༸གོང་ས་མཆོག

ཁ་སང་ཕྱི་ཟླ་ ༨ ཚེས་ ༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ནང་ཚོགས་དང་དགོན་ཚོགས་གཉིས་ཐུན་མོང་གིས་གསོལ་སྟོན་གཟབ་རྒྱས་ཤིག་འདེགས་འབུལ་ཞུ་སྐབས་མགོན་པོ་༸གང་ཉིད་མཆོག་༸སྐུ་ལུས་ཤ་རུས་ལས་གྲུབ་པ་ཡིན་སྟབས་༸སྐུ་ཐང་ཆད་རྒྱུའི་མཛད་འཕྲིན་མང་དག་ཞིག་བསྐྱང་ཚེ་༸སྐུ་ཚེ་ཡུན་རིང་བཞུགས་རྒྱུར་འགོག་རྐྱེན་བཟོ་ངེས་ཡིན་པར་བཀའ་བསྩལ་འདུག ༸གོང་ས་མཆོག་གིས་དུས་སང་ལ་དྭགས་སུ་སྐུ་ངལ་གསོ་རྒྱུའི་ཆེད་ཁྱུག་ཙམ་རིང་ཕེབས་རྒྱུའི་ཐུགས་རེ་གནང་བཞིན་ཡོད་པ་དང་། ༸སྐུ་ངལ་གསོ་རྒྱུའི་ཆེད་ཕེབས་རྒྱུའི་དགོངས་པ་ཡོད་པ་ལས་བྲལ་བ་འཚུབ་འཚུབ་གནང་རྒྱུ་སླད་མིན་སྐོར་བཀའ་བསྩལ་དང་འབྲེལ། མགོན་པོ་༸གང་ཉིད་མཆོག་༸སྐུ་ལུས་ཤ་རུས་ལས་གྲུབ་པ་ཞིག་ཡིན་སྟབས་༸སྐུ་ཐང་ཆད་རྒྱུའི་མཛད་འཕྲིན་མང་དག་བསྐྱང་ཚེ་༸སྐུ་ཚེ་ཡུན་རིང་བཞུགས་རྒྱུར་འགེགས་རྐྱེན་བཟོ་ངེས་ཡིན་པས་༸སྐུ་ལྷོད་ལྷོད་གནང་ནས་༸སྐུ་ཚེ་རིང་བ་བཞུགས་རྒྱུར་དགའ་བ་འདུག་གམ་བྲལ་འཚུབ་ཐོག་༸སྐུ་ཚེ་ཐུང་བ་བཞུགས་རྒྱུར་དགའ་བ་འདུག་ཞེས་བཀའ་བསྩལ་འདུག ༸གོང་ས་མཆོག་གིསལ་དྭགས་མང་ཚོགས་ནས་དད་པ་གཡོ་བ་མེད་པ་ཞིག་ཡོད་པ་མ་ཟད་ཁུལ་དེའི་ནང་གི་ཁ་ཆེ་བ་ཚོས་དགའ་ཚོར་ཆེན་པོ་བྱེད་བཞིན་པ་བཅས་ལ་ཐུགས་འགྱེས་ཚོར་ཆེན་པོ་བྱུང་ཞེས་བཀའ་བསྩལ་བ་དང་འབྲེལ། ལ་དྭགས་སུ་མཛད་འཕྲིན་དུ་མ་བསྐྱངས་གནང་བ་དེས་བསྟན་པ་དང་འགྲོ་བར་ཕན་ཐོགས་ཆེན་པོ་བྱུང་ཡོད་པར་དགོངས་སྐོར་བཀའ་ནན་མཛད་འདུག ཁ་སང་ཟླ་ ༨ ཚེས་ ༣ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གླེ་རྒྱལ་སའི་ནང་ལ་དྭགས་ཧེཊ་ཇུ་མ་བྷག་ཞེས་པའི་སྐྱེད་ཚལ་དབུ་འབྱེད་གནང་བ་དང་འབྲེལ། མགོན་པོ་༸གང་ཉིད་མཆོག་ནས་རྒྱ་གར་རྒྱལ་ཁབ་ལ་ཆེ་བསྟོད་དང་ཐུགས་མོས་གནང་གི་ཡོད་ཀྱང་རྒྱལ་ཁབ་འདིའི་ནང་རིགས་རུས་དབྱེ་འབྱེད་གནང་བཞིན་པ་དེ་བློ་ཕམ་བྱ་གཞི་ལས་མ་འདས་པའི་གནད་དོན་ཞིག་ཡིན་པར་བཀའ་བསྩལ་བ་དང་ཆབས་ཅིག་ཏུ་༸གོང་ས་མཆོག་ནས་དུས་རྟག་ཏུ་ཆོས་དཔོན་ཚོར་འགྲོ་བ་མི་གཅིག་གྱུར་གྱི་བསམ་པ་གོང་འཕེལ་གཏོང་ཐབས་གནང་གལ་ཡིན་པར་བཀའ་བསྩལ་མཛད་སྐོར་ལམ་སྟོན་རྒྱ་ཆེ་མཛད་ཡོད་པ་རེད། རྩ་བའི་སྐྱེད་ཚལ་དེ་བཞིན་ལ་དྭགས་མི་མང་དང་རིག་འཚོ་མ་ཟིན་པ་རྣམས་ལ་ལུས་སྦྱོང་བྱ་རྒྱུའི་ཆེད་གསར་འཛུགས་གནང་བ་ཞིག་ཡིན་པ་དང་། སྐབས་དེར་མགོན་པོ་༸གང་ཉིད་མཆོག་ནས་སྐྱེད་ཚལ་གྱི་ལས་གཞི་དེ་དང་དེའི་ཐོག་ཕྱག་ལས་གནང་མཁན་རྣམས་ལ་བསྔགས་བརྗོད་གནང་བ་དང་འབྲེལ། ལས་དོན་དེའི་སླད་ཏཱ་ལའི་བླ་མའི་དགེ་རྩ་ཁང་ནས་ཞལ་འདེབས་གསོལ་རས་མཛད་རྒྱུ་ཡིན་པར་བཀའ་བསྩལ་ཡོད་པ་རེད། ༸སྐུ་དཔར་དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་སང་ཟླ་ ༨ ཚེས་ ༢ ཉིན་ལ་དྭགས་ལྕོགས་ལམ་སར་ཟམ་པའི་ཉེ་འདབས་སུ་ཡོད་པའི་ཆུ་ཤོད་ཁ་ཆེ་ལྷ་ཁང་དུ་གནས་གཟིགས་མཛད་པ་དང་འབྲེལ་ཁ་ཆེའི་གཅེན་གཅུང་རྣམས་ལ་ཆོས་ལུགས་ཀྱི་གནད་དོན་དང་འབྲེལ་མི་སྟོང་ཕྲག་མང་པོ་གསོད་རེས་བྱས་པའི་གནས་ཚུལ་ཐོན་བཞིན་ཡོད་སྟབས། ཆོས་ལུགས་མཐུན་སྒྲིལ་ཡོང་བར་ཕྱི་ནང་གཉིས་ཀས་འགན་བཞེས་དགོས་གལ་ཡིན་པར་ལམ་སྟོན་མཛད་འདུག མགོན་པོ་༸གང་ཉིད་མཆོག་གིས་ང་ཚོའི་ངོས་ནས་འདོད་མོས་ཡོད་མེད་ལ་ལྟོས་མེད་འཛམ་གླིང་ཐོག་གི་འགྲོ་བ་མི་རྣམས་ཕན་ཚུན་དབར་མཉམ་གནས་བྱེད་དགོས་པ་དང་། ལྷག་དོན་ལ་དྭགས་ནང་ཡོད་པའི་ནང་པ་དང་ཁ་ཆེ་གཉིས་ཕན་ཚུན་དབར་མཉམ་གནས་བྱེད་དགོས་གལ་ཡིན་པ་བཀའ་བསྩལ་དང་འབྲེལ་ནས་ད་ལྟའི་འཛམ་གླིང་ཐོག་དཀའ་ངལ་མང་དག་ཞིག་འཕྲད་རྐྱེན་ནི་རྒྱལ་ཞེན་གྱི་བསམ་བློ་ཤུགས་ཆེ་དྲག་པ་དང་། ཆོས་ལུགས་ཕན་ཚུན་དབར་གུས་བརྩི་དང་མཐུན་སྒྲིལ་མེད་པའི་དབང་གིས་ཡོང་གི་ཡོད་སྟབས། ངོས་ལ་ཆ་མཚོན་ན་འཛམ་གླིང་ནང་ཡོད་པའི་མི་འབོར་ཐེར་འབུམ་ ༧ པོ་དེ་དག་རྡོག་རྩ་གཅིག་ཏུ་དྲིལ་ཐབས་སུ་འབད་བརྩོན་བྱེད་ཡོད་པ་ལྟར་ངལ་བ་དེ་དག་ཉུང་དུ་གཏོང་བར་ང་ཚོ་ཚང་མར་འགན་ཡོད་ཅེས་བཀའ་ནན་བསྩལ་ཡོད་པ་རེད། དེ་བཞིན་༸གོང་ས་མཆོག་གིས་ཡོ་རོབ་མཐུན་ཚོགས་ཀྱི་སྒྲོམ་གཞིར་ཆེ་བསྟོད་དང་ཐུགས་སྨོན་གནང་བཞིན་ཡོད་པ་དང་། སྤྱིར་བོད་དེ་ལོ་རྒྱུས་ཀྱི་ཐོག་ནས་རང་དབང་གཙང་མའི་རྒྱལ་ཁབ་ཞིག་ཡིན་ཀྱང་རྒྱ་ནག་དང་མཉམ་དུ་གཅིག་ཕན་གཅིག་རོགས་ཐོག་ནས་མཉམ་གནས་བྱ་རྒྱུའི་དགོངས་གཞི་ཡོད་སྐོར་བཀའ་བསྩལ་འདུག རྒྱ་གར་ནང་མི་འབུམ་ཕྲག་མང་པོ་གནས་སྡོད་བྱེད་བཞིན་ཡོད་ཀྱང་ལོ་ངོ་སྟོང་ཕྲག་གཉིས་ཀྱི་གོང་ནས་ཆོས་ལུགས་མཐུན་སྒྲིལ་ཡོད་པ་དེས་འཛམ་གླིང་ཐོག་ཆོས་ལུགས་མཐུན་སྒྲིལ་ཡོང་རྒྱུ་ཡོད་པའི་དཔེ་མཚོན་ཞིག་ཆགས་ཡོད་པར་བཀའ་བསྩལ་བ་དང་ཆབས་ཅིག་ཏུ་༸གང་ཉིད་མཆོག་ནས་ལོ་མང་རིང་རྒྱ་གར་གཞུང་ལ་རྒྱལ་སྤྱིའི་ཆོས་དད་ལྷན་ཚོགས་ཤིག་བསྐོང་ཚོགས་གནང་དགོས་གནད་ཡིན་པར་ལམ་སྟོན་མཛད་མྱོང་སྐོར་བཀའ་བསྩལ་འདུག ཆོས་ལུགས་དང་འབྲེལ་བའི་ཐོག་ནས་མི་སྟོང་ཕྲག་མང་པོ་བསད་རེས་གནང་གི་ཡོད་པ་དང་། ལྷག་པར་དུ་ཁ་ཆེའི་ Shia དང་ Sunni གཉིས་དབར་རྩོད་རྙོག་རིགས་མང་དག་ཞིག་འབྱུང་བཞིན་ཡོད་སྟབས། དཀའ་ངལ་དེ་དག་སེལ་ཐབས་སུ་རོགས་འདེགས་ཇི་ལྟར་གནང་དགོས་མིན་ཐད་དགོངས་བཞེས་གནང་དགོས་པ་ལས་རང་ཉིད་ཀྱི་བདེ་སྐྱིད་ཁོ་ནར་དོན་དུ་གཉེར་ཚེ་ Allah ཡང་ཐུགས་འགྱེས་ཀྱི་མ་རེད་ཅེས་བཀའ་སློབ་བཀྲིན་ཆེ་བ་བསྩལ་ཡོད་པ་རེད། ༸སྐུ་དཔར་དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟའི་ཆར་རྒྱ་གར་བྱང་ཕྱོགས་ལ་དྭགས་ནང་དུ་བཞུགས་ཞག་གིས་མཛད་འཕྲིན་དུ་མ་སྐྱོང་བཞིན་ཡོད་པ་ལྟར། ཁ་སང་ཟླ་ ༨ ཚེས་ ༡ ཉིན་ཞི་བའི་ཚལ་༸རྒྱལ་བའི་ཕོ་བྲང་དུ་ལ་དྭགས་གླེ་བསོད་ནམས་ནོར་བུ་དྲན་རྟེན་སྨན་ཁང་ཆེན་མོའི་སྨན་ཞབས་པ་རྣམས་ལ་དམིགས་བསལ་མཇལ་ཁ་དང་བཀའ་སློབ་བཀའ་དྲིན་བསྩལ་འདུགམགོན་པོ་༸གང་ཉིད་མཆོག་ནས་སྨན་ཞབས་པའི་ལས་ཀ་ནི་གཞན་ཕན་གྱི་བྱ་བ་ཞིག་ཡིན་པས་ཁྱེད་ཚོས་ངེས་པར་དུ་བསམ་པ་བཟང་པོའི་ཐོག་ནས་ནད་པར་ཕན་རོགས་བྱེད་དགོས་པ་མ་ཟད་ནད་པ་ཚོར་བརྩེ་བ་དང་གད་མོ་དགོད་ནས་ཕན་ཐོགས་བྱ་ཐུབ་ཚེ་ཕན་རླབས་ཆེན་པོ་ཡོད་པ་བཀའ་བསྩལ་འདུག ཚེ་འདིར་མི་ལུས་ཤིག་བླངས་ནས་གཞན་ཕན་བྱ་རྒྱུའི་གོ་སྐབས་ བྱུང་ཡོད་པ་རེད། ཚེ་འདིར་བསོད་ནམས་བསགས་པ་དེས་ཚེ་རབས་ནས་ཚེ་རབས་ལ་གཞན་ཕན་སྒྲུབ་རྒྱུ་ཡོང་གི་རེད་ཅེས་བཀའ་བསྩལ་འདུག དེ་དང་ཕྱོགས་མཚུངས་དེ་རིང་ཚེས་ ༢ ཉིན་སྔ་དྲོ་ཚོུད་ ༩༌༣༠ ཐོག་ལ་དྭགས་ནང་པའི་ཚོགས་འདུ་དང་ Sebol ཚོགས་པ་གཉིས་ནས་ཇི་ལྟར་གསོལ་འདེབས་ཞུས་པ་བཞིན་ལ་དྭགས་གླེ་ Eliezer Joldan Memorial College འམ་ཨེ་ལི་ཛྷར་ཇོལ་དན་དྲན་རྟེན་མཐོ་སློབ་ཏུ་ཆིབས་བསྒྱུར་གྱིས་དགེ་ལས་སློབ་གཉེར་བ་ ༡༥༠༠ ལྷག་ལ་ Holistic Education འམ་ཡོངས་སྒྲིལ་ཤེས་ཡོན་ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་བསྩལ་འདུག མགོན་པོ་༸གང་ཉིད་མཆོག་གིས་ད་ལྟའི་ཆར་འཛམ་གླིང་ནང་ཤེས་ཡོན་གྱི་ལམ་ལུགས་ཤིག་འགྲོ་བཞིན་པ་དེ་ལྟར་ཡང་ལམ་ལུགས་དེས་མི་ཚེ་བདེ་སྐྱིད་དང་ལྡན་པ་ཞིག་བསྐྲུན་ཐུབ་རྒྱུ་ནི་ཐེ་འཚོམ་གྱི་གཞི་ལས་མ་འདས་སྟབས། མ་འོངས་པར་ནང་བསམ་བློ་ཡར་རྒྱས་ཀྱི་སྟེང་ནས་ཤེས་ཡོན་གྱི་ལམ་ལུགས་བསྐྲུན་དགོས་པ་ནི་མེད་དུ་མི་རུང་བའི་གལ་གནད་ཆགས་ཡོད་པ་མ་ཟད་འཛམ་བུ་གླིང་ནང་ནང་བསམ་བློ་ཡར་རྒྱས་ཀྱི་ཤེས་ཡོན་ལམ་ལུགས་དེ་མ་དར་བའི་གོང་དུ་རྒྱ་གར་ནང་དར་ཟིན་ཡོད་པས་ང་ཚོས་བདག་གཉེར་བྱ་རྒྱུ་དེ་གལ་ཆེན་པོ་ཡིན་པ་བཀའ་ནན་མཛད་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ཀྱི་དད་ལྡན་མང་ཚོགས་ནས་ཇི་ལྟར་གསོལ་འདེབས་ཞུས་དོན་ལྟར། ས་གནས་སུ་འདི་ལོའི་ཟླ་ ༧ ཚེས་ ༣ ནས་ཟླ་བ་གཅིག་ལྷག་ཙམ་རིང་ལ་དྭགས་གླེ་དང་ཟངས་དཀར། ནུབ་ར། ཀར་གྷིལ། དེ་བཞིན་བོད་ཕྲུག་ཁྱིམ་སྡེ་བཅས་སུ་ཆིབས་བསྒྱུར་གྱིས་མང་ཚོགས་ལ་བཀའ་ཆོས་སོགས་ཀྱི་མཛད་འཕྲིན་དུ་མ་བསྐྱངས་གནང་མཛད་ཡོད་པ་རེད། ༸སྐུ་དཔར་དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟའི་ཆར་རྒྱ་གར་བྱང་ཕྱོགས་ལ་དྭགས་ནང་དུ་བཞུགས་ཞག་གིས་མཛད་འཕྲིན་དུ་མ་སྐྱོང་བཞིན་ཡོད་པ་ལྟར། ཁ་སང་ཟླ་ ༨ ཚེས་ ༡ ཉིན་ཞི་བའི་ཚལ་༸རྒྱལ་བའི་ཕོ་བྲང་དུ་ལ་དྭགས་གླེ་བསོད་ནམས་ནོར་བུ་དྲན་རྟེན་སྨན་ཁང་ཆེན་མོའི་སྨན་ཞབས་པ་རྣམས་ལ་དམིགས་བསལ་མཇལ་ཁ་དང་བཀའ་སློབ་བཀའ་དྲིན་བསྩལ་འདུག མགོན་པོ་༸གང་ཉིད་མཆོག་ནས་སྨན་ཞབས་པའི་ལས་ཀ་ནི་གཞན་ཕན་གྱི་བྱ་བ་ཞིག་ཡིན་པས་ཁྱེད་ཚོས་ངེས་པར་དུ་བསམ་པ་བཟང་པོའི་ཐོག་ནས་ནད་པར་ཕན་རོགས་བྱེད་དགོས་པ་མ་ཟད་ནད་པ་ཚོར་བརྩེ་བ་དང་གད་མོ་དགོད་ནས་ཕན་ཐོགས་བྱ་ཐུབ་ཚེ་ཕན་རླབས་ཆེན་པོ་ཡོད་པ་བཀའ་བསྩལ་འདུག ཚེ་འདིར་མི་ལུས་ཤིག་བླངས་ནས་གཞན་ཕན་བྱ་རྒྱུའི་གོ་སྐབས་བྱུང་ཡོད་པ་རེད། ཚེ་འདིར་བསོད་ནམས་བསགས་པ་དེས་ཚེ་རབས་ནས་ཚེ་རབས་ལ་གཞན་ཕན་སྒྲུབ་རྒྱུ་ཡོང་གི་རེད། དེས་ན་ངོས་ཀྱིས་ཁྱེད་ཅག་ལ་སྨོན་ལམ་བརྒྱབ་ཆོག་ཞེས་ཐུགས་བརྩེ་བ་ཆེན་པོས་བཀའ་བསྩལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟའི་ཆར་རྒྱ་གར་བྱང་ཕྱོགས་ལ་དྭགས་ནང་བཞུགས་ཞག་གིས་མཛད་འཕྲིན་དུ་མ་སྐྱོང་བཞིན་ཡོད་པ་ལྟར། དེ་རིང་ཟླ་ ༨ ཚེས་ ༡ ཉིན་སྔ་དྲོ་ཚོུད་ ༡༠༌༣༠ ཐོག་མགོན་པོ་༸གང་ཉིད་མཆོག་ལ་དྭགས་བོད་ཕྲུག་ཁྱིམ་སྡེའི་དུས་འཁོར་མཆོད་རྟེན་གྱི་མདུན་དུ་ཆིབས་བསྒྱུར་གྱིས་ལ་དྭགས་བསོད་ནམས་གླིང་གི་སེར་སྐྱ་མང་ཚོགས་དང་སློབ་ཕྲུག་ཚོར་ཐུགས་བརྩེ་བ་ཆེན་པོས་བཀའ་སློབ་བཀྲིན་ཆེ་བ་བསྩལ་འདུག སྐབས་དེར་མགོན་པོ་༸གང་ཉིད་མཆོག་གིས་བོད་ཀྱི་ཆབ་སྲིད་ཀྱི་ལངས་ཕྱོགས་དང་འབྲེལ་དེ་སྔ་ ༡༩༧༤ ལོ་ནས་བཟུང་རང་བཙན་གྱི་ལངས་ཕྱོགས་དེ་དོར་ནས་གཉིས་སྨན་དབུ་མའི་ལམ་གྱི་སྲིད་བྱུས་ཐོག་བསྐྱོད་དང་སྐྱོད་མུས་ཡིན་པ་མ་ཟད། དེར་མཁས་དབང་མང་པོ་ཞིག་ནས་རྒྱབ་སྐྱོར་གནང་དང་གནང་བཞིན་ཡོད་པ་དང་ལྷག་པར་དུ་དེ་སྔ་རྒྱ་ནག་གཞུང་གིས་༸གོང་ས་མཆོག་ལ་ཁ་བྲལ་བ་ཞེས་འགྲེལ་བརྗོད་བྱས་ཡོད་ཀྱང་དུས་ཀྱི་འགྱུར་འགྲོས་དང་སྤྱི་ཚོགས་ཀྱི་འགྱུར་འགྲོས་ལ་བརྟེན་ནས་དེང་སྐབས་༸གང་ཉིད་མཆོག་ལ་ཁ་བྲལ་བ་ཞེས་འགྲེལ་བརྗོད་བྱེད་མཁན་ཉུང་དུ་ཕྱིན་ཡོད་པ་བཀའ་གནང་བ་དང་ཆབས་ཅིག་ཏུ་བོད་མིའི་དྲང་བདེན་གྱི་འཐབ་རྩོད་ཀྱི་ནུས་པ་དེ་མུ་མཐུད་ནས་གནས་ངེས་ཡིན་པ་བཅས་བཀའ་བསྩལ་འདུགམགོན་པོ་༸གང་ཉིད་མཆོག་གིས་དུས་རབས་ ༢༡ པའི་ནང་པ་སངས་རྒྱས་པའི་ཆོས་དེ་དག་ཚད་མའི་ལམ་ནས་འགྲེལ་བརྗོད་གནང་རྒྱུ་ཡོད་པ་ནི་བོད་གངས་ཅན་ལྗོངས་སུ་ཡོད་པའི་སངས་རྒྱས་པའི་ཆོས་ཁོ་ན་ལས་འཛམ་གླིང་ནང་ཡོད་པའི་ནང་པ་སུ་གང་ཞིག་ནས་དེ་ལྟར་གནང་མི་ཐུབ་ཚུལ་བཀའ་བསྩལ་ཡོད།འཛམ་གླིང་ནང་མི་དུང་ཕྱུར་ ༧༠ ཡོད་པའི་ནང་ནས་བོད་པ་ཉུང་ཤས་ཤིག་ལས་མེད་ཀྱང་སེམས་ཁམས་རིག་པ་དང་། ཚད་མ་རིག་པར་འགྲེལ་བརྗོད་བྱེད་དགོས་ཚེ་བོད་ཀྱི་སྐད་ཡིག་ལས་ལྷག་པའི་སྐད་ཡིག་གཞན་མེད་སྟབས། དེ་ནི་མེས་པོ་ཚོས་བྱས་རྗེས་དང་མི་རིགས་ཀྱི་གཟི་བརྗིད་ཞིག་ཡིན་པ་བཀའ་བསྩལ་མཛད་འདུགདེ་སྔ་མགོན་པོ་༸གང་ཉིད་མཆོག་ལ་དྭགས་ནང་༸ཞབས་སོར་བདེ་བར་འཁོད་སྐབས་རིག་འཚོ་མ་ཟིན་པའི་སློབ་ཕྲུག་རྣམས་བདག་གཉེར་ལེགས་པོ་དགོས་པར་ལམ་སྟོན་གནང་བ་ལྟར་ཕྱི་ལོ་ ༢༠༡༧ ནས་ལས་གཞི་ཆེད་མངགས་དབུ་འཛུགས་གནང་ཡོད་པ་དང་། ད་ཆ་ལས་གཞི་དེ་ལེགས་གྲུབ་བྱུང་བར་མགོན་པོ་༸གང་ཉིད་མཆོག་བོད་ཕྲུག་ཁྱིམ་སྡེར་ཆིབས་བསྒྱུར་དང་འབྲེལ་སློབ་ཕྲུག་དེ་དག་དང་། རྒས་འཁོགས་རྣམས་ལ་དམིགས་བསལ་མཇལ་ཁ་སོགས་བསྩལ་ཡོད་པ་རེད།རྩ་བའི་མགོན་པོ་༸གང་ཉིད་མཆོག་གིས་བོད་རིགས་རྐྱང་པར་བཀའ་སློབ་སྩལ་བའི་མཛད་རིམ་དེ་ནི་༸གང་ཉིད་མཆོག་༸སྐུ་སྒེར་གྱིས་མར་བཀའ་ཕེབས་པའི་མཛད་རིམ་ཞིག་ཆགས་ཡོད་པ་དང་། དེའི་ཐོག་ལ་དྭགས་བོད་ཕྲུག་ཁྱིམ་སྡེའི་ངེས་སྟོན་པ་དང་ལ་སྤྱི་གཉིས་ནས་མགོན་པོ་༸གང་ཉིད་མཆོག་ལ་ལས་བསྡོམས་སྙན་སྒྲོན་ཞུས་ཡོད་པ་རེད། དེ་བཞིན་བོད་ཁྱིམ་སློབ་མ་ཚོས་རིགས་ལམ་རྟགས་དང་ལ་དྭགས་བསོད་ནམས་གླིང་གིས་རྐང་བྲོ་གླུ་གཞས་སོགས་སྤྱན་འབུལ་ཞུས་ཡོད་པ་རེད།༸སྐུ་དཔར་དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ལ་དྭགས་ཁུལ་གྱི་དད་ལྡན་སེར་སྐྱ་མང་ཚོགས་རྣམས་ལ་སྤྱོད་འཇུག་ཆེན་མོའི་ཉིན་མཐའ་མའི་ཆོས་འབྲེལ་ཐོག་ཆོས་འཆད་ཉན་བྱེད་མཁན་གྱི་ངོས་ནས་རང་ཉིད་ལ་མིང་དང་རྒྱུ་ནོར་དཔལ་འབྱོར་སོཊ་ཐོབ་རྒྱུའི་ཀུན་སློང་ཁྱེར་ནས་ཆོས་བཤད་ན་ཡག་པོ་མ་རེད་ཅེས་ལམ་སྟོན་བསྩལ་སོང་། ༸གོང་ས་མཆོག་གིས་དེ་རིང་ཟླ་ ༧ ཚེས་ ༣༡ ཉིན་སྔ་དྲོ་སྤྱོད་འཇུག་ཆེན་མོའི་ཆོས་འབྲེལ་དབུ་འཛུགས་མ་གནང་བའི་སྔ་རོལ་དུ་ཆོས་ཞུ་བ་ཚོར་སྔོན་འགྲོའི་ཆོས་འབྲེལ་དང་སྦྲགས། རྣམ་ཀུན་ནས་ཆོས་འཆད་ཉན་གང་གནང་ཡང་ཆོས་འཆད་པ་པོའི་ངོས་ནས་ཀུན་སློང་རྣམ་པར་དག་པའི་སྒོ་ནས་ཆོས་འཆད་དགོས་པ་དང། དེ་བཞིན་ཉན་པ་པོའི་ངོས་ནས་ཀྱང་ཀུན་སློང་རྣམ་པར་དག་པའི་ཐོག་ནས་ཉན་ཏེ་ཆོས་ཆོས་སུ་སོང་བ་ཞིག་དང། ཆོས་གནད་དུ་འཁྱེལ་ཞིག་དགོས་གལ་ཆེན་པོ་ཡིན་པ་ལས་ཆོས་འཆད་ཉན་བྱེད་མཁན་གྱི་ངོས་ནས་རང་ཉིད་ལ་མིང་དང་རྒྱུ་ནོར་དཔལ་འབྱོར་སོཊ་ཐོབ་རྒྱུའི་ཀུན་སློང་ཁྱེར་ནས་ཆོས་བཤད་ན་ཡག་པོ་མ་རེད་ཅེས་ལམ་སྟོན་བསྩལ་སོང་། ༸གོང་ས་མཆོག་གིས་ཆོས་ཞུ་བ་ཚོར་རྒྱལ་སྲས་ཆེན་པོ་ཞི་བའི་ལྷས་མཛད་པའི་སྤྱོད་འཇུག་ཆེན་མོའི་ལེའུ་བརྒྱད་པ་བསམ་གཏན་ལེའུ་དང། ལེའུ་དགུ་པ་ཤེས་རབ་ཀྱི་ལེའུ་གཉིས་བཀའ་ཁྲིད་བསྩལ་བ་དང་འབྲེལ་ནང་པ་སངས་རྒྱས་པའི་ཆོས་ཟབ་ཅིང་རྒྱ་ཆེ་བ་འདི་དག་ཡང་དག་པ་ཞིག་ཤེས་པར་བཤད་ལུང་དང་ཚིག་འགྲེལ། དེ་བཞིན་གཞུང་གཅིག་ཁོ་ན་ལྟ་ཀློག་བྱས་པ་ཙམ་གྱི་མ་འགྲིག་པར་རྒྱུན་དུ་གཞུང་ཆེན་ཁག་ལ་ལྟ་ཀློག་བྱ་རྒྱུ་གལ་ཆེན་པོ་ཡིན་པ་དང། ལྷག་པར་དུ་སངས་རྒྱས་པའི་ཆོས་འདིས་སེམས་ལ་བསྒྱུར་བཅོས་བཏང་ནས་སངས་རྒྱས་ཀྱི་གོ་འཕང་ཐོབ་རྒྱུ་ཡོད་པ་ཞིག་གསུངས་ཡོད་པ་ལས་དངོས་མེད་དང་རྒྱུ་མེད། རྐྱེན་མེད་ལ་སྨོན་ལམ་བརྒྱབ་ན་འབྲས་བུ་ཐོབ་རྒྱུ་ཡོད་པ་ཞིག་གསུངས་མེད་སྐོར་བཀའ་ནན་བསྩལ་ཡོད། ༸གོང་ས་མཆོག་གིས་བཀའ་ཆོས་བསྩལ་གྲུབ་མཚམས་སུ་དད་ལྡན་སེར་སྐྱ་མང་ཚོགས་རྣམས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་དང་ཐུབ་པའི་མཚན་སྔགས། མ་ཎི་ཡིག་དྲུག རྟ་མགྲིན་གཟུངས་སྔགས། འཇམ་དབྱངས་གཟུངས་སྔགས་སོགས་བཀྲིན་བསྩལ་བ་དང་འབྲེལ་ཐེངས་འདིའི་སྤྱོད་འཇུག་ཆེན་མོའི་བཀའ་ཆོས་རེ་ཞིག་མཇུག་སྒྲིལ་གནང་སོང་། སྐབས་དེའི་མགོན་པོ་མཆོག་གིས་ལ་དྭགས་ནང་གི་ཆོས་འབྲེལ་གྱི་མཛད་འཆར་ལེགས་པར་གྲུབ་མཚམས་སུ་ལ་དྭགས་ནང་ཚོགས་ཀྱི་ཚོགས་གཙོ་ཚེ་དབང་འཕྲིན་ལས་ལགས་ཀྱིས་མགོན་པོ་༸གང་ཉིད་མཆོག་དགུང་གྲངས་མཐོ་པོ་ཕེབས་ཡོད་ཀྱང། ད་རེས་སླར་ཡང་ལ་དྭགས་ཁུལ་དུ་ཆིབས་བསྒྱུར་མཛད་དེ་ཐུགས་བརྩེ་བ་ཆེན་པོས་ལ་དྭགས་ཀྱི་དད་ལྡན་མང་ཚོགས་ལ་བཀའ་ཆོས་དང་བཀའ་སློབ་བཀྲིན་བསྩལ་བར་སྙིང་དབུས་ནས་ཐུགས་རྗེ་ཆེ་ཞུས་པ་དང་འབྲེལ། མགོན་པོ་༸གང་ཉིད་མཆོག་གི་བཀའ་དགོངས་བཞིན་ཉེ་སྔོན་ལ་དྭགས་ཁུལ་དུ་འབྲེལ་ཡོད་གཞུང་དང་གཞུང་འབྲེལ་མིན་པའི་ཚོགས་ཁག་རྣམས་མཉམ་འཛོམས་ཀྱིས་ལ་དྭགས་ས་གནས་སུ་ཡོད་པའི་ཆོས་ལུགས་དང་ཆོས་བརྒྱུད་ནང་ཁུལ་དབར་མཐུན་སྒྲིལ་གནང་སྟེ་དུས་རབས་ཉེར་གཅིག་པའི་ནང་པ་ཞིག་བྱ་རྒྱུར་ཁས་ལེན་གྲོས་ཆོད་བཞག་ཡོད་པ་དང། གྲོས་ཆོད་དེ་ཉེ་ཆར་མགོན་པོ་༸གང་ཉིད་མཆོག་ལ་ཕུལ་ནས་ཉམས་ལེན་དུ་འཁྱེལ་ཐབས་ཞུ་རྒྱུ་ཡིན་པའི་དམ་བཅའ་ཡང་ཕུལ་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་དད་ལྡན་མང་ཚོགས་ནས་ཇི་ལྟར་གསོལ་འདེབས་ཞུས་དོན་ལྟར། ས་གནས་སུ་འདི་ལོའི་ཕྱི་ཟླ་ ༧ ཚེས་ ༣ ཉིན་ནས་ཟླ་བ་གཅིག་ལྷག་རིང་ལ་དྭགས་གླེ་དང། ཟངས་དཀར། ནུབ་ར། དེ་བཞིན་ཀར་གྷིལ་བཅས་སུ་ཆིབས་བསྒྱུར་གྱིས་མང་ཚོགས་ལ་ཆོས་འབྲེལ་སོགས་ཀྱི་མཛད་འཕྲིན་དུ་མ་བསྐྱངས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ལ་དྭགས་ཞི་བའི་ཚལ་དུས་འཁོར་ཐང་ཆེན་དུ་ཆེད་དུ་བྱ་བའི་འདུལ་བྱ་ལ་དྭགས་དད་ལྡན་སེར་སྐྱ་མང་ཚོགས་གཙོ་གྱུར་ཕྱི་ནང་གི་དད་ལྡན་ཆོས་ཞུ་བ་སྟོང་ཕྲག་བརྒལ་བར་༸རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ཆོས་འབྲེལ་དབུ་འཛུགས་མཛད་པ་དང་འབྲེལ། མགོན་པོ་༸གང་ཉིད་མཆོག་གིས་གཞན་གཅེས་པར་འཛིན་པའི་བློ་དེ་རང་གཅེས་པར་འཛིན་པའི་དགོས་དོན་སྒྲུབ་ཐབས་ཡག་ཤོས་ཆགས་ཡོད་པར་བཀའ་བསྩལ་འདུག དེ་རིང་སྔ་དྲོ་མགོན་པོ་༸གང་ཉིད་མཆོག་གིས་ཆོས་ཞུ་བ་ཚོར་སྔ་ལོའི་སྤྱོད་འཇུག་ཆེན་མོའི་ཆོས་འབྲེལ་ལེའུ་དྲུག་པ་བཟོད་པ་བསྟན་པ་ནས་འཕྲོ་སྐྱོང་གི་བཀའ་འཁྲིད་མཛད་པ་དང་འབྲེལ། དེང་གི་འཛམ་བུ་གླིང་འདིའི་ནང་རྩོད་རྙོག་དང་སྡུག་བསྔལ། མི་བསད་ཁྲག་སྦྱོར། དེ་བཞིན་དཔལ་འབྱོར་དཀའ་ངལ་མཚོན་རང་གཅེས་པར་འཛིན་པའི་དབང་གིས་དེ་ལྟར་ཡོང་གི་ཡོད་སྟབས། གཞན་གཅེས་པར་འཛིན་པའི་བློ་དེ་རང་ཉིད་གཅེས་པར་འཛིན་པའི་དགོས་དོན་སྒྲུབ་ཐབས་ཡག་ཤོས་ཆགས་ཡོད་པར་ལམ་སྟོན་མཛད་འདུག འཛམ་གླིང་འདིིིའི་ཐོག་མི་འབོར་དུང་ཕྱུར་བདུན་བཅུ་ཡོད་པ་རྣམས་མང་ཆེ་བས་ཕྱིའི་དངོས་པོ་ཐོག་བསམ་བློ་གཏོང་མཁན་ཆགས་ཡོད་པ་ལས་ནང་སེམས་ཀྱི་ཐོག་བསམ་བློ་གཏོང་མཁན་ཉུང་ཉུང་ལས་མེད་པ་དང། དེ་བཞིན་ཆོས་ལུགས་ཐོག་ནས་སངས་རྒྱས་པའི་ཆོས་ལུགས་དང་རྒྱ་གར་གྱི་ཆོས་ལུགས་ཕུད་པའི་ཆོས་ལུགས་གཞན་མང་ཆེ་བས་གཙོ་བོ་དཀོན་མཆོག་ལ་དད་པ་གཙོ་བོ་གནང་བ་ལས་ནང་སེམས་ལ་སྦྱོང་བརྡར་སྤྲོད་རྒྱུར་གནད་ཆེ་འཛིན་མཁན་ཆེས་ཉུང་ཉུང་ཡིན་པ་ལྟར་ནང་པའི་རྗེས་འབྲང་པ་ཚོས་དཀོན་མཆོག་བཀོད་པོ་འདོད་མཁན་བཞིན་མིན་པར་སངས་རྒྱས་པའི་ཆོས་ལ་བསླབ་པ་སློབ་གཉེར་གནང་གལ་ཡིན་པ་དང། དེ་སྔ་བོད་ལ་ཡིན་ན་བསྟན་པ་སྤྱི་མཚན་ཐོག་སློབ་སྦྱོང་བྱ་རྒྱུའི་འཐུད་ཤོར་ཕྱིན་ཡོད་པ་བཀའ་བསྩལ་འདུག ད་རེས་ལ་དྭགས་ཞི་བའི་ཚལ་དུས་འཁོར་ཐང་ཆེན་ནས་ཐད་གཏོང་གནང་བའི་མགོན་པོ་༸གང་ཉིད་མཆོག་གིས་བསྩལ་བའི་སྤྱོད་འཇུག་ཆེན་མོའི་ཆོས་འབྲེལ་དེ་དེ་རིང་ནས་དབུ་འཛུགས་ཀྱིས་སང་བར་ཉིན་གཉིས་རིང་ཕྱི་ནང་གི་དད་ལྡན་མང་ཚོགས་ཚོར་ཐད་སྲིད་གནང་གི་ཡོད་པ་རེད། དེའང་བོད་སྐད་དང་ཨིན་སྐད། དེ་བཞིན་རྒྱ་སྐད་བཅས་ཀྱི་ཐོག་ཐད་སྲིང་གནང་གི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ལ་དྭགས་གླེ་ཉེ་འཁོར་དུ་རྟེན་གཞི་བྱས་པའི་ཁྲིག་རྩེ་ཤེས་རབ་སྐྱེད་ཚལ་གླིང་གི་དཔེ་མཛོད་ཁང་དབུ་འབྱེད་རབ་གནས་མཛད་པ་དང་འབྲེལ། དད་ལྡན་མང་ཚོགས་ ༢༥༠༠ ཙམ་ལ་བླང་དོར་གྱི་བཀའ་སློབ་བཀའ་དྲིན་བསྩལ་བར་དེང་གི་ཤེས་ཡོན་ཐོག་ནས་བྱམས་བརྩེ་སྤེལ་རྒྱུ་ནི་ཧ་ཅང་དགོས་གལ་ཆེན་པོ་ཡིན་པར་བཀའ་བསྩལ་འདུག ཁྲིག་རྩེ་ཤེས་རབ་སྐྱེད་ཚལ་གླིང་གི་དགོན་བདག་ཁྲིག་རྩེ་རིན་པོ་མཆོག་གིས་དབུས་པའི་ཡུལ་དེའི་གྲོས་ཚོགས་གོང་མའི་འཐུས་མི་ཟུར་པ་དང། གྲོས་ཚོགས་འོག་མའི་འཐུས་མི། ལ་དྭགས་ནང་པའི་ལྷན་ཚོགས་དང་ལ་དྭགས་ཡུལ་ལྗོངས་ཡར་རྒྱས་ཚོགས་པའི་ཚོགས་གཙོ་བཅས་གནད་ཡོད་མི་སྣ་མང་དག་ཞིག་དང་། དེ་བཞིན་དད་ལྡན་མང་ཚོགས་ ༢༥༠༠ བརྒལ་བས་ཕེབས་བསུ་གཟབ་རྒྱས་ཞུས་ཐོག་༸གོང་ས་མཆོག་ཁྲིག་རྩེ་ཤེས་རབ་སྐྱེད་ཚལ་གླིང་དགོན་པར་ཆིབས་བསྒྱུར་མཛད་དེ་དགོན་པའི་དཔེ་མཛོད་ཁང་གསར་རྒྱག་གི་ལས་གཞི་ལེགས་གྲུབ་བྱུང་བར་དབུ་འབྱེད་རབ་གནས་མཛད་འདུག སྐབས་དེར་མགོན་པོ་༸གང་ཉིད་མཆོག་གིས་དེང་སྐབས་ལ་དྭགས་ནང་ཕྱིའི་དངོས་པོ་ཡར་རྒྱས་ཡག་པོ་ཕྱིན་ཡོད་པ་ལྟར་ནང་སེམས་ཀྱི་ཞི་བདེ་དང་དོན་དམ་གྱི་བདེ་སྐྱིད་སྐྲུན་རྒྱུ་གནད་ཆེ་ཡིན་སྐོར་བཀའ་བསྩལ་བ་དང་འབྲེལ་ཏེ་འཛམ་གླིང་གི་ཆོས་ལུགས་ཚང་མའི་ངོས་ནས་བྱམས་བརྩེ་གོང་འཕེལ་གནང་ཐབས་གནང་བཞིན་པ་གཅིག་གྱུར་ཡིན་ཀྱང་སྐབས་འགར་རང་ཕྱོགས་གཞན་ཕྱོགས་ཀྱི་དབྱེ་བ་དང། རིགས་མཐོ་དམན་དང་དཔལ་འབྱོར་སོགས་མིའི་ཆགས་སྡང་རྐྱེན་པས་ཕན་ཚུན་དབར་འཁྲུག་རྩོད་མང་དག་ཞིག་ཡོང་གི་ཡོད་སྟབས། དངོས་ཡོད་གནས་ཚུལ་དེ་དག་ལ་གཞིགས་པའི་བྱམས་བརྩེ་གོང་སྤེལ་གཏང་གལ་ཡིན་པ་སོགས་ལམ་སྟོན་མཛད་འདུག ལྷག་པར་དུ་དེང་གི་ཤེས་ཡོན་ཐོག་ནས་བྱམས་བརྩེ་སྤེལ་རྒྱུ་ནི་ཧ་ཅང་གནད་ཆེ་ཡིན་པ་དང་དེའང་ཚན་རིག་པ་རྣམས་ཀྱིས་མིའི་རང་བཞིན་དེ་བྱམས་བརྩེ་ཡིན་པའི་གྲུབ་དོན་རྙེད་པ་ལྟར་གནང་གནད་ཡིན་པའང་བཀའ་བསྩལ་བ་དང་ཆབས་ཅིག དགེ་འདུན་པ་དང་བཙུན་མ་ཙམ་མིན་པར་ཁྱིམ་པ་ཕོ་མོ་རྣམས་ནས་ཀྱང་དེ་དག་ཐོག་བསླབ་པ་སློབ་གཉེར་གནང་གལ་ཡིན་པ་སོགས་བཀའ་ནན་མཛད་འདུག ལ་དྭགས་ནང་པའི་ཆོས་ཚོགས་ཀྱི་ཚོགས་གཙོ་ཚེ་དབང་འཕྲིན་ལས་ལགས་ཀྱིས་ནང་པའི་ཆོས་ཚོགས་ཀྱི་ངོས་ནས་ཆོས་ལུགས་འཐེན་འཁྱེར་གྱི་ལས་སུ་མི་འཇུག་པ་དང། ལ་དྭགས་ནང་ཆོས་ལུགས་ཕན་ཚུན་མཐུན་སྒྲིལ་གོང་འཕེལ་ཡོང་ཐབས་གནང་རྒྱུའི་གྲོས་ཆོས་ཤིག་༸གོང་ས་མཆོག་ལ་སྤྱན་འབུལ་ཞུས་ཡོད་པ་དང་འབྲེལ། ༸གོང་ས་མཆོག་གིས་ལ་དྭགས་ནང་པའི་ཆོས་ཚོགས་ཀྱི་བསམ་བློ་བཟང་པོ་དེར་ཐུགས་འགྱེས་ཚོར་ཆེན་པོ་བྱུང་སྐོར་བཀའ་བསྩལ་བ་དང་སྦྲགས། ཆོས་ལུགས་མཐུན་སྒྲིལ་གནང་དགོས་གནད་ཡིན་པར་ལམ་སྟོན་རྒྱ་ཆེ་མཛད་འདུག མཛད་སྒོའི་ཐོག་ཁྲིག་རྩེ་རིན་པོ་ཆེ་མཆོག་ནས་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་དང་རྒྱ་གར་གྱི་གནའ་བོའི་རིག་གནས་བསྐྱར་གསོ་གནང་རྒྱུའི་དམ་བཅའ། ལྷག་པར་དུ་༸གོང་ས་མཆོག་གི་ཆོས་ལུགས་ལ་མ་བརྟེན་པའི་བཟང་སྤྱོད་གོང་འཕེལ་བཅས་ཀྱི་བཀའ་སློབ་ལམ་སྟོན་མཛད་ཁག་ཡིད་ལ་བཅངས་ནས་ད་རེས་དཔེ་མཛོད་ཁང་གསར་རྒྱག་གི་ལས་གཞི་དབུ་འབྱེད་གནང་བཞིན་ཡོད་པ་དང། དཔེ་མཛོད་ཁང་དེ་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་ལྟ་གྲུབ་ཐོག་བསླབ་པ་སློབ་གཉེར་གནང་སའི་བསྟི་གནས་ལྟ་བུར་བསྐྲུན་འཆར་ཡོད་པ་དང། དེའི་ནང་སྐྱ་སེར་དབྱེ་བ་མེད་པར་བསླབ་པ་སློབ་གཉེར་གྱི་གོ་སྐབས་གནང་རྒྱུ་དང་ལ་དྭགས་ཀྱི་སློབ་གྲྭ་དང་དགོན་པ། བཙུན་དགོན་བཅས་ལ་ཡང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་ཚན་ངོ་སྤྲོད་གནང་རྒྱུ་ཡིན་པ་སོགས་གསུངས་འདུག  ༸སྐུ་དཔར་དཔལ་ལྡན་དགའ་ལྡན་ཕོ་བྲང་ཡིག་ཚང་།

ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ཀྱི་ཀར་གྷིལ་རྫོང་ཁོངས་སུ་གཏོགས་པའི་ཝ་ཀ་མུལ་སྦེག་ཁུལ་གྱི་ Spring Dales Public High School  ནས་ཇི་ལྟར་གསོལ་འདེབས་ཞུས་དོན་ལྟར་ཁུལ་དེར་༸ཞབས་སོར་བདེ་བར་འཁོད་ཡོད་པ་དང་། མགོན་པོ་༸གང་ཉིད་མཆོག་ནས་སླར་ཡང་བླ་མའི་ཆབ་སྲིད་ལ་རྒྱུན་དུ་ནས་མི་མང་ཚོས་ཡིད་གཟབ་གནང་དགོས་པ་དང་། བོད་ཀྱི་ཆོས་བརྒྱུད་ཚང་མའི་རྩ་བ་དེ་དཔལ་ནཱ་ལེནྡཱའི་ཆོས་བརྒྱུད་འཛིན་མཁན་ཞིག་ཡིན་སྟབས། རྔ་རྡུང་། འཆམ་འཁྲབ། ཆོ་ག་འདོན་རྒྱུ་བཅས་ལ་ངོ་མཚར་གང་ཡང་མི་གནང་པར་རྒྱུན་དུ་གཞི་ལམ་འབྲས་གསུམ་གྱི་རྣམ་གཞག་གནད་ཆེར་ངོས་འཛིན་དགོས་པར་ལམ་སྟོན་མཛད་ཡོད། མགོན་པོ་༸གང་ཉིད་མཆོག་གིས་ཆོས་ལ་དད་པ་ཡོད་མེད་ལ་ལྟོས་མེད་རྒྱུན་དུ་མི་བཟང་པོ་ཞིག་ཡོང་ཐབས་སུ་འབད་བརྩོན་བྱེད་དགོས་པ་དང་། གཞན་ལ་ཕན་ཐོགས་བྱེད་དགོས་པ། དེ་ལྟར་མ་བྱུང་ཡང་གནོད་པ་མི་བྱེད་པ་ཞིག་བྱེད་རྒྱུ་ནི་ཆོས་ཀྱི་སྙིང་པོ་དང་འཇིག་རྟེན་མི་ཆོས་ཀྱི་རྩ་བ་ཡང་ཡིན་པར་ལམ་སྟོན་བསྩལ་ཡོད། ཝ་ཀ་མུལ་སྦེག་ཁུལ་གྱི་ Spring Dales Public High School  སློབ་གྲྭ་དེ་ནི་ཕྱི་ལོ་ ༡༩༩༥ལོར་གསར་འཛུགས་གནང་བ་ཞིག་དང་། སྔོན་འགྲོ་ནས་འཛིན་རིམ་བཅུ་པ་བར་ཡོད་པ་ལྟར་དེང་སྐབས་སློབ་ཕྲུག་ ༢༠༠ ལྷག་འདུག ཤེས་རྟོགས་བྱུང་བར་༸གོང་ས་མཆོག་གི་ཏཱ་ལའི་བླ་མའི་ཐེབས་རྩ་ཁང་ནས་དེ་སྔོན་སློབ་གྲྭ་དེར་ཧིན་སྒོར་འབུམ་དགུ་བཅུ་གསོལ་བསྩལ་མཛད་འདུག། སློབ་གྲྭ་དེའི་སློབ་སྤྱིའི་ངོས་ནས་ཕྱི་ལོ་ ༢༠༡༠ ལོར་༸གོང་ས་མཆོག་སློབ་གྲྭར་ཆིབས་བསྒྱུར་མཛད་ནས་ལམ་སྟོན་ཕེབས་དོན་ལྟར་དེང་སྐབས་སློབ་གྲྭའི་ཤེས་ཡོན་གནས་སྟངས་སོགས་གང་ལེགས་ཡོད་པའི་ལས་བསྡོམས་སྙན་སྒྲོན་ཞུས་པ་མ་ཟད་ཏཱ་ལའི་བླ་མའི་ཐེབས་རྩ་ནས་ཞལ་འདེབས་གནང་བར་སྙིང་དབུས་ནས་ཐུགས་རྗེ་ཆེ་སོགས་ཞུས་ཡོད་པ་རེད། ཝ་ཀ་མུལ་སྦེག་ནི་ཀར་གྷིལ་ཁུལ་ནས་གླེ་ངོས་སུ་ཀི་ལོ་མི་ཀྲར་ ༤༠ སར་གནས་པའི་གྲོང་ཚོ་ཞིག་ཡིན་པ་དང་། གྲོང་ཚོ་དེའི་ནང་ནང་པའི་མི་འབོར་ལྔ་སྟོང་ལྷག་ཙམ་ཞིག་འདུག།ཁ་སང་མཛད་སྒོའི་ཐོག་ཁུལ་དེའི་དམག་དཔོན་དང་། འབྲེལ་ཡོད་རྒྱ་གར་གྱི་ས་གནས་ལས་བྱེད། དེ་བཞིན་སློབ་གྲྭའི་སྦྱིན་བདག་ཕྱི་རྒྱལ་བ་སོགས་མང་པོ་ཞིག་ཕེབས་ཡོད་པ་ལྟར་སྐབས་དེར་༸གོང་ས་མཆོག་ནས་ཐོག་མར་དབྱིན་སྐད་ནང་བཀའ་སློབ་བསྩལ་བར་འདས་པའི་དུས་རབས་ཉི་ཤུ་དེ་དམག་འཁྲུག་དང་མི་གསོད་ཁྲག་སྦྱོར་སོགས་ཀྱི་དུས་རབས་དེ་ལས་སློབ་གསོ་བླངས་ནས་མི་རབས་གཞོན་པ་ཚོས་དུས་རབས་ཉིར་གཅིག་པ་དེ་ཞི་བདེ་མཉམ་གནས་ཡོང་བའི་དུས་རབས་ཤིག་ཡོང་ཐབས་བྱེད་དགོས་པ་དང་། དཀའ་ངལ་རིགས་གྲོས་མོལ་གྱི་ལམ་ནས་སེལ་ཐབས་བྱེད་དགོས་པའི་དུས་རབས་ཤིག་ཡོང་བ་དང་སྔར་ལྷག་དུས་རབས་ཤིག་བསྐྲུན་གལ་ཡིན་པ་ལམ་སྟོན་མཛད་ཡོད་པ་རེད། མགོན་པོ་༸གང་ཉིད་མཆོག་འཛམ་གླིང་ས་ཕྱོགས་གང་དུ་ཆིབས་བསྒྱུར་གནང་ཡང་འགྲོ་བ་མི་ཚང་མ་ཨ་མའི་བྱམས་བརྩེར་བརྟེན་ནས་འཚར་ལོངས་བྱུང་བ་གང་ཞིག་བདེ་བ་འདོད་མཁན་འབའ་ཞིག་ཡིན་སྟབས།ཆོས་ཁས་ལེན་མིན་ལ་ལྟོས་མེད་འགྲོ་བ་མི་ཚང་མ་གཅིག་མཚུངས་ཡིན་པའི་འདུ་ཤེས་དེའི་འོག་ནས་ཕྱིའི་དངོས་པོའི་འཕྲོད་བསྟེན་དང་འབྲེལ་ཏེ་ནང་སེམས་ཀྱི་འཕྲོད་བསྟེན་ཡང་གལ་འགངས་ཆེན་པོ་ཡིན་སྐོར་ལམ་སྟོན་མཛད་ཀྱི་ཡོད་པ་བཀའ་བསྩལ་སོང་། ལྷག་པར་དུ་༸གོང་ས་མཆོག་གིས་རྒྱ་གར་གྱི་དཔལ་ནཱ་ལེནྡཱའི་ཆོས་བརྒྱུད་ནས་བྱུང་བའི་ཚད་མ་དང་སེམས་ཁམས་རིག་པ་བཅས་ནི་དེང་རབས་ཀྱི་ཚན་རིག་དང་ཆེས་མཐུན་པའི་འཛམ་གླིང་ཞི་བདེར་ཕན་པའི་རིག་པའི་གཞུང་ལུགས་ཤིག་ཡིན་སྟབས་ཚང་མས་དེར་རྒྱུན་དུ་དོ་སྣང་བྱེད་དགོས་པ་སོགས་ལམ་སྟོན་མཛད་ཡོད། མཛད་སྒོ་དེ་གྲུབ་བསྟུན་༸གོང་ས་༸སྐྱབས་མགོན་ཆེན་པོ་མཆོག་ནས་ Spring Dales Public High School  སློབ་གྲྭར་དངོས་སུ་ཆིབས་བསྒྱུར་མཛད་དེ་ཁང་པ་གསར་རྒྱག་གྱི་འཛུགས་སྐྲུན་ལས་གཞིར་རབ་གནས་བཀྲིན་བསྩལ་བ་དང་སློབ་ཕྲུག་ཚོ་དང་ལྷན་སྐུ་པར་སྒྲོན་ཡོད་པ་རེད།