རྒྱ་ནག

སྤྱི་ཚོགས་དྲ་ལམ་བརྒྱུད་འདི་གར་གནས་ཚུལ་བཏང་འབྱོར་བྱུང་བར་གཞིགས་ན། རྒྱ་ནག་དམར་ཤོག་གཞུང་གིས་འདི་ལོའི་ཟླ་བ་བཞི་བའི་ནང་བོད་རང་སྐྱོང་ལྗོངས་ཀྱི་ཏང་ཡོན་ལས་བྱེད་དམ་དམར་ཤོག་ཚོགས་མི་རྣམས་ལ་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་ཞེས་པ་ཞིག་བཀྲམས་པའི་ནང་དུ། སྤྱི་ཡོངས་ཀྱི་ཆོས་ལུགས་ཀྱི་བྱེད་སྒོ་ཡོངས་ལ་འབྲེལ་ཐག་བཅད་ནས་མར་ཁེ་སི་རིང་ལུགས་ཀྱི་དངོས་གཙོ་སྨྲ་བ་དང་ལྷ་མེད་སྨྲ་བ་མཐའ་འཁྱོངས་ལག་བསྟར་བྱེད་དགོས་བར་སྐུལ་མ་བཏང་འདུགརྩ་བའི་ཐེངས་འདིར་རྒྱ་ནག་གིས་སློབ་སྦྱོང་གི་ཡིག་ཆའི་ཆ་ཤས་འོག་བོད་རིགས་དམར་ཤོག་ཚོགས་མི་རྣམས་ལ་བཏང་བའི་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་ཞེས་པ་དེ་ཀྲུང་གོའི་གུང་ཁྲན་ཏང་གི་སྒྲིག་ཡིག་དང་།  གནས་བབ་གསར་པའི་འོག་གི་ཏང་ནང་གི་ཆབ་སྲིད་འཚོ་བའི་སྐོར་གྱི་ཚད་གཞི་འགའ་ཞིག  དེ་བཞིན་ཀྲུང་གོའི་གུང་ཁྲན་ཏང་གི་ཏང་ཡོན་ལ་སློབ་གསོ་དང་དོ་དམ་བྱེད་པའི་ལས་ཀའི་སྲོལ་ཡིག་གི་ཁྲིམས་སྲོལ་གཞིར་བཟུང་། བོད་རང་སྐྱོང་ལྗོངས་ཟེར་བའི་དོན་དངོས་དང་ཟུང་འབྲེལ་བྱས་ནས་ཚོད་ལྟའི་ཚུལ་དུ་བཟོས་པ་ཞིག་ཡིན་ཚུལ་བསྒྲགས་འདུག ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་དེ་དག་གི་ནང་དུ། བོད་རིགས་དམར་ཤོག་ཚོགས་མི་རྣམས་ཀྱིས། ཏཱ་ལ་སྐུ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་ཟེར་བ་དང་དབྱེ་མཚམས་གསལ་པོ་མཐའ་གཅིག་ཏུ་ཕྱེ་ནས་དར་ཆ་གསལ་སྟོན་གྱིས་ཏཱ་ལའི་རུ་ཚོགས་ཀྱིས་ཆོས་ལུགས་ལ་བརྟེན་ནས་བཟོས་པའི་ལྡོག་ཕྱོགས་ཀྱི་ཤུགས་རྐྱེན་ངན་པ་མེད་པ་བཟོ་དགོས་པ་མ་ཟད། ཕྱི་རྒྱལ་དུ་བསྐྱོད་དེ་ཏཱ་ལ་སྐུ་ཕྲེང་བཅུ་བཞི་པར་མཇལ་བའམ་ཡང་ན་ཏཱ་ལ་སྐུ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་ཀྱིས་གཉེར་བའི་ཆོས་ཚོགས་དང་། ཆོས་ལུགས་བྱེད་སྒོ་སྤེལ་རིགས་ནང་ཞུགས་པར་དུས་ཐོག་ཏུ་བཀག་འགོག་བྱ་དགོས་པ། དེ་བཞིན་ཁྱིམ་ཚང་དུ་མཆོད་གཤོམ་མི་འཛུགས་པ་དང་། བག་སྟོན་དང་གཤིན་པོ་དུར་སྐྱེལ་གྱི་མཛད་སྒོ་སོགས་དམངས་སྲོལ་བྱེད་སྒོའི་སྐབས་ཆོས་ལུགས་མི་སྣ་གདན་དྲངས་ནས། ཆོས་ལུགས་ཀྱི་བྱེད་སྒོ་སྤེལ་བར་ངེས་པར་དུ་སྔོན་ནས་གོང་རིམ་ལ་སྙན་སེང་ཞུ་དགོས་པ། ལུས་ཐོག་ཏུ་ཆོས་ལུགས་ཀྱི་མཚོན་རྟགས་མི་བརྐོ་བ་སོགས་ཆོས་ལུགས་དང་ཡོངས་སུ་འབྲེལ་ཐག་གཅོད་དགོས་པའི་བཀའ་རྒྱ་བཏང་བ་མ་ཟད། ཕྱི་རུ་ཡོད་དུས་ཡིད་མི་ཆེས་ཀྱང་ནང་དུ་སླེབས་དུས་ཡིད་ཆེས་པ། ལས་གནས་སུ་ཡོད་དུས་ཡིད་མི་ཆེས་ཀྱང་ལས་འཁྱུར་ངལ་གསོ་བཞག་དུས་ཡིད་ཆེས་བ་བཅས་ཀྱི་བྱ་སྤྱོད་ལ་གཏན་འགོག་མཐའ་གཅིག་ཏུ་བྱ་དགོས་པའི་བཀའ་རྒྱ་བཏང་འདུག ད་དུང་བོད་རིགས་དམར་ཤོག་ཚོགས་མི་རྣམས་ཀྱིས་རྣམ་པ་ཅི་རིགས་ཀྱི་སྒོ་ནས་ཆོས་ལུགས་དང་འབྲེལ་ཐག་གཅོད་དགོས་བ་མ་ཟད། རང་འགུལ་ངང་དམར་ཤོག་གི་མཚན་རྟགས་འདོགས་པ་དང་། ཕྲེང་བ་དང་སྐུ་འདྲ་སོགས་ཆོས་ལུགས་ཀྱི་མཚོན་རྟགས་མི་འདོགས་པ། གྲྭ་བཙུན་རྣམས་གདན་དྲངས་ནས་མོ་འདེབས་སུ་འཇུག་རྒྱུ་དང་ཕྲུ་གུར་མིང་འདོགས་པ་བཅས་ལ་མཐའ་གཅིག་ཏུ་དགག་གཞག་ནན་མོ་བྱེད་དགོས་པ་མ་ཟད། ཁྲིམས་ལྟར་ནར་མ་སོན་པའི་བུ་ཕྲུག་རྣམས་དགོན་པ་གྲྭ་ཚང་དུ་ཆོས་སྒོར་ཞུགས་སུ་མི་འཇུག་པའི་ངན་སྐུལ་བྱས་འདུག དེ་བཞིན་བོད་ཁུལ་གྱི་སྲོལ་རྒྱུན་གྱི་ལམ་ལུགས་སྟེ། བག་སྟོན་དང་གཤིན་པོ་དུར་སྐྱེལ་གྱི་མཚོན་པའི་དམངས་སྲོལ་གྱི་ནང་དུ་ཆོས་ལུགས་ཀྱི་མི་སྣ་གདན་འདྲེན་ཞུ་རྒྱུ་མེད་པར། ཆོས་ལུགས་དང་འབྲེལ་བའི་བྱེད་སྒོར་འཛུལ་ཞུགས་བྱེད་དགོས་ན་ངེས་བར་དུ་རྒྱ་ནག་གི་གོང་རིམ་དཔོན་རིགས་ལ་ཡར་ཞུ་བྱེད་དགོས་བའི་བླངས་བྱ་བཏོན་ཏེ། ནང་མི་གཉེན་འབྲེལ་རྣམས་རྒྱ་གར་དུ་སྐྱོད་ནས་༸གོང་ས་མཆོག་ལ་མཇལ་བཅར་ཞུ་རྒྱུའི་བྱ་བ་ལ་དངོས་སུ་དགག་གཞག་གནང་དགོས་བ་དང་། མི་སུ་ཞིག་གིས་རེ་ཞུ་དེར་ངོས་ལེན་མ་བྱས་ཚེ་འཕྲལ་དུ་གོང་རིམ་ལ་གནས་ཚུལ་ཡར་ཞུ་བྱེད་དགོས་བ་སོགས་ཀྱི་རེ་སྐུལ་བྱས་འདུག  མ་ཟད་སྤྱི་ཚོགས་ཀྱི་ལས་དོན། དཔལ་འབྱོར། རིག་གནས། སྤྱི་ཚོགས་ཀྱི་བྱ་གཞག་བཅས་ལ་ཐེ་གཏོགས་མི་བྱེད་པ་དང་གནས་རི་དང་ལྷ་མཚོ་ལ་བརྟེན་ནས། རྒྱལ་ཁབ་ཀྱི་འཛུགས་སྐྲུན་རྣམ་གྲངས་ལ་འགོག་རྐྱེན་མི་བཟོ་བ་བྱེད་དགོས་པར་གསལ་འདུག གཞི་རྩའི་སྔར་ལོར་ལོར་འདི་ག་གསར་ཁང་ལ་བོད་ནས་གནས་ཚུལ་མཁོ་སྤྲོད་བྱས་པ་ལྟར་ན། བོད་ཁུལ་དུ་རྒྱ་ནག་གིས་ཆེད་དུ་དམར་ཤོག་གི་ཚོགས་མི་རྩ་འཛུགས་བྱེད་བཞིན་པ་དང་འབྲེལ་ནས།  མཚོ་སྔོན་པོའི་གཡས་གཡོན་དང་བྲག་དཀར་རྫོང་ཁོངས་སོགས་ཀྱི་ས་གནས་གང་སར་ཁོར་ཡུག་གཙང་བཟོ་ལ་ཁ་གཡར་ནས། གཞུང་ལམ་དང་ཐག་ཉེ་བའི་ཆོས་ལུགས་ཀྱི་མཚོན་བྱེད་དེ། མ་ཎི་རྡོ་བརྐོས་དང་དར་ལྕོག། དེ་བཞིན་བསང་ཁྲི་སོགས་གཙང་བཟོ་བྱེད་དགོས་བའི་བཀའ་བཏང་བ་ལྟར། བོད་རིགས་དམར་ཤོག་ཚོགས་མི་རྣམས་ཀྱིས་དངོས་སུ་གོང་རིམ་གྱི་བཀའ་རྒྱ་དེ་ལག་བསྟར་བྱས་ཏེ། མ་ཎི་རྡོ་བརྐོས་དང་དར་ལྕོག་སོགས་རྨང་ནས་རྩ་གཏོར་བྱས་ཡོད་པར་འགྲེལ་བརྗོད་བྱས་ཡོད།

རྒྱ་གར་གྱི་བདེ་སྲུང་བློན་ཆེན་སྐུ་ཞབས་Rajnath Singh མཆོག་གིས་རྒྱ་གར་ངོས་ནས་སྔར་ལོ་ལ་དྭགས་གྷལ་ཝན་ཁུལ་གྱི་ས་མཚམས་ཀྱི་རྩོད་རྙོག་ཁྲོད་ཚེ་སྲོག་ཤོར་བའི་རྒྱ་གར་གྱི་མཐའ་མཚམས་དམག་མི་རྣམ་པའི་བློས་གཏོང་དེ་ནམ་ཡང་བརྗེད་རྒྱུ་མིན་སྐོར་འགྲེལ་བརྗོད་དང་འབྲེལ། རྒྱ་གར་ལ་དམག་སྟོབས་ཆ་ནས་ཡུལ་འདིར་ཚུར་རྒོལ་བྱེད་མཁན་ཡོངས་ལ་གདོང་ལེན་བྱ་རྒྱའི་ནུས་པ་ཡོད་སྐོར་གསུངས་འདུགདེའང་རྒྱ་གར་གྱི་བརྒྱུད་ལམ་ཁག་ཏུ་ཐོན་པའི་གནས་ཚུལ་ནང་གསལ་ལྟར་ན། སྐུ་ཞབས་ Rajnath Singh མཆོག་རྒྱ་གར་གྱི་དམག་སྤྱི་ཆེན་མོ་ Gen. Manoj Mukund Naravane ལགས་དང་ལྷན་རྒྱ་གར་བྱང་ཕྱོགས་ལ་དྭགས་ཁུལ་དུ་གཞུང་འབྲེལ་གྱིས་ཆེད་ཕེབས་གནང་སྟེ་ཉིན་གསུམ་རིང་ལ་ས་ཁུལ་དེར་ཡོད་པའི་རྒྱ་གར་གྱི་མཐའ་དམག་གི་དཔོན་རིགས་རྣམས་དང་ཐུག་འཕྲད་ཀྱིས་ས་མཚམས་ཁུལ་གྱི་དམག་དོན་ཐད་གཟིགས་ཞིབ་གནང་བཞིན་ཡོད་པ་མ་ཟད། ཁོང་གིས་ཁ་སང་ལ་དྭགས་ཀྱི་དམག་མི་རྣམས་ལ་གཏམ་བཤད་གནང་བའི་སྐབས། གཞི་རྩའི་རྒྱ་གར་ནི་དུས་རྒྱུན་ནས་ཁྱིམ་མཚེས་རྒྱལ་ཁབ་ཁག་དང་ལྷན་དུ་དཀའ་ངལ་ཡོད་ཚད་གྲོས་མོལ་བརྒྱུད་ནས་སེལ་རྒྱུར་ཡིད་ཆེས་བྱེད་མཁན་ཞིག་ཡིན་རུང་། ཚུར་རྒོལ་བྱེད་མཁན་རིགས་ལ་བཟོད་བསྲན་བྱེད་ཐབས་བྲལ་བ་དང་། དམགས་སྟོབས་ཆ་ནས་རྒྱ་གར་ལ་ཚུར་རྒོལ་དེའི་རིགས་ལ་གདོང་ལེན་བྱ་རྒྱུའི་ནུས་པ་ཆ་ཚང་ཡོད་པ་གསུངས་འདུགདེ་བཞིན་ཁོང་གིས། རྒྱ་གར་གྱིས་ད་ལྟའི་བར་དུ་རྒྱལ་ཁབ་གཞན་སུ་ཞིག་ལ་ཡང་དཔུང་འཇུག་བྱེད་མ་མྱོང་ཞིང་གཞན་གྱི་ས་སོར་གང་ཙམ་ཡང་དབང་བསྒྱུར་བྱེད་མྱོང་མེད་པར་མངོན་གསལ་གྱིས། རྒྱ་གར་གྱིས་དུས་རྒྱུན་རྒྱལ་ཁབ་གཞན་ཞིག་ལས་རྣམ་པར་རྒྱལ་འདོད་ཀྱི་དམིགས་འབེན་བཅིངས་མྱོང་མེད་སྐོར་གསུངས་འདུག རྩ་བའི་རྒྱ་གར་གྱི་བདེ་སྲུད་བློན་ཆེན་མཆོག་གིས་ཐེངས་འདིའི་ལ་དྭགས་ཁུལ་གྱི་གཞུང་འབྲེལ་ཕྱོགས་བསྐྱོད་དང་འབྲེལ། ཁ་སང་རེས་གཟའ་ཟླ་བའི་ཉིན་དྲ་ལམ་ནས། མཐའ་མཚམས་ཀྱི་གཞུང་ལམ་འཛུགས་སྐྲུན་དོ་དམ་ལས་ཁུངས་ཀྱིས་གསར་རྒྱག་བྱས་པའི་ཟམ་ཆེན་ཁྱོན་ ༦༣ དབུ་འབྱེད་གནང་ཡོད་པ་དང་། དེའང་ལ་དྭགས་ནང་གི་ཟམ་ཆེན་ ༡༡ དང་། ཨ་རུ་ན་ཅལ་ནང་ ༢༩ ཨུ་ཊ་ར་ཁན་ཁུལ་དུ་ཟམ་ཆེན་ ༦ Jammu Kashmir ནང་ ༤ ཧི་མ་ཅལ་ནང་གསུམ། འབྲས་ལྗོངས་ནང་དྲུག གཞན་ཡང་ Manipur དང་ Nagaland ནང་གཅིག་རེ་བཅས་དབུ་འབྱེད་གནང་འདུག ཟམ་ཆེན་དེ་དག་གི་བཟོ་བསྐྲུན་འཆར་འགོད་པས་གསར་ལམ་ཁག་ལ། ཐེངས་འདིའི་ཟམ་ཆེན་དེ་དག་གིས་མཐའ་དམག་ཙམ་མ་ཡིན་པར་ས་གནས་ཡུལ་མི་དང་ཡུལ་སྐོར་སྤྲོ་འཆམ་པ་བཅས་ལ་ཕན་ནུས་ཆེན་པོ་ལྡན་རྒྱུ་ཡིན་པ་གསུང་ཡོད་པ་རེད་འདུག དེའི་བར་ན་ཟླ་འདིའི་ཚེས་༢༥ཡིན། རྒྱ་ནག་དམར་ཤོག་སྲིད་གཞུང་བཙུགས་ནས་མི་ལོ་ཧྲིལ་བོ་བརྒྱ་འཁོར་གྱི་ཡོད་པའི་རྒྱལ་སྟོན་དུས་ཆེན་དང་བསྟུན་ནས།  རྒྱ་ནག་སྲིད་གཞུང་གིས་ལྷ་ས་ནས་ཉིང་ཁྲི་བར་གྱི་ལྷ་ཉིང་ལྕགས་ལམ་དངོས་སུ་སྒོ་འབྱེད་ཀྱིས་བོད་ཁུལ་གྱི་ཆེས་ཐོག་མའི་གློག་རླངས་ཅན་གྱི་ཤུགས་འགྲེམས་མེ་འཁོར་ཐོག་མ་དེ་བོད་ཁུལ་དུ་ཆེད་གཏོང་བྱས་ཡོད་པ་རེད།ཐེངས་འདིའི་བོད་ཁུལ་གྱི་ལྷ་ཉིང་གི་མེ་འཁོར་ལྕགས་ལམ་དེར་ཕུག་ལམ་༤༩ དང་ཟམ་ཆེན་ ༡༢༡ ལྷག་གིས་གྲུབ་ཡོད་པ་མ་ཟད། ལྷ་ས་དང་ཉིང་ཁྲི་བར་དུ་སྤྱི་ལེ་ ༡༧༠༠ ལྷག་ཡོད་པའི་འགྲིམ་འགྲུལ་དེ་ཆུ་ཚོད་ ༤༨ ནས་ཆུ་ཚོད་ ༡༣ རིང་གི་འགྲུལ་ལམ་དུ་བཟོ་སྐྲུན་བྱས་ཡོད་པར་བསྒྲགས་འདུག རྒྱ་ནག་གི་གཞུང་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ལྷ་ཉིང་ལྕགས་ལམ་འདི་ཉིད་ལྷ་ས་དང་ལྷོ་ཁ། ཉིང་ཁྲི་བཅས་གྲོང་ཁྱེར་གསུམ་དུ་ཁྱབ་ཡོད་ཅིང་། ལམ་རྒྱུད་དུ་བོད་ལྗོངས་ཀྱི་མི་འབོར་སྟུག་པོའི་ས་ཁོངས་བརྒྱུད་དགོས་པ་དང་། ལྕགས་ལམ་ཤར་གཏོང་ཐུབ་པ་དེས་ལྷ་ས་དང་ལྷོ་ཁ། ཉིང་ཁྲི་བཅས་ཀྱི་བར་དུ་འགྲོ་སྐྱོད་བྱེད་པའི་དུས་ཚོད་སྔར་བས་ཇེ་ཐུང་དུ་གཏོང་རྒྱུ་ཡིན་པ་མ་ཟད། དངོས་ཟོག་སྐྱེལ་འདྲེན་སྔར་ལྷག་ཤུགས་ཆེར་གཏོང་རྒྱུ་ཡིན་སྐོར་འཁོད་འདུག ཐེངས་འདིའི་རྒྱ་ནག་གིས་ཤར་གཏོང་བྱས་པའི་ལྷ་ཉིང་གི་མེ་འཁོར་དེ་ནི་ལྷོ་བོད་ཁུལ་གྱི་ས་མཚམས་སུ་ཁེལ་གྱི་ཡོད་སྟབས། རྒྱ་གར་གྱི་བྱང་ཤར་གྱི་མངའ་སྡེ་འབྲས་ལྗོངས་དང་ས་ཐག་ཉེ་བའི་འཕགས་བོད་ཀྱི་མཐའ་མཚམས་ཁུལ་གྱི་གློག་རླངས་ཀྱི་མེ་འཁོར་དང་པོ་དེ་ཆགས་ཀྱི་ཡོད་པ་རེད་འདུགགཞི་རྩའི་སྔར་ལོའི་འཕགས་བོད་ས་མཚམས་ཀྱི་གྷལ་ཝན་ལུང་གཤོངས་སུ་རྒྱ་དཀར་ནག་གི་དམག་མིའི་བར་གདོང་ཐུག་བྱུང་སྟེ་ཕྱོགས་གཉིས་ཀྱི་མཐའ་དམག་ཤི་རྨས་ཐེབས་པའི་གནད་དོན་དང་འབྲེལ་ནས། ད་བར་ཕྱོགས་གཉིས་ཀྱི་དམག་དོན་སྐུ་ཚབ་བར་ལ་གྲོས་མོལ་ཐེངས་ ༡༡ བྱས་ཟིན་ནའང་ད་དུང་མཐའ་མཚམས་ཁག་གི་དམག་མི་རྣམས་ཡོངས་སུ་ཕྱིར་འཐེན་བྱེད་རྒྱུར་གྲོས་འཆམ་བྱུང་མེད་སྟབས། ད་ལྟའི་ཕྱོགས་གཉིས་ནས་འཕགས་བོད་མཐའ་མཚམས་ཁུལ་དུ་འཛུགས་སྐྲུན་གྱི་ལས་གཞིའི་རྣམ་གྲངས་ཤུགས་ཆེ་རུ་བཏང་སྟེ་ཕྱོགས་སོ་སོའི་མཐའ་དམག་གི་དཔུང་ཁག་ངོམ་བཞིན་པ་རེད་འདུག  

བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཚན་པའི་གོ་སྒྲིག་འོག་ཉེ་ལམ་ཚེས་ ༢༥ ནས་ ༢༧ བཅས་ཉིན་གྲངས་གསུམ་རིང་བོད་ཀྱི་ཁོར་ཡུག་གི་ཚོགས་ཆེན་ཐེངས་གསུམ་པ་ཚོགས་འདུག་པ་དང་སྦྲགས།  ཚོགས་ཆེན་དེའི་ཐོག་སྐྱབས་རྗེ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གི་དབུས་པའི་ཡུ་རོབ་ཁུལ་གྱི་གྲོས་ཚོགས་འཐུས་མི་དང་།   རྒྱལ་ཁབ་འདྲ་མིན་བརྒྱད་ནས་ཕེབས་པའི་ཁོར་ཡུག་ཆེད་མཁས་པ་གྲགས་ཅན་ ༡༥  ནས་ལྷན་ཞུགས་ཀྱིས་བོད་ཀྱི་ཁོར་ཡུག་གི་གནས་སྟངས་ཐད་རྒྱལ་སྤྱིའི་དྲ་ཐོག་ཚོགས་འདུ་ཚོགས་ཡོད་པ་རེད། ཉིན་གྲངས་གསུམ་རིང་གི་ཚོགས་ཆེན་ཐོག་ཚོགས་ཞུགས་པ་རྣམས་པས་བོད་མཐོ་སྒང་གི་ཁོར་ཡུག་གི་གལ་འགངས་ཤེས་རྟོགས་དང་། གོ་ལ་ཧྲིལ་པོའི་གནམ་གཤིས་འགྱུར་ལྡོག་གི་འབྲེལ་བ།    ས་མཚམས་ལས་བརྒལ་བའི་ཆུ་བོ་དང་། བོད་མཐོ་སྒང་ནས་འབབ་བཞིན་པའི་ཆུ་བོ་ཁག་གི་གནས་བབ།  དེ་བཞིན་ཁོར་ཡུག་སྲུང་སྐྱོབ་ཁྲོད་འགྲོ་བ་མིའི་ཐོབ་ཐང་གི་འོས་འགན་ཞེས་པའི་བརྗོད་གཞི་ཐོག་བགྲོ་གླེང་གནང་འདུག སྐབས་དེར་ཚོགས་ཞུགས་པས་བོད་ཀྱི་ཁོར་ཡུག་སྲུང་སྐྱོབ་ཐད་ཕྱི་ཕྱོགས་ཀྱི་རྒྱལ་ཁབ་དང་ས་གནས་ཡུལ་མི་ནས་ག་རེ་གནང་ཐུབ་མིན་དང་།   བོད་ཀྱི་ཆུ་བོའི་གལ་གནད།  དེ་བཞིན་བོད་ཀྱི་འཁྱགས་རོམས་ཀྱི་ཞུ་ཚད་ཧ་ཅང་མྱུར་པོ་ཆགས་བཞིན་པའི་སྐོར་བཅས་བོད་ཀྱི་ཁོར་ཡུག་གི་ཆེས་ཛ་དྲག་གི་གནས་སྟངས་སྐོར་བགྲོ་གླེང་གནང་འདུག  མ་ཟད།   གནམ་གཤིས་འགྱུར་ལྡོག་ཕྱིན་པ་དེས་བོད་ཀྱི་ས་གནས་མང་ཚོགས་ཀྱི་འཚོ་བ་དང་སྣོད་བཅུད་རྟེན་འབྲེལ་ལ་ཤུགས་རྐྱེན་སྤྲོད་པ་དང་ལྷག་པར་དུ་ཉེ་དུས་ནས་བོད་མཐོ་སྒང་དུ་རང་བྱུང་གོད་ཆགས་ཀྱི་རྐྱེན་ངན་ཇེ་མང་དུ་འགྲོ་བཞིན་པ་སོགས་གླེང་སློང་གནང་འདུག ཚོགས་ཆེན་གྱི་ཉིན་གསུམ་དང་འབྲེལ་འདི་ག་རླུང་འཕྲིན་ཁང་ནས་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཚན་པའི་འགན་འཛིན་འཛམ་ལྷ་བསྟན་པ་རྒྱལ་མཚན་ལགས་སུ་བཀའ་འདྲི་ཞུས་སྐབས།  བོད་མཐོ་སྒང་གི་ཁོར་ཡུག་དང་གོ་ལའི་གནམ་གཤིས་འགྱུར་ལྡོག་གི་འབྲེལ་བ་དང་།  དེ་བཞིན་ཕན་ཚུན་ཤུགས་རྐྱེན་གང་སྤྲོད་མིན་ལྷག་པར་དེར་གདོང་ལེན་ཇི་ལྟར་་གནང་དགོས་པ་དང་།    རྒྱལ་སྤྱིའི་ཐོག་བོད་མཐོ་སྒང་གི་ཁོར་ཡུག་དེ་གལ་ཆེན་ཡིན་པ་ངོ་སྤྲོད་སོགས་ནི་ཚོགས་ཆེན་གྱི་དམིགས་ཡུལ་ཡིན་པར་གསུངས་སོང་། དེ་བཞིན་ཐེངས་འདིའི་ཚོགས་ཆེན་ཐོག་མཁས་དབང་དང་དཔྱད་ཞིབ་པ་ཚོས་བོད་ཀྱི་ཁོར་ཡུག་སྲུང་སྐྱོབ་ཐད་དགོངས་ཚུལ་ག་རེ་ཕེབས་སོང་ཞེས་བཀའ་འདྲི་ཞུས་སྐབས་ཁོང་གིས། ཚོགས་ཆེན་ཐོག་གསུང་བཤད་པ་ཚོས་བོད་མཐོ་སྒང་གི་ཁོར་ཡུག་སྲུང་སྐྱོབ་བྱེད་རྒྱུ་དེ་བོད་ཙམ་མིན་པར་ཨེ་ཤ་ཡའི་རྒྱལ་ཡོངས་དང་ལྷག་པར་འཛམ་གླིང་གོ་ལ་ཧྲིལ་པོར་གལ་ཆེན་ཆགས་ཀྱི་ཡོད་པ་དང་།  དེ་བཞིན་ཚན་རིག་པ་དང་རྒྱལ་ཁབ་ཚང་མ་མཉམ་འབྲེལ་གྱིས་བོད་མཐོ་སྒང་གི་ཁོར་ཡུག་གནས་སྟངས་ཐད་ཞིབ་འཇུག་བྱེད་དགོས་པ།  ལྷག་པར་བོད་ཀྱི་ཁོར་ཡུག་སྲུང་སྐྱོབ་སླད་བོད་མིའི་ཡུལ་སྲོལ་གོམས་གཤིས་དང་སྔར་ཡོད་པའི་ཤེས་བྱ་ལ་གུས་རྩི་དགོས་པ་དང་།  རྒྱ་གཞུང་གིས་བོད་ནང་གི་གནམ་གཤིས་འགྱུར་ལྡོག་གི་ཤུགས་རྐྱེན་ལ་རྒྱུས་ལོན་གྱིས་དེར་གདོང་ལེན་བྱེད་པར་དེར་འབྲེལ་གྱི་སྲིད་བྱུས་ཁ་ཡོད་ལག་ཡོད་ཀྱིས་ལག་བསྟར་དགོས་པ་དང་།   ས་གནས་བོད་མི་ནས་གནམ་གཤིས་འགྱུར་ལྡོག་ལ་གདོང་ལེན་གནང་དགོས་པ་སོགས་ཀྱི་དོན་ཚན་དྲུག་ལ་འགྲེལ་བརྗོད་གནང་སོང་། གཞི་རྩའི་ད་ལན་གྱི་ཚོགས་ཆེན་གྱི་ཉིན་དང་པོར་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་དང་། ཅེཀ་གྲོས་ཚོགས་ཀྱི་ཁོར་ཡུག་ཚོགས་ཆུང་གི་ཚོགས་གཙོ་ལྕམ་སྐུ་ Dana Balcarova  ལགས་དང་།  ཉིན་གཉིས་པའི་ཐོག་དབྱིན་ཡུལ་གྲོས་ཚོགས་འཐུས་མི་སྐུ་ཞབས་ Tim Loughton ལགས་ཆེད་དུ་གསུང་བཤད་གནང་བར་མགྲོན་འབོད་གནང་འདུག་པ་དང་།  ཉིན་མཐའ་མའི་ཚོགས་འདུའི་ཐོག་སྐྱབས་རྗེ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གིས་བཀའ་སློབ་གནང་འདུག

རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་ལྕམ་ Michelle Bachelet ལགས་ཀྱིས་ཉེ་སྔོན་གསར་ལམ་ཁག་ཏུ་འགྲེལ་བརྗོད་གནང་བའི་ནང་དུ། ཁོང་གིས་ཡུན་རིང་ནས་རེ་བ་ཞུས་ཏེ་རྒྱ་ནག་དུ་ཆེད་ཕེབས་ཀྱིས་རྒྱ་ནག་གིས་ཤིན་ཅང་གི་ནང་དུ་འགྲོ་བ་མིའི་ཐོབ་ཐང་ལ་རྡོག་རོལ་གྱིས་མི་མང་བཀག་སྐྱིལ་དང་མནར་གཅོད། དེ་བཞིན་ངལ་རྩོལ་བསྒྱུར་བཀོལ་བྱེད་བཞིན་པར་ཞིབ་འཇུག་བྱེད་རྒྱུར་རེ་སྒུག་བྱས་ཡོད་པར་ལུང་འདྲེན་གྱིས། ཐེངས་འདིར་ཁོང་གིས་ཐབས་གཞན་བརྒྱུད་ནས་རྒྱ་གཞུང་གི་བཀའ་ཁྲོལ་མི་དགོས་པའི་ཐོག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་རྡོག་རོལ་ལ་ཞིབ་འཇུག་བྱེད་རྒྱུའི་ཉེན་བརྡ་བཏང་འདུག སྤྱིར་རྒྱ་ནག་གཞུང་ངོས་ནས་ཡུ་གུར་མི་མང་གི་མཚོན་པའི་ཁ་ཆེ་མང་ཚོགས་མང་པོ་བཀག་སྐྱིལ་བྱས་ཡོད་པར་ངོས་ལེན་མ་བྱས་པར། བཀག་སྐྱིལ་ཁང་དེ་དག་ནི་ཁ་ཆེ་དྲག་སྤྱོད་འགོག་ཐབས་ཀྱི་ལས་རིགས་སྦྱོང་བརྡར་སྤྲོད་ས་ཡིན་པར་འགྲེལ་བརྗོད་བྱེད་མུས་ཁྲོད། བདུན་ཕྲག་སྔོན་མའི་ནང་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་ཁ་ན་ཊ་ཡི་འགོ་ཁྲིད་པའི་རྒྱལ་ཁབ་ ༤༥ ཡིས་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཙོ་འཛིན་ལྕམ་ Michelle Bachelet རྒྱ་ནག་གི་ནང་དུ་རང་དབང་གི་སྒོ་ནས་ཞིབ་འཇུག་བྱེད་རྒྱུར་ལམ་ཁ་སྤྲོད་དགོས་བའི་ཞུ་སྐུལ་གནང་ཡོད་པ་རེད། འོན་ཀྱང་རྒྱ་ནག་གིས་གནད་དོན་དེ་ནི་ཆབ་སྲིད་ཀྱི་དམིགས་འབེན་ལྡན་ཞིང་རྒྱ་ནག་གི་ནང་སྲིད་ལ་ཐེ་གཏོགས་བྱས་པ་ཞིག་ཡིན་པར་ལན་འདེབས་བྱས་ཏེ། གཞི་རྩའི་རྒྱ་ནག་གིས་ལྕམ Michelle Bachelet ལགས་རྒྱ་ནག་ཏུ་ཕེབས་རྒྱུར་དགའ་བསུ་ཞུ་བཞིན་ཡོད་ནའང་། དེ་ནི་ཕན་ཚུན་བར་དུ་མཉམ་ལས་དང་བརྗེ་ལེན་ལ་དམིགས་པ་ཞིག་ཡིན་དགོས་བ་ལས་རྟོག་ཞིབ་བྱ་བར་དམིགས་པ་ཞིག་ཡིན་མི་ཆོག་པའི་སྐྱོན་བརྗོད་བྱས་ཡོད་པ་རེད། Reuters གསར་ཁང་གིས་གནས་ཚུལ་སྤེལ་བར་གཞིགས་ན། ལྕམ Michelle Bachelet ལགས་ཀྱིས་གཟའ་འཁོར་སྔོན་མའི་ནང་གསར་འགོད་པར་གནད་དོན་དེའི་སྐོར་ལ་ལན་འདེབས་གནང་སྐབས། ཁོང་གིས་ཕྱི་ལོ་ ༢༠༡༨ ནས་བཟུང་རྒྱ་ནག་དང་ལྷན་དུ་གྲོས་བསྡུར་བརྒྱུད་ཡུལ་དེར་རྟོག་ཞིབ་སླད་བསྐྱོད་ཐུབ་པའི་འབད་བརྩོན་རིམ་པ་ཞུས་དང་ཞུ་བཞིན་པ་དང་ཆབས་ཅིག ཁོང་གི་ལས་ཁུངས་ངོས་ནས་རྒྱ་ནག་གིས་ཤིན་ཅང་གི་ཁུལ་དུ་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པར་མུ་མཐུད་དུ་རྟོག་ཞིབ་ཞིབ་ཚགས་གནང་རྒྱུ་ཡིན་སྐོར་གསུང་སྟེ་ཐབས་ལམ་གཞན་ཞིག་ལ་འབད་རྒྱའི་གོ་བརྡ་སྤྲད་ཡོད་པ་རེད་འདུག གོང་གི་གནད་དོན་དང་འབྲེལ་ནས། འགྲོ་བ་མིའི་ཐོབ་ཐང་ལྟ་ཞིབ་ཁང་གི་འགན་འཛིན་ Kenneth Roth ལགས་ཀྱིས་ལྕམ་སྐུ་ Bachelet མཆོག་ལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་དེ་བཞིན་རྒྱ་ནག་གཞུང་སོགས་ནས་བཀའ་ཁྲོལ་མི་དགོས་པར། ཐག་རིང་ས་ཁུལ་དུ་གནས་བཞིན་ཤིན་ཅང་ནང་གི་གནས་སྟངས་ལ་ཞིབ་འཇུག་དང་དྲི་རྩད་བྱ་ཆོག་པའི་སྐུ་དབང་ཡོད་པ་དང་། དེ་སྔ་ལྕམ་སྐུ་ཁོང་དང་། ལྷན་ཚོགས་ཀྱི་གཙོ་འཛིན་གོང་མས་ Venezuela ་དང་། ལྷོ་ཤར་Turkey, དེ་བཞིན་Kashmir སོགས་སུའང་དེ་ལྟར་གནང་ཡོད་པ་གསུང་འདུག ཁོང་གིས་ད་དུང་ད་ལྟའི་ཆར་ཤིན་ཅང་ནང་གི་གནས་སྟངས་ཐད་མཉམ་འབྲེལ་རྒྱལ་ཚོགས་ཀྱི་གཞུང་འབྲེལ་ཐོག་ནས་རྟོག་ཞིབ་གང་ཡང་ཐུབ་མེད་པ་དང་། རྒྱ་ནག་གཞུང་གིས་རྒྱལ་ཚོགས་ཀྱི་འབོད་སྐུལ་རིམ་པར་ངོས་ལེན་མ་བྱས་པའི་ཁྲོད་འདིར་རྒྱལ་ཚོགས་ངོས་ནས་འདི་ལྟ་བུའི་ཐབས་ལམ་ལ་མ་འབད་ཀ་མེད་ཡིན་སྐོར་གསུངས་བ་མ་ཟད། International Service for Human Rights ཞེས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཁང་གི་ལས་བྱེད་དང་རྒྱ་ནག་དང་འབྲེལ་བའི་ཆེད་མཁས་བ་ལྕམ Sarah Brooks ལགས་ཀྱིས་ཀྱང་ལྕམ Michelle Bachelet ལགས་ནས་གནད་དོན་དེའི་ཐོག་གོམ་གང་མདུན་སྤོས་བྱེད་དགོས་པའི་དུས་ལ་བབ་ཡོད་པར་འགྲེལ་བརྗོད་གནང་བ་དང་འབྲེལ། ཤིན་ཅང་ནང་གི་གནས་སྟངས་ལ་ཞིབ་འཇུག་སླད་རྒྱ་ནག་གི་མཉམ་འབྲེལ་དགོས་པ་དེ་སྔོན་འགྲོའི་ཆ་རྐྱེན་ཞིག་ཡིན་པར་འགྲེལ་ལོག་རྒྱག་རྒྱུ་མེད་པར་གསུངས་འདུག དེ་བཞིན་གསར་ཁང་གིས་འདི་ལོར་འགྲོ་བ་མིའི་ཐོབ་ཐང་ལྟ་ཞིབ་ཁང་དང་རྒྱལ་སྤྱིའི་ཉེས་ཡངས་ཚོགས་པས་རྒྱ་ནག་དང་འབྲེལ་བའི་སྙན་ཐོ་སྤེལ་བའི་ནང་དུ། རྒྱ་ནག་གིས་ཤིན་ཅང་གི་ནང་དུ་ལས་འགུལ་སྤེལ་བ་དེ་ནི་འགྲོ་བ་མིའི་རིགས་ཀྱི་ནག་ཉེས་ཚབས་ཆེན་ཞིག་ཡིན་པར་བསྒྲགས་ཡོད་པ་མངོན་གསལ་གནང་འདུག གཞི་རྩའི་འདི་ལོར་ཡུ་རོབ་མཐུན་ཚོགས་ཀྱི་ཕྱི་འབྲེལ་བློན་ཆེན་མཆོག་གིས་ཤིན་ཅང་ཁུལ་གྱི་དངོས་ཡོད་གནས་ཚུལ་རྟོག་ཞིབ་དཔྱིས་ཕྱིན་པ་ཞིག་གནང་སླད་རྒྱ་ནག་གཞུང་གི་ངོས་ནས་ཁུལ་དེར་དམ་དྲག་གང་ཡང་མེད་པར་རང་དབང་ཐོག་བསྐྱོད་འཇུག་དགོས་པའི་ཡོངས་ཁྱབ་གསལ་བསྒྲགས་གནང་བ་ལྟར། ཨ་རི་དང་དབྱིན་ཡུལ་སོགས་ཀྱི་མཚོན་པའི་ནུབ་ཕྱོགས་ཀྱི་རྒྱལ་ཁབ་མང་པོ་ཞིག་གི་གྲོས་ཚོགས་ཀྱི་ནང་དུ་རྒྱ་ནག་གིས་ཤིན་ཅང་གི་ཁུལ་དུ་མི་རིགས་རྩ་གཏོར་གྱི་སྲིད་བྱུས་སྤེལ་བཞིན་ཡོད་པའི་གླེང་སློང་ཤུགས་ཆེན་བྱུང་ཡོད་པ་རེད།

རྒྱ་ནག་མི་མང་བཅིངས་གྲོལ་དམག་གིས་བོད་པའི་ན་གཞོན་ཁོ་ན་ལས་བསྡུས་པའི་བོད་རིགས་དམིགས་བསལ་དམག་དཔུང་གི་རུ་ཁག་ཞིག་ལ་སྦྱོང་བརྡར་ཟིན་སྟེ་འབྲས་ལྗོངས་དང་འབྲུག་གི་མཐའ་མཚམས་སུ་ཆགས་པའི་བོད་གྲོ་མོ་རྫོང་གི་མཐའ་མཚམས་སུ་འགྲེམས་འཇོག་བྱས་འདུགདེ་རིང་རྒྱ་གར་གྱི་TheIndianExpressགསར་ལམ་དུ་གནས་ཚུལ་ཐོན་པར་གཞིགས་ན་ Mimang Cheton ཞེས་འབོད་པའི་དམག་སྡེ་དེ་སྡེ་ཚན་གཉིས་སུ་ཕྱེས་ཡོད་པ་དང་། སྡེ་ཚན་རེ་རེར་བོད་ཀྱི་ན་གཞོན་རྣམས་ཀྱིས་གྲུབ་པའི་དམག་མི་བརྒྱ་རེ་ཡོད་པ་བཞིན་སྡེ་ཁག་དང་པོའི་ན་གཞོན་བརྒྱ་ལྷག་ལ་དམག་མིའི་སྦྱོང་བརྡར་སྤྲད་དེ་མཐའ་མཚམས་གྲོ་མོ་རུ་འགྲེམས་འཇོག་བྱས་ཡོད་པ་དང་། སྡེ་ཁག་གཞན་དེར་ད་ཆ་ཕ་རི་ཁུལ་དུ་སྦྱོང་བརྡར་སྤྲོད་བཞིན་པ་རེད་འདུག འབྲེལ་ཡོད་ཀྱིས་གསར་ཁང་ལ་གནས་ཚུལ་མཁོ་སྤྲོད་བྱས་པའི་ནང་དུ།རྒྱ་ནག་གི་བཅིངས་གྲོལ་དམག་མིས་མཐའ་མཚམས་ཀྱི་ཁུལ་དུ་བོད་དམག་ཆེད་གཏོང་བྱེད་དོན་ནི་གཅིག་ནས་བོད་མི་རྣམས་མཐོ་སྒང་གི་གནམ་གཤིས་དང་ས་གཤིས་ལ་བསྟུན་འགྱུར་ཐུབ་པ་དང་།དེ་བཞིན་མཐའ་མཚམས་ཁག་ཏུ་རྒྱུས་མངའ་ཡོད་པ་སོགས་ལ་དམིགས་ཏེ་རྒྱ་མཚོའི་ངོས་ནས་ས་བབ་མཐོ་ཚད་ཕི་ཊི་ ༡༡༠༠༠ ལྷག་ཡོད་པའི་རྒྱ་གར་བྱང་ཕྱོགས་ཨ་རོ་ན་ཅལ་གྱི་མཐའ་མཚམས་དང་དེ་བཞིན་ཕི་ཊི་ ༡༨༠༠༠ ལྷག་ཡོད་པའི་ལ་དྭགས་ཀྱི་མཐའ་མཚམས་སོགས་སུ་ཆེད་གཏོང་བྱེད་རྒྱུར་དམིགས་ཀྱི་ཡོད་པར་གསུངས་འདུག ད་ལྟའི་ཆར་གྲོ་མོ་རྫོང་གི་བོད་དམག་ལ་སྦྱོར་བརྡར་སྤྲད་ཡོད་པ་ཙམ་ལས། དམག་མིའི་སྒྲིག་ཆས་མེད་པ་མ་ཟད་གོ་གནས་ཀྱང་སྤྲད་མེད་ཀྱང་།དམག་སྦྱོང་གྲུབ་མཚམས་སུ་བོད་དམག་དེ་དག་བོད་ཀྱི་བླ་གྲྭ་ཡོད་སར་ཁྲིད་དེ་བྱིན་རླབས་སྩོལ་དུ་འཇུག་བཞིན་ཡོད་པ་དང་། གསར་ལམ་དུ་རྒྱ་ནག་དམར་ཤོག་སྲིད་གཞུང་ལ་མཚོན་ན་སྔོན་ཆད་དེ་ལྟ་བུའི་བྱེད་ལས་ལག་བསྟར་བྱེད་མྱོང་མེད་ཀྱང་།  བྱེད་བབ་དེ་ནི་རྒྱ་ནག་གི་བཅིངས་གྲོལ་དམག་མིའི་རྒྱང་བགྲོད་ཀྱི་འཐབ་བྱུས་གསར་བ་ཞིག་ཡིན་པར་ངོ་སྤྲོད་གནང་འདུག གཞི་རྩའི་རྒྱ་ནག་གི་སྲིད་འཛིན་ཞི་ཅིན་ཕིང་གིས་ རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་དགོས་པ་དང་། མཐའ་མཚམས་སྐྱོང་བར་སྔོན་ལ་བོད་བརྟན་བརླིང་ཡོང་བ་བྱེད་དགོས་པའི་འཐབ་ཇུས་བཏོན་པ་གཞིར་བཟུང་། འདས་བའི་ལོ་འགའི་རིང་དུ་འཕགས་བོད་མཐའ་མཚམས་ཁག་ཏུ་ཡང་གྲོང་ཚོ་གསར་རྒྱག་དང་བོད་མཐོ་སྒང་དུ་ཛ་དྲག་གི་སྐབས་སུ་དམག་ཆས་འབོར་འདྲེན་བྱེད་སླ་བའི་གནམ་ཐང་་དང་རྒྱ་ལམ་སོགས་ཀྱི་འཛུགས་སྐྲུན་ལས་གཞི་སྤེལ་དང་སྤེལ་མུས་མ་ཟད། སྔར་ལོའི་ཕྱི་ཟླ་ ༨ པའི་ནང་རྒྱ་ནག་གི་ཕྱི་སྲིད་བློན་ཆེན་ཝང་ཡི་བོད་དུ་བསྐྱོད་ནས་བོད་དང་རྒྱ་གར་གྱི་ས་མཚམས་ས་ཁུལ་དུ་ལྟ་སྐོར་བྱས་པ་མ་ཟད། འཛུགས་སྐུན་གྱི་ལས་གཞི་དང་མཐའ་མཚམས་ས་ཁུལ་གྱི་དབུལ་ཕོངས་མི་སེར་རྣམས་ཀྱི་དགོས་མཁོ་སོགས་ཀྱི་གནད་དོན་ལ་རྒྱུས་ལོན་བྱས་ཡོད་པ་རེད།  

ཉི་ཧོང་རྒྱལ་ཁབ་ཀྱིས་རྒྱ་ནག་གི་ཁུང་ཙི་སློབ་གླིང་ནི་དམར་ཤོག་སྲིད་གཞུང་གི་དྲིལ་བསྒྲགས་ཀྱི་ལག་ཆ་ཡིན་པར་སེམས་ཁྲལ་གྱིས་ཨ་རི་དང་ཁ་ན་ཊ་སོགས་ཀྱིས་ཁུང་ཙི་སློབ་གླིང་སྒོ་རྒྱག་ཏུ་བཅུག་པ་ལྟར་ཉི་ཧོང་རྒྱལ་ཁབ་ཀྱིས་ཀྱང་ཁུལ་དེར་རྩ་འཛུགས་བྱས་ཡོད་པའི་ཁུང་ཙི་སློབ་གླིང་ཁག་ལ་གཞི་རྒྱ་ཆེ་བའི་བསྐྱར་ཞིབ་གནང་རྒྱུ་ཡིན་པར་བསྒྲགས་འདུགདེ་ཡང་ཉི་ཧོང་གི་ནང་དུ་རྟེན་གཞི་བྱས་པའི་ Nikkei Asia  ཞེས་པའི་གསར་ཁང་གིས་དེ་རིང་གསར་འགྱུར་སྤེལ་བའི་ནང་དུ། ཉི་ཧོང་གི་ཤེས་ཡོན་བློན་ཆེན་ལས་ཁུངས་ཀྱིས་གོ་སྒྲིག་གི་ཐོག་ནས། ཁུལ་དེར་རྒྱ་ནག་སྲིད་གཞུང་གིས་མ་དངུལ་མཁོ་འདོན་བྱེད་བཞིན་པའི་ཁུང་ཙི་སློབ་གླིང་དང་འབྲེལ་བའི་ཤེས་ཡོན་ལྟེ་གནས་ཁག་ལ་རྩད་གཅོད་ཀྱིས་དྲི་ཞིབ་བྱེད་རྒྱུ་ཡིན་པ་མ་ཟད། འདིའ་ལོའི་ལོ་མཇུག་བར་དུ་ཤེས་ཡོན་ལྟེ་གནས་ཁག་ལ་རྒྱ་ནག་དང་འབྲེལ་བའི་སློབ་གླིང་གི་མ་དངུལ་མཁོ་འདོན་དང་། སློབ་མ་རྣམས་ཀྱི་མཉམ་ཞུགས་བྱེད་ཕྱོགས། ལྷག་པར་སློབ་གླིང་གི་ལས་དོན་བྱེད་ཕྱོགས་ཀྱིས་གཙུག་ལག་སློབ་ཁང་དུ་སྤྱིའི་ཉམས་ཞིབ་ཀྱི་ལས་དོན་ལ་ཤུགས་རྐྱེན་ཇི་ཡོད་སོགས་དང་འབྲེལ་བའི་དྲི་བ་ཁག་གཅིག་གཏན་འབེབས་གནང་རྒྱུ་རེད་འདུག གསར་ཁང་གིས་སྤེལ་བའི་གནས་ཚུལ་ལྟར་ན། ཨ་རི་དང་ཡུ་རོབ་གཉིས་ཀྱིས་རྒྱ་ནག་གི་ཁུང་ཙི་སློབ་གླིང་གི་བྱ་འགུལ་ལ་སྟངས་འཛིན་དང་ཁག་ཅིག་ཡོངས་སུ་མཚམས་འཇོག་བྱས་པའི་རྗེས་སུ། ཉི་ཧོང་གིས་རྒྱ་ནག་གི་ཁུང་ཙི་སློབ་གླིང་གིས་རྒྱ་ནག་གཞུང་འབྲེལ་གྱི་དྲིལ་བསྒྲགས་རིགས་ཁྱབ་སྤེལ་བྱེད་རྒྱུར་སེམས་ཁྲལ་བྱེད་བཞིན་པ་ཙམ་དུ་མ་ཟད། རྒྱ་ནག་གི་མི་སྒེར་གྱི་འབྲེལ་ལམ་བརྒྱུད་དེ་ཉི་ཧོང་གི་འཕྲུལ་རིགས་ཀྱི་གསང་བ་རྣམས་ཀྱང་རྒྱ་ནག་ཏུ་ཤོར་ཉེན་ཡོད་པར་སེམས་འཚབ་བྱེད་བཞིན་ཡོད་སྐོར་གསུངས་འདུག དེ་བཞིན་ཉི་ཧོང་གི་ཤེས་ཡོན་བློན་ཆེན་སྐུ་ཞབས Koichi Hagiuda ལགས་ཀྱིས་ད་ལྟའི་ཆར་ཨ་རི་དང་ཡུ་རོབ་ལྟ་བུའི་ཐུན་མོང་གི་རིན་ཐང་ཡོད་པའི་རྒྱལ་ཁབ་ཁག་ཅིག་གིས་སྒེར་སོ་སོའི་རྒྱལ་ཁབ་ནང་གི་ཁུང་ཙི་སློབ་གླིང་ཁག་མཚམས་འཇོག་བྱས་པ་ལྟར།  ང་ཚོའི་ངོས་ནས་ཀྱང་ཉི་ཧོང་ནང་གི་ཤེས་ཡོན་གྱི་ལྟེ་གནས་ཁང་རྣམས་ཀྱིས་རྒྱ་ནག་གི་ཁུང་ཙི་སློབ་གླིང་དང་འབྲེལ་བའི་འཛིན་སྐྱོང་གི་ལས་དོན་དང་། ཞིབ་འཇུག་གི་ལས་གཞི་མཐའ་དག་ཕྱི་གསལ་ནང་གསལ་གནང་དགོས་པའི་འབོད་སྐུལ་ཞུ་བཞིན་་ཡོད་ཅེས་གསུངས་འདུག གཞན་ཡང་འདི་ལོའི་ཟླ་བ་ལྔ་བའི་ནང་དུ། ཉི་ཧོང་གི་མི་འབྱོར་ཞིབ་བཤེར་གྱི་བློན་ཆེན་ཟུར་བ་ལྕམ Haruko Arimura ལགས་ཀྱིས་ གྲོས་ཚོགས་གོང་མའི་ཚོགས་ཆེན་ཞིག་གི་དབུས་སུ་ཕྱིའི་རྒྱལ་ཁབ་མང་པོ་ཞིག་གིས་རྒྱ་ནག་གི་ཁུང་ཙི་སློབ་གླིང་དེ་ནི་བདེ་འཇགས་ལ་ཉེན་ཚབ་ཆེ་བ་ཞིག་ཏུ་ངོས་འཛིན་གནང་གི་ཡོད་པ་ལུང་འདྲེན་གྱིས། ཉི་ཧོང་གི་འབྲེལ་ཡོད་ལས་ཁུངས་ཁག་གིས་རྒྱ་ནག་གི་ཁུང་ཙི་སློབ་གླིང་ལ་སྟངས་འཛིན་བྱེད་དགོས་བའི་འབོད་སྐུལ་ཞུས་ཡོད་པར་འཁོད་འདུག གསར་ཁང་གིས། རྒྱ་ནག་གི་ཁུང་ཙི་སློབ་གླིང་ཁག་གིས་དམིགས་བསལ་གྱིས་ཤེས་ཡོན་གྱི་ལག་འཁྱེར་རིགས་མཁོ་སྤྲོད་བྱེད་ཀྱི་མེད་སྟབས་ཡན་ལག་ལས་ཁུངས་གསར་འཛུགས་སྐབས་སུ་སྲིད་གཞུང་གི་ཆོག་མཆན་ནམ་དེབ་སྐྱེལ་སོགས་བྱེད་དགོས་ཀྱི་མེད་པར་གསལ་འགྲེལ་གྱིས། རྒྱ་ནག་གིས་ཐབས་ལམ་དེ་སྤྱད་ནས་དྲིལ་བསྒྲགས་དང་འབྲེལ་བའི་ལས་གཞི་ཁག་ཁྱབ་སྤེལ་བྱེད་བཞིན་ཡོད་པར་མངོན་གསལ་གནང་འདུག ཉི་ཧོང་ནང་གི་ greater Tokyo ཁུལ་གྱི་སྒེར་བཙུགས་ཀྱི་སློབ་ཆེན་གྱི་ལས་བྱེད་ཅིག་གིས་གསར་ཁང་ལ་འགྲེལ་བརྗོད་གནང་བའི་ནང་དུ། ཁོང་གི་སྒེར་བཙུགས་ཀྱི་སློབ་གྲྭ་དེར་རྒྱ་ནག་གིས་ཁུང་ཙི་སློབ་གླིང་གསར་འཛུགས་བྱེད་རྒྱུའི་རེ་སྐུལ་བྱས་ཡོད་ནའང་། སློབ་གླིང་དེས་ངོས་ལེན་བྱས་མེད་པ་དང་།  སྤྱི་ཡོངས་ཀྱི་ཆ་ནས་ལས་གཞི་དེའི་རིགས་ཀྱིས་རྒྱ་ནག་དང་ཉི་ཧོང་གཉིས་ཀྱི་བར་དུ་སློབ་ཕྲུག་བརྗེ་ལེན་ལ་ཕན་ཐོག་ཡོང་གི་ཡོད་ནའང་ཤེས་ཡོན་ལྟེ་གནས་ཁག་གིས་ཐེ་ཝན་དང་མཉམ་དུ་སློབ་ཕྲུག་བརྗེ་ལེན་གྱི་ལས་གཞི་གསར་འཛུགས་བྱས་ན་རྒྱ་ནག་གི་མ་དངུལ་མཁོ་འདོན་རིགས་མཚམས་འཇོག་བྱེད་ངེས་ཡིན་པ་གསུངས་འདུག གཞི་རྩའི་རྒྱ་ནག་གིས་ཕྱི་ལོ་ ༢༠༠༤ ལོ་ནས་བཟུང་ཕྱིའི་རྒྱལ་ཁབ་ ༡༦༠ ལྷག་གི་ནང་དུ་རྒྱ་ནག་གི་སྐད་ཡིག་དང་རིག་གཞུང་ཁྱབ་སྤེལ་བྱེད་ཐབས་ཀྱི་ཁུང་ཙི་སློབ་གླིང་ ༥༠༠ ལྷག་རྩ་འཛུགས་བྱས་ཡོད་པའི་ཁྲོད་དུ། ཉི་ཧོང་ནང་གི་སྒེར་བཙུགས་ཀྱི་ཤེས་ཡོན་ལྟེ་གནས་ཁང་ Waseda དང་ Ritsumeikan གཙུག་ལམ་སློབ་ཆེན་སོགས་ཀྱི་གཙོ་བྱས་པའི་གཙུག་ལག་ཁང་ ༡༤་ཙམ་གྱི་ནང་དུ་ཡང་རྒྱ་ནག་གི་ཁུང་ཙི་སློབ་གླིང་ཆེད་འཛུགས་བྱས་ཡོད་པ་རེད། འདས་བའི་ལོ་འགའི་རིང་དུ་བོད་རང་བཙན་སློབ་ཕྲུག་ཚོགས་པ་སོགས་ཀྱི་དབུ་འཛུགས་ཀྱི་ཐོག་ནས་རྒྱ་ནག་གིས་ཁུང་ཙི་སློབ་གླིང་བརྒྱུད་ནས་རྒྱ་ནག་གི་འཇམ་པོའི་སྟོབས་ཤུགས་རྒྱ་བསྐྱེད་དང་། སྲིད་གཞུང་གི་དྲིལ་བསྒྲགས་རིགས་ཕྱི་ལོག་གི་སྤྱི་ཚོགས་ནང་དུ་ཁྱབ་སྤེལ་བྱེད་བཞིན་ཡོད་པར་ཡོངས་གྲགས་ཀྱིས་ལས་འགུལ་སྣ་མང་སྤེལ་ཡོད་པ་ལྟར། ཨ་རི་དང་ཡུ་རོབ། ཨོ་གླིང་སོགས་ཀྱི་ནང་དུ་རྒྱ་ནག་གི་ཁུང་ཙི་སློབ་གླིང་བརྒྱ་ཕྲག་ལྷག་སྒོ་རྒྱག་དགོས་བའི་གནས་སུ་ལྷུང་ཡོད་པ་རེད།  

ཁ་སང་བྷེལ་ཇམ་གྱི་རྒྱལ་ས་ Brussels གྱི་ནང་དུ་ཨ་རི་དང་ཡུ་རོབ་ལྷན་ཚོགས་གཉིས་ཀྱིས་མཉམ་འབྲེལ་གྱིས་ལྷན་ཚོགས་ཚོགས་འདུ་བསྡུ་སྐོང་བྱས་ཏེ་མཉམ་འབྲེལ་གྱིས་བསྒྲགས་གཏམ་སྤེལ་བའི་ནང་དུ། རྒྱ་ནག་གི་དབང་བསྒྱུར་འོག་གི་བོད་ནང་གི་གནས་སྟངས་གི་གཙོ་བྱས་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་སྤྱི་ཡོངས་ལ་སེམས་འཚབ་ཡོད་པ་ཕྱིར་བསྒྲགས་གནང་འདུགཁ་སང་གི་ཨ་རི་དང་ཡུ་རོབ་ལྷན་ཚོགས་ཀྱི་ཚོགས་འདུ་དེར། ཡུ་རོབ་སྤྱི་མཐུན་ལྷན་ཚོགས་ཀྱི་ཚོགས་གཙོ་སྐུ་ཞབས Charles Michel ལགས་དང་ཡུ་རོབ་མཐུན་ཚོགས་ཀྱི་འཛིན་སྐྱོང་ལྷན་ཁང་གི་ཚོགས་གཙོ་ལྕམ་ Ursula von der Leyen ལགས་གཉིས་དང་། དེ་བཞིན་ཨ་རིའི་སྲིད་འཛིན་སྐུ་ཞབས་ཇཱོ་བྷ་ཊན་ལགས་གསུམ་གྱིས་དབུ་བཞུགས་ཀྱི་ཐོག་ཚོགས་འདུ་གཙོ་སྐྱོང་གནང་ཡོད་པ་དང་།  ཐེངས་འདིའི་ལྷན་ཚོགས་དེ་ནི་ཨ་རིའི་སྲིད་འཛིན་བྷ་ཊན་ལགས་ཀྱི་ཆབ་སྲིད་ཀྱི་དབང་ཆ་བཞེས་རྗེས་ཕྱོགས་གཉིས་ཀྱིས་ལྷན་འཛོམས་ཀྱི་ཐོག་ནས་ལྷན་ཚོགས་བསྡུས་བ་ཐེངས་དང་པོ་དེ་ཆགས་ཀྱི་ཡོད་པ་རེད་འདུག ལྷན་ཚོགས་དེའི་ཐོག་ཏུ། རྒྱལ་ཁབ་ཕྱོགས་གཉིས་ཀྱི་ཕྱི་སྲིད་ལས་དོན་དང་རྒྱ་ནག་ནང་གི་གནས་བབ་སོགས་ཀྱི་མཚོན་པའི་ཕྱོགས་གཉིས་ཀྱི་སེམས་འཚབ་རང་བཞིན་གྱི་བརྗོད་གཞི་སྣ་མང་ཞིག་གི་ཐོག་ལ་གྲོས་བསྡུར་གནང་བ་དང་འབྲེལ་ནས། ཨ་རི་དང་ཡུ་རོབ་གཉིས་ཀྱིས་ཕན་ཚུན་་གྲོས་བསྡུར་དང་མཉམ་རུབ་གྱི་ཐོག་ནས་ཕྱག་ལས་གནང་རྒྱུར་དམ་བཅའ་བརྟན་པོ་ཡོད་པར་ཡོངས་གྲགས་གནང་འདུག་པ་མ་ཟད་རྒྱ་ནག་དམར་གཞུང་གིས་ད་ལྟའི་རྒྱ་ནག་གི་དབང་བསྒྱུར་འོག་གི་བོད་དང་ཤིན་ཅང་ནང་གི་འགྲོ་བ་མིའི་ཐོབ་ཐང་རྡོག་རོལ་དང་། ཧོང་ཀོང་ནང་གི་རང་སྐྱོང་གི་གནས་བབ་དང་མང་གཙོའི་ལམ་ལུགས་ཉམས་དམས་སུ་གཏོང་བཞིན་པ། གཞན་ཡང་དྲིལ་བསྒྲགས་བཀག་སྡོམ་དང་ས་ཁོངས་བདེ་འཇགས་སོགས་ཀྱི་བརྗོད་གཞི་མང་དག་ཅིག་གིས་ཐད་ནས་ཕྱོགས་གཉིས་ཀྱིས་མཉམ་འབྲེལ་གྱིས་རྒྱ་ནག་ལ་ཁ་གཏད་གཅོག་རྒྱུ་ཡིན་པར་བསྒྲགས་འདུགད་རེས་ཀྱི་ལྷན་ཚོགས་ཀྱི་བསྒྲགས་གཏམ་གྱི་ནང་དུ་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་འཁོད་པར་རྒྱལ་སྤྱིའི་བོད་དོན་ལས་འགུལ་ཁང་གིས་དགའ་བསུ་ཞུས་པ་དང་སྦྲགས། ཐེངས་འདིའི་ལྷན་ཚོགས་དེ་ནི་རྒྱ་ནག་ལ་ཁ་གཏད་གཅོག་པར་རབ་ཏུ་རྨད་པའི་མཉམ་འབྲེལ་གྱི་གོམ་སྟབས་ཤིག་ཡིན་པར་བསྒྲགས་པ་དང་ཆབས་ཅིག བསམ་ཕྱོགས་མཐུན་པའི་རྒྱལ་ཁབ་ཁག་གིས་རྒྱ་ནག་དང་འབྲེལ་བའི་རང་ཉིད་ཀྱི་ཕྱི་འབྲེལ་སྲིད་བྱུས་ཐད་ཕན་ཚུན་མཉམ་འབྲེལ་སྒོ་ནས་ཕྱག་ལས་གནང་རྒྱུ་གལ་ཆེ་ཡིན་པ་མ་ཟད། ཆོད་སེམས་བརྟན་པོའི་ཐོག་ནས་རྒྱ་ནག་རྒྱལ་ཁབ་དང་ཞི་ཅིན་ཕིང་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པར་མཉམ་འབྲེལ་གྱི་ཡ་ལན་སྤྲོད་རྒྱུ་གལ་ཆེན་ཡིན་པར་དྲན་སྐུལ་གནང་འདུག ཁ་སང་གི་ལྷན་ཚོགས་མཇུག་བསྒྲིལ་བྱུང་བའི་རྗེས་ཀྱི་གསར་འགོད་ལྷན་ཚོགས་ཐོག   ཡུ་རོབ་ལྷན་ཚོགས་ཀྱི་གཙོ་འཛིན་གྱིས། འགྲོ་བ་མིའི་ཐོབ་དང་དང་འགྲོ་བ་མིའི་ཆེ་མཐོང་གི་གནད་དོན་ལ་ཐུག་དང་ཨ་རི་དང་ཡུ་རོབ་གཉིས་ནི་ལམ་ལུགས་རང་བཞིན་གྱི་ཐོག་ནས་རྒྱ་ནག་གི་ཁ་གཏད་ཆགས་ཀྱི་ཡོད་པ་དང་། ང་ཚོས་གནད་དོན་དེ་ཡོངས་གྲགས་ཀྱིས་མངོན་གསལ་བྱ་རྒྱུ་གལ་ཆེ་ཡིན་པ་མ་ཟད། འགྲོ་བ་མིའི་ཐོབ་ཐང་གི་གནད་དོན་དེ་ནི་ཨ་རི་དང་ཡུ་རོབ་གཉིས་རྒྱ་ནག་ལས་ལོགས་སུ་བཀར་བྱེད་ཀྱི་གནད་དོན་གཙོ་བོ་ཞིག་ཡིན་པའང་མངོན་གསལ་རེད་ཅེས་གསུངས་འདུག གཞི་རྩའི་སྔར་ལོའི་ཟླ་བ་བཅུ་གཅིག་པའི་ནང་དུ། ཨ་རི་དང་ཡུ་རོབ་གཉིས་ཀྱིས་མཉམ་འབྲེལ་གྱི་ཐོག་ནས། གོ་ལའི་འགྱུར་ལྡོག་དང་འབྲེལ་བའི་ཨ་རི་དང་ཡུ་རོབ་ཀྱི་གྲོས་མཐུན་ཞེས་པ་ཞིག་གཏན་འབེབས་ཀྱིས། རྒྱལ་ཁབ་ཕྱོགས་གཉིས་ཀྱིས་རྒྱལ་སྤྱིའི་སྟེང་རྒྱ་ནག་གི་སྟོབས་ཤུགས་ཇེ་ཆེར་འཕེལ་བཞིན་པར་མཉམ་འབྲེལ་གྱིས་གདོང་ལེན་གནང་རྒྱུའི་འཐབ་བྱུས་ལ་གྲོས་མཐུན་བྱུང་ཡོད་པ་མ་ཟད།  ཕྱོགས་གཉིས་ཀྱིས་རྒྱ་ནག་དང་འབྲེལ་བའི་གྲོས་མོལ་དེ་ནི་རང་རྒྱལ་གྱི་མངོན་འདོད་སྲུང་སྐྱོབ་བྱེད་རྒྱུའི་དོན་གནད་ཅིག་ལ་ངོས་འཛིན་གནང་ཡོད་པ་དང་། དེར་འབྲེལ་ཨ་རི་དང་ཡུ་རོབ་ཐུན་ཚོགས དེ་བཞིན་དབྱིན་ཡུལ་དང་ཁ་ན་ཊ་སོགས་ཀྱི་སྣེ་ཁྲིད་འོག ནུབ་ཕྱོགས་ཀྱི་རྒྱལ་ཁབ་ཁག་ཅིག་གིས་རྒྱ་ནག་གིས་ཤིན་ཅང་ནང་དུ་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་གནད་དོན་དང་འབྲེལ་ནས་རྒྱ་ནག་གི་འབྲེལ་ཡོད་དཔོན་རིགས་ཁག་ཅིག་ནུབ་ཕྱོགས་ཀྱི་རྒྱལ་ཁབ་ཁག་ཏུ་ཡོང་རྒྱུར་བཀག་སྡོམ་སོགས་ཀྱི་གནས་ཚུལ་རིམ་པ་བྱུང་ཡོད་པ་རེད།

ལ་དྭགས་ཀྱི་གྷལ་ཝན་ཁུལ་དུ་ཆགས་པའི་འཕགས་བོད་ས་མཚམས་སུ་རྒྱ་དཀར་ནག་ཕྱོགས་གཉིས་ཀྱི་མཐའ་མཚམས་དམག་དབར་དྲག་པོའི་མདོང་ཐུག་བྱུང་ནས་ད་ཆ་ལོ་གཅིག་འགྲོ་གི་ཡོད་པའི་ཁྲོད་འདིར། དེ་སྔོན་པེ་ཅིང་དུ་རྒྱ་གར་གྱི་གཞུང་ཚབ་ཆེན་མོའི་ཐུགས་འགན་བཞེས་མྱོང་ཡོད་པའི་སྐུ་ཞབས་ Gautam Bambawale ལགས་ཀྱིས། རྒྱ་ནག་ངོས་ནས་ས་མཚམས་ཀྱི་གནད་དོན་ཐད་རང་ཉིད་ཀྱི་བཞེངས་ཕྱོགས་བློས་བཏང་མེད་པར་དེ་མུར་གནས་སྟབས། རྒྱལ་ཁབ་ཕྱོགས་གཉིས་དབར་ས་མཚམས་ཀྱི་དཀའ་རྙོག་སྔར་ལྷག་ཇེ་ཆེར་འགྲོ་ཉེན་ཡོད་པའི་ཉེན་བརྡ་བཏང་བ་དང་འབྲེལ། རྒྱ་གར་ངོས་ནས་རང་ཉིད་ཀྱི་མཐུན་ཕྱོགས་རྒྱལ་ཁབ་ཁག་ཕྱོགས་བསྡུས་ཀྱིས་ནུས་པ་རྒྱ་བསྐྱེད་སྒོ་ནས་རྒྱ་ནག་གི་བཙན་ཤེད་ལ་གདོང་ལེན་བྱེད་དགོས་པ་གསུངས་འདུག དེའང་་སྐུ་ཞབས Gautam Bambawale ལགས་ཀྱིས་དེ་རིང་ The Print ཞེས་པའི་རྒྱ་གར་གྱི་གསར་ཁང་གི་དམིགས་བསལ་བཅར་དྲིར་དྭང་ལེན་གནང་པའི་ནང་དུ། སྔར་ལོ་རྒྱ་ནག་གིས་རྒྱ་གར་བྱང་ཕྱོགས་ཀྱི་ལ་དགས་ཁུལ་གྱི་མཐའ་མཚམས་སུ་མདུན་མཆོང་གིས་འགུལ་སྐྱོད་བྱས་པ་དེ་ནི་རྒྱ་ནག་གི་དམག་འཐབ་དང་འབྲེལ་བའི་སྔོན་སོང་གི་འཆར་གཞི་ཞིག་ཡིན་པ་་དང་། རྒྱ་ནག་གིས་བྱང་ཕྱོགས་ལ་དགས་ཁུལ་དུ་དུས་རྒྱུན་ནས་རྒྱ་ནག་གི་མཐའ་མཚམས་ཡིན་ལུགས་རྩོད་སྒྲུབ་བྱེད་བཞིན་པའི་ས་ཁུལ་གང་འཚམས་ཤིག་གི་བར་དུ་སླེབས་ཐུབ་ཡོད་ནའང་། རྒྱ་གར་གྱི་དམག་མིས་ཀྱང་རྒྱ་ནག་གི་མཐའ་མཚམས་རྒྱ་བསྐྱེད་ཀྱི་འགུལ་སྐྱོད་དེའི་གདོང་དུ་བུད་ནས་ཕར་རྒོལ་བྱེད་ཐུབ་པ་བྱུང་སྟབས་རྒྱ་གཞུང་གིས་ལ་དགས་ཤར་ཕྱོགས་ཀྱི་ས་ཁུལ་ཐོག་བདག་དབང་རྩོད་རྒྱུའི་ཐོག་མའི་དམིགས་ཡུལ་དེ་གྲུབ་ཐུབ་པ་བྱུང་མེད་སྐོར་གསུངས་འདུག དེ་སྔ་པ་ཀི་སུ་ཐན་ནང་དུའང་རྒྱ་གར་གྱི་གཞུང་ཞབས་གནང་མྱོང་མཁན་་གི་སྐུ་ཞབས་ Bambawale ལགས་ཀྱིས་ད་དུང་སྔར་ལོའི་ཟླ་བ་བཞི་བའི་ཟླ་མཇུག་དང་ཟླ་བ་ལྔ་བའི་ཟླ་མགོར་རྒྱ་དམག་ཁྲི་ལྔ་ནས་ཁྲི་དྲུག་བར་ལ་དྭགས་བྱང་ཤར་ཕྱོགས་སུ་ཆེད་གཏོང་བྱས་ཡོད་པ་མ་ཟད། དམག་འཐབ་དང་འབྲེལ་བའི་གོ་མཚོན་ཆེ་གྲས་ཀྱི་རིགས་དང་དེ་བཞིན་ལྕགས་ཁྲབ་འཁོར་ལོ་སོགས་ཀྱང་ཆེད་དུ་འབོར་འདྲེན་བྱས་ཡོད་པར་གཞིགས་ན། སྔར་ལོའི་རྒྱ་ནག་གི་དམག་མིའི་འགུལ་སྐྱོད་དེ་ནི་འཆར་གཞི་དང་ལྡན་པ་ཞིག་ཡིན་པ་གསལ་པོ་ཡིན་པ་དང་། རྒྱུ་མཚན་དེར་བརྟེན་རྒྱ་ནག་གི་ངོས་ནས་ད་ཆ་ལོ་གཅིག་ཟིན་ཡང་ལ་དྭགས་བྱང་ཤར་གྱི་སྤང་གོང་མཚོ་ཁུལ་ནས་མ་གཏོགས་ས་ཁུལ་གཞན་ནས་དམག་མི་རྩ་བ་ནས་ཕྱིར་འཐེན་བྱས་མེད་པ་མ་ཟད། རྒྱ་གར་ངོས་ནས་ཀྱང་རང་རྒྱལ་གྱི་མངོན་འདོན་དེ་བློས་གཏོང་བྱེད་རྒྱུ་མིན་སྟབས་འབྱུང་འགྱུར་གྱི་ལོ་གཅིག་གི་ནང་དུ་རྒྱ་དཀར་ནག་གཉིས་ཀྱི་འབྲེལ་ལམ་ཆེས་རྣོ་ངར་ཅན་དུ་འགྱུར་ངེས་ཡིན་པར་བསྒྲགས་ཏེ། མ་འོངས་བར་རྒྱ་དཀར་ནག་གཉིས་ཀྱིས་འབྲེལ་ལམ་ཕྱོགས་ཡོངས་ནས་བསྐྱར་སྒྲིག་བྱེད་དགོས་བའི་དུས་ཤིག་ཤར་རྒྱུ་ཡིན་པར་འགྲེལ་བརྗོད་གནང་འདུགདེ་བཞིན་སྔར་ལོའི་རྒྱ་དཀར་ནག་གཉིས་ཀྱི་མཐའ་མཚམས་ཀྱི་དམག་འཐབ་དང་འབྲེལ་ནས། རྒྱ་གར་གྱི་ཕྱི་འབྲེལ་གྱི་ཆེད་མཁས་བས་རྒྱ་དཀར་ནག་གི་ལ་དྭགས་ཁུལ་གྱི་མཐའ་མཚམས་སུ་ཞི་བདེ་བརྟན་བརླིང་གི་དུས་ཤིག་མ་ཤར་བར་དུ། རྒྱལ་ཁབ་ཕྱོགས་གཉིས་ཀྱི་རྒྱུན་ལྡན་གྱི་འབྲེལ་ལམ་གཞན་ཁག་ཀྱང་རང་སོར་གནས་ཐབས་མེད་པར་བསྒྲགས་པ་མ་ཟད། རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་པ་ནས་བཟུང་། རྒྱ་གར་སྲིད་གཞུང་གིས་རྒྱ་ནག་གི་ཚོང་ལས་མ་འཛུགས་ལ་བཀག་རྒྱ་དང་རྒྱ་ནག་གི་མཉེན་ཆས་ཁག་རྒྱ་གར་གྱི་ནང་དུ་བཀག་སྡོམ་བྱས་ཡོད་པ། དེ་བཞིན་རྒྱ་ནག་ 5G ཞེས་པའི་བརྡ་འཕྲིན་གྱི་ལས་གཞིའི་ཁྲོད་འཛུལ་ཞུགས་བྱེད་དུ་འཇུག་གི་མེད་པ་སོགས་ཀྱི་གནད་དོན་མངོན་གསལ་གྱིས། ཇི་སྲིད་རྒྱ་ནག་གིས་ཕྱི་ལོ་ ༢༠༢༠ ལོའི་སྔོན་གྱི་ཕྱོགས་གཉིས་ཀྱི་མཐའ་མཚམས་ཀྱི་གནས་བབ་དེ་བསྐྱར་གསོ་མ་བྱས་བར་དུ། དེ་སྲིད་ཕྱོགས་ཀྱི་འབྲེལ་ལམ་སྔར་སྲོལ་བཞིན་རྒྱུན་ལྡན་འབྱུང་ཐབས་མེད་པར་གསུང་གི་ཡོད་པ་རེད། སྐུ་ཞབས་ Bambawale ལགས་ཀྱིས་ད་དུང་རྒྱ་དཀར་ནག་གཉིས་ཀྱིས་ཕྱི་ལོ་ ༡༩༩༣ ལོར་རྒྱལ་ཁབ་ཕན་ཚུན་མཐའ་མཚམས་ས་ཁུལ་དུ་ཞི་བདེ་ལྷིང་འཇགས་བསྐྲུན་ཐབས་ཀྱི་གྲོས་མཐུན་ཐོག་མ་དེ་འཇོག་སྐབས་རང་ནས། རྒྱ་ནག་གིས་ LAC ཞེས་པའི་རྒྱལ་ཁབ་ཕན་ཚུན་གྱི་མཐའ་མཚམས་ཀྱི་གཞུང་ཐིག་ལ་ངོས་ལེན་མེད་པའི་རྣམ་པ་གསལ་བོར་བཟོས་ཡོད་པ་དང་། ད་ལྟའི་ཆར་རྒྱ་གར་གྱིས་མཐའ་མཚམས་ཀྱི་གཞུང་ཐིག་དང་འབྲེལ་ནས་རྒྱ་ནག་དང་ལྷན་དུ་ཕྱིར་ནུར་བྱེད་ཐབས་མེད་སྟབས། མཐའ་མཚམས་ཀྱི་གནས་བབ་མུ་མཐུད་ཛ་དྲག་གི་ངང་གནས་ཡོད་སྟབས་ཕྱོགས་གཉིས་དབར་མ་འོངས་བར་དམག་འཁྲུག་རྒྱག་སྲིད་པའི་ཉེན་ཚབས་ད་ལྟའང་རང་སོར་གནས་ཡོད་པར་གསུངས་ཏེ། ད་ཆ་རྒྱ་གར་གྱིས་ནུབ་ཕྱོགས་དམངས་གཙོ་ཅན་གྱི་རྒྱལ་ཁབ་དང་Bangladesh ལྟ་བུའི་མཐུན་ཕྱོགས་ཀྱི་རྒྱ་ཁབ་རྣམས་དང་འབྲེལ་ལམ་རྒྱ་བསྐྱེད་དང་། QUAD ལྟ་བུའི་སྒྲིག་འཛུགས་དང་འབྲེལ་བ་དམ་ཟབ་ཐོག་ནས་རྒྱ་ནག་གི་བཙན་ཤེད་ཀྱི་གདོང་དུ་འབུད་ཐབས་བྱེད་རྒྱུ་གལ་ཆེན་པོ་ཡིན་པར་བསྒྲགས་འདུག གཞི་རྩའི་སྔར་ལོའི་རྒྱ་དཀར་ནག་གི་མཐའ་མཚམས་ཀྱི་དམག་འཐབ་དང་འབྲེལ་ནས། རྒྱ་གར་གྱི་མི་མང་སྤྱི་ཡོངས་ཀྱི་ནང་དུ་ཡང་རྒྱ་ནག་ལ་སྡང་ཟུག་བྱེད་ཤུགས་ཆེ་རུ་ཕྱིན་ཏེ། རྒྱ་གར་རྒྱལ་ཡོངས་སུ་རྒྱ་ནག་གིས་བཟོ་སྐྲུན་བྱས་པའི་ཅ་དངོས་རིགས་རྒྱ་གར་གྱི་ཚོང་རར་བཀག་སྡོམ་བྱེད་དགོས་བའི་ལས་འགུལ་རིམ་པ་སྤེལ་བ་དང་། རྒྱ་གར་སྲིད་གཞུང་གི་ངོས་ནས་ཀྱང་རྒྱལ་ནང་གི་བདེ་འཇགས་སྲུང་སྐྱོབ་ཀྱི་དགོས་མཁོ་དང་བསྟུན་ནས་སྔ་རྗེས་སུ་རྒྱ་ནག་གིས་བཟོས་བའི་མཉེན་ཆས་༢༠༠ ལྷག་བཀག་སྡོམ་བྱས་པ་མ་ཟད། མཐའ་མཚམས་ཁག་ཏུ་ཕྱོགས་གཉིས་ཀྱི་དམག་དཔུང་འགྲེམས་འཇོག་ཤུགས་ཆེ་རུ་བཏང་སྟེ་རྒྱལ་ཁབ་ཕྱོགས་གཉིས་ཀྱི་མཐའ་མཚམས་སུ་དམག་འཁྲུག་འབྱུང་སྲིད་པའི་ཚོད་དཔག་བྱས་ཡོད་པ་རེད།

དེ་རིང་དབྱིན་ཡུལ་དུ་རྟེན་གཞི་བྱས་པའི་ free Tibet ཞེས་པའི་བོད་དོན་རྒྱབ་སྐྱོར་ཚོགས་པས་གནས་ཚུལ་སྤེལ་བའི་ནང་དུ། འདི་ལོའི་ཟླ་བ་༡ པའི་ཚེས་ ༣༠ ཉིན་གསེར་རྟ་ལྔ་རིག་ནང་བསྟན་སློབ་གླིང་དང་གསེར་རྟ་ཆོས་དོན་ལྷན་ཁང་གཉིས་ཀྱིས་མཉམ་འབྲེལ་གྱིས་བཀོད་ཁྱབ་ཅིག་བཏང་བའི་ནང་དུ། གསེར་རྟ་བླ་རུང་སྒར་རམ་གསེར་རྟ་ལྔ་རིག་ནང་བསྟན་སློབ་གླིང་སུ་ཕྱི་མི་ཡོང་མི་ཆོག་པ་དང་། ཁུལ་དེར་ཆོས་ལུགས་དང་འབྲེལ་བའི་མང་ཚོགས་འདུ་འཛོམས་རང་བཞིན་གྱི་བྱེད་སྒོ་སྤེལ་མི་ཆོག་པ་དང་། གཞན་ཡང་གསེར་རྟ་གནུབ་ཟུར་དུར་ཁྲོད་དེ་ཡུལ་སྐོར་སྤྲོ་འཁྱམ་གྱི་ས་ཚིགས་ཤིག་མིན་པར་བརྗོད་དེ་ཡུལ་སྐོར་སྤྲོ་འཁྱམ་པ་རྣམས་ཁུལ་དེར་འགྲོ་མི་ཆོག་པ་སོགས་ཀྱི་བཀོད་ཁྱབ་བཏང་ཡོད་ནའང་། གསེར་རྟ་བླ་རུང་སྒར་དུ་ཞི་ཅིན་ཕིང་གི་ལོ་རྒྱུས་དྲིལ་བསྒྲགས་ཀྱི་ལས་གཞི་དེ་མུ་མཐུད་སྤེལ་བཞིན་ཡོད་སྐོར་མངོན་གསལ་གནང་འདུགདེ་བཞིན་འདི་ལོའི་ཟླ་བ་༤ བའི་ཚེས་ ༢༧  ཉིན་རྒྱ་ནག་གིས་གསེར་རྟ་ཁུལ་དུ་བཀའ་རྒྱ་ཞིག་བཏང་བའི་ནང་དུ། གསེར་རྟ་ལྔ་རིག་ནང་བསྟན་སློབ་གླིང་དེ་ནི་རྙིང་མ་བ་རྣམས་ཀྱི་སློབ་སྦྱོང་གི་ལྟེ་གནས་སུ་གསར་འཛུགས་བྱས་པ་ཞིག་ཡིན་པ་དང་། ས་གནས་དེའི་དུར་ཁྲོད་དེ་ཡང་ས་གནས་མི་མང་གི་ཆེད་དུ་ཡིན་པར་ནན་བརྗོད་ཀྱིས། ས་གནས་དེ་དག་དུ་ཡུལ་སྐོར་སྤྲོ་འཁྱམ་པ་རྣམས་ལ་འཛིན་བྱང་བཙོང་ནས་ཡུལ་སྐོར་སྤྲོ་འཁྱམ་གྱི་ས་ཚིགས་སུ་བེད་སྤྱོད་གཏོང་མྱོང་མེད་མ་ཟད། སྤྱི་ཚོགས་དྲ་རྒྱའི་ནང་དུ་འཁོད་པའི་ས་གནས་ཀྱི་སྐོར་གྱི་གནས་ཚུལ་དེ་དག་རྫུན་མ་ཡིན་པར་བསྒྲགས་ཡོད་པ་ལས། ཏོག་དབྱིབས་དང་འབྲེལ་བའི་གནས་ཚུལ་གཅིག་ཀྱང་འཁོད་མེད་པར་འཁོད་འདུག འོན་ཀྱང་། ཟླ་བ་དང་པོའི་ནང་དུ་བཀོད་ཁྱབ་བཏང་བ་དེ་ནི་གཙོ་བོ་ཏོག་དབྱིབས་རིམས་ནད་སྔོན་འགོག་ལ་དམིགས་པ་ཞིག་ཡིན་པ་ལྟར། བཀོད་ཁྱབ་དེའི་ནང་དུ། ཡུལ་མི་སུ་ཞིག་གིས་གཞུང་འབྲེལ་གྱི་བཀོད་ཁྱབ་དེར་རྩིས་མེད་བྱས་པ་ཡིན་ན་རྒྱ་ནག་གི་བདེ་འཇགས་ཚན་ཁག་གིས་ཁྲིམས་ལྟར་ཉེས་ཆད་གཅོད་རྒྱུ་ཡིན་པ་སོགས་ཀྱི་གནས་ཚུལ་ཁག་ཅིག་འཁོད་པའི་ནང་དུ། མི་མང་འདུ་འཛོམས་བྱས་མི་ཆོག་པ་དང་། ཆོས་ལུགས་ཀྱི་བྱེད་སྒོ་ཁག་མཚམས་འཇོག་དགོས་བ། དེ་བཞིན་དགོན་པ་ནས་ཕྱིར་ཕེབས་ཟིན་པའི་གྲྭ་བཙུན་རྣམས་ཕྱིར་དགོན་པར་ཕེབས་པའི་ཟླ་དུས་གསལ་བོར་བཟོ་དགོས་བ་སོགས་ཀྱི་གནད་དོན་ཁག་ཅིག་འཁོད་ཡོད་པ་མ་ཟད། འགྲོ་བ་མིའི་ཐོབ་ཐང་ལྟ་ཞིབ་ཁང་གིས་ཕྱི་ལོ་ ༢༠༡༨ ལོར་སྤེལ་བའི་གནས་ཚུལ་ལྟར་ན། ཁུལ་དེར་སྔོན་མ་ནས་རྒྱ་ནག་གི་དམ་དྲག་འོག  མང་ཚོགས་རྣམས་ས་གནས་ནས་འགྲོ་སྐྱོད་བྱེད་སྐབས་རྒྱ་སྒོ་རེ་རེ་ནས་ཞིབ་བཤེར་བྱེད་དགོས་བ་མ་ཟད།  ས་གནས་ཀྱི་ཡུལ་མི་རྣམས་ལ་ཨང་རྟགས་དང་ཁ་ཏོག་གིས་རིགས་དབྱེ་བཀར་ཡོད་པའི་གནས་ཚུལ་སྤེལ་ཡོད་པ་ལུང་འདྲེན་གནང་འདུག Free Tibet ཚོགས་པས་སྤེལ་བའི་གནས་ཚུལ་ནང་སྤྱིར་བླ་རུང་སྒར་གྱི་ས་གནས་ཀྱི་དཔོན་རིགས་རྣམས་ཀྱིས་བླ་རུང་སྒར་ཁུལ་དེ་ཡུལ་སྐོར་སྤྲོ་འཁྱམ་པའི་དམིགས་འདུན་གྱི་ས་ཚིགས་ཤིག་ཏུ་བསྒྱུར་ཐབས་ལ་འབད་བཞིན་པའི་ཐད་ནས་བླ་རུང་སྒར་གྱི་མཁན་པོ་རྣམས་ཀྱིས་ཐུགས་ཁྲལ་ཆེན་པོ་གནང་བཞིན་ཡོད་པ་དང་། དེ་སྔོན་རྒྱལ་སྤྱིའི་བོད་དོན་ལས་འགུལ་ཁང་གིས་བླ་རུང་སྒར་གྱི་སློབ་ཟུར་ཞིག་ལ་བཅར་འདྲི་ཞུས་པའི་ནང་དུ། བླ་རུང་སྒར་དུ་ཡུལ་སྤྲོ་འཁྱམ་དང་འབྲེལ་བའི་གནད་དོན་ཞིག་ཡོད་སྟབས་ཐེངས་འདིར་རྒྱ་ནག་གི་བཀོད་ཁྱབ་དེའི་ནང་དུ་བླ་རུང་སྒར་དུ་ཡུལ་སྐོར་སྤྲོ་འཁྱམ་དང་འབྲེལ་བའི་གནད་དོན་འཁོད་ཡོད་པ་དེ་ནི་ལེགས་ཕྱོགས་ཀྱི་གནས་ཚུལ་ཞིག་ཡིན་ཡིན་པར་བརྗོད་ཡོད་འདུག རྒྱ་ནག་གིས་གཞི་རྩའི་གསེར་རྟ་ལྔ་རིག་ནང་བསྟན་སློབ་གླིང་དུ་ཕྱི་མི་འགྲོ་སྐྱོད་མི་ཆོག་པའི་བཀའ་རྒྱ་བཏང་ཡོད་ནའང་། ཕྱོགས་གཞན་ཞིག་ནས་འདི་ལོའི་ཟླ་བ་ལྔ་བའི་ནང་དུ་སྤྱི་ཚོགས་དྲ་ལམ་དུ་གནས་ཚུལ་ཐོན་ཁག་ལ་གཞིགས་ན། རྒྱ་ནག་གཞུང་གིས་སློབ་གླིང་དེའི་ནང་རྒྱ་དམར་གཞུང་གི་ལོ་རྒྱུས་དྲིལ་བསྒྲགས་ཀྱི་བྱ་འགུལ་མུ་མཐུད་དུ་སྤེལ་མུས་རེད་འདུག རྒྱ་ནག་དྲིལ་བསྒྲགས་ཀྱི་བྱ་འགུལ་དེ་དག་གི་ནང་དུ། རྒྱ་ནག་གི་བཅིངས་གྲོལ་དམག་མིའི་ཁུལ་དེར་འགན་ཅི་ཞིག་ཁུར་ཡོད་པ་དང་། ཕྱི་རྒྱལ་ཁག་དང་རྒྱ་ནག་གི་ནང་དུ་ཏོག་དབྱིབས་གཉན་རིམས་ལ་གདོང་ལེན་བྱེད་ཕྱོགས་མཚུངས་བསྡུར། དེ་བཞིན་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལྟ་བ་ཁྱབ་སྤེལ་སོགས་ཀྱི་མཚོན་པའི་རྒྱ་ནག་གཞུང་གིས་མི་མང་ལ་བརྩེ་ཞེན་དང་བྱམས་སྐྱོང་བྱེད་སྟངས་སོགས་ཚུད་ཡོད་འདུག འདི་གའི་གསར་འགོད་པའི་གསེར་རྟ་བླ་རུང་སྒར་གྱི་གནད་དོན་དང་འབྲེལ་ནས།  free Tibet ཚོགས་པའི་ཉམས་ཞིབ་སྡེ་ཚན་འམ་བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས་སུ་ཐེངས་འདིའི་རྒྱ་ནག་གི་བཀོད་ཁྱབ་དེ་དང་འབྲེལ་ནས་བཀའ་འདྲི་ཞུས་པར་ཁོང་གིས་གཞི་རྩའི་ད་ལྟའི་བོད་ནང་གི་དངོས་ཡོད་གནས་ཚུལ་ལ་རྒྱུས་ལོན་བྱེད་རྒྱུ་ཁག་པོ་ཡིན་ནའང་། སྤྱི་ཡོངས་ཀྱི་ཆ་ནས་རྒྱ་ནག་གི་བཀོད་ཁྱབ་སྔར་རྗེས་གཉིས་ཀྱི་ནང་དུ་བླ་རུང་སྒར་དུ་རིམས་ནད་ཁྱབ་བརྡལ་ལ་ཁ་གཡར་ནས་གྲྭ་མང་གི་ཆོས་ལུགས་ཀྱི་བྱེད་སྒོར་བཀག་སྡོམ་དང་ཡུལ་སྐོར་སྤྲོ་འཁྱམ་མཚམས་འཇོག      དེ་བཞིན་རྒྱ་ནག་གི་ས་གནས་ཀྱི་དཔོན་རིགས་ཁག་ཅིག་དགོན་གྲོང་དུ་ཡོང་ནས་གྲྭ་མང་ལ་རྒྱ་ནག་གི་ལོ་རྒྱུས་དང་ཆབ་སྲིད་སོགས་ཀྱི་སློབ་ཁྲིད་གནང་གི་ཡོད་པ་དེ་ལས། གཙོ་བོ་བོད་ཁུལ་དུ་ཆོས་ལུགས་སློབ་སྦྱོང་ལ་དམ་དྲག་སྔར་ལྷག་བྱེད་བཞིན་ཡོད་པ་ཞིག་མཚོན་ཡོད་པར་གསུངས་སོང་།གཞི་རྩའི་རྒྱ་ནག་གིས་ཕྱི་ལོ་ ༢༠༠༡ ནས་བཟུང་གསེར་རྟ་བླ་རུང་སྒར་དུ་དམ་དྲག་བྱེད་ཤུགས་ཆེ་རུ་བཏང་སྟེ་གྲྭ་བཙུན་ནས་ཕྱིར་ཕུད་བཏང་ཡོད་པའི་གནས་ཚུལ་རིམ་པ་ཐོན་ཡོད་པ་ལས། ཕྱི་ལོ་ ༢༠༡༦ ནས་ ༢༠༡༧ བར་དུ་གྲྭ་ཤག་ ༤༧༠༠ ལྷག་རྩ་གཏོར་དང་གྲྭ་མང་ ༤༨༠༠ ལྷག་བཙན་ཤེད་ཀྱིས་དགོན་པ་ནས་ཕྱིར་ཕུད་བཏང་བའི་གནས་ཚུལ་ཕྱི་ལ་ཐོན་ཡོད་པ་མ་ཟད། བླ་རུང་སྒར་གྱི་བཙུན་མ་ཚེ་རིང་སྒྲོལ་མ་ལགས་ཀྱིས་ཕྱི་ལོ་ ༢༠༡༩ ལོའི་ཟླ་བ་ ༧ པའི་ཚེས་ ༡༩ ཉིན་རྒྱ་ནག་གིས་གྲྭ་ཤག་གཏོར་བཅོམ་བཏང་བ་དང་བོད་དུ་རང་དབང་མེད་པ་སོགས་ཀྱི་ཁ་ཆེམས་ཡི་གེ་བྲོས་ཏེ་རང་སྲོག་བཅད་པའི་གནད་དོན་བྱུང་ཡོད་པ་དང་། ཕྱི་ལོག་གི་གསར་ལམ་ཁག་ཏུ་རྒྱ་ནག་གིས་གསེར་རྟ་ལྔ་རིག་ནང་བསྟན་སློབ་གླིང་དེ་རྒྱ་ནག་གི་ཡུལ་སྐོར་སྤྲོ་འཁྱམ་གྱི་ལྟེ་གནས་སུ་བསྒྱུར་བཞིན་ཡོད་པའི་གསར་འགྱུར་རིམ་པ་ཐོན་ཡོད་པ་མ་ཟད། བོད་མིའི་སྲོལ་རྒྱུན་གྱི་དུར་འཇུག་གི་རྣམ་གྲངས་སྟེ། བྱ་གཏོར་གྱི་འདས་མཆོད་རིགས་ཀྱང་རྒྱ་ནག་གི་ཡུལ་སྐོར་ལྟེ་གནས་སུ་བསྒྱུར་སྐྲུན་བྱས་ཡོད་པའི་གནས་ཚུལ་ཐོན་ཡོད་པ་རེད།