རྒྱ་ནག

བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱི་གོ་སྒྲིག་གི་འོག   ཐེ་ཝན་ཁུལ་དུ་ཁ་སང་ནས་དབུ་འཛུགས་ཀྱིས་ཟླ་བ་རྗེས་མའི་གསུམ་བཅུའི་དུས་དྲན་བར་བར་དུ་རེས་གཟའ་ལྷག་པ་འཆར་ཅན་གྱི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་ཞིག་དབུ་འཛུགས་གནང་འདུགཁ་སང་གི་རྐང་འཁོར་སྐོར་སྐྱོད་ཀྱི་ལས་འགུལ་གྱི་ཉིན་དང་པོའི་ཐོག ཐེ་ཝན་ནང་ཡོད་པའི་བོད་མི་དང་ཐེ་ཝན་གྲོས་ཚོགས་ཀྱི་འཐུས་མི། ཐེ་ཝན་དང་ཧོང་ཀོང་གི་བོད་དོན་རྒྱབ་སྐྱོར་བ་སོགས་མི་སྣ་ཁག་ཅིག་མཉམ་ཞུགས་ཐོག་གསར་འགོད་ལྷན་ཚོགས་ཤིག་སྐོང་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཀྱི་ཐད་ནས་གཏམ་བཤད་སྤེལ་རྗེས་ལས་འགུལ་དངོས་སུ་དབུ་འཛུགས་གནང་འདུགའདི་ག་རླུང་འཕྲིན་ཁང་གིས་ལས་འགུལ་འདི་གོ་སྒྲིག་ཞུ་མཁན་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲིས་ཚེ་རིང་ལགས་སུ་ཁ་པར་གྱི་ལམ་ནས་བཀའ་འདྲི་ཞུས་པར་ཁོང་གིས་རྩ་བའི་ལས་འགུལ་དེ་ཕྱི་ལོ་ ༢༠༡༡ ལོར་ཁོང་མི་སྒེར་གྱིས་དབུ་འཛུགས་གནང་བ་ཞིག་ཡིན་ཞིང་། དམིགས་ཡུལ་གཙོ་བོ་ཐེ་ཝན་དུ་ཡོད་པའི་རྒྱ་རིགས་ཀྱི་ཡུལ་སྐོར་སྤྲོ་འཆམ་པ་དང་སློབ་མ་རྣམས་ལ་བོད་མིའི་སྒྲིག་འཛུགས་ཀྱི་སྲིད་བྱུས་དང་འབྲེལ་བའི་བོད་དོན་ངོ་སྤྲོད་དང་དྲིལ་བསྒྲགས་ཀྱི་ལས་འགུལ་ཞིག་ཆགས་ཡོད་ཀྱང་། ད་ཆ་ཁོང་སྒེར་ཙམ་མིན་པར་ལས་འགུལ་དེར་བོད་མི་དང་ཐེ་ཝན་གྱི་གཞུང་འབྲེལ་མི་སྣ་སོགས་ཀྱིས་དོ་སྣང་ཆེན་པོས་འཛུལ་ཞུགས་ཀྱིས་བོད་དོན་དྲིལ་བསྒྲགས་ལ་ཤུགས་སྣོན་བྱེད་བཞིན་པ་ཞིག་ཡིན་པར་ངོ་སྤྲོད་གནང་སོང་། དེ་བཞིན་ཁོང་གིས་ཁ་སང་གི་ལས་འགུལ་དབུ་འཛུགས་སྐབས་ཀྱི་གསར་འགོད་བསྒྲགས་གཏམ་གྱི་བརྗོད་བྱ་གཙོ་བོ་དེ་ནི་རྒྱ་ནག་གིས་བོད་ས་ཞི་བའི་བཅིངས་གྲོལ་ཞེས་པ་བཏང་ནས་ལོ་ངོ་བདུན་ཅུ་འགྲོ་མུས་ཡིན་ཡང་། རྒྱ་ནག་དམར་ཤོག་སྲིད་གཞུང་གི་དྲག་གནོན་གྱི་སྲིད་བྱུས་ཀྱི་འོག་ཏུ། བོད་ནང་གི་ཆོས་དང་རིག་གཞུང་རྩ་གཏོར་ཐེབས་པ་མ་ཟད། འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་གི་ཡོད་པ་དང་འབྲེལ་ནས། བོད་ཙམ་མིན་པར་རྒྱ་ནག་གི་དབང་སྒྱུར་འོག་གི་གྲངས་ཉུང་མི་རིགས་སྤྱི་ཡོངས་ཀྱི་གནས་བབ་ཉམས་དམས་སུ་འགྲོ་བཞིན་པ་ཞིག་ཡིན་སྟབས་ཐེ་ཝན་ཁུལ་གྱི་མང་ཚོགས་ཀྱིས་གནད་དོན་དེ་མཁྱེན་པའི་ཐོག་ནས་བོད་དང་གྲངས་ཉུང་མི་རིགས་གཞན་ཁག་གི་གནས་བབ་ལ་རྒྱབ་སྐྱོར་དགོས་བ་སོགས་ཡིན་པར་གསུངས་སོང་། གཞན་ཡང་ཁོང་གིས་འདི་ལོར་ཏོག་དབྱིབས་རིམས་ནད་ཀྱི་རྐྱེན་གྱིས་རྒྱ་ནག་སྐམ་ས་ཆེན་པོའི་ཡུལ་སྐོར་སྤྲོ་འཆམ་དེ་འདྲ་མང་པོ་མེད་ཀྱང་། ཐེ་ཝན་ནི་སྤྱི་ཡོངས་ཀྱི་ཆ་ནས་རྒྱ་ཡིག་རྒྱ་སྐད་ཤུགས་ཆེར་སྤྱོད་སའི་རང་དབང་དང་མང་གཙོའི་ས་ཁུལ་ཞིག་ཆགས་ཡོད་སྟབས། ལས་འགུལ་གྱི་ཆེ་ཆུང་ལ་མ་ལྟོས་བར་གནས་ཚུལ་གང་ཞིག་ཕྱིར་ཐོན་ཡང་གཙོ་བོ་རྒྱ་ཡིག་རྒྱ་སྐད་ཀྱི་ལམ་ནས་ཕྱིར་བསྒྲགས་བྱེད་ཀྱི་ཡོད་དུས། རྒྱ་ནག་གི་སྐམ་ས་ཆེན་པོའི་མི་མང་དཀྱུས་མ་རྣམས་ཀྱི་ཁྲོད་དུ་བོད་དོན་དང་འབྲེལ་བའི་གནས་ཚུལ་ཁྱབ་སྤེལ་བྱེད་ཐུབ་པ་ཞིག་ཡིན་ཙང་།  ལོ་རྟག་པར་སུམ་བཅུའི་དུས་དྲན་མ་བསླེབ་བར་དུ་ཟླ་གཅིག་གི་རིང་ལ་རྐང་འཁོར་སྐོར་སྐྱོད་ཀྱི་ལས་འགུལ་དེ་སྤེལ་མུས་ཡིན་པར་གསུངས་སོང་། གཞི་རྩའི་ཐེངས་འདིའི་རྐང་འཁོར་སྐོར་སྐྱོད་ཀྱི་ལས་འགུལ་དེ་ཟླ་གཅིག་གི་རིང་ལ་རེས་གཟའ་ལྷག་པ་འཆར་ཅན་ལ་སྤེལ་རྒྱུ་ཡིན་པ་དང་། གཙོ་བོ་རྒྱ་ནག་སྐམ་ས་ཆེན་པོའི་མི་མང་འདས་སྡོད་ཀྱི་ས་ཁུལ་དང་། རྒྱ་ནག་གི་དངུལ་ཁང་གི་ས་ཚིགས། དེ་བཞིན་ཁུལ་དེའི་གྲོང་ཁྱེར་ཆེ་ཁག་ལ་ཆེད་ཕེབས་ཀྱིས་བོད་དོན་དྲིལ་བསྒྲགས་ཀྱི་སྐོར་སྐྱོད་གནང་རྒྱུ་རེད་འདུག

རྒྱ་གར་གྱི་ Hindustan Times གསར་ཤོག་ཐོག་གནས་ཚུལ་ཐོན་པ་ལྟར་ན། རྒྱ་ནག་གིས་བོད་ལྷོ་ཁ་ཁུལ་གྱི་ལྷུན་རྩེ་རྫོང་ཁོངས་སུ་ཁེལ་བའི་ཡུལ་མི་ཞེས་པའི་འཕགས་བོད་འབྲུག་གསུམ་གྱི་མཐའ་མཚམས་སུ་བཅིངས་གྲོལ་དམག་གི་སྨན་པ་དང་མ་བྱན་སོགས་ཆེད་གཏོང་གིས་ཁུལ་དེའི་མཐའ་མཚམས་བོད་མི་རྣམས་དང་འབྲེལ་བ་སྔར་ལྷག་སྐྲུན་ཏེ་འཛུགས་སྐྲུན་གྱི་ལས་གཞི་ལ་ཤུགས་སྣོན་རྒྱག་བཞིན་རེད་འདུགགསར་ཁང་གིས་ཐེངས་འདིར་རྒྱ་ནག་གི་བཅིངས་གྲོལ་དམག་མིས་ཡུལ་མི་ཞེས་པའི་མཐའ་མཚམས་འབྱོར་འབྲིང་གྲོང་ཚོའི་བོད་མི་རྣམས་ལ་འབྲེལ་འདྲིས་ཀྱིས་འཛུགས་སྐྲུན་ལས་གཞི་རྒྱ་སྐྱེད་བྱེད་བཞིན་པ་དང་། བཅིངས་གྲོལ་དམག་མི་རྣམས་ཀྱིས་གྲོང་ཚོ་དེར་ཆེད་སྐྱོད་ཀྱིས་རྒྱ་ནག་གི་སྐད་གྲགས་ཡོད་པའི་ཟ་མ་རིགས་བཟོ་སྟངས་ཀྱང་སློབ་བཞིན་པ་མ་ཟད། བཅིང་འགྲོལ་དམག་གི་སྨན་པ་རྣམས་གྲོང་ཚོ་དེར་གཟའ་འཁོར་གཅིག་ལ་ཐེངས་གཉིས་ཙམ་སྐོར་སྐྱོད་དང་། མཐའ་སྲུང་གི་དམག་མི་རྣམས་ཀྱང་ཁུལ་དེའི་གྲོང་ཚོའི་རྒན་འཁོགས་རྣམས་ལ་ལྟ་སྐོར་དུ་འགྲོ་བཞིན་པ་བཅས་མངོན་གསལ་གྱིས།  དེ་དག་གི་དམིགས་ཡུལ་ནི་རྒྱ་ནག་གི་དམག་མི་ཞིག་གིས་བརྗོད་པ་ལྟར། ཁུལ་དེའི་དམག་མི་དང་མི་མང་གཉིས་ཁྱིམ་ཚང་གཅིག་གི་མི་ལྟར། མཛའ་བརྩེ་འབྲེལ་ལམ་རྒྱ་སྐྱེད་བྱེད་རྒྱུ་དེ་ཡིན་པར་མངོན་གསལ་གནང་འདུགགཞི་རྩའི་རྒྱ་ནག་གི་བཅིངས་གྲོལ་དམག་མིས་རོགས་རམ་བྱེད་བཞིན་པའི་ལྷུན་རྩེ་རྫོང་ཁོངས་ཀྱི་ཡུལ་མི་ཞེས་པའི་གྲོང་ཚོ་དེ་ནི་རྒྱ་ནག་གི་མཐའ་མཚམས་འབྱོར་འབྲིང་གྲོང་ཚོ་ཞེས་པ་ཐོག་མ་དེ་ཡིན་པ་དང་། དེའང་རྒྱ་གར་བྱང་ཤར་གྱི་མངའ་སྡེ་ཨ་རུ་ན་ཅལ་ས་ཁུལ་གྱི་ Subansiri ཞེས་པའི་གྲོང་སྡེ་དང་སྤྱི་ལེ་རེ་འགའ་མ་གཏོགས་མེད་པའི་ས་ཁུལ་ཞིག་ཆགས་ཡོད། ཕྱི་ལོ ༢༠༡༧ ལོར་རྒྱ་ནག་གི་སྲིད་འཛིན་ཞི་ཅིན་ཕིང་གིས་གྲོང་ཚོ་དེའི་ཁྱིམ་ཚང་ཞིག་ལ་ཡི་གེ་ཞིག་བཏང་སྟེ་  རྒྱ་ནག་གིས་ཁུལ་དེར་འབྲོག་ལས་ཀྱི་ཁྱིམ་ཚང་མང་དུ་གནས་སྤོར་བྱེད་འཆར་ཡོད་པ་དང་། ཁྱིམ་ཚང་དེ་དག་ཚང་མ་མཐའ་མཚམས་སྲུང་སྐྱོབ་པ་ཆགས་རྒྱུར་རེ་བ་ཡོད་ཅེས་བཀོད་ཡོད་པའི་གནད་དོན་དེ་རྒྱ་ནག་གི་གསར་ལམ་ཁག་ཏུ་ཐོན་རྗེས་གྲོང་ཚོ་དེ་སྐད་གྲགས་ཆེན་པོར་གྱུར་ཡོད་པ་རེད།  དེ་སྔོན་མཐའ་མཚམས་གྲོང་ཚོ་དེར་བོད་པའི་ཁྱིམ་ཚང་གཅིག་མ་གཏོགས་མེད་ཀྱང་ད་ཆ་ཁྱིམ་ཚང་མང་པོ་གནས་སྤོར་བྱས་ཡོད་པ་རེད་འདུག རྒྱ་ནག་གི་དམག་སྡེ་དང་འབྲེལ་བའི་གསར་ལམ་ཞིག་གིས་གནས་ཚུལ་སྤེལ་བ་ལྟར་ན། ཉེ་བའི་ལོ་འགའི་རིང་ལ། རྒྱ་ནག་གིས་ཡུལ་མི་གྲོང་ཚོ་དེར་ལམ་ཁ་དང་སློབ་གྲྭ་གསར་རྒྱག   དེ་བཞིན་སྨན་ཁང་དང་ཉེན་རྟོག་རུ་ཁག་ཀྱང་གསར་འཛུགས་ཀྱིས་སྒོ་འབྱེད་བྱས་ཡོད་སྟབས། ད་ཆ་གྲོང་ཚོ་དེར་བོད་ཀྱི་ཁྱིམ་ཚང་མང་པོ་གནས་སྤོར་བྱེད་མུས་ཡིན་པར་བསྒྲགས་ཡོད་པའི་ཁྲོད། བོད་མི་ཅི་ཙམ་ཞིག་གནས་སྤོར་བྱས་པའི་གྲངས་གནས་དང་བོད་མི་དེ་དག་གནས་སྤོར་བྱེད་དགོས་བའི་རྒྱུ་མཚན་སོགས་གསལ་བོར་བརྗོད་མེད་ཀྱང་།  སྔར་ལོའི་ཟླ་བ་ ༨ པའི་ནང་དུ་རྒྱ་ནག་གཞུང་འབྲེལ་གྱི་གསར་ཁང་གིས་གནས་ཚུལ་སྤེལ་བའི་ནང་དུ། ད་ཆ་གྲོང་ཚོ་དེར་མི་གྲངས་ ༢༠༠ ལྷག་ཡོད་པར་མངོན་གསལ་བྱས་ཡོད་པ་རེད།སྐབས་དེའི་གནས་ཚུལ་གྱི་ནང་དུ། སྔོན་ཆད་ས་གནས་དེར་མི་གསུམ་ལས་འདུག་མཁན་མེད་པའི་གྲོང་ཚོ་དེར། ཕྱི་ལོ་ ༡༩༩༩ ལོར་མི་༢༠ ལྷག་ཡོད་པ་དང་། ཕྱི་ལོ་ ༢༠༠༩ ལོར་མི་༣༠ ལྷག་གནས་སྡོད་བྱེད་མུས་ཡིན་ཡང་། ད་ཆ་གྲོང་ཚོ་དེ་འབྱོར་འབྲིང་སྤྱི་ཚོགས་སུ་གྱུར་ནས་ནང་མི་ ༦༧་ལྷག་ཡོད་པ་མ་ཟད། མི་གྲངས་ཡང་ ༢༠༠ ལྷག་ཡོད་པར་གྱུར་བ་མ་ཟད།  གྲོང་ཚོ་དེའི་ས་གནས་ཀྱི་ཡུལ་མི་རྣམས་ཀྱིས་མཐའ་མཚམས་ཁག་ལ་སྲུང་སྐྱོབ་ཀྱིས་སྐོར་སྐྱོད་ཀྱང་བྱེད་ཀྱི་ཡོད་པར་འཁོད་ཡོད་པ་རེད། རྒྱ་ནག་གི་ནུབ་རྒྱུད་ཀྱི་དམག་སྡེ་ཁོངས་སུ་གཏོགས་པའི་བོད་ཁུལ་གྱི་དམག་སྡེའི་རོགས་སྐྱོར་འོག   ད་ཆ་གྲོང་ཚོ་དེར་ཡུལ་སྐོར་སྤྲོ་འཆམ་པ་འདུག་སའི་མགྲོན་ཁང་ལྔ་ལྷག་སྒོ་འབྱེད་བྱས་ཡོད་མ་ཟད། ཁང་ཁྱིམ་དེ་དག་ཏུ་བརྙན་འཕྲིན་དང་མྱུར་སྐྱོབ་ཀྱི་སྲོག་རླུང་། དེ་བཞིན་སྐུད་མེད་དྲྭ་རྒྱ་སོགས་ཀྱི་མཐུན་རྐྱེན་ཡང་ཡོད་པམ་ཟད། མགྲོན་ཁང་གི་སྦྱིན་བདག་རྣམས་ཀྱིས་ད་ཆ་རྒྱ་ནག་གི་དམག་མིས་ཁྲིད་སྟོན་ཁྲོད་ཕག་ཤ་དང་བྱ་ཤ་སོགས་ཀྱི་ཟས་རིགས་བཟོ་སྟངས་དམིགས་བསལ་བ་ཞིག་ཤེས་རྟོགས་བྱུང་ཡོད་པར་བརྗོད་འདུགདེ་ཙམ་དུ་མ་ཟད། འཕགས་བོད་འབྲུག་གསུམ་གྱི་མཐའ་མཚམས་དང་ཐག་ཉེ་བའི་ཨ་རུ་ན་ཅལ་གྱི་ Longju ཞེས་པའི་ས་ཚིགས་སུ་ཡང་རྒྱ་ནག་གིས་གྲོང་ཚོ་གསར་བ་ཁག་ཅིག་གསར་རྒྱག་བྱས་ཡོད་པ་དང་།  མཐའ་མཚམས་དེ་ནི་ཕྱི་ལོ་ ༡༩༥༩ ལོར་རྒྱ་དཀར་ནག་གི་བར་དུ་གདོང་ཐུག་ཐོག་མ་བྱུང་ས་དེ་ཆགས་ཡོད་འདུག རྒྱ་ནག་གིས་མཐའ་མཚམས་རྒྱ་སྐྱེད་ཀྱི་སྲིད་བྱུས་ལག་བསྟར་དོ་ནན་བྱེད་བཞིན་པའི་སྐབས་འདིར།  བལ་ཡུལ་གཞུང་གིས་ཕྱོགས་བསྒྲིགས་བྱས་པའི་སྙན་ཐོ་ཞིག་བྷི་བྷི་སི་གསར་ཁང་དུ་འབྱོར་བའི་ནང་དུ་ཡང་། རྒྱ་ནག་གིས་ད་ཆ་བལ་ཡུལ་མཐའ་མཚམས་ཀྱི་ས་ཆ་ཁག་ཅིག་ཧམ་བཟུང་ཡོད་པར་ཡང་འཁོད་ཡོད་འདུགགཞི་རྩའི་རྒྱ་ནག་གིས་བོད་སྐྱོང་མཐའ་སྐྱོང་ཞེས་པའི་སྲིད་བྱུས་འོག    མཐའ་མཚམས་ཁག་ལ་བདེ་འཇགས་དགོས་ན་ཁུལ་དེར་རྟེན་གཞི་བྱས་པའི་བོད་པའི་གྲོང་ཚོ་ཁག་ལ་བདག་སྐྱོང་བྱེད་དགོས་བའི་གོང་རིམ་གྱི་ལམ་སྟོན་འོག   ཉེ་བའི་ལོ་འགའི་རིང་ནས་རྒྱ་ནག་གིས་འཕགས་བོད་མཐའ་མཚམས་སུ་ཁེལ་བའི་བོད་མིའི་གྲོང་ཚོ་རྣམས་ལ་དངུལ་དངོས་ཀྱི་ཁེ་བཟང་སྤྲོད་བཞིན་པ་དང།  མཐའ་མཚམས་སུ་འབྱོར་འབྲིང་སྤྱི་ཚོགས་འཛུགས་སྐྲུན་གྱིས་གྲོང་ཚོ་གསར་རྒྱག་གི་ལས་གཞིར་ཤུགས་སྣོན་བྱེད་བཞིན་པ་མ་ཟད། སྔར་ལོ་ནས་རྒྱ་ནག་གིས་མཐའ་མཚམས་དང་འབྲེལ་བའི་ཁྲིམས་སྒྲིག་གསར་བ་ཞིག་གཏན་འབེབས་བྱས་ཏེ་འདི་ལོ་ནས་དངོས་སུ་ཁྲིམས་སྒྲིག་ཁག་ལག་བསྟར་བྱེད་འགོ་བཙུགས་ཏེ། འཕགས་བོད་མཐའ་མཚམས་སུ་འཛུགས་སྐྲུན་ལས་གཞི་སྔར་ལྷག་རྒྱ་བསྐྱེད་ཀྱིས་ལྟ་སྲུང་ལས་གཞི་དོ་དམ་བྱེད་ཤུགས་ཆེ་རུ་གཏོང་བཞིན་པ་རེད་འདུག

ཁ་སང་། དབྱིན་ཡུལ་དུ་རྟེན་གཞི་བྱས་པའི་ Free Tibet ཞེས་པའི་བོད་དོན་རྒྱབ་སྐྱོར་ཚོགས་པ་དང་། དེ་བཞིན་Big Brother Watch ཞེས་པའི་སྤྱི་མང་རང་དབང་ཚོགས་པ་གཉིས་ཀྱིས་ཉམས་ཞིབ་བྱས་ཏེ་ཤེས་རྟོགས་བྱུང་བ་ལྟར་ན། དབྱིན་ཡུལ་གྱི་གྲོང་སྡེ་ལས་ཁུངས་ཁག་ ༢༧༥ ལྷག་གིས་རྒྱ་ནག་གཞུང་འབྲེལ་གྱི་Hikvision བཟོ་ལས་ཁང་གིས་བཟོ་སྐྲུན་བྱས་པའི་བརྙན་མིག་གི་འཕྲུལ་ལས་རིགས་བེད་སྤྱོད་གཏོང་བཞིན་པར་ཡོང་གྲགས་དང་འབྲེལ། བརྙན་མིག་འཕྲུལ་ལས་ཀྱི་རིགས་དེ་དག་ནི་རྒྱ་ནག་གིས་བོད་མི་དང་ཡུ་གུར་ཁ་ཆེ་མི་རིགས་དྲག་གནོན་བྱེད་པར་བེད་སྤྱོད་གཏོང་བཞིན་པའི་འཕྲུལ་ལས་ཡིན་པར་སྐྱོན་བརྗོད་གནང་འདུགདེ་ཡང་བོད་དོན་རྒྱབ་སྐྱོར་ཚོགས་པ་དང་Big Brother Watch ཚོགས་པ་གཉིས་ཀྱིས་སྨྲ་བརྗོད་རང་དབང་གི་གནད་དོན་དང་འབྲེལ་དབྱིན་ཡུལ་གྱི་གྲོང་སྡེ་ལས་ཁུངས་ཁག་ཡོངས་ལ་དྲི་བ་རིམ་པ་བཏང་རྗེས་གྲོང་སྡེ་ལས་ཁུངས་མང་ཆེ་བས་རྒྱ་ནག་གི་ Hikvision བཟོ་ལས་ཁང་གིས་བཟོ་སྐྲུན་བྱས་པའི་བརྙན་མིག་གི་འཕྲུལ་ལས་བེད་སྤྱོད་གཏོང་གི་ཡོད་པར་ངོས་ལེན་བྱས་ཡོད་པ་དང་། དེའི་ཁོངས་སུ་དབྱིན་ཡུལ་གྱི་རྒྱལ་ས་ལོན་ཊོན་ནང་གི་གྲོང་སྡེ་ལས་ཁུངས་༣༢ ལས་༡༩ དང་ Scotland ནང་གི་གྲོང་སྡེ་ལས་ཁུངས་ཁག་ཡོང་རྫོགས་ཀྱིས་རྒྱ་ནག་གིས་བཟོ་སྐྲུན་བྱས་པའི་བརྙན་མིག་བེད་སྤྱོད་གཏོང་གི་ཡོད་པ་མངོན་གསལ་གནང་འདུག ལོན་ཊོན་གྱི་Tower Hamlets འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ནས་རྒྱ་ནག་གིས་བཟོ་སྐྲུན་བྱས་པའི་བརྙན་མིག་དེ་དག་བེད་སྤྱོད་བྱེད་ཀྱི་མེད་སྐོར་གསུངས་འདུག སྤྱིར་Tower Hamletsནི་རྒྱ་ནག་གིས་གཞུང་ཚབ་ཁང་གསར་རྒྱག་བྱས་སའི་ས་ཁུལ་ཞིག་ཆགས་ཀྱི་ཡོད་པ་དང་། གྲོང་སྡེ་ལྷན་ཚོགས་དེའི་ངོས་ནས་རྒྱ་ནག་གི་གཞུང་ཚབ་ཁང་གི་ཉེ་འགྲམ་གྱི་སྲང་ལམ་ཁག་ལ་རྒྱ་ནག་གིས་དྲག་གནོན་བྱས་པའི་མི་མང་གི་ཆེ་མཐོང་དང་འབྲེལ་བའི་མཚན་གནས་གསར་བ་ཞིག་འདོགས་རྒྱུར་དགོངས་བཞེས་གནང་བཞིན་ཡོད་པ་རེད། Free Tibet བོད་དོན་རྒྱབ་སྐྱོར་ཚོགས་པས་ངོས་ནས་དབྱིན་ཡུལ་གྱི་ཕྱི་སྲིད་བློན་ཆེན་གྱི་མཚན་ཐོག་ཏུ་རྒྱ་ནག་གཞུང་འབྲེལ་གྱི་Hikvision བཟོ་ལས་ཁང་གིས་བཟོ་སྐྲུན་བྱས་པའི་བརྙན་མིག་དེ་དག་ཡུལ་དེའི་ནང་ཚོང་ལས་བྱ་རྒྱུར་འཕྲལ་དུ་བཀག་སྡོམ་བྱེད་དགོས་བའི་ཞུ་སྙན་ཞིག་ཕུལ་ཡོད་པའི་ནང་དུ། དབྱུལ་ཡུལ་གྱི་ལས་ཁུངས་ཁག་གིས་རྒྱ་ནག་གིས་བཟོ་སྐྲུན་བྱས་པའི་འཕྲུལ་ལས་དེ་དག་བེད་སྤྱོད་བྱས་པ་ཡིན་ན། ཤུགས་ནས་དབྱིན་གཞུང་གིས་མི་མང་གི་ཁྲལ་བསྡུ་བརྒྱུད་ནས་རྒྱ་ནག་གིས་བོད་ཁུལ་དང་ཤིན་ཅང་གི་ནང་དུ་དྲག་གནོན་བྱེད་བཞིན་པ་དེར་རྒྱབ་སྐྱོར་བྱས་པ་ཞིག་ཆགས་ཀྱི་ཡོད་པར་མངོན་གསལ་གྱིས། དབྱིན་ཡུལ་ཁུལ་དུ་གང་མགྱོགས་བཟོ་ལས་ཁང་དེའི་བརྙན་མིག་འཕྲུལ་ཆས་རྣམས་བཀག་སྡོམ་བྱེད་དགོས་བར་རེ་ཞུ་ནན་སྐུལ་གནང་འདུག སྤྱིར་རྒྱ་ནག་གིས་བོད་དང་ཤིན་ཅང་གི་ནང་ཐབས་ཤེས་སྣ་མང་གི་སྒོ་ནས་གསང་ཉུལ་ལྟ་ཞིབ་ཀྱིས་དྲག་གནོན་ཆེས་ཆེར་བྱེད་བཞིན་པའི་ཁྲོད། རྒྱ་ནག་གཞུང་འབྲེལ་གྱི་བཟོ་གྲྭ་Hikvision ཟེར་བ་དེ་ནི་དྲག་གནོན་གྱི་སྲིད་བྱུས་དེར་རྒྱབ་སྐྱོར་ཤུགས་ཆེར་བྱེད་མཁན་གྱི་བཟོ་ལས་ཁང་ཞིག་ཆགས་ཡོད་པ་དང་། བཟོ་ལས་ཁང་དེའི་བརྙན་མིག་འཕྲུལ་ལས་རྣམས་བརྒྱུད་ནས་པར་རིས་དང་བརྙན་ཕབ་རྣམས་མི་མང་གི་ཤེས་རྟོགས་མེད་པའི་སྒང་ནས་རྒྱ་ནག་གི་ནང་དུ་བརྒྱུད་གཏོང་བྱེད་བཞིན་པའི་གནད་དོན་ཕྱིར་གྱུར་བྱུང་བ་ལྟར། ཨ་རིའི་སྲིད་གཞུང་དང་དབྱིན་ཡུལ་གྱི་བདེ་སྲུང་བློན་ཆེན་ལས་ཁུངས་ནས་ཁུལ་དེར་རྒྱ་ནག་གི་བཟོ་ལས་ཁང་དེའི་བརྙན་མིག་རྣམས་བེད་སྤྱོད་གཏོང་མཚམས་འཇོག་དགོས་བར་བསྒྲགས་ཡོད་ཀྱང་། ད་ལྟའང་དབྱུལ་ཡུལ་དུ་གཞུང་འབྲེལ་གྱི་ལས་ཁུངས་ཁག་མང་དག་ཅིག་གིས་བརྙན་མིག་དེ་དག་བེད་སྤྱོད་གཏོང་བཞིན་ཡོད་པ་རེད།

དེ་རིང་རྒྱ་ནག་གི་པི་ཅིང་གི་དགུན་དུས་ཀྱི་ཨོ་རྩལ་དངོས་སུ་འགོ་འཛུགས་ཀྱི་ཡོད་པའི་སྔ་རོལ་དུ། ཁ་སང་ཨ་རིའི་གྲོས་ཚོགས་གོང་མའི་དབུས་སུ།  ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་གོ་སྒྲིག་འོག་ཉན་ཞིབ་ཀྱི་ལས་རིམ་ཞིག་ཚོགས་འདུག་པ་དང་། ལས་རིམ་དེའི་ཐོག རྒྱ་ནག་གི་དྲག་སྤྱོད་ཀྱི་འོག་ཏུ་མནར་གཅོད་མྱངས་བའི་བོད་ཀྱི་ཆབ་སྲིད་བཙོན་ཟུར་དམ་པ། སྤྲུལ་སྐུ་བསྟན་འཛིན་བདེ་ལེགས་མཆོག་གི་ཚ་མོ་ཉི་མ་ལྷ་མོ་ལགས་དང་། ཡུ་གུར་ཐོབ་ཐང་རྩོད་ལེན་པ་སྐུ་ཞབས་ Ilham Tohti ལགས་ཀྱིས་བུ་མོ Jewher Tohti ལགས། རྒྱ་རིགས་འགྲོ་བ་མིའི་ཐོབ་ཐང་རྩོད་ལེན་པ་ Ding Jiaxi ལགས་ཀྱི་སྐུ་ཟླ་ Sophie Lao ལགས། དེ་བཞིན་ཧོང་ཀོང་གི་མང་གཙོ་རྩོད་ལེན་པ་ Nathan Law དང་ China Change ཞེས་པའི་རྒྱ་ནག་གི་དུས་དེབ་ཀྱི་རྩོམ་སྒྲིག་པ Yaxue Cao ལགས་བཅས་རྒྱ་ནག་གི་དྲག་སྤྱོད་དངོས་སུ་མྱངས་མྱོང་མཁན་ཁག་གཅིག་ལྷན་བཞུགས་ཐོག་རྒྱ་གཞུང་གི་མི་སྤྱོད་ལས་འདས་པའི་དྲག་སྤྱོད་ཐད་ཚོགས་ཆུང་ལ་སྙན་གསེང་ཞུས་པ་མ་ཟད། ཉན་ཞིབ་ཀྱི་ལས་རིམ་དེའི་ཐོགཨ་རའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་Nancy Pelosi མཆོག་དམིགས་བསལ་ཆེད་ཕེབས་ཀྱིས་གཏམ་བཤད་གནང་འདུགལྕམ་ནེན་སི་པོ་ལོ་སི་(Nancy Pelosi)ལགས་ཀྱིས་སྐབས་དེར་གཏམ་བཤད་གནང་བའི་ནང་དུ། རྒྱ་ནག་གིས་འདས་པའི་ལོ་ངོ་བཅུ་ཕྲག་འགའ་ཤས་རིང་ནས་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་ཁག་རྒྱལ་སྤྱིའི་སྤྱི་ཚོགས་ཁྲོད་གླེང་སློང་བྱེད་རྒྱུར་གཡོལ་ཐབས་བྱེད་བཞིན་པ་ལྟར། ཐེངས་འདིའི་དགུན་དུས་ཀྱི་ཨོ་རྩལ་འགྲན་ཚོགས་བརྒྱུད་སླར་ཡང་ཐབས་ཤེས་དེ་རང་བྱེད་རྒྱུ་ཡིན་པར་བསྒྲགས་པ་མ་ཟད། རྒྱ་ནག་གི་བྱེད་ལས་ལ་ལྟོས་མེད་ཀྱིས། ཨ་རི་གཙོ་བྱས་པའི་རྒྱལ་སྤྱིའི་སྤྱི་ཚོགས་ཀྱིས་གསལ་བོར་ཤེས་བ་ཞིག་ནི། རྒྱ་ནག་གིས་འགྲོ་བ་མིའི་ཐོབ་ཐང་ལ་ཚབས་ཆེན་གྱི་རྡོག་རོལ་གཏོང་བཞིན་པ་མ་ཟད་མི་རིགས་རྩ་གཏོར་གྱི་བྱ་སྤྱོད་སྤེལ་བཞིན་ཡོད་ཅེས་གསུངས་འདུག སྒྲ།། ཁོང་གིས་ད་དུང་པེ་ཅིང་གི་ཨོ་རྩལ་འགྲན་བསྡུར་གྱི་སྐབས་སུ་ཨ་རིའི་རྩེད་འགྲན་པ་རྣམས་ཀྱིས་སྙིང་རྗེ་བྲལ་བའི་རྒྱ་ནག་སྲིད་གཞུང་ལ་གཟབ་གཟབ་གནང་དགོས་བའི་འབོད་སྐུལ་གནང་སྟེ། ཨ་རིའི་ངོས་ནས་རང་ཉིད་ཀྱི་རྩེད་འགྲན་པ་རྣམས་ལ་མཐའ་གཅིག་ཏུ་རྒྱབ་སྐྱོར་ཞུ་མུས་ཡིན་པ་དེ་ལྟར་ཡང་རྒྱ་ནག་ནང་གི་འགྲོ་བ་མིའི་ཐོབ་ཐང་ཐད་ཞལ་ཙུམ་ནས་འདུག་རྒྱུ་མིན་པར་གསུངས་འདུག དེ་བཞིན་ཁོང་གིས་ཡོང་རྒྱུར་བསྡད་པའི་བདུན་ཕྲག་གཉིས་ཀྱི་ནང་དུ། རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཁག་ཡོང་གྲགས་བྱ་རྒྱུར་ཨ་རིའི་གཞུང་ལ་བཟང་སྤྱོད་ཀྱི་འགན་འཁྲི་ཡོད་པར་བསྒྲགས་པ་དང་ཆབས་གཅིག ཐེངས་འདིའི་སྐྱོན་བརྗོད་དེ་ནི་རྒྱ་ནག་མི་མང་ལ་དམིགས་པ་ཞིག་མིན་པར། རྒྱ་ནག་མི་མང་སྤྱིི་མཐུན་རྒྱལ་ཁབ་ཀྱི་དྲག་གནོན་བྱེད་མཁན་གྱི་སྲིད་གཞུང་ལ་དམིགས་པ་ཞིག་ཡིན་པར་འགྲེལ་བརྗོད་ཀྱིས། རྒྱ་ནག་སྲིད་གཞུང་གིས་ཐེ་ཝན་ལ་བརྙན་བཅོས། ཧོང་ཀོང་ནང་གི་གཞི་རྩའི་རང་དབང་ལ་དྲག་གནོན། དེ་བཞིན་ལོ་བཅུ་ཕྲག་ཁ་ཤས་ཀྱི་རིང་ལ་བོད་ཀྱི་ཆོས་དང་རིག་གཞུང་། དེ་བཞིན་སྐད་ཡིག་སོགས་ལ་རྒོལ་རྡུང་བཏང་ཡོད་པར་གསུངས་འདུག ཉན་ཞིབ་ཀྱི་ལས་རིམ་དེའི་ཐོག་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་སྐུ་ཞབས་Jim McGovern ལགས་ཀྱིས་རྒྱ་ནག་གིས་ཡུ་གུར་ཁ་ཆེ་མི་རིགས་རྣམས་རྩ་གཏོར་གྱི་སྲིད་བྱུས་ལག་བསྟར་བྱེད་བཞིན་པ་བསྐྱར་ནན་དང་འབྲེལ། རྒྱ་ནག་གིས་རྩེད་འགྲན་པ་རྣམས་ཀྱིས་སྤྱོད་དགོས་བར་བཟོས་བའི་མཉེན་ཆས་དེས་མི་སྒེར་གྱི་གནས་ཚུལ་རྐུ་འཁྱེར་བྱེད་རྒྱུ་དང་། རྩེད་འགྲན་པ་རྣམས་ལ་སྤྲད་པའི་གྱོན་པ་དང་ཟ་མ་རྣམས་ཀྱང་རྒྱ་ནག་གི་ངལ་རྩོལ་སྒྱུར་བཀོལ་བྱས་ནས་ཐོན་སྐྱེད་བྱས་པ་ཞིག་ཡིན་པར་བསྒྲགས་ཏེ། ཨོ་རྩལ་འགྲན་ཚོགས་ལ་འཛུལ་ཞུགས་བྱེད་མཁན་རྣམས་ཀྱིས་རང་གི་ཉེན་ཁ་ལ་གཟབ་ནན་བྱེད་དགོས་པའི་སྐུལ་མ་གནང་བ་མ་ཟད། རྒྱ་ནག་གི་ཨོ་རྩལ་ལ་སྦྱིན་བདག་བྱེད་མཁན་རྣམས་ཀྱིས་དཔལ་འབྱོར་གྱི་ཁེ་ཕན་ལ་བརྟེན་ནས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་རྒྱ་གཞུང་དང་ལྷན་དུ་ཚོང་འབྲེལ་བྱེད་ཀྱི་ཡོད་པ་དེ་ནི་ནོར་འཁྲུལ་ཡིན་པར་གསུངས་འདུགཉན་ཞིབ་ཀྱི་ལས་རིམ་དེིའི་ཐོག་ཉི་མ་ལྷ་མོ་ལགས་ཀྱིས་རྒྱ་ནག་གི་བཀག་ཉར་འོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྐུ་བཀྲོང་བའི་གནས་ཚུལ་དང་། ད་ལྟའང་ཁོང་གི་ཨ་མ་གཙོས་པའི་ནང་མི་རྣམས་ལ་དམ་དྲག་སུནགཙེར་བྱེད་བཞིན་པ་སྙན་གསེང་དང་འབྲེལ། འཕྲོད་བསྟེན་གྱི་གནས་བབ་འོག་ནས་ཁོང་གི་ཨ་མ་རང་དབང་ལུང་པའི་ནང་བསླེབ་ཐུབ་པར་ཕྱག་རོགས་དགོས་པའི་འབོད་སྐུལ་གནང་བ་མ་ཟད། པཎ་ཆེན་རིན་པོ་ཆེ་མཆོག་གི་དབུས་པའི་བོད་ཀྱི་ཆབ་སྲིད་བཙོན་པ་ཁག་ཅིག་གི་གནད་དོན་འབུར་འདོན་གྱིས་ཁོང་རྣམ་པར་གློད་གྲོལ་གནང་ཐབས་དགོས་པའི་ཞུ་སྐུལ་གནང་འདུག

རྒྱ་གར་གྱི་རྒྱལ་ས་ལྡི་ལིར་འཚོགས་བཞིན་པའི་དགུན་དུས་ཀྱི་སྔོན་རྩིས་གྲོས་ཚོགས་ཀྱི་ལས་རིམ་ཐོག་ཁ་སང་བི་ཧཱར་མངའ་སྡེ་ནས་ཡིན་པའི་གྲོས་ཚོགས་གོང་མའི་འཐུས་མི་སྐུ་ཞབས་ Shri Amarendra Dhari Singh ལགས་ཀྱིས་རྒྱ་གར་གྱི་སྲིད་འཛིན་གྱི་གསུང་བཤད་ལ་ཐུགས་རྗེ་ཆེ་ཞུའི་གཏམ་བཤད་ཀྱི་ལས་རིམ་དང་འབྲེལ་ཏེ། རྒྱ་གར་གཞུང་གི་ངོས་ནས་བོད་ལྟ་བུ་རང་ཉིད་ཀྱི་ཁྱིམ་མཚེས་རྒྱལ་ཁབ་རྣམས་གཙིགས་ཆེར་བརྩིས་ནས་བོད་དོན་རྒྱབ་སྐྱོར་གནང་ཤུགས་ཆེ་རུ་གཏོང་དགོས་པའི་གྲོས་འགོ་བརྩམས་འདུགཁོང་གི་གསུངས་བཤད་ཀྱི་ནང་དུ།  བོད་མི་རྣམས་ཀྱིས་རྒྱ་ནག་གི་དབང་སྒྱུར་གྱི་བདག་དབང་དང་མིང་ཙམ་གྱི་དབང་སྒྱུར་ལ་ཁས་ལེན་བྱས་མེད་པ་ཡིག་ཚགས་སུ་གསལ་བར་གསུངས་བ་དང་འབྲེལ། རྒྱ་གར་གྱིས་རང་གི་གྲོགས་པོ་དང་མཉམ་དུ་ལངས་དགོས་པའི་སྐོར་ནས་བསླབ་བྱ་ལེན་དགོས་པ་དང་། གལ་ཏེ་དེ་ལྟར་མ་གནང་བ་ཡིན་ན། ང་ཚོས་རྒྱ་གར་དང་མཛའ་འབྲེལ་ཡོད་པའི་བོད་མི་རྣམས་ས་ལ་བརྡབ་པའི་དེ་སྔའི་ལོ་རྒྱུས་ཀྱི་ནོར་འཁྲུལ་དེ་སླར་ཡང་བསྐྱར་ཟློས་བྱེད་ངེས་བར་གསུངས་འདུག ཁོང་གིས་ད་དུང། ད་ལྟའི་གཞུང་འཛིན་གྱིས་དགའ་མོས་ཆེས་ཆེར་བྱེད་སའི་རྒྱ་གར་གྱི་སྲིད་བློན་ཟུར་བ་ནེཧ་རུར་མཚོན་ཡང་། ཁོང་གིས་ཕྱི་ལོ་ ༡༩༤༩ ལོར། བོད་མི་རྣམས་ལ་མཉམ་འབྲེལ་རྒྱལ་ཚོགས་སུ་འབྲེལ་གཏུགས་བྱེད་དགོས་པའི་ལམ་སྟོན་གནང་ཡོད་ལ། ཐ་ན་རྒྱ་གར་གྱི་ན་གཞོན་དམག་སྤྱི་ Zorawar Bakshi  ལགས་བོད་དུ་ཆེད་མངགས་ཆེད་གཏོང་གིས་འཐབ་བྱུས་ལྡན་པའི་དམག་དོན་གྱི་ལས་གཞི་སྒྲིག་དགོས་བར་སྐུལ་ཡོད་པ་ལུང་འདྲེན་གྱིས། སྐབས་དེའི་ལས་དོན་རྣམས་འཆར་གཞི་སྒྲིག་པ་ལྟར་ལེགས་འགྲུབ་མ་བྱུང་བར་ལོ་རྒྱུས་ཁྲོད་ལྷག་ཡོད་པར་འགྲེལ་བརྗོད་གནང་འདུགཁོང་གིས་ད་དུང་གང་ལྟར་ད་ཆ་བོད་རྒྱལ་ཁབ་དེ་འཛམ་གླིང་ཕྱོགས་གཏོགས་མང་པོར་འགྱུར་བཞིན་པའི་དུས་སྐབས་སུ་རྒྱ་གར་གྱི་བྱེད་བབ་འདྲ་མིན་གྱི་རྐྱེན་པས་བོད་ལ་ཡུན་རིང་གི་དཀའ་ངལ་མང་པོར་འཕྲད་བཞིན་པ་ཞིག་ཡིན་སྟབས། རྒྱ་གར་གྱིས་རང་གི་ཁེ་ཕན་སྲུང་སྐྱོབ་དང་སྦྲགས་ཁྱིམ་མཚེས་རྒྱལ་ཁབ་དང་དེ་ལས་བརྒལ་བའི་རྒྱལ་ཁབ་གཞན་རྣམས་དང་ལྷན་དུ་མཐུན་སྒྲིག་བྱེད་དགོས་ཀྱི་ཡོད་པའི་ཞུ་སྐུལ་གནང་འདུག གཞི་རྩའི་འདི་ལོའི་རྒྱ་གར་གྱི་དགུན་དུས་ཀྱི་གྲོས་ཚོགས་ཚོགས་འདུ་དེ་ཟླ་བ་སྔོན་མའི་ཚེས་ ༣༡ ཉིན་ནས་འགོ་འཛུགས་ཀྱིས་ཟླ་བ་འདིའི་ཚེས་ ༨ གྱི་བར་དུ་འཚོགས་བཞིན་ཡོད་པ་དང་། ཐེངས་འདིར་གྲོས་ཚོགས་ཀྱི་ཁྲོད་དུ་བོད་དོན་རྒྱབ་སྐྱོར་གྱི་གསུངས་བཤད་གནང་མཁན་གྱི་གྲོས་ཚོགས་འཐུས་མི་སྐུ་ཞབས་ Shri Amarendra Dhari Singh ལགས་ནི་ Rashtriya Janata Dal་ཞེས་པའི་རྒྱ་གར་་གྱི་ཆབ་སྲིད་ཚོགས་པའི་འཐུས་ཚབ་ཀྱི་ངོས་ནས་རྒྱ་གར་ཤར་ཕྱོགས་ཀྱི་མངའ་སྡེ་བི་ཧཱར་ནས་ཕེབས་བའི་གྲོས་ཚོགས་གོང་མིའི་འཐུས་མི་ཞིག་ཆགས་ཀྱི་ཡོད་པ་རེད།

དེ་རིང་སྔ་དྲོ་ཕྱག་ཚོད་བཅུ་དང་ཕྱེད་ཀའི་སྟེང་། བཞུགས་སྒར་མེགྷན་གྱི་ཁྲོམ་གཞུང་གི་བཞི་མདོ་རུ། བོད་རང་བཙན་སློབ་ཕྲུག་ཚོགས་པའི་གོ་སྒྲིག་གི་ཐོག་ནས། སང་ཉིན་རྒྱ་ནག་གི་དགུན་དུས་ཀྱི་ཨོ་རྩལ་འགྲན་ཚོགས་འགོ་འཛུགས་ལ་རན་པར་པར་རིས་འགྲེམས་སྟོན་བརྒྱུད་ནས་ངོ་རྒོལ་ལས་འགུལ་ཞིག་སྤེལ་སོང་། པར་རིས་འགྲེམས་སྟོན་གྱི་ངོ་རྒོལ་ལས་འགུལ་ནང་དུ། བོད་ནང་གི་ཆབ་སྲིད་བཙོན་པའི་རྣམ་པ་མཚོན་བྱེད་དང་། དེ་བཞིན་ཨོ་རྩལ་འགྲན་ཚོགས་ལ་སྦྱིན་བདག་བྱེད་མཁན་གྱི་བཟོ་ཚོང་། NBC དང་ Allianz སོགས་ཀྱི་ཚོང་རྟགས་འཁོད་པའི་པར་རིས། དེ་བཞིན་། Genocide 2020 ཞེས་བྲིས་པའི་འཕྲེད་དར་བཤམ་སྟེ། འདི་ལོའི་རྒྱ་ནག་གི་ཨོ་རྩལ་འགྲན་བསྡུར་དེ་ནི་མི་རིགས་རྩ་གཏོར་གྱི་རྩེད་འགྲན་ཞིག་ཆགས་ཡོད་པར་ཕྱིར་བསྒྲགས་བྱས་འདུག ཚོགས་པའི་གསར་འགོད་བསྒྲགས་གཏམ་གྱི་ནང་དུ། བོད་ནང་གི་གཙོ་བྱས་པའི་རྒྱ་ནག་རྒྱལ་ཡོངས་སུ་འགྲོ་བ་མིའི་ཐོབ་ཐང་ལ་རྡོག་རོལ་ཆེས་ཆེར་ཐེབས་བཞིན་པར་ལྟོས་མེད་ཀྱིས་སང་ཉིན་རྒྱ་ནག་ནང་གི་དགུན་དུས་ཨོ་རྩལ་འགྲན་ཚོགས་དངོས་སུ་འགོ་འཛུགས་བྱེད་རྒྱུར་མཐའ་གཅིག་ཏུ་ངོ་རྒོལ་ཡོད་པ་ཕྱིར་བསྒྲགས་ཀྱིས། ཕྱི་ལོ་ ༢༠༠༨ ལོའི་རྒྱ་ནག་གི་ཨོ་རྩལ་འགྲན་ཚོགས་ཀྱི་སྐབས་ནས་བཟུང་བོད་ནང་དུ་སྔར་ལྷག་དྲག་གནོན་བྱེད་ཤུགས་ཆེ་རུ་ཕྱིན་ཡོད་པ་མ་ཟད། དེ་ལྟ་བུའི་དྲག་གནོན་གྱི་སྲིད་བྱུས་དེ་ད་དུང་ཡང་མུ་མཐུད་དུ་གནས་བཞིན་པ་ཞིག་ཡིན་པང་མངོན་གསལ་གྱིས། འདི་ལོའི་ཨོ་རྩལ་འགྲན་ཚོགས་བརྒྱུད་ནས་བོད་ནང་དུ་དྲག་གནོན་གྱི་སྲིད་བྱས་དེ་སྔོན་ལས་ཀྱང་ཤུགས་ཆེ་རུ་འགྲོ་རྒྱུར་སེམས་འཚབ་ཡོད་པར་བསྒྲགས་འདུག རྒྱ་གར་ཁུལ་གྱི་བོད་རང་བཙན་སློབ་ཕྲུག་ཚོགས་པའི་འགན་འཛིན་རིག་འཛིན་ཆོས་སྒྲོལ་ལགས་ཀྱིས་གསར་ཁང་ལ་དེ་རིང་གི་ངོ་རྒོལ་ལས་འགུལ་གྱི་དགོས་དམིགས་ཀྱི་ཐད་ནས་ངོ་སྤྲོད་གནང་བ་ལྟར་ན། ད་ལྟའི་བར་དུ་ལས་འགུལ་གྱི་རྣམ་གྲངས་སྣ་མང་བརྒྱུད་ནས་རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་གྱི་ལས་འགུལ་སྤེལ་ཡོད་པ་ལྟར། སང་ཉིན་རྒྱ་ནག་གི་དགུན་དུས་ཀྱི་ཨོ་རྩལ་དེ་འགོ་འཛུགས་ལ་རན་པའི་དུས་སྐབས་དང་བསྟུན་ནས་སླར་ཡང་མང་ཚོགས་ཀྱི་ཁྲོད་དུ་རྒྱ་ནག་གི་དྲག་གནོན་གྱི་སྲིད་བྱུས་ལ་དྲན་གསོ་བྱས་ཏེ། རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་རྡོག་རོལ་གཏོང་གི་ཡོད་པའི་ཐད་ནས་མུ་མཐུད་དུ་ལས་འགུལ་རྒྱུན་སྐྱོང་གནང་ནས་མང་ཚོགས་ཁྲོད་གནད་དོན་དེ་ཕྱིར་བསྒྲགས་བྱེད་རྒྱུར་དམིགས་པ་ཞིག་ཡིན་པར་གསུངས་སོང་། གཞན་ཡང་ཁོང་གིས། ད་ལྟའི་བར་དུ་ལས་འགུལ་སྤེལ་བའི་གྲུབ་འབྲས་སུ་ནུབ་ཕྱོགས་ཀྱི་སྟོབས་ཆེན་རྒྱལ་ཁབ་ཨ་རི་དང་དབྱིན་ཡུལ། དེ་བཞིན་ཁ་ན་ཊ་སོགས་ཀྱི་མཚོན་པའི་རྒྱལ་ཁབ་མང་པོ་ཞིག་གིས་རྒྱ་ནག་གི་ཨོ་རྩལ་འགན་ཚོགས་ཀྱི་ཡུལ་དངོས་སུ་གཞུང་འབྲེལ་གྱི་སྐུ་ཚབ་མི་སྣ་ཆེད་གཏོང་བྱེད་རྒྱུ་མིན་པར་བསྒྲགས་ཡོད་པ་དེ་བརྒྱུད་ནས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབ་དེ་རྒྱལ་སྤྱིའི་ཐོག་དྲིལ་བསྒྲགས་བྱེད་ཐུབ་པ་བྱུང་ཡོད་པ་ཞིག་ཡིན་པར་གསུངས་སོང་། ཁོང་གིས་མུ་མཐུད་དུ་གསུངས་རྒྱུར། རྒྱ་ནག་གི་ཉེ་སྔོན་ཨོ་རྩལ་གྱི་འགྲན་ཞུགས་པ་རྣམས་ཀྱིས་འགྲོ་བ་མིའི་ཐོབ་ཐང་གི་གནས་བབ་དང་འབྲེལ་བའི་གཏམ་བརྗོད་སྤེལ་བ་ཡིན་ན་ཁྲིམས་ལྟར་ཉེས་ཆད་གཅོད་རྒྱུ་ཡིན་པའི་འཇིགས་སྐུལ་་བྱས་ཡོད་པ་དེ་ནི་ཉེན་ཁ་ཆེ་བའི་གནད་དོན་ཞིག་ཡིན་པར་འགྲེལ་བརྗོད་ཀྱིས། ཨོ་རྩལ་འགྲན་ཞུགས་པ་རྣམས་ཀྱི་ཚེ་སྲོག་ལ་ཡང་ཉེན་ཁ་འཕྲད་སྲིད་པ་ཞིག་ཡིན་མངོན་གསལ་གནང་སོང་། གཞི་རྩའི་འདས་བའི་ལོ་གཉིས་ཀྱི་ནང་དུ། བོད་རང་བཙན་སློབ་ཕྲུག་ཚོགས་དང་བོད་ཀྱི་གཞོན་ནུ་ལྷན་ཚོགས་སོགས་ཀྱི་གཙོ་བྱས་པའི་འགྲོ་བ་མིའི་ཐོབ་ཐང་གི་ཚོགས་སྐྱིད་ཁག་བརྒྱ་དང་བརྒྱད་ཅུ་ལྷག་གིས་རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་གྱིི་ལས་འགུལ་རབ་དང་རིམས་པ་སྤེལ་བ་བརྒྱུད་ནས། ཕྱི་ཕྱོགས་ཀྱི་རྒྱལ་ཁབ་ཁག་ཅིག་གིས་གཞུང་འབྲེལ་གྱི་མི་སྣ་ཕྱིར་གཏོང་བྱེད་རྒྱུ་མིན་པར་བསྒྲགས་ཏེ་རྒྱ་ནག་གི་རྩེད་འགྲན་དེར་གནོན་ཤུགས་སྤྲོད་ཐུབ་པ་བྱུང་ཡོད་ཀྱང་། གནད་དོན་དེར་ལྟོས་མེད་ཀྱིས་སང་ཉིན་ནས་དངོས་སུ་རྒྱ་ནག་གི་ནང་དུ་ཨོ་རྩལ་འགྲན་བསྡུར་འགོ་འཛུགས་ཀྱིས་ཚེས་ཉི་ཤུའི་ཉིན་མཇུག་སྒྲིལ་གྱི་ཡོད་ཀྱང་། ད་ཆ་ཏོག་དབྱིབས་ནད་དུག་ཁྱབ་བརྡལ་གྱི་རྐྱེན་གྱིས་ཨོ་རྩལ་འགྲན་བསྡུར་དེ་ལམ་ལྷུང་ཅི་ཅམ་བྱུང་མིན་ཐེ་ཚོམ་གྱི་གནས་སུ་ལྷག་ཡོད་པ་རེད།

རྒྱ་ནག་གི་འདི་ལོའི་དགུན་དུས་ཀྱི་ཨོ་རྩལ་འགོ་འཛུགས་ལ་རན་པའི་དུས་སྐབས་འདིར་ཕྱི་ཕྱོགས་ཀྱི་རྩེད་འགྲན་པ་མང་པོ་འབྱོར་བཞིན་པ་དང་བསྟུན་ནས། རྒྱ་ནག་གི་ནང་དུ་ཏོག་དབྱིབས་ནད་དུག་འགོས་ཁྱབ་ཇེ་ཆེར་འགྲོ་བཞིན་ཡོད་པ་རེད་འདུགགསར་ལམ་ཁག་ཏུ་གནས་ཚུལ་ཐོན་པའི་ནང་དུ། འདས་པའི་ཚོུད་ ༢༤ འི་ནང་པེ་ཅིང་དུ་ཨོ་ལམ་སྤིག་རྩེད་འགྲན་གྱི་འབྲེལ་ཡོད་མི་སྣ་ ༣༢ ལ་ནད་དུག་ཕོག་ཡོད་པ་ར་སྤྲོད་བྱུང་བ་དང་། དེའི་ཁོངས་ནས་ ༡༥ པེ་ཅིང་གནམ་ཐང་དུ་དེ་རིང་འབྱོར་བའི་མི་སྣ་ཡིན་པ་བཅས། ཟླ་བ་སྔོན་མའི་ཚེས་ ༢༣ ནས་ད་ལྟའི་བར་གྱི་གནས་སྟངས་ལ་གཞིགས་ན། རྒྱ་གཞུང་གིས་རྩེད་འགྲན་པ་དང་འབྲེལ་ཡོད་ལས་བྱེད་རྣམས་ལ་རིམས་ནད་བརྟག་དཔྱད་བྱས་པའི་ཁྲོད་ཏོག་དབྱིབས་ནད་དུག་ཕོག་མཁན་གྱི་མི་ཁྱོན་ ༢༠༠ ལྷག་བྱུང་ཡོད་པ་རེད་འདུག རེས་གཟའ་པ་སངས་ཉིན་ནས་འགོ་འཛུགས་བྱེད་རྒྱུའི་ཐེངས་འདིའི་པེ་ཅིང་ནང་གི་འགྲན་ཚོགས་དེའི་ཐོག འཛམ་གླིང་ས་ཕྱོགས་གང་ས་ནས་རྩེད་འགྲན་པ་གཙོ་བོར་གྱུར་བའི་འབྲེལ་ཡོད་ལས་བྱེད་དང་རྒྱལ་ཁབ་སོ་སོའི་སྐུ་ཚབ་རུ་ཁག་སོགས་ཁྱོན་མི་སྣ་ ༣༠༠༠ ལྷག་འདུ་འཛོམས་གནང་གི་ཡོད་པ་དང་། པེ་ཅིང་ཨོ་རྩལ་འགྲན་ཚོགས་ཀྱི་སྨན་པའི་ཚོགས་ཆུང་གི་ཚོགས་གཙོ་ Brian McCloskey ལགས་ཀྱིས་འགྲེལ་བརྗོད་གནང་དོན་ལྟར་ན། འདས་པའི་ཉིན་ཤས་ནང་པེ་ཅིང་དུ་ནད་དུག་ཕོག་མཁན་གྱི་གྲངས་འབོར་ཆ་སྙོམ་དེ་ཉིན་ལྟར་ ༣༠ ཙམ་ཆགས་ཀྱི་ཡོད་པ་དེ་ལྟར་ཡང་། ད་ལྟའི་ཆར་ནད་དུག་ཕོག་མཁན་སུ་ཞིག་གི་གནས་སྟངས་ཛ་དྲག་མེད་པ་དང་། ཕྱི་ལོག་ནས་འབྱོར་མཁན་གྱི་རྩེད་འགྲན་པའི་གྲངས་འབོར་ཉུང་རུ་སོང་བ་དང་ལྷན་དུ། ནད་དུག་ཕོག་མཁན་གྱི་ཉིན་རེའི་ཆ་སྙོམ་གྱི་གྲངས་འབོར་དེའང་ཉུང་དུ་འགྲོ་བའི་རེ་བ་ཡོད་སྐོར་བརྗོད་འདུག གང་ལྟར་རིམས་ནད་ཕོག་པའི་རྩེད་འགྲན་པ་རྣམས་གནས་སྐབས་སུ་མགྲོན་ཁང་གི་ནང་དུ་ཟུར་བཀག་བྱས་ཏེ་བཞག་པ་མ་ཟད། གཅིག་བྱས་ན་ནད་པ་ཁ་ཤས་ཀྱིས་ཐེངས་འདིའི་རྩེད་འགྲན་གྱི་གོ་སྐབས་ལེན་རྒྱུ་ཁག་པོ་ཆགས་སྲིད་པ་དང་། བྷི་བྷི་སི་གསར་ཁང་གིས་འགྲེལ་བརྗོད་གནང་དོན་ལྟར་ན། རྒྱ་ནག་གིས་ད་ལྟའི་བར་དུ་ཏོག་དབྱིབས་ནད་དུག་འགོས་ཁྱབ་ལ་ཚོད་འཛིན་གྱིས་པེ་ཅིང་གི་རྫོང་མང་དག་ཅིག་སྒོ་རྒྱབ་སྟེ་མང་ཚོགས་ས་ཡ་བརྒལ་བར་བརྟག་དཔྱད་དང་།ཕྱི་ཕྱོགས་ཀྱི་འགྲིམ་འགྲུལ་ཡོད་ཚད་མཚམས་འཇོག་བྱས་ཡོད་ཀྱང་། ད་ཆ་རྒྱ་ནག་གི་ཨོ་རྩལ་འགྲན་ཚོགས་འགོ་འཛུགས་ལ་རན་པའི་ཁྲོད་ནད་དུག་ཕོག་པའི་གྲངས་འབོར་དེ་ནི་འདས་བའི་ཟླ་ངོ་ ༡༨ གྱི་ནང་དུ་བསྡུར་བ་ཡིན་ན། ད་ཆ་ཏོག་དབྱིབས་ནད་པའི་གྲངས་འབོར་འཕར་ཤུགས་ཆེ་ཤོས་དེ་ཡིན་པར་བརྗོད་འདུག རྩ་བའི་རིམས་ནད་དང་པོ་བྱུང་མ་ཐག་ནས་རྒྱ་ནག་གིས་པེ་ཅིང་གྲོང་ཁྱེར་ནང་དུ་མང་ཚོགས་བཀག་སྐྱིལ་གྱི་སྲིད་བྱུས་ལག་བསྟར་བྱས་ཡོད་པའི་ཁྲོད། པེ་ཅིང་གྲོང་ཁྱེར་དང་ལྷག་པར་རྩེད་འགྲན་འཚོགས་སའི་རྩེད་རྭ་རྣམས་ཕྱོགས་ཡོངས་ནས་བཀག་སྟེ། ལྟ་མོ་བ་རྣམས་ཀྱང་དམིགས་བསལ་གདན་ཞུའི་ཐོག་ནས་མ་གཏོགས་ཕེབས་ཆོག་གི་མེད་པ་དང་། རིམས་ནད་ཕོག་པའི་རྩེད་འགྲན་པ་རྣམས་གཅིད་སྡོད་ས་ཚིགས་སུ་ཟུར་འགོག་བྱས་པ་དང་། ཚོུད་ ༢༤ རེའི་དུས་བཀག་བྱས་ཏེ་སླར་ཡང་བརྟག་དཔྱད་རིམ་པ་གཉིས་བྱས་ནས་ནད་དུག་མེད་པ་ར་སྤྲོད་བྱུང་ན་མ་གཏོགས་རྩེད་འགྲན་ནང་ཞུགས་ཐུབ་ཡ་མེད་པ་བཟོས་ཡོད་པ་རེད་འདུག མ་ཟད་རྩེད་འགྲན་པ་དང་འབྲེལ་ཡོད་ཡོངས་ནས་རང་ཉིད་ཀྱི་ལག་ཐོག་ཁ་པར་ཐོག་དམིགས་བསལ་གཉེན་ཆས་ཕབ་ལེན་གྱིས་ཉིན་ལྟར་སྒེར་སོ་སོའི་ཚ་བ་རྟགས་དཔྱད་བྱེད་དགོས་པ་མ་ཟད། ཨོ་རྩལ་དང་འབྲེལ་བའི་རླངས་འཁོར་རྡབ་སྐྱོན་སོགས་ཀྱི་གནས་ཚུལ་བྱུང་བའི་སྐབས་སུའང་གཞུང་གི་གོ་སྒྲིག་བྱས་པའི་མྱུར་སྐྱོབ་རུ་ཁག་མ་གཏོགས་མང་ཚོགས་གཞན་ནས་རོགས་པ་སོགས་བྱེད་ཆོག་གི་མེད་པའི་བཀོད་ཁྱབ་ཀྱང་བཏང་བའི་གནས་ཚུལ་བྱུང་འདུག གཞི་རྩའི་པེ་ཅིང་གི་དགུན་དུས་ཨོ་ལམ་སྤིག་རྩེད་འགྲན་དེ་རེས་གཟའ་པ་སངས་ཉིན་ནས་འགོ་འཛུགས་བྱེད་ཀྱི་ཡོད་པ་ལྟར། དེ་རིང་པེ་ཅིང་དུ་རྩེད་འགྲན་གྱི་དཔལ་འབར་སྐོར་བསྐྱོད་ཀྱི་ལས་རིམ་དེ་འགོ་འཛུགས་བྱས་ཡོད་པ་དང་། དཔལ་འབར་སྐོར་བསྐྱོད་ཐོག་མར་འགོ་འཛུགས་བྱེད་མཁན་ནི་རྒྱ་ནག་གི་སིལ་སྤོལ་གྱི་རྩེད་འགྲན་པ་གྲགས་ཅན་ Yao Ming དང་། དེ་སྔ་འཕགས་བོད་མཐའ་མཚམས་སུ་རྒྱ་དཀར་ནག་གཉིས་དབར་གདོང་ཐུག་དྲག་པོ་བྱུང་སྐབས་རྨས་སྐྱོན་ཕོག་པའི་དམག་མི་ཞིག་བཞག་ཡོད་པ་རེད་འདུག

ཁ་སང་དབྱིན་ཡུལ་དུ་རྟེན་གཞི་བྱས་པའི་ Free Tibetཞེས་པའི་བོད་དོན་རྒྱབ་སྐྱོར་ཚོགས་པས་དབྱིན་ཡུལ་གྱི་ཁུལ་དུ་མང་ཚོགས་གཅིག་སྟོང་ལྷག་གི་ཁྲོད་འདི་ལོའི་རྒྱ་ནག་གི་དགུན་དུས་ཀྱི་ཨོ་རྩལ་འགྲན་ཚོགས་ལ་དྲྭ་ལམ་ནས་ལྟ་ཉན་བྱེད་རྒྱུ་ཡིན་མིན་གྱི་བསམ་ཤོག་བསྡུ་རུབ་ཁྲོད་དུ། མང་ཚོགས་བརྒྱ་ཆ་ ༥༨ ཙམ་གྱིས་རྒྱ་ནག་གི་ཨོ་རྩལ་ལ་བལྟ་ཉན་ཉུང་ཙམ་བྱེད་རྒྱུ་ཡིན་པ་དང་བརྒྱ་ཆ་ཉི་ཤུ་ལྷག་གིས་བལྟ་ཉན་རྩ་བ་ནས་བྱེད་རྒྱུ་མིན་པར་བསྒྲགས་འདུག དེ་ཡང་མང་ཚོགས་ཁྲོད་དུ་བསམ་ཤོག་ཁྲོད་དྲི་བ་གཉིས་དྲིས་བའི་ནང་། གཅིག་ནས་དགུན་དུས་ཨོ་རྩལ་འགྲན་ཚོགས་དང་རྒྱལ་སྤྱིའི་རྐང་སྤོལ་རྩེད་འགྲན་ལས་མང་ཚོགས་ཀྱིས་དུས་རྒྱུན་རྩེད་འགྲན་ཅི་ཙམ་ལ་བལྟ་ཉན་བྱེད་ཀྱི་ཡོད་མེད་དང་། གཉིས་པར་དབྱིན་ཡུལ་གཞུང་གཙོས་པའི་རྒྱལ་ཁབ་གཅིག་གིས་རྒྱ་ནག་གི་ནང་དུ་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབ་དང་འབྲེལ་ནས་ཐཻངས་འདིའི་དགུན་དུས་འགྲན་ཚོགས་སུ་གཞུང་འབྲེལ་གྱི་སྐུ་ཚབ་གཏོང་རྒྱུ་མིན་པར་བསྒྲགས་ཡོད་དུས་མང་ཚོགས་ཀྱིས་གནད་དོན་དེར་འབྲེལ་གྱིས་དྲྭ་ལམ་བརྒྱུད་རྒྱ་ནག་གི་ཨོ་རྩལ་ལ་བལྟ་ཉན་བྱེད་རྒྱུ་ཡིན་མིན་བཀའ་འདྲི་ཞུས་འདུགབོད་དོན་རྒྱབ་སྐྱོར་ཚོགས་པའི་དྲིལ་བསྒྲགས་དང་ཞིབ་འཇུག་འགན་འཛིན་ John Jones ལགས་ཀྱིས། རྒྱ་ནག་གིས་ཊི་ནེ་སི་རྩེད་འགྲན་པ་ Peng Shauiལགས་ཀྱི་གནད་དོན་དེ་ལྐོག་གྱུར་བཟོས་བ་བཞིན་རྒྱལ་སྤྱིའི་ཨོ་རྩལ་ལྷན་ཚོགས་ངོས་ནས་ཀྱང་རྩེད་འགྲན་གྱི་དམིགས་འདུན་ལས་ཁེ་བཟང་གཙོ་བོར་བཟུང་སྟེ་རྒྱ་ནག་དང་ངན་འབྲེལ་བྱས་ཏེ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་གནས་ཚུལ་དེ་རིགས་སྦེད་ཐབས་བྱ་རྒྱུ་ཉག་གཅིག་ཡིན་སྐོར་གསུང་བ་དང་ཆབས་ཅིག ཨོ་རྩལ་འགྲན་ཚོགས་ལ་རྒྱུན་དུ་དགའ་མོས་གནང་མཁན་རྣམས་ཀྱིས་ད་རེས་ཀྱི་བསམ་ཤོག་བསྡུ་རུབ་དེ་བརྒྱུད། རྩེད་འགྲན་དེ་བཞིན་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབ་དེ་གཙང་བཟོ་བྱེད་ཐབས་ལ་བེད་སྤྱོད་བྱེད་དུ་འཇུག་འདོད་མེད་པའི་རྣམ་པ་གསལ་པོར་བསྒྲགས་པ་མ་ཟད། དགོས་མཁོར་ཐུག་ན་རྩེད་འགྲན་ཕྱིར་སྟོན་གྱི་དྲྭ་ལམ་དེ་དག་ཡོངས་སུ་སྒོ་རྒྱག་རྒྱུ་ཡིན་པར་གསུངས་འདུགཁོང་གིས་ད་དུང་ཨོ་རྩལ་ལྷན་ཚོགས་དང་FIFAཞེས་པའི་རྒྱལ་སྤྱིའི་རྐང་རྩེད་ཚོགས་པ་སོགས་ཀྱིས་དུས་ཡུན་རིང་བོར་ལྟད་མོ་བ་རྣམས་ཀྱིས་རྒྱབ་སྐྱོར་ཡོད་ཤག་གིས་རང་སྣང་གང་དྲན་བྱས་ཀྱང་། རྩེད་འགྲན་ལ་དགའ་མོས་ཡོད་མཁན་རྣམས་ཀྱིས་དྲང་བདེན་གྱི་རྩེད་འགྲན་ལ་རེ་བ་གསལ་འདོན་གྱིས། རྒྱལ་སྤྱིའི་རྩེད་འགྲན་ཚོགས་པ་ཁག་གིས་རྒྱལ་སྤྱིའི་བུད་མེད་ཊི་ནེ་སི་ཚོགས་པ་ལྟར་བློ་ཁོག་ཆེན་པོའི་ངང་ནས་རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་ལ་འཛུལ་ཞུགས་ཕྱིར་འཐེན་དགོས་བར་སྐུལ་མ་གནང་ཡོད་པར་འགྲེལ་བརྗོད་གནང་འདུག དབྱིན་ཡུལ་བོད་དོན་རྒྱབ་སྐྱོར་ཚོགས་པས་ཕྱི་ལོ་༢༠༠༨་ལོའི་རྒྱ་ནག་གི་དབྱར་དུས་ཀྱི་ཨོ་རྩལ་སྔ་རོལ་དུ་བོད་མི་རྣམས་ཀྱིས་གཞི་རྒྱ་ཆེ་བའི་ངོ་རྒོལ་གྱི་ལས་འགུལ་སྤེལ་ཡོད་ཀྱང་། རྒྱ་ནག་གིས་སྐབས་དེར་བོད་མིའི་ཐོག་དྲག་སྤྱོད་ཤུགས་ཆེ་སྤེལ་དང་སྤེལ་མུས་ཁྲོད། ཨ་རིའི་རང་དབང་ཁང་པའི་ལོ་འཁོར་སྙན་ཐོ་ནང་དུ་བོད་ནི་རྒྱལ་སྤྱིའི་ཁྲོད་རང་དབང་ཆེས་ཞན་པའི་དྲག་གནོན་གྱི་ས་ཁུལ་ཞིག་ཡིན་པར་ཕྱིར་བསྒྲགས་བྱས་ཡོད་པར་ལུང་འདྲེན་དང་འབྲེལ། ད་ཆ་རྒྱལ་སྤྱིའི་གསར་ཁང་ཆེ་གྲས། BBCདང་Discovery གཞན་ཡང་ ITV སོགས་ཀྱིས་ཨོ་རྩལ་ལྟད་མོ་སྟོན་ཐབས་སུ་མ་འཛུགས་ཆེན་པོ་བྱས་ཡོད་པ་དང་། དེ་བཞིན་ཁྱབ་བསྒྲགས་པ་དང་སྦྱིན་བདག་སོགས་ཀྱང་རྩེད་འགྲན་དང་འབྲེལ་ནས་མ་དངུལ་ཆེན་པོ་བཏང་ཡོད་པ་དེ་ནི་ཧང་སང་དགོས་བའི་གནད་དོན་ཞིག་ཡིན་པར་བསྒྲགས་འདུགརྩ་བའི་དབྱིན་ཡུལ་བོད་དོན་རྒྱབ་སྐྱོར་ཚོགས་པའི་ངོས་ནས་No Beijing 2022 ཞེས་རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་ལ་ངོ་རྒོལ་གནང་མཁན་གྱི་ཚོགས་པ་ཁག་གཅིག་དང་མཉམ་འབྲེལ་གྱིས། འདི་ལོའི་ཨོ་རྩལ་འགྲན་ཚོགས་ལ་བལྟ་ཉན་བྱེད་རྒྱུ་མེད་པའི་འབོད་སྐུལ་བྱས་ཏེ། དེའི་ཚབ་ཏུ། རྩེད་འགྲན་དང་འབྲེལ་བའི་ལྟད་མོ་དང་། ཡང་ན་བོད་དང་བོད་མིའི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་ལྟད་མོ་སོགས་ལ་བལྟ་ཉན་བྱེད་རྒྱུའི་སྐུལ་སློང་གི་ལས་འགུལ་སྤེལ་མུས་ཡིན་པ་རེད། གཞི་རྩའི་རྒྱལ་སྤྱིའི་ཨོ་རྩལ་ལྷན་ཚོགས་ཀྱིས་རྒྱ་ནག་ཏུ་འདི་ལོའི་དགུན་དུས་ཀྱི་ཨོ་རྩལ་འགྲན་ཚོགས་བསྡུ་རྒྱུའི་ཆོག་མཆན་སྤྲད་པ་དང་འབྲེལ་ནས། རྒྱ་ནག་གིས་གཅིག་ནས་བོད་ས་བཙན་བཟུང་བྱས་པ་དང་། ཡུ་གུར་ཁ་ཆེ་མི་རིགས་རྩ་གཏོར་བཏང་བ། དེ་བཞིན་ཧོང་ཀོང་ནང་གི་མང་གཙོའི་རང་དབང་ལ་དྲག་གནོན་བྱས་པ་སོགས་ཀྱི་གནད་དོན་དང་འབྲེལ་ཏེ་རྒྱལ་སྤྱིའི་སྤྱི་ཚོགས་ཀྱི་སྟེང་འདས་བའི་ལོ་གཉིས་ཀྱི་ནང་དུ་ཨོ་རྩལ་ལྷན་ཚོགས་ལ་སྐྱོན་བརྗོད་དྲག་པོ་བྱས་ཏེ་རྒྱ་ནག་ཏུ་ཨོ་རྩལ་བསྡུ་རྒྱུའི་གནས་བབ་མེད་པར་ཡོངས་གྲགས་གནང་ཡོད་བའི་ཁྲོད། དབྱིན་ཡུལ་དང་ཨ་རི་སོགས་ཀྱི་མཚོན་པའི་རྒྱལ་ཁབ་མང་པོ་ཞིག་གིས་རྒྱ་ནག་གི་ཨོ་རྩལ་འགྲན་ཚོགས་ཐོག་གཞུང་འབྲེལ་གྱི་སྐུ་ཚབ་མི་སྣ་མི་གཏོང་རྒྱུ་ཕྱིར་བསྒྲགས་གནང་ཡོད་པ་རེད།

དེ་ཡང་གཟའ་འཁོར་སྔོན་མའི་རེས་གཟའ་ཕུར་བའི་ཉིན། ཡུ་རོབ་མཐུན་ཚོགས་ཀྱིས་རྒྱ་ནག་གིས་དབྱེ་འབྱེད་རང་བཞིན་གྱི་རྒྱལ་སྤྱིའི་ཚོང་ལས་ལག་བསྟར་བྱེད་ཀྱི་ཡོད་པ་དང་འབྲེལ་ནས། WTO ཞེས་པའི་རྒྱལ་སྤྱིའི་ཚོང་ལས་ལྷན་ཚོགས་སུ་རྒྱ་ནག་གི་བྱེད་བབ་དང་འབྲེལ་བའི་ཚོང་དོན་གྱོད་གཞིའི་ཁྲིམས་གཏུགས་བྱེད་འགོ་ཚུགས་འདུག ཡུ་རོབ་མཐུན་ཚོགས་ཀྱིས། རྒྱ་ནག་གིས་ Baltic མངའ་ཁུལ་གྱིས་ཐེ་ཝན་དང་མཉམ་དུ་འབྲེལ་ལམ་གཏིང་ཟབ་ཏུ་བཏང་བ་དང་འབྲེལ་ནས་རྒྱ་ནག་གིས་ཁུལ་དེའི་ལི་ཐོ་ཎི་ཡ་རྒྱལ་ཁབ་དང་མཉམ་དུ་ཚོང་འབྲེལ་ཡོད་ཚད་བཀག་སྡོམ་བྱས་པར་ ཡུ་རོབ་མཐུན་ཚོགས་ཀྱིས་རྒྱ་ནག་གིས་དབྱེ་འབྱེད་རང་བཞིན་གྱི་ཚོང་ལས་ལག་བསྟར་བྱེད་ཀྱི་ཡོད་པར་ངོས་འཛིན་གྱིས་རྒྱལ་སྤྱིའི་ཚོང་ལས་ལྷན་ཚོགས་སུ་ཁྲིམས་གཏུགས་བྱས་ཡོད་འདུགདེ་ཡང་ཡུ་རོབ་མཐུན་ཚོགས་ཀྱི་ཚོང་ལས་ཀྱི་གཙོ་འཛིན།  སྐུ་ཞབས Valdis Dombrovskis ལགས་ཀྱིས་འགྲེལ་བརྗོད་བྱས་པའི་ནང་དུ། གཞི་རྩའི་རྒྱལ་སྤྱིའི་ཚོང་ལས་ལྷན་ཚོགས་ལ་གྱོད་དོན་ཞུ་གཏུགས་བྱེད་རྒྱུ་དེ་ནི་ང་ཚོ་ལས་སླ་བོ་ཞིག་ལ་ངོས་འཛིན་བྱེད་བཞིན་མེད་ཀྱང་། རྒྱལ་ཁབ་ཕྱོགས་གཉིས་ཀྱིས་ཐེངས་མང་པོ་ཚོང་འབྲེལ་གྱི་གྱོད་དོན་དེ་ཞི་འགྲིག་ཐུབ་ཐབས་སུ་འབད་བརྩོན་བྱས་ཀྱང་གྲུབ་འབྲས་མ་བྱུང་བས།  ད་ནི་རྒྱལ་སྤྱིའི་ཚོང་ལས་ལྷན་ཚོགས་སུ་ཞུ་སྐུལ་གྱིས་རྒྱ་ནག་དང་འབྲེལ་བའི་གྱོད་དོན་དེ་ཞི་འཇགས་ཡོང་ཐབས་སུ་སྐུལ་མ་གནང་རྒྱུ་ལས་ལྷག་མེད་པ་ཞིག་ཡིན་པར་མངོན་གསལ་གནང་འདུག གཞན་ཡང་ཁོང་གིས། ཡུ་རོབ་མཐུན་ཚོགས་ནི་ཚོང་ར་གཅིག་གི་ངོ་བོར་གནས་ཡོད་པ་དང་རྒྱལ་སྤྱིའི་ཚོང་ལས་ལྷན་ཚོགས་ཀྱི་ཁྲིམས་སྒྲིག་དང་འགལ་བའི་བྱ་སྤྱོད་ལ་ཐུག་སྐབས་ཀྱང་ཡུ་རོབ་མཐུན་ཚོགས་ཀྱིས་གནད་དོན་དེར་མཉམ་མཐུན་གྱིས་ཁ་གཏད་གཅོག་རྒྱུ་ཡིན་ལུགས་ངོ་སྤྲོད་ཀྱིས། ཚོང་ལས་ཀྱི་ཁྲིམས་སྒྲིག་རྩ་གཏོར་བྱིན་པ་དེ་ཡིས་ཡུ་རོབ་མཐུན་ཚོགས་ཀྱི་ཚོང་རའི་གཅིག་སྒྲིལ་ལ་ཉེན་ཁ་སྤྲད་པ་ཞིག་ཡིན་སྟབས་ཕྱི་འབྲེལ་གྱི་མི་སྣ་བརྒྱུད་ནས་གནད་བབ་དེ་གང་མགྱོགས་ཞི་འཇགས་ཡོང་ཐབས་གནང་དགོས་བར་སྐུལ་འདུགཡུ་རོབ་ལྷན་ཚོགས་ཀྱི་རྒྱལ་སྤྱིའི་ཚོང་ལས་ལྷན་ཚོགས་ཀྱི་སྐུ་ཚབ་པས་ཚོང་ལས་ལྷན་ཚོགས་སུ་དང་ཁ་གཏད་ཀྱི་རྒྱ་ནག་སྐུ་ཚབ། Li Chenggang ལགས་སུ་ཡི་གེ་བཏང་བའི་ནང་དུ། པེ་ཅིང་གིས་ལི་ཐོ་ཎི་ཡའི་ཚོང་ལས་ནང་འདྲེན་དང་རྒྱ་ནག་གི་ཅ་དངོས་ཕྱིར་འདྲེན་སོགས་ཡོངས་སུ་བཀག་སྡོམ་བྱས་ཡོད་པ་ཞིག་ཡིན་པར་འཁོད་ཡོད་པ་མ་ཟད། རྒྱ་ནག་གིས་ལི་ཐོ་ཎི་ཡ་དང་འབྲེལ་བའི་ཚོང་ལས་དང་ཞབས་ཞུའི་རིགས་བཀག་སྡོམ་བྱས་པའི་ཁྲོད།  ཡུ་རོབ་མཐུན་ཚོགས་བརྒྱུད་པའི་ཚོང་ལས་ལ་ཡང་དོ་ཕོག་འགྲོ་བཞིན་ཡོད་པར་མངོན་གསལ་གནང་འདུག རྒྱ་ནག་གིས་ཡུ་རོབ་མཐུན་ཚོགས་ཀྱི་གྱོད་དོན་དེ་དང་འབྲེལ་ནས་གནད་དོན་དེ་ནི་རྒྱ་ནག་དང་ལི་ཐོ་ཎི་ཡ་གཉིས་བར་གྱི་གནད་དོན་ཞིག་ཡིན་པར་འགྲེལ་བརྗོད་ཀྱིས། ཡུ་རོབ་མཐུན་ཚོགས་ཀྱིས་གནད་དོན་དེར་ཐེ་གཏོགས་མི་བྱེད་རྒྱུའི་ཉེན་བརྡ་བཏང་ཡོད་པ་དང་། རྒྱ་ནག་གིས་ལི་ཐོ་ཎི་ཡ་དང་འབྲེལ་བའི་ཚོང་འབྲེལ་བྱེད་ཕྱོགས་དེ་ནི་རྒྱ་ནག་གི་ཚོང་ལས་ཀྱི་འདོད་མོས་ཡིན་པ་ལས་གནད་དོན་གཞན་དང་འབྲེལ་བ་ཡོད་པར་ཁས་ལེན་བྱས་མེད་ཀྱང་ཡུ་རོབ་ལྷན་ཚོགས་ཀྱིས་རྒྱ་ནག་གི་འགྲེལ་བརྗོད་བྱེད་སྟངས་དེར་ངོས་ལེན་གནང་མེད་པ་རེད་འདུགགཞི་རྩའི་ཡུ་རོབ་མཐུན་ཚོགས་ཀྱིས་རྒྱ་ནག་གིས་ཡུ་གུར་ཁ་ཆེ་མི་མང་ངལ་རྩོལ་བསྒྱུར་བཀོལ་བྱས་པའི་གནད་དོན་དང་འབྲེལ་ནས་རྒྱ་ནག་གི་འབྲེལ་ཡོད་དཔོན་རིགས་ཁག་ཅིག་ཡུ་རོབ་ཏུ་འགྲོ་སྐྱོད་མི་ཆོག་པའི་ཁྲིམས་ཀྱི་ཉེས་ཆད་བཅད་པ་དང་བསྟུན་ནས་རྒྱ་ནག་གིས་ཀྱང་ཡུ་རོབ་ཀྱི་དཔོན་རིགས་ཁག་ཅིག་རྒྱ་ནག་གི་ནང་དུ་ཡོང་མི་ཆོག་པའི་བཀའ་རྒྱ་བསྒྲགས་ཡོད་པ་དང་བསྟུན་ནས།  ཡུ་རོབ་མཐུན་ཚོགས་དང་རྒྱ་ནག་གཉིས་ཀྱི་བར་དུ་ཚོང་དོན་གྱི་གན་རྒྱ་མང་པོ་ཞིག་དུས་ལྟར་འཇོག་མ་ཐུབ་པར་རང་སོར་ལྷག་ཡོད་པ་རེད།