བོད།

དེ་རིང་ཕྱི་ཟླ་ ༡༡ པའི་ཚེས་ ༩ ཉིན་ནས་་བཟུང་། ཟླ་འདིའི་ཚེས་༡༢ བོར་བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གིས་སྤྱི་ལོ་ ༢༠༡༥ ནས་བཟུང་གོ་སྒྲིག་ཞུ་བཞིན་པའི་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་དྲུག་པ་དེ་དྲྭ་རྒྱ་བརྒྱུད་ནས་དབུ་འཛུགས་གནང་སོང་།

རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་སྔ་དྲོ་ཕྱག་ཚོད་ ༩་དང་༣༠ ཕྱེད་ཀའི་སྟེང་། རྒྱ་དཀར་ནག་གི་ཆེས་མཐོའི་དཔོན་རིགས་དང་དམག་སྤྱིའི་བར་དུ་འཕགས་བོད་ས་མཚམས་ཀྱི་རྙོག་གླེང་དང་འབྲེལ་བའི་གྲས་མོལ་ཐེངས་བརྒྱད་པ་དེ་བྱེད་བཞིན་ཡོད་པ་དང་འབྲེལ་ནས། སྔོན་དཔག་གི་དགོངས་ཚུལ་འདྲ་མིན་སྤེལ་མཁན་བྱུང་བཞིན་པའི་ཁྲོད།    མང་དག་ཅིག་གིས་ཕྱོགས་གཉིས་ཀྱིས་རྒྱ་གར་བྱང་ཕྱོགས་ལ་དྭགས་ཀྱི་ས་མཚམས་ཀྱི་དམག་མི་ཕྱིར་བསྡུ་བྱེད་མི་སྲིད་པ་མ་ཟད།  ད་དུང་དགུན་དུས་དང་འབྲེལ་ནས་གྱོན་གོས་དང་བཟའ་འབྲུ་རིགས་མང་དུ་འབོར་འདྲེན་བྱེད་བཞིན་ཡོད་སྐོར་གསུངས་འདུག  

ཉེ་ཆར་རྒྱ་ནག་རྒྱལ་ས་པེ་ཅིང་དུ་ཚོགས་པའི་སྐབས་ ༡༩ པའི་རྒྱ་ནག་དམར་ཤོགས་ཚོགས་པའི་ཚོགས་འདུ་ཐེངས་ ༥ པའི་ཐོག ཕྱི་ལོ་ ༢༠༢༡ ནས་ ༢༠༢༥ བར་གྱི་ལོ་ལྔ་ཚན་གྱི་འཆར་གཞི་ཐེངས་ ༡༤ པ་དེ་གཏན་འབེབས་ཐོག་གྲོས་བསྡུར་བྱེད་བཞིན་ཡོད་པ་དང་བསྟུན། ཨ་རིའི་ནང་དུ་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་རྒྱ་ནག་གི་ལོ་ལྔ་ཚན་གྱི་འཆར་གཞི་ཐེངས་ ༡༣ པ་སྟེ། ཕྱི་ལོ་ ༢༠༡༦ ནས་ ༢༠༢༠ བར་གྱི་ལོ་ལྔ་ཚན་གྱི་འཆར་གཞི་ལག་བསྟར་ཐོག་ལ་དཔྱད་ཞིབ་གནང་བའི་སྙན་ཐོ་ཞིག་འདོན་སྤེལ་གནང་བའི་ནང་དུ། རྒྱ་ནག་གཞུང་གིས་འདས་པའི་ལོ་ལྔའི་ནང་དུ་བོད་ནང་འཛུགས་སྐྲུན་ཡར་རྒྱས་སོགས་ལ་ཁ་གཡར་ཏེ། ཏཱ་ལའི་ཁ་བྲལ་རུ་ཚོགས་ལ་གདོང་ལེན་ཇེ་ཆེར་བཏང་བ་དང་། དབུལ་ཐར་འཁྲེགས་གཏོར། བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བ། བོད་མི་ཞིང་འབྲོག་མང་ཚོགས་གྲོང་ཁྱེར་ནང་དུ་གནས་སྤོར་སོགས་འཛུགས་སྐྲུན་ཡར་རྒྱས་སོགས་ལས་དམར་ཤོག་ཚོགས་པའི་ཆབ་སྲིད་ཀྱི་དམིགས་ཡུལ་ཤུགས་ཆེ་བ་བསྒྲུབས་ཡོད་པ་མངོན་གསལ་གནང་འདུག

དེ་རིང་་ཕྱི་ལོ་༢༠༢༠ ཕྱི་ཟླ་ ༡༡ ཚེས་ ༥ ཉིན་སྔ་དྲོ་ཚོུད་ ༡༠ པའི་ཐོག་ལྷ་སྤྱི་ཚོགས་ཞབས་ཞུ་ཁང་གི་འཚེ་མེད་ཞི་བའི་ཚོགས་ཁང་དུ་དཔལ་ལྡན་རྒྱུད་སྟོད་གྲྭ་ཚང་དང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གཉིས་ཀྱི་ཟུང་འབྲེལ་གྱིས་གོ་སྒྲིག་ཐོག  བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་ཕྱི་ལུགས་ཀྱི་དགུང་གྲངས་ ༨༡ ལ་ཕེབས་པའི་སྐུའི་ཁྲུངས་ཚེས་སྲུང་རྩི་དང་འབྲེལ། སློབ་དཔོན་མཆོག་གི་རྩ་ཆེའི་གསུང་བཤད་དང་གསུང་རྩོམ་གལ་ཆེ་ཁག་ཕྱོགས་བསྡུས་ཀྱི་དེབ་ཕྲེང་བརྒྱད་པ་དབུ་འབྱེད་དང་འགྲེམས་སྤེལ་གནང་སོང་།

ཨ་རིའི་ཕྱི་སྲིད་ལས་ཁུངས་ཀྱིས་བོད་དང་ཤིན་ཅང་། ཧོང་ཀོང་བཅས་ཀྱི་གནད་དོན་དང་འབྲེལ་རྒྱ་ནག་གཞུང་གི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་སྟེ་ཆོས་དད་རང་དབང་དང་སྨྲ་བརྗོད་རང་དབང་རྡོག་རོལ། དེ་བཞིན་བཙན་དབང་གིས་ངལ་རྩོལ་བསྒྱུར་བཀོད་ཀྱི་སྲིད་བྱུས་སྤེལ་བར་མ་ཟད་གང་བྱུང་དུ་འཛིན་བཟུང་བྱས་པ་སོགས་ཀྱི་གནད་དོན་བཀོད་པའི་དྲྭ་རྒྱ་གསར་པ་ཞིག་ཆེད་བཟོ་གནང་འདུགདྲྭ་རྒྱའི་མདུན་ངོས་སུ་འགྲོ་བ་སྤྱིར་དབང་བའི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ནི་རྒྱལ་ཁབ་སོ་སོའི་འོས་འགན་ཞིག་ཡིན་ཀྱང་། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་དབང་ཆ་གཅིག་བསྡུས་རིང་ལུགས་གཞི་རྩར་བཟུང་བའི་དམར་ཤོག་ཚོགས་པའི་ལྟ་གྲུབ་འོག་དེ་གའི་མི་སེར་གྱི་ཐོབ་ཐང་ཁག་འཕྲོག་པ་དང་། རང་ཉིད་ཀྱི་དབང་ཆ་རྒྱུན་འཛིན་བྱ་རྒྱུར་དམིགས་ཏེ་འཆར་གཞི་ལྡན་པའི་སྒོ་ནས་མང་ཚོགས་ཀྱི་རང་དབང་འཕྲོག་གི་ཡོད་པར་འགྲེལ་བརྗོད་གནང་བ། རྒྱ་ནག་ཏུ་ཡོད་པའི་མི་རིགས་ཚོར་རང་དབང་གི་སྒོ་ནས་རང་གི་འདོད་པ་བཞིན་ཆོས་གནང་བཅུག་གི་མེད་པར་མ་ཟད། གང་བྱུང་འཛིན་བཟུང་དང་དོ་དམ་བཀག་སྐྱིལ་བྱེད་བཞིན་རྐྱེན་བསམ་ཚུལ་འདོད་མོས་བཞིན་བརྗོད་རྒྱུའི་རང་དབང་མེད་པ་དང་། ལྷག་པར་དུ་རྒྱ་གཞུང་གིས་གྲངས་ཉུང་མི་རིགས་ཕོན་ཆེར་བཙན་དབང་གིས་བཙོན་འཇུག་བྱ་རྒྱུ་གཙོས་ཚད་འགལ་གྱི་མནར་གཅོད་གཏང་རྒྱུ་དང་། མྱུ་ཞིབ་བྱ་རྒྱུ། དེ་བཞིན་རྒྱ་གཞུང་གི་ལྟ་སྤྱོད་དང་མཐུན་པའི་སློབ་གསོ་སྤྲོད་རྒྱུ་དང་སྐྱེས་སྒོ་བཀག་པ། བཙན་དབང་གིས་ངལ་རྩོལ་བསྒྱུར་བཀོད་བྱེད་དུ་བཅུག་མུས་ཡིན་པ་བཀོད་འདུག དྲྭ་རྒྱའི་ཐོག་གཙོ་བོ་བོད་དང་ཤིན་ཅང་། ཧོང་ཀོང་བཅས་ཀྱི་གནད་དོན་དང་འབྲེལ་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་བརྩི་འཇོག་བྱེད་ཀྱི་མེད་པ་བརྗོད་བྱ་གཙོ་བོར་བཀོད་ཡོད་པ་དང་། བྱེ་བྲག་ཏུ་བོད་ནང་དམ་དྲག་ཤུགས་ཆེར་བྱེད་བཞིན་པར་མ་ཟད་བཙན་དབང་གིས་ངལ་རྩོལ་བསྒྱུར་བཀོད་དང་སྨྲ་བརྗོད་རང་དབང་འཕྲོག་པ། ཆོས་དད་རང་དབང་ལ་གནོད་སྐྱོན་ཆེས་ཆེར་གཏོང་བ། འཛིན་བཟུང་། དེ་བཞིན་ཤིན་ཅང་དང་ཧོང་ཀོང་ཁུལ་དུ་དྲག་གནོན་བྱས་པ་བཅས་ཀྱི་ནང་ཚན་བརྗོད་གཞི་ཁག་བདུན་གྱི་ཐོག་རྒྱ་ནག་གཞུང་ནས་ རྡོག་རོལ་ཇི་ལྟར་གཏོང་བཞིན་ཡོད་མེད་ཡིག་ཐོག་དང་བརྙན་པར་བརྒྱུད་ཞིབ་བཀོད་གནང་འདུགབོད་ཀྱི་གནད་དོན་དང་འབྲེལ་ནས་ཨ་རིའི་ཕྱི་སྲིད་ལས་ཁུངས་ཀྱི་དྲྭ་གནས་ཐོག་བོད་དོན་དང་འབྲེལ་བའི་སྙན་ཐོ་དང་ཕྱི་ལོ་ ༢༠༡༨ ལོར་གཏན་འབེབས་གནང་བའི་ Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར། དེ་བཞིན་ཁྲིམས་འཆར་དེའི་འོག་ནས་རྒྱ་ནག་གཞུང་གི་དཔོན་རིགས་ལ་མཐོང་མཆན་སྤྲོད་རྒྱུར་དམ་དྲག་གནང་སྐོར། རྒྱ་ནག་གཞུང་གིས་ལོ་ངོ་བཅུ་ཕྲག་མང་པོའི་སྔོན་ནས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང། སྐད་ཡིག་སོགས་རྩ་མེད་བཟོ་ཐབས་བྱེད་བཞིན་པའི་གནད་དོན། རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་གཙོས་བོད་མིིའི་ཆོས་དད་རང་དབང་སོགས་ལ་བཙན་དབང་གིས་རྡོག་རོལ་གཏོང་བཞིན་ཡོད་པར་མ་ཟད། དགོན་སྡེ་དང་བསྟན་སྲུང་གཏོར་བཅོམ་དང་དགེ་འདུན་པ་དང་བཙུན་མ་སྟོང་ཕྲག་མང་པོ་དགོན་པ་ནས་ཕྱིར་ཕུད་བཏང་བ། ལྷག་པར་དུ་རྒྱ་ནག་གཞུང་གིས་བོད་རྒྱ་གྲོས་མོལ་བྱ་རྒྱུ་ཁས་ལེན་བྱེད་ཀྱི་མེད་པའི་ཁར་ཕྱིའི་གསར་འགོད་པ་དང་དབྱེ་ཞིབ་པ་སོགས་བོད་དུ་རང་དབང་གི་སྒོ་ནས་འགྲུལ་བཞུད་གནང་བར་བཀག་སྡོམ་ནན་པོ་བྱས་དང་བྱེད་མུས་ཡིན་པ་སོགས་ཆེད་བཀོད་གནང་ཡོད་པ་རེད།ཨ་རིའི་ཕྱི་སྲིད་ལས་ཁུངས་གྱི་དྲྭ་གནས་གསར་པ་དང་འབྲེལ་ནས་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ Wang Wenbin ལ་གསར་འགོད་པས་འདྲི་རྩད་གནང་བར་ཁོ་པས་རྒྱ་ནག་གཞུང་གིས་མི་འབོར་ས་ཡ་བདུན་བརྒྱ་ཙམ་དབུལ་ཕོངས་ཀྱི་ངལ་བ་སེལ་ཡོད་སྐོར་དང་། རྒྱ་རིགས་ཚོའི་ཤེས་ཡོན་དང་སྤྱི་ཚོགས་བདེ་འཇགས་སྲུང་བྱས་ནས་ནས་གྲངས་ཉུང་མི་རིགས་ཀྱི་རང་དབང་དང་ཆོས་དད་ཁག་ཁྲིམས་མཐུན་གྱི་སྒོ་ནས་སྤྲོད་ཀྱི་ཡོད་སྐོར་བརྗོད་པ་དང་ཆབས་ཅིག ཨ་རིའི་ནང་མི་རིགས་དབྱེ་འབྱེད་དང་ཉེན་རྟོག་པའི་དྲག་སྤྱོད། དམག་འཁྲུག་གི་ལམ་ནས་མི་སེར་དཀྱུས་མ་སྟོང་ཕྲག་མང་པོར་རྨས་སྐྱོན་ཕོག་པ་དང་མི་སེར་ས་ཡ་མང་པོར་ཁ་ལག་དང་སྨན་གྱི་མཐུན་རྐྱེན་རག་གི་མེད་བཞིན་དུ་ཕྱིའི་རྒྱལ་ཁབ་ལ་ཐེ་བྱུས་བྱ་རྒྱུར་ངོ་རྒོལ་ཡོད་ཅེས་བརྗོད་འདུག་པ་དང་། འགྲོ་བ་མིའི་ཐོབ་ཐང་གི་གནད་དོན་ཞེས་བརྗོད་སྐབས་རང་ཉིད་ཀྱི་བྱ་སྤྱོད་ལ་ཡོ་བསྲང་བྱེད་དགོས་པ་ལས་ཕྱིའི་རྒྱལ་ཁབ་གི་འགྲོ་བ་མིའི་ཐོབ་ཐང་གི་གནད་དོན་ཐོག་ཐེ་བྱུས་གནང་དབང་མེད་པར་བརྗོད་འདུག

ཁ་སང་ཕྱི་ལོ་ ༢༠༢༠ ཟླ་ ༡༡ ཚེས་ ༣ དགོང་མའི་ཆུ་ཚོད་ ༥།༣༠ ཐོག་མེག་གྷན་ཁྲོམ་གཞུང་དུ་གཞུང་འབྲེལ་མ་ཡིན་པའི་ཚོགས་པ་ལྔ་ཐུན་མོང་གིས་གོ་སྒྲིག་འོག་བོད་འབྲི་རུ་རྫོང་གི་ཛ་དྲག་གནས་སྟངས་ལ་གདུང་སེམས་མཉམ་བསྐྱེད་མཚོན་པའི་མར་མེའི་ཁྲོམ་སྐོར་གྱི་ལས་འགུལ་ཞིག་སྤེལ་སོང་།

ཉེ་ལམ་ཟླ་ ༡༠ ཚེས་ ༣༠ ཉིན་ལྡེ་ར་ལྡུན་ནས་བདེ་སྐྱིད་གླིང་ས་གནས་གཞོན་ནུ་དང་ལྡེ་ར་ལྡུན་ཧིན་བོད་མཛའ་འབྲེལ་ཚོགས་པ་གཉིས་མཉམ་འབྲེལ་ཐོག་ Gangotri Nelong དུ་ཆགས་པའི་འཕགས་བོད་ས་མཚམས་བར་འཕགས་བོད་ས་མཚམས་ཀྱི་རྩོད་རྙོག་ཁྲོད་འདས་གྲོངས་སུ་སོང་བའི་རྒྱ་གར་གྱི་དམག་མི་དང་བོད་མིའི་དྭང་ཞབས་ཚོར་གདུང་སེམས་མཉམ་བསྐྱེད་ཞུ་རྒྱུ་དང་། རྒྱ་གར་གཞུང་མང་གཉིས་ལ་བོད་ཀྱི་གནད་དོན་ཐོག་མུ་མཐུད་ཐུགས་ཁུར་གནང་བའི་འབོད་སྐུལ། དེ་བཞིན་རྒྱ་ནག་གིས་བཟོས་པའི་དངོས་ཟོག་ཉོ་ཚོང་དང་བེད་སྤྱོད་གནང་མཚམས་འཇོག་དགོས་པའི་འབོད་སྐུལ་ཞུས་ཏེ་ཉིན་གྲངས་བཞིའི་རིང་གི་སྦག་སྦག་སྐོར་སྐྱོད་ཀྱི་ལས་འགུལ་སྤེལ་བ་དེ་དེ་རིང་མཇུག་སྒྲིལ་གནང་གི་འདུག རླུང་འཕྲིན་ཁང་གིས་ལས་འགུལ་ནང་ཡོད་པའི་ས་གནས་གཞོན་ལྷན་གྱི་ཚོགས་གཙོ་བསྟན་འཛིན་སྦྱིན་པ་ལགས་སུ་བཀའ་འདྲི་ཞུས་པར་ཁོང་རྣམས་མ་སུ་རིར་འབྱོར་བར་སྤྱི་ལེ་ ༣༠ དང་ ༤༠ ཙམ་ལས་མེད་པའི་ས་ཁུལ་ཞིག་ཏུ་འབྱོར་ཡོད་པ་དང་། ཁོང་གིས་ད་རེས་ཀྱི་སྦག་སྦག་སྐོར་སྐྱོད་འདི་ཚགས་ཚུད་པོ་དང་རྒྱ་གར་གྱི་ས་གནས་ཁག་ཏུ་བོད་དོན་དྲིལ་བསྒྲགས་ལེགས་པོ་གནང་ཐུབ་པར་མ་ཟད། བོད་ཀྱི་གནད་དོན་ཐད་རྒྱ་གར་ངོས་ནས་རྒྱབ་སྐྱོར་གནང་རྒྱུ་ནི་ཤིན་ཏུ་ནས་གལ་ཆེན་པོ་ཡིན་པ་དང་ཆབས་ཅིག  ཉེ་ལམ་འཕགས་བོད་གཉིས་ས་མཚམས་སུ་རྒྱ་དཀར་ནག་གཉིས་ཀྱི་མཐའ་སྲུང་དམག་མི་དབར་གདོང་ཐུག་སོགས་བྱུང་རྐྱེན་བོད་ཀྱི་གནད་དོན་དེ་གསར་འགྱུར་དང་སྤྱི་ཚོགས་བརྒྱུད་ལམ་སོགས་ལ་ཐོན་བཞིན་ཡོད་སྟབས་རྒྱ་གར་གྱི་ངོས་ནས་ཇི་ཙམ་གྱིས་བོད་དོན་གླེང་སློང་དང་རྒྱབ་སྐྱོར་གནང་བ་དེ་ཙམ་གྱིས་རྒྱ་ནག་ལ་གནོན་ཤུགས་སྤྲོད་ངེས་ཡིན་སྐོར་གསུངས་སོང་། རྩ་བའི་རྒྱལ་སྤྱིའི་ཁྲོད་རྒྱ་ནག་གིས་ཏོག་དབྱིབས་གཉན་རིམས་ ༡༩ སྟངས་འཛིན་བྱེད་ཕྱོགས་གཙོས་པའི་མཐའ་མཚམས་ཀྱི་རྩོད་རྙོག་ཐད་ལབ་གླེང་མང་དག་ཅིག་འབྱུང་བཞིན་པའི་གནས་སྟངས་ཁྲོད་བྱེས་བཞུགས་བོད་མི་རྣམས་ནས་གོ་སྐབས་དམ་འཛིན་གྱིས་ཚོགས་སྒེར་གཉིས་ནས་མ་སྐུལ་དང་བླངས་སྒོ་ནས་བོད་དོན་ལས་འགུལ་སྤེལ་མུས་ཡིན་པ་དང་། ཁ་སང་བཞུགས་སྒར་དྷ་ས་ནས་བསྟན་འཛིན་དོན་གྲུབ་ལགས་ཀྱིས་འབྲས་ལྗོངས་སུ་ཆགས་པའི་འཕགས་བོད་ས་མཚམས་རྣ་ཐོས་ལ་བར་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་ཡོད་པ་རེད།

རྒྱ་ནག་གིས་ས་བགོས་བྱས་པའི་ཟི་ཁྲོན་ཞིང་ཆེན་གྱི་གཡག་རྔ་ས་ཁུལ་ནས་བོད་རང་ལྗོངས་སྐྱོང་གི་མངའ་ཁོངས་སུ་ས་བགོས་བྱས་ཡོད་པའི་ཉིང་ཁྲི་གཉིས་ཀྱི་བར་དུ་ཕུགས་ལམ་གཉིས་དང་ཟམ་ཆེན་གཅིག་ཅན་གྱི་མེ་འཁོར་ལྕགས་ལམ་གསར་བ་ཞིག་འཛུགས་འཆར་ཡོད་པ་དང་།  ལྕགས་ལམ་དེ་ནི་མདོ་དབུས་ལྕགས་ལམ་གྱི་འཕྲོ་ནས་བོད་མཐོ་སྒང་དུ་རྩ་འཛུགས་བྱས་པའི་མེ་འཁོར་ལྕགས་ལམ་གཉིས་བ་དེ་ཆགས་རྒྱུ་ཡིན་སྐོར་བརྗོད་འདུག

རྒྱ་གཞུང་གིས་སྤེལ་བཞིན་པའི་དབུལ་ཕོངས་ངལ་སེལ་གྱི་ལས་གཞི་དྲིལ་བསྒྲགས་ལ་དམིགས་ནས་ཟླ་བ་འདིའི་ནང་རྒྱ་ནག་གཞུང་གིས་པེ་ཅིང་དུ་ཡོད་པའི་ཕྱི་རྒྱལ་གྱི་གསར་འགོད་པ་ཁག་ཅིག་ལྟ་རྟོག་ནན་པོའི་འོག་ནས་བོད་དུ་ལྟ་སྐོར་དུ་ཁྲིད་ཡོད་པའི་ཁྲོད་རྒྱ་ནག་གཞུང་གིས་བོད་མིའི་བསམ་བློ་ལ་བཅོས་སྒྱུར་གྱིས་ཆོས་དད་ལ་དོ་སྣང་ཉུང་ཙམ་བྱས་ནས་དཔལ་འབྱོར་ཡར་རྒྱས་ལ་ཤུགས་སྣོན་རྒྱག་དགོས་པ་དང་ཆོས་ཕྱོགས་ཀྱི་འདུ་ཤེས་ཡོངས་སུ་དོར་ནས་རྒྱ་ནག་དམར་ཤོག་ཚོགས་པར་ཡིད་ཆེས་བྱེད་མཁན་ཞིག་ཏུ་བསྐྲུར་ཐབས་བྱེད་བཞིན་ཡོད་པ་ཕྱིར་མངོན་གནང་འདུགReuters གསར་ཁང་གིས་དཔྱད་རྩོམ་ཞིག་སྤེལ་བར་ཕྱི་རྒྱལ་གྱི་གསར་འགོད་པ་ཁག་ཅིག་བོད་དུ་ལྟ་སྐོར་ལ་ཁྲིད་པའི་སྐབས་རྒྱ་ནག་གཞུང་གིས་གྲ་སྒྲིག་བྱས་པའི་བོད་མི་ཁག་ཅིག་དང་ལྷན་དུ་སྐད་ཆ་བཤད་རྒྱུ་བཟོས་ཡོད་པ་དང་། སྐབས་དེར་ས་གནས་རྒྱ་ནག་དམར་ཤོག་ཚོགས་པའི་ཚོགས་མི་བོད་རིགས་རང་ལོ་ ༥༤ ལ་སོན་པ་ཞིག་གིས་ངས་སྙིང་དེ་རྒྱ་ནག་དམར་ཤོག་ཚོགས་པའི་ཁོངས་སུ་ཡོད་པ་ལས་ཆོས་ཕྱོགས་ཀྱི་ཐད་ལ་མེད་ཅེས་བརྗོད་འདུག་པ་མ་ཟད་སྐབས་དེར་བོད་རང་སྐྱོང་ལྗོངས་ཟེར་བའི་འགོ་ཁྲིད་ཆེ་དགྲ་ལྷས་ཀྱང་སྐྱེ་བ་སྔ་ཕྱི་ལ་ཡིད་ཆེས་བྱས་པའི་ནང་པའི་ཆོས་ཀྱི་ཤུགས་རྐྱེན་ངན་པའི་འོག་བོད་ལ་གོམས་སྲོལ་རྙིང་པ་མང་པོ་ཡོད་པ་དང་། དེས་མང་ཚོགས་ཁྲོད་མི་ཚེ་འདིར་བདེ་སྐྱིད་ཀྱི་འཚོ་བ་ཞིག་བསྐྲུན་རྒྱུའི་མངོན་འདོད་ལ་དོ་ཕོག་གཏོང་བཞིན་ཡོད་སྟབས། སྲིད་གཞུང་གིས་བོད་མི་རྣམས་ཀྱི་ཚོ་བའི་དཀའ་ངལ་སེལ་རྒྱུ་གཅིག་པོ་མིན་པར་ཁོང་ཚོའི་བསམ་བློར་བཅོས་སྒྱུར་གནང་རྒྱུ་གལ་ཆེ་ཡིན་པར་བརྗོད་འདུག ད་དུང་བདེ་སྐྱིད་དཔལ་སྒྲོན་ཟེར་བའི་ས་གནས་གྲོང་གསེབ་ཀྱི་འགོ་ཁྲིད་ཅིག་གིས་ཁྱིམ་ཚང་ཉམ་ཐག་རྣམས་ནས་ཆོས་མེད་སྨྲ་བའི་རྒྱ་ནག་དམར་ཤོགས་པའི་ཐོབ་ཐང་ལེན་པ་དང་མཉམ་དུ་ནང་ཆོས་ཉམས་ལེན་བྱེད་ནས་མགོ་གཉིས་འཁྲབ་རྒྱུ་མེད་སྐོར་བརྗོད་པ་དང་འབྲེལ། སྲིད་གཞུང་ནས་ཁང་ཁྱིམ་གསར་པ་ཐོབ་པའི་ཁྱིམ་ཚང་ཉམ་ཐག་རྣམས་ནས་མཆོད་ཁང་ཟུར་དུ་རྒྱག་ཆོག་གི་མེད་པ་ནི་རྩ་འཛིན་ཞིག་ཡིན་སྐོར་བརྗོད་པར་མ་ཟད། འགོ་ཁྲིད་གཞན་ཞིག་གིས་ཀྱང་ཁང་ཁྱིམ་ནང་མཆོད་ཁང་ཟུར་བཟོ་གནང་ན་ནང་གི་བུ་ཕྲུག་རྣམས་ཁང་མི་གཅིག་གི་ནང་མཉམ་དུ་སྡོད་དགོས་འཁེལ་སྟབས་དེ་ནི་ཕྲུ་གུའི་འཚར་ལོངས་ལ་ཡག་པོ་མེད་སྐོར་བརྗོད་འདུགགསར་འགོད་པ་རྣམས་ཉིང་ཁྲིའི་ལག་ཤེས་སློབ་གྲྭ་ཞིག་ཏུ་ཁྲིད་སྐབས་དེ་གའི་སྒོ་བྱང་ཐོག་སློབ་གྲྭའི་ངོས་ནས་བྱེས་བཞུགས་ལ་གདོང་ལེན་དང་༸གོང་ས་མཆོག་ལ་མཚན་སྨད། དེ་བཞིན་ཆོས་དད་རྐྱེན་པས་མང་ཚོགས་རྣམས་ལེ་ལོ་ཅན་དུ་མི་འགྱུར་བའི་སླད་སློབ་མའི་ཁྲོད་ལྟ་བ་དང་ཆབ་སྲིད་ཀྱི་སློབ་གསོ་སྤེལ་བཞིན་པ་གསལ་པོ་བཀོད་ཡོད་སྐོར་གསུངས་བ་དང་འབྲེལ། རྒྱ་ནག་གཞུང་གིས་བོད་མིའི་བསམ་བློར་བཅོས་སྒྱུར་གྱི་འབད་བརྩོན་ཇི་ལྟར་བྱེད་བཞིན་པ་མངོན་གསལ་བྱས་འདུག གསར་ཁང་གིས་མུ་མཐུད་བོད་མིའི་ཁྱིམ་ཚང་ཁག་གི་ནང་༸གོང་ས་མཆོག་གི་༸སྐུ་པར་སྒྲིག་གཤོམ་གནང་ཆོག་གི་མེད་པ་དང་གསར་འགོད་པ་རྣམས་ཁྲིད་སའི་ཁྱིམ་ཚང་ཀུན་གྱི་ནང་དུ་ཞི་ཅིན་ཕིང་གི་པར་སྒྲིག་གཤོམ་བྱས་པ་མངོན་རྒྱུ་ཡོད་སྐོར་བརྗོད་པ་དང་། ཉེ་ལམ་ Reuters གསར་སྤེལ་ཁང་གིས་རྒྱ་གཞུང་གིས་བོད་མི་ཞིང་འབྲོག་མང་ཚོགས་ཕོན་ཆེ་ཞིག་བཙན་དབང་གིས་ངལ་རྩོལ་བསྒྱུར་བཀོད་བྱེད་བཞིན་པའི་གནད་དོན་སྐོར་ལ་དྲིས་པར་དབུལ་ཕོངས་ངལ་སེལ་གྱི་ལས་གཞི་དང་འབྲེལ་བའི་དཔོན་རིགས་ཤིག་གིས་དེ་སྔ་ང་ཚོས་བོད་མི་རྣམས་ལ་ལས་གཞི་དེའི་གལ་གནད་སྐོར་གསལ་བཤད་མང་པོ་བྱེད་དགོས་འཁེལ་ཡོད་ཀྱང་ད་ཆ་བོད་མི་རྣམས་ཀྱིས་མ་སྐུལ་དང་བླངས་ཀྱིས་ཚུར་འབྲེལ་བ་གནང་གི་ཡོད་ཚུལ་བརྗོད་འདུག འོན་ཀྱང་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ཉམས་ཞིབ་པ་ maya wang ལགས་ཀྱིས་གསར་ཁང་ལ་བརྗོད་དོན་ལྟར་ན་རྒྱ་ནག་གཞུང་གིས་བཙན་དབང་གིས་བོད་མིའི་འཚོ་བ་དང་གོམས་སྲོལ་ལ་བསྒྱུར་བཅོས་བཏང་བ་ནི་གཞི་རྩའི་འགྲོ་བ་མིའི་ཐོབ་ཐང་དང་འགལ་བ་ཞིགཡིན་པར་མ་ཟད། བསམ་སྤྱོད་རང་དབང་དང་ཆོས་དད་རང་དབང་སོགས་ལ་རྡོག་རོལ་བཏང་བ་ཞིག་ཡིན་པར་སྐྱོན་བརྗོད་གནང་འདུག གཞི་རྩའི་རྒྱ་གཞུང་གིས་སྟངས་འཛིན་ནན་པོས་གོ་སྒྲིག་ཞུས་པའི་ཕྱི་རྒྱལ་གྱི་གསར་འགོད་པ་རྣམ་པའི་སྐོར་སྐྱོད་དེའི་ཁྲོད་རྒྱ་ནག་གཞུང་ནས་གསར་འགོད་པ་རྣམས་ས་གནས་གང་སར་ཁྲིད་དེ་བོད་མི་རྣམས་ལ་སྡོད་ཁང་གསར་པ་མཁོ་སྤྲོད་དང་ཤེས་ཡོན་དང་ལག་ཤེས། དཔལ་འབྱོར་བཅས་ཀྱི་གོ་སྐབས་དུ་མ་སྐྲུན་བཞིན་པའི་རྣམ་པ་མངོན་གསལ་བྱས་ཡོད་ཀྱང་། Reuters གསར་ཁང་གིས་སྤེལ་བའི་དཔྱད་རྩོམ་ནང་གསར་འགོད་པ་རྣམས་ལ་རྒྱ་ནག་གི་དཔོན་རིགས་མེད་པའི་ཐོག་ནས་བོད་མི་དཀྱུས་མ་ཚོ་དང་འབྲེལ་བ་གནང་རྒྱུའི་གོ་སྐབས་ཐོབ་དཀའ་བར་འགྲེལ་བརྗོད་གནང་ཡོད་པ་རེད།