Tibetan Royal Year of 2151 | Year of the Wood Dragon

བོད་མིའི་སྒྲིག་འཛུགས།

ཨ་རིའི་གྲོས་ཚོགས་དང་སྲིད་གཞུང་གཉིས་ནས་བོད་མིར་མུ་མཐུད་རོགས་དངུལ་རྒྱབ་སྐྱོར་གནང་གཏན་འཁེལ་འདུག

ཨ་རིའི་གྲོས་ཚོགས་དང་སྲིད་གཞུང་གི་ངོས་ནས་འདས་པའི་ལོ་ངོ་ ༣༠ ཙམ་གྱི་གོང་ནས་བོད་ཕྱི་ནང་གཉིས་སུ་བཞུགས་པའི་བོད་མི་རྣམས་ལ་རང་རིགས་ཀྱི་ངོ་བོ་སྲུང་སྐྱོབ་དང། ཤེས་ཡོན། འཕྲོད་བསྟེན། དཔལ་འབྱོར། དེ་བཞིན་སྤྱི་ཚོགས་ཡར་རྒྱས་ལས་དོན་བཅས་ཀྱི་ཐོག་རོགས་དངུལ་གནང་བཞིན་ཡོད་པ་ལྟར། འདི་ལོ་ ༢༠༡༨ ལོའི་ཨ་རིའི་སྔོན་རྩིས་ཁོངས་ནས་བོད་ཕྱི་ནང་གཉིས་ཀྱི་བདེ་དོན་ཐོག་མུ་མཐུད་མ་དངུལ་གནང་རྒྱུར་ཐག་གཅོད་བྱུང་འདུག ཁ་སང་དང་ཁ་ཉིན་བཅས་སུ་ཨ་རིའི་གྲོས་ཚོགས་གོང་འོག་གཉིས་ཀྱི་ནང་ལ་ཕྱི་ལོ་ ༢༠༡༨ ལོའི་ཨ་རིའི་སྔོན་རྩིས་མཐའ་མ་གཏན་འབེབས་གནང་ཡོད་པ་དང་། སྐབས་དེར་གྲོས་ཚོགས་འོག་མའི་ནང་ལ་ཁྱོན་གྲོགས་ཚོགས་འཐུས་མི་ ༢༥༦ ནས་ ༡༦༧ དེ་བཞིན་གྲོས་ཚོགས་གོང་མའི་ནང་ལ་གྲོས་ཚོགས་འཐུས་མི་ ༦༥ ནས་ ༣༢ ཀྱིས་བོད་དོན་དང་འབྲེལ་བའི་རོགས་དངུལ་གྲོས་འཆར་ལ་རྒྱབ་སྐྱོར་གནང་ཐོག་ཨ་རིའི་གྲོས་ཚོགས་ནས་བོད་མིར་མུ་མཐུད་རོགས་དངུལ་གནང་རྒྱུར་གྲོས་འཆར་གཏན་འབེབས་གནང་ཡོད་པ་མ་ཟད། ཁ་སང་གྲོས་འཆར་དེའི་ཐོག་ཨ་རིའི་སྲིད་འཛིན་སྐུ་ཞབསཌོ་ནལ་ཊམ་མཆོག་ནས་ཆེས་མཐའ་མའི་མཚན་རྟགས་གནང་བ་དང་སྦྲགས། བོད་དོན་དང་འབྲེལ་བའི་མ་དངུལ་རོགས་རམ་ཁག་མུ་མཐུད་གནང་རྒྱུའི་ཐག་གཅོད་གནང་འདུག ཨ་རིའི་ཕྱི་ལོ་ ༢༠༡༨ ལོའི་རྩིས་འགོའི་ནང་གསལ་ལྟར་ཨ་རི་སྲིད་གཞུང་ནས་བོད་ནང་ཡོད་པའི་བོད་མི་ཚོའི་བདེ་དོན་སྤྱི་དང་སྒོས་བོད་མི་གནས་སྡོད་ཀྱི་ས་ཁུལ་ཁག་ཏུ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། ཤེས་ཡོན། འཕྲོད་བསྟེན། ཁོར་ཡུག་སྲུང་སྐྱོབ་བཅས་ཀྱི་ཆེད་དུ་ཨ་སྒོར་ས་ཡ་ ༨ དང་། དེ་བཞིན་རྒྱ་བལ་གཉིས་ནང་ཡོད་པའི་བོད་མིའི་རིག་གཞུང་སྲུང་སྐྱོབ་དང་སྤྱི་ཚོགས་སྲ་བརྟན། མི་རབས་རྗེས་མའི་འགོ་ཁྲིད་ཀྱི་ནུས་པ་གསོ་སྐྱོང་བཅས་ཀྱི་ཆེད་རོགས་དངུལ་ཨ་སྒོར་ས་ཡ་ ༦ དང་། ལྷག་པར་དུ་བོད་མིའི་སྒྲིག་འཛུགས་སྲ་བརྟན་ཡོང་ཐབས་དང་འཛིན་སྐྱོང་གི་ལས་དོན་ཚགས་ཚུད་ཆེད་དམིགས་བསལ་གྱི་རྩིས་འགོ་གསར་པ་ཞིག་བརྒྱུད་ཨ་སྒོར་ས་ཡ་ ༣ བཅས་ཁྱོན་ཨ་སྒོར་ས་ཡ་ ༡༧ གྱི་མ་དངུལ་རོགས་རམ་གནང་རྒྱུ་ཡིན་པ་གསལ་འདུག ཐེངས་འདིའི་ཨ་རི་གཞུང་ནས་བོད་མིར་མུ་མཐུད་མ་དངུལ་རོགས་རམ་གནང་གཏན་འཁེལ་བ་དང་འབྲེལ། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་སྐལ་རྡོར་ལགས་སུ་བཅར་འདྲི་ཁག་ཅིག་ཞུས་པར་ཐེངས་འདིའི་ཨ་རིའི་སྔོན་རྩོས་གཏན་འབེབས་གནང་རྒྱུར་དུས་ཚོད་གང་འཚམས་འགོར་ཡོད་ཀྱང་། ད་ལན་མཐའ་མའི་ཐག་གཅོད་གནང་བའི་ཁྲོད་བོད་དོན་དང་འབྲེལ་བའི་གོང་གསལ་སྡེ་ཚན་གསུམ་ནང་འཁོད་པའི་ཨ་སྒོར་ས་ཡ་ ༡༧ ཡོད་པ་ཙམ་མ་ཟད། ཨ་རིས་བོད་ཕྱི་ནང་གཉིས་སུ་གནང་བཞིན་པའི་སློབ་ཡོན་དང་། མང་གཙོ་གོང་འཕེལ་དང་འབྲེལ་བའི་མ་དངུལ། ཨ་རི་ཕྱི་སྲིད་ལས་ཁུངས་ཀྱི་ཁྱབ་ཁོངས་སུ་ཡོད་པའི་ཨ་རིའི་བོད་དོན་དམིགས་བསལ་འབྲེལ་མཐུད་ལས་ཁུངས་ཀྱི་ལས་དོན་དང་འབྲེལ་བའི་མ་དངུལ་བཅས་ཡོངས་བསྡོམས་ཚེ་ད་རེས་ཕྱི་ལོ་ ༢༠༡༨ ལོའི་ཨ་རིའི་སྔོན་རྩིས་ཁྲོད་བོད་མིའི་བདེ་དོན་སྤྱི་ཡོངས་ཀྱི་ཐོག་ཁྱོན་ཨ་སྒོར་ས་ཡ་ ༣༠ ཙམ་གནང་གཏན་འཁེལ་ཡོད་པ་གསུངས་ཡོད། གཞི་རྩའི་ཨ་རིའི་ཕྱི་ལོ་ ༢༠༡༨ ལོའི་སྔིན་རྩིས་དེ་སྲིད་འཛིན་སྐུ་ཞབས་ Donald Trump མཆོག་གིས་སྔར་ལོའི་ཕྱི་ཟླ་ ༥ པའི་ནང་ཡུལ་དེའི་གྲོས་ཚོགས་སུ་འཆར་འབུལ་ཞུས་ཡོད་དང་། སྐབས་དེར་སྔོན་རྩིད་འཆར་འབུལ་ཁྲོད་སྲིད་འཛིན་མཆོག་ནས་ཨ་རིས་བོད་གཙོས་པའི་ཕྱིའི་རྒྱལ་ཁབ་ཁག་གི་ནང་ལ་གནང་བཞིན་པའི་མ་དངུལ་རོགས་རམ་ཁག་ཅིག་གཅོག་ཆ་དང་ཁག་ཅིག་མཚམས་འཇོག་གནང་རྒྱུ་ཡིན་སྐོར་སོགས་གསུངས་ཡོད་པ་མ་ཟད། ལྷག་པར་དུ་ཨ་རིའི་མི་མང་གི་ཤེས་ཡོན་དང་འཕྲོད་བསྟེན་སོགས་དང་འབྲེལ་བའི་མ་དངུལ་འཆར་འབུལ་ཞུས་པའི་ཐད་ལ་གྲོས་ཚོགས་འཐུས་མི་དབར་དགོངས་ཚུལ་མི་མཐུན་པ་སོགས་བྱུང་རྐྱེན་ད་བར་ཟླ་བ་དྲུག་ལྷག་གི་རིང་སྔོན་རྩིས་གཏན་འབེབས་གནང་ཐུབ་མེད་པ་རེད། ལྷག་པར་དུ་བོད་དོན་དང་འབྲེལ་བའི་མ་དངུལ་རོགས་རམ་མུ་མཐུད་ཐོབ་ཐབས་སུ་འདས་པའི་ཟླ་བ་དྲུག་ལྷག་ཙམ་དེའི་ནང་ཨ་རིར་རྟེན་གཞི་བྱས་པའི་བོད་ཀྱི་སྐུ་ཚབ་དོན་གཅོད་ཁང་དང་། རྒྱལ་སྤྱི་བོད་དོན་ལས་འགུལ་ཁང་སོགས་ཀྱི་འབྲེལ་ཡོད་ལས་བྱེད་རྣམས་ནས་ཡུལ་དེའི་གྲོས་ཚོགས་འཐུས་མི་རྣམས་དང་དངོས་སུ་ཐུགས་འཕྲད་གནང་སྟེ་ཞུ་འབོད་རབ་དང་རིམ་པ་གནང་ཡོད་པ་རེད།

ཟམ་གདོང་རིན་པོ་ཆེ་མཆོག་རྒྱ་ནག་ཏུ་ཕེབས་ཡོད་མེད་དེ་རིན་པོ་ཆེ་སྐུ་སྒེར་གྱི་གནད་དོན་ཞིག་རེད།

དེ་རིང་ཟླ་ ༣ ཚེས་ ༢༤ ཉིན་སྔ་དྲོ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ལས་ཉིན་མཐའ་མའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་ལན་འདེབས་གསལ་བཤད་གནང་བའི་ཁྲོད། བཀའ་བློན་ཁྲི་ཟུར་ཟམ་གདོན་རིན་པོ་ཆེ་མཆོག་སྔ་ལོར་རྒྱ་ནག་ཏུ་ཕེབས་ཡོད་མེད་ཀྱི་གནད་དོན་དེ་རིན་པོ་ཆེ་མཆོག་སྐུ་སྒེར་གྱི་གནད་དོན་ཞིག་ཆགས་ཡོད་སྟབས་གྲོས་ཚོགས་ནས་གནད་དོན་དེ་གླེང་སློང་གནང་རྒྱུ་མེད་པར་འགྲེལ་བརྗོད་གནང་སོང་། དེའང་ཟླ་བ་འདིའི་ཚེས་ ༡༩ སྟེ་གྲོས་ཚོགས་ཀྱི་ལས་ཉིན་ལྔ་པའི་ཐོག་སྲིད་སྐྱོང་མཆོག་གིས་གྲོས་ཚོགས་སུ་བཀའ་ཤག་གི་གསལ་བཤད་གནང་ཟིན་རྗེས། གྲོས་ཚོགས་ཀྱི་འཐུས་མི་རྣམས་ནས་བཀའ་ཤག་གི་གསལ་བཤད་ཐོག་བགྲོ་གླེང་གནང་སྐབས་སྤྱི་འཐུས་ཁག་ཅིག་གིས་ཉེ་ལམ་རྒྱ་གར་གྱི་གསར་ཤོག་ཞིག་གི་ཐོག་བཀའ་བློན་ཁྲི་ཟུར་ཟམ་གདོན་རིན་པོ་ཆེ་མཆོག་སྔ་ལོའི་ཕྱི་ཟླ་ ༡༡ ནང་རྒྱ་ནག་ཏུ་ཕེབས་ཡོད་པའི་གནས་ཚུལ་ཞིག་ཕྱིར་འགྱར་བྱུང་ཡོད་སྟབས།གནས་ཚུལ་དེ་བདེན་པ་ཡིན་མིན་དང་བཀའ་ཤག་ནས་དེའི་སྐོར་མཁྱེན་རྟོགས་ཡོད་མེད་ཐོག་དྲི་བ་ཁག་ཅིག་ཕེབས་ཡོད་པ་རེད། སྲིད་སྐྱོང་བློ་བཟང་སེང་གེ་མཆོག་གིས་དེ་རིང་བཀའ་ཤག་གི་ལན་འདེབས་གནང་སྐབས་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་གནང་ཕྱོགས་ཀྱི་སྒྲིག་གཞི་དོན་ཚན་ཁག་ཅིག་ལུང་འདྲེན་དང་འབྲེལ། རིན་པོ་ཆེ་མཆོག་རྒྱ་ནག་ཏུ་ཕེབས་པའི་གནད་དོན་དེ་རིན་པོ་ཆེ་མཆོག་སྐུ་སྒེར་གྱི་གནད་དོན་ཞིག་ཆགས་ཀྱི་ཡོད་སྟབས། གནད་དོན་དེ་གྲོས་ཚོགས་ནས་གླེང་སློང་གནང་རྒྱུ་མེད་པ་དང། ལར་ནས་ཉེ་ལམ་རྒྱ་ནག་དམར་ཤོགས་ཚོགས་པའི་ལྷན་ཚོགས་དང་རྒྱ་ནག་མི་དམངས་འཐུས་མི་ཚོགས་ཆེན་གྲུབ་བསྟུན་རྒྱ་ནག་གི་ཆབ་སྲིད་ཀྱི་གནད་དོན་ལ་འགྱུར་ལྡོག་ཆེན་པོ་ཞིག་ཕྱིན་ཡོད་སྟབས། བཀའ་ཤག་གི་ངོས་ནས་རིང་མིན་ཕྱི་ཟླ་ ༥ པའི་ནང་བོད་རྒྱ་འབྲེལ་མོལ་ལས་དོན་ཚོགས་ཆུང་གི་ཚོགས་འདུ་ཞིག་ཚོགས་འཆར་ཡོད་སྐོར་གསུངས་ཡོད། སྲིད་སྐྱོང་མཆོག་གིས་དེ་འབྲེལ་གོ་སྐབས་ཆེས་བཞེས་དང་འབྲེལ་ནས་སྤྱིར་བོད་དུ་གཉེན་འཕྲད་སླད་བོད་མི་གང་ཟག་སུ་འདྲ་ཞིག་ཕེབས་ཆོག་ཀྱང་། གལ་ཏེ་ཕྱོགས་བསྐྱོད་དེ་བོད་རྒྱ་འབྲེལ་མོལ་གྱི་གནད་དོན་དང་འབྲེལ་བ་ཡོད་པ་ཞིག་ཡིན་ཚེ་ཆབ་སྲིད་དང་བཟང་སྤྱོད་གཉིས་ཀྱི་ཐོག་ནས་བཀའ་ཤག་གི་ངེས་པར་དུ་མཁྱེན་དགོས་གལ་ཡིན་པ་གསུངས་སོང་། གཞི་རྩའི་འདི་ལོའི་ལོ་འགོར་རྒྱ་གར་གྱི་གསར་ཤོག་ཞིག་གི་ཐོག་བོད་མིའི་སྒྲིག་འཛུགས་ཀྱི་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་སྔ་ལོའི་ཕྱི་ཟླ་ ༡༡ པའི་ནང་རྒྱ་ནག་ཏུ་ཕེབས་ནས་འཐབ་ཕྱོགས་གཅིག་འགྱུར་ལས་ཁུངས་ཀྱི་མི་སྣ་དང་འབྲེལ་བ་བྱུང་སྐོར་གནད་དོན་ཞིག་ཕྱིར་འགྱར་བྱུང་ཡོད་པ་དང། སྲིད་སྐྱོང་མཆོག་ནས་རྗེས་སུ་ལྡི་ལིར་ཚོགས་པའི་ཚོགས་འདུ་ཞིག་གི་ཐོག་འབྲེལ་ཡོད་དྲི་བར་ལན་འདེབས་གནང་སྐབས་བཀའ་ཤག་ནས་རིན་པོ་ཆེ་མཆོག་དང་མཇལ་འཕྲད་གནང་རྒྱུ་ཡིན་སྟབས་དེའི་ཐོག་ཤེས་རྟོགས་གང་ཡང་མེད་པ་དང། ལར་ནས་རིན་པོ་ཆེ་མཆོག་རྒྱ་ནག་ཏུ་ཕེབས་ཡོད་ཚེ་དེ་ནི་སྐུ་སྒེར་གྱི་ཕྱོགས་བསྐྱོད་ཞིག་ཡིན་པ་དང། གནད་དོན་དེའི་ཐོག་ཚོད་དཔག་འདྲ་མིན་གནང་རྒྱུ་མེད་སྐོར་གསུངས་པ་དེ་ལྟར་ཡང། རིན་པོ་ཆེ་མཆོག་གིས་རྗེས་སུ་རྒྱ་གར་གྱི་གསར་ཤོག་ཞིག་གི་ཐོག་གནད་དོན་དེ་གཞི་རྩ་མེད་པ་ཞིག་ལ་འགྲེལ་བརྗོད་གནང་ཡོད་པ་རེད། སྲིད་སྐྱོང་བློ་བཟང་སེང་གི་མཆོག་གིས་དེ་རིང་གྲོས་ཚོགས་སུ་སྤྱིར་བཀའ་ཤག་གི་ངོས་ནས་བོད་རྒྱ་འབྲེལ་མོལ་གྱི་གནད་དོན་ཐོག་འབད་བརྩོན་མུ་མཐུད་གནང་བཞིན་ཡོད་པ་དང། རྒྱ་ནག་གིས་འཚེ་མེད་ཞི་བའི་ཐབས་ལམ་ལ་འབད་མཁན་བོད་ནང་གི་བོད་མི་ཚོའི་ཐོག་འགྲོ་སོང་ཕོན་ཆེ་བཏང་ནས་དྲག་གནོན་བྱེད་སྟངས་ལ་གཞིགས་ན། བོད་མིའི་དབུ་མའི་ལམ་གྱི་འཐབ་རྩོད་ལ་ཕུགས་རྒྱང་ཡོད་པ་ཞིག་གཟིགས་ཀྱི་ཡོད་སྐོར་གསུངས་པ་མ་ཟད། སྲིད་སྐྱོང་མཆོག་གིས་ཉིན་ཤས་སྔོན་གྲོས་ཚོགས་སུ་བཀའ་ཤག་གི་གསལ་བཤད་སྐབས་གསུངས་ཟིན་པ་བཞིན། རྒྱལ་སྤྱི་དང་ཨེ་ཤ་ཡ། རྒྱ་ནག་བཅས་ནང་ཆབ་སྲིད་དང་དཔལ་འབྱོར། དམག་འཐབ་སོགས་འགྱུར་འགྲོས་ལ་གཞིགས་ནས་མ་འོངས་པའི་ལོ་གསུམ་བཞིའི་དུས་ཡུན་དེ་བོད་ཀྱི་གནད་དོན་ཐོག་ཧ་ཅང་གནད་འགག་ཆེ་བའི་དུས་ཚོད་ཞིག་ཆགས་ཡོད་སྟབས། བོད་གཞུང་མང་གཉིས་ནས་དེའི་ཐོག་དཔྱང་གྲུང་དང་དོ་སྣང་གནང་དགོས་པ་མ་ཟད། ཆིག་སྒྲིལ་ཐོག་ནས་ཐབས་ལམ་དང་འཆར་གཞི་གསར་པའི་ལས་འགུལ་སྤེལ་དགོས་ཞེས་བཀའ་ནན་གནང་སོང་། སྲིད་སྐྱོང་མཆོག་གིས་གཞན་ཡང་དེ་རིང་གི་གྲོས་ཚོགས་དེའི་ཐོག་ཨ་རིའི་གྲོས་ཚོགས་གོང་འོག་གཉིས་ནས་བོད་མིར་མུ་མཐུད་རོགས་དངུལ་གནང་རྒྱུའི་ཞལ་བཞེས་གནང་ཡོད་སྐོར་སྙན་གསེང་དང་འབྲེལ། ཨ་རིའི་གཞུང་མང་དང་ལྷག་པར་དུ་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ Nancy Pelosi མཆོག་དང་ཨ་རིའི་གློག་བརྙན་ཁྲབ་སྟོན་པ་གྲགས་ཅན་སྐུ་ཞབས་ Richard Gere ལགས་རྣམ་གཉིས་ཀྱིས་ད་བར་བོད་དོན་ཐོག་ཁ་ཞེ་གཉིས་མེད་ཀྱིས་རྒྱབ་སྐྱོར་ཤུགས་ཆེ་གནང་དང་གནང་མུས་ལ་ཐུགས་རྗེ་ཆེ་ཞུས་ཡོད་པ་རེད།

གཞིས་ཁོངས་ཡོད་མེད་ལ་མ་བལྟོས་པར་རྒྱ་གར་མི་སེར་ལེན་མཁན་ཚོས་བོད་མི་སྐྱབས་བཅོལ་བའི་ཁེ་དབང་ལེན་ཆོག་གི་མེད།

བོད་མིའི་སྒྲིག་འཛུགས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་སུ་རྒྱ་གར་མི་སེར་ལག་འཁྱེར་བཟོ་གནང་མཁན་ཚོའི་སྐོར་དང་འབྲེལ་འཛིན་སྐྱོང་གི་བཞེངས་ཕྱོགས་དང་རྒྱ་གར་དབུས་གཞུང་གི་ལམ་སྟོན་བཀོད་ཁྱབ་སྐོར་ཁ་གསལ་གསུངས་པ་དང་སྦྲགས། གཞིས་ཆགས་ཀྱི་ཐོབ་ཁོངས་ཡོད་མེད་ལ་མ་བལྟོས་པར་བཙན་བྱོལ་བོད་མི་རྒྱ་གར་གྱི་མི་སེར་ལག་འཁྱེར་བཟོ་མཁན་ཚོས་སྐྱབས་བཅོལ་བོད་མིའི་ཁེ་དབང་ལེན་ཆོག་གི་མེད་པ་གསུངས་སོང་། དེ་རིང་སྤྱི་འཐུས་གྲོས་ཚོགས་ཀྱི་ལས་ཉིན་དགུ་པའི་སྟེང་གྲོས་ཚོགས་འཐུས་མི་རྣམ་པས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྔོན་རྩིས་དང་འབྲེལ་ནས་འབོད་སྐུལ་དང་དྲི་བ། བགྲོ་གླེང་སོགས་གནང་བའི་ཁྲོད་སྐྱབས་བཅོལ་བོད་མིའི་གཞིས་ཆགས་ཁག་གི་ས་ཁང་དང་སོ་ནམ་ཞིང་ལས་སྐོར་དང་བོད་ནས་ཕེབས་མཁན་ཚོར་སྡོད་ཁང་གསར་རྒྱག ཕྱི་ལོ་ ༢༠༡༤ ལོའི་བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ས་གནས་ག་ཚོད་ནང་ལག་བསྟར་དབུ་འཛུགས་གནང་ཡོད་མེད་སོགས་ཐད་ཀར་ནང་སྲིད་ལས་ཁུངས་དང་འབྲེལ་བའི་གནད་དོན་མང་དག་ཐོག་བཀའ་བསྡུར་གནང་ཡོད། ལྷག་པར་དུ་སྤྱི་འཐུས་ཁ་ཤས་ནས་དེང་སང་སྤྱི་ཚོགས་ནང་དུ་བཀའ་མོལ་ཡོང་བཞིན་པ་རྒྱ་གར་མི་སེར་བཟོ་རྒྱུའི་ཐད་ལ་འཛིན་སྐྱོང་གི་བཞེངས་ཕྱོགས་དང་དེའི་ཐོག་ལས་དོན་གནང་ཕྱོགས་ལ་འགྱུར་བ་ཇི་སོང་སོགས་བཀའ་འདྲི་གནང་མཁན་བྱུང་ཡོད། ནང་སྲིད་བཀའ་བློན་མཆོག་གིས་སྐབས་དེར་མི་སེར་བཟོ་མིན་གྱི་རང་དབང་ཡོངས་རྫོགས་དོ་བདག་རང་ཉིད་ལ་བཞག་གནང་ཡོད་པ་འཛིན་སྐྱོང་གི་བཞེངས་ཕྱོགས་སྐོར་དང་། ཁྱད་པར་དུ་རྒྱ་གར་དབུས་གཞུང་གི་བཀོད་ཁྱབ་དོན་ཚན་བཞི་ཅན་ཞིག་ཕེབས་ཡོད་སྐོར་གསལ་བཤད་གནང་སོང་། ནང་སྲིད་ལས་ཁུངས་ཀྱི་རྩིས་འགོ་དང་འབྲེལ་ནས་སྐབས་དེར་སྤྱི་འཐུས་གཅིག་གིས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ལ་སྐྱབས་བཅོལ་བོད་མིའི་གཞིས་ཆགས་ཁག་ནང་གི་ས་ཁང་དང་འཛུགས་སྐྲུན་སྐོར་དང་འབྲེལ་ལ་དྭགས་ནང་གི་བོད་མི་ཁག་ཅིག་ནས་གཞིས་ཆགས་ཀྱི་ས་ཁང་ཉོ་ཚོང་གནང་གི་ཡོད་སྐོར་དྲི་བ་ཞིག་ཕུལ་བ་ལྟར། བཀའ་བློན་མཆོག་གིས་བོད་མིའི་གཞིས་ཆགས་ཁག་གི་ས་ཁང་ཉོ་ཚོང་གི་འགན་དབང་སུ་གཅིག་ལ་མེད་སྐོར་གསལ་བཤད་གནང་ཡོད། དེ་རིང་གྲོས་ཚོགས་ཐོག་ནས་སྤྱི་འཐུས་རྣམ་པས་བོད་ནས་ཕེབས་མཁན་གསར་འབྱོར་བ་རྣམས་ལ་བོད་མིའི་སྒྲིག་འཛུགས་ནས་མཐུན་རྐྱེན་སྦྱོར་སྤྲོད་སྐོར་དང་འབྲེལ། དེ་སྔ་སྦིར་ཁུལ་དུ་བོད་མི་སྐོར་ཞིག་ལ་སྡོད་ཁང་གནང་ཟིན་པ་དང་ད་ལྟ་ལྷོ་ཕྱོགས་མོན་གྷོ་དང་སྦེལ་ཀོབ་བཅས་སུ་སྡོད་ཁང་གསར་རྒྱག་གི་ལས་གཞི་འགྲོ་བཞིན་པ་ལ་བསྔགས་བརྗོད་དང་མུ་མཐུད་དེ་ལྟར་མཐུན་འགྱུར་གནང་གལ་ཡིན་པའི་དགོངས་ཚུལ་གནང་ཡོད། ཁ་སང་ཉིན་རྒྱབ་ནས་དེ་རིང་ཉིན་འཁྱོངས་རིང་ནང་སྲིད་ལས་ཁུངས་ཀྱི་རྩིས་འགོ་དང་འབྲེལ་ནས་གྲོས་ཚོགས་འཐུས་མི་རྣམ་པས་བགྲོ་གླེང་བཀའ་བསྡུར་སོགས་གནང་བའི་ཁྲོད། གྲོས་ཚོགས་སྔ་མ་དང་སྔ་མའི་སྔ་མ་སོགས་ཀྱི་ནང་དུ་ཡང་ཡང་གླེང་སློང་འབྱུང་བཞིན་པ་དྷ་ས་ཡོངས་གླིང་སློབ་གྲྭའི་སྐོར་དང་འབྲེལ་བའི་ཁ་མཆུ་ཨང་ ༨ པའི་སྐོར་དང་བལ་ཡུལ་ཚེ་རིང་རྒན་གསོ་ཁང་གི་འགན་འཛིན་བསྐོ་གཞག་གི་གནད་དོན་སྐོར་ལ་བགྲོ་གླེང་གསལ་བཤད་དང་དྲི་བ་དྲིས་ལན་བཅས་གནང་ནས་དུས་ཚོད་གང་འཚམས་བཏང་གནང་སོང་།

ཁམས་ལི་ཐིང་ཁུལ་གྱི་བོད་མིའི་འགོག་རྒོལ་མཚོན་པའི་པར་རིས་འགྲེམས་སྟོན།

བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འགྲམ་དུ་རྟེན་གཞི་བྱས་པའི་བོད་ཀྱི་འགྲེམས་སྟོན་ཁང་དུ་ཕ་རན་སིའི་གློག་བརྙན་བཟོ་བསྐྲུན་པ་དང་པར་པ་ Sandra Dolani ལགས་ཀྱིས་བོད་ཁམས་ལི་ཐང་ཁུལ་གྱི་བོད་མིའི་འགོག་རྒོལ་གྱི་རྣམ་པ་མཚོན་པའི་པར་རིས་འགྲེམས་སྟོན་ཞིག་གནང་སོང་། དེ་རིང་ཟླ་ ༣ ཚེས་ ༢༣ ཉིན་སྔ་དྲོ་ཁོ་མོས་ The Cradle of Tibetan Resistance འམ་ཁམས་ལི་ཐང་ཁུལ་གྱི་བོད་མིའི་འགོག་རྒོལ་ཞེས་པའི་པར་རིས་འགྲེམས་སྟོན་གནང་བ་དང་། སྐབས་དེར་བོད་མིའི་སྒྲིག་འཛུགས་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་དབུ་འབྱེད་གནང་ཡོད། འགྲེམས་སྟོན་གོ་སྒྲིག་གནང་མཁན་ Sandra Dolani ལགས་ཀྱིས་འགྲེམས་སྟོན་དང་འབྲེལ་ཕྱི་ནང་གི་གསར་འགོད་པར་ཐེངས་འདིའི་འགྲེམས་སྟོན་དེ་ཁོ་མོས་དེ་སྔ་ཕྱི་ལོ་ ༢༠༡༥ ལོར་ཕ་རན་སིར་བྱུང་བའི་འཇིགས་སྐུལ་བའི་དྲག་སྤྱོད་ཁྲོད་འདས་གྲོངས་སུ་གྱུར་པའི་ཁོང་གི་ནང་མི་རྣམ་པའི་དྲན་གསོ་ཆེད་འགོ་འཛུགས་གནང་བའི་ ONE འམ་གཅིག་ཞེས་རྒྱལ་སྤྱིའི་དཀའ་རྙོག་ཅན་གྱི་ས་གནས་འདྲ་མིན་གྱི་གནས་སྟངས་མཚོན་པའི་པར་རིས་དང་བརྙན་ཐུང་བརྒྱུད་ཁྱབ་སྤེལ་གནང་རྒྱུའི་ལས་གཞི་སྤེལ་བའི་ཆ་ཤས་ཤིག་ཡིན་པ་གསུངས་ཡོད། ལྷག་དོན་པར་རིས་དེ་དག་དེ་སྔ་ཡོ་རོབ་ཀྱི་རྒྱལ་ཁབ་མང་པོའི་ནང་འགྲེམས་སྟོན་གནང་སྟེ་བོད་ནང་གི་དངོས་ཀྱི་གནས་སྟངས་ངོ་སྤྲོད་གང་ཐུབ་ཞུས་ཡོད་པ་གསུངས་སོང་། བོད་ནང་གི་བོད་མི་ཚོས་དྲག་པོའི་སྲིད་བྱུས་ལ་འགོག་རྒོལ་གནང་སྟངས་དང་རྒྱུན་ལྡན་གྱི་འཚོ་བ་སྐྱེལ་སྟངས་སོགས་ལས་ཁོ་མོའི་ལས་གཞི་དེ་མུ་མཐུད་གནང་རྒྱུར་སེམས་ཤུགས་འཕར་མ་ཞིག་སྐྱེས་ཡོད་པ་གསུངས་བ་དང་ཆབས་ཅིག ད་ལྟའི་ཆར་ཁོ་མོས་བོད་ཁམས་ལི་ཐང་ཁུལ་གྱི་པར་རིས་འགྲེམས་སྟོན་ཙམ་ཞུས་ཡོད་ཀྱང་། སླད་མར་ཕྱི་ལོ་ ༢༠༡༦ ལོར་རང་སྲེག་གནང་མཁན་རྒྱས་གཅེས་པ་རྡོ་རྗེ་ཚེ་རིང་ལགས་ཀྱི་མི་ཚེ་ལོ་རྒྱུས་དང་འབྲེལ་བའི་དངོས་བྱུང་གློག་བརྙན་ The last Child ཞེས་པ་ཞིག་དང་། བོད་མིའི་ཆབ་སྲིད་བཙོན་ཟུར་གྲྭ་དཔལ་ལྡན་རྒྱ་མཚོ་ལགས་ཀྱིས་མི་རབས་གསར་པར་གནང་བའི་ལམ་སྟོན་ཕྱོགས་སྒྲིག། དེ་བཞིན་བོད་རིགས་འདྲ་མིན་ལ་བཅར་འདྲི་ཞུས་པའི་སྒྲུང་གཏམ་ཕྱོགས་སྒྲིག་བཅས་ཀྱི་ཐོག་ཕྱག་ལས་གནང་མུས་ཡིན་པ་གསུངས་ཡོད། གཞི་རྩའི་ཐེངས་འདིའི་འགྲེམས་སྟོན་ཁོངས་སུ་དེ་སྔ་ལོ་ངོ་བཅུ་གཉིས་ཙམ་གྱི་གོང་ལ་ཁོང་བོད་མདོ་ཁམས་ལི་ཐང་ཁུལ་དུ་བསྐྱོད་སྐབས་ས་གནས་ཀྱི་ཁོར་ཡུག་དང་དགོན་སྡེ། ལྷག་པར་དུ་རྒྱ་གཞུང་གི་དམ་དྲག་ཡོད་མེད་ལ་བསྟོས་མེད་ཀྱིས་ཡུལ་མི་ཚོས་རང་ཉིད་ཀྱི་རིག་གཞུང་གཅེས་འཛིན་དང་། མི་རིགས་ཀྱི་ལ་རྒྱ་སྲུང་སྐྱོབ་གནང་སྟངས་སོགས་མཚོན་པའི་པར་རིས་ལྔ་བཅུ་མན་ཙམ་སྒྲིག་ཤོམ་གནང་འདུག་པ་མ་ཟད། པར་རིས་ཁག་ཅིག་གི་ཆེད་ཁོང་ཕྱི་ལོ་ ༢༠༡༢ ལོར་སླར་ལི་ཐང་དུ་བསྐྱོད་སྐབས་ཕྱི་ལོ་ ༢༠༠༨ ལོར་བྱུང་བའི་ས་བྱི་ཞི་རྒོལ་ཆེན་མོའི་དོན་རྐྱེན་དང་འབྲེལ་ས་གནས་སུ་རྒྱ་གཞུང་གི་དམ་དྲག་བྱེད་ཤུགས་ཆེ་རུ་བཏང་ཡོད་སྟབས། དེ་སྔ་ཁོང་དང་ངོ་ཤེས་འཆམ་པོ་ཡོད་པའི་གྲོགས་ཕོ་མོ་དང་། ལྷག་པར་དུ་ཁོང་གི་གནས་བཤད་པ་བློ་བཟང་ཟེར་བ་ཁོང་དང་བཀའ་མོལ་ཞུར་ཁོང་ནས་འཇིགས་སྣང་ཆེན་པོ་གནང་སྐོར་སོགས་མཆན་འགྲེལ་བཀོད་འདུག སྐབས་དེར་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་གསར་འགོད་པར་ཐེངས་འདིའི་འགྲེམས་སྟོན་ཐོག་གཙོ་བོ་བོད་ལི་ཐང་ཁུལ་གྱི་གནས་སྟངས་ཁག་ཅིག་གསལ་བཏོན་གནང་ཡོད་ཀྱང་། རྒྱ་གཞུང་གི་དམ་དྲག་བྱེད་སྟངས་དེ་བོད་ཀྱི་ས་ཁུལ་ཚང་མའི་ནང་ལ་གཅིག་མཚུངས་ཡིན་སྐོར་གསུངས་པ་དང་ཆབས་ཅིག ད་རེས་ཕྱིའི་མི་རིགས་ཤིག་ནས་བོད་ནང་གི་དམ་དྲག་གནས་སྟངས་དང་འབྲེལ་བའི་པར་རིས་འགྲེམས་སྟོན་གནང་བ་དེས་རྒྱུན་དུ་བོད་མི་ཚོས་བོད་ནང་འགྲོ་བ་མིའི་ཐོབ་ཐང་མེད་པ་དང་། རྒྱ་གཞུང་གིས་དམ་དྲག་བྱེད་མུས་ཡིན་སྐོར་གསུངས་ཁག་མངོན་གསལ་ཆགས་ཡོད་པ་གསུངས་སོང་། རྩ་བའི་ཕ་རན་སིའི་མི་སེར་ཡིན་པ་ Sandra Dolani ལགས་ནི་དེ་སྔ་རྒྱ་ནག་ནང་གསར་འགོད་པའི་ཕྱག་ལས་གནང་མྱོང་ཡོད་པ་དང་། ཕྱི་ལོ་ ༢༠༠༧ ལོ་ནས་ད་བར་ཁམས་ལི་ཐང་ནང་ལ་ཐེངས་བཞི་དང་། བོད་མདོ་སྨད་ཁུལ་དང་རྒྱལ་ས་ལྷ་ས། གཞིས་ཀ་རྩེ་བཅས་སུ་ཕེབས་མྱོང་ཡོད་པ་རེད།

དགེ་རྒན་ཚོར་གསོལ་ཕོགས་འདང་ངེས་ཤིག་ཕུལ་དགོས་གལ་ཡིན་པའི་གླེང་སློང་ཤུགས་ཆེ་གནང་བ།

དེ་རིང་ཟླ་ ༣ ཚེས་ ༢༢ ཉིན་གྲོས་ཚོགས་ཀྱི་ལས་ཉིན་བརྒྱད་པའི་ཐོག་ཤེས་རིག་ལས་ཁུངས་ཀྱི་སྔོན་རྩིས་ཐོག་བགྲོ་གླེང་གནང་བའི་ཁྲོད་སྤྱི་འཐུས་མང་དག་ཞིག་གིས་སློབ་གྲྭའི་དགེ་རྒན་ཚོར་གསོལ་ཕོགས་འདང་ངེས་ཤིག་ཕུལ་དགོས་གལ་ཡིན་པའི་གླེང་སློང་ཤུགས་ཆེ་གནང་སོང་། ལོ་ཤས་སྔོན་ནས་བོད་སློབ་འཛིན་སྐྱོང་ཚོགས་པའི་སློབ་གྲྭ་རྣམས་ཤེས་རིག་ལས་ཁུངས་ནས་རྩིས་བཞེས་གནང་གཏན་འཁེལ་བ་དང་བསྟུན། ད་བར་བོད་སློབ་ ༨ རྩིས་སྤྲོད་ཟིན་ཡོད་པ་དང་འདི་ལོ་ནང་ཤེས་རིག་ལས་ཁུངས་ཀྱི་ངོས་ནས་དགེ་རྒན་ ༡༥༨ གསར་འདེམས་ས་མིག་གསལ་བསྒྲགས་གནང་བའི་ཁྲོད། དགེ་རྒན་དེ་དག་ལ་དེ་སྔ་རྒྱ་གར་གཞུང་ནས་མཐུན་རྐྱེན་གནང་མུས་བཞིན་ཧིན་སྒོར་ཁྲི་གསུམ་ལྷག་གནང་རྒྱུའི་གསལ་བསྒྲགས་བསྐྱངས་ཡོད་པ་ལྟར། དེ་རིང་གྲོས་ཚོགས་སུ་སྤྱི་འཐུས་མང་དག་ཞིག་ནས་ཤེས་རིག་ལས་ཁུངས་ཀྱི་བོད་སློབ་འཛིན་ཚོགས་ཀྱི་སློབ་གྲྭ་ ༨ རྩིས་བཞེས་ཐུབ་པར་ལེགས་གསོ་ཞུས་པ་དང་ཆབས་ཅིག སྤྱིར་བཙན་བྱོལ་བོད་མིའི་ཤེས་ཡོན་སྲིད་བྱུས་ལག་བསྟར་ཐོག་དགེ་རྒན་གལ་ཆེན་པོ་ཆགས་ཡོད་སྟབས། སློབ་གྲྭའི་དགེ་རྒན་ཚོར་གསོལ་ཕོགས་གཙོ་འགྱུར་མཐུན་རྐྱེན་ཁག་སྤར་ཐབས་གནང་དགོས་གལ་ཡིན་པ་གསུངས་སོང་། ཤེས་རིག་བཀའ་བློན་མཆོག་གིས་ཤེས་རིག་ལས་ཁུངས་ཀྱི་ངོས་ནས་གནད་དོན་དེའི་ཐོག་ཐབས་ཤེས་གནང་བཞིན་ཡོད་པ་དེ་ལྟར་ཡང་། གསོལ་ཕོགས་དང་ཁེ་ཕན་གཅིག་པོར་གཟིགས་ནས་མིན་པར་ཕྱག་ལས་གནང་བར་ཕེབས་པ་ཡིན་ཚེ་གནས་སྟངས་བཟང་དུ་འགྲོ་རྒྱུར་དམིགས་གསལ་ཕན་ཐོགས་ཡོང་ཐུབ་སྐོར་དགོངས་ཚུལ་ཡང་གསུངས་སོང་། དེ་བཞིན་ཤེས་རིག་ལས་ཁུངས་ཀྱི་སྔོན་རྩིས་དང་འབྲེལ་ནས་བོད་ཀྱི་སྐད་ཡིག་མི་ཉམས་རྒྱུན་འཛིན་དང་ཉམས་པ་སླར་གསོ་གནང་གལ་ཡིན་སྐོར་དང་འབྲེལ། ཕྱིས་སུ་བོད་པའི་སློབ་གྲྭ་ཁག་གི་ནང་དུ་ཧི་མཱ་ལ་ཡའི་རི་རྒྱུད་ཀྱི་སློབ་ཕྲུག་མང་པོ་ཞིག་སློབ་ཞུགས་གནང་གི་ཡོད་སྟབས། བོད་པའི་སྐད་ཡིག་ནང་ཡུལ་སྐད་བསྲེས་ལྷད་ཡོང་བའི་ངལ་བ་འཕྲད་བཞིན་པའི་དངངས་སྐྲག་ཡོད་སྐོར་གསུང་མཁན་བྱུང་བ་དང་། ཤེས་རིག་བཀའ་བློན་མཆོག་ནས་དཀའ་ངལ་དེ་དངོས་འབྲེལ་ཡིན་པར་ངོས་བཞེས་དང་འབྲེལ། དེང་སྐབས་སློབ་གྲྭ་ཟླ་སྒྲིལ་ལ་སོགས་པའི་འགྱུར་བ་ཆེན་པོ་ཞིག་འགྲོ་བའི་ཞོར་ལ་གནད་དོན་དེའི་ཐོག་དོ་སྣང་དང་ཐབས་ལམ་འཚོལ་ཞིབ་གནང་རྒྱུ་ཡིན་ཞེས་གསུངས་ཡོད། རྩ་བའི་དེ་རིང་གྲོས་ཚོགས་ཀྱི་ལས་ཉིན་ ༨ པ་དབུ་འཛུགས་དང་བསྟུན་སྤྱི་ཁྱབ་རྩིས་ཞིབ་ལས་ཁང་དང་། ལས་བྱེད་འདེམས་བསྐོ་ལྷན་ཁང་གཉིས་དང་འབྲེལ་བའི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་ཕེབས་ཡོད་པ་དེ་ལྟར་ཡང་། དེའི་ཁོངས་ནས་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ལ་མང་མོས་རྒྱབ་སྐྱོར་མ་ཐོབ་སྟབས་ཁྲིམས་འཆར་དེ་ཡར་འགྲོ་ཐུབ་མེད་པ་རེད། ཤེས་རིག་ལས་ཁུངས་ཀྱི་སྔོན་རྩིས་ཐོག་བགྲོ་གླེང་གནང་བའི་ཁྲོད། སློབ་གྲྭ་ཁག་གི་ནང་ཆོས་ལུགས་ལ་མ་བརྟེན་པའི་བཟང་སྤྱོད་སློབ་ཁྲིད་གནང་ཕྱོགས་དང་། བཙན་བྱོལ་བོད་མིའི་སྤྱི་ཚོགས་ནང་དུ་ལྷག་དཀར་སྲུང་བརྩི་བརྒྱུད་བོད་ཀྱི་སྐད་ཡིག་དང་རིག་གཞུང་གོང་འཕེལ་ཐད་ལ་ཕན་ཐོགས་ཆེན་པོ་ཡོང་བཞིན་ཡོད་པ་སོགས་གནད་དོན་མང་དག་ཞིག་གི་ཐོག་བགྲོ་གླེང་ལྷུག་པོ་གནང་ཡོད། རྩ་བའི་ཐེངས་འདིའི་གྲོས་ཚོགས་ཚོགས་དུས་ ༥ པ་ཐོག་དཔལ་འབྱོར་ལས་ཁུངས་ནས་ཤེས་རིག་ལས་ཁུངས་ཀྱི་བོད་ཕྲུག་ཚོའི་ཤེས་ཡོན་གྱི་ལས་དོན་ཆེད་ཧིན་སྒོར་ས་ཡ་ ༣༠༡ ལྷག་ཙམ་ལ་རྒྱབ་གཉེར་གནང་ཡོད་པ་རེད།

༸གོང་ས་མཆོག་མ་འོངས་པར་མོན་རྟ་དབང་བརྒྱུད་བོད་ལ་ཕྱིར་ཕེབས་ཐུབ་པའི་རེ་སྨོན་ཞུ་བཞིན་འདུག

ཟླ་ ༣ ཚེས་ ༡༧ ཉིན་མོ་དེ་ནི་དེ་སྔ་ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་གྱི་མཚན་མོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནོར་གླིང་རྟག་བརྟན་མི་འགྱུར་ཕོ་བྲང་ནས་རྒྱ་གར་དུ་བཙན་བྱོལ་ལ་ཆིབས་བསྒྱུར་མཛད་པའི་ཉིན་མོ་འཁེལ་གྱི་ཡོད་སྟབས། རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་གྲོང་ཁྱེར་རྟ་དབང་ནང་རྟེན་གཞི་ བྱས་པའི་ Core Group for Tibetan Cause འམ་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མས་རྐང་གོ་སྒྲིག་འོག་བོད་དང་རྒྱ་གར་གཉིས་ཀྱི་ས་མཚམས་ས་ཁུལ་ཆུ་དྭངས་མོར་ནས་པཐ་ཡཏྲ་ཞེས་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་ཡོད་པ་ལྟར།  ད་ལྟའི་ཆར་གོམ་བགྲོད་པ་རྣམས་རླུང་ལ་གྲོང་ཁྱེར་དང་ས་གནས་རྟ་དབང་གྲོང་ཁྱེར་བརྒལ་ནས་འབུམ་སྡེ་ལ། དེ་བཞིན་སེང་གེ་རྫོང་ཕྱོགས་སུ་གྲོམ་བགྲོད་གནང་མུས་རེད་འདུག འདི་ག་རླུང་འཕྲིན་ཁང་ནས་གོམ་བགྲོད་ཀྱི་ལས་འགུལ་རྐང་གོ་སྒྲིག་གནང་མཁན་ཁོངས་སུ་ཡོད་པ་སྐུ་ཞབས་རིན་ཆེན་ནོར་བུ་ལགས་སུ་འདས་པའི་ཉིན་ཤས་ནང་གི་གོམ་བགྲོད་དང་འབྲེལ་བཀའ་འདྲི་ཁག་ཅིག་ཞུས་པར་གོམ་བགྲོད་ཁྲོད་མཉམ་ཞུགས་གནང་མཁན་དང་།  ས་གནས་ཡུལ་མིའི་རྒྱབ་སྐྱོར་ལ་བལྟས་ཚེ་༸གོང་ས་མཆོག་བཙན་བྱོལ་དུ་ཕེབས་ནས་ད་བར་ལོ་ངོ་ ༦༠ ཙམ་འགྲོ་བཞིན་ཡོད་ཀྱང་། ས་གནས་མི་མང་གི་ངོས་ནས་དེ་སྔ་མགོན་པོ་༸གང་ཉིད་མཆོག་ལ་དད་དམ་དང་ཡིད་ཆེས་བརྟན་པོ་ཡོད་པ་ལྟར་འགྱུར་བ་རྩ་བ་ནས་ཕྱིན་མེད་པ་མ་ཟད། ལྷག་པར་དུ་གོམ་བགྲོད་པ་རྣམས་༸གོང་ས་མཆོག་གི་༸སྐུ་པར་བསྣམས་ཏེ་ས་གནས་ས་ཐོག་ཏུ་འབྱོར་སྐབས་ཕེབས་བསུ་ཞུ་སྟངས་དང་། ཆོས་ཕྱོགས་ཀྱི་མཛད་སྒོ་གོ་སྒྲིག་གནང་སྟངས་སོགས་མཐོང་སྐབས་༸གོང་ས་མཆོག་༸སྐུ་དངོས་ཆིབས་བསྒྱུར་མཛད་པ་ལྟ་བུའི་ཚོར་སྣང་ཆེན་པོ་ཡོང་གི་ཡོད་པ་གསུངས་ཡོད། ཁྱད་པར་དུ་༸གོང་ས་༸སྐྱབས་མགོན་ཆེན་པོ་མཆོག་ནི་འཛམ་གླིང་འདིའི་ཐོག་དཀའ་རྙོག་སེལ་མཁན་ཞི་བདེའི་མཚོན་རྟགས་ངོ་མ་དེ་ཡིན་སྟབས། ང་ཚོའི་ངོས་ནས་མགོན་པོ་༸གང་ཉིད་མཆོག་གི་གསང་གསུམ་གྱི་འཕྲིན་ལས་མུ་མཐུད་དར་ཞིང་རྒྱས་པ་དང་། དེ་སྔ་༸གང་ཉིད་མཆོག་བོད་ནས་མོན་རྟ་དབང་བརྒྱུད་བཙན་བྱོལ་དུ་ཕེབས་པ་ལྟར། མ་འོངས་པར་གང་མགྱོགས་མོན་རྟ་དབང་བརྒྱུད་རང་ཡུལ་བོད་གངས་ཅན་ལྗོངས་སུ་ཕྱིར་ཕེབས་ཐུབ་པའི་རེ་སྨོན་ཞུ་བཞིན་ཡོད་ཅེས་གསུངས་སོང་། གཞི་རྩའི་ལས་འགུལ་འདིའི་ནང་གོམ་བགྲོད་གནང་མཁན་རྣམས་ཕྱི་ཚེས་ ༢༠ ཉིན་མོན་རྟ་དབང་དུ་འབྱོར་སྐབས་ཁུལ་དེར་རྟེན་གཞི་བྱས་པའི་ཀཱ་ལ་དབང་པོ་ཚོགས་ཁང་དུ་གོམ་བགྲོད་པ་དང་ས་གནས་ཡུལ་མི་ ༤༠༠ ལྷག་ལྷན་འཛོམས་ཐོག་དམིགས་བསལ་གྱི་མཛད་སྒོ་ཞིག་ཚོགས་ཡོད་པ་དང་། སྐབས་དེར་རྟ་དབང་དགོན་པའི་སློབ་དཔོན་ཟུར་པ་ངག་དབང་ནོར་བུ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་འཚེ་མེད་ཞི་བ་དང་བྱམས་བརྩེའི་ཉམས་ལེན་སྐོར་བཀའ་སློབ་བསྩལ་བ་དེ་དག་མི་ཚེ་དངོས་ཀྱི་ནང་ལག་བསྟར་གནང་རྒྱུ་དང་། ལྷག་པར་དུ་བོད་བརྒྱུད་ནང་བསྟན་གྱི་གཞི་མ་བོད་ཀྱི་སྐད་ཡིག་ལ་སློབ་གཉེར་དང་འཛིན་སྐྱོང་སྤེལ་གསུམ་གནང་ན་༸རྒྱལ་བ་དགྱེས་པའི་མཆོད་སྤྲིན་ངོ་མ་དེ་ཡིན་པ་གསུངས་འདུག གཞན་ཡང་སྐབས་དེར་ཨུ་ཏྲ་པྲ་དེ་ཤ་མངའ་སྡེའི་ནང་གི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Sunderlal Suman ལགས་ཀྱིས་ས་གནས་ཡུལ་མི་ཚོས་༸གོང་ས་མཆོག་དང་བོད་མི་རྣམས་སླར་རང་ཡུལ་བོད་དུ་ཕྱིར་༸ཞབས་སོར་འཁོད་ཐུབ་ཐབས་སུ་ནུས་པ་མཉམ་སྤུངས་གནང་དགོས་གལ་ཡིན་པ་སོགས་གསུངས་ཡོད་པ་མ་ཟད། རྒྱ་གར་གཞུང་གི་ཆེ་བསྟོད་གཟེངས་རྟགས་པདྨ་ཤྲི་བཞེས་མྱོང་མཁན་སྐུ་ཞབས་ཐུབ་བསྟན་ཕུན་ཚོགས་ལགས་ཀྱིས་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་མི་ལོ་ ༦༠ ཙམ་རིང་སྐུ་ངལ་འཛེམས་མེད་ཐོག་ནས་རྒྱ་གར་གྱི་ཆེ་མཐོང་སྲུང་སྐྱོབ་དང་། ལྷག་པར་དུ་ཤར་མོན་ཡུལ་ནས་ནུབ་ལ་དྭགས་བར་གྱི་ཧི་མཱ་ལ་ཡའི་ས་ཁུལ་ཁག་ཏུ་ནང་ཆོས་འཛིན་སྐྱོང་སྤེལ་གསུམ་ཡོང་སླད་མཛད་འཕྲིན་རྒྱ་ཆེ་བསྐྱངས་དང་སྐྱོང་བཞིན་ཡོད་པ་འགྲེལ་བརྗོད་དང་སྦྲགས། ཧི་མཱ་ལ་ཡའི་མི་རིགས་ཚོའི་ངོས་ནས་༸གོང་ས་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་མགོན་པོ་༸གང་ཉིད་མཆོག་ལ་ཐུགས་རྗེ་ཆེ་ཞུ་རྒྱུའི་དུས་ལ་བབ་ཡོད་པ་ཡང་གསུངས་འདུག རྩ་བའི་ཐེངས་འདིའི་གོམ་བགྲོད་ལས་འགུལ་དེ་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་གྲོང་ཁྱེར་རྟ་དབང་ནང་རྟེན་གཞི་བྱས་པའི་ Core Group for Tibetan Cause འམ་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མས་གོ་སྒྲིག་འོག་ཁུལ་དེར་ཡོད་པའི་རྒྱ་གར་བོད་དོན་རྒྱབ་སྐྱོར་ཚོགས་པ་དང་། ས་གནས་ཀྱི་དགོན་སྡེ་ཁག དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་ཅིག ས་གནས་ཡུལ་མི་སོགས་ནས་མཉམ་ཞུགས་གནང་ཡོད་པ་དང་། ལས་འགུལ་བ་དེ་དག་རླུང་ལ་གྲོང་ཁྱེར་དང་ས་གནས་རྟ་དབང་དང་བྱང་སྡེ་རང་། འབུམ་སྡེ་ལ། དེ་བཞིན་སེང་གེ་རྫོང་སོགས་ ལ་མུ་མཐུད་གོམ་བགྲོད་ཀྱིས་དེ་སྔ་༸གོང་ས་མཆོག་ཆིབས་བསྒྱུར་མཛད་ཡུལ་ས་གནས་སོ་སོར་གོམ་བགྲོད་གནང་ནས་ཕེབས་ཏེ་མཐར་ཕྱི་ཚེས་ ༢༧ ཉིན་ཨཱ་སམ་མངའ་སྡེའི་གྲོང་ཁྱེར་ཏེ་ཛ་པུར་ནང་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་ལས་འགུལ་མཇུག་སྒྲིལ་གནང་གི་ཡོད་པ་རེད།

བཀའ་བློན་དུ་བདམས་ཐོན་བྱུང་བ་པདྨ་དབྱངས་ཅན་ལགས་ནས་ཤེས་རིག་ལས་ཁུངས་སུ་ཞབས་ཕྱི་གང་ཐུབ་ཞུ་རྒྱུའི་དགོངས་བཞེས་གནང་བཞིན་འདུག

ཁེ་ན་ཌར་བཅའ་བཞུགས་ཏཱ་ལའི་བླ་མ་མཐོ་སློབ་ཀྱི་སློབ་སྤྱི་གཞོན་པ་ཟུར་པ་འབུམ་རམས་པ་པདྨ་དབྱངས་ཅན་ལགས་བོད་མིའི་སྒྲིག་འཛུགས་ཀྱི་བཀའ་ཤག་སྐབས་ ༡༥ པའི་བཀའ་བློན་དུ་བདམས་ཐོན་བྱུང་སོང་། དེ་རིང་ཟླ་ ༣ ཚེས་ ༢༡ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ལས་ཉིན་བདུན་པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༡ པའི་དགོངས་དོན་སྲིད་སྐྱོང་གིས་རང་གི་བཀའ་ཤག་ལྷན་ཚོགས་སུ་བཀའ་བློན་ཇི་དགོས་ཀྱི་འོས་མི་མི་འགྲོའི་མཚན་དང་ལོ་རྒྱུས་གྲོས་ཚོགས་སུ་འབུལ་དགོས་པ་ལྟར། སྲིད་སྐྱོང་མཆོག་གིས་འབུམ་རམས་པ་པདྨ་དབྱངས་ཅན་ལགས་བཀའ་ཤག་གི་བཀའ་བློན་འོས་མི་གཅིག་ཏུ་མཚན་འབོད་གནང་ཡོད་པ་རེད། འོས་མི་དེའི་ཐོག་ལ་སྤྱི་འཐུས་རྣམ་པས་གསང་བའི་འོས་ཤོག་འཕངས་རྗེས་སྤྱི་འཐུས་རྩ་འབོར་ ༤༤ ནས་འོས་པ་ ༢༦ དང་མི་འོས་པ་ ༡༥ བར་བཞུགས་གྲངས་ ༣ བཅས་ཁོང་ལ་མང་མོས་ཐོག་ནས་བཀའ་བློན་དུ་བདམས་ཐོན་བྱུང་ཡོད་པ་རེད། བཀའ་བློན་འོས་མི་དེ་ལ་འགག་པ་གནང་མཁན་སྤྱི་འཐུས་གཅིག་བྱུང་ཡོད་པ་ལས་འཕྲོས་ནས་སྲིད་སྐྱོང་བློ་བཟང་སེང་གེ་མཆོག་གིས་ད་ལྟ་ཤེས་རིག་ལས་ཁུངས་ལ་ངེས་པར་དུ་བཀའ་བློན་གཅིག་དགོས་ཀྱི་ཡོད་པ་ལྟར་འབུམ་རམས་པ་པདྨ་དབྱངས་ཅན་ལགས་ནི་བཀའ་བློན་འོས་མི་ཚད་མཐོ་པོ་ཞིག་ཐོབ་ཡོད་པར་ངོས་འཛིན་གནང་གི་ཡོད་ཅེས་གསུངས་ཡོད། བཀའ་བློན་དུ་གསར་དུ་བདམས་ཐོན་བྱུང་བ་འབུམ་རམས་པ་པདྨ་དབྱངས་ཅན་ལགས་ནས་འདི་ག་རླུང་འཕྲིན་ཁང་གི་བཀའ་འདྲི་དང་ལེན་དང་སྦྲགས། ཁོང་ད་རེས་བཀའ་བློན་དུ་བདམས་ཐོན་བྱུང་བར་དགའ་ཚོར་དང་བཅས་ཁོང་གིས་ངོས་ནས་བོད་མིའི་སྒྲིག་འཛུགས་ལ་ཞབས་ཕྱི་ཞུ་རྒྱུ་ནི་གོ་སྐབས་དང་སྐལ་བ་བཟང་པོ་ཞིག་ལ་ངོས་འཛིན་གནང་བཞིན་ཡོད་པ་དང་། ཁྱད་པར་དུ་ཤེས་རིག་ལས་ཁུངས་སུ་ཞབས་ཕྱི་གང་ཐུབ་ཞུ་རྒྱུའི་དགོངས་བཞེས་གནང་བཞིན་ཡོད་པ་གསུངས་སོང་། འབུམ་རམས་པ་པདྨ་དབྱངས་ཅན་ལགས་ནས་ཕྱི་ལོ་ ༢༠༡༢ ནས་ ༢༠༡༦ བར་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་སློབ་ཀྱི་སློབ་སྤྱི་གཞོན་པའི་ཐུགས་འགན་བཞེས་འདུག ཁོང་གིས་ཕྱི་ལོ་ ༡༩༩༣ ལོ་ནས་ལྡི་ལི་དང་མ་ཌི་རས་མཐོ་སློབ་ནས་དབྱིན་སྐད་ཐོག་མཐོ་རིམ་དང་ཉེ་བའི་གཙུག་ལག་རབ་འབྱམས་པ་ཐོན་འདུག་པ་དང་། ཕྱི་ལོ་ ༡༩༩༦ ལོར་དགེ་འོས་ཐོན་རྗེས་སུ་ཇཱ་བོད་ཁྱིམ་སློབ་གྲྭར་དབྱིན་སྐད་དགེ་རྒན་གྱི་ཕྱག་ལས་གནང་འདུག ཕྱི་ལོ་ ༢༠༠༡ ནང་དུ་ཁོང་ཨ་རིར་ Fulbright སློབ་ཡོན་ཁོངས་སུ་ལོ་གཅིག་རིང་དབྱིན་ཇི་སློབ་ཁྲིད་ཐོག་སློབ་སྦྱོང་གནང་འདུག་པ་དང་དེའི་རྗེས་སུ་རིམ་པས་གཙུག་ལག་རབ་འབྱམས་པ་དང་མཐར་ཤེས་ཡོན་སློབ་ཁྲིད་ཐོག་འབུམ་རམས་པ་ཐོན་འདུག ད་ལྟའི་གནས་སྐབས་འདིར་འབུམ་རམས་པ་པདྨ་དབྱངས་ཅན་ལགས་ནི་བཀའ་ཤག་འདིའི་ནང་བེུད་བཀའ་བློན་གཅིག་པུ་དེ་ཆགས་ཡོད་པ་རེད། སྲིད་སྐྱོང་བློ་བཟང་སེང་མཆོག་གིས་དེ་སྔ་ ༢༠༡༦ ལོར་ཐོག་མར་རང་གི་བཀའ་ཤག་ཏུ་བེུད་བཀའ་བློན་གཅིག་བསྐོ་གཞག་ཟིན་ཀྱང་། ལོ་ནའི་བབ་ཀྱི་ནས་ཆ་དཀའ་ངལ་འཕྲད་པར་བརྟེན་རྗེས་སུ་བཀའ་བློན་གྱི་མཚན་གནས་ནས་ཕྱིར་འཐེན་གནང་དགོས་བྱུང་ཡོད་པ་རེད། དེའི་རྗེས་སུ་བཀའ་བློན་འོས་མི་དེ་སླར་ཡང་གྲོས་ཚོགས་སུ་བསྣམས་ཀྱང་གྲོས་ཚོགས་ནས་བདམས་ཐོན་བྱུང་མེད་པ་རེད།

འཛིན་སྐྱོང་བཀའ་ཤག་ནས་གྲོས་ཚོགས་འཐུས་མི་རྣམ་པའི་དགོངས་ཚུལ་ལ་གོ་བསྡུར་ནན་པོ་གནང་ཐོག་བྱ་ལམ་བྱ་བདེའི་དགོངས་བཞེས་དགོས་པའི་འབོད་སྐུལ་གནང་བ།

སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་ནས་དེ་རིང་ཉིན་གྲངས་དྲུག་པ་དེ་ཆགས་ཡོད་ཀྱང་། བོད་མིའི་སྒྲིགས་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་འཆར་འབུལ་གྱི་ལས་རིམ་དུས་ཐོག་ཕྱིན་མ་ཐུབ་པར་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་དང་དེའི་རྗེས་འབྲས་སྤྱི་ཚོགས་ནང་ལབ་གླེང་དང་དཀའ་རྙོག་འབྱུང་བཞིན་པའི་གནད་དོན་ཐོག་བགྲོ་གླེང་མུ་མཐུད་གནང་བཞིན་པ་ལྟར། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དེ་རིང་ཉིན་རྒྱབ་ཀྱི་ཚོགས་ཐེངས་ཐོག་གནད་དོན་ཆེ་ཆུང་ལ་ལྟོས་མེད་དཀའ་ངལ་ཞིག་ཡོད་པ་གསལ་པོ་ཡིན་སྟབས། འཛིན་སྐྱོང་བཀའ་ཤག་ནས་མིག་བཙུམ་ནས་མ་བཞུགས་པར་ད་རེས་ཀྱི་གྲོས་ཚོགས་དེའི་ཐོག་སྤྱི་འཐུས་རྣམ་པས་བགྲོ་གླེང་གནང་བའི་ཐོག་གོ་བསྡུར་གནང་སྟེ་བྱ་ལམ་བྱ་བདེའི་དགོངས་བཞེས་གནང་དགོས་གལ་ཡིན་པའི་འབོད་སྐུལ་གནང་སོང་། དེ་བཞིན་སང་ཉིན་གྲོས་ཚོགས་ཀྱི་ལས་དོན་གནང་ཕྱོགས་དང་འབྲེལ་གནད་དོན་ཁག་ཅིག་གི་ཐོག་བཞུགས་མོལ་ཚོགས་འདུ་ཞིག་ཚོགས་ཀྱི་ཡོད་པ་ལྟར། བྱང་ཨ་རིའི་སྐུ་ཚབ་དོན་གཅོད་ཀྱི་གནད་དོན་ཐོག་བྱ་ལམ་བྱ་བདེ་ཇི་ཡོད་ཐོག་དགོངས་ཚུལ་གསལ་པོ་སྤུངས་དགོས་པ་དང་། དེའི་མཇུག་སྐྱོང་གང་གནང་དགོས་མིན་བཅས་ཀྱི་ཐོག་དགོངས་པ་ནན་པོ་བཞེས་དགོས་པའི་ལམ་སྟོན་གསལ་པོ་གནང་ཡོད། སྤྱིར་ཐེངས་འདིའི་གྲོས་ཚོགས་ཐོག་སྤྱི་འཐུས་རྣམ་པས་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་དང་འབྲེལ་བའི་གནད་དོན་ཐོག་ཞིབ་འཇུག་ཚོགས་ཆུང་ཆེད་འཛུགས་གནང་དགོས་སྐོར་གསུང་མཁན་དང་། ཡང་ཁག་ཅིག་གིས་དེར་མོས་མཐུན་གནང་གི་མེད་པ་མ་ཟད། སྤྱི་འཐུས་ལ་ལས་བཀའ་ཤག་དང་། བཀའ་སྤྱི་ལྷན་རྒྱས་ནས་གནད་དོན་དེའི་ཐོག་ངོ་རྒོལ་གནང་མཁན་ཚོ་དང་ལྷན་དངོས་སུ་མཇལ་འཕྲད་ཀྱིས་གནས་སྟངས་ཞི་འཇམ་གནང་དགོས་པའི་དགོངས་ཚུལ་བཏོན་ཡོད། འཛིན་སྐྱོང་བཀའ་ཤག་གི་ངོས་ནས་གནད་དོན་དེའི་ཐོག་ཁྲིམས་ཁང་ལ་ཕེབས་རྒྱུ་མ་གཏོགས་ཐབས་ལམ་གཞན་མེད་པའི་འགྲེལ་བརྗོད་གནང་གི་ཡོད་པ་རེད། རྩ་བའི་གྲོས་ཚོགས་ཀྱི་ལས་ཉིན་དྲུག་པ་དེའི་ཐོག་སྔ་དྲོ་བྱང་ཨ་མི་རི་ཀའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་དང་འབྲེལ། སྐར་རྟགས་ཅན་གྱི་དྲི་བ་དྲིས་ལན་གྱི་ལས་རིམ་ཞིག་ཀྱང་ཕེབས་ཡོད་པ་དང་། དེ་བཞིན་ཉིན་རྒྱབ་ཏུ་ཨ་རིའི་དོན་ཁང་གི་སྔོན་རྩིས་འཆར་འབུལ་ཐོག་བགྲོ་གླེང་གནང་སྐབས་སུ་ཆོས་རིག་བཀའ་བློན་མཆོག་གིས་གསལ་བཤད་གནང་པར་འདས་པའི་ཉིན་ཤས་ནང་གནད་དོན་དེའི་སྐོར་བགྲོ་གླེང་རིམ་པ་བྱུང་བའི་ནང་སྤྱི་འཐུས་ཁག་ཅིག་ནས་བཀའ་ཤག་དགོངས་པ་ཞུས་དགོས་པ་སོགས་ཀྱི་བཀའ་མོལ་མང་དག་ཞིག་གསུང་མཁན་བྱུང་ཡོད་པ་ལྟར། དེ་ལྟར་གནང་བ་ཡིན་ན་ད་ལྟའི་བོད་ཀྱི་ཛ་དྲག་གནས་སྟངས་གང་འདྲ་ཆགས་ཀྱི་ཡོད་དམ་ཞེས་དྲི་བ་གནང་སོང་། སྤྱི་འཐུས་གཞན་ཁག་ཅིག་ནས་གནད་དོན་དེའི་ཐོག་ཞིབ་འཇུག་ཚོགས་ཆུང་འཛུགས་དགོས་སྐོར་གསུངས་ཡོད་ཀྱང་ཆོས་རིག་བཀའ་བློན་མཆོག་ནས་དེ་ལྟར་གནང་དགོས་པ་ཞིག་ལ་གཟིགས་ཀྱི་མེད་པ་དང་མོས་མཐུན་རྩ་བ་ནས་མེད་ཅེས་གསལ་བཤད་གནང་སོང་།

༸རྒྱལ་བའི་༸སྐུ་ཕྱྭའི་ཐོག་སྔར་ལྷག་མ་གཏོགས་འཐུས་ཤོར་བཏང་བ་རྩ་བ་ནས་མེད།

དེ་རིང་གྲོས་ཚོགས་ཀྱི་ལས་ཉིན་དྲུག་པ་དེའི་ཐོག་ནས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་རྩིས་འགོ་དང་ལས་དོན་ཐོག་ལ་གྲོས་ཚོགས་འཐུས་མི་རྣམས་པས་བགྲོ་གླེང་གསལ་བཤད་དང་དྲི་བ་བཅས་གནང་བའི་ཁྲོད། དུས་ཚོུད་དང་དྲི་བ་མང་ཆེ་བ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭའི་སྐོར་དང་འབྲེལ་མགོན་པོ་མཆོག་དགུང་ནའི་བབ་ཀྱི་ཆ་ནས་ད་ཆ་༸སྐུ་ངལ་གསོ་བཞུགས་ཀྱི་དུས་ཚོུད་ཐོག་དགོངས་པ་བཞེས་གལ་ཡིན་པ་དང་། ཉེ་ཆར་རྡོ་རྗེ་གདན་གྱི་གསུང་ཆོས་ར་བའི་ཉེ་འགྲམ་དུ་འབར་རྫས་རྙེད་སོན་བྱུང་སྐོར་དང་། ༸གོང་ས་མཆོག་གི་གསུང་ཆོས་ཞུ་མཁན་དང་མཇལ་བཅར་ཞུ་མཁན་ཁོངས་དོགས་གཞི་ཅན་མི་སྣ་ཁ་ཤས་ཐོན་བཞིན་པ་སོགས་༸རྒྱལ་བའི་༸སྐུ་ཕྱྭ་ལ་ཉེན་ཁར་གཟིགས་བཞིན་པའི་དགོངས་ཚུལ་ཁག་ཅིག་གསུང་མཁན་བྱུང་ཡོད་སྟབས། བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་བདེ་སྲུང་ཀྱི་ལས་དོན་གཙོ་བོ་༸རྒྱལ་བའི་༸སྐུ་ཕྱྭ་ཡིན་པས་ལས་ཁུངས་ཀྱི་ངོས་ནས་༸སྐུ་ཕྱྭའི་ཐད་ལ་སྔར་ལྷག་མ་གཏོགས་འཐུས་ཤོར་བཏང་བ་རྩ་བ་ནས་མེད་ཅེས་གསུངས་སོང་། གཞན་ཡང་བདེ་སྲུང་ལས་ཁུངས་དང་འབྲེལ་ནས་བོད་མི་ཆབ་སྲིད་བཙོན་པའི་གནས་སྟངས་སྐོར་དང་སྐད་འཕྲིན་སོགས་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་དང་འབྲེལ་ནས་བོད་པའི་སྤྱི་ཚོགས་ནང་གི་བདེ་འཇགས་སྐོར་སོགས་གནད་དོན་མང་ཅིག་གི་ཐོག་ལའང་དྲི་བ་དང་བགྲོ་གླེང་གནང་སོང་བ་དང་། ཁྱད་པར་དུ་སྤྱི་འཐུས་རྣམ་པས་བདེ་སྲུང་བཀའ་བློན་མཆོག་ལ་དྲི་བ་ཞུ་དོན་གཙོ་གནད་གཞན་གཅིག་ནི་བཙན་བྱོལ་བོད་མི་རྣམས་ཀྱི་སྐྱབས་བཅོལ་ལག་དེབ་དྲ་ཐོག་དེབ་སྐྱེལ་ཞུ་ཕྱོགས་དང་གནས་སྤོ་སྐོར་ལ་ཡིན་སྟབས། སྲིད་སྐྱོང་བློ་བཟང་སེང་གེ་མཆོག་གིས་བར་ལམ་བོད་མི་རྣམས་ཀྱི་དྲ་ལམ་དེབ་སྐྱེལ་ཞུ་ཕྱོགས་དང་འབྲེལ་ནས་དཀའ་ངལ་མང་དག་ཅིག་འཕྲད་དང་འཕྲད་བཞིན་པ་སོང་། བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་དབུས་གཞུང་ལ་དེའི་དུས་བཀག་གི་དུས་ཚེས་དེ་ཕྱི་ཟླ་ ༩ པའི་ཟླ་མཇུག་བར་ཕར་འགྱངས་ཡོང་བར་རེ་བ་ཞུས་ཡོད་ཀྱང་། རྒྱ་ཆེ་མང་ཚོགས་ནས་ལྷོད་ཡངས་མེད་པའི་ཐོག་ནས་གསལ་བསྒྲགས་སྔོན་སོང་ལྟར་གང་སྔ་སྔ་དྲ་ཐོག་དེབ་སྐྱེལ་གནང་དགོས་གལ་ཡིན་པའི་འབོད་སྐུལ་གནང་ཡོད། ལྷག་པར་དུ་སྲིད་སྐྱོང་མཆོག་གིས་རྒྱ་གར་གཞུང་ནི་ཕ་མ་ལྟར་བོད་མི་རྣམས་ལ་གཟིགས་སྐྱོང་རྒྱ་ཆེ་གནང་དང་གནང་བཞིན་པ་སོང་ཙང་། ད་ཆ་བོད་མི་ ༩༥༥ ཡི་སྐྱབས་བཅོལ་ལག་དེབ་བཟོ་ཆེད་འབྲེལ་ཡོད་ལས་ཁུངས་སུ་སྐྱེལ་ཡོད་པ་ལྟར་དེ་ཡང་གང་མགྱོགས་བཟོ་ཐུབ་པའི་རེ་བ་དང་། དེ་དེ་བཞིན་བོད་མི་རྣམས་རྒྱ་གར་ནས་ཕྱི་རྒྱལ་དུ་ཐོན་པར་ཕྱིར་ཐོན་མཐོང་མཆན་དང་ཆོག་མཆན་གཉིས་ཀ་སྟབས་བདེ་བ་བཟོ་ཆེད་མ་འོངས་པ་ Traverl Document འམ་ཕྱིར་བསྐྱོད་ངོ་སྤྲོད་ལག་འཁྱེར་ཁོ་ནས་གོ་ཆོད་ཐུབ་རྒྱུའི་འབད་བརྩོན་སྒོ་གང་ས་ནས་གནང་མུས་ཡིན་པ་གསུངས་ཡོད། དེ་རིང་བདེ་སྲུང་ལས་ཁུངས་ཀྱི་རྩིས་འགོ་དང་ལས་དོན་ལས་འཕྲོས་ནས་སྤྱི་འཐུས་གྲོས་ཚོགས་ནང་གི་འཐུས་མི་གཅིག་གིས་རྒྱ་ནག་འཐབ་ཕྱོགས་གཅིག་གྱུར་ལས་ཁང་གི་ལས་བྱེད་དང་མཉམ་དུ་ཞལ་ལག་བཞེས་ཡོད་པའི་གནད་དོན་སྐོར་སླར་ཡང་གླེང་སློང་བྱུང་ཡོད་སྟབས། དོན་གནད་དེ་གསུང་མཁན་སྤྱི་འཐུས་རྣམ་པས་དེའི་ཐོག་ལ་བདེ་སྲུང་ལས་ཁུངས་ནས་ཞིབ་འཇུག་མཐིལ་ཕྱིན་གནང་དགོས་པ་དང་། གནས་ཚུལ་འདི་དངོས་འབྲེལ་ཡིན་ཚེ་ཧ་ཅང་གི་ཚབས་ཆེ་ཡིན་པ་གསུངས་ཡོད། སྤྱི་འཐུས་ཁ་ཤས་ནས་དོགས་གཞི་གནང་ཡུལ་འབྲེལ་ཡོད་སྤྱི་འཐུས་དེ་ཉིད་ནས་གྲོས་ཚོགས་སུ་གསལ་བཤད་གནང་བའི་ཁྲོད། བདེ་སྲུང་བཀའ་བློན་མཆོག་གིས་དེའི་ཐད་ལ་བཀའ་ལན་ལམ་སེང་དང་ཁ་ཐུག་གནང་དགོས་པའི་འབོད་སྐུལ་དང་། མཐར་ཁྲིམས་ཞིབ་ཁང་ལའང་ཞུ་ས་ཡོད་དགོས་སྐོར་གསུངས་སོང་། གཞན་ཡང་སྤྱི་འཐུས་གཅིག་གིས་ད་ཆ་གྲོས་ཚོགས་ཀྱི་ཕྱི་ལ་ངོ་རྒོལ་ལས་འགུལ་སྤེལ་བཞིན་པ་གཙོས་ངོ་རྒོལ་གྱི་ལས་རིགས་ཡོང་སྐབས་བདེ་སྲུང་ལས་ཁུངས་ནས་ཁོང་རྣམ་པ་སུ་ཡིན་སོགས་རྒྱུས་ལོན་དང་སྤྱི་ཚོགས་ཀྱི་བདེ་འཇགས་ཐོག་དགོངས་པ་བཞེས་གནང་གི་ཡོད་མེད་ཐོག་བཀའ་འདྲི་ཞུ་མཁན་བྱུང་ཡོད་སྟབས། བཀའ་བློན་མཆོག་ནས་དེ་དག་ཀུན་ལ་ངོས་ཟིན་པའི་ཐོག་ནས་འགན་འཁུར་བཞིན་ཡོད་པ་གསུངས་ཡོད། ཁ་སང་ཉིན་རྒྱབ་ནས་དེ་རིང་ཉིན་གུང་གསོལ་ཚིགས་བར་གྲོས་ཚོགས་སུ་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་རྒྱུན་གྲོན་དང་དམིགས་བསལ། དམིགས་བཀར། ཟུར་བཀོལ་དང་བཅས་པ་རྩིས་འགོ་སྤྱིའི་ཐོག་བགྲོ་གླེང་བཀའ་བསྡུར་ཞིབ་ལྷུག་གནང་གྲུབ་རྗེས་ཉིན་གུང་རྒྱབ་ནས་ཕྱི་དྲིལ་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་དང་དེ་བཞིན་ཨ་རིའི་སྐུ་ཚབ་དོན་གཅོད་ཁང་གི་རྩིས་འགོ་སྤྱིའི་ཐོག་ཕེབས་ནས་བགྲོ་གླེང་དང་དྲི་བ་དྲིས་ལན་བཅས་གནང་ཡོད་པ་རེད།

Latest news