༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གཞོན་ནུ་ནང་ཆོས་ཚོགས་པ་ Youth Buddhist Society ཞེས་པས་ཇི་ལྟར་གསོལ་འདེབས་ཞུས་པ་བཞིན། ༸གོང་ས་མཆོག་ནས་དེ་རིང་རྒྱ་གར་བྱང་ཕྱོགས་སན་ཀི་སའམ་ལྷ་བབས་ཀྱི་གནས་སུ་རྒྱ་གར་གྱི་དད་ལྡན་གཙོས་པའི་འཛམ་གླིང་ཡུལ་གྲུ་འདྲ་མིན་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་ཁྱོན་མི་གྲངས་ཁྲི་ཚོ་འགའ་ཞིག་ལ་ཉིན་གྲངས་གསུམ་རིང་བསྩལ་རྒྱུའི་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་པའི་སྤྱོད་པ་ལ་འཇུག་པའི་བཀའ་ཆོས་དེ་དབུ་འཛུགས་མཛད་ཡོད་པ་རེད།དེའང་ཆོས་འབྲེལ་དེའི་ཐོག་མར་མགོན་པོ་༸གང་ཉིད་མཆོག་ནས་ད་རེས་སླར་ཡང་གནས་མཆོག་ཁྱད་པར་ཅན་འདིར་ཆོས་འབྲེལ་གནང་རྒྱུ་བྱུང་བ་དེ་སྐལ་པ་བཟང་པོ་ཞིག་ཡིན་སྟབས། གོ་སྒྲིག་ཞུ་མཁན་ཆོས་གྲོགས་རྣམ་པ་དང་འབྲེལ་ཡོད་ཀུན་ལ་ཐུགས་རྗེ་ཆེ་ཞེས་བཀའ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་སྤྱིར་འདས་པའི་དུས་རབས་འགའི་ནང་ཚན་རིག་དང་འཕྲུལ་ཆས། དེ་དང་བསྟུན་དེ་སྤྱི་ཚོགས་ཀྱི་དགོས་མཁོའི་མཐུན་རྐྱེན་སོགས་ཡར་རྒྱས་ཕྱིན་ཡོད་པ་མ་ཟད། ད་ལྟའི་དུས་རབས་ ༢༡ འདིའི་ནང་ལའང་མུ་མཐུད་ཡར་རྒྱས་ཧ་ལས་པ་ཞིག་ཕྱིན་ཡོད་ཀྱང་། གོ་མཚོན་སྤྱོད་ནས་མི་གསོད་ཁྲག་སྦྱོར་དང་དབང་ཤེད་སོགས་ཀྱི་དུས་རབས་སྔོན་མའི་བག་ཆགས་ངན་པ་དེ་དག་ད་དུང་ཡང་བསྡད་ཡོད་སྟབས། དཀའ་ངལ་དེ་དག་གི་གཞི་རྩ་གཙོ་བོ་དེ་སེམས་འཁྲུག་པའི་ཉོན་མོངས་དབང་གིས་ཡོང་གི་ཡོད་པས་དེང་སྐབས་ཚན་རིགས་པ་ཚོས་ཀྱང་མིའི་ལྷན་རྐྱེས་ཀྱི་རང་བཞིན་དེ་བྱམས་བརྩེ་ལྡན་པ་ཞིག་ཏུ་ངོས་འཛིན་གནང་བ་མ་ཟད། ལྷག་དོན་སེམས་ཅན་གཞན་དང་མི་འདྲ་བར་འགྲོ་བ་མིའི་རིགས་ལ་ཡག་ཉེས་དབྱེ་འབྱེད་ཐུབ་པའི་ཆོས་རབ་ཏུ་རྣམ་པར་འབྱེད་པའི་ནུས་པ་ལྡན་ཡོད་པ་རེད། དེང་གི་དུས་ཚོད་འདིར་ཤིན་ཏུ་དགོས་མཁོ་ཡོད་པའི་བྱམས་བརྩེ་གཞི་རྩར་འཛིན་པའི་ཞི་བདེ་ནི་དེང་སྐབས་འཛམ་གླིང་འདིར་ཉེར་བ་མཁོ་བ་ཞིག་ཡིན་པ་ལྟར། ཇི་ཙམ་གྱིས་སེམས་ལ་བྱམས་བརྩེ་ཡོད་པ་དེ་ཙམ་གྱིས་ཞི་བདེ་ཡོང་ངེས་ཡིན་པ་སོགས་ལམ་སྟོན་བཀྲིན་བསྩལ་ཡོད།༸གོང་ས་མཆོག་གིས་ད་དུང་རིས་སུ་མ་ཆད་པའི་ཆོས་ལུགས་ཚང་མས་མིའི་རིན་ཐང་ཆེ་ཤོས་དེ་བྱམས་བརྩེར་ངོས་འཛིན་གནང་གི་ཡོད་སྟབས། འཇིག་རྟེན་བཀོད་པ་པོ་འདོད་མཁན་དང་མི་འདོད་མཁན་སུ་འདྲ་ཞིག་ཡིན་ནའང་། ལྟ་གྲུབ་འདྲ་མིན་ལ་མ་ལྟོས་པར་ཕ་གཅིག་གི་བུ་ལྟ་བུར་ཚང་མ་མཐུན་འབྲེལ་དམ་ཟབ་གནང་དགོས་པ་དང་། ལྷག་པར་དུ་བྱམས་བརྩེ་གོང་འཕེལ་ཡོང་ཐབས་གནང་གནད་ཡིན་པ་སོགས་ལམ་སྟོན་བསྩལ་སོང་།ཁྱད་པར་དུ་རྒྱ་གར་གྱི་གནའ་རབས་ནས་བྱུང་བའི་  Ahimsa  འམ་འཚེ་བ་མེད་པའི་ལྟ་གྲུབ་དེ་ཆོས་དང་མ་འབྲེལ་བའི་ཐོག་ནས་འགྲེལ་བཤད་གནང་ཐུབ་པའི་གུ་ཡངས་དང་ཡ་རབས་བཟང་པོའི་བསླབ་བྱ་ཡིན་སྟབས། ཆོས་དད་ཡོད་མེད་ལ་མ་ལྟོས་པར་རྒྱ་གར་གྱི་བསླབ་བྱ་དེ་ཤིན་ཏུ་ནས་རྒྱ་ཆེ་བ་དང་དགོས་མཁོ་ལྡན་པ་ཞིག་ཡིན་པ་ལྟར། མགོན་པོ་༸གང་ཉིད་མཆོག་ནས་སྲོལ་རྒྱུན་བཟང་པོ་དེ་དག་ཆོས་དང་མ་འབྲེལ་བའི་ཐོག་ནས་བསྐྱར་གསོ་ཡོང་ཐབས་གནང་གི་ཡོད་སྐོར་བཀའ་བསྩལ་བ་དང་ཆབས་ཅིག རྒྱ་གར་བ་ཚོས་ཀྱང་དེའི་ཐོག་འགན་ཆེ་ཙམ་བཞེས་དགོས་གལ་ཡིན་པར་བཀའ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་ནས་མགོན་པོ་༸གང་ཉིད་མཆོག་ནང་པའི་དགེ་སློང་ཞིག་ཡིན་ཡང་། འཛམ་གླིང་ས་ཕྱོགས་གང་དུ་ཕེབས་ཀྱང་ནང་ཆོས་ཁྱབ་སྤེལ་གནང་རྒྱུའི་ཀུན་སློང་དང་འདུ་ཤེས་རྩ་བ་ནས་མེད་སྐོར་གསལ་བཤད་བཀྲིན་བསྩལ་བ་མ་ཟད། ཆོས་གང་འདྲ་བྱེད་མིན་གང་ཟག་སྒེར་སོ་སོའི་རང་དབང་ཡིན་སྐོར་སོགས་ལམ་སྟོན་རྒྱ་ཆེ་བཀྲིན་བསྩལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཉིན་དགུང་ཆུ་ཚོད་ ༡༢ ཙམ་ལ་འདི་ག་རྒྱ་གར་གྱི་ཡུ་པི་མངའ་སྡེའི་རྒྱ་གར་ཚོས་སང་ཀི་ས་ཞུ་བའི་ལྷ་བབས་ཀྱི་གནས་འདིར་༸ཞབས་སོར་བདེ་བར་འཁོད་གནང་སོང་། རྒྱ་གར་གྱི་ནང་པའི་གཞོན་ནུའི་མཐུན་ཚོགས་ནས་ཇི་ལྟར་གསོལ་འདེབས་ཞུས་པ་བཞིན། མགོན་པོ་༸གང་ཉིད་མཆོག་དེ་རིང་སྔ་དྲོ་བཞུགས་སྒར་ནས་མཁའ་ལམ་ཐོག་རྒྱ་གར་རྒྱལ་ས་ལྡི་ལི་དང་དེ་ནས་ཡང་བསྐྱར་མཁའ་ལམ་ཐོག་ནས་འདི་ག་ལྷ་འབབ་ཀྱི་གནས་ཕྱོགས་སུ་༸ཞབས་སོར་འཁོད་གནང་བ་ཞིག་ཡིན་པ་དང་། གནམ་ཐང་དུ་༸གོང་ས་༸སྐྱབས་མགོན་ཆེན་པོ་མཆོག་ལ་ས་གནས་གྲོས་ཚོགས་ཚོགས་མི་སྐུ་ཞབས་ Mukesh Sharma མཆོག་གི་དབུས་པའི་ཐེངས་འདིའི་གསུང་ཆོས་གསོལ་འདེབས་ཞུ་མཁན་གྱི་ཚོགས་གཙོ་སྐུ་ཞབས་ Ashok Sakya དང་གཞན་ཡང་ས་གནས་ཀྱི་རྫོང་དཔོན་དང་སྐོར་སྲུང་བའི་དཔོན་པོ་བཅས་ནས་སྣེ་ལེན་ཕེབས་བསུ་ཟབ་རྒྱས་ཞུས་ཡོད་པ་མ་ཟད། མགོན་པ་༸གང་ཉིད་མཆོག་ Royal Residency བཞུགས་གནས་སུ་༸ཞབས་སོར་འཁོད་སྐབས་གསུང་ཆོས་དྭང་ཞུ་བ་ཚོར་དམིགས་བསལ་མཇལ་ཁ་དང་། ལྷག་པར་མགོན་པོ་༸གང་ཉིད་མཆོག་ནས་ད་རེས་སླར་ཡང་གནས་མཆོག་འདིར་༸ཞབས་སོར་འཁོད་ཐུབ་པར་ཐུགས་དགྱེས་ཚོར་ཆེན་པོ་བྱུང་བ། རྒྱུན་དུ་མི་ཚེ་དོན་དང་ལྡན་པ་ཞིག་བསྐྱལ་ཐབས་དགོས་པ་དང་། རྒྱ་གར་ནང་ལོ་ངོ་སྟོང་ཕྲག་རིང་ཚེ་མེད་ཞི་བའི་སྤྱོད་པ་སྲ་བརྟན་གནས་ཡོད་སྟབས། འཛམ་གླིང་མི་མང་ཀུན་གྱི་དགོས་མཁོ་དེ་ཚེ་མེད་ཞི་བ་ཡིན་སྟབས། ཆོས་མཁས་ལེན་བྱེད་ཀྱི་ཡོད་མེད་ལ་མ་བལྟོས་པར་ཚེ་མེད་ཞི་བའི་སྤྱོད་པ་རྒྱུན་འཛིན་དང་གོང་འཕེལ་ཡོང་བར་སྙིང་རྗེ་རྩ་ཆེན་པོ་ཡིན་པ་སོགས་ཀྱི་ལམ་སྟོན་ཡང་བཀྲིན་བསྩལ་གནང་སོང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སང་ཉིན་ཕྱི་ཚེས་ ༣ ནས་ ༥ བར་ཉིན་གྲངས་གསུམ་རིང་ནང་པའི་རྒྱ་གར་གཞོན་ནུའི་མཐུན་ཚོགས་ནས་གོ་སྒྲིག་ཞུས་པ་གཞི་བཟུང་འདི་ག་ Sankisa ལྷ་འབབ་ཀྱི་གནས་སུ་ནང་ཆོས་ཀྱི་སྙིང་པོ་ངོ་སྤྲོད་དང་། རྒྱལ་སྲས་ཞི་བ་ལྷའི་མཛད་པའི་བྱང་ཆུབ་སེམས་དཔའི་སྤྱོད་པར་འཇུག་པའི་བཀའ་འཁྲིད་བཀྲིན་བསྩལ་གནང་རྒྱུ་དང་། ཆོས་འབྲེལ་གོ་སྒྲིག་ཚོགས་ཆུང་ངོས་ནས་འགྲེལ་བརྗོད་གནང་པ་གཞི་བཟུང་བྱས་ན་ཉིན་གྲངས་གསུམ་རིང་གི་ཆོས་འབྲེལ་དེར་རྒྱ་གར་གྱི་མངའ་སྡེ་ཁག་འདྲ་མིན་ནས་རྒྱ་གར་བའི་ཆོས་ཞུ་བ་དང་། གཞན་ཡང་བོད་རིགས་ཕྱི་རྒྱལ་བ་སོགས་ཁྱོན་ཆོས་ཞུ་བ་མི་གྲངས་འབུམ་གཅིག་ཙམ་ཡོང་རྒྱུའི་ཚོད་དཔག་གནང་གི་འདུག གཞི་རྩའི་བོད་མི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ Sankisa ལྷ་འབབ་ཀྱི་གནས་སུ་ཆིབས་བསྒྱུར་གནང་བ་་ཐེངས་གསུམ་པ་དེ་ཡིན་པ་དང་། དེ་ཡང་ཕྱི་ལོ་ ༡༩༦༠ ལོར་ཐེངས་དང་པོ་དང་། དེ་ནས་ཕྱི་ལོ་༢༠༡༥ ལོར་སླར་ཡང་ཆིབས་བསྒྱུར་ཐེངས་གཉིས་པ་གནང་སྟེ། སྐབས་དེར་དམིགས་བསལ་གྱི་ས་གནས་ཀྱི་རྒྱ་གར་མང་ཚོགས་རྣམས་ལ་ཆོས་འབྲེལ་སོགས་བཀྲིན་བསྩལ་གནང་མཛད་ཡོད་པ་དང་། གོ་སྒྲིག་ཚོགས་ཆུང་གི་འགྲེལ་བརྗོད་གནང་པ་གཞི་བཟུང་བྱས་ན་ས་གནས་ཀྱི་རྒྱ་གར་བ་ཚོས་སྔོན་མ་དང་བསྡུར་ན་ད་ཐེངས་དམིགས་བསལ་གྱི་དོ་སྣང་ཆེ་བ་གནང་གི་ཡོད་སྐོར་གསུང་གི་འདུག  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་སྲིད་འཛིན་ཟུར་པ་སྐུ་ཞབས་ George W Bush མཆོག་གི་ཡབ་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར་ཐུགས་གསོའི་གསུང་འཕྲིན་ཞིག་བསྩལ་འདུག ཁ་སང་ཟླ་ ༡༡ ཚེས་ ༣༠  ཉིན་ཨ་རིའི་སྲིད་འཛིན་ ༤༣ པ་སྐུ་ཞབས་ George W Bush མཆོག་གི་ཡབ་ཨ་རིའི་སྲིད་འཛིན་ ༤༡ པ་སྐུ་ཞབས་ George H. W. Bush མཆོག་དགུང་གྲངས་ ༩༤ ཐོག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་ཡོད་པ་རེད། དེ་རིང་༸གོང་ས་༸སྐྱབས་མགོན་ཆེན་མཆོག་གིས་ཨ་རིའི་སྲིད་འཛིན་ཟུར་པ་སྐུ་ཞབས་ George W Bush མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་སྩལ་བའི་ནང་མགོན་པོ་༸གང་ཉིད་མཆོག་ནས་སྐུ་ཞབས་དམ་པ་ George H. W. Bush མཆོག་ནི་མགོན་པོ་༸གང་ཉིད་མཆོག་དང་ཆེས་ཐོག་མར་མཇལ་འཕྲད་བྱུང་བའི་ཨ་རིའི་སྲིད་འཛིན་དེ་ཡིན་པ་དང་། ཁོང་གིས་རྒྱུན་དུ་བོད་དོན་དང་བོད་མིའི་ཐོག་ཐུགས་ཚོར་ཆེན་པོས་ཐུགས་ཁུར་གནང་ཁག་རྒྱུན་དུ་ཐུགས་དྲན་གསོ་བཞིན་ཡོད་ཅེས་བཀའ་བསྩལ་འདུག ལྷག་དོན་མགོན་པོ་༸གང་ཉིད་མཆོག་གིས་ཨ་རིའི་སྲིད་འཛིན་ ༤༣ པ་སྐུ་ཞབས་ George W Bush མཆོག་གི་ཡབ་ཨ་རིའི་སྲིད་འཛིན་ ༤༡ པ་སྐུ་ཞབས་ George H. W. Bush མཆོག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་གསན་པར་ཐུགས་ཕམ་ཆེན་པོ་དང་བཅས་འདས་པོ་ཁོང་ལ་ཐུགས་སྨོན་དང་ཤུལ་ལུས་ནང་མི་ཀུན་ལ་ཐུགས་གསོ་མཛད་འདུག དེ་བཞིན་མགོན་པོ་མཆོག་གིས་སྲིད་འཛིན་མཆོག་གི་ཡབ་དམ་པ་ཁོང་ད་བར་དགུང་གྲངས་ ༩༤ བར་བཞུགས་ཐུབ་པ་ནི་ཡིད་སྨོན་བྱ་ཡུལ་ཞིག་དང་། དམ་པ་ཁོང་ནས་སྐུ་འཚོ་བཞུགས་རིང་ཨ་རིའི་མི་སེར་ཆེད་དུ་ཕྱག་ལས་གནང་སྟེ་མི་ཚེ་དོན་སྙིང་ལྡན་པ་ཞིག་བསྐྱལ་ཡོད་པར་བཀའ་བསྩལ་བ་དང་འབྲེལ། ལྷག་དོན་སྐུ་ཞབས་ཁོང་ནས་རང་ཉིད་ཀྱི་ཕྲུ་གུ་ཚོ་ལའང་སྤྱི་ཚོགས་ནང་ཞབས་འདེགས་ཞུ་རྒྱུའི་སྐུལ་ལྕག་གནང་བ་བཅས་ལ་ཆེ་བསྟོད་ཀྱང་མཛད་འདུག གཞི་རྩའི་སྐུ་ཞབས་དམ་པ་ George H. W. Bush མཆོག་ཕྱི་ལོ་ ༡༩༢༤ ལོར་ཨ་རིའི་ Massachusetts མངའ་སྡེའི་ནང་སྐུ་འཁྲུངས་ཡོད་པ་དང་། དགུང་ལོ་ ༦༥ ཐོག་ཨ་རིའི་སྲིད་འཛིན་ ༤༡ པའི་ཐུགས་འགན་བཞེས་ཡོད་པ་མ་ཟད། ཕྱི་ལོ་ ༡༩༩༡ ལོར་དམ་པ་ཁོང་ནས་ཨ་རིའི་ཕོ་བྲང་དཀར་པོའི་ནང་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་ཡོད་པ་རེད།

ཨུ་རུ་སུའི་ཁྱབ་ཁོངས་ Kalmyk སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་ Aleksey Orlov མཆོག་གིས་ཁ་སང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་སྤྱིར་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་འདུགལྷན་རྒྱས་ཀྱི་མཇལ་མོལ་དེའི་ཐོག་ཁལ་མུག་སྤྱི་མཐུན་རྒྱལ་ཁབ་ཀྱི་སྲིད་འཛིན་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་གཙོ་བོ་ད་ལྟའི་ཁལ་མུག་ནང་གི་གནས་སྟངས་སྤྱི་ཡོངས་ངོ་སྤྲོད་དང་འབྲེལ་ཏེ། ཁོང་སྲིད་འཛིན་གནང་བའི་རིང་གི་ལས་དོན་གནང་ཕྱོགས་དང་གྲུབ་འབྲས་ཇི་སོན་སྐོར། ཁོང་སླར་ཁལ་མུག་སྤྱིམཐུན་རྒྱལ་ཁབ་ཀྱི་སྲིད་འཛིན་འོས་མིར་བཞེངས་ནས་མང་ཚོགས་ཆེད་དུ་ཞབས་ཞུ་སྒྲུབ་འདོད་ཡོད་པ་བཅས་སྙན་གསེང་ཞུས་ནས་༸གང་ཉིད་མཆོག་ལ་ཐུགས་སྨོན་སྐྱབས་འཇུག་བཀྲིན་བསྩལ་གནང་ཡོང་བའི་རེ་སྐུལ་ཞུས་འདུགསྐབས་དེར་༸གོང་ས་མཆོག་གིས་བོད་སོག་གཉིས་པོ་ནི་ལོ་ངོ་བརྒྱ་ཕྲག་རིང་ནས་ཆོས་དང་རིག་གཞུང་། ལོ་རྒྱུས་སོགས་ཀྱི་ཐོག་ནས་ཐུན་མིན་གྱི་འབྲེལ་བ་དམ་ཟབ་ཡོད་པ་དང་། ལྷག་པར་དུ་མ་འོངས་པར་ཨུ་རུ་སུའི་ནང་ཁལ་མུག་སྤྱི་མཐུན་རྒྱལ་ཁབ་ཀྱིས་སྣེ་ཁྲིད་ནས་སློབ་གྲྭ་ཁག་ཏུ་ཆོས་ལུསག་ལ་མ་བརྟེན་པའི་བཟང་སྤྱོད་ཀྱི་སློབ་ཚན་ངོ་སྤྲོད་གནང་ཐུབ་ཚེ་ལེགས་པོ་ཡོད་སྐོར་ལམ་སྟོན་བསྩལ་བ་དང་ཆབས་ཅིག་ཏུ་རིང་མིན་ཕྱི་ལོ་ ༢༠༡༩ ཟླ་ ༤ པའི་འཚོགས་འཆར་ཡོད་པའི་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གྱི་རྒྱལ་སྤྱིའི་ལྷན་ཚོགས་ཐོག་ཁལ་མུག་གི་སྐུ་ཚབ་ཆེད་གཏོང་ཐུབ་ན་ལེགས་པོ་ཡོད་པར་ལམ་སྟོན་རྒྱ་ཆེ་བསྩལ་འདུག ཁལ་མུག་སྲིད་འཛིན་མཆོག་ནས་གཞན་ཡང་གནས་ཆུང་སྐུ་རྟེན་མཆོག་མཇལ་འཕྲད་གནང་བ་དང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་མཇལ་མོལ་གནང་སྟེ་སྲིད་འཛིན་མཆོག་གིས་ད་ཆ་ཨུ་རུ་སུ་དང་རྒྱ་ནག་དབར་ཆབ་སྲིད་ཀྱི་འབྲེལ་ལམ་དང་། རུ་སུའི་ངོས་ནས་རྒྱ་གཞུང་ལ་ལྟ་སྟངས་ཇི་ཡོད་སོགས་ཀྱི་སྐོར་འགྲེལ་བརྗོད་གནང་བ་མ་ཟད། ལྷག་པར་དུ་ཁལ་མུག་སྤྱི་མཐུན་རྒྱལ་ཁབ་ཀྱི་མང་ཚོགས་ཀུན་ནས་མ་འོངས་པར་བོད་དོན་ཐོག་སེམས་འཚབ་དང་གདུང་སེམས་མཉམ་བསྐྱེད་ཀྱི་རྒྱབ་སྐྱོར་མུ་མཐུད་གནང་རྒྱུའི་ཁས་ལེན་གནང་བར་སྲིད་སྐྱོང་མཆོག་གིས་ཐུགས་རྗེ་ཆེ་ཞུས་འདུག

དེ་རིང་ཟླ་ ༡༡ ཚེས་ ༢༩ ཉིན་སྔ་ཐོག་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་སྤྱིའི་ཁོར་སྲུང་སྐྱོབ་དང་རྒྱལ་སྤྱིའི་ཐོག་ཞི་བདེ་སྐྲུན་ཐབས་ཐད་ཕྱག་ལས་གནང་མཁན་གྱི་ཚོགས་པ་ Better We Better World ཡི་ཚོགས་མི་ ༥༠ ཙམ་ལ་དམིགས་བསལ་གྱི་མཇལ་ཁ་དང་བཀའ་སློབ་བཀའ་དྲིན་བསྩལ་འདུག སྐབས་དེར་ཚོགས་པ་དེས་༸གོང་ས་༸སྐྱབས་མགོན་ཆེན་པོ་མཆོག་ལ་ཚོགས་པའི་ལས་དོན་གནང་སྒོ་ཁག་སྙན་གསེང་ཞུས་ཡོད་པ་དང་། རྒྱུན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་སྙིང་རྗེ་བསྐྱར་གསོ་གནང་དགོས་གལ་ཐོག་བཀའ་སློབ་ཕེབས་དོན་བཞིན་བཀའ་སློབ་བསྩལ་བ་རྣམས་ཕྱོགས་སྒྲིག་ཞུས་པའི་དཔེ་དེབ་ཞིག་མགོན་པོ་༸གང་ཉིད་མཆོག་ལ་ཕུལ་ཡོད་པ་མ་ཟད། དེབ་དེའི་ནང་བཀོད་པའི་བཀའ་སློབ་དེ་དག་ལག་བསྟར་གནང་ཕྱོགས་སོགས་ཀྱི་ཐད་ལམ་སྟོན་ཞུས་འདུགགཞི་རྩའི་ Better We Better World ཞེས་པའི་ཚོགས་པ་དེའི་ཚོགས་མི་རྣམས་ཆེད་མངགས་ཡུ་རོབ་རྒྱལ་ཁབ་ཕ་རན་སི་ནས་བཞུགས་སྒར་དྷ་རྨ་ས་ལར་ཕེབས་ཏེ་ཚེས་ ༢༤ ཉིན་ནས་དབུ་འཛུགས་ཀྱིས་སང་རེས་གཟའ་པ་སངས་བར་བཞུགས་སྒར་དུ་རྟེན་གཞི་བྱས་པའི་ཆོས་ནོར་གསོལ་མགྲོན་ཁང་དུ་བཀའ་ཁྲི་ཟུར་པ་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་དབུ་བཞུགས་ཐོག་ཚད་མེད་བཞིའི་ཐོག་ཟབ་ཁྲིད་དང་བགྲོ་གླེང་གནང་བཞིན་ཡོད་པ་རེད། དེ་རིང་ཚོགས་པ་དེའི་ཚོགས་མི་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་གི་གསེར་ཞལ་མཇལ་ཞུའི་སྐབས་ལྷན་བཅར་ཡོད་པའི་བཀའ་ཁྲི་ཟུར་པ་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་གིས་༸གང་ཉིད་མཆོག་གི་མཇལ་ཁ་ཞུ་དོན་དང་ཚོགས་པ་དེའི་དགོས་དམིགས་གང་ཡིན་སོགས་ངོ་སྤྲོད་གནང་སོང་། དེ་རིང་མཇལ་ཁ་གྲུབ་མཚམས་སུ་ཚོགས་པ་དེའི་ལས་འཆར་འགན་འཛིན་སྐུ་ཞབས་ Khoa  Nguyen ལགས་སུ་བཞུགས་སྒར་དུ་ཕེབས་དོན་ཇི་ཡིན་དང་འབྲེལ་བཀའ་འདྲི་ཁག་གཅིག་ཞུས་པར་ང་ཚོ་ཕ་རན་སི་ནས་ཡོང་བའི་ཚོགས་པ་འདིའི་ཚོགས་མིའི་ཁོངས་སུ་བཅོས་སྒྱུར་བཏང་ཐུབ་མཁན་དང་། འཕྲུལ་རིགས་ཆེད་ལས་པ་སོགས་མང་པོ་ཡོད། ང་ཚོ་ད་རེས་འདིར་ཡོང་དོན་གཙོ་བོ་ནི་ང་ཚོས་མ་འོངས་ཕྱི་ལོ་ ༢༠༢༠ ཐམ་པའི་ལོར་རྒྱ་གར་ནང་ད་བར་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་དང་། ཚན་རིག་མཁས་པ། དེ་བཞིན་བསམ་བློ་བ་ཁག་གཅིག་གདན་ཞུ་གནང་སྟེ་ཞི་བདེ་དང་འགན་ཁུར་ཞེས་པའི་ཐོག་ལྷན་ཚོགས་ཤིག་གོ་སྒྲིག་ཞུ་རྒྱུའི་སྟ་གོན་སླད་ཡོང་བ་ཡིན་ཞེས་གསུངས་སོང་།ད་དུང་ཁོང་གིས་གོ་སྒྲིག་དེ་ལྟར་གནང་འཆར་ཡོད་པའི་ཞི་བདེ་དང་འགན་ཁུར་ཞེས་པའི་ལྷན་ཚོགས་དེའི་ཆེད་དུ་ད་བར་ལོ་ངོ་ཉི་ཤུག་ལྷག་འབད་བརྩོན་གནང་སྐོར་གསུངས་ཡོད། ཐེངས་འདིའི་༸གོང་ས་མཆོག་གི་མཇལ་ཁ་དང་འབྲེལ་མཇལ་ཁ་འདི་གཞན་དང་མི་འདྲ་བར་དམིགས་བསལ་ཅན་ཞིག་བྱུང་། ༸གོང་ས་མཆོག་ནི་ངའི་དགེ་རྒན་ཡག་ཤོས་ཤིག་ལ་ངོས་འཛིན་ཞུ་བཞིན་ཡོད། ལྷག་པར་དུ་༸གོང་ས་མཆོག་གི་ཐུགས་བག་ཡངས་པའི་དགོངས་བཞེས་དག་ལ་ཧང་སང་དགོས་པའི་ཆེས་དཔོག་དཀའ་བའི་ཁྱད་ཆོས་ཤིག་འདུག མགོན་པོ་མཆོག་ནས་གནད་དོན་མང་པོའི་ཐོག་སྐུ་རྩེད་དང་འབྲེལ་ནས་བཀའ་སློབ་མང་པོ་གནང་སོང་། ད་རེས་ཀྱི་མཇལ་ཁ་འདི་ཤིན་ཏུ་ནས་ཡག་པོ་བྱུང་སོང་། ང་ཚོ་ཚང་མ་ཕྱིར་ལོག་སྐབས་མུ་མཐུད་ནས་མཉམ་རུབ་ཐོག་ཕྱག་ལས་གནང་དགོས་པའི་སྤྲོ་སེམས་དང་སེམས་འགུལ་ཆེན་པོ་ཐེབས་སོང་།གཞན་ཡང་དེ་རིང་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་པ་དེའི་ཚོགས་མི་རྣམས་ལ་མཇལ་ཁ་དང་བཀའ་སློབ་མ་བསྩལ་བའི་གོང་དུ་ཕྱི་ནང་གི་དད་ལྡན་མང་དག་ཅིག་ལ་མཇལ་ཁ་གནང་ཡོད་པ་དང་། དེའི་ཁོངས་སུ་ Australia དང་། New Zealand ཁུལ་གྱི་ནང་པའི་ཆོས་ཚོགས་ནས་ཕེབས་པའི་མི་མང་ ༤༠ ལྷག་ལ་མཇལ་ཁ་བསྩལ་ཡོད་པ་དང་སྐབས་དེར་༸གང་ཉིད་མཆོག་གིས་ཆོས་ལུགས་ཚང་མ་བྱམས་བརྩེ་ཉམས་ལེན་གནང་མཁན་གཅིག་གྱུར་ཡིན་པ་དང་། དུས་རྒྱུན་དུ་ང་ཚོས་ཕྱི་གཟུགས་པོའི་འཕྲོད་བསྟེན་ལ་དོན་སྣང་བྱེད་མུས་ལྟར་ནང་སེམས་ཀྱི་འཕྲོད་བསྟེན་ཐོག་དེ་མཚུངས་དོ་སྣང་བྱེད་དགོས་གལ་ཡིན་པ་སོགས་ལམ་སྟོན་མཛད་འདུག  

དེ་རིང་ཟླ་ ༡༡ ཚེས་ ༢༩ ཉིན་བོད་ཀྱི་རྒྱལ་ས་ལྷ་ས་ཁུལ་ནས་བོད་མི་ཞིག་གིས་འདི་གར་དྲྭ་ལམ་བརྒྱུད་གནས་ཚུལ་མཁོ་སྤྲོད་གནང་དོན། དེང་སྐབས་བོད་ནང་རྒྱ་གཞུང་གིས་སྔར་ལས་ལྷག་པའི་དམ་དྲག་དང་བོད་ཀྱི་རྒྱལ་ས་ལྷ་སའི་ཁུལ་དུ་རྒྱ་ནག་གཞུང་གིས་རྫོགས་རྒྱུ་དང་ཚར་རྒྱུ་མེད་པའི་རྒྱལ་གཅེས་རིང་ལུགས་ཀྱི་ཆབ་སྲིད་སློབ་གསོའི་ཚོགས་འདུ་ཡང་ཡང་ཚོགས་ཐོག་མང་ཚོགས་ལ་སུན་གཙེར་ཚད་མེད་བཟོ་བཞིན་ཡོད་མ་ཟད། གལ་ཏེ་ཚོགས་འདུར་མ་བཅར་ཚེ་ཆད་པ་གཅོད་པ་དང་ཡང་ན་མི་དེར་ཆབ་སྲིད་ཀྱི་ཉེས་པ་ཕོག་ཉེན་ཡོད་སྐོར་གསུངས་སོང་བ་དང་ཆབས་ཅིག ཉེ་ལམ་ཟླ་བ་འདིའི་ཟླ་དཀྱིལ་དུའང་ལྷ་སའི་སྟོད་ལུང་བདེན་ཆེན་རྫོང་བདེ་ཆེན་གྲོང་ལ་ས་ཁུལ་དེའི་བོད་རིགས་གུང་ཁྲན་ཏང་མི་རྣམས་བཙན་དབང་གིས་བསྐོངས་ནས་ཁ་བྲལ་རིང་ལུགས་པའི་གནོད་འཚེ་ཆེ་ཆུང་གང་ཡང་ལྷག་མི་ཆོག་པའི་ནན་བཤད་བྱས་པ་མ་ཟད་སྣང་ཆེན་བཞི་དང་དགའ་ཞེན་བཞི་ཟེར་བ་སོགས་ཀྱི་དོན་ཚན་ཁག་གཅིག་གི་ཐོག་སློབ་སྦྱོང་བྱེད་བཅུག་འདུགསྣང་ཆེན་བཞི་ཟེར་བ་ནི་ཏང་གི་བཀའ་དྲིན་ལ་སྣང་ཆེན་གྱིས་སྲོག་ཤིང་ལ་དགའ་ཞེན་དང་མཐུན་སྒྲིལ་ལ་སྣང་ཆེན་གྱིས་མེས་རྒྱལ་ལ་དགའ་ཞེན། ལེགས་སྐྱེས་ལ་སྣང་ཆེན་གྱི་ཁྱིམ་གཞིས་ལ་དགའ་ཞེན། ཤེས་དཔལ་ལ་སྣང་ཆེན་གྱིས་འཚོ་བར་དགའ་ཞེན་བཅས་ཡིན་པ་དང་། གཞན་ཡང་ཡོད་པ་ལྔ་དང་ཡག་པ་ལྔ་ཟེར་བ་སོགས་ཀྱི་སློབ་གསོ་སྤེལ་འདུག་པ་མ་ཟད་ཏང་མི་ཁྱོད་ཚོས་སྔོན་ཐོན་གྱི་ནུས་པ་འདོན་དགོས་པ་སོགས་ཀྱི་གཏམ་བཤད་བྱས་འདུགགནས་ཚུལ་ངོ་སྤྲོད་པས་མུ་མཐུད་དུ་བརྗོད་དོན་ཉེ་ལམ་རྒྱ་ནག་གཞུང་གིས་ལྷ་ས་གྲོང་ཁྱེར་ལྷུན་གྲུབ་རྫོང་འཕྲོད་འཆར་ལས་ཁུངས་དང་རྫོང་རིམས་འགོག་ལྟེ་གནས། རྫོང་ཆོས་དོན་ལས་ཁུངས། བོད་རང་སྐྱོང་ལྗོངས་ཨེ་འགོག་དང་བླངས་ཚོགས་ཆུང་བཅས་མཉམ་འབྲེལ་ཐོག་ལྷུན་གྲུབ་རྫོང་རྒྱལ་དགོན་པ་དང་སྣ་དཀར་དགོན་བཅས་ལ་བསྐྱོད་ནས་སྔོན་ཐོན་གྱི་གྲྭ་བཙུན་རྣམ་དག་བྱེད་པར་བརྩོན་དགོས་ཞེས་པའི་མིང་བྱང་འོག་གྲྭ་བཙུན་རྣམས་ལ་རེག་དུག་ནད་གཞི་སྔོན་འགོག་གི་དྲིལ་བསྒྲགས་ལས་དོན་སྤེལ་ཡོད་པའི་འབྲེལ་ཡོད་འདྲ་པར་དང་གནས་ཚུལ་ཡང་མཁོ་སྤྲོད་གནང་ཡོད་ཅིང་། གྲྭ་བཙུན་ཚོར་དེ་ལྟར་གནང་བ་དེ་ཕྱོགས་གཅིག་ནས་ཡག་པོ་ཡིན་ཀྱང་ཕྱོགས་གཞན་ནས་དམའ་འབེབ་དང་ཁྱད་གསོད་ཡིན་པའི་བསམ་ཚུལ་བརྗོད་མཁན་ཡང་མི་ཉུང་བ་ཞིག་བྱུང་ཡོད་པར་འགྲེལ་བརྗོད་དང་ཆབས་ཅིག དེང་སྐབས་བོད་ནང་དམ་དྲག་ཇི་ཆེ་དང་མང་ཚོགས་ཀྱི་འཚོ་བར་ཡང་སྔར་དང་མི་འདྲ་བའི་དཀའ་ངལ་ཆེ་རུ་འགྲོ་བཞིན་འདུག་ཅེས་གསུངས་སོང་།གནས་ཚུལ་མཁོ་སྤྲོད་གནང་མཁན་གྱིས་འདི་གར་གཞིས་ལུས་བོད་མི་ཚོས་དམ་དྲག་དང་དཀའ་སྡུག་འོག་དུས་གཏན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དྲན་བཞིན་ཡོད་པ་དང་༸གང་ཉིད་མཆོག་གང་མགྱོགས་ཕོ་བྲང་པོ་ཏ་ལར་༸ཞབས་སོར་འཁོད་ཐུབ་པའི་ཆེད་དུས་གཏན་དུ་གསོལ་འདེབས་སྨོན་ལམ་ཞུ་བཞིན་ཡོད་སྐོར་གྱི་རྩོམ་ཡིག་གནང་སོང་། སྐྱབས་མགོན་དྲན་པའི་སྨྲེ་སྔགས། སྙིགས་དུས་ཀྱི་འགྲོ་བར་ལམ་སྟོན་གྱི་ཆོས་མེ་སྤར་མཁན་སྐྱབས་མགོན་ལགས། དྭ་ཕྲུག་ཁྲི་མ་འབུམ་གྱིས་རེ་བལྟོས་དང་འདུན་པ་བཅང་བའི་སེམས་ཀྱི་སྐྱབས་མགོན་ལགས། ངས་ཁྱེད་ལ་སྨྲེ་སྔགས་སེམས་ཀྱི་མཆོད་པ་འབུལ། ཞོགས་པ་ལྷ་བསང་གཏོང་དུས་རླུང་རྟ་དགུང་ལ་མཆོད་ནས། ཁྱེད་ཀྱི་སྐུ་ཚེ་དགོངས་བཞེད་ཇི་བཞིན་བརྒྱ་དང་བཅུ་གསུམ་བཞུགས་པར་སྨོན། ཀི་བསྭོ་ཡིས་བསྟོད་པའི་དུ་སྤྲིན་ཁྲོད་དུ་གསོལ་འདེབས་དང་སྨོན་ལམ་མང་པོ་རྒྱབ་ཡོད། ཡུན་རིང་དུ་བྲལ་བའི་རྒྱང་རིང་གི་ཡབ་ཆེན་ལགས། ཁྱེད་རང་སྐུ་ཁམས་བདེ་ལགས་སམ། རང་རྒྱལ་གྱི་དྲོད་འཁོལ་སྟོངས་བའི་གཞིས་ལུས་ཕུ་ནུ་མིང་སྲིང་ཚོས་སེམས་ཀྱི་བླ་མ་སྒུག་ཡོད། ཁྱེད་ནམ་ཡང་མ་བརྗེད་པར་ངང་སྒུག་བྱས་ཡོད། མིག་ཟུང་མཆི་མས་བརླན་ནས་སྒུག་ཡོད། ལག་ཟུང་སྙིང་ཁར་བཀོད་དེ་སྒུག་ཡོད། སྐུ་ཚེ་མི་འགྱུར་རི་རྒྱལ་ལྷུན་པོ་བཞིན་བརྟན་ཅིང་། ཐུགས་ཀྱི་བཞེད་དོན་ཡོད་དོ་ཅོག་འགྲུབ་ནས་མྱུར་དུ་རི་བོ་གྲུ་འཛིན་གྱི་ཞིང་འདིར་༸ཞབས་སོར་འཁོད་རྒྱུའི་སྨོན་ལམ་ཁྲི་ཕྲག་གིས་བསུ། རེ་སྒུག་ནས་གཞིས་ལུས་བོད་མི་ཡོངས་ཀྱི་ཚབ་བྱས་ཏེ་ཕུལ།།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་ནང་ཉིན་གྲངས་བཅུ་ཙམ་རིང་གི་ཆོས་འབྲེལ་དང་བཀའ་སློབ་སོགས་ཀྱི་མཛད་འཕྲིན་ཁག་ལེགས་པར་གྲུབ་ཏེ་ཁ་སང་བཞུགས་སྒར་༸རྒྱལ་བའི་ཕོ་བྲང་དུ་༸ཞབས་སོར་བདེ་བར་འཁོད་སོང་། ཁ་སང་ཉིན་རྒྱབ་ཚོུད་ ༡ ཡོལ་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ས་ལྡི་ལི་ནས་མཁའ་ལམ་བརྒྱུད་བཞུགས་སྒར་ཉེ་འདབས་སུ་ཡོད་པའི་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་སྐབས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་གིས་གཙོས་པའི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་གནད་ཡོད་མི་སྣ་སོགས་ཆེད་བཅར་ཀྱིས་ཕེབས་བསུ་གཟབ་རྒྱས་ཞུས་ཡོད་པ་རེད།སྐབས་དེར་མགོན་པོ་༸གང་ཉིད་མཆོག་གིས་གསར་འགོད་པའི་བཀའ་འདྲིར་བཀའ་ལན་སྩལ་བར་ཉེ་ལམ་དཔལ་གསང་ཆེན་སྔ་འགྱུར་རྙིང་མའི་ཆོས་བརྒྱུད་ཀྱི་དབུ་འཛིན་ཁྲི་རབས་བདུན་པ་མཆོག་སྐུ་ཞི་བར་གཤེགས་པའི་གནས་ཚུལ་བྱུང་བར་བརྟེན་ད་ཆ་བོད་ཀྱི་ཆོས་བརྒྱུད་ཁག་གི་ཚོགས་ཆེན་འཚོགས་ན་འཚམ་པོ་མེད་པས་ཕྱིར་འགྱངས་གནང་བ་རེད་ཅེས་བཀའ་བསྩལ་འདུག བཞུགས་སྒར་དུ་ཆིབས་བསྒྱུར་མཛད་སྐབས་ཕེབས་ལམ་གྱི་གཡས་གཡོན་དུ་ས་གནས་བོད་མི་ཚོས་ལག་ཏུ་དཀར་གཙང་གི་མཇལ་དར་དང་དུག་སྤོས། ཞུགས་ཏོག་བཅས་བསྣམས་ཏེ་དགའ་དད་སྤྲོ་གསུམ་འཁོད་ཐོག་༸གང་ཉིད་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད།གཞི་རྩའི་མགོན་པོ་༸གང་ཉིད་མཆོག་ཉི་ཧོང་ཁུལ་དུ་ཟླ་ ༡༡ ཚེས་ ༡༣ ནས་དབུ་འཛུགས་ཀྱིས་ཚེས་ ༢༣ བར་ཁྱོན་ཉིན་གྲངས་བཅུ་ཙམ་གྱི་རིང་བཞུགས་ཞག་མཛད་འཕྲིན་བསྐྱངས་པའི་ཁྲོད་ཚེས་ ༡༤ ནས་ ༡༦ བར་ཡོ་ཁོ་ཧཱ་མ་གྲོང་ཁྱེར་དུ་བཀའ་ཆོས་དང་བཀའ་དབང་། དེ་བཞིན་ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ཐོག་དབུ་བཞུགས་མཛད་པ་མ་ཟད། ཚེས་ ༡༧ ནས་ ༡༨ བར་ Tokyo ནང་ཡོད་པའི་ཤེས་རབ་སྐྱེད་ཚལ་གླིང་སློབ་གཉེར་ཁང་དང་སྐུ་ཚབ་དོན་གཅོད་ཁང་། ཉི་ཧོང་བོད་ཁང་དང་སོག་པོའི་རིག་གཞུང་ལྟེ་གནས་ཁང་བཅས་ནས་༸གང་ཉིད་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་ཊོག་ཡོ་མི་མང་ ༢༠༠༠ ཙམ་ལ་ང་ཚོ་ཁྱིམ་ཚང་གཅིག་ཅེས་པའི་བརྗོད་གཞིའི་ཐོག་བཀའ་སློབ་བསྩལ་བ་དང་ཚེས་ ༡༨ ཉིན་ཤེས་རབ་སྐྱེད་ཚལ་གླིང་སློབ་གཉེར་ཁང་གི་ཚོགས་ཁང་གསར་པ་དབུ་འབྱེད་རབ་གནས་མཛད་པ་དང་འབྲེལ་ཏེ་དགེ་བཤེས་གླང་རི་ཐར་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་མཛད་ཡོད་པ་རེད།དེ་བཞིན་ཚེས་ ༡༩ ནས་  ༢༢ ཉི་ཧོང་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་ཚོགས་ཆུང་དང་མཇལ་འཕྲད་དང་ཁུལ་དེར་གནས་བཞུགས་བོད་མི་དང་འབྲུག་པ། ཧི་མཱ་ལ་ཡའི་མི་རིགས་ཁག་ཅིག་ལ་མཇལ་ཁ་བསྩལ་བ་དང་འབྲེལ་བཀའ་འགྱུར་བསྟན་འགྱུར་ཐད་བསླབ་པ་སློབ་གཉེར་གནང་དགོས་གལ་ཡིན་པར་ལམ་སྟོན་མཛད་པ་མ་ཟད་ཉི་ཧོང་གི་ལྷོ་ཕྱོགས་སུ་དེ་སྔ་ས་འགུལ་འོག་འདས་གྲོངས་སུ་ཕྱིན་པ་རྣམས་ཀྱི་སླད་མཆོད་འབུལ་སྨོན་ལམ་ཐོག་དབུ་བཞུགས་མཛད་ཡོད་པ་རེད།༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་ལ་གཞིགས་ན། རིན་མིན་ཕྱི་ཟླ་ ༡༢ ཚེས་ ༣ ནས་ ༥ བར་རྒྱ་གར་ཨུ་ཏར་མངའ་སྡེའི་སན་ཀི་སའམ་ལྷ་བབས་ཀྱི་གནས་སུ་རྒྱ་གར་གཞོན་ནུ་ནང་ཆོས་ཚོགས་པས་ཇི་ལྟར་གསོལ་འདེབས་ཞུས་དོན་ལྟར། མགོན་པོ་༸གང་ཉིད་མཆོག་གིས་རྒྱལ་སྲས་ཆནེ་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་གསུང་ཆོས་བཀྲིན་བསྩལ་རྒྱུ་དང་། དེ་རྗེས་རྒྱལ་ས་ལྡི་ལི་དང་མུམ་བའེ་ནང་ཆིབས་བསྒྱུར་གྱིས་གཙུག་ལག་སློབ་གཉེར་ཁང་ཁག་གཅིག་ནང་བཀའ་སློབ་བཀྲིན་བསྩལ་རྒྱུ་མ་ཟད། ཕྱི་ཟླ་ ༡༢ ཚེས་ ༡༦ ཉིན་༸གོང་ས་མཆོག་མུམ་བའེ་ནས་མཁའ་ལམ་བརྒྱུད་གནས་མཆོག་རྡོ་རྗེ་གནད་དུ་༸ཞབས་སོར་བདེ་བར་འཁོད་ཀྱི་ཡོད་པ་དང་འབྲེལ་རིས་མེད་དྲང་ངེས་མཁས་པའི་བགྲོ་གླེང་དང་དེ་བཞིན་རྒྱལ་སྤྱིའི་བཀའ་སྡེ་སྣོད་གསུམ་གྱི་བགྲོ་གླེང་ཐོག་དབུ་བཞུགས་མཛད་རྒྱུ་མ་ཟད། ཉེ་བརྒྱུད་འཇམ་དབྱངས་ཆོས་སྐོར་དང་ལག་ལེན་སོ་བདུན་མ། གཞན་ཡང་དེ་སྔ་ཕྱི་ལོ་ ༢༠༡༥ ལོར་གདན་ས་བཀྲིས་ལྷུན་པོར་གནང་བའི་ཚད་མ་རྣམ་འགྲེལ་གྱི་བཀའ་ཁྲིད་འཕྲོ་སྐྱོང་བཀྲིན་སྩལ་རྒྱུ་བཅས་ཐུགས་གཏན་ཁེལ་ཡོད་པ་རེད། དེ་རྗེས་བོད་མིའི་སྒྲིག་འཛུགས་ཀྱིས་གཙོས་པའི་ཚོགས་སྡེ་ཁག་གཅིག་ནས་མགོན་པོ་༸གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཉི་ཧོང་ནང་ཉིན་གྲངས་བཅུ་ལྷག་གི་མཛད་འཕྲིན་ཁག་ལེགས་གྲུབ་མཛད་ནས་དེ་རིང་སྔ་ཐོག་ཁུལ་དེའི་ཚོུད་ ༩.༤༥ ཐོག་ཉི་ཧོང་གི་ལྷོ་ནུབ་གྲོང་ཁྱེར་ Fukuoka ནས་མཁའ་ལམ་བརྒྱུད་རྒྱ་གར་ཕྱོགས་སུ་ཆིབས་ཞལ་བསྒྱུར་གནང་འདུག རྩ་བའི་༸གོང་ས་སྐྱབས་མགོན་ཆེན་པོ་མཆོག་ཟླ་བ་འདིའི་ཚེས་ ༡༢ ཉིན་ཉི་ཧོང་དུ་༸ཞབས་དོར་བདེ་བར་འཁོད་པ་དང་འབྲེལ། ཚེས་ ༡༤ ནས་དབུ་འཛུགས་ཀྱིས་དེ་རིང་བར་ཁྱོན་ཉིན་གྲངས་བཅུ་ལྷག་གི་རིང་ཁུལ་དེའི་ Yokohama དང་ Tokyo གཙོས་པའི་ Chiba ས་གནས་སུ་དད་ལྡན་མང་ཚོགས་ལ་བཀའ་ཆོས་དང་གཞོན་སྐྱེས་ཚོར་བཀའ་སློབ། ཆཱི་སྦ་གྲོང་ཁྱེར་དུ་ཡོད་པའི་ཤེས་རབ་སྐྱིད་ཚལ་གླིང་སློབ་གཉེར་ཁང་གི་ཚོགས་ཁང་གསར་པ་དབུ་འབྱེད་རབ་གནས་མཛད་པ་དང་ཉི་ཧོང་གི་རྒྱལ་ཡོངས་གཟུགས་མཐོང་རླུང་འཕྲིན་དང་ཁུལ་དེའི་ནང་གི་ Think Tank འམ་བསམ་བློ་བའི་བཅར་འདྲི་ཁག་ཅིག་དང་ལེན་མཛད་ཡོད་པ་མ་ཟད། ཁུལ་དེའི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་ཚོགས་ཆུང་དང་མཇལ་འཕྲད་དང་། ནང་པའི་ཚན་རིག་དང་དེང་རབས་ཚན་རིག་དབར་གྱི་བགྲོ་གླེང་ཐོག་དབུ་བཞུགས། དེ་བཞིན་ཉི་ཧོང་ནང་གནས་བཞུགས་བོད་མི་དང་འབྲུག་པ། དེ་བཞིན་ཧི་མཱ་ལ་ཡའི་མི་རིགས་ཁག་གཅིག་ལ་མཇལ་ཁ་དང་བཀའ་སློབ་ལམ་སྟོན་མཛད་པ་དང་ལྷག་དོན་༸གོང་ས་མཆོག་ནས་ཁ་སང་ཉི་ཧོང་གི་ལྷོ་ཕྱོགས་སུ་དེ་སྔ་ས་འགུལ་འོག་འདས་གྲོངས་སུ་ཕྱིན་པ་རྣམས་ཀྱི་སླད་འཆོད་འབུལ་སྨན་ལམ་ཐོག་དབུ་བཞུགས་མཛད་པ་སོགས་ཀྱི་མཛད་འཆར་དུ་མ་བསྐྱངས་གནང་མཛད་ཡོད་པ་རེད། མཛད་འཆར་ལྟར་ན། ༸གོང་ས་མཆོག་དེ་རིང་ཉི་ཧོང་གི་གྲོང་ཁྱེར་ Fukuoka  ནས་སིངྒ་པུར་བརྒྱུད་རྒྱལ་ས་ལྡི་ལིར་ཆིབས་བསྒྱུར་མཛད་དེ་སང་ཉིན་ཉིན་རྒྱབ་ལྡི་ལིར་༸ཞབས་སོར་འཁོད་གནང་གི་འདུག་པ་དང་ཁུལ་དེར་ཉིན་གཅིག་བཞུགས་གཞག་མཛད་དེ་ཚེས་ ༢༥ ཉིན་བཞུགས་སྒར་རྡ་རམ་ས་ལར་ཆིབས་ཐོན་གནང་གི་འདུག

དེ་རིང་ཕྱི་ཟླ་ ༡༡ ཚེས་ ༢༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་ཞུགས་ཐོག་དེ་སྔ་ཉི་ཧོང་གི་ཁུལ་དུ་འབྱུང་བའི་གོད་ཆག་ཁྲོད་འདས་གྲོངས་སུ་ཕྱིན་པ་རྣམས་ཀྱི་སླད་དུ་མཆོད་འབུལ་སྨོན་ལམ་ཚོགས་འདུག ཉི་ཧོང་གྱི་ལྷོ་ངོས་སུ་ཡོད་པའི་ Fukuoka ཞེས་པའི་རྫོང་དུ་རྟེན་གཞི་བྱས་པའི་མ་དགོན་ Tochoji ནང་༸གོང་ས་མཆོག་དབུ་ཞུགས་ཀྱིས་གཙོས་པའི་སེར་སྐྱ་མང་ཚོགས་ ༡༥༠༠ ལྷག་འདུ་འཛོམས་གནང་ཐོག་དེ་སྔ་ལོ་གཉིས་ཀྱི་གོང་དུ་ཉི་ཧོང་ Kumanmoto ས་ཁུལ་དུ་ས་འགུལ་ཤུགས་ཆེའི་དོན་རྐྱེན་འོག་མི་རྒྱུ་གཉིས་ལ་གནོད་འཚེ་ཆེན་པོ་བྱུང་ཡོད་པ་མ་ཟད། འདི་ལོར་ཉི་ཧོང་གི་ས་གནས་མང་དག་ཞིག་ལ་དྲག་ཆར་རླུང་འཚུབ་དང་ཆུ་ལོག་སོགས་ཀྱི་དོན་རྐྱེན་འོག་གནོད་འཚེ་ཚབས་ཆེ་བྱུང་བ་རྣམས་ཀྱི་ཆེད་དུ་བདེ་སྨོན་དང་ཤེས་རབ་སྙིང་པོ་གསུང་འདོན་མཛད་པ་དང་། ཉི་ཧོང་པ་ཚོས་ཀྱང་མ་ཎི་དང་ཉི་ཧོང་གི་སྐད་དུ་ཤེས་སྙིང་པོ་གསུང་འདོན་གནང་ཐོག་མཆོད་འབུལ་སྨོན་ལམ་རྒྱས་པ་ཞིག་ཚོགས་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་ནས་རང་འབྱུང་གི་གོད་ཆག་ཕོག་པའི་ནང་མི་ཚོར་ཐུགས་གསོ་མཛད་པ་དང་ཆབས་ཅིག་ཏུ་ཉི་ཧོང་དེ་བཞིན་ནང་པའི་ལུང་པ་ཞིག་ཡིན་པ་དང་ཤེས་རབ་སྙིང་པོ་གསུང་འདོན་གནང་མཁན་ཤ་སྟག་ཡིན་སྟབས། ཤེས་རབ་སྙིང་པོ་ཁ་ནས་འདོན་པ་ཙམ་མ་ཡིན་པར་དེའི་དོན་རྟོགས་པའི་ཐོག་ནས་གསུང་འདོན་གནང་དགོས་གལ་ཡིན་པར་ལམ་སྟོན་བཀའ་སློབ་བསྩལ་འདུག གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་ཟླ་བ་འདིའི་ཚེས་ ༡༤ ཉིན་ཉི་ཧོང་དུ་༸ཞབས་སོར་བདེ་བར་འཁོད་པ་དང་འབྲེལ། ཚེས་ ༡༧ ནས་དབུ་འཛུགས་ཀྱིས་ཡུལ་དེའི་མང་ཚོགས་ལ་ཆོས་འབྲེལ་དང་། བཀའ་སློབ། གྲོས་ཚོགས་འཐུས་མི་ཁག་གཅིག་མཇལ་འཕྲད་སོགས་ཀྱི་མཛད་འཆར་དུ་མ་ཞིག་བསྐྱངས་ཡོད་པ་དང། སང་ཉིན་༸གོང་ས་མཆོག་ཉི་ཧོང་ནས་རྒྱ་གར་དུ་ཆིབས་ཞལ་བསྒྱུར་གནང་རྒྱུ་ཡིན་པ་རེད།