༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཧོང་ཀོང་ནང་གི་གནས་སྟངས་ཐོག་ཐུགས་འཚབ་ཆེན་པོ་ཡོད་པ་བཀའ་བསྩལ་བ་དང་འབྲེལ། གནད་དོན་དེ་གྲོས་མོལ་གྱི་སྒོ་ནས་སེལ་དགོས་གལ་ཡིན་པའི་ལམ་སྟོན་མཛད་འདུག ཁ་སང་ཐེ་ཝན་གྱི་ Hakka བརྙན་འཕྲིན་ཁང་གིས་ཉེ་སྔོན་༸གོང་ས་མཆོག་གིས་མ་ན་ལི་ཁུལ་དུ་གསུང་ཆོས་གནང་སྐབས་སུ་མགོན་པོ་༸གང་ཉིད་མཆོག་ལ་བཀའ་འདྲི་ཞུས་པའི་བརྙན་ཞིག་རྒྱང་སྲིང་བྱས་འདུག་པ་དང་དེའི་ནང་༸གོང་ས་མཆོག་གིས་ཧོང་ཀོང་དང་ཐེ་ཝན།  དེ་བཞིན་བོད་དང་རྒྱ་ནག་སོགས་ཀྱི་སྐོར་ལ་བཀའ་མོལ་གནང་སྟེ་ནམ་ཞིག་རྒྱ་ནག་ལ་འགྱུར་བ་ཞིག་འགྲོ་རྒྱུ་ཡིན་པར་བཀའ་གནང་འདུག སྐབས་དེར་གསར་འགོད་པས་ཉེ་ཆར་ཧོང་ཀོང་གི་ནང་དུ་མི་མང་གིས་ངོ་རྒོལ་བྱུང་བཞིན་པར་གང་ཉིད་ཀྱིས་ཐུགས་སྣང་མཛད་ཀྱི་ཡོད་མེད་བཀའ་འདྲི་ཞུས་པར་༸མགོན་པོ་མཆོག་གིས་སྔོན་ཆད་ཏིན་ཞའོ་ཕེན་གྱིས་དངོས་དོན་བདེན་འཚོལ་གྱི་ཐོག་ནས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ཤིག་གཏན་འབེབས་བྱས་ཡོད་པ་དེ་ནི་ངོ་མས་རླབས་ཆེན་རང་བཞིན་ཞིག་རེད་ཅེས་བཀའ་བསྩལ་བ་དང་སྦྲགས། ཉེ་བའི་བདུན་ཕྲག་ཁ་ཤས་ནང་དུ་ཧོང་ཀོང་དུ་ཟིང་ཆ་ཆེན་མོ་ལངས་ཡོད་པར་བརྟེན་ངོས་རང་སེམས་ཁྲལ་ཆེན་པོ་བྱུང།  རྩ་བའི་ཡུལ་ཕྱོགས་གང་དུ་སོང་ཡང་།  ཞི་མོལ་གྱི་ལམ་ནས་ཞི་བདེ་བསྐྲུན་རྒྱུ་དེ་གལ་ཆེན་པོ་རེད།  ཁོང་ཁྲོའི་དབང་དུ་སོང་བ་ཡིན་ན་བེད་སྤྱོད་ཡོད་པ་མ་རེད།   ངོས་རང་སེམས་ཁྲལ་ཆེན་པོ་ཡོད་ནའང་སྨོན་ལམ་རྒྱག་རྒྱུ་ལས་བྱེད་ཐབས་གང་ཡང་མི་འདུག་ཅེས་བཀའ་འདུག ༸གོང་ས་མཆོག་གིས་དེ་དང་ཆབས་ཅིག ཐེ་ཝེན་གྱིས་མང་གཙོ་དང་རང་དབང་རྒྱུན་འཛིན་བྱས་ཡོད་པ་མ་ཟད། གནའ་བོའི་རྒྱ་ནག་གི་ཤུལ་བཞག་གི་རིག་གནས་དང་ནང་བསྟན་གྱི་གཞུང་ལུགས་རྣམས་རྒྱུན་འཛིན་ཡག་པོ་བྱས་ཡོད་པ་དེ་ཧ་ཅང་གི་གལ་ཆེན་པོ་ཡིན་པ་དང་།  དབང་ཆ་གཅིག་སྡུད་ཀྱི་རྒྱ་ནག་རྒྱལ་ཁབ་ཀྱིས་ཐེ་ཝན་ལ་བཅིངས་གྲོལ་གཏོང་དགོས་པར་བརྗོད་བཞིན་ཡོད་ནའང་།  ངོས་ནས་མ་འོངས་ཀྱི་ཕུགས་རྒྱང་རིང་པོའི་ནང་ཐེ་ཝན་གྱི་རྒྱུན་འཛིན་བྱས་པའི་མང་གཙོ་དང་རང་དབང་། དེ་བཞིན་སྲོལ་རྒྱུན་གྱི་རིག་གཞུང་དང་ཆོས་ལུགས་ཀྱི་སློབ་སྦྱོང་དེ་རྒྱ་ནག་ལས་རྣམ་པར་རྒྱལ་ཐུབ་པ་རེད་ཅེས་བཀའ་བསྩལ་བ་མ་ཟད། ད་ལྟའི་ཆར་རྒྱ་ནག་དེ་ཕྱི་ལོག་ལ་འབྲེལ་བ་མང་དུ་འགྲོ་བཞིན་པར་བརྟེན་ནམ་ཞིག་འགྱུར་བ་ཞིག་འགྲོ་ངེས་རེད་ཅེས་བཀའ་ལན་བསྩལ་འདུག དེ་བཞིན་གསར་འགོད་པས་མི་ལོ་ ༥༩ སྔོན་ལ་དུས་དྲན་ཞིག་གི་ཐོག་གི་ཐོག་ཏུ་མགོན་པོ་༸གང་ཉིད་མཆོག་གིས་མི་མང་ལ་གསུང་བཤད་གནང་བའི་ནང་བོད་མི་རྣམས་བཙན་བྱོལ་དུ་འབྱོར་བའི་དམིགས་འབེན་དང་པོ་དེ་བོད་མི་རིགས་ཀྱི་ཆོས་དང་རིག་གཞུང་སྲུང་སྐྱོབ་བྱེད་རྒྱུ་དེ་རེད་ཅེས་གསུངས་འདུག    བོད་ཀྱི་རིག་གཞུང་དེ་ལ་གཞན་དང་མི་འདྲ་བའི་ཁྱད་ཆས་ག་རེ་ཡོད་པ་རེད་དམ་ཞེས་བཀའ་འདྲི་ཞུས་པར་༸གོང་ས་མཆོག་གིས་བོད་ཀྱི་རིག་གཞུང་ཟེར་དུས་དཔལ་ན་ལེནྡྲ་ནས་དར་ཡོང་བའི་ནང་པའི་གཞུང་ཆེན་ཁག་གི་ལྟ་གྲུབ་ཡོད་ཚད་འཐུས་སྒོ་ཚང་བའི་ཐོག་ནས་བོད་ཀྱི་སྐད་ཡིག་གི་ནང་དུ་ཡོད་པ་མ་ཟད།  གཞུང་ཆེན་དེ་དག་ལ་སློབ་སྦྱོང་བྱས་པ་བརྒྱུད་མཚན་ཉིད་རིག་པར་དམིགས་བསལ་གྱིས་དོ་སྣང་བྱེད་ཀྱི་ཡོད་སྟབས།   ཕྱི་དངོས་བོ་ཙམ་མ་ཡིན་པར་ནང་སེམས་རྒྱུད་ལ་ཡང་བདེ་སྐྱིད་བསྐྲུན་ཐུབ་པའི་གནའ་བོའི་རིག་གཞུང་དེ་བོད་ཀྱིས་ལོ་ངོ་སྟོང་ཕྲག་གི་རིང་ལ་རྒྱུན་འཛིན་བྱས་ཡོད་པར་བཀའ་བསྩལ་འདུག བཀའ་འདྲིའི་ལས་རིམ་དེའི་སྐབས་སུ་༸གོང་ས་མཆོག་གིས་བོད་དོན་དང་འབྲེལ་ནས་རྒྱ་ནག་དེ་དབང་ཆ་གཅིག་སྡུད་ཀྱི་རྒྱལ་ཁབ་ཅིག་ཡིན་ནའང་། སྲིད་འཛིན་ཞིི་ཅིན་ཕིང་གིས་གདོང་ལེན་བྱས་ཏེ་ལྐོག་ཟ་རུལ་སུངས་ལ་འཐབ་འཛིན་བྱེད་བཞིན་པ་དེ་ཧ་ཅང་ཡག་པོ་ཡིན་པ་དང་། བོད་མིར་ཆ་མཚོན་ནའང་རང་བཙན་རྩོད་ཀྱི་མེད་པར་ཀྲུང་ཧ་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ལ་ངོས་འཛིན་གྱིས་རྒྱ་ནག་དང་ལྷན་དུ་འདུག་འདོད་ཡོད་པ་དང་། དེ་ལྟར་བྱུང་ན་དེང་རབས་ཀྱི་དཔལ་འབྱོར་དང་འཛུགས་སྐྲུན་གྱི་ཐོག་ནས་རྒྱ་ནག་གིས་བོད་མིའི་བདེ་སྡུག་ལ་རོགས་རམ་བྱེད་ཐུབ་པ་བཞིན།  བོད་མིའི་ངོས་ནས་ཀྱང་ནང་ཆོས་བརྒྱུད་ནས་རྒྱ་ནག་ནང་གི་ནང་པ་མང་པོར་ཕན་པ་བསྒྲུབ་ཐུབ་ཀྱི་ཡོད་པར་བཀའ་བསྩལ་འདུག དེ་བཞིན་ཐེ་ཝན་དུ་ཆིབས་བསྒྱུར་མཛད་རྒྱུ་ཡིན་མིན་སྐོར་གྱི་བཀའ་འདྲིར་༸གོང་ས་མཆོག་ནས་རྩ་བའི་དེའི་ཐོག་རྒྱ་ནག་སྐམ་སའི་ཕྱོགས་ནས་བཟང་ཕྱོགས་ཀྱི་ཡར་ལན་ཞིག་དགོས་པ་དེ་གལ་ཆེན་པོ་ཡིན་སྐོར་བཀའ་སྩལ་བ་དེ་ལྟར་ཡང་། མགོན་པོ་གང་ཉིད་མཆོག་ནས་ད་བར་ཐེ་ཝན་ནང་ཐེངས་གསུམ་ཆིབས་བསྒྱུར་མཛད་མྱོང་ཡོད་པ་དེ་ནམ་ཡང་བརྗེད་རྒྱུ་མིན་པ་དང་། མ་འོངས་པར་གོ་སྐབས་བྱུང་ན་ངེས་པར་དུ་ཆིབས་བསྒྱུར་མཛད་རྒྱུ་ཡིན་སྐོར་བཀའ་བསྩལ་བ་དང་ཆབས་ཅིག ཐེ་ཝན་མང་ཚོགས་ཀྱིས་བོད་རྒྱུད་ནང་བསྟན་རྒྱུན་འཛིན་ཡག་པོ་བྱས་ཡོད་སྟབས་མ་འོངས་པར་རྒྱ་ནག་མི་མང་ལ་ཕན་ཐོགས་ངེས་ཡིན་པའི་བཀའ་ལན་མཛད་འདུག རྩ་བའི་ཐེངས་འདིའི་བཀའ་འདྲིའི་སྐབས་སུ། ༸གོང་ས་མཆོག་གི་སྐུ་སྒེར་གྱི་དཀའ་ཚེགས་ཆེ་བའི་མི་ཚེ་བརྒྱུད་རིམ་དང་འགྲོ་བ་མིའི་རིགས་ཀྱི་སེམས་ཀྱི་བདེ་སྐྱིད།  དེ་བཞིན་བོད་ཀྱི་ཆོས་རིག་འཛིན་སྐྱོང་སོགས་ཀྱི་ཐད་ནས་ཀྱང་བཀའ་ལན་བསྩལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱིར་ནོར་༸གོང་ས་སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་དུ་ཕྱི་ནང་གི་དད་ལྡན་ཆོས་ཞུ་བ་ཚོར་རང་ཉིད་ལ་གདོན་བགེགས་བྱེད་མཁན་ཡོད་པར་སྣང་བ་དེ་ནི་གཙོ་བོ་རང་གཅེས་འཛིན་དབང་གིས་ཡོང་གི་ཡོད་སྟབས་རང་ཉིད་ཀྱིས་སྣང་སྲིད་ཐམས་ཅད་གཉེན་དུ་འཆར་ཐུབ་པ་བྱེད་དགོས་ཞེས་བཀའ་བསྩལ་བ་དང་སྦྲགས། ཨེ་ཤ་ཡའི་དད་ལྡན་ཚོར་ཉིན་གསུམ་གྱི་བཀའ་ཆོས་མཇུག་སྒྲིལ་མཛད་སོང་། ཨེ་ཤ་ཡའི་ཡུལ་གྲུ་ཁག་གི་དད་ལྡན་སེར་སྐྱ་མང་ཚོགས་ཀྱིས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཚེས་ ༤ ནས་དེ་རིང་བར་ཉིན་གསུམ་གྱི་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཕྱི་ནང་གི་ཆོས་ཞུ་བ་ ༦༨༠༠ བརྒལ་བར་བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན། མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཅས་ཀྱི་བཀའ་ཆོས་བཀྲིན་བསྩལ་བ་མ་ཟད། དེ་རིང་ཆོས་འབྲེལ་གྱི་ཉིན་མཐའ་མའི་ཐོག་མགོན་པོ་༸གང་ཉིད་མཆོག་གིས་ཐོག་མར་བཀའ་ཆོས་འཕྲོ་སྐྱོང་མཛད་པ་དང་། དེ་རྗེས་༸རྗེ་བདག་ཉིད་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་བསྩལ་བ་དང་འབྲེལ་ཏེ་བྱང་ཆུབ་སེམས་བསྐྱེད་བཅས་བསྩལ་ཡོད་པ་རེད། ༸གོང་ས་མཆོག་གིས་ལམ་གཙོ་རྣམ་གསུམ་གྱི་ཆོས་འབྲེལ་བསྩལ་བའི་ཁྲོད་ཆོས་ཞུ་བ་ཚོར་སློབ་མའི་ངོས་ནས་དགེ་བའི་བཤེས་གཉེན་དུ་བསྟན་པའི་བླ་མ་དེ་རང་རྒྱུད་འདུལ་བ་དང་ཞི་བ། ཡོན་ཏན་ལྷག་པ་བཅས་ཀྱི་ཁྱད་ཆོས་ལྡན་པ་ཞིག་བསྟན་དགོས་གལ་ཡིན་པར་ལམ་སྟོན་བསྩལ་བ་དང་ཆབས་ཅིག་ཏུ་༸སྐྱབས་རྗེ་ཕ་བོང་ཁ་རིན་པོ་ཆེ་མཆོག་ནི་ཡོངས་འཛིན་རྣམ་གཉིས་ཀྱི་རྩ་བའི་བླ་མ་བསམ་གྱིས་མི་ཁྱབ་པ་ཞིག་རེད། འོན་ཀྱང་རིན་པོ་ཆེས་སྨོན་ལམ་ལོག་པའི་དམ་སྲིར་གྱུར་པ་དོལ་རྒྱལ་དང་འབྲེལ་བའི་དར་སྤེལ་ཞེ་དྲག་གནང་ཡོད་སྐོར་བཀའ་བསྩལ་ཏེ་གང་ཟག་ལ་དག་སྣང་སྦྱོང་བ་དང་ཆོས་ལ་དཔྱད་དགོས་གལ་ཡིན་པ་སོགས་ལམ་སྟོན་མཛད་སོང་། དེ་བཞིན་༸གོང་ས་མཆོག་གིས་བྱང་ཆུབ་སེམས་དཔའི་སྤྱོད་པ་ལ་ཚུལ་བཞིན་སློབ་པར་ཕྱོགས་བཅུ་ན་བཞུགས་པའི་རྒྱལ་སྲས་བྱང་ཆུབ་སེམས་དཔའ་ཚོས་མཛད་པ་ལྟར་ངས་ཀྱང་དེ་ལྟར་གང་ལྕོགས་བྱེད་བསམ་པའི་འདུན་པ་དགོས་སྐོར་ལམ་སྟོན་བསྩལ་སོང་། ༸གོང་ས་མཆོག་གིས་དེ་རིང་གི་ཆོས་འབྲེལ་ཡོངས་རྫོངས་ལེགས་པར་གྲུབ་པ་མཛད་དེ་ཕྱི་ནང་གི་དད་ལྡན་ཆོས་ཞུ་བ་ཚོར་བྱང་ཆུབ་སེམས་བསྐྱེད་ཀྱི་ཕན་ཡོན་ངོ་སྤྲོད་བསྩལ་སྐབས་བྱང་ཆུབ་སེམས་བསྐྱེད་ཀྱི་ཕན་ཡོན་དང་བྱང་ཆུབ་སེམས་ལ་བསམ་བློ་གཏང་ཚེ་རང་ཉིད་ལ་གདོན་བགེགས་བྱེད་མཁན་ཡོད་པར་སྣང་བ་དེ་ནི་གཙོ་བོ་རང་གཅེས་འཛིན་དབང་གིས་ཡོང་གི་ཡོད་སྟབས་རང་ཉིད་ཀྱིས་སྣང་སྲིད་ཐམས་ཅད་མགྲོན་གཉེན་དུ་འཆར་ཐུབ་པ་བྱེད་དགོས་ཞེས་དང་བྱང་ཆུབ་སེམས་ཀྱིས་སྔར་བསགས་ཀྱི་སྡིག་པ་བྱང་ཞིང་བསོད་ནམས་ཀྱི་ཚོགས་དཔག་མེད་བསགས་པའི་དགེ་མཚན་ལྡན་ཡོད་པ་ལམ་སྟོན་མཛད་ཡོད། དེ་རྗེས་ཆོས་ཞུ་བ་རྣམས་ལ་བདག་ཅག་གི་སྟོན་པ་ཐུབ་པའི་དབང་པོའི་མཚན་སྔགས་དང་འཕགས་པ་སྤྱན་རས་གཟིགས། ༸རྗེ་བཙུན་འཇམ་དཔལ་དབྱངས། ༸རྗེ་བཙུན་འཕགས་མ་སྒྲོལ་མ་བཅས་ཀྱི་མཚན་སྔགས་ལྗགས་ལུང་བཀྲིན་བསྩལ་བ་དང་འབྲེལ་ཐེངས་འདིའི་བཀའ་ཆོས་རེ་ཞིག་མཇུག་སྒྲིལ་གནང་སོང་བ་དང་སྦྲགས། མགོན་པོ་༸གང་ཉིད་མཆོག་གིས་ཨིན་སྐད་ནང་ཐེངས་འདིའི་བཀའ་ཆོས་ཡོངས་རྫོགས་མཇུག་སྒྲིལ་ཟིན་པ་དང་མགོན་པོ་མཆོག་ནས་ལོ་རྗེས་མའི་བཀའ་ཆོས་ཐོག་སླར་མཇལ་བའི་ཐུགས་རེ་ཡོད་པ་བཀའ་བསྩལ་ཡོད། གཞི་རྩའི་ཟླ་བ་འདིའི་ཚེས་ ༡༣ ཉིན་བཞུགས་སྒར་དྷ་རྨ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚོགས་པ་ཁག་ལྔས་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པ་མ་ཟད། དེ་རྗེས་ཕྱི་ཟླ་ ༡༠ ཚེས་ ༣ ནས་ ༥ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་ཐེ་ཝན་གྱི་དད་ལྡན་ཆོས་ཞུ་བས་ཇི་ལྟར་གསོལ་བ་བཏབ་པ་ལྟར་ཉིན་གྲངས་གསུམ་གྱི་རིང་དབུ་མ་རིན་ཆེན་ཕྲེང་བའི་བཀའ་ཆོས་བཀའ་དྲིན་བསྩལ་རྒྱུའི་མཛད་འཆར་ཐུགས་གཏན་ཁེལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ནས་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཨེ་ཤ་ཡའི་ཡུལ་གྲུ་ཁག་གི་དད་ལྡན་ཆོས་ཞུ་བ་གཙོས་པའི་ཕྱི་ནང་གི་མང་ཚོགས་སྟོང་ཕྲག་ལྷག་ལ་བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཅས་ཀྱི་བཀའ་ཆོས་ཉིན་གཉིས་པའི་སྟེང་སེམས་ཅན་གཞན་གྱི་དོན་བསྒྲུབ་པར་སེམས་ཅན་གྱི་ཁམས་དང་མོས་པ་སྣ་ཚོགས་ཡོད་སྟབས་དེ་དག་དང་འཚམ་པའི་གྲུབ་མཐའ་གོང་འོག་གི་སྟོང་ཉིད་ཀྱི་ལྟ་བ་བཞེད་ཚུལ་གང་ཡིན་ཤེས་དགོས་གལ་ཡིན་པ་ལམ་སྟོན་བསྩལ་སོང་། དེ་ཡང་མགོན་པོ་མཆོག་དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་ནས་ཆིབས་བསྒྱུར་གྱིས་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་གྲུབ་བསྟུན་ཕྱི་ནང་གི་དད་ལྡན་ཆོས་ཞུ་བ་རྣམས་ལ་ཐོག་མར་མགོན་པོ་༸གང་ཉིད་མཆོག་ནས་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ལུང་དེ་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་གི་སྐུ་མདུན་ནས་ཞུས་ཡོད་སྐོར་ངོ་སྤྲོད་མཛད་པ་དང་འབྲེལ། དེ་སྔ་བོད་ནང་ལ་མཁན་ཆེན་ཞི་བ་འཚོའི་ལམ་སྟོན་འོག་ལེགས་སྦྱར་གྱི་སྐད་ཡིག་བསླབ་མི་དགོས་པར་བོད་ཀྱི་ལོ་པཎ་ཚོས་རྒྱ་གར་ནས་ནང་པ་སངས་རྒྱས་པའི་བཀའ་བསྟན་ཡོངས་རྫོངས་བོད་སྒྱུར་གནང་ཡོད་པ་ཙམ་མ་ཟད། བོད་ཀྱི་ཆོས་རྒྱས་ཚོས་ཀྱང་ལྷག་བསམ་རྣམ་དག་གིས་སྐུལ་ལས་བསྐྱོན་ཡོད་པ་བཀའ་བསྩལ་སོང་། མགོན་པོ་༸གང་ཉིད་མཆོག་གིས་བྱང་ཆུབ་སེམས་འགྲེལ་གྱི་སྐབས་སུ་བསྟན་པའི་བྱང་ཆུབ་ཀྱི་སེམས་ཞེས་པ་འདི་ནི་མདོ་སྔགས་ཐུན་མོང་གི་གཞུང་ནས་གསུངས་པའི་བྱང་ཆུབ་ཀྱི་སེམས་ལ་གོ་དགོས་པར་བཀའ་བསྩལ་ཡོད། གཞན་ཡང་༸གོང་ས་མཆོག་གིས་སེམས་ཅན་གཞན་གྱི་དོན་བསྒྲུབ་པར་སེམས་ཅན་གྱི་ཁམས་དང་མོས་པ་སྣ་ཚོགས་པ་ཞིག་ཡོད་སྟབས་དེ་དག་དང་འཚམ་པའི་གྲུབ་མཐའ་གོང་འོག་གི་སྟོང་ཉིད་ཀྱི་ལྟ་བའི་རྣམ་གཞག་གང་ཡིན་ངེས་པར་དུ་ཤེས་དགོས་གལ་ཡིན་པ་ལམ་སྟོན་བཀྲིན་ཆེ་བ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གི་ཆོས་འབྲེལ་ལེགས་པར་བསྩལ་རྗེས་ཨེ་ཤ་ཡའི་ཁུལ་གྱི་དད་ལྡན་ཆོས་ཞུ་བ་ཚོས་༸གང་ཉིད་མཆོག་ལ་བཀའ་འདྲི་དགོངས་བསྐོར་ཞུ་རྒྱུའི་ལས་རིམ་སྐབས་ཆོས་ཞུ་བ་གཅིག་གིས་ང་ཚོའི་ཉིན་རེའི་འཚོ་བའི་ཁྲོད་དུ་བྱང་ཆུབ་ཀྱི་སེམས་ཉམས་ལེན་གང་འདྲ་བྱེད་དགོས་སམ་ཞེས་བཀའ་འདྲི་ཞུས་པར་༸གོང་ས་མཆོག་གིས་བཀའ་ལན་དུ་སྡུག་བསྔལ་འདོར་འདོད་ཀྱི་བློ་ཡོད་པ་ལྟར་སྡུག་བསྔལ་གྱི་རྒྱུ་གང་ཡིན་ངོ་ཤེས་པའི་ཐོག་ནས་སྡུག་བསྔལ་གཏན་དུ་སྤངས་པའི་བྲལ་བ་དེ་འཐོབ་ཐབས་སུ་བྱང་ཆུབ་ཀྱི་སེམས་དེ་གལ་ཆེན་པོ་ཆགས་ཡོད་པ་ཤེས་ཏེ་ཉམས་ལེན་གནང་དགོས་པའི་ལམ་སྟོན་བསྩལ་ཡོད།

ཨེ་ཤ་ཡའི་ཡུལ་གྲུ་ཁག་གི་དད་ལྡན་སེར་སྐྱ་མང་ཚོགས་ཀྱིས་ཇི་ལྟར་གསོལ་བ་བཏབ་པ་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་དུ་ཉིན་གྲངས་གསུམ་གྱི་བཀའ་ཆོས་དབུ་འཛུགས་བསྐྱངས་པ་དང་འབྲེལ། ༸གོང་ས་མཆོག་གིས་བོད་ཀྱི་ཆོས་དང་རིག་གཞུང་འདི་དག་བོད་མི་ཁོ་ན་ཙམ་གྱི་མིན་པར་འཛམ་གླིང་སྤྱིའི་སྤྱི་ནོར་ཆགས་ཡོད་པར་ལམ་སྟོན་མཛད་སོང་། དེའང་ཨིན་ཌོ་ནེ་ཤི་ཡ་དང་། ཀོ་རི་ཡ། མ་ལེ་ཤི་ཡ། སིངྒ་པུར། ཐའེ་ལན་ཌི། ཝི་དི་ནམ་སོགས་ཨེ་ཤ་ཡའི་ཡུལ་གྲུ་ཁག་གི་དད་ལྡན་ཆོས་ཞུ་བ་ནས་ཇི་ལྟར་གསོལ་བ་བཏབ་པ་ལྟར་དེ་རིང་ཟླ་ ༩ ཚེས་ ༤ ཉིན་གྱི་སྔ་དྲོ་ཚོུད་ ༨༌༣༠ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་གཞུང་སྐུལ་བ་པོས་གཙོས་པའི་ཕྱི་ནང་གི་མང་ཚོགས་སྟོང་ཕྲག་ལྷག་ལ་བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན། མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཅས་ཀྱི་བཀའ་ཆོས་དབུ་འཛུགས་བསྐྱངས་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཐོག་མར་ཨེ་ཤ་ཡའི་ཡུལ་གྲུ་ཁག་ནས་ཆེད་ཞུས་པའི་དད་ལྡན་ཆོས་ཞུ་བ་རྣམས་ཀྱིས་གཙོས་པའི་ཕྱི་ནང་གི་ཆོས་ཞུ་བ་ཚོར་དགའ་བསུའི་འཚམས་འདྲི་བསྩལ་བ་སྦྲགས། བཀའ་ཆོས་དངོས་གཞི་དབུ་འཛུགས་མ་མཛད་གོང་དུ་འགྲོ་བ་མིའི་རང་བཞིན་ལྷན་སྐྱེས་དེ་བྱམས་བརྩེའི་བདག་ཉིད་ཅིག་ཡིན་པ་ལྟར་འཛམ་གླིང་འདིའི་ཐོག་གི་ཆོས་ལུགས་ཡོད་དོ་ཅོག་གིས་དེ་འབྲེལ་བྱམས་བརྩེའི་བསླབ་བྱ་གོང་སྤེལ་གནང་གི་ཡོད་པ་བཀའ་བསྩལ་ཡོད། དེ་བཞིན་༸གོང་ས་མཆོག་གིས་དཀྱིལ་ཤར་ཨེ་ཤ་ཡའི་ཁུལ་གྱི་རྒྱལ་ཁབ་དག་ཏུ་རྒྱ་གར་ནས་ནང་པ་སངས་རྒྱས་པའི་བསྟན་པ་དེ་ཇི་ལྟར་དར་འཕེལ་བྱུང་ཚུལ་ལོ་རྒྱུས་དང་བཅས་པ་ངོ་སྤྲོད་མཛད་སོང་བ་དང་སྦྲགས་ཏེ་ནང་པའི་བདེན་བཞིའི་རྣམ་གཞག་དེ་ནི་ནང་པ་སངས་རྒྱས་པའི་ཆོས་ཀྱི་རྨང་གཞི་ཆགས་ཡོད་པས་དེ་དག་ཐོག་ལ་སློབ་གཉེར་གནང་ནས་དེ་རྣམས་ཤེས་པར་འབད་དགོས་གལ་ཡིན་པར་ལམ་སྟོན་བསྩལ་སོང་། ༸གོང་ས་མཆོག་གིས་ཆགས་སྡང་གཉིས་ཀྱིས་རང་ཉིད་ཀྱི་ཕྱི་གཟུགས་པོའི་འཕྲོད་བསྟེན་ལ་གནད་ཀྱི་ཡོད་པར་བརྟེན་དེའི་གཉེར་པོར་བྱམས་བརྩེ་བསྒོམ་དགོས་པར་ལམ་སྟོན་བཀྲིན་ཆེ་བ་བསྩལ་སོང་། གཞན་ཡང་༸གོང་ས་མཆོག་གིས་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་ཆེན་པོ་བཞི་ལས་འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས་དང་ཆོས་ལུགས་མཐུན་འབྲེལ། དེ་བཞིན་བོད་ཀྱི་ཆོས་རིག་འཛིན་སྐྱོང་སྤེལ་གསུམ་མཛད་རྒྱུར་ཐུགས་འགན་གཙོ་བཞེས་གནང་གི་ཡོད་སྐོར་ངོ་སྤྲོད་སྙིང་བསྡུས་ཤིག་བསྩལ་བ་དང་འབྲེལ་ཏེ། བོད་ཀྱི་ཆོས་དང་རིག་གཞུང་འདི་དག་བོད་མི་ཁོ་ན་ཙམ་གྱི་མིན་པར་འཛམ་གླིང་སྤྱིའི་སྤྱི་ནོར་ཞིག་ཆགས་ཡོད་སྟབས་དེ་དག་ཐོག་ལ་སློབ་གཉེར་བྱེད་དགོས་པ་དང་སེམས་ཁམས་རིག་པའི་རྣམ་གཞག་འགྲེལ་བཤད་ཡག་ཤོས་རྒྱག་ཐུབ་པའི་སྐད་ཡིག་དེ་བོད་ཀྱི་སྐད་ཡིག་ཆགས་ཡོད་སྐོར་ལམ་སྟོན་མཛད་ཡོད། མགོན་པོ་༸གང་ཉིད་མཆོག་གི་༸སྐུའི་བབ་དང་བསྟུན་༸སྐུ་ངལ་གསོ་བཞུགས་མཛད་ཕྱིར་དེ་རིང་སྔ་དྲོ་ཚོུད་ ༡༠༌༣༠ རྗེས་ནས་༸སྐུ་བཅར་ཞབས་ཞུ་བ་ཡང་སྟེང་རིན་པོ་ཆེ་མཆོག་གིས་མུ་མཐུད་ཆོས་འབྲེལ་བསྐྱངས་ཡོད་པ་དང་། ཐེངས་འདིའི་ཆོས་འབྲེལ་ཐོག་འཛམ་གླིང་རྒྱལ་ཁབ་འདྲ་མིན་ ༦༩ ནས་ཆོས་ཞུ་བ་ཞལ་གྲངས་ ༦༨༠༠ ལྷག་དང་ཨེ་ཤ་རང་གི་མི་རིགས་ ༨༥༠ ཕེབས་ཡོད་པ་མ་ཟད། རྒྱ་ནག་སྐམ་ས་ཆེན་པོ་ནས་རྒྱ་རིགས་ ༧ བཅས་བཅར་འདུག ཉིན་གྲངས་གསུམ་གྱི་ཆོས་འབྲེལ་དེ་སྔ་དྲོ་ཚོུད་ ༩་༠༠ ནས་ ༡༡༌༣༠  བར་ཡིན་པ་དང་བོད་སྐད་དང་དབྱིན་སྐད། ཝི་ཏི་ནམ་ རྒྱ་སྐད། ཉི་ཧོང་། ཧིཾ་དི། ཨི་ཊ་ལིན། ཐཡི་སྐད། ཨུ་རུ་སུའི་སྐད། ཨིན་ཌོ་ནེ་ཤ་ཡ། ཀོ་རི་ཡའི་སྐད་སོགས་སྐད་རིགས་མི་འདྲ་བ་བཅིུག་ཐོག་གསུང་སྒྱུར་གནང་བཞིན་འདུག གཞི་རྩའི་ཟླ་བ་འདིའི་ཚེས་ ༡༣ ཉིན་བཞུགས་སྒར་དྷ་རྨ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚོགས་པ་ཁག་ལྔས་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པ་རེད།

བཞུགས་སྒར་དུ་རྟེན་གཞི་བྱས་པའི་བོད་ཀྱི་སྲིད་བྱུས་ཉམས་ཞིབ་ཁང་དང་ལྷོ་ཕྱོགས་བྷེང་ལོར་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་གཉིས་ཀྱིས་གོ་སྒྲིག་བྱས་པའི་རྒྱ་ནག་གིས་བོད་ས་བཙན་བཟུང་བྱས་ནས་མི་ལོ་དྲུག་ཅུ་འཁོར་་དང་བཙན་བྱོལ་ནང་གི་གནད་དོན་ཐད་དཔྱད་པ་ཞེས་པའི་བརྗོད་གཞིའི་འོག་བོད་ཀྱི་ན་གཞོན་ཉམས་ཞིབ་ཀྱི་ཚོགས་འདུ་ཐེངས་ལྔ་བ་དེ་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་བསྐོང་ཚོགས་གནང་འདུག ཟླ་བ་འདིའི་ཚེས་ ༡ ནས་ ༣ བར་ཚོགས་པའི་བོད་ཀྱི་གཞོན་ཉམས་ཞིབ་པའི་ཚོགས་ཐོག་ཏུ་སྐུ་མགྲོན་གཙོ་བོ་སེར་སྨད་གྲྭ་ཚང་གི་མཁན་རིན་པོ་ཆེ་དགེ་བཤེས་བཀྲ་ཤིས་ཚེ་རིང་ལགས་དང་། དམིགས་བསལ་སྐུ་མགྲོན་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས་གཉིས་དབུ་བཞུགས་ཐོག་བོད་ཀྱི་ན་གཞོན་ཞིབ་འཇུག་པ་བཞི་བཅུ་ལྷག་གིས་རང་རང་གི་ཆེད་རྩོམ་སྒྲོག་སྦྱང་ཞུས་ཏེ་དྲི་བ་དྲིས་ལན་གྱི་ལམ་ནས་བགྲོ་གླེང་ལྷུག་པོ་གནང་འདུག   ཚོགས་འདུའི་ཐོག་བོད་ནང་གྱི་གནད་དོན་དང་འབྲེལ་ནས་འགོ་ཁྲིད་དང་བོད་ནང་གྱི་འཛིན་སྐྱོང་།  བོད་ནང་འཛུགས་སྐྲུན་ཡར་རྒྱས་དང་དེའི་མཇུག་འབྲས་ཀྱི་དོ་ཕོག བོད་ཀྱི་ཁོར་ཡུག དེ་བཞིན་རིག་གཞུང་དང་སྐད་ཡིག་སོགས་ཀྱི་གནས་བབ་ཐོག་བགྲོ་གླེང་གནང་ཡོད་པ་དང་། བཙན་བྱོལ་དུ་བོད་མིའི་སྒྲིག་འཛུགས་དང་འཛིན་སྐྱོང་། རིག་གཞུང་དང་ཤེས་ཡོན། དཔལ་འབྱོར་དང་སྤྱི་ཚོགས་སྲ་བརྟན་སོགས་ཀྱི་ཐོག་ལ་བགྲོ་གླེང་གནང་ཡོད་པ་རེད།   ཏཱ་ལའི་བླ་མ་མཐོ་སློབ་ཀྱི་སློབ་སྤྱི་བུ་མོ་ཚེ་རིང་ལགས་སུ་ཚོགས་འདུའི་གྲུབ་ཆ་དང་འབྲེལ་ཏེ་བཀའ་འདྲི་ཞུས་པར་ཐེངས་འདིའི་ཚོགས་ཐོག་ཤེས་ཡོན་ལྟེ་གནས་མི་འདྲ་བ་བཅོ་ལྔ་དང་དེ་བཞིན་ས་གནས་ཁག་བརྒྱད་ནས་འཐུས་ཚབ་ཀྱི་ཞིབ་འཇུག་པ་མཉམ་ཞུགས་བྱས་ཡོད་པ་མ་ཟད། ཉམས་ཞིབ་ཀྱི་བརྒྱུད་རིམ་ཁག་ཀྱང་དེ་སྔ་ལས་ཡག་པོ་བྱུང་ཡོད་པར་ངོ་སྤྲོད་གནང་སོང་བ་དང་། མང་ཆེ་བས་གནའ་དེང་ཟུང་འབྲེལ་གྱི་ཞིབ་འཇུག་གི་ཐབས་ལམ་སྤྱད་ནས་རྒྱུ་ཆ་འཚོལ་བསྡུ་གནང་ཡོད་པ་དང་། ལ་ལས་སྲོལ་རྒྱུན་གྱི་དཔྱད་ཐབས་ཁོ་ནར་བརྟེན་ནས་ཞིབ་འཇུག་གནང་ཡོད་སྐོར་གསུངས་ཡོད། དེ་བཞིན་བུ་མོ་ཚེ་རིང་ལགས་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་དང་ཏཱ་ལའི་བླ་མ་མཐོ་རིམ་སློབ་གཉེར་ཁང་གཉིས་དབར་ལ་ཐེངས་འདིའི་ཚོགས་འདུ་བརྒྱུད་ནས་གན་ཡིག་ཅིག་ཀྱང་བཞག་སྟེ་མ་འོངས་པར་ལོ་རེ་རེ་ནང་མཐོ་སློབ་ཁང་གི་སློབ་མ་གཉིས་རེ་སྲིད་བྱུས་ཉམས་ཞིབ་ཁང་དུ་ཉམས་གསོག་གི་གོ་སྐབས་གནང་རྒྱུ་ཡིན་པ་ལྟར། སྲིད་བྱུས་ཉམས་ཞིབ་ཁང་གི་ཞིབ་འཇུག་པ་རྣམས་ཀྱང་མཐོ་སློབ་ཏུ་ཕེབས་ཏེ་གཏམ་བཤད་སོགས་གནང་རྒྱུ་གལ་ཆེར་ངོས་འཛིན་གནང་ཐོག་ཕྱོགས་གཉིས་ནས་ཟུང་འབྲེལ་གྱིས་སྤྱི་ཚོགས་ལ་ཕན་པའི་ཕྱག་ལས་གནང་རྒྱུ་ཡིན་པ་གསུངས་སོང་། རྩ་བའི་བོད་ཀྱི་ན་གཞོན་ཉམས་པའི་ཚོགས་འདུ་དེ་ནི་ཕྱི་ལོ་ ༢༠༡༥ ལོ་ནས་འགོ་ཚུགས་པ་ལྟར།  འདས་བའི་ཚོགས་འདུ་བཞི་དེ་བཞུགས་སྒར་ངྷ་སར་འཚོགས་ཡོད་པ་དང་། ཐེངས་འདིའི་ཚོགས་ཐེངས་ལྔ་པ་རྒྱ་གར་ལྷོ་ཕྱོགས་བྷེང་ལོར་བསྐོང་འཚོགས་གནང་བ་དང་། ཚོགས་འདུ་དེ་ནི་བོད་ཀྱི་སྲིད་བྱུས་ཉམས་ཞིབ་ཁང་གིས་བོད་ཀྱི་ན་གཞོན་ཉམས་ཞིབ་པ་རྣམས་ལ་རོགས་རམ་དང་གསོ་སྐྱོང་གནང་རྒྱུའི་ལས་འཆར་གལ་ཆེན་ཞིག་ཏུ་བརྩི་བཞིན་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དེ་རིང་རྒྱ་གར་ལྷོ་ཕྱོགས་ Karnataka མངའ་སྡེའི་ Mangalore གྲོང་ཁྱེར་ནང་གི་ Father Muller ཚོགས་ཁང་ཆེན་མོར་རྒྱ་གར་རྒྱལ་ཡོངས་ཡི་ཤུ་རྣམ་དག་ཆོས་ལུགས་ཀྱི་སློབ་གྲྭའི་མཐུན་ཚོགས་ཀྱི་ཚོགས་ཆེན་ཐེངས་ ༥༢ ཐོག་དབུ་བཞུགས་མཛད་འདུག མགོན་པོ་༸གང་ཉིད་མཆོག་ཁ་སང་ Mangalore གྲོང་ཁྱེར་ནང་༸ཞབས་སོར་བདེ་བར་འཁོད་ཡོད་པ་དང་དེ་རིང་སྔ་དྲོ་ཁུལ་དེའི་ Kankanady ས་གནས་སུ་ཆགས་པའི་ Father Muller ཚོགས་ཁང་དུ་ཆིབས་བསྒྱུར་བསྐྱངས་པ་དང་འབྲེལ་དེར་འཛོམས་པའི་ཡི་ཤུའི་སློབ་གྲྭ་ཁག་འདྲ་མིན་གྱི་སློབ་སྤྱིས་གཙོས་པའི་ཚོགས་བཅར་བ་ཡོངས་ལ་བླང་དོར་གྱི་བཀའ་སློབ་བཀའ་དྲིན་བསྩལ་འདུག དེ་རིང་གི་མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོ་ཚང་མའི་ངོས་ནས་དུས་རབས་ ༢༡ པ་འདི་ཞི་བདེ་ལྡན་པ་ཞིག་བཟོ་དགོས་པ་དང་། འགྲོ་བ་མི་གཅིག་མཚུངས་ཀྱི་བློ་འཛིན་དགོས་པ། དེང་སྐབས་སློབ་ཕྲུག་གཞོན་སྐྱེས་ཚོར་ཕྱི་དངོས་པོའི་ཤེས་ཡོན་སྤྲད་པ་ཙམ་མིན་པར་ནང་སེམས་ཀྱི་འཕྲོད་བསྟེན་སྐོར་ལ་སློབ་སྦྱོང་སྤྲོད་དགོས་གལ་ཡིན་པའི་ལམ་སྟོན་བཀའ་སློབ་མཛད་འདུག གཞན་ཡང་དེ་རིང་སྔ་དྲོ་༸གོང་ས་མཆོག་ནས་མེང་ལོར་གྲོང་ཁྱེར་དང་ཉེ་འཁོར་གྱི་མཐོ་སློབ་ཁག་ཏུ་སློབ་བཞིན་པའི་བོད་པའི་སློབ་ཕྲུག་ ༢༣༠ སྐོར་ཞིག་ལ་མཇལ་ཁ་དང་བཀའ་སློབ་བསྩལ་བ་དང་། དེ་བཞིན་མེང་ལོར་གྲོང་ཁྱེར་གྱི་གྲོས་ཚོགས་འཐུས་མི་དང་གཙུག་ལག་སློབ་གཉེར་ཁང་ཞིག་གི་རིགས་བདག ས་གནས་ཁྲིམས་དཔོན་བཅས་གནད་ཡོད་མི་སྣ་ཁག་གཅིག་དང་མཇལ་འཕྲད་གནང་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་པའི་སློབ་ཕྲུག་རྣམས་ལ་ལོ་རྒྱུས་ཀྱི་ཐོག་ནས་བོད་དེ་རྒྱ་ནག་དང་ཐ་དད་ཡིན་པ་དང་། བོད་པའི་སློབ་ཕྲུག་རྣམས་ནས་ནང་ཆོས་ལ་དོ་སྣང་བྱེད་དགོས་གལ་དང་དུས་རབས་ ༢༡ པའི་ནང་པ་ཞིག་བྱེད་དགོས་གལ་ཡིན་པ་སོགས་ཀྱི་ལམ་སྟོན་བསྩལ་འདུག གཞི་རྩའི་དེ་རིང་གི་མཛད་སྒོ་དང་འབྲེལ་ནས་ས་གནས་དེར་ཡོད་བོད་པའི་སློབ་ཕྲུག་གཙོ་གྱུར་ཨ་རུ་ནཱ་ཅལ་མངའ་ཁུལ་དང་འབྲུག་ནས་ཡིན་པའི་སློབ་ཕྲུག་རྣམས་ལ་ཡང་༸གོང་ས་མཆོག་གི་གསེར་ཞལ་མཇལ་རྒྱུའི་གོ་སྐབས་ཐོབ་ཡོད་པ་རེད། འབྲེལ་ཡོད་༸སྐུ་པར་རྣམས་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཟླ་ ༨ ཚེས་ ༢༩ ཉིན་གྱི་སྔ་དྲོ་རྒྱལ་ས་ལྡི་ལི་ནས་མཁའ་ལམ་བརྒྱུད་རྒྱ་གར་ལྷོ་ཕྱོགས་མེང་ལོར་གྲོང་ཁྱེར་དུ་ཆིབས་བསྒྱུར་མཛད་པའི་ཕེབས་ལམ་དུ་ཁེལ་བའི་བྷེང་ལོར་གནམ་ཐང་དུ་༸ཞབས་སོར་བདེ་བར་འཁོད་བསྟུན་གནམ་ཐང་དུ་ཚོུད་ ༢ ཙམ་རིང་༸སྐུ་ལྷོད་བཞུགས་མཛད་གྲུབ་རྗེས་ Bangalore ནས་སྤྱི་ལེ་ ༣༥༠ ཙམ་གྱི་སར་ཆགས་པའི་ Mangalore གྲོང་ཁྱེར་དུ་ཆིབས་བསྒྱུར་མཛད་འདུག དེ་རིང་སྔ་དྲོ་བྷེང་ལོར་གནམ་ཐང་དུ་༸ཞབས་སོར་བདེ་བར་འཁོད་སྐབས་རྒྱ་གར་མངའ་སྡེ་གཞུང་གི་སྐུ་ཚབ་དང་སྐོར་སྲུང་སྤྱི་ཁྱབ་པ་བཅས་ནས་ཕེབས་བསུའི་སྣེ་ལེན་ཞུས་འདུག་པ་དང་། དེ་རིང་མེང་ལོར་གནམ་ཐང་དུའང་མེང་ལོར་རྫོང་དཔོན་མཆོག་དང་སྐོར་སྲུང་སྤྱི་ཁྱབ་པ་བཅས་ཕེབས་བསུར་ཆེད་བཅར་ཞུས་ཡོད་པ་རེད། དེ་ཡང་ All India Association of Catholic Schools ཞེས་རྒྱ་གར་རྒྱལ་ཡོངས་ཀྱི་ཡི་ཤུ་རྣམ་དག་ཚོགས་པའི་ཁྱབ་ཁོངས་ཀྱི་སློབ་གྲྭའི་ལྷན་ཚོགས་ཀྱིས་ཇི་ལྟར་གསོལ་འདེབས་ཞུས་དོན་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་བཞེས་བཟང་པོ་སྨིན་བསྩལ་མཛད་པ་དང་འབྲེལ། མགོན་པོ་༸གང་ཉིད་མཆོག་དེ་རིང་སྔ་དྲོ་རྒྱལ་ས་ལྡི་ལི་ནས་བྷེང་ལོར་གྲོང་ཁྱེར་བརྒྱུད་ཆིབས་སྒྱུར་མཛད་དེ་དེ་རིང་ཉིན་གུང་ཙམ་ལ་མེང་ལོར་གྲོང་ཁྱེར་དུ་༸ཞབས་སོར་བདེ་བར་འཁོད་རྗེས་༸གོང་ས་མཆོག་གི་བཞུགས་གནས་ Taj Group ཡི་ Hotel Gateway གསོལ་མགྲོན་ཁང་དུ་ཆིབས་བསྒྱུར་དང་འབྲེལ། ཕེབས་བསུར་བཅར་བའི་ཡི་ཤུ་རྣམ་དག་ཚོགས་པའི་ཁྱབ་ཁོངས་ཀྱི་སློབ་གྲྭའི་ལྷན་ཚོགས་ཀྱི་ཚོགས་ཆེན་གོ་སྒྲིག་པ་རྣམས་དང་མཇལ་འཕྲད་གནང་འདུག ༸གོང་ས་མཆོག་གིས་སྐབས་དེར་ཁོང་རྣམས་ལ་མགོན་པོ་༸གང་ཉིད་མཆོག་གྲོང་ཁྱེར་དེའི་ནང་ཆིབས་བསྒྱུར་བསྐྱང་རྒྱུར་གསོལ་འདེབས་ཞུས་པར་ཐུགས་རྗེ་ཆེ་ཞེས་བཀའ་བསྩལ་བ་དང་། ཐུགས་བསྐྱེད་དམ་བཅའ་གསུམ་ལས་དང་པོ་འགྲོ་བ་མིའི་རིན་ཐང་གོང་འཕེལ་མཛད་རྒྱུ་དེ་ཡིན་སྟབས། མགོན་པོ་༸གང་ཉིད་མཆོག་ཁུལ་དེར་ཕེབས་པ་ནི་ཐུགས་བསྐྱེད་དང་པོའི་ཆ་ཤས་ཤིག་ཡིན་པ་དང་། འཛམ་གླིང་ནང་གི་ཆོས་ལུགས་མི་འདྲ་བ་རྣམས་ཀྱི་ལྟ་གྲུབ་མི་འདྲ་བ་ཡོད་པར་ལྟོས་མེད་ཚང་མས་བྱམས་བརྩེའི་བརྡ་ལན་སྤེལ་གྱི་ཡོད་པ་བཞིན་དེ་ལྟ་བུའི་ཆོས་ལུག་མཐུན་སྒྲིལ་དང་ཆིག་སྒྲིག་གི་རྣམ་པ་མངོན་པའི་གནང་སྒོ་ཁག་ནི་ཧ་ཅང་གི་གལ་ཆེན་པོ་ཡིན་པར་ལམ་སྟོན་མཛད་འདུག ཐེངས་འདིའི་ཆིབས་བསྒྱུར་ནི་༸གོང་ས་༸སྐྱབས་མགོན་ཆེན་པོ་མཆོག་ Mangalore གྲོང་ཁྱེར་ནང་ཆིབས་བསྒྱུར་མཛད་པ་ཆེས་ཐོག་མ་ཡིན་ཞིང་། སང་ཕྱི་ཚེས་ ༣༠ ཉིན་༸གོང་ས་མཆོག་ནས་གྲོང་ཁྱེར་དེའི་ Kankanady ས་གནས་སུ་རྟེན་གཞི་བྱས་པའི་ Father Muller ཚོགས་ཁང་དུ་རྒྱ་གར་རྒྱལ་ཡོངས་ཡི་ཤུའི་རྣམ་དག་ཚོགས་པའི་ཁྱབ་ཁོངས་ཀྱི་སློབ་གྲྭ་ཁག་གི་ལྷན་ཚོགས་ཐེངས་ ༥༢ པའི་མཛད་སྒོར་དབུ་བཞུགས་ཀྱིས་བཀའ་སློབ་བསྩལ་རྒྱུའི་མཛད་འཆར་ཐུགས་གཏན་ཁེལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་མེང་ལོར་དུ་༸ཞབས་སོར་བདེ་བར་འཁོད་རྗེས་སང་ཉིན་གྱི་མཛད་རིམ་ཁག་དབུ་འཛུགས་མ་གནང་གོང་དུ་ཁུལ་དེར་མཐོ་སློབ་ཏུ་སློབ་བཞིན་པའི་བོད་རིགས་སློབ་མ་དང་གནད་ཡོད་མི་སྣ་ཁག་གཅིག་དང་མཇལ་འཕྲད་མཛད་རྒྱུ་ཡིན་པ་དང་། གནངས་ཕྱི་ཚེས་ ༣༡ སྔ་དྲོ་ཕྱིར་བྷེང་ལོར་བརྒྱུད་རྒྱལ་ས་ལྡི་ལིར་ཆིབས་བསྒྱུར་མཛད་གཏན་ཁེལ་འདུག རྩ་བའི་རྒྱ་གར་རྒྱལ་ཡོངས་ཡི་ཤུའི་རྣམ་དག་ཚོགས་པའི་ཁྱབ་ཁོངས་ཀྱི་སློབ་གྲྭ་ཁག་གི་ལྷན་ཚོགས་འདི་ཐོག་མར་ཕྱི་ལོ་ ༡༩༥༣ ལོར་གསར་འཛུགས་གནང་ཞིང། ཕྱི་ལོ་ ༡༩༧༡ ལོར་གཞུང་འབྲེལ་དེབ་སྐྱེལ་གནང་བའི་གཞུང་འབྲེལ་མིན་པའི་ཚོགས་པ་ཞིག་ཡིན་པ་དང་། ལྷན་ཚོགས་དེའི་འོག་རྒྱ་གར་ནང་གི་ཡི་ཤུ་རྣམ་དག་གི་སློབ་གྲྭ་ཁྱོན་སུམ་ཁྲི་ཙམ་ཡོད་པ་རེད། སང་ཟླ་ ༨ ཚེས་ ༣༠ ཉིན་དབུས་འཛུགས་ཀྱིས་ཟླ་ ༩ ཚེས་ ༡ བར་ Mangalore གྲོང་ཁྱེར་དུ་ཚོགས་རྒྱུའི་ལྷན་ཚོགས་ཐེངས་ ༥༢ པའི་ཐོག་ལྷན་ཚོགས་དེའི་ཁྱབ་ཁོངས་སློབ་ཁག་ ༢༠༠༠ ཙམ་གྱི་སློབ་སྤྱི་རྣམ་པ་ལྷན་འཛོམས་གནང་གི་ཡོད་པ་རེད།

ཟླ་འདིའི་ཕྱི་ཚེས་ ༢༣ ཉིན་རྒྱ་གར་བྱང་ཕྱོགས་མ་ན་ལིར་ཆགས་པའི་འོན་མངའ་རིས་གྲྭ་ཚང་གི་མཁན་པོ་བློ་བཟང་བསམ་གཏན་མཆོག་གིས་དབུས་པའི་གྲྭ་ཚང་འདུ་མང་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་པ་དང་འབྲེལ་༸གོང་ས་མཆོག་གི་མ་ན་ལི་ཁུལ་གྱི་མཛད་འཆར་ཁག་ལེགས་པར་གྲུབ་ཡོད་པ་དང་། མགོན་པོ་༸གང་ཉིད་མཆོག་ཚེས་ ༢༤ ཉིན་རྒྱ་གར་གྱི་རྒྱལ་ས་ལྡི་ལི་ཁུལ་དུ་ཆིབས་ཞལ་བསྒྱུར་ཏེ་ད་ལྟའི་ཆར་ཁུལ་དེར་༸སྐུ་ལྷོད་བཞུགས་མཛད་མུས་ཡིན་པ་རེད། རྩ་བའི་འོན་མངའ་རིས་གྲྭ་ཚང་གིས་འདས་པའི་ལོ་ཤས་ནས་ཇི་ལྟར་གསོལ་འདེབས་ཞུས་དོན་བཞིན་༸གོང་ས་མཆོག་ཟླ་ ༨ ཚེས་ ༡༠ ཉིན་འོན་མངའ་རིས་གྲྭ་ཚང་དུ་༸ཞབས་སོར་བདེ་བར་འཁོད་ཡོད་པ་དང་། ཁུལ་དེར་ཁྱོན་གཟའ་འཁོར་གཉིས་ཙམ་རིང་༸སྐུ་བཞུགས་མཛད་པའི་ཁྲོད་མགོན་པོ་༸གང་ཉིད་མཆོག་གིས་ས་གནས་ཀྱི་བོད་མི་དང་ཡུལ་མི་གཙོ་གྱུར་ཕྱི་ནང་གི་དད་ལྟན་ཆོས་ཞུ་བ་རྣམས་ལ་ཉིན་གྲངས་བཞིའི་རིང་བཀའ་ཆོས་བསྐྱངས་ཡོད་པ་རེད། ཟླ་བ་འདིའི་ཚེས་ ༢༣ ཉིན་འོན་མངའ་རི་གྲྭ་ཚང་གྱི་གྲྭ་མང་གིས་སློབ་དཔོན་ཆོས་གྲགས་ཀྱིས་མཛད་པའི་ཚད་མ་ཀུན་བཏུས་ཀྱི་གཞུང་ལུགས་ཀྱི་ཐད་ནས་རྟགས་གསལ་སྤྱན་འབུལ་ཞུས་རྗེས་དགོན་པའི་མཁན་པོ་བློ་བཟང་བསམ་གཏན་མཆོག་གིས་དབུས་པའི་གྲྭ་མང་གིས་༸གོང་ས་མཆོག་ལ་བརྟན་བཞུགས་བསྟར་འབུལ་གྱི་མཛད་སྒོ་ཞིག་ཚོགས་ཡོད་པ་དང་། བརྟན་བཞུགས་བསྟར་འབུལ་གྱི་ཆོ་གོ་ཕྱག་ལེན་ཡོངས་སུ་རྫོགས་མཚམས་སུ་མགོན་པོ་གིས་མི་མང་ལ་བཀའ་སློབ་བསྩལ་ཏེ་འོན་མངའ་རེས་ཀྱི་དགོན་པ་དེ་ཉིད་༸རྒྱལ་བ་སྐུ་ཕྲེང་གཉིས་པ་དགེ་འདུན་རྒྱ་མཚོའི་ཕྱག་བཏབ་པ་ཞིག་ཡིན་པར་བརྟེན་༸རྒྱལ་བ་རིམ་བྱོན་དང་ཐུན་མོང་མ་ཡིན་པའི་འབྲེལ་བ་ཡོད་པར་བཀའ་བསྩལ་བ་དང་སྦྲགས། བོད་མི་རྣམས་ཀྱིས་དུས་རྒྱུན་ནས་ཆོས་ལུགས་ལ་རྨོངས་དད་བྱེད་རྒྱུ་དེ་མ་ཡིན་པར་དབང་རྣོན་ཆོས་ཀྱི་རྗེས་འབྲང་ཞིག་བྱས་ནས་ནང་པའི་གཞུང་ལ་སློབ་གཉེར་བྱེད་རྒྱུ་དེ་གལ་ཆེན་པོ་ཡིན་པའི་བཀའ་སློབ་བསྩལ་འདུག གཞན་ཡང་མགོན་པོ་མཆོག་གིས་འཛམ་གླིང་སྟེང་ཆོས་ལུགས་འདྲ་མིན་སྣ་ཚོགས་ཤིག་ཡོད་ཀྱང་དེང་རབས་ཀྱི་ཚན་རིག་པ་དང་ལྷན་དུ་བགྲོ་གླེང་གནང་ཐུབ་མཁན་གྱི་ཆོས་ལུགས་དེ་ནི་བོད་བརྒྱུད་ནང་བསྟན་ཁོ་ན་ཡིན་སྟབས་མང་ཚོགས་ཀྱིས་དེ་ལ་དོ་སྣང་བྱེད་རྒྱུ་གལ་ཆེན་ཡིན་པར་བཀའ་གནང་སྟེ་དགོན་པ་གྲྭ་ཚང་ཁག་གིས་མང་ཚོགས་ལ་ནང་ཆོས་ངོ་སྤྲོད་ཀྱི་ཕྱག་ལས་མང་དུ་གནང་བཞིན་ཡོད་ནའང་། མང་ཚོགས་ཀྱིས་ནང་ཆོས་ལ་སློབ་གཉེར་བྱེད་རྒྱུ་དེ་ནི་དབང་རྟུལ་དད་པའི་རྗེས་འབྲང་ལྟ་བུ་ཞིག་ལས་དོན་དམ་གྱི་སློབ་གཉེར་བྱེད་ཐུབ་ཀྱི་མེད་སྐོར་བཀའ་བསྩལ་འདུག རྩ་བའི་མགོན་པོ་༸གང་ཉིད་མཆོག་ཟླ་ ༨ ཚེས་ ༡༠ ཉིན་མ་ན་ལི་ཁུལ་དུ་༸ཞབས་སོར་བདེ་བར་འཁོད་རྗེས་ཚེས་ ༡༣ དང་ ༡༤ དེ་རྗེས་ཚེས་ ༡༧ དང་ ༡༨ སོ་སོར་ས་གནས་ཀྱི་བོད་མི་དང་ཡུལ་མི་བཅས་ཕྱི་ནང་གི་དད་ལྡན་ཆོས་ཞུ་བ་ ༥༠༠༠ ལྷག་ཙམ་ལ་བྱང་ཆུབ་སེམས་འགྲེལ་དང། བློ་སྦྱོག་ཚིག་བརྒྱད་མ། ལག་ལེན་སོ་བདུན་མ་བཅས་ཀྱི་ཆོས་འབྲེལ་དང་། དེ་བཞིན་འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཅས་བཀྲིན་བསྩལ་ཡོད་པ་རེད། ཕྱི་ཚེས་ ༢༣ ཉིན་འོན་མངའ་རི་དགོན་གྱི་བརྟན་བཞུགས་བསྟར་འབུལ་ཞུ་གྲུབ་མཚམས་སུ་ཚེས་ ༢༤ ཉིན་མཁའ་ལམ་བརྒྱུད་ནས་རྒྱལ་ས་ལྡི་ལིར་ཆིབས་བསྒྱུར་བསྐྱངས་ནས་ད་ལྟའི་ཆར་ཁུལ་དེར་༸སྐུ་ལྷོད་བཞུགས་མཛད་མུས་ཡིན་པ་དང། མཛད་འཆར་ལྟར་ན་མགོན་པོ་མཆོག་ཕྱི་ཚེས་ ༢༩ ཉིན་ལྷོ་ཕྱོགས་མེང་ལོར་གྲོང་ཁྱེར་གྱི་མཐོ་སློབ་ཞིག་ཏུ་ཆིབས་བསྒྱུར་གྱིས་བཀའ་སློབ་བཀྲིན་བསྩལ་རྒྱུའི་མཛད་རིམ་ཡོད་པ་དང་། དེ་རྗེས་སླར་ལྡི་ལིར་༸ཞབས་སོར་འཁོད་དེ་ཉིན་ཤས་རིང་༸སྐུ་ལྷོད་བཞུགས་མཛད་གྲུབ་རྗེས་བཞུགས་སྒར་དུ་ཆིབས་བསྒྱུར་མཛད་རྒྱུ་ཡིན་པ་རེད།

ཨ་རི་མི་ནི་སོ་ཊའི་བོད་རིགས་སྤྱི་མཐུན་ཚོགས་པའི་སྐུ་ཚབ་ཁག་གཅིག་གིས་༸གོང་ས་མཆོག་མངའ་སྡེ་དེའི་ནང་རྟེན་གཞི་བྱས་པའི་ Mayo སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་གནང་སླད་ཆིབས་བསྒྱུར་བསྐྱང་གནང་ཡོང་བའི་གསོལ་འདེབས་ཞུས་ཡོད་པ་དང་། སྐབས་དེར་༸གོང་ས་མཆོག་གིས་མགོན་པོ་༸གང་ཉིད་མཆོག་དགུང་ནའི་བབས་ཀྱི་ཆ་ནས་ད་ཆ་ཨ་རིར་ཆིབས་བསྒྱུར་བསྐྱང་ཐུབ་ཐབས་བྲལ་ཡང་། ད་ལྟའི་ཆར་མགོན་པོ་༸གང་ཉིད་མཆོག་༸སྐུ་གཟུགས་གསལ་ཐང་ཡིན་པ་དང་། དགུང་ལོ་ ༡༡༡ བར་བཞུགས་རྒྱུར་ཐེ་ཚོམ་མེད་ཅེས་བཀའ་སློབ་ཕེབས་འདུག མི་ནི་སོ་ཊའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ངག་དབང་འཆི་མེད་ལགས་ཀྱིས་གཙོས་པའི་རྒྱུན་ལས་བཅས་སྐུ་ཚབ་དྲུག་ཁ་སང་ཕྱི་ཟླ་ ༨ ཚེས་ ༡༩ ཉིན་རྒྱ་གར་བྱང་ཕྱོགས་མ་ན་ལི་ཁུལ་དུ་རྟེན་གཞི་བྱས་པའི་འོན་མངའ་རིས་གྲྭ་ཚང་དུ་ཆེད་བཅར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དམིགས་བསལ་མཇལ་ཁ་ཞུས་ཏེ་ཚོར་ཤུགས་ཆེན་པོའི་ཐོག་ནས་མགོན་པོ་༸གང་ཉིད་མཆོག་ཨ་རི་ནང་ཆེས་སྙན་གྲགས་ཆེ་བའི་ Mayo སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་གནང་ཕྱིར་ཆིབས་བསྒྱུར་བསྐྱང་གནང་ཡོང་བའི་གསོལ་འདེབས་ཞུས་འདུག  སྐབས་དེར་༸གོང་ས་མཆོག་གིས་མགོན་པོ་༸གང་ཉིད་མཆོག་གི་༸སྐུའི་འཕྲོད་བཞེས་ཐོག་དམིགས་བསལ་ཐུགས་སྣང་གནང་བར་ཐུགས་རྗེ་ཆེ་ཞེས་བཀའ་བསྩལ་བ་དང་སྦྲགས། དེ་སྔ་ཡིན་ན་མེ་ཡོ་སྨན་ཁང་དུ་རྒྱུན་ལྡན་བཞིན་ལོ་ལྟར་༸སྐུའི་འཕྲོད་བཞེས་བརྟག་དཔྱད་དང་འབྲེལ་ཆིབས་བསྒྱུར་མཛད་ཀྱི་ཡོད་ཀྱང་བར་སྐབས་ནས་དགུང་ནའི་བབས་དང་བསྟུན་ས་ཐག་རིང་པོར་ཕེབས་རྒྱུར་༸སྐུ་ངལ་ཡོད་པ་དང་། ཉེ་ལམ་ནས་ལྡི་ལིར་ཡོད་པའི་རྒྱ་གར་དབུས་གཞུང་གི་སྨན་ཁང་ནས་དེ་འབྲེལ་དམིགས་བསལ་དོ་སྣང་གནང་གི་ཡོད་པ་མ་ཟད། སྒོས་སུ་བཞུགས་སྒར་ནས་ཉེ་འཁྲིས་ཀྱང་ཆགས་ཡོད་པར་བརྟེན་ཕེབས་སྟབས་བདེ་བ་ཡོད་པར་བཀའ་སྩལ་བ་དང་ཆབས་ཅིག དགོས་གལ་དུ་གཟིགས་ཚེ་མེ་ཡོ་སྨན་ཁང་ནས་སྨན་པ་ཁག་གཅིག་ཚུར་གདན་ཞུ་གནང་ཐུབ་ངེས་ཡིན་པ་སོགས་བཀའ་བསྩལ་འདུག  དེ་བཞིན་༸གོང་ས་མཆོག་གིས་ད་ཆ་མགོན་པོ་༸གང་ཉིད་མཆོག་དགུང་ལོ་༨༤ ལ་ཕེབས་ཀྱང་༸སྐུ་གཟུགས་གསལ་ཐང་ཡིན་པ་དང་། གཙོ་བོ་དགོངས་པ་བཞེས་སྟངས་ཡིན་པས་༸སྐུ་ཉིད་མཆོག་གི་དགོངས་པར་དགུང་ལོ་ ༡༡༡ བར་༸སྐུ་འཚོ་བཞུགས་གནང་རྒྱུར་སེམས་ཤུགས་སྒྲིལ་ནས་བཞུགས་ཡོད་པ་དང་། སྒོས་སུ་གཟིམ་ལམ་ནང་ལའང་༸དཔལ་ལྡན་ལྷ་མོས་ཁྱེད་རང་ལོ་ ༡༡༠ བར་བསྡད་པར་ཐེ་ཚོམ་མེད་ཅེས་གསུངས་པ་དེ་ལྟར་བཀའ་བསྩལ་ཡོད་སྟབས་རྒྱ་ཆེ་མང་ཚོགས་ཚོ་བློ་བདེ་པོ་བྱོས་ཞེས་བཀའ་བསྩལ་འདུག གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་དེ་སྔ་ལོ་ཤས་གོང་དུ་ཨ་རིར་ཆིབས་བསྒྱུར་ནམ་མཛད་ལ་ཨ་རིའི་མི་ནི་སོ་ཊའི་ནང་ཆགས་པའི་མེ་ཡོ་སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་ལན་མང་གནང་མྱོང་ཡོད་པ་རེད། མི་ནི་སོ་ཊའི་བོད་རིགས་སྤྱི་མཐུན་ཚོགས་པའི་སྐུ་ཚབ་རྣམས་ད་ཆ་བཞུགས་སྒར་དུ་ཕེབས་པ་དང་བསྟུན་འདི་ག་རླུང་འཕྲིན་ཁང་གིས་ཚོགས་གཙོ་ངག་དབང་འཆི་མེད་ལགས་སུ་བཅར་འདྲི་ཁག་གཅིག་ཞུས་པར་ཁོང་གིས་བོད་མི་མང་ཚོགས་ནས་མགོན་པོ་༸གང་ཉིད་མཆོག་གི་བཀའ་སློབ་ལམ་སྟོན་འོག་ཤར་སྐྱོད་གནང་ཐུབ་ཚེ་༸གོང་ས་མཆོག་༸སྐུ་ཚེ་ཡུན་རིང་བརྟན་པར་ཐུགས་ཕན་གསོས་ངེས་ཡིན་པའི་འབོད་སྐུལ་ཞུས་སོང་།  རྩ་བའི་༸གོང་ས་མཆོག་གི་དགུང་ལོའི་བབས་དང་བསྟུན་མཛད་འཕྲིན་མང་དྲག་རྐྱེན་ཉེ་ལམ་༸གོང་ས་མཆོག་༸སྐུའི་འཕྲོད་བཞེས་བདེ་མིན་འོག་རྒྱལ་ས་ལྡི་ལིའི་ Max སྨན་ཁང་དུ་བསྟེན་གཏུག་དང་། ༸སྐུའི་འཕྲོད་བཞེས་དྭངས་སྐྱེད་སངས་དྲག་བྱུང་ཀྱང་བོད་མི་དང་ཚོགས་སྐྱིད་ཁག་ནས་མགོན་པོ་༸གང་ཉིད་མཆོག་གི་མཛད་འཕྲིན་ཉུང་འཕྲི་དང་། ༸སྐུ་ངལ་གསོ་བཞུགས་མང་ཙམ་གནང་དགོས་པའི་གསོལ་འདེབས་ཞུས་དང་ཞུ་མུས་ཡིན་པ་རེད། མཛད་འཆར་ལྟར་ན་༸གོང་ས་མཆོག་མ་ན་ལིའི་འོན་མངའ་རིས་གྲྭ་ཚང་དུ་མང་ཚོགས་ལ་བཀའ་ཆོས་ལེགས་གྲུབ་དང་བསྟུན་ད་ལྟའི་ཆར་ཁུལ་དེར་ཉིན་ཤས་རིང་༸སྐུ་ངལ་གསོ་བཞུགས་མཛད་རྒྱུ་དང་དེ་རྗེས་རྒྱ་གར་ལྷོ་ཕྱོགས་མེང་ལོར་གྲོང་ཁྱེར་དུ་ཆིབས་བསྒྱུར་བསྐྱང་རྒྱུའི་མཛད་འཆར་ཐུགས་གཏན་ཁེལ་ཡོད་པ་རེད།