Tibetan Royal Year of 2151 | Year of the Wood Dragon

བོད།

རྒྱལ་ཁབ་སུམ་ཅུ་ལྷག་གིས་བོད་ནང་གི་འགྲོ་བ་མིའི་ཐོབ་ཐང་ལ་བློ་འཚབ་གནང་བ།

ཇི་ནི་ཝར་འཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཐེངས་ ༥༡ ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ཨ་རིས་གཙོས་པའི་དབྱིན་ཡུལ་དང་འཇར་མི་ནི། སུད་སི། ཉེ་ཧོང་། དེ་བཞིན་ཚོགས་མི་རྒྱལ་ཁབ་ ༢༧ ལས་གྲུབ་པའི་ཡོ་རོབ་མཐུན་ཚོགས་བཅས་ཀྱིས་རྒྱ་ནག་གཞུང་གིས་བོད་གཙོས་པའི་མངའ་འོག་གི་ས་ཁུལ་ཁག་ཏུ་དྲག་གནོན་དང་ཚོད་འཛིན་བརྒྱུད་མང་ཚོགས་ཀྱི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་བརྩི་མེད་རྡོག་རོལ་ཚབས་ཆེན་གཏོང་བཞིན་པའི་གནས་སྟངས་མངོན་གསལ་གྱིས་བློ་འཚབ་གནང་ཡོད། སྐབས་དེར་ལྷན་ཚོགས་ཐོག་ཨ་རིས་རྒྱ་གཞུང་གི་ངོས་ནས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་སྤྱི་དང་སྒོས་བོད་ནང་གི་བོད་མིའི་ཐོག་དྲག་གནོན་ཚབས་ཆེན་བྱེད་བཞིན་པའི་ཁར་བོད་མིའི་ངོ་བོ་མཚོན་པའི་ཆོས་རིག་དང་སྐད་ཡིག ལེགས་བྱང་བཅས་པ་རྩ་མེད་གཏོང་བཞིན་པའི་བྱ་སྤྱོད་ཁག་ལ་ཨ་རིའི་ངོས་ནས་མུ་མཐུད་ཐུགས་འཚབ་གནང་བཞིན་ཡོད་སྐོར་གསུངས་འདུག ལྷན་ཚོགས་ཐོག་ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་ཀྱིས་རྒྱལ་ཁབ་ ༢༧ ལས་གྲུབ་པའི་ཡོ་རོབ་མཐུན་ཚོགས་ཀྱི་ཚབ་ཞུས་ཏེ་ཇེ་ཞན་ཇེ་སྡུག་ཏུ་འགྲོ་བཞིན་པའི་རྒྱ་ནག་གི་འགྲོབ་མིའི་ཐོབ་ཐང་གནས་སྟངས་གླེང་སློང་དང་སྦྲགས། རྒྱ་ནག་གཞུང་གིས་རྒྱ་ནག་རྒྱལ་ནང་གི་ཁྲིམས་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ཁག་ལ་གུས་བརྩི་དང་དོན་འཁྱོལ་ལག་བསྟར་བྱས་ཏེ་རྒྱ་ནག་གི་མངའ་འོག་ཏུ་ཡོད་པའི་བོད་ཀྱིས་གཙོས་པའི་ས་ཁུལ་ཁག་གི་མང་ཚོགས་རྣམས་ཀྱི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་སྲུང་སྐྱོབ་བྱེད་དགོས་པའི་གཞེན་སྐུལ་གནང་ཡོད། དེ་བཞིན་ཡོ་རོབ་རྒྱལ་ཁབ་ཌན་མག་དང་འཇར་མི་ནི། ལི་ཐོ་ནི་ཡ། ཉེ་ཧོང་། དབྱིན་ཡུལ། ཧྥི་ལན་ཌི། ནི་ཐར་ལན་ཌི་སོགས་ཀྱིས་རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་གླེང་སློང་གནང་བར་མ་ཟད་ལྷག་པར་ཡོ་རོབ་རྒྱལ་ཁབ་སུ་ཌེན་གྱིས་བོད་གཙོས་པའི་རྒྱ་ནག་རྒྱལ་ནང་གི་འགྲོ་བ་མིའི་ཐོབ་ཐང་ཐོག་ལ་ཧ་ཅང་བློ་འཚབ་ཡོད་ཅེས་གསུངས་པ་དང་འབྲེལ། རྒྱ་གཞུང་གི་ངོས་ནས་འགྲོ་བ་མིའི་ཐོབ་ཐང་དང་རྒྱལ་སྤྱིའི་ཁྲིམས་སྒྲིག་སྤྱི་དང་སྒོས་གྲངས་ཉུང་མི་རིགས་ཁག་གི་རང་དབང་དང་ཐོབ་ཐང་། སྨྲ་བརྗོད་རང་དབང་ལ་གུས་བརྩི་ཞུ་དགོས་ཞེས་གསུངས་ཡོད། སྐབས་དེར་སུད་སི་སྐུ་ཚབ་ཀྱིས་ལྷན་ཚོགས་ཐོག་རྒྱལ་ཚོགས་ཀྱི་དམིགས་བསལ་ཁྱད་ལས་རྟོག་ཞིབ་ཚོགས་ཆུང་གིས་རྒྱ་ནག་ཐོག་སྤེལ་བའི་སྙན་ཐོ་ཞིག་ལུང་འདྲེན་དང་འབྲེལ་ཏེ་བོད་གཙོས་ས་ཁུལ་གཞན་ཁག་ཏུ་རྒྱ་གཞུང་གིས་མང་ཚོགས་ལ་བཙན་དབང་ཐོག་ནས་ངལ་རྩོལ་བྱེད་བཅུག་པའི་བྱ་སྤྱོད་ལ་སེམས་འཚབ་ཡོད་ཅེས་གསུངས་པ་མ་ཚད་པར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་ལས་ཁུངས་ནས་དེ་སྔོན་ཤིན་ཅང་ཐོག་སྤེལ་བའི་སྙན་ཐོར་གཞིགས་ཚེ་རྒྱ་ནག་གཞུང་གིས་ཁུལ་དེར་ལག་བསྟར་བྱས་པའི་གནད་དོན་དེ་དག་ནི་འགྲོ་བ་མིའི་རིགས་ལ་སྤེལ་བ་ནི་ཁྲིམས་འགལ་གྱི་བྱ་སྤྱོད་ཅིག་རེད་ཅེས་མངོན་གསལ་གནང་འདུག ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ Melanie Blondelle ལགས་ཀྱིས་རྒྱལ་ཚོགས་ཀྱི་ངོས་འཛིན་ཡོད་པའི་གཞུང་འབྲེལ་མིན་པའི་ཚོགས་པའི་མིང་ཐོག་ནས་སྲིད་འཛིན་ཞི་ཅིན་ཕིང་གི་འགོ་ཁྲིད་འོག་བོད་ནང་རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་བཙན་དབང་གིས་མི་རིགས་མཉམ་བསྲེས་ཀྱི་སྲིད་བྱུས་ལག་བསྟར་དང་། ལྷག་པར་ཉེ་ལམ་རྒྱ་གཞུང་གིས་བོད་རང་སྐྱོང་ལྗོངས་ཟེར་བའི་ནང་གི་བོད་མི་མང་ཚོགས་ཀྱི་རིགས་རྫས་བཙན་དབང་གིས་མཁོ་སྒྲུབ་བྱས་པའི་གསང་བའི་ལྟ་སྲུང་གི་ལས་གཞི་བརྒྱུད་དམ་དྲག་ཆེས་ཆེར་བྱེད་བཞིན་ཡོད་པའི་གནད་དོན་སོགས་སྙན་སེང་ཞུས་འདུག་ལ། ད་བར་རྒྱལ་ཚོགས་ཐོག་རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་བདེན་དཔང་ར་སྤྲོད་བྱུང་བའི་བྱ་སྤྱོད་ནི་རྒྱལ་སྤྱིའི་ཁྲིམས་སྒྲིག་དང་ཡོངས་སུ་འགལ་བའི་ཚབས་ཆེན་གྱི་བྱ་སྤྱོད་དེ་རེད་ཅེས་གསུངས་ཡོད། སྐབས་དེར་སུད་སི་བོད་ཀྱི་སྐུ་ཚབ་དོན་གཅོད་ཁང་གི་རྒྱལ་ཚོགས་ཀྱི་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས་རྒྱལ་ཚོགས་ཀྱི་ངོས་འཛིན་ཡོད་པའི་གཞུང་འབྲེལ་མིན་པའི་ཚོགས་པའི་མིང་ཐོག་ནས་ཇེ་ཞན་ཇེ་སྡུག་ཏུ་འགྲོ་བཞིན་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཁག་སྙན་སེང་ཞུས་པ་དང་འབྲེལ། བོད་ནང་རྒྱ་གཞུང་གིས་ཏོག་དབྱིབས་ནད་ཡམས་ཀླད་ཀོར་གྱི་སྲིད་བྱུས་འོག་གཞིས་ལུས་བོད་མི་རྣམས་བཙན་དབང་གིས་ཟུར་བཀག་ཁང་དུ་བཅུག་པ་དང་ནད་ཕོག་པའི་མང་ཚོགས་ལ་སྨན་བཅོས་དང་ཟས་བཅུད་སོགས་ཉེར་མཁོའི་མཐུན་རྐྱེན་ཁག་འཐུས་ཚང་སྦྱོར་སྤྲོད་བྱེད་ཀྱི་མེད་སྟབས་བོད་མི་རྣམས་དམྱལ་བ་མི་ཡུལ་ལྟར་ངལ་བ་ཆེས་ཆེར་མྱངས་དང་མྱོང་བཞིན་པའི་ཡ་ང་བའི་གནས་སྟངས་རྣམས་ལྷན་ཚོགས་ཐོག་སྙན་སེང་ཞུས་པ་དང་ཆབས་ཅིག་རྒྱ་ནག་གཞུང་གི་ངོས་ནས་ནད་ཡམས་ཕོག་པའི་བོད་མི་རྣམས་ལ་དུས་ཐོག་ཏུ་སྨན་བཅོས་ཀྱི་མཐུན་རྐྱེན་སྦྱོར་དགོས་པའི་འབོད་སྐུལ་སོགས་གནང་ཡོད།

རིམས་ནད་ཚོད་འཛིན་དམ་དྲག་འོག་ཉིན་གསུམ་ནང་ལྷ་ས་ནས་བོད་མི་ལྔས་རང་སྲོག་བཅད་པ།

རྒྱ་ནག་གཞུང་གིས་གཉན་རིམས་ཀླད་ཀོར་ཞེས་པའི་སྲིད་བྱུས་འོག་ཉེ་ལམ་ཟླ་བ་འདིའི་ཚེས་ ༢༣ ནས་ ༢༥ བར་བོད་ཀྱི་རྒྱལ་ས་ལྷ་ས་ནས་བོད་མི་ལྔ་ཁང་སྟེང་ནས་མཆོངས་ཏེ་རང་སྲོག་བཅད་པའི་གནས་ཚུལ་ཐོན་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཉེ་ལམ་རྒྱལ་ས་ལྷ་ས་ནས་སྤེལ་བའི་སྐད་འཕྲིན་དང་ Weibo སོགས་ཀྱི་གནས་ཚུལ་ཁག་ཕྱོགས་བསྡུས་གནང་དོན་ལ་བོད་ཀྱི་རྒྱལ་ས་ལྷ་ས་སོགས་སུ་ཐེམ་སྤང་བཀའ་རྒྱ་བསྡམས་ནས་དེ་རིང་བར་ཁྱོན་ཉིན་ ༤༩ འགྲོ་ཡོད་སྟབས་བོད་མིར་ངལ་བ་ཆེན་པོ་འཕྲད་བཞིན་པའི་ཁྲོད་ཟླ་བ་འདིའི་ཚེས་ ༢༣ ཉིན་གྱི་སྔ་དྲོ་ལྷ་སའི་ཤར་ངོས་དགའ་སྐྱིད་གླིང་སྡེ་ཁུལ་གསུམ་པ་ནས་མི་གཅིག་ཁང་ཐོག་ནས་མཆོངས་ཏེ་རང་སྲོག་བཅད་པ་དང་ཚེས་ ༢༤ དང་ ༢༥ བཅས་ལ་ལྷ་སའི་ནུབ་ངོས་ཕྱོགས་བསྡུས་ཁྲལ་སྲུང་ས་ཁུལ་གྱི་ལོགས་བཀག་ཁང་གཉིས་པ་ནས་མི་གཅིག དེ་བཞིན་ནོར་བུ་གླིང་གའི་ཉེ་ཕྱོགས་བརྒྱད་གཅིག་སྡེ་ཁུལ་ནས་མི་གཅིག བོད་ལྗོངས་སློབ་གྲྭ་ཆེན་མོའི་ཉེ་ཕྱོགས་ལན་ཐིང་ཁང་བརྩེགས་ནས་མི་གཅིག སེ་རའི་ལམ་ཕྱོགས་སྐལ་བཟང་མེ་ཡུ་ནས་མི་གཅིག་བཅས་ཁྱོན་མི་ལྔ་ཁང་ཐོག་ནས་མཆོངས་ཏེ་རང་སྲོག་བཅད་ཡོད་སྐོར་བཤད་འདུག ལྷག་དོན་བོད་ནང་གི་བོད་མི་ཚོས་སྐད་འཕྲིན་སོགས་སྤྱི་ཚོགས་དྲྭ་ལམ་ཁག་ཏུ་དེ་འབྲེལ་གནས་ཚུལ་ཉུང་ངུ་བཀོད་ཡོད་ཀྱང་། རྒྱ་གཞུང་གིས་དེ་གློ་བུར་དུ་ནག་སུབ་གཏོང་གི་ཡོད་པ་དང་དྲྭ་བྱང་མང་པོ་ཞིག་སྒོ་བརྒྱབ་པར་མ་ཟད། ཕྱི་ཚེས་ ༢༤ ཕྱི་དྲོར་ཝི་བོ་སྟེང་དུ་དགའ་སྐྱིད་གླིང་ས་ཁུལ་གསུམ་པ་ནས་མི་གཅིག་གིས་རང་སྲོག་བཅད་པའི་གནས་ཚུལ་བཀོད་པ་དང་འབྲེལ་ཏེ་སྲིད་གཞུང་གི་འགོ་ཁྲིད་ཚོས་མང་ཚོགས་ལ་མགོ་སྐོར་གཏོང་མཚམས་འཇོག་དགོས་པའི་ཞུ་སྐུལ་གནང་འདུག ཕྱི་ཚེས་ ༢༥ ཉིན་སྤྱི་ཚོགས་དྲྭ་ལམ་ཐོག་བསྐྱར་དུ་གནས་ཚུལ་ཞིག་སྤེལ་བའི་ནང་རྡོ་གཅལ་སྟེང་དུ་གན་རྐྱལ་དུ་ལོག་ནས་རང་སྲོག་བཅད་པའི་ཕུང་པོའི་འདྲ་པར་སོགས་བཞག་སྟེ་མི་མང་དཀྱུས་མའི་ཚེ་སྲོག་ལ་རིན་ཐང་མི་འདུག་ཅེས་བྲིས་ཡོད་པར་ལམ་སེང་གནས་ཚུལ་དེ་བསུབས་འདུག་ཀྱང་དྲ་རྒྱ་གཞན་འགས་མཆན་བཏབ་པའི་ནང་གཉའ་གནོན་བྱེད་དྲག་རྐྱེན་མི་བཞིའི་ཚེ་སྲོག་ཤོར་ཟིན་པས་ད་ལྟ་བཟོད་ཐབས་རྩ་བ་ནས་མི་འདུག འོན་ཀྱང་ཚེ་སྲོག་བློས་བཏང་ནས་ངོ་རྒོལ་མ་གནང་རོགས་ཞེས་བཀོད་ཡོད་འདུག སྤྱིར་ཉེ་སྔོན་བོད་ནང་གི་བོད་མི་ཧ་ཅང་མང་པོས་ཐེམ་སྤང་བཀའ་རྒྱའི་ཛ་དྲག་གི་གནས་བབ་སོགས་བརྙན་དང་སྒྲ་འཇུག་གི་ལམ་ནས་ས་གནས་སྲིད་གཞུང་དང་རྒྱལ་སྤྱིའི་མང་ཚོགས་ལ་མངོན་གསལ་གནང་རྗེས་རྒྱལ་ས་ལྷ་སའི་སྲིད་གཞུང་གི་ངོས་ནས་མང་ཚོགས་ལ་དགོངས་སེལ་ཞུས་ཡོད་ཀྱང་ཕྱིས་སུ་སྤྱི་ཚོགས་དྲ་ལམ་ཁག་ཏུ་མང་ཚོགས་ཀྱི་ངོས་ནས་དེ་འབྲེལ་བརྙན་དང་གནས་ཚུལ་སྤེལ་བ་རྣམས་ལྟ་ཀློག་གནང་ས་མེད་པ་བཟོས་ཡོད་སྟབས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནད་དོན་འདིའི་ཐད་ལྷ་སར་གནས་སྡོད་བོད་མི་ཞིག་ལ་འབྲེལ་བ་གནང་མཐར་ཤེས་རྟོགས་བྱུང་བར་གཞིགས་ན། ཉེ་སྔོན་ལྷ་སའི་འགོ་ཁྲིད་རྣམས་ཀྱིས་བོད་མི་མང་ཚོགས་ལ་དགོངས་སེལ་ཞུས་པའི་རྗེས་སུ་སྐད་འཕྲིན་དང་ཝི་བོ་སོགས་སྤྱི་ཚོགས་དྲ་རྒྱ་ཁག་ཏུ་མངོན་གསལ་དོད་པོའི་ཐོག་ནས་སྤྱོད་ཚེ་འཛིན་བཟུང་དང་བཀག་ཉར་བྱེད་ཀྱི་ཡོད་པ་དང་། ལྷག་དོན་ལྷ་སར་ནད་རྟགས་ཡོད་མེད་གཉིས་ཀ་ཟུར་བཀག་ཁང་གཅིག་ཏུ་བཅུག་ནས་བཀག་སྡོམ་དམ་པོ་བྱས་ཡོད་སྟབས་མང་ཚོགས་རྣམས་བཀྲེས་ལྟོགས་དང་གྲང་ངར་སོགས་ཀྱི་དཀའ་ངལ་ཆེན་པོ་འཕྲད་བཞིན་ཡོད་པར་འགྲེལ་བརྗོད་གནང་འདུག དེའི་བར་ན། རྒྱ་ནག་གི་ས་ཁུལ་གཞན་ཁག་ཏུའང་མང་ཚོགས་རྣམས་ཐེམ་སྤང་བཀའ་རྒྱའི་འོག་གནས་མུས་ཁྲོད་ཁ་སང་དང་དེ་རིང་བར་ས་གནས་མང་ཚོགས་འགའ་ཞིག་ཕྱིར་ཐོན་ནས་སྲིད་གཞུང་ལ་ངོ་རྒོལ་གནང་བའི་བརྙན་པར་ཁག་གཅིག་མཐོང་རྒྱུ་འདུག ཉེ་བའི་ཆར་རྒྱ་ནག་གི་ Shenzhen གྲོང་ཁྱེར་ནང་གཉན་རིམས་ཁྱབ་གདལ་བྱུང་རྐྱེན་རྒྱ་གཞུང་གིས་དེ་འབྲེལ་གྲོང་ཁྱེར་གྱི་ས་ཁུལ་བཅུ་བཞི་ཙམ་རེས་གཟའ་མིག་དམར་ནས་སྒོ་རྒྱ་བསྡམས་ཡོད་པར་མ་ཟད། Shenzhen གྲོང་ཁྱེར་ནང་རྟེན་གཞི་བྱས་པའི་ Shawei སྤྱི་སྤྱོད་རླངས་འཁོར་འབབ་ཚུགས་ཀྱང་སྒོ་བརྒྱབ་ནས་མང་ཚོགས་རྣམས་རང་ཁྱིམ་དུ་ཐེམ་སྤང་འོག་གནས་དགོས་པའི་བཀའ་རྒྱ་བསྡམས་ཡོད་སྟབས་གྲོང་ཁྱེར་གྱི་ས་གནས་མང་ཚོགས་ཁག་ཅིག་གིས་ཐེམ་སྤང་བཀའ་རྒྱར་ངོ་རྒོལ་གནང་བའི་བརྙན་པར་སྤྱི་ཚོགས་དྲ་ལམ་དུ་ཕྱིར་ཐོན་པར་མ་ཟད་བེུད་གཅིག་གིས་ངོ་རྒོལ་གནང་སྐབས་ས་གནས་ཉེན་རྟོག་པས་མང་ཚོགས་ལ་གཅར་རྡུང་བཏང་བའི་སྒྲ་གོ་རྒྱུ་འདུག

རྔ་བ་ཁྱུང་མཆུ་རྫོང་གི་དགེ་རྒན་ཞིག་འཛིན་བཟུང་བྱས་རྗེས་གར་སོང་ཆ་མེད་དུ་གྱུར་འདུག

རྔ་བ་ཁྱུང་མཆུ་རྫོང་དབལ་ཤུལ་རྨེ་བ་ཡུལ་ཚོ་ནས་ཡིན་པའི་དགེ་རྒན་མགོན་ཚེ་ལགས་རྒྱ་གཞུང་གིས་འཛིན་བཟུང་བྱས་རྗེས་གར་སོང་ཆ་མེད་དུ་གྱུར་འདུགརྒྱ་ནག་གཞུང་གིས་འདི་ལོའི་ཕྱི་ཟླ་ ༨ ནང་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་བོད་ཀྱི་རྒྱལ་ས་ལྷ་ས་གཙོ་བོར་གྱུར་པའི་བོད་ཀྱི་ས་ཁུལ་མང་ཆེ་བར་མང་ཚོགས་རྣམས་ཐེམ་སྤང་བཀའ་རྒྱའི་འོག་གཉན་རིམས་ཕོག་ཡོད་མེད་ལ་མ་བརྟག་པར་གང་བྱུང་དུ་འཛིན་བཟུང་གིས་ཟུར་བཀག་བྱས་ཏེ་ཟས་དང་སྨན་བཅོས་སོགས་གཞི་རྩའི་མཐུན་རྐྱེན་སྦྱོར་སྤྲོད་འཐུས་ཚང་མེད་སྟབས་བོད་མི་རྣམས་འུ་ཐུག་ཐབས་ཟད་ཀྱིས་འབོད་སྐུལ་རིམ་པ་གནང་བཞིན་པའི་ཁྲོད་འདིར་བཞུགས་སྒར་དུ་ཡོད་པའི་བོད་གནས་ལྟ་ཞིབ་ཁང་གིས་འདི་ལོའི་ཕྱི་ཟླ་ ༨ ཚེས་ ༡༤ ཉིན་རྒྱ་གཞུང་ཉེན་རྟོག་པས་རྔ་བ་ཁྱུང་མཆུ་རྫོང་དབལ་ཤུལ་རྨེ་བ་ཡུལ་ཚོ་ནས་ཡིན་པའི་དགེ་རྒན་མགོན་ཚེ་ལགས་རང་ཁྱིམ་ནས་བཙན་ཁྲིད་བྱས་ཡོད་པ་དང་། ད་ཆ་ཟླ་བ་གཅིག་དང་ཕྱེད་ཀ་ཙམ་ཕྱིན་ཡོད་ཀྱང་ཁོང་བཙོན་ཁང་གང་དུ་བཀག་ཉར་བྱས་ཡོད་པ་དང་གཟུགས་གཞིའི་གནས་སྟངས་ཇི་ཆགས་སོགས་ཀྱི་གནས་ཚུལ་གང་ཡང་ཤེས་རྟོགས་མེད་པར་གྱུར་འདུག རྒྱ་ནག་གཞུང་གི་ཉེན་རྟོག་པས་རྒན་མགོན་ཚེ་ལགས་གློ་བུར་དུ་འཛིན་བཟུང་བྱེད་སྐབས་ནང་མི་རྣམས་ལ་ཁོང་འཛིན་བཟུང་བྱེད་དོན་གང་ཡིན་སོགས་འགྲེལ་བརྗོད་གང་ཡང་བྱས་མེད་ཀྱང་ཁོང་གིས་ཉེ་སྔོན་རྒྱ་གཞུང་གི་བཀའ་རྒྱའི་འོག་བོད་ཀྱི་རྒྱལ་ས་ལྷ་སའི་བོད་མི་རྣམས་ལ་ངལ་བ་ཆེས་ཆེར་འཕྲད་བཞིན་པའི་ཛ་དྲག་གནས་སྟངས་དང་འབྲེལ་བའི་པར་དང་བརྙན་ཁག་གཅིག་སྤྱི་ཚོགས་དྲ་ལམ་དུ་བརྒྱུད་སྤེལ་གནང་བའི་རྒྱུ་མཚན་གྱིས་ཡིན་པར་ཚོད་དཔག་གནང་བཞིན་འདུགདེ་བཞིན་པདྨ་རྒྱལ་ལགས་ཀྱིས་བོད་ནང་གཉན་རིམས་ཁྱབ་གདལ་བྱུང་ལུགས་འདི་སྔ་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ནད་ཡམས་དེ་དང་མི་འདྲ་བའི་གནད་དོན་མང་དག་ཅིག་མངོན་གསལ་འབྱུང་བཞིན་པ་ཡོད་པར་འགྲེལ་བརྗོད་གནང་བ་དང་སྦྲགས་ཏེ་ཐེངས་འདིར་བོད་ནང་ནད་ཡམས་ཁྱབ་གདལ་བྱུང་སྟངས་དང་དེར་རྒྱ་གཞུང་གིས་གསང་རྫུན་བྱས་ནས་བོད་མི་མང་དག་ཅིག་ལ་གཅར་རྡུང་དང་འཛིན་བཟུང་བཙན་ཁྲིད་ཀྱིས་ཟུར་བཀག་ཁང་དུ་ཟས་དང་སྨན་བཅོས་སོགས་གཞི་རྩའི་མཐུན་རྐྱེན་གདང་ངེས་མེད་པར་ངལ་འཕྲད་ཀྱི་གནས་སུ་བཞག་པ་དེ་ནི་གཙོ་བོ་ནད་ཡམས་ཁྱབ་གདལ་ལ་གདོང་ལེན་གྱི་གནད་དོན་ཁོ་ན་མིན་པར་དོན་དམ་ལ་བོད་མིའི་ཐོག་དྲག་གནོན་གྱི་སྲིད་བྱུས་ལག་བསྟར་བྱ་རྒྱུའི་ཐབས་ཤེས་ཤིག་ཡིན་པར་ནན་བརྗོད་གནང་སོང་། གཞི་རྩའི་མགོན་ཚེ་ལགས་ནི་རང་ལོ་ ༤༠ ཡས་མས་ཤིག་ཡིན་པ་དང་། ཁྱུང་མཆུ་རྫོང་ཁོངས་ཀྱི་དབལ་ཤུལ་རྨེ་བ་ཡུལ་ཚོའི་སློབ་ཆུང་གི་དགེ་རྒན་ཡིན་པ་རེད། ཁོང་ཉིད་རྒྱ་གཞུང་གིས་འཛིན་བཟུང་བཀག་ཉར་བྱས་པ་ནས་བཟུང་ཁོང་གི་སྐད་འཕྲིན་དང་ཝིའུ་བོ་སོགས་བཀག་སྡོམ་བྱས་འདུག པར་བདག་དབང་། freetibet དང་། tibetwatch

རྒྱ་གཞུང་གིས་གཉན་རིམས་ཀླད་ཀོར་གྱི་སྲིད་བྱུས་ནོར་འཁྲུལ་ཡིན་པར་ངོས་ལེན་བྱས་མེད་པར་ཐེར་འདོན་གནང་བ།

བོད་ནང་རྒྱ་ནག་དམར་ཤོག་ཚོགས་པས་གཉན་རིམས་ཀླད་ཀོར་གྱི་སྲིད་བྱུས་ལག་བསྟར་འོག་ལྷ་སའི་མང་ཚོགས་སྤྱི་དང་ལྷག་པར་དུ་ཁུལ་དེར་ཡོད་པའི་ཡུལ་སྐོར་སྤྲོ་འཆམ་པ། ལས་མི། སྨན་ཞབས་པ། ལས་བྱེད་པ་སོགས་ཀྱིས་ཀྱང་སྲིད་བྱུས་དེའི་འོག་དཀའ་སྡུག་མྱོང་བཞིན་པའི་ཁྲོད་མང་ཚོགས་ཀྱིས་འ་ཆད་འུ་ཐུག་གི་སྡུག་བསྔལ་མང་པོ་མྱངས་དང་མྱོང་བཞིན་སྐོར་གསུངས་པའི་བརྙན་དང་སྒྲ་འཇུག་ག་ཚོད་ཙམ་ཕྱིར་ཐོན་མིན་ལ་མ་ལྟོས་པར་བོད་ཀྱི་རྒྱལ་ས་ལྷ་སའི་འགོ་གཙོ་གཞོན་པས་མང་ཚོགས་ཀྱི་ཁ་བཀག་ཆེད་དགོངས་དག་ཐུགས་བདེན་ཞུས་པ་མ་གཏོགས་ད་བར་བོད་ནང་ལག་བསྟར་བྱེད་བཞིན་པའི་གཉན་རིམས་ཀླད་ཀོར་གྱི་སྲིད་བྱུས་ནོར་འཁྲུལ་ཡིན་པར་ངོས་ལེན་བྱས་མེད་པར་ཐེར་འདོན་གྱིས་མངོན་གསལ་གནང་འདུགཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་ཉེ་ཆར་བོད་ནང་དང་ལྷག་པར་དུ་རྒྱལ་ས་ལྷ་ས་ཁུལ་དུ་རྒྱ་གཞུང་གིས་གཉན་རིམས་ཀླད་ཀོར་ཞེས་པའི་སྲིད་བྱུས་འོག་མང་ཚོགས་ལ་ཕན་ལས་གནོད་ཆེ་བ་བྱུང་བ་དང་། གཉན་རིམས་ཁྱབ་གདལ་ཤུགས་ཆེ་རུ་བཏང་བར་མ་ཟད་མང་ཚོགས་ལ་དོན་མེད་དཀའ་ངལ་འཕར་མ་བཟོ་བཞིན་ཡོད་པ་སོགས་གསུངས་ཡོད་པའི་མང་ཚོགས་ཀྱིས་འ་ཆད་འུ་ཐུག་གི་བརྙན་དང་སྒྲ་མང་དག་ཅིག་འདོན་སྤེལ་གནང་བའི་ཁོངས་ནས་ཕྱི་ཕྱོགས་སུ་ཕྱིར་འགྱར་བྱུང་བ་ཁག་གཅིག་ལ་དཔྱད་ཞིབ་དང་སྦྲགས། བོད་ཀྱི་རྒྱལ་ས་ལྷ་སའི་འགོ་ཁྲིད་ཀྱིས་མང་ཚོགས་རྣམས་ལ་དགོངས་དག་ཐུགས་བདེན་ཞུས་ཡོད་པ་དེ་ལྟར་ཡང་། ད་བར་རྒྱ་ནག་དམར་ཤོག་ཚོགས་པའི་བཀོད་ཁྱབ་འོག་བོད་ནང་གཉན་རིམས་ཀླད་ཀོར་གྱི་སྲིད་བྱུས་ལག་བསྟར་བྱེད་བཞིན་པ་དེ་ནོར་འཁྲུལ་ཅན་གྱི་སྲིད་བྱུས་ཤིག་ཡིན་པར་ངོས་ལེན་རྩ་བ་ནས་བྱས་མེད་པའི་ཁར་ཚེས་ ༡༩ ཉིན་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ Wang Junzheng ཟེར་བས་ལྗོངས་ཀྱི་རྒྱུན་ལས་ཚོགས་འདུའི་ཐོག་གཉན་རིམས་ཀླད་ཀོར་གྱི་སྲིད་བྱུས་ལ་བསྒྱུར་བཅོས་གང་ཡང་མེད་ཅེས་བཤད་པ་མངོན་གསལ་གནང་འདུག མང་ཚོགས་ལ་དགོངས་སེལ་ཞུས་པའི་བསྒྲགས་གཏམ་ནང་ད་ལྟའི་ཛ་དྲག་གི་དཀའ་ངལ་གསལ་ཐབས་དང་འབྲེལ་བའི་ཐབས་ལམ་གང་ཡང་བསྟན་མེད་པ་དང་དགོངས་སེལ་ཞུས་པར་ལྷ་སའི་འགོ་གཙོ་གཞོན་པས་གཤམ་འོག་གི་འཕྲོད་བསྟེན་ལས་བྱེད་པ་སོགས་ལ་ཁག་དཀྲི་བྱས་པ་དང་། རྒྱལ་ས་ལྷ་སའི་འགོ་གཙོ་གཞོན་པ་དགྲ་འདུལ་ཟེར་བ་དེར་རྒྱ་ནག་དམར་ཤོགས་ཚོགས་པའི་ལས་བྱེད་པའི་གོ་གནས་ཡོད་ཀྱང་། ཁོ་པས་རྒྱལ་ས་ལྷ་སའི་འགོ་གཙོ་གཞོན་པའི་མིང་ཐོག་ནས་དགོངས་སེལ་ཞུས་པ་མ་གཏོགས་སྲིད་བྱུས་ལག་བསྟར་བྱེད་དགོས་པའི་བཙན་བཀའ་གཏོང་མཁན་དམར་ཤོག་ཚོགས་པའི་ས་གནས་འགོ་ཁྲིད་དང་དཔོན་རིགས་བཅས་ཀྱི་ངོས་ནས་དགོངས་སེལ་གང་ཡང་ཞུས་མེད་པར་ཐེར་འདོན་གནང་འདུག བོད་ཀྱི་རྒྱལ་ས་ལྷ་སའི་འགོ་ཁྲིད་ཀྱིས་མང་ཚོགས་རྣམས་ལ་དགོངས་དག་ཐུགས་བདེན་ཞུས་པའི་གནས་ཚུལ་བྱུང་རྗེས་སྤྱི་ཚོགས་དྲ་ལམ་ཁག་ཏུ་མང་ཚོགས་ཀྱི་ངོས་ནས་བརྙན་དང་གནས་ཚུལ་སྤེལ་བ་རྣམས་ལྟ་ཀློག་གནང་ས་མེད་པ་བཟོས་པར་མ་ཟད། ཚེས་ ༡༨ ཉིན་རྒྱལ་ས་ལྷ་སའི་སྤྱི་བདེ་ལས་ཁུངས་ཀྱིས་བོད་མི་གསུམ་ལ་གཉན་རིམས་དང་འབྲེལ་བའི་དཀྲོག་གཏམ་སྤེལ་བའི་ཉེས་མིང་འོག་ཆད་པ་བཅད་པ་དང་། ཚེས་ ༢༠ ཉིན་ད་བར་གཉན་རིམས་སྐོར་དཀྲོག་གཏམ་སྤེལ་བའི་གྱོད་གཞི་ ༤༧༡ ལ་ཞིབ་འཇུག་བྱས་པའི་ཁྲོད་མི་ ༧༨༦ ལ་ཉེས་ཆད་བཏང་ཡོད་པའི་གསལ་བསྒྲགས་ཤིག་སྤེལ་བ་བརྒྱུད་དོན་དམ་ལ་རྒྱ་གཞུང་གིས་མང་ཚོགས་ཀྱི་དཀའ་ངལ་གསལ་རྒྱུ་ལས་ལྡོག་སྟེ་མང་ཚོགས་ཀྱི་ཁ་བཀག་ཐབས་ལ་དོ་སྣང་ཆེས་ཆེར་སྤྲོད་བཞིན་ཡོད་པ་མངོན་གསལ་གནང་འདུགདེའི་བར་ན་ཉེ་ཆར་ Epoch Times ཞེས་པའི་བརྒྱུད་ལམ་གྱིས་གནས་ཚུལ་སྤེལ་བར་གསར་ཁང་དེས་རྒྱལ་ས་ལྷ་ས་ཁུལ་དུ་གནས་སྡོད་རྒྱ་རིགས་མང་ཚོགས་ཁག་གཅིག་དང་འབྲེལ་བ་གནང་སྟེ་ས་གནས་དངོས་ཀྱི་གནས་སྟངས་རྒྱུན་ལོན་གནང་བའི་ཁྲོད་བོད་མི་རྣམས་ཀྱིས་གསུངས་པའི་བཀའ་མོལ་ལྟར་ལྷ་ས་ཁུལ་དུ་སྤྱི་སྤྱོད་རླངས་འཁོར་བཅུ་ཕྲག་མང་པོ་བང་སྒྲིག་ནས་ས་ཁུལ་ཞིག་ཏུ་རིམས་ནད་ཕོག་མཁན་གཅིག་འབྱུང་ཚེ་ནད་གཞི་ཕོག་མིན་ལ་མ་ལྟོས་པར་ཉེ་འཁོར་གྱི་མི་ཚང་མ་ཟུར་བཀག་ཏུ་བཙན་ཁྲིད་བྱེད་བཞིན་པ་དང་། རང་ཁྱིམ་དུ་བཞུགས་པ་རྣམས་ཀྱང་ཟས་མི་འདང་བ་དང་དངུལ་གསོག་འཇོག་གནང་བ་རྣམས་རྫོགས་པའི་ངལ་འཕྲད་ཀྱི་ཐོག་ནས་ནམ་ཞིག་ཟུར་བཀག་ཁང་དུ་ཁྲིད་མིན་གྱི་དངངས་སྐྲག་འོག་བཞུགས་དགོས་པ་བྱུང་བ་བཅས་ཕྱོགས་ཡོངས་ཀྱི་དཀའ་ངལ་བཟོད་མ་ཐུབ་པར་འ་ཆད་འུ་ཐུག་གི་གནས་སུ་གྱར་བའི་ཁར་རྒྱ་གཞུང་གིས་མང་ཚོགས་ཁྲོད་དཀྲོག་གཏམ་སྤེལ་རྒྱུ་མེད་པའི་འཇིགས་སྐུལ་དང་སྤེལ་མཁན་རྣམས་ལ་ཉེས་ཆད་གཏོང་བཞིན་ཡོད་ཀྱང་། རྒྱ་ནག་གཞུང་འབྲེལ་དྲ་རྒྱའི་ཐོག་གནས་ཚུལ་གང་སྤེལ་བ་དེ་དག་ཚང་མ་རྫུན་གཏམ་ཁོ་ན་ཡིན་པ་ལྟར་དཀྲོག་གཏམ་སྤེལ་མཁན་ངོ་མ་དེ་རྒྱ་ནག་གཞུང་རང་ཉིད་ཆགས་ཡོད་པར་སྐྱོན་བརྗོད་གནང་འདུག

རྒྱལ་ཚོགས་ནང་རྒྱ་གཞུང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་ཐེར་འདོན་གནང་འདུག

ཨ་རི་དང་ཡོ་རོབ་མཐུན་ཚོགས་གཉིས་ཀྱིས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་ཐོག་རྒྱ་ནག་གཞུང་གིས་བོད་མིས་གཙོས་པའི་ཡུ་གུར་ཁ་ཆེའི་མི་རིགས་སོགས་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་པར་ཐུགས་འཚབ་ཀྱི་རྣམ་པ་བསྟན་པ་དང་སྦྲགས་ཏེ་རྒྱ་ནག་གཞུང་ནས་འཕྲལ་མར་བྱ་སྤྱོད་དེ་དག་མཚམས་འཇོག་དགོས་པའི་ཞུ་སྐུལ་གནང་འདུགརྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༥༡ ཐོག་འགྲོ་བ་མིའི་ཐོབ་ཐང་གི་གནས་སྟངས་ལ་ཐུགས་སྣང་དགོས་པའི་སྤྱི་ཡོངས་ཀྱི་བགྲོ་གླེང་ལས་རིམ་ཐོག་ཕེབས་སྐབས་ཨ་རི་སྐུ་ཚབ་ཀྱིས་རྒྱ་ནག་དང་ཨུ་རུ་སུ། ཨབ་གྷན། སི་རི་ཡ། ཨི་རན་སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་ནས་གཏམ་བཤད་གནང་འདུག་པ་དང་། དེའི་ཁྲོད་རྒྱ་ནག་གི་འགྲོ་བ་མིའི་ཐོབ་ཐང་དང་འབྲེལ་བའི་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་གིས་བོད་མིའི་ངོ་བོ་དང་སྐད་ཡིག རིག་གཞུང་། དེ་བཞིན་ཆོས་ཕྱོགས་ཀྱི་གནང་སྒོར་དྲག་གནོན་ཚད་ལས་འགལ་བ་བྱས་ནས་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་བཅས་བོད་མིའི་གནད་དོན་ཐེར་འདོན་གྱིས་ཐུགས་འཚབ་ཡོད་པའི་རྣམ་པ་བསྟན་འདུག རྒྱལ་ཚོགས་ནང་གི་ཨ་རིའི་གཏན་འཇགས་སྐུ་ཚབ་ Kelly Billingsley ལགས་ཀྱིས་རྒྱ་ནག་སྲིད་གཞུང་གིས་ཡུ་གུར་ཁ་ཆེའི་མི་རིགས་གཙོས་ཤིན་ཅང་ནང་གི་གྲངས་ཉུང་མི་རིགས་རྣམས་ཀྱི་འགྲོ་བ་མིའི་ཐོབ་ཐང་རྡོག་རོལ་དང་མི་རིགས་སྡེབ་གསོད་ཀྱི་བྱ་སྤྱོད་སྤེལ་བར་ཆེས་ཐུགས་འཚབ་ཀྱི་རྣམ་པ་བསྟན་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གཙོ་འཛིན་ཟུར་པ་ལྕམ་སྐུ་ Michelle Bachlet མཆོག་ནས་ཟླ་བ་སྔོན་མའི་ཟླ་མཇུག་ཏུ་རྒྱ་གཞུང་གིས་ཤིན་ཅང་ནང་ཡུ་གུར་གཙོ་གྱུར་ཁ་ཆེའི་མི་རིགས་རྣམས་བཀག་སྐྱིལ་དང་མནར་གཅོད་སོགས་བཏང་བའི་སྐོར་སྙན་ཐོ་བཏོན་པ་དེར་ཐུགས་སྣང་གནང་དགོས་པ་དང་།  རྒྱ་གཞུང་ནས་འཕྲལ་མར་མནར་གཅོད་བྱེད་ཁག་མཚམས་འཇོག་དང་དེ་བཞིན་དྲང་བདེན་མིན་པའི་ཐོག་ནས་འཛིན་བཟུང་བཀག་སྐྱིལ་བྱས་པ་རྣམས་གློད་བཀྲོལ་དགོས་པ། དེ་བཞིན་གར་སོང་ཆ་མེད་དུ་གྱུར་པ་རྣམས་ཀྱི་གནས་སྟངས་ཇི་ཆགས་ཁ་གསལ་བཟོ་དགོས་པ། ཤིན་ཅང་ནང་རང་དབང་ཅན་གྱི་རྟོག་ཞིབ་ཀྱི་སྐུ་ཚབ་མི་སྣ་རྣམས་འགོག་རྐྱེན་མེད་པར་ཕེབས་འཐུས་ཆོག་མཆན་གནང་དགོས་ཞེས་གསུངས་འདུག ཧོང་ཀོང་ནང་མང་ཚོགས་ཀྱི་སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་སྐོར་མངོན་གསལ་གནང་འདུག་པར་མ་ཟད་ལྷག་པར་རྒྱ་ནག་གཞུང་གིས་ཕྱི་ཕྱོགས་སུའང་རྒྱ་ནག་སྲིད་གཞུང་ལ་སྐྱོན་བརྗོད་གནང་མཁན་ཚོར་སུན་གཙེར་དང་དོགས་སྲུང་། དེ་བཞིན་འཇིགས་སྐུལ་སོགས་བྱེད་ཀྱི་ཡོད་སྐོར་བཀོད་འདུག གཞན་ཡང་ཡོ་རོབ་མཐུན་ཚོགས་ཀྱིས་ཀྱང་རྒྱལ་ཚོགས་སུ་དེ་འབྲེལ་གཏམ་བཤད་སྤེལ་བའི་ནང་རྒྱ་ནག་གཞུང་གིས་བོད་མི་དང་ཤིན་ཅང་སོགས་གྲངས་ཉུང་མི་རིགས་རྣམས་ཀྱི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ལ་ཐུགས་འཚབ་དང་སྦྲགས། རྒྱ་ནག་གཞུང་ནས་དམིགས་བསལ་བོད་དང་ཤིན་ཅང་། ནང་སོག་བཅས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་དང་རང་དབང་ལ་སྲུང་སྐྱོབ་བྱེད་དགོས་སྐོར་གསུངས་འདུགདེ་བཞིན་དེའི་ནང་འཛིན་བཟུང་བྱས་པའི་བོད་མི་རྡོ་རྗེ་བཀྲ་ཤིས་ལགས་དང་སྒོ་ཤེས་རབ་རྒྱ་མཚོ་ལགས། རིན་ཆེན་ཚུལ་ཁྲིམས་ལགས་བཅས་མཚན་འདོན་གནང་སྟེ་ཁོང་རྣམས་ཆ་རྐྱེན་གང་ཡང་མེད་པར་འཕྲལ་དུ་གློད་བཀྲོལ་དགོས་ཞེས་སོགས་གསུངས་འདུག གཞི་རྩའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གཙོ་འཛིན་ཟུར་པ་ Michelle Bachlet མཆོག་གིས་རང་ཉིད་ཀྱི་ལས་གནས་ནས་མ་འཁྱུར་ཙམ་གྱི་གོང་དུ་ཡུན་རིང་ནས་ངང་སྒུག་བྱེད་བཞིན་པའི་ཤིན་ཅང་ནང་གི་སྙན་ཐོ་འདོན་སྤེལ་གནང་ཡོད་པ་དང་། ད་ཆ་ཨ་རིས་གཙོས་པའི་དབྱིན་ཡུལ་དང་རྒྱལ་ཁབ་གཞན་ཁག་ཅིག་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐོག་ཤིན་ཅང་གི་སྙན་ཐོར་གྲོས་བསྡུར་དགོས་པའི་ཞུ་སྐུལ་གནང་བཞིན་ཡོད་པ་དེ་ལྟར་ཡང་། སྙན་ཐོ་དེར་གོ་བསྡུར་དགོས་མིན་ཐད་ལ་རྒྱལ་ཚོགས་ནང་མང་མོས་ཀྱི་འོས་བསྡུ་གནང་དགོས་ཀྱི་འདུག དབྱིན་ཡུལ་གྱི་གཞུང་ཚབ་ Simon Manley ལགས་ཀྱིས་ཁ་སང་རྒྱལ་ཚོགས་ལ་ང་ཚོའི་ངོས་ནས་རྒྱ་ནག་གིས་འཆར་གཞི་དང་ལྡན་པའི་ཐོག་ནས་འགྲོ་བ་མིའི་ཐོབ་ཐང་རྡོག་རོལ་བཏང་བ་སྣང་མེད་དུ་འཇོག་རྒྱུ་མེད་པ་དང་རྒྱལ་ཚོགས་ཀྱིས་ཀྱང་གནད་དོན་འདི་རིགས་ལ་ཁུ་སིམ་བཞུགས་རྒྱུ་མེད་ཅེས་གསུངས་ཡོད། པར་གྱི་བདག་དབང་སྤྱི་ཚོགས་དྲ་རྒྱ་དང་ Getty Images

བོད་མིར་ཆེ་མཐོང་ངང་ནས་སྨན་བཅོས་སོགས་ཀྱི་གཞི་རྩའི་མཐུན་རྐྱེན་སྦྱོར་སྤྲོད་དགོས་པའི་འབོད་སྐུལ།

བོད་མིའི་སྒྲིག་འཛུགས་ཀྱིས་རྒྱ་ནག་གི་གཉན་རིམས་ཀླད་ཀོར་གྱི་སྲིད་བྱུས་འོག་མང་ཚོགས་ལ་ཕན་ལས་གནོད་ཆེ་བ་བྱུང་བ་དང་། ལྷག་པར་བོད་ནང་གི་ཏོག་དབྱིབས་གཉན་རིམས་ཁྱབ་གདལ་གྱི་གནས་སྟངས་ལས་རྒྱ་ནག་གི་གཉན་རིམས་ཀླད་ཀོར་གྱི་སྲིད་བྱུས་དེར་དོན་འབྲས་རྩ་བ་ནས་སོན་མེད་པ་གསལ་པོ་ཡིན་པར་སྐྱོན་བརྗོད་དང་སྦྲགས། བོད་མི་རྣམས་ལ་གུས་བརྩི་ལྡན་པའི་ཐོག་ནས་སྨན་བཅོས་སོགས་ཀྱི་གཞི་རྩའི་མཐུན་རྐྱེན་སྦྱོར་སྤྲོད་དགོས་པའི་ཞུ་སྐུལ་གནང་འདུགརྒྱ་ནག་གི་གཉན་རིམས་ཀླད་ཀོར་གྱི་སྲིད་བྱུས་འོག་བོད་ནང་གི་བོད་མི་རྣམས་འུ་ཐུག་ཐབས་ཟད་ཀྱི་གནས་སུ་གྱར་མུས་ཁྲོད་དེ་རིང་བོད་མིའི་སྒྲིག་འཛུགས་བཀའ་ཤག་གིས་གཞུང་འབྲེལ་གསར་འགོད་བསྒྲགས་གཏམ་ཞིག་གནང་བའི་ནང་། རྒྱ་གཞུང་གི་ངོས་ནས་གཉན་རིམས་ཀླད་ཀོར་ཟེར་བའི་སྲིད་བྱུས་ལག་བསྟར་འོག་བོད་ནང་གི་བོད་མི་རྣམས་ཀྱི་བདེ་འཇགས་ལ་སྣང་མེད་གཏོང་བཞིན་ཡོད་སྟབས་བོད་མི་རྣམས་ཀྱིས་རང་ཉིད་ཀྱི་བདེ་འཇགས་བློས་བཏང་གནང་སྟེ་བོད་མི་རྣམས་ལ་སྨན་བཅོས་ཀྱི་མཐུན་རྐྱེན་མེད་པ་དང་།  ཟས་མི་འདང་བ། རིམས་ནད་ཕོག་མཁན་དང་མི་ཕོག་མཁན་བོད་མི་སྟོང་ཕྲག་མང་པོ་མཉམ་ བཞག་བྱས་པ། རྒྱལ་ས་ལྷ་སའི་ཕྱི་རོལ་གྱི་བོད་མི་མང་དག་ཅིག་ཉིན་ལྟར་བརྟག་དཔྱད་བྱས་ནས་ནད་རྟགས་གང་ཡང་མེད་ཀྱང་རང་ཡུལ་དུ་ཕྱིར་ལོག་གནང་བར་བཀག་སྡོམ་བྱེད་བཞིན་རྐྱེན་འ་ཆད་འུ་ཐུག་གནས་སུ་གྱར་བ་མངོན་གསལ་གནང་བའི་ཁར་ས་གནས་སྲིད་གཞུང་གིས་ཀྱང་འཐུས་ཤོར་ཕྱིན་པར་ངོས་ལེན་ཞུས་ཏེ་དགོངས་སེལ་ཞུས་པ་སོགས་ཀྱི་གནད་དོན་ཞིབ་རྒྱས་ངོ་སྤྲོད་དང་འབྲེལ། རྒྱ་ནག་གཞུང་གི་ངོས་ནས་ས་གནས་བོད་མི་རྣམས་ཀྱི་ལྷག་བསམ་བཟོད་མེད་ཀྱིས་ས་གནས་ཀྱི་དངོས་ཡོད་གནས་སྟངས་མངོན་གསལ་གནང་བ་རྣམས་ལ་དང་ལེན་བྱེད་དགོས་པ་དང་།བོད་མི་རྣམས་ལ་གུས་བརྩི་ལྡན་པའི་ཐོག་ནས་སྨན་བཅོས་སོགས་ཀྱི་གཞི་རྩའི་མཐུན་རྐྱེན་ཁག་དུས་ཐོག་ཏུ་མཁོ་སྤྲོད་ཡོང་བའི་ཞུ་སྐུལ་གནང་འདུག དེ་བཞིན་ད་ལྟའི་གཉན་འཕྲང་ཅན་གྱི་དུས་སྐབས་འདིར་བོད་ནང་གི་བོད་མི་རྣམས་ལ་རིམས་ནད་ལ་གདོང་ལེན་སླད་ཕྱི་ཕྱོགས་ཀྱི་སྨན་དང་རོགས་སྐྱོར་སོགས་སྦྱོར་སྤྲོད་ཀྱི་ཆོག་མཆན་སྤྲོད་དགོས་པ་དང་། ལྷག་པར་བོད་མིའི་སྒྲིག་འཛུགས་ལ་དེ་སྔ་གཉན་རིམ་སྔོན་འགོག་གི་ཉམས་མྱོང་ཡོད་པ་ལྟར་དེ་དག་བོད་ནང་ལག་བསྟར་གནང་བཅུག་དགོས་པའི་འབོད་སྐུལ་གནང་བར་མ་ཟད། བོད་མིའི་སྒྲིགས་འཛུགས་ཀྱི་ངོས་ནས་བོད་ནང་གི་བོད་མི་ཚོའི་ཆེད་གསོ་རིག་ནུས་གསོའི་སྨན་དང་ཡོ་ཆས། སྨན་ཞབས་པ། དེ་བཞིན་དང་བླངས་ཞབས་ཞུ་བ་སོགས་རོགས་སྐྱོར་སོགས་གང་དགོས་ངེས་ཞུར་གྲ་སྒྲིག་ཨང་གསར་ཡིན་སྐོར་གསུངས་འདུག དེའི་བར་ན་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཁ་སང་སྤེལ་བའི་གནས་ཚུལ་ལ་གཞིགས་ན། བོད་ནང་རྒྱ་གཞུང་གིས་གཉན་རིམས་ཀླད་ཀོར་གྱི་སྲིད་བྱུས་ལག་བསྟར་འོག་བོད་མི་རྣམས་ལ་ཕན་ལས་གནོད་ཆེ་བ་བྱུང་ཡོད་པ་མངོན་གསལ་དང་འབྲེལ། ས་གནས་སྲིད་གཞུང་གི་ངོས་ནས་རིམས་ནད་འགོག་ཐབས་ཐད་ལ་འཐུས་ཤོར་ཆེན་པོ་ཕྱིན་ཡོད་པའི་ནོར་འཁྲུལ་ངོས་ལེན་གྱིས་མང་ཚོགས་ལ་དགོངས་སེལ་ཞུས་ཟིན་པའི་རྗེས་སུའང། བོད་ནང་གནས་སྟངས་ཡར་རྒྱས་འགྲོ་རྒྱུ་ལས་ལྡོག་སྟེ་རྒྱ་གཞུང་གིས་རིམས་ནད་སྐོར་གྱི་དཀྲོག་གཏམ་སྤེལ་མཁན་ལ་རྡུང་རྡེག་ཚ་གནོན་ཞེས་པའི་ལས་འགུལ་འོག་བོད་མི་ ༨༠༠ མིན་ཙམ་ལ་ཉེས་ཆད་བཏང་སྟེ་མང་ཚོགས་ཀྱི་སྨྲ་བརྗོད་རང་དབང་ལ་དམ་དྲག་དང་ཉེས་ཆད་གཏོང་མུས་ཡིན་པ་སོགས་ཆེས་མངོན་གསལ་གནང་ཡོད།བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་དེ་སྔ་ལྷ་ས་སྲིད་གཞུང་གིས་དགོངས་སེལ་ཞུས་པ་དེས་དེ་སྔོན་གཞུང་ཕྱོགས་ནས་རིམས་ནད་སྔོན་འགོག་གི་ལས་དོན་ཐོག་མཐའ་བར་གསུམ་དུ་ཚགས་ཚུད་ངང་སྤེལ་བཞིན་ཡོད་པའི་དྲིལ་བསྒྲགས་ཡང་ཡང་བྱས་པ་རྣམས་རྫུན་གཏམ་འབའ་ཞིག་ཡིན་པར་ཡོངས་གསལ་བྱས་ཡོད་པ་དང་། མི་མང་གི་སྐྱོན་བརྗོད་དང་ལེན་བྱས་ཏེ་དགོངས་སེལ་ཞུས་པ་དང་ནོར་འཁྲུལ་ཡོ་བསྲང་བྱས་པ་དེ་ནི་སྲིད་གཞུང་ཚད་ལྡན་ཞིག་གི་སྤྱོད་ཚུལ་ཡིན་ཀྱང་། དེ་རྗེས་ཀྱི་བྱ་སྤྱོད་རྣམས་ལ་བལྟས་ན་རྒྱ་གཞུང་གི་ངོས་ནས་དགོངས་སེལ་ཞུས་པ་དེ་མི་མང་མགོ་སྐོར་གཏོང་ཐབས་ཀྱི་འཁྲབ་སྟོན་ཙམ་ལས་ལྷག་བསམ་རྣམ་དག་ཅིག་མིན་པའི་དོགས་གཞི་ཇེ་ཆེར་ཕྱིན་ཡོད་སྐོར་གསུངས་ཏེ། རྒྱ་གཞུང་གིས་རང་གི་ནོར་འཁྲུལ་ངོས་ལེན་ཞུས་པ་བཞིན་མི་མང་གི་བསམ་ཚུལ་ལ་ལྷག་བསམ་རྣམ་དག་གིས་བདག་སྤྲོད་བྱས་ནས་བོད་མི་ཚོའི་དཀའ་སྡུག་སེལ་ཐབས་བྱེད་དགོས་པ་ལས་མང་ཚོགས་མགོ་སྐོར་བཏང་སྟེ་མུ་མཐུད་དམ་དྲག་རྒྱ་སྐྱེད་དང་ཉེས་མེད་ལ་ཁྲིམས་ཆད་གཏོང་བའི་བྱ་སྤྱོད་འདི་རིགས་འཕྲལ་དུ་མཚམས་འཇོག་དགོས་པའི་འབོད་སྐུལ་ནན་པོ་གནང་འདུགརྩ་བའི་ཟླ་ ༩ ཚེས་ ༡༧ ཉིན་བོད་ཀྱི་རྒྱལ་ས་ལྷ་སའི་འགོ་ཁྲིད་ཀྱིས་མང་ཚོགས་རྣམས་ལ་དགོངས་དག་ཐུགས་བདེན་ཞུས་པའི་གནས་སྟངས་འོག་མང་ཚོགས་དཀའ་སྡུག་མྱོང་བཞིན་པའི་གནས་སྟངས་ལ་བཟང་ཕྱོགས་ཀྱི་འགྱུར་ལྡོག་གང་ཡང་ཕྱིན་པ་དང་། སྤྱི་ཚོགས་དྲ་ལམ་སོགས་བཀག་སྡོམ་དང་ཉེས་ཆད་བཏང་སྟེ་མང་ཚོགས་ཀྱི་སྨྲ་བརྗོད་རང་དབང་བརྩི་མེད་རྡོག་རོལ་མུ་མཐུད་གཏོང་བཞིན་པའི་ཁྲོད། བོད་མི་གཅིག་ཁང་སྟེང་ནས་མཆོང་ནས་རང་སྲོག་བཅད་པའི་བརྙན་པར་ཕྱིར་འགྱར་བྱུང་བར་མ་ཟད། བོད་མི་གཞན་འགའ་ཞིག་ཀྱང་དེ་ལྟར་རང་སྲོག་བཅད་པའི་གནས་ཚུལ་ཐོས་རྒྱུ་འདུག དེ་བཞིན་ཕ་མ་རྣམས་སྲིད་གཞུང་གིས་བཙན་དབང་འོག་ཟུར་བཀག་ཁང་དུ་ཁྲིད་རྗེས་ཁྱིམ་དུ་ལོ་ ༣ ཡས་མས་ཀྱི་དབང་པོ་སྐྱོན་ཅན་གྱི་ཕྲུ་གུ་ཞིག་ལུས་ཡོད་པ་སོགས་མཐོང་རྒྱུ་འདུག

བོད་མི་ཞིག་རྒྱ་གཞུང་གིས་འཛིན་བཟུང་འོག་ཤེས་རྟོགས་མེད་པར་གྱུར་འདུག

རྒྱ་གཞུང་ཉེན་རྟོག་པས་རྒྱུ་མཚན་འདྲ་མིན་ལ་ཁ་གཡར་ནས་བོད་མི་མང་པོ་འཛིན་བཟུང་བཀག་ཉར་བྱེད་བཞིན་ཡོད་པ་ལྟར། འདི་ལོའི་ཕྱི་ཟླ་ ༨ ནང་ལ་བོད་སྐྱེ་རྒུ་མདོ་འབྲི་སྟོད་རྫོང་ནས་ཡིན་པའི་ན་གཞོན་ཚེ་བརྟན་ལགས་ཁྲིན་འདུ་གྲོང་ཁྱེར་ནས་ནག་ཉེས་ཁ་གསལ་མེད་པའི་ཐོག་འཛིན་བཟུང་གིས་བཀག་ཉར་བྱས་ནས་ཟླ་བ་གཅིག་ཙམ་ཕྱིན་ཡོད་ཀྱང་། ཁོང་བཙོན་ཁང་གང་དུ་བཀག་ཉར་བྱས་པ་དང་གཟུགས་གཞིའི་གནས་སྟངས་ཇི་ཆགས་སོགས་ཤེས་རྟོགས་གང་ཡང་ཐུབ་ཀྱི་མི་འདུག གསར་འགོད་པར་བོད་མི་ཞིག་གིས་ཁུངས་ལྡན་གནས་ཚུལ་མཁོ་སྤྲོད་གནང་བར་རྒྱ་གཞུང་ཉེན་རྟོག་པས་བོད་མི་རྣམས་ལ་རྒྱུ་མཚན་འདྲ་མིན་འོག་ནས་འཛིན་བཟུང་བཀག་ཉར་དང་གཅར་རྡུང་བཏང་བའི་གནས་སྟངས་མང་དག་ཅིག་བྱུང་ཡོད་པ་ལས་བོད་ཁམས་སྐྱེ་རྒུ་མདོ་ནས་ཡིན་པའི་བོད་མི་ཚེ་བརྟན་ལགས་ཟླ་བ་སྔོན་མར་ཆུ་དམར་ལེབ་རྫོང་དུ་རང་གི་ནང་མི་སྤུན་མཆེད་ཐུག་འཕྲད་གནང་རྗེས་ཕྱིར་ལོག་སྐབས་གློ་བུར་དུ་ཁྲིན་འདུ་ས་གནས་རྒྱ་གཞུང་ཉེན་རྟོག་པས་རྒྱུ་མཚན་གང་ཡིན་གསལ་བཤད་གང་ཡང་མེད་པར་འཛིན་བཟུང་བཙན་ཁྲིད་བྱས་ཡོད་པ་དང་། དུས་དེ་ནས་བཟུང་ཁོང་གི་ནང་མི་ཚོས་དུས་ནས་དུས་སུ་ས་གནས་རྒྱ་གཞུང་ཉེན་རྟོག་པར་ཚེ་བརྟན་ལགས་ཀྱི་གཟུགས་གཞིའི་གནས་སྟངས་དང་བཙོན་ཁང་གང་དུ་བཞག་ཡོད་པ་སོགས་དང་འབྲེལ་བའི་འདྲི་རྩད་གནང་ཡོད་ཀྱང་ཉེན་རྟོག་པའི་ངོས་ནས་ལན་འདེབས་གང་ཡང་བྱེད་ཀྱི་མེད་སྐོར་གསུངས་སོང་། རྩ་བའི་ཉེ་ཆར་ཕྱི་ཟླ་ ༨ ཚེས་ ༢༤ ཉིན་རྒྱ་གཞུང་གིས་བོད་གསེར་རྟ་ཁུལ་ནས་ཡིན་པའི་བོད་མི་ལྔ་ཆོས་ཕྱོགས་ཀྱི་བྱེད་སྒོ་སྤེལ་བའི་ཉེས་མིང་འོག་བཙན་ཁྲིད་བྱས་པ་དང་། དེ་དག་ལས་ཕྱུག་དར་ལགས་ལ་གཅར་རྡུང་དྲག་པོ་བཏང་སྟེ་དམར་གསོད་བཏང་བའི་གནས་ཚུལ་བྱུང་བ་དང་། ཟླ་ ༩ ཚེས་ ༡༤ ཉིན་རྒྱ་གཞུང་གིས་བོད་ནག་ཆུ་ཤན་རྩ་དང་རྒྱལ་ས་ལྷ་ས། ཆུ་དམར་ལེབ་རྫོང་བཅས་ནས་ཡིན་པའི་རིན་ཆེན་དོན་འགྲུབ་ལགས་ཀྱིས་གཙོས་པའི་བོད་མི་བདུན་ཏོག་དབྱིབས་རིམས་ནད་དང་འབྲེལ་བའི་པར་དང་བརྙན་སོགས་འགྲེམས་སྤེལ་བྱས་པའི་ཉེས་མིང་འོག་འཛིན་བཟུང་བཙན་ཁྲིད་བྱས་པའི་གནས་ཚུལ་ཡང་ཐོན་ཡོད། འབྲེལ་ཡོད་པར་བོད་ཀྱི་དུས་བབ།

ཆོས་ཕྱོགས་ཀྱི་བྱེད་སྒོ་སྤེལ་བའི་ཉེས་མིང་འོག་བོད་མི་གཅིག་དམར་གསོད་དང་བཞི་བཙན་ཁྲིད།

ཉེ་ཆར་ཕྱི་ཟླ་ ༨ ཚེས་ ༢༤ ཉིན་རྒྱ་གཞུང་གིས་བོད་གསེར་རྟ་ཁུལ་ནས་ཡིན་པའི་བོད་མི་ལྔ་བཙན་ཁྲིད་བྱས་པའི་ཁྲོད་ནས་ཕྱུག་དར་ལགས་ལ་གཅར་རྡུང་དྲག་པོ་བཏང་སྟེ་དམར་གསོད་བཏང་འདུགས་གནས་རྒྱ་གཞུང་ཉེན་རྟོག་པས་བོད་མི་ན་གཞོན་ཕྱུག་དར་ལགས་དང་དགེ་ལོ་ལགས། ཚེ་རྡོ་ལགས། འབའ་མོ་ལགས། ཀོ་རིས་ལགས་བཅས་ཀྱིས་རི་རྩེར་བསང་གསོལ་དང་ཞབས་རིམ་བསྒྲུབས་པ་སོགས་ཆོས་ཕྱོགས་ཀྱི་བྱེད་སྒོ་སྤེལ་ཡོད་པར་ཉེས་འཛུགས་ཀྱིས་བོད་གསེར་རྟ་རྫོང་གི་ཁེས་སྐོར་ཡུལ་ཚོའི་ཨ་བོས་དཀྱིལ་རི་མགོ་སྡེ་བ་ནས་འཛིན་བཟུང་བཙན་ཁྲིད་བྱས་ཏེ་གསེར་རྟ་རྫོང་གི་བཙོན་ཁང་དུ་ཁྲིད་འདུག་པ་དང་། སྐབས་དེར་ས་གནས་རྒྱ་གཞུང་ཉེས་རྟོག་པས་ཕྱུག་དར་ལགས་ལ་གཅར་རྡུང་དྲག་པོ་བཏང་སྟེ་དམར་གསོད་བཏང་པ་མ་ཚད་པར་བོད་མི་གཞན་བཞི་པོ་དེ་དག་འཕྲལ་མར་ཉིད་དུ་དཀར་མཛེས་རྫོང་གི་བཙོན་ཁང་དུ་བཀག་ཉར་འོག་བཅུག་འདུག གསར་འགོད་པར་གནས་ཚུལ་མཁོ་སྤྲོད་གནང་བར་བོད་མི་ན་གཞོན་ལྔ་པོ་བཙན་ཁྲིད་བྱས་པའི་སང་ཉིན་སྟེ་ཕྱི་ཟླ་ ༨ ཚེས་ ༢༥ ཉིན་ཁོང་རྣམ་པའི་ནང་མི་རྣམས་བཙོན་ཁང་དུ་ཕྱིན་ནས་ཁོང་རྣམས་ལ་ཟས་གོས་སོགས་དགོས་མཁོ་ཅན་སྤྲོད་ཐབས་བྱས་ཀྱང་རྒྱ་གཞུང་ཉེན་རྟོག་པས་དམ་དྲག་ཆེས་ཆེར་བྱས་ཏེ་ནང་མི་རྣམས་ཕྱིར་ལོག་བཏང་ཡོད་སྐོར་གསུངས་སོང་། ལྷག་པར་དུ་ཕྱི་ཟླ་ ༨ ཚེས་ ༢༦ ཉིན་ས་གནས་རྒྱ་གཞུང་ཉེན་རྟོག་པས་ཕྱུག་དར་ལགས་ཀྱི་ནང་མིར་ཁོང་བཙོན་ཁང་ནང་ཤི་སོང་བས་མགྱོགས་པོ་ཕུང་པོ་བདག་པོ་རྒྱག་པར་ཤོག་ཅེས་བཀའ་བཏང་ཡོད་པ་དང་། སྐབས་དེར་དགུང་ལོ་ ༧༡ ལ་ཕེབས་པའི་ཕྱུག་དར་ལགས་ཀྱི་ཡབ་ཐུབ་འོད་ལགས་གཙོས་སྤུན་མཆེད་ཁག་གཅིག་གསེར་རྟའི་ཉེན་རྟོག་ཁང་དུ་འབྱོར་སྐབས་ཁོང་གློ་བུར་དུ་བཙོན་ཁང་ནང་ཤི་སོང་ཞེས་འགྲེལ་བརྗོད་དང་སྦྲགས། ནང་མི་རྣམས་ལ་བཙན་དབང་ཐོག་ནས་ཕྱུག་དར་ལགས་རྒྱ་གཞུང་ཉེན་རྟོག་པས་དམར་གསོད་བཏང་མེད་སྐོར་དང་འབྲེལ་བའི་ཡིག་ཆར་མིང་རྟགས་བཀོད་བཅུག་ཡོད་པ་གསུངས་ཡོད། ཕྱུག་དར་ལགས་ནི་རང་ལོ་ ༥༢ ཙམ་ཡིན་པ་དང་། ཁོང་ནི་བཟའ་ཟླ་བུ་ཕྲུག་དང་ཕ་མ་རྒན་འཁོགས་གཉིས་བཅས་ཀྱི་འཚོ་རྟེན་ཡིན་འདུག བོད་མི་དགེ་ལོ་ལགས་དང་ཚེ་རྡོ་ལགས། འབའ་མོ་ལགས། ཀོ་རིས་ལགས་བཅས་བདུན་ཕྲག་གཅིག་གི་རིང་གསེར་རྟ་རྫོང་གི་བཙོན་ཁང་དུ་བཀག་ཉར་བྱས་རྗེས། ཕྱི་ཟླ་ ༨ ཚེས་ ༣༡ ཉིན་ཁོང་རྣམས་དཀར་མཛེས་རྫོང་གི་བཙོན་ཁང་དུ་བཙན་ཁྲིད་ཀྱིས་བཀག་ཉར་བྱེད་བཞིན་ཡོད་འདུག ས་ཁྲའི་པར་དབང་། བོད་ཀྱི་དུས་བབ།

རྒྱ་ནག་གི་འགྲོ་བ་མིའི་ཐོབ་ཐང་གནད་དོན་ཐོག་རྟོག་ཞིབ་གནང་སྐབས་བོད་གནད་ངེས་ཚུད་དགོས་ཞེས་གསུངས་འདུག

སུད་སིའི་གྲོང་ཁྱེར་ཇི་ནི་ཝར་ཟླ་ ༩ ཚེས་ ༡༢ ནས་ཟླ་ ༡༠ ཚེས་ ༧ བར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༡ པ་འཚོགས་བཞིན་པ་དང་བསྟུན་ཁ་སང་རྒྱལ་སྤྱིའི་བོད་དོན་ལས་འགུལ་ཁང་གི་ངོས་ནས་ལྷན་ཚོགས་ཀྱི་ལས་རིམ་ཞིག་གི་ནང་མཉམ་ཞུགས་གནང་བ་དང་འབྲེལ། བོད་ནང་རྒྱ་གཞུང་གིས་དྲག་གནོན་ཅན་གྱི་སྲིད་བྱུས་ལག་བསྟར་འོག་བོད་མི་མང་དག་ཅིག་དོན་མེད་འཛིན་བཟུང་བཀག་ཉར་བྱས་དང་བྱེད་བཞིན་པ་ནི་རྒྱུན་ལྡན་ལྟ་བུའི་གནས་སྟངས་ཤིག་ཆགས་ཡོད་སྐོར་གསུངས་པར་མ་ཟད། རྒྱལ་ཚོགས་ཀྱི་དེ་སྔ་ཤར་ཏུ་ཀིས་ཐན་ནང་གི་གནད་དོན་ཐོག་རྟོག་གནང་བ་ལྟར་མ་འོངས་པར་རྒྱ་ནག་ནང་གི་འགྲོ་བ་མིའི་ཐོབ་ཐང་གནད་དོན་ཐོག་རྟོག་ཞིབ་གནང་སྐབས་ངེས་པར་དུ་བོད་ཀྱི་གནད་དོན་གཙོ་བོར་གྱུར་པའི་ཧོང་ཀོང་དང་རྒྱ་རིགས་འགྲོ་བ་མིའི་ཐོབ་ཐང་རྩོད་ལེན་པའི་གནད་དོན་རྣམས་ཚུད་དགོས་པར་གསུངས་འདུག རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱལ་སྤྱིའི་བོད་དོན་ལས་འགུལ་ཁང་གི་འཇར་མ་ནི་སྡེ་ཚན་གྱི་འགན་འཛིན་ Kai Muller ལགས་ཀྱིས་ Helsinki འགྲོ་བ་མིའི་ཐོབ་ཐང་ཐེབས་རྩ་ཁང་བརྒྱུད་ནས་མཉམ་ཞུགས་གནང་ཡོད་པ་དང་། ཁ་སང་ཁོང་གིས་རྒྱལ་ཚོགས་ཀྱི་དོན་མེད་འཛིན་བཟུང་བཀག་ཉར་གྱི་ལས་དོན་ཚོགས་ཆུང་གི་སྙན་ཐོ་འགོད་འབུལ་ཞུས་པའི་ལས་རིམ་ཐོག་མཉམ་ཞུགས་གནང་སྟེ། རྒྱ་ནག་གཞུང་གིས་ཚེ་བཙོན་གྱི་ཁྲིམས་ཐག་བཅད་པའི་བོད་ནང་གི་ཚོང་པ་གྲགས་ཅན་རྡོ་རྗེ་བཀྲིས་ལགས་ཀྱི་གནད་དོན་གཙོས་རྒྱ་གཞུང་གིས་འཛིན་བཟུང་དང་བཙོན་འཇུག་གི་ཁྲིམས་ཆད་ཕོག་པའི་བོད་མི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་དང་། རིན་ཆེན་ཚུལ་ཁྲིམས་ལགས། བློ་བཟང་ལྷུན་འགྲུབ་ལགས། རྩོམ་པ་པོ་ཐུབ་བསྟན་བློ་གྲོས་ལགས།  དགེ་འདུན་ལྷུན་འགྲུབ་ལགས། གངས་དཀར་ལགས། དེ་བཞིན་ཉི་མ་ལགས་སོགས་བོད་མི་ཤེས་ལྡན་མི་སྣ་མང་དག་ཅིག་གིས་རང་ཉིད་ཀྱི་སྨྲ་བརྗོད་རང་དབང་ལོངས་སུ་སྤྱོད་པར་ཆབ་སྲིད་ཀྱི་ཉེས་མིང་འོག་འཛིན་བཟུང་བཀག་ཉར་གྱི་ཁྲིམས་ཐག་བཅད་པ་སོགས་ལུང་འདྲེན་དང་སྦྲགས། བོད་ནང་བོད་མིའི་ཐོག་དོན་མེད་བཀག་ཉར་དང་སྡུག་སྦྱོང་མནར་གཅོད་ཀྱི་གནད་དོན་རྒྱུན་ལྡན་ལྟ་བུ་འབྱུང་བཞིན་པའི་ཛ་དྲག་གི་གནས་སྟངས་རྣམས་ཆེས་མངོན་གསལ་གནང་འདུག ཁོང་གིས་ད་དུང་རྡོ་རྗེ་བཀྲིས་ལགས་ཀྱི་གནད་དོན་མངོན་གསལ་གནང་སྟེ་ཁོང་བཀག་ཉར་འོག་བཞུགས་སྐབས་སུ་ཁོང་ལ་མི་སྤྱོད་ལས་འདས་པའི་མནར་གཅོད་གཏོང་མཁན་གྱི་ཉེན་རྟོག་པའི་ངོས་ནས་ཁྱེད་རང་དམར་གསོད་བཏང་བའམ་དབང་པོ་སྐྱོན་ཅན་བཟོས་ཚེ་ང་ཚོར་ཁྲིམས་ལྟར་ཉེས་ཆད་གཅོད་མཁན་མེད་ཅེས་བཤད་ཡོད་སྐོར་ལུང་འདྲེན་དང་སྦྲགས། གཞིས་བཞུགས་མང་ཚོགས་ཀྱི་སྨྲ་བརྗོད་རང་དབང་ལ་འགོག་རྐྱེན་བཟོ་མཁན་གཙོ་བོ་དེ་ནི་དོན་མེད་འཛིན་བཟུང་བཀག་ཉར་བྱས་པ་དེ་ཆགས་ཡོད་པ་གསུངས་འདུག རྒྱལ་ཚོགས་ཀྱི་དོན་མེད་འཛིན་བཟུང་བཀག་ཉར་ལས་དོན་ཚོགས་ཆུང་གི་ངོས་ནས་མ་འོངས་པར་རྒྱ་ནག་གི་ངོས་ནས་ཁྲིམས་འགལ་གྱི་བྱ་སྤྱོད་སྤེལ་ཁག་ངེས་པར་དུ་ཁ་གསལ་བཟོ་དགོས་པ་དང་། རྒྱ་ནག་ཐོག་རང་དབང་ལྡན་པའི་རྟོག་ཞིབ་ཀྱི་ལས་དོན་ནང་བོད་ཀྱི་གནད་དོན་ངེས་པར་དུ་ཚུད་དགོས་པའི་གཞེན་སྐུལ་གནང་འདུག རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༡ ཐོག་བོད་རང་བཙན་སློབ་ཕྲུག་ཚོགས་པ་དང་རྒྱལ་སྤྱིའི་བོད་དོན་འབྲེལ་མཐུད་ཁང་། ཡུ་རོབ་བོད་ཀྱི་ན་གཞོན་ཚོགས་པ། ཁེ་ན་ཌ་ནང་གི་ Tibet Justice Center དང་ Tibet Initiative Deutschland ཞེས་འཇར་མ་ནིའི་བོད་དོན་རྒྱབ་སྐྱོར་ཚོགས་པ་བཅས་བོད་དོན་རྒྱབ་སྐྱོར་ཚོགས་པ་ལྔའི་འཐུས་མི་ལས་གྲུབ་པའི་ Tibet Advocacy Coalition ཞེས་པའི་བོད་དོན་མཉམ་ལས་ཚོགས་པས་རྒྱལ་ཚོགས་ཀྱི་ལྷན་ཚོགས་ནང་དུ་ཞབས་བཀྱག་ཡོད་པའི་ International services for Human Rights ཞེས་རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཁང་བརྒྱུད་ནས་མཉམ་ཞུགས་གནང་འདུག ཁ་སང་རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཁང་གིས་རྒྱལ་ཚོགས་ཀྱི་ངོས་ནས་རྒྱ་ནག་ལ་འགྲོ་བ་མིའི་ཐོབ་ཐང་ཐོག་འགན་འཁུར་ཇི་ལྟར་ལེན་ཐུབ་པ་བཟོ་ཐབས་དང་འབྲེལ་བའི་བརྗོད་གཞིའི་ཐོག་ཟུར་ཚོགས་ཤིག་གོ་སྒྲིག་གནང་ཡོད་པ་ལྟར་བོད་དོན་ཞུ་གཏུག་པ་རྣམ་པས་རྒྱ་ནག་གཞུང་གིས་བོད་ནང་བོད་མིའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་གནད་དོན་རྣམས་ཞིབ་རྒྱས་ངོ་སྤྲོད་དང་ཆབས་ཅིག་རྒྱལ་ཚོགས་ཀྱི་མཁས་དབང་རུ་ཁག་བོད་དུ་རྟོག་ཞིབ་སླད་ཆེད་གཏོང་དགོས་པ་སོགས་ཀྱི་སྐོར་ལ་གླེང་མོལ་གནང་འདུག པདྨ་སྒྲོལ་མ་ལགས་ཀྱིས་ད་དུང་དེ་རིང་ཉིན་རྒྱབ་ཟུར་ཚོགས་གཞན་ཞིག་གོ་སྒྲིག་གནང་བའི་ཐོག་བོད་ཀྱི་ཁོར་ཡུག་གི་གནད་དོན་སྐོར་གྲོས་བསྡུར་གནང་གི་ཡོད་པ་དང་། བོད་དོན་མཉམ་ལས་ཚོགས་པ་གཙོས་རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཚབ་མི་སྣ་བཅས་ནས་མཉམ་ཞུགས་གནང་གི་ཡོད་པ་གསུངས་སོང་།

Latest news