Tibetan Royal Year of 2151 | Year of the Wood Dragon

བོད་མིའི་སྒྲིག་འཛུགས།

ཆོས་རིག་བཀའ་བློན་མཆོག་ལ་གནས་ཆུང་ཆོས་རྒྱལ་ཆེན་པོའི་གནད་དོན་སྐོར་འདྲི་རྩད་ནན་པོ་གནང་སོང་།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་ལས་ཉིན་གཉིས་པའི་ཐོག་ཆོས་རིག་ལས་ཁུངས་ཀྱི་ལས་བསྡོམས་སྐོར་བགྲོ་གླེང་གནང་སྐབས་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོའི་གདན་ཐོབ་དང་གསོལ་ཕོགས་སྐོར་ལས་འཕྲོས་ཏེ་སྤྱི་འཐུས་ཁག་ཅིག་ནས་བཀའ་བློན་མཆོག་ལ་གནས་ཆུང་ཆོས་རྒྱལ་ཆེན་པོའི་གནད་དོན་སྐོར་ལ་འདྲི་རྩད་གནང་སོང། དེ་ཡང་ཁ་སང་ཉིན་རྒྱབ་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་གཏན་འབེབས་གནང་གྲུབ་རྗེས་བོད་མིའི་སྒྲིག་འཛུགས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཆོས་རིག་ལས་ཁུངས་ཀྱི་ཕྱི་ལོ་ ༢༠༡༦ ཟླ་ ༤ ཚེས་ ༡ ནས་འདི་ལོ་ཟླ་ ༣ ཚེས་ ༣༡ བར་༸རྒྱལ་བའི་༸སྐུ་ཕྱྭ་དང་བསྟན་སྲིད་ཞབས་རིམ་སོགས་ཆོས་ཕྱོགས་ཀྱི་ལས་དོན་དང་། གྲྭ་བཙུན་སྔགས་འཆང་གསུམ་ལ་མཐུན་རྐྱེན་སྦྱོར་སྤྲོད་སྐོར། སློབ་ཁག་གི་ལྟ་གྲུབ་དགེ་རྒན་ཚོའི་གསོལ་ཕོགས་དང་བདེ་དོན། སྤྱི་ཚོགས་ནང་ནང་ཆོས་ངོ་སྤྲོད་ལས་དོན་གནང་ལུགས་བཅས་ཀྱི་ཐོག་ནས་ལོ་འཁོར་ལས་བསྡོམས་འདོག་འབུལ་གནང་ཡོད་པ་རེད། དེ་རིང་ཆོས་རིག་ལས་ཁུངས་ཀྱི་ལས་སྡོམས་ཐོག་གྲོས་ཚོགས་འཐུས་མི་རྣམས་ནས་མུ་མཐུད་བགྲོ་གླེང་དང་དྲི་བ་དྲིས་ལན་བཅས་གནང་སྐབས་སྤྱི་འཐུས་ཅིག་གིས་ང་ཚོའི་གཞུང་འདི་ཆོས་སྲིད་ཟུང་འབྲེལ་གྱི་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དགོངས་དོན་ལྟར་ཡིན་པར་ངོས་ལེན་ཞུ་བཞིན་ཡོད་ཀྱང་། ཆོས་སྲིད་གཉིས་ལྡན་གྱི་ཆོས་ཞེས་པ་དེ་གནས་ཆུང་ཆོས་རྒྱལ་ཆེན་པོར་ངོས་འཛིན་ཞུ་བཞིན་པ་དེ་ནོར་འཁྲུལ་ཡིན་པ་དང་དེ་བོད་ཆོལ་ཁ་གསུམ་དང་ཆོས་བརྒྱུད་ཡོངས་ལ་ཁྱབ་པའི་སྐུ་རྟེན་ཞིག་གཏན་ནས་ཆགས་ཀྱི་མེད་ཅེས་ཚོར་ཤུགས་ཆེན་པོས་གསུངས་སོང་། སྐབས་དེར་ཆོས་རིག་བཀའ་བློན་མཆོག་གིས་གསལ་བཤད་ལན་འདེབས་གནང་པར་གཞུང་བསྟེན་དགྲ་ལྷར་གདན་ཐོབ་དང་གསོལ་ཕོགས་ཕུལ་རྒྱུའི་ལམ་སྲོལ་དེ་སྔ་ལམ་ཞིག་ཆགས་ཡོད་པ་དང། ང་ཚོའི་ཆོས་སྲིད་ཟུང་འབྲེལ་དེ་དུས་དང་མཐུན་པའི་ཆོས་སྲིད་བཟུང་འབྲེལ་ཞིག་ཡིན་སྐོར་འགྲེལ་བརྗོད་དང་སྦྲགས། གལ་ཏེ་ལམ་ལུགས་རང་གི་ཐད་བསྒྱུར་བཅོས་དགོས་པར་གཟིགས་ཚེ་དེ་བརྒྱུད་རིམ་གཞན་གི་ཐོག་ནས་གཏན་འབེབས་གནང་དགོས་གལ་ཡིན་པ་གསུངས་སོང་། དེ་མཚུངས་སྤྱི་འཐུས་གཞན་ཞིག་གིས་གནས་ཆུང་ཆོས་རྒྱལ་ཆེན་པོ་དེ་ལོ་རྒྱུས་ལ་ཁུངས་གཏུགས་ནས་ད་ཆ་ཆོས་སྲིད་ཟུང་འབྲེལ་གྱི་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་ལུང་འདྲེན་གྱིས་གནས་ཆུང་ཆོས་རྒྱལ་ཆེན་པོ་དེ་གལ་ཆེ་ཞིག་ཏུ་ངོས་འཛིན་གནང་གི་ཡོད་ཞེས་དང་། ཅི་སྟེ་གཞུང་བསྟེན་དགྲ་ལྷ་བསྟེན་སྲོལ་དེ་ལ་འགྱུར་བ་ཞིག་གཏོང་དགོས་ཀྱི་ཡོད་ནའང། ཆོས་སྲིད་གཉིས་ལྡན་གྱི་བཅའ་ཁྲིམས་ཀྱི་སྒྲོམ་གཞིར་འགྱུར་བ་གཏང་དགོས་པ་དང་དེ་བཞིན་སྤྱི་འཐུས་གཞན་ཞིག་ནས་གཞུང་འབྲེལ་དགྲ་ལྷ་བསྟེན་སྲོལ་དེ་འགྲིག་མི་འགྲིག་སོགས་ཞུ་དཀའ་བར་འགྲེལ་བརྗོད་གནང་ཡང་སྔར་ལམ་ཁག་ཅིག་འགྱུར་བ་གཏང་ཆེད་བགྲོ་གླེང་དང་གོ་བསྡུར་གནང་རྒྱུ་གལ་ཆེར་གཟིགས་ཀྱི་ཡོད་སྐོར་གསུང་སོང། འོན་ཀྱང་སྤྱི་འཐུས་གཅིག་གིས་ཆོས་དང་སྲིད་གཉིས་ཁ་བྲལ་ཐབས་མེད་སྐོར་གསུངས་པ་དང། སྤྱི་འཐུས་གཞན་ཞིག་ནས་ཀྱང་སྤྱིར་གཞུང་བསྟེན་དགྲ་ལྷ་གལ་ཆེན་པོ་ཡིན་པ་ངོས་ལེན་ཞུ་བཞིན་ཡོད་ཀྱང་སྒྲིག་འཛུགས་ཀྱིས་དགྲ་ལྷ་བེད་སྤྱོད་གཏོང་ཕྱོགས་ལ་དྲི་བ་ཡོད་པ་དང། ཁག་ཅིག་ནས་དེ་རིང་གི་བགྲོ་གླེང་དེའི་གྲོས་ལ་གཞིགས་ཏེ་སྤྱི་འཐུས་རྣམས་ལ་ཆོས་བརྒྱུད་ཀྱི་འཐེན་འཁྱེར་གནང་རྒྱུ་མེད་པར་འབོད་སྐུལ་གནང་མཁན་བྱུང་སོང། རྩ་བའི་དེ་རིང་ཆོས་རིག་ལས་ཁུངས་ཀྱི་ལས་སྡོམས་དང་འབྲེལ་བའི་བགྲོ་གླེང་དེའི་ཁྲོད་སྤྱི་འཐུས་འགའ་ཞིག་གིས་ཆོས་རིག་ལས་ཁུངས་ཀྱི་ནང་ཆོས་ངོ་སྤྲོད་ལས་དོན་དང་འབྲེལ་ད་བར་ས་གནས་ག་ཚོད་ནང་ནང་དོན་རིག་པའི་ངོ་སྤྲོད་ལས་འགུལ་གང་སྤེལ་ཡོད་མེད་དང་དེ་དང་ལྷན་དུ་ཞར་བྱུང་བོད་ཡིག་བྲིས་ཀློག་སློབ་ཁྲིད་གནང་དགོས་པ། དེ་བཞིན་ནང་ཆོས་ངོ་སྤྲོད་སློབ་ཁྲིད་གནང་མཁན་གྱི་ལྟ་གྲུབ་དགེ་རྒན་རྣམས་གདན་ས་གང་དང་གང་ནས་གདན་ཞུ་གནང་མིན་དང་ཁོང་རྣམས་རིས་སུ་མ་ཆད་པའི་ཆོས་བརྒྱུད་ཁག་ནས་ཡིན་མིན་བཅས་ཀྱི་སྐོར་གསུང་མཁན་ཡང་བྱུང་སོང་། གཞན་ཡང་སྤྱི་འཐུས་ཤིག་གིས་བགྲོ་གླེང་དེའི་ཐོག་ཆ་ཤས་བཞེས་པར་ལྟ་གྲུབ་དགེ་རྒན་ཚོས་ནང་ཆོས་ངོ་སྤྲོད་གནང་སྐབས་གཙོ་ཆེ་ཤོས་དེ་ནང་ཆོས་ངོ་སྤྲོད་གནང་ཡུལ་གྱི་གདུལ་བྱ་དེར་ནང་ཆོས་ངོ་སྤྲོད་ཐུབ་པ་ཞིག་གནང་རྒྱུ་ཡིན་པ་མ་གཏོགས་ནང་ཆོས་ངོ་སྤྲོད་གནང་མཁན་ལ་ཁྱད་པར་གང་ཡང་མེད་སྐོར་གསུངས་པ་དང་འབྲེལ། ལྷག་དོན་ནང་ཆོས་ངོ་སྤྲོད་བྱ་རྒྱུ་ཆེད་དམིགས་བསལ་སློབ་ཚན་ཞིག་གཏན་འབེབས་གནང་ཐུབ་ན་དགེ་མཚན་ཆེ་བར་གཟིགས་ཀྱི་ཡོད་པར་དགོངས་འཆར་ཕུལ་སོང་།

དབུ་མའི་ལམ་ལ་ཡིད་ཆེས་དང་རྒྱབ་སྐྱོར་ཡོད་ཐོག་འགན་འཁུར་ནས་ལས་འགུལ་ནང་མཉམ་ཞུགས་གནང་དགོས།

དེ་རིང་ཟླ་ ༩ ཚེས་ ༡༨ ཉིན་སྔ་དྲོ་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་དེ་ཕྱི་ལོ་ ༡༩༩༧ ལོའི་ཟླ་ ༩ ཚེས་ ༡༨ ཉིན་བོད་མི་མང་སྤྱི་འཐུས་ལྷན་ཚོགས་སུ་སྤྱི་མོས་གཏན་འབེབས་གནང་པའི་ཉིན་མོ་དང་བསྟུན། དབུ་མའི་ལམ་གྱི་མི་མང་ལས་འགུལ་ཁང་གི་གོ་སྒྲིག་འོག་བཞུགས་སྒར་རྟེན་གཞི་བྱས་པའི་ཡོངས་གླིང་སློབ་གྲྭའི་ཚོགས་ཁང་དུ་མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་སྒྲོལ་མ་ཚེ་རིང་ལགས་དང་། དམིགས་བསལ་སྐུ་མགྲོན་སྤྱི་འཐུས་བློ་བཟང་ཆོས་འབྱོར་ལགས་རྣམ་གཉིས་གཙོས་སྤྱི་འཐུས་ཁག་ཅིག དྷ་ས་ས་གནས་འགོ་འཛིན་ཟླ་བ་རིན་ཆེན་ལགས། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མང་ཚོགས་བཅས་ཁྱོན་མི་གྲངས་ ༡༠༠ ལྷག་ལྷན་འཛོམས་ཀྱིས་དབུ་མའི་ལམ་གྱི་ཉིན་མོ་ཐེངས་ ༧ པ་སྲུང་བརྩི་ཞུས་སོང་། མཛད་སྒོའི་ཐོག་མོར་དབུ་མའི་ལམ་མི་མང་ལས་འགུལ་ཁང་ནས་ཚོགས་བཅར་བ་ཡོངས་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དེ་སྔ་དབུ་མའི་ལམ་གྱི་སྲིད་བྱུས་གཏན་འབེབས་གནང་ཕྱོགས་དང་དེའི་གལ་གནད་བཅས་ཀྱི་སྐོར་ལ་དམིགས་བསལ་བཀའ་སློབ་བཀའ་དྲིན་སྩལ་བའི་བརྙན་པར་ཁག་ཅིག་གཟིགས་འབུལ་ཞུས་པ་དང་སྦྲགས། ལས་འགུལ་གྱི་འགན་འཛིན་བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་༸གོང་ས་མཆོག་གིས་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་ནི་རྒྱ་རིགས་མང་ཚོགས་ཀྱི་ཁེ་ཕན་ཙམ་མིན་པར་འཛམ་གླིང་ཡོངས་ཀྱི་ཁེ་ཕན་དང་འབྲེལ་བའི་ཡང་དག་པའི་སྲིད་བྱུས་ཤིག་དང་། ལྷག་དོན་སྲིད་བྱུས་དེར་རྒྱ་ཆེ་བོད་རིགས་མང་ཚོགས་ཕལ་མོ་ཆེས་ཚད་མཐོའི་རྒྱབ་སྐྱོར་དང་སྤྱི་འཐུས་ལྷན་ཚོགས་ཀྱིས་སྤྱི་མོས་ཐོག་གཏན་ལ་ཕབ་པ་ཞིག་ཡིན་སྟབས། གཞུང་དང་གཞུང་འབྲེལ་མིན་པའི་ཚོགས་པ་དང་གཞི་རིམ་མང་ཚོགས་བཅས་ནས་སྲིད་བྱུས་དེར་བརྩི་བཀུར་དང་རྒྱབ་སྐྱོར་ཡོད་པ་ལྟར་དངོས་སུ་འགན་འཁུར་ནས་ལས་འགུལ་ནང་མཉམ་ཞུགས་གནང་དགོས་གལ་ཡིན་པ་གསུངས་སོང་། མཛད་སྒོའི་སྐུ་མགྲོན་གཙོ་བོ་སྤྱི་འཐུས་སྒྲོལ་མ་ཚེ་རིང་ལགས་ཀྱིས་དབུ་མའི་ལམ་གྱི་སྲིད་དེ་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོར་བསྩལ་གནང་མཛད་པ་ཙམ་དུ་མ་བཞག་པར་དེ་རང་ཉིད་སོ་སོའི་ལམ་ཞིག་ཡིན་པར་ངོས་འཛིན་ཞུ་ཐོག་རྒྱུན་དུ་ནས་བོད་ཀྱི་རིག་གཞུང་སྲུང་སྐྱོབ་བྱ་རྒྱུ་ཐད་དམིགས་བསལ་འགན་འཁུར་དགོས་པར་གསུང་བཤད་གནང་སོང་། སྤྱི་འཐུས་བློ་བཟང་ཆོས་འབྱོར་ལགས་ནས་བོད་མི་མི་རེ་ངོ་རེ་ནས་རང་གི་སྒོ་གསུམ་གྱི་བྱ་སྤྱོད་ཡོངས་རྫོགས་དབུ་མའི་ལམ་དང་མཐུན་པ་གནང་རྒྱུ་དང་། སྲིད་བྱུས་དེར་ཡིད་ཆེས་དང་ངེས་པ་རྙེད་ཡོད་པ་དེ་རྒྱ་རིགས་མང་ཚོགས་ཁྲོད་ར་སྤྲོད་ཐུབ་ཐབས་གནང་དགོས་གལ་ཡིན་པ་སོགས་གསུངས་སོང་། རྩ་བའི་བོད་ཀྱི་གཞོན་ནུ་ལྷན་ཚོགས་ཀྱིས་སྣེ་ཁྲིད་པའི་གཞུང་འབྲེལ་མ་ཡིན་པའི་ཚོགས་སྒེར་ཁག་ནས་རང་བཙན་འཐབ་རྩོད་བྱེད་བཞིན་ཡོད་པ་དང་། ཉེ་ཆར་བོད་ཀྱི་གཞོན་ནུ་ལྷན་ཚོགས་ནས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༨ པ་ཚོགས་སྐབས་སྤྱི་ཚོགས་ནང་བོད་དེ་རང་བཙན་གྱི་རྒྱལ་ཁབ་ཅིག་ཡིན་པའི་གོ་རྟོགས་ལས་འགུལ་སྤེལ་ཕྱོགས་དང་སྒྲིག་འཛུགས་སྲ་བརྟན་ཡོང་ཐབས་སོགས་ཀྱི་གྲོས་ཆོད་བཞག་ཡོད་པ་མ་ཟད། ཟླ་བ་སྔོན་མའི་ཕ་རན་སིའི་རྒྱལ་ས་པེ་རིས་དུ་བོད་རིགས་རང་བཙན་འཐབ་རྩོད་པ་ཁག་ཅིག་གི་གོ་སྒྲིག་འོག་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་བསྐོང་ཚོགས་གནང་ཐོག་མ་འོངས་པར་སོ་སོའི་རྩ་དོན་འཐབ་རྩོད་ཀྱི་ཆེད་དུ་ནུས་པ་མཉམ་སྤུངས་དང་མཉམ་ལས་བྱ་རྒྱུར་མོས་མཐུན་ཡོད་པ་སོགས་དོན་ཚན་ལྔ་ཅན་གྱི་ཡོངས་ཁྱབ་བསྒྲགས་གཏམ་ཞིག་སྤེལ་གནང་ཡོད་པ་རེད།

ཐེ་ཝན་རང་དབང་གོམ་བགྲོད་ཀྱི་ལས་འགུལ་ནང་དུ་བོད་མིས་མཉམ་ཞུགས་གནང་འདུག

ཨ་རིའི་གྲོང་ཁྱེར་ནིའུ་ཡོག་ཏུ་ཐེ་ཝན་རང་དབང་གོམ་བགྲོད་ཀྱི་ལས་འགུལ་སྤེལ་བའི་ནང་དུ་བོད་མི་ཚོས་མཉམ་ཞུགས་ཀྱིས་ཐེ་ཝན་དང་ཡུ་གུར། དེ་བཞིན་སོག་པོའི་མང་ཚོགས་བཅས་ཀྱི་རང་དབང་འཐབ་རྩོད་ལ་རྒྱབ་སྐྱོར་དང་གདུང་སེམས་མཉམ་བསྐྱེད་མཚོན་པ་གནང་འདུག ཐེ་ཝན་གྱི་གྲོས་ཚོགས་འཐུས་མི་ Shui Yang Ming ལགས་དང། Yu Wan Rao ལགས། དེ་བཞིན་དེ་སྔའི་ཐེ་ཝན་གྱི་རྒྱལ་སྲུང་བློན་ཆེན་ཟུར་པ་ Tsai Ming Shian ལགས་གཙོས་པའི་ཐེ་ཝན་མང་གཙོ་ལས་འགུལ་བ་ཁག་ཅིག་གིས་སྣེ་ཁྲིད་ནས་མཉམ་འབྲེལ་རྒྱལ་ཚོགས་ལ་ཐེ་ཝན་རྒྱལ་ཁབ་དེ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁོངས་སུ་བཅུག་དགོས་པར་རེ་འདུན་བཏོན་ཐོག་ཁ་ཉིན་ཨ་མི་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་རྒྱ་ནག་གཞུང་ཚབ་ཡན་ལག་ལས་ཁུངས་མདུན་ནས་མཉམ་འབྲེལ་རྒྱལ་ཚོགས་ཀྱི་ལས་ཁུངས་བར་ཐེ་ཝན་རང་དབང་གོམ་བགྲོད་ཀྱི་ལས་འགུལ་ཞིག་སྤེལ་འདུག སྐབས་དེའི་གོམ་བགྲོད་ཀྱི་ལས་འགུལ་དེའི་ནང་ཨ་རི་ནིའུ་ཡོག་དང་ནིའུ་ཇར་སི་བོད་ཀྱི་གཞོན་ནུ་ལྷན་ཚོགས་དང་བོད་རིགས་སྤྱི་མཐུན་ཚོགས་པའི་སྐུ་ཚབ་འཐུས་མི། བོད་རང་བཙན་སློབ་ཕྲུག་ཚོགས་པ། ས་གནས་སུ་ཡོད་པའི་ཐེ་ཝན་དང་ཡུ་གུར། སོག་པོའི་མི་རིགས། ཧོང་ཀོང་མང་གཙོ་ལས་འགུལ་བ། དེ་བཞིན་རྒྱ་རིགས་བཅས་ཁྱོན་ལས་འགུལ་བ་ཆིག་སྟོང་ལྷག་ནས་མཉམ་ཞུགས་གནང་འདུག ལས་འགུལ་ཐོག་བོད་རང་བཙན་སློབ་ཕྲུག་ཚོགས་པའི་འགན་འཛིན་དང་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་ཆིག་སྒྲིལ་གྱི་ནུས་པའི་ཐོག་རང་དབང་འཐབ་རྩོད་ལ་རྒྱལ་ཁ་ཐོབ་རྒྱུ་ཡིན་པ་གསུངས་པ་དང་འབྲེལ། ད་ཆ་རྒྱ་གཞུང་གི་སྲིད་འཛིན་ཞི་ཅིང་གི་སྣེ་ཁྲིད་པའི་དབང་ཆ་གཅིག་བསྡུས་རིང་ལུགས་ལྡན་པའི་རྒྱ་ནག་དམར་གཞུང་གིས་བོད་དང་ཐེ་ཝན། ཧོང་ཀོང་། དེ་བཞིན་ཡུ་གུར་སོགས་ཀྱི་ནང་མང་གཙོ་ལས་འགུལ་བ་དང་ཁྲིམས་རྩོད་པ་དང། རང་དབང་འཐབ་རྩོད་པའི་ཐོག་དྲག་གནོན་དང་དམ་དྲག དེ་བཞིན་བཙན་དབང་གིས་འཛིན་བཟུང་བྱེད་བཞིན་བཅས་ཛ་དྲག་གི་གནས་སྟངས་འོག་གནས་ཡོད་པ་འགྲེལ་བརྗོད་གནང་འདུག རང་དབང་ལུང་པའི་ནང་ཡོད་པའི་རྒྱལ་སྤྱིའི་གཞུང་དང་ལྷག་པར་དུ་མཉམ་འབྲེལ་རྒྱལ་ཚོགས་ནས་ཁུལ་དེའི་ནང་གི་མང་ཚོགས་ཀྱི་བདེན་པའི་འཐབ་རྩོད་ལ་རྒྱབ་སྐྱོར་གནང་དགོས་པའི་རེ་འདུན་བཏོན་འདུག དེ་བཞིན་སྲིད་འཛིན་ཞི་ཅིང་ཕིང་གི་ངོས་ནས་ད་ལྟའི་རྒྱ་ནག་གི་དབང་ཆ་གཅིག་བསྡུས་རིང་ལུགས་ཀྱི་ལམ་ལུགས་དེ་རྒྱུན་གནས་ཐུབ་ཐབས་མེད་པ་ཤེས་དགོས་པ་དང། རྒྱ་གཞུང་གིས་མང་ཚོགས་ཐོག་ཇི་ཙམ་གྱིས་དྲག་གནོན་བྱས་པ་དེ་ཙམ་གྱིས་མང་ཚོགས་ཚོའི་ངོས་ནས་དྲག་གནོན་ལ་འགོག་རྒོལ་གྱི་ལས་འགུལ་སྤེལ་ཤུགས་ཆེ་རུ་འགྲོ་རྒྱུ་ཡིན་པ་རེད་ཅེས་གསུངས་འདུག རྩ་བའི་ཕྱི་ལོ་ ༡༩༤༩ ལོ་རྗེས་ཐེ་ཝན་མཚོ་གླིང་དེ་རྒྱ་ནག་ནས་ཁ་བྲལ་དུ་ཕྱིན་པའི་རྒྱལ་ཁབ་ཅིག་ཡིན་པ་རེད།  ཕྱི་ལོ་ ༡༩༧༡ ལོར་མཉམ་འབྲེལ་རྒྱལ་ཚོགས་ཀྱི་ཚོགས་མིའི་ཞབས་སྟེགས་དེ་རྒྱ་ནག་མི་མང་སྤྱི་མཐུན་རྒྱལ་ཁབ་ལ་ཤོར་ནས་ད་བར་ལོ་ ༤༠ ལྷག་གི་རིང་ཐེ་ཝན་གིས་རྒྱལ་ཚོགས་ཀྱི་ཚོགས་མིའི་ཁོངས་སུ་ཞུགས་རྒྱུར་རྩོད་ལེན་གནང་བཞིན་ཡོད་པ་དང། ཕྱོགས་གཞན་ཞིག་ནས་རྒྱ་གཞུང་གིས་རྒྱལ་སྤྱིའི་ཁྲོད་ཐེ་ཝན་རྒྱལ་ཁབ་དེ་རྒྱ་ནག་གི་ཆ་ཤས་ཡིན་པ་དང་རྒྱ་ནག་སྐམ་ས་དང་ལྷན་གཅིག་ཏུ་གནས་རྒྱུར་རྩོད་ལེན་བྱེད་བཞིན་ཡོད་པ་རེད།

བོད་ཁྱིམ་སློག་ཁག་ནང་ཁུལ་རིགས་ལམ་འདུ་འཛོམས་ཆེན་མོ་དབུ་འཛུགས་གནང་སོང་།

དེ་རིང་ཟླ་ ༩ ཚེས་ ༡༨ ཉིན་བཞུགས་སྒར་གྱི་ཉེ་འདབས་སུ་རྟེན་གཞི་བྱས་པའི་དྷ་ཤོད་བོད་ཁྱིམ་སློབ་གྲྭར་བོད་ཁྱིམ་སློབ་གྲྭ་ཁག་གི་རིགས་ལམ་འདུ་འཛོམས་ཆེན་མོ་ཐེངས་ ༧ དེ་དབུ་འཛུགས་གནང་སོང་། རིགས་ལམ་གྱི་འདུ་འཛོམས་ཆེན་མོ་དེའི་ཐོག་དྷ་ས་ཉེ་ཁུལ་གྱི་བོད་ཁྱིམ་སློབ་གྲྭ་ཁག་དྲུག་དང་། སཾ་བྷོ་ཊའི་སློབ་གྲྭ་གཉིས་བཅས་ཀྱི་འཛིན་རིམ་ལྔ་པ་ནས་དགུ་པ་བར་གྱི་ཁྱོན་སློབ་མ་ ༣༠༠ ལྷག་ནས་མཉམ་ཞུགས་གནང་འདུག་པ་དང་། དེ་རིང་དབུ་འཛུགས་ཀྱི་མཛད་སྒོའི་སྐུ་མགྲོན་གཙོ་བོ་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོའི་སྐུ་རྟེན་རིན་པོ་ཆེ་མཆོག་དབུ་བཞུགས་ཀྱིས་རིགས་ལམ་གྱི་གལ་གནད་དང་དེར་སློབ་གཉེར་གནང་དགོས་གལ་ཡིན་པ་སོགས་ཀྱི་ལམ་སྟོན་བཀའ་སློབ་བཅས་གནང་སོང་།

གླིང་ཚ་ཚེ་བརྟན་རྡོ་རྗེ་ལགས་ལ་ཞི་བའི་འཐབ་རྩོད་པའི་གཟེངས་རྟགས་ཕུལ་སོང་།

དེ་རིང་ཟླ་ ༩ ཚེས་ ༡༦ ཉིན་བཞུགས་སྒར་དུ་བོད་ལྗོངས་མདོ་སྨད་ཆོལ་ཁའི་དམིགས་བསལ་ཚོགས་ཆེན་གྱི་དབུ་འབྱེད་མཛད་སྒོའི་ཐོག་གར་སོང་ཆ་མེད་དུ་གྱུར་བའི་བོད་མི་ལས་འགུལ་བ་གླིང་ཚ་ཚེ་བརྟན་རྡོ་རྗེ་ལགས་ལ་ཞི་བའི་འཐབ་རྩོད་པའི་གཟེངས་རྟགས་འབུལ་བཞེས་གནང་སོང། གླིང་ཚ་ཚེ་བརྟན་རྡོ་རྗེ་ལགས་ནི་བོད་མདོ་སྨད་བླ་བྲང་ཁུལ་ནས་ཡིན་པ་དང། ཁོང་ནས་དེ་སྔ་ཕྱི་ལོ་ ༢༠༡༢ ལོར་རང་གི་ཨ་མ་ལགས་དང་སྲིང་མོའི་ལྷན་དུ་བལ་ཡུལ་བར་ཞི་བའི་གོམ་བགྲོད་གནང་ཡོད་པ་རེད། སྐབས་དེར་ཁོང་རྣམས་ནས་བོད་བར་གོམ་བགྲོད་གནང་འཆར་ཡོད་ཀྱང། བལ་ཡུལ་ས་མཚམས་སུ་ཉེན་རྟོག་པས་དཀག་སྡོམ་བྱེད་རྐྱེན་གོམ་བགྲོད་དེ་མུར་མཚམས་འཇོག་གནང་དགོས་བྱུང་ཡོད་སྟབས། གླིང་ཚ་ཚེ་བརྟན་རྡོ་རྗེ་ལགས་ནས་ཕྱི་ལོ་ ༢༠༡༣ ལོར་ཁོང་ཁེར་རྐྱང་ཐོག་སླར་བོད་བར་ཞི་བའི་གོམ་བགྲོད་བསྐྱོད་སྐབས་རྒྱ་གར་བྱང་ཤར་བོད་རྒྱ་ས་མཚམས་ནས་གར་སོང་ཆ་མེད་དུ་གྱུར་རྗེས་ད་བར་ཤི་གསོན་གང་ཡིན་སོགས་ཀྱི་གནས་ཚུལ་ཤེས་རྟོགས་མེད་པ་གྱུར་ཡོད་པ་རེད། བཞུགས་སྒར་ཀིརྟི་བྱེས་པ་གྲྭ་ཚང་གི་ཚོགས་ཁང་དུ་སྐབས་ ༡༦ པའི་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག་བོད་ལྗོང་མདོ་སྨད་ཆོལ་ཁའི་དམིགས་བསལ་ཚོགས་ཆེན་དབུ་འཛུགས་ཀྱི་མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་གླིང་ཚ་ཚེ་བརྟན་རྡོ་རྗེ་ལགས་ལ་ཞི་བའི་འཐབ་རྩོད་པའི་གཟེངས་རྟགས་དེ་གནང་སོང་བ་དང། སྐབས་དེར་ཁོང་གི་མ་སྡོམ་པ་སྐྱིད་ལགས་ནས་རང་ཉིད་ཀྱི་བུའི་ཚབ་ཞུས་ཐོག་གཟེངས་རྟག་དེ་བཞེས་ཡོད་པ་རེད། རྩ་བའི་དེ་རིང་ནས་དབུ་འཛུགས་གནང་བའི་བོད་ལྗོང་མདོ་སྨད་ཆོལ་ཁའི་དམིགས་བསལ་ཚོགས་ཆེན་དེ་ནི་གཙོ་བོ་དེ་སྔོན་སྐབས་ ༡༥ པའི་ཚོགས་ཆེན་ཐོག་མདོ་སྨད་སྤྱི་ལ་ཁྱབ་པའི་སྒྲིག་གཞི་གང་མགྱོགས་གཏན་འབེབས་དགོས་པའི་གྲོས་ཆོད་བཞག་ཡོད་པ་ལྟར། སྐབས་ ༡༦ པའི་རྒྱུན་ལས་རྣམས་ནས་སྒྲིག་གཞིའི་ཟིན་བྲིས་ཆ་ཚང་བ་ཞིག་གནང་ཟིན་ཡོད་པ་དང་། དེ་རིང་གི་དམིགས་གསལ་ཚོགས་ཆེན་འདིའི་ཐོག་སྒྲིག་གཞི་དེ་དག་ཐོག་གྲོས་བསྡུར་གནང་རྗེས་གཏན་འབེབས་བྱ་རྒྱུ་དང་། དེ་བཞིན་བོད་ཕྱི་ནང་གཉིས་ཀྱི་བོད་འབངས་ཡོངས་ཀྱི་སྐྱབས་གནས་དང་ཕ་མ་ལྟ་བུ་༸གོང་ས་༸སྐྱབས་མགོན་ཆེན་པོ་མཆོག་ལ་གཞི་མེད་སྐྱོན་འཛུགས་དང་མཚན་སྨད་ཞུ་མཁན་རིགས་ལ་གདོང་ལེན་གནང་ཕྱོགས་གཙོས། བོད་པའི་སྤྱི་ཚོགས་ནང་དུ་ཆོལ་ཁའི་འཐེན་འཁྱེར་གྱི་གནད་དོན་བཅས་དོན་ཚན་ ༨ ཀྱི་ཐོག་ལ་གྲོས་བསྡུར་གནང་ཕྱིར་ཚོགས་པ་ཞིག་རེད་འདུག སྐུ་མགྲོན་གཙོ་བོ་མཁན་པོ་བསོད་ནམས་བསྟན་འཕེལ་མཆོག་གིས་བོད་རྒྱ་ཆེ་མང་ཚོགས་རྣམས་རྡོག་རྩ་ཆིག་སྒྲིལ་ཐོག་མཉམ་གནས་བྱེད་རྒྱུ་དང། ཆིག་སྒྲིལ་གྱི་ནུས་པའི་ཐོག་ནས་བོད་དོན་འཐབ་རྩོད་རྒྱུན་སྐྱོང་གནང་དགོས་གལ་ཡིན་པ་སོགས་ཀྱི་གསུང་བཤད་གནང་བ་མ་ཟད། དེ་བཞིན་དམིགས་གསལ་སྐུ་མགྲོན་བཀའ་ཟུར་ཀིརྟིའི་རིན་པོ་ཆེ་མཆོག་ནས་རྒྱ་ཆེ་མང་ཚོགས་ནས་༸གོང་ས་མཆོག་གི་དགོངས་པ་དང་མཐུན་པའི་ལས་ཀ་བྱེད་དགོས་གལ་དང་། ལྷག་དོན་ད་ལྟའི་མི་རིགས་རྣམས་ནས་བོད་ཆོལ་ཁ་གསུམ་ཆིག་སྒྲིལ་ངང་གནས་ཐོག་མི་རབས་རྒན་པའི་བྱ་གཞག་རྒྱུན་སྐྱོང་ཐུབ་པ་བྱེད་དགོས་གལ་ཡིན་པ་སོགས་ཀྱི་ལམ་སྟོན་གནང་སོང་། ཐེངས་འདིའི་དམིགས་གསལ་ཚོགས་ཆེན་འདི་བཞིན་དེ་རིང་ཕྱི་ཟླ་ ༩ ཚེས་ ༡༦ ཉིན་ནས་དབུ་འཛུགས་ཀྱིས་ཚེས་ ༡༨ བར་ཉིན་གྲངས་གསུམ་རིང་ཚོགས་རྒྱུ་རེད་འདུག

མུམ་བའེ་གནམ་ཐང་ནས་བོད་མི་གཉིས་འཛིན་བཟུང་བྱས་འདུག

རྒྱ་གར་གྱི་གྲོང་ཁྱེར་མུམ་བའེ་རྒྱལ་སྤྱིའི་གནམ་ཐང་དུ་བོད་མི་གཉིས་ཀྱིས་མ་ལེ་ཤི་ཡའི་ཕྱི་སྐྱོད་ལག་ཁྱེར་རྫུན་བཟོ་ཐོག་བསྐྱོད་སྐབས་ཉེན་རྟོག་པས་འཛིན་བཟུང་བྱས་འདུག དེའང་ཟླབ་འདིའི་ཚེས་ ༢ ཉིན་རྒྱ་གར་མུམ་བའེ་གྲོང་ཁྱེར་གྱི་ Chhatrapati Shivaji International Airport གནམ་ཐང་དུ་བོད་མི་གཉིས་ཀྱིས་མ་ལེ་ཤི་ཡའི་ཕྱི་སྐྱོད་ལག་ཁྱེར་དང་འགྲུལ་བཞུད་འཛིན་བྱང་རྫུན་མ་བེད་སྤྱོད་བརྒྱུད་མུམ་བའེ་ནས་ཕ་རན་སིར་བསྐྱོད་རྩི་བྱེད་སྐབས་རྒྱ་གར་གྱི་ཕྱི་མི་ཞིབ་བཤེར་ཉེན་རྟོག་པས་གནམ་ཐང་གི་ཐོན་སྒོ་ཨང་ ༦༩ ནས་ཁོང་རྣམ་གཉིས་འཛིན་བཟུང་བྱས་འདུག་པ་དང། བོད་མི་དེ་དག་གཉིས་ནི་རང་ལོ་ ༣༩ ཡིན་པའི་དཀོན་མཆོག་དབང་འདུས་དང་རང་ལོ་ ༣༢ ཡིན་པའི་ཚེ་རིང་སྒྲོལ་དཀར་རེད་འདུག Indian Express གསར་ཤོག་ཐོག་ཐོན་པའི་གནས་ཚུལ་ནང་གསལ་ལྟར་ན། བོད་མི་གཉིས་པོ་དེ་དག་ནས་དེ་ཉིན་ཐོག་མར་མུམ་བའེ་ནས་ Ahmedabad གྲོང་ཁྱེར་བར་འགྲུལ་སྐྱོད་བྱེད་ཚུལ་འོག་གནམ་ཐང་དུ་ཞུགས་པ་དང། དེ་རྗེས་མངོན་གསལ་མིན་པའི་ཐོག་ནས་གནམ་ཐང་གི་རྒྱལ་སྤྱིའི་འགྲུལ་སྐྱོད་སྡེ་ཚན་ཕྱོགས་སུ་བསྐྱོད་པ་མ་ཟད། དེ་གར་བསོད་ནམས་ཡུམ་ལོ་ཞུ་བའི་འགྲིམ་འགྲུལ་ལས་མི་ཞིག་དང་ཐུག་འཕྲད་བྱས་ཡོད་པ་དང། ཁོ་པས་ཁོང་རྣམ་པ་གཉིས་ལ་དོ་དག་སོ་སོའི་པར་སྦྱར་བའི་མ་ལེ་ཤི་ཡའི་ཕྱི་སྐྱོད་ལག་འཁྱེར་དང་མ་ལེ་ཤི་ཡའི་མི་གཉིས་ཀྱི་མིང་འཁོད་པའི་ france གྱི་འགྲུལ་བཞུད་འཛིན་བྱང་བཅས་སྤྲད་ཡོད་ཀྱང། གནམ་གྲུར་མ་བཞུགས་གོང་འཛིན་བཟུང་བྱས་ཡོད་པ་རེད་འདུག བོད་མི་གཉིས་པོ་དེ་དག་གིས་ཕྱི་མི་ཞིབ་བཤེར་མི་སྣར་འགྲེལ་བརྗོད་བྱེད་དོན་ལྟར་ན། ཁོང་གཉིས་མུམ་བའེ་དུ་ཟླ་ ༨ ཚེས་ ༢༨ ཉིན་འབྱོར་བ་དང་འབྲེལ་འགྲིམ་འགྲུལ་ལས་ཁང་ཞིག་དང་ཐུག་འཕྲད་བྱུང་བ་མ་ཟད། ཁོང་གཉིས་མུམ་བའེ་ནས་མ་ཐོན་པའི་ཉིན་ཤས་གོང་དུ་གནམ་ཐང་གི་ཉེ་འགྲམ་མགྲོན་ཁང་ཞིག་ཏུ་བསྡད་པ་དང་དེ་བཞིན་ Ahmedabad གྲོང་ཁྱེར་ལ་འགྲུལ་སྐྱོད་བྱ་རྒྱུའི་ཁྲིམས་མཐུན་གྱི་གནམ་གྲུའི་འཛིན་བྱང་ཉོས་ཡོད་སྐོར་བཤད་འདུག སྐོར་སྲུང་བས་ད་ལྟའི་ཆར་བསོད་ནམས་ཡུམ་ལོ་ཞུ་བའི་ལས་མི་དེ་རྩད་ཞིབ་གནང་མུས་ཡིན་པ་དང་། བོད་མི་དེ་གཉིས་ལ་བསླུ་བྲིད་དང་ལག་ཁྱེར་རྫུན་བཟོའི་ཉེས་འཛུགས་བྱས་ཡོད་ཀྱང། ཁོང་རྣམ་གཉིས་ཀྱི་ཁྲིམས་རྩོད་པ་སྐུ་ཞབས་ Prabhakar Tripathi ལགས་དང་སྐུ་ཞབས་ Rakesh Singh རྣམ་གཉིས་ཀྱིས་བོད་མི་གཉིས་པོ་དེ་དག་འགྲིམ་འགྲུལ་ལས་ཁང་གི་མགོ་སྐོར་འོག་ཚུད་ཡོད་པ་དང་། འགྲིམ་འགྲུལ་ལས་ཁང་གིས་ཁོང་གཉིས་ལ་འགྲུལ་སྐྱོད་དང་མུམ་བའེ་ནང་ཞག་བསྡོད། དེ་བཞིན་འགྲུལ་བཞུད་འཛིན་བྱང་སོགས་བཀོད་སྒྲིག་བྱས་ཡོད་པ་གསུངས་པ་མ་ཟད། གནམ་ཐང་ནང་ཁོང་གཉིས་འཛིན་བཟུང་བྱེད་སྐབས་འགྲིམ་འགྲུལ་ལས་མི་གར་སོང་ཆ་མེད་དུ་གྱུར་ཡོད་སྐོར་འགྲེལ་བརྗོད་གནང་འདུག ད་དུང་ཁོང་གིས་བོད་མི་གཉིས་པོ་དེ་དབྱིན་སྐད་མི་ཤེས་པའི་ཁར་འགྲུལ་སྐྱོད་ཀྱི་འཛིན་བྱང་ཐོག་ཏུ་མིང་གང་བཀོད་མེད་སོགས་ཀྱང་མི་ཤེས་པའི་ཡིག་རྨོངས་ཤིག་ཡིན་སྟབས། ཁོང་གཉིས་ལ་འགྲིམ་འགྲུལ་ལས་ཁང་གིས་མགོ་སྐོར་བཏང་ཡོད་པའང་འགྲེལ་བརྗོད་གནང་འདུག

སྨན་རི་ཁྲི་འཛིན་རིན་པོ་ཆེ་མཆོག་གི་སྐུ་གདུང་ཟླ་ ༡༠ ཚེས་ ༢ ཉིན་ཞུགས་འབུལ་གནང་རྒྱུ་རེད་འདུག

གཡུང་དྲུང་བོན་གྱི་མངའ་བདག་༸སྐྱབས་རྗེ་སྨན་རི་ཁྲི་འཛིན་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་ཁ་སང་ཟླ་ ༩ ཚེས་ ༡༤ ཕྱི་དྲོ་ཚོུད་ ༦་༢༥ སྟེང་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ Sirmour རྗོང་དུ་རྟེན་གཞི་བྱས་པའི་བོན་གྱི་གདན་ས་ཆེན་པོ་དཔལ་གཤེན་བསྟན་སྨན་རིའི་གླིང་གི་བླ་བྲང་དུ་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་བྱུང་འདུག རིན་པོ་ཆེ་མཆོག་དགུང་གྲངས་ ༨༩ ལ་ཕེབས་ཡོད་པ་དང་ཁོང་ནི་༸རྒྱལ་བ་སྨན་རིའི་ཁྲི་འཛིན་སོ་གསུམ་པ་དེ་ཡིན་པ་རེད། ཁ་སང་ཕྱི་དྲོ་རིན་པོ་ཆེ་མཆོག་དགོངས་པ་གཞན་དུ་གཤེགས་པ་ནས་བཟུང་ཐུགས་དམ་དུ་བཞུགས་མུས་ཡིན་པ་དང་ད་ལྟ་གདན་ས་ཆེན་པོ་དཔལ་གཤེན་བསྟན་སྨན་རིའི་གླིང་གཙོས་པའི་བོན་གྱི་དགོན་ཁག་སོ་སོར་དད་ལྡན་མང་ཚོགས་ནས་དགོངས་རྫོགས་མཆོད་འབུལ་སྲུང་བརྩི་ཞུ་བཞིན་འདུག འདི་ག་བཞུགས་སྒར་དུ་བོད་མིའི་སྒྲིག་འཛུགས་ནས་དེ་རིང་ཉིན་དགུང་ཚོུད་ ༡༢།༠༠ ཐོག་ལས་ཁུངས་ཁག་གི་ལས་མཚམས་བཞག་ནས་རིན་པོ་མཆོག་གི་དགོངས་རྫོགས་ལ་གཞུང་འབྲེལ་མྱ་ངན་རྗེས་དྲན་གྱི་བསྔོ་སྨོན་མཆོད་འབུལ་ཞུས་སོང་བ་དང་། ཚོགས་མཆོད་དེའི་ཐོག་ནས་སྲིད་སྐྱོང་བློ་བཟང་སེང་གེ་མཆོག་གིས་༸སྐྱབས་རྗེ་སྨན་རི་ཁྲི་འཛིན་རིན་པོ་ཆེ་མཆོག་ནས་བོད་གཞིས་བྱེས་གཉིས་སུ་བསྟན་འགྲོའི་སྤྱིའི་སླད་མཛད་འཕྲིན་རྒྱ་ཆེ་བསྐྱངས་ཡོད་པར་ཆེ་བསྟོད་དང་འབྲེལ། འཛིན་སྐྱོང་བཀའ་ཤག་ནས་ཐུགས་ཕམ་དང་བཅས་རྗེས་འཇུག་སློབ་མ་ཀུན་ལ་ཐུགས་གསོ་ཡོད་པ་གསུངས་གནང་སོང་། བོད་མི་མང་བོན་པོ་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་སུ་བཀའ་འདྲི་ཞུས་སྐབས་རིན་པོ་མཆོག་༸སྐུ་ཐུགས་དམ་བཞུགས་སྟངས་ཁྱད་པར་བ་ཞིག་ཡོད་པ་དང་། དེ་བཞིན་༸སྐུ་གདུང་རིན་པོ་ཆེའི་མདུན་དུ་མཁན་བླ་དང་དགེ་འདུན་པ་རྣམས་ནས་སྨོན་ལམ་གསུང་འདོན་ཐོག་༸སྐུ་གདུང་རིན་པོ་ཆེ་ཐུགས་དམ་དུ་བཞུགས་མུས་ཡིན་པ་སོགས་འགྲེལ་བརྗོད་གནང་སོང་། གཞི་རྩའི་༸སྐྱབས་རྗེ་སྨན་རི་ཁྲི་འཛིན་རིན་པོ་ཆེ་མཆོག་ནི་ཕྱི་ལོ་ ༡༩༢༩ ལོའི་ཧོར་ཟླ་ ༥ ཚེས་ ༡༥ ཉིན་མདོ་སྨད་ཤར་ཁོག་ཏུ་ལྗོངས་ལྡོང་ཚང་ཞེས་པའི་ཁྱིམ་དུ་ཡབ་ལྗོངས་ལྡོང་རྒྱལ་ལོ་དང་ཡུམ་བར་རོང་བཟའ་མཚོ་མོ་གཉིས་ཀྱི་སྲས་སུ་སྐུ་འཁྲུངས་ཤིང་མཚན་ལ་བླ་མ་ཐར་ཞེས་གསོལ་འདུག དགུང་ན་བདུན་ནས་སྐྱང་ཚང་དགོན་དུ་བཞུགས་ནས་ཐོག་མར་བྲིས་ཀློག་ནས་རིམ་བཞིན་ཆོ་ག་རྒྱས་བསྡུས་སོགས་སློབ་གཉེར་གནང་འགོ་ཚུགས་འདུག དགུང་ལོ་ ༡༧ ཐོག་བོད་ཀྱི་རིག་གནས་ཆེ་ཆུང་ཁག་ལ་སློབ་གཉེར་གསན་བསམ་གནང་ཞིང་། ༡༩༥༣ ལོར་གཡུང་དྲུང་བོན་གྱི་གཞུང་བཀའ་པོད་དྲུག་ལ་དམ་བཅའ་མཛད་ནས་བཀའ་རབ་འབྱམས་པ་དགེ་བའི་བཤེས་གཉེན་ཆེན་པོའི་མཚན་གནས་སོགས་བཞེས་འདུག ཕྱི་ལོ་ ༡༩༦༨ ལོར་རིན་པོ་ཆེ་མཆོག་དགུང་གྲངས་༤༠ཐོག་སྨན་རིའི་ཁྲི་འཛིན་སོ་གསུམ་པར་མངའ་གསོལ་གྱིས་མཚན་ལ་ལུང་རྟོགས་བསྟན་པའི་ཉི་མ་དཔལ་བཟང་པོ་ཞེས་གསོལ་འདུག ༸རྒྱལ་བ་སྨན་རིའི་ཁྲི་འཛིན་དུ་མངའ་གསོལ་རྗེས་རིན་པོ་ཆེ་མཆོག་ནས་བོད་གཞིས་བྱེས་གཉིས་སུ་བོན་གྱི་བཤད་སྒྲུབ་བསྟན་པ་འཛིན་སྐྱོང་སྤེལ་གསུམ་རྒྱ་ཆེ་མཛད་པ་མ་ཟད། སློབ་གྲྭ་དང་དཔེ་མཛོད་ཁང་། གཞན་ཡང་གཡུང་དྲུང་བོན་གྱི་དགེ་སློབ་ཁང་སོགས་ཤེས་ཡོན་གྱི་ལྟེ་གནས་ཁག་ཅིག་གསར་འཛུགས་མཛད་ནས་མཁན་པོ་སློབ་དཔོན་དང་དགེ་རྒན། སྐྱ་སེར་ཞིབ་འཇུག་ཤེས་ཡོན་མི་སྣ་ཇེ་སྙེད་ཅིག་སྐྱེད་སྲིང་མཛད་འདུག་པ་བཅས་བསྟན་འགྲོ་སྤྱིའི་སླད་རླབས་ཆེན་གྱི་མཛད་རྗེས་འཇོག་གནང་འདུག གཤམ་ལ་སྨན་རི་ཁྲི་འཛིན་རིན་པོ་ཆེ་མཆོག་ནས་འདི་ལོའི་ལོ་མགོར་འདི་ག་རླུང་འཕྲིན་ཁང་གི་བཅར་འདྲི་དང་ལེན་གནང་པའི་ཁྲོད། བོད་རིགས་གཞོན་སྐྱེས་རྣམས་ནི་མ་འོངས་བོད་ཀྱི་རེ་སྟོང་བྱེད་ས་ཞིག་ཡིན་སྟབས་ཆང་རག་ཚད་མེད་འཐུང་རྒྱུ་མེད་པ་དང་། ང་ཚོ་བོད་མི་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་བསྒྲུབ་ན་བཀྲིས་པ་དང་དོན་གྲུབ་པ་སོགས་ཡོང་རྒྱུར་ཕན་ཐོགས་ཆེན་པོ་ཡོད་པའི་ལམ་སྟོན་བཀའ་སློབ་སྩལ་བའི་ཚན་པ་ཞིག་རྒྱང་སྲིང་ཞུས་ཡོད།

བོད་རིགས་བེུད་གཅིག་ཁེ་ན་ཌའི་ས་གནས་གྲོས་ཚོགས་འཐུས་མིའི་འོས་གཞིར་འདེམས་ཐོན་བྱུང་བ།

ཁེ་ན་ཌའི་ Ontario མངའ་ཁུལ་གྱི་ Parkdale ས་གནས་སུ་གནས་སྡོད་བོད་རིགས་བེུད་བུ་འཁྲིད་དཀར་པོ་ཆེ་ཞུ་བ་ཁོང་ཕྱི་ལོ་ ༢༠༡༨ ལོའི་ Ontario མངའ་ཁུལ་གྱི་གྲོས་ཚོགས་འཐུས་མིའི་འོས་བསྡུའི་ནང་ ParkDaleHigh ས་གནས་ཀྱི་ New Democrats ཆབ་སྲིད་ཚོགས་པའི་འོས་མིར་བདམས་ཐོན་བྱུང་འདུག དེ་ཡང་ཁ་སང་ Parkdale མང་གཙོ་ཚོགས་པའི་ཚོགས་འདུ་ཐོག་ཕྱི་ལོ་ ༢༠༡༨ ལོའི་མངའ་སྡེའི་འོས་བསྡུའི་ནང་ Parkdale ས་གནས་ནས་བཞེང་མཁན་འོས་མི་བདམ་སྐབས་བོད་རིགས་བེུད་བུ་འཁྲིད་དཀར་པོ་ཆེ་ལགས་བདམས་ཐོན་བྱུང་ཡོད་པ་དང། སྐབས་དེར་བུ་འཁྲིད་ལགས་ཀྱིས་ཁོང་དེ་སྔ་ཕྱི་ལོ་ ༢༠༠༢ ལོར་ Canada ནང་དུ་རང་གི་ནང་མི་ལྷན་རྒྱས་ཐོག་མར་འབྱོར་སྐབས་ཁུལ་དེའི་ནང་བོད་ཆས་སྤྲས་པའི་བོད་མི་དང། གཞན་མི་རིགས་མང་དག་ཞིག་མཉམ་གནས་བྱས་པ་མཐོང་སྐབས་ས་གནས་འདིར་བློ་ཐག་ཉེ་བའི་ཚོར་བ་ཞིག་བྱུང་བ་མ་ཟད། དེའང་ཁོང་རང་ཉིད་ལྟ་བུར་ཆ་མཚོན་ན་བཙན་བྱོལ་ནང་དུ་ལྷུང་བའི་བོད་མི་མི་རབས་གསུམ་པ་ཞིག་ཡིན་པའི་ཆ་ནས་ཚོར་བ་དེ་དམིགས་བསལ་ཤུགས་ཆེ་བ་ཡོད་སྐོར་གསུངས་འདུག བུ་འཁྲིད་ལགས་ཀྱིས་ཁོང་ Parkdale ནང་ཐོག་མར་གཞིས་སྤོས་གནང་སྐབས་ཁྱིམ་མཚེས་ཞིག་གིས་ཁོང་གི་ནང་མིར་བརྙན་འཕྲིན་མེད་པ་ཤེས་སྟབས། རང་ཉིད་ཀྱི་བརྙན་འཕྲིན་རྙིང་པ་དེ་གནང་པའི་དུས་ཚོད་དྲན་གསོ་དང་སྦྲགས། ཁྱིམ་མཚེས་དེའི་གནང་སྟངས་དེ་ནས་རང་རྒྱུད་ལ་སྤྱི་ཚོགས་ལ་དགའ་ཞེན་དང་སྤྱི་ཚོགས་ཀྱི་ཆེད་དུ་ལས་ཀ་བྱེད་རྒྱུའི་འདུན་པ་དམིགས་བསལ་ཞིག་བྱུང་ཡོད་པ་མ་ཟད། མཐོ་རིམ་སློབ་གྲྭའི་ནང་དུ་ལས་འགུལ་སྤེལ་ཕྱོགས་དང་འབྲེལ་བའི་སློབ་སྦྱོང་གནང་རྗེས་ཁོང་རང་ཉིད་ཀྱི་འདུན་པ་ལྟར་མང་ཚོགས་ལྷན་དུ་དངོས་སུ་འབྲེལ་མཐུད་ཀྱི་གོ་སྐབས་བྱུང་བ་བཞིན་སྤྱི་ཚོགས་ལ་ཞབས་ཞུ་མུ་མཐུད་ཞུ་རྒྱུ་ཡིན་ཞེས་གསུངས་འདུག རྩ་བའི་ Parkdale ས་གནས་དེ་འཛམ་གླིང་ཡུལ་གྲུ་གཞན་ནས་ Canada ནང་དུ་སྐྱབས་བཅོལ་ཞུ་བར་ཕེབས་མཁན་རྣམས་ཀྱི་བཞུགས་གནས་གཙོ་བོ་ཞིག་ཆགས་ཀྱི་ཡོད་པ་དང་། ས་གནས་དེར་རྒྱ་བལ་འབྲུག་གསུམ་གྱི་རྗེས་སུ་བོད་མི་སྐྱབས་བཅོལ་བའི་གྲངས་འབོར་མང་ཤོས་ཆགས་ཀྱི་ཡོད་པ་རེད་འདུག བུ་འཁྲིད་དཀར་པོ་ཆེ་ལགས་ནས་དེ་སྔ་ལོ་མང་རིང་ Ontario མངའ་སྡེ་གྲོས་ཚོགས་ཀྱི་ Toronto གྲོང་ཁྱེར་གྱི་འཐུས་མི་ལྕམ་ Cheri Dinovo ལགས་དང་ལྷན་དུ་ཕྱག་ལས་གནང་མྱོང་ཡོད་པ་ལས་ Toronto གྲོང་ཁྱེར་དང་སྒོས་ Parkdale ས་ཁུལ་དུ་མང་ཚོགས་ཀྱི་བདེ་དོན་དང་འབྲེལ་བའི་ལས་འགུལ་མང་དག་ཞིག་སྤེལ་མྱོང་ཡོད་པ་དང་། ཉེ་སྔོན་ཁུལ་དེར་ཁང་བདག་རྣམས་ནས་གནས་ཚང་གི་མཐུན་རྐྱེན་ཡར་རྒྱས་མ་གཏང་པར་ཁང་གླ་ཕོན་ཆེན་སྤར་སྐབས་བུ་འཁྲིད་གཙོས་པའི་ལས་འགུལ་བ་མང་དག་ཞིག་ནས་གཞུང་ལ་གནད་དོན་དེ་སེལ་དགོས་པའི་འབོད་སྐུལ་གྱི་ལས་འགུལ་སྣ་ཚོགས་ སྤེལ་འདུག ཁ་སང་གི་མཛད་སྒོའི་ཐོག་མང་གཙོ་ཚོགས་པའི་ཚོགས་མི་མང་དག་ཞིག་གཙོས་པའི་བུ་འཁྲིད་ལགས་ཀྱི་སྐུ་ཟླ་དང་ལོ་གཉིས་དང་ཕྱད་ཀ་ཡིན་པའི་བུ་མོ། དེ་བཞིན་ཕ་མ། ས་གནས་བོད་མི་མང་དག་ཞིག་སླེབས་ཡོད་པ་རྣམས་ཚོས་ཁོང་འོས་མིར་བདམས་ཐོན་བྱུང་བར་དགའ་བསུའི་རྣམ་པ་ཤུགས་ཆེ་སྟོན་གནང་འདུག རྩ་བའི་བུ་འཁྲིད་ལགས་རང་ཉིད་བོད་མི་ཞིག་ཡིན་པོའི་ཆ་ནས་འདས་པའི་ལོ་ ༡༠ ལྷག་ནས་ Toronto ས་ཁུལ་དུ་བོད་དོན་ཆེད་ཕྱག་ལས་ཤུགས་ཆེ་གནང་མྱོང་ཡོད་པ་དང་། ཁོང་ནས་ཁུལ་དེའི་བོད་རིགས་ཚོགས་པའི་འགན་འཛིན་ལྷན་ཚོགས་ནང་དུ་ཞུགས་མྱོང་ཡོད་པ་མ་ཟད། ITN ཞེས་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ལམ་སྟོན་ཚོགས་ཆུང་གི་ཚོགས་མི་ཡང་གནང་མྱོང་འདུག

ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་རྒྱལ་ཡོངས་བགྲོ་གླེང་ཚོགས་ཆེན་ཚོགས་གནང་པ།

རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་གོ་སྒྲིག་འོག་དེ་རིང་ཟླ་ ༩ ཚེས་ ༡༥ ཉིན་ནས་འགོ་འཛུགས་ཀྱིས་ཕྱི་ཚེས་ ༡༧ བར་དུས་ཡུན་ཉིན་གྲངས་གསུམ་རིང་མཐོ་སློབ་དེའི་ནང་བོད་ཀྱི་རིག་གཞུང་འཛིན་སྐྱོང་སྤེལ་གསུམ་དང་བཙན་བྱོལ་ནང་བོད་མི་རིགས་ཀྱི་ངོ་བོ་ངོས་འཛིན་ཇི་ལྟར་ཆགས་ཡོད་མེད་ཅེས་པའི་བརྗོད་གཞིའི་ཐོག་རྒྱལ་ཡོངས་བགྲོ་གླེང་ཐེངས་དང་པོ་དེ་དབུ་འཛུགས་གནང་ཡོད་པ་རེད། ཐེངས་འདིའི་རྒྱལ་ཡོངས་བགྲོ་གླེང་ཚོགས་ཆེན་སྐབས་སུ་འདས་པའི་དུས་རྒྱལ་རབས་ལོ་རྒྱུས་ནང་རྩི་མཐོང་ཇི་ལྟར་བྱེད་གོས་པ་དང་ད་ལྟའི་ཆར་ཤུགས་རྐྱེན་ག་འདྲ་ཐེབས་ཀྱི་ཡོད་མེད། མ་འོངས་མི་རབས་གསར་པ་ཚོར་ཁ་ཕྱོགས་གསར་པ་དང་ཐབས་ལམ་གསར་པ་གང་སྟོོན་དགོས་མིན་བཅས་ཀྱི་བརྗོད་གཞིའི་ཐོག་རྒྱལ་ཡོངས་བགྲོ་གླེང་གནང་རྒྱུ་རེད་འདུག བགྲོ་གླེང་ཐོག་དམིགས་བསལ་སྐུ་མགྲོན་དུ་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་དང་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གིི་འགན་འཛིན་ལོ་རྒྱུས་སྨྲ་བ་མཁས་དབང་བཀྲིས་ཚེ་རིང་ལགས། དབུས་བོད་ཀྱི་སྨན་རྩིས་ཁང་གིི་ཡན་ལག་སྦེང་ལོར་སྨན་རྩིས་ཁང་གི་སྨན་པ་འབུམ་རམས་པ་རྡོ་རྗེ་རབ་བརྟན་ལགས། ལྡི་ལིར་རྟེན་གཞི་བྱས་པའི་ Jawaharal Nehru University ᨵཙུག་ལག་སློབ་གཉེར་ཁང་གི་འབུམ་རམས་པ་ཡེ་ཤེས་ཆོས་སྒྲོན་ལགས། དེ་བཞིན་རྩོམ་པ་པོ་དང་གསར་འགོད་པ། བོད་དང་རྒྱ་དཀར་ནག་ཐོག་ཆབ་སྲིད་ཉམས་ཞིབ་པ་མཁས་དབང་སྐུ་ཞབས་ Claude Arpi ལགས། གཞན་ཡང་དམིགས་བསལ་སྐུ་མགྲོན་ལྔ་གདན་ཞུ་གནང་འདུག་པ་མ་ཟད། སློབ་ཁང་དེའི་སློབ་མ་དང་མཐོ་སློབ་འདྲ་མིན་གྱི་བོད་རིགས་སློབ་ཕྲུག་བཅས་ཁྱོན་མི་སྣ་ ༥༠༠ ལ་ཉེ་བ་ཚོགས་བཅར་གནང་ཡོད་པ་རེད།

Latest news