགོས་པ་དང་། ཁོང་རྣམ་པའི་གནས་སྟངས་ཇི་ཆགས་གསལ་པོ་བཟོ་དགོས་པའི་རེ་སྐུལ་བསྐྱར་ནན་གནང་ཡོད། སྐབས་དེར་སྐུ་མགྲོན་གཙོ་བོ་བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་ཀྱིས་དེ་རིང་ནི་བོད་མི་ཚོས་དགའ་སྐྱོ་ཟུང་འབྲེལ་གྱི་ཚོར་བའི་ཐོག་ནས་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུ་རྒྱུའི་ཉིན་མོ་ཞིག་ཡིན་པ་དང་ལྷག་དོན་རྒྱ་གཞུང་གིས་འདས་པའི་ལོ་ ༧༠ རིང་བོད་མིའི་ཐོག་ཆེས་དྲག་གནོན་ཅན་གྱི་སྲིད་བྱུས་སྤེལ་ཁག་གི་ངལ་བ་ཆེས་ཆེར་མྱང་ཡོད་ཀྱང་། གཞིས་ལུས་རྒྱ་ཆེ་མང་ཚོགས་ཀྱི་ལྷག་བསམ་དང་སྙིང་སྟོབས་ཆེ་རུ་སོང་ཡོད་སྟབས་ང་ཚོས་རྗེས་སུ་ཡི་རང་ཞུས་པའི་ཐོག་ནས་རང་ཉིད་ཀྱི་འགན་འཁྲི་དང་ནུས་པ་བཅས་མཉམ་སྤུངས་ཀྱིས་རྩ་དོན་སླད་ཕྱར་གྲུ་མཉམ་འདེགས་གནང་དགོས་པ་དང་ཆབས་ཅིག བོད་མིའི་སྒྲིག་འཛུགས་ཀྱིས་ཀྱང་མུ་མཐུད་༸པཎ་ཆེན་རིན་པོ་ཆེའི་གནས་སྟངས་གསལ་བཟོ་དང་གང་མགྱོགས་གློད་བཀྲོལ་ཡོང་ཐབས་སུ་འཆར་གཞི་ལྡན་པའི་ཞུ་གཏུག་སྐོར་སྐྱོད་གནང་འཆར་ཡོད་པ་གསུངས་འདུག དེའི་ཁྲོད་ཁ་སང་ཨ་རི་ནིའུ་ཡོག་དང་ནིའུ་ཇར་སི་ས་གནས་གཞོན་ནུའི་གོ་སྒྲིག་འོག་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་བོད་མི་ ༣༠ ལྷག་འདུ་འཛོམས་ཀྱིས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་དགུང་ལོ་ ༣༣ ལ་ཕེབས་པའི་འཁྲུངས་སྐར་དང་སྟབས་བསྟུན་རིན་པོ་ཆེ་མཆོག་གིས་དབུས་པའི་ཡབ་ཡུམ་སྐོ་འཁོར་དང་བཅས་པ་རྒྱ་གཞུང་གིས་བཙན་ཁྲིད་བྱས་ནས་གར་སོང་ཆ་མེད་དུ་གྱུར་ནས་མི་ལོ་ཧྲིལ་པོ་ ༢༧ འཁོར་བ་གློད་བཀྲོལ་དགོས་པའི་སྐད་འབོད་ལས་འགུལ་ཞིག་སྤེལ་འདུག དེ་དང་ཕྱོགས་མཚུངས་སུ་རྒྱ་གར་ནང་གི་བཙན་བྱོལ་བོད་མིའི་སྡོད་གནས་བཞུགས་སྒར་དྷརྨ་སཱ་ལཱ་གཙོས་ལ་དྭགས་དང་ལྷོ་ཕྱོགས་སོགས་ས་གནས་ཁག་ཅིག་ཏུ་རྣམ་པ་འདྲ་མིན་ཐོག་ནས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་རེད།

ད་ཆ་ཨུ་རུ་སུས་ཡུཀ་རེན་ནང་དུ་དྲག་པོའི་བཙན་འཛུལ་བྱས་ནས་ཟླ་བ་གཉིས་ལྷག་འགྲོ་བཞིན་པའི་ཁྲོད་འདིར་ཨུ་རུ་སུའི་ཕྱོགས་ནས་ཡུཀ་རེན་གྱི་གྲོང་ཁྱེར་ཁག་ཅིག་ཏུ་དངོས་སུ་འབར་རྫས་དང་གོ་མཚོན་གྱི་ལམ་ནས་གཏོར་རྒོལ་ཚབས་ཆེན་གཏོང་བཞིན་ཡོད་སྟབས་ཡུཀ་རེན་གྱི་མི་སེར་འབུམ་ཕྲག་མང་པོ་ Poland དང་ Slovakia དེ་བཞིན་ Hungary སོགས་ཉེ་འཁོར་ཁྱིམ་མཚེས་རྒྱལ་ཁབ་ཁག་ཏུ་སྐྱབས་བཅོལ་ལ་འགྲོ་དགོས་བྱུང་བ་མ་ཟད་དོན་རྐྱེན་དེའི་འོག་ད་བར་ཡུཀ་རེན་གྱི་མི་སེར་ ༤༠༠༠ ལྷག་གི་ཚེ་སྲོག་ཤོར་བ་དང་ ༥༥༠༠ ལྷག་ལ་རྨས་སྐྱོན་ཕོག་པ་བྱུང་ཡོད།ཡུཀ་རེན་ནང་དུ་ངལ་བ་འཕྲད་བཞིན་པའི་དམག་འཁྲུག་གི་དོན་རྐྱེན་ཁྲོད་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་མཚོན་ཆ་སོགས་ཀྱི་རྒྱབ་སྐྱོར་གནང་བ་དང་ཆབས་ཅིག ཨུ་རུ་སུར་དཔལ་འབྱོར་དང་ཚོང་ལས་བཀག་སྡོམ་གནང་ཡོད་པ་རེད།དེའི་ཁྲོད་སི་པེན་གྱི་གྲོང་ཁྱེར་ Barcelon ནང་རྟེན་གཞི་བྱས་པའི་བོད་ཁང་གིས་སྣེ་ཁྲིད་འོག་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་གཙོས་དེ་འབྲེལ་ལས་བྱེད་གཉིས་དང་། པོཊ་ལན་ཌི་བོད་རིགས་ཚོགས་པའི་ཚོགས་མི་ཁག་ཅིག་བཅས་མཉམ་འབྲེལ་ཐོག་ཡུཀ་རེན་གྱི་ས་མཚམས་ Medyka ལ་ཆེད་ཕེབས་ཀྱིས་སྐྱབས་བཅོལ་བ་རྣམས་ལ་རོགས་སྐྱོར་གནང་འདུག རྩ་བའི་ཨུ་རུ་སུས་ཡུཀ་རེན་ལ་དྲག་པོའི་བཙན་འཛུལ་བྱས་པའི་གནད་དོན་དང་འབྲེལ་ཏེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུཀ་རེན་གྱི་གནས་སྟངས་ལ་ཐུགས་ཕམ་མཛད་པ་དང་སྦྲགས། གྲོས་མོལ་བརྒྱུད་ཡུཀ་རེན་ནང་ཞི་བདེ་སླར་གསོ་གནང་དགོས་པའི་གསུང་འཕྲིན་ཞིག་སྩལ་ཡོད་པ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཀྱང་ཨུ་རུ་སུས་ཡུཀ་རེན་ནང་དུ་བཙན་འཛུལ་བྱེད་བཞིན་པའི་གནས་སྟངས་འདིས་དེ་སྔ་ ༡༩༥༠ ལོར་རྒྱ་ནག་གིས་བོད་ལ་བཙན་འཛུལ་བྱས་པའི་གནས་སྟངས་དེ་དྲན་གསོ་གནང་ཡོད་པར་འགྲེལ་བརྗོད་དང་འབྲེལ་ཏེ། འཚེ་བའི་ལམ་ལ་བསྐྱོད་རྒྱུ་དེ་ནི་འགྲོ་བ་མི་ཞིག་གི་གནང་སྟངས་མིན་པར་མ་ཟད་དེ་ནི་ད་ལྟའི་དུས་ཚོད་དང་མི་མཐུན་པའི་བྱེད་སྟངས་ཤིག་རེད་ཅེས་དང་ཡུཀ་རེན་ལ་གང་མགྱོགས་ཞི་བདེ་སླར་གསོ་གནང་དགོས་པ་གསུངས་ཡོད།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོང་ཐང་གཙོ་འཛིན་ལྕམ་སྐུ་ Michelle Bachelet མཆོག་རིང་མིན་ཕྱི་ཟླ་ ༥ པའི་ནང་ཤིན་ཅང་གཙོ་གྱུར་རྒྱ་ནག་ནང་གི་འགྲོ་བ་ཐོབ་ཐང་གི་གནས་སྟངས་རྟོག་ཞིབ་སླད་ཁུལ་དེར་ཕེབས་གཏན་ཁེལ་བ་དང་འབྲེལ་ཏེ་རྒྱལ་སྤྱིའི་ཁྲོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ཁག་ ༦༠ ཡིས་མཉམ་འབྲེལ་ཐོག་ལྕམ་སྐུ་མཆོག་ལ་སྔ་ལོའི་ཕྱི་ཟླ་ ༡༢ ནང་འདོན་སྤེལ་གནང་འཆར་སྐོར་གསུངས་པའི་ཤིན་ཅང་ནང་གི་འགྲོ་བ་མིའི་ཐོབ་ཐང་གནས་སྟངས་ཐོག་གི་སྙན་ཐོ་དེ་གང་མགྱོགས་འདོན་སྤེལ་གནང་དགོས་པ་དང་། རིང་མིན་རྒྱ་ནག་ནང་དངོས་སུ་ཕེབས་སྐབས་རང་དབང་ལྡན་པའི་རྟོག་ཞིབ་ཀྱི་འབྲུ་དོན་ཡོངས་སུ་ཚང་བའི་དོན་ལ་སྨིན་པའི་སྐོར་སྐྱོད་གནང་དགོས་པའི་ཞུ་སྐུལ་གནང་འདུག རྩ་བའི་ལྕམ་སྐུ་ Michelle Bachelet མཆོག་གིས་དེ་སྔ་ཕྱི་ལོ་ ༢༠༡༨ ཟླ་ ༩ པའི་ནང་ཤིན་ཅང་ནང་གི་གནས་སྟངས་རྟོག་ཞིབ་སླད་རང་དབང་ངང་སྐོར་སྐྱོད་གནང་འཆར་ཡོད་སྐོར་གསུངས་པ་དེ་ལྟར་ཡང་། དུས་དེ་ནས་བཟུང་ད་བར་རྒྱ་ནག་གཞུང་གིས་གནད་དོན་དེའི་ཐོག་གཡོལ་ཐབས་ཁོ་ན་བྱས་ཡོད་པའི་ཁྲོད་སྔ་ལོའི་ཕྱི་ཟླ་ ༩ པ་ནང་དུ་འགྲོ་བ་མིའི་ཐོབ་ཐང་གཙོ་འཛིན་ཁོང་གི་འབྲེལ་ཡོད་ལས་ཁུངས་ནས་རྒྱ་ནག་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་དང་གཏོང་བཞིན་པའི་གནད་དོན་ཐོག་ཞིབ་འཇུག་གནང་ཟིན་གྲབས་ཡོད་སྐོར་དང་འབྲེལ། སྔ་ལོའི་ཞིབ་འཇུག་སྙན་ཐོ་དེ་ཡོངས་གྲགས་གནང་འཆར་ཡོད་སྐོར་གསུངས་ཡོད། དེ་རྗེས་ད་བར་སྙན་ཐོ་འདོན་སྤེལ་གནང་མེད་པའི་ཁར་འདི་ལོའི་ཕྱི་ཟླ་ ༣ ཚེས་ ༨ ཉིན་ལྕམ་སྐུ་མཆོག་ནས་རིང་མིན་ལོ་འདིའི་ཕྱི་ཟླ་ ༥ པ་ནང་ཤིན་ཅང་གཙོ་བོར་གྱུར་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞན་པའི་ས་ཁུལ་ཁག་ཏུ་སྐོར་སྐྱོད་གནང་གཏན་ཁེལ་བ་ཡོངས་གྲགས་གནང་ཡོད་པ་རེད། ཁ་སང་ Human Rights Watch འམ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་དྲ་གནས་ཐོག་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཆེ་གྲས་ཁག་དང་རྒྱ་ནག་གི་མནར་གཅོད་མྱོང་བཞིན་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་སོགས་ཀྱི་ཚོགས་པ་དང་མི་རིགས་དེ་དག་གི་རྒྱབ་སྐྱོར་ཚོགས་པ་བཅས་ཁྱོན་ཚོགས་པ་ཁག་ ༦༠ མཉམ་འབྲེལ་གྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གཙོ་འཛིན་ལྕམ་སྐུ་ Michelle Bachelet མཆོག་གི་མཚན་ཐོག་ལ་ཞུ་སྐུལ་གྱི་ཕྱག་བྲིས་དེ་འདོན་སྤེལ་གནང་འདུག དེ་སྔ་རྒྱལ་ཚོགས་ཀྱི་དམིགས་བསལ་སྐུ་ཚབ་ Finonnuala Ni Aolian ལགས་ཀྱི་སྙན་ཐོ་འགོད་འབུལ་ཞུས་པའི་ནང་ཤིན་ཅང་གི་ཡུ་གུར་མང་ཚོགས་རྣམས་གསང་བའི་བཀག་ཉར་དང་བཙན་དབང་གིས་ངལ་རྩོལ་འོག་འཇོག་བཞིན་པ་སོགས་མངོན་གསལ་དང་འབྲེལ། གནད་དོན་དེ་དག་ཐོག་ཛ་དྲག་གི་ཞིབ་འཇུག་དགོས་པ་དང་། རྒྱལ་སྤྱིའི་ཁྲིམས་དང་འགལ་བའི་ཆ་རྣམས་ཐེར་འདོན་དགོས་སྐོར་གསུངས་ཡོད། དེ་བཞིན་རྒྱལ་ཚོགས་ཀྱི་དབུལ་ཕོངས་བའི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་སྐུ་ཞབས་ Philip Alston ལགས་ཀྱིས་དེ་སྔ་ཁོང་རྒྱ་ནག་ནང་སྐོར་སྐྱོད་ཕེབས་པ་དང་འབྲེལ་བའི་སྙན་ཐོ་འགོད་འབུལ་ཞུས་པའི་ནང་སྐོར་སྐྱོད་ཁྲོད་ཁོང་ལ་རང་དབང་ཐོག་མང་ཚོགས་ཀྱི་ཚོགས་ཁག་གི་སྐུ་ཚབ་རྣམ་པ་དང་ཐུག་འཕྲད་གནང་མ་བཅུག་པར་མ་ཚད་ས་གནས་གང་དུ་ཕེབས་ཀྱང་དེར་སྒྲིག་ཆས་མ་གྱོན་པའི་ཉེན་རྟོག་པ་ཡོང་བ་དང་། གང་ཟག་སུ་དང་ཐུག་འཕྲད་དང་བཀའ་མོལ་གང་གནང་བ་དེ་དག་རྒྱ་གཞུང་ལ་འཕྲལ་མར་སྙན་སེང་ཞུ་དགོས་པ་དང་། སྐབས་དེར་ཐུག་འཕྲད་བྱུང་བའི་མི་སྣ་གཅིག་ནི་རྒྱ་རིགས་ཁྲིམས་རྩོད་པ་ Jiang Tianyong ལགས་ཡིན་སྟབས་ཐུག་འཕྲད་རྗེས་སུ་ལོ་གསུམ་གྱི་རིང་འཛིན་བཟུང་བྱས་པ་མ་ཟད། ད་ལྟའང་བཟང་བཙོན་འོག་ཡོད་པ་སོགས་ལུང་འདྲེན་གྱིས་ད་བར་གཞུང་འབྲེལ་མིན་པའི་ཚོགས་པ་ཁག་དང་རྒྱལ་ཚོགས་ཀྱི་དམིགས་བསལ་སྐུ་ཚབ་དང་ཆེད་ལས་པ་རྣམས་ནས་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནད་དོན་དང་སྒོས་བོད་དང་ཤིན་ཅང་ནང་དུ་བཙན་དབང་གིས་ངལ་རྩོལ་བཏང་བ། མང་ཚོགས་སྡེབས་ལ་ཆད་པ་བཏང་བ། ཁྲིམས་རྩོད་པ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་འཛིན་བཟུང་། དེ་བཞིན་ཧོང་ཀོང་ནང་གི་ཞི་བའི་ངོ་རྒོལ་གནང་མཁན་ཐོག་དྲག་གནོན་བྱས་པ་སོགས་ཀྱི་གནད་དོན་ཞིབ་ཕྲ་ངོ་སྤྲོད་དང་འབྲེལ་དེ་དག་ཐོག་སེམས་འཚབ་ཀྱི་རྣམ་པ་མངོན་གསལ་དང་སྦྲགས། ཞིབ་འཇུག་དགོས་སྐོར་གསུངས་པ་ཐེར་འདོན་གནང་འདུག འགྲོ་བ་མིའི་ཐོབ་ཐང་ཚོགས་པ་དེ་དག་གིས་ཉེ་སྔོན་ཕྱི་ཟླ་ ༣ ཚེས་ ༨ ཉིན་གཙོ་འཛིན་མཆོག་གིས་ཁོང་ཤིན་ཅང་དུ་ཕེབས་གཏན་ཁེལ་བའི་གསལ་གྲགས་གནང་བར་དེ་སྔ་གཙོ་འཛིན་མཆོག་གི་ལས་ཁུངས་ནས་རྒྱ་ནག་ཐོག་གི་ཞིབ་འཇུག་སྙན་ཐོ་དེ་ནམ་འདོན་སྤེལ་གནང་རྒྱུ་ཡིན་མིན་སྐོར་གསལ་ཁ་གང་ཡང་གནང་མེད་པར་བློ་ཕམ་ཡོད་པ་དང་། གཙོ་འཛིན་མཆོག་ནས་ཐོག་མར་རྒྱ་ནག་ནང་དུ་སྐོར་སྐྱོད་གནང་འཆར་ཡོད་སྐོར་གསུངས་ནས་ད་ཆ་ཟླ་བ་གསུམ་དང་ཕྱེད་ཀ་ཙམ་ཕྱིན་པའི་མཚམས་འདིར་རྒྱ་ནག་ནང་གི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གྱི་ཚབས་ཆེ་བའི་གནད་དོན་དང་འབྲེལ་སྐྱོན་བརྗོད་དང་བསྒྲགས་གཏམ་སྤེལ་རྒྱུ་བཅས་ནི་སྔར་གྱི་གཙོ་འཛིན་ཚོ་དང་བསྡུར་ཚེ་འགན་ཁུར་ཉུ་བ་བཞེས་ཀྱི་ཡོད་སྐོར་གསུངས་ཡོད། རྒྱ་ནག་གཞུང་གི་ངོས་ནས་ད་བར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་ཕེབས་རྒྱུ་དེ་ཕན་ཚུན་འབྲེལ་ལམ་ཡར་རྒྱས་དང་མཉམ་འབྲེལ་ལ་དམིགས་པའི་ Friendly Visit འམ་མཛའ་འབྲེལ་གྱི་སྐོར་སྐྱོད་ཡིན་པ་མ་གཏོགས་རྒྱ་ནག་ནང་གི་དངོས་ཡོད་གནས་སྟངས་ལ་རྟོག་ཞིབ་གནང་ཕྱིར་མིན་སྐོར་གསལ་བཟོ་བྱས་འདུག་པ་ལུང་འདྲེན་དང་སྦྲགས། ད་ལན་ལྕམ་སྐུ་ Bachelet མཆོག་རྒྱ་ནག་ཏུ་ཏོག་དབྱིབས་གཉན་རིམས་ཁྱབ་གདལ་གྱི་ཛ་དྲག་གནས་སྐབས་སུ་ཕེབས་ཀྱི་ཡོད་སྟབས། ལྕམ་སྐུ་མཆོག་ནས་འགྲོ་བ་མིའི་ཐོབ་ཐང་ལྷན་ཚོགས་ལ་སྙན་སེང་ཞུས་པའི་ནང་ཁོང་གི་རུ་ཁག་ལ་དོན་དངོས་ཐོག་བཀག་སྡོམ་མེད་པར་ཞིབ་འཇུག་གནང་འཐུས་མིན་སྐོར་གླེང་སློང་གནང་ཡོད་མེད་གང་ཡང་བཀོད་མེད་པར་བློ་འཚབ་དང་འབྲེལ། དེ་ལྟར་གནང་མ་ཐུབ་ཚེ་སྐོར་སྐྱོད་དེ་དོན་སྨིན་ལྡན་པ་ཞིག་ཡོང་དཀའ་བ་ཡིན་སྐོར་གསུངས་འདུག དེ་བཞིན་ལྕམ་སྐུ་མཆོག་ལ་ཕྱི་ཟླ་ ༥ པ་ནང་རྒྱ་ནག་ཏུ་མ་ཕེབས་སྔོན་ཚུད་དུ་བོད་དང་ཤིན་ཅང་ནང་གི་གནས་སྟངས་དང་འབྲེལ་བའི་དེ་སྔ་ཁས་ལེན་གནང་བ་སྙན་ཐོ་དེ་ཡོངས་གྲགས་འདོན་སྤེལ་གནང་དགོས་པ་དང་། སྐོར་སྐྱོད་ཀྱི་སྔོན་ཚུད་དུ་སྤྱི་དམངས་ཚོགས་པ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་དང་། ཕྱིའི་རྒྱལ་ཁབ་ཏུ་ཡོད་པ་རྣམས་གཙོས་རྒྱ་ནག་གི་གདུག་རྩུབ་མྱོང་མཁན་གྱི་མི་སྣ་ཚོ་དང་མཇལ་འཕྲད་གནང་སྟེ་གནས་སྟངས་རྒྱུས་ལོན་གནང་དགོས་པ། སྐོར་སྐྱོད་དངོས་ཀྱི་སྐབས་སུ་རྒྱ་ནག་གཞུང་དང་ཉེན་རྟོག་པའི་ཐེ་བྱུས་གང་ཡང་མེད་པར་རང་དབང་ཐོག་ནས་རྟོག་ཞིབ་གནང་ཐུབ་དགོས་པ། རྟོག་ཞིབ་རུ་ཁག་ནང་མཁས་དབང་མཉམ་ཁྲིད་དགོས་པ་སོགས་ཀྱི་དགོས་འདུན་ཆེད་བཀོད་དང་ཆབས་ཅིག  རང་དབང་ལྡན་པའི་རྟོག་ཞིབ་ཀྱི་འབྲུ་དོན་ཡོངས་སུ་ཚང་བའི་དོན་ལ་སྨིན་པའི་སྐོར་སྐྱོད་གནང་དགོས་པའི་ཞུ་སྐུལ་གནང་འདུག

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་གིས་རྒྱ་གཞུང་གིས་ལོ་བཞིའི་བཙོན་འཇུག་ཁྲིམས་ཐག་བཅད་པའི་རྩོམ་པ་པོ་བློ་བཟང་ལྷུན་འགྲུབ་ལགས་དང། ལོ་དྲུག་གི་བཙོན་འཇུག་ཁྲིམ་ཐག་བཅད་པའི་གླུ་བ་ལྟུན་འགྲུབ་གྲགས་པ་ལགས། དེ་བཞིན་རྒྱ་གཞུང་གིས་འཛིན་བཟུང་བཙན་ཁྲིད་འོག་གར་སོང་ཆ་མེད་དུ་གྱུར་བའི་མགོ་ལོག་དར་ལག་རྫོང་སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་བཅས་བོད་ནང་བོད་མི་ཆབ་སྲིད་བཙོན་པ་གསུམ་གྱི་གཟུགས་གཞིའི་གནས་སྟངས་ཁ་གསལ་དགོས་སྐོར་རྒྱ་ནག་གཞུང་ལ་ཡིག་ཐོག་ནས་འདྲི་རྩད་གནང་འདུག རྒྱལ་ཚོགས་ཀྱི་དྲ་ཚིགས་ཐོག་གསལ་བར་གཞིགས་ན། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་གིས་རྒྱ་གཞུང་ལ་བཏང་བའི་ཡིག་ཐོག་འདྲི་རྩད་ནང་གོང་དུ་གསལ་བའི་བོད་མི་ཆབ་སྲིད་བཙོན་པ་གསུམ་ཐོག་མར་རྒྱ་གཞུང་ཉེན་རྟོག་པས་འཛིན་བཟུང་བཙན་འཁྲིད་དང། རྒྱུན་རིང་བཀག་ཉར་འོག་གར་སོང་ཆ་མེད་དུ་གྱུར་བ། མཐར་ཕྱི་གསལ་ནང་གསལ་མེད་པར་གསང་བའི་ཐོག་ནས་བཙོན་འཇུག་ཁྲིམས་ཐག་བཅད་པའི་དོ་བདག་ཆབ་སྲིད་བཙོན་པ་ཁོང་གསུམ་གྱི་ཐོག་མཐའ་བར་གསུམ་གྱི་གནས་ཚུལ་རྣམས་ཞིབ་ཁྲ་མངོན་གསལ་གནང་སྟེ། རྒྱ་ཆེ་ས་ནས་ད་ལྟའི་ཆར་རྒྱ་ནག་གཞུང་གིས་བོད་ནང་བོད་མི་རིགས་ཀྱི་སྐད་ཡིག་དང་བོད་མིའི་ངོ་བོ་མཚོན་པའི་ལེགས་བྱང་ཁག་སྲུང་སྐྱོབ་དར་སྤེལ་གནང་མཁན་དང། དེ་བཞིན་རྒྱ་གཞུང་གི་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་གནང་མཁན་མི་སྣ་ཁག་ལ་དྲག་གནོན་བྱེད་བཞིན་པའི་གནས་སྟངས་དངོས་ར་འཕྲོད་པ་ཞིག་མཚོན་གྱི་ཡོད་པ་མ་ཟད། ད་ལྟའི་ཆར་རྒྱ་གཞུང་གིས་བོད་ནང་ཤེས་ཡོན་ཅན་དང་སྒྱུ་རྩལ་བ་སོགས་མང་ཚོགས་ཀྱི་རང་དབང་སྲུང་སྐྱོབ་གནང་མཁན་གྱི་མི་སྣ་ཁག་འཛིན་བཟུང་བཙན་ཁྲིད་དང། རྒྱུན་རིང་བཀར་ཉར་གྱི་གར་ཡོད་ཤེས་རྟོགས་མེད་པ་བཟོས་པ། དེ་བཞིན་བཙོན་འཇུག་ཁྲིམས་ཐག་བཅད་པ་སོགས་ཀྱི་གནད་དོན་ཁག་རྒྱུན་ལྡན་གྱི་ལམ་ལུགས་ལྟར་ཆགས་ཡོད་པར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་གི་ངོས་ནས་ཧ་ཅང་སེམས་འཚབ་ཡོད་ཅེས་གསུངས་འདུག ལྷག་པར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་ནས་ད་ལན་རྒྱ་གཞུང་ལ་འདྲི་རྩད་གནང་བའི་ནང་ལ་ད་ལྟ་རྒྱ་ནག་གི་བཙོན་ཁང་དུ་ཡོད་པ་རྩོམ་པ་པོ་བློ་བཟང་ལྷུན་འགྲུབ་ལགས་དང། གླུ་བ་ལྟུན་འགྲུབ་གྲགས་པ་ལགས། གར་སོང་ཆ་མེད་དུ་གྱུར་བའི་མགོ་ལོག་དར་ལག་རྫོང་སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་བཅས་གསུམ་གང་དུ་ཡོད་མེད་དང་གཟུགས་གཞིའི་བདེ་ཐང་གང་ཡིན། ཁོང་གསུམ་ཐོག་མར་འཛིན་བཟུང་དང་བཀག་ཉར། དེ་ནས་འབྲེལ་ཡོད་ནང་མི་ཚོར་ཤེས་རྟོགས་གང་ཡང་མེད་པར་བཙོན་འཇུག་ཁྲིམས་ཐག་བཅད་པ་སོགས་རྒྱལ་སྤྱིའི་འགྲོ་བ་མིའི་ཐོབ་ཐང་གི་འབྲུ་དོན་དང་མཐུན་པ་ཞིག་ཆགས་ཀྱི་ཡོད་མེད་སོགས་ལན་འདེབས་ཁ་གསལ་དགོས་པ། རྒྱ་གཞུང་གི་ངོས་ནས་ད་བར་བོད་ཀྱི་ས་ཁུལ་ཁག་གི་མང་ཚོགས་ཚོར་རང་ཉིད་ཀྱི་སྐད་ཡིག་རང་དབང་དང་ཆོས་དད་རང་དབང། དེ་བཞིན་སྨྲ་བརྗོད་རང་དབང་། བསམ་བློའི་རང་དབང་སོགས་འགན་སྲུང་ཆེད་དུ་གང་དང་གང་བྱས་པ་ཁ་གསལ་བཟོ་དགོས་པ་བཅས་ཀྱི་འདྲི་རྩད་ཁག་ཅིག་གནང་ཡོད། རྒྱ་ནག་གཞུང་ལ་བོད་མི་ཆབ་སྲིད་བཙོན་གསུམ་གྱི་གནད་དོན་དང་འབྲེལ་ནས་ཡིག་ཐོག་འདྲི་རྩད་གནང་མཁན་རྒྱལ་ཚོགས་ཀྱི་སྡེ་ཁག་དྲུག་ནི། རྒྱལ་ཚོགས་ཀྱི་འཛིན་བཟུང་བཀག་ཉར་ཐོག་རྟོག་ཞིབ་གནང་མཁན་གྱི་དམིགས་བསལ་ཁེ་ལས་རྟོག་ཞིབ་ཚོགས་ཆུང་དང། བཙན་ཁྲིད་དམ་གར་སོང་ཆ་མེད་ཀྱི་གནད་དོན་རྟོག་ཞིབ་གནང་མཁན་དམིགས་བསལ་ཁེ་ལས་རྟོག་ཞིབ་ཚོགས་ཆུང། རྒྱལ་ཚོགས་ཀྱི་ཤེས་ཡོན་རང་དབང་གི་དམིགས་བསལ་ཁེ་ལས་རྟོག་ཞིབ་མི་སྣ། སྨྲ་བརྗོད་རང་དབང་དང་བསམ་བློའི་རང་དབང་དར་སྤེལ་དང་སྲུང་སྐྱོབ་གནང་མཁན་ཁེ་ལས་རྟོག་ཞིབ་མི་སྣ། ལེགས་བྱང་རང་དབང་དང་གྲངས་ཉུང་མི་རིགས་ཐོག་གི་ཁེ་ལས་རྟོག་ཞིབ་མི་སྣ་བཅས་ཡིན་པ་རེད།

རྒྱ་གཞུང་གི་འཇིགས་སྐུལ་ལ་ལྟོས་མེད་ཨ་རིའི་སྲིད་དོན་ཚོགས་པ་གཉིས་ཀྱི་གྲོས་ཚོགས་འཐུས་མི་དྲུག་ལས་གྲུབ་པའི་སྐུ་ཚབ་ཚོགས་ཆུང་ཞིག་ཐེ་ཝན་ནང་གཞུང་འབྲེལ་འཚམས་གཟིགས་ལ་ཕེབས་འདུག གཟའ་འཁོར་འདིའི་ནང་སུད་ཌིན་གྲོས་ཚོགས་འཐུས་མིས་སྣེ་ཁྲིད་པའི་ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཆུང་ཞིག་ཀྱང་ཐེ་ཝན་གྱི་རྒྱལ་ས་ཐེ་པེ་ནང་དུ་ཆེད་ཕེབས་གནང་བ་དང་འབྲེལ་ཡུལ་དེའི་སྲིད་འཛིན་ལྕམ་ Tsai Ing-Wen ལགས་དབུ་བཞུགས་ཐོག་དྲ་ཐོག་ཚོགས་འདུ་ཞིག་ཚོགས་ཡོད་པ་ལྟར། ཁ་ཉིན་ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་དྲུག་ཐེ་ཝན་གྱི་རྒྱལ་ས་ཐེ་པེ་ནང་ཆེད་ཕེབས་ཀྱིས་དེ་རིང་སྐུ་ཚབ་ཚོགས་པ་དེས་སྲིད་འཛིན་ལྕམ་ Tsai Ing-Wen ལགས་དང་རྒྱལ་སྲུང་ལྷན་ཁང་གི་འགོ་ཁྲིད་གཙོས་གནད་ཡོད་མི་སྣ་ཁག་ཅིག་དང་མཇལ་མོལ་གནང་སྟེ་ཨ་རི་དང་ཐེ་ཝན་དབར་གྱི་གནད་དོན་གལ་ཆེ་ཁག་ཅིག་གི་ཐོག་ཕན་ཚུན་དབར་དགོངས་ཚུལ་སྤེལ་རེས་གནང་གི་ཡོད་པ་རེད། ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་པ་དེ་ཐེ་ཝན་དུ་ཆེད་ཕེབས་མ་གནང་གོང་ཡུལ་དེའི་སྲིད་འཛིན་མཆོག་ནས་ཁོང་རྣམ་པར་དྲ་ལམ་བརྒྱུད་དགའ་བསུའི་འཚམས་འདྲི་ཞུས་པ་དང་། གྲོས་ཚོགས་འཐུས་མི་དག་གི་འཚམས་གཟིགས་བརྒྱུད་རྒྱལ་ཁབ་གཉིས་དབར་གྱི་མཛའ་གྲོགས་འབྲེལ་ལམ་སྔར་ཡོད་དེ་གོང་འཕེལ་ཡོང་བར་ནུས་པ་མཉམ་སྤུངས་གནང་རྒྱུ་ཡིན་ཞེས་གསུངས་འདུག ཐེ་ཝན་ནང་ཆེད་ཕེབས་གནང་བའི་ཨ་རིའི་སྐུ་ཚབ་ཚོགས་ཁག་དེ་ནི་ཡུལ་དེའི་སྲིད་དོན་ཚོགས་པ་གཉིས་ལས་གྲུབ་པའི་ཆེས་མཐོའི་གཞུང་འབྲེལ་མི་སྣ་ཆགས་ཀྱི་ཡོད་པ་དང་སྐུ་ཚབ་ཚོགས་པའི་ནང་ཨ་རིའི་སྤྱི་མཐུན་སྲིད་དོན་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་ Lindsey Graham ལགས་དང་སྐུ་ཞབས་ Ben Sasse ལགས། སྐུ་ཞབས་ Richard Burr ལགས། སྐུ་ཞབས་ Robert Jones Portman དེ་བཞིན་སྐུ་ཞབས་ Bob Menendez ལགས། མང་གཙོ་སྲིད་དོན་ཚོགས་པའི་སྐུ་ཞབས་ Bob Menendez ལགས་སོགས་གྲོས་ཚོགས་འཐུས་མི་དྲུག་ཡོད་པ་རེད། ཨ་རིའི་གྲོས་ཚོགས་འཐུས་མིས་ཐེ་ཝན་ལ་འཚམས་གཟིགས་གནང་བར་ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ Zhao Lijian ཡིས་སྐྱོན་བརྗོད་དང་འབྲེལ་ཐེ་ཝན་འདི་རྒྱ་ནག་གི་ཆ་ཤས་ཤིག་ཡིན་པས་དེའི་ནང་གཞུང་འབྲེལ་གྱི་ཐོག་ནས་འགྲོ་འོང་གནང་ཚེ་དེར་ངོ་རྒོལ་མཐའ་ཅིག་ཏུ་བྱ་རྒྱུ་ཡིན། ཨ་རི་གཞུང་ནས་རྒྱ་ནག་གཅིག་གི་སྲིད་བྱུས་ལ་ངེས་པར་བརྩི་སྲུང་བྱས་ནས་ཉེན་ཁ་མི་ཡོང་བར་གཙོ་འདོན་བྱེད་དགོས་པ་དང་གལ་ཏེ་དེ་ལྟར་མ་གནང་ན་རྒྱ་ནག་གཞུང་གིས་དེར་འཁོན་ལན་དྲག་པོ་སློག་ངེས་ཡིན་པའི་ཉེན་བརྡ་བཏང་འདུག

ཁ་ཉིན་ཐེ་ཝན་གྱི་སྲིད་འཛིན་དང་ཡུ་རོབ་མཐུན་ཚོགས་ཀྱི་སྐུ་ཚབ་དབར་དྲ་ཐོག་ཚོགས་འདུ་བརྒྱུད་ཕྱོགས་གཉིས་ཀྱི་འབྲེལ་ལམ་དམ་ཟབ་གཏོང་རྒྱུ་སླད་གོ་བསྡུར་གནང་འདུག ཐེ་ཝན་དང་རྒྱ་ནག་དབར་གྱི་རྩོད་རྙོག་ལ་ལྟོས་མེད་ཉེ་ལམ་སུད་ཌིན་གྲོས་ཚོགས་འཐུས་མིས་སྣེ་ཁྲིད་པའི་ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཁག་ཅིག་ཐེ་ཝན་གྱི་རྒྱལ་ས་ཐེ་པེ་ནང་དུ་ཆེད་ཕེབས་གནང་བ་དང་འབྲེལ། ཁ་ཉིན་སྲིད་འཛིན་ལྕམ་ Tsai Ing-Wen ལགས་དབུ་བཞུགས་ཐོག་དྲ་ཐོག་ཚོགས་འདུ་ཞིག་ཚོགས་ཏེ་ད་ཆ་ Ukraine གཙོས་རྒྱལ་ཁབ་ཁག་ཅིག་གི་མང་གཙོའི་རང་དབང་ལ་དབང་ཆ་གཅིག་བསྡུས་ལམ་ལུགས་ཀྱིས་ཉེན་ཚབས་ཆེས་ཆེར་བཟོས་ཤིང་། རྒྱལ་སྤྱིའི་ཁྱོན་དུ་རྒྱ་སྐྱེད་གཏོང་ཐབས་བྱེད་བཞིན་པའི་མཚམས་འདིར་ཐེ་ཝན་སྲིད་འཛིན་མཆོག་གིས་རྒྱལ་སྤྱིའི་ངོས་ནས་མཉམ་ལས་གནང་དགོས་པ་དང་སྒོས་དབང་ཆ་གཅིག་བསྡུས་ལམ་ལུགས་ལ་གདོང་ལེན་ཆེད་འཛམ་གླིང་གི་མང་གཙོའི་ཕྱག་སྦྲེལ་རྒྱལ་ཁབ་ཁག་ངེས་པར་དུ་མཉམ་འབྲེལ་གནང་དགོས་པའི་རེ་སྐུལ་གནང་འདུག དྲ་ཐོག་གི་ཚོགས་འདུ་ཐོག་ལྕམ་ Tsai Ing-Wen ལགས་ཀྱིས་ཡུ་རོབ་མཐུན་ཚོགས་ཀྱི་སྐུ་ཚབ་རྣམས་ལ་ད་བར་ཐེ་ཝན་དང་འབྲེལ་བའི་གནད་དོན་ཁག་གི་ཐོག་ཡུན་རིང་རྒྱབ་སྐྱོར་གྱིས་ཁས་ལེན་གནང་བ་དང་། ལྷག་དོན་ཕྱོགས་གཉིས་ཀྱི་ཚོང་འབྲེལ་དང་མཉམ་མཐུན་གྱི་ལས་དོན་དག་ལ་ཧུར་བརྩོན་གོང་སྤེལ་གནང་ཐབས་གནང་བར་ཐུགས་རྗེ་ཆེ་ཞུས་པ་མ་ཟད། སྐབས་དེར་སུད་ཌེན་དང་ཐེ་ཝན་གྲོས་ཚོགས་འཐུས་མི་ཚོགས་ཆུང་གི་གཙོ་ལྕམ་ Boriana Aberg ལགས་ཀྱིས་ཨུ་རུ་སུས་ཡུཀ་རེན་ནང་དམག་འཁྲུག་རྒྱག་བཞིན་པ་དེ་ནི་སྲིད་དབང་སྒེར་འཛིན་པའི་མངོན་འདོད་ཀྱི་རྗེས་འབྲས་འཇིགས་སྣང་ཅན་ཞིག་ཡིན་པས་ད་ཆ་ཕྱི་འབྲེལ་མི་སྣ་དང་རྒྱལ་སྲུང་མཁས་པ་རྣམས་ཀྱིས་ཨུ་རུ་སུས་ Ukraine བཙན་འཛུལ་བྱས་པ་དེས་རྒྱ་གཞུང་ནས་ཐེ་ཝན་ལ་འཐབ་རྒོལ་བྱ་རྒྱུའི་དཔའ་ངར་སློང་སྲིད་པའི་འཇིགས་སྣང་བྱས་བཞིན་ཡོད་པ་འགྲེལ་བརྗོད་དང་སྦྲགས། ཚོགས་ཆུང་དེའི་ངོས་ནས་ཐེ་ཝན་ལ་རྒྱབ་སྐྱོར་བྱ་རྒྱུ་དེ་རང་ཉིད་ལ་བསྐུར་བའི་འགན་འཁྲི་ཞིག་ལ་ངོས་འཛིན་གནང་གི་ཡོད་པས་རྒྱལ་ཁབ་དེའི་རང་དབང་དང་མང་གཙོའི་རིན་ཐང་སྲུང་སྐྱོབ་སླད་གང་ཐུབ་ཅི་ཐུབ་གནང་རྒྱུ་ཡིན་པའི་ཁས་ལེན་གནང་འདུག ད་རེས་ཕྱོགས་གཉིས་དབར་དྲ་ཐོག་ཚོགས་འདུ་འདི་ཡུ་རོབ་མཐུན་ཚོགས་ཀྱི་སྐུ་ཚབ་རྣམས་ཐེ་ཝན་དུ་གཟའ་འཁོར་སྔོན་མའི་རེས་གཟའ་ཉི་མ་ནས་དེ་རིང་བར་ཁྱོན་ཉིན་གྲངས་ལྔའི་རིང་གཞུང་འབྲེལ་སྐོར་སྐྱོད་ལ་ཕེབས་པའི་ཆ་ཤས་སུ་གནང་བ་ཞིག་དང་། ཐེ་ཝན་གྱི་སྲིད་འཛིན་མཆོག་གི་ཉེ་འབྲེལ་ཞིག་ལ་ཏོག་དབྱིབས་ནད་དུག་ཕོག་ནས་སྲིད་འཛིན་མཆོག་ཟུར་བཀག་ལ་བཞུགས་ཡོད་པའི་གནས་སྟངས་ལ་བརྟེན་ཕྱོགས་གཉིས་ཀྱི་ཚོགས་འདུ་དེ་དྲ་ཐོག་ནས་གནང་དགོས་བྱུང་འདུག ཕྱོགས་སྐྱོད་དེའི་ཁྲོད་ཡུ་རོབ་མཐུན་ཚོགས་ཀྱི་སྐུ་ཚབ་རྣམས་ནས་ཐེ་ཝན་གྱི་སྲིད་བློན་ Su Tseng-Chang ལགས་གཙོས་དཔལ་འབྱོར་བློན་ཆེན་དང་ཕྱི་སྲིད་བློན་ཆེན། དེ་བཞིན་གྲོས་ཚོགས་ཀྱི་ཚོགས་གཙོ་སོགས་གནད་ཡོད་མི་སྣ་ཁག་ཅིག་དང་ཐུག་འཕྲད་གནང་འདུགཕྱི་སྲིད་བློན་ཆེན་སྐུ་ཞབས་ Jan Lipavsky ལགས་ཀྱིས་ Politico བརྒྱུད་ལམ་གྱི་བཅར་འདྲི་ལས་རིམ་ཞིག་ཐོག་ད་ཆ་རྒྱ་ནག་གཞུང་གིས་ཨ་རུ་སུ་དང་ལྷན་དུ་ Ukraine ནང་གི་དམག་འཁྲུག་ལ་རྒྱབ་སྐྱོར་བྱེད་ཀྱི་ཡོད་མེད་ཐོག་ཞིབ་འཇུག་ཁྱད་པར་བ་ཞིག་གནང་དགོས་པའི་གནད་དོན་དང་འབྲེལ། གལ་ཏེ་རྒྱ་གཞུང་གིས་དེ་ལྟར་བྱས་ཚེ་དེས་ཡུ་རོབ་མཐུན་ཚོགས་དང་རྒྱ་ནག་དབར་གྱི་འབྲེལ་ལམ་ལ་ཉེན་ཚབས་ཆེའི་མཇུག་འབྲས་འཕྲད་རྒྱུ་ཡིན་སྟབས་གནད་དོན་དེའི་ཐོག་ཞིབ་འཇུག་གཏིང་ཟབ་ཞིག་གནང་རྒྱུའི་དུས་ལ་བབ་ཡོད་པ་དང་ཁོང་རྣམས་ཀྱིས་ཐེ་ཝན་དེ་རྒྱ་ནག་གི་དབང་འོག་ལ་ཡོད་པ་རྟོགས་ཀྱི་ཡོད་ཀྱང་ང་ཚོའི་ཅེཀ་གཞུང་འཛིན་གྱི་་འཆར་སྣང་གི་ཆ་ཤས་གཅིག་དེ་འཛམ་གླིང་ནང་གི་མང་གཙོའི་རྒྱལ་ཁབ་ཁག་མཉམ་ལས་གནང་རྒྱུ་དང་ཐེ་ཝན་དེ་མང་གཙོ་འདོད་ཀྱི་ཡོད་པ་གསུངས་འདུག དེ་བཞིན་ཕྱི་སྲིད་བློན་ཆེན་མཆོག་གིས་ཅེཀ་སྤྱི་མཐུན་རྒྱལ་ཁབ་ནང་མ་འཛུགས་གནང་མཁན་རྒྱལ་ཁབ་མང་་པོ་ཡོད་པའི་ཁོངས་ནས་རྩེ་ཕུད་གཅིག་ཡོད་པ་དེ་ནི་ཐེ་ཝན་ཆགས་ཡོད་པ་དང་ཐེ་ཝན་གྱིས་ད་བར་བཟོ་གྲྭ་ཡག་པོ་དང་ལས་ཁུངས་མང་དག་ཅིག་གསར་སྐྲུན་གནང་ཡོད་སྟབས་རྒྱལ་ཁབ་དེའི་ལྷན་དུ་དཔལ་འབྱོར་གྱི་འབྲེལ་ལམ་ཐོག་ནས་ཕྱག་ལས་གནང་འདོད་ཡོད་པ་དང་ཆབས་ཅིག་དེར་རོགས་རམ་གང་ཐུབ་གནང་འདོད་ཡོད་སྐོར་མངོན་གསལ་གནང་ཡོད། རྩ་བའི་སྔ་ལོར་ལི་ཐོའུ་ནེཡ་གཞུང་གིས་ཐེ་ཝན་ལ་རྒྱབ་སྐྱོར་གྱིས་ཡུལ་དེའི་རྒྱལ་ས་ Vilnius ནང་ཐེ་ཝན་གྱི་གཞུང་ཚབ་ལས་ཁུངས་ཤིག་དབུ་འབྱེད་གནང་བ་མ་ཟད་ལས་ཁུངས་ཀྱི་མིང་སྦྱང་ཐོག་ཐེ་ཝན་ཞེས་མིང་དངོས་སུ་སྤྱོད་རྐྱེན། རྒྱ་གཞུང་གིས་ Lithuania ལ་སྐྱོན་བརྗོད་ཀྱིས་ཐེ་ཝན་དང་འབྲེལ་བ་མཚམས་འཇོག་དགོས་པའི་ཉེན་བརྡ་དང་གནོན་ཤུགས་སྤྲད་དེ་དཔལ་འབྱོར་གྱི་ཉེས་ཆད་བཏང་བ། དེ་བཞིན་པེ་ཅིང་ནང་ཡོད་པའི་ Lithuania གཞུང་ཚབ་ཆེན་མོ་ཕྱིར་འཐེན་དགོས་པ་སོགས་བཤད་ཡོད། གནད་དོན་དེའི་ཐད་ཅེཀ་གཞུང་གི་ཕྱི་འབྲེལ་མི་སྣ་ཁག་གིས་རྒྱ་ནག་དང་ལྷན་འབྲེལ་བ་དམ་ཟབ་ཡོད་མཁན་ཅེཀ་སྲིད་འཛིན་ Milos Zeman ལགས་ཀྱི་སྲིད་འཛིན་གྱི་ལས་ཡུན་དེ་འདི་ལོའི་ལོ་མཇུག་ཏུ་ཚང་གི་ཡོད་པ་དང་བསྟུན་ Prague གྱིས་ཀྱང་ལི་ཐོའུ་ནེཡ་གཞུང་གིས་ཐེ་ཝན་ལ་རྒྱབ་སྐྱོར་གནང་བ་བཞིན་དེ་མཚུངས་གནང་ཐུབ་པ་དང་དེ་བཞིན་རྒྱལ་ས་ Prague ནང་ཡོད་པའི་ཐེ་པེ་ལས་ཁུངས་ལ་བསྒྱུར་བཅོས་ཀྱིས་ཐེ་ཝན་གཞུང་ཚབ་ལས་ཁུངས་ཞེས་གནང་རྒྱུའི་རེ་བ་ཡོད་སྐོར་གསུངས་འདུག

ཁ་སང་ཨ་རིའི་ཕྱི་སྲིད་ལས་ཁུངས་ཀྱིས་འདས་པའི་ཕྱི་ལོ་ ༢༠༢༡ ནང་འཛམ་གླིང་ནང་གི་འགྲོ་བ་མིའི་ཐོབ་ཐང་གི་གནས་བབ་དང་འབྲེལ་བའི་སྙན་ཐོ་འདོན་སྤེལ་གནང་བར་སྔ་ལོར་རྒྱ་ནག་གཞུང་གིས་བོད་ནང་བོད་མིའི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་བཏང་ཡོད་པ་མ་ཟད་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་རྒྱ་ནག་གི་ལས་བྱེད་པ་དང་འགོ་ཁྲིད་ཚོར་གཞུང་གི་ངོས་ནས་ཉེས་ཆད་དང་ཞིབ་འཇུག་རིགས་བྱས་ཡོད་པའི་གནས་ཚུལ་སོགས་གང་ཡང་མཐོང་ཐོས་བྱུང་མེད་པར་མངོན་གསལ་གནང་འདུག ཨ་རིའི་ཕྱི་སྲིད་ལས་ཁུངས་ཀྱི་དྲ་གནས་ཐོག་འདས་ལོར་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་སྙན་ཐོ་ཤོག་གྲངས་ ༢༥ ཅན་ཞིག་སྤེལ་བའི་ནང་། བོད་ནང་གི་གནས་སྟངས་གང་ཡིན་འགྲེལ་བརྗོད་གནང་ཡོད་པ་དང་འདས་ལོར་བོད་ནང་གི་ས་གནས་ཁག་ཏུ་རྒྱ་ནག་གཞུང་དང་དེའི་ལས་བྱེད་པ་ཚོས་བོད་མི་གང་བྱུང་དུ་འཛིན་བཟུང་བཀག་བསྐྱིལ་དང་དམར་གསོད་བཏང་བ་སོགས་ཀྱི་གནས་ཚུལ་ར་འཕྲོད་བྱུང་ཡོད་ཀྱང་། གཞུང་ཕྱོགས་ནས་ད་བར་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་སྟེ་ཁྲིམས་འགལ་གྱི་བྱ་སྤྱོད་སྤེལ་མཁན་རྒྱ་ནག་གི་དཔོན་རིགས་རྣམས་ལ་ཉེས་ཆད་བཏང་བའི་གནས་ཚུལ་གང་ཡང་མཐོང་ཐོས་བྱུང་མེད་པར་མངོན་གསལ་གནང་བ་དང་སྦྲགས། བོད་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་ཚོར་ཁྲིམས་ཆད་གང་ཡང་བཏང་མེད་པ་དེ་ཛ་དྲག་རང་བཞིན་ལྡན་པའི་གནས་སྟངས་ཤིག་ཡིན་པར་འགྲེལ་བརྗོད་གནང་འདུག དེ་བཞིན་བོད་མི་རྣམས་བཙོན་ཁང་དུ་བཞུགས་རིང་ལ་ཞལ་ལག་དང་སྨན་བཅོས་ཀྱི་མཐུན་རྐྱེན་སོགས་ཆེས་ཞན་པོ་ཡོད་པ་དེ་ལྟར་ནའང་། ད་བར་བཙོན་ཁང་ནང་གི་མཐུན་རྐྱེན་དང་བཏང་འཛིན་བྱེད་ཕྱོགས་ལ་ལྟ་རྟོག་དང་ཞིབ་འཇུག་རིགས་གང་ཡང་མེད་པ་མ་ཟད། གཞིས་ལུས་རྒྱ་ཆེ་མང་ཚོགས་ཚོ་གང་བྱུང་དུ་འཛིན་བཟུང་བྱས་དང་བྱེད་བཞིན་པའི་གནས་སྟངས་དེ་ནི་ཛ་དྲག་རང་བཞིན་ཅན་དང་། བོད་མི་ཆབ་སྲིད་བཙོན་པ་རྣམས་ལ་ཁྲིམས་ཐོག་ནས་སྲུང་སྐྱོབ་ཞུ་རྒྱུའི་གནས་བབ་ཡོད་སྐོར་བཀོད་མེད་པར་མངོན་གསལ་གནང་ཡོད། ཆབ་སྲིད་པའམ་ཆོས་ཕྱོགས་ཀྱི་གནད་དོན་འོག་འཛིན་བཟུང་བྱས་པའི་བོད་མི་རྣམས་ལ་རྒྱལ་ཁབ་བདེ་འཇགས་ཀྱི་གནད་དོན་དང་འབྲེལ་བའི་ཉེས་མིང་གྱོད་དོན་འོག་བོད་རང་སྐྱོང་ལྗོངས་ཟེར་བ་གཙོས་བོད་ཀྱི་ས་ཁུལ་ཁག་ཏུ་ཁྲིམས་བཤེར་སོགས་མེད་པར་ལོ་གཅིག་ལས་མང་བ་བཀག་ཉར་བྱས་པ་མ་ཟད། བོད་མི་རྣམས་ལ་རང་ཉིད་ཀྱི་གྱོད་དོན་རྩོད་དབང་མེད་པའི་ངལ་འཕྲད་ཀྱི་གནས་སྟངས་ཡོད་པ་སོགས་ཆེས་མངོན་གསལ་གནང་འདུག དེ་བཞིན་སྔ་ལོར་བོད་ནང་དུ་སྤྱི་ཚོགས་དྲ་ལམ་ཐོག་ཕན་ཚུན་དབར་འབྲེལ་བ་གནང་བ་དང་། བཙན་བྱོལ་ནང་གི་བོད་མིར་འབྲེལ་བ་གནང་བ། ལག་ཐོགས་ཁ་པར་ནང་༸གོང་ས་མཆོག་གི་༸སྐུ་པར་ཉར་བ། དེ་བཞིན་བོད་ཀྱི་སྐད་ཡིག་སྲུང་སྐྱོབ་སྐོར་གླེང་སློང་གནང་བ་བཅས་ནི་རྒྱལ་ཁབ་ཁ་བྲལ་གཏོང་ཐབས་བྱས་པའི་ཉེས་འཛུགས་བྱས་པ་དང་། བཙན་དབང་གིས་ཆབ་སྲིད་སློབ་གསོ་དང་ Sinicization འམ་བོད་མི་རྒྱ་སྡེར་བསྒྱུར་རྒྱུའི་སྲིད་བྱུས་སོགས་ལ་སྐྱོན་བརྗོད་གནང་བ། དེ་བཞིན་བོད་ཕྱི་ནང་གཉིས་སུ་གསར་འགོད་ལས་རིགས་ལ་དམ་དྲག་བྱས་པ་མ་ཚད་པར་བོད་མིའི་ཆོས་ཕྱོགས་དང་། ཆབ་སྲིད་དང་འབྲེལ་བའི་ཚོར་རྣོ་བའི་དུས་ཚིགས་ཁག་སྲུང་བརྩི་ཞུ་རྒྱུར་དམ་དྲག་དང་། ལས་ཀ་བྱེད་ས་ཡོངས་ལ་རྒྱ་ཡིག་གཙོ་བོར་སྤྱོད་སྟབས། བོད་མི་རྣམས་ལ་ལས་ཀའི་གོ་སྐབས་ཀྱི་ཐོག་ནས་ངལ་བ་ཆེས་ཆེར་འཕྲད་བཞིན་པ་སོགས་ཆེད་བཀོད་དང་། བོད་ཀྱི་སློབ་གྲྭ་ཁག་ཏུ་རྒྱ་ཡིག་གཙོ་སློབ་ཀྱི་སྲིད་བྱུས་ལག་བསྟར་བྱེད་མུས་ཡིན་པ་སོགས་ཀྱི་གནད་དོན་མང་དག་ཅིག་ཆེད་བཀོད་གནང་འདུག ལྷག་པར་དུ་སྔ་ལོར་རྒྱ་ནག་ཞུང་གིས་ལོ་ན་ ༦ ནས་ ༡༨ བར་གྱི་བོད་རིགས་བྱིས་པ་འབུམ་ ༨ ལ་བརྒྱ་ཆ་ ༧༨ ཙམ་དབང་བསྒྱུར་ལམ་ལུགས་ཀྱི་བཅའ་སྡོད་སློབ་གྲྭར་ཞུགས་དགོས་པའི་བཙན་བཀའ་བཏང་སྟེ། བོད་ཀྱི་ཆོས་དང་རིག་གཞུང་། སྐད་ཡིག རྒྱལ་རབས་སོགས་མི་ཤེས་པའི་མི་རབས་ཤིག་བསྐྲུན་ཐབས་དང་བོད་པའི་སྒེར་གཉེར་སློབ་གྲྭ་མང་དག་ཅིག་སྒོ་བརྒྱབ་པའི་གནས་སྟངས་བྱུང་བ་མ་ཟད། བོད་མིའི་ཆོས་དད་རང་དབང་དང་འགྲོ་བ་མིའི་ཐོབ་ཐང་བཅས་པ་ཕྱོགས་ཡོངས་ནས་བརྩི་མེད་རྡོག་རོལ་གཏོང་བཞིན་པ་མངོན་གསལ་གནང་ཡོད།

ཁེ་ན་ཌར་རྟེན་གཞི་བྱས་པའི་ International Forum for Rights and Security ཞེས་པའི་ཉམས་ཞིབ་ཁང་གི་ལོ་འཁོར་སྙན་ཐོ་ཞིག་འདོན་སྤེལ་གནང་བའི་ནང་རྒྱ་ནག་གཞུང་གིས་ད་བར་བོད་ནང་དུ་གནས་སྟངས་ཡར་རྒྱས་གཏང་རྒྱུར་ཁས་ལེན་མང་དག་ཅིག་བྱས་ཡོད་པ་དེ་ལྟར་ནའང་། དོན་དམ་ཐོག་རྒྱ་གཞུང་གིས་བོད་ནང་མུ་མཐུད་བོད་མིའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པ་མངོན་གསལ་གནང་འདུགདེ་རིང་རྒྱ་གར་གྱི་ The Statesman བརྒྱུད་ལམ་ཐོག་ཁེ་ན་ཌ་ཉམས་ཞིབ་ཁང་གི་སྙན་ཐོར་སྤེལ་བའི་གནས་ཚུལ་བཀོད་པར་རྒྱ་ནག་གཞུང་གིས་མ་འོངས་༸སྐུའི་ཡང་སྲིད་གདམ་རྒྱུའི་བདག་དབང་རྩོད་བཞིན་པ་དང་། སྔ་ལོར་རྒྱ་ནག་གཞུང་གིས་བོད་བྲག་མགོ་ཁུལ་དུ་སྟོན་པའི་སྐུ་བརྙན་དང་༸རྒྱལ་བ་བྱམས་པའི་སྐུ་བརྙན་གཏོར་བཤིག་བཏང་བའི་གནས་ཚུལ་སྤེལ་བ་མ་ཟད། བོད་མི་འཛིན་བཟུང་བྱས་པ། དེ་བཞིན་རྒྱ་ནག་གཞུང་གིས་བོད་ས་ཁྱོན་ཡོངས་སུ་བོད་ཀྱི་སྐད་ཡིག་ལ་སྦྱང་བརྩོན་འབད་གསུམ་གནང་བར་དམ་དྲག་བྱས་པ། ལས་ཀ་བྱེད་ས་ཡོངས་ལ་རྒྱ་ཡིག་གཙོ་བོར་སྤྱོད་སྟབས། བོད་མི་རྣམས་ལ་ལས་ཀའི་གོ་སྐབས་ཀྱི་ཐོག་ནས་ངལ་བ་ཆེས་ཆེར་འཕྲད་བཞིན་པ་སོགས་ཆེད་བཀོད་དང་སྦྲགས། བོད་མིའི་ཆོས་དད་རང་དབང་དང་འགྲོ་བ་མིའི་ཐོབ་ཐང་བཅས་པ་ཕྱོགས་ཡོངས་ནས་བརྩི་མེད་རྡོག་རོལ་གཏོང་བཞིན་པ་མངོན་གསལ་གྱིས་ད་ལྟའི་བོད་ནང་གི་ཡ་ང་བའི་དངོས་ཡོད་གནས་སྟངས་ཁག་གསུངས་འདུག ཉམས་ཞིབ་ཁང་དེའི་ངོས་ནས་བོད་མི་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་ནས་སྙན་ཐོ་རིམ་པ་སྤེལ་བ་དང་། བོད་ནང་གི་གནས་སྟངས་དང་འབྲེལ་བའི་གནས་ཚུལ་ཐོན་པ་ཁག་ལུང་འདྲེན་གྱིས་བོད་དེ་འཛམ་གླིང་ནང་རང་དབང་རྩ་བ་ནས་མེད་པའི་རྒྱལ་ཁབ་ཆེས་སྡུག་ཤོས་གྲས་སུ་བསླེབས་ཡོད་པ་ལྟར། བོད་ནང་ཡོད་པའི་བོད་མི་རྣམས་ལ་བཙན་བྱོལ་ནང་ཡོད་པའི་རང་གི་ནང་མི་ཉེ་འབྲེལ་རྣམས་དང་འབྲེལ་བ་གནང་རྒྱུར་བཀག་སྡོམ་དང་སུན་གཙེར་བཟོས་པ་མ་ཟད། སྔ་ལོའི་ཕྱི་ཟླ་ ༣ ནང་རྒྱ་ནག་གཞུང་གིས་བོད་པའི་གཞི་རིམ་སྤྱི་ཚོགས་ནང་དུ་ལས་བྱེད་པ་ ༢༠༠༠ ཙམ་ཆེད་གཏོང་གིས་བོད་མི་རྣམས་བོད་ཀྱི་ཕྱི་ཕྱོགས་ཙམ་མ་ཟད་བོད་ནང་ལའང་འགྲུལ་བཞུད་གནང་རྒྱུར་བཀག་སྡོམ་བྱས་པ་སོགས་མངོན་གསལ་གནང་ཡོད། སྔ་ལོར་རྒྱ་ནག་གཞུང་གིས་སྤྱི་ཚོགས་དྲ་ལམ་དང་བརྙན་སོགས་དྲ་རྒྱའི་གླེང་སྟེགས་འདྲ་མིན་ཐོག་བོད་ཡིག་བཀོལ་སྤྱོད་ལ་དམ་དྲག་དང་རྒྱ་ནག་ནང་གི་སྐད་ཡིག་འདྲ་མིན་སློབ་གཉེར་བྱ་ཡུལ་ Talkmate དང་། Bilibili སོགས་ཀྱི་བརྒྱུད་ལམ་ལས་བོད་ཡིག་དང་ཡུ་གུར་སྐད་ཡིག་ཕྱིར་འཐེན་བྱས་པ་སོགས་ཀྱི་སྲིད་བྱུས་ལག་བསྟར་བྱེད་བཞིན་ཡོད་པ་མངོན་གསལ་གནང་འདུག

ཨུ་རུ་སུའི་ཉེ་ཆར་ཡུག་རེན་རྒྱལ་ཁབ་ལ་བཙན་འཛུལ་བྱས་ཏེ་ཕྱོགས་གཉིས་ཀྱི་དམག་འཐབ་རིམ་པ་བྱུང་བའི་ཁྲོད་མང་ཚོགས་ཤི་རྨས་ཐེབས་བཞིན་པའི་གནད་དོན་དང་འབྲེལ་ནས། ཁ་སང་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཀྱི་ཐོག་ནས། ཨུ་རུ་སུ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་ཕྱིར་ཕུད་བཏང་འདུག ཁ་སང་གི་ལྷན་ཚོགས་ཀྱི་ཐོག་ཏུ། མཉམ་འབྲེལ་རྒྱལ་ཚོགས་ཀྱི་རྒྱལ་ཁོངས་ནས་རྒྱལ་ཁབ་༩༣ གྱིས་ཨུ་རུ་སུ་རྒྱལ་ཚོགས་ཀྱི་ཁོངང་ནས་ཕྱིར་ཕུད་གཏོང་རྒྱུར་འོས་འཕངས་ཡོད་པ་དང་། རྒྱལ་ཁབ་༢༤ ཡིས་གྲོས་གཞི་དེར་དགག་གཞག་གནང་ཡོད་པ་དང་རྒྱལ་ཁབ་ ༥༨ གྲོས་གཞི་དེར་ཞུགས་ཐུབ་མི་འདུགགྲོས་ཆོད་དེ་དང་འབྲེལ་ནས། ཁ་སང་མཉམ་འབྲེལ་རྒྱལ་ཚོགས་ཀྱི་གཞུང་ཚབ་པ་ཟུར་བ། ལྕམ Nikki Haley ལགས་ཀྱིས་ Fox News Digital གསར་ཁང་ལ་འགྲེལ་བརྗོད་བྱས་པའི་ནང་། ཨུ་རུ་སུ་རྒྱལ་ཚོགས་ཀྱི་འགྲོ་བ་མིའི་ལྷན་ཚོགས་ནས་ཕྱིར་ཕུད་བཏང་བའི་གྲོས་ཆོད་དེར་དགའ་བསུ་ཞུས་ཏེ། ལྷན་ཚོགས་ཀྱི་ངོས་ནས་ཨུ་རུ་འགྲོ་བ་མིའི་ཐོབ་ཐང་གི་ལྷན་ཚོགས་ནས་ཕྱིར་ཕུད་བཏང་བ་དེ་ནི་དོན་ལ་གནས་བ་ཞིག་ཆགས་ཡོད་པར་འགྲེལ་བརྗོད་ཀྱིས། དམག་དོན་གྱི་ཉེས་ཅན་པ་ཞིག་ལ་ལྷན་ཚོགས་སུ་ཞབས་སྟེགས་སྤྲད་པ་ཡིན་ན་ལྷན་ཚོགས་ཀྱི་མཚན་གནས་ལ་གནོད་ཀྱི་ཡོད་པར་ངོ་སྤྲོད་ཀྱིས། འགྲོ་བ་མིའི་ཐོབ་ཐང་གི་གནས་བབ་ཞན་པའི་རྒྱལ་ཁབ་རྒྱ་ནག་དང་བྱང་ཀོ་ཡི་ཡ། དེ་བཞིན་སི་རི་ཡཱ་དང་ཨེ་རན་སོགས་ཀྱང་རྗེས་སུ་ཕྱིར་ཕུད་གཏོང་དགོས་བར་བརྗོད་འདུག གཞི་རྩའི་རེས་གཟའ་ཟླ་བའི་ཉིན། མཉམ་འབྲེལ་རྒྱལ་ཚོགས་ཀྱི་ཨ་རིའི་གཞུང་ཚབ་པ། ལྩམ་ Thomas-Greenfield ལགས་ཀྱིས་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐེངས་༤༧ པའི་ཐོག་ཨུ་རུ་སུ་དམག་འཐབ་དང་འབྲེལ་ནས་མང་ཚོགས་ཤི་རྨས་ཐེབས་པའི་གནད་དོན་མངོན་གསལ་གནང་བ་བརྒྱུད་ནས་ཨུ་རུསུ་རྒྱལ་ཚོགས་ཀྱི་ལྷན་ཚོགས་ནས་ཕྱིར་ཕུད་གཏོང་དགོས་བའི་སྐུལ་མ་གནང་བ་མ་ཟད། ཨུ་རུ་སུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཁོངས་སུ་ཡོད་པ་ནི་གད་མོ་སློང་བྱེད་ཀྱི་གནད་དོན་ཞིག་ཡིན་པའི་ཟུར་ཟ་གནང་འདུག ཁ་སང་ལྷན་ཚོགས་ཀྱི་དབུས་སུ་ཨུ་རུ་སུ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཁང་ནས་ཕྱིར་ཕུད་བཏང་མ་ཐག ལྩམ་ Thomas-Greenfield ལགས་ཀྱིས་ཁོང་གི་འཕྲུལ་སྒྲའི་སྟེང་། ཁ་སང་ནི་གལ་གནད་ཆེ་བའི་ལོ་རྒྱུས་རང་བཞིན་གྱི་ཉིན་མོ་ཞིག་ཡིན་པ་ཕྱིར་བསྒྲགས་ཀྱིས། རྒྱལ་སྤྱིའི་སྤྱི་ཚོགས་ཀྱིས་མཉམ་འབྲེལ་གྱི་ཐོག་ནས་ཨུ་རུ་སུ་ལྷན་ཚོགས་ནས་ཕྱིར་ཕུད་བཏང་ཡོད་ལུགས་མངོན་གསལ་གནང་བརྒྱུད་ནས། རྒྱལ་སྤྱིའི་སྤྱི་ཚོགས་ཀྱི་ངོས་ནས་ཨུ་རུ་སུ་ཕྱི་གསལ་ནང་གསལ་བཟོ་དགོས་བའི་བརྡ་ལན་གལ་ཆེན་ཞིག་སྤྲད་ཡོད་པར་བསྒྲགས་འདུག གཞི་རྩའི་ཕྱི་ལོ་ ༢༠༠༦ ལོར་མཉམ་འབྲེལ་རྒྱལ་ཚོགས་ཀྱིས་ཐུན་མོང་གིས་གྲོས་ཆོད་གཏན་འབེབས་གནང་བའི་ནང་དུ། རྒྱལ་ཁབ་སུ་ཞིག་གིས་མངོན་སུམ་གྱི་ཐོག་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་ན་རྒྱལ་ཁབ་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ནང་ནས་ཕྱིར་ཕུད་གཏོང་དགོས་བར་འཁོད་ཡོད་དང་། སྤྱིར་མཉམ་འབྲེལ་རྒྱལ་ཚོགས་ཀྱི་ཁོངས་སུ་རྒྱལ་ཁབ་ ༡༩༣ ལྷག་ཡོད་པའི་ཁྲོད། གྲོས་ཆོད་གཏན་འབེབས་ལ་རྒྱལ་ཁོངས་ནས་ངོ་ཡོད་སུམ་ཆ་གཉིས་ཀྱིས་རྒྱབ་སྐྱོར་དགོས་བར་འཁོད་ཡོད་པ་ལྟར། ཁ་སང་གི་གྲོས་ཆོད་དེར་རྒྱལ་ཁབ་༩༣ ལྷག་གིས་རྒྱབ་སྐྱོར་གྱིས་མང་མོས་ཐོག་གཏན་འབེབས་བྱུང་འདུག