རྒྱ་ནག

ཁ་སང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་ཉན་ཞིབ་ཀྱི་ཚོགས་འདུ་ཞིག་གི་ཐོག་འཛམ་གླིང་རྒྱལ་ཁབ་ཚང་མས་རང་ཉིད་ཀྱི་ཚད་མཐོའི་གཞུང་འབྲེལ་དཔོན་རིགས་རྣམས་རྒྱ་ནག་ནང་ཆེད་གཏོང་གིས་དམར་ཤོག་སྲིད་གཞུང་ལ་ཆེ་བསྟོད་བྱ་རྒྱུ་མཚམས་འཇོག་དགོས་ཞེས་ནན་བརྗོད་གནང་འདུག ཁ་སང་ཨ་རི་ Tom Lantos འགྲོ་བ་མིའི་ཐོབ་ཐང་ཚོགས་པ་དང་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གཉིས་ཟུང་འབྲེལ་ཐོག་ཉན་ཞིབ་ཀྱི་ཚོགས་འདུ་ཞིག་ཚོགས་འདུག་པ་དང་ཚོགས་འདུ་དེའང་རིམ་པ་གཉིས་སུ་ཆ་བགོས་ཀྱིས་རིམ་པ་དང་པོའི་ཐོག་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་དགོངས་ཚུལ་གཏམ་བཤད་དང་དྲི་བ་དྲིས་ལན་གནང་བ་མ་ཟད། གྲོས་ཚོགས་ཀྱིི་དམངས་གཙོ་དོན་གཉེར་ཅན་གྱི་འཐུས་མི་ཁག་ཅིག་དང་ལྷག་དོན་མགྲོན་འབོད་གནང་བའི་མང་གཙོ་དང་འགྲོ་བ་མིའི་ཐོབ་ཐང་གི་ཚོགས་སྡེ་དང་བེུད་ཀྱི་ཐོབ་ཐང་དོན་གཉེར་བའི་ཚོགས་སྡེ་བཅས་ཀྱི་མི་སྣ་གྲགས་ཅན་སོགས་ནས་ཉན་ཞིབ་ཀྱི་ཚོགས་འདུ་དེའི་ནང་ཞུགས་ཡོད་པ་རེད་འདུགཚོགས་འདུ་དེ་གཙོ་སྐྱོང་ནི་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ Christ Smith ལགས་དང་མང་གཙོ་ཚོགས་པའི་གྲོས་ཚོགས་འོག་མའི་འཐུས་མི་ Jim Mcgovern ལགས་རྣམ་གཉིས་ཀྱིས་གནང་ཡོད་པ་དང་ཁོང་གཉིས་ཀས་རྒྱ་ནག་གཞུང་གིས་བོད་གཙོས་པའི་གྲངས་ཉུང་མི་རིགས་ཀྱི་ཆོས་དང་རིག་གཞུང་། འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བཏང་ཡོད་པ་ཐེར་འདོན་གནང་འདུག སྐབས་དེར་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Pelosi མཆོག་གིས་རྒྱ་ནག་གིས་འགྲོ་བ་མིའི་ཐོབ་ཐང་གི་གནས་བབ་མཐའ་མ་ཡིན་པ་དང་ད་ཆ་ཨ་རིའི་གཞུང་གིས་ཀྱང་རྒྱ་ནག་གི་མི་མང་ལྡེབ་གསོད་དང་མི་རིགས་རྩ་གཏོར་གཏོང་བཞིན་པའི་ངན་སྤྱོད་སྤེལ་གྱི་ཡོད་པར་ངོས་འཛིན་ཐོབ་ཡོད་པ་མ་ཟད། རྒྱ་ནག་གིས་བོད་དང་ཤིན་ཅང་གཙོ་བོར་གྱུར་པའི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བྱེད་བཞིན་པའི་ངན་སྤྱོད་དེ་སྤེལ་ཤུགས་ཇེ་ཆེར་འགྲོ་མུས་བཅས་ལ་བརྟེན་ནས་དགུན་དུས་ Olympic རྩེད་འགྲན་དེ་པེ་ཅིང་ལ་མགྲོན་བདག་བྱེད་རྒྱུར་ངོ་རྒོལ་བྱེད་ཕྱོགས་ཀྱི་ནང་ལ་རྒྱལ་ཁབ་སོ་སོའི་ཕྱི་འབྲེལ་དཔོན་རིགས་ཚོས་རྩེད་འགྲན་སྐབས་སུ་པེ་ཅིང་ལ་མི་བསྐྱོད་པའི་ཐོག་ནས་ངོ་རྒོལ་བྱེད་དགོས་ཀྱི་ཡོད་པའི་དགོངས་ཚུལ་བཏོན་འདུག དེ་བཞིན་ལྕམ་སྐུ་མཆོག་གིས་ང་ཚོས་ངོས་ནས་རྒྱ་ནག་ནང་འཚོགས་རྒྱུའི་ Olympic རྩེད་འགྲན་དེར་སྐྱོན་ཆ་གང་ཡང་མེད་པར་ངོས་འཛིན་གྱིས་མདུན་བསྐྱོད་གནང་ན་འགྲིག་གི་མེད་པ་དང་ལྷག་པར་དུ་རྒྱ་ནག་གཞུང་གིས་ཡུ་གུར་ཁ་ཆེའི་ཐོག་ལ་དྲང་བདེན་མིན་པའི་ཁྲིམས་གཏུགས་བྱེད་བཞིན་པར་སྐྱོན་བརྗོད་ཀྱིས་གནོན་ཤུགས་འཕར་མ་སྤྲོད་ཆེད་ཨ་རི་དང་འཛམ་གླིང་རྒྱལ་ཁབ་གཞན་ཚོས་རང་རྒྱལ་ཁབ་ཀྱི་ཚད་མཐོའི་སྐུ་ཚབ་རྣམ་པ་རྒྱ་ནག་ནང་ཆེད་གཏོང་བྱ་རྒྱུ་མཚམས་འཇོག་དགོས་པའི་འབོད་སྐུལ་ཞུས་པ་མ་ཟད། རྒྱ་གཞུང་གིས་འདས་པའི་ལོ་བཅུ་ཕྲག་གསུམ་ནང་སྤེལ་བའི་ངན་སྤྱོད་ལ་འགྱུར་བ་ཕྲན་བུ་གཏོང་རྒྱུའི་རེ་བ་མེད་པར་གསལ་བོ་ཆགས་ཡོད་ཅེས་གསུངས་འདུག ད་དུང་ལྕམ་སྐུ་མཆོག་གིས་ཨ་རིའི་ངོས་ནས་རྒྱ་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བཏང་དང་གཏོང་བཞིན་པའི་ཐོག་ལ་ཐེར་འདོན་མ་གནང་བ་ཡིན་ན་ང་ཚོས་འཛམ་གླིང་གི་ས་ཕྱོགས་གང་དུའང་འགྲོ་བ་མིའི་ཐོབ་ཐང་ཐོག་གཏམ་བཤད་བྱེད་རྒྱུར་འོས་བབ་ལྷག་མེད་ཅེས་གསུངས་བ་མ་ཟད། ལྕམ་སྐུ་མཆོག་གི་དགོངས་ཚུལ་དེར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ལྕམ་ Sophie Richardson ལགས་ཀྱིས་ཁོང་ནི་ཨ་རིའི་གྲོས་ཚོགས་འོག་མའི་ཚོགས་གཙོ་ཡིན་ཞིང་རྒྱ་ནག་དང་འགྲོ་བ་མིའི་ཐོབ་ཐང་གི་གནད་དོན་ཐོག་ལོ་བཅུ་ཕྲག་མང་པོའི་རིང་ཕྱག་ལས་གནང་མྱོང་མཁན་ཞིག་ཀྱང་ཡིན་པས་ཁོང་གི་བཀའ་མོལ་འདི་གལ་ཆེན་པོ་ཆགས་ཀྱི་ཡོད་ཅེས་གསུངས་འདུགཉན་ཞིབ་ཀྱི་ཚོགས་འདུ་དེའི་ཐོག་གཞན་ཡང་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ Christ Smith ལགས་ཀྱིས་དགུན་དུས་Olympic རྩེད་འགྲན་གྱི་འཚོགས་ཡུལ་དེ་རྒྱ་ནག་ནང་མ་ཡིན་པར་རྒྱལ་ཁབ་གཞན་ནང་གནང་དགོས་པའི་འདུན་པ་ཡོད་སྟབས་རྩེད་འགྲན་དེར་རོགས་སྐྱོར་གནང་མཁན་དང་འབྲེལ་བ་ཡོད་པའི་ Coca Cola སོགས་པའི་ཨ་རིའི་ཚོང་ལས་ཁག་གི་ངོས་ནས་གནད་དོན་དེའི་ཐོག་བདེན་དཔང་བྱེད་དགོས་པའི་ཞུ་སྐུལ་གནང་བ་མ་ཟད། བྱེད་ལས་དེའི་རྐྱེན་པས་གོང་ཞུས་ཚོང་ལས་ཁག་ལ་དངུལ་གྱི་གྱོང་གུད་བྱུང་སྲིད་ཀྱང་ཁོང་རྣམས་ཀྱི་ངོས་ནས་མི་རིགས་ལྡེབ་གསོད་བྱེད་མཁན་སྲིད་དབང་སྒེར་འཛིན་ལམ་ལུགས་ཤིག་ནས་མ་དངུལ་ལེན་རྒྱུ་དེ་ནི་གནོད་འཚེ་ཅན་གྱི་ཁེ་ཕན་ཞིག་ཡིན་པར་ཟུར་ཟ་བྱས་འདུག རྩ་བའི་ Financila Times ཡིས་ཉེ་དུས་གནད་དོན་དེའི་ཐད་དགུན་དུས་ Olympic རྩེད་འགྲན་ལ་རོགས་སྐྱོར་གནང་མཁན་དང་འབྲེལ་བ་ཡོད་པའི་ཚོང་ལས་སྡེ་ཁག་ ༢༤ ལྷག་ལ་འབྲེལ་བ་གནང་ཐབས་བྱས་ཀྱང་དེ་དག་ཁོངས་ནས་ཕལ་ཆེ་བས་དགོངས་ཚུལ་གསུང་རྒྱུར་ཁས་ལེན་གནང་མེད་པ་མ་ཟད། ཐེངས་འདིའི་ཉན་ཞིབ་ཚོགས་འདུའི་ཐོག་ཚང་མས་གནད་དོན་གཙོ་བོ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བྱེད་བཞིན་པར་བརྟེན་ནས་ཕྱི་ལོ་ ༢༠༢༢ ལོའི་དགུན་དུས་ཨོ་རྩལ་འགྲན་ཚོགས་དེ་རྒྱ་ནག་ནང་འཚོགས་རྒྱུར་དགག་པ་བརྒྱབས་ཏེ་ངོ་རྒོལ་ངེས་པར་དུ་བྱེད་དགོས་པར་ནན་བརྗོད་གནང་འདུག

ཡུ་རོབ་གྲོས་ཚོགས་འཐུས་མི་ཁག་ཅིག་གིས་ཡོ་རོབ་མཐུན་ཚོགས་ཀྱི་ཕྱི་སྲིད་དང་བདེ་སྲུང་བློན་ཆེན་སྐུ་ཞབས Josep Borrell ལགས་ཀྱི་མཚན་ཐོག་ལ་ཟླ་བ་སྔོན་མའི་ནང་དུ་ཡིག་ཐོག་བརྒྱུད་ནས་རྒྱ་ནག་གཞུང་གིས་བོད་ནང་གི་བོད་མི་རྣམས་ལ་མི་སྤྱོད་ལས་འདས་བའི་མནར་གཅོད་གཏོང་བཞིན་པའི་སྐོར་ལ་དྲི་བ་ཁག་ཅིག་ཕུལ་བ་ལྟར། ཁ་སང་སྐུ་ཞབས་ Josep Borrell ལགས་ཀྱིས་དྲི་བ་ཁག་ལ་ལན་འདེབས་ཀྱིས་ཡུ་རོབ་མཐུན་ཚོགས་ཀྱི་ངོས་ནས་རྒྱལ་སྤྱིའི་ས་ཕྱོགས་གང་དུ་སྡུག་སྦྱོང་མནར་གཅོད་ཀྱི་ལས་ཅི་ཞིག་གཉེར་བཞིན་ཡོད་ནའང་དེར་མཐའ་གཅིག་ཏུ་ངོ་རྒོལ་ཡོད་སྐོར་དང་འབྲེལ། ཡུ་རོབ་མཐུན་ཚོགས་ཀྱི་ངོས་ནས་གོ་སྐབས་ནམ་བྱུང་ལ་རྒྱ་ནག་དང་མཉམ་དུ་བོད་ནང་གི་མི་སྤྱོད་ལས་འདས་བའི་གྱོད་དོན་རེ་རེ་གྲོས་མོལ་བྱེད་རྒྱུ་ཡིན་པར་གསུངས་འདུགདེ་ཡང་ཡུ་རོབ་གྲོས་ཚོགས་ཀྱི་འཐུས་མི་ཁག་ཅིག་གིས་ཕུལ་བའི་དྲི་བ་ཁག་གི་ནང་དུ། ཉེ་བའི་རིང་ལ་བོད་ཀྱི་ཆབ་སྲིད་བཙོན་པ་ཨ་མ་ལྷ་མོ་ལགས་དང་གྲྭ་བསྟན་འཛིན་ཉི་མ་ལགས། དེ་བཞིན་ཡུལ་སྐོར་སྣེ་ཤན་པ་དཀོན་མཆོག་སྦྱིན་པ་སོགས་ཀྱི་མཚོན་པའི་ཆབ་སྲིད་བཙོན་པ་མང་པོ་ཞིག་རྒྱ་ནག་གི་བཀག་སྐྱིལ་ཁང་དུ་མི་སྤྱོད་ལས་འདས་བའི་སྡུག་སྦྱོང་མནར་གཅོད་འོག་ཚེ་སྲོག་ཤོར་ཡོད་པ་ལུང་འདྲེན་གྱིས། ཡུ་རོབ་མཐུན་ཚོགས་ཀྱི་ངོས་ནས་ཡོངས་ཁྱབ་རང་བཞིན་གྱི་ཐོག་ནས་རྒྱ་ནག་གིས་བོད་ནང་དུ་མི་སྤྱོད་ལས་འདས་བའི་མནར་གཅོད་གཏོང་བཞིན་པ་དེར་སྐྱོན་བརྗོད་གནང་ཡོད་མེད་དང་། དེ་བཞིན་ཡུ་རོབ་དང་རྒྱ་ནག་གཉིས་ཀྱི་འགྲོ་བ་མིའི་ཐོབ་ཐང་གི་གྲོས་མོལ་སྐབས་སུ་ཡུ་རོབ་མཐུན་ཚོགས་ཀྱི་ངོས་ནས་བོད་གི་འགྲོ་མ་མིའི་ཐོབ་ཐང་རྡོག་རོལ་གྱི་གནས་བབ་དེ་མཚམས་འཇོག་ཡོང་ཐབས་སུ་ཐབས་ལམ་ཅི་ཞིག་སྤྱད་ཡོད་མིན་སོགས་ཀྱི་གནད་དོན་ཁག་ཅིག་འཁོད་འདུག གོང་གི་དོགས་འདྲི་དེ་དག་དང་འབྲེལ་ནས་སྐུ་ཞབས Josep Borrell ལགས་ཀྱིས་ཡུ་རོབ་སྤྱི་མཐུན་ལྷན་ཚོགས་ཀྱི་སྐུ་ཚབ་ཀྱི་ངོ་བོའི་ཐོག་ནས་བཀའ་ལན་གནང་བའི་ནང་དུ། ཡུ་རོབ་མཐུན་ཚོགས་ཀྱིས་གོ་སྐབས་ནམ་བྱུང་ལ་རྒྱལ་སྤྱིའི་ཁྲིམས་སྒྲིག་གཞིར་བཟུང་གིས་རྒྱ་ནག་གཞུང་དང་གཞུང་འབྲེལ་ཡིན་མིན་ཅི་རིགས་ཀྱིས་བོད་མི་རྣམས་ལ་མནར་གཅོད་ཀྱིས་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དེར་དགག་ལན་གནང་གི་ཡོད་པར་འགྲེལ་བརྗོད་གནང་འདུག དེ་བཞིན་ཁོང་གིས། ཡུ་རོབ་མཐུན་ཚོགས་ཀྱི་ངོས་ནས་ཡང་ནས་བསྐྱར་དུ་རྒྱ་ནག་ལ་འབོད་སྐུལ་རིམ་པ་གནང་སྟེ། རྒྱ་ནག་གིས་རྒྱལ་སྤྱིའི་ཁྲིམས་སྒྲིག་ལ་བརྩི་འཇོག་གིས་བོད་དང་ཤིན་ཅང་གི་མཚོན་པའི་གྲངས་ཉུང་མི་རིགས་རྣམས་ཀྱི་འགྲོ་བ་མིའི་ཐོབ་ཐང་ལ་བརྩི་བཀུར་བྱེད་དགོས་བར་ནན་བརྗོད་ཀྱིས། སྔར་ནས་ཀྱང་ཡུ་རོབ་མཐུན་ཚོགས་ཀྱི་དཔོན་རིགས་དང་རྒྱ་ནག་གི་མཐོ་རིམ་དཔོན་རིགས་བར་འབྲེལ་བ་ནམ་བྱུང་ལ་བོད་དོན་གླེང་སློང་བྱས་ཡོད་པར་ལུང་འདྲེན་གནང་འདུག གཞན་ཡང་ཁོང་གིས། བོད་ཀྱི་སྐད་ཡིག་གི་ཐོབ་ཐང་རྩོད་ལེན་པ་ན་གཞོན་བཀྲ་ཤིས་དབང་ཕྱུག་ལགས་རྒྱ་ནག་གིས་ཕྱི་ལོ་ ༢༠༢༡ ལོའི་ཟླ་བ་ ༡ པོའི་ཚེས་ ༢༩ ཉིན་བཙོན་གྲོལ་བཏང་མཚམས་སུ་ཡང་། ཡུ་རོབ་མཐུན་ཚོགས་ཀྱི་ཆེས་མཐོ་དཔོན་རིགས་ཀྱི་མགྲིན་ཚབ་པས་རྒྱ་ནག་ལ་ཞུ་སྐུལ་གྱི་བསྒྲགས་གཏམ་ཞིག་སྤེལ་བའི་ནང་དུ་ཡང་། རྒྱ་ནག་གིས་བཙན་དབང་གི་འོག་ཏུ་བོད་མི་མང་པོ་ཞིག་བཀག་སྐྱིལ་གྱིས་ཁྲིམས་ཐག་བཅད་པ་དང་། དེ་བཞིན་བཙོན་ཁང་ནས་འདས་གྲོངས་སུ་གྱུར་བ། གཞན་ཡང་གར་སོང་ཆ་མེད་དུ་བསྒྱུར་བཞིན་པ་སོགས་ཀྱི་གནད་དོན་མང་པོ་ཞིག་དང་འབྲེལ་ནས། བོད་མི་རྣམས་ཀྱིས་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱད་པ་ཙམ་གྱིས་འཛིན་བཟུང་བཙོན་འཇུག་བྱས་པ་རྣམས་འཕྲལ་དུ་ཆ་རྐྱེན་གང་ཡང་མེད་པའི་ཐོག་ནས་གློད་གྲོལ་གཏོང་དགོས་བའི་འབོད་སྐུལ་དང་སྦྲགས། རྒྱ་ནག་གིས་བོད་མི་རྣམས་ཀྱི་ཁྲིམས་གཏུགས་ཀྱི་བྱ་རིམ་ལ་དྲང་བདེན་སྐྱོང་དགོས་བ་དང་། བཀག་སྐྱིལ་བྱས་པ་རྣམས་ལ་མནར་གཅོད་མི་གཏོང་བར་བདག་གཅེས་གང་ལེགས་བྱ་དགོས་བའི་འབོད་སྐུལ་གནང་ཡོད་པ་ཡང་ཡོངས་གྲགས་གནང་འདུག མ་ཟད་སྐུ་ཞབས་ Borrell ལགས་ཀྱིས་ཡུ་རོབ་མཐུན་ཚོགས་ངོས་ནས་བོད་མི་རྣམས་གང་བྱུང་འཛིན་བཟུང་དང་གར་སོང་ཆ་མེད་དུ་བསྒྱུར་བ། གཞན་ཡང་མི་སྤྱོད་ནས་འདས་བའི་མནར་གཅོད་བཏང་བ་སོགས་ཀྱི་གནད་དོན་རྣམས་ཕྱི་འབྲེལ་འཐབ་བྱུས་ཀྱི་ལམ་ནས་སེལ་རྒྱུ་དོན་གནད་དུ་འཛིན་བཞིན་ཡོད་པ་ལྟར། འདི་ལྟ་བུའི་མི་སྒེར་སོ་སོའི་གྱོད་དོན་མཐའ་དག་མུ་མཐུད་དུ་རྒྱ་ནག་གི་དཔོན་རིགས་དང་མཉམ་དུ་གླེང་སློང་བྱ་ངེས་བ་དང་། དེ་བཞིན་མི་མང་རང་བཞིན་དང་ཕྱོགས་ངོས་མང་པོ་ནས་མཚམས་མི་ཆད་པར་གླེང་སློང་རིམ་པ་གནང་རྒྱུ་ཡིན་པར་གསུངས་འདུག གཞི་རྩའི་ཟླ་བ་སྔོན་མའི་ཟླ་མཇུག་ཏུ་ཡོ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་རྒྱ་ནག་འགོ་ཁྲིད་ཁག་ཅིག་ཐོག་ཉེས་ཆད་བཏང་བར་རྒྱ་གཞུང་གིས་ཡོ་རོབ་མཐུན་ཚོགས་ལ་འཁོན་ལན་སློག་པའི་གནད་དོན་དང་འབྲེལ་ཟླ་བ་བཞི་བའི་ཚེས་ ༢༨ ཉིན་ཡོ་རོབ་གྲོས་ཚོགས་ནང་དུ་རྒྱ་ནག་ཐོག་དམིགས་བསལ་གྱི་བགྲོ་གླེང་ལས་རིམ་སྐོང་ཚོགས་བྱས་ཡོད་པ་དང། སྐབས་དེར་ཡོ་རོབ་མཐུན་ཚོགས་ཀྱི་ཕྱི་སྲིད་དང་བདེ་སྲུང་བློན་ཆེན་ Josep Borrell ལགས་གཙོས་གྲོས་ཚོགས་འཐུས་མི་ ༣༠ ལྷག་ནས་རྒྱ་གཞུང་གི་བྱ་སྤྱོད་དེ་ནི་ཡོ་རོབ་ཀྱི་མང་གཙོ་དང་སྨྲ་བརྗོད་རང་དབང་གི་རིན་ཐང་ལ་མཐོང་ཆུང་ཁྱད་གསོད་བྱས་པ་ཞིག་རེད་ཅེས་སྐྱོན་བརྗོད་ཤུགས་ཆེ་གནང་ཡོད་པ་རེད།

ཉེ་ལམ་ཟླ་ ༥ པའི་ཚེས་ ༡༤ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་ ༡༧ པའི་བོད་མི་མང་སྤྱི་འཐུས་ཀྱི་གྲུབ་འབྲས་གསལ་བསྒྲགས་བསྐྱངས་བ་དང་སྦྲགས།  རྒྱ་ནག་གི་དཔྱད་ཞིབ་པས་བོད་མིའི་སྒྲིག་འཛུགས་ཀྱི་བདམས་ཐོན་སྲིད་སྐྱོང་གསལ་བསྒྲགས་བྱས་ཡོད་ཀྱང་གཞུང་འཛིན་གསར་བས་བོད་རང་བཙན་རྩོད་རྒྱུའི་བཞེངས་ཕྱོགས་དེར་འགྱུར་བ་གཏང་གི་མ་རེད་ཅེས་བཤད་འདུགདེ་ཡང་ཁ་ཉིན་རྒྱ་ནག་གཞུང་འབྲེལ་གྱི་Global Times གསར་ཁང་ནས་འདོན་སྤེལ་བྱས་པའི་གནས་ཚུལ་ནང་།  ཚོགས་ཟུར་སྤེན་པ་ཚེ་རིང་ལགས་བོད་མིའི་སྒྲིག་འཛུགས་ཀྱི་སྲིད་སྐྱོང་དུ་བདམས་ཐོན་བྱུང་ཡོད་ཀྱང་གཞུང་འཛིན་གསར་པའི་བོད་རང་བཙན་རྩོད་རྒྱུའི་བཞེངས་ཕྱོགས་ལ་འགྱུར་བ་གཏང་གི་མ་རེད་ཅེས་དང་།   ལྷག་པར་འདི་ལོའི་འོས་བསྡུའི་བརྒྱུད་རིམ་ཁྲོད་བཙན་བྱོལ་བོད་མིའི་ནང་ཁུལ་གྱི་རྙོག་གྲ་ཡོངས་མངོན་གསལ་བྱུང་བ་མ་ཟད།  ནང་ཁུལ་གྱི་རྩོད་རྙོག་དེ་བཞིན་ཇེ་སྡུག་ཏུ་བཏང་ཡོད་པར་བཤད་འདུག རྒྱ་ནག་གི་བོད་གནས་ཉམས་ཞིབ་ལྟེ་གནས་ཁང་གི་འགན་འཛིན་གཞོན་པ་ Xiao Jie ཡིས་གསར་ལམ་དེའི་ཐོག་སྲིད་སྐྱོང་ལས་ཐོག་བློ་བཟང་སེང་གེ་མཆོག་དང་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་རྣམ་གཉིས་ཀྱིས་རྒྱབ་ལྗོངས་མཚུངས་བསྡུར་དང་སྦྲགས།  བཙན་བྱོལ་སྒྲིག་འཛུགས་དེ་བཞིན་སུས་འགོ་ཁྲིད་ཀྱང་ཏཱ་ལའི་རུ་ཚོགས་ནས་བོད་རང་བཙན་ཆེད་དུ་འཐབ་རྩོད་བྱེད་རྒྱུའི་རང་བཞིན་ལ་འགྱུར་བ་ཐེབས་ཐབས་མེད་པ་བཤད་འདུགདེ་བཞིན་བཙན་བྱོལ་སྤྱི་ཚོགས་ནང་ཆབ་སྲིད་དང་ཆོས་ཕྱོགས་ཀྱི་དབང་ཚད་ཐ་དད་ཡོད་པ་དང་། བོད་མིའི་སྒྲིག་འཛུགས་དེ་བཞིན་ཕྱི་རྒྱལ་ནས་རྒྱབ་སྐྱོར་འཚོལ་རྒྱུའི་ཚོགས་པ་ཞིག་དང་།  སྲིད་སྐྱོང་ནི་ཚོགས་པ་དེའི་འགོ་ཁྲིད་ལྟ་བུ་ཞིག་ཡིན་པ་བཤད་འདུག་པ་མ་ཟད།   ཁོས་རྒྱ་ནག་གཞུང་ནས་ད་ལྟ་བོད་མིའི་སྒྲིག་འཛུགས་ལ་འབྲེལ་བ་བྱེད་ཀྱི་མ་རེད་ལ།   རྒྱ་གཞུང་ནས་བོད་ཐོག་འཛིན་པའི་སྲིད་བྱུས་མུ་མཐུད་སྤེལ་གྱི་རེད་ཅེས་བཤད་འདུག མ་ཟད་རྒྱ་ནག་ཆབ་སྲིད་གྲོས་ཚོགས་ཀྱི་གྲངས་ཉུང་མི་རིགས་དང་ཆོས་ལུགས་ལས་དོན་ཚོགས་ཆུང་གི་ཚོགས་གཙོ་ཟུར་པ་ Zhu Weiqun ཡིས་གསར་ཁང་དེར་དབུ་མའི་ལམ་གྱི་སྲིད་བྱུས་ཟེར་བ་དེ་ནི་བོད་ལ་ཚད་མཐོའི་རང་སྐྱོང་དང་དེའང་རིམ་བཞིན་རང་བཙན་རྩོད་རྒྱུའི་སྲིད་བྱུས་ཤིག་ཡིན་པས།  འདི་ནི་ཡོང་མི་སྲིད་པ་ཞིག་ཡིན་པ་བཤད་འདུག  མ་ཟད།  ཁོས།  འདས་པའི་དུས་ཡུན་ནང་སྲིད་སྐྱོང་བློ་བཟང་སེང་གེ་མཆོག་གི་ལས་དོན་གཅིག་རྗེས་གཉིས་མཐུད་ལམ་ལྷོང་བྱུང་མེད་པ་དང་དེ་འབྲེལ་གྱི་གནས་སྟངས་གཅིག་མཚུངས་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་སུ་འཕྲད་ངེས་ཡིན་པ་དང་ཆབས་ཅིག  སྤེན་པ་ཚེ་རིང་ལགས་ནས་གདོང་ལེན་བྱེད་དགོས་པའི་གནས་ཚུལ་གལ་ཆེ་གཅིག་ནི་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཆགས་ཀྱི་ཡོད་པ་བཤད་འདུག ད་དུང་ཁོས་༸གོང་ས་མཆོག་ནི་ཏཱ་ལའི་རུ་ཚོགས་ཀྱི་གཙོ་བོ་ཞིག་ཡིན་སྟབས། ཏཱ་ལའི་རུ་ཚོགས་ཀྱི་འབྱུང་འགྱུར་ནི་བཤད་ཐུབ་རྒྱུ་ཁག་པོ་རེད་ཅེས་བཤད་འདུག   འདི་ག་རླུང་འཕྲིན་ཁང་ནས་དེ་རིང་རྒྱ་ནག་གི་ Global Times གསར་ཤོག་སྤེལ་བའི་གནས་ཚུལ་དེའི་སྐོར་ལ་བདམས་ཐོན་སྲིད་སྐྱོང་སྤེན་པ་ཚེ་རིང་ལགས་སུ་ཞལ་པར་བརྒྱུད་བཀའ་འདྲི་ཞུས་སྐབས།  ཁོང་གིས།  Zhu Weiqun ཡིས་གནས་ཚུལ་དེའི་ནང་གང་བཤད་པ་དེ་གསར་པ་གང་ཡང་མིན་པ་དང་།  ལྷག་པར་དུ་བོད་གནས་ཉམས་ཞིབ་ལྟེ་གནས་ཁང་གི་འགན་འཛིན་གཞོན་པ་ Xiao Jie ཟེར་བས་བཤད་པ་དེ་རང་ངོས་ནས་བརྒྱུད་ལམ་ཁག་ཏུ་རྒྱ་ནག་གཞུང་ལ་ང་ཚོས་སྙོབས་རྒྱུ་ཐབས་ཤེས་བྱེད་རྒྱུ་་ཡིན་ཞེས་བརྗོད་པ་དེར་ལན་ལྟ་བུ་ཞིག་གོ་བ་ལེན་གྱི་ཡོད་པ་དང་།  ཁོ་རང་ཚོས་བཤད་པ་དེ་སྤྱིར་བཏང་གི་ལངས་ཕྱོགས་ཙམ་ཞིག་མ་གཏོགས་དོན་ངོ་མའི་ཐོག་རྒྱ་གཞུང་གི་བསམ་ཚུལ་ཅིག་ཡིན་པ་ངོས་འཛིན་ཞུ་ཐུབ་ཐབས་མེད་གསུངས་པ་དང་ཆབ་ཅིག བོད་མིའི་སྒྲིག་འཛུགས་ཀྱི་བཞེངས་ཕྱོགས་གང་ཡིན་པ་དེ་དེ་སྔ་ནས་གང་བཤད་པ་དེར་འགྱུར་བ་རྩ་བ་ནས་མེད་པ་སྐོར་གསུངས་བྱུང་། རྩ་བའི་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ།   བདམས་ཐོན་སྲིད་སྐྱོང་སྤེན་པ་ཚེ་རིང་ལགས་ཀྱིས་རྒྱ་གཞུང་ནས་༸གོང་ས་མཆོག་གི་༸སྐུའི་ཡང་སྲིད་ཐད་ཐེ་ཇུས་བྱེད་རྒྱུའི་འགན་དབང་མེད་པ་དང་། རྒྱ་ནག་དམར་ཤོག་ཚོགས་པའི་འགོ་ཁྲིད་རྣམས་ཀྱིས་ཆོས་་ཁས་ལེན་བྱེད་ཀྱི་མེད་པར་འགྲེལ་བརྗོད་ཀྱིས་༸སྐུའི་ཡང་སྲིད་ཀྱི་གནད་དོན་ནི་ཆོས་ཕྱོགས་དང་འབྲེལ་བ་ཆགས་ཀྱི་ཡོད་སྐོར་གསུངས་ཡོད་པ་རེད།

ཨ་རིའི་སྲིད་འཛིན་སྐུ་ཞབས་ཇཱོ་བྷ་ཊན་མཆོག་གི་སྣེ་ཁྲིད་པའི་ཨ་རིའི་སྲིད་གཞུང་གི་ངོས་ནས་བོད་རྒྱ་གྲོས་མོལ་གནང་རྒྱུ་དེ་ནི་ཕྱོགས་གཉིས་ཀྱི་དཀའ་རྙོག་སེལ་རྒྱུ་དང་། ལྷག་པར་དུ་བོད་མི་རྣམས་ལ་མིང་དོན་མཚུངས་པའི་རང་སྐྱོང་གི་གནས་བབ་ཐོག་རང་ཉིད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་རང་དབང་སྒོ་ནས་ཉམས་ལེན་དང་འཛིན་སྐྱོང་ཐུབ་རྒྱུ་སོགས་ཕུགས་རྒྱང་རིང་པོ་ལ་དགེ་མཚན་ཆེ་བའི་ཐབས་ལམ་དང་རེ་བ་བཟང་ཤོས་ཤིག་ཏུ་ངོས་འཛིན་ཞུ་བཞིན་ཡོད་པ་གསུངས་འདུགཨ་རིའི་བོད་ཐོག་འཛིན་པའི་སྲིད་བྱུས་ ༢༠༠༢ ཀྱི་དགོངས་དོན་འོག་ལོ་ལྟར་ཨ་རིའི་སྲིད་འཛིན་མཆོག་དང་ཕྱི་སྲིད་ལས་ཁུངས་གཉིས་ནས་བོད་རྒྱ་འབྲེལ་མོལ་གྱི་གནས་བབ་ཐོག་ལས་དོན་ག་རེ་གནང་ཡོད་མེད་ཀྱི་སྙན་ཐོ་ཞིག་ཡུལ་དེའི་གྲོས་ཚོགས་གོང་འོག་གཉིས་ཀྱི་ཕྱི་འབྲེལ་ལས་དོན་ཚོགས་ཆུང་ལ་འབུལ་དགོས་ཀྱི་ཡོད་ལྟར། ཟླ་བ་འདིའི་ཕྱི་ཚེས་ ༡ ཉིན་ཨ་རིའི་ཕྱི་སྲིད་ལས་ཁུངས་ནས་འདས་ལོའི་ཕྱི་ཟླ་ལྔ་པ་ནས་འདི་ལོའི་ཕྱ་ཟླ་བཞི་པའི་བར་གྱི་ལོ་འཁོར་སྙན་ཐོ་དེ་གྲོས་ཚོགས་ཀྱི་ཚོགས་ཆུང་སོ་སོར་ཕུལ་ཡོད་པ་དང་། དེ་ནི་བྷ་ཊན་སྲིད་གཞུང་གིས་བོད་རྒྱ་གྲོས་མོལ་ཐད་ཀྱི་སྙན་ཐོ་ཐོག་མ་དེ་ཆགས་ཀྱི་ཡོད་པ་རེད། སྙན་ཐོ་དེའི་སྔོན་གླེང་གི་ནང་དུ་ཕྱི་ལོ་ ༢༠༡༠ ལོ་ནས་རྒྱ་ནག་མི་མང་སྤྱི་མཐུན་རྒྱལ་ཁབ་དང་༧གོང་ས་མཆོག་གམ་མགོན་པོ་གང་ཉིད་མཆོག་གི་སྐུ་ཚབ་དབར་གཞུང་འབྲེལ་གྱི་འབྲེལ་མོལ་བྱུང་མེད་པ་དང་། ཨ་རིའི་སྲིད་གཞུང་གི་ངོས་ནས་དུས་རྟགས་ཏུ་བོད་རྒྱའི་བར་ཆ་རྐྱེན་གང་ཡང་མེད་པའི་ཐོག་དོན་སྙིང་ལྡན་པའི་གྲོས་མོལ་ཡོང་རྒྱུར་སྐུལ་འདུད་བྱེད་བཞིན་ཡོད་པ་མ་ཟད། ལྷག་པར་དུ་ད་ལྟའི་ཆ་ལ་བོད་མི་ཚོར་མིང་དོན་མཚུངས་པའི་རང་སྲིད་རང་སྐྱོང་གི་གནས་ཙམ་ཡང་མེད་པའི་ཁར། རྒྱ་ནག་གཞུང་ནས་བོད་མི་རྣམས་ཀྱི་གཞི་རྩའི་འགྲོ་བ་མིའི་ཐོབ་ཐང་ཁག་རྩིད་མེད་རྡོག་རོལ་དང་། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་རྩ་མེད་གཏོང་ཐབས་བྱེད་བཞིན་པར་བློ་འཚབ་ཆེན་པོ་གནང་བཞིན་ཡོད་པ་གསུངས་བ་དང་ཆབས་ཅིག རྒྱ་ནག་གཞུང་ནས་བློ་འཚབ་ཅན་གྱི་གནད་དོན་དེ་དག་ཁ་གསལ་བཟོས་ཏེ། བོད་རྒྱ་གཉིས་ཀྱི་གནད་དོན་ཞི་འགྲིག་ཡོང་རྒྱུར་འབད་བརྩོན་གནང་དགོས་པ་མ་ཟད། དེ་ནི་བོད་རྒྱ་གཉིས་དབར་ཕུགས་ནས་ཞི་བདེ་ལྷིང་འཇགས་ཡོང་རྒྱུའི་དགེ་མཚན་ཡང་ཡོད་པ་གསུངས་འདུག མ་ཟད་ཨ་རིའི་སྲིད་གཞུང་གི་རྩ་བའི་སྲིད་བྱུས་ཀྱི་ཆ་ནས་བོད་འདི་རྒྱ་ནག་གྱི་ཆ་ཤས་ཤིག་ཏུ་ངོས་འཛིན་བྱེད་བཞིན་ཡོད་ཀྱང་། ད་ལྟའི་བོད་རྒྱ་གཉིས་ཀྱི་དཀའ་རྙོག་སེལ་ཐབས་སུ་གྲོས་མོལ་གནང་རྒྱུ་དང་། ལྷག་པར་དུ་བོད་མི་རྣམས་ལ་མིང་དོན་མཚུངས་པའི་རང་སྐྱོང་གི་གནས་བབ་ཐོག་རང་ཉིད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ཉམས་ལེན་དང་འཛིན་སྐྱོང་ཐུབ་པ་གནང་རྒྱུ་སོགས་ནི་ཕུགས་རྒྱང་རིང་བོ་ལ་དགེ་མཚན་ཆེ་བའི་ཐབས་ལམ་དང་རེ་བ་བཟང་ཤོས་ཤིག་ཏུ་ངོས་འཛིན་ཞུ་བཞིན་ཡོད་པ་གསུངས་འདུག དེ་བཞིན་ཐེངས་འདིའི་སྙན་ཐོའི་ནང་ལ། རྒྱ་ནག་གཞུང་གིས་བོད་ཀྱི་ས་གནས་ཁག་ཏུ་འཛིན་པའི་སྲིད་བྱུས་ཁག་ལ་བསྐྱར་བཅོས་གནང་སྟེ། བོད་མི་ཚོར་རང་ཉིད་ཀྱི་རིག་གཞུང་སྲུང་སྐྱོབ་དང་མངོན་འདོད་རྣམས་རང་དབང་ཐོག་ནས་གསུང་རྒྱུའི་ཐོབ་ཐང་སྤྲོད་དགོས་པ་དང་། རྒྱལ་སྤྱིའི་ཆབ་སྲིད་ཀྱི་སྐུ་ཚབ་དང་གསར་འགོད་པ། དེ་བཞིན་ཡུལ་སྐོར་བ་རྣམས་བོད་ཀྱི་ས་གནས་ཁག་ཏུ་རང་དབང་ཐོག་སྐྱོད་རྒྱུར་དམ་དྲག་བྱེད་བཞིན་པ་རྣམས་ཕྱིར་འཐེན་བྱེད་དགོས་པ། དེ་བཞིན་རྒྱ་ནག་གཞུང་ནས་བླ་སྤྲུལ་ངོས་འཛིན་གྱི་གནད་དོན་གཙོས་པའི་བོད་མིའི་ཆོས་ཕྱོགས་ཀྱི་བྱེད་སྒོ་ཁག་ལ་ཐེ་བྱུས་བྱེད་བཞིན་པ་རྣམས་མཚམས་འཇོག་བྱེད་དགོས་པ་སོགས་ཀྱི་དགོས་འདུན་ཁག་ཅིག་བཏོན་འདུག་པ་མ་ཟད། སྔར་ལོའི་ཕྱི་ཟླ་བདུན་པའི་ནང་རྒྱ་ནག་གཞུང་ནས་ཁྲིན་ཏོའུ་ནང་ཡོད་པའི་ཨ་རིའི་གཞུང་ཚབ་ཁང་སྒོ་བརྒྱབ་པ་དེ་ཡིས། ཨ་རི་གཞུང་ནས་བོད་ནང་གི་གནས་སྟངས་རྒྱུས་ལོན་བྱེད་རྒྱུར་འགོག་རྐྱེན་འཕར་མ་ཞིག་བཟོས་ཡོད་པ་གསུངས་འདུགགཞན་ཡང་སྙ་ཐོ་དེའི་ནང་འདས་ལོའི་ཕྱི་ཟླ་དགུ་པའི་ནང་སྐབས་དེའི་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་ནས་རྒྱ་ནག་གཞུང་གིས་ཆ་རྐྱེན་མེད་པར་༧གོང་ས་མཆོག་གམ་མགོན་པོ་གང་ཉིད་མཆོག་གི་སྐུ་ཚབ་ལྷན་དུ་གྲོས་མོལ་གནང་དགོས་པ་བསྐྱར་ནན་གནང་པ་དང་། ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་ Robert A. Destro  ལགས་ནས་དྲ་ཐོག་བརྒྱུད་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། དེ་བཞིན་གཞུང་འབྲེལ་མ་ཡིན་པའི་སྐུ་ཚབ་དང་གསར་འགོད་པ་སོགས་དང་མཇལ་འཕྲད་གནང་སྟེ་བོད་དོན་གླེང་སློང་གནང་བ་ཁག་གསལ་སྟོན་གནང་འདུག ཐེངས་འདིའི་ཨ་རིའི་ཕྱི་སྲིད་ལས་ཁུངས་ཀྱི་སྙན་ཐོ་དེ་དང་འབྲེལ། ཨ་རིའི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ནས། སྲིད་འཛིན་སྐུ་ཞབས་ Joe Biden མཆོག་གི་སྣེ་ཁྲིད་པའི་ཨ་རིའི་སྲིད་གཞུང་ནས་ཨ་རི་བོད་དོན་རྒྱབ་སྐྱོར་གྱི་ཁྲིམས་གཞིའི་དགོངས་དོན་འོག་བོད་རྒྱ་གྲོས་མོལ་ཡོང་ཐབས་སུ་རྒྱལ་སྤྱིའི་རྒྱལ་ཁབ་གཞན་དང་ཟུང་འབྲེལ་ཐོག་ནུས་པ་སྔར་ལྷག་འདོན་དགོས་བ་དང་། སྔར་ལོ་ལྟར་མ་ཡིན་པར་ཨ་རིའི་བོད་དོན་དམིགས་བསལ་འབྲེལ་མཐུད་པ་དེ་བཞིན་གང་མགྱོགས་བསྐོ་བཞག་གནང་དགོས་པའི་རེ་སྐུལ་གནང་འདུག གཞི་རྩའི་ཨ་རིའི་གཞུང་ནས་བོད་རྒྱ་འབྲེལ་མོལ་གྱི་གནས་བབ་དང་འབྲེལ་བའི་སྙན་ཐོ་ཐེངས་དང་པོ་དེ་སྤྱི་ལོ་ ༢༠༠༣ ལོར་སྲིད་འཛིན་སྐུ་ཞབས་ George W. Bush མཆོག་གི་ཡུལ་དེའི་གྲོས་ཚོགས་སུ་སྙན་སྒྲོན་གནང་ཡོད་པ་དང་། ད་ལྟའི་སྲིད་འཛིན་ལས་ཐོག་སྐུ་ཞབས་ཇཱོ་བྷ་ཊན ་མཆོག་གིས་འོས་བསྡུའི་བརྒྱུད་རིམ་ཁྲོད་མ་འོངས་སྲིད་འཛིན་དུ་འཁོད་པ་ཡིན་ན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་མཇལ་འཕྲད་ཞུ་རྒྱུ་མ་ཟད། བོད་རྒྱ་གྲོས་མོལ་བསྐྱར་གསོ་ཡོང་སླད་རྒྱ་ནག་གཞུང་ལ་གནོན་ཤུགས་སྤྲོད་རྒྱུ་དང་། བོད་དོན་ལ་རྒྱབ་སྐྱོར་སྔར་ལྷག་གནང་གི་ཡིན་ཞེས་གསུངས་ཡོད་པ་རེད།

ཁ་སང་ཕྱི་ཟླ་ ༥ ཚེས་ ༡༧ ཉིན་མོ་སྟེ། ༸གོང་ས་སྐྱབས་མགོན་ཆེན་པོ་ཆེན་པོ་མཆོག་གི་ངོས་འཛིན་ཞུས་པའི་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉིན་མ་མཆོག་གི་དབུས་བའི་རིན་པོ་ཆེ་མཆོག་གིས་ཡབ་ཡུམ་སྐུ་འཁོར་དང་བཅས་བ་རྒྱ་གཞུང་གིས་བཙན་ཁྲིད་བྱས་ནས་གར་སོང་ཆ་མེད་དུ་སོང་སྟེ་མི་ལོ་ཧྲིལ་པོ་ ༢༦ འཁོར་བའི་དུས་དྲན་ཡིན་པ་དང་། ཉིན་འདིར་ཡོ་རོབ་ཡུལ་གྲུ་ཁག་ནང་གནས་སྡོད་བོད་མི་དང་བོད་དོན་རྒྱབ་སྐྱོར་རྣམས་ཀྱིས་རྒྱ་གཞུང་ལ་ངོ་རྒོལ་གྱིས་ལས་འགུལ་རྣམ་པ་འདྲ་མིན་བརྒྱུད་ནས་ཉིན་མོ་དེ་སྲུང་བརྩི་ཞུས་ཡོད་པ་རེད།དེ་ཡང་ཡོ་རོབ་རྒྱལ་ཁབ་སུད་སི་ནང་ལ་ཆ་མཚོན་ན། སུད་སི་ས་གནས་བོད་ཀྱི་བེུད་ལྷན་ཚོགས་དང་ཡོ་རོབ་བོད་རིགས་གཞོན་ནུ་མཐུན་ཚོགས་ཀྱིས་སྣེ་ཁྲིད་འོག སུད་སི་དང་ལིག་ཏེན་སིཊཡན་བོད་རིགས་མི་མང་། དེ་བཞིན་སུད་བོད་མཐུན་ཚོགས་བཅས་ནས། ཛུ་རིག་ Werdmühleplatz  ས་ཚིགས་ནས་རྒྱ་ནག་གཞུང་ཚབ་ཡན་ལག་ལས་ཁུངས་བར་། བོད་མི་རྣམས་ནས་ལག་དུ་བོད་ཀྱི་རྒྱལ་དར་དང་། པཎ་ཆེན་རིན་པོ་ཆེའི་སྐུ་པར། དེ་བཞིན་རྒྱ་གཞུང་ལ་ཞི་རྒོལ་གྱི་འབོད་ཚིག་འཁོད་པའི་འཕྲེད་དར་་སོགས་འཁྱེར་ནས་། ཞི་བའི་རྔམ་སྟོན་ཁྲོམ་སྐོར་གནང་ཡོད་པ་སུད་སི་ས་གནས་བོད་ཀྱི་བེུད་ལྷན་ཚོགས་ནས་ཚོགས་གཙོ་ཚེ་རིང་གཡུ་སྒྲོན་ལགས་ཀྱིས་གསུངས་ཡོད། དེ་བཞིན་ད་ལན་ལས་འགུལ་དེའི་ཐོག་སུད་སི་གྲོས་ཚོགས་ཀྱི་འཐུས་མི་ Fabian Mollina ལགས་དང། དེ་བཞིན་Balthasar Glattli ལགས་ཀྱིས་བོད་མིའི་ལས་འགུལ་ཐོག་མཉམ་ཞུགས་ཀྱིས་རྒྱབ་སྐྱོར་གཏམ་བཤད་སྤེལ་གནང་ཡོད་པ་མ་ཟད། རྒྱ་ནག་གཞུང་ཚབ་མདུན་ངོས་སུ་བོད་མི་རྣམས་ཀྱིས། ༸པཎ་ཆེན་རིན་པོ་ཆེ་མཆོག་གི་དབུས་པའི་བོད་མི་ཆབ་སྲིད་བཙོན་པ་རྣམས་གློད་གྲོལ་དགོས་པ་དང་། བོད་ལ་རང་དབང་དགོས།   རྒྱ་ནག་གཞུང་ནས་བོད་ནང་མི་གསོད་ཁྲག་སྦྱོར་མཚམས་འཇོག་དགོས། ངོ་ཚ་ཁྲེལ་གཞུང་མེད་པའི་རྒྱ་ནག་གཞུང་སོགས་ཀྱི་ཞི་བའི་སྐད་འབོད་ལས་འགུལ་ཡང་སྤེལ་འདུགཡང་ཡོ་རོབ་རྒྱལ་ཁབ་ཧྥ་རན་སིའི་ནང་ལ་ཆ་མཚོན་ན། ཁུལ་དེའི་སི་ཊ་སི་སྦག་བོད་རིགས་མཐུན་ཚོགས་དང་ཁུལ་དེའི་བོད་དོན་རྒྱབ་སྐྱོར་ཚོགས་པ་གཉིས་ཀྱི་གོ་སྒྲིག་འོག ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་དུ་གྱུར་ནས་ལོ་ངོ་༢༦འཁོར་བའི་དུས་དྲན་ཉིན་གཉིས་སྔ་ནུར་གྱིས་སྲུང་བརྩི་ཞུས་འདུག་ཅིང་། སྐབས་དེར་བོད་མི་དང་བོད་དོན་རྒྱབ་སྐྱོར་ཚོགས་རྣམས་ཀྱིས་རྒྱ་ནག་གཞུང་ཚབ་ཡན་ལགས་ལས་ཁུངས་བར་རྔམ་སྟོམ་ཁྲོམ་སྐོར་དང། རྒྱ་ནག་གཞུང་ཚབ་ཡན་ལག་ལས་ཁུངས་མདུན་དུ་ཞི་བའི་སྐད་འབོད་ཀྱི་ལས་འགུལ་སྤེལ་འདུག་པ་མ་ཟད།  ཁོང་རྣམས་ནས་བོད་ལ་རང་དབང་དགོས་པ་དང་། རྒྱ་གཞུང་ནས་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་། བོད་མིའི་སྐད་ཡིག་རིག་གཞུང་རྩ་མེད་རྡོག་རོལ་མཚམས་འཇོག་དགོས་ཞེས་མཚན་རྟགས་བསྡུ་རུབ་བྱས་པའི་ཞུ་སྙན་རྒྱ་ནག་གཞུང་ཚབ་ལས་ཁུངས་ཀྱི་ཡིག་སྒམ་ནང་དུའང་བླུགས་འདུག དེ་བཞིན་ཁ་སང་ཉིན་མོ་འདིར་ཡོ་རོབ་རྒྱལ་ཁབ་སི་པན་ནང་ལ་ཆ་མཚོན་ན། སི་པན་བོད་ཁང་གི་ཀྱི་འགན་འཛིན་དང་འདེམས་ཐོན་ཡོ་རོབ་སྤྱི་འཐུས་སྐུ་ཞབས་ཐུབ་བསྟན་དབང་ཆེན་ལགས་ཀྱི་གཙོ་བྱས་པའི་ས་གནས་བོད་རིགས་ཚོགས་པ་དང་བོད་དོན་རྒྱབ་སྐྱོར་བ་རྣམས་ཀྱིས། ཁུལ་དེའི་རྒྱ་ནག་གཞུང་ཚབ་ཡན་ལགས་ལས་ཁུངས་མདུན་དུ། བོད་ཀྱི་རྒྱལ་དར་དང་༸པན་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐུ་པར། རིན་པོ་ཆེ་མཆོག་གློད་གྲོལ་དགོས་པ་དང་། བོད་ལ་རང་དབང་དགོས། དེབཞིན་༢༠༢༢ ལོའི་པེ་ཅིང་དགུན་དུས་ཨོ་རྩལ་འགྲན་རྩོད་ཕྱིར་འཐེན་དགོས་སོགས་འཁོད་པའི་ཤོག་བྱང་དང་འཕྲེད་དར་སོགས་ཁྱེར་ནས་རྒྱ་གཞུང་ལ་ཞི་བའི་ངོ་རྒོལ་སྐད་འབོད་ལས་འགུལ་སྤེལ་ཏེ་ཉིན་མོ་དེ་སྲུང་བརྩི་ཞུས་འདུགགཞན་ཡང་དེ་བཞིན་ཉིན་དེའི་ཕྱི་དྲོ་དབྱིན་ཡུལ་རྒྱལ་ས་Londonརྒྱ་ནག་གཞུང་ཚབ་ཁང་མདུན་ངོས་སུ་བོད་མི་དང་བོད་དོན་རྒྱབ་སྐྱོར་བ་ཚོ་ས་བོད་ཀྱི་རྒྱལ་དར་དང་པཎ་ཆེན་དགེ་འདུན་ཆོས་ཀྱི་ཉིན་མ་མཆོག་གི་སྐུ་པར་ཁྱེར་ནས་རྒྱ་གཞུང་ལ་ཞི་བའི་སྐད་འབོད་ཀྱི་ལས་འགུལ་སྤེལ་འདུག་ལ།  དེ་བཞིན་ཉིན་འདིར་ཨི་ཊ་ལི་བོད་རིགས་ཚོགས་པས་ཁུལ་དེའི་བོད་པའི་ན་ཆུང་བྱིས་པ་ཁག་ནས་རྒྱ་ནག་གཞུང་ལ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གློད་གྲོལ་དགོས་སོགས་ཀྱི་རེ་འདུན་བཏོན་པའི་དམིགས་བསལ་ཆེད་སྒྲིག་བརྙན་ཐུང་སྤྱི་ཚོགས་དྲ་ལམ་ཁག་ཏུ་སྤེལ་དེ་ཁ་སང་གི་ཉིན་མོ་དེ་ཉི་ནག་གི་དུས་ཚིགས་ཞིག་ལ་སྲུང་བརྩི་ཞུས་འདུག་པ་མ་ཟད།   དེ་མིན་ཡོ་རོབ་ཁུལ་གྱི་བོད་མིའི་གཞུང་སྒེར་ཚོགས་པ་ཁག་དང་བོད་དོན་རྒྱབ་སྐྱོར་ཚོགས་པ་ཁག་ནས་ཁ་སང་དུས་ཚིགས་དང་བསྟུན་དྲ་ཐོག་ཏུ་བསྒྲགས་གཏམ་སྤེལ་བ་དང་རྒྱལ་ཚོགས་ལ་ཞུ་སྙན་ཕུལ་བ་སོགས་ལས་འགུལ་རྣམ་པ་འདྲ་མིན་བརྒྱུད་སྲུང་བརྩི་ཞུས་ཡོད་པ་རེད།  

དེ་རིང་ནི་དེ་སྔ་ཕྱི་ལོ་ ༡༩༩༥ ལོའི་ཟླ་ ༥ པ་ཕྱི་ཚེས་ ༡༧ ཉིན་རྒྱ་ནག་གཞུང་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་དབུས་པའི་ཡབ་ཡུམ་སྐུ་འཁོར་དང་བཅས་པ་བཙན་ཁྲིད་བྱས་ནས་གར་སོང་ཆ་མེད་དུ་གྱུར་ཏེ་མི་ལོ་ ༢༦ འཁོར་བའི་དུས་དྲན་ཡིན་པ་ལྟར། དུས་ཚིགས་འདི་དང་བསྟུན་དེ་རིང་བཀའ་སྤྱི་གཉིས་ནས་ཡོངས་ཁྱབ་བསྒྲགས་གཏམ་རེ་འདོན་སྤེལ་གནང་འདུག དེ་ཡང་དེ་རིང་བཀའ་ཤག་གི་བསྒྲགས་གཏམ་དེའི་ནང་དུ ། རྒྱ་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་འཛིན་བཟུང་བྱས་པའི་སྐབས་དེར་རིན་པོ་ཆེ་མཆོག་དགུང་གྲངས་དྲུག་ལས་སོན་མེད་པས། རིན་པོ་ཆེ་མཆོག་འཛམ་གླིང་ནང་གི་ཆབ་སྲིད་བཙོན་པ་ལོ་ན་ཆུང་ཤོས་ཆགས་ཀྱི་ཡོད་སྟབས། རིན་པོ་ཆེ་མཆོག་བཙན་ཁྲིད་བྱས་པ་ནི་མི་སྤྱོད་ལས་འདས་པའི་བྱ་སྤྱོད་ཡིན་པ་མ་ཟད། རྒྱ་གཞུང་གིས་བྱེད་ཕྱོགས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་དང་ཁྱད་པར་བྱིས་པའི་ཐོབ་ཐང་གི་ཁྲིམས་ལུགས་ཁག་དང་འགལ་བ་ཞིག་ཆགས་ཡོད་པ་གསུངས་འདུག ལྷག་པར་རྒྱ་གཞུང་གིས་བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དང་༸ཀུན་གཟིགས་པཎ་ཆེན་རིན་པོ་ཆེ་མཆོག་རྣམ་གཉིས་ཀྱི་ཡང་སྤྲུལ་ངོས་འཛིན་གནང་ཕྱོགས་སོགས་བོད་ཀྱི་ཐུན་མིན་ཆོས་ལུགས་དང་སྲོལ་རྒྱུན་གྱི་གནང་སྒོ་གང་ཅིའི་ཐད་ཐེ་བྱུས་བྱེད་ཀྱི་ཡོད་པས་རྒྱ་གཞུང་གིས་བྱེད་ཕྱོགས་དེར་ངོ་རྒོལ་མཐའ་གཅིག་ཏུ་ཡོད་ཅེས་གསུངས་འདུག དེ་བཞིན་༸པཎ་ཆེན་རིན་པོ་ཆེ་མཆོག་བཙན་ཁྲིད་བྱས་པ་ནས་བཟུང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཚོགས་པ་རྣམས་ནས་རིན་པོ་ཆེ་མཆོག་གི་གནས་སྟངས་རྒྱུས་ལོན་དང་གློད་བཀྲོལ་སླད་ཞུ་གཏུག་ལན་མང་གནང་བ་དང་ལྷག་པར་རྒྱལ་ཁབ་མང་པོའི་གྲོས་ཚོགས་དང་སྲིད་གཞུང་། རྒྱབ་སྐྱོར་ཚོགས་པ་བཅས་ཀྱིས་རིན་པོ་ཆེ་མཆོག་གློད་བཀྲོལ་སླད་གྲོས་ཆོད་དང་སྙན་ཐོ་རིམ་པ་སོགས་བཏོན་གནང་བ་མ་ཟད། བོད་མིའི་སྒྲིག་འཛུགས་དང་གཞུང་འབྲེལ་མ་ཡིན་པའི་ཚོགས་སྒེར་རྣམས་ནས་ཀྱང་ལས་འགུལ་རྒྱུན་མི་ཆད་པར་སྤེལ་དང་སྤེལ་མུས་ཡིན་ནའང་། རྒྱ་གཞུང་ནས་ད་བར་རིན་པོ་ཆེ་མཆོག་གི་གནད་དོན་ཐད་དངོས་ཡོད་གནས་སྟངས་དང་མཐུན་པའི་འགན་ཁུར་གྱི་ལན་འདེབས་རྩ་བ་ནས་བྱས་མེད་པ་གསུངས་འདུག ཕྱོགས་མཚུངས་ད་རེས་ཀྱི་དུས་ཚིགས་དེ་བསྟུན་ ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་གི་མཛད་པ་རྣམ་ཐར་ལའང་ཚད་མཐོའི་གུས་འདུད་དང་བཀའ་དྲིན་རྗེས་དྲན་ཞུས་གནང་འདུག་པ་མ་ཟད། རྒྱ་གཞུང་ནས་ ༸པཎ་ཆེན་སྐུ་ཕྲེང་བཅུ་གཅིག་དགེ་འདུན་ཆོས་ཀྱི་ཉི་མ་མཆོག་ དབུས་པའི་སྐུ་འཁོར་བཅས་ཆ་རྐྱེན་གང་ཡང་མེད་པའི་ཐོག་གློད་བཀྲོལ་དགོས་པའི་རེ་སྐུལ་ནན་པོ་གནང་འདུག དེ་རིང་གི་དུས་ཚིག་དང་སྟུན། དེ་རིང་རྒྱ་གར་གྱི་དགོང་དྲོའི་ཕྱག་ཚོད་༧ པའི་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་དྲ་ཐོག་ཐད་བསྲིང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་རྗེས་དྲན་ལོ་རྒྱུས། སྐུ་ལ་ཤོར་བའི་བོད་ཀྱི་བྱིས་པ། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་མཛད་རྣམ་རྗེས་དྲན་ཞེས་པའི་དཔེ་དེབ་དབུ་འབྱེད་གནང་རྒྱུ་ཡིན་འདུག་པ་དང་། ཐད་ཀར་རྒྱང་སྲིང་གི་མཛད་སྒོ་དེའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ དང་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ Anant Kumar Hegde ལགས་དེ་བཞིན་བཀྲིས་ལྷུན་པོའི་དགོན་པའི་མཁན་པོ་གཟིག་རྒྱབ་རིན་པོ་ཆེ་མཆོག་བཅས་ནས་གསུང་བཤད་གནང་རྒྱུ་རེད་འདུག ཡང་བོད་མི་མང་སྤྱི་འཐུས་ལྷན་ཚོགས་ཀྱི་བསྒྲགས་གཏམ་དེའི་ནང་རྒྱལ་སྤྱིའི་གཞུང་དང་གྲོས་ཚོགས། གཞུང་འབྲེལ་མ་ཡིན་པའི་ཚོགས་སྡེ་ཁག་ལ་༸པཎ་ཆེན་རིན་པོ་ཆེ་མཆོག་ཞལ་བཞུགས་ཡོད་མེད་སྐོར་ཡིད་ཆེས་འཕེར་བའི་རྩད་གཅོད་གནང་ཐབས་ཀྱི་རོགས་མགོན་སྐྱབས་འཇུག་ཡོང་བ་དང་། རིན་པོ་ཆེ་མཆོག་མི་ལོ་ ༢༦ རིང་གར་སོང་ཆ་མེད་དུ་སོང་བ་འདི་ནི་ལོ་རྒྱུས་ཐོག་བྱུང་མྱོང་མེད་པ་ལྟ་བུ་ཞིག་ཡིན་པས་འཛམ་གླིང་ལོ་རྒྱུས་ཀྱི་ཟིན་ཐོའི་ནང་འགོད་དགོས་པ་ཞིག་ཆགས་ཡོད་པས་དེ་ལུགས་མཐུན་འགྱུར་གནང་ཐབས་ཡོང་བ། དེ་བཞིན་གཞིས་བྱེས་བོད་མི་ཡོངས་ཀྱིས་རྒྱ་ནག་གཞུང་གིས་ཆེད་དུ་བསྐོ་བཞག་བྱས་པའི་རྒྱལ་མཚན་ནོར་བུར་དད་གུས་དང་བརྩི་བཀུར་བྱེད་ཀྱི་མེད་པས། རྒྱ་ནག་དམར་གཞུང་དང་འབྲེལ་ལམ་གནང་སྐབས་དེ་ལུགས་གོ་བརྡ་འཕྲོད་ངེས་གནང་སྐྱོང་དང་། ལྷག་པར་ཨ་རི་གཙོས་རྒྱལ་སྤྱིའི་ཁྱོན་ཡོངས་ཀྱི་རྒྱལ་ཁབ་མང་དག་ཅིག་གི་དབུ་ཁྲིད་རྣམ་པས། རྒྱ་གཞུང་ལ་ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་སྐུ་འཚོ་བཞུགས་ཡོད་མེད་ཀྱི་གནས་ཚུལ་གསལ་སྟོན་དགོས་པའི་དགོས་འདུན་བཏོན་ཡོད་པ་མ་ཟད། འཛམ་གླིང་གི་རྒྱལ་ཁབ་མང་དག་ཅིག་གི་གྲོས་ཚོགས་ནང་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་འཕྲད་དུ་གློད་བཀྲོལ་དགོས་པའིོ་གྲོས་ཆོད་བཞག་ཡོད་པས་དེ་འབྲེལ་རྒྱབ་སྐྱོར་གནང་མཁན་གཞུང་སྒེར་ཡོངས་ལ་བོད་མི་མང་སྤྱི་འཐུས་ལྷན་ཚོགས་ནས་ཐུགས་རྗེ་ཆེ་ཞུ་བ་དང་ཆབས་ཅིག སླད་མར་ཡང་༸པཎ་ཆེན་རིན་པོ་ཆེ་མཆོག་གློད་གྲོལ་མ་བྱུང་གི་བར་དུ་སྔར་བཞིན་རྒྱ་གཞུང་ལ་དགོས་འདུན་དང་སྐུལ་ལྕག་ངེས་གནང་ཡོང་བའི་འབོད་སྐུལ་དང་། བོད་མི་ཡོངས་ཀྱི་རེ་འདུན་ནི་རིན་པོ་ཆེ་མཆོག་རྒྱ་གཞུང་གི་བཙན་གནོན་འོག་ཐར་ཏེ་གདན་ས་བཀྲིས་ལྷུན་པོར་ཞབས་སོར་འཁོད་རྒྱུ་ཡིན་སྟབས། དེ་འབྲེལ་གྱི་སྐལ་བཟང་གི་ཉི་མ་གང་མགྱོགས་འཆར་བའི་ཆེད་རོགས་མགོན་སྐྱབས་འཇུག་ལྷོད་གཡེང་མེད་པར་གནང་རོགས་བཅས་དོན་ཚན་ལྔའི་ཐོག་ནས་ཞུ་སྐུལ་གནང་འདུག དེའི་བར་ན་དེ་རིང་༸ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་མཆོག་རྒྱ་ནག་གཞུང་གིས་བཙན་ཁྲིད་ཀྱིས་གར་སོང་ཆ་མེད་དུ་གྱུར་བའི་ཉིན་མོ་དང་བསྟུན། ཉི་ཧོང་ནང་རྟེན་གཞི་བྱས་པའི་རྒྱལ་སྤྱིའི་གསར་འགོད་གླེང་སྟེགས་ཐོག་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ཉི་ཧོང་གཙུག་ལག་སློབ་གཉེར་ཁང་གི་སློབ་དཔོན་ Hirano Satoshi ལགས། དེ་བཞིན་རྒྱལ་སྤྱིའི་ཉེས་ཡངས་ཚོགས་པའི་ཉི་ཧོང་སྡེ་ཚན་གྱི་འབྲེལ་མཐུད་པ་ Kitai Daisuke ལགས་བཅས་ལྷན་བཞུགས་ཀྱིས་ས་གནས་ཀྱི་གསར་འགོད་པའི་མདུན་སར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་འདོན་སྤེལ་གནང་བའི་ Tibet's Stolen Child ཞེས་པའི་དཔེ་དེབ་ཉི་ཧོང་གི་སྐད་ཡིག་ཐོག་སྒྱུར་བ་དེ་འདོན་སྤེལ་དང་སྦྲགས། གསུང་བཤད་ཀྱི་ལས་རིམ་ཞིག་ཚོགས་འདུག སྐབས་དེར་ཉི་ཧོང་སྐུ་ཚབ་དོན་གཅོད་མཆོག་གིས་རྒྱ་ནག་གཞུང་གིས་༸པཎ་ཆེན་ཆུང་སྲིད་རིན་པོ་ཆེ་མཆོག་འཛིན་བཟུང་བྱས་ཏེ་ད་ལྟའི་ཆར་རིན་པོ་ཆེ་མཆོག་གི་གནས་སྟངས་གང་ཡིན་གསལ་བཤད་ཙམ་ཡང་མ་བྱས་པར་དེ་མུར་བཞག་པ་དེ་ཡིས། བོད་ནང་ལ་རྒྱ་ནག་གཞུང་གི་དམ་དྲག་ཅན་གྱི་སྲིད་བྱུས་གང་འདྲ་ཞིག་ལག་བསྟར་བྱེད་ཀྱི་ཡོད་མེད་མཚོན་ཐུབ་པ་མ་ཟད། ད་ལྟའི་ཆར་རྒྱ་ནག་གཞུང་གིས་ཆོས་ཁས་ལེན་ཙམ་ཡང་བྱེད་ཀྱི་མེད་པའི་ཁར། རྒྱ་ནག་རང་ཉིད་ཀྱི་པཎ་ཆེན་ཞིག་ངོས་འཛིན་བྱས་ཏེ་ཆབ་སྲིད་དྲིལ་བསྒྲགས་སོགས་ཀྱི་ལས་དོན་ལ་བེད་སྤྱོད་གཏོང་བཞིན་པ་སོགས་འགྲེལ་བརྗོད་དང་སྦྲགས། ད་རེས་ཉི་ཧོང་གི་སྐད་ཡིག་ཐོག་འདོན་སྤེལ་ཞུས་པའི་༸པཎ་ཆེན་ཆུང་སྲིད་རིན་པོ་ཆེའི་སྐུ་ཚེ་ལོ་རྒྱུས་དང་འབྲེལ་བའི་ Tibet's Stolen Child ཞེས་པའི་དཔེ་དེབ་དེ་བརྒྱུད་དེ་ས་གནས་ཀྱི་གསར་འགོད་པ་དང་། རྒྱལ་སྤྱིའི་མང་ཚོགས་རྣམས་ནས་དངོས་ཡོད་གནས་སྟངས་ཤེས་རྟོགས་ཐུབ་རྒྱུའི་རེ་བ་ཡོད་ཅེས་གསུངས་འདུག མ་ཟད་སྐུ་ཚབ་དོན་གཅོད་མཆོག་ནས་ཐེངས་འདིའི་དུས་ཚིགས་དང་བསྟུན། རྒྱ་ནག་གཞུང་ནས་༸པཎ་ཆེན་ཆུང་སྲིད་རིན་པོ་ཆེ་མཆོག་གཙོས་པའི་ནང་མི་རྣམ་པ་དང་། རིན་པོ་ཆེ་མཆོག་གི་དགེ་བའི་བཤེས་གཉེན་བྱ་བྲལ་རིན་པོ་ཆེ་བཅས་ཀྱི་གནས་སྟངས་གང་ཡིན་ཁ་གསལ་བཟོ་དགོས་པ་དང་། དེ་བཞིན་ཁོང་རྣམ་པ་གང་མགྱོགས་གློད་བཀྲོལ་གནང་དགོས་པ། རྒྱ་ནག་གཞུང་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་གཙོས་པའི་བོད་བརྒྱུད་ནང་བསྟན་གྱི་ལས་དོན་ཐོག་ཐེ་བྱུས་བྱེད་རྒྱུ་མཚམས་འཇོག་དགོས་པ། བོད་ཀྱི་ཁོར་ཡུག་གཏོར་བཤིག་བཏང་སྟེ་བོད་དེ་བཞིན་དམག་སྒར་ལྟ་བུ་བཟོ་རྒྱུའི་ལས་དོན་རྣམས་མཚམས་འཇོག་དགོས་པ། དེ་བཞིན་བོད་མིའི་སྒྲིག་འཛུགས་ཀྱི་སྐུ་ཚབ་ལྷན་དུ་གྲོས་མོལ་གནང་དགོས་པ་སོགས་ཀྱི་དགོས་འདུན་དོན་ཚན་ཁག་ཅིག་སྟོན་གནང་འདུག གཞན་ཡང་དེ་རིང་གི་དུས་ཚིགས་འདི་དང་བསྟུན་ཁ་སང་ཁེ་ན་ཊའི་ས་གནས་གཞོན་ནུ་ལྷན་ཚོགས་ཀྱི་གོ་སྒྲིག་འོག་༸པཎ་ཆེན་ཆུང་སྲིད་རིན་པོ་ཆེ་མཆོག་གློད་བཀྲོལ་དགོས་པ་སོགས་ཀྱི་དགོས་འདུན་སྟོན་པའི་ཐོག་ས་གནས་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་འདུག ད་དུང་ཨོ་སི་ཀྲི་རི་ཡ་ནང་གནས་བཞུགས་བོད་མི་རྣམས་ནས་༸པཎ་ཆེན་རིན་པོ་ཆེ་མཆོག་གློད་བཀྲོལ་གྱི་ལས་འགུལ་དང་དེ་བཞིན་བོད་མིའི་ཚོགས་སྒེར་ཁག་ནས་ཀྱང་དྲ་ཐོག་བརྒྱུད་རྒྱ་ནག་གཞུང་ནས་རིན་པོ་ཆེ་མཆོག་གི་གནས་སྟངས་ཇི་ཡིན་གསལ་བཟོ་དང་རིན་པོ་ཆེ་དང་སྐུ་འཁོར་བཅས་པ་ཆ་རྐྱེན་མེད་པའི་ཐོག་གློད་བཀྲོལ་དགོས་པའི་ལས་འགུལ་སྤེལ་འདུག མ་ཟད་དེ་རིང་ཨ་རི་ནེའུ་ཡོག་ས་གནས་གཞོན་ནུའི་ངོས་ནས་ཁུལ་དེར་ཡོད་པའི་རྒྱ་ནག་གཞུང་ཚབ་ལས་ཁུངས་མདུན་དུ་ངོ་རྒོལ་སྐད་འབོད་ཀྱི་ལས་འགུལ་ཞིག་ཀྱང་གནང་གི་འདུག

རྒྱ་གཞུང་གིས་དབྱེ་བའི་བོད་མཚོ་སྔོན་ཞིང་ཆེན་གྱི་ཡུལ་ཤུལ་ཁུལ་རྫ་སྟོད་རྫོང་ནས་བོད་མི་ ༦ དང་ཁྲི་འདུ་རྫོང་ནས་བོད་མི་ ༢ དེ་བཞིན་བོད་རྔ་བ་ཁུལ་ནས་བོད་མ་ ༦ འཛིན་བཟུང་བྱས་པའི་གནས་ཚུལ་ཐོན་འདུག དེ་ཡང་ཉེ་ཆར་མཚོ་སྔོན་ཡུལ་ཤུལ་རྫ་སྟོད་རྫོང་གི་བོད་མི་ ༦ འཛིན་བཟུང་བྱས་ཡོད་པ་དང་། རྒྱ་ནག་གཞུང་འབྲེལ་བརྒྱུད་ལམ་གྱིས་གནས་ཚུལ་སྤེལ་བར་གཞིགས་ན། བོད་མི་དེ་དག་གིས་ཐད་གཏོང་ལས་སྟེགས་སྤྱད་ནས་མ་རབས་ཐ་ཤལ་དང་གཡེམ་སྦྱོར་ཆགས་སྲེད། ཚུལ་མིན་གྱི་སྐད་ཆ་སོགས་བཤད་པ་ཤེས་རྟོགས་བྱུང་སྟེ། ཞིབ་རྩད་བྱས་མཐར་རྫ་སྟོད་རྫོང་དྲ་རྒྱའི་བདེ་འཇགས་རུ་ཆེན་གྱིས་འཕྲལ་དུ་ཉེན་རྟོག་པ་སྒྲིག་འཛུགས་བྱས་ནས་ཆུ་ཚོད་ ༣༢ ནང་དྲ་རྒྱའི་ཐད་གཏོང་བརྒྱུད་དེ་ཆགས་སྲེད་ཆ་འཕྲིན་ཁྱབ་སྤེལ་བྱས་པའི་ཁྲིམས་འགལ་དོགས་ཡོད་ཉེས་ཅན་ ༦ པོ་འཛིན་བྱས་ཡོད་པ་དང་། འཛིན་བཟུང་བྱས་པའི་མི་དྲུག་པོའི་ཁོངས་སུ་སྐྱེད་པ་ ༢ དང་བེུད་ ༤ ཡོད་པ་དེ་དག་གིས་ནག་ཉེས་ངོས་ལེན་བྱས་ཡོད་ཚུལ་བརྗོད་དེ ། ཁོང་རྣམས་ལ་ཉིན་གྲངས་ ༡༠ ནས་ ༡༤ བར་བཀག་ཉར་དང་། ཁོང་རྣམས་ཀྱི་ཐད་གཏོང་ཨང་གྲངས་སོ་སོར་ཟླ་གཅིག་ནས་གསུམ་བར་སྒོ་བརྒྱབ་ཡོད་པ་རེད་འདུག ཡང་དེའི་བར་ན་ཉེ་ཆར་ཡུལ་ཤུལ་ཁྲི་འདུ་རྫོང་སྤྱི་བདེ་ལས་ཁུངས་ནས་ཀྱང་། དྲ་རྒྱའི་ཐད་གཏོང་ལས་སྟེགས་བརྒྱུད་མ་རབས་ཐ་ཤལ་དང་གཡེམ་སྦྱོར་ཆགས་སྲེད། ཚུལ་མིན་གྱི་སྐད་ཆ་སོགས་བཤད་པས་ཉེས་མིང་འོག་བོད་མི་ ༢ འཛིན་བཟུང་བྱས་ཡོད་པ་དང་། བོད་མི་དེ་དག་ཉིན་གྲངས་ ༡༠ རིང་བཀག་ཉར་གྱི་ཆད་པ་བཅད་པ་དང་། འབྲེལ་ཡོད་ཐད་གཏོང་གི་སྒོ་ཡོངས་སུ་བརྒྱབ་ཡོད་པ་བཀོད་འདུག རྩ་བའི་རྒྱ་གཞུང་གིས་བོད་ནང་དྲ་རྒྱ་སོགས་ཕྱོགས་ཡོངས་ནས་དམ་དྲག་ཚད་ལས་བརྒལ་བ་བྱེད་བཞིན་པའི་ཁྲོད། གཞུང་དང་ལྟ་སྤྱོད་མི་མཐུན་མཁན་དང་ཆབ་སྲིད་དང་སྐད་ཡིག དེ་བཞིན་ཁོར་ཡུག་སྲུང་སྐྱོབ་ཀྱི་ལས་གཞི་སྤེལ་མཁན་མང་དག་ཅིག་ལ་ཉེས་མིང་འདྲ་མིན་གཡོག་སྟེ་འཛིན་བཟུང་བཀག་ཉར་དང་། གར་སོང་ཆ་མེད་དུ་བསྒྱུར་བའི་གནས་ཚུལ་ཡང་ནས་ཡང་དུ་ཐོན་བཞིན་པ་རེད། ཐེངས་འདིར་བོད་མི་འཛིན་བཟུང་གི་གནད་དོན་དེ་དག་ཁྲོད། འདི་གའི་གསར་འགོད་པའི་གནས་ཚུལ་ཁོངས་ལྡན་ཡིན་མིན་དང་བོད་མི་དེ་དག་ལ་ནག་ཉེས་གཡོག་པ་རྣམས་དངོས་ལྡན་ཡིན་མིན་སོགས་ཁ་གསལ་ཤེས་ཐབས་བྱས་ཀྱང་། བོད་ཁུལ་དུ་ཆེས་དམ་དྲག་གི་རྐྱེན་གྱིས་གནས་ཚུལ་གང་ཡང་ཤེས་རྟོགས་ཐུབ་ཀྱི་མི་འདུག ཡང་དེའི་བར་ན། གནས་ཚུལ་མཐོན་ཁག་ལ་གཞིགས་ན། ཟླ་བ་འདིའི་ཚེས་ ༩ ཉིན་བོད་རྔ་བ་ཁུལ། ཟུང་ཆུ་རྫོང་གཙོ་ཚང་དགོན་གྲོང་རྡལ་གྱི་བོད་ལུགས་གསོ་རིག་སྨན་པ་ ༣ དང་སྤྱི་གཉེར་བ་ ༢།  ཁྲིམས་ལུགས་ངོ་ཚབ་པ་ ༡ བཅས་ཁྱོན་བོད་མི་ ༦ ཀྱིས་བོད་སྨན་གྱིས་ཡུལ་སྐོར་བར་མགོ་སྐོར་བཏང་ཡོད་པའི་ཉེས་འཛུགས་འོག་འཛིན་བཟུང་བྱས་ཏེ་འདྲི་རྩད་བྱེད་བཞིན་ཡོད་པ་རེད་འདུག

ད་ལྟ་རྒྱ་གར་དུ་རྒྱ་ནག་གི་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་འོག་དཀའ་སྡུག་ཚད་མེད་མྱོང་བཞིན་པ་དང་བསྟུན། ཉེ་ཆར་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གི་ངོས་ནས་བཙན་བྱོལ་བོད་མི་ཡོངས་ནས་ཏོག་དབྱིབས་ནད་རླབས་གཉིས་པར་གདོང་ལེན་ལ་རོགས་སྐྱོང་ཆེད་ PM-cares ཞེས་རྒྱ་གར་གྱི་སྲིད་བློན་མཆོག་གི་མཚན་ཐོག་གི་ཏོག་དབྱིབས་རོགས་དངུལ་ཐེབས་རྩར་ཞལ་འདེབས་གང་ཐུབ་འབུལ་དགོས་པའི་སྐུལ་མ་གནང་བ་བཞིན། ཕྱི་རྒྱལ་ཡུལ་གྲུ་ཁག་ཏུ་བཞུགས་པའི་བཙན་བྱོལ་བོད་མི་དང་རྒྱ་བལ་འབྲུག་གསུམ། དེ་བཞིན་བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་རྣམས་ཀྱིས་ཉིན་གཅིག་གི་གླ་ཕོགས་བཅས་ཁྱོན་སྡོམ་སྒོར་ས་ཡ་ ༥༠ ཙམ་རོགས་དངུལ་གནང་གནང་འདུགདེ་ཡང་ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། གཞུང་འབྲེལ་བརྙན་འཕྲིན་བརྒྱུད་ལམ་ཐོག་གཏམ་བཤད་ཀྱི་བརྙན་ཐུང་ཞིག་འདོན་སྤེལ་གནང་བའི་ནང་དུ། བོད་མི་ཡོངས་ལ་ས་ག་ཟླ་བ་འགོ་བཙུགས་པར་འཚམས་འདྲི་དང་། ལྷག་པར་དུ་ཁ་སང་རྒྱལ་སྤྱིའི་སྨན་ཞབས་པའི་ཉིན་མོ་དང་བསྟུན། སྨན་ཞབས་པ་དང་འཕྲོད་བསྟེན་ལས་བྱེད་རྣམས་ལ་མཚམས་འདྲི་ཞུས་པ་དང་འབྲེལ། ཉེ་འཆར་བཀའ་ཤག་གི་འབོད་སྐུལ་ཞུས་པ་བཞིན། ཨ་རིའི་བོད་མི་མང་ཚོགས་རྣམས་ནས་ཨ་རིའི་སྐུ་ཚབ་དོན་ཁང་བརྒྱུད། རྒྱ་གར་སྲིད་བློན་གྱི་མཚན་ཐོག་གི་ཏོག་དབྱིབས་རོགས་དངུལ་ཐེབས་རྩར་ཧིན་སྒོར་ས་ཡ་ ༢༠ ཙམ་དང་སུད་སུ་བོད་མི་རྣམས་ནས་ས་ཡ་ ༡༠ ཙམ། དེ་བཞིན་ Brussels སྐུ་ཚབ་དོན་ཁང་བརྒྱུད་ཡུ་རོབ་ཁུལ་དུ་གནས་སྡོད་བོད་མི་རྣམས་ནས་ནས་འབུམ་ ༣༧ ཙམ། དེ་བཞིན་ཐེ་ཝན་སྐུ་ཚབ་དོན་ཁང་བརྒྱུད་ཧིན་སྒོར་འབུམ་ ༣༠ ཙམ། ཨོ་གླིང་དང་ New Zealand བོད་མི་རྣམས་ནས་འབུམ་ ༢༧ ཙམ་བཅས་ཁྱོན་ཕྱི་རྒྱལ་ཡུལ་གྲུ་ཁག་ཏུ་བཅའ་བཞུགས་བོད་མི་རྣམས་ནས་ས་ཡ་ ༤༠ ཙམ་དང་རྒྱ་བལ་འབྲུག་གསུམ་ནང་དུ་གནས་སྡོད་བོད་མི་རྣམས་ནས་འབུམ་ ༨༠ ཙམ་དང་བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་པ་རྣམས་ནས་ཉིན་གཅིག་གི་གླ་ཕོགས་དངུལ་འབོར་ཞལ་འདེབས་བཅས་ཁྱོན་ས་ཡ་ ༥༠ ཙམ་རྒྱ་གར་གཞུང་དམངས་ལ་ཞལ་འདེབས་གནང་ཡོད་པ་མངོན་གསལ་གནང་འདུག སྲིད་སྐྱོང་མཆོག་གིས་དེ་དང་ཆབས་ཅིག རྒྱ་གར་གཞུང་དམངས་གཉིས་ནས་བོད་མི་རྣམས་ཀྱི་རང་ས་ཤོར་ནས་ཉག་ཕྲག་པའི་དུས་སྐབས་སུ་ཕྱོགས་ཡོངས་ནས་གཟིགས་སྐྱོང་གང་ལེགས་གནང་བར་ཧ་ལས་པའི་དཀའ་འདྲིན་ཆེན་པོ་ཡིན་པ་ལྟར། ད་ལན་བོད་མི་རྣམས་ནས་ཐུགས་རྗེ་ལེགས་འབུལ་གྱི་རྣམ་འགྱུར་སྟོན་ཐུབ་པ་དེས་རྒྱ་གར་གཞུང་དམངས་གཉིས་ལ་ཡང་བོད་མི་རྣམས་བཀའ་དྲིན་བསམ་ཤེས་ཐུབ་མཁན་ཡིན་པ་དང་། གདུང་སེམས་མཉམ་སྐྱེད་ཀྱི་བརྡ་ལན་ཤུགས་ཆེན་པོ་ཞིག་ཆགས་རྒྱུ་ཡིན་པ་གསུངས་འདུགརྩ་བའི་ད་ལན་ཙམ་མ་ཟད། སྔར་ལོ་རྒྱ་གར་ནང་དུ་རིམས་ནད་ཀྱི་གནས་སྟངས་ཐོག་མར་བྱུང་བའི་སྐབས་སུའང་བཙན་བྱོལ་བོད་མི་ཚོགས་སྒེར་ཡོངས་ནས་རྒྱ་གར་སྲིད་བློན་གྱི་རོགས་སྐྱོར་ཐེབས་རྩར་ཧིན་སྒོར་ས་ཡ་མང་པོ་ཞལ་འདེབས་གནང་ཡོད་པ་རེད། ད་ལྟ་རྒྱ་གར་ནང་དུ་ཏོག་དབྱིབས་ནད་རླབས་གཉིས་པའི་ཁྲོད་དཀའ་ངལ་ཆེ་ཤོས་གཅིག་ནི། ནད་པ་ཛ་དྲགས་ཧ་ཅང་མང་རུ་ཕྱིན་པའི་ཁྲོད། སྲོག་རླུང་གི་མཐུན་རྐྱེན་མ་འདང་བའི་དཀའ་ངལ་ཤུགས་ཆེན་པོ་འཕྲད་བཞིན་པ་དང་སྟུན། ཁ་སང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་མཚུར་ཕུ་བླ་བྲང་ཀྱི་ངོ་དེབ་དྲ་ལམ་བརྒྱུད་གནས་ཚུལ་སྤེལ་བར་གཞིགས་ན། ཉེ་ཆར་དཔལ་རྒྱལ་བ་ཀརྨ་པ་མཆོག་གི་ཀུན་སྐྱོང་དགེ་རྩ་ཚོགས་པ་ནས། རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཧེམ་ཀུཎ་ཊ་དགེ་རྩ་ཚོགས་པར་སྲོག་རླུང་གི་བླུག་སྣོད ༡༠༠ ཐམ་པ་ཞལ་འདེབས་གནང་ཡོད་པ་མ་ཟད། ལྡི་ལི་ས་གནས་འགོ་འཛིན་གྱི་སྣེ་ཁྲིད་པའི་ཏོག་དབྱིབས་སྔོན་འགོག་ལས་དོན་རུ་ཁག་ལ་ PPE Kit ༡༥༠ ལྷག་ཞལ་འདེབས་གནང་ཡོད་པ་རེད་འདུག དེ་བཞིན་ཉེ་ཆར་ཕྱི་ཟླ་ ༥ པའི་ནང་དུ་ཏོག་དབྱིབས་ཀྱི་གནས་སྟངས་ཛ་དྲག་ཁྲོད། ལྡི་ལི་ནང་དུ་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པ་དང་གཞོན་ནུ་ལྷན་ཚོགས་བཅས་ནས། ནད་ཡམས་ཀྱི་མནར་བའི་བོད་མི་རྣམས་ལ་སྨན་ཁང་འཚོལ་རྒྱུ་དང་སྨན་ཅོས་ཀྱི་མཐུན་རྐྱེན་སྦྱོར་རྒྱུ་སོགས་ཀྱི་ཞབས་ཞུ་སྒྲུབ་བཞིན་པའི་ཁྲོད། རྒྱ་གར་བ་དཀའ་ངལ་ཤུགས་ཆེར་འཕྲད་མཁན་ཁག་ཅིག་ལའང་སྲོག་རླུང་གི་ཕྱག་རོགས་དང་ནད་པ་མྱུར་སྐྱོབ་ཀྱི་རླང་འཁོར་གྱི་མཐུན་རྐྱེན་སོགས་ཀྱི་ཕྱག་རོགས་གང་ཐུབ་གནང་ཡོད་པ་རེད། དེ་བཞིན་བཙན་བྱོལ་བོད་མིའི་གཞུང་འབྲེལ་མ་ཡིན་པའི་ཚོགས་པ་དང་སྒེར་ཁག་ཅིག་ནས། གཉན་རིམས་ཀྱི་ཛ་དྲག་གནས་སྟངས་ཁྲོད།  འཚོ་བའི་ཡོངས་འབབ་མེད་མཁན་དང་དཀའ་འཕྲད་བཞིན་པའི་རྒྱ་གར་ཡུལ་མི་རྣམས་ལ་བཟའ་བཅའ་སོགས་ཀྱི་རོགས་སྐྱོར་གནང་བཞིན་པ་རེད། དེ་བཞིན་བལ་ཡུལ་ནང་དུའང་དགེ་འདུན་པ་བསོད་ནམས་དབང་ཆེན་ཞུ་བ་ཞིག་གིས། སྔར་ལོ་ནས་བཟུང་ད་བར་བལ་པོའི་མི་དབུལ་ཕོངས་རྣམས་ལ་བཟའ་བཅའ་དང་དངུལ། དེ་བཞིན་སྨན་བཅོས་དང་ད་ཕྲུག་ལྟ་སྐྱོང་སོགས་ཀྱི་ཞབས་ཞུ་སྒྲུབ་མུས་རེད། ཁ་སང་སྲིད་སྐྱོང་མཆོག་གིས་གསུངས་བཤད་བརྙན་པར་དེའི་ནང་ད་དུང་། ནད་ཡམས་དང་འབྲེལ་འཛིན་སྐྱོང་བཀའ་ཤག་གི་ངོས་ནས་སྔོན་ཁབ་རིན་མེད་རྒྱག་རྒྱུ་སོགས་ཀྱི་མཐུན་རྐྱེན་གང་ཐུབ་སྦྱོར་རྒྱུའི་ཆོད་སེམས་བརྟན་པོ་ཡོད་སྐོར་གསུངས་པ་དང་འབྲེལ། སྲིད་སྐྱོང་མཆོག་གི་སྣེ་ཁྲིད་པའི་བཀའ་ཤག་ལས་ཡུན་གཉིས་པ་དེ་གཙང་ལ་རན་པ་དང་བསྟུན། ད་བར་ནད་ཡམས་ལ་གདོང་ལེན་གཙོས་པའི་ལས་དོན་ཅི་རིགས་ནང་དུ་བོད་མིའི་སྒྲིག་འཛུགས་ཀྱི་དབུས་སའི་ལས་བྱེད་པ་ཚོས་སྐུ་ལས་ཧ་ཅང་ཆེན་པོ་སྐྱོན་གནང་བར་ཐུགས་རྗེ་ཆེ་ཞུས་དང་འབྲེལ།   དམའ་རིམ་ལས་བྱེད་པའི་གླ་ཕོགས་བརྒྱ་ཆ་ ༡༨ དང་ལས་བྱེད་མཐོ་རིམ་གྱི་ཕོགས་བརྒྱ་ཆ་ ༡༠ ཙམ་སྤར་ཐུབ་པ་བྱུང་ཡོད་པ་དང་། འཕྲོད་བསྟེན་ལས་བྱེད་ཁྲོད། སྨན་ཞབས་པའི་རིམ་པ་འདྲ་མིན་གསུམ་ལ་གླ་ཕོགས་བརྒྱ་ཆ་ ༡༠ དང་ ༡༥། ༢༠ དེ་བཞིན་འཕྲོད་བསྟེན་ལས་ཁུངས་ལས་བྱེད་པ་ཚོའི་གླ་ཕོགས་བརྒྱ་ཆ་ ༤༠ ཙམ་སྤར་ཐུབ་པ་བྱུང་ཡོད་སྐོར་གསུངས་སོང་། ལྷག་པར་དུ་སྨན་ཞབས་པ་ཚོར་ནད་པ་དང་ཐད་དཀར་འབྲེལ་བ་ཆགས་སྐབས་ཁོང་རྣམས་ལ་ནད་གཞི་འགོས་པའི་གནད་དོན་ཡང་བྱུང་བཞིན་ཡོད་པ་དང་། གཉན་རིམས་གྱི་ཛ་དྲག་གནས་སྟངས་འདི་མུ་མཐུད་གནས་རྒྱུ་ཡིན་སྟབས། ཁོང་རྣམས་ལ་ཐུགས་རྗེ་ལེགས་འབུལ་གྱི་ཚུལ་དུ་ཧིན་སྒོར་སྟོངས་ཕྲག་ ༥ རེ་ཐུགས་རྗེ་ལེགས་འབུལ་གྱི་ཚུལ་དུ་འབུལ་གཏན་ཁེལ་ཡོད་པ་མ་ཟད། སྨན་ཞབས་པར་མཐུན་རྐྱེན་གང་ཐུབ་མུ་མཐུད་སྦྱོར་རྒྱུ་ཡིན་པ་གསུངས་སོང་། དེ་བཞིན་ནང་སྲིད་ཀྱི་ལས་ཁུངས་ལས་བྱེད་པ་དང་ལྷག་པར་དུ་བསམ་བྷོ་ཊ་སློབ་གྲྭའི་ལས་བྱེད་དང་དགེ་རྒན་རྣམ་པའི་གླ་ཕོགས་ནང་དུ་རྒྱ་ཆ་ ༡༥ ཙམ་སྤར་ཆ་གནང་ཐུབ་པ་བྱུང་ཡོད་སྐོར་སོགས་གསུངས་པ་དང་འབྲེལ། ལས་བྱེད་པ་རྣམས་ནས་དེ་སྔ་སྐུ་ལས་སྐྱོན་པ་བཞིན་མུ་མཐུད་སྐུ་ལས་བསྐྱོན་དགོས་པའི་སྐུལ་མ་གནང་འདུག

རྒྱ་ནག་གཞུང་ནས་རྒྱ་ནག་སྤྱི་དང་། ལྷག་པར་དུ་བོད་དང་ཤིན་ཅང་། ཧོང་ཀོང་དང་མེ་ཀའོ་སོགས་ཀྱི་ནང་ལ་གསལ་ཁ་མེད་པའི་ཐ་སྙད་དང་ཁྲིམས་སྒྲིག་གཏན་འབེབས་བྱས་ཏེ་ས་གནས་མང་ཚོགས་ཀྱི་གཞི་རྩའི་ཆོས་དད་རང་དབང་ལ་མུ་མཐུད་དམ་དྲག་དང་ཚོད་འཛིན་བྱས་པ་མ་ཟད། ཆོས་ཕྱོགས་ཀྱི་ལས་དོན་ནང་ཞུགས་མཁན་ཁག་ཅིག་རྒྱལ་ཁབ་ཀྱི་བདེ་འཇགས་སོགས་ལ་ཁ་གཡར་ཏེ་འཛིན་བཟུང་བཙན་ཁྲིད་དང་བཙོན་འཇུག་སོགས་ཀྱང་བྱེད་བཞིན་པ་མངོན་གསོལ་གནང་འདུག དེ་ཡང་ཁ་སང་ཕྱི་ཚེས་ ༡༢ ཉིན་ཨ་རིའི་ཕྱི་སྲིད་ལས་ཁུངས་ནས་འདས་ལོའི་ཕྱི་ཟླ་དང་པོ་ནས་ཕྱི་ཟླ་བཅུ་གཉིས་བར་རྒྱལ་སྤྱིའི་རྒྱལ་ཁབ་༢༠༠ ཙམ་གྱི་ཆོས་དད་རང་དབང་གི་གནས་བབ་ཐོག་དཔྱད་ཞིབ་གནང་སྟེ་་ཕྱི་ལོ་༢༠༢༠ ལོའི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་བཏོན་གནང་འདུག་པ་དང་། སྙན་ཐོ་དེའི་ནང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་དུ་ས་གནས་ཀྱི་མང་ཚོགས་རྣམས་ལ་ཆོས་དད་རང་དབང་གི་ཐོབ་ཐང་ཡོད་པ་ཁ་གསལ་འཁོད་ཡོད་པ་ལྟར། རྒྱ་ནག་གི་འགོ་ཁྲིད་ཚོས་ཀྱང་ས་གནས་ཀྱི་མང་ཚོགས་རྣམས་ནས་ཆོས་དད་རང་དབང་ལོངས་སུ་སྤྱོད་བཞིན་ཡོད་སྐོར་འགྲེལ་བརྗོད་བྱེད་བཞིན་ཡོད་ཀྱང་། དོན་དངོས་ལག་བསྟར་ཐོག་རྒྱ་ནག་གཞུང་ནས་ཡུལ་དེའི་ཁྲིམས་སྒྲིག་དང་བཀའ་ཁྱབ་ཁག་གི་ནང་ལ་རྒྱུན་ལྡན་གྱི་ཆོས་ཕྱོགས་ལས་དོན་ཞེས། རྒྱུན་ལྡན་ཞེས་པའི་ཐ་སྙད་དེའི་ནང་ལ་བྱེད་སྒོ་གང་ཚུད་ཀྱི་ཡོད་མེད་དང་། དེའི་འགྲེལ་བརྗོད་གང་ཡིན་གསལ་ཁ་མེད་པར་མང་ཚོགས་ཀྱི་ཆོས་དད་རང་དབང་ལ་ཚོད་འཛིན་དམ་དྲག་བྱེད་བཞིན་པ་མ་ཟད། རྒྱལ་ཁབ་ཀྱི་བདེ་འཇགས་ཞེས་པའི་ཐ་སྙད་དེའི་འོག་རྒྱ་ནག་སྤྱི་དང་། བོད་དང་ཤིན་ཅང་སོགས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་རྒྱ་ནག་གཞུང་གི་བཀའ་ཁྲོལ་དང་རྒྱབ་གཉེར་མེད་པར་ཆོས་ཕྱོགས་ཀྱི་ལས་དོན་གང་ཡང་སྤེལ་མི་ཆོག་པ་སོགས་ཀྱི་དམ་དྲག་ཤུགས་ཆེར་བྱེད་བཞིན་པ་མངོན་གསལ་གནང་འདུགལྷག་པར་དུ་སྙན་ཐོ་དེའི་ནང་གསལ་བའི་བོད་ནང་གི་ཆོས་དད་རང་དབང་གི་ཚན་པའི་ཁོངས་སུ། རྒྱ་ནག་གཞུང་ནས་བོད་ནང་ལ་བོད་ཀྱི་ནང་ཆོས་སློབ་གཉེར་དང་ དེ་འབྲེལ་འདུ་འཛོམས་ཀྱི་བྱ་བཞག དེ་བཞིན་ཆོས་ཕྱོགས་མི་སྣ་ཁག་ལ་དམིགས་བསལ་གྱི་དམ་དྲག་དང་དོགས་ཟོན་བྱས་པ།  ༧གོང་ས་མཆོག་དབུས་པའི་ཕྱི་ཕོགས་སུ་བཞུགས་པའི་ཆོས་ཕྱོགས་ཀྱི་དབུ་ཁྲིད་དང་། ཚོགས་པ་ཁག་གི་སློབ་གསོ་དང་ཤུགས་རྐྱེན་འོག་མ་ཚུད་པར། དེ་དག་ལ་གདོང་ལེན་བྱེད་དགོས་པ་སོགས་བཤད་པ་མ་ཟད། ཆོས་ཕྱོགས་ཀྱི་ལས་དོན་ཁག་ཏུ་ཞུགས་མཁན་རྣམས་ཀྱིས་རྒྱ་ནག་དམར་ཤོག་ཚོགས་པས་འགྲེལ་བརྗོད་བྱས་པའི་ཆོས་ཕྱོགས་ཀྱི་རྩ་འཛིན་ཁག་ལ་བརྩི་བཀུར་དང་། རྒྱ་ནག་དམར་ཤོག་ཚོགས་པ་དང་རྒྱ་ནག་རྒྱལ་ཁབ་གཉིས་རྒྱལ་ཞེན་གྱི་བསམ་བློ་བཅངས་དགོས་པའི་བཀའ་རྒྱ་གཏོང་བཞིན་པ་གསལ་འདུགམ་ཟད་འདས་ལོ་དེའི་ནང་རྒྱ་ནག་གཞུང་ནས་ཆོས་ཕྱོགས་དང་འབྲེལ་བའི་སྡེ་ཚན་ཁག་གི་འཛིན་སྐྱོང་ལས་དོན་དང་འབྲེལ་བའི་སྒྲིག་གཞི་ཁག་ལ་བསྐྱར་ཞིབ་བྱས་ཏེ། རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་གཙོས་པའི་བོད་ཀྱི་ས་གནས་ཁག་ཏུ་ཆོས་ཕྱོགས་ཀྱི་ལས་དོན་ནང་ཞུགས་པའི་རྐྱེན་གྱིས་ཉེས་མེད་འཛིན་བཟུང་དང་། མནར་གཅོད་བཏང་བ། དེ་བཞིན་གར་སོང་ཆ་མེད་དུ་བསྒྱུར་་བ་དང་བཀག་ཉར་བྱས་ཡོད་པ་སོགས་ཀྱི་གྲངས་འབོར་ཇེ་མང་དུ་ཕྱིན་ཡོད་པ་མ་ཟད། ས་གནས་མི་མང་ཁག་ཅིག་མནར་གཅོད་དེ་དག་ཁྲོད་ཚེ་སྲོག་ཤོར་བ་དང་། ཁག་ཅིག་གློད་བཀྲོལ་བཏང་ཡོད་ཀྱང་བཀག་ཉར་བྱེད་པའི་སྐབས་སུ་མནར་གཅོད་འདྲ་མིན་བཏང་སྟབས་སྐུ་ཚེ་མ་ཟིན་པའི་གནས་སྟངས་སོགས་བྱུང་ཡོད་པ་དང་། ལྷག་པར་དུ་འདས་ལོ་དེའི་ནང་རྒྱ་ནག་གཞུང་ནས་ལས་རིགས་སྦྱོང་བརྡར་སོགས་ཀྱི་མིང་བྱང་འོག་ས་གནས་མི་མང་རྣམས་དམག་གི་རང་བཞིན་ལྡན་པའི་ངལ་རྩོལ་གྱི་སྦྱོང་བརྡར་དང་རྒྱ་ནག་གི་ལྟ་གྲུབ་དང་མཐུན་པའི་སློབ་གསོའི་རིགས་འདྲ་མིན་སྤེལ་ཏེ་སོ་སོའི་ཕ་མེས་ནས་མཆེད་པའི་ཆོས་ཕྱོགས་ཀྱི་དད་མོས་དང་བྱེད་སྒོ་ཁག་དང་རྒྱང་ཐག་རིང་དུ་གཏོང་བཞིན་པ་ཡང་གསལ་སྟོན་གནང་འདུག  གཞན་ཡང་སྙན་ཐོ་དེའི་ནང་ལ་རྒྱ་ནག་གཞུང་ནས་བོད་ནང་གི་རྩོམ་པ་པོ་དང་། གཞས་བ་དང་སྒྱུ་་རྩལ་བ། བོད་ཀྱི་སྐད་ཡིག་དང་རིག་གཞུང་སློབ་གསོ་བ། དེ་བཞིན་༧གོང་ས་མཆོག་དབུས་པའི་ཆོས་ཕྱོགས་ཀྱི་དབུ་ཁྲིད་ཁག་གི་བཀའ་ཆོས་དང་བཀའ་སློབ་ཁག་ལ་བརྩི་བཀུར་ཞུ་མཁན་རྣམས་རྒྱལ་ཁབ་ཁ་བྲལ་གྱི་ཉེས་མིང་འོག་མུ་མཐུད་འཛིན་བཟུང་བྱེད་བཞིན་པ་མ་ཟད། བོད་ཀྱོ་དགོན་སྡེ་ཁག་གི་གྲྭ་བཙུན་གྱི་གྲངས་འབོར་ལ་ཚད་བཀག་བཟོས་ཏེ་ད་བར་བོད་ནང་གི་ཆོས་སྡེ་ཆེ་ཁག་བླ་རུང་སྒར་དང་ཡ་ཆེན་སྒར་གཉིས་ནས་གྲ་བཙུན་༡༧༠༠༠ ཙམ་ཕྱིར་ཕུད་བཏང་ཟིན་པ་མ་ཟད། དགོན་སྡེ་ཁག་ཅིག་ཏུ་༧གོང་ས་མཆོག་གི་སྐུ་པར་ཚབ་ཏུ་རྒྱ་ནག་གི་འགོ་ཁྲིད་མའོ་དང་ཞི་ཅིན་ཕིང་གི་པར་འགྲེམ་སྤེལ་བྱེད་དུ་བཅུག་པ་དང་། ལྷག་པར་དུ་ད་ལྟའི་ཏོག་དབྱིབས་རིམས་ནད་ཀྱི་གནས་སྟངས་ཁ་ལ་ཁ ལ་ཁྱེར་ཏེ་དེ་སྔ་ནས་ཆོས་སྡེ་ཁག་ལ་གསང་བའི་ལྟ་སྲུང་གི་ཡོ་ཆས་བཙུགས་ཏེ་གྲྭ་བཙུན་རྣམས་ཀྱི་ཉིན་རེའི་བྱ་བཞག་ལ་ཚོད་འཛིན་བྱེད་མུས་ཐོག ས་གནས་གཅིག་ནས་གཞན་དུ་བསྐྱོད་སྐབས་རྒྱ་གཞུང་གི་ལས་བྱེད་ཀྱིས་བཀའ་འཁྲོལ་དགོས་པ་སོགས་བཟོས་ཏེ་དམ་དྲག་རིགས་བྱེད་ཤུགས་ཆེ་རུ་བཏང་ཡོད་པ་ཐེར་འདོན་གནང་འདུགདེ་བཞིན་རྒྱ་ནག་གཞུང་ནས་འདས་ལོ་དེའི་ནང་བོད་ནང་གི་བོད་ཕྲུག་ལོ་ངོ་༡༨ མན་རྣམས་ཆོས་ཕྱོགས་ཀྱི་ལས་དོན་ལ་ཞུགས་མི་ཆོག་པ་བཟོས་པ་དང་། སློབ་གྲྭ་ཁག་ཏུ་རྒྱ་ཡིག་གཙོ་བཟུང་ཐོག་སློབ་ཁྲིད་དགོས་པ། དགོན་སྡེ་ཁག་གི་གྲ་བཙུན་རྣམས་ངེས་པར་དུ་ཆབ་སྲིད་སློབ་གསོའི་ནང་ཞུགས་དགོས་པ། ཆོས་སྡེ་ཁག་གི་འཛིན་སྐྱོང་ལས་དོན་ཁྲོད་རྒྱ་ནག་གཞུང་གི་མི་སྣ་བསྐོ་བཞག་ངེས་པར་དུ་བྱེད་དགོས་པ། རྒྱ་ནག་གི་ངོས་འཛིན་བྱས་པའི་༧པཎ་ཆེན་རིན་པོ་ཆེ་ལ་བརྩི་བཀུར་བྱེད་དགོས་པ་སོགས་ཆོས་དད་རང་དབང་གཙོས་པའི་གཞི་རྩའི་ཐོབ་ཐང་སྤྱི་ཡོངས་ཐོག་ལ་དམ་དྲག་བྱེད་བཞིན་པ་ཁག་མངོན་གསལ་དང་སྦྲགས། རྒྱ་ནག་གཞུང་ནས་མུ་མཐུད་བོད་ནང་གི་གནས་སྟངས་དེ་དག་ཐོག་ཉམས་ཞིབ་གནང་མཁན་ཕྱིའི་སྲིད་གཞུང་ཁག་གི་སྐུ་ཚབ་དང་། གསར་འགོད་པ་རྣམས་ལ་དམ་དྲག་ཆེན་པོ་བྱེད་བཞིན་ཡོད་ཀྱང་། ཨ་རི་གཞུང་ནས་རྒྱ་ནག་ལ་ཡོད་པའི་ཨ་རི་གཞུང་ཚབ་དང་། ཨ་རིའི་ཆོས་དད་རང་དབང་ལྷན་ཚོགས་སོགས་བརྒྱུད་བོད་ནང་གི་གནས་སྟངས་རྒྱུས་ལོན་བྱེད་བཞིན་པ་མ་ཟད། ཨ་རིའི་ཁྲིམས་སུ་བཅད་པ་ Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་འོག་ཆོས་དད་རང་དབང་གཙོས་པའི་འགྲོ་བ་མིའི་ཐོབ་ཐང་རྩིས་མེད་རྡོག་རིག་གཏོང་མཁན་གྱི་རྒྱ་ནག་འགོ་ཁྲིད་རྣམས་ལ་ཉེས་ཆད་འགེལ་་རྒྱུ་དང་། ལྷག་པར་དུ་ཉེ་ཆར་གཏན་འབེབས་གནང་བའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་གཞིའི་དགོངས་དོན་འོག་བོད་ཀྱི་ཆོས་རིག་སྲུང་སྐྱོབ་དང་། ལྷག་པར་དུ་༸གོང་ས་མཆོ་གི་༸སྐུའི་ཡང་སྲིད་ཀྱི་གནད་དོན་དེ་ནི་བོད་མིའི་ཆོས་ཕྱོགས་དང་འབྲེལ་བའི་གནད་དོན་ཞིག་ཡིན་སྟབས་དེར་རྒྱ་ནག་གཞུང་ནས་ཐེ་བྱུས་བྱེད་རྒྱུའི་ཐོབ་ཐང་མེད་པ་ཁ་གསལ་འཁོད་པ་སོགས་གསལ་སྟོན་གནང་འདུགགཞི་རྩའི་ཨ་རི་ཕྱི་སྲིད་ལས་ཁུངས་ནས་ལོ་ལྟར་རྒྱལ་སྤྱིའི་ཐོག་ཆོས་དད་རང་དབང་གི་གནས་བབ་གོང་མཐོར་ཡོང་སླད་རྒྱལ་ཁབ་སོ་སོའི་ནང་གི་ཆོས་དད་རང་དབང་གི་གནས་བབ་ཐོག་སྙན་ཐོ་འདོན་སྤེལ་གནང་སྟེ། ཡུལ་དེའི་གྲོས་ཚོགས་སུ་ཕུལ་གྱི་ཡོད་པ་དང་། ད་རེས་ཡོངས་གྲགས་གནང་བའི་སྙན་ཐོའི་ནང་རྒྱ་ནག་གཞུང་ནས་བོད་ནང་ཙམ་མ་ཟད། རྒྱ་ནག་ཁྱོན་ཡོངས་སུ་ཡོད་པའི་ཡི་ཤུའི་ཆོས་དད་པ་དང་། ཁ་ཆེའི་ཆོས་དད་པ། དེ་བཞིན་རྩ་རླུང་ཆོས་འཁོར་རྒྱུད་འཛིན་མཁན་བཅས་ལ་ཡང་དེ་མཚུངས་ཀྱིས་དམ་དྲག་དང་མནར་གཅོད་གཏོང་བཞིན་པ་སོགས་གསལ་སྟོན་གནང་འདུག   མ་ཟད། སྙན་ཐོ་འདོན་སྤེལ་དང་འབྲེལ་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken ལགས་ནས། ཆོས་དད་རང་དབང་ནི་འགྲོ་བ་མིའི་ཐོབ་ཐང་གི་ཆ་ཤས་གལ་ཆེན་པོ་ཞིག་ཆགས་ཀྱི་ཡོད་སྟབས། ཨ་རིའི་ངོས་ནས་དེའི་ཐོག་མུ་མཐུད་ལས་དོན་སྤེལ་རྒྱུ་སོགས་འགྲེལ་བརྗོད་གནང་འདུག