Tibetan Royal Year of 2151 | Year of the Wood Dragon

༸གོང་ས་མཆོག

༸གོང་ས་མཆོག་བཞུགས་སྒར་དུ་༸ཞབས་སོར་བདེ་བར་འཁོད་པ།

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་མངའ་སྡེ་ཆེ་ཁག་བྷི་ཧཱར་དང་ཨུཏྲཔྲདེཤ། དེ་བཞིན་མུམ་བའི། ལྡི་ལི་བཅས་ཀྱི་ནང་མང་ཚོགས་ལ་བཀའ་སློབ་དང་ཆོས་འབྲེལ་གྱི་མཛད་འཕྲིན་ཁག་ལེགས་པར་གྲུབ་ནས་དེ་རིང་སྔ་དྲོ་ཆུ་ཚོད་ ༨༌༠༠ ཙམ་ལ་རྒྱ་གར་རྒྱལ་ས་ལྡི་ལི་ནས་མཁའ་ལམ་བརྒྱུད་བཞུགས་སྒར་གྱི་ཉེ་འདབས་སུ་ཆགས་པའི་གྷ་གྷལ་གནམ་ཐང་ལ་༸ཞབས་སོར་བདེ་བར་འཁོད་སོང་།སྐབས་དེར་མགོན་པོ་༸གང་ཉིད་མཆོག་ནས་བོད་པའི་གསར་འགོད་པ་ཚོར་ཐེངས་འདིའི་བདུན་ཕྲག་བཞི་ལྷག་ཙམ་གྱི་མཛད་འཕྲིན་དེ་ཏོག་ཙམ་རིང་དྲག་རྐྱེན་སྐུ་ཐང་ཆད་ཡོད་པ་དང་། ལྷག་པར་དུ་གནས་མཆོག་དོ་རྗེ་གདན་དུ་རྡུལ་ཐལ་མང་བའི་དབང་གིས་མང་ཚོགས་ཁྲོད་དུ་ནད་ཡམས་ལྟ་བུ་བྱུང་བ་བཞིན་༸གང་ཉིད་མཆོག་ལའང་༸སྐུའི་འཕྲོད་བཞེས་ལ་བདེ་མིན་ཕྲན་བུ་བྱུང་ཡོད་ཀྱང་། ད་ལྟར་༸སྐུ་ཁམས་གསལ་ཐང་ཡིན་ཞེས་བཀའ་བསྩལ་ཡོད། རྩ་བའི་གོང་ས་མཆོག་སྔར་ལོའི་ཕྱི་ཟླ་ ༡༢ ཚེས་ ༢ ཉིན་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་གྱིས་རྒྱ་གར་གྱི་མངའ་སྡེ་ཆེ་ཁག་བྷི་ཧཱར་དང་ཨུཏྲཔྲདེཤ།  མུམ་བའི། དེ་བཞིན་ལྡི་ལི་བཅས་ཀྱི་ནང་མང་ཚོགས་ལ་བཀའ་སློབ་དང་ཆོས་འབྲེལ་གྱི་མཛད་འཕྲིན་རྒྱ་ཆེར་བསྐྱངས་ཡོད་པ་རེད།

༸གོང་ས་མཆོག་གིས་ལྕམ་ནན་སི་པེ་ལོ་སི་མཆོག་ཨ་རིའི་གྲོས་ཚོགས་ཀྱི་ཚོགས་གཙོར་བསྐྱར་འདེམས་བྱུང་བར་འཚམས་འདྲི་མཛད་འདུག

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྕམ་ནན་སི་པེ་ལོ་སི་མཆོག་སྐབས་ ༡༡༦ པའི་ཨ་རིའི་གྲོས་ཚོགས་ཀྱི་ཚོགས་གཙོར་བསྐྱར་དུ་བསྐོ་བཞག་བྱུང་བར་དགའ་བསུའི་འཚམས་འདྲི་མཛད་འདུག དེ་ཡང་ཁ་སང་དགའ་ལྡན་ཕོ་བྲང་ཡིག་ཚང་གི་དྲ་གནས་ཐོག་༸གོང་ས་མཆོག་གིས་འཚམས་འདྲིའི་གསུང་འཕྲིན་འདོན་སྤེལ་གནང་བའི་ནང་དུ། ཨ་རི་ནི་འཛམ་གླིང་རང་དབང་ལུང་པའི་སྣེ་ཁྲིད་རྒྱལ་ཁབ་ཅིག་ཡིན་པ་དང་། གཉན་འཕྲང་ཆེ་བའི་དུས་སྐབས་འདིར་ལྕམ་སྐུ་མཆོག་གིས་ཚོགས་གཙོའི་ལས་དོན་བརྒྱུད་ཁ་ཕྱོགས་བཟང་པོ་ཞིག་ཏུ་སྣེ་འཁྲིད་ཐུབ་རྒྱུ་ཡིན་པར་༸མགོན་པོ་མཆོག་ལ་ཡིད་ཆེས་བརྟན་པོ་ཡོད་པ་བཀའ་ནན་དང་སྦྲགས། བོད་ཀྱི་ལོ་རྒྱུས་ཁྲོད་ཆེས་གཉན་འཕྲང་ཅན་གྱི་དུས་སྐབས་འདིར་ལྕམ་སྐུ་མཆོག་ནས་སེམས་ཐག་ཉེ་པོ་དང་བློ་གཅིག་སེམས་གཅིག་གི་ཐོག་ནས་བོད་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེད་གནང་བ་དེ་ནི། བོད་མི་རྣམས་ལ་རེ་བ་དང་སྙིང་སྟོབས། དེ་བཞིན་བོད་དོན་བདེན་མཐའ་གསལ་རྒྱུའི་རེ་བ་སྐྱེ་གཞི་ཞིག་ཡིན་པ་བཀའ་གནང་འདུགལྷག་པར་དུ་དེང་སྐབས་བོད་ནང་སྡུག་སྦྱོང་མྱོང་བཞིན་པའི་བོད་རིགས་སྤུན་ཟླ་རྣམས་ཀྱི་གཙོས་མ་འོངས་ངེས་གཏན་མེད་པར་འགྱུར་བ་ཆེན་པོ་འགྲོ་བཞིན་པའི་དུས་སྐབས་འདིར། མཐར་དྲང་བདེན་དང་རྒྱུ་མཚན་ལ་བརྟེན་ནས་མི་སྡེའི་སྤྱི་ཚོགས་ཀྱི་དཔལ་ཡོན་དར་ཞིང་རྒྱས་པ་ཞིག་ཡོང་རྒྱུ་ཡིན་པར་༸མགོན་པོ་མཆོག་ལ་ཡིད་ཆེས་བརྟན་པོ་ཡོད་ཅེས་བཀའ་གནང་འདུག དེ་ཡང་ཉེ་ཆར་ཨ་མི་རིའི་ཀའི་སྲིད་འཛིན་ལས་ཡུན་གྱི་བར་མའི་འོས་བསྡུའི་ཁྲོད། ཨ་རིའི་མང་གཙོ་ཚོགས་པར་མང་མོས་རྒྱལ་ཁ་ཐོབ་ཡོད་པ་དང་། ཁ་སང་ཚེས་ ༣ ཉིན་སྐབས་ ༡༡༦ ཨ་རིའི་གྲོས་ཚོགས་ཀྱི་ལས་ཡུན་དབུ་འཛུགས་ཐོག་འཐུས་མི་གསར་འདེམས་བྱུང་བ་རྣམས་ཀྱིས་དམ་འབུལ་ཞུས་པ་དང་། སྐབས་ ༡༡༦ པའི་ཨ་རིའི་གྲོས་ཚོགས་འོག་མའི་འཐུས་མིར་སླར་ཡང་འདེམས་ཐོན་བྱུང་བའི་མང་གཙོ་ཚོགས་པའི་དབུ་ཁྲིད་ལྕམ་ནེན་སི་པེ་ལོ་སི་མཆོག་ལ་མང་མོས་ཀྱི་ཐོག་ནས་གྲོས་ཚོགས་ཀྱི་ཚོགས་གཙོར་འདེམས་བསྐོ་བྱུང་ཡོད་པ་རེད། ལྕམ་ནེན་སི་པེ་ལོ་སི་མཆོག་ཕྱི་ལོ་ ༡༩༨༧ ལོར་ཐོག་མར་གྲོས་ཚོགས་འཐུས་མིར་འདེམས་ཐོན་བྱུང་བ་དང་། ཕྱི་ལོ་༢༠༠༧ ལོར་ཨ་རིའི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བ་དང་འབྲེལ། ཨ་རིའི་ནང་དུ་བུད་མེད་ཚོགས་གཙོར་བསྐོ་བཞག་བྱུང་བ་ཐོག་མ་དེ་ཆགས་ཀྱི་ཡོད་པ་རེད། རྩ་བའི་ལྕམ་ནེན་སི་པེ་ལོ་སི་མཆོག་ནི་ཡུན་རིང་ནས་བོད་དོན་དང་བོད་མིའི་གནས་སྟངས་ལ་ཐུགས་ཁུར་དང་རྒྱབ་སྐྱོར་ཤུགས་ཆེར་གནང་མཁན་ཞིག་དང་། ལྷག་པར་དུ་༧གོང་ས་མཆོག་ལ་གུས་བཀུར་ཆེ་བསྟོད་ཞུས་མཁན་ཞིག་ཡིན་པ་རེད། ལྕམ་ནན་སི་པི་ལོ་སི་མཆོག་ཨ་རིའི་གྲོས་ཚོགས་ཀྱི་ཚོགས་གཙོར་བསྐྱར་འདེམས་བྱུང་བར། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་ཀྱང་། གཞུང་འབྲེལ་དྲ་གནས་བརྒྱུད་བོད་མིའི་སྒྲིག་འཛུགས་ཡོངས་ཀྱི་ཚབ་ཞུས་ཏེ་ལྕམ་སྐུ་མཆོག་ལ་དགའ་བསུའི་འཚམས་འདྲི་ཞུས་འདུག་པ་དང། ད་རེས་ཁོང་བསྐྱར་འདེམས་བྱུང་བ་དེ་ནི་ཁོང་གིས་ཨ་རིའི་རྒྱལ་ཁབ་ཀྱི་རིན་ཐང་ལ་གཞིགས་པའི་དབུ་ཁྲིད་བཟང་པོའི་བྱ་བཞག་གི་མཚོན་རྟགས་ཤིག་ཡིན་པ་དང་། ད་ལན་ཁོང་ལ་རྒྱལ་ཁ་ཐོབ་བ་དེ་ནི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་དཀའ་སྡུག་མྱོང་བཞིན་པའི་བོད་མི་ཡོངས་ཀྱི་རྒྱལ་ཁ་ཡིན་པ་གསུངས་འདུག ཁ་སང་ལྕམ་ནན་སི་པི་ལོ་སི་མཆོག་ཨ་རིའི་གྲོས་ཚོགས་ཀྱི་ཚོགས་གཙོར་བསྐྱར་འདེམས་བྱུང་བ་དང་འབྲེལ། ཨ་རིའི་སྲིད་འཛིན་ Donald Trump མཆོག་གི་གཙོས་པའི་གནད་དོན་མི་སྣ་ཡོངས་ཀྱིས་ཁོང་ལ་འཚམས་འདྲི་གནང་མུས་ཡིན་པ་མ་ཟད། ངོ་དེབ་དང་ Twitter སོགས་སྤྱི་ཚོགས་དྲ་རྒྱ་ཐོག་ལ་བོད་མི་དང་བོད་དོན་རྒྱབ་སྐྱོར་བ་མང་དག་ཅིག་ནས། ལྕམ་སྐུ་མཆོག་ལ་དགའ་བསུའི་འཚམས་འདྲི་གནང་བཞིན་འདུག    

༸གོང་ས་མཆོག་གནས་མཆོག་རྡོ་རྗེ་གདན་ནས་བཞུགས་སྒར་དུ་ཆིབས་ཞལ་བསྒྱུར་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༨ ལོའི་གནས་མཆོག་རྡོ་རྗེ་གདན་ཁུལ་གྱི་ཆོས་འབྲེལ་སོགས་ཀྱི་མཛད་འཆར་ཁག་ལེགས་པར་གྲུབ་ནས་དེ་རིང་སྔ་དྲོ་ཕྱིར་བཞུགས་སྒར་དྷ་རྨ་ས་ལར་ཆིབས་ཞལ་བསྒྱུར་གནང་སོང་།དེ་རིང་ཕྱི་ལོ་ ༢༠༡༩ ཟླ་ ༡ ཚེས་ ༢ ཉིན་སྔ་དྲོ་རྡོ་རྗེ་གདན་གྱི་༸རྒྱལ་བའི་བཞུགས་གནས་དགའ་ལྡན་འཕེལ་རྒྱས་གླིང་གི་གཟིམ་ཆུང་ནས་རྡོ་རྗེ་གདན་གྱི་བྱང་ཆུབ་ཆེན་པོའི་མཆོད་རྟེན་ཆེན་མོའི་ནང་ཞབས་ཐང་ལ་ཆིབས་བསྒྱུར་གྱིས་གནས་གཟིགས་མཛད་ཡོད་པ་དང་། སྐབས་དེར་མགོན་པོ་༸གང་ཉིད་མཆོག་ནས་བྱང་ཆུབ་མཆོད་རྟེན་གྱི་རྟེན་གཙོ་སྟོན་པ་ཐུབ་པའི་་དབང་པོའི་སྐུ་བརྙན་ཆོས་མཇལ་དང་ཐུགས་སྨོན་སོགས་གཞི་རྒྱ་ཆེན་པོ་མཛད་ཡོད་པ་རེད།  དེ་རྗེས་སྔ་དྲོ་ཚོུད་ ༨ ཙམ་ལ་གནས་གཟིགས་གྲུབ་མཚམས་གནས་མཆོག་རྡོ་རྗེ་གདན་ནས་གྷ་ཡ་གནམ་ཐང་བརྒྱུད་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་མཛད་ཡོད་པ་རེད།གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་སྔ་ལོའི་ཕྱི་ཟླ་ ༡༢ ཚེས་  ༡༦ ཉིན་གནས་མཆོག་རྡོ་རྗེ་གདན་དུ་༸ཞབས་སོར་བདེ་བར་འཁོད་ཡོད་པ་དང་། མགོན་པོ་༸གང་ཉིད་མཆོག་ནས་དེ་རིང་བར་ཉིན་གྲངས་ ༢༠ རིང་བཞུགས་ཞག་མཛད་པའི་ཁྲོད་ཀིརྟི་བྱེས་པ་གྲྭ་ཚང་གིས་གོ་སྒྲིག་ཞུས་པའི་དྲང་ངེས་ལེགས་བཤད་སྙིང་པོའི་མཁས་པའི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ཡོད་པ་རེད། གནས་མཆོག་རྡོ་རྗེ་གདན་དུ་རྒྱལ་ཁབ་འདྲ་མིན་ཁག་ ༧༠ ལྷག་ནས་ཕེབས་པའི་དད་ལྡན་མི་གྲངས་བཞི་ཁྲི་ལྷག་ལ་ལག་ལེན་སོ་བདུན་མ་དང་། ཚད་མ་རྣམ་འགྲེལ། འཇིགས་བྱེད་དཔའ་གཅིག་བཅས་ཀྱི་བཀའ་དབང་བཀྲིན་བསྩལ་བ། ལྷག་པར་དུ་མགོན་པོ་༸གང་ཉིད་མཆོག་ནས་རྒྱལ་སྤྱིའི་ལེགས་སྦྱར་དང་པྭ་ལིའི་ཆོས་བརྒྱུད་ཀྱི་བགྲོ་གླེང་ཐོག་དབུ་བཞུགས་མཛད་པ་མ་ཟད་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་སོགས་བཀྲིན་བསྩལ་ཡོད་པ་རེད།ཁ་ཉིན་༸གོང་ས་༸མཆོག་གིས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་དང་མཇལ་འཕྲད་གནང་བ་སོགས་ཀྱི་མཛད་འཕྲིན་རྒྱ་ཆེ་བསྐྱངས་ཡོད་པ་རེད། ཤེས་རྟོགས་བྱུང་བར་༸གོང་ས་༸སྐྱབས་མགོན་ཆེན་མཆོག་དེ་རིང་རྒྱ་གར་གྱི་རྒྱལ་ས་ལྡི་ལིར་སྐུ་ངལ་གསོ་བཞུགས་མཛད་རྒྱུ་དང་སང་ཉིན་ལྡི་ལི་ནས་བཞུགས་སྒར་དྷ་རྨ་ས་ལར་ཆིབས་བསྒྱུར་བསྐྱང་གི་ཡོད་པ་རེད།

བྷི་ཧཱར་མངའ་སྡེའི་སྤྱི་ཁྱབ་བློན་ཆེན་མཆོག་ནས་༸གོང་ས་མཆོག་ལ་མཇལ་བཅར་ཞུས་པ།

ཁ་སང་ཟླ་ ༡༢ ཚེས་ ༣༡ ཕྱི་དྲོར་བྷི་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་ནས་གནས་མཆོག་རྡོ་རྗེ་གདན་གྱི་༸གོང་ས་མཆོག་གི་བཞུགས་གནས་ཕོ་བྲང་དུ་ཆེད་ཕེབས་ཀྱིས་༸གོང་ས་མཆོག་ལ་མཇལ་བཅར་ཞུས་ཡོད་པ་ལྟར། དེ་རིང་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་སྤེལ་བར་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱི་ཁྱབ་བློན་ཆེན་མཆོག་ལ་བདག་ཅག་གི་སྟོན་པ་ཐུབ་པའི་དབང་པོ་བཅོམ་ལྡན་འདས་ཀྱིས་ལམ་སྟོན་མཛད་པ་བཞིན་གཞན་ཕན་གྱི་ཀུན་སློང་ལྡན་པའི་ཐོག་ནས་མང་ཚོགས་ཀྱི་ཞབས་འདེགས་ཞུ་དགོས་གལ་ཡིན་པར་ལམ་སྟོན་རྒྱ་ཆེ་མཛད་འདུག༸གོང་ས་མཆོག་དང་ལྷན་དུ་སྐར་མ་ ༤༥ རིང་གི་མཇལ་མོལ་དེ་གྲུབ་མཚམས་བློན་ཆེན་མཆོག་ནས་རྡོར་གདན་གྱི་བྱང་ཆུབ་ཆེན་པོའི་རྟེན་གཙོ་མཆོད་རྟེན་རིན་པོ་ཆེར་གནས་གཟིགས་གནང་རྗེས་གསར་འགོད་པའི་བཅར་འདྲི་དང་ལེན་གནང་སྐབས་ཁོང་གིས་གནས་མཆོག་རྡོ་རྗེ་གདན་དུ་༸གོང་མཆོག་ནས་བཀའ་ཆོས་ཀྱི་མཛད་འཕྲིན་སྐྱོང་བཞིན་པའི་ཁྲོད་ཉེ་ཆར་མགོན་པོ་༸གང་ཉིད་མཆོག་༸སྐུ་ཐང་ཆད་པའི་དབང་གིས་ཆོས་འབྲེལ་བར་མཚམས་བཞག་དགོས་པའི་གནས་ཚུལ་ཐོས་མ་ཐག་འཕྲལ་དུ་མགོན་པོ་མཆོག་གི་མཇལ་ཁ་ཞུ་རྒྱུའི་འདོད་པ་བྱུང་། ཁོང་རང་ཉིད་ནས་ད་བར་༸གོང་ས་མཆོག་གི་མཇལ་ཁ་ཐེངས་ཁ་ཤས་ཞུས་མྱོང་ཡོད་པ་མ་ཟད་ལྷག་དོན་༸རྒྱལ་བའི་བཞུགས་གནས་བཞུགས་སྒར་དྷ་རྨ་ས་ལ་ཡང་ཆེད་བཅར་གནང་མྱོང་ཡོད་སྐོར་གསུངས་འདུག དེ་བཞིན་༸གོང་ས་མཆོག་གིས་རྒྱུན་དུ་ནང་པའི་ཆོས་དང་རྒྱ་གར་གྱི་དཔལ་ནཱ་ལེནྡཱའི་གནའ་བོའི་རིག་གནས་དང་འབྲེལ་བའི་དགོངས་བཞེས་ཐོག་ལ་བཀའ་མོལ་ཡང་ཡང་ཡོང་གི་ཡོད་པ་ལྟར་ད་རེས་དེ་དག་ཐོག་བཀའ་མོལ་གནང་སྐོར་གསུངས་པ་དང་ཆབས་ཅིག མང་ཚོགས་ཀུན་ལ་ཕྱི་ལོ་གསར་བཞད་ལ་འཚམ་འདྲི་གནང་ཡོད་པ་རེད།

༸གོང་ས་མཆོག་གིས་དགུང་ལོ་བརྒྱ་ཕྲག་རིང་༸སྐུ་འཚོ་བཞུགས་ཀྱི་བཀའ་བཞེས་སྨིན་བསྩལ།

གནས་མཆོག་ཁྱད་པར་ཅན་རྡོ་རྗེ་གདན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཆོས་འབྲེལ་མཛད་འཆར་ཁག་ལེགས་པར་གྲུབ་པ་དང་བསྟུན། དེ་རིང་དུས་འཁོར་དབང་ཆེན་གྱི་ཆོས་རར་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོ་མཆོག་གིས་གཙོས་པའི་དཔལ་ལྡན་དགའ་ལྡན་ཕོ་བྲང་དང་འབྲེལ་བ་ཡོད་པའི་ལྷ་སྲུང་ཁག་གཅིག་སྐུ་ཕེབས་གནང་ཡོད་པ་མ་ཟད། བོད་མིའི་སྒྲིག་འཛུགས་དང་། རྣམ་རྒྱལ་གྲྭ་ཚང་། ཤེལ་དཀར་ཆོས་སྡེ་མངའ་ཞབས་བཅས་ལྷ་མི་ཟུང་འབྲེལ་གྱིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གསང་གསུམ་ལ་ཚུལ་བསྟན་སྐུ་གེགས་ཉེར་འཚེ་རིགས་ཀྱི་ཆ་ཙམ་མི་བཞེས་པར་བསྟན་པ་དང་འགྲོ་བའི་འཕྲལ་ཡུན་ཕན་བདེའི་བྱེད་པོར་སྐུ་ཚེ་༸ཞབས་པད་བརྟན་པའི་ཆེད་སྒྲོལ་དཀར་ཡེ་ཤེས་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་ལྟར། བོད་མའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་རྒྱལ་བ་བསྟན་འཛིན་རྒྱ་མཚོར་སྨོན་ལམ་བརྒྱབ་མཁན་མི་གྲངས་ས་ཡ་འགའ་ཤས་ཡོད་པ་ལྟར་ལས་དང་སྨོན་ལམ་གྱི་ཐོག་ནས་དམིགས་བསལ་དད་པ་དང་དམ་ཚིག་ཡོད་མཁན་ཚོའི་སྨོན་ལམ་ལྟར་ངོས་རང་ནས་ཀྱང་ལོ་བརྒྱ་ཕྲག་ལྷག་འཚོ་བཞུགས་ཡོང་རྒྱུའི་སྨོན་ལམ་བརྒྱབ་ཀྱི་ཡོད། ཁྱེད་རང་ཚོ་བློ་བདེ་པོ་བྱེད་ཞེས་སོགས་བཀའ་བཞེས་བཟང་པོའི་སློབ་བཀྲིན་བསྩལ་ཡོད། གཞི་རྩའི་དེ་རིང་བརྟན་བཞུགས་ཀྱི་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ།  དེ་བཞིན་རྣམ་རྒྱལ་གྲྭ་ཚང་གི་མཁན་པོ་དབུ་ལས་རྣམ་པ། བལ་ཡུལ་ཁུལ་ནས་ཤེལ་དཀར་ཆོས་སྡེའི་བརྟན་བཞུགས་ཚོགས་མི་བཅས་ཆེད་ཕེབས་གནང་འདུགཤེས་རྟོགས་བྱུང་བར་མགོན་པོ་༸གང་ཉིད་མཆོག་གནངས་ཕྱི་ཚེས་ ༢ ཉིན་གནས་མཆོག་རྡོ་རྗེ་གདན་ནས་ཕྱིར་ལོག་བཞུགས་སྒར་དྷ་རྨ་ས་ལར་ཆིབས་བསྒྱུར་མཛད་ཀྱི་ཡོད་པ་རེད།

བདེ་མཆོག་ཚེ་ལྷ་དཀར་པོའི་བཀའ་དབང་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཁ་སང་ཉིན་གཅིག་གི་རིང་གནས་མཆོག་རྡོ་རྗེ་གདན་གྱི་ཆོས་འབྲེལ་དེ་སྐུ་ངལ་གསོ་བཞུགས་ཆེད་བར་སེང་གནང་བའི་རྗེས། དེ་རིང་སླར་ཡང་ཉེ་བརྒྱུད་འཇམ་དབྱངས་ཆོས་འཁོར་གྱི་ཆོས་འབྲེལ་བསྩལ་ཡོད་པ་དང་། མགོན་པོ་༸གང་ཉིད་མཆོག་ནས་ཆོས་འབྲེལ་གྱི་ཐོག་མར་ཁ་སང་ཆོས་འབྲེལ་བར་མཚམས་བཞག་དོན་ནི་༸གང་ཉིད་མཆོག་གི་སྐུའི་འཕྲོད་བཞེས་ལ་སྐུ་ངལ་ཕྲན་བུ་འཕྲད་རྐྱེན་ཡིན་སྐོར་བཀའ་བསྩལ་ཡོད།དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་འཇམ་དབྱངས་ཆོས་འཁོར་ནང་ཚན་བདེ་མཆོག་ཚེ་ལྷ་དཀར་པོའི་སྒྲུབ་བཞག་དང་འབྲེལ་ཚེ་དབང་དངོས་གཞི་བཀྲིན་བསྩལ་ཡོད་པ་མ་ཟད། མགོན་པོ་༸གང་ཉིད་མཆོག་ནས་སྐབས་དེར་ང་ཚོའི་ལུས་རྟེན་འདི་རིང་དུ་གནས་པའི་དགོས་པ་དེ་རང་དོན་གྲུབ་ཐབས་ཙམ་མིན་པར་གཞན་དོན་གྲུབ་པར་འབད་བརྩོན་བྱེད་དགོས་པ་དང་། ལྷག་པར་གནས་མཆོག་ཁྱད་པར་ཅན་རྡོ་རྗེ་གདན་ལྟ་བུར་དུས་གཅིག་ལ་ཆོས་ཞུ་བ་འདི་ཙམ་ཞིག་འདུ་འཛོམས་བྱུང་ཐུབ་པ་དེ་སྐལ་པ་ཤིན་ཏུ་ནས་བཟང་པོ་ཡིན་སྐོར་སོགས་བཀའ་བསྩལ་བ་མ་ཟད། ཆ་རྐྱེན་ཆ་ཚང་ཡོད་པའི་མི་ལུས་འདིའི་རིང་ལ་དངོས་ཤུགས་བརྒྱུད་གསུམ་གྱི་ཐོག་ནས་གཞན་དོན་ལ་འབད་གནད་ཡིན་པ་སོགས་ལམ་སྟོན་མཛད་སོང་། ༸ གོང་ས་ ༸སྐྱབས་མགོན་ཆེན་པོ་མཆོག་ནས་ད་དུང་དེ་རིང་གི་ཉེ་བརྒྱུད་འཇམ་དབྱངས་ཆོས་འཁོར་གྱི་བདེ་མཆོག་ཚེ་ལྷ་དཀར་པོའི་ཆོས་འབྲེལ་གྲུབ་མཚམས། ཆོས་ཞུ་བ་ཚོས་ངེས་པར་དུ་བླ་མས་གསུངས་ཟིན་པའི་གདམས་ངག་དག་ཉིན་མཚན་དབྱེ་མེད་ཐོག་ནས་ཐོས་བསམ་སྒོམ་གསུམ་གནང་ཐོག་སེམས་རྒྱུད་ལ་འགྱུར་བ་ཡོང་ཐབས་གནང་གནད་ཡིན་པར་ལམ་སྟོན་བཀྲིན་བསྩལ་ཡོད།

༸པཎ་ཆེན་སྐུ་ཕྲེང་བཅུ་པ་ཆེ་མཆོག་གི་དགོངས་རྫོགས་མཆོད་འབུལ་གནང་བ།

ཁ་སང་བོད་ཟླ་ ༡༡ ཚེས་ ༢༡ ཉིན་༸ཀུན་གཟིགས་པཎ་ཆེན་ཨེར་ཏེ་ནི་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་དགོངས་པ་ཆོས་དབྱིངས་སུ་ཐིམ་ནས་མི་ལོ་ཧྲིལ་པོ་ ༣༠ འཁོར་བའི་དུས་དྲན་དང་བསྟུན། འདི་ག་འཕགས་ཡུལ་གྱི་གནས་མཆོག་རྡོ་རྗེ་གདན་གྱི་མཆོད་རྟེན་རིན་པོ་ཆེའི་དྲུང་དུ་རྒྱ་གར་ལྷོ་ཕྱོགས་གདན་ས་བཀྲིས་ལྷུན་པོས་གོ་སྒྲིག་གནང་ཐོག་དགོངས་རྫོགས་ཀྱི་མཆོད་འབུལ་སྨོན་ལམ་རྒྱ་ཆེ་གནང་ཡོད་པ་རེད།ཁ་སང་ཕྱི་དྲོ་རྡོ་རྗེ་གདན་གྱི་མཆོད་རྟེན་རིན་པོ་ཆེའི་དྲུང་དུ་༸དཔལ་ས་སྐྱ་ཁྲི་འཛིན་རཏྣ་བཛྲ་རིན་པོ་ཆེ་མཆོག་དང་། འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་ཁྲི་ཟུར་རིན་པོ་ཆེ་མཆོག ཤར་པ་ཆོས་རྗེ་མཆོག གདན་ས་གྲྭ་ཚང་ཁག་གི་མཁན་བླ་སྤྲུལ། དེ་བཞིན་དད་ལྡན་ཆོས་ཞུ་བ་བཅས་མི་གྲངས་ ༧༠༠༠ ལྷག་ཙམ་ཞིག་འདུ་འཛོམས་གནང་བའི་ཐོག་ནས་རིན་པོ་ཆེ་མཆོག་གི་དགོངས་རྫོགས་མཆོད་འབུལ་གཟབ་རྒྱས་གནང་ཡོད་པ་མ་ཟད། གདན་ས་བཀྲིས་ལྷུན་པོའི་ཕྱག་མཛོད་དཀོན་མཆོག་བསྟན་འཛིན་ལགས་ཀྱིས་མང་ཚོགས་ནས་རྒྱ་ནག་གི་བཙན་ཁྲིད་འོག་གར་སོང་ཆ་མེད་དུ་གྱུར་བའི་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་གང་མགྱོགས་ཀློད་བཀྲོལ་ཡོང་ཐབས་སུ་རྒྱབ་སྐྱོར་གནང་དགོས་པའི་འབོད་སྐུལ་གནང་ཡོད་པ་རེད།གཞི་རྩའི་ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་ཞུགས་ཐོག་གནས་མཆོག་རྡོ་རྗེ་གདན་གྱི་ཆོས་འབྲེལ་སྐབས་སུའང་བཟང་སྤྱོད་སྨོན་ལམ་གསུང་འདོན་སོགས་གནང་ཡོད་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་ཐུང་བརྒྱུད་༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་རྫོགས་ནས་མི་ལོ་ ༣༠ འཁོར་བར་གསུང་འཕྲིན་ཞིག་ཀྱང་བསྩལ་ཡོད་པ་རེད།

༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་རྫོགས་པ་དེ་ནི་བོད་མིའི་བསོད་ནམས་ཀྱིས་མ་འཆུན་པ་བྱུང་སོང་།

༸པཎ་ཆེན་སྐུ་ཕྲེང་བཅུ་པའི་ལོ་འཁོར་མོའི་བཀྲིན་རྗེས་དྲན་ཚོགས་ཆུང་གིས་ཇི་ལྟར་གསོལ་འདེབས་ཞུས་དོན་ལྟར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༡༢ ཚེས་ ༢༨ ཉིན་བརྙན་ཐུང་བརྒྱུད་གསུང་འཕྲིན་ཞིག་མཛད་པའི་ནང། ༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་རྫོགས་པ་དེ་ནི་བོད་མིའི་བསོད་ནམས་ཀྱིས་མ་འཆུན་པ་བྱུང་ཡོད་པར་བཀའ་བསྩལ་འདུག སྐར་མ་ལྔ་ཡོད་པའི་བརྙན་ཐུང་དེའི་ནང་། ༸གོང་ས་མཆོག་གིས་༸པཎ་ཆེན་རིན་པོ་མཆོག་གིས་བོད་ནང་དུས་ཚོད་ཧ་ཅང་དཀའ་ཚེགས་ཆེ་བའི་སྐབས་སུ་ཐུགས་ཁུར་ཆེན་པོའི་ཐོག་ནས་སྐུ་ངལ་འཛེམས་མེད་དང་། ལྷག་བསམ་གཡོ་བ་མེད་པ། དེ་བཞིན་ཐུགས་གཞི་དོར་བ་མེད་པར་བོད་བསྟན་སྲིད་སྤྱིའི་བདེ་དོན་སླད་ཐུགས་ཁུར་ཆེ་བཞེས་མཛད་ཡོད་སྐོར་དྲན་སྐུལ་མཛད་པ་དང་ཆབས་ཅིག ༸གོང་ས་མཆོག་གིས་དབུ་ཁྲིད་པའི་བཙན་བྱོལ་བོད་མི་ཚོ་འདིར་རྒྱ་གར་དུ་གནས་པ་དང་། ༸པཎ་ཆེན་རིན་པོ་ཆེ་མཆོག་བོད་ནང་ལ་དུས་ཚོད་གང་ཙམ་༸སྐུ་བཞུགས་གནང་ཐུབ་ཡོད་ཚེ་བོད་ཀྱི་བདེན་དོན་ཐོག་ཕན་ཐོགས་ངེས་ཅན་ཞིག་ཡོང་ཐུབ་ཀྱང་། བོད་མི་སྤྱིའི་བསོད་ནམས་ཀྱི་རྒྱབ་རྟེན་མ་འདང་བའི་དབང་གིས་དགོངས་པ་རྫོགས་ཡོད་སྐོར་ཐུགས་ཕམ་དང་བཅས་བཀའ་བསྩལ་འདུག ༸གོང་ས་མཆོག་གིས་གཞན་ཡང་༸པཎ་ཆེན་སྐུ་ཐོག་གོང་མའི་ཡང་སྲིད་མཆོག་སྤྲུལ་དེ་ལ་༸གང་ཉིད་མཆོག་གིས་ངོས་འཛིན་མཛད་པའི་༸པཎ་ཆེན་དང་རྒྱ་གཞུང་གིས་ངོས་འཛིན་བྱས་པའི་༸པཎ་ཆེན་མཆོག་སྤྲུལ་གཉིས་བྱུང་ཡོད་བའི་སྐོར་བཀའ་བསྩལ་བ་དང་སྦྲགས། དེ་སྔ་བོད་ནང་ལོ་རབས་བརྒྱ་ཕྲག་གཅིག་གི་གོང་ལ་ཆེས་སྙན་གྲགས་ཡོད་པའི་འཇམ་མགོན་མཁྱེན་བརྩེ་དབང་པོ་མཆོག་གི་ཡང་སྲིད་ལྔ་འཁྲུངས་མྱོང་ཡོད་པ་བཞིན་སངས་རྒྱས་ཀྱི་བསྟན་པ་སྤྱི་དང་བྱེ་བྲག་གང་ལ་བཤད་སྒྲུབ་གཉིས་ཀྱི་ཐོག་ནས་ཞབས་འདེགས་བསྒྲུབ་ཐུབ་མཁན་གྱི་སྐྱེས་བུ་དམ་པ་གང་འདྲ་ཞིག་འཁྲུངས་ན་འགྲིག་སྐོར་ལམ་སྟོན་མཛད་འདུག ༸གོང་ས་མཆོག་གིས་བརྙན་ཐུང་དེའི་ནང་ད་དུང་༸པཎ་ཆེན་སྐུ་ཕྲེང་བཅུ་པ་མཆོག་དང་༸གང་ཉིད་མཆོག་གི་དབར་ཐུན་མིན་གྱི་འབྲེལ་བ་ཞིག་ཡོད་པ་མ་ཟད། བོད་ཀྱི་ལོ་རྒྱུས་ཐོག་ནས་༸རྒྱལ་བ་ཡབ་སྲས་རྣམ་གཉིས་ཀྱི་སྐུ་ཕྲེང་རིམ་ཁག་བར་འབྲེལ་བ་དམིགས་བསལ་བ་ཡོད་སྐོར་བཀའ་བསྩལ་བ་དང་ཆབས་ཅིག ༸པཎ་ཆེན་སྐུ་ཕྲེང་རིམ་བྱོན་གྱི་སྐུ་ཚེའི་མཛད་འཕྲིན་རྣམས་ངོ་སྤྲོད་མཛད་ཡོད་པ་རེད།

ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་དབུ་འཛུགས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འདི་ག་གནས་མཆོག་རྡོ་རྗེ་གདན་དུ་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་དབུ་འཛུགས་བཀྲིན་བསྐྱངས་ཡོད་པ་རེད། དེ་རིང་ཟླ་ ༡༢ ཚེས་ ༢༨ ཉིན་སྔ་དྲོ་ཆོས་འབྲེལ་དངོས་གཞི་དབུ་འཛུགས་མ་གནང་གོང་ཐོག་མར་༸ཀུན་གཟིགས་༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་ཞི་བར་གཤེགས་ནས་ལོ་ ༣༠ འཁོར་བའི་རྗེ་དྲན་གྱི་ཉིན་མོ་དང་བསྟུན་དུས་འཁོར་ཐང་ཆེན་གྱི་ཚོགས་རར་མགོན་པོ་༸གང་ཉིད་དབུ་བཞུགས་ཀྱི་ཐོག་རིས་མེད་བླ་སྤྲུལ་མཁན་པོ་དང་དགེ་བཤེས། དད་ལྡན་གྲྭ་བཙུན་སེར་སྐྱ་ཡོངས་ནས་དགོངས་རྫོགས་མཆོད་འབུལ་གནང་འདུགདེ་ནས་༸གོང་ས་༸སྐྱབས་མགོན་ཆེན་པོ་མཆོག་ནས་ཉེ་བརྒྱུད་འཇམ་དབྱངས་ཆོས་སྐོར་གྱི་ཆོས་འབྲེལ་དངོས་གཞི་བཀྲིན་བསྐྱངས་ཡོད་པ་དང་། ཉིན་དང་པོའི་ཆོས་འབྲེལ་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་འཇམ་དབྱངས་ཀྱི་རྗེས་གནང་བཅུའི་ཁོངས་ནས་འཇམ་དབྱངས་གསང་སྒྲུབ་བར་གྱི་རྗེས་གནང་བཀྲིན་བསྩལ་ཡོད་པ་མ་ཟད། མགོན་པོ་༸གང་ཉིད་མཆོག་ནས་ད་དུང་དེ་རིང་ཆོས་འབྲེལ་དུ་ཕེབས་པའི་དད་ལྡན་རྣམས་ནས་ཉིན་རེར་དམིགས་བརྩེ་མ་དང་ཨོཾ་ཨ་ར་པ་ཙ་ན་དྷཱིཿ་ཕྲེང་སྐོར་རེ་ངེས་པར་དུ་གསོག་བསྒྲུབ་གནང་དགོས་པའི་ལམ་སྟོན་ཡང་བཀྲིན་བསྩལ་ཡོད་པ་རེད།

Latest news