རྒྱ་ནག

ཉེ་ཆར་རེས་གཟའ་པ་སངས་ཉིན་རྒྱ་ནག་གི་ཕྱི་སྲིད་བློན་ཆེན་ Wang Yi བོད་དུ་བསྐྱོད་ནས་བོད་དང་རྒྱ་གར་གྱི་ས་མཚམས་ས་ཁུལ་དུ་ལྟ་སྐོར་བྱས་པ་མ་ཟད་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Wu Yingjie དང་བོད་རང་སྐྱོང་ལྗོངས་ཟེར་བའི་འགོ་གཙོ་ཆེ་དགྲ་ལྷ་གཉིས་གཙོས་ས་གནས་ཀྱི་གཞུང་འབྲེལ་ལས་བྱེད་ཁག་ཅིག་དང་ཐུག་འཕྲད་བྱས་འདུགབརྒྱུད་ལམ་ཁག་གིས་དེ་འབྲེལ་གནས་ཚུལ་སྤེལ་བར་རྒྱ་ནག་གི་ཕྱི་སྲིད་བློན་ཆེན་ Wang Yi གིས་སྐབས་དེར་རྒྱ་ནག་སྲིད་གཞུང་ནས་བོད་ཀྱི་དཔལ་འབྱོར་གནས་བབས་ཡར་རྒྱས་ཆེན་པོ་བཏང་བ་དང་རྒྱུད་ཅིག་ལམ་གཅིག་གི་སྲིད་བྱུས་འོག་བོད་འདི་ཕྱིའི་རྒྱལ་ཁབ་ཁག་དང་འབྲེལ་བ་བཟང་དུ་གཏོང་རྒྱུ་སོགས་བརྗོད་དེ་བོད་ཀྱི་བདེ་འཇགས་དེ་རྒྱ་ནག་རྒྱལ་ཁབ་འཛུགས་སྐྲུན་གྱི་གཞི་རྩ་ཡིན་པར་བཤད་འདུག ཁོ་པས་ཉེ་ཆར་རྒྱ་དཀར་ནག་གཉིས་ཀྱི་གནད་དོན་སོགས་དང་འབྲེལ་ནས་རྒྱ་གར་དང་བོད་ཀྱི་ས་མཚམས་ས་ཁུལ་ཁག་ཏུ་ཕྱིན་ཏེ་འཛུགས་སྐུན་གྱི་ལས་གཞི་གང་དག་སྤེལ་དགོས་པ་དང་མཐའ་མཚམས་ས་ཁུལ་གྱི་དབུལ་ཕོངས་མི་སེར་རྣམས་ཀྱི་དགོས་མཁོ་གང་ཡིན་སོགས་གནད་དོན་རྒྱུས་ལོན་བྱས་པ་མ་ཟད། རྒྱ་ནག་གཞུང་ནས་བོད་ཀྱི་ས་ཁུལ་དེ་དག་གི་བདེ་འཇགས་ཡོངས་ཐབས་སུ་མི་མང་དང་མཉམ་དུ་ལས་ཀ་བྱེད་ཀྱི་ཡིན་ཞེས་སོགས་བཤད་འདུགགཞི་རྩའི་ད་རེས་རྒྱ་ནག་གི་ཕྱི་སྲིད་བློན་ཆེན་བོད་དུ་བསྐྱོད་པ་དེ་ནི་ལོ་ལྔའི་ནང་ཐེངས་དང་པོ་དེ་ཆགས་ཀྱི་ཡོད་པ་མ་ཟད་ཉེ་ལམ་བོད་དང་རྒྱ་གར་གྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་བྱུང་བའི་རྗེས་སུ་རྒྱ་ནག་གི་ཆེས་མཐོའི་འགོ་ཁྲིད་ས་མཚམས་ཁུལ་དུ་སྐྱོད་མཁན་ཆེས་ཐོག་མ་དེ་ཆགས་ཀྱི་ཡོད་པ་རེད། ཕྱི་སྲིད་བློན་ཆེན་ Wang Yi ནི་རྒྱ་གར་དང་རྒྱ་ནག་དབར་གྱི་ས་འབྲེལ་གནད་དོན་སྐོར་གྲོས་མོལ་བྱེད་སྐབས་རྒྱ་ནག་གི་ངོ་ཚབ་གཙོ་བོ་དེ་ཆགས་ཀྱི་ཡོད་སྟབས། དཔྱད་ཞིབ་པ་ཁག་ནས་ཐེངས་འདིའི་ Wang Yi བོད་དང་ས་མཚམས་ས་ཁུལ་ཁག་ཏུ་སྐྱོད་པ་དེ་གཙོ་བོ་ས་མཚམས་ཀྱི་གནད་དོན་དང་འབྲེལ་བ་བཏགས་པ་དང་། རྒྱ་ནག་གི་ Nanjing གཙུག་ལག་སློབ་གཉེར་ཁང་གི་ཆབ་སྲིད་ཚན་པ་ Gu Su ཟེར་པ་དེས་གནད་དོན་གལ་ཆེ་ཞིག་ཡིན་པ་མ་ཏོགས་དུས་རྒྱུན་ནས་རྒྱ་ནག་གི་ཕྱི་སྲིད་བློན་ཆེན་བོད་དུ་སྐྱོད་རྒྱུ་དཀོན་པོ་ཡིན་པར་འགྲེལ་བརྗོད་དང་སྦྲགས། ཁོ་པ་བོད་དུ་སྐྱོད་པ་དེས་རྒྱ་ནག་རྒྱལ་ནང་དང་རྒྱལ་སྤྱིའི་ཐོག་རྩོད་གཞི་ཅན་གྱི་ས་མཚམས་ས་ཁུལ་དེ་དག་གི་བདག་དབང་རྒྱ་ནག་རྒྱལ་ཁབ་ལ་ཡོད་པའི་བརྡ་ལན་སྤྲད་པ་རེད་ཅེས་བརྗོད་འདུགརྒྱ་གར་གྱི་གནད་དོན་ཐོག་མཁས་པ་ Wang Dehua ཟེར་བས་རྒྱ་དཀར་གཉིས་ཀྱི་གདོང་ཐུག་གནད་དོན་ཁྲོད་སྲིད་བློན་མོ་དཱི་མཆོག་གིས་དབུ་ཁྲིད་པའི་རྒྱ་གར་སྲིད་གཞུང་ནས་རྒྱ་ནག་གི་གཉེན་ཆས་བཀག་སྡོམ་དང་ཚོང་གི་གྲོས་མཐུན་ཕྱིན་འཐེན་གནང་སྟེ་ཡར་ལན་གནང་ཡོད་སྟབས། བློན་ཆེན་ Wang Yi བོད་དང་རྒྱ་གར་གྱི་ས་མཚམས་ཁག་ཏུ་ལྟ་ཞིབ་ཙམ་མིན་པར་དགོས་མཁོ་བྱུང་ན་དམག་གི་ཐབས་བྱུས་ཁག་ཀྱང་གྲ་སྒྲིག་ཐུབ་ཐབས་སོགས་ལ་ཆེད་དམིགས་ཀྱིས་བསྐྱོད་པ་ཞིག་རེད་ཅེས་དཔྱད་བརྗོད་གནང་འདུག

ཁ་སང་UNPO ཞེས་པའི་རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པའི་སྐབས་བཅོ་ལྔ་བའི་ཚོགས་ཆེན་གྱི་ཐོག་ཏུ། ཚོགས་པ་དེ་ཐོག་མར་གསར་འཛུགས་གནང་མཁན་གྱི་སྤྱི་ཁྱབ་དྲུང་ཆེ། སྐུ་ཞབས་ Michael van Walt van Praag ལགས་སུ་ Netherlands རྒྱལ་ཁབ་ཀྱི་ཆེ་མཐོང་གི་གཟེངས་རྟགས་ཕུལ་བར་འཚམས་འདྲི་གནང་བ་དང་འབྲེལ་ནས། རྒྱལ་སྤྱིའི་ཚོགས་སྡེ་རྣམས་ཀྱིས་བོད་ནང་དུ་རྒྱལ་སྤྱིའི་ཁྲིམས་སྒྲིག་ལག་བསྟར་ཚད་ལྡན་ཡོང་བར་སྐུལ་འདེད་བྱེད་དགོས་བའི་འབོད་སྐུལ་གྱི་གྲོས་ཆོད་ཅིག་བཞག་འདུག སྐབས་དེར། བོད་དོན་དང་ Nigeria ཁུལ་གྱི་ Ogoniland མི་མང་གི་དོན་དུ་རླབས་ཆེན་གྱི་ཕྱག་ལས་གནང་མཁན་གྱི་ UNPO དབུ་ཁྲིད་ཟུར་བ་རྣམས་ཀྱི་བྱས་རྗེས་དྲན་གསོ་བྱེད་ཆེད་དུ་གྲོས་འཆར་ཞིག་བཏོན་པ་དང་སྦྲགས། UNPO ཚོགས་པ་དེ་ཐོག་མར་གསར་འཛུགས་གནང་མཁན་གྱི་ཁོངས་སུ་ཡོད་པའི་༸གོང་ས་མཆོག་གི་དམིགས་བསལ་གྱི་སྐུ་ཚབ་ཞིང་གཤེགས་དམ་པ་རྒྱ་རི་བློ་གྲོས་རྒྱལ་མཚན་མཆོག་དང་ཚོགས་པ་དེའི་ཚོགས་མི་ངག་དབང་ཆོས་འཕེལ་རྣམས་གཉིས་སྔ་རྗེས་སུ་སྐུ་གཤེགས་པར་དྲན་གསོ་མཛད་པ་དང་འབྲེལ་ནས་རྒྱ་རི་བློ་གྲོས་རྒྱལ་མཚན་ལགས་ཀྱིས་བོད་མིའི་འཚེ་མེད་ཞི་བ་དང་ཆེ་མཐོང་། དེ་བཞིན་རང་ཐག་རང་གཅོད་སོགས་ཀྱི་ཐད་ལ་རླབས་ཆེན་གྱི་བྱས་རྗེས་བཞག་ཡོད་པར་ཡི་རངས་བསྔགས་བརྗོད་མཛད་འདུག དེ་བཞིན་ཚོགས་ཆེན་གྱི་ཐོག   རྒྱ་ནག་དམར་ཤོག་སྲིད་གཞུང་གིས་བོད་མི་མང་གི་རང་ཐག་རང་གཅོད་ཀྱི་གཞི་རྩའི་ཐོབ་ཐང་ལ་བརྩི་བཀུར་བྱེད་དགོས་བ་མ་ཟད།  རྒྱ་ནག་གིས་བོད་མི་རྣམས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་རྒྱུ་མཚམས་འཇོག་དགོས་བའི་ཞུ་སྐུལ་གནང་བ་དང་འབྲེལ་ནས། Nigeria སྲིད་གཞུང་གིས་ Ogoni མི་རིགས་ས་ཁུལ་དུ་རང་བྱུང་ཁོར་ཡུག་ལ་གཏོར་བཅོམ་གཏོང་བཞིན་ཡོད་པར་སྐྱོན་བརྗོད་གནང་སྟེ།  མཉམ་འབྲེལ་རྒྱལ་ཚོགས་ཀྱིས་ Ogoni མི་རིགས་ཀྱི་ཁོར་ཡུག་དང་འབྲེལ་བའི་སྙན་ཐོ་ཞིག་ཆེད་འདོན་གནང་བའི་འབྲུ་དོན་རྣམས་ལག་བསྟར་དོན་འཁྱོལ་དགོས་བའི་འབོད་སྐུལ་གནང་འདུག གཞན་ཡང་ཚོགས་ཆེན་གྱི་ཐོག་ཏུ།  རྒྱལ་སྤྱིའི་སྤྱི་ཚོགས་ཀྱིས་བོད་དང་ Ogoniland ས་ཁུལ་གཉིས་སུ་རྒྱལ་སྤྱིའི་ཚད་གཞི་ལྡན་པའི་ཁྲིམས་སྒྲིག་ཁག་ལག་བསྟར་ཡོང་པར་རྒྱབ་སྐྱོར་གྱི་ཞུ་སྐུལ་དང་འབྲེལ་ནས། ཨ་རི་དང་ཡོ་རོབ་རྒྱལ་ཁབ་ཀྱི་སྲིད་གཞུང་གཉིས་ཀྱིས་ཁུལ་དེའི་མི་སེར་རྣམས་ཀྱིས་བོད་མིའི་ཐོབ་ཐང་རྡོག་རོལ་ལས་བྱུང་བའི་ཁེ་དབང་ལོངས་སུ་སྤྱོད་བཞིན་པ་རྣམས་ཕྱི་གསལ་གནང་གསལ་བཟོ་དགོས་བའི་ཞུ་སྐུལ་གནང་སྟེ། UNPO ཚོགས་པ་དེ་སྔར་བཞིན་བོད་དང་Ogoni མི་མང་གི་བདེ་དོན་ལ་ལྟ་རྟོག་བྱེད་རྒྱུ་ཡིན་པར་བསྒྲགས་འདུག རྩ་བའི་UNPO ཚོགས་པ་འདི་ནི་སྤྱི་ལོ་༡༩༩༡ ལོར་ Netherlands ཁུལ་དུ་གསར་འཛུགས་བྱས་པའི་རྒྱལ་མཚམས་རིས་མེད་ཀྱི་ཚོགས་པ་ཞིག་ཡིན་ཞིང་། ཚོགས་པ་འདིའི་དམིགས་ཡུལ་གཙོ་བོ་ནི་བཙན་འཛུལ་གྱི་འོག་ཏུ་དཀའ་སྡུག་མྱོང་བཞིན་པའི་མི་སེར་རྣམས་ཀྱི་འགྲོ་བ་མིའི་ཐོབ་ཐང་ལ་སྲུང་སྐྱོབ་དང་། རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་བྱས་པ་བརྒྱུད་ནས་བཙན་རྒྱལ་གྱི་སྟོབས་ཤུགས་ལ་འཐབ་འཛིན་བྱས་ཏེ་མི་སེར་དཀྱུས་མ་རྣམས་ཀྱི་ཐོབ་ཐང་དང་ཁེ་དབང་སྲུང་སྐྱོབ་བྱེད་རྒྱུའི་ཚོགས་པ་ཞིག་ཆགས་ཡོད་པ་རེད།་

དེ་རིང་བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་ལ་གནས་ཚུལ་འབྱོར་བ་ལྟར་ན། ད་ཆ་རྒྱ་ནག་གིས་ལྷ་སའི་ཇོ་ཁང་གི་ནང་དུ་རྒྱ་རིགས་ཡུལ་སྐོར་སྤྲོ་འཆམ་པ་མང་པོ་གཏོང་གི་ཡོད་ནའང་། དམར་ཤོག་གཞུང་གི་བོད་མི་ལས་བྱེད་དང་བོད་པའི་སློབ་མ་སོགས་ཇོ་ཁང་གི་ནང་དུ་མཆོད་མཇལ་ལ་འགྲོ་རྒྱུར་བཀག་སྡོམ་བྱས་ཡོད་ལུགས་འཁོད་འདུག ལྷ་སར་གནས་སྡོད་བྱེད་མཁན་གྱི་བོད་མི་ཞིག་གིས་བོད་དོན་ལྟེ་གནས་ཁང་ལ་འགྲེལ་བརྗོད་གནང་པའི་ནང་དུ། རྒྱ་ནག་གི་དབང་འོག་ཏུ། བོད་མིའི་རིག་གཞུང་ནི་རྒྱ་ནག་གི་ཡུལ་སྐོར་སྤྲོ་འཆམ་པ་དག་ལ་སྟོན་རྒྱུའི་དངོས་ཟོག་ལྟ་བུ་ཞིག་ལས། རྒྱ་ནག་གིས་བོད་མི་རྣམས་ཀྱིས་རང་གི་ཆོས་དང་རིག་གཞུང་ལ་བདག་གཅེས་བྱེད་རྒྱུར་གོ་སྐབས་སྤྲོད་ཀྱི་མེད་པར་འཁོད་འདུག དེ་བཞིན། རྒྱ་ནག་གི་གསར་ཁང་ཁག་གིས་གནས་ཚུལ་སྤེལ་བའི་ནང་དུ། འདི་ལོའི་ལོ་ཕྱེད་ཅིག་གི་ནང་དུ། ཏོག་དབྱིབས་རིམས་ནད་ཁྱབ་བརྡལ་བྱུང་བའི་རྗེས་སུ་ལྷ་ས་ནི་རྒྱ་ནག་གི་ཡུལ་སྐོར་སྤྲོ་འཆམ་པ་འགྲོ་སའི་ས་ཁུལ་ལྟེ་བ་ལྟ་བུ་ཞིག་ཏུ་གྱུར་ཡོད་པར་འཁོད་པ་ལྟར། འདི་ལོའི་ནང་དུ་རྒྱ་རིགས་ཡུལ་སྐོར་སྤྲོ་འཆམ་པ་ས་ཡ་༨།༣ ལྷག་ལྷ་སར་ཕྱིན་ཡོད་པ་འཁོད་ཡོད་པ་དང་། སྔར་ལོ་དང་བསྡུར་ན། འདི་ལོའི་ཟླ་བ་དྲུག་པའི་བར་དུ། བོད་ཁུལ་དུ་སྔར་ལོ་ནས་རྒྱ་ནག་གི་ཡུལ་སྐོར་སྤྲོ་འཆམ་པ་བརྒྱ་ཆ་ ༣༦ ལྷག་མང་དུ་ཕྱིན་ཡོད་པ་ཡང་མངོན་གསལ་གནང་འདུག དེ་བཞིན་ལྷ་སའི་ཁུལ་གྱི་འབྲེལ་ཡོད་ཀྱིས་གསལ་བཤད་གནང་བ་ལྟར་ན། གཞི་རྩའི་རྒྱ་ནག་གི་ཡུལ་སྐོར་སྤྲོ་འཆམ་པ་ལྷ་སར་སླེབས་པ་དེས་ས་གནས་ཀྱི་དཔལ་འབྱོར་འཕེལ་རྒྱས་ལ་ཕན་ཐོག་འབྱུང་གི་ཡོད་ནའང་། ཡུལ་སྐོར་སྤྲོ་འཆམ་མ་མང་པོས་བོད་ཀྱི་དགོན་གྲོང་གི་རིག་གནས་དང་ཡུལ་སྲོལ་གོམས་གཤིས་ལ་སྣང་མེད་རྡོག་རོལ་ཐེབས་ཀྱི་ཡོད་པ་ལུང་འདྲེན་གྱིས། རྒྱ་རིགས་ཡུལ་སྐོར་སྤྲོ་འཆམ་པ་རྣམས་ཀྱིས་དགོན་པའི་ནང་དུ་གད་སྙིགས་གཡུགས་པ་དང་ཐ་མག་འཐེན་པ་སོགས་ཀྱི་སྣང་ཚུལ་གང་མང་འབྱུང་གི་ཡོད་པ་ཡང་འགྲེལ་བརྗོད་གནང་འདུག བོད་དོན་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས་ཀྱིས་རྒྱ་ནག་གིས་དུས་རྒྱུན་ནས་གྲངས་ཉུང་མི་རིགས་ཀྱི་ཆོས་དང་རིག་གཞུང་རྩ་གཏོར་གཏོང་ཐབས་སུ་ས་ཁུ་སོ་སོར་རྒྱ་ནག་གི་ཡུལ་སྐོར་སྤྲོ་འཆམ་པ་མང་པོ་ཆེད་གཏོང་བྱས་ཏེ་མི་སེར་སྤེལ་ཡུལ་གྱི་ལམ་ལུགས་རྒྱུན་འཁྱོངས་བྱེད་བཞིན་ཡོད་་པར་ངོ་སྤྲོད་གནང་སོང་། གཞི་རྩའི་རྒྱ་ནག་གིས་གྲངས་ཆུང་མི་རིགས་ཀྱི་ཆོས་དང་རིག་གཞུང་ལ་བརྩི་སྲུང་བྱེད་དགོས་བའི་ཁྱབ་བསྒྲགས་མང་པོ་བྱེད་བཞིན་ཡོད་ནའང་། དོན་དུ་བོད་ཁུལ་གྱི་དགོན་པ་གྲྭ་ཚང་ཁག་ཏུ་རྒྱ་གཞུང་གིས་གཏན་འབེབས་བྱས་པའི་བསླབ་གཞི་ཁག་ངོ་སྤྲོད་བྱེད་ཀྱི་ཡོད་པ་དང་། དེ་བཞིན་སློབ་མ་རྣམས་ཀྱང་རང་གི་སྐད་ཡིག་ཆེད་སྦྱོང་གི་ཕྱིར་རུ་དགོན་པ་གྲྭ་ཚང་དུ་ཟུར་སྦྱོང་ལ་འགྲོ་མི་ཆོག་པའི་བཀའ་རྒྱ་བཏང་ཐེངས་མང་བཏང་ཡོད་པ་མ་ཟད།། འདི་ལོ་ནས་མགོ་ལོག་ཁུལ་དང་མཚོ་སྔོན་པོའི་གཡས་གཡོན། དེ་བཞིན་བྲག་དཀར་རྫོང་སོགས་སུ་ཁོར་ཡུག་འབག་བཙོག་གི་གནད་དོན་དང་བསྙལ་ནས་གཞུང་ལམ་ཉེ་འཁྲིས་ཀྱི་མ་ཎི་རྡོ་བརྐོས་དང་དར་ལྕོགས་སོགས་ཡོངས་སུ་གཙང་ཕྱག་བྱེད་དུ་བཅུག་ཡོད་པའི་གནས་ཚུལ་ཡང་མང་པོ་ཐོན་ཡོད་པ་རེད།

ཨ་རི་སྲིད་གཞུང་ནས་ཧོང་ཀོང་གི་སྤྱི་ཁྱབ་ཀེ་རི་ལེམ་གཙོས་རྒྱ་གཞུང་དང་ལྟ་སྤྱོད་མཐུན་མཁན་གྱི་འགོ་ཁྲིད་ ༡༠ ལ་སྲིད་དོན་གྱི་ཉེས་ཆད་འགེལ་རྒྱུ་དང་སྦྲགས། འགོ་ཁྲིད་དེ་དག་ནས་དམར་ཤོག་ཚོགས་པའི་འགོ་ཁྲིད་དང་མཉམ་མཐུན་གྱིས་ཧོང་ཀོང་རང་སྐྱོང་གི་གནས་བབས་རྡོག་རོལ་ཐད་ངན་འབྲེལ་བྱས་པར་སྐྱོན་བརྗོད་གནང་འདུག གནད་དོན་འདིའི་ཐད་ཉེ་ལམ་ཨ་རིའི་ནོར་སྲིད་སྤྱི་ཁྱབ་ལས་ཁུངས་ཀྱི་སྤྱི་བསྒྲགས་ཤིག་སྤེལ་འདུག་པ་དང་སྤྱི་བསྒྲགས་དེའི་ནང་སྤྱི་ཁྱབ་ཀེ་རི་ལེམ་གཙོས་འགོ་ཁྲིད་ ༡༠ པོ་དེ་དག་ནས་ཧོང་ཀོང་མང་ཚོགས་ཀྱི་བསམ་བརྗོད་རང་དབང་དང་འདུ་འཛོམས། མང་གཙོའི་བརྒྱུད་རིམ་ལ་ཆེད་མངགས་དོ་ཕོག་གཏོང་རྒྱུའི་དམིགས་འབེན་བཟུང་ནས་དེ་འབྲེལ་གྱི་སྲིད་བྱུས་ལག་བསྟར་བྱས་ཏེ་ཧོང་ཀོང་རང་སྐྱོང་གི་གནས་བབས་རྡོག་རོལ་བཏང་ཡོད་པ་གསུངས་འདུག ལྷག་དོན་ཉེ་ལམ་ཧོང་ཀོང་བདེ་འཇགས་ཀྱི་ཁྲིམས་གཞི་གསར་པ་དེས་ཧོང་ཀོང་རང་སྐྱོང་གི་གནས་བབས་ལ་སྣང་ཆུང་ཙམ་མིན་པར་དེ་གའི་མང་ཚོགས་ཀྱི་ཐོབ་ཐང་ལའང་བརྩི་མེད་བཏང་ཡོད་པ་གསུངས་འདུག སྲིད་དོན་གྱི་ཉེས་འཆད་འགེལ་རྒྱུའི་མིང་ཐོའི་ཁོངས་ཧོང་ཀོང་གི་ལས་འགུལ་བ་གང་བྱུང་འཛིན་བཟུང་བཀག་ཉར་བྱེད་མཁན་གྱི་ཧོང་ཀོང་ཉེན་རྟོག་གི་སྤྱི་ཁྱབ་ Chris Tang དང་ཧོང་ཀོང་བདེ་འཇགས་ཀྱི་སྤྱི་ཁྱབ་དྲུང་ཆེ་ John Lee Ka-chiu དེ་བཞིན་ཧོང་ཀོང་དུ་ཡོད་པའི་རྒྱ་ནག་གི་ངོ་ཚབ་ Luo Huining སོགས་ཡོད་པ་དང་། ད་ལན་ཨ་རིས་ཐག་གཅོད་གནང་བ་དེ་བརྒྱུད་ཨ་རིའི་ཁྲིམས་ལུགས་ཀྱི་དབང་ཚད་འོག་ཡོད་པའི་ཧོང་ཀོང་གི་འགོ་ཁྲིད་དེ་དག་གི་རྒྱུ་ནོར་ལོངས་སུ་སྤྱོད་རྒྱུར་བཀག་འགོག་གནང་རྒྱུ་རེད་འདུག ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ཀྱང་རྒྱ་གཞུང་ནས་ཧོང་ཀོང་བདེ་འཇགས་ཀྱི་ཁྲིམས་གཞི་གསར་པ་གཏན་འབེབས་བྱས་པ་བརྒྱུད་ཧོང་ཀོང་མང་ཚོགས་ནས་བསྐྱར་དུ་ཚད་མཐོའི་རང་སྐྱོང་གི་གནས་བབས་སྤྱོད་རྒྱུ་མིན་པ་ཁ་གསལ་བྱས་ཡོད་པར་གསུངས་འདུག སྲིད་འཛིན་ཊམ་མཆོག་གིས་ཨ་རིའི་ངོས་ནས་ཧོང་ཀོང་དེ་རྒྱལ་ཁབ་གཅིག་དང་ལམ་ལུགས་གཅིག་ཏུ་ངོས་འཛིན་གནང་རྒྱུ་དང་། ལྷག་པར་དུ་ཧོང་ཀོང་མང་ཚོགས་ཀྱི་རང་དབང་དོ་ཕོག་གཏོང་མཁན་མི་སྒེར་སུ་འདྲ་ཞིག་ཡིན་རུང་དེ་དག་ལ་ཆབ་སྲིད་སྒོ་ནས་ཡ་ལན་གང་གནང་དགོས་ཀྱང་དེ་ལྟར་གནང་ངེས་ཡིན་ཞེས་གསུངས་ཡོད་པ་རེད། ཨ་རིའི་བྱེད་ཕྱོགས་དེར་ཧོང་ཀོང་གཞུང་གིས་ཨ་རི་ནས་ཧོང་ཀོང་གི་མིང་སྤྱོད་དེ་རྒྱ་ནག་ནང་མོལ་གྱི་གནད་དོན་ལ་ཐེ་བྱུས་བྱེད་ཀྱི་ཡོད་པར་བརྗོད་འདུག དེ་བཞིན་ཀེ་རི་ལེམ་གྱི་མགྲིན་ཚབ་པས་བྱེད་ཕྱོགས་དེས་སྤྱི་ཁྱབ་ཁོང་ལ་ཞེད་སྣང་གང་ཡང་མེད་པ་དང་། ང་ཚོས་ཧོང་ཀོང་བདེ་འཇགས་ཀྱི་ཁྲིམས་གསར་པ་དེ་བརྒྱུད་ཧོང་ཀོང་མང་ཚོགས་ས་ཡ་བདུན་དང་ཕྱེད་ཀའི་ཚེ་སྲོག་དང་བདེ་འཇགས་ཁོ་ན་མིན་པར་རྒྱ་ནག་སྐམ་ས་ཆེན་པོའི་མི་ཐེར་འབུམ་གཅིག་ལྷག་གི་བདེ་འཇགས་སྲུང་སྐྱོབ་བྱེད་ཀྱི་ཡོད་ཅེས་བརྗོད་ཡོད།   དེ་རིང་རྒྱ་ནག་གི་ཕྱི་སྲིད་ལས་ཁང་ནས་ད་དུང་ཨ་རིས་ཧོང་ཀོང་ནང་མོལ་གྱི་གནད་དོན་ལ་ཐེ་བྱུས་བྱེད་ཀྱི་འདུག་ཅེས་སྐྱོན་བརྗོད་དང་སྦྲགས་རྒྱ་གཞུང་ནས་དེར་འཁོན་ལན་བྱེད་རྒྱུ་ཡིན་པའི་ཉེན་བརྡ་བཏང་འདུག

ཁ་སང་ཨ་རིར་རྟེན་གཞི་བྱས་པའི་རྒྱ་གར་བ་མང་པོ་ཞིག་གིས་ཨ་རིའི་རྒྱལ་ས་ཝ་ཞིན་ཁྲོན་གྱི་ཁུལ་དུ་འདུ་འཛོམས་ཀྱིས་རྒྱ་ནག་གིས་རིམས་ནད་ཁྱབ་ཁྱབ་བརྡལ་གྱི་གོ་དུས་སྐབས་འདིར་རྒྱ་གར་གཙོ་བྱས་པའི་ཁྱིམ་མཚེས་རྒྱལ་ཁབ་མང་པོ་ཞིག་གི་ས་མཚམས་སུ་བཙན་འཛུལ་བྱེད་ཀྱི་ཡོད་པ་ཡོངས་གྲགས་གནང་བ་དང་སྦྲགས། ཤིན་ཅང་ཁུལ་དུ་མི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པའི་འཕྲེད་དར་འཕྱར་་བ་དང་སྦྱར་ཡིག་བཀྲམས་ནས་ངོ་རྒོལ་སྐད་འབོད་གནང་བ་མ་ཟད། རྒྱ་གར་གྱིས་རྒྱ་ནག་གི་དངོས་ཟོག་ཉོ་ཚོང་བྱེད་རྒྱུ་མཚམས་འཇོག་དགོས་པའི་ལས་འགུལ་སྤེལ་ཡོད་པ་ལྟར་ཨ་རིའི་ངོས་ནས་ཀྱང་རྒྱ་ནག་གི་དངོས་ཟོག་ཉོ་ཚོང་མཚམས་འཇོག་རྒྱུའི་རེ་ཞུ་གནང་འདུག དེ་རིང་རྒྱ་གར་གྱི་གསར་ཁང་ཁག་ཏུ་གནས་ཚུལ་སྤེལ་བ་ལྟར་ན། ཁ་སང་ཨ་རིར་གནས་སྡོད་ཀྱི་རྒྱ་གར་བ་རྣམས་ཀྱིས་རྒྱ་ནག་ལ་ངོ་རྒོལ་སྐད་འབོད་གནང་ཡོད་དང་། སྐབས་དེར། རྒྱ་གར་གྱི་ད་ལྟའི་གཞུང་འཛིན་ཚོགས་པ་ BJP ཕྱི་ཕྱོགས་ཀྱི་གྲོགས་པོ། སྐུ་ཞབས་ Adapa Prasad ལགས་ཀྱིས། ད་ལོའི་དབྱར་དུས་འདིར་འཛམ་གླིང་ཧྲིལ་བོས་རྒྱ་ནད་ཏོག་དབྱིབས་རིམས་ནད་ལ་ཁ་གཏད་གཅོག་བཞིན་པའི་ཁྲོད་དུ་རྒྱ་ནག་གིས་རྒྱ་གར་གྱི་ས་མཚམས་ཙམ་མ་ཡིན་པར་ཁྱིམ་མཚེས་རྒྱལ་ཁབ་མང་པོའི་ས་མཚམས་སུ་བཙན་འཛུལ་བྱེད་ཐབས་བྱས་ཡོད་པ་ཡོངས་གྲགས་ཀྱིས་ད་ཆ་འཛམ་གླིང་གི་རྒྱལ་ཁབ་ཡོངས་རྫོགས་གཅིག་གྱུར་གྱིས་མཉམ་འབྲེལ་གྱི་ཐོག་ནས་རྒྱ་ནག་ལ་འཐབ་འཛིང་བྱེད་དགོས་བའི་དུས་ལ་བབ་ཡོད་པའི་གསུངས་བཤད་གནང་འདུག གཞན་ཡང་རྒྱ་གར་བ་སྐུ་ཞབས། Puneet Ahluwalia ལགས་ཀྱིས་ཀྱང་། རྒྱ་ནག་གིས་ཡུ་གུར་བ་དང་ཧོང་ཀོང་མི་མང་གི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་གི་ཡོད་པ་ལུང་འདྲེན་གནང་སྟེ་ཨ་རིའི་སྲིད་འཛིན་ཁྲི་རན་ཕི་ལགས་ཀྱིས་རྒྱ་ནག་གི་འབྲེལ་ལམ་ལ་དོ་དོམ་གནང་གི་ཡོད་པ་དེ་ནི་དུས་ལ་བབ་པའི་ཁ་ཕྱོགས་ལེགས་པོ་ཞིག་རེད་ཅེས་གསུངས་པ་དང་སྦྲགས། རྒྱ་ནག་གིས་རྒྱལ་སྤྱིའི་ཁྲིམས་སྒྲིག་ལ་བརྩི་སྲུང་བྱེད་དགོས་པའི་རེ་སྐུལ་ཞུས་འདུག ད་དུང་ཁོང་གིས་རྒྱ་ནག་གིས་ཨ་ཧྥི་རི་ཁ་དང་ཨེ་རཱན་གྱི་ནང་དུ་ལས་ཀ་ཅི་ཞིག་གཉེར་བཞིན་པ་ཤེས་རྟོགས་བྱུང་ཡོད་པ་ལུང་འདྲེན་གནང་བ་ཟད་རྒྱ་ནག་གིས་སྤྱི་ཚོགས་དྲ་རྒྱའི་མཉེན་ཆས་མང་པོ་བརྒྱུད་ནས་ཨ་རིའི་ནང་དུ་གསང་ཉུལ་གྱི་ལས་ཀ་བྱེད་ཀྱི་ཡོད་པ་དང་། དེ་བཞིན་ཡིག་ཚག་དང་གནས་ཚུལ་གཞན་མང་པོ་རྐུ་འཁྱེར་བྱེད་ཀྱི་ཡོད་པ་མངོན་གསལ་གནང་འདུག གཞན་ཡང་སྐབས་དེར་ངོ་རྒོལ་གྱི་ལས་འགུལ་ལ་ཞུགས་མཁན་གྱི་སྐུ་ཞབས། Sunil Singh ལགས་ཀྱིས་རྒྱ་གར་གྱི་སྲིད་བློན་མཱོ་ཌི་མཆོག་གིས་རྒྱ་ནག་གི་དྲ་རྒྱའི་མཉེན་ཆས་མང་པོ་ཞིག་ནག་གསུབ་བཏང་བར་བསྔགས་བརྗོད་གནང་བ་དང་ལྷན་དུ། ད་ཆ་རྒྱ་གར་བ་རྣམས་ཀྱིས་རྒྱ་ནག་གིས་ཐོན་སྐྱེད་བྱས་པའི་དངོས་ཟོག་གཅིག་ཀྱང་ཉོ་རྒྱུ་མིན་པ་ཡོངས་གྲགས་གནང་སྟེ། ད་ཆ་ཨ་རིའི་ངོས་ནས་ཀྱང་རྒྱ་གར་གྱིས་རྒྱ་ནག་དང་འབྲེལ་བའི་གོམ་སྟབས་གསར་བ་ཞིག་སྤོས་ཡོད་པ་དེར་མིག་དཔེ་ལེན་ཐུབ་ན་དགེ་མཚན་ཆེ་བའི་རེ་སྐུལ་གནང་འདུག རྩ་བའི་དེང་སང་རྒྱ་ནག་གིས་ཕྱི་ཕྱོགས་སུ་སྤྱི་ཚོགས་དྲ་ལམ་ནས་གསང་ཉུལ་བྱེད་བཞིན་པའི་གླེང་སློང་མང་པོ་འབྱུང་བཞིན་ཡོད་པར་བརྟེན། ཟླ་བ་སྔོན་མའི་ནང་། རྒྱ་གར་དབུས་གཞུང་གིས་རྒྱལ་ཁབ་ཀྱི་ས་ཁོངས་བདག་དབང་དང་བདེ་འཇགས་གཞི་རྩར་བཟུང་བའི་ཐོག་རྒྱ་གར་ནང་བཀོལ་སྤྱོད་བྱེད་བཞིན་པའི་རྒྱ་ནག་གི་མཉེན་ཆས་ ༥༩ ཙམ་ཞིག་བཀག་སྡོམ་བྱས་ཡོད་པ་མ་ཟད། ད་དུང་རྒྱ་ནག་གི་མཉེན་ཆས་ ༢༥༠ ཙམ་ཞིག་ལ་ཞིབ་འཇུག་བྱེད་བཞིན་པ་ཡིན་སྟབས། རྒྱ་གར་གྱི་བདེ་འཇགས་དང་འབྲེལ་བ་ཡོད་པ་ར་འཕྲོད་བྱུང་ཚེ་མཉེན་ཆས་དེ་དག་ཡོངས་སུ་བཀག་སྡོམ་བྱེད་རྒྱུ་ཡིན་ཚུལ་ཡོངས་གྲགས་གནང་ཡོད་པ་དང་། དེ་བཞིན་གཟའ་འཁོར་སྔོན་མའི་ནང་ཨ་རིའི་ངོས་ནས་ཀྱང་རྒྱ་ནག་གི་སྐད་འཕྲིན་དང་ཀྲིག་ཁྲོ་གཉིས་བཀག་སྡོམ་བྱེད་རྒྱུའི་བཀོད་ཁྱབ་བཏང་ཡོད་པ་རེད།

ཉེ་ཆར་ནིའུ་ཛ་ལན་ཌི་ནང་གི་གསར་ཤོག་ཆེ་གྲས་ཤིག་གིས་ས་གནས་རྒྱ་ནག་གཞུང་ཚབ་ལས་ཁང་གི་དྲིལ་བསྒྲགས་ཁག་ཅིག་སྤེལ་བར་བརྟེན་ས་གནས་ཀྱི་ཡུལ་མི་དང་ལྷག་པར་ཁུལ་དེར་གནས་སྡོད་ཧོང་ཀོང་མང་ཚོགས་རྣམས་ནས་དེ་ནི་རྒྱ་གཞུང་གི་འཁྱོག་བཤད་དྲིལ་བསྒྲགས་དང་རྫུན་གཏམ་ཁོ་ན་ཡིན་པར་སྐྱོན་བརྗོད་གནང་བཞིན་འདུགདེའང་ནིའུ་ཛ་ལན་ཌིའི་ Christchurch ཞེས་པའི་གསར་ཁང་གིས་རྣམ་ཀུན་ནས་དེ་གའི་གསར་ཤོག་ཐོག་ས་གནས་རྒྱ་ནག་གཞུང་ཚབ་ལས་ཁང་གི་དྲིལ་བསྒྲགས་སྤེལ་མུས་ཡིན་པ་དེ་ལྟར་ཡང་། ཉེ་བའི་ཆར་གསར་ཤོག་དེའི་ངོས་ནས་ཧོང་ཀོང་ནང་གི་གནད་དོན་དང་ཏོག་དབྱིབས་གཉན་རིམས་ ༡༩ པ། དེ་བཞིན་ཡུ་གུར་གྱི་ཁ་ཆེའི་གྲངས་ཉུང་མི་རིགས་ཀྱི་རང་དབང་སོགས་དང་འབྲེལ་བའི་དྲིལ་བསྒྲགས་ཁག་ཅིག་སྤེལ་ཡོད་པ་རེད་འདུག RNZ ཞེས་པའི་ས་གནས་ཀྱི་བརྒྱུད་ལམ་ཐོག་གནས་ཚུལ་ཐོན་གསལ་ Christchurch གསར་ཁང་གིས་འདས་པའི་ལོ་གཉིས་དང་ཕྱེད་ཀ་ཙམ་ནས་དེའི་བདུན་རེའི་གསར་ཤོག་ཐོག་ས་གནས་རྒྱ་ནག་གཞུང་ཚབ་ཡན་ལག་ལས་ཁུངས་ཀྱི་དྲིལ་བསྒྲགས་རིགས་སྤེལ་སྲོལ་ཡོད་པ་དང་། གསར་ཁང་གི་ངོས་ནས་ཐེངས་འདིའི་ལས་དོན་གཉེར་བ་དེ་འགྲིག་པར་སྒྲུབ་བྱེད་ལ་སྨྲ་བརྗོད་རང་དབང་ལོངས་སུ་སྤྱོད་སྐོར་བཤད་པ་མ་ཟད། རྒྱ་ནག་གཞུང་ཚབ་ཡན་ལག་ལས་ཁུངས་ནས་ཀྱང་གསར་ཤོག་དེའི་ཐོག་དྲིལ་བསྒྲགས་གང་སྤེལ་བ་དེ་དག་ཡོངས་རྫོགས་བདེན་པ་རང་ཡིན་ཞེས་བཤད་འདུག Christchurch གསར་ཤོག་གཉེར་མཁན་ Star Media ཚོང་ལས་ཁང་ས་གནས་འགན་འཛིན་སྐུ་ཞབས་ Steve McCaughan ལགས་ཀྱིས་གསར་ཤོག་དེའི་ངོས་ནས་ཕྱོགས་ཚང་མར་སྨྲ་བརྗོད་ཀྱི་རང་དབང་སྤྲོད་དགོས་པ་དང་། ཚོང་གཉེར་བ་གང་ཞིག་གིས་དེའི་གསར་ཤོག་ཐོག་ཁྱབ་བསྒྲགས་བྱས་ཡོད་ཀྱང་དེ་ནི་ནིའུ་ཛ་ལན་ཌི་གཞུང་གི་ལམ་སྟོན་ནང་ཚུད་ལྟར་གནང་ཚེ་དེར་ངོས་བཞེས་གནང་གི་ཡོད་སྐོར་བཤད་འདུག རྩ་བའི་ Christchurch གསར་ཤོག་ཐོག་ཐེངས་འདིར་སྤེལ་བའི་གཞུང་ཚབ་ཁང་གི་དྲིལ་བསྒྲགས་ནང་ཤིན་ཅང་ནང་གི་ཡུ་གུར་གྱི་ཁ་ཆེའི་གྲངས་ཉུང་མི་རིགས་ཐོག་དྲག་གནོན་བྱེད་བཞིན་པ་དེ་ནི་འཇིགས་སྐུལ་རིང་ལུགས་པར་ཁ་གཏད་གཅོད་བྱེད་ཡིན་པར་ཆེད་བཀོད་བྱས་པ་དང་། ཧོང་ཀོང་ནང་དུ་ཁྲིམས་གཞི་གསར་པ་བསྡམས་པ་དེས་ཕུགས་རྒྱང་རིང་པོར་ཞི་བདེ་ལྡན་པ་ཞིག་བསྐྲུན་ཕྱིར་ཡིན་པ་སོགས་བཀོད་ཡོད་པ་རེད་འདུགནིའུ་ཛ་ལན་ཌི་ནང་དུ་ཡོད་པའི་ཧོང་ཀོང་ལ་རྒྱབ་སྐྱོར་ཞུ་མཁན་ཚོགས་པ་ཁག་ནས་མངོན་ཐོན་གྱིས་བཀའ་མོལ་གནང་བར་ཞེད་སྣང་གནང་སྟེ་ RNZ གསར་ལས་ཁང་ལ་རྒྱ་གཞུང་གིས་གང་བཤད་པ་དེ་རྣམས་འཁྱོག་བཤད་འབའ་ཞིག་དང་ནིའུ་ཛ་ལན་ཌིའི་ཧོང་ཀོང་མི་མང་ནས་དེ་ལྟར་བཀའ་མོལ་གནང་བར་འཇིགས་ཞུམ་གནང་གི་ཡོད་སྐོར་སོགས་ཀྱང་བཀོད་འདུག ནོར་ཝེ་ Tromso གཙུག་ལག་སློབ་གཉེར་ཁང་གི་ཆབ་སྲིད་ཚན་རིག་པ་དང་རྒྱ་ནག་རིག་པའི་མཁས་དབང་སྐུ་ཞབས་ Marc Lanteigne ལགས་ཀྱིས་ New Zealand གཞུང་གི་ངོས་ནས་རྒྱ་ནག་དང་འབྲེལ་བའི་དྲིལ་བསྒྲགས་རིགས་ལ་དོ་སྣང་བྱེད་དགོས་པ་དང་ཉེ་ཆར་རང་རྒྱ་ནག་གིས་ཧོང་ཀོང་ནང་བདེ་འཇགས་ཀྱི་ཁྲིམས་གཞི་ལག་བསྟར་བྱེད་མུས་དང་འབྲེལ་ནིའུ་ཛ་ལན་ཌི་གཞུང་འཛིན་གྱིས་དེ་སྔ་ཧོང་ཀོང་དང་ལྷན་དུ་བཞག་པའི་ཉེས་ཅན་རྩིས་སྤྲོད་ཀྱི་གྲོས་མཐུན་ཕྱིར་འཐེན་གནང་ཡོད་སྟབས། ད་ལན་འཁྱོག་བཤད་དྲིལ་བསྒྲགས་དེ་ནི་རྒྱ་ནག་གཞུང་གི་ཕྱི་འབྲེལ་སྲིད་བྱུས་དང་འབྲེལ་བའི་གནད་དོན་གལ་འགངས་ཅན་ཞིག་ཡིན་པ་གསུངས་འདུག

ཉེ་ཆར་ཕྱི་ཚེས་ ༣༡ ཉིན་ཨ་རིའི་ Department of the Treasury ཞེས་ནོར་སྲིད་སྤྱི་ཁྱབ་ལྷན་ཁང་ནས་ཡོངས་ཁྱབ་བསྒྲགས་གཏམ་ཞིག་འདོན་སྤེལ་གནང་སྟེ་ཤིན་ཅང་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནད་དོན་དང་འབྲེལ། རྒྱ་ནག་གཞུང་དང་ཐད་ཀར་འབྲེལ་ཡོད་ལྟེ་གནས་ཁང་གཅིག་དང་དེ་འབྲེལ་དཔོན་རིགས་གཉིས་ལ་ཉེས་ཆད་བཀལ་རྒྱུ་ཡིན་པ་གསུངས་འདུགཨ་རི་སྲིད་གཞུང་ནས་དེ་སྔ་ ༢༠༡༦ ལོར་ཡུལ་དེའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་ཁུར་ཐུབ་ཐབས་དང་འབྲེལ་བའི་ཁྲིམས་གཞིའི་དགོངས་དོན་འོག་ཕྱི་ལོ་ ༡༩༥༤ ལོར་རྒྱ་ནག་གིས་ཤིན་ཅང་ནང་དུ་ཚོང་དང་དཔུང་དམག་གི་ལས་དོན་སླད་ཆེད་འཛུགས་བྱས་པའི་ Xinjiang Production and Construction Corps པའི་ལྟེ་གནས་ཁང་དང་ལྟེ་གནས་ཁང་དེའི་དམར་ཤོག་ཚོགས་པའི་དྲུང་ཆེ་ཟུར་པ་ Sun Jinlong དེ་བཞིན་དྲུང་གཞོན་དང་དམག་སྤྱི་གཅིག་ལྕོགས་ Peng Jiarui བཅས་ནས་ཨ་རི་གཞུང་གི་ཆོག་མཆན་མེད་པར་ཨ་རིའི་ཚོང་ལས་སྡེ་ཚན་ཁག་དང་ཚོང་འབྲེལ་རིགས་བྱེད་མི་ཆོག་པ་མ་ཟད་དཔོན་རིགས་དེ་གཉིས་ཨ་རི་ནང་བསྐྱོད་རྒྱུའི་མཐོང་མཆན་བཀག་སྡོམ་བྱེད་རྒྱུ་ཡིན་ཞེས་བཀོད་འདུགགནད་དོན་དེ་དང་འབྲེལ་ཨ་མི་རི་ཀའི་ནོར་སྲིད་སྤྱི་ཁྱབ་ལྷན་ཁང་གི་དྲུང་ཆེ་སྐུ་ཞབས་ Steven Mnuchin ལགས་ནས་ཨ་རིའི་ངོས་ནས་དཔལ་འབྱོར་གྱི་ནུས་ཤུགས་ཡོད་ཚད་བེད་སྤྱོད་བྱས་ནས་ཤིན་ཅང་གཙོས་འཛམ་གླིང་ཁྱོན་ཡོངས་སུ་འགྲོ་བ་མིའི་ཐོབ་ཐང་རྡོག་རོལ་བཏང་མཁན་རྣམས་འགན་ཁུར་ལྡན་པ་ཞིག་བཟོ་རྒྱུའི་ཆོད་སེམས་གཏན་པོ་ཡོད་ཅེས་གསུངས་འདུགགཞི་རྩའི་ཨ་རི་གཞུང་ནས་ད་རེས་ཙམ་མ་ཟད་ཟླ་བ་སྔོན་མའི་འགོ་སྟོད་དུ་ཡུ་གུར་ཁ་ཆེའི་མི་རིགས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་འབྲེལ་དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo དང་། ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ Zhu Hailun དེ་བཞིན་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་ཀྱི་དམར་ཤོག་དྲུང་ཆེ་དང་འགན་འཛིན་གཅིག་ལྕོགས་ Wang Mingshan དང་། ལས་ཁུངས་དེའི་དམར་ཤོག་དྲུང་ཆེ་ཟུར་པ་ Huo Liujun བཅས་བཅས་ལ་དེ་མཚུངས་ཀྱི་ཉེས་ཆད་བཀལ་ཡོད་པ་མ་ཟད་རྒྱ་ནག་སྲིད་གཞུང་དང་འབྲེལ་བ་དམ་ཟབ་ཡོད་པའི་ Nanchang O-Film Tech དང་ Esquel Textile Ltd སོགས་ཤིན་ཅང་ནང་ཡོད་པའི་རྒྱ་ནག་གི་ཚོང་ལས་སྡེ་ཚན་ ༡༡ དངོས་སུ་མིང་འདོན་གནང་སྟེ་ཚོང་ལས་སྡེ་ཚན་དེ་དག་ཨ་རི་ནང་ཡོད་པའི་ཚོང་ལས་སྡེ་ཚན་ཁག་དང་འབྲེལ་བ་བྱེད་མི་ཆོག་པའི་ཉེས་ཆད་བཀལ་ཡོད་པ་རེད།ད་ལྟའི་འགྲོ་བ་མིའི་ཐོབ་ཐང་དང་ཚོང་འབྲེལ། དེ་བཞིན་རྒྱལ་ཁབ་ཀྱི་བདེ་འཇགས་ཀྱི་གནད་དོན་དང་འབྲེལ་ཨ་རི་དང་རྒྱ་དབར་གྱི་འབྲེལ་བ་དེ་ཚོར་བ་རྣོ་བོ་ཞིག་གྱུར་བ་དང་། འདས་པའི་ཉིན་ཤས་གོང་དུ་ཕྱོགས་གཉིས་ཀྱི་དོན་གཅོད་ལས་ཁུངས་ཀྱང་སྒོ་རྒྱབ་རེས་བྱས་པའི་གནས་ཚུལ་ཐོན་ཡོད་པ་རེད། ཁ་སང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་རྒྱ་ནག་གིས་བཟོ་སྐྲུན་བྱས་པའི་མཉེན་ཆས་ཚོས་མང་ཚོགས་ཀྱི་གསང་གནས་རྐུ་ཁྱེར་བྱས་པར་འགྲེལ་བརྗོད་དང་སྦྲགས། སྲིད་འཛིན་སྐུ་ཞབས་ Donald Trump མཆོག་གི་སྣེ་ཁྲིད་ཐོག་རྒྱ་ནག་གི་ TikTok གཙོས་མཉེན་ཆས་མི་ཉུང་བ་ཞིག་བཀག་སྡོམ་དང་འབྲེལ་བའི་ཐག་གཅོད་ཁག་ཅིག་རིམ་པས་གནང་གི་རེད་ཅེས་གསུངས་འདུག

དེ་རིང་སྔ་དྲོ། བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་རྒྱ་གར་ཧི་མ་ཅལ་མངའ་སྡེའི་ BJP ཆབ་སྲིད་ཚོགས་པའི་གཙོ་འཛིན་དུ་འོས་འདེམས་བྱུང་བའི་སྐུ་ཞབས Shri Suresh Kashyap ལགས་སུ། རང་རེའི་བོད་མིའི་སྐབས་བཅུ་དྲུག་གི་གྲོས་ཚོགས་ཀྱི་ཚབ་བྱས་ཏེ་འཚམས་འཕྲིན་གནང་འདུག འཚམས་འཕྲིན་དེའི་ནང་ཚོགས་གཙོ་མཆོག་གིས། རང་རེའི་གྲོས་ཚོགས་ཀྱི་འཐུས་ཚབ་པ་རྣམས་འདི་ལོའི་སྤྱི་ཟླ་གཉིས་བའི་ནང་སྐུ་ཞབས་ཁོང་དང་མཇལ་འཕྲད་གནང་རྒྱུའི་གོ་སྐབས་ཐོབ་ཡོད་པར་ལུང་འདྲེན་དང་སྦྲགས། བོད་ཕྱི་ནང་གཉིས་ཀྱི་བོད་མི་རྣམས་ཀྱི་ཚབ་བྱས་ཏེ་རྒྱ་གར་དབུས་གཞུང་དང་སྒོས་སུ་༸གོང་ས་སྐྱབས་མགོན་ཆེན་པོ་མཆོག་གི་བཞུགས་སྒར་དང་བོད་མིའི་སྒྲིག་འཛུགས་ཀྱི་ལྟེ་གནས་ཆགས་སའི་ཧི་མ་ཅལ་མངའ་སྡེ་གཞུང་གིས་འདས་བའི་ལོ་དྲུག་ཅུའི་རིང་ལ་བོད་དོན་རྒྱབ་སྐྱོར་བླ་མེད་གནང་བར་སྙིང་ཁོང་རུས་པའི་གཏིང་ནས་ཐུགས་རྗེ་ཆེ་ཞེས་བྲིས་གནང་འདུག ཚོགས་གཙོ་མཆོག་གིས་༸གོང་ས་༸སྐྱབས་མགོན་ཆེན་པོ་ཆེ་མཆོག་གི་ཐུགས་དགོངས་ལམ་སྟོན་ལྟར་བོད་མི་རྣམས་ཀྱིས་དབུ་མའི་ལམ་བརྒྱུད་ནས་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་ཏུ་བོད་རྒྱ་གཉིས་ལ་ཁེ་ཕན་ལྡན་པའི་ཚད་མཐོའི་རང་སྐྱོང་གི་གནས་བབ་ཅིག་ལ་རྩོད་ལེན་གནང་གི་ཡོད་པར་ལུང་འདྲེན་གྱིས། བོད་མི་རྣམས་ཀྱིས་༸གོང་ས་མཆོག་གི་སྐུ་ཚབ་དང་རྒྱ་ནག་གི་དཔོན་རིགས་བར་དུ་བོད་རྒྱ་ཞུ་མོལ་ཡོང་རྒྱུར་རེ་བ་གནང་གི་ཡོེད་པར་བརྟེན། རྒྱ་གར་གྱི་ BJP ཆབ་སྲིད་ཚོགས་པའི་ངོས་ནས་མུ་མཐུད་དུ་བོད་དོན་ལ་རྒྱབ་སྐྱོར་གྱིས་བོད་རྒྱ་ཞི་མོལ་མཇུག་སྐྱོང་ཡོང་བར་རྒྱབ་སྐྱོར་གནང་རྒྱུའི་རེ་ཞུ་གནང་འདུག དེ་བཞིན་ཚོགས་གཙོ་མཆོག་གིས། BJP ཆབ་སྲིད་ཚོགས་པས་དེ་སྔ་ནས་བོད་དོན་ལ་རྒྱབ་སྐྱོར་བླ་མེད་གནང་ཡོད་ལུགས་དྲན་སྐུལ་གྱིས། སྐུ་ཞབས་ Shri Suresh Kashyap ལགས་ཀྱི་དབུ་ཁྲིད་འོག་སྔར་ལྟར་བོད་དོན་ལ་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་དང་སྦྲགས། མགོན་པོ་གང་གི་ཐུགས་རེ་ལྟར། བོད་མི་རྣམས་ཀྱིས་རྒྱ་གར་ནང་གི་བོད་རིགས་འདུས་སྡོད་ཀྱི་མངའ་སྡེ་སོ་སོའི་ནང་དུ་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་རེ་འཛུགས་རྒྱུར་ཤུགས་སྣོན་རྒྱག་གི་ཡོད་པར་ལུང་འདྲེན་གྱིས། ཧི་མ་ཅལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་རྒྱུར་རྒྱབ་སྐྱོར་གནང་རྒྱུའི་འབོད་སྐུལ་ཞུས་པ་དང་སྦྲགས། སླད་འབྱུང་འགྱུར་གྱི་ཁྲོད་དུ་སྐུ་ཞབས་ཁོང་གི་དབུ་ཁྲིད་ཀྱི་འོག་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུས་འདུག

ཨི་ཊ་ལི་གྲོས་ཚོགས་འཐུས་མི་སྐུ་ཞབས་ Matteo Lungi Bianchi ལགས་ཀྱིས་ཨི་ཊ་ལི་གཞུང་ནས་རྒྱ་ནག་ཐོག་བཞེངས་ཕྱོགས་ལ་འདྲི་རྩད་དང་སྦྲགས་ཏེ་ཨི་ཊ་ལི་ནས་ཚོང་འབྲེལ་རྒྱལ་ཁབ་རྒྱ་ནག་ལྟ་བུས་དབང་སྒྱུར་འོག་ཡོད་པའི་མི་རིགས་དག་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ནམ་ཡང་བཟོད་བསྲན་གནང་ཐབས་མེད་ཅེས་གསུངས་འདུགཁ་སྔོན་ཚེས་ ༢༠ ཉིན་སྐུ་ཞབས་ Bianchi ལགས་ཀྱིས་གྲོས་ཚོགས་སུ་རྒྱ་གཞུང་གིས་བོད་ནང་དགོན་སྡེ་སོགས་གཏོར་བཅོམ་བཏང་བར་ཐུགས་འཚབ་དང་འབྲེལ་ཉེ་ལམ་རྒྱ་ནག་གཞུང་གིས་གོམས་སྲོལ་རྙིང་པ་བསྒྱུར་བཅོས་ཞེས་པའི་ལས་འགུལ་འོག་རི་སྒང་དུ་མ་ཎི་རྡོ་བརྐོས་དང་དར་ལྕོག་སོགས་གཙང་བཟོ་བྱེད་དགོས་པར་བཙན་བཀའ་བཏང་ཡོད་པ་ལུང་འདྲེན་གྱིས་ཨི་ཊ་ལིས་གནད་དོན་དེའི་ཐོག་ནམ་གླེང་རྒྱུ་དང་རྒྱ་ནག་ལ་འགན་ཁུར་བཟོ་ཐབས་ཤིག་ནམ་གནང་རྒྱུ་ཡིན་ནམ་ཞེས་འདྲི་རྩད་གནང་ཡོད་པ་རེད། དེ་བཞིན་ཁོང་གིས་རྒྱ་གཞུང་གི་དྲག་གནོན་ཅན་གྱི་སྲིད་བྱུས་གླེང་སློང་གནང་བ་དང་སྦྲགས། ཨི་ཊ་ལི་གཞུང་ནས་ཉེ་ལམ་རྒྱ་གཞུང་གིས་ཧོང་ཀོང་བདེ་འཇགས་ཀྱི་ཁྲིམས་གཞི་གསར་པ་གཏན་འབེབས་བྱས་པའི་ཐོག་བཞེངས་ཕྱོགས་ཁ་གསལ་དགོས་པ་དང་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཐད་ཨི་ཊ་ལིས་གང་ཡང་མ་གསུང་པར་ཁུ་སིམ་མེར་བཞུགས་རྒྱུ་དེ་དགོས་ངེས་ལ་གཟིགས་སམ་སམ་ཞེས་སོགས་འདྲི་རྩད་དང་ཆབས་ཅིག་ཏུ་རྒྱ་ནག་གི་བྱ་སྤྱོད་དེ་དག་ལ་ནམ་ཡང་བཟོད་བསྲན་གནང་ཐུབ་ཐབས་མེད་ཅེས་གསུངས་འདུག སྐུ་ཞབས་ཁོང་གིས་ད་དུང་ཨི་ཊ་ལི་རྒྱལ་ཁབ་དེ་བཞིན་ G7 སྟོབས་ཆེན་རྒྱལ་ཁབ་ཀྱི་ཚོགས་མི་ཞིག་ཡིན་པའི་ཆ་ནས་འགྲོ་བ་མིའི་ཐོབ་ཐང་རྡོག་རོལ་བཏང་མཁན་རྒྱ་ནག་ལྟ་བུར་སྐྱོན་བརྗོད་གནང་བ་ཁོ་ནས་མ་འགྲིག་པར་རྒྱ་ནག་ཐོག་བཞེངས་ཕྱོགས་གསལ་པོ་བཟོས་དགོས་པ་དང་ལྷག་པར་དུ་རྒྱ་ནག་ནི་ད་ཆ་འཛམ་གླིང་ཐོག་ཉེན་ཁ་ཅན་ཞིག་ཆགས་ཡོད་སྟབས། ང་ཚོས་ད་ལྟ་ནས་དེར་ཁ་གཏད་མ་གནང་ཚེ་སླད་མར་གནད་དོན་ཚབས་ཆེན་ཆགས་ངེས་ཡིན་པའི་ཉེན་བརྡ་བཏང་འདུག རྩ་བའི་སྐུ་ཞབས་ Bianchi ལགས་ཀྱིས་ད་ལྟ་ཙམ་མ་ཟད་ཟླ་མགོར་གྲོས་ཚོགས་སུ་རྒྱ་གཞུང་ནས་ཁས་ལེན་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལུགས་རྡོག་རོལ་བཏང་བར་སྐྱོན་བརྗོད་གནང་བ་དང་འབྲེལ། རྒྱལ་སྤྱིའི་ཚོགས་སྡེ་ཁག་ནས་རྒྱ་གཞུང་གིས་བོད་མིའི་ཐོག་དྲག་གནོན་བྱེད་བཞིན་པའི་གནད་དོན་དག་ལ་མགོ་སྒུར་ནས་ཁུ་སིམ་མེར་བཞུགས་རྒྱུ་མེད་པ་མ་ཟད་རྒྱ་གཞུང་ནས་དེ་འབྲེལ་བོད་མིའི་ཐོག་སྤེལ་བའི་དྲག་གནོན་གྱི་སྲིད་བྱུས་དག་མཚམས་འཇོག་དགོས་པ་གསུངས་ཡོད།