བོད།

ཉེ་ཆར་ཟླ་གོང་མའི་ཕྱི་ཚེས་ ༡༥ དགོང་མོ་ལ་དྭགས་གྷལ་ཝན་ཡུལ་ཀླུང་དུ་ཆགས་པའི་རྒྱ་གར་དང་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཤོར་རྐྱེན་དེང་སྐབས་རྒྱ་དཀར་ནག་གཉིས་དབར་རྩོད་རྙོག་ཇེ་ཆེར་ཕྱིན་པའི་ཁྲོད་འདིར་ཕྱོགས་གཉིས་པོའི་དབར་དམག་འཁྲུག་ལངས་སྲིད་པའི་གནས་སྟངས་ཆགས་ཡོད་པ་དང་འབྲེལ། རྒྱ་ནག་གཞུང་ཕྱོགས་ནས་རྒྱ་དཀར་ནག་གཉིས་ཀྱི་རྩོད་རྙོག་འདིའི་ཁྲོད་བོད་རིགས་དམག་མི་ཕོན་ཆེ་བཏང་དང་གཏོང་བཞིན་པ་མངོན་གསལ་གནང་སྟེ་གནད་དོན་དེ་ནི་ཆེས་བློ་འཚབ་གནང་གཞིར་གྱུར་ཡོད་པ་གསུངས་འདུགརྒྱ་གར་ལྷོ་ཕྱོགས་ Auroville ནང་དུ་བཅའ་བཞུགས་བོད་རིག་པའི་མཁས་པ་སྐུ་ཞབས་ Claude Arpi ལགས་ཀྱིས་ཁ་སང་ rediff བརྒྱུད་ལམ་ཐོག་དཔྱད་རྩོམ་ཞིག་འདོན་སྤེལ་གནང་བར་ཟླ་སྔོན་ཚེས་ ༡༥ གོང་མོ་ལ་དྭགས་གྷལ་ཝན་ཡུལ་ཀླུང་དུ་ཆགས་པའི་རྒྱ་གར་དང་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཤོར་རྐྱེན་རྒྱ་གར་གྱི་དམག་དཔོན་ Santosh Babu ལགས་གཙོས་པའི་དམག་མི་ ༢༠ ཚེ་སྲོག་ཤོར་ཡོད་པ་ཡོངས་གྲགས་གནང་བའི་གནས་ཚུལ་སྤེལ་ཡོད་པ་དང་། རྒྱ་ནག་ཕྱོགས་ནས་དམག་མི་ཇི་ཙམ་རྐྱེན་འདས་གྲོངས་སུ་ཕྱིན་ཡོད་པ་ད་བར་ཡོངས་གྲགས་ཞུས་མེད་ཀྱང་རྗེས་སུ་ Twitter དྲྭ་ལམ་ཐོག་གནས་ཚུལ་ཞིག་ཕྱི་གྱར་བྱུང་བའི་ནང་ཚེས་ ༡༥ ཉིན་ Galwan དམག་འཁྲུག་ནང་འདས་གྲོངས་སུ་ཕྱིན་པའི་རྒྱ་ནག་གི་དམག་མི་ ༣༨  ཀྱི་མིང་ཐོ་དང་དམག་མི་དེ་དག་རྒྱ་ནག་གི་ས་ཁུལ་གང་ནས་ཡིན་པ་སོགས་མངོན་གསལ་གནང་བའི་ཁོངས་ནས་མི་ ༨ བོད་ནས་ཡིན་སྐོར་བརྗོད་པ་བཞིན་མི་བརྒྱད་པོ་དེ་དག་གི་མིང་ལ་ལྷག་པ་དང་ཚེ་རིང་། སྐལ་བཟང་སོགས་བོད་པའི་མིང་འཁོད་ཡོད་པ་དང་། ད་ལྟའི་ཆར་གནས་ཚུལ་དེ་ཁུངས་ལྡན་ཡིན་མིན་རྩད་གཅོད་གནང་དཀའ་ནའང་རྒྱ་ནག་གཞུང་གིས་བོད་དམག་ཆེད་གཏོང་གི་དམག་འཐབ་པར་ཐེ་ཚོམ་གང་ཡང་མེད་པར་རྟོགས་ཐུབ་རྒྱུ་ཡོད་པ་གསུངས་འདུག དེ་བཞིན་ཉེ་ཆར་རྒྱ་ནག་གཞུང་འབྲེལ་བརྒྱུད་ལམ་ཐོག་འདྲ་པར་ཕོན་ཆེ་དང་འབྲེལ་ནས་གནས་ཚུལ་སྤེལ་བར་བོད་ཀྱི་ས་ཁུལ་ཁག་ཏུ་རྒྱ་ནག་གི་གོ་ཚོན་དང་བཅས་དམག་སྦྱོང་ཤུགས་ཆེན་པོ་སྤེལ་བཞིན་པ་མ་ཟད། ས་གནས་བོད་རིག་མང་ཚོགས་ལས་གྲུབ་པའི་ཞོགས་འདེགས་དཔུང་དམག་རུ་ཁག་གསར་པ་ལྔ་ཙམ་ཆེད་འཛུགས་བྱས་ཡོད་པ་དང་། དེང་དུས་འཕྲུལ་ཆས་ལྡན་པའི་རུ་ཁག་གཅིག་དང་རི་འཛེགས་རུ་ཁག་གཅིག དེ་བཞིན་མྱུར་སྐྱོབ་དང་འབྲེལ་མཐུད་རུ་ཁག་བཅས་ཡོད་པ་དེ་ཉེན་ཆར་བོད་ཁུལ་གྱི་རྒྱ་ནག་བཅིངས་བཀྲོལ་དམག་གི་དམག་དཔོན་གཞོན་པ་དང་དམར་ཤོགས་ཚོགས་པའི་ངོ་ཚབ་པ་ Zhang Xiejie ཟེར་བས་སྣེ་ཁྲིད་འོག་ཞོགས་འདེགས་དཔུང་དམག་རུ་ཁག་གསར་པ་ལྔ་པོ་དེ་དག་གི་རུ་སྒྲིག་མཛད་སྒོ་ཚོགས་པ་དང་སྐབས་དེར་རྒྱ་ནག་གི་དཔོན་རིགས་མཐོ་གྲས་ཚོས་བོད་ནང་བརྟན་ལྷིང་དང་ས་མཚམས་སྲུང་སྐྱོབ་ཀྱི་ལས་དོན་སྤེལ་ཁུལ་ལ་བློ་འགུལ་ཐབས་བྱེད་བཞིན་ཡོད་པ་དང་། བོད་རིགས་དེ་དག་ལ་གླ་ཕོགས་ཡག་པོ་སྤྲད་ནས་དམག་འཐབ་ལ་ཞུགས་བཅུག་པ་གསལ་རྟོགས་བྱུང་སྐོར་མངོན་གསལ་གནང་འདུགསྐུ་ཞབས་ Claude Arpi ལགས་ཀྱིས་རྒྱ་ནག་གི་རྩ་ཁྲིམས་དོན་ཚན་ ༢༢ དང་ ༣༦ ནང་གསལ་ཞོགས་འདེགས་དཔུང་དམག་དེ་དག་གི་ལས་འགན་གཙོ་བོ་ནི་དམག་གི་གྲ་སྒྲིག་དང་རྒྱལ་སྲུང་། དེ་བཞིན་སྤྱི་ཚོགས་བདེ་འཇགས་སོགས་ཀྱི་ལས་དོན་གཉེར་དགོས་སྐོར་འཁོད་ཡོད་པ་མ་ཟད་ཕྱི་ལོ་ ༢༠༡༦ ལོ་ནས་ཟུང་ཞོགས་འདེགས་དཔུང་དམག་དེ་རྒྱ་ནག་དམར་ཤོག་གཞུང་གི་བཅིངས་བཀྲོལ་དམག་གི་ཐད་དཀར་བཏང་འཛིན་འོག་ཡོད་སྟབས་རྒྱ་ནག་ལ་ཞོགས་འདེགས་དཔུང་དམག་ས་ཡ་ ༨ ཙམ་ཡོད་པ་དང་འབྲེལ་ནས་འཛམ་གླིང་ཁྱོན་ཡོངས་སུ་གཞུང་འབྲེལ་དམག་དཔུང་ཡོད་པའི་ཐོག་ལ་ཞོགས་འདེགས་དཔུང་དམག་མང་ཤོས་ཡོད་མཁན་གྲས་ཤིག་ཡིན་པ་སོགས་མངོན་གསལ་གནང་འདུག ལྷག་པར་དུ་སྔ་ལོའི་ཕྱི་ཟླ་ ༧ དང་ ༩  ནང་ལྷ་ས་དང་པེ་ཅིང་དབར་བརྙན་འཕྲིན་བརྒྱུད་ཚོགས་འདུ་ཚོགས་པའི་ནང་བོད་ཁུལ་གྱི་བཅིངས་བཀྲོལ་དམག་དཔུང་དང་བོད་ཁུལ་གྱི་ཞོགས་འདེགས་དཔུང་དམག་ནང་དུ་དམག་མི་གསར་འཇུག་བྱེད་རྒྱུའི་ཐོག་གྲོས་བསྡུར་བྱས་ཡོད་པ་དང་འབྲེལ། རྗེས་སུ་བོད་ལྗོངས་ཉིན་རེའི་གསར་ཤོག་གིས་གནས་ཚུལ་སྤེལ་བར་རྒྱ་ནག་ཁྱོན་ཡོངས་ཀྱི་ཞོགས་འདེགས་དཔུང་དམག་ནང་འཛུལ་ཞུགས་ཀྱི་འགྲན་བསྡུར་ནང་བོད་ཁུལ་གྱི་ཞོགས་འདེགས་དཔུང་དམག་གི་ཟིན་ཐོ་གསར་པ་བཞག་ཡོད་པ་དང་། འགྲན་བསྡུར་ནང་འཛུལ་ཞུགས་ཆེད་དམར་ཤོག་ཚོགས་པའི་ལྟ་གྲུབ་གསལ་པོ་ཤེས་དགོས་པ་དང་། དམག་འཁྲུག་སྐབས་སེམས་ཞི་བར་གནས་ཐུབ་པ་སོགས་ཀྱི་ཐད་ལ་རྟོག་ཞིབ་ནན་པོ་བྱས་པ་ལྟར། བོད་ཁུལ་གྱི་ཞོགས་འདེགས་དཔུང་དམག་ནང་དུ་འཛུལ་ཞུགས་བྱེད་མཁན་རྣམས་ནས་འཇོན་ཐང་དང་སྤྱོད་ཚུལ་ཡག་པོ་ཡོད་དགོས་པའི་ཁར་ཆབ་སྲིད་ཀྱི་སློབ་གསོ་སྤྲོད་རྒྱུ་གལ་ཆེན་པོ་ཡིན་པ་སོགས་འཁོད་ཡོད་སྐོར་གསུངས་འདུགསྤྱིར་བོད་ཁུལ་གྱི་དམག་དཔུང་ནང་དམག་སྤྱི་དང་དམག་སྤྱི་གཞོན་པ། དེ་བཞིན་མདའ་དཔོན་སོགས་ཀྱི་གོ་གནས་ཡོད་མཁན་བོད་རིགས་མང་དག་ཅིག་ཡོད་པ་སོགས་གནད་དོན་ཁག་ལུང་འདྲེན་དང་འབྲེལ། མ་འོངས་པར་རྒྱ་དཀར་ནག་གཉིས་དབར་དམག་འཁྲུག་འབྱུང་ཚེ་བོད་རིགས་དམག་མི་ཕོན་ཆེ་ཞིག་དེར་མཉམ་ཞུགས་གནང་ངེས་ཡིན་པ་མ་ཟད། གནས་ཚུལ་ཐོན་ཁག་ལ་གཞིགས་ན་བོད་མི་ཁག་ཅིག་ནས་མཉམ་ཞུགས་བྱེད་བཞིན་པ་མངོན་རྒྱུ་ཡོད་སྟབས། རྒྱ་གར་གྱི་ངོས་ནས་བོད་པའི་དམག་མི་དང་ལྷན་དུ་འཁྲུག་འཛིང་གནང་བློ་རྩ་བ་ནས་མེད་པར་བརྟེན་དེ་ནི་བོད་དང་རྒྱ་གར་དབར་གྱི་འབྲེལ་ལམ་ཐད་ལ་གནོད་གཞི་ཆགས་ཡོད་སྐོར་གསུངས་པ་དང་ཆབས་ཅིག་ཏུ་བོད་མིའི་སྒྲིག་འཛུགས་ཀྱི་ངོས་ནས་དེའི་ཐོག་བཞེངས་ཕྱོགས་གང་ཡོད་དམ་ཞེས་བཀའ་འདྲི་གནང་འདུག

རྒྱ་གར་གཞུང་གིས་རྒྱ་ནག་གི་ WeChat འམ་སྐད་འཕྲིན་གཙོས་མཉེན་ཆས་ལྔ་བཅུ་ང་དགུ་བཀག་སྡོམ་གནང་འདུགཁ་སང་རྒྱ་གར་གཞུང་གིས་རྒྱ་གར་ནང་བཀོལ་སྤྱོད་བྱེད་བཞིན་པའི་རྒྱ་ནག་གི་མཉེན་ཆས་ང་དགུ་ཆེད་འདོན་གྱིས་མཉེན་ཆས་དེ་དག་གིས་རྒྱ་གར་གྱི་ས་ཁོངས་ཀྱི་བདག་དབང་དང་བདེ་འཇགས། དེ་བཞིན་རྒྱལ་སྲུང་སོགས་ལ་གནོད་འཚེ་བཟོ་ཡི་ཡོད་སྐོར་གསུངས་ནས་མཉེན་ཆས་དེ་དག་བཀག་སྡོམ་གནང་རྒྱུའི་སྤྱི་བསྒྲགས་ཤིག་སྤེལ་འདུག གཞི་རྩའི་རྒྱ་གར་ཕྱོགས་ནས་རྒྱ་ནག་གི་མཉེན་ཆས་བཀག་སྡོམ་གནང་བ་དེ་ཉེ་ལམ་རྒྱ་གར་བྱང་ཕྱོགས་ལ་དྭགས་སྤང་གོང་མཚོའི་ཁུལ་དུ་ཆགས་པའི་བོད་དང་རྒྱ་གར་གཉིས་ཀྱི་ས་མཚམས་སུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་བྱུང་རྐྱེན་རྒྱ་གར་གྱི་དམག་མི་ཉི་ཤུའི་ཚེ་སྲོག་ཤོར་བའི་གནད་དོན་ལ་འཁོན་ལན་ཚུལ་དུ་དེ་ལྟར་གནང་བ་ཞིག་ལ་ངོས་འཛིན་གནང་གི་འདུག དཔྱད་ཞིབ་པ་ཁག་ཅིག་གིས་རྒྱ་གར་དང་རྒྱ་ནག་དབར་གྱི་གནས་སྟངས་ཛ་དྲག་ཏུ་འགྲོ་མུས་ལ་ལྟོས་མེད་མཉེན་ཆས་དེ་དག་རྒྱ་གར་ནང་བཀོལ་སྤྱོད་གནང་འཇུག་རྒྱུ་མེད་ཅེས་གསུངས་འདུག རྩ་བའི་མཉེན་ཆས་དེ་དག་བཀག་སྡོམ་གནང་བ་དེས་རྒྱ་ནག་གི་དཔལ་འབྱོར་ལ་གྱོང་གུན་གཏང་གི་ཡོད་སྟབས་སྤྱི་ཚོགས་དྲྭ་ལམ་བརྒྱུད་མང་ཚོགས་དུ་མས་དགའ་བསུ་ཞུས་ཡོད་ཀྱང་། སྐད་འཕྲིན་ལྟ་བུ་ནི་བོད་ཕྱི་ནང་གཉིས་སུ་བཞུགས་པའི་བོད་མིའི་དབར་འབྲེལ་མཐུད་མ་ལག་གཙོ་བོ་ཞིག་ཆགས་ཡོད་པར་བརྟེན་བོད་མི་ཁག་ཅིག་གིས་དེ་འབྲེལ་ཐད་ཐུགས་འཚབ་གནང་གི་འདུག རླུང་འཕྲིན་ཁང་གིས་རྣམ་ཀུན་ནས་སྐད་འཕྲིན་བརྒྱུད་བོད་ནང་ཕ་མ་གཙོས་སྤུན་མཆེད་དང་འབྲེལ་བ་གནང་མཁན་ཁག་ཅིག་ལ་མཉེན་ཆས་བཀག་སྡོམ་ཐོག་དགོངས་འཆར་གང་ཡོད་བཅར་འདྲི་ཞུས་པར་ཁོང་རྣམ་པས་སྤྱིར་བཏང་སྐད་འཕྲིན་འདི་བོད་ནང་འབྲེལ་ལམ་ཞུ་རྒྱུའི་མཉེན་ཆས་སྟབས་བདེ་ཞིག་ཆགས་ཀྱི་ཡོད་པ་རེད། འོན་ཀྱང་ཕྱོགས་གཅིག་ནས་རྒྱ་ནག་གིས་མཉེན་ཆས་དེ་དག་བརྒྱུད་སྒེར་གྱི་གནས་ཚུལ་ཁག་གསང་ཁྱེར་བྱེད་ཀྱི་ཡོད་སྟབས་དེས་སྐབས་རེ་སོ་སོའི་ནང་མི་ཚོར་དཀའ་ངལ་འཕྲད་སྲིད་པར་དོགས་ནས་དངངས་སྐྲག་ཡོང་གི་འདུག་པ་མ་ཟད། ད་རེས་རྒྱ་གར་གཞུང་གིས་རྒྱ་ནག་གི་མཉེན་ཆས་དེ་དག་བཀག་སྡོམ་གནང་རྐྱེན་གཞིས་བཞུགས་ནང་མི་དང་སྤུན་མཆེད་དག་དང་རྒྱང་ཐག་རིང་དུ་འགྲོ་ངེས་ཡིན་པར་བརྟེན་བློ་མི་བདེ་བ་བྱུང་སྐོར་སོགས་གསུངས་ཡོད། དེ་བཞིན་མཉེན་ཆས་བཀག་སྡོམ་གྱི་གནད་དོན་ཐད་བོད་ནང་གནས་བཞུགས་རྩོམ་པ་པོ་ཚེ་རིང་འོད་ཟེར་ལགས་ཀྱིས་ཀྱང་སྤྱི་ཚོགས་དྲྭ་ལམ་ཐོག་བློ་འཚབ་ཀྱི་རྣམ་པ་ཆེད་བཏོན་གནང་འདུག རླུང་འཕྲིན་ཁང་ནས་བོད་དོན་ལས་འགུལ་བསྟི་གནས་ཁང་གི་བརྡ་འཕྲིན་སྲུང་སྐྱོབ་ལས་གཞིའི་འགན་འཛིན་བློ་བཟང་རྒྱ་མཚོ་ལགས་སུ་མཉེན་ཆས་བཀག་སྡོམ་ཐད་དགོངས་འཆར་དང་བྱེས་བཞུགས་བོད་མི་རྣམས་ནས་བོད་ནང་འབྲེལ་བ་གནང་ཕྱོགས་ཐད་ལམ་སྟོན་གང་ཡོད་བཅར་འདྲི་ཞུས་པར་ད་ལན་རྒྱ་གར་གཞུང་གིས་བདེ་འཇགས་ལ་དགོངས་ཏེ་རྒྱ་ནག་གི་མཉེན་ཆས་དེ་དག་བཀག་སྡོམ་གནང་རྒྱུར་ཐུགས་ཐག་བཅད་པ་དེ་འོས་འཚམས་ཤིག་ཡིན་པ་དེ་ལྟར་ཡང་།  སྒོས་སྐད་འཕྲིན་དེའང་བཀག་སྡོམ་གནང་བར་བརྟེན་བཙན་བྱོལ་དུ་གནས་བཞུགས་བོད་མིས་བོད་ནང་འབྲེལ་བ་གནང་རྒྱུར་ངལ་བ་འཕྲད་ཆེར་འགྲོ་རྒྱུ་ཡིན་སྐོར་སོགས་གསུངས་སོང་། རྩ་བའི་རྒྱ་ནག་གི་མཉེན་ཆས་དེ་དག་བརྒྱུད་རྒྱ་ནག་ལ་རྒྱ་གར་ཁོ་ན་ནས་བརྒྱ་ཆ་ ༣༠ དང་ ༤༠ ཙམ་གྱི་དཔལ་འབྱོར་གྱི་ཡོང་འབབ་བྱུང་གི་ཡོད་པ་མ་ཟད།   རྒྱ་ནག་གིས་སྙན་གྲགས་ཆེ་བའི་ Tiktok མཉེན་ཆས་བརྒྱུད་རྒྱ་གར་ནས་ཡོང་འབབ་ཕོན་ཆེ་བྱུང་རྒྱུ་དམིགས་ཡུལ་ཀྱང་ཡོད་པ་རེད།  འོན་ཀྱང་ད་ཆ་རྒྱ་གར་དབུས་གཞུང་ནས་མཉེན་ཆས་དེ་དག་བཀག་སྡོམ་བྱེད་པས་ཐག་གཅོད་དེས་རྒྱ་ནག་གི་དཔལ་འབྱོར་ལ་གྱོང་གུད་ཆེན་པོ་བྱུང་ངེས་ཡིན་པ་བརྗོད་ཀྱི་ཡོད་པ་རེད།  

རྒྱ་ནག་གིས་ཟླ་བ་འདིའི་ནང་། བོད་མཚོ་སྔོན་ཁུལ་དུ་ཁོར་ཡུག་སྲུང་སྐྱོབ་དང་ཆོས་ལུགས་ཀྱི་བྱེད་སྒོ་རྣམས་དངུལ་གསོག་སྒྲུབ་སོགས་ཚོང་གི་ངོ་བོར་བསྒྱུར་མི་ཆོག་པའི་དྲིལ་བསྒྲགས་ཀྱི་འོག་ནས།  བོད་མཐོ་སྒང་དུ་ལོ་ངོ་སྟོང་ཕྲག་གི་རིང་ལ་ལག་བསྟར་བྱས་ནས་ཡོང་བའི་ཆོས་ལུགས་ཀྱི་བྱེད་སྒོ་མཚོན་བྱེད་དང་མི་མང་གི་དད་རྟེན་དུ་གྱུར་བའི་དར་ལྕོག་དང་མ་ཎི་རྡོ་བརྐོས། དེ་བཞིན་མཆོད་རྟེན་སོགས་རྩ་གཏོང་གཏོང་དགོས་བའི་བྱ་འགུལ་སྤེལ་བཞིན་འདུག དེ་རིང་འདི་གའི་རླུང་འཕྲིན་ཁང་ལ་བོད་ནང་གསར་འགྱུར་འབྱོར་བ་ལྟར་ན།  ད་ཆ་རྒྱ་ནག་གིས་ས་བགོས་བྱས་པའི་མཚོ་སྔོན་ཞིང་ཆེན། མཚོ་ལྷོ་བོད་རིགས་རང་སྐྱོང་ཁུལ། བྲག་དཀར་རྫོང་། དཔལ་ཁ་གྲོང་བརྡལ་དུ་རྒྱ་ནག་དམར་ཤོག་གིས་རྩ་འཛུགས་བྱས་པའི་བོད་རིགས་ཏང་ཡོན་པའམ། གྲོང་རྡལ་གྱི་ཞིང་འབྲོག་དམར་ཤོག་ཚོགས་མི་རྣམས་ལ་གོང་རིམ་ནས་མངགས་བཅོལ་བྱས་པ་ལྟར་ན།  དཔལ་ཁ་གྲོང་བརྡལ་ནས་བྲག་དཀར་སྤྲེལ་རྫོང་གི་དགོན་པའི་བར་གྱི་ལམ་གཞུང་གང་སར།  མ་ཎི་རྡོ་བརྐོས་དང་དར་ལྕོག་དང་། དེ་བཞིན་མཆོན་རྟེན་སོགས་ནང་པའི་ཆོས་ལུགས་ཀྱི་མཚོན་བྱེད་ལྡན་པའི་བྱ་འགུལ་གྱི་རིགས་གང་ཡང་སྤེལ་མི་ཆོག་པ་མ་ཟད། རི་སྒང་དུ་ཡང་མ་ཎི་རྡོ་བརྐོས་དང་དར་ལྕོག་སོགས་གཙང་བཟོ་བྱེད་དགོས་བར་མངགས་ཡོད་འདུག གནས་ཚུལ་མཁོ་སྤྲོད་པས་གསུངས་བ་ལྟར་ན།  དཔལ་ཁ་གྲོང་བརྡལ་གྱི་ཡུལ་མི་རྣམས་ཀྱིས་གང་མགྱོགས་ལམ་ཁ་གང་སར་ཡོད་པའི་ཆོས་ལུགས་མཚོན་བྱེད་རྣམས་གཙང་བཟོ་བྱེད་དགོས་བ་དང་། མི་འགྱངས་བར་རྒྱ་ནག་གི་གོང་རིམ་དཔོན་རིགས་དཔལ་ཁ་གྲོང་བརྡལ་ལ་་ཆེད་དུ་བརྟག་དཔྱད་བྱེད་རྒྱུར་ཡོང་རྒྱུ་ཡིན་པར་བསྒྲགས་ཡོད་སྟབས། ཡུལ་མིའི་གྲུབ་པའི་ཚོགས་པ་ཞིག་གིས། གང་མགྱོགས་སྤྱི་ལེ་བརྒྱ་ཙམ་གྱིས་ཆོད་པའི་ལམ་ཁའི་གཡས་གཡོན་གྱི་དར་ལྕོག་དང་མི་ཎི་རྡོ་འབུམ་སོགས་གཙང་བཟོ་བྱེད་པར་གྲ་སྒྲིག་བྱེད་ཀྱི་ཡོད་པར་ངོ་སྤྲོད་གནང་བ་དང་སྦྲགས།  མཚོ་སྔོན་པོའི་གཡས་གཡོན་དུ་ལས་འགུལ་དེ་དངོས་སུ་ལག་བསྟར་གྱིས་གཙང་བཟོ་བྱས་ཟིན་ཡོད་པར་ངོ་སྤྲོད་གནང་སོང་།གཞན་ཡང་ཁོང་གིས།  གཞི་རྩའི་རྒྱ་ནག་གི་དྲིལ་བསྒྲགས་ཀྱི་ངོ་བོར་བལྟས་ན། ཁོར་ཡུག་སྲུང་སྐྱོབ་དང་ཆོས་ལུགས་ཚོང་བསྒྱུར་བྱེད་མི་ཆོག་པའི་སྐད་ཆ་སྙན་པོ་ཞིག་བཤད་བཞིན་ཡོད་ནའང་། དོན་དུ་བོད་མི་རིགས་ཀྱི་ལོ་ངོ་སྟོང་ཕྲག་གི་ལོ་རྒྱུས་ལྡན་པའི་ཆོས་ལུགས་རིག་གནས་གནས་ཀྱི་སྣང་ཚུལ་ཞིག་རྩ་གཏོར་གཏོང་གི་ཡོད་པ་དེ་རེད།  གོང་རིམ་ནས་སྲིད་གཞུང་གི་བཀའ་སླེབས་དུས། མི་མང་ལ་དབང་ཆ་མེད་སྟབས་གོང་རིམ་གྱི་གོ་སྒྲིག་ལྟར་གང་མགྱོགས་དཔལ་ཁ་གྲོང་བརྡལ་ནས་བྲག་དཀར་སྤྲེལ་རྫོང་བར་གྱི་ལམ་ཟུར་ཁག་དངོས་སུ་གཙང་བཟོ་བྱེད་རྒྱུ་ཡིན་པར་ངོ་སྤྲོད་གནང་སོང་། དེ་བཞིན། ཁ་སང་རླུང་འཕྲིན་ཁང་གི་རྒྱ་ཡིག་སྡེ་ཚན་ལ་ཡང་བོད་ཁུལ་གྱི་གནས་ཚུལ་མཁོ་སྤྲོད་བྱེད་མཁན་ཞིག་གིས་ཀྱང་། ད་ཆ་མགོ་ལོག་བོད་རིགས་རང་སྐྱོང་ཁུལ་དུ་ཡང་རྒྱ་ནག་གིས་བཙན་བཀའ་བཏང་ནས། མ་ཎི་དར་ལྕོག་སོགས་གཙང་བཟོ་བྱེད་དགོས་ལུགས་ཀྱི་དྲིལ་བསྒྲགས་སྤེལ་ཡོད་ལུགས་ངོ་སྤྲོད་གནང་ཡོད་པ་རེད།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ནས་རྒྱ་ནག་གཞུང་གིས་བོད་དང་ཧོང། དེ་བཞིན་ཤར་ཏུར་ཀི་སི་ཐན་བཅས་ནང་མང་ཚོགས་ཐོག་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ལ་བློ་འཚབ་ཀྱི་རྣམ་པ་ཆེས་ཆེར་ཆེད་འདོན་དང་འབྲེལ། རྒྱལ་ཚོགས་ཀྱི་ངོས་ནས་རྒྱ་ནག་ཐོག་ཕྱོགས་ལྷུང་མེད་པའི་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་དགོས་ཞེས་གསུངས་འདུགསུད་སི་ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༤ པ་འཚོགས་ལ་ཉེ་བ་དང་བསྟུན་ཟླ་བ་འདིའི་ཕྱི་ཚེས་ ༢༦ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ཡི་ཁེ་ལས་རྟོག་ཞིབ་མི་སྣ་ ༥༠ མན་མཉམ་འཐུས་ཀྱིས་རྒྱ་ནག་ཐོག་དམིགས་བསལ་སྤྱིར་བསྒྲགས་སྤེལ་འདུག་པ་དང། སྤྱིར་བསྒྲགས་ཐོག་དམིགས་བསལ་ཁེ་ལས་རྟོག་ཞིབ་མི་སྣ་རྣམས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་ཚོགས་མི་རྒྱལ་ཁབ་ཁག་ལ་རྒྱ་ནག་གཞུང་གི་མངའ་འོག་ཏུ་ཡོད་པའི་བོད་རང་སྐྱོང་ལྗོངས་མངའ་ཁུལ་དང་ཤར་ཏུར་ཀི་སི་ཐན་རང་སྐྱོང་ལྗོངས་མངའ་ཁུལ། དེ་བཞིན་ཧོང་ཀོང་བཅས་ཀྱི་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་ཆེད་དུ་དགོས་འདུན་དོན་ཚན་གསུམ་ཅན་ཞིག་ཆེད་འདོན་གནང་འདུག དགོས་འདུན་དོན་ཚན་གསུམ་ཅན་དེའི་ནང་རྒྱ་གཞུང་གིས་གོང་གསལ་ས་ཁུལ་དེ་དག་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་རྡོག་རོལ་གཏོང་བཞིན་པའི་གནད་དོན་ཐོག་རྒྱལ་ཚོགས་ཀྱིས་བསྐྱར་ཞིབ་གནང་སྟེ་རྒྱ་ནག་རང་གི་ཐོག་དམིགས་བསལ་གྱི་ཚོགས་དུས་རྒྱལ་ཚོགས་ཀྱི་ངོས་ནས་བསྐོང་ཚོགས་གནང་དགོས་པ་དང། རྒྱལ་ཚོགས་ནས་རྒྱ་ནག་ཐོག་ཕྱོགས་ལྷུང་མེད་པའི་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་བྱེད་དགོས་པ། དམིགས་བསལ་ཁེ་ལས་རྟོག་ཞིབ་མི་སྣ་འམ་དམིགས་བསལ་ཁེ་ལས་རྟོག་ཞིབ་ཚོགས་ཆུང། དེ་བཞིན་དམིགས་བསལ་ཁེ་ལས་སྐུ་ཚབ་བཅས་ཀྱི་ཆེད་འཛུགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་སྤྱི་དང་རྒྱ་ནག་གིས་དབྱེ་བའི་བོད་རང་ལྗོངས་དང་ཤར་ཏུར་ཀི་སི་ཐན་མངའ་ཁུལ། དེ་བཞིན་ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཡོད་པའི་ས་ཁུལ་ཐོག་ལྟ་ཞིབ་དང་ཞིབ་འཇུག་གྱི་ལོ་འཁོར་སྙན་ཐོ་འདོན་སྤེལ་དགོས་པ། རྒྱལ་ཚོགས་ཀྱི་ཚོགས་མི་རྒྱལ་ཁབ་དང་འབྲེལ་ཡོད་ལས་ཁུངས་ཁག་གི་རྒྱ་ནག་དང་ལྷན་དུ་འབྲེལ་མོལ་བྱེད་པའི་སྐབས་རྒྱ་ནག་གི་ངོས་ནས་དེ་སྔ་འགྲོ་བ་མིའི་ཐོབ་ཐང་སྲུང་སྐྱོབ་ཞུ་རྒྱུར་ཁས་ལེན་གྱི་འབྲུ་དོན་ཁག་ལག་བསྟར་བྱེད་བཅུག་དགོས་ཞེས་འཁོད་འདུག སྤྱིར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་མི་སྣའི་སྡེ་ཚན་ཁག་ཤས་ཀྱིས་རྒྱུན་དུ་རྒྱ་ནག་གཞུང་ལ་འགྲོ་བ་མིའི་ཐོབ་ཐང་གནས་སྟངས་ཐོག་འདྲི་རྩད་དང་སེམས་འཚབ་དང་འབྲེལ་བའི་སྤྱིར་བསྒྲགས་རིགས་སྤེལ་གྱི་ཡོད་ཀྱང་། གནད་དོན་དབྱེ་ཞིབ་པ་ཚོས་ཐེངས་འདིའི་རྒྱལ་ཚོགས་ཀྱི་དམིགས་བསལ་ཁེ་ལས་དམིགས་བསལ་རྟོག་ཞིབ་སྡེ་ཚན་ཁག་ ༣༠ ནས་རྒྱ་ནག་ཐོག་མཉམ་འཐུས་ཀྱིས་སྤྱིར་བསྒྲགས་སྤེལ་ཏེ་དགོས་འདུན་བཏོན་པ་འདི་ནི་བྱུང་མྱོང་མེད་པའི་གནས་ཚུལ་ཞིག་ཆགས་ཡོད་པར་འགྲེལ་བརྗོད་གནང་བཞིན་འདུག དེ་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁེ་ལས་རྟོག་ཞིབ་པ་རྣམས་ནས་སྤེལ་བའི་སྤྱིར་བསྒྲགས་ནང་རྒྱ་ནག་གཞུང་གིས་བོད་དང་ཧོ་ཀོང་ཤར་ཏུར་ཀི་སི་ཐན་ནང་མང་ཚོགས་ཐོག་དྲག་གནོན་དང་ཆོས་དད་རང་དབང་རྡོག་རོལ། འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་རྣམས་འཛིན་བཟུང་བཀག་ཉར། དེ་བཞིན་རྒྱ་གཞུང་གིས་རྒྱ་ནག་ནས་ཐོན་པའི་ཏོག་དབྱིབས་གཉན་རིམས་ ༡༩ དང་འབྲེལ་དངོས་ཡོད་གནས་ཚུལ་ཕྱིར་གྱར་བྱེད་མཁན་གྱི་སྨན་པ་དང་གསར་འགོད་པའི་སྨྲ་བརྗོད་རང་དབང་རྡོག་རོལ་བཏང་བའི་གནད་དོན་ཁག་དང་རྒྱལ་ཚོགས་ཁེ་ལས་རྟོག་ཞིབ་མི་སྣས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐོག་ད་བར་འདྲི་རྩད་བྱས་པ་ཁག་ལ་ཁས་ལེན་བྱེད་ཀྱི་མེད་པ་སོགས་མངོན་གསལ་གྱིས་རྒྱ་གཞུང་གི་བྱ་སྤྱོད་ཁག་ཐེར་འདོན་གནང་འདུགལྷག་པར་དུ་རྒྱལ་ཚོགས་ཀྱི་དམིགས་བསལ་ཁེ་ལས་རྟོག་ཞིབ་སྡེ་ཚན་ཁག་ནས་རྒྱལ་ཚོགས་ལ་རྒྱ་ནག་སྤྱི་དང་སྒོས་རྒྱ་ནག་གི་མངའ་འོག་ཏུ་ཡོད་པའི་བོད་དང་ཧོང་ཀོང། དེ་བཞིན་ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་བསྐྱར་ཞིབ་གནང་རྒྱུའི་དུས་ལ་བབ་འདུག་ཅེས་བརྗོད་པ་མ་ཟད། རྒྱལ་ཚོགས་དང་རྒྱལ་སྤྱིའི་གཞུང་སྒེར་ཚོགས་སྡེ་ཁག་ནས་རྒྱ་ནག་གཞུང་གི་ངོས་ནས་ཁས་ལེན་བྱས་པའི་རྒྱལ་སྤྱིའིའགྲོ་བ་མིའི་ཐོབ་ཐང་སྲུང་སྐྱོབ་ཀྱི་འབྲུ་དོན་ཁག་དོན་འཁྱོལ་ལག་བསྟར་བྱེད་དགོས་ཞེས་ནན་བརྗོད་ཀྱང་གནང་འདུགཐེངས་འདིའི་རྒྱལ་ཚོགས་ཀྱི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ཡིས་རྒྱ་ནག་ཐོག་སྤེལ་བའི་བསྒྲགས་གཏམ་འདིར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱབ་སྐྱོར་དང་འབྲེལ་དགའ་བསུའི་བསྒྲགས་གཏམ་ཞིག་སྤེལ་དང་འབྲེལ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ངོས་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་བཏང་བའི་གནད་དོན་ཐོག་དམིགས་བསལ་ཚོགས་དུས་ཤིག་འཚོགས་དགོས་པའི་རེ་འདུན་གནང་འདུག

འཇར་འཁོད་བོད་རིགས་ཚོགས་པའི་ངོས་ནས་འཇར་མི་ནི་གཞུང་མང་གཉིས་ཀྱིས་ལ་བོད་ནང་གི་དངོས་ཡོད་གནས་སྟངས་ར་སྤྲོད་དང་རྒྱ་གཞུང་གིས་གདོང་རིས་དང་བྱ་སྤྱོད་ངོ་མ་ཐེར་འདོན་གནང་རྒྱུ་དང་འབྲེལ་དགོས་འདུན་དོན་ཚན་དྲུག་ཅན་ཞིག་གི་ཐོག་དེ་རིང་ཕྱི་ཚེས་༢༩  སྔ་དྲོ་ཡོ་རོབ་རྒྱལ་ཁབ་འཇར་མན་གྱི་རྒྱལ་ས་རྙིང་པ་ Bonn ནས་འཇར་མཱ་ནི་རྒྱལ་ས་ Berlin བར་བོད་དོན་གོ་རྟོགས་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་ཞིག་དབུ་འཛུགས་གནང་འདུག འཇར་འཁོད་བོད་རིགས་ཚོགས་པའི་ཚོགས་གཙོ་བློ་བཟང་ཕུན་ཚོགས་ཀྱིས་རླུང་འཕྲིན་ཁང་ལ་འགྲེལ་བརྗོད་གནང་གསལ་ད་ལན་བོད་དོན་རྐང་འཁོར་སྐྱོད་ལས་འགུལ་ཁྲོད་ཁུལ་དེའི་ནང་བོད་མི་རྣམས་ནས་འཇར་མན་གཞུང་མང་གཉིས་ལ་ཞུ་གཏུག་གནང་རྒྱུའི་དགོས་དོན་དྲུག་ནི་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་རྒྱུའི་ལམ་སྲོལ་དང་དེ་བཞིན་བོད་མིའི་ཆོས་དད་རང་དབང་ཐོག་རྒྱ་གཞུང་ལ་ཐེ་བྱུས་བྱ་རྒྱུའི་ཐོབ་ཐང་མེད་པའི་གྲོས་ཆོད་ཅིག་འཇར་མན་གྲོས་ཚོགས་ནང་གཏན་འབེབས་གནང་དགོས་པ་དང། རྒྱ་ནག་གཞུང་ནས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་༸སྐུ་དངོས་གང་དུ་བཞུགས་ཡོད་མེད་ཡོངས་ཁྱབ་ཞུ་དགོས་པ། བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་དགོས་པ། འཇར་མན་གྲོས་ཚོགས་ནས་རྒྱ་ནག་ནང་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་གནང་དགོས་པ། གཉིས་སྨན་དབུ་མའི་ལམ་གྱི་ཐོག་༸གོང་ས་མཆོག་གི་སྐུ་ཚབ་ལྷན་དུ་གྲོས་མོལ་གནང་བར་རྒྱ་ནག་གཞུང་ལ་ཤུགས་གནོན་སྤྲོད་དགོས་པ། རྒྱ་གཞུང་གིས་བོད་ནང་བཟང་ཕྱོགས་ཀྱི་འགྱུར་བ་མ་གཏང་ཚེ་རྒྱ་ནག་དང་མཉམ་དུ་ཚོང་འབྲེལ་མཚམས་འཇོག་དགོས་པ། དེ་བཞིན་རྒྱ་ནག་ནས་བྱུང་བའི་ཏོག་དབྱིབས་གཉན་རིམས་རྐྱེན་གྱིས་འཛམ་གླིང་ཡོངས་ལ་གོད་ཆག་ཕོག་པའི་རྒྱུ་རྐྱེན་རྒྱ་ནག་ཡིན་པ་ར་སྤྲོད་གནང་དགོས་པ་བཅས་ཆེད་བཀོད་གནང་འདུགཐེངས་འདི་འཇར་མན་གྲོང་ཁྱེར་ Bonn ནས་རྒྱལ་ས་ Berlin བར་རྒྱང་ཐག་སྤྱི་ལེ་༧༠༠ མན་ཙམ་གྱི་སྐོར་སྐྱོད་ཁྲོད་བོད་དོན་རྐང་འཁོར་སྐོར་སྐྱོད་བ་རྣམས་ནས་ཁུལ་དེའི་མངའ་སྡེ་ཆེ་ཁག་བཞི་དང་གྲོང་ཁྱེར་ཆེ་ཁག་གསུམ། དེ་བཞིན་གྲོང་རྡལ་ཁག་ ༢༥ ལྷག་དང་གྲོང་སྡེ་ལས་ཁུངས། འཇར་མན་གྱི་སྲིད་བློན་གཙོས་གནད་ཡོད་མི་སྣ་དང་བློན་ཆེན་ལས་ཁུངས། གྲོས་ཚོགས་ཚོགས་གཙོ་གཙོས་འཐུས་མི་རྣམས་ལ་གོང་གསལ་དགོས་འདུན་དོན་ཚན་དྲུག་ལ་རྒྱབ་སྐྱོར་གྱི་ཞུ་གཏུག་ཞུ་རྒྱུ་རེད་འདུག སྤྱིར་ཁོང་རྣམས་ནས་བོད་དོན་རྐང་འཁོར་སྐྱོད་ཀྱི་ལས་འགུལ་དེ་དེ་རིང་ཕྱི་ཚེས་ ༢༩ ནས་དབུ་འཛུགས་ཀྱིས་རིང་མིན་ཕྱི་ཟླ་ ༧ ཚེས་ ༦ ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ཉིན་མོར་འཇར་མན་གྱི་རྒྱལ་ས་ Berlin སྲིད་བློན་ལས་ཁུངས་ཀྱི་མདུན་དུ་ལས་ལས་འགུལ་མཇུག་སྒྲིལ་གནང་རྒྱུ་དང་འདི་བཞིན་ཉིན་མོར་དེར་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་གཏན་འཁེལ་འདུག    

དེ་རིང་ཟླ་ ༦ ཚེས་ ༢༦ ཉིན་མོ་འདི་མཉམ་འབྲེལ་རྒྱལ་ཚོགས་ནས་གཏན་འབེབས་གནང་བའི་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ཡིན་པ་དང་བསྟུན་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཚ་མོ་ཉི་མ་ལྷ་མོ་ལགས་ཀྱིས་བརྙན་ཐུང་བརྒྱུད་དེ་རྒྱལ་སྤྱིའི་ཚོགས་སྡེ་ཁག་ལ་ཁོ་མོའི་ཨ་ཞང་བཙོན་ཁང་ནང་གློ་བུར་དུ་དགོངས་པ་རྫོགས་པའི་གནད་དོན་ཐད་ཞིབ་འཇུག་མཐིལ་ཕྱིན་གནང་ཕྱིར་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་འདུགརྒྱལ་ཚོགས་ནས་ལོ་ལྟར་ཕྱི་ཟླ་ ༦ ཚེས་ ༢༦ ཉིན་མོ་དེ་རྒྱལ་སྤྱིའི་མནར་གཅོད་འགོག་རྒོལ་གྱི་དུས་ཚིགས་སུ་སྲུང་བརྩི་ཞུས་ནས་འཛམ་གླིང་ས་ཕྱོགས་གང་སར་སྡུག་སྦྱོང་མནར་གཅོད་མྱངས་དང་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་དང་མནར་གཅོད་ཀྱི་བྱ་སྤྱོད་ལ་ཁྲིམས་འགལ་ཡིན་པར་ངོས་འཛིན་གྱིས་མཐའ་གཅིག་ཏུ་ངོ་རྒོལ་གནང་བཞིན་ཡོད་པ་ལྟར་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལགས་ཀྱིས་རྒྱལ་སྤྱིའི་ཚོགས་སྡེ་ཁག་ལ་རིན་པོ་ཆེ་སྐུ་གྲོངས་རྐྱེན་ཐད་ཞིབ་འཇུག་མཐིལ་ཕྱིན་པ་གནང་དགོས་པའི་རེ་སྐུལ་གནང་བའི་བརྙན་ཐུང་ཞིག་འདོན་སྤེལ་གནང་བ་བརྒྱུད་ནས་རྒྱ་གཞུང་གིས་བོད་ནང་ངན་བྱུས་ཀྱི་རྣམ་པ་འདྲ་མིན་ཐོག་ནས་བོད་མིར་མི་སྤྱོད་ལས་འདས་པའི་མནར་གཅོད་བཏང་དང་གཏོང་བཞིན་པར་སྐྱོན་བརྗོད་ཤུགས་ཆེ་གནང་འདུག ལྷག་པར་དུ་རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་དང་འབྲེལ་བོད་མི་གང་བྱུང་འཛིན་བཟུང་བཀག་ཉར་དང་དུས་ཡུན་རིང་པོར་ཁྲིམས་འགལ་བཀག་སྐྱིལ་བྱས་ཏེ་བཙན་དབང་གིས་ཉེས་འཛུགས་ཁས་ལེན་འཇུག་གི་ཡོད་པ་མ་ཟད་བོད་མི་ཆབ་སྲིད་བཙོན་པ་རྣམས་ལ་དྲང་བདེན་གྱི་ཁྲིམས་ཞིབ་མེད་པའི་ཁར་མི་སྤྱོད་ལས་འདས་པའི་ཉེས་རྡུང་ཚད་མེད་བཏང་བའི་དབང་གིས་མཐར་གཟུགས་པོ་ནད་གཅོང་དུ་གྱུར་ནས་འདས་གྲོངས་སུ་གྱུར་བ་དང་མང་ཆེ་བ་ཛ་དྲག་གནས་སྟངས་འོག་བཙོན་འཇུག་དུས་ཡུན་མ་ཚང་གོང་དུ་བཙོན་གྲོལ་བཏང་ཡོད་པ་མངོན་གསལ་གནང་འདུགདེ་རིང་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་དང་བསྟུན་ཉི་མ་ལྷ་མོ་ལགས་ཀྱིས་འདོན་སྤེལ་གནང་བའི་བརྙན་ཐུང་ནང་ཁོང་གིས་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ནི་མི་མང་པོས་དད་གུས་ཞུ་ཡུལ་གྱི་བླ་མ་ཞིག་ཡིན་པ་དང་། ཁོང་ནི་རྒྱ་གཞུང་གིས་ཚེ་བཙོན་ཁྲིམས་ཐག་བཅད་དེ་བཙོན་ཁང་དུ་མི་ལོ་ ༡༣ རིང་བཞུགས་སྐབས་གློ་བུར་དུ་སྐུ་གྲོངས་ཡོད་པ་དང་ཕྱིས་སུ་རིན་པོ་ཆེའི་སློབ་མ་བློ་བཟང་དོན་གྲུབ་ལགས་ཀྱང་གནད་དོན་དེ་འབྲེལ་ཐོག་ཟླ་བ་བརྒྱད་ཙམ་རིང་དོ་དམ་བཀག་ཉར་གྱིས་སྡུག་སྦྱོང་མནར་གཅོད་མང་དག་ཅིག་བཏང་ནས་མཐར་སྲོག་ཐོག་བཏང་ཡོད་པ་མ་ཟད། གནད་དོན་དེ་འབྲེལ་རྐྱེན་པས་བོད་མི་མང་དག་ཅིག་བཙོན་ལ་ཚུད་པ་དང་དེ་བཞིན་མང་དག་ཅིག་གིས་རྒྱ་གཞུང་ལ་དྲང་བདེན་གྱི་ཁྲིམས་བཤེར་ཡོང་སླད་འབོད་སྐུལ་ཞུ་གང་ཐུབ་གནང་ཡོད་ཀྱང་རྒྱ་གཞུང་གིས་དེར་ངོས་ལེན་མེད་པར་རིན་པོ་ཆེ་དགོངས་པ་རྫོགས་རྐྱེན་ལ་བརྟག་དཔྱད་གནང་དབང་སྤྲད་མེད་པ་མ་ཟད་སྐུ་གྲོངས་པའི་དཔང་ཡིག་ཚད་ལྡན་མེད་ཀྱང་། ཚང་མས་རིན་པོ་ཆེ་མཆོག་སྐུ་གྲོངས་རྐྱེན་ཐད་ཞིབ་འཇུག་མཐིལ་ཕྱིན་གནང་བར་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་འདུགལྷག་དོན་ལོ་ངོ་ ༢༥ ལྷག་གི་རིང་ལ་རྒྱ་གཞུང་གིས་འཛིན་བཟུང་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་བོད་མིའི་ཆབ་སྲིད་བཙོན་པ་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མི་ཆབ་སྲིད་བཙོན་པ་རྒྱ་ནག་གཞུང་གི་བཙན་དབང་འོག་ནས་གང་མགྱོགས་གློད་བཀྲོལ་ཡོང་ཐབས་སུ་ཚང་མས་ཤུགས་གནོན་འཕར་མ་གནང་དགོས་པ་གསུངས་འདུག

ཁེ་ན་ཌའི་གྲོས་ཚོགས་གོང་མའི་འཐུས་མི་ ༡༣ ཡིས་ཡུལ་དེའི་སྲིད་བློན་ Justin Trudeau མཆོག་གིས་མཚན་ཐོག་ལ་ཕྱག་ཡིག་ཞིག་ཕུལ་བ་བརྒྱུད་བོད་མི་དང་ཧོང་ཀོང་། ཡུ་གུར་བའི་ཐོག་དྲག་གནོན་བྱེད་མཁན་རྒྱ་ནག་གི་དཔོན་རིགས་རྣམས་ལ་ Global Magnitsky Act ཞེས་པའི་ཁྲིམས་གཞི་ལག་བསྟར་གནང་དགོས་གསུངས་འདུག རྩ་བའི་ Global Magnitsky Act ཞེས་པའི་ཁྲིམས་འཆར་དེ་དེ་སྔ་ཨུ་རུ་སུ་ནང་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་ལྐོག་ས་རུལ་སུངས་དང་དེ་བཞིན་མང་ཚོགས་ཀྱི་དངུལ་རྐུ་འཁྱེར་གྱི་བྱ་སྤྱོད་ཐེར་འདོན་གནང་མཁན་ཡུལ་དེའི་ཁྲལ་བསྡུའི་སློབ་སྟོན་པ་ Sergei Magnitsky ལགས་ཕྱི་ལོ་ ༢༠༠༨ ལོར་འཛིན་བཟུང་རྗེས་ ༢༠༠༩ ལོར་ཁོང་བཙོན་ཁང་ནང་དུ་སྐུ་གྲོངས་བའི་གནད་དོན་དང་འབྲེལ། དེ་ལྟར་བྱེད་མཁན་ཨ་རིའི་དཔོན་རིགས་རྣམས་ལ་ཉེས་ཆད་གཅོད་ཕྱིར་སྲིད་འཛིན་གོང་མ་ Obama མཆོག་གིས་ཕྱི་ལོ་ ༢༠༡༢ ལོར་ཁྲིམས་གཞིར་གཏན་འབེབས་གནང་བ་ཞིག་དང་ཕྱི་ལོ་ ༢༠༡༦ རྗེས་སུ་ཁྲིམས་གཞི་དེ་རྒྱལ་སྤྱི་ཁྱོན་ཡོངས་སུ་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་དཔོན་རིགས་ཀུན་ལ་ཁྱབ་ཡོད་པ་རེད་འདུགཁ་སང་ཕྱི་ཚེས་ ༢༣ ཉིན་ཁེ་ན་ཌའི་གྲོས་ཚོགས་གོང་མའི་འཐུས་མི་ ༡༣ ནས་ཡུལ་དེའི་སྲིད་བློན་མཆོག་གིས་མཚན་ཐོག་ལ་ཕུལ་བའི་ཕྱག་ཡིག་ནང་རྒྱ་ནག་གཞུང་གིས་ཧོང་ཀོང་ཞི་རྒོལ་བ་རྣམས་ཀྱི་འགྲོ་བ་མིའི་ཐོབ་ཐང་དང་དྲང་བདེན་གྱི་རིན་ཐང་བཅས་ལ་བརྩི་མེད་བཏང་བ་མ་ཟད། ཤིན་ཅང་ནང་དུ་ཁ་ཆེའི་གྲངས་ཉུང་མི་རིགས་ཐོག་དྲག་གནོན་ཁྲོད་མི་ས་ཡ་ ༢ ནས་ ༣ བར་འཛིན་བཟུང་བཀག་ཉར་བྱས་པ། དེ་བཞིན་ལོ་ངོ་བཅུ་ཕྲག་མང་པོའི་སྔོན་ནས་བོད་མིའི་ཐོག་དྲག་གནོན་བྱེད་བཞིན་པའི་བྱ་སྤྱོད་རྣམས་ལུང་འདྲེན་གྱིས་རྒྱ་ནག་གཞུང་གིས་ལོ་ངོ་བཅུ་ཕྲག་མང་པོའི་རིང་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་ཁྲིམས་ཀྱི་དབང་སྒྱུར་བཅས་ལ་བརྩི་མེད་བཏང་བ། དེ་སྔ་ཧོང་ཀོང་ཐད་ཨིན་ཡུལ་དང་ལྷན་དུ་བཞག་པའི་ཆིངས་ཡིག་དང་རྒྱལ་ཚོགས་ཀྱི་གཏན་འབེབས་གནང་བའི་རྒྱལ་སྤྱིའི་ཁྲིམས་བཅས་ལ་བརྩི་མེད་རྡོག་རོལ་གཏོང་བཞིན་ཡོད་པ་བཅས་ལུང་འདྲེན་གནང་འདུག ལྷག་པར་དུ་རྒྱ་གཞུང་གིས་ཁེ་ན་ཌའི་མི་སེར་འཛིན་བཟུང་གིས་ཁོང་རྣམས་ལ་གསང་ཉུང་བའི་ཉེས་མིང་འོག་ཁྲིམས་ཐག་བཅད་པ་དང་ཁེ་ན་ཌའི་ནང་དུའང་ཁུང་རྩིས་སློབ་གླིང་སོགས་རྒྱ་ནག་འཐབ་ཕྱོགས་གཅིག་གྱུར་ལས་ཁུངས་དང་འབྲེལ་བའི་སྒྲིག་འཛུགས་ཁག་གིས་ཁེ་ན་ཌའི་སྤྱི་ཚོགས་དང་མང་ཚོགས་ལ་སྡིགས་ར་སྐུལ་བ་དང་སུན་གཙེར་བཟོ་བ་སོགས་མང་ཚོགས་ཀྱི་ཐོབ་ཐང་བརྩི་མེད་གཏོང་བཞིན་པ་བཅས་ལ་གཞིགས་ནས་ཁེ་ན་ཌ་དེ་རྒྱལ་སྤྱིའི་སྤྱི་ཚོགས་དང་རྒྱལ་ཚོགས་ཀྱི་ཚོགས་མི་རྒྱལ་ཁབ་ཅིག་ཡིན་པ་དང་། རྒྱལ་སྤྱིའི་ཁྲིམས་དང་འགྲོ་བ་མིའི་རིན་ཐང་། དེ་བཞིན་རང་དབང་དང་མང་གཙོ། ཁྲིམས་ཀྱི་དབང་སྒྱུར་བཅས་སྲུང་སྐྱོབ་གནང་དགོས་པ། གཞུང་གི་ངོས་ནས་ Global Magnitsky Act ཞེས་པའི་ཁྲིམས་གཞི་ལག་བསྟར་བརྒྱུད་ཧོང་ཀོང་དང་བོད་བཅས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གྱི་དྲག་གནོན་བྱེད་མཁན་རྒྱ་ནག་གི་དཔོན་རིགས་རྣམས་ཁེ་ན་ཌའི་ནང་ཡོང་མི་ཆོག་པ་དང་ཡུལ་དེའི་ནང་ཡོད་པའི་དཔོན་རིགས་དེ་དག་གི་རྒྱུ་ནོར་རྣམས་གཞུང་བཞེས་གནང་དགོས་པ་གསུངས་འདུག དེའི་ནང་ད་དུང་ཉེ་སྔོན་ཁེ་ན་ཌའི་གྲོས་ཚོགས་ཚོགས་དུས་ ༤༣ པ་དབུ་འབྱེད་ཐོག་སྲིད་སྐྱོང་ལྕམ་ Julie Payette མཆོག་གིས་ཨིན་ཡུལ་རྒྱལ་མོའི་གསུང་འཕྲིན་སྒྲོག་སྦྱང་གནང་བའི་ནང་ཁེ་ན་ཌ་གཞུང་དེ་ཁྲིམས་ཀྱི་སྐྱོང་བའི་རྒྱལ་སྤྱིའི་སྒྲིག་འཛུགས་དེར་དཀའ་ངལ་འཕྲད་སྐབས་ངལ་བ་ལས་སྲུང་སྐྱོབ་ཆེད་དུ་བཞེངས་རྒྱུའི་དམ་བཅའ་ཡོད་པ་ལྟར་ད་ལྟའི་ཆར་རྒྱ་ནག་གི་ངོས་ནས་ཁྲིམས་ཀྱི་སྐྱོང་བའི་རྒྱལ་སྤྱིའི་སྤྱི་ཚོགས་ལ་གནོད་འཚེ་ཆེས་ཆེར་བཟོ་བཞིན་པ་མ་ཟད་རྒྱལ་སྤྱིའི་བདེ་འཇགས་དང་འགྲོ་བ་མིའི་རིགས་ཀུན་ལ་ཉེན་ཁ་བཟོ་བཞིན་ཡོད་སྟབས། ང་ཚོའི་འབོད་སྐུལ་དེ་བཞིན་གཞུང་གི་ལས་འགན་དང་མཐུན་པ་མ་ཟད་ལོ་རྒྱུས་ཐོག་ཁེ་ན་ཌ་འདི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་། མང་གཙོ་དང་ཁྲིམས་ཀྱི་དབང་སྒྱུར་སྲུང་སྐྱོབ་བྱེད་མཁན་གྱི་རྒྱལ་ཁབ་ཅིག་ཡིན་པའི་གནས་བབ་དང་འབྲེལ་གསུངས་ཡོད་སྐོར་དང་ཆབས་ཅིག ད་ཆར་ཁེ་ན་ཌ་གཞུང་རང་གི་བཞེངས་ཕྱོགས་རྒྱུན་འཛིན་གྱིས་རྒྱ་ནག་ཐོག་ Magnitsky ཁྲིམས་གཞི་ལག་བསྟར་གནང་རྒྱུའི་དུས་ལ་བབ་ཡོད་པ་གསུངས་འདུག ཁ་སང་ཁེ་ན་ཌའི་སྲིད་བློན་མཆོག་ལ་ཕྱག་ཡིག་ཕུལ་མཁན་གཙོ་བོ་ནི་གྲོས་ཚོགས་གོང་མའི་འཐུས་མི་སྐུ་ཞབས་ Thanh Hai Ngo ལགས་དང་ Leo Housakos ལགས་གཉིས་ཡིན་པ་དང་གྲོས་ཚོགས་འཐུས་མི་ ༡༡ ནས་རྒྱབ་སྐྱོར་གྱི་མཚན་རྟགས་བསྐྱོན་འདུག དེའི་བར་ན་ཁ་ཉིན་ཕྱེ་ཚེས་ ༢༢ ཉིན་ཡུ་རོབ་མཐུན་ཚོགས་དང་རྒྱ་ནག་དབར་གྱི་འབྲེལ་མོལ་ཚོགས་འདུ་ཐེངས་ ༢༢ པ་དེ་ཏོག་དབྱིབས་རིམས་ནད་ཀྱི་གནས་སྟངས་ཁྲོད་དྲྭ་རྒྱ་བརྒྱུད་ཚོགས་ཡོད་པ་དང་། ལྷན་ཚོགས་དེ་རྒྱ་ནག་གི་སྲིད་བློན་ལི་ཁེ་ཆང་དང་སྲིད་འཛིན་ཞི་ཅིན་ཕིང་གཉིས་དང་། ཡུ་རོབ་སྤྱི་མཐུན་ལྷན་ཁང་གི་གཙོ་འཛིན་ Charles Michel མཆོག་དང་ཡུ་རོབ་མཐུན་ཚོགས་ཀྱི་ཚོགས་གཙོ་ Ursula von der Leyen མཆོག ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་ཁུངས་ཀྱི་འགན་འཛིན་གཞོན་པ་་ Josep Borrell མཆོག་བཅས་གཙོས་ཡུ་རོབ་མཐུན་ཚོགས་ཀྱི་འགོ་ཁྲིད་མི་སྣ་ ༢༧ ནས་ལྷན་ཚོགས་གནང་འདུག ཚོགས་འདུའི་ཐོག་ཡུ་རོབ་མཐུན་ཚོགས་ཀྱི་འགོ་ཁྲིད་རྣམས་ཀྱིས་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང་འགྲོ་བ་མའི་ཐོབ་ཐང་སྲུང་སྐྱོབ་བྱེད་མཁན། དེ་བཞིན་མང་ཚོགས་ཀྱི་གཞི་རྩའི་རང་དབང་ལ་དམ་དྲག་བྱེད་བཞིན་པ་བཅས་ཀྱི་ཐོག་ཐུགས་འཚབ་ཆེན་པོ་ཡོད་པར་འགྲེལ་བརྗོད་གནང་བ་དང་འབྲེལ། རྒྱ་གཞུང་གིས་བཙོན་འཇུག་བྱས་ཡོད་པའི་བོད་མི་འགྲོ་བ་མིའི་ཐོབ་ཐང་ལས་འགུལ་བ་ཁག་ཅིག་གི་གནད་དོན་ཐེར་འདོན་གནང་སྟེ་རིང་མིན་ཏོག་དབྱིབས་རིམས་ནད་ཀྱི་ངལ་བ་སེལ་རྗེས་ཡུ་རོབ་མཐུན་ཚོགས་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཚོགས་འདུ་དེ་འཚོགས་ཐུབ་པའི་རེ་བ་ཡོད་ཅེས་གསུངས་འདུག

ཁ་ཉིན་ཕྱི་ཚེས་ ༢༢ ཉིན་རྒྱ་ནག་གི་བརྒྱུད་ལམ་ཁག་ཏུ་རྒྱ་ནག་ཏུ་ཡོད་པའི་ཡོ་རོབ་རྒྱལ་ཁབ་ཁག་ཅིག་གཙོས་ཨེ་ཤ་ཡའི་རྒྱལ་ཁབ་ཁག་ཅིག་དང་ཨ་རི་སོགས་ཀྱི་གཞུང་ཚབ་མི་སྣ་ ༢༡ ཟི་ཁྲོན་ཞིང་ཆེན་གྱི་ཁྱབ་ཁོངས་ཟུང་ཆུ་དང་གཟི་ཚ་སྡེ་དགུ་གཉིས་ལ་འཚམས་གཟིགས་སུ་བསྐྱོད་པའི་གནས་ཚུལ་སྤེལ་འདུག།ཨ་རིའི་ནང་རྟེན་གཞིར་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་འཚམས་གཟིགས་སུ་ཕེབས་མཁན་དག་ལ་དགའ་བསུ་ཞུ་ཡི་སྐོར་གསུངས་པ་དང་ཆབས་ཅིག ཐེངས་འདིའི་འཚམས་གཟིགས་དེ་བོད་མི་རིགས་ཀྱི་གནས་སྟངས་རྟོབ་ཞིབ་སླད་དུ་ཡིན་སྲིད་ཀྱང་བོད་མི་རིགས་ཀྱི་དངོས་ཡོད་ཀྱི་བདེ་སྡུག་ཤེས་རྟོགས་ཐུབ་རྒྱུ་དཀའ་བའི་གནས་ཡིན་པ་གསལ་པོ་རེད། འཚམས་གཟིགས་སུ་ཕེབས་མཁན་དག་གིས་རྒྱ་ནག་གཞུང་གིས་བོད་ནང་དུ་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་གླེང་སློང་མ་གནང་ཚེ་འཚམས་གཟིགས་དེ་དོན་དམ་གྱི་འཚམས་གཟིགས་ཤིག་ཆགས་ཀྱི་མེད་པར་བརྗོད་འདུགརྒྱལ་སྤྱིའི་བོད་དོན་ལས་འགུལ་ཁང་གིས་ཕྱིའི་རྒྱལ་ཁབ་ཁག་གི་གཞུང་ཚབ་མི་སྣ་བསྐྱོད་སའི་ས་ཁུལ་གཉིས་པོ་ནི་བོད་རང་སྐྱོངས་ལྗོངས་ཟེར་བའི་ཁྱབ་ཁོངས་ཤིག་མིན་པར་ངོ་སྤྲོད་གནང་བ་དང་འབྲེལ། བོད་རང་སྐྱོངས་ལྗོངས་ཟེར་བའི་ས་ཁུལ་དེ་དག་ལ་རྒྱ་ནག་གཞུང་གིས་ཕར་འགྲོ་ཚུར་འོང་ཐད་ལ་བཀག་སྡོམ་ནན་པོ་བྱེད་ཀྱི་ཡོད་པ་མ་ཟད་རྒྱ་ནག་རང་གི་ས་ཁུལ་གཞན་ཁག་ལས་ཆེས་བཀག་སྡོམ་ཆེ་བ་ཡོད་སྐོར་དང་། ཅི་སྟེ་བོད་རང་སྐྱོངས་ལྗོངས་ཟེར་བའི་ཁྱབ་ཁོངས་སུ་ཕྱི་འབྲེལ་དཔོན་རིགས་ཀྱིས་གཙོས་གནད་ཡོད་མི་སྣ་དང་། རྒྱ་ནག་ཏུ་ཡོད་པའི་ཕྱིའི་རྒྱལ་ཁབ་ཁག་གི་གསར་འགོད་པ་ཚོ་རྒྱ་ནག་གཞུང་གིས་ཆོག་མཆན་མེད་པར་བསྐྱོད་ཐུབ་ཀྱི་མེད་པ་མ་ཟད། ཡུལ་སྐོར་བའི་ངོ་བོའི་ཐོག་ནས་བསྐྱོད་ཐབས་བྱེད་ཀྱང་ཆོག་མཆན་ཐོབ་རྒྱུ་ཤིན་ཏུ་ནས་དཀའ་བ་ཞིག་ཡིན་པ་དང་། ཅི་སྟེ་ཆོག་མཆན་ཞིག་ཐོབ་དབང་བྱས་ཀྱང་ཁོང་ཚོར་བལྟ་སྲུང་དང་དམ་དྲག་ནན་པོ་བྱེད་ཀྱི་ཡོད་པར་འགྲེལ་བརྗོད་གནང་འདུག རྩ་བའི་ཟླ་བ་འདིའི་ཚེས་ ༢༢ ཉིན་རྒྱ་ནག་གཞུང་འབྲེལ་བརྒྱུད་ལམ་ཐོག་གནས་ཚུལ་སྤེལ་བ་ལྟར་རྒྱ་ནག་དམར་ཤོག་ཚོགས་པའི་ཕྱི་འབྲེལ་ཚོགས་ཆུང་གི་སྣེ་ཁྲིད་འོག་རྒྱ་ནག་ཏུ་ཡོད་པའི་ཨོ་སི་ཊི་ལི་ཡ་དང་ཨོ་སི་ཊྲི་ཡ། ཕ་རན་སི། འཇར་མ་ནི། ཨིས་རེལ། པ་ཀིས་ཏཱན། པོ་ལན་ཌི། སིངྒྷ་པུར། སུསད་ཛ་ལན་ཌི། དེ་བཞིན་ཨ་རི་སོགས་ཀྱི་གཞུང་ཚབ་མི་སྣ་ ༢༡ ཟླ་བ་འདིའི་ཕྱི་ཚེས་ ༡༧ དང་ ༡༨ ཉིན་ཟི་ཁྲོན་ཞིང་ཆེན་གྱི་ཁྱབ་ཁོངས་ཟུང་ཆུ་དང་གཟི་ཚ་སྡེ་དགུ་གཉིས་ལ་འཚམས་གཟིགས་སུ་སྐྱོད་སྐབས་ཚན་རིག་གི་བསྟི་གནས་དང་། ཡུལ་སྐོར་སྤྲོ་འཆམ་པའི་མྱུར་སྐྱོབ་སྨན་ཁང་། དེ་བཞིན་ཐང་གའི་འགྲེམས་སྟོན་ཁང་སོགས་ལ་འཚམས་གཟིགས་སུ་ཕེབས་ཀྱི་ཡོད་པ་རེད་འདུག འོན་ཀྱང་རྒྱལ་སྤྱིའི་བོད་དོན་ལས་འགུལ་ཁང་གིས་འཚམས་གཟིགས་སུ་བསྐྱོད་པའི་གཞུང་ཚབ་མི་སྣ་དག་གོང་གི་ས་ཚིགས་དེ་དག་ལ་ཕེབས་པ་དེས་བོད་ཀྱི་དངོས་ཡོད་གནས་སྟངས་ཏེ་ཆོད་དད་རང་དབང་གྱི་དཀའ་སྡུག་གཙོས་འགྲོ་འདུག་གི་རང་དབང་དང་། འགྲོ་བ་མིའི་ཐོབ་ཐང་དང་འབྲེལ་བའི་བོད་མི་རྣམས་ནས་མྱོང་བཞིན་པའི་ངལ་ཁག་ཤེསརྟོགས་ཐུབ་ཀྱི་མ་རེད་ཅེས་གསུངས་པ་དང་ཆབས་ཅིག ལས་འགུལ་ཁང་གིས་ཐེངས་འདིའི་འཚམས་གཟིགས་དང་འབྲེལ་གཞུང་ཚབ་མི་སྣ་དག་གི་སྙན་ཐོ་ལ་ངང་སྒུག་གནང་ནས་བཞུགས་ཡོད་ཅེས་འགྲེལ་བརྗོད་གནང་འདུག དེ་བཞིན་རྒྱ་ནག་གཞུང་གིས་འདེམས་སྒྲུག་བྱས་པའི་འཚམས་གཟིགས་སུ་ཕེབས་མཁན་གྱི་གཞུང་ཚབ་མི་སྣ་དག་ནི་རྒྱ་ནག་གཞུང་གི་ལྟ་སྐྱོང་གི་འོག་ཏུ་ཕྱིན་ཡོད་པ་ལས་དངོས་སུ་དཀའ་སྡུག་མྱོང་བཞིན་པའི་བོད་མི་དག་ལ་བཀའ་བསྡུར་གནང་རྒྱུ་གཙོས་བོད་ནང་གི་དངོས་ཡོད་གནས་སྟངས་ལ་རྟོག་ཞིབ་གནང་རྒྱུའི་གོ་སྐབས་མེད་པ་ཞིག་རེད་ཅེས་གསུངས་པ་དང་སྦྲགས། ཐེངས་འདིའི་འཚམས་གཟིགས་དེ་ལས་འགུལ་ཁང་ནས་ཡོ་རོབ་ཀྱི་མི་སེར་རྣམས་བོད་དུ་རང་དབང་གི་སྒོ་ནས་འགྲུལ་སྐྱོད་ཆོག་པའི་སྐོར་ལ་སྙན་ཐོ་ཞིག་འདོན་སྤེལ་ཟིན་རྗེས་བདུན་ཕྲག་གཉིས་ཀྱི་རྗེས་སུ་བྱུང་བ་ཞིག་ཡིན་པ་དང་། སླད་མར་རྒྱལ་ཁབ་གཞན་རྣམས་ཀྱི་འཐུས་ཚབ་རྣམས་འཚམས་གཟིགས་སུ་ཕེབས་སྐབས་བོད་ཀྱི་གནས་སྟངས་ངོ་མ་དེ་ཤེས་རྟོགས་ཐུབ་ཐབས་གནང་དགོས་པ་དང་བོད་ཀྱི་ས་ཁུལ་ནས་རྔ་བ་ལྟ་བུ་མཚོན་ན་རྒྱ་ནག་གཞུང་གིས་དྲག་གནོན་ཆེས་ཆེར་བྱ་ཡུལ་ཞིག་ཆགས་ཡོད་སྟབས་འཚམས་གཟིགས་སུ་ཕེབས་མཁན་དག་གིས་བོད་ནང་གི་ཆོས་དད་རང་དབང་གི་གནས་བབས་གཙོས་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་ཐད་གླེང་སློང་གནང་དགོས་པ་མ་ཟད་རྒྱ་ནག་གཞུང་གིས་བོད་མིར་མི་སྤྱོད་ལས་འདས་པའི་མནར་གཅོད་ཇི་ལྟར་བཏང་དང་གཏོང་བཞིན་པའི་སྙན་ཐོ་འདོན་སྤེལ་གནང་དགོས་པ་བརྗོད་འདུག

རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་དང་ཉིང་ཁྲི་དབར་གྱི་མེ་འཁོར་ལྕགས་ལམ་འཛུགས་སྐྲུན་གྱི་ལས་གཞིའི་འོག་ཟམ་ཆེན་འདྲ་མིན་ ༡༢༠ གསར་རྒྱག་གི་ལས་འཆར་ཡོད་པ་ལྟར་ལས་གཞི་དེའི་ཁྲོད་ཟམ་ཆེན་མཐའ་མ་དེ་ཉེ་ལམ་རེས་གཟའ་སྤེན་པའི་ཉིན་མཇུག་སྒྲིལ་ཟིན་པ་དང་བོད་རང་སྐྱོང་ལྗོངས་ཟེར་བའི་ལྷོ་ཁ་གྲོང་ཁྱེར་རྒྱ་ཚ་རྫོང་ཁོངས་སུ་གསར་རྒྱག་བྱས་པའི་ཟམ་ཆེན་དེ་ནི་རྒྱ་གར་གྱི་ཨ་རུ་ནཱ་ཅལ་མངའ་སྡེ་ནས་རྒྱང་ཐག་སྤྱི་ལེ་ ༣༠ ཙམ་ལས་མེད་པའི་ས་མཚམས་ཁུལ་དུ་ཆགས་ཡོད་པ་རེད་འདུགརྒྱ་གར་གྱི་ The Hindustan Times གསར་ཁང་གིས་གནས་ཚུལ་སྤེལ་བར་འཛུགས་སྐྲུན་གྱི་རྨང་འཛུགས་ཕོན་ཆེར་བཙུགས་པ་བརྒྱུད་བོད་ནས་ཆས་པའི་རྟ་མཆོག་ཁ་འབབ་བམ་ཡར་ཀླུང་གཙང་པོའི་ཆུ་རྒྱུན་ཐོག་ཏུ་གསར་རྒྱག་བྱས་པའི་མེ་འཁོར་བཞུད་ལམ་གྱི་ཟམ་པ་དེའི་རིང་ཚད་ནི་མི་ཊར་ ༥༢༥ ཡོད་པ་དང་འབྲེལ་ཡོད་ཉམས་ཞིབ་པ་རྣམས་ནས་རྒྱ་གཞུང་གིས་ཟམ་པ་དེ་དྲག་པོའི་དམག་དང་སྤྱི་དམངས་གཉིས་ཀའི་ཁེ་ཕན་སླད་བེད་སྤྱོད་བྱ་ངེས་ཡིན་པར་འགྲེལ་བརྗོད་དང་འབྲེལ། ལྷ་ས་དང་ཉིང་ཁྲི་དབར་གྱི་ལྕགས་ལམ་གྱི་ལས་གྲྭ་ཡོངས་སུ་ཟིན་པ་དང་ཆབས་ཅིག ལྕགས་ལམ་དེ་རྒྱ་གར་གྱི་ཨ་རུ་ནཱ་ཅལ་མངའ་སྡེའི་བར་སླེབས་རྒྱུ་ཡིན་སྟབས་དེ་ནི་ཐབས་བྱུས་ཐད་རྒྱ་གར་ལ་གནད་འགག་ཞིག་ཆགས་ཡོད་པ་འགྲེལ་བརྗོད་གནང་འདུགགཞི་རྩའི་ཕྱི་ལོ་ ༢༠༠༦ ལོར་རྒྱ་ནག་གི་སྲིད་འཛིན་ Hu Jintao ཡིས་མཚོ་སྔོན་ཞིང་ཆེན་གྱི་གྲོང་ཁྱེར་ཟི་ལང་ནས་རྒྱལ་ས་ལྷ་སའི་བར་རིང་ཚད་ལ་སྤྱི་ལེ་ ༡༩༥༦ ཡོད་པའི་མེ་འཁོར་ལྕགས་ལམ་ཐོག་མར་ཤར་གཏོང་བྱས་པ་ནས་བཟུང་འཛུགས་སྐྲུན་གྱི་ལས་གཞི་ཞེས་པའི་མིང་བྱང་འོག་ཆུ་གློག་དང་དང་མེ་འཁོར་ལྕགས་ལམ་འཛུགས་སྐྲུན་གྱི་ལས་གཞི་རྒྱ་ཆེར་སྤེལ་ཡོད་པ་ལས་གཙོ་བོ་བོད་ནང་གི་རང་བྱུང་ཐོན་ཁུངས་ཁག་རྒྱ་ནག་ཏུ་འབོར་འདྲེན་བྱེད་རྒྱུ་དང་། བོད་མཐོ་སྒང་དེ་རྒྱ་ནག་གི་ཡུལ་སྐོར་སྤྲོ་འཁྱམ་གྱི་ས་གནས་ཤིག་ཏུ་བསྒྱུར་ནས་རྒྱ་ནག་གི་མི་འབོར་མང་པོ་བོད་ཁུལ་དུ་འབོར་འདྲེན་གྱིས་བོད་མི་རྣམས་རང་ས་ནས་གྲངས་ཉུང་མི་རིགས་སུ་བསྒྱུར་རྒྱུ་ཙམ་དུ་མ་ཟད་བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས་གཙོས་སྐད་ཡིག་དང་བཅས་པ་རྒྱར་བསྒྱུར་བྱེད་རྒྱུ་དམིགས་པ་ཞིག་ཡིན་པ་རེད། ཕྱི་ལོ་ ༢༠༡༤ ལོ་མཇུག་ནས་འཛུགས་སྐྲུན་འགོ་འཛུགས་བྱས་པའི་ལྷ་ས་ནས་ཉིང་ཁྲི་བར་གྱི་མེ་འཁོར་ལྕགས་ལམ་གྱི་ལས་གཞི་དེའི་ཐོག་ལས་མི་ཁྲི་གཉིས་ལྷག་ཙམ་གླ་གཡར་བྱས་ཡོད་པ་དང་ལས་གཞི་དེ་ཕྱི་ལོ་ ༢༠༢༡ ལོར་ཡོངས་སུ་མཇུག་སྒྲིལ་དང་འབྲེལ་བེད་སྤྱོད་བྱ་རྒྱུ་ཡིན་པ་རེད། རྒྱ་ནག་གཞུང་ནས་ལས་གཞི་འདི་དང་འབྲེལ་རྒྱ་ནག་གི་འབྱོར་ལྡན་ཞིང་ཆེན་གཞན་ཁག་ལ་བོད་རང་སྐྱོང་ལྗོངས་དང་ལྷག་པར་ཉིང་ཁྲི་ཁུལ་དུ་མ་རྩ་ཕོན་ཆེ་འཇོག་དགོས་པའི་སྐུལ་དད་བྱེད་བཞིན་པ་མ་ཚད་འདས་པའི་གཟའ་འཁོར་གཉིས་ཙམ་གྱི་གོང་དུ་ཉིང་ཁྲིའི་ནང་གཞུང་ལམ་གསར་རྒྱག་དང་སྤྱི་ཚོགས་ཞབས་ཞུ། དེ་བཞིན་ཡུལ་སྐོར་སྤྲོ་འཆམ་བཅས་དང་འབྲེལ་བའི་འཛུགས་སྐྲུན་ལས་གཞི་ ༢༦ ཙམ་འགོ་འཛུགས་བྱས་ཡོད་པ་རེད།