རྒྱ་ནག

Life Is Strange འམ་ཁྱད་མཚར་གྱི་མི་ཚེ་ཞེས་པའི་གློག་རྡུལ་བརྙན་རྩེད་ཀྱི་ True Colors ཞེས་པའི་མུ་འབྲེལ་བརྙན་རྩེད་ཐོན་གསར་པའི་ནང་དུ་བོད་ཀྱི་རྒྱལ་དར་བཞག་ཡོད་པ་ལ་བརྟེན་ནས་རྒྱ་ནག་གི་རྩེད་འགྲན་པ་མང་པོས་གནད་དོན་དེར་སྐྱོན་བརྗོད་ཀྱི་མཆན་མང་པོ་བྲིས་ཏེ། བརྙན་ཕབ་པས་དགོངས་སེལ་ཞུ་དགོས་བར་བརྗོད་འདུགདེ་རིང་ Thegamer.com ཞེས་པའི་དྲ་གནས་ཐོག་གནས་ཚུལ་ཐོན་པ་ལྟར་ན། ཁ་ཉིན་ཟླ་འདིའི་ཚེས་བཅུའི་ཉིན།  ཨ་རིའི་གྲོང་ཁྱེར་ཁ་ལ་ར་ཊོ་ནང་དུ་རྟེན་གཞི་བྱས་པའི་བརྙན་ལམ་གྱི་གློག་རྡུལ་བརྙན་རྩེད་སྒྲིག་སྦྱོར་ཁང་ Idol Minds ཞེས་པ་ཞིག་གིས་ཁྱད་མཚར་གྱི་མི་ཚེ་ཞེས་པའི་མུ་འབྲེལ་གྱི་བརྙན་རྩེད་ཀྱི་ཆ་ཤས་སུ། True Colors ཞེས་པའི་རྩེད་འགྲན་དེ་གསར་དུ་ཕབ་སྐྲུན་བྱས་ཤིང་། ཉི་ཧོང་ནང་གི་བརྙན་རྩེད་བཟོ་ལས་ཁང་ Square Enix ཞེས་པའི་ཡུ་རོབ་སྡེ་ཚན་ཞིག་གིས་བརྙན་རྩེད་དེ་དྲ་ཐོག་ཏུ་སྒོ་འབྱེད་བྱས་ཡོད་པའི་ནང་དུ།  བོད་ཀྱི་རྒྱལ་དར་འཁོད་ཡོད་པ་དང་། བརྙན་རྩེད་དེར་རྒྱལ་སྤྱིའི་སྟེང་དགའ་མོས་བྱེད་མཁན་མང་པོ་བྱུང་ཡོད་ཀྱང་། རྒྱ་ནག་གིས་རྩེད་འགྲན་པ་མང་པོས་བོད་ཀྱི་རྒྱལ་དར་བཞག་ཡོད་པར་སྐྱོན་བརྗོད་སྣ་ཚོགས་བྱེད་བཞིན་ཡོད་པར་འཁོད་འདུགབརྙན་རྩེད་གསར་པ་འདོན་སྤེལ་བྱས་པའི་རྗེས་སུ་དྲ་ཐོག་ནས་ཨིན་ཡིག་དང་རྒྱ་ཡིག་སོགས་སྐད་ཡིག་འདྲ་མིན་ཐོག་མཆན་བཀོད་མཁན་མང་དག་ཅིག་བྱུང་ཡོད་པའི་ཁོངས་ནས་རྒྱ་ཡིག་ཐོག་མཆན་བཀོད་མཁན་མང་པོ་ཞིག་གིས་བརྙན་རྩེད་དེའི་ནང་བོད་ཀྱི་རྒྱལ་དར་བཞག་པ་དེ་ནི་རྒྱ་ནག་གི་རྒྱལ་ཁབ་ཀྱི་བདག་དབང་ཁ་བྲལ་གཏོང་བ་ཞིག་ཡིན་པར་བསྙལ་ནས་གནད་དོན་དེར་བཟོད་བསྲན་བྱེད་ཐབས་མེད་པ་དང་། ཡང་ཁག་གཅིག་གིས་བོད་ཀྱི་རྒྱལ་དར་བཞག་པ་དེ་ཡིས་བོད་རང་བཙན་མཚོན་གྱི་ཡོད་པར་བསྒྲགས་ཏེ། གནད་དོན་དེ་ནི་རྒྱ་ནག་ཁ་བྲལ་གཏོང་ཐབས་ཤིག་རེད་ཅེས་སྐྱོན་བརྗོད་བྱས་ཡོད་པ་རེད་འདུག རྒྱ་ཡིག་གི་ལམ་ནས་མཆན་འབྲི་མཁན་ལ་རིགས་གཉིས་ཡོང་གི་ཡོད་པའི་ཁྲོད་ནས། ཐེ་ཝན་དང་ཧོང་ཀོང་གི་འབྲི་ལུགས་ཀྱིས་མཆན་བཀོད་མཁན་ཡོད་པ་རྣམས་ཀྱིས་སྐྱོན་བརྗོད་བྱས་མེད་ཀྱང་། རྒྱ་ནག་དམར་གཞུང་གི་སྤྱི་སྐད་ཀྱི་ལམ་ནས་མཆན་བཀོད་པ་རྣམས་ཀྱི་ནང་དུ་སྐྱོན་བརྗོད་ཤུགས་ཆེར་བྱས་ཏེ། དྲ་ཐོག་གི་གློག་རྡུལ་རྩེད་མོ་དེ་ཕབ་སྐྲུན་བྱེད་མཁན་ཚོས་བོད་ཀྱི་རྒྱལ་དར་བཞག་པར་དགོངས་སེལ་ཞུ་དགོས་ལུགས་བཀོད་ཡོད་པ་མ་ཟད། སྐྱོན་བརྗོད་ཀྱི་མཆན་བཀོད་མཁན་ཁག་ཅིག་གིས་རྩེད་མོའི་ཁྲོད་ཀྱི་འཁྲབ་སྟོན་པའི་སྐོར་ལ་མི་རིགས་དབྱེ་འབྱེད་དང་ཕོ་མོའི་མཚན་མཐུད་ཀྱི་རིགས་ལ་སྡང་ཟུག་དང་འབྲེལ་བའི་མཆན་མང་དག་ཅིག་བཀོད་ཡོད་པ་རེད་འདུག རྩ་བའི་རྒྱ་ནག་གི་ངོས་ནས་བརྙན་རྩེད་དང་གློག་བརྙན་སོགས་ཅི་རིགས་ཀྱི་ནང་དུ་བོད་ཅེས་འཁོད་པ་ཙམ་གྱིས་རྒྱལ་ཁབ་ཁ་བྲལ་གཏོང་ཐབས་ལ་ཁ་གཡར་སྟེ་བཀག་སྡོམ་བྱེད་ཀྱི་ཡོད་པ་མ་ཟད། རྒྱ་ནག་གི་བརྙན་རྩེད་དང་འབྲེལ་བའི་ཁྲིམས་སྒྲིག་གཏན་འབེབས་བྱས་པའི་ནང་དུ། ཕོ་མོའི་མཚན་མཐུད་ཀྱི་གནད་དོན་དེ་དག་གིས་མང་ཚོགས་ལ་དཔེ་མཚོན་ངན་པ་འཇོག་གི་ཡོད་ལུགས་བརྗོད་ནས་དེ་དག་ཀྱང་བཀག་སྡོམ་བྱེད་བཞིན་ཡོད་པའི་ཁྲོད། དེ་སྔོན་ Guilty Gear Strive ཞེས་པའི་རྩེད་མོའི་ནང་དུ་བོད་དང་ནང་སོག དེ་བཞིན་ཐེ་ཝན་དང་འབྲེལ་བའི་བརྗོད་དོན་ཡོངས་སུ་ནག་གསུབ་བཏང་དགོས་ཁེལ་ཡོད་པ་མ་ཟད། Hearthstone ཞེས་པའི་བརྙན་རྩེད་ཀྱི་རྩེད་འགྲན་པ་ཞིག་ལ་རྩེད་འགྲན་གྱི་མཐའ་མཇུག་ཏུ་ Free Hong Kong ཞེས་བྲིས་པར་རྩེད་འགྲན་ནང་ཞུགས་མི་ཆོག་པ་བཟོས་ཡོད་པ་རེད།  

རྒྱ་ནག་གི་ནུབ་ཕྱོགས་དམག་སྡེའི་འཀོད་འདོམ་གྱི་འོག་ནས།  འཕགས་བོད་ས་མཚམས་དང་ཤིན་ཅང་གི་ས་ཁུལ་དུ་གནམ་ཐང་སུམ་ཅུ་ལྷག་གསར་རྒྱག་བྱེད་བཞིན་པ་དང་། དེའང་ཁུལ་དེ་དག་དུ་རྒྱ་ནག་གི་དམག་མི་འོར་འདྲེན་གྱི་མཐུན་རྐྱེན་ཇེ་ལེགས་སུ་གཏོང་རྒྱུ་ཡིན་པར་བསྒྲགས་འདུགWestern Theatre Command ཞེས་པའི་རྒྱ་ནག་གི་ནུབ་ཕྱོགས་དམག་སྡེ་ནི་འཕགས་བོད་མཐའ་མཚམས་ས་ཁུལ་ཁག་གི་གཙོས་ཤིན་ཅང་དང་བོད་རང་སྐྱོང་ལྗོངས་ཟེར་བར་ལྟ་རྟོགས་ཀྱི་འགན་ཡོད་པའི་རྒྱ་ནག་བཅིངས་གྲོལ་དམག་སྡེ་ལྔའི་ནང་གི་གཅིག་ཆགས་ཀྱི་ཡོད་པ་དང་། དམག་སྡེ་དེའི་ནང་གི་དཔོན་རིགས་ཞིག་གིས་རྒྱ་ནག་གི་གཞུང་འབྲེལ་བརྒྱུད་ལམ་Chinamil ཐོག རྒྱ་ནག་གིས་མཐའ་མཚམས་ཁག་ཏུ་གནམ་ཐང་འཛུགས་སྐྲུན་གྱི་ལས་གཞི་རྒྱ་སྐྱེད་དང་འཕེལ་རྒྱས་གཏོང་བཞིན་པ་དེ་ཡིས་འབྱུང་འགྱུར་གྱི་ཁྲོད་དུ་དམག་མིའི་འགྲུལ་སྐྱོད་རིགས་སྟབས་བདེ་ཆགས་རྒྱུ་ཡིན་སྐོར་འགྲེལ་བརྗོད་བྱས་པ་དང་འབྲེལ། གནམ་ཐང་༣༠ གསར་རྒྱག་ཁྲོད་ཀྱི་ལས་གཞི་གསུམ་འཕགས་བོད་མཐའ་མཚམས་སུ་ཆགས་པའི་བོད་དབུས་ཁུལ་གྱི་ལྷུན་རྩེ་རྫོང་། དེ་བཞིན་དིང་རི་དང་སྤུ་ཧྲེང་རྫོང་ཁུལ་དུ་ཁེལ་གྱི་ཡོད་པར་བརྗོད་འདུག གནམ་ཐང་དེ་དག་ལས་ཁག་ཅིག་གསར་རྒྱག་བྱས་ཟིན་དེ་ད་ཆ་དངོས་སུ་སྒོ་འབྱེད་བྱས་ཡོད་པ་མ་ཟད། ཁག་ཅིག་ད་ལྟ་འཛུགས་སྐྲུན་བྱེད་མུས་ཡིན་པར་མངོན་གསལ་གནང་བའི་ཁོངས་སུ་པ་ཀི་སི་ཐན་གྱི་དབང་བསྒྱུར་འོག་ཡོད་པའི་ཀ་ཞི་མཱར་དང་། དེ་བཞིན་ཨ་ཧྥན་ཧྒན་དང་ཐག་ཉེ་བའི་ཤིན་ཅང་གི་Tashkurgan ཞེས་པའི་ས་གནས་སུ་གསར་རྒྱག་བྱེད་བཞིན་པའི་འཐབ་བྱུས་རང་བཞིན་གྱི་གནམ་ཐང་དེ་སང་ལོའི་ལོ་དཀྱིལ་དུ་དངོས་སུ་སྒོ་འབྱེད་བྱེད་རྒྱུ་ཡིན་པ་དང་། གནམ་ཐང་དེ་ནི་ཤིན་ཅང་ཁུལ་དུ་ས་བབ་ཆེས་མཐོ་བའི་ཁུལ་གྱི་གནམ་ཐང་ཐོག་མ་དེ་ཆགས་ཡོད་པར་བརྗོད་འདུགརྒྱ་ནག་གིས་གཞུང་འབྲེལ་བརྒྱུད་ལམ་ཐོག་ཐོན་པའི་གནས་ཚུལ་དེའི་ནང་དུ། རྒྱ་གཞུང་གིས་འདི་ལོར་བོད་དང་ཤིན་ཅང་གི་ས་ཁུལ་ཁག་རྒྱ་ནག་གི་གྲོང་ཁྱེར་མང་པོར་འབྲེལ་མཐུད་ཀྱི་གཞུང་ལམ་༢༤ལྷག་གསར་དུ་དངོས་སུ་སྒོ་འབྱེད་བྱས་ཟིན་པ་དང་། རྒྱ་གར་གསར་ཁང་གིས་རྒྱ་ནག་གིས་གནམ་ཐང་དང་གཞུང་ལམ་གསར་རྒྱག་གི་ལས་གཞི་དེ་དག་ནི་འཕགས་བོད་ས་མཚམས་དང་འབྲེལ་ནས་རྒྱ་དཀར་ནག་གི་རྙོག་གླེང་ལ་སེམས་འཚབ་ཆེ་བའི་དུས་སྐབས་སུ་ལས་གཞི་ལག་བསྟར་བྱས་པ་ཞིག་ཡིན་པར་བརྗོད་དེ། ད་ཆ་རྒྱ་ནག་གིས་འཕགས་བོད་མཐའ་མཚམས་ཡོངས་སུ་གཞུང་ལམ་དང་གནམ་ཐང་གསར་རྒྱག་བྱེད་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག དེ་བཞིན་ཟླ་འདིའི་ཚེས་གཅིག་གི་ཞོགས་པར། བོད་དབུས་ཁུལ་གྱི་གཞིས་རྩེ་ནས་རྒྱ་ནག་གི་མནམ་གྲུ་ཞིག་གིས་དམག་མི་མཐོ་གྲས་༡༡༥ ལྷག་ཁྲིན་ཏིའུ་རུ་སྐྱེལ་འདྲེན་གྱིས་བོད་དང་ཤིན་ཅང་གི་ས་ཁུལ་ནས་དམག་མི་འོར་འདྲེན་སླད་མཁའ་ལམ་༢༣ གསར་རྒྱག་གི་མཛད་སྒོར་ཞུགས་ཡོད་སྐོར་བརྗོད་པ་མ་ཟད། མངའ་རི་བར་བསྐྱོད་རྒྱུའི་མཁའ་ལམ་གཞན་གསུམ་གསར་འཛུགས་བྱས་ཡོད་པ་དང་། དུས་རྒྱུན་གྱི་གནམ་གྲུའི་འགྲུལ་སྐྱོད་ཀྱི་ཁྲོད་དུ་གནམ་ཐང་གི་འབྲེལ་ཡོད་ལས་བྱེད་ཀྱིས་ཛ་དྲག་གི་སྐབས་སུ་དམག་མི་མངའ་རིའི་ཁུལ་དུ་འགྲོ་དགོས་ཁེལ་བ་སོགས་ལ་འཛིན་བྱང་ཆེད་གཉེར་བྱེད་ཀྱི་ཡོད་པ་སོགས་ཀྱང་མངོན་གསལ་གནང་འདུག གཞི་རྩའི་སྲིད་འཛིན་ཞི་ཅིན་ཕིང་གི་བོད་སྐྱོང་མཐའ་སྐྱོང་ཞེས་པའི་སྲིད་བྱུས་ཀྱི་འོག་ནས་རྒྱ་ནག་གིས་འདས་བའི་ལོ་འགའི་རིང་འཕགས་བོད་མཐའ་མཚམས་ཁག་ཏུ་གནམ་ཐང་དང་གཞུང་ལམ། དེ་བཞིན་གྲོང་ཚོ་གསར་རྒྱག་སོགས་ཀྱི་ལས་གཞི་ལག་བསྟར་གྱིས། མང་ཚོགས་རྙོག་གླེང་ཆེ་བའི་ས་ཁུལ་དུ་འཚོ་གནས་བཅའ་ཐབས་ལ་འབད་བརྩོན་དང་། དེ་བཞིན་ཛ་དྲག་གི་སྐབས་སུ་རྒྱ་ནག་གི་དམག་མི་དང་གོ་མཚོན་རིགས་སྐྱེལ་འདྲེན་བྱེད་རྒྱུར་ནུས་ཤུགས་རྒྱ་སྐྱེད་བྱེད་ཀྱི་ཡོད་པ་རེད།  

རྒྱ་ནག་གི་གཞུང་འབྲེལ་Global Times གསར་ཁང་གིས་དེ་རིང་གནས་ཚུལ་སྤེལ་བའི་ནང་དུ།  རྒྱ་ནག་གི་་ཆིན་རྒྱལ་རབས་ཀྱི་གོང་མ་ཨན་བན་དང་འབྲེལ་བའི་གློག་བརྙན་གསར་བ་ཞིག་མི་འགྱངས་བར་ཕྱིར་འདོན་བྱེད་རྒྱུ་ཡིན་ལུགས་སྦྲགས་ཏེ། ལྟད་མོ་དེའི་བརྗོད་སྙིང་གཙོ་བོ་ནི་རྒྱ་ནག་གི་ཆིན་གོང་མས་བོད་ས་དབང་སྒྱུར་གྱིས་བལ་ཡུལ་གྱི་གོར་ཁ་དམག་འཐབ་ལས་བོད་ས་སྲུང་སྐྱོབ་བྱས་པ་གཙོ་བོར་བསྟན་ཡོད་པ་ཞིག་ཡིན་པར་བསྒྲགས་ཏེ། གློག་བརྙན་དེ་ནི་རྒྱ་ནག་གིས་བོད་ལ་བཅིངས་གྲོལ་ཟེར་བ་བཏང་ནས་མི་ལོ་བདུན་ཅུ་འཁོར་བའི་དུས་སྟོན་གྱི་ཆ་ཤས་ཤིག་ཏུ་སྟོན་རྒྱུ་ཡིན་པར་བསྒྲགས་འདུགགསར་ཤོག་དེའི་ནང་དུ། རྒྱ་ནག་ཕྱི་ལོག་གི་བརྒྱུད་ལམ་ཁག་ཅིག་ནས་གློག་བརྙན་དེ་ནི་རྒྱ་ནག་གིས་ཆེད་དུ་ཏཱ་ལའི་རུ་ཚོགས་ལ་ཉེན་བརྡ་བཏང་བ་ཞིག་ཡིན་པར་འགྲེལ་བརྗོད་བྱེད་མཁན་བྱུང་ཡོད་སྐོར་བརྗོད་པ་མ་ཟད།  རྒྱ་ནག་གི་ཉམས་ཞིབ་པའི་ལྟད་མོ་དེར་སྡོམ་རྒྱབ་པ་ཞིག་ལུང་འདྲེན་བྱས་ཏེ། གློག་བརྙན་དེས་ཏྭ་ལའི་རུ་ཚོགས་ལ་བརྡ་ལན་ཞིག་སྤྲད་ཚེ། དེ་ནི་རྒྱ་ནག་གཞུང་གི་ད་བར་འགྱུར་བ་མེད་པའི་ཐོག་ནས་བཟུང་པའི་ལངས་ཕྱོགས་ཏེ། ཁ་བྲལ་གྱི་ལས་འགུལ་དེ་ནམ་ཡང་ལེགས་འགྲུབ་བྱུང་ཐབས་མེད་པ་དང་། རྒྱ་ནག་གི་ངོས་ནས་རྒྱལ་ཁབ་ཀྱི་བདག་དབང་དང་ས་ཁོངས་གོང་བུ་སྲུང་སྐྱོབ་བྱེད་རྒྱུའི་ཆོད་སེམས་བརྟན་པོ་ཡོད་པ་དེ་རེད་ཅེས་འགྲེལ་བརྗོད་བྱས་འདུག Global Times གསར་ཁང་གིས་བརྗོད་པ་ལྟར་ན། གློག་བརྙན་དེ་ནི་རྒྱ་ནག་གི་གོང་མ་ཆིན་ལོང་གི་སྐབས་ཏེ། པཎ་ཆེན་སྐུ་ཕྲེང་དྲུག་པའི་སྤུན་མཆེད་ཀྱིས་ཕྱི་ལོག་གི་སྟོབས་ཤུགས་དང་ཟླ་སྒྲིལ་གྱིས་བོད་ས་དབང་སྒྱུར་བྱེད་ཐབས་ལ་དམིགས་ཏེ་བཀྲ་ཤིས་ལྷུན་པོ་དགོན་པ་ཇག་བཅོམ་བྱས་པའི་སྐབས་སུ། ཆིན་གོང་མས་དམག་སྤྱི་བོད་དུ་བཏང་སྟེ། བོད་དང་མན་ཇུ། དེ་བཞིན་ཧན་མི་རིགས་དང་སོག་པོ་སོགས་ས་ཁོངས་གཅིག་སྒྲིལ་གྱིས་ཕྱི་ལོག་གི་བཙན་འཛུལ་བ་ཕྱིར་ཕུད་བཏང་སྟེ། གྲངས་ཉུང་མི་རིགས་རྣམས་ཀྱི་སྟོབས་ཤུགས་གཅིག་སྒྲིལ་བྱས་པ་མ་ཟད། བོད་ཀྱི་སྲིད་གཞུང་ལ་སྲུང་སྐྱོབ་བྱས་ཏེ། སྐབས་དེ་ནས་བཟུང་བོད་ཏུ་ཡང་སྲིད་ཐག་གཅོད་གནང་སྟངས་ཀྱི་གསེར་བུམ་དཀྲུག་སྲོལ་གསར་དུ་ལག་བསྟར་བྱས་པ་ཞིག་ཡིན་ཚུལ་བརྗོད་འདུག དེ་བཞིན་རྒྱ་ནག་གི་ཉམས་ཞིབ་པས་སྐབས་དེ་ནས་བོད་དུ་གསེར་བུམ་དཀྲུག་སྲོལ་བྱུང་བ་ལྟར། བོད་ཀྱི་རྒྱལ་བ་པཎ་ཆེན་གཉིས་ཀྱི་ཡང་སྲིད་ཀྱང་གསེར་བུམ་དཀྲུག་ནས་ཐག་གཅོད་བྱེད་ཀྱི་ཡོད་ནའང་། ད་ཆ་༸གོང་ས་མཆོག་གི་གཙོ་བྱས་པའི་ཁ་བྲལ་བ་ཚོས་ལམ་ལུགས་དེར་ངོས་ལེན་མ་བྱས་པར་༸གོང་ས་མཆོག་གི་ཡང་སྲིད་དང་འབྲེལ་བའི་དྲིལ་བསྒྲགས་བྱེད་ཀྱི་ཡོད་པར་བརྗོད་པ་མ་ཟད། ༸གོང་ས་ཏཱ་ལའི་བླ་མ་ནི་ཆོས་བ་རྣམ་དག་ཅིག་མིན་པར་བཙན་བྱོལ་དུ་གྱར་བའི་ཁ་བྲལ་བ་ཞིག་ཡིན་པའི་མཚན་སྨོད་བྱས་འདུག གོང་གི་གནས་ཚུལ་དེ་དང་འབྲེལ་ནས་འདི་གའི་གསར་འགོད་པས་ཐེ་ཝན་དོན་གཅོད་དང་སྤྱི་ཟུར་སྐལ་བཟང་རྒྱལ་མཚན་ལགས་སུ་བཀའ་འདྲི་ཞུས་པར་ཁོང་གིས་རྒྱ་ནག་གི་ཐེངས་འདིའི་གློག་བརྙན་འདི་ནི་ལོ་འགའ་ཤས་ཀྱི་གོང་ནས་འཆར་གཞི་ལྡན་པའི་ཐོག་ནས་བཟོ་སྐྲུན་བྱས་ཏེ། ལོ་རྒྱུས་ཀྱི་ཐོག་ནས་བོད་རྒྱ་ཁོངས་ཡིན་པ་དང་། ཆོས་ལུགས་ཀྱི་ཐོག་ནས་༸གོང་ས་སྐུ་ཕྲེང་༡༤་པ་མཆོག་རྒྱལ་སྤྱིའི་སྟེང་ནས་མཛད་འཕྲིན་རྒྱས་བཞིན་ཡོད་སྟབས་སྐུ་ཕྲེང་བཅོ་ལྔ་བ་དེ་རྒྱ་ནག་རང་གིས་གདམ་ཐབས་སུ་ལོ་རྒྱུས་ཀྱི་ཁྲོད་དུ་ཆོས་ལུགས་ཀྱི་བཀའ་དབང་རྒྱ་ནག་ལ་ཡོད་པ་སོགས་ཀྱི་ལོ་རྒྱུས་ལ་འཁྱོགས་བརྗོད་བྱེད་བཞིན་པའི་གནད་དོན་ཞིག་ཆགས་ཡོད་པར་ངོ་སྤྲོད་གནང་སོང་། དེ་བཞིན་ཁོང་གིས་གོར་ཁ་དམག་མི་མཐར་སྐྲོད་བཏང་ཟིན་པའི་རྗེས་སུ་བོད་དང་འབྲེལ་མཐུད་ཀྱི་ཕྱིར་ཏུ་ཨན་བན་ལས་ཁུངས་བོད་དུ་བཙུགས་པ་དང་དེ་བཞིན་བོད་ཀྱི་ཆབ་སྲིད་ཀྱི་འཛིན་སྐྱོང་དང་ལ་ལེགས་བཅོས་ཀྱི་དོན་ཚན་ཉེར་དགུ་ཅན་གྱི་བསམ་ཚུལ་ཞིག་ཕུལ་བ་ཙམ་ལས་བོད་ཀྱི་བདག་དབང་ཡོངས་སུ་རྫོགས་ལ་རྒྱ་ནག་ལ་ཡོད་པར་བརྗོད་བཞིན་པ་དེ་ནི་ལོ་རྒྱུས་ཐོག་རྩ་བ་ཉིད་ནས་གཞི་རྩ་མེད་པ་ཞིག་ཆགས་ཡོད་པར་འགྲེལ་བརྗོད་གནང་སོང་། དེ་བཞིན་བོད་ཀྱི་སྲིད་བྱིས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་ཚེ་བརྟན་ལགས་ཀྱིས་རྒྱ་ནག་གིས་དུས་རྒྱུས་ནས་རྣམ་པ་འདྲ་མིན་གྱི་ཐོག་ནས་ཆབ་སྲིད་དགོས་མཁོ་ལ་དམིགས་པའི་དྲིལ་བསྒྲགས་ཀྱི་རིགས་བྱེད་ཀྱི་ཡོད་པ་ལྟར། གློག་བརྙན་འདི་ལ་མཚོན་ན་ཡང་གཙོ་བོ་ལོ་རྒྱུས་ཀྱི་ཐོག་བོད་རྒྱལ་ཁོངས་ཡིན་པ་དང་རྒྱ་ནག་ལ་བོད་ཀྱི་བདག་དབང་ཡོད་པར་དྲིལ་བསྒྲགས་བྱེད་ཐབས་དང་། དེ་བཞིན་བོད་དང་ཆིན་གོང་མའི་བར་གྱི་མཆོད་ཡོན་གྱི་འབྲེལ་བ་བརྒྱུད་ནས་སྐུའི་ཡང་སྲིད་ཀྱི་བདག་དབང་ཡང་རྒྱ་ནག་ལ་ཡོད་པར་སྒྲུབ་པར་འབད་བརྩོད་བྱེད་བཞིན་པའི་དྲིལ་བསྒྲགས་ཁོ་ན་ཡིན་པར་ངོ་སྤྲོད་གནང་སོང་། གཞི་རྩའི་ཨན་བན་ཞེས་པའི་གློག་བརྙན་དེ་ནི་ཕྱི་ལོ་ ༢༠༡༦ ལོར་བཟོ་བསྐྲུན་གྱིས་ཕྱི་ལོ་ ༢༠༡༧ ལོར་དངོས་སུ་གཟིགས་འབུལ་ཞུ་རྒྱུར་ཐག་གཅོད་བྱས་ཡོད་ཀྱང་། ཕྱིས་སུ་གློག་བརྙན་དེ་དུས་ཐོག་ཏུ་འདོན་སྤེལ་མ་བྱས་པར་ལོ་བཞིའི་རིང་ལ་ཕྱིར་འགྱངས་བྱས་པ་ཞིག་ཡིན་པ་དང་། འདི་ལོར་རྒྱ་ནག་གི་བོད་ཞི་བའི་བཅིངས་གྲོལ་ཟེར་བ་བཏང་ནས་ལོ་བདུན་ཅུ་འཁོར་བའི་དུས་སྟོན་གྱི་ཆ་ཤས་སུ་ཕྱིར་འདོན་གནང་རྒྱུ་ཡིན་པར་བསྒྲགས་འདུག

སང་ལོར་རྒྱ་ནག་ཏུ་དགུན་དུས་ཀྱི་ཨོ་རྩལ་འགྲན་ཚོགས་བསྡུ་ལ་ཉེ་བ་དང་བསྟུན་ནས། རྒྱལ་སྤྱིའི་ཐོབ་ཐང་ཚོགས་པ་ཁག་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་དང་འབྲེལ་ནས་ཨ་རི་དང་། ཁེ་ན་ཊ། དབྱིན་ཡུལ། དེ་བཞིན་འཇར་མན་བཅས་ཀྱི་བརྒྱུད་ལམ་ཁག་གིས་རྒྱ་ནག་གི་ཨོ་རྩེད་འགྲན་ཚོགས་ཁྱབ་བསྒྲགས་དང་རྒྱང་སྲིང་མི་བྱེད་རྒྱུའི་ཞུ་སྐུལ་གནང་འདུགདེའང་ཞུ་སྐུལ་གནང་མཁན་གྱི་ཁོངས་སུ། རྒྱ་ནག་གི་དབང་བསྒྱུར་འོག་གི་གྲངས་ཉུང་མི་རིགས་ཁག་སྟེ། བོད་མི་དང་ཡུ་གུར་བ། དེ་བཞིན་ཧོང་ཀོང་བ་སོགས་ཀྱི་གཙོ་བྱས་པའི་རྒྱལ་སྤྱིའི་ཐོབ་ཐང་ཚོགས་པ་ཁག་ཆགས་ཡོད་པ་དང་། ཐོབ་ཐང་ཚོགས་པ་ཁག་དེ་དག་གིས་ཁ་སང་ཨ་རིའི་ NBC དང་། དབྱིན་ཡུལ་གྱི་ BBC, འཇར་མ་ནིིའི་ ARD, དེ་བཞིན་ཁེ་ན་ཀྲའི་ CBC སོགས་ཀྱི་བརྙན་འཕྲིན་ལས་ཁུངས་ཆེ་གྲས་སོ་སོའི་གཙོ་འཛིན་ལ་ཞུ་སྐུལ་གྱི་ཕྱག་ཡིག་ཕུལ་ཏེ་རྒྱ་ནག་གི་དགུན་དུས་ཀྱི་ཨོ་རྩལ་དང་འབྲེལ་བའི་གནས་ཚུལ་ཁག་མི་སྤེལ་རྒྱུའི་རེ་ཞུ་གནང་ཡོད་པ་རེད། གཞི་རྩའི་ཨ་རིའི་གསར་ཁང་ཆེ་གྲས་ NBC ནི་རྒྱལ་སྤྱིའི་ཨོ་རྩལ་ལྷན་ཚོགས་ཀྱི་མ་དངུལ་མཁོ་འདོན་གྱི་སྦྱིན་བདག་ཆེ་ཤོས་ཤིག་ཆགས་ཀྱི་ཡོད་པ་དང་། AP གསར་སྤེལ་ཁང་གིས་སྤེལ་བའི་གནས་ཚུལ་ནང་གསལ་ལྟར་ན། བརྙན་འཕྲིན་ལས་ཁང་དེས་ཨོ་རྩལ་ལྷན་ཚོགས་ལ་ཡོང་རྒྱུའི་ཨོ་རྩལ་དྲུག་རྒྱང་སྲིང་ཆེད་མ་དངུལ་ཨ་སྒོར་ཐེར་འབུམ་ ༧།༧༥ ལྷག་མཁོ་སྤྲོད་གནང་ཡོད་པ་དང་། དངུལ་འབབ་དེ་ནི་ཨོ་རྩལ་ལྷན་ཚོགས་ཀྱི་སྤྱི་ཡོངས་ཀྱི་མ་དངུལ་རྩ་འབོར་གྱི་བརྒྱ་ཆ་ ༤༠ ལྷག་ཆགས་ཀྱི་ཡོད་པ་རེད་འདུགNBC ཡི་གཙོ་འཛིན་ Jeff Shell ལགས་ཀྱི་མཚན་ཐོག་ཏུ་ཕུལ་བའི་ཞུ་ཡིག་གི་འདྲ་བཤུས་ཤིག་ AP གསར་སྤེལ་ཁང་ལ་རག་སོན་བྱུང་བའི་ནང་དུ། ཐོབ་ཐང་ཚོགས་པ་ཁག་གིས་རྒྱལ་སྤྱིའི་གསར་ལམ་དེ་དག་གིས་རྒྱ་ནག་གི་ཨོ་རྩལ་ཁྱབ་བསྒྲགས་དང་རྒྱང་བསྲིེངས་ཞུས་པ་ཡིན་ན་། དེ་ནི་རྒྱ་ནག་ནང་གི་འགྲོ་བ་མིའི་ཐོབ་ཐང་ཇེ་ཞན་ཇེ་སྡུག་ཏུ་གཏོང་རྒྱུར་ངན་པ་ལག་འབྲེལ་བྱས་པ་ཞིག་མཚོན་རྒྱུ་ཡིན་སྐོར་བརྗོད་འདུག གཞི་རྩའི་རྒྱ་ནག་གི་ཕྱི་སྲིད་ལྷན་ཁག་གིས་ཨོ་རྩལ་འགྲན་ཚོགས་དེ་ཆབ་སྲིད་ཀྱི་ངོ་བོར་བསྒྱུར་བཞིན་པར་འགྲེལ་བརྗོད་ཀྱིས་སྐྱོན་བརྗོད་བྱས་ཏེ་ཐོབ་ཐང་ཚོགས་སྐྱིད་ཁག་གིས་རྒྱ་ནག་ནང་གི་ཨོ་རྩལ་འགོག་ཐབས་བྱས་པ་དེ་ནི་ཕམ་ཉེས་འབྱུང་རྒྱུ་འབའ་ཞིག་ཡིན་པར་འགྲེལ་བརྗོད་ཀྱིས། རྒྱ་ནག་གིས་ཡུ་གུར་མི་རིགས་རྩ་གཏོར་གཏོང་གི་ཡོད་པར་བསྒྲགས་བཞིན་པ་དེ་ནི་དུས་རབས་འདིའི་རྫུན་གཏམ་ཁོ་ན་ཞིག་ཡིན་པར་བརྗོད་ཡོད་པ་རེད། རྒྱལ་སྤྱིའི་བོད་དོན་འབྲེལ་མཐུད་ཁང་གི་འགན་འཛིན་ལས་རོགས། བཀྲས་མཐོང་ལྷ་སྒྲོན་ལགས་ཀྱིས་ཁ་ན་ཊའི་གསར་ཁང་ལ་འགྲེལ་བརྗོད་གནང་བའི་ནང་དུ། ABC དང་CBC དེ་བཞིན་ BBC དང་ ARD སོགས་རྒྱལ་སྤྱིའི་བརྙན་འཕྲིན་ལས་ཁང་དེ་དག་གི་མ་དངུལ་མང་ཚོགས་ཀྱི་ཁྲོད་ནས་མཁོ་འདོན་གནང་གི་ཡོད་སྟབས། གསར་ཁང་དེ་དག་གིས་རྒྱ་ནག་གི་ཨོ་རྩལ་དང་འབྲེལ་བའི་གསར་འགྱུར་རིགས་ཁྱབ་སྤེལ་གྱི་འཆར་གཞི་དེ་མདུན་སྐྱོད་མི་བྱེད་རྒྱུའི་རེ་སྐུལ་དང་སྦྲགས། གསར་ཁང་དེ་དག་ཡོད་སའི་རྒྱལ་ཁོངས་སོ་སོའི་མང་ཚོགས་ཀྱིས་གནད་དོན་དེ་དང་འབྲེལ་ནས་གླེང་མོལ་བྱེད་དགོས་བའི་རེ་བ་བཏོན་སྟེ། རྒྱ་ནག་གིས་བོད་མི་དང་ཡུ་གུར་བ་རྩ་གཏོར་གྱི་སྲིད་བྱུས་ལག་བསྟར་བྱེད་བཞིན་པའི་སྐབས་འདིར་གསར་ཁང་དེ་དག་གིས་རྒྱ་ནག་གི་དཔོན་རིགས་ཀྱི་ལས་འཆར་ཁག་ལ་རོགས་འདེགས་ཀྱིས་ཨོ་རྩལ་འགྲན་ཚོགས་དེ་རྒྱུན་ལྡན་ལྟ་བུ་ཞིག་ལ་ངོས་འཛིན་གྱིས་གསར་འགྱུར་སྤེལ་བ་ཡིན་ན། གནད་དོན་དེ་གནས་ལུགས་དང་བྲལ་བའི་བྱེད་བབ་ཅིག་ཡིན་པར་གསུངས་འདུག གཞན་ཡང་གསར་ཁང་གིས། རྒྱལ་སྤྱིའི་ཨོ་རྩལ་ལྷན་ཚོགས་ཀྱིས་ཕྱི་ལོ་ ༢༠༢༤ ཧྥ་རན་སིའི་ཨོ་རྩལ་འགྲན་ཚོགས་དང་འབྲེལ་ནས་འགྲོ་བ་མིའི་ཐོབ་ཐང་གི་གནས་བབ་ཀྱི་ཆ་རྐྱེན་བཏོན་ནས་གན་ཡིག་བཞག་ཡོད་ནའང་། ཨོ་རྩལ་ལྷན་ཚོགས་ཀྱིས་རྒྱ་ནག་གི་སང་ལོའི་རྩེད་འགྲན་དེར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་ཚོང་ལས་ཀྱི་རྩ་འཛིན་ལམ་སྟོན་ཁག་གི་ཆ་རྐྱེན་བཏོན་མེད་པར་མངོན་གསལ་གནང་འདུག གཞི་རྩའི་བོད་མི་དང་ཡུ་གུར་བ། དེ་བཞིན་ཧོང་བ་སོགས་ཀྱི་མཚོན་པའི་རྒྱལ་སྤྱིའི་ཐོབ་ཐང་ཚོགས་པ་བརྒྱ་ལྷག་གིས་ཨོ་རྩལ་ལྷན་ཚོགས་ལ་ཞུ་སྐུལ་གྱིས་རྒྱ་ནག་ཏུ་ཨོ་རྩལ་འགྲན་ཚོགས་བསྡུ་རྒྱུའི་ཆ་རྐྱེན་ཚང་མེད་སྟབས་རྩེད་འགྲན་དེ་ཕྱིར་བསྡུའམ་རྒྱལ་ཁོངས་གཞན་ཞིག་ཏུ་འཚོགས་དགོས་བའི་ཞུ་སྐུལ་རིམ་པ་བྱས་དང་བྱེད་མུས་ཡིན་པ་རེད།

རྒྱལ་སྤྱིའི IFFRAS ཞེས་པའི་ཐོབ་ཐང་དང་བདེ་འཇགས་གླེང་སྟེགས་ཁང་གིས་ཉེ་ཆར་གསར་དུ་བཏོན་པའི་སྙན་ཐོའི་ནང་དུ། རྒྱ་ནག་གི་བརྒྱུད་གཅིག་ལམ་གཅིག་གིས་ཁོར་ཡུག་ལ་གནོན་སྐྱོན་ཚབས་ཆེན་གཏོང་གི་ཡོད་པར་བསྒྲགས་འདུགགླེང་སྟེགས་ཁང་གིས་བཏོན་པའི་སྙན་ཐོའི་ནང་དུ། རྒྱ་ནག་གི་རྒྱུད་གཅིག་ལམ་གཅིག་གི་ལས་གཞི་དེ་ཡིས་གནམ་གཤིས་འགྱུར་ལྡོག་ལ་ཤུགས་ཆེ་བའི་ཉེན་ཁ་ཞིག་ཆགས་ཡོད་པ་མ་ཟད། རང་བྱུང་ཁོར་ཡུག་ཉམས་ཉེས་ལ་ཚད་བརྒལ་རང་བཞིན་གྱི་གནོད་སྐྱོན་ཐེབས་ཀྱི་ཡོད་ལུགས་དང་འབྲེལ། རྒྱ་ནག་གིས་ཀར་བོན་འཚོ་རླུང་མེར་སྲེག་ཆེས་ཆེར་གཏོང་བཞིན་པ་དེ་ཡིས་གནམ་གཤིས་འགྱུར་ལྡོག་དང་ཁོར་ཡུག་ཉམས་ཉེས་ལ་སྔར་ལྷག་གནོད་སྐྱོན་ཐེབས་རྒྱུ་ཡིན་པར་མངོན་གསལ་གནང་འདུག དེ་བཞིན་རྒྱ་ནག་གིས་ད་དུང་རྡོ་སོལ་མང་དུ་སྲེག་བཞིན་པ་དེ་ཡིས་རྒྱལ་སྤྱིའི་ཐོག་གི་དུག་རླངས་སྐྱེད་ཚད་ཀྱི་བརྒྱ་ཆ ༤༦ ལྷག་ཟིན་ཡོད་པ་དང་། གཞན་ཡང་གློག་ཤུགས་འདོན་ཚད་ཀྱིས་དྲོད་ཁང་གི་དུག་རླངས་བརྒྱ་ཆ ༧༢ ལྷག་རྒྱ་བསྐྱེད་བྱེད་བཞིན་ཡོད་པ་དང་སྦྲགས། རྒྱ་ནག་གི་རྒྱུད་གཅིག་ལམ་གཅིག་གི་ལས་གཞི་དེ་ཡིས་རྒྱལ་སྤྱིའི་ཁོར་ཡུག་ལ་ཤུགས་རྐྱེན་ངན་པ་ཐེབས་བཞིན་ཡོད་པར་འགྲེལ་བརྗོད་གནང་འདུག མ་ཟད་རྒྱ་ནག་གི་ནང་དུ་ཁོར་ཡུག་བདག་གཅེས་དང་འབྲེལ་བའི་རྩ་འཛིན་གྱི་སྒྲོམ་གཞི་དག་ལག་བསྟར་བྱེད་ཀྱི་མེད་པ་དང་། རྒྱ་ནག་གི་འཆར་ཅན་གྱི་ལས་གཞི་ཡོད་ཚད་ fossil fuels ཞེས་པའི་རང་བྱུང་གི་ཐོན་རྫས་སྤྱོད་ཀྱི་ཡོད་པར་མངོན་གསལ་གྱིས། རྒྱ་ནག་གིས་རྒྱུད་གཅིག་ལམ་གཅིག་གི་འཛུགས་སྐྲུན་ལས་གཞི་དེ་ནི་ཁོར་ཡུག་དང་འོས་འཚམས་ཡིན་ཞིང་ལྗང་མདོག་གི་ལས་གཞི་ཞིག་ཡིན་པར་བསྒྲགས་བཞིན་ཡོད་པར་བརྗོད་བཞིན་ཡོད་ནའང། རང་བྱུང་ཁོར་ཡུག་ལ་གནོད་སྐྱོན་བཟོ་གཞིའི་གནད་དོན་ཞིག་ཡིན་པར་བསྒྲགས་འདུག འབྱུང་འགྱུར་གྱི་ཁྲོད་དུ་རྒྱ་ནག་གི་རྒྱུད་གཅིག་ལམ་གཅིག་གི་འཛུགས་སྐྲུན་ལས་གཞི་དེ་ཡིས་རྒྱལ་སྤྱིའི་གླིང་ཕྲན་ལྔ་ཡི་ཁོར་ཡུག་ལ་ཉམས་ཉེས་ཚད་ལས་བརྒལ་བ་གཏོང་རྒྱུ་ཡིན་པར་འགྲེལ་བརྗོད་ཀྱིས། རྒྱལ་སྤྱིའི་འབྲེལ་ཡོད་ཀྱི་སློབ་སྟོན་ལྟེ་གནས་ཁང་གི་ཆེད་མཁས་བས་བརྗོད་པ་ལྟར་ན། རྒྱ་ནག་གི་ནུས་ཤུགས་སྐྱེ་འཕེལ་གྱི་འཛུགས་སྐྲུན་ལས་གཞིའི་བརྒྱ་ཆ་ ༩༠ ལྷག་རང་བྱུང་གི་ཐོན་རྫས་སྤྱད་ནས་དུག་རླངས་ཀར་བོན་ carbon  ཕྱིར་འདོན་བྱེད་ཀྱི་ཡོད་པར་བསྒྲགས་ཏེ། WRI ཞེས་པའི་རྒྱལ་སྤྱིའི་ཐོན་ཁུངས་ལྟེ་གནས་ཁང་གིས་རྒྱ་ནག་གི་འཛུགས་སྐྲུན་ལས་གཞི་ཡོད་ཚད་བསྐྱར་སྤེལ་བྱེད་ཐབས་བྲལ་བའི་རང་བྱུང་གི་ཐོན་རྫས་ལ་གཞི་བཞག་པ་ཤ་སྟག་ཡིན་ལུགས་མངོན་གསལ་གྱིས། བྱེད་བབས་དེ་ཡིས་དུག་རླངས་ཉུང་འཕྲུའི་ཐབས་ལམ་བརྟེན་གྱི་མེད་པར་བརྗོད་པ་ལུང་འདྲེན་གནང་ཡོད་པ་མ་ཟད།  རྒྱ་ནག་གི་ནང་དུ་ནུས་ཤུགས་སྐྱེ་འཕེལ་གྱི་དངུལ་བུན་བརྒྱ་ཆ་ ༦༡ ལྷག་རང་བྱུང་ཁོར་ཡུག་གི་ཐོན་སྐྱེད་ལ་གཞི་བྱས་པའི་རྒྱ་ནག་གི་ Development Bank ཞེས་པའི་འཕེལ་རྒྱས་དངུལ་ཁང་གིས་མཁོ་འདོན་བྱེད་བཞིན་ཡོད་པར་བསྒྲགས་འདུགགཞི་རྩའི་རྒྱ་ནག་གི་རྒྱུད་གཅིག་ལམ་གཅིག་གི་ལས་གཞི་ནི་ཕྱི་ལོ་ ༢༠༡༣ ལོའི་མཇུག་ཏུ་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཐོག་མར་བཀོད་འདོམས་བྱས་ཏེ་གཏན་ལ་ཕབ་ཡོད་པ་དང་། ཕྱི་ལོ་ ༢༠༡༧ ལོའི་རྒྱལ་སྤྱིའི་རྒྱུད་གཅིག་ལམ་གཅིག་གི་མཉམ་འབྲེལ་གླེང་སྟེགས་ཐོག་རྒྱལ་ཁབ་ཁག་ ༡༣༠ ཙམ་གྱི་སྐུ་ཚབ་དང་། མཉམ་འབྲེལ་རྒྱལ་ཚོགས་དང་འཛམ་གླིང་དངུལ་ཁང་། རྒྱལ་སྤྱིའི་དངུལ་གྱི་ཐེབས་རྩ་སོགས་ཀྱི་གཙོའི་རྒྱལ་སྤྱིའི་ཚོགས་པ་ཁག་ ༧༠ ཙམ་གྱི་མགོ་ཁྲིད་ཚོར་ཆེད་བཅར་གྱིས་ལས་གཞི་དེ་ཡིས་འཛམ་གླིང་གི་དཔལ་འབྱོར་འཕེལ་རྒྱས་ལ་རོགས་འདེགས་ཆེན་པོ་བྱེད་ངེས་ཡིན་པར་བརྗོད་ཡོད་ནའང་། འདས་བའི་ལོ་འགའི་རིང་རྒྱ་ནག་གི་ལས་གཞི་དེའི་ཁྲོད་ནས་ས་གནས་ཀྱི་ཡུལ་མི་མང་པོ་གནས་སྤོར་བྱེད་དགོས་བ་དང་། དེ་བཞིན་རྒྱ་ནག་གི་རྒྱལ་ཁབ་གཞན་ལ་དངུལ་བུན་གཡར་བ་སྤྲོད་མ་ཐུབ་པའི་རྒྱལ་ཁོངས་སུ་བཙན་གྱིས་རྒྱུད་གཅིག་ལམ་གཅིག་གི་ལས་གཞི་ལག་བསྟར་བྱས་པ་སོགས་ཀྱིས་རྒྱལ་སྤྱིའི་སྤྱི་ཚོགས་ཀྱི་ཁྲོད་གླེང་གཞི་ཆེན་པོ་བྱུང་ཡོད་ལྟར། ད་ཆ་རྒྱལ་སྤྱིའི་ཐོག་རྒྱ་ནག་གི་འཛུགས་སྐྲུན་ལས་གཞི་དེ་ཡིས་རྒྱལ་སྤྱིའི་གནམ་གཤིས་འགྱུར་ལྡོག་དང་རང་བྱུང་ཁོར་ཡུག་ལ་གནོད་སྐྱོན་ཐེབས་བཞིན་ཡོད་པའི་ཐད་ནས་སྐྱོན་བརྗོད་བྱེད་མཁན་ཇེ་མང་དུ་འགྲོ་བཞིན་པ་རེད།

ཁ་སང་བཙན་དབང་འོག་ནས་གར་སོང་ཆ་མེད་དུ་བཏང་བའི་ཉིན་མོ་ཐེངས་ ༢༨ པའི་དུས་དྲན་དང་བསྟུན་ནས། བཞུགས་སྒར་ཁུལ་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་འདས་པའི་ལོ་གསུམ་ནང་རྒྱ་ནག་གཞུང་གིས་བོད་མི་ ༤༠ ལྷག་བཙན་དབང་འོག་གར་སོང་ཆ་མེད་དུ་བཏང་ཡོད་པའི་གནས་ཚུལ་སྤེལ་འདུགལྟེ་གནས་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གིས་དུས་རྒྱུན་ནས་བོད་མི་རྣམས་ཉེས་མིང་སྣ་ཚོགས་ཀྱི་འོག་ནས་འཛིན་བཟུང་བཙན་ཁྲིད་བྱེད་བཞིན་པའི་གནད་དོན་དང་འབྲེལ་ནས། འདི་ལོའི་ཕྱི་ཟླ་གསུམ་པའི་ནང་མིང་ལ་བཀྲ་ཤིས་ཟེར་ཞིང་ལོ་ན་སུམ་ཅུར་སོན་པའི་བོད་མི་ཞིག་ལ་རྒྱ་གཞུང་སྤྱི་བདེ་མི་སྣས་བཀག་བསྐྱིལ་ཁང་དུ་མནར་གཅོད་ཚད་མེད་བཏང་བས་མ་བཟོད་པར་རང་སྲོག་བཅད་ཡོད་པ་དང་། དེ་བཞིན་མིང་ལ་དངོས་གྲུབ་ཕུན་ཚོགས་ཟེར་བའི་བགྲེས་པོ་ཞིག་ལ་ལོ་ངོ་བརྒྱད་ཀྱི་ཁྲིམས་ཐག་བཅད་དེ་བཀལ་སྐྱིལ་ཁང་ནས་ནད་གཅོང་དུ་སྒྱུར་བ། གཞན་ཡང་དགེ་འདུན་པ་འཇིགས་མེད་རྒྱ་མཚོ་ཞེས་པ་ཞིག་ལ་བཙན་དབང་གིས་བཀག་སྐྱིལ་ཁང་ནས་སྨན་བཅོས་བྱ་དགོས་བར་བསྙལ་ནས་སྨན་ཁང་དུ་བཙན་ཁྲིད་བྱེད་པ་དེར་དགོས་མེད་ཀྱི་སྨན་བཅོས་བྱ་སྲིད་པ་སོགས། རྒྱ་ནག་གིས་མནར་གཅོད་གཏོང་བཞིན་པའི་བོད་མི་ཁག་ཅིག་གི་གནད་དོན་གསལ་འདོན་གྱིས། ད་ལྟའི་བར་གནས་ཚུལ་ཤེས་རྟོགས་བྱུང་དང་མ་བྱུང་ཅི་རིགས་ཀྱི་བོད་མི་བགྲང་ལས་འདས་པ་ཞིག་གིས་རང་ཉིད་ཀྱི་གཞི་རྩའི་འགྲོ་བ་མིའི་ཐོབ་ཐང་སྤྱད་པའམ། ཡང་ན། ཁྲིམས་མཐུན་གྱི་ལས་འགུལ་སྤེལ་བ་ཙམ་གྱིས་ཁོང་ཚོར་ཁྲིམས་ཀྱི་སྲུང་སྐྱོབ་གང་ཡང་མེད་པར་མངོན་གསལ་དང་གསང་བ་ཅི་རིགས་ཀྱི་སྒོ་ནས་འཇུ་བཟུང་བཀག་ཉར་གྱིས་མནར་གཅོད་སྣ་ཚོགས་མྱོང་དགོས་ཐུག་གི་ཡོད་པ་རེད་ཅེས་མངོན་གསལ་གནང་འདུགགསར་འགོད་པས་ལྟེ་གནས་ཁང་གི་བོད་གནས་ཉམས་ཞིབ་པ་ཉི་འོད་ལགས་སུ་ཐེངས་འདིའི་ལྟེ་གནས་ཁང་གི་བསྒྲགས་གཏམ་དང་འབྲེལ་ནས་བཀའ་འདྲི་ཞུས་པར་ཁོང་གིས། མནར་གཅོད་ནི་མཉམ་འབྲེལ་རྒྱལ་ཚོགས་ཀྱི་མནར་གཅོད་འགོག་པའི་ཁྲིམས་ཡིག་ནང་ཡོངས་གྲགས་ཀྱིས་བཀག་འགོག་བྱས་ཡོད་པ་ལུང་འདྲེན་གྱིས་རྒྱ་ནག་གཞུང་གིས་རྒྱལ་ཁབ་བརྟན་བརླིང་ལ་ཁ་གཡར་བོད་མི་རྣམས་བཙན་དབང་གིས་གར་སོང་ཆ་མེད་དུ་གཏོང་བའི་རིགས་མཚམས་འཇོག་བྱ་དགོས་སྐོར་དང་། རྒྱ་ནག་གཞུང་གིས་རྒྱ་ནག་གི་ཉེས་དོན་ཁྲིམས་ཡིག་དོན་ཚན་ ༧༣ དང་ ༨༣ གཉིས་ཕྱིར་འཐེན་དང་རྒྱལ་སྤྱིའི་ཁྲིམས་ལུགས་དང་མཐུན་པར་བསྐྱར་བཅོས་བྱ་དགོས་སྐོར་འགྲེལ་བརྗོད་གནང་བྱུང་།གཞན་ཡང་ཁོང་གིས་རྒྱ་ནག་གིས་དུས་རྒྱུན་ནས་ཆབ་སྲིད་དང་འབྲེལ་ནས་བོད་མི་རྣམས་འཇུ་བཟུང་བྱེད་སྐབས། རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པ་དང་རྒྱལ་ཁབ་ཀྱི་བརྟན་བརླིང་ལ་གནོད་པའི་ནག་ཉེས་བསྙད་འདོགས་ཀྱིས་གནས་ཚུལ་འཚོལ་ཞིབ་བྱེད་ཐབས་བྲལ་བའི་ཁྱབ་ཆེ་བའི་ཐ་སྙད་རིགས་བེད་སྤྱོད་གཏོང་གི་ཡོད་སྐོར་གསུང་བ་དང་འབྲེལ། ལྟེ་གནས་ཁང་གིས་ཤེས་རྟོགས་བྱུང་བའི་འདས་བའི་ལོ་གསུམ་རིང་གར་སོང་ཆ་མེད་དུ་བསྒྱུར་བའི་བོད་མི་ ༤༠ ལྷག་ཀྱང་བསྙད་འདོགས་དེ་དག་གི་འོག་ནས་གར་སོང་ཆ་མེད་དུ་སྒྱུར་བ་ཞིག་ཡིན་སྐོར་གསུངས་སོང་།སྤྱིར་ཁ་སང་ཨ་རིའི་ཕྱི་སྲིད་ལྷན་ཁང་གིས་འཕྲུལ་སྒྲ་བརྒྱུད་ནས་བཙན་དབང་གིས་གར་སོང་ཆ་མེད་དུ་སྒྱུར་བའི་ཉིན་མོ་སྲུང་བརྩི་ཞུས་པ་དང་འབྲེལ། འགྲོ་བ་མི་ཡོངས་རྫོགས་ས་ཕྱོགས་གང་དུ་གནས་མིན་དང་མི་སུ་ཡིན་མིན། དེ་བཞིན་དད་མོས་ཅི་ཡིན་སོགས་ལ་ལྟོས་བ་མེད་པར་ཐོབ་ཐང་དང་ཆེ་མཐོང་གཅིག་པ་ཡིན་པར་བསྒྲགས་འདུག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གིས་ཀྱང་ཁ་སང་གི་རྒྱལ་སྤྱིའི་བཙན་དབང་གིས་གར་སོང་ཆ་མེད་དུ་སྒྱུར་བའི་ཉིན་མོ་དང་བསྟུན་ནས། རྒྱལ་སྤྱིའི་ཆབ་སྲིད་བཙོན་པ་ཆུང་ཤོས་སམ། བོད་ཀྱི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གླེང་སློང་གིས། རྒྱ་ནག་གིས་ཆུང་སྲིད་མཆོག་གང་དུ་བཀག་སྐྱིལ་བྱས་ཡོད་མེད་གསལ་བོ་བཟོ་དགོས་བ་དང་། དེ་བཞིན་གང་ཉིད་མཆོག་ལ་སྨྲ་བརྗོད་ཀྱི་རང་དབང་སྤྲོད་དགོས་བའི་ཞུ་སྐུལ་གནང་འདུག་པ་དང་། གཞན་ཡང་ཨ་རིའི་རྒྱལ་སྤྱིའི་ཆོས་ལུགས་ལྷན་ཚོགས་ཀྱིས་ཀྱང་རྒྱ་ནག་གིས་བོད་ཀྱི་པཎ་ཆེན་ཆུང་སྲིད་མཆོག་བཙན་ཁྲིད་བྱས་པ་ཡོད་པར་འགྲེལ་བརྗོད་ཀྱིས་རྒྱ་ནག་གིས་གང་ཉིད་གང་དུ་བཀག་ཉར་བྱས་ཡོད་པར་མངོན་གསལ་བྱེད་དགོས་བའི་སྐུལ་མ་གནང་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཁ་སང་གི་ཉིན་མོ་དང་སྟུན་ནས་འདོན་སྤེལ་གནང་བའི་སྒྲགས་གཏམ་ནང་། བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་རྒྱ་ནག་གིས་བོད་ཀྱི་ཆབ་སྲིད་བཙོན་པ་རྣམས་ལ་ངོས་འཛིན་བྱེད་ཕྱོགས་དང་འབྲེལ་ནས་ངོ་སྤྲོད་གནང་བ་ཞིག་ལུང་འདྲེན་གནང་ཡོད་པ་དང་། དེའི་ནང་དུ། བོད་ནང་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱོད་དབང་མེད། བོད་མི་ཚོར་དུད་འགྲོ་སེམས་ཅན་གྱི་འདུ་ཤེས་འཛིན་གྱི་ཡོད། རྒྱ་གཞུང་གི་དབང་འཛིན་པ་ཚོས་བོད་མི་རྣམས་འགྲོ་བ་མི་ཞིག་ཡིན་པའི་ངོས་འཛིན་བྱ་ཐབས་ཤེས་ཀྱི་མེད། རྒྱ་ནག་གཞུང་གིས་ང་ཚོར་དུད་འགྲོའི་འདུ་ཤེས་ལས་འཛིན་གྱི་མེད་པས་དུད་འགྲོ་སེམས་ཅན་ལྟར་མནར་གཅོད་གཏོང་རྒྱུ་ཡིན་པ་བོད་མི་ཚོས་ཤེས་ཀྱི་ཡོད་པ་རེད། ང་རང་སྒེར་གྱི་ངོས་ནས་ཀླ་ཀློའི་སྤྱོད་པ་རྩིང་པོ་འདི་ལ་སྙིང་སྟོབས་ཞུམ་ནས་མགོ་སྒུར་མ་མྱོང་། རྒྱུ་མཚན་ནི་མནར་གཅོད་ཀྱི་སྦྱོར་བ་འདིས་ངའི་པུས་མོ་ས་ལ་འཛུགས་སུ་འཇུག་པ་ཤེས་ཀྱི་ཡོད། འོན་ཀྱང་མནར་གཅོད་ཀྱི་ན་ཟུག་ལ་གདོང་ལེན་གྱིས་ཕྱིར་རྐང་པ་གཉིས་ཀྱི་སྒང་ལ་ལངས་རྒྱུའི་སེམས་ཀྱི་དམ་བཅའ་དེ་ནམ་ཡང་འགྱུར་མ་མྱོང་། དེ་ང་གཅིག་བུ་མ་རེད། བོད་མི་ཚང་མར་དཀའ་སྡུག་གི་གདོང་ནས་ལངས་ཐུབ་པའི་སྙིང་སྟོབས་འདི་ཡོད་པ་རེད། ང་ཚོས་དུས་རྒྱུན་རྒྱ་ནག་གི་དབང་འཛིན་པ་ཚོས་ང་ཚོར་དུད་འགྲོའི་འདུ་ཤེས་འཛིན་གྱི་ཡོད་པ་ཤེས་ཀྱི་ཡོད་ལ། ང་ཚོས་དུས་རྒྱུན་མཚན་ཉིད་ཚང་བའི་འགྲོ་བ་མི་ཞིག་ལྟར་རང་ཉིད་རྐང་པ་གཉིས་ཀྱི་སྒང་ལ་ཡང་བསྐྱར་ལངས་ཏེ་རང་ཉིད་འགྲོ་བ་མི་ཞིག་བྱེད་པའི་སེམས་ཐག་བཅད་ཡོད། ཅེས་འགྲེལ་བརྗོད་གནང་འདུག

དེ་རིང་སྔ་དྲོ་ཕྱག་ཚོད་དགུ་བའི་ཐོག   བཞུགས་སྒར་སྐོར་ལམ་གྱི་ལྷ་རྒྱལ་རིའི་ཁུལ་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྔར་ལོའི་དེ་རིང་གི་ཉིན་མོར། འཕགས་བོད་ས་མཚམས་ནས་རྒྱ་ནག་གི་མཐའ་དམག་ལ་ཕར་རྒོལ་གྱིས་རང་སྲོག་བློས་གཏོང་གནང་མཁན་གྱི་བོད་ཀྱི་དྭང་ཞབས་པ་ཉི་མ་བསྟན་འཛིན་ལགས་ཀྱི་རྗེས་དྲན་རྡོ་རིང་ཞིག་དབུ་འབྱེད་གནང་སོང་། གཞི་རྩའི་སྲིད་སྐྱོང་སྤེན་པ་ཚེ་རིང་མཆོག་བདུན་ཕྲག་སྔོན་མའི་ནང་དུ་ལ་དྭགས་ནང་གཞུང་འབྲེལ་ཕྱོགས་བསྐྱོད་ཐོག་མ་དེ་བསྐྱངས་ཏེ་ཁ་ས་རང་བཞུགས་སྒར་དུ་འབྱོར་མ་ཐག་ཡིན་པ་དང་། སྲིད་སྐྱོང་མཆོག་གིས་ཐེངས་འདིར་ལ་དྭགས་ནང་མཛད་རིམ་སྣ་མང་ཞིང་བསྐྱངས་པའི་ཁྲོད་དྭངས་ཞབས་པ་ཉི་མ་བསྟན་འཛིན་ལགས་དམ་པ་དེ་ཉིད་ཀྱི་ནང་མི་དང་མཇལ་འཕྲད་གནང་བ་མ་ཟད། ལ་དགས་ས་གནས་འཐུས་ཚོགས་ཀྱིས་མང་ཚོགས་ལས་ཞལ་འདེབས་བསྡུས་ཏེ་དྭང་ཞབས་དམ་པ་དེ་ཉིད་ལ་རྗེས་དྲན་གྱི་འདྲ་སྐུ་ཞིག་བཞེངས་ཡོད་པ་དེའང་དབུ་འབྱེད་གནང་ཡོད་པ་རེད།དེ་རིང་སྲིད་སྐྱོང་མཆོག་གིས་བཞུགས་སྒར་རྡ་རམ་ས་ལའི་ལྷ་རྒྱལ་རིར་དམ་པ་དེ་ཉིད་རྗེས་དྲན་གྱི་རྡོ་རིང་དབུ་འབྱེད་གནང་སྐབས་གསར་འགོད་པ་རྣམས་ལ་དེ་རིང་གི་དུས་ཚིགས་དང་བསྟུན། ཉི་མ་བསྟན་འཛིན་ལགས་གཅིག་པོ་མིན་པར། གནས་ཡུལ་རྒྱལ་ཁབ་སྲུང་སྐྱོབ་ཀྱི་ཆེད་དུ་སྔོན་ཆད་ཕྱི་ལོ་ ༡༩༧༡ ལོར་བྷང་ལ་ཊི་ཞི་ (Bangladesh) བཅིངས་གྲོལ་གྱི་སྐབས་སུ་ཡང་བོད་དམག་གིས་ཚེ་སྲོག་བློས་གཏོང་གནང་ཡོད་པ་དང་། དེ་བཞིན་གྷར་ཀེལ་ (Kargil) གྱི་དམག་འཁྲུག་སྐབས་སུ་ཡང་བོད་དམག་གིས་རང་སྲོག་བློས་གཏོང་གནང་ཡོད་པ་དྲན་གསོ་དང་འབྲེལ། དེ་རིང་དཔའ་བོ་ཁོང་གི་མཚན་ཐོག་ནས་རང་སྲོག་བློས་གཏོང་གནང་མཁན་གྱི་བོད་དམག་རྣམས་ལ་རྗེས་དྲན་ཞུ་བཞིན་ཡོད་སྐོར་ངོ་སྤྲོད་གནང་སོང་། གཞན་ཡང་སྲིད་སྐྱོང་མཆོག་གིས། སྔོན་ཆད་རྒྱ་གར་ནང་དུ་བོད་ཀྱི་དྭང་ཞབས་དམག་མིའི་སྐོར་ཡོངས་གྲགས་གནང་གི་མེད་ནའང་། ད་ཆ་རྒྱ་གར་གྱི་ནང་དུ་སྤྱི་ཚོགས་དྲ་ལམ་ཁག་ལ་བོད་ཀྱི་དྭང་ཞབས་དམག་མིའི་སྐོར་དེ་ཡོངས་གྲགས་ཆགས་ཚར་བ་ཞིག་ཡིན་སྐོར་དང་འབྲེལ་ནས། བོད་མིའི་སྒྲིག་འཛུགས་ཀྱིས་དྭང་ཞབས་དང་འབྲེལ་བའི་དམིགས་བསལ་གྱི་སྲིད་བྱུས་དེ་འདྲ་གང་ཡང་གོ་བསྡུར་གནང་མེད་ནའང་། ཐེངས་འདིའི་རྗེས་དྲན་རྡོ་རིང་དེ་བརྒྱུད་ནས་བོད་མི་རྣམས་ཀྱིས་ཀྱང་རྒྱ་གར་གྱི་བདེ་སྲུང་གི་གནས་བབ་དང་འབྲེལ་ནས་རང་སྲོག་བློས་གཏོང་གིས་རྒྱ་གར་གྱི་མཐའ་སྲུང་ལ་མཉམ་ཞུགས་དང་གདུང་སེམས་མཉམ་སྐྱེལ་ཡོད་པ་དེ་ཕྱིར་མངོན་པ་ཞིག་ཡིན་པར་འགྲེལ་བརྗོད་གནང་སོང་། དེ་བཞིན་སྐབས་དེར་གསར་འགོད་པ་ཞིག་གིས་རྒྱ་གར་གྱི་མཐའ་སྲུང་གི་ནང་དུ་བོད་མི་ཡོད་པ་དང་། དེང་སྐབས་རྒྱ་ནག་གིས་ཀྱང་བོད་ཀྱི་མཐའ་མཚམས་སུ་ཆེད་དུ་བོད་མི་རྣམས་ལ་དམག་སྦྱོང་སྤྲད་ནས་མཐའ་སྲུང་དུ་གཏོང་གི་ཡོད་པ་དང་འབྲེལ་ནས་ཕྱོགས་གཉིས་ཀྱི་བོད་དམག་གི་བར་ལ་དམར་འཛིང་གི་གནས་བབ་ཡོང་གི་ཡོད་པའི་གནས་བབ་དང་འབྲེལ་ནས་བཀའ་འདྲི་ཞུས་པར་སྲིད་སྐྱོང་མཆོག་གིས་གནས་བབ་དེའི་ཐོག་ལ་ཞིབ་འཇུག་བྱེད་བཞིན་པ་ཡིན་པར་བཀའ་གནང་བ་དང་སྦྲགས། གཞི་རྩའི་རྒྱ་ནག་གིས་རྒྱ་གར་གྱི་མཐའ་སྲུང་གི་ནང་དུ་བོད་དམག་ཡོད་པ་ཤེས་དུས་ཆེད་དུ་བོད་དམག་མཐའ་སྲུང་དུ་གཏོང་གི་ཡོད་པར་འགྲེལ་བརྗོད་བྱེད་བཞིན་ཡོད་ཀྱང་། རྒྱ་ནག་གིས་བོད་མི་རྣམས་ལ་ཡིད་ཆེས་རྩ་བ་ཉིད་ནས་མེད་སྐོར་འགྲེལ་བརྗོད་གནང་སོང་། རྒྱ་གར་གྱི་དཔོན་རིགས་ནང་དུ་བོད་པའི་གསང་བའི་དམག་སྒར་གྱི་གནད་དོན་དེར་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད་པ་མ་ཟད། གསར་ཁང་ཁག་གིས་ཀྱང་བོད་མི་བཙན་བྱོལ་བ་རྣམས་ཀྱི་འདས་མ་ད་གསུམ་ལ་གླེང་སློང་བྱེད་ཤུགས་ཇེ་ཆེར་འགྲོ་བཞིན་པ་རེད་འདུགགཞི་རྩའི་སྔར་ལོའི་ནང་ལ་དྭགས་སུ་ཆགས་པའི་འཕགས་བོད་ས་མཚམས་སུ་རྒྱ་དཀར་ནག་གཉིས་ཀྱི་མཐའ་དམག་དབར་གདོང་ཐུག་རིམ་པ་བྱུང་བའི་ཁྲོད། ཟླ་བ་ ༨ པའི་ཚེས་ ༣༠ ཉིན་བོད་པའི་དྭང་ཞབས་དམག་མིས་ས་མཚམས་སུ་ས་ཁམས་མྱུལ་ཞིབ་གནང་སྐབས་དེ་སྔ་ས་འོག་ཏུ་བཞག་པའི་འབར་རྫས་ཤིག་གས་འཐོར་བྱུང་ནས་དྭང་སློབ་རུ་ཤོག་ཨང་བདུན་པའི་མེ་ཏོག་གཉིས་ཅན་གྱི་བརྒྱ་དཔོན་ཉི་མ་བསྟན་འཛིན་ལགས་འདས་གྲོངས་སུ་གྱུར་ཡོད་པ་དང་། ཁོང་གི་ཕྱག་རོག་བསྟན་འཛིན་བློ་ལྡན་ལགས་སུ་རྨས་སྐྱོན་ཚབ་ཆེ་ཕོག་ཡོད་པ་རེད། དྭངས་ཞབས་པ་འདས་པོ་ཉི་མ་བསྟན་འཛིན་ལགས་ཀྱི་སྐུ་ཕུང་ཞུགས་འབུལ་གྱི་ཉིན་མོར་རྒྱ་གར་གཞུང་འཛིན་ཚོགས་པ་ BJP རྒྱལ་ཡོངས་དྲུང་ཆེ་སྐུ་ཞབས་ Ram Madhav ལགས་ཀྱིས་གཙོས་པའི་ལ་དྭགས་གླེའི་ཉེན་རྟོག་རུ་དཔོན། གྲོས་ཚོགས་འཐུས་མི་དང་ལ་དྭགས་ཁུལ་གྱི་གནད་ཡོད་དཔོན་རིགས་ཆེད་ཕེབས་ཀྱིས་དམ་པ་དེ་ཉིད་ལ་ཆེ་བསྟོད་ཀྱི་རྣམ་པ་མངོན་གསལ་གནང་བ་མ་ཟད། རྒྱ་གར་གྱི་དཔོན་རིགས་ནང་དུ་བོད་པའི་གསང་བའི་དམག་སྒར་གྱི་གནད་དོན་དེར་དོ་སྣང་བྱེད་མཁན་ཇེ་མང་དང་། རྒྱ་གར་གྱི་སྤྱི་ཚོགས་དང་གསར་འགྱུར་བརྒྱུད་ལམ་ཐོག་དེ་སྔ་གསང་རྒྱ་དམ་པོར་བྱས་ཡོད་པའི་བོད་ཀྱི་དྭང་ཞབས་དམག་མིའི་སྐོར་ལ་གླེང་སློང་བྱེད་མཁན་མང་དུ་ཕྱིན་ཡོད་པ་རེད།

རྒྱ་ནག་གི་བཅིངས་གྲོལ་དམག་མིས་བོད་མཐོ་སྒང་གི་ཁུལ་དུ་ Snowfield Duty-2021 ཞེས་པའི་སྟོང་ལོ་ཉེར་གཅིག་གི་གངས་ལྗོངས་ཁུལ་གྱི་འགན་འཁྲིའི་མིང་ཐོག་ནས་དམིགས་འབེན་རྩ་གཏོང་ལ་ཕྱོགས་ཏེ་གཞི་རྒྱ་ཆེ་ཞིང་ཕྱོགས་ངོས་མང་པོའི་འཐབ་ཇུས་རང་བཞིན་གྱི་དམག་སྦྱོང་བྱས་འདུགརྒྱ་ནག་གཞུང་འབྲེལ་གྱིས་གནས་ཚུལ་སྤེལ་བའི་ནང་དུ། ཐེངས་འདིའི་རྒྱ་ནག་གི་བཅིངས་གྲོལ་དམག་མིའི་དམག་སྦྱོང་དེའི་ནང་དུ། བོད་ཁུལ་གྱི་བཅིངས་གྲོལ་དམག་སྡེ་ཆུང་གྲས་བཅུ་ལྷག་གིས་དེར་འཛུལ་ཞུགས་བྱས་པ་མ་ཟད། དེང་རབས་རང་བཞིན་གྱི་ཁྱད་ཆོས་ལྡན་པའི་གོ་མཚོན་གྱི་རིགས་ཀྱང་བེད་སྤྱོད་བྱས་བ་བརྒྱུད་ནས། མཚན་སྨག་གི་ཁྲོད་ནས་དམག་སྦྱོང་དེ་འགོ་འཛུགས་བྱས་ཡོད་པར་བསྒྲགས་འདུག དེ་བཞིན་དམག་སྦྱོང་གི་སྐབས་སུ་མེ་མདའ་ཆེ་ཆུང་ཅི་རིགས་དང་། གཞན་ཡང་འཕུར་མདའ་ཆེད་གཏོང་གི་མ་ལག་ཁག་ཅིག་སྦྱོང་བརྡར་གྱིས་འཐབ་དམག་གི་བརྡ་ཁྱབ་ལྟེ་གནས་དང་གྱེན་འཕུར་གནམ་གྲུར་གཏོར་རྒོལ་བྱེད་ཐབས་ལ་སྦྱོང་བརྡར་བྱས་ཡོད་པ་དང་། དམག་སྦྱོང་གི་སྐབས་སུ་མཚོ་ངོས་ལས་མཐོ་ཚད་མི་ཊར་ ༦༡༠༠ ལྷག་གི་མཚམས་སུ་ས་བབ་དང་མཐུན་པའི་རིག་རྩལ་བསྐྱར་དར་གྱི་ཚད་གཞི་ལྡན་པའི་སྦྱོང་བརྡར་བྱས་ཡོད་པར་འཁོད་འདུག དེ་བཞིན་དམག་སྦྱོང་གི་སྐབས་སུ། གནམ་དམག་ལ་འཐབ་རྒོལ་བྱེད་ཐབས་ཀྱང་སྦྱོང་བརྡར་བྱས་ཡོད་པའི་ཁྲོད་དུ། ལྕགས་ཁྲབ་འཁོར་ལོ་དང་རྐང་དམག   དེ་བཞིན་འཐབ་དམག་གི་འཕྲུལ་རིགས་རླངས་འཁོར་དང་གྱེན་འཕུར་གནམ་གྲུར་རྒོལ་ཐབས་སོགས་ཀྱང་སྦྱོང་བརྡར་སྤྲད་པ་མ་ཟད་དམག་འཐབ་སྐབས་ཀྱི་འགལ་རྫས་དང་བར་ཆད་རིགས་ཟློག་ཐབས་ཀྱི་སྦྱོང་བརྡར་བྱས་འདུགགཞི་རྩའི་འདི་ལོའི་ལོ་མགོ་ནས་བོད་ཉིང་ཁྲིའི་ཁུལ་དུ་བོད་ཀྱི་བྱིས་པ་རྣམས་ལ་དམིགས་བཀར་གྱིས་དམག་གི་སྦྱོང་བརྡར་ལྟེ་གནས་ཤིག་ཆེད་འཛུགས་བྱས་པ་དང་། དེ་རིང་་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Wion གསར་ཁང་གིས་གནད་དོན་དེ་དང་འབྲེལ་ནས་གནས་ཚུལ་སྤེལ་བའི་ནང་དུ། འདི་ལོའི་དབྱར་གནང་གི་སྐབས་སུ་རྒྱ་ནག་གིས་བོད་ཁུལ་དུ་དམག་སྦྱོང་གི་རིགས་འདྲ་མིན་སྤེལ་བའི་ཁྲོད་དུ། བོད་ཀྱི་བྱིས་པ་ལོ་བརྒྱད་ཅན་གྱིས་ཀྱང་འཛུལ་ཞུགས་བྱེད་དུ་བཅུག་ཡོད་པ་དང་། རྒྱ་ནག་གིས་ལོ་ཆུང་གི་བྱིས་པ་དེ་དག་ལ་དམག་སྦྱོང་སྤྲོད་བཞིན་པ་དེ་ནི་བོད་ཀྱི་བྱིས་པ་དག་རྒྱ་ནག་དམར་ཤོག་ལ་བློ་དཀར་གཞུང་དྲང་གི་འདུ་ཤེས་སྐྲུན་ཐབས་སུ་ཡིན་པར་བསྒྲགས་འདུགགཞན་ཡང་གསར་ཁང་གིས་བོད་ཁུལ་སྤྱི་ཡོངས་སུ་བོད་ཀྱི་བྱིས་པ་རྣམས་ལ་དམག་སྦྱོང་སྤྲོད་ཀྱི་ཡོད་པ་དང་། སྒོས་སུ་རྒྱ་གར་དང་ས་འབྲེལ་ཡོད་པའི་བོད་ཀྱི་ལྷོ་རྒྱུད་ཀྱི་ས་ཁུལ་དུ་རྒྱ་ནག་གིས་བོད་ཀྱི་བྱིས་པ་བརྒྱ་ཙལ་ལ་བཙན་དབང་གིས་དམག་སྦྱོང་གི་ནང་དུ་ཞུགས་སུ་བཅུག་ནས་རྒྱ་ནག་གི་དམར་ཤོག་གི་ལྟ་བ་ཁྱབ་སྤེལ་བྱེད་ཐབས་དང་། དེ་བཞིན་རྒྱ་ནག་ལ་རྒྱལ་ཞེན་གྱི་བསམ་བློ་སྐྲུན་ཐབས། གཞན་ཡང་དབྱར་གནང་གི་སྐབས་སུ་བོད་ཀྱི་བྱིས་པ་དག་ལ་བོད་ཀྱི་སྐད་ཡིག་དང་རིག་གཞུང་ཟབ་ཁྲིད་སོགས་འགོག་ཆེད་དུ་ཡིན་པར་བསྒྲགས་འདུག་པ་མ་ཟད། རྒྱ་ནག་གིས་དེང་སྐབས་བོད་མི་མང་པོ་རྒྱ་ནག་གི་བཅིངས་གྲོལ་དམག་མིའི་ཁོངས་སུ་འཇུག་བཞིན་པ་དང་།  དེ་ནི་བོད་མི་རྣམས་བོད་མཐོ་སྒང་གི་ས་བབ་དང་གནམ་གཤིས་ལ་གདོང་གཏོད་ཐུབ་པའི་ཁྱད་ཆོས་ཡོད་པ་སོགས་ཀྱིས་ཡིན་ལུགས་སོགས་མངོན་གསལ་གནང་འདུག ཉེ་སྔོན་འདི་གའི་གསར་ཁང་གིས་བོད་གནས་ལྟ་ཞིབ་ཁང་ལ་བོད་ནང་གི་བྱིས་པར་དམག་སྦྱོང་སྤྲོད་བཞིན་པ་དང་འབྲལེ་ནས་བཀའ་འདྲི་ཞུས་པའི་ནང་དུ། རྒྱ་གཞུང་གིས་དམིགས་ཡུལ་ངེས་ཅན་ཞིག་ལ་བརྟེན་ནས་ཞིང་པ་དང་འབྲོག་ས་ནས་ཡིན་པའི་བོད་པའི་བྱིས་པ་དང་། ཆབ་སྲིད་བཙོན་ཟུར་བ་རྣམས་ལ་དམིགས་བཀར་གྱིས་དམག་སྦྱོང་ཁང་དུ་སྦྱོང་བརྡར་སོགས་སྤྲད་པ་དེས་བོད་ཀྱི་གནའ་བོའི་རིག་གཞུང་དང་རྒྱལ་རབས། དེབཞིན་སྤྱི་ཚོགས་ལ་ངན་ཕྱོགས་ཀྱི་འགྱུར་བ་ཆེན་པོ་གཏོང་བཞིན་པ་མ་ཟད། བོད་པའི་གཞོན་སྐྱེས་རྣམས་རྒྱ་གཞུང་གིས་བཙན་དབང་འོག་དམག་གི་སྦྱོང་བརྡར་བསྟི་གནས་དང་ལག་ཤེས་སློབ་གསོ་བསྟི་གནང་ཁང་དུ་མར་མི་འགྲོ་ཀ་མེད་ཆགས་ཀྱི་ཡོད་པ་མངོན་གསལ་གནང་ཡོད།

རྒྱ་ནག་དམར་ཤོག་སྲིད་གཞུང་གི་ཤེས་རིག་ལྷན་ཁང་གིས་ཡུལ་དེའི་སློབ་གྲྭ་ཆེ་འབྲིང་ཆུང་གསུམ་གྱི་བསླབ་གཞིའི་ནང་དུ་སྲིད་འཛིན་ཞི་ཅིན་ཕིང་གི་ཆབ་སྲིད་ཀྱི་ལྟ་གྲུབ་ངེས་བར་དུ་འཇུག་དགོས་བའི་གཞུང་འབྲེལ་གྱི་བཀའ་རྒྱ་བཏང་འདུགདེ་རིང་BBC གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གིས་ད་ཆ་རྒྱལ་ནང་གི་སློབ་གྲྭ་ཁག་གི་ནང་དུ་སྲིད་འཛིན་ཞི་ཅིན་ཕིང་གི་ལྟ་བ་གཙོ་བོར་བྱས་པའི་བསླབ་གཞི་རྩ་འཛུགས་ཀྱིས། ཞི་ཅིན་ཕིང་གི་ལྟ་བས་ན་གཞོན་རྣམས་ལ་དམར་ཤོག་གི་ལྟ་བར་ཡིད་ཆེས་སྐྲུན་རྒྱུར་ནུས་བ་ཐོན་རྒྱུ་ཡིན་སྐོར་བསྒྲགས་འདུག གསར་ཁང་གིས་ཞི་ཅིན་ཕིང་གི་ཆབ་སྲིད་ལྟ་གྲུབ་རྒྱ་ནག་གི་སློབ་གྲྭ་ཆེ་འབྲིང་ཆུང་གསུམ་གྱི་བསླབ་གཞིའི་ནང་དུ་འཇུག་རྒྱུའི་གནད་དོན་དེ་ནི་ཞི་ཅིན་ཕིང་ངོས་ནས་ཡུལ་དེའི་སྤྱི་ཚོགས་ཁྱོན་ཡོངས་དམར་ཤོག་སྲིད་གཞུང་གི་དབང་བསྒྱུར་གྱི་འོག་ཏུ་ཕྱོགས་གཅིག་ཏུ་སྒྲིལ་ཐབས་ལ་འབད་བརྩོན་བྱེད་བཞིན་པ་ཞིག་ཡིན་སྐོར་འགྲེལ་བརྗོད་དང་སྦྲགས། རྒྱ་ནག་གི་ཤེས་རིག་ལྷན་ཁང་གིས་སྤེལ་བའི་གནས་ཚུལ་ལུང་འདྲེན་གནང་བའི་ནང་དུ། ཞི་ཅིན་ཕིང་གི་ལྟ་བ་བསླབ་གཞིའི་ནང་དུ་འཇུག་རྒྱུ་དེ་ནི་སྤྱི་ཚོགས་རིང་ལུགས་དང་མཐུན་པའི་ཀུན་སྤྱོད་སློབ་གསོ་དང་རྣམ་དཔྱོད་བཀྲ་བ། དེ་བཞིན་མཛེས་ཆོས་རིག་པའི་རྒྱུད་འཛིན་ཁྱབ་སྤེལ་གཏོང་ཐབས་དང་། གཞན་ཡང་བདེ་འཇགས་དང་ངལ་རྩོལ་གྱི་སློབ་གསོ་སོགས་རྒྱུད་དུ་འཇགས་ཐབས་ལ་དམིགས་པ་ཞིག་ཡིན་སྐོར་འབྲེལ་བརྗོད་གནང་འདུགརྩ་བའི་རྒྱ་ནག་གཞུང་གིས་ཞི་ཅིན་ཕིང་གི་ལྟ་གྲུབ་ཞེས་པ་དེ་བཞིན་ཕྱི་ལོ་ ༢༠༡༨ ལོར་རྒྱ་ནག་རྒྱལ་ཁབ་ཀྱི་རྩ་ཁྲིམས་ཀྱི་ནང་དུ་བཅུག་ཟིན་ཡོད་པ་མ་ཟད། སྐབས་དེ་ནས་བཟུང་ཞི་ཅིན་ཕིང་གི་ལྟ་གྲུབ་འམ་དགོངས་པ་ཞེས་པ་དེ་རྒྱ་ནག་གི་ན་གཞོན་ཆབ་སྲིད་ཕྱོགས་ཁག་དང་གཙུག་ལག་སློབ་གྲྭ་ཁག་ཏུ་ཁྱབ་སྤེལ་བཏང་དང་གཏོང་བཞིན་ཡོད་པ་དང་། སྤྱིར་ཞི་ཅིན་ཕིང་གི་ལྟ་གྲུབ་ནང་དམར་ཤོག་གི་ལྟ་གྲུབ་གཙོ་བཟུང་བྱས་པའི་དོན་ཚན་༡༤ དང་། གཞན་ཡང་ལྟ་བ་གསར་བའི་ཐོག་ནས་སྤྱི་ཚོགས་བསྐྱར་བཟོ་དང་། དམར་ཤོག་ཚོགས་པར་རྒྱ་ནག་གི་དམར་དམག་དང་འབྲེལ་བའི་དབང་ཚད་ཡོད་ཚད་ཡོད་རབས། དེ་བཞིན་རྒྱལ་ཁབ་གཅིག་དང་ལམ་ལུགས་གཉིས་གཙོ་འཛིན་གྱི་ཐོག་ནས་མེས་རྒྱལ་གཅིག་སྒྲིལ་བྱེད་དགོས་བ་སོགས་ཀྱང་ཡོད་པ་རེད་འདུག རྒྱ་ནག་གི་གཞུང་འབྲེལ་བརྒྱུད་ལམ་ཐོག་འཁོད་པར་གཞིགས་ན། ཐེངས་འདིར་བསླབ་གཞིའི་ནང་དུ་བཅུག་པའི་ཞི་ཅིན་ཕིང་གི་ལྟ་གྲུབ་དེ་ད་དུང་ཁྱབ་ཆེ་བ་ཡོད་པ་དང་། དེའང་སློབ་ཆུང་གི་སློབ་གསོའི་ནང་དུ། རྒྱ་དམག་དམར་ཤོག་སྲིད་གཞུང་དང་སྤྱི་ཚོགས་རིང་ལུགས་ལ་དགའ་ཞེན་སྐྲུན་ཐབས་དང་། སློབ་འབྲིང་གི་ནང་དུ་ཆབ་སྲིད་དང་འབྲེལ་བའི་ལྟ་ཕྱོགས་དང་ཉམས་མྱོང་གཙོར་འཛིན་བྱས་པ་དང་། དེ་བཞིན་སློབ་ཆེན་གྱི་ནང་དུ་གཞུང་ལུགས་དང་མཐུན་པའི་བསམ་བློའི་ཕྱོགས་ལ་ཤུགས་སྣོན་རྒྱག་རྒྱུ་ཡིན་པར་མངོན་གསལ་གནང་འདུགགཞི་རྩའི་རྒྱ་ནག་དམར་ཤོག་ཚོགས་པའི་ངོས་ནས་ལོ་ཤས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ཞེས་པ་དེ་རྒྱ་ནག་རྒྱལ་ཡོངས་སུ་ཁྱབ་སྤེལ་ཤུགས་ཆེ་བྱས་དང་བྱེད་མུས་མ་ཟད། སྔ་ལོའི་ལོ་མཇུག་ཏུ་ཐོན་པའི་གནས་ཚུལ་ནང་གསལ་ལྟར་ནར། ད་སྐབས་བོད་ནང་དུའང་བོད་མི་ན་གཞོན་རྣམས་ཀྱིས། གླ་ཕོག་མཐོ་བའི་ལས་ཀའི་གོ་སྐབས་འཚོལ་སྐབས་རྒྱ་ནག་དམར་ཤོག་ཚོགས་པར་འཛུལ་ཞུགས་དང་འབྲེལ། ཞི་ཅིན་ཕིང་གི་ལྟ་གྲུབ་ལ་སློབ་སྦྱོང་མི་བྱེད་ཀ་མེད་ཆགས་ཡོད་པ་རེད་འདུགམ་ཟད་སྔ་ལོར་རྒྱ་ནག་གི་ལོ་ལྔ་ཚན་བཅུ་བཞི་བའི་ཚོགས་འདུ་སྐབས་གཏན་འཁེལ་བྱས་པ་ལྟར། འབྱུང་འགྱུར་གྱི་ཕྱི་ཟླ་ ༩ པ་ནས་བཟུང་རྒྱ་ནག་གི་ཞིང་ཆེན་དང་རང་སྐྱོང་ས་ཁུལ། གྲོང་སྡེ་ཁག་སོགས་ནས་ཞི་ཅིན་ཕིང་གིས་རྒྱ་ནག་ནང་གི་སྐད་ཡིག་སློབ་གསོའི་ཐད་གནང་བའི་ལམ་སྟོན་དང་དགོངས་པར་སློབ་སྦྱོང་ཡང་དག་ཟེར་བ་ལག་བསྟར་ཡོང་སླད། བོད་ཁུལ་ཡོངས་ཀྱི་མཚོན་པའི་གྲངས་ཉུང་མི་རིགས་ས་ཁུལ་དང་གྲོང་གསེབ་ས་ཁུལ་གྱི་བྱིས་པ་རྣམས་ལ་རྒྱ་སྐད་རྒྱ་ཡིག་སློབ་ཁྲིད་ཀྱིས། ཆུང་དུས་ནས་རྒྱའི་སྐད་ཡིག་གི་བག་ཆགས་ཟབ་མོ་བཞག་སྟེ། མི་སྒེར་འཕེལ་རྒྱས་དང་རིག་རྩལ་ལྡན་པ་ཞིག་ཏུ་བཟོས་པ་བརྒྱུད་གྲོང་གསེབ་གོང་འཕེལ་དང་། ཀྲུང་ཧཱ་མི་རིགས་ཆེན་མོའི་གཞིས་ཁྱིམ་སྲ་བརྟན་གྱི་འདུ་ཤེས་ཡོད་མཁན་ཟེར་བ་ཞིག་ཏུ་བསྒྱུར་དགོས་སྐོར་བསྒྲགས་ཡོད་པ་དང་། སྲིད་བྱུས་ཏེ་དངོས་སུ་བོད་ཁུལ་དུ་ལག་བསྟར་བྱས་པའི་ཁྲོད་ནས། ཟླ་བ་སྔོན་མའི་ནང་དུ། མདོ་སྨད་མགོ་ལོག་ཁུལ་གྱི་སེང་འབྲུག་སྟག་རྩེ་སློབ་གྲྭ་སློབ་གྲྭ་བཙན་དབང་གིས་སྒོ་རྒྱག་ཏུ་བཅུག་པ་དང་། དེ་བཞིན་ ཁམས་དཀར་མཛེས་ཏྲེ་ཧོར་རོང་པ་ཚ་ས་ཁུལ་གྱི་རྒྱལ་བསྟན་དགེ་རྩ་སློབ་གྲྭར་ཟླ་བ་སྔོན་མའི་ནང་རྒྱ་ནག་གིས་བཙན་བཀའ་བཏང་སྟེ། དགེ་རྒན་རྣམས་ཀྱིས་སློབ་གྲྭ་དེའི་བསླབ་གཞི་ཁག་རྒྱ་ཡིག་གི་ལམ་ནས་སློབ་ཁྲིད་བྱེད་དགོས་བ་དང་། དགེ་རྒན་རྣམས་ཀྱིས་རྒྱ་ནག་གི་བཀའ་ལྟར་མ་སྒྲུབ་ན་སློབ་གྲྭ་སྒོ་རྒྱག་རྒྱུ་ཡིན་པའི་འཇིགས་སྐུལ་བྱས་པའི་གནས་ཚུལ་ཐོན་ཡོད་པ་རེད།