༸གོང་ས་མཆོག

བྱིས་པའི་ཐོབ་ཐང་འཐབ་རྩོད་པ་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་རྒྱ་གར་བ་སྐུ་ཞབས་ Kailash Satyarthi མཆོག་བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུ་སླད་བཞུགས་སྒར་དུ་ཆེད་ཕེབས་གནང་འདུག  སྐུ་ཞབས་ Kailash Satyarthi མཆོག་ནས་ཁ་སང་དང་དེ་རིང་བཞུགས་སྒར་༸རྒྱལ་བའི་ཕོ་བྲང་དུ་ཆེད་ཕེབས་ཀྱིས་༸གོང་ས་མཆོག་དང་ལྷན་དུ་དེང་དུས་ཀྱི་སྤྱི་ཚོགས་ནང་རྒྱ་གར་ནས་ཞབས་འདེགས་གང་ཞུ་ཐུབ་མིན་དང་། དེང་གི་འཛམ་གླིང་ནང་དཀའ་ངལ་གང་འཕྲད་མིན་སོགས་ཀྱི་གནད་དོན་ཐད་བཀའ་བསྡུར་གནང་དང་གནང་མུས་རེད་འདུག དེ་རིང་སྐུ་ཞབས་ Satyarthi མཆོག་སྔ་དྲོ་ཚོུད་ ༡༠༌༣༠ ཡོལ་ཙམ་ལ་མགོན་པོ་༸གང་ཉིད་མཆོག་དང་མཇལ་འཕྲད་ཞུས་རྗེས་གསར་འགོད་པས་བཅར་འདྲི་ཁག་གཅིག་ཞུས་པར་ཁོང་གིས་༸གོང་ས་མཆོག་དང་མཇལ་འཕྲད་ནམ་བྱུང་ལ་རྟག་ཏུ་སེམས་ཀྱི་ཞི་བདེ་དང་བདེ་སྐྱིད་ཀྱི་ཚོར་བ་ཤུགས་ཆེ་སྐྱེས་ཀྱི་ཡོད་སྐོར་གསུངས་པ་དང་འབྲེལ། ༸གོང་ས་མཆོག་དང་མཇལ་འཕྲད་ཞུས་པ་དེ་བྱིས་པ་གཉིས་ཐུག་འཕྲད་བྱུང་བ་ལྟར་ཡིན་པ་དང་། ངོས་ནས་༸གོང་ས་མཆོག་ལ་ཆེས་གུས་བརྩི་ཡོད་པའི་ཁར་གྲོགས་པོ་ཞིག་གི་འདུ་ཤེས་ཐོག་ནས་བརྩེ་བ་ཡང་ཡོད་ཅེས་གསུངས་ཡོད།ལྷག་པར་དུ་ད་རེས་མགོན་པོ་༸གང་ཉིད་མཆོག་དང་ལྷན་དུ་འཛམ་གླིང་ནང་ལོ་ངོ་སྟོང་ཕྲག་རིང་འཕྲད་བཞིན་པའི་དཀའ་ངལ་དང་མ་འོངས་པར་དཀའ་ངལ་གསར་པ་གང་འཕྲད་སྲིད་མིན། དཀའ་ངལ་དེ་དག་གླེང་སློང་གནང་ཕྱོགས་ཐད་བཀའ་བསྡུར་གནང་བ་མ་ཟད། ༸གོང་ས་མཆོག་དང་ཁོང་ནས་འགྲོ་བ་མིའི་རང་བཞིན་བྱམས་བརྩེའི་ཐོག་ནས་སྙིང་རྗེ་དང་འཚེ་བ་མེད་པའི་འདུ་ཤེས་ལས་དཀའ་ངལ་དེ་དག་སེལ་ཐུབ་པར་ཡིད་ཆེས་གནང་གི་ཡོད་པ་དང་། ༸གོང་ས་མཆོག་དང་ཁོང་ནས་འདས་པའི་དུས་ཡུན་ནང་གནད་དོན་དེ་དག་ཐད་བཀའ་བསྡུར་རིམ་པ་གནང་སྟབས། འཛམ་བུ་གླིང་འདི་ཞི་བདེ་དང་བདེ་སྐྱིད། དེ་བཞིན་འཚེ་བ་མེད་པ་ཞིག་ཏུ་གཟིགས་འདོད་ཡོད་པས་དེ་འབྲེལ་བཀའ་བསྡུར་གནང་སྐོར་གསུངས་སོང་། ༸གོང་ས་མཆོག་ནས་འཆར་གཞི་ལྡན་པའི་སློབ་ཚན་གཏན་འབེབས་གནང་ཐུབ་ཚེ་རྒྱ་གར་ལ་གནའ་བོའི་རིག་གནས་དང་དེང་དུས་ཀྱི་ཤེས་ཡོན་གཉིས་ཐུན་མོང་ཐོག་འཛམ་གླིང་ཁྱོན་ལ་ཞི་བདེ་སྐྲུན་པར་ནུས་པ་ཡོད་སྐོར་བཀའ་བསྩལ་འདུགཤེས་རྟོགས་བྱུང་བར་༸གོང་ས་མཆོག་ནས་སྐུ་ཞབས་ Satyarthi མཆོག་དང་འབྲེལ་ཡོད་མི་སྣ་དང་ལྷན་དུ་སང་ཉིན་དགུང་ཚིགས་ལྷན་བཞེས་མཛད་རྒྱུ་དང་། དེ་བཞིན་མཛད་རིམ་ཁྲོད་བཀའ་བསྡུར་བྱུང་བའི་གནད་དོན་ཐོག་མུ་མཐུད་མཇུག་སྐྱོང་གནང་རྒྱུ་རེད་འདུག རྩ་བའི་ཉེ་ལམ་༸གོང་ས་མཆོག་གི་རྒྱ་གར་རྒྱལ་ས་ལྡི་ལི་ནང་ཆོས་ལུགས་ལ་མ་བརྟེན་བཟང་སྤྱོད་ཀྱི་བསླབ་གཞི་ SEE Learning ཞེས་པ་དབུ་འབྱེད་བཀྲིན་བསྩལ་སྐབས་སྐུ་ཞབས་ Kailash Satyarthi མཆོག་ནས་ཀྱང་ལྷན་ཞུགས་གནང་ཡོད་པ་མ་ཟད། དེ་སྔ་རྒྱ་གར་གྱི་སྲིད་འཛིན་ཟུར་པ་ Pranab Mukherjee  མཆོག་དང་ལྷན་རྒྱས་སྲིད་འཛིན་གྱི་ཕོ་བྲང་དུ་༸གོང་ས་མཆོག་དང་ལྷན་མཇལ་འཕྲད་གནང་མྱོང་ཡོད་པ་རེད།

ད་བར་ལོ་ངོ་ ༢༤ རིང་རྒྱ་གར་གྱི་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་གནང་མྱོང་ཡོད་པ་སྐུ་ཞབས་ Pawan Chamling མཆོག་གི་ཆབ་སྲིད་ཚོགས་པར་ཉེ་ལམ་མངའ་སྡེའི་གྲོས་ཚོགས་ཀྱི་འོས་བསྡུའི་ནང་ཕམ་ཁ་བྱུང་བ་ལྟར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བློན་ཆེན་མཆོག་ལ་དམིགས་བསལ་གསུང་འཕྲིན་ཞིག་བསྩལ་ཏེ། ཁོང་གིས་ད་བར་ཁུལ་དེར་གནས་སྡོད་བོད་མི་རྣམས་ལ་དགོས་ངེས་ཀྱི་མཐུན་འགྱུར་གང་ཐུབ་གནང་བར་ཐུགས་རྗེ་ཆེ་ཞེས་བཀའ་བསྩལ་བ་དང་ཆབས་ཅིག ཁོང་གི་ཆབ་སྲིད་ཚོགས་པར་ད་ལན་གཞུང་འཛིན་གནང་རྒྱུའི་གོ་སྐབས་བྲལ་ཡང་། རྒྱལ་ཁབ་ཆེན་པོ་འདི་ཡང་དག་པའི་མང་གཙོའི་ལམ་ལུགས་ཀྱི་བརྒྱུད་རིམ་ཐོག་ནས་མང་མོས་ཀྱིས་བདེན་དཔང་འཕེལ་བར་སྐྱོང་བ་ལ་ལེགས་གསོའི་བསྔགས་བརྗོད་མཛད་འདུག༸གོང་ས་མཆོག་གིས་གསུང་འཕྲིན་དེའི་ནང་སྤྱི་ཁྱབ་བློན་ཆེན་མཆོག་ནས་མགོན་པོ་༸གང་ཉིད་མཆོག་ལོ་ཤས་གོང་དུ་འབྲས་ལྗོངས་ནང་ཆིབས་བསྒྱུར་མཛད་སྐབས་ཕེབས་བསུའི་སྣེ་ལེན་གང་གཟབ་དང་བློ་ཐག་ཉེ་བའི་མཛའ་བརྩེའི་རྣམ་འགྱུར་ཆེད་འདོན་གནང་བར་ཡི་རང་བསྔགས་བརྗོད་ཀྱི་བཀའ་བསྩལ་བ་མ་ཟད། ལྷག་དོན་སྤྱི་ཁྱབ་བློན་ཆེན་མཆོག་ནས་རང་ཉིད་ཀྱི་མངའ་སྡེའི་མང་ཚོགས་རྣམས་ཀྱི་བདེ་སྡུག་དང་འཚོ་བའི་སླད་དུ་ལོ་ངོ་བཅུ་ཕྲག་གཉིས་ཀྱི་རིང་འབད་པ་ཆེན་པོས་ཞབས་ཕྱི་ཞུས་ཡོད་སྐོར་བཀའ་བསྩལ་འདུག༸གོང་ས་མཆོག་གིས་ད་དུང་ཟླ་བ་སྔོན་མའི་ནང་བོད་མི་རྣམས་རྒྱ་གར་དུ་བཙན་བྱོལ་ལ་འབྱོར་ནས་ལོ་ངོ་ ༦༠ འཁོར་བའི་ཉིན་མོ་སྲུང་བརྩི་ཞུས་ཡོད་སྐོར་བཀའ་བསྩལ་བ་དང་འབྲེལ། འབྲས་ལྗོངས་མངའ་སྡེའི་གཞུང་མང་གཉིས་ཀྱིས་ཁུལ་དེར་གནས་སྡོད་བོད་མི་རྣམས་ལ་བྱམས་བརྩེ་དང་སྙིང་རྗེ་འདི་བཞིན་དགོངས་བཞེས་བཅས་ཀྱི་ཐོག་ནས་ད་བར་མཐུན་འགྱུར་གང་ཐུབ་གནང་བར་བརྟེན་ས་གནས་ཀྱི་བོད་མི་རྣམས་ཀྱི་གནས་བབས་གང་ལེགས་ཆགས་ཡོད་སྟབས་ད་རེས་ཀྱི་གོ་སྐབས་དེའི་ཐོག་ནས་བློན་ཆེན་མཆོག་ལ་བཀྲིན་རྗེས་དྲན་ཞུ་རྒྱུ་མ་ཟད། སྤྱི་ཁྱབ་བློན་ཆེན་ཟུར་པ་མཆོག་གི་མ་འོངས་ཕྱག་ལས་རྣམས་ལམ་ལྷོང་ཡོང་བར་ཐུགས་སྨོན་བཅས་མཛད་འདུག རྩ་བའི་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ Pawan Chamling མཆོག་ནི་༸གོང་ས་མཆོག་ལ་དད་གུས་ཤུགས་ཆེ་ཡོད་མཁན་ཞིག་དང་། ལྷག་དོན་ཁོང་གིས་ཕྱི་ལོ་ ༢༠༡༥ ཟླ་ ༧ ཚེས་ ༦ སྟེ་༸གོང་ས་མཆོག་གི་༸སྐུའི་འཁྲུངས་སྐར་ཉིན་མོ་དང་བསྟུན་༸སྐུའི་འཁྲུངས་སྐར་ཉིན་༸གང་ཉིད་མཆོག་ལ་ཆེ་བསྟོད་ཚུལ་དུ་འབྲས་ལྗོངས་མངའ་སྡེ་གཞུང་འབྲེལ་གྱི་གུང་སེང་གཏན་འབེབས་གནང་ཡོད་པ་རེད།གཞན་ཡང་སྐུ་ཞབས་ Pawan Kumar Chamling མཆོག་ནས་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་འབྲས་ལྗོངས་ནང་ཆིབས་བསྒྱུར་མཛད་ཕྱིར་རྒྱ་གར་ཕྱི་སྲིད་བློན་ཆེན་ལྕམ་ Sushma Swaraj མཆོག་ལ་རིན་པོ་ཆེ་མཆོག་ཁུལ་དེར་ཆིབས་བསྒྱུར་བསྐྱང་རྒྱུའི་མཐུན་འགྱུར་གང་ཐུབ་གནང་དགོས་པའི་ཞབས་སྐུལ་ཡང་ཞུས་མྱོང་ཡོད་པ་རེད། སྐུ་ཞབས་ Chamling མཆོག་ནི་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་ལྔ་པ་དེ་ཡིན་ཞིང་། ཁོང་གིས་ཕྱི་ལོ་ ༡༩༩༤ ཟླ་ ༡༢ ཚེས་ ༡༢ ནས་ཕྱི་ལོ་ ༢༡༠༩ ཟླ་ ༥ ཚེས་ ༢༣ བར་ཁྱོན་ལོ་ངོ་ ༢༤ ལྷག་སྤྱི་ཁྱབ་བློན་ཆེན་གྱི་ཕྱག་ལས་གནང་ཡོད་སྟབས་རྒྱ་གར་གྱི་མངའ་སྡེའི་བློན་ཆེན་དུས་ཡུན་རིང་ཤོས་དེ་ཆགས་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་མངའ་སྡེའི་གྲོས་ཚོགས་ཀྱི་འོས་བསྡུའི་ཁྲོད་ཨ་རུ་ནཱ་ཅལ་དང་ཨོ་ཌི་ཤ་དེ་བཞིན་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་རྣམ་གསུམ་གྱི་ཆབ་སྲིད་ཚོགས་པར་རྒྱལ་ཁ་ཐོབ་པར་དགའ་བསུའི་འཚམས་འཕྲིན་བསྩལ་འདུག ༸གོང་ས་མཆོག་གིས་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་ལ་དགའ་བསུའི་འཚམས་འདྲི་དང་འབྲེལ། སྤྱི་ཁྱབ་བློན་ཆེན་མཆོག་ནས་༸གང་ཉིད་མཆོག་ལ་ཐུགས་འདྲིས་ཆེན་པོ་གནང་བ་དང་ལྷག་པར་དུ་མངའ་སྡེ་མི་མང་ནས་༸གོང་ས་མཆོག་ཁུལ་དེར་ཐེངས་མང་ཆིབས་བསྒྱུར་གནང་སྐབས་སུ་སེམས་ཐག་ཉེ་བའི་མཛའ་བརྩེའི་རྣམ་འགྱུར་ཆེད་འདོན་གནང་བཞིན་པར་ཡི་རང་བསྔགས་བརྗོད་མཛད་ཀྱི་བཀའ་བསྩལ་བ་མ་ཟད། ཟླ་བ་སྔོན་མའི་ནང་བོད་མི་རྣམས་རྒྱ་གར་དུ་བཙན་བྱོལ་ལ་འབྱོར་ནས་ལོ་ངོ་ ༦༠ འཁོར་བའི་ཉིན་མོ་སྲུང་བརྩི་ཞུས་ཡོད་པ་དང་གོ་སྐབས་འདིའི་བརྒྱུད་ཨ་རུ་ནཱ་ཅལ་མངའ་སྡེའི་གཞུང་མང་གཉིས་ཀྱིས་ས་གནས་བོད་མི་རྣམས་ལ་ད་ཕན་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞེས་བཀའ་བསྩལ་འདུག དེ་དང་ཕྱོགས་མཚུངས་ཨོ་ཌི་ཤ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Shri Naveen Patnaik མཆོག་ལ་མགོན་པོ་༸གང་ཉིད་མཆོག་འདས་པའི་ལོ་ཤས་ནང་ཨོ་ཌི་ཤ་མངའ་སྡེའི་ནང་ཐེངས་འགའ་ཤས་ཕེབས་མྱོང་ཡོད་པ་མ་ཟད། སྤྱི་ཁྱབ་བློན་ཆེན་མཆོག་དང་མཇལ་མོལ་མཛད་ཀྱང་ཐེངས་འགའ་ཤས་གནང་ཡོད་པ་དང་། ཁྱད་པར་དུ་ཨོ་ཌི་ཤ་མངའ་སྡེའི་ Gajapati རྫོང་ནང་དུ་ Chandragiri ས་གནས་སུ་བོད་མི་བཙན་བྱོལ་བ་རྣམས་ཀྱི་སྡོད་གནས་གཞིས་ཆགས་ཤིག་ཡོད་པ་དང་། བོད་མི་དེ་དག་ལ་ད་བར་མཐུན་འགྱུར་རོགས་རམ་གནང་བར་སྙིང་ཐག་པ་ནས་བསྔགས་བརྗོད་དང་ཐུགས་རྗེ་ཆེ་ཞེས་བཀའ་བསྩལ་འདུག དེ་བཞིན་རྒྱ་གར་བྱང་ཤར་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Prem Singh Tamang མཆོག་ལ་འཚམས་འཕྲིན་བསྩལ་བའི་ནང་མགོན་པོ་༸གང་ཉིད་མཆོག་ད་བར་འབྲས་ལྗོངས་ནང་ཆིབས་བསྒྱུར་གནང་བའི་དུས་ཡུན་ཚང་མའི་ནང་ཡུལ་དེའི་མང་ཚོགས་ནས་༸གོང་ས་མཆོག་ལ་སེམས་ཐག་ཉེ་བའི་མཛའ་བརྩེའི་རྣམ་འགྱུར་ཆེད་བཏོན་གནང་བར་ཡི་རང་བསྔགས་བརྗོད་དང་སྦྲགས། སྐུ་ཞབས་ Prem Singh Tamang མཆོག་གི་དབུ་ཁྲིད་ལམ་སྟོན་འོག་འབྲས་ལྗོངས་དེ་མུ་མཐུད་ཡར་རྒྱས་དང་གོང་འཕེལ་གྱི་ཕྱོགས་སུ་མདུན་སྐྱོད་ཐུབ་པ་མ་ཟད། སྤྱི་ཚོགས་ཁྲོད་ཆེས་ཉམ་ཐག་རྣམས་ཀྱི་འཚོ་བར་དོན་འབྲས་སོན་པའི་ཡར་རྒྱས་ཐུབ་པར་ཐུགས་རེ་མཛད་བཞིན་ཡོད་པར་བཀའ་བསྩལ་འདུག ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རུ་ནཱ་ཅལ་དང་ཨོ་ཌི་ཤ་མངའ་སྡེ་གཉིས་ནང་ཉེ་ལམ་ནས་བཟུང་དབུལ་ཕོངས་ཉམ་ཐག་རྣམས་ཀྱིས་གཙོས་མི་མང་གི་འཚོ་བའི་གནས་སྟངས་ཡར་རྒྱས་ཕྱིན་པ་དེར་ཡི་རང་བསྔགས་བརྗོད་རྒྱ་ཆེ་མཛད་པ་དང་སྦྲགས། སྐུ་ཞབས་རྣམ་གཉིས་ཀྱིས་སྤྱི་ཁྱབ་བློན་ཆེན་གནང་བའི་དུས་ཡུན་དེའི་རིང་ངལ་བ་དག་ལ་གདོང་ལེན་གནང་སྟེ་མང་ཚོགས་ཀྱི་མངོན་འདོད་དང་རེ་བ་ལྟར་ཕྱག་ལས་ལམ་ལྷོང་ཡོང་བའི་ཐུགས་སྨོན་མཛད་འདུག སྲིད་སྐྱོང་མཆོག་གིས་ཀྱང་བོད་མིའི་སྒྲིག་འཛུགས་ཀྱི་སྐུ་ཚབ་ཞུས་ནས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་ཆབ་སྲིད་ཚོགས་པར་རྒྱལ་ཁ་ཐོབ་པར་དགའ་བསུའི་འཚམ་འདྲི་གནང་བ་དང་ལྷག་དོན་བློན་ཆེན་མཆོག་གིས་ཨ་རུ་ནཱ་ཅལ་ནང་ཕྱོགས་གང་ཅིའི་ཐད་ནས་ཡར་རྒྱས་གནང་རྒྱུའི་ཆོད་སེམས་ལ་རྗེས་སུ་ཡི་རང་དང་ཆོད་སེམས་དེ་ལམ་ལྷོང་ཡོང་བའི་སྨོན་འདུན་ཞུས་པ་མ་ཟད། མངའ་སྡེའི་གཞུང་མང་གཉིས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་དད་དམ་གཡོ་མེད་ཞུ་བཞིན་ཡོད་པ་དང་། དེ་བཞིན་བཙན་བྱོལ་བོད་མི་རྣམས་ལ་འདས་པའི་ལོ་ངོ་ ༦༠ རིང་རྒྱབ་སྐྱོར་གནང་དང་གནང་མུས་ཁག་ལ་བཀའ་དྲིན་ཤིན་ཏུ་ཆེ་ཞེས་ཞུས་འདུག ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་དང་སྐུ་ཉིད་ཀྱི་ཡབ་ཞིང་གཤེགས་དམ་པ་དེ་ཉིད་ལ་གུས་འདུད་དང་འབྲེལ། དམ་པ་དེ་ཉིད་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཧ་ཅང་ཞུ་མཁན་ཞིག་དང་། བོད་དོན་ལ་ཞལ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་ཞིག་ཡིན་པ་དྲན་གསོ་དང་འབྲེལ་ཏེ་ཨ་རུ་ནཱ་ཅལ་མངའ་སྡེའི་གཞུང་མང་གཉིས་ལ་ཐུགས་རྗེ་ཆེ་ཞེས་ཞུས་པ་དང་ཆབས་ཅིག འབྱུང་འགྱུར་སྤྱི་ཁྱབ་བློན་ཆེན་མཆོག་གི་ལས་ཡུན་ནང་བྱ་བ་ལམ་ལྷོང་ཡོང་བར་སྨོན་འདུན་ཤུགས་དྲག་ཡོད་ཅེས་གསུངས་འདུག

རྒྱ་ནག་གི་རྒྱལ་ས་པེ་ཅིང་དུ་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱིས་རྒྱ་ནག་གཞུང་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་ཆ་རྐྱེན་གང་ཡང་མེད་པར་བོད་རྒྱ་གཉིས་ཀྱི་གནད་དོན་ཞི་འགྲིག་ཡོང་བར་དོན་ལྡན་གྱི་གྲོས་མོལ་གནང་དགོས་པར་སྐུལ་མ་གནང་འདུག ཨ་རིའི་ཕྱི་སྲིད་ལས་ཁུངས་ཀྱིས་བདུན་ཕྲག་སྔོན་མའི་རེས་གཟའ་སྤེན་པ་ཕྱི་ཚེས་ ༢༥ ཉིན་སྐུ་ཞབས་  Branstad ལགས་ཀྱི་བོད་ནང་གི་འཚམས་གཟིགས་དང་འབྲེལ་སྤྱི་བསྒྲགས་ཤིག་སྤེལ་འདུག་པ་དང་། དེའི་ནང་སྐུ་ཞབས་ Branstad ལགས་ཀྱིས་རྒྱ་གཞུང་ནས་༸གོང་ས་མཆོག་དང་ཡང་ན་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་ཆ་རྐྱེན་གང་ཡང་མེད་པར་བོད་རྒྱ་གཉིས་ཀྱི་མི་མཐུན་པའི་གནད་དོན་ཞི་འགྲིག་ཡོང་བར་དོན་ལྡན་གྱི་གྲོས་མོལ་གནང་དགོས་པར་སྐུལ་མ་གནང་བ་དང་།  དེ་བཞིན་རྒྱ་ནག་གཞུང་གིས་བོད་མི་ནས་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་ལས་དོན་གོ་སྒྲིག་ཞུ་ཕྱོགས་དང་ཆོས་ལུགས་ཀྱི་རང་དབང་ལོངས་སུ་སྤྱད་མི་བཅུག་པར་ཐེ་བྱུས་རིམ་པ་བྱས་དང་བྱེད་བཞིན་པར་སྐྱོན་བརྗོད་དང་། ལྷག་པར་དུ་བོད་རང་སྐྱོང་ལྗོངས་ཟེར་བ་དང་མཚོ་སྔོན་གཙོ་གྱུར་ས་ཁུལ་ཁག་ཏུ་ཕྱི་མི་སྐྱོད་པར་དམ་དྲག་ཤུགས་ཆེ་བྱེད་བཞིན་པ་བཅས་ཡུན་རིང་ནས་ཐུགས་འཚབ་ཡོད་པའི་གནད་དོན་གླེང་སློང་གནང་བ་བཀོད་འདུགགཞི་རྩའི་ཟླ་བ་འདིའི་ཚེས་ ༡༩ ནས་ ༢༥ བར་གྱི་ཨ་རི་གཞུང་ཚབ་ཀྱི་འཚམས་གཟིགས་དེ་བོད་རང་སྐྱོང་ལྗོངས་ཟེར་བའི་ས་གནས་ཀྱི་གཞུང་ནས་གོ་སྒྲིག་ཞུས་པ་ཞིག་དང་། འཚམས་གཟིགས་དེའི་ཁྲོད་སྐུ་ཞབས་ Branstad ལགས་ནས་ལྷ་སར་ཡོད་པའི་ཕོ་བྲང་པོ་ཏཱ་ལ་དང་། ཇོ་ཁང་། ༸གོང་ས་༸སྐྱབས་མགོན་ཆེན་པོ་མཆོག་གི་དབྱར་དུས་བཞུགས་གནས་ནོར་བུ་གླིང་ཁ། སེར་ར་དགོན་པ་སོགས་སུ་འཚམས་གཟིགས་གནང་ཡོད་པ་དང་། དེ་བཞིན་བོད་བརྒྱུད་ནང་བསྟན་གྱི་འགོ་ཁྲིད་སོགས་དང་མཇལ་འཕྲད་གནང་འདུག སྤྱིར་རྒྱ་གཞུང་ནས་ཕྱི་མི་རྣམས་བོད་གཙོས་པའི་ཤིན་ཅང་ཁུལ་དུ་སྐྱོད་པར་དམ་དྲག་ཇེ་ཆེར་བྱེད་ཀྱི་ཡོད་པ་རྒྱལ་སྤྱིའི་ཁྲོད་ཡོངས་བསྒྲགས་ཡིན་པ་དང་། རྒྱལ་ཚོགས་སུ་རྒྱལ་སྤྱིའི་རྒྱལ་ཁབ་ཁག་གི་སྐུ་ཚབ་ནས་རྒྱ་གཞུང་ལ་རིམ་པ་བཞིན་དེ་དག་གི་གཞུང་འབྲེལ་མི་སྣ་བོད་ནང་སྐྱོད་ཆོག་པར་རེ་སྐུལ་ཞུས་ཡོད་ནའང་། རྒྱ་གཞུང་ནས་གཞི་རྩ་མེད་པའི་རྒྱུ་མཚན་བཤད་ཐོག་ཕྱི་མི་བོད་ནང་སྐྱོད་པར་བཀག་སྡོམ་ནན་པོ་བྱེད་བཞིན་ཡོད་པ་རེད།འོན་ཏང་ཉེ་ལམ་ཨ་རི་གཞུང་ནས་བོད་ནང་འདྲ་མཉམ་གྱི་འགྲུལ་སྐྱོད་ཆོག་པའི་ཁྲིམས་གཞི་གཏན་འབེབས་རྗེས་སྐུ་ཞབས་ Branstad ལགས་བོད་ནང་ཆེས་དམ་དྲག་ཡོད་པའི་ས་ཁུལ་ཏུ་ཕེབས་ཐུབ་པ་བྱུང་ཡོད་ཀྱང་། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་སྐུ་ཞབས་ Branstad ལགས་བོད་ནང་ཕེབས་པའི་ཁྲོད་རྒྱ་གཞུང་ནས་ཁོང་དང་བོད་མི་མང་ཚོགས་དབར་བཀའ་མོལ་ཡོང་བར་དམ་དྲག་བྱེད་པར་སྔོན་ཚུད་ནས་ཚོད་དཔག་གནང་བ་དང་འབྲེལ། སྐུ་ཞབས་Branstad མཆོག་ནས་རྒྱ་གཞུང་གི་ཆེས་དམ་དྲག་དང་ལྟ་སྲུང་ནན་པོ་འོག་གི་བོད་ནང་གི་འཚམས་གཟིགས་དེའི་མྱོང་ཚོར་རྒྱལ་སྤྱིའི་གསར་ཁང་ཁག་ལ་འཛེམས་ཟོན་མེད་པར་ཡོངས་བསྒྲགས་གསུངས་དགོས་གལ་ཡིན་པར་ཞུས་ཡོད་པ་རེད།

ཁ་སང་ཟླ་ ༥ ཚེས་ ༢༣ ཉི་ཐེ་ཝན་གྱི་རྒྱལ་ས་ Taipei ནང་ཡུལ་དེའི་ National Congress organization ཆབ་སྲིད་ཚོགས་པའི་འཐུས་མི་སྐུ་ཞབས་ Ted Lau ལགས་དང་། Jerry Cheng ལགས། ཐེ་ཝན་ Jury Association ཚོགས་པའི་ངེས་སྟོན་པ་སྐུ་ཞབས་ Lin Ping-chuan ལགས་བཅས་ནས་གསར་འགོད་ལྷན་ཚོགས་ཤིག་གནང་ཐོག་ད་ལྟའི་སྲིད་འཛིན་ལས་ཐོག་ལྕམ་ Tsai Ing-wen ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་གདན་ཞུ་མ་གནང་བ་ནི་རྒྱ་ནག་གཞུང་ལ་སྐྲག་པ་ཞིག་ཡིན་ནམ་ཞེས་ཟུར་ཟའི་སྐྱོན་བརྗོད་གནང་འདུག གསར་འགོད་ལྷན་ཚོགས་ཐོག་སྐུ་ཞབས་ Jerry Cheng ལགས་ཀྱིས་ད་བར་སྲིད་འཛིན་ཁག་གཅིག་ནས་༸གོང་ས་མཆོག་ཁུལ་དེར་གདན་ཞུ་གནང་ཡོད་ཀྱང་། ད་ལྟའི་སྲིད་འཛིན་ལས་ཐོག་ལྕམ་ Tsai ལགས་ནས་སྲིད་འཛིན་གྱི་ལས་འཁུར་བཞེས་ནས་ལོ་ངོ་གསུམ་ཕྱིན་ཡོད་ནའང་ད་བར་མགོན་པོ་མཆོག་ཁུལ་དེར་གདན་ཞུ་གནང་མེད་སྐོར་གསུངས་པ་དང་འབྲེལ། མ་འོངས་སྲིད་འཛིན་གྱི་འོས་མི་སྐུ་ཞབས་ William lai ལགས་སུའང་ཅི་སྟེ་སྐུ་ཉིད་ལོ་རྗེས་མར་སྲིད་འཛིན་ལ་འདེབས་ཐོན་བྱུང་ཚེ་༸གོང་ས་མཆོག་གདན་ཞུ་གནང་ཐུབ་བམ་ཞེས་བཀའ་འདྲི་གནང་འདུག་པ་མ་ཟད། Taipei གྲོང་སྡེའི་སྤྱི་ཁྱབ་སོགས་ཆེས་མཐོའི་མི་སྣ་ཁག་གཅིག་གི་མིང་གཞུང་ལུང་འདྲེན་གནང་ནས་བཀའ་འདྲི་དེ་སླར་ཡང་གནང་སྟེ་དེར་ལན་འདེབས་དགོས་པ་གསུངས་འདུག སྐུ་ཞབས་ Cheng ལགས་ཀྱིས་ཐེ་ཝན་གྱི་ངོས་ནས་གཞི་རྩའི་འགྲོ་བ་མིའི་ཐོབ་ཐང་གཙོས་པའི་གལ་གནད་ཆེ་བའི་རྒྱལ་སྤྱིའི་གནད་དོན་ཁག་ལ་ཤུགས་སྣོན་རྒྱག་དགོས་ཀྱི་ཡོད་པ་དང་། ལྷག་པར་དུ་བོད་དང་ཤིན་ཅང་གི་གནད་དོན་ཐད་གྲུབ་འབྲས་མ་སོན་གྱི་བར་དུ་རོགས་འདེགས་ཞུ་དགོས་པ། དེས་ཐེ་ཝན་རང་བཙན་རྒྱལ་ཁབ་ཅིག་ཡིན་པ་མཚོན་ཐུབ་ཀྱི་ཡོད་པར་འགྲེལ་བརྗོད་གནང་བ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་བགྲེས་པོར་ཕེབས་ཡོད་པ་དང་། ཚོགས་སྡེ་གཞན་ཁག་ནས་ཀྱང་ཐེ་ཝན་གཞུང་ལ་༸གོང་ས་མཆོག་ཁུལ་དེར་གདན་ཞུ་ཕུལ་བར་སྐུལ་མ་གནང་དགོས་སྐོར་འགྲེལ་བརྗོད་གནང་འདུག   དེ་བཞིན་སྐུ་ཞབས་ Ted lau ལགས་ཀྱིས་རྒྱ་ནག་གཞུང་གིས་འཁྱོག་བཤད་དང་ལོག་བཤད་ཀྱི་ལོ་རྒྱུས་ཁྲོད་ཐེ་ཝན་མི་མང་ཕལ་མོ་ཆེས་བོད་ཀྱི་དངོས་ཡོད་ལོ་རྒྱུས་དེ་ཤེས་ཀྱི་མེད་སྐོར་གསུངས་པ་དང་འབྲེལ། བོད་དེ་དུས་ནམ་ཡང་རྒྱ་ནག་གི་ཆ་ཤས་ཤིག་མ་རེད་ཅེས་དང་། རྒྱ་ནག་གཞུང་ནས་བཏང་འཛིན་གྱི་དབང་ཚད་གང་ཡང་མེད་སྟབས་སྲིད་འཛིན་ Tsai ལགས་ནས་རྒྱལ་སྤྱིའི་ཁྲོད་བོད་དེ་རྒྱ་ནག་གི་ཆ་ཤས་མིན་པར་ཡོངས་བསྒྲགས་གནང་དགོས་ཞེས་གསུངས་ཡོད། ལྷག་དོན་ཁོང་གིས་སྲིད་འཛིན་ལས་ཐོག་ལྕམ་ Tsai Ing-wen ལགས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་གདན་ཞུ་མ་གནང་བ་ནི་རྒྱ་ནག་གཞུང་ལ་སྐྲག་པ་ཞིག་ཡིན་ནམ་ཞེས་དང་། སྐུ་ཞབས་ William lai ཀྱི་དུས་ཡུན་ནང་གནད་དོན་དེ་དག་ཐོག་བཞེངས་ཕྱོགས་བརྟན་པོ་དང་། རྒྱལ་སྤྱིའི་ཁྲོད་གནད་དོན་ངོ་མ་གང་ཡིན་འགྲེལ་བརྗོད་གནང་བར་རེ་བ་ཡོད་ཅེས་གསུངས་འདུག རྩ་བའི་ད་བར་༸གོང་ས་མཆོག་ཐེ་ཝན་ནང་ཕྱི་ལོ ༡༩༩༧ ལོར་ཐོག་མ་ཆིབས་བསྒྱུར་མཛད་པ་དང་། དེ་རྗེས་ ༢༠༠༡ དང་ ༢༠༠༩ བཅས་ལ་ཆིབས་བསྒྱུར་གསོལ་འདེབས་ཞུས་དོན་ལྟར་ཆིབས་བསྒྱུར་ཐེངས་གསུམ་བསྐྱངས་ཡོད་པ་རེད།

ཁ་སང་ཕྱི་ཚེས་ ༢༣ ཉིན་རྒྱ་གར་དབུས་འོས་བསྡུ་ལྷན་ཁང་ནས་རྒྱ་གར་གྲོས་ཚོགས་འོག་མའི་རྒྱལ་ཡོངས་འོས་བསྡུ་ཆེན་མོའི་གྲུབ་འབྲས་གསལ་བསྒྲགས་གནང་བའི་ཁྲོད། སྲིད་བློན་མོ་དི་མཆོག་གིས་སྣེ་ཁྲིད་པའི་ཆབ་སྲིད་ཚོགས་པ་ BJP ལ་རྒྱལ་ཁ་ཤུགས་ཆེ་ཐོབ་པར་བརྟེན་སྲིད་བློན་མོ་དི་མཆོག་སླར་ཡང་ལོ་ལྔའི་རིང་རྒྱ་གར་གྱི་སྲིད་བློན་གནང་གཏན་ཁེལ་བ་དང་བསྟུན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་བསུའི་འཚམས་འདྲི་མཛད་འདུག འཚམས་འདྲི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཐོག་གི་མང་གཙོའི་རྒྱལ་ཁབ་ཆེ་ཤོས་རྒྱ་གར་འདི་ད་ཆ་རྒྱལ་སྤྱིའི་སྤྱི་ཚོགས་སྣེ་ཁྲིད་མཁན་གྱི་རྒྱལ་ཁབ་གཙོ་གྲས་ཤིག་ཆགས་པར་ཐུགས་ལ་དགྱེས་སྤོབས་ཆེན་པོ་བྱུང་ཞེས་དང་། ལྷག་པར་དུ་རྒྱ་གར་འདི་གནའ་བོའི་སྤྱི་ཚོགས་ཀྱི་དཔལ་ཡོན་ཕུན་སུམ་ཚོགས་པ་དར་ཡུལ་ཞིག་ཡིན་པ་མ་ཟད་བྱམས་པ་དང་སྙིང་རྗེ་གཞི་རྩར་འཛིན་པའི་འཚེ་བ་མེད་པའི་ལྟ་སྤྱོད་ཉམས་ལེན་གནང་བཞིན་ཡོད་པ་དེ་ནི་རྒྱལ་ཁབ་གཞན་དང་མི་འདྲ་བའི་ཐུན་མིན་གྱི་ཁྱད་ཆོས་ཁྱད་པར་བ་ཞིག་རེད་ཅེས་བཀའ་བསྩལ་འདུགམགོན་པོ་༸གང་ཉིད་མཆོག་ནས་འགྲོ་བ་མི་གཅིག་གྱུར་དང་ཆོས་ལུགས་ཕན་ཚུན་འཆམ་མཐུན་གྱི་འདུ་ཤེས་གོང་མཐོར་གཏོང་རྒྱུའི་མཛད་འགན་ཐོག་རྒྱ་གར་གྱི་གནའ་རབས་ཀྱི་སེམས་ཁམས་རིག་པའི་རྣམ་གཞག་དང་འབྲེལ་བའི་བློའི་རྣམ་གཞག་དང་བྱེད་ལས་སོགས་ཀྱི་ལེགས་བཤད་དེ་དག་ད་ཆ་རྒྱ་གར་ནང་བསྐྱར་གསོ་ཡོང་ཐབས་མཛད་བཞིན་ཡོད་པ་དང་། དེར་རྒྱ་གར་བ་སྤྱི་དང་ལྷག་པར་དུ་གཞོན་སྐྱེས་ཁྲོད་ནས་དགའ་མོས་དང་རྒྱབ་སྐྱོར་ཆེན་པོ་ཐོབ་བཞིན་པ་དེས་མགོན་པོ་༸གང་ཉིད་མཆོག་ནས་རེ་བ་བཟང་པོ་ཞིག་གཟིགས་སྐོར་བཀའ་བསྩལ་བ་དང་སྦྲགས། དེང་སྐབས་རྒྱ་གར་འདི་བཞིན་འཛམ་གླིང་ཁྱོན་ཡོངས་སུ་གནའ་དེང་གཉིས་ཀྱི་ཤེས་ཡོན་ཟུང་འབྲེལ་ཐོག་ནས་འགྲོ་བ་མིའི་སེམས་ནང་དོན་དམ་གྱི་ཞི་བདེ་སྐྲུན་རྒྱུ་སླད་རེ་བ་རྒྱག་ས་གཅིག་པོ་དེ་ཡིན་པར་བཀའ་བསྩལ་འདུག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་དུས་རབས་བཅུ་བཞི་པའི་ནང་བོད་ཀྱི་མཁས་པ་ཞིག་གིས་ཁ་བ་གངས་ཅན་གྱི་ལྗོངས་འདིར་སངས་རྒྱས་ཀྱི་བསྟན་པ་མ་དར་བར་དུ་སྨག་རུམ་མུན་པས་འཐིབ་ཀྱི་རེད་ཅེས་གསུངས་པ་ལུང་འདྲེན་གྱིས་བོད་མི་ཚོས་རྒྱ་གར་འཕགས་ཡུལ་འདི་ཉིད་ནང་ཆོས་ཀྱི་འབྱུང་གནས་སུ་ངོས་འཛིན་ཞུས་ཏེ་གུས་བརྩི་ཧ་ཅང་ཞུ་བཞིན་ཡོད་དང་། དུས་རབས་བརྒྱད་པའི་ནང་བོད་དུ་དཔལ་ནཱ་ལེནྡཱའི་ལེགས་བཤད་དར་འཕེལ་བྱུང་བར་བརྟེན་བོད་ཀྱི་རིག་གནས་ཡར་རྒྱས་ཐོག་ཕན་རླབས་ཤུགས་ཆེ་བྱུང་ཡོད་པར་བཀའ་བསྩལ་མཛད་འདུག ༸གོང་ས་༸སྐྱབས་མགོན་ཆེན་པོ་མཆོག་ནས་དགའ་བསུའི་འཚམས་འདྲི་དང་འབྲེལ་ཟླ་བ་སྔོན་མའི་ནང་བོད་མི་བཙན་བྱོལ་བ་རྣམས་རྒྱ་གར་དུ་འབྱོར་ནས་ལོ་ངོ་ ༦༠ འཁོར་བའི་ཉིན་མོ་སྲུང་བརྩི་ཞུས་ཡོད་པ་དང་། རྒྱ་གར་གཞུང་མང་གཉིས་ཀྱི་ཐུགས་རྗེ་བཀའ་དྲིན་ལ་བརྟེན་ནས་ད་བར་བོད་མི་ཚོས་བཙན་བྱོལ་ནང་རང་ཉིད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྣམས་མི་ཉམས་རྒྱུན་འཛིན་གནང་ཡོད་པ་སོགས་བཀའ་འགྲེལ་དང་སྦྲགས། རྒྱ་གར་གཞུང་མང་ཡོངས་ལ་ཐུགས་རྗེ་ཆེ་ཞེས་བཀའ་བསྩལ་དང་། སྲིད་བློན་མོ་དི་མཆོག་གི་འབྱུང་འགྱུར་ལས་དོན་རྣམས་བྱ་བ་ལམ་ལྷོངས་ཡོང་བ་དང་།  ལས་དོན་ཁྲོད་ཀྱི་ངལ་བ་ལས་རྣམ་པར་རྒྱལ་ཏེ་རྒྱ་གར་མི་མང་གི་བསམ་དོན་འགྲུབ་པའི་ཐུགས་སྨོན་མཛད་འདུག གཞི་རྩའི་རྒྱ་གར་གྲོས་ཚོགས་འོག་མའི་རྒྱལ་ཡོངས་འོས་བསྡུ་ཆེན་མོ་དེ་ཟླ་ ༤ ཚེས་ ༡༡ ནས་ཟླ་ ༥ ཚེས་ ༡༩ བར་གནང་ཡོད་པ་དང་། འོས་བསྡུའི་ཁྲོད་སྲིད་བློན་མོ་དི་མཆོག་གིས་སྣེ་ཁྲིད་པའི་ཆབ་སྲིད་ཚོགས་པ་ BJP དང་དེའི་མཐུན་ཕྱོགས་ཆབ་སྲིད་ཚོགས་པ་བཅས་ལ་གྲོས་ཚོགས་འོག་མའི་གདན་གྲངས་ ༥༤༢ ཡོད་པ་ལས་གདན་གྲངས་ ༣༥༣ ཐོབ་སྟེ་འོས་བསྡུའི་རྒྱལ་ཁ་ཐོབ་ཡོད་པ་དང་། སྲོད་བློན་མོ་དི་མཆོག་ནས་ཟླ་ ༥ ཚེས་ ༢༨ དང་ ༢༩ གང་རུང་ཞིག་ཏུ་སྐབས་གཉིས་པའི་སྲིད་བློན་གྱི་དམ་འབུལ་བཞེས་རྒྱུ་རེད་འདུག

ཉེ་ཆར་ཟླ་ ༥ ཚེས་ ༡༥ ཉིན་རྒྱ་གར་གྱི་ NDTV གསར་ཁང་གི་དྲྭ་གནས་ཐོག་གསར་ཁང་གི་རྩོམ་སྒྲིག་འགན་འཛིན་ Sonia Singh ལགས་ཀྱིས་རྩོམ་བྲིས་གནང་བའི་དཔེ་དེབ་གསར་པ་ Defining India: Through Their Eyes ཞེས་པ་ལས་ཟུར་འདོན་གྱིས་གནས་ཚུལ་སྤེལ་བའི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསར་འགོད་པ་ Sonia Singh ལགས་ཀྱི་བཅར་འདྲིའི་ལས་རིམ་ཞིག་གི་ཐོག་ཕྱི་ལོ་ ༢༠༡༤ ལོར་རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་དུ་གཞུང་འབྲེལ་འཚམས་གཟིགས་ཕེབས་སྐབས་སྲིད་འཛིན་ཞི་ཅིན་ཕིང་གིས་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་རྒྱ་གར་ནང་མཇལ་འཕྲད་ཞུ་རྒྱུར་མོས་མཐུན་གནང་ཡོད་ཀྱང་། རྒྱ་གར་གཞུང་གིས་དེར་དོགས་ཟོན་གནང་སྟབས་ཕྱོགས་གཉིས་དབར་གྱི་མཇལ་འཕྲད་གནང་ཐུབ་མེད་ཅེས་བཀའ་ལན་བསྩལ་སྐོར་གསན་ཚུལ་ཐོན་བཀོད་ཡོད་པ་རེད།གནས་ཚུལ་དེ་དང་འབྲེལ་ཁ་སང་རྒྱལ་སྤྱིའི་གསར་ཁང་ཆེ་གྲས་ The Guardian ཞེས་པའི་དྲྭ་གནས་ཐོག་གསར་ཁང་གི་ལྷོ་ཨེ་ཤ་ཡ་མངའ་ཁུལ་གྱི་གསར་འགོད་པ་ Michael Safi ལགས་དང་རྒྱ་ནག་སྡེ་ཚན་གྱི་གསར་འགོད་པ་ Lily Kuo ལགས་གཉིས་ཀྱིས་ཕྱོགས་སྒྲིག་ཞུས་པའི་གནས་ཚུལ་ནང་ཕྱི་ལོ་ ༢༠༡༤ ལོར་རྒྱ་གར་དབུས་གཞུང་ལ་བོད་ཀྱི་གནད་དོན་ཐོག་སློབ་སྟོན་ཞུ་མཁན་རྒྱ་གར་གསང་བའི་ལས་ཁུངས་ཀྱི་ལས་བྱེད་ཟུར་པ་སྐུ་ཞབས་ Amitabh Mathur ལགས་ནས་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གི་སྲིད་འཛིན་ཞི་ཅིན་ཕིང་དང་ལྷན་དུ་རྒྱ་གར་ནང་མཇལ་འཕྲད་གནང་འདོད་ཡོད་སྐོར་གྱི་གནས་ཚུལ་གང་འཚམ་ཞིག་གོ་ཐོས་བྱུང་ཡང་། ཕྱོགས་གཉིས་དབར་གྱི་མཇལ་འཕྲད་དེ་མོས་མཐུན་བྱུང་ཡོད་མེད་དང་དེར་རྒྱ་གར་གཞུང་ནས་ཐེ་བྱུས་གནང་ཡོད་མེད་ཀྱི་ཐད་ལ་ཤེས་རྟོགས་གང་ཡང་མ་བྱུང་ཞེས་གསུངས་པ་དང་ཆབས་ཅིག གལ་སྲིད་རྒྱ་གར་གཞུང་ནས་སྐབས་དེའི་མཇལ་འཕྲད་ལ་དགག་པ་གནང་བའི་དབང་དུ་བཏང་ཚེ་རྒྱ་གར་གཞུང་གིས་དགོས་པ་རྒྱུ་མཚན་ཞིག་ལ་གཟིགས་ནས་༸གོང་ས་མཆོག་དང་ཞི་ཅིན་ཕིང་རྣམ་གཉིས་ཀྱི་མཇལ་འཕྲད་ལ་དགག་པ་གནང་ཡོད་སྲིད་པ་རེད་ཅེས་གསུངས་ཡོད་པ་དང་། རྒྱ་ནག་ཕྱི་སྲིད་ལས་ཁུངས་ནས་དབུ་ཁྲིད་རྣམ་གཉིས་ཀྱི་མཇལ་འཕྲད་གནང་རྒྱུའི་སྐོར་གྱི་གནས་ཚུལ་དེ་ནི་གཞི་རྩ་མེད་པ་ཞིག་རེད་ཅེས་ལན་འདེབས་བྱས་ཡོད།དེ་རིང་རླུང་འཕྲིན་ཁང་ནས་༸དཔལ་ལྡན་དགའ་ལྡན་ཕོ་བྲང་གི་དྲུང་ཆེ་འཆི་མེད་རིག་འཛིན་ལགས་སུ་ཞལ་པར་བརྒྱུད་འབྲེལ་བ་ཞུས་པར་བཅར་འདྲི་དང་བཞེས་གནང་མེད་ཀྱང་། ཕྱི་ཚེས་ ༢༠ ཉིན་ Sonia Singh ལགས་ཀྱི་དཔེ་དེབ་ལས་ཁྲོད་པའི་གནས་ཚུལ་ལ་བསལ་བཤད་གནང་བའི་ཕྱག་ཡིག་ཞིག་གསར་ཁང་ལ་གནང་སོན་བྱུང་སོང་། གསལ་བཤད་ཀྱི་ཕྱག་ཡིག་ནང་ཕྱི་ལོ་ ༢༠༡༤ ལོར་རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་དུ་གཞུང་འབྲེལ་འཚམས་གཟིགས་ཕེབས་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་འཛིན་ཞི་ཅིན་ཕིང་དང་མཇལ་འཕྲད་མཛད་རྒྱུའི་ཞུ་སྐུལ་གནང་ཡོད་ཀྱང་། རྒྱ་ནག་ཕྱོགས་ནས་དེར་ཡ་ལན་གང་ཡང་གནང་མེད་སྟབས་དབུ་ཁྲིད་རྣམ་གཉིས་ཀྱི་མཇལ་འཕྲད་དེ་རྒྱ་གར་གཞུང་གིས་དོགས་ཟོན་གནང་སྟབས་བྱུང་ཐུབ་མེད་པ་རེད་ཅེས་གསུངས་པ་དེ་གཞི་རྩ་མེད་པ་ཞིག་རེད་ཅེས་བཀའ་ལན་བསྩལ་འདུག སྐབས་དེའི་ཞུ་སྐུལ་དེ་ཕྱི་ལོ་ ༡༩༩༡ ལོར་རྒྱ་ནག་གི་སྲིད་འཛིན་ Jiang Zemin སྐབས་སུ་རྒྱ་ནག་གི་སྲིད་བློན་ Li Peng རྒྱ་གར་ལ་འཚམས་གཟིགས་ཕེབས་སྐབས་མཇལ་འཕྲད་གནང་རྒྱུའི་ཞུ་སྐུལ་གྱི་ཐུགས་རེ་གནང་བང་གཅིག་མཚུངས་ཡིན་ཞེས་བཀའ་ཕེབས་ཡོད་པ་རེད།

འདི་ལོ་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་དགུང་ཀེག་ཁེལ་ཡོད་སྟབས་འཛམ་གླིང་ཡུལ་གྲུ་གང་སར་གནས་པའི་བོད་མི་ཡོངས་ཀྱིས་མ་གྲོས་བསམ་པ་གཅིག་མཐུན་ཐོག་མགོན་པོ་༸གང་ཉིད་མཆོག་གི་༸སྐུའི་འཕྲོད་བཞེས་དང་དགུང་ཀེག་གི་མཚན་མ་ཐམས་ཅད་ཞི་ནས་བསྟན་པ་དང་འགྲོ་བའི་དོན་དུ་༸སྐུ་ཚེ་ཡུན་དུ་བརྟན་ཕྱིར་ཞབས་རིམ་རྒྱ་ཆེ་གསོག་སྒྲུབ་གནང་དང་གནང་བཞིན་ཡོད་པ་ལྟར། བལ་ཡུལ་ཀོ་པན་དགོན་པས་གཙོ་འགན་བཞེས་ཐོག་བལ་ཡུལ་དུ་ཡོད་པའི་རིས་མེད་དགོན་སྡེ་ཁག་གི་ངོས་ནས་ཀྱང་ཁ་སང་ཕྱི་ཟླ་ ༥ ཚེས་ ༢༠ ཉིན་བལ་ཡུལ་ཀོ་པན་བཙུན་མའི་དགོན་པར་གུ་རུའི་འབུམ་ཚོགས་ཀྱི་སྒོ་ནས་དམིགས་བསལ་ཞབས་རིམ་རྒྱ་ཆེ་གསོག་སྒྲུབ་གནང་འདུག དེའང་ཀོ་པན་དགོན་པའི་བླ་མ་བཟོད་པ་རིན་པོ་ཆེ་མཆོག་གིས་བཀའ་འབྲེལ་ལྟར་ཛ་དྲག་ངང་ཚོགས་ཡོད་པ་རེད་འདུག༸གོང་ས་མཆོག་གི་༸སྐུ་ཕྱཱའི་ཞབས་རིམ་དེའི་ཐད་བལ་ཡུལ་དགེ་ལུགས་དགོན་ཁག་བཅུ་དང་རྙིང་མའི་དགོན་པ་ཞེ་ཆེན་བསྟན་གཉིས་དར་རྒྱས་གླིང་དགོན་པ། འཇམ་མགོན་ཀོང་སྤྲུལ་བཀའ་བརྒྱུད་དགོན་པ་བཅས་ཀྱི་སྐུ་ཚབ་དང་དགེ་འདུན་པ་ཐོུང་ནས་ཞབས་རིམ་སྒྲུབ་གནང་ཡོད་པ་མ་ཟད། ཞབས་རིམ་གསོག་སྒྲུབ་དེའི་སྐབས་སུ་གྲྭ་བཙུན་ཞལ་གྲངས་ ༨༠༠ ལྷག་ནས་མཉམ་ཞུགས་གནང་འདུགདེ་དང་ཕྱོགས་མཚུངས་བླ་མ་བཟོད་པ་རིན་པོ་ཆེ་མཆོག་གིས་གུ་རུ་རིན་པོ་ཆེའི་གོས་སྐུ་ཆེན་པོ་ཞིག་གསར་བཞེངས་དང་འབྲེལ་ཀོ་པན་གྲྭ་བཙུན་ཐོུང་ནས་ལོ་ལྟར་ཀོ་པན་བཙུན་དགོན་དུ་བོད་བསྟན་སྲིད་དང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱཱའི་ཞབས་རིམ་ཆེད་དུ་གུ་རུའི་འབུམ་ཚོགས་ཤིག་ལོ་ལྟར་ཚོགས་སྲོལ་ཡོད་པ་དང་ད་བར་ལོ་ངོ་གསུམ་ཙམ་སོང་ཡོད་པ་རེད། བལ་ཡུལ་དོན་གཅོད་ལས་ཁུངས་ནས་འགན་ཁུར་འོག་ལོ་ལྟར་བལ་ཡུལ་ཞེ་ཆེན་དགོན་པའི་ནང་ཆོས་བརྒྱུད་རིས་མེད་ཀྱི་དགེ་འདུན་པ་དང་མང་ཚོགས་བཅས་སྟོང་ཕྲག་བརྒལ་བ་མཉམ་ཞུགས་ཀྱིས་དུས་ཡུན་བདུན་ཕྲག་གཅིག་ཙམ་གྱི་རིང་བོད་བསྟན་སྲིད་དང་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རིས་མེད་བླ་ཆེན་རྣམས་ཀྱི་༸སྐུ་ཚེ་མཛད་འཕྲིན་ཕྱིར་དུ་གུ་རུའི་འབུམ་ཚོགས་ཤིག་ཀྱང་བོད་ཟླ་ལྔ་པའི་ནང་ཚོགས་སྲོལ་ཡོད་པ་རེད།

ཉེ་ཆར་ཟླ་ ༥ ཚེས་ ༡༥ ཉིན་རྒྱ་གར་གྱི་ NDTV གསར་ཁང་གི་དྲྭ་གནས་ཐོག་གསར་ཁང་གི་རྩོམ་སྒྲིག་འགན་འཛིན་ Sonia Singh ལགས་ཀྱིས་རྩོམ་བྲིས་གནང་བའི་དཔེ་དེབ་གསར་པ་ Defining India: Through Their Eyes ཞེས་པ་ལས་ཟུར་འདོན་གྱིས་གནས་ཚུལ་སྤེལ་བའི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསར་འགོད་པ་ Sonia Singh ལགས་ཀྱི་བཅར་འདྲིའི་ལས་རིམ་ཞིག་གི་ཐོག་རྒྱ་གར་གྱི་སྲིད་བློན་རྣམ་པ། རྒྱ་དཀར་ནག་གཉིས་དབར་གྱི་འབྲེལ་ལམ་དང་དེའི་བར་གྱི་བོད་བཅས་ཀྱི་ཐོག་བཀའ་ལན་མཛད་པའི་ཁྲོད་དུ་ཕྱི་ལོ་ ༢༠༡༤ ལོར་རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་དུ་གཞུང་འབྲེལ་འཚམས་གཟིགས་ཕེབས་སྐབས་སྲིད་འཛིན་ཞི་ཅིན་ཕིང་གིས་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་དུ་རྒྱ་གར་ནང་མཇལ་འཕྲད་ཞུ་རྒྱུར་མོས་མཐུན་གནང་ཡོད་ཀྱང་། རྒྱ་གར་གཞུང་གིས་དེར་དོགས་ཟོན་གནང་སྟབས་ཕྱོགས་གཉིས་དབར་གྱི་མཇལ་འཕྲད་གནང་ཐུབ་མེད་ཅེས་བཀའ་ལན་བསྩལ་སྐོར་བཀོད་ཡོད་པ་རེད། གནས་ཚུལ་དེ་དང་འབྲེལ་ཁ་སང་རྒྱལ་སྤྱིའི་གསར་ཁང་ཆེ་གྲས་ The Guardian ཞེས་པའི་དྲྭ་གནས་ཐོག་གསར་ཁང་གི་ལྷོ་ཨེ་ཤ་ཡ་མངའ་ཁུལ་གྱི་གསར་འགོད་པ་ Michael Safi ལགས་དང་རྒྱ་ནག་སྡེ་ཚན་གྱི་གསར་འགོད་པ་ Lily Kuo ལགས་གཉིས་ཀྱིས་ཕྱོགས་སྒྲིག་ཞུས་པའི་གནས་ཚུལ་ནང་ཕྱི་ལོ་ ༢༠༡༤ ལོར་རྒྱ་གར་དབུས་གཞུང་ལ་བོད་ཀྱི་གནད་དོན་ཐོག་སློབ་སྟོན་ཞུ་མཁན་རྒྱ་གར་གསང་བའི་ལས་ཁུངས་ཀྱི་ལས་བྱེད་ཟུར་པ་སྐུ་ཞབས་ Amitabh Mathur ལགས་ནས་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གི་སྲིད་འཛིན་ཞི་ཅིན་ཕིང་དང་ལྷན་དུ་རྒྱ་གར་ནང་མཇལ་འཕྲད་གནང་འདོད་ཡོད་སྐོར་གྱི་གནས་ཚུལ་གང་འཚམ་ཞིག་གོ་ཐོས་བྱུང་ཡང་། ཕྱོགས་གཉིས་དབར་གྱི་མཇལ་འཕྲད་དེ་མོས་མཐུན་བྱུང་ཡོད་མེད་དང་དེར་རྒྱ་གར་གཞུང་ནས་ཐེ་བྱུས་གནང་ཡོད་མེད་ཀྱི་ཐད་ལ་ཤེས་རྟོགས་གང་ཡང་མ་བྱུང་ཞེས་གསུངས་པ་དང་ཆབས་ཅིག གལ་སྲིད་རྒྱ་གར་གཞུང་ནས་སྐབས་དེའི་མཇལ་འཕྲད་ལ་དགག་པ་གནང་བའི་དབང་དུ་བཏང་ཚེ་རྒྱ་གར་གཞུང་གིས་དགོས་པ་རྒྱུ་མཚན་ཞིག་ལ་གཟིགས་ནས་༸གོང་ས་མཆོག་དང་ཞི་ཅིན་ཕིང་རྣམ་གཉིས་ཀྱི་མཇལ་འཕྲད་ལ་དགག་པ་གནང་ཡོད་སྲིད་པ་རེད་ཅེས་གསུངས་འདུག ཁོང་གིས་ད་དུང་ཕྱི་ལོ་ ༢༠༡༤ ལོར་སྲིད་བློན་ Narendra Modi མཆོག་གིས་དབུ་ཁྲིད་པའི་རྒྱ་གར་གཞུང་དེ་ཡང་གཞུང་འཛིན་གསར་པ་ཞིག་ཡིན་པ་མ་ཟད། སྲིད་འཛིན་ཞི་ཅིན་ཕིང་ཡང་རྒྱ་གར་ནང་ལ་གཞུང་འབྲེལ་འཚམས་གཟིགས་ཐེངས་དང་པོ་ཕེབས་ཀྱི་ཡོད་སྟབས། རྒྱ་དཀར་ནག་གཉིས་ཀྱི་འབྲེལ་བ་ལ་དོ་ཕོག་མི་འགྲོ་བའི་སླད་དུ་རྒྱ་གར་གྱིས་དགག་པ་གནང་བ་ཞིག་ཡིན་སྲིད་པ་དང་། སྐབས་དེར་རྒྱ་ནག་ཕྱོགས་ནས་༸གོང་ས་མཆོག་དང་མཇལ་འཕྲད་གནང་རྒྱུར་མོས་མཐུན་གནང་བ་དེ་ནི་རྒྱ་ནག་གི་སྔོན་ཚུད་ནས་རྒྱ་གར་གཞུང་ནས་མཇལ་འཕྲད་དེར་དགག་པ་གནང་རྒྱུ་ཡིན་པ་ཤེས་པའི་ཐོག་ནས་མོས་མཐུན་གནང་བ་ཞིག་ཡིན་པ་མ་ཟད། ལྷག་པར་དུ་རྒྱ་ནག་རང་ཉིད་ཀྱི་ཁེ་ཕན་བསྒྲུབ་ཐབས་སུ་རྒྱ་གར་གཞུང་དང་བོད་མིའི་དབུ་ཁྲིད་དབར་གྱི་འབྲེལ་བ་ལ་དོ་ཕོག་གཏོང་རྒྱུར་དམིགས་ཡོད་སྲིད་པ་རེད་ཅེས་ཀྱང་གསུངས་འདུག དེ་བཞིན་ཨ་རིའི་ Columbia གཙུག་ལག་སློབ་གཉེར་ཁང་གི་བོད་གནས་མཁས་དབང་སྐུ་ཞབས་ Robbie Barnett ལགས་ནས་སྤྱི་ཡོངས་ནས་རྒྱ་ནག་གྱི་མགོ་འཁྲིད་ཁྲོད་ལ་༸གོང་ས་མཆོག་དང་མཇལ་འཕྲད་གནང་འདོད་ཀྱི་རྣམ་པ་དང་བཀའ་མོལ་གང་ཡང་མཐོང་ཐོས་མ་བྱུང་ཡང་། གལ་སྲིད་གསར་འགོད་པ་ Sonia Singh ལགས་ཀྱིས་ལུང་འདྲེན་གནང་བའི་བཀའ་མོལ་དེ་ངོ་མ་ཡིན་ཚེ་བོད་རྒྱའི་གནད་དོན་ཐད་ཀྱི་འགྱུར་བ་ཆེན་པོ་ཞིག་ཡིན་པ་དང་དེ་ཡང་གཙོ་བོ་ད་བར་རྒྱ་ནག་གཞུང་ནས་བོད་ཐོག་འཛིན་པའི་སྲིད་བྱུས་དང་། གོ་སྐབས་ནམ་བྱུང་ཐོག་༸གོང་ས་མཆོག་ལ་མཚན་དམད་ཞུ་བཞིན་པའི་ལས་དོན་བཅས་ལ་འགྱུར་བ་ངེས་ཅན་ཞིག་ཐེབས་རྒྱུ་རེད་ཅེས་གསུངས་འདུག༸གོང་ས་མཆོག་གིས་དབུ་ཁྲིད་རྣམ་གཉིས་དབར་གྱི་མཇལ་འཕྲད་སྐོར་གསུངས་པ་དེ་ནི་བོད་རྒྱའི་དབར་གྱི་འབྲེལ་མོལ་གྱི་བརྒྱུད་རིམ་ཆད་བཞིན་ཡོད་ཀྱང་རེ་བ་ཅིག་ད་ལྟའང་ཟད་མེད་པའི་རྣམ་པ་མངོན་གསལ་གནང་ཕྱིར་གསུངས་ཡོད་པ་ཞིག་ཡིན་སྲིད་པར་གསུངས་ཡོད།གཞི་རྩའི་རྒྱ་ནག་གི་སྲིད་འཛིན་དང་མཇལ་འཕྲད་གནང་རྒྱུའི་སྐོར་གྱི་གནས་ཚུལ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གིས་གསར་འགོད་པ་ Sonia Singh ལགས་ཀྱི་བཅར་འདྲིར་བཀའ་ལན་བསྩལ་བའི་ཆ་ཤས་ཤིག་ཞིག་ཡིན་པ་དང་། གནད་དོན་དེའི་ཐད་ད་ལྟའི་ཆར་༸དཔལ་ལྡན་དགའ་ལྡན་ཕོ་བྲང་ཡིག་ཚང་ནས་གསལ་བཤད་གང་ཡང་གནང་མེད་ཀྱང་། རྒྱ་ནག་ཕྱི་སྲིད་ལས་ཁུངས་ནས་ The Guardian གསར་ཁང་གི་བཅར་འདྲིར་ལན་འདེབས་བྱས་པར་དབུ་འཁྲིད་རྣམ་གཉིས་མཇལ་འཕྲད་གནང་རྒྱུའི་སྐོར་གྱི་གནས་ཚུལ་དེ་ནི་གཞི་རྩ་མེད་པའི་གནས་ཚུལ་ཞིག་རེད་ཅེས་ཁས་ལེན་གནང་མེད་པ་རེད། འོན་ཀྱང་གསར་འགོད་པ་ Sonia Singh ལགས་ཀྱིས་སྐབས་དེར་༸གོང་ས་མཆོག་གི་བཀའ་ལན་དེ་ལྟར་མཛད་ཡོད་པ་མ་ཟད། ད་རེས་ཁོང་གི་དཔེ་དེབ་ནང་བཀོད་པའི་བཀའ་ལན་གྱི་ཆ་ཤས་དེ་༸གོང་ས་མཆོག་གི་༸སྐུ་སྒེར་ཡིག་ཚང་ནས་བཀའ་ཁྲོལ་ཡོད་པའི་ཐོག་ནས་ཆེད་བཀོད་གནང་བ་ཞིག་ཡིན་ཞེས་གསུངས་འདུག དེ་བཞིན་དབུ་ཁྲིད་རྣམ་གཉིས་དབར་གྱི་མཇལ་འཕྲད་སྐོར་གྱི་གནས་ཚུལ་དང་འབྲེལ། འཇར་མན་གནས་ཞུགས་རྒྱ་ནག་གི་བོད་དང་ཤིན་ཅང་གཙོ་གྱུར་གྲངས་ཉུང་མི་རིགས་ཐོག་འཛིན་པའི་སྲིད་བྱུས་ལ་དཔྱད་ཞིབ་གནང་མཁན་སྐུ་ཞབས་ Adrian Zenz ལགས་ནས་སྲིད་འཛིན་ཞི་ཅིན་ཕིང་གིས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་རྒྱུའི་མོས་མཐུན་གནང་ཡོད་ཚེ་དེ་ནི་གཙོ་བོ་རྒྱ་ནག་རང་ཉིད་ལ་༸གོང་ས་མཆོག་གི་མཚན་མཐོང་བརྒྱུད་རྒྱལ་སྤྱིའི་ཐོག་ལ་འཇམ་པོའི་སྟོབས་ཤུགས་ཐོབ་ཐབས་དང་། ལྷག་པར་དུ་ཕྱི་ལོ་ ༢༠༡༣ ལོའི་ལོ་མཇུག་ཙམ་དུ་སྲིད་འཛིན་ཞི་ཅིན་ཕིང་གིས་ཡོངས་བསྒྲགས་གནང་བའི་རྒྱུད་ཅིག་ལམ་གཅིག་གི་སྲིད་བྱུས་དེར་མང་ཚོགས་ནས་སེམས་གསོའི་རྒྱབ་སྐྱོར་ཐོབ་ཐབས་ཀྱི་དགེ་མཚན་སོགས་ལ་ཆེད་དམིགས་གནང་བ་ཞིག་རེད་ཅེས་གསུངས་འདུགསྔར་ལོ་རྒྱ་གར་གཞུང་གིས་བོད་མིའི་སྒྲིག་འཛུགས་ཀྱིས་རྒྱལ་ས་ལྡི་ལིར་གོ་སྒྲིག་ཞུས་པའི་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་མཛད་སྒོའི་ཐོག་གཞུང་གྱི་གནད་ཡོད་མི་ན་མཉམ་ཞུགས་གནང་མི་ཆོག་པའི་བཀའ་རྒྱ་གནང་བ་སོགས་ལུང་འདྲེན་དང་འབྲེལ་ཏེ་སྤྱིར་རྒྱ་གར་གཞུང་ནས་༸གོང་ས་མཆོག་དང་བོད་མིར་བསྐྱབ་བཅོལ་གནང་ཡོད་ཀྱང་། བོད་ཀྱི་གནད་དོན་ཐོག་འཛེམ་ཟོན་མེད་པར་གསུང་ཕོད་མཁན་ཞིག་མིན་པ་མ་ཟད་བོད་དང་རྒྱ་ནག་གཉིས་ལས་རྒྱ་ནག་དེ་གནད་ཆེ་བར་འཛིན་མཁན་ཞིག་རེད་ཅེས་གསུངས་འདུག གཞི་རྩའི་གསར་འགོད་པ་ Sonia Singh ལགས་ཀྱིས་རྩོམ་བྲིས་གནང་བའི་དཔེ་དེབ་གསར་པ་ Defining India ཞེས་པའི་ནང་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་ནེཧརུ་ནས་གཙོས་པའི་གཞུང་རིམ་པས་བོད་མིར་གཟིགས་རྟོག་གནང་སྐོར་བཀའ་ལན་མཛད་པ་སོགས་ཀྱང་བཀོད་ཡོད་པ་རེད།