Tibetan Royal Year of 2151 | Year of the Wood Dragon

༸གོང་ས་མཆོག

མ་འོངས་པར་སོག་པོ་དང་ཁྱིམ་མཚེས་ཡུལ་གྲུ་ཁག་ཏུ་སངས་རྒྱས་ཀྱི་བསྟན་པ་སླར་གསོ་རྒྱུན་འཛིན་ཚད་ལྡན་ཞིག་གནང་དགོས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་དང་དེ་རིང་བཅས་ཉིན་གྲངས་གཉིས་རིང་གི་སྔ་ཐོག་བཞུགས་སྒར་༸རྒྱལ་བའི་ཕོ་བྲང་དུ་སོག་པོའི་གྲྭ་ཆུང་ ༨༩ ལ་དགེ་ཚུལ་གྱི་སྡོམ་པ་བསྩལ་འདུག དེ་ཡང་ཉེ་ཆར་བཞུགས་སྒར་གཙུག་ལག་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་མང་ཚོགས་རྣམས་ལ་དབུ་མ་འཇུག་པའི་ཆོས་འབྲེལ་བཀའ་དྲིན་སྐྱོང་སྐབས་སོག་ཡུལ་གྱི་ནང་པའི་གྲྭ་ཆུང་མི་ཉུང་བ་ཞིག་ཆེད་བཅར་ཞུས་ཡོད་པ་རྣམས་མགོན་པོ་༸གང་ཉིད་མཆོག་གི་སྐུ་མདུན་ནས་རབ་བྱུང་གི་སྡོམ་པ་ཞུ་མཁན་ཆགས་ཀྱི་ཡོད་པ་ལྟར། ཁ་སང་ཕྱི་ཚེས་ ༨ ཉིན་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་སོག་པོའི་གྲྭ་ཆུང་ ༣༠ ལ་དགེ་ཚུལ་གྱི་སྡོམ་པ་བསྩལ་ཡོད་པ་དང་། དེ་མིན་གྲྭ་ཆུང་ ༥༩ ལ་དེ་རིང་སྔ་ཐོག་དགེ་ཚུལ་གྱི་སྡོམ་པ་བསྩལ་འདུགསྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་གྲྭ་ཆུང་རྣམས་ལ་བོད་དང་སོག་པོ་གཉིས་དབར་གྱི་ཐུན་མོང་མ་ཡིན་པའི་འབྲེལ་བའི་སྐོར་ངོ་སྤྲོད་དང་སྦྲགས། སོག་ཡུལ་འདི་བཞིན་ཕ་མེས་ནས་ནང་པའི་རྒྱལ་ཁབ་ཅིག་ཡིན་སྟབས་སངས་རྒྱས་ཀྱི་ཆོས་ལ་སློབ་གཉེར་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་སོག་ཡུལ་ནི་རང་དབང་ཡོད་པའི་ནང་པའི་རྒྱལ་ཁབ་ཅིག་ཡིན་སྟབས་སོག་པོའི་གྲྭ་བ་གཞོན་སྐྱེས་ཚོས་གདན་ས་ཁག་ཏུ་སློབ་གཉེར་གནང་སྟེ་མ་འོངས་པར་སོག་པོ་དང་ཁྱིམ་མཚེས་ཡུལ་གྲུ་ཁག་ཏུ་སངས་རྒྱས་ཀྱི་བསྟན་པ་སླར་གསོ་དང་མི་ཉམས་རྒྱུན་འཛིན་ཚད་ལྡན་ཞིག་གནང་དགོས་པའི་ལམ་སྟོན་བསྩལ་འདུགགཞི་རྩའི་ད་རེས་༸གོང་ས་མཆོག་གི་སྐུ་མདུན་ནས་དགེ་ཚུལ་གྱི་སྡོམ་པ་ཞུ་མཁན་གྱི་སོག་པོའི་གྲྭ་ཆུང་རྣམས་སོག་ཡུལ་གྱི་ས་གནས་མི་འདྲ་བ་བདུན་ཙམ་ནས་ཕེབས་འདུག་པ་དང་། ཁོང་རྣམས་དེ་རིང་དགོང་དྲོ་བཞུགས་སྒར་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཕྱོགས་སུ་ཕྱིར་ཐོན་གནང་སྟེ་ཁུལ་དེར་རྟེན་གཞི་བྱས་པའི་འབྲས་སྤུངས་སྒོ་མང་གྲྭ་ཚང་དུ་ནང་ཆོས་ཐོག་སློབ་གཉེར་དངོས་སུ་དབུ་འཛུགས་གནང་གི་ཡོད་པ་རེད། ༸སྐུ་པར་དཔལ་ལྡན་དགའ་ལྡན་ཕོ་བྲང་ཡིག་ཚང་།

༸གོང་ས་མཆོག་གིས་སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་བཀའ་དྲིན་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱིར་ནོར་༸གོང་ས་སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་དུ་ཕྱི་ནང་གི་དད་ལྡན་ཆོས་ཞུ་བ་ཚོར་འཕགས་པ་སྤྱན་རས་གཟིགས་ངན་སོང་ཀུན་གྲོལ་གཙོ་འཁོར་གསུམ་གྱི་རྗེས་གནང་བསྩལ་བ་དང་སྦྲགས། དབུ་མ་འཇུག་པའི་ཉིན་བཞིའི་བཀའ་ཆོས་མཇུག་སྒྲིལ་མཛད་སོང་།དེ་ཡང་ཐེ་ཝན་ནང་དུ་རྟེན་གཞི་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱིས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཚེས་པ་ ༣ ནས་དེ་རིང་བར་ཉིན་བཞིའི་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཕྱི་ནང་གི་ཆོས་ཞུ་བ་ ༦༩༠༠ བརྒལ་བར་དཔལ་ལྡན་ཟླ་བ་གྲགས་པའི་མཛད་པའི་དབུ་མ་འཇུག་པའི་བཀའ་ཆོས་བཀྲིན་བསྩལ་ཡོད་པ་ལྟར། དེ་རིང་ཆོས་འབྲེལ་གྱི་ཉིན་མཐའ་མར་སྔ་དྲོ་ཆུ་ཚོད་ ༨ ཡོལ་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་ལ་ཐེ་ཝན་གྱི་དད་ལྡན་ཆོས་ཞུ་བའི་སྐུ་ཚབ་ཀྱིས་སྤོས་སྣེས་སྔོན་བསུས་ཏེ་བཞུགས་གནས་༸རྒྱལ་བའི་ཕོ་བྲང་ནས་གདན་ཞུས་ཀྱི་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་དྲུང་དུ་སྒྲུབ་ཞག་སྔོན་དུ་མཛད་དེ་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་པཱ་ལིའི་སྐད་དང་རྒྱ་སྐད་ཐོག་ཤེས་རབ་སྙིང་པོ་གསུང་འདོན་ཟིན་མཚམས་སྔོན་འགྲོའི་ཆོས་འབྲེལ་རྗེས་མགོན་པོ་༸གང་ཉིད་མཆོག་གིས་ཐོག་མར་ཁྱིམ་པ་ཕོ་མོ་རྣམས་ལ་དགེ་བསྙེན་གྱི་སྡོམ་པ་འབོགས་ཆོག་དང་། དེ་ནས་༸རྗེ་བདག་ཉིད་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་བསྩལ་ཡོད་པ་རེད། སྐབས་དེར་༸གང་ཉིད་མཆོག་གིས་ཆོས་ཞུ་བ་ཚོར་སློབ་མའི་ངོས་ནས་དགེ་བའི་བཤེས་གཉེན་བསྟན་པར་དང་ཐོག་བསྟན་སའི་བླ་མ་དེ་རང་རྒྱུད་འདུལ་བ་དང་ཞི་བ། ཡོན་ཏན་ལྷག་པ་བཅས་ཀྱི་ཁྱད་ཆོས་ལྡན་པ་ཞིག་བསྟན་དགོས་གལ་ཡིན་པར་ལམ་སྟོན་མཛད་སོང་།དེ་རྗེས་༸གོང་ས་མཆོག་གིས་ཁྱིམ་པ་ཕོ་མོ་རྣམས་ལ་དགེ་བསྙེན་གྱི་སྡོམ་པ་འབོགས་ཆོག་དང་ བྱང་ཆུབ་སེམས་ཀྱི་སྡོམ་པ་འབོག་ཆོག་སྩལ་སྐབས་སུ་བྱང་ཆུབ་སེམས་དཔའི་སྤྱོད་ལ་ཚུལ་བཞིན་སློབ་འདོད་དགོས་པ་ལས་དེ་མིན་རང་རྒྱུད་ལ་བྱང་སེམས་བསྐྱེས་ཐབས་མེད་སྐོར་ལམ་སྟོན་བསྩལ་སོང་། མགོན་པོ་༸གང་ཉིད་མཆོག་གིས་དེ་རྗེས་ཆོས་ཞུ་བ་རྣམས་ལ་འཕགས་པ་སྤྱན་རས་གཟིགས་ངན་སོང་ཀུན་གྲོལ་གཙོ་འཁོར་གསུམ་གྱི་རྗེས་གནང་བསྩལ་ཡོད་པ་དང་། རྗེས་གནང་དེ་ལན་རེ་ཐབ་ཚེ་མཚམས་མེད་ལྔ་ཡི་ལས་བཅད་པ་མ་ཟད་རྗེས་གནང་འདིའི་བྱིན་རླབས་ལན་རེ་ཐོབ་པ་དེས་ངན་སོང་གསུམ་གྱི་སྐྱེ་གནས་སུ་སྐྱེ་རྒྱུའི་ལས་རེ་ལྡོག་པའི་ཕན་ནུས་ཡོད་པར་བཀའ་བསྩལ་སོང་། ༸གོང་ས་མཆོག་གིས་དེ་རིང་གི་ཆོས་འབྲེལ་ཡོངས་རྫོངས་ལེགས་པར་གྲུབ་བསྟུན་ཆོས་ཞུ་བ་ཚོས་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་སོགས་ཀྱིས་དེ་སྔ་བསྔོ་སྨོན་མཛད་པ་བཞིན་ཁྱེད་རང་ཚོའི་ངོས་ནས་བཀའ་ཆོས་ཞུས་པའི་དགེ་རྩ་གང་བྱུང་བ་རྣམས་སེམས་ཅན་གཞན་གྱི་ཆེད་དུ་བསྔོ་སྨོན་བྱེད་ཨ་ཞེས་ཐུགས་བརྩེ་བ་ཆེན་པོས་ལམ་སྟོན་དེ་ལྟར་མཛད་ཡོད།

༸གོང་ས་མཆོག་ནས་ ༢༠༡༨ ལོའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་གཉིས་ལ་འཚམས་འདྲི་མཛད་པ།

ནོར་ཝེ་རྒྱལ་ས་ Oslo ནང་རྟེན་གཞི་བྱས་པའི་ནོ་སྦེལ་ཞི་བདེའི་གཟེངས་རྟགས་ལྷན་ཚོགས་ཀྱིས་བཙན་གཡེམ་ལ་འགོག་རྒོལ་གནང་མཁན་ Iraq ཡི་ yazidi རིགས་ཀྱི་བུད་མེད་གཅིག་དང། Congo འི་སྨན་པ་ཞིག་ལ་འདི་ལོའི་ནོ་སྦེལ་ཞི་བདེའི་གཟེགས་རྟགས་གནང་རྒྱུ་ཡིན་པ་ཡོངས་བསྒྲགས་གནང་ཡོད་པ་ལྟར། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཞི་བདེའི་དེད་དཔོན་རྣམ་གཉིས་ལ་དགའ་བསུའི་འཚམས་འཕྲིན་བསྩལ་བ་དང་འབྲེལ། བྱམས་བརྩེ་དངོས་སུ་ལག་བསྟར་གནང་མཁན་ཁོང་གཉིས་ལྟ་བུ་སྐྱེ་བོ་ཀུན་ལ་༸གང་ཉིད་མཆོག་ནས་ཡི་རང་བསྔགས་བརྗོད་ཆེན་པོ་གནང་བཞིན་ཡོད་པར་བཀའ་བསྩལ་འདུག རྩ་བའི་ Dr Denis Mukwege ལགས་ནི་ Congo འི་ Bukavu ཞེས་པའི་ས་གནས་སུ་སྨན་ཁང་ཞིག་བཙུགས་ནས་མི་ཚེ་གང་པོར་བཙན་གཡེམ་ཐེབས་པའི་བུད་མེད་སྟོང་ཕྲག་མང་པོར་སྨན་བཅོས་གནང་མཁན་ཞིག་ཡིན་པ་དང་། ཕྱི་ལོ ༢༠༡༢ ལོར་གོ་མཚོན་ཐོག་པའི་དམག་མིས་ཁོང་ལྐོག་གསོད་གཏོང་ཐབས་བྱས་རྐྱེན་ཡུལ་དེར་གནས་ཐབས་བྲལ་བས་གནས་སྐབས་སུ་རྒྱལ་ཁོངས་ཀྱི་ཕྱི་ལོགས་སུ་བཞུགས་ཡོད་པ་རེད། དེ་བཞིན་ Nadia  Murad ལགས་ནི་ཁ་ཆེའི་འཇིགས་སྐུལ་དྲག་སྤྱོད་ཚོགས་པ་ ISIS ཡིས་བཙན་གཡེམ་ཐེབས་པའི་ Yazidi ཡི་བུད་མེད་ ༣༠༠༠ ལྷག་ཡོད་པའི་ཁྲོད་ནས་གཅིག་ཡིན་པ་དང་། ཁོ་མོ་འཇིགས་སྐུལ་ཚོགས་པས་འཛིན་བཟུང་བྱས་ནས་བཙན་གཡེམ་ཐེབས་ནས་ཟླ་ངོ་གསུམ་ཙམ་གྱི་རྗེས་སུ་ཕྱི་ལོགས་སུ་བྲོས་བྱོལ་དུ་སོང་ནས་རང་གི་དཀའ་སྡུག་གི་འཚོ་བའི་ཉམས་མྱོང་དངོས་སུ་ཕྱིར་གསལ་ཐུབ་པ་བྱུང་འདུག རང་ལོ ༢༣ གྱི་སྐབས་སུ་ཁོ་མོ་མི་གསོད་ཚོང་ལས་ཀྱི་ལག་པ་ནས་ཐར་བའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་ཀྱི་མཚན་གནས་ཐོབ་ཡོད་མཁན་ཞིག་དང་།  ཕྱི་ལོ་ ༢༠༡༦ ལོར་ Vaclav Havel Human Rights Prize ཞེས་ཡོ་རོབ་སྤྱི་མཐུན་ཚོགས་པས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་དམ་པ་སྐུ་ཞབས་ Vaclav Havel མཆོག་གི་མཚན་གནས་ཐོག་ཕུལ་བའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གཟེངས་རྟགས་ཀྱང་ཐོབ་མྱོང་ཡོད་པ་ཞིག་རེད། ༸དཔལ་ལྡན་དགའ་ལྡན་ཕོ་བྲང་གི་དྲྭ་གནས་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རེང་སྐུ་ཞབས་ Denis Mukwege ལགས་དང་ལྕམ་ Nadia  Murad ལགས་རྣམ་གཉིས་ལ་དགའ་བསུའི་འཚམས་འཕྲིན་བསྩལ་བ་བཀོད་པར་གཞིགས་ཚེ་གཟེགས་རྟགས་འདི་ནི་སྐུ་ཉིད་ནས་རྐྱེན་ངན་དུ་མའི་ཁྲོད་དུ་དཀའ་སྡུག་དང་རྨས་སྐྱོན་ཕོག་པའི་མིའི་རིགས་ལ་རོགས་རམས་བྱས་པའི་སྙིང་སྟོབས་དང་ཆོད་སེམས། སོར་ཆུད་སོགས་ཀྱི་ཐད་ནས་གཞན་སེམས་ཀྱིས་བསླངས་བའི་ཕྱག་ལས་ལ་ངོས་འཛིན་ཐོབ་པ་ཞིག་ཡིན་སྐོར་བཀའ་བསྩལ་བ་དང་འབྲེལ། ཁོང་རྣམ་པ་གཉིས་ཀྱིས་གཞན་གྱི་བདེ་རྩའི་ཆེད་དུ་བྱམས་བརྩེ་དངོས་སུ་ཕྱག་བསྟར་གནང་བར་ཡི་རང་བསྔགས་བརྗོད་མཛད་འདུག ༸གོང་ས་མཆོག་གིས་ད་དུང་གཞན་ལ་རོགས་རམས་དགོས་ཚེ་འཛེམ་ཟོན་མེད་པར་ཡུལ་དངོས་ལ་སོང་ནས་སྲུང་སྐྱོབ་དང་བདེ་གནས་སུ་འཁོད་ཐུབ་མཁན་གྱི་གཅེན་གཅུང་ཁྱེད་རྣམ་གཉིས་ལྟ་བུར་ངོས་ནས་བསྔགས་བརྗོད་ཞུ་བཞིན་ཡོད་ཅེས་བཀའ་བསྩལ་བ་མ་ཟད། མགོན་པོ་༸གང་ཉིད་མཆོག་ནས་ཁོང་གཉིས་དང་ལྷན་དུ་ཐུན་མོང་གི་ཐོག་ནས་འཛམ་གླིང་འདིར་མི་སུ་ལའང་དགའ་སྐྱིད་ཀྱི་འཚོ་བ་རོལ་ཐུབ་པར་ཤུགས་སྣོན་རྒྱག་རྒྱུར་གྲ་སྒྲིག་ཡོད་ཅེས་བཀའ་བསྩལ་འདུག ནོར་ཝེ་ནང་རྟེན་གཞི་བྱས་པའི་ནོ་སྦེལ་ཞི་བདེའི་གཟེངས་རྟགས་ལྷན་ཚོགས་ཀྱིས་ཁ་སང་ཟླ་ ༡༠ ཚེས་ ༥ ཉིན་ཕྱི་ལོ་ ༢༠༡༨ ལོའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་གསལ་བསྒྲགས་གནང་སྐབས་འབུམ་རམས་པ་ Denis Mukwege ལགས་དང་ Nadia  Murad ལགས་རྣམ་གཉིས་ཀྱིས་བཙན་གཡེམ་གྱི་དྲག་སྤྱོད་ལ་ཁ་གཏད་གཅོག་ཐབས་དང་དོ་སྣང་འདྲེན་ཐབས་ལ་བླ་ན་མེད་པའི་བྱས་རྗེས་བཞག་ཡོད་ཅེས་གསུངས་འདུག

སྒོ་ལྔའི་ཤེས་པ་དང་འབྲེལ་བའི་བདེ་སྡུག་ལས་ཡིད་བློ་དང་འབྲེལ་བའི་བདེ་སྡུག་གཙོ་ཆེ་བ་རེད།  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་དབུ་མ་འཇུག་པའི་ཆོས་འབྲེལ་ཉིན་གསུམ་པའི་ཐོག་གོ་ལའི་ཐོག་གནས་པའི་སྐྱེ་འགྲོ་ཐམས་ཅད་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་དང། དེའང་སྒོ་ལྔའི་ཤེས་པ་དང་འབྲེལ་བའི་བདེ་སྡུག་ལས་ཡིད་བློ་དང་འབྲེལ་བའི་བདེ་སྡུག་དེ་གཙོ་ཆེ་བ་རེད་ཅེས་བཀའ་སྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་ལ་ཐེ་ཝན་རྒྱ་རིགས་དད་ལྡན་ཆོས་ཞུ་བ་ཚོས་ཇི་ལྟར་གསོལ་འདེབས་ཞུ་དོན་ལྟར། ཁ་ཉིན་ཚེས་ ༣ ནས་མགོན་པོ་༸གང་ཉིད་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཕྱི་ནང་གི་དད་ལྡན་ཆོས་ཞུ་བ་ ༦༩༠༠ བརྒལ་བར་དབུ་མ་འཇུག་པའི་ཆོས་འབྲེལ་བཀྲིན་སྐྱོང་བཞིན་ཡོད་པ་དང། དེ་རིང་ཉིན་གསུམ་པའི་ཆོས་འབྲེལ་ཐོག་ཐོག་མར་པཱ་ལི་དང་རྒྱ་སྐད་ཐོག་ཤེས་རབ་སྙིང་པོ་གསུང་འདོན་གནང་རྗེས། ༸གོང་ས་མཆོག་གིས་༸གང་ཉིད་མཆོག་དེ་སྔ་ ༡༩༦༠ རེ་གྲངས་ནང་སིངྒ་པུར་དུ་ཆིབས་བསྒྱུར་གྱིས་ཆོས་འབྲེལ་མཛད་པའི་སྐབས་ནང་པའི་གནས་བརྟན་ཁག་ཅིག་གིས་རྒྱ་སྐད་ཐོག་ཤེས་རབ་སྙིང་པོ་གསུང་འདོན་གནང་བའི་སྐབས་ཀྱི་༸སྐུའི་མྱོང་ཚོར་དང་འབྲེལ་བཀའ་བསྩལ་སོང་།ད་དུང་༸གོང་ས་མཆོག་གིས་ཉེ་ཆར་རྒྱལ་ས་ལྡི་ལིར་འཛམ་གླིང་ཡུལ་གྲུ་འདྲ་མིན་ཁག་ཅིག་གི་གནས་བརྟན་འདུལ་བ་འཛིན་པ་རྣམས་དང་མཇལ་མོལ་མཛད་སྐབས་༸གང་ཉིད་མཆོག་གིས་གོ་ལ་འདིའི་ཐོག་ཆོས་ཀྱི་དགོས་མཁོ་འདུག་གམ་ཞེས་བཀའ་འདྲི་གནང་ཡོད་སྐོར་བཀའ་བསྩལ་དང་འབྲེལ། གོ་ལའི་ཐོག་གནས་པའི་སྐྱེ་འགྲོ་ཐམས་ཅད་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་སྟབས་༸གང་ཉིད་མཆོག་གིས་དགོས་མཁོ་ཡོད་པ་ཞིག་ཏུ་གཟིགས་སྐོར་བསྐྱར་ནན་མཛད་སོང་།དེ་ལྟ་བུའི་བདེ་སྡུག་དེ་དག་གཙོ་བོ་སྒོ་ལྔའི་ཤེས་པ་དང་ཡིད་བློའི་ཤེས་པ་ལས་ཡོང་གི་ཡོད་པ་ལྟར་ཡིད་བློ་དང་འབྲེལ་བའི་བདེ་སྡུག་དེ་གཙོ་ཆེ་བ་ཡིན་སྟབས། ཆོས་རབ་ཏུ་རྣམ་པར་འབྱེད་པའི་ཤེས་རབ་ཀྱི་ཐོག་ནས་ཡིད་བློ་དང་འབྲེལ་བའི་བདེ་སྡུག་དེ་དག་བཅོས་དགོས་གལ་ཡིན་པར་བཀའ་བསྩལ་སོང་།དེ་བཞིན་༸གོང་ས་མཆོག་གིས་ཐེག་པ་ཆེན་པོ་སངས་རྒྱས་ཀྱི་བཀའ་ཡིན་མིན་བཞེད་ཚུལ་མི་མཐུན་པ་ཡོང་གི་ཡོད་པ་དང་། དེའང་བདག་ཅག་གི་སངས་རྒྱས་ནས་ལེགས་སྦྱར་མཁྱེན་གྱི་མེད་པ་རྒྱུ་མཚན་དུ་བཀོད་ཀྱི་ཡོད་ཀྱང་། ཁོང་གི་རྗེས་འབྲང་སློབ་དཔོན་ཀླུ་སྒྲུབ་སོགས་ཀྱིས་མཛད་པའི་རྒྱ་གཞུང་དག་གོ་རིམ་ལེགས་པོ་བསྒྲིག་ཚེ་གསང་སྔགས་ཀྱི་ཆོས་འཁོར་གཙོས་པའི་ཐེག་ཆེན་གྱི་ཆོས་རྣམས་སངས་རྒྱས་ཀྱི་བཀའ་སྐོར་བཀའ་ནན་མཛད་ཡོད།རྩ་བའི་༸གོང་ས་མཆོག་གིས་ཁ་ཉིན་ནས་དབུ་འཛུགས་ཀྱིས་སྔ་དྲོར་ཆོས་ཞུ་བ་ཚོར་དབུ་མ་འཇུག་པའི་གཞུང་ཡོངས་རྫོགས་བཀའ་ཁྲིད་མཛད་ཟིན་ཡོད་སྟབས། སང་ཆོས་འབྲེལ་མཐའ་མའི་སྐབས་སུ་༸གང་ཉིད་མཆོག་གིས་ཆོས་ཞུ་བ་ཚོར་ལམ་གཙོ་རྣམ་གསུམ་གྱི་བཀའ་ཆོས་དང་སྤྱན་རས་གཟིགས་འཇིག་རྟེན་ཀུན་གྲོལ་གྱི་རྗེས་གནང་བསྩལ་གནང་གི་ཡོད་པ་རེད།

༸གོང་ས་མཆོག་གིས་སྨོན་ལམ་བརྒྱབ་པ་ཙམ་གྱིས་ཉོན་མོངས་སེལ་མི་ཐུབ་ཅེས་བཀའ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སློབ་དཔོན་ཟླ་བ་གྲགས་པས་མཛད་པའི་དབུ་མ་འཇུག་པའི་ཆོས་འབྲེལ་ཉིན་གཉིས་པའི་ཐོག་སྨོན་ལམ་ཁོ་ན་བརྒྱབ་པ་ཙམ་གྱིས་རང་རྒྱུད་ཀྱི་ཉོན་མོངས་པ་སེལ་ཐུབ་ཐབས་མེད་པར་ལམ་སྟོན་བསྩལ་སོང་།དེའང་༸གོང་ས་༸སྐྱབས་མགོན་ཆེན་པོ་མཆོག་གིས་སྔོན་འགྲོའི་བཀའ་ཆོས་སུ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་བདག་ཅག་གི་སྟོན་པ་སངས་རྒྱས་ཤཱཀྱ་ཐུབ་པ་མཆོག་གི་རྣམ་དཔྱོད་ནི་ཆེས་ཕུལ་དུ་བྱུང་བ་ཞིག་ཡོད་པ་དང་། དེའི་རྗེས་འབྲངས་རྒྱ་གར་གྱི་པཎ་གྲུབ་ཚོའི་རྒྱུད་ལ་རྟོགས་པ་མཐོ་པོ་ཡོད་པ་མ་ཟད་དེ་དག་གིས་གཞུང་སྡེ་སྣོད་གསུམ་ལ་ཐོས་བསམ་སྒོམ་གསུམ་མཐར་ཕྱིན་པ་གནང་སྟེ་མི་རབས་མང་པོའི་བར་དུ་རྒྱུན་འཛིན་གནང་ཐོག་འཛམ་གླིང་གི་ལྷོ་ཤར་ཨེ་ཤ་ཡས་གཙོས་པའི་རྒྱལ་ཁབ་དུ་མའི་ནང་ནང་ཆོས་དར་སྤེལ་བྱུང་ཡོད་པ་བཀའ་བསྩལ་སོང་།ད་དུང་༸གོང་ས་མཆོག་གིས་ཁྱེད་རང་ཚོས་རྣམ་ཀུན་རྒྱ་སྐད་ཐོག་ཤེས་རབ་སྙིང་པོའི་མཇུག་ཏུ་དུག་གསུམ་ཉོན་མོངས་སེལ་བར་ཤོག ཤེས་རབ་སྣང་བ་འབར་བར་ཤོག ཕྱི་ནང་གི་ངན་སེམས་མེད་པ་དང་། བྱང་ཆུབ་སྤྱོད་ལ་མཇུག་པར་ཤོག ཅེས་པའི་སྨོན་ལམ་ཚིག་བཞི་པོ་འདི་ལས་དུག་གསུམ་ཉོན་མོངས་སེལ་བར་ཤོག་ཅེས་སྨོན་ལམ་བརྒྱབ་ཀྱི་ཡོད་པ་ལྟར་དེ་ཁོ་ན་འགྲིག་ཚེ་ཤེས་རབ་སྣང་བ་འབར་བ་ཤོག་ཅེས་པ་དེ་གོ་མེད་ཆགས་ཀྱི་ཡོད་པས་སྨོན་ལམ་ཁོ་ན་བརྒྱབ་པ་ཙམ་གྱིས་རང་རྒྱུད་ཀྱི་ཉོན་མོངས་པ་སེལ་ཐབས་མེད་པར་ལམ་སྟོན་བསྩལ་སོང་བ་དང་། ཆོས་རྣམས་ཀྱི་གནས་ལུགས་གང་ཡིན་ཤེས་པ་ཙམ་གྱིས་གཞན་དོན་རྒྱ་ཆེན་པོ་བསྒྲུབ་དཀའ་བ་ཡིན་པས་བྱང་ཆུབ་སྤྱོད་ལ་མཇུག་པར་ཤོག་ཅེས་གསུངས་པ་བཞིན་བྱང་ཆུབ་ཀྱི་སེམས་བསྐྱེད་དགོས་གལ་ཡིན་པར་བཀའ་བསྩལ་ཡོད།མགོན་པོ་༸གང་ཉིད་མཆོག་གིས་གསུང་ཆོས་བར་མཚམས་སུ་བཀའ་འདྲི་ཞུ་རྒྱུའི་གོ་སྐབས་བསྩལ་དོན་ལྟར་ཆོས་ཞུ་བས་༸གོང་ས་མཆོག་གི་བཀའ་སློབ་བསྩལ་བ་བཞིན་རྣམ་ཀུན་རང་ནུས་ལ་གཞིགས་པའི་བྱང་སེམས་དང་སྟོང་ཉིད་ཀྱི་ལྟ་བ་བསྒོམ་གང་ཐུབ་ཞུ་མུས་ཡིན་ཀྱང་མཚམས་རེ་ལས་འབྲལ་རྐྱེན་པས་དོན་སྙིང་ལྡན་པ་ཞིག་བསྒོམ་ཐུབ་ཀྱི་མི་འདུག་པས་དེ་ལྟར་བསྒོམ་ཐུབ་ཐབས་སུ་ལམ་སྟོན་ཞིག་གནང་རོགས་ཞེས་དང་འདི་བཞིན་རྒྱ་སྐད་ཐོག་ནས་ནང་པའི་གཞུང་ཆེན་དག་ལ་སློབ་གཉེར་བྱ་འཆར་ཡོད་པས་ཇི་ལྟར་གནང་དགོས་མིན་ཐོག་ལམ་སྟོན་བསྩལ་རོགས་ཞེས་ཞུས་པར་ལམ་སྟོན་བཀའ་བསྩལ་མཛད་སོང་།

༸གོང་ས་མཆོག་གིས་བཞུགས་སྒར་དུ་དབུ་མ་འཇུག་པའི་ཆོས་འབྲེལ་དབུ་འཛུགས་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གཞུང་སྐུལ་བ་པོ་ཐེ་ཝན་གྱི་དད་ལྡན་ཆོས་ཞུ་བ་གཙོས་པའི་ཕྱི་ནང་གི་མང་ཚོགས་ ༦༩༠༠ ལྷག་ཙམ་ལ་ཉིན་བཞིའི་རིང་སློབ་དཔོན་ཟླ་བ་གྲགས་པས་མཛད་པའི་དབུ་མ་འཇུག་པ་ལས་སྔར་ལོའི་ཆོས་འབྲེལ་འཕྲོ་སྐྱོང་གི་བཀའ་ཆོས་དབུ་འཛུགས་བསྐྱངས་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཐོག་མར་ཐེ་ཝན་དང་རྒྱ་ནག་སྐམ་ས་ཆེན་པོ། ཡོ་རོབ། ཨ་རི། དེ་བཞིན་ཝི་ཏི་ནམ་དང་ཀོ་རི་ཡ་སོགས་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ནས་ཕེབས་པའི་ཆོས་ཞུ་བ་ཚོར་དགའ་བསུའི་འཚམས་འདྲི་བསྩལ་བ་སྦྲགས། མགོན་པོ་༸གང་ཉིད་མཆོག་གིས་ཁྱེད་རང་ཚོའི་ངོས་ནས་ངོས་ཀྱིས་རྒྱུན་ལྡན་བཤད་པ་ལྟར་ནང་ཆོས་ལ་ཤེས་ནས་དད་པ་ཐོབ་པ་ཞིག་བྱེད་དགོས་ཞེས་ལམ་སྟོན་མཛད་སོང་།༸གོང་ས་མཆོག་གིས་བཀའ་ཆོས་དངོས་གཞི་དབུ་འཛུགས་མ་བསྐྱང་གོང་དུ་ཕྱི་ནང་གི་དད་ལྡན་ཆོས་ཞུ་བ་ཚོར་སྔོན་འགྲོ་ཆོས་འབྲེལ་དུ་སངས་རྒྱས་བཅོམ་ལྡན་འདས་ཀྱིས་སྡིག་པ་ཅི་ཡང་མི་བྱ་ཞིང་། དགེ་བ་ཕུན་སུམ་ཚོགས་པར་སྤྱད། རང་གི་སེམས་ནི་ཡོངས་སུ་འདུལ། འདི་ནི་སངས་རྒྱས་བསྟན་པ་ཡིན་ཞེས་གསུངས་པ་ལྟར་འདིར་རྒྱ་ཆེ་ས་ནས་བསམ་བློ་གཏང་ཚེ་འཛམ་གླིང་ཐོག་གི་ཆོས་ལུགས་ཚང་མས་གཞན་ལ་གནོད་པ་མ་བྱེད་ཞེས་སེམས་རྒྱུད་འདུལ་ཐབས་སུ་འཇིག་རྟེན་བཀོད་པ་པོ་འདོད་མཁན་དང་མི་འདོད་པའི་དབར་ཐབས་ཚུལ་ཙམ་ལས་ཁྱད་མེད་ཅིང་བསླབ་བྱའི་སྙིང་པོ་གཅིག་མཚུངས་ཡིན་སྐོར་བཀའ་བསྩལ་སོང་།ད་དུང་༸གོང་ས་མཆོག་གིས་སངས་རྒྱས་ཀྱིས་འགྲོ་བའི་སྡུག་བསྔལ་ཕྱག་གིས་སེལ་མི་ནུས་པ་དང་དེའི་རྒྱུ་ལས་དང་ཉོན་མོངས་རྣམས་ཆུས་འཁྲུ་རྒྱུ་མེད་པ་སོགས་བསྟན་ནས་ཆོས་ཀྱི་གནས་ལུགས་གང་ཡིན་ཇི་བཞིན་བསྟན་ཐོག་སེམས་ཅན་ལ་ཕན་ཐོགས་མཛད་ཀྱི་ཡོད་པ་བཀའ་བསྩལ་བ་དང་སྦྲགས། རང་གི་སེམས་ནི་ཡོངས་སུ་འདུལ་ཞེས་ནང་པ་སངས་རྒྱས་པའི་ཆོས་ཀྱི་ཐོག་ནས་སེམས་འདུལ་ཚུལ་དེ་ནི་ཐུན་ཐོན་མ་ཡིན་པ་ཞིག་ཆགས་ཡོད་པར་བཀའ་བསྩལ་ཡོད།༸གོང་ས་མཆོག་གིས་དེ་རིང་བཀའ་ཆོས་ཉིན་དང་པོའི་ཐོག་གཙོ་བོ་སངས་རྒྱས་ཀྱིས་ཐོག་མར་བདེན་བཞི་ཆོས་འཁོར་བསྐོར་ཡོད་པ་དང་། ལྷག་དོན་བདེན་བཞིའི་རྒྱུ་འབྲས་དང་བཅས་པ་ཤེས་པའི་ཐོག་ནས་ཆོས་ཉམས་སུ་བླངས་དགོས་སྐོར་ལམ་སྟོན་རྒྱ་ཆེ་མཛད་སོང་། ཐེངས་འདིའི་དབུ་མ་འཇུག་པའི་གསུང་ཆོས་འདི་ནི་གཙོ་བོ་ཐེ་ཝན་ནང་ཡོད་པའི་བསྟན་འཛིན་བྱམས་ཆེན་ཆོས་ཚོགས་ནས་གསོལ་འདེབས་ཞུས་པ་ཞིག་ཡིན་པ་དང་། བཀའ་ཆོས་ཐོག་འཛམ་གླིང་རྒྱལ་ཁབ་མི་འདྲ་བ་ ༦༧ ནས་ཁྱོན་ཆོས་ཞུ་བ་ ༦༩༠༠ ལྷག་འདུ་འཛོམས་བྱུང་འདུག་པའི་ཁོངས་ནས་ཐེ་ཝན་ནས་ཆོས་ཞུ་བ་ཁྱོན་ ༩༠༠ དང་རྒྱ་ནག་སྐམ་ས་ཆེན་པོ་ནས་ཆོས་ཞུ་བ་ཁྱོན་ ༥༤ བཅས་ཆེད་བཅར་ཞུས་འདུགམགོན་པོ་༸གང་ཉིད་མཆོག་གིས་གསུང་ཆོས་བར་མཚམས་སུ་བཀའ་འདྲི་ཞུ་རྒྱུའི་གོ་སྐབས་བསྩལ་དོན་ལྟར་ཆོས་ཞུ་བ་ཞིག་གིས་༸གོང་ས་མཆོག་གིས་རྣམ་ཀུན་ནས་བཀའ་ཆོས་སྩལ་སྐབས་སུ་ཆོས་ཀྱི་བདག་མེད་དང་གང་ཟག་གི་བདག་མེད་གཉིས་ཡོད་པ་ལས་མགོན་པོ་མཆོག་གི་ཐུགས་རྒྱུད་ལ་ཐོག་མར་གང་ཟག་གི་བདག་མེད་འཁྲུངས་སྐོར་བཀའ་སྩལ་དོན་གང་ཡིན་ནམ་ཞེས་བཀའ་འདྲི་ཞུས་སོང་། རྩ་བའི་༸གོང་ས་མཆོག་ནས་དེ་རིང་ཟླ་ ༡༠ ཚེས་ ༣ ནས་ ༦ བར་ཉིན་གྲངས་བཞིའི་རིང་བཀའ་ཆོས་བཀའ་དྲིན་བསྩལ་གནང་གི་ཡོད་པ་དང་། བཀའ་ཆོས་དེའང་༸དཔལ་ལྡན་དགའ་ལྡན་ཕོ་བྲང་གི་དྲྭ་རྒྱ་ Dalialama.com ཐོག་ལ་བོད་སྐད་དང་། དབྱིན་སྐད། རྒྱ་སྐད། ཝི་ཏི་ནམ། ཧིཾདི། ཉེ་ཧོང། ཨུ་རུ་སུ། སེ་པན་ནི་ཤི། འཇར་མན། པོར་ཆུགྷར་སི་བཅས་ཀྱི་སྐད་ཐོག་ཐད་སྲིང་གནང་གི་འདུག

༸གོང་ས་མཆོག་གིས་ཨིན་ཌོ་ནེ་ཤ་ཡར་ས་འགུལ་དང་མཚོ་རླབས་ཀྱི་གོད་ཆག་ཕོག་པར་ངལ་སེལ་ཨ་སྒོར་ཁྲི་ལྔ་ཞལ་འདེབས་བསྩལ་བ།

ཁ་སང་ཟླ་ ༩ ཕྱི་ཚེས་ ༣༠ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་ Indonesiaའི་མཚོ་གླིང་Sulawesiཞེས་པའི་ཁུལ་དེར་ས་ཡོམ་དང་། དེས་རྐྱེན་པའི་tsunami འམ་མཚོ་རླབས་ཀྱི་གོད་ཆག་བྱུང་ནས་མི་རྒྱུ་གཉིས་ཀར་གནོད་འཚེ་ཆེན་པོ་ཕོག་པར་ཐུགས་གསོའི་གསུང་འཕྲིན་དང་འབྲེལ། ངལ་སེལ་ཆེད་ཨ་སྒོར་ཁྲི་ལྔ་གསོལ་བསྩལ་གནང་འདུག མགོན་པོ་༸གང་ཉིད་མཆོག་ནས་ Indonesia སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་Joko Widodoམཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་བསྩལ་ཡོད་པ་དང་དེའི་ནང་ Sulawesi མཚོ་གླིང་དུ་ས་ཡོམ་དང་མཚོ་རླབས་ཀྱི་འཇིག་པའི་འོག་རྐྱེན་ལམ་དུ་འགྱུར་བ་དང་རྨས་སྐྱོན་ཕོག་མཁན་རྣམས་ལ་ཐུགས་སྨོན་དང་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད་ཀྱི་ཐུགས་གསོ་བསྩལ་བ་མ་ཟད། འཇིག་པ་ལས་སྲོག་ཐར་བ་དང་རྨས་སྐྱོན་ཕོག་མཁན་ཚོའི་ཆེད་དུ་ངལ་སེལ་གྱི་ལས་གཞི་སྤེལ་མུས་ཡིན་པ་མཁྱེན་རྟོགས་ཡོད་སྐོར་བཀའ་བསྩལ་བ་དང་ཆབས་ཅིག ༸དཔལ་ལྡན་དགའ་ལྡན་ཕོ་བྲང་གི་ཐེབས་རྩ་ཁང་ནས་ indonesia མི་མང་ལ་རོགས་སྐྱོར་དང་འདས་གྲོངས་སུ་གྱུར་པའི་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད་མཚོན་ཕྱིར་ཞལ་འདེབས་ཨ་སྒོར་ཁྲི་ལྔ་གསོལ་བསྩལ་གནང་རྒྱུ་ཡིན་ཞེས་བཀའ་བསྩལ་འདུག ༸གོང་ས་མཆོག་ནས་༸གང་ཉིད་མཆོག་ཕྱི་ལོ་ ༡༩༨༢ ལོར་indonesia ནང་རྟེན་གཞི་བྱས་པའི་ནང་པའི་གནས་ཆེན་Borobudar ཞེས་པ་དེར་ཆིབས་བསྒྱུར་གྱིས་ཆོས་འབུལ་མཛད་རྒྱུའི་སྐལ་བཟང་གོ་སྐབས་བྱུང་སྐོར་བཀའ་བསྩལ་བ་དང་། སྐབས་དེའི་ཚེ་མགོན་པོ་༸གང་ཉིད་མཆོག་ལ་ indonesia ཡི་མི་སེར་དང་རིག་གཞུང་བཅས་ལ་ཧ་ཅང་གི་བློ་ཉེ་བའི་དགོངས་པ་གཏིང་ཟབ་ཀྱི་ཐུགས་ཚོར་ཞིག་བྱུང་ཞེས་བཀའ་བསྩལ་འདུག རྩ་བའི་ཉེ་ལམ་རེས་གཟའ་པ་སངས་ཉིན་ Indonesiaའི་མཚོ་གླིང་Sulawesiཞེས་པའི་ཁུལ་དེར་ས་ཡོམ་ཤུགས་ཚད་ ༧.༥ བརྒྱབ་རྐྱེན་ tsunami འམ་མཚོ་རླབས་ཀྱི་གོད་ཆག་བྱུང་ནས་མི་རྒྱུ་གཉིས་ལ་གནོད་འཚེ་ཆེན་པོ་བྱུང་ཡོད་པ་དང་ད་བར་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། གོད་ཆག་དེས་རྐྱེན་པའི་ཉུང་མཐར་མི་གྲངས་ ༨༤༤ ལྷག་རྐྱེན་འདས་སུ་ཕྱིན་ཡོད་པ་དང་། ཛ་དྲག་གྱི་ངལ་སྐྱོབ་ལས་གཞི་སྤེལ་མུས་ཡིན་པའི་གནས་ཚུལ་ཐོན་ཡོད་པ་རེད།

༸གོང་ས་མཆོག་གིས་ཡོ་རོབ་ཁུལ་གྱི་མཛད་འཕྲིན་ཁག་ལེགས་གྲུབ་ཀྱིས་བཞུགས་སྒར་དུ་༸ཞབས་སོར་བདེ་བར་འཁོད་པ།

དེ་རིང་ཟླ་ ༩ ཚེས་ ༢༦ ཉིན་གྱི་ཕྱག་ཚོད་ ༡༢།༣༠ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡོ་རོབ་ནང་གི་མཛད་འཆར་ཁག་ལེགས་གྲུབ་ཀྱིས་རྒྱ་གར་རྒྱལ་ས་ལྡི་ལི་ནས་མཁའ་ལམ་བརྒྱུད་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་གནང་མཛད་སོང་། གཞི་རྩའི་༸གོང་ས་མཆོག་ཕྱི་ཟླ་ ༩ ཚེས་ ༡༠ ཉིན་བཞུགས་སྒར་ནས་ཆིབས་བསྒྱུར་གྱིས་སུད་ཌེན་དང་། ནི་ཐར་ལན་ཌི། འཇར་མ་ནི། དེ་བཞིན་ སུ་ཛ་ལན་ཌི་བཅས་ཡོ་རོབ་ཀྱི་རྒྱལ་ཁབ་ཁག་བཞིའི་ནང་ཆིབས་བསྒྱུར་དང་འབྲེལ་མང་ཚོགས་ལ་བཀའ་ཆོས་དང་བཀའ་སློབ་སོགས་ཀྱི་མཛད་འཕྲིན་དུ་མ་བསྐྱངས་གནང་མཛད་ཡོད་པ་རེད། དེ་ཡང་མགོན་པོ་༸གང་ཉིད་མཆོག་ཕྱི་ཟླ་ ༩ ཚེས་ ༡༡ གི་ཉིན་རྒྱབ་ཡོ་རོབ་རྒྱལ་ཁབ་ Sweden གྱི་ Malmo གྲོང་ཁྱེར་ནང་ཞབས་སོར་བདེ་བར་འཁོད་དེ་ཁུལ་དེའི་ནང་གི་ IM རོགས་སྐྱོར་ཚོགས་པ་ཆེད་འཛུགས་གནང་ནས་མི་ལོ་  ༨༠ འཁོར་བའི་དུས་དྲན་ཐོག་དབུ་ཞུགས་དང་འབྲེལ། ཞི་བདེ་དང་བདེ་སྐྱིད་བསྐྲུན་ཐབས་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བཀྲིན་བསྩལ་ཡོད་པ་དང་། མལ་མོ་གཙུག་ལག་སློབ་གཉེར་ཁང་དུ་ཆོས་ལུགས་ལ་མ་བརྟེན་པའི་བཟང་སྤྱོད་ཐོག་བཀའ་སློབ་བསྩལ་ཡོད་པ་རེད། ༸གོང་ས་མཆོག་ནས་སྐབས་དེར་འཛམ་གླིང་ནང་ཆོས་ལུགས་དང་ཆབ་སྲིད་ཀྱི་ཐོག་ནས་རྩོད་རྙོག་བྱུང་བ་རྣམས་ཉུང་དུ་གཏོང་རྒྱུའི་ཐབས་ལམ་གཙོ་བོ་ཆོས་ལུགས་ལ་མ་བརྟེན་པའི་བཟང་སྤྱོད་དམ་ཚུལ་སྤྱོད་ཤེས་ཡོན་སློབ་གསོ་དེ་ཡིན་པ་བཀའ་བསྩལ་ཡོད་པ་མ་ཟད། སུད་ཌེན་གཙོ་བོར་འགྱུར་བའི་ཉེ་འཁོར་ Denmark དང་ Norway བཅས་ནས་ཆེད་དུ་བཅར་བའི་བོད་མི་བརྒྱ་སྐོར་ཞིག་དང་བོད་དོན་རྒྱབ་སྐྱོར་བ་ ༦༠ བཅས་ལ་དམིགས་བསལ་མཇལ་ཁ་དང་བཀའ་སློབ་བཀྲིན་ཡང་བསྩལ་ཡོད་པ་རེད། མགོན་པོ༸གང་ཉིད་མཆོག་ཡོ་རོབ་རྒྱལ་ཁབ་སུད་ཌེན་ནང་ཉིན་གཉིས་ཀྱི་མཛད་འཆར་ཁག་ལེགས་གྲུབ་ཀྱིས་ཕྱི་ཟླ་༩ ཚེས་ ༡༤ ཡི་ཉིན་རྒྱབ་ Netherlands ཡི་ Rotterdam ནང་༸ཞབས་སོར་བདེ་བར་འཁོད་དེ་ཚེས་ ༡༥ ཉིན་རྒྱལ་ས་ Amsterdam ནང་དུ་སྟོན་པའི་མཛད་རྣམ་དང་འབྲེལ་བའི་འགྲེམས་སྟོན་དབུ་འབྱེད་དང་དེང་དུས་ཀྱི་འཕྲུལ་ཆས་དང་བྱམས་བརྩེ། དེ་བཞིན་སྐྱེ་རྒ་ན་འཆི་ཞེས་པའི་གླེང་མོལ་གྱི་མཛད་རིམ་ཐོག་དབུ་བཞུགས་གནང་ཡོད་པ་དང་། ཕྱི་ཚེས་ ༡༦ ཉིན་ Netherlands གཙོ་བོར་གྱུར་པའི་ Belgium དང་ཕ་རན་སི། འཇར་མ་ནི། དབྱིན་ཡུལ་སོགས་ཡོ་རོབ་རྒྱལ་ཁབ་འདྲ་མིན་ནས་བཅར་བའི་བོད་མི་རྣམས་ལ་བཀའ་སློབ་བཀའ་དྲིན་བསྩལ་ཡོད་པ་དང་། སྐབས་དེར་མགོན་པོ་མཆོག་གིས་བོད་མིར་མཚན་ཤས་མི་ཡོང་བར་མི་བཟང་པོ་ཞིག་གནང་དགོས་གལ་ཡིན་པའི་ལམ་སྟོན་བཀའ་སློབ་བསྩལ་ཡོད་པ་རེད། ཕྱི་ཚེས་༡༧ ཉིན་ Ahoy ཚོགས་ཁང་ཆེན་མོའི་ནང་མང་ཚོགས་ཁྲི་ཕྲག་བརྒལ་བ་འདུ་འཛོམས་ཐོག་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Richard Gere ལགས་དང་༸གོང་ས་མཆོག་གི་དབར་བོད་དོན་གླེང་མོལ་གནང་ཡོད་པ་དང་། སྐབས་དེར་༸གོང་ས་མཆོག་གིས་བོད་ཀྱི་གནད་དོན་འདི་ཆབ་སྲིད་ཁོ་ན་མིན་པར་གོ་ལ་སྤྱི་ལ་ཕན་པ་བསྒྲུབ་རྒྱུ་དང་འབྲེལ་བའི་གནད་དོན་ཞིག་ཡིན་པ་བཀའ་བསྩལ་ཡོད་པ་དང་། Rotterdam གྲོང་ཁྱེར་ནང་ཉིན་མཐའ་མའི་མཛད་འཆར་དང་འབྲེལ། ཡུལ་དེའི་མང་ཚོགས་སྟོང་ཕྲག་ ༦ ལྷག་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་བཀའ་དྲིན་མཛད་ཡོད་པ་དང་། སྐབས་དེར་༸གང་ཉིད་མཆོག་ནས་ནང་པ་སངས་རྒྱས་པའི་ཆོས་ཉམས་ལེན་གནང་སྐབས་དབང་རྣོན་ཆོས་ཀྱི་རྗེས་འབྲང་བ་ཞིག་བྱ་དགོས་པ་བཀའ་གནང་ཡོད་པ་རེད། Rotterdam ནང་གི་མཛད་འཆར་ཁག་ལེགས་གྲུབ་རྗེས་༸གོང་ས་མཆོག་ཕྱི་ཟླ་ ༩ ཚེས་༡༨ཉིན་འཇར་མ་ནི་ Darmstadt གྲོང་ཁྱེར་དུ་༸ཞབས་སོར་བདེ་བར་འཁོད་དེ་ཕྱི་ཚེས་༡༩ ཉིན་ནོ་སྦེལ་ཞི་བདེའི་དེད་དཔོན་གཉིས་དང་འཇར་མ་ནིའི་གྲོས་ཚོགས་ཀྱི་ཚོགས་གཞོན་བཅས་དང་ལྷན་དུ་འཚེ་མེད་ཞི་བའི་བགྲོ་གླེང་ཐོག་དབུ་བཞུགས་མཛད་ཡོད་པ་དང་། ཕྱི་ཚེས་ ༢༠ འི་ཉིན་འཇར་མན་དང་ཨ་མི་རི་ཀའི་གཙུག་ལག་སློབ་གཉེར་ཁང་གི་རྒྱལ་སྤྱིའི་ཚན་རིག་དུས་སྟོན་འགོ་འཛུགས་དང་བསྟུན། ༸གོང་ས་མཆོག་གིས་བདེ་སྐྱིད་དང་འགན་འཁུར་ཞེས་པའི་བགྲོ་གླེང་ཐོག་དབུ་བཞུགས་མཛད་ཡོད་པ་རེད། ༸གོང་ས་མཆོག་དེའི་རྗེས་ཕྱི་ཟླ་ ༩ ཚེས་ ༢༡ ཉིན་སུད་སི་གྲོང་ཁྱེར་ཛུ་རིག་ནང་དུ་ཞབས་སོར་བདེ་བར་འཁོད་དེ་ རི་ཀོན་ཆོས་འཁོར་དགོན་གསར་འཛུགས་གནང་ནས་ལོ་ངོ་ ༥༠ འཁོར་བའི་ཆོས་ཕྱོགས་ཀྱི་དུས་དྲན་མཛད་སྒོར་དབུ་བཞུགས་མཛད་པ་དང་འབྲེལ། རི་ཀོན་ཆོས་འཁོར་དགོན་འདི་བཞིན་ནང་པའི་ལྟ་གྲུབ་ཀྱི་ཤེས་ཡོན་བསྟི་གནས་ཁང་ཞིག་ཏུ་འགྱུར་དགོས་པའི་ལམ་སྟོན་མཛད་ཡོད་པ་མ་ཟད། ཉིན་གཉིས་པའི་ཐོག་སླར་ཡང་རི་ཀོན་ཆོས་འཁོར་དགོན་གསར་འཛུགས་གནང་ནས་ལོ་ངོ་ ༥༠ འཁོར་བའི་གཞུང་འབྲེལ་མཛད་སྒོའི་ཐོག་དབུ་བཞུགས་མཛད་ཡོད་པ་དང་། སྐབས་དེར་བོད་པའི་སྟོབས་ཤུགས་ངོ་མ་དེ་བོད་ཀྱི་རིག་གཞུང་ཡིན་པ་ལྟར། ངེས་པར་དུ་མི་ཉམས་རྒྱུན་འཛིན་གནང་དགོས་པའི་ལམ་སྟོན་གནང་ཡོད་པ་རེད། ཕྱི་ཚེས་ ༢༣ ཉིན་Swiss དང་ Lechtenstien བོད་རིགས་ཚོགས་པ་གཉིས་ནས་ཇི་ལྟར་གསོལ་འདེབས་ཞུས་དོན་བཞིན་༸གོང་ས་མཆོག་ནས་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་དང་།  སློབ་དཔོན་ཀ་མ་ལ་ཤཱི་ལ་མཆོག་གིས་མཛད་པའི་སྒོམ་རིམ་བར་པ། དེ་བཞིན་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་བཅས་ཀྱི་བཀའ་ཆོས་བསྩལ་གནང་མཛད་ཡོད་པ་དང་ཉིན་རྒྱབ་བོད་མི་རྣམས་ལ་བཀའ་སློབ་བསྩལ་ཡོད་པ་མ་ཟད། ཕྱི་ཚེས་ ༢༥ ཉིན་ Zurich མཐོ་སློབ་ཀྱི་ཚན་རིག་སྡེ་ཚན་གྱི་དགེ་ལས་སློབ་མ་རྣམས་ལ་འགྲོ་བ་མིའི་རིན་ཐང་སྐོར་བཀའ་སློབ་བསྩལ་ཡོད་པ་དང་སྐབས་དེར་ཤེས་ཡོན་སྡེ་ཚན་གྱི་ངོས་ནས་ནང་སེམས་ཀྱི་ཞི་བདེ་གོང་འཕེལ་གཏོང་ཕྱོགས་ཐད་དམིགས་བསལ་འགན་འཁུར་དགོས་པ་བཀའ་བསྩལ་ཡོད་པ་རེད།

ཤེས་ཡོན་སྡེ་ཚན་གྱི་ངོས་ནས་ནང་སེམས་ཀྱི་ཞི་བདེ་གོང་འཕེལ་གཏོང་ཕྱོགས་ཐད་དམིགས་གསལ་འགན་འཁུར་དགོས་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་དེ་རིང་ Zurich མཐོ་སློབ་ཀྱི་ཚན་རིག་སྡེ་ཚན་གྱི་དགེ་ལས་སློབ་མ་རྣམས་ལ་འགྲོ་བ་མིའི་རིན་ཐང་སྐོར་བཀའ་སློབ་བསྩལ་བའི་ཁྲོད། ནང་སེམས་ཀྱི་ཞི་བདེ་གོང་འཕེལ་བཏང་རྒྱུ་དེ་ཤེས་ཡོན་གྱི་ལམ་ནས་གནང་ཐུབ་རྒྱུ་ཡིན་སྟབས། ཤེས་ཡོན་སྡེ་ཚན་རྣམས་ལ་ནང་སེམས་ཀྱི་ཞི་བདེ་གོང་འཕེལ་གཏོང་ཐབས་ཐོག་དམིགས་བསལ་འགན་ཡོད་པ་བཀའ་བསྩལ་འདུག དེ་ཡང་ Zurich གཙུག་ལག་སློབ་གཉེར་ཁང་གི་ཚན་རིག་སྡེ་ཚན་དང་དགའ་ལྡན་ཕོ་བྲང་ཐེབས་རྩ་ཁང། དེ་བཞིན་རི་ཀོན་ཆོས་འཁོར་དགོན་གསུམ་གྱི་གོ་སྒྲིག་མཉམ་རུབ་ཐོག་དེ་རིང་་ཚེས་ ༢༤ སྔ་འདྲོ་༸གོང་ས་མཆོག་ནས་ Winterthur གྲོང་ཁྱེར་གྱི་ Kongresshaus Liebestrasse ཚོགས་ཁང་ནང་དུ་ཟུ་རིག་མཐོ་སློབ་ཀྱི་དགེ་ལས་སློབ་མ་ ༡༠༠༠ ཙམ་དང་ལྷན་དུ་གོ་ལ་སྤྱི་ལ་ཁྱབ་པའི་འགྲོ་བ་མིའི་རིན་ཐང་དང་ཤེས་ཡོན་ཐོག་ལ་ཆེད་དོན་བགྲོ་གླེང་གི་ལས་རིམ་ཐོག་དབུ་བཞུགས་མཛད་འདུག སྐབས་དེར་༸གོང་ས་མཆོག་གིས་འཛམ་གླིང་འདིའི་ཐོག་གི་དཀའ་ངལ་རྣམས་མིས་བཟོས་པ་ཤ་སྟག་ཡིན་སྟབས། དཀའ་ངལ་དེ་དག་འགོག་ཐབས་སུ་འགྲོ་བ་མི་གཅིག་གྱུར་གྱི་བསམ་བློ་གོང་འཕེལ་གཏང་ཐུབ་དགོས་པ་དང་དེའང་ཨིན་ཡུལ་ལྟ་བུ་རང་ཞེན་དང་སེམ་བུག་དོག་པོའི་བྱེད་སྟངས་ཐོག་ནས་མ་ཡིན་པར། ཡུ་རོབ་མཐུན་ཚོགས་ལྟ་བུ་ཕན་ཚུན་མཉམ་མཐུན་གྱི་ཁེ་ཕན་གཞི་ལ་བཞག་པའི་ཐོག་གནང་དགོས་སྐོར་བཀའབསྩལ་བ་མ་ཟད། ད་ཆ་ཕྱིའི་དངོས་པོའི་འཕྲོད་བསྟེན་དང་འབྲེལ་ཏེ་ནང་སེམས་ཀྱི་འཕྲོད་བསྟེན་ཡང་གལ་འགངས་ཆེན་པོ་ཡིན་པས་ཤེས་ཡོན་སྡེ་ཚན་རྣམས་ལ་དམིགས་བསལ་འགན་ཡོད་པ་བཀའ་བསྩལ་འདུག དེ་བཞིན་མགོན་པོ་༸གང་ཉིད་མཆོག་གིས་ཚན་རིག་པ་ཁག་ཅིག་གིས་ཞིབ་འཇུག་གནང་བ་ལས་མིའི་རང་བཞིན་དེ་བྱམས་བརྩེ་ཡིན་པ་གྲུབ་དོན་རྙེད་པ་ལྟར། ང་ཚོ་ཚང་མ་སྤྱི་ཚོགས་ཀྱི་སེམས་ཅན་ཡིན་པའི་ཆ་ནས་གྲོགས་པོ་སོགས་དགོས་ཀྱི་ཡོད་པ་དང། དེའང་གཙོ་བོ་ཡིད་ཆེས་ཀྱི་ཐོག་ནས་ཡོང་རྒྱུ་ཡིན་སྟབས། དོན་དམ་གྱི་ཡིད་ཆེས་ཞེས་པ་དེ་དངུལ་དང་དབང་ཆའི་ཐོག་ནས་མ་ཡིན་པར་བྱམས་དང་བརྩེ་བའི་ཐོག་ནས་བསྐྲུན་དགོས་སྐོར་བཀའ་གནང་བ་དང་འབྲེལ། དེའི་ཆེད་དུ་གཙོ་བོ་འགྲོ་བ་མི་གཅིག་གྱུར་གྱི་འདུ་ཤེས་འཛིན་ཏེ་གཅིག་ཕན་གཅིག་གྲོགས་གནང་དགོས་པའི་ལམ་སྟོན་བཀྲིན་བསྩལ་ཡོད་པ་རེད། ༸གོང་ས་མཆོག་གིས་འགྲོ་བ་མིའི་རིན་ཐང་སྐོར་བཀའ་སློབ་གྲུབ་མཚམས་བགྲོ་གླེང་དེའི་ནང་མཉམ་བཞུགས་གནང་མཁན་ཛུ་རིག་མཐོ་སློབ་ཀྱི་འཛིན་སྐྱོང་ལྷན་ཚོགས་ཀྱི་ཚོགས་མི་དང་ཉམས་ཞིབ་སྡེ་ཚན་གྱི་འགན་འཛིན་སྐུ་ཞབས་ Andreas Gerber Grote ལགས་དང། མཐོ་སློབ་ཀྱི་སྐད་རིག་སྡེ་ཚན་གྱི་སློབ་དཔོན་ Christiane Hohenstein ལགས། དེ་བཞིན་མཐོ་སློབ་ཀྱི་སློབ་ཕྲུག་ཚོགས་པའི་ཚོགས་གཙོ་Leandro Huber དེ་བཞིན་རི་ཀོན་ཆོས་འཁོར་དགོན་གྱི་འགན་འཛིན་ལྷན་ཚོགས་ཀྱི་ཚོགས་གཞོན་ Reudi Hogger ལགས་དང། ལས་རིམ་གཙོ་སྐྱོང་བ་ Susanne Wille ལགས་བཅས་དང་ལྷན་དུ་གྲོས་བསྡུར་གྱི་ལས་རིམ་བསྐྱངས་ཡོད་པ་རེད། ད་རེས་༸གང་ཉིད་མཆོག་མཐོ་སློབ་ཏུ་ཆིབས་བསྒྱུར་མཛད་དེ་བཀའ་སློབ་བསྩལ་བ་དེས་སློབ་ཕྲུག་དང་མཐོ་སློབ་ཀྱི་འགན་འཛིན་ལྷན་ཚོགས་ཀྱི་བསམ་བློ་གཏོང་ཕྱོགས་ལ་ལམ་སེང་འགྱུར་བ་ཐེབས་རྒྱུ་ཡིན་པ་བཤད་ཐུབ་ཀྱི་མེད་ཀྱང། ཁོང་ཚོའི་ངོས་ནས་རང་ཉིད་ཀྱི་བསམ་བློ་གཏོང་ཕྱོགས་ལ་དཔྱད་པ་བྱེད་པར་ཕན་ཐོགས་ཆེན་པོ་ཡོང་རྒྱུ་ཡིན་པ་སོགས་བཀའ་བསྩལ་བ་དང་འབྲེལ་ནས་གྲོས་བསྡུར་ལྷུག་པོ་གནང་རྗེས། མགོན་པ་མཆོག་ནས་མཐོ་སློབ་ཀྱི་དགེ་ལས་སློབ་མ་རྣམས་དང་ལྷན་དུ་སྤྱི་ཚོགས་བརྟན་ལྷིང་དང། འགྲོ་བ་མིའི་ཤེས་ཡོན་དང་སེམས་ཁམས་བདེ་ཐང་ཆེད་ཚན་རིག་གི་ཕན་ཐོགས་གང་འདྲ་བསྒྲུབ་ཐུབ་མིན་སྐོར་གྱི་འདྲི་བ་དྲི་ལན་གྱི་མཛད་རིམ་བསྐྱངས་གནང་འདུག རྩ་བའི་ཛུ་རིག་ཚན་རིག་མཐོ་སློབ་ཀྱི་ངོས་ནས་སྤྱི་ཚོགས་ས་བརྟན་དང་ཡུན་གནས་ཡོང་རྒྱུ་དེ་གལ་འགངས་ཆེན་པོར་ངོས་འཛིན་གནང་གི་ཡོད་པ་བཞིན། དེ་གའི་སློབ་ཕྲུག་ཁྲོད་ཆེད་ལས་སློབ་སྦྱོང་གཅིག་པོ་མ་ཡིན་པར། གང་ཟག་སྒེར་དང་སྤྱི་ཚོགས་དེ་བཞིན་ཕན་ཚུན་མཉམ་ལས་དང་འབྲེལ་ལམ་གོང་འཕེལ་བཏང་རྒྱུའི་ཐོག་སློབ་སྦྱོང་གང་ཐུབ་སྤྲོད་ཐབས་གནང་གི་ཡོད་པ་དང། ༸གོང་ས་སྐྱབས་མགོན་ཆེན་པོ་མཆོག་ནས་ཀྱང་འགྲོ་བ་མིའི་རིན་ཐང་གོང་འཕེལ་གཏོང་ཐབས་ཐོག་ཚན་རིག་པ་རྣམ་དང་ལྷན་དུ་གྲོས་མོལ་གནང་རྒྱུ་གལ་ཆེན་པོར་བརྩི་གནང་གི་ཡོད་པ་ལྟར། ད་ལན་འགྲོ་བ་མིའི་རིན་ཐང་དང་ཤེས་ཡོན་ཐོག་༸གོང་ས་མཆོག་གིས་ལྷན་དུ་བགྲོ་གླེང་གི་ལས་རིམ་དེ་གོ་སྒྲིག་ཞུས་པ་ཞིག་རེད་འདུག དེ་རིང་༸གོང་ས་མཆོག་ནས་ཛུ་རིག་མཐོ་སློབ་ཏུ་གླེང་མོལ་གྱི་མཛད་རིམ་བསྐྱངས་པ་དང་སྦྲགས། སུད་སི་ནང་དང། ཡང་སྒོས་ཐེངས་འདིའི་ཡུ་རོབ་རྒྱལ་ཁབ་བཞིའི་ནང་གི་མཛད་རིམ་ཁག་ལེགས་པར་གྲུབ་སྟེ། དེ་རིང་ཉིན་རྒྱབ་སུད་སིའི་རྒྱལ་ས་སྦེན་ཕྱོགས་སུ་ཆིབས་ཁ་བསྒྱུར་གནང་སྟེ། སང་ཉིན་སྔ་འདྲོ་རྒྱ་གར་ལ་ཕེབས་ཐོན་གནང་རྒྱུ་རེད་འདུག  

Latest news