Tibetan Royal Year of 2151 | Year of the Wood Dragon

ARCHIVE

Monthly Archives: January, 2018

རེས་གཟའ་ལྷག་པ། ༢༠༡༨།༠༡།༣༡

ཉན་པ།: Listen ཕབ་ལེན། Download ༸གོང་ས་མཆོག་བཞུགས་སྒར་དུ་༸ཞབས་སོར་འཁོད་པ། བོད་མིའི་ཆིག་སྒྲིལ་ལ་དོ་ཕོག་མི་ཡོང་བའི་འབོད་སྐུལ་གནང་སོང་། དབྱིན་ཡུལ་སྲིད་བློན་མཆོག་ལ་རྒྱ་ནག་འོག་མགོ་སྒུར་རྒྱུ་མེད་པའི་ཞུ་འབོད། ཁེ་ན་ཌས་རྒྱ་གཞུང་ལ་པན་ཆེན་རིན་པོ་ཆེ་དང་ཐུག་འཕྲད་བཅུག་དགོས་པ་གསུངས་འདུག མཚོ་སྔོན་པོར་གསེར་ཉ་རྐུ་འཁྱེར་བྱེད་བཞིན་པའི་ཛ་དྲག དམིགས་བསལ་ལེ་ཚན། ༸གོང་ས་མཆོག་གིས་༢༠༡༦ལོར་ལ་དྭགས་སུ་བསྩལ་བའི་བཀའ་སློབ། Wednesday 31/01/2018 Dalai Lama returns to Dharamsala after completing 5 Indian states visit TYC holds prayer vigil for Dalai Lama, urges Tibetans to maintain unity International Tibet support groups urge UK Prime Minister not to be bullied by China Canadian requests permission from China to visit Panchen Rinpoche FEATURE: Dalai Lama’s speech to Buddhists in Ladakh

༸གོང་ས་མཆོག་བཞུགས་སྒར་དུ་༸ཞབས་སོར་བདེ་བར་འཁོད་པ།

དེ་རིང་ཟླ་ ༡ ཚེས་ ༣༡ ཉིན་སྔ་དྲོ་ཆུ་ཚོད་ ༡༡།༣༠ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་མངའ་སྡེ་ཆེ་ཁག་བི་ཧཱར་དང་ཨུཏྲཔྲདེཤ། དེ་བཞིན་རྒྱ་གར་ལྷོ་ཕྱོགས་ཀ་ན་ཊ་ཀ མཧཱརཤཊཱ། ལྡི་ལི་བཅས་ཀྱི་ནང་མང་ཚོགས་ལ་བཀའ་སློབ་དང་ཆོས་འབྲེལ་གྱི་མཛད་འཕྲིན་ཁག་ལེགས་པར་གྲུབ་ནས་བཞུགས་སྒར་དུ་༸ཞབས་སོར་བདེ་བར་འཁོད་གནང་སོང་། མགོན་པོ་༸གང་ཉིད་མཆོག་གིས་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་འཚམས་སུ་ཕྱི་ནང་གི་གསར་འགོད་པའི་བཅར་འདྲི་དང་ལེན་དང་འབྲེལ། ༸གང་ཉིད་མཆོག་རྒྱལ་ས་ལྡི་ལིར་རྟེན་གཞི་བྱས་པའི་ Max སྨན་ཁང་དུ་ལོ་རེའི་མཚམས་སུ་༸སྐུའི་འཕྲོད་བཞེས་བརྟག་དཔྱད་གནང་སྲོལ་ཡོད་པ་ལྟར་ཁ་སང་ཚེས་ ༣༠ ཉིན་༸སྐུའི་འཕྲོད་བཞེས་བརྟག་དཔྱད་གནང་བའི་གྲུབ་འབྲས་གང་ལེགས་བྱུང་ཡོད་པ་བཀའ་བསྩལ་སོང་། ལྷག་དོན་༸གོང་ས་༸སྐྱབས་མགོན་ཆེན་མཆོག་གིས་མགོན་པོ་༸གང་ཉིད་མཆོག་ད་ཆ་དགུང་ལོ་ ༨༢ ལ་ཕེབས་ཟིན་ཡོད་སྟབས། ལོ་རེ་ནས་ལོ་རེ་བཞིན་དུ་༸སྐུ་ཐང་ཆད་རྒྱུ་མང་དུ་འགྲོ་བཞིན་འདུག་པས་ཐེངས་འདིའི་རྒྱ་གར་གྱི་མངའ་སྡེ་ཆེ་ཁག་འདྲ་མིན་ནང་ཟླ་བ་གཅིག་དང་ཕྱེད་ཀ་ལྷག་གི་མཛད་འཆར་དེ་རྒྱུན་རིང་པོ་བྱུང་ཞེས་བཀའ་གནང་ཡོད། གཞི་རྩའི་༸གོང་ས་མཆོག་ཟླ་བ་སྔོན་མའི་ཕྱི་ཚེས་ ༧ ཉིན་བཞུགས་སྒར་ནས་ཕེབས་ཐོན་གྱིས་ད་བར་ཟླ་བ་གཉིས་ཙམ་གྱི་རིང་གནས་མཆོག་རྡོ་གདན་དང་ཝཱ་རཱ་ཎ་སཱི། པུ་ནེ། རྒྱ་གར་ལྷོ་ཕྱོགས་ཀྱི་གྲོང་ཁྱེར་མུམ་བའེ། སྦེང་ལོར། དེ་བཞིན་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཅིག ལྡི་ལི་བཅས་ཀྱི་ནང་མང་ཚོགས་ལ་བཀའ་སློབ་དང་ཆོས་འབྲེལ་གྱི་མཛད་འཕྲིན་རྒྱ་ཆེ་བསྐྱངས་ཡོད་པ་རེད། མཛད་འཆར་ལྟར་ན། མགོན་པོ་༸གང་ཉིད་མཆོག་གིས་ཕྱི་ཟླ་ ༣ ཚེས་ ༢ དང་བོད་ཟླ་ ༡ ཚེས་ ༡༦ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐྱེས་རབས་སོ་བཞིའི་བཀའ་ཆོས་བསྩལ་རྒྱུ་ཡིན་པ་རེད།

ཁེ་ན་ཌ་གཞུང་ནས་རྒྱ་གཞུང་ལ་༸པཎ་ཆེན་རིན་པོ་ཆེ་མཆོག་དང་མཇལ་འཕྲད་ཞུ་བཅུག་དགོས་པ་གསུངས་འདུག

ཁེ་ན་ཌའི་གཞུང་གིས་རྒྱ་ནག་དང་ལྷན་དུ་རྒྱུན་རིང་འབྲེལ་བ་གནང་བའི་ཁྲོད་ཁུལ་དེའི་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་དང་གོང་འཕེལ་བྱ་རྒྱུ་ནི་ཁེ་ན་ཌའི་ཕྱི་འབྲེལ་གྱི་སྲིད་བྱུས་གལ་ཆེ་ཞིག་ཏུ་ངོས་འཛིན་ཞུ་བཞིན་ཡོད་པ་དང་། ཁྱད་པར་དུ་ཁེ་ན་ཌའི་གཞུང་ནས་རྒྱ་ནག་གཞུང་ལ་ཡུལ་དེའི་སྐུ་ཚབ་མི་སྣར་བཙོན་འོག་ཏུ་ཡོད་པའི་༸པཎ་ཆེན་རིན་པོ་ཆེ་མཆོག་དང་མཇལ་འཕྲད་ཞུ་བཅུག་དགོས་པ་གསུངས་འདུག དེ་ཡང་དེ་སྔ་ཁེ་ན་ཌའི་གྲོས་ཚོགས་སུ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Grarrison ལགས་ཀྱིས་ཁེ་ན་ཌའི་གཞུང་ལ་བོད་ནང་གི་ཆབ་སྲིད་བཙོན་པའི་གནས་སྟངས་དང་། རྒྱ་ནག་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ཐོག་གྲོས་ཚོགས་བརྒྱུད་ནས་གཞུང་ལ་ཞུ་གཏུགས་གནང་ཡོད་པ་རེད། ཟླ་འདིའི་ཕྱི་ཚེས་ ༢༩ ཉིན་ཁེ་ན་ཌའི་ཕྱི་སྲིད་བློན་ཆེན་ Chrystia freeland ལགས་ཀྱིས་བོད་དོན་ཞུ་གཏུགས་གནད་དོན་ཐོག་ཡིག་ལམ་ནས་ལན་འདེབས་གནང་བ་དང་འབྲེལ། ཁེ་ཌའི་གཞུང་གི་ངོས་ནས་ད་བར་རྒྱ་གཞུང་ལ་ཁུལ་དེའི་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པར་ནན་སྐུལ་རྒྱུན་ཆད་མེད་པ་གནང་བ་བཞིན་ཡོད་པ་དང། ཁྱད་པར་དུ་ཁེ་ན་ཌའི་གཞུང་གིས་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་ཐོག་དམིགས་བསལ་དོ་སྣང་བྱེད་བཞིན་ཡོད་མོས་ལྟར། ཟླ་བ་སྔོན་མའི་ཕྱི་ཟླ་ ༡༢ ནང་ཁེ་ན་ཌའི་སྲིད་བློན་མཆོག་རྒྱ་ནག་ཏུ་འཚམས་གཟིགས་ཕེབས་སྐབས་རྒྱ་ནག་གི་འགོ་ཁྲིད་དང་ལྷན་དུ་བོད་ནང་གི་བོད་མིའི་གནས་སྟངས་དང་བོད་མིའི་ཆོས་དད་རང་དབང་སྐོར་གླེང་སློང་གནང་ཡོད་སྐོར་གསུངས་པ་མ་ཟད། ཁེ་ན་ཌའི་གཞུང་གིས་རྣམ་ཀུན་རྒྱ་གཞུང་ལ་༸གོང་ས་མཆོག་གི་སྐུ་ཚབ་ལྷན་དུ་འབྲེལ་མོལ་གྱི་ལམ་ནས་བོད་རྒྱའི་དཀའ་རྙོག་སེལ་དགོས་པར་ནན་སྐུལ་གནང་བཞིན་ཡོད་པའང་གསུངས་ཡོད། དེ་བཞིན་ལྕམ་སྐུ་ Chrystia freeland ལགས་ཀྱིས་ཀྱང་འདས་ལོའི་ཕྱི་ཟླ་ ༡༡ ནང་དུ་བོད་རང་སྐྱོང་ལྗོངས་ཀྱི་ཆབ་སྲིད་གྲོས་མོལ་ཁང་གི་ཚོགས་གཞོན་ཁེ་ཌར་གཞུང་འབྲེལ་འཚམས་སྐོར་འབྱོར་བསྟུན་རྒྱ་ནག་གི་བཙོན་འོག་ཏུ་ཡོད་པའི་བོད་མི་བཀྲིས་དབང་ཕྱུག་ལགས་དང་ཞོགས་ལྗང་ལགས་ཀྱི་གནད་དོན་ཐོག་གླེང་སློང་གནང་ཡོད་པ་མ་ཟད།  ལྷག་པར་དུ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐོར་གླེང་སློང་གནང་བ་དང་འབྲེལ་རིན་པོ་ཆེ་མཆོག་གིས་དབུས་པའི་སྐུ་འཁོར་ནང་མི་ལྷན་རྒྱས་ཆ་རྐྱེན་གང་ཡང་མེད་པར་གློད་བཀྲོལ་དགོས་པ་མ་ཟད། ཁེ་ན་ཌའི་གཞུང་སྐུ་ཚབ་མི་སྣར་རིན་པོ་ཆེ་མཆོག་དང་ཐུགས་འཕྲད་བྱེད་བཅུག་དགོས་པ་བསྐྱར་ནན་གསུངས་ཡོད་པ་རེད། ཕྱི་སྲིད་བློན་ཆེན་མཆོག་གིས་བོད་དོན་ཞུ་གཏུགས་གནང་བའི་ལན་འདེབས་དེའི་ནང་ཁེ་ན་ཌའི་གཞུང་གི་ངོས་ནས་མུ་མཐུད་རྒྱ་ནག་གཞུང་ལ་ཁུལ་དེའི་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པ་དང། བོད་ནང་འགྲོ་བ་མིའི་ཐོབ་ཐང་རྩོད་ལེན་གནང་མཁན་བོད་མི་གཙོས་བཙོན་འོག་ཏུ་བཀག་སྐྱིལ་བྱས་པའི་ཆབ་སྲིད་བཙོན་པའི་གནས་སྟངས་ཐོག་མུ་མཐུད་ཐུགས་སྣང་གནང་ངེས་ཡིན་པ་གསུངས་ཡོད།

ཨིན་ཡུལ་སྲིད་བློན་མཆོག་ལ་རྒྱ་ནག་གི་བརྙས་བཅོས་འོག་མགོ་སྒུར་རྒྱུ་མེད་པའི་ཞུ་འབོད།

ཨིན་ཡུལ་གྱི་སྲིད་བློན་ལྕམ་ Theresa May མཆོག་དེ་རིང་ནས་ཉིན་གྲངས་གསུམ་རིང་རྒྱ་ནག་ཏུ་གཞུང་འབྲེལ་འཚམས་གཟིགས་ཕེབས་ཀྱི་ཡོད་པ་དང་བསྟུན། ཁ་སང་ཨིན་ཡུལ་ནང་རྟེན་གཞི་བྱས་པའི་ Tibet Society དང་ Free Tibet བོད་དོན་རྒྱབ་སྐྱོར་ཚོགས་པ་གཉིས་ཀྱིས་གཙོས་ཨིན་ཡུལ་བོད་རིག་ཚོགས་པ། ཨ་རིར་ཡོད་པའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་དང་རྒྱལ་སྤྱིའི་བོད་དོན་ལས་འགུལ་ཁང། དེ་བཞིན་བོད་རང་བཙན་སློབ་ཕྲུག་ཚོགས་པ་བཅས་ཀྱིས་ཨིན་ཡུལ་སྲིད་བློན་མཆོག་གི་མཚན་ཐོག་ཏུ་ཞུ་སྙན་ཞིག་ཕུལ་བའི་བརྒྱུད་རྒྱ་ནག་གཞུང་གི་བརྙས་བཅོས་འོག་མགོ་སྒུར་རྒྱུ་མེད་སྐོར་ཞུས་འདུག དེ་ཡང་ཁ་སང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་དྲ་གནས་ཐོག་བོད་དོན་རྒྱབ་སྐྱོར་ཚོགས་པ་དེ་དག་གིས་ཨིན་ཡུལ་སྲིད་བློན་མཆོག་གི་མཚན་ཐོག་ལ་ཕུལ་བའི་ཕྱག་བྲིས་དེ་འདོན་སྤེལ་གནང་འདུག་པ་དང། དེའི་ནང་བོད་དོན་རྒྱབ་སྐྱོར་ཚོགས་པ་རྣམས་ནས་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང། རྒྱ་ནག་གཞུང་གི་ངོས་ནས་རྒྱལ་སྤྱིའི་གཞུང་ཚོགས་ཁག་ལ་གནད་དོན་དེ་དག་ཐོག་གླེང་སློང་མི་གནང་བར་གནོན་ཤུགས་ཆེས་སྤྲོད་བཞིན་ཡོད་པར་བློ་འཚབ་ཡོད་པ་འགྲེལ་བརྗོད་དང་སྦྲགས། ཨིན་ཡུལ་ནི་རྒྱ་ནག་གི་ཚོང་འབྲེལ་ཤུགས་ཆེ་བྱ་ཡུལ་རྒྱལ་ཁབ་ཡིན་པའི་ཆ་ནས་རྒྱ་ནག་ཐོག་གནོན་ཤུགས་སྤྲོད་ཐུབ་མཁན་གྱི་རྒྱལ་ཁབ་ཡིན་སྟབས། ལྕམ་སྐུ་མཆོག་ནས་གནས་བབ་དང་ནུས་པ་དེ་དག་དམ་འཛིན་གྱིས་སྲིད་འཛིན་ཞི་ཅིང་ཕིང་དབུས་པའི་རྒྱ་ནག་གི་འགོ་ཁྲིད་ཚོ་དང་ལྷན་འགྲོ་བ་མིའི་ཐོབ་ཐང་དང་བོད་ཀྱི་གནད་དོན་ཐོག་ལ་གླེང་སློང་ངེས་པར་དུ་གནང་དགོས་གལ་ཡིན་པ་མ་ཟད། དེ་ལྟར་མ་གནང་ཚེ་ཨིན་ཡུལ་རྒྱལ་ཁབ་ཀྱི་གཞི་རྩའི་རིན་ཐང་དང་མང་གཙོའི་ལངས་ཕྱོགས་ཀྱི་ཆེ་མཐོང་ལ་གནོད་རྒྱུ་ཡིན་པ་གསུངས་འདུག བོད་དོན་རྒྱབ་སྐྱོར་ཚོགས་པའི་ཕྱག་བྲིས་དེའི་ནང་ད་དུངསྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དང་རྒྱ་རིགས་སྐུ་ཞབས་ Liu Xiaobo ལགས་གཉིས་རྒྱ་ནག་གི་བཙོན་འཇུག་འོག་སྐུ་གྲོངས་པ་དང། རྒྱལ་ཁབ་ཀྱི་རྩ་ཁྲིམས་ནང་འཁོད་པའི་བོད་མིའི་སྐད་ཡིག་རང་དབང་ཐོག་ཕྱག་ལས་གནང་མཁན་བཀྲིས་དབང་ཕྱུག་ལགས་ལ་ཉེས་མེད་ཉེས་འཛུགས་ཀྱིས་ཁྲིམས་བཤེར་བྱས་པའི་གནད་དོན་ཁག་འབུར་བཏོན་གྱིས་བོད་དང་ཤིན་ཅང་། རྒྱ་ནག་རྒྱལ་ནང་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལ་བརྩི་མེད་རྡོག་རོལ་ཤུགས་ཆེ་གཏོང་བཞིན་ཡོད་པ་མངོན་གསལ་གནང་ཡོད་པ་རེད། ལྷག་ཏུ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཀྱི་འབྲུ་དོན་རྣམས་ཚོང་འབྲེལ་རྒྱལ་ཁབ་ཙམ་མ་ཟད་ཚོང་འབྲེལ་བྱ་ཡུལ་ས་གནས་ས་ཐོག་གི་མང་ཚོགས་ཡོངས་ལ་ཁྱབ་ཀྱི་ཡོད་སྟབས། ཨིན་ཡུལ་གཞུང་གི་ངོས་ནས་རྒྱ་ནག་དང་ལྷན་ཚོང་འབྲེལ་གནང་སྐབས་བོད་དང་ཤིན་ཅང་སོགས་ཀྱི་འགྲོ་བ་མིའི་ཐོབ་དང་སྤྱི་དམངས་ཀྱི་ཐོབ་ཐང་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་མེད་ལ་ཞིབ་འཇུག་གནང་རྒྱུའི་འོས་འགན་ཡོད་པ་ནན་བརྗོད་གནང་འདུག

རེས་གཟའ་མིག་དམར། ༢༠༡༨།༠༡།༣༠

ཉན་པ།: Listen ཕབ་ལེན། Download ཆབ་སྲིད་བཙོན་ཟུར་བློ་གྲོས་རྒྱ་མཚོ་ལགས་གར་སོང་ཆ་མེད་དུ་གྱུར་འདུག འཇར་མ་ནིའི་གྲོས་ཚོགས་འཐུས་མིས་བཀྲ་ཤིས་དབང་ཕྱུག་ལགས་འཕྲལ་དུ་གློད་བཀྲོལ་དགོས་པའི་ཞུ་འབོད་གནང་བ། སྲིད་སྐྱོང་མཆོག་གིས་ཧྥ་རན་སི་གཞུང་ལ་སིཊསིསྦག་གྲོས་འཆར་ལ་བདག་པོ་གནང་དགོས་པ་གསུངས་འདུག བོད་མི་མང་སྤྱི་འཐུས་ལྷན་ཚོགས་ནས་ཕྱོགས་ལྷུང་མེད་པའི་རྟོག་ཞིབ་གནང་དགོས། ༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་གིས་སྒེར་གྱི་ལྟ་སྤྱོད་གཙོ་བཟུང་མིན་པར་དྲང་པོ་གནང་དགོས་པ་གསུངས་འདུག གླུ་གཞས་ལེ་ཚན། བསྟན་འཛིན་སྲོང་ཡིད་ནས་བླངས་པའི་༼བྱུས་གཏོགས།༽ Tuesday 30/01/2018 Former political prisoner disappears from Lhasa German Parliamentarians call for Tashi Wangchuk’s release France should take ownership of Strasbourg Proposal: Sikyong Concern over Tibetan protests in Europe, youth leaders call for unbiased investigation Karmapa Rinpoche urges Tibetans to shy away from regionalism MUSIC FEATURE: Jutok by Tibetan rapper Tenzin Seungyi

ལོ་ངོ་ཉི་ཤུ་ལྷག་བཙོན་འཇུག་ཁྲིམས་ཆད་ཕོག་པའི་ཆབ་སྲིད་བཙོན་ཟུར་ཞིག་ཉེ་ཆར་གར་སོང་ཆ་མེད་དུ་གྱུར་འདུག

ལོ་ངོ་ ༢༠ ལྷག་བཙོན་འཇུག་ཁྲིམས་ཆད་ཕོག་པའི་བོད་མི་ཆབ་སྲིད་བཙོན་ཟུར་སོག་མཁར་བློ་གྲོས་སམ་བློ་གྲོས་རྒྱ་མཚོ་ལགས་ཁ་ཉིན་ཕྱི་ཚེས་ ༢༨ ཉིན་བོད་ཀྱི་རྒྱལ་ས་ལྷ་ས་ནས་གར་སོང་ཆ་མེད་དུ་གྱུར་འདུག རྩ་བའི་བློ་གྲོས་རྒྱ་མཚོ་ལགས་ལ་དེ་སྔ་ཕྱི་ལོ་ ༡༩༩༣ ལོར་རྒྱ་གཞུང་གིས་མི་བསད་པའི་ནག་ཉེས་འོག་ལོ་བཅོ་ལྔ་རིང་བཙོན་འཇུག་ཁྲིམས་ཐག་བཅད་ཡོད་པ་དེ་ལྟར་ཡང། ཕྱི་ལོ་ ༡༩༩༥ ལོར་ལྷ་སའི་གྲྭ་བཞི་བཙོན་ཁང་དུ་ཁོང་གི་༸རྒྱལ་བ་རིན་པོ་ཆེ་༸སྐུ་ཚེ་ཁྲི་ལོར་བརྟན་པ་ཤོག་ཞེས་འཁོད་པའི་ཡིག་ཆ་འགྲེམས་སྤེལ་དང་སྐད་འབོད་གནང་རྐྱེན་སྲོག་གཅོད་ཀྱི་ཁྲིམས་ཆད་བཏང་འདུག འོན་ཏང་སྐབས་དེར་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཉེས་ཡངས་ཚོགས་པ་བཅས་ཀྱིས་གནོན་ཤུགས་སྤྲད་པའི་ཁྲོད་ཁོང་ལ་ལོ་དྲུག་གི་སྲོག་ཁྲིམས་ནར་འགྱངས་དང་ཆབ་སྲིད་ཀྱི་ཐོབ་ཐང་ལོ་གསུམ་འཕྲོག་ནས་མཐར་ཕྱི་ལོ་ ༢༠༡༣ ཟླ་ ༥ ཚེས་ ༢ ཉིན་ལོ་ ༢༠ ཙམ་བཙོན་གྲོལ་བཏང་ཡོད་པ་རེད། འདི་ག་རླུང་འཕྲིན་ཁང་ནས་ཕྱི་ལོ་ ༢༠༡༦ ལོར་གནས་ཚུལ་སྤེལ་བའི་ནང་བློ་གྲོས་རྒྱ་མཚོ་ལགས་ཕྱི་ལོ་ ༢༠༡༦ ཟླ་ ༥ ཚེས་ ༡༤ ཉིན་སླར་འཛིན་བཟུང་གནང་བའི་གནས་ཚུལ་ཞིག་སྤེལ་རྗེས་ཁོང་གི་གནས་སྟངས་ཇི་ཆགས་ཞིབ་ཕྲ་བཀོད་ཐུབ་མེད། ད་ལན་བོད་མི་ཞིག་གིས་ཁུངས་ལྡན་གནས་ཚུལ་མཁོ་སྤྲོད་གནང་བར་དེ་སྔ་ཕྱི་ལོ་ ༢༠༡༣ ལོར་བློ་གྲོས་རྒྱ་མཚོ་ལགས་ལ་བཙོན་གྲོལ་ཐོབ་རྗེས་ཁོང་བཟང་བཙོན་འོག་བཞག་ཡོད་པ་དང་། ཕྱི་ལོ་ ༢༠༡༥ ལོར་རྒྱ་གཞུང་གིས་བོད་ཀྱི་ས་ཁུལ་ཁག་ཅིག་ཏུ་བོད་མི་ཚོར་བཙན་དབང་གིས་སྟག་གཟིག་གི་པགས་པ་གྱོན་བཅུག་པ་དང། གཞས་སྣ་འཁྲབ་སྟོན་ལ་བལྟ་བཅུག་པའི་གནད་དོན་དང། དེ་བཞིན་ཕྱི་ལོ་ ༢༠༡༦ ལོར་རྒྱ་གཞུང་གིས་བོད་པའི་ས་ཕྱོགས་གཞན་གྱི་ནང་དུ་སློབ་གཉེར་གནང་བཞིན་པའི་གྲྭ་བཙུན་མང་དག་ཞིག་རང་གི་ཕ་ཡུལ་དུ་ཕྱིར་ལོག་བྱེད་དུ་བཅུག་པ་མ་ཟད། དེ་ལྟར་མི་གནང་མཁན་གྱི་ནང་མིའི་འཚོ་བའི་ཡོངས་ཁུངས་མེད་པ་བཟོ་རྒྱུའི་རྡིག་ར་སྐུལ་བའི་གནད་དོན་ཁག་ལ་བློ་གྲོས་རྒྱ་མཚོ་ལགས་ཀྱིས་མ་བཟོད་པར་སྲིད་གཞུང་ལ་ཁྲིམས་འགལ་ཡིན་པའི་ཞུ་གཏུགས་གནང་བར་བརྟེན། ལོ་དེ་གཉིས་ནང་རྒྱ་གཞུང་གིས་ཁོང་ཐེངས་འགའ་འཛིན་བཟུང་བཀག་ཉར་བྱས་ཡོད་པ་གསུངས་སོང་། ཉེ་བའི་ཆར་བློ་གྲོས་རྒྱ་མཚོ་ལགས་ནས་གལ་ཏེ་ཁོང་མི་གཞན་དང་འདྲ་བར་ཆབ་སྲིད་ཀྱི་ཉེས་མེད་ཆགས་ཚེ་ཁོང་ནས་ལྷ་སར་ཞི་བདེའི་ལས་འགུལ་ཞིག་སྤེལ་རྒྱུ་ཡིན་པ་དང། དེའང་༸རྒྱལ་བ་ཡིད་བཞིན་ནོར་བུ་མཆོག་བོད་ལ་མྱུར་དུ་ཕེབས་རྒྱུ་གཙོས། རྒྱ་ནག་དང་འཛིམ་གླིང་གི་དམག་དཔུང་རྣམས་མེད་པ་བཟོ་རྒྱུ་མ་ཟད་བོད་འདི་འཛམ་གླིང་ཞི་བདེའི་བསྟི་གནས་ཤིག་ཡོང་བར་སྐད་འབོད་གནང་རྒྱུ་ཡིན་ཞེས་ཡང་ཡང་གསུང་བཞིན་ཡོད་པ་རེད་འདུག ཉེ་ཆར་ཟླ་བ་འདིའི་ཕྱི་ཚེས་ ༢༨ ཉིན་བོད་མི་ཆབ་སྲིད་བཙོན་ཟུར་སོག་མཁར་བློ་གྲོས་སམ་བློ་གྲོས་རྒྱ་མཚོ་ལགས་བོད་ཀྱི་རྒྱལ་ས་ལྷ་ས་ནས་གར་སོང་ཆ་མེད་དུ་གྱུར་བ་ནི། ཁོང་གིས་དེ་སྔ་གསུངས་པ་བཞིན་ལྷ་སར་ངོ་རྒོལ་སྐད་འབོད་གནང་རྐྱེན་ཡིན་པར་ཚོད་དཔག་གནང་གི་འདུག འོན་ཀྱང་ད་བར་ཁོང་གི་སྐད་འབོད་གནང་ཐུབ་ཡོད་མེད་སོགས་ཀྱི་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མེད།

སྒེར་གྱི་ལྟ་བ་དང་ལངས་ཕྱོགས་ཁོ་ན་གཙོ་བཟུང་མིན་པར་དྲང་པོ་གནང་དགོས་གལ་ཡིན་པའི་ལམ་སྟོན་བསྩལ་བ།

དེ་ཡང་ཁ་ཉིན་ཕྱི་ཚེས་ ༢༨ ཉིན་སྒྲུབ་བརྒྱུད་བསྟན་པའི་གསལ་བྱེད་དཔལ་༸རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་ཨ་རིའི་ནིའུ་ཡོག་དང་ནིའུ་ཇར་སིའི་ས་གནས་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུས་པ་ལྟར། ས་གནས་བོད་མི་དང་ཧི་མཱ་ལ་ཡའི་རིི་རྒྱུད་ཀྱི་ནང་པ། དེ་བཞིན་ས་གནས་དད་ལྡན་མང་ཚོགས་རྣམས་ལ་གྲུབ་ཐོབ་ཐང་སྟོང་རྒྱལ་པོའི་ཚེ་དབང་བཀའ་དྲིན་སྩལ་བ་དང་སྦྲགས། ས་གནས་བོད་རིགས་རྣམས་ལ་དམིགས་བསལ་ལམ་སྟོན་མཛད་་སློབ་བསྩལ་ཡོད་པ་རེད། སྐབས་དེར་དཔལ་༸རྒྱལ་དབང་ཀརྨ་པ་རིན་པོ་ཆེ་མཆོག་གིས་བོད་མི་རྣམས་སྐྱབས་བཅོལ་བ་ཆགས་ནས་ལོ་ངོ་ ༦༠ ཙམ་འགྲོ་བཞིན་ཡོད་ཀྱང་། རྒྱལ་སྤྱིའི་ཐོག་བོད་མི་རྣམས་མུ་མཐུད་རྒྱལ་ཁབ་གཞན་གྱི་མི་མང་དང་དཔུང་པ་མཉམ་གཤིབ་ཐོག་འགྲོ་ཐུབ་པ་ཞིག་བྱུང་ཡོད་པ་དེ་དག་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་དང་། སྐབས་དེའི་མི་རབས་རྒན་པ་རྣམས་ནས་དབུ་ཁྲིད་བཟང་པོའི་ལམ་སྟོན་འོག་མུ་མཐུད་དཀའ་སྤྱད་ཀྱིས་འབད་བརྩོན་གནང་བའི་གྲུབ་འབྲས་ཤིག་ཡིན་སྟབས། བོད་མི་ཚང་མས་རང་ཉིད་སྒེར་གྱི་ལྟ་སྤྱོད་ཁོ་ན་གཙོ་བཟུང་མིན་པར་སྤྱི་ལ་ཁྱབ་པའི་དབུ་ཁྲིད་བཟང་པོའི་ལམ་སྟོན་གནང་བར་རྒྱབ་སྐྱོར་དང་ཞབས་འདེགས་གང་ཐུབ་ཞུ་དགོས་གལ་ཡིན་པའི་ལམ་སྟོན་མཛད་འདུག དེ་བཞིན་རིན་པོ་ཆེ་མཆོག་གིས་སྔར་ལོའི་སྲིད་སྐྱོང་གི་འོས་བསྡུ་ཆེན་མོ་ནས་བཟུང་བོད་པའི་སྤྱི་ཚོགས་འདི་བཟང་ངན་གང་ཡིན་དབྱེ་འབྱེད་དཀའ་བའི་འཁྲུག་ཆ་དོད་པོ་ཞིག་ཏུ་འགྱུར་བཞིན་པའི་སྐབས་འདིར་བོད་མི་ཚང་མས་གཙོ་བོ་བོད་མི་རིགས་ལ་ཤ་ཚ་དང་ལྷག་བསམ་གྱི་ཐོག་ནས་བསམ་བློ་གཏོང་དགོས་གལ་ཡིན་པ་མ་ཟད། ཁྱད་པར་དུ་༸གོང་ས་མཆོག་དགུང་ལོ་མཐོ་པོར་ཕེབས་ཡོད་པའི་དུས་འདིར་ང་ཚོ་འཁྲུག་བསྡད་པ་ཡིན་ན་༸གང་ཉིད་མཆོག་གི་ཐུགས་བློ་བདེ་པོ་ཡོང་ཐུབ་ཀྱི་མ་རེད་ཅེས་བཀའ་བསྩལ་འདུག ལྷག་པར་དུ་ཀརྨ་རིན་པོ་ཆེ་མཆོག་ནས་བོད་ནང་ལ་ཡོད་པའི་བོད་མི་རྣམས་ཀྱིས་རང་གི་མི་རིགས་ཀྱི་ཆེད་དུ་མུ་མཐུད་ལུས་སྲོག་ལ་མ་འཛེམས་པར་སྐུ་ལས་སྐྱོན་བཞིན་ཡོད་ཀྱང་། བཙན་བྱོལ་ནང་བོད་མི་ཚོས་སྐབས་རེ་རྩ་དོན་ལས་ལྟ་བ་དང་ལངས་ཕྱོགས་ཤུགས་ཆེ་བ་འཛིན་པའི་ཚོར་སྣང་ཆེན་པོ་ཡོད་བཞིན་འདུག དེས་ན་ང་རང་ཚོ་ཚང་མས་རང་སྒེར་གྱི་ལྟ་བ་དང་ལངས་ཕྱོགས་དེ་གཙོ་བཟུང་མ་གནང་བར་དྲང་པོ་གནང་དགོས་གལ་ཡིན་པར་ལམ་སྟོན་བསྩལ་འདུག དེང་སྐབས་བོད་ནང་དུ་སྔར་དང་མི་འདྲ་བ་མདོ་དབུས་ཁམས་གསུམ་ཤ་ཁྲག་རུས་གསུམ་གཅིག་པ་ཡིན་པའི་འདུ་ཤེས་དང་ཤ་ཞེན་སྔར་ལྷག་གནང་བཞིན་ཡོད་སྟབས། བཙན་བྱོལ་ནང་གི་བོད་མི་ཚོའི་ངོས་ནས་ཀྱང་ཇི་ཙམ་ཆོལ་ཁ་དང་ཆོས་ལུགས་དབྱེ་བ་མེད་པའི་བློ་རྒྱ་ཇི་ཙམ་ཆེ་བ་བསྐྲུན་ཐུབ་ཚེ་དེའི་ཚོད་ཀྱིས་བོད་སྤྱི་ལ་བསམ་བློ་གཏོང་ཐུབ་པ་ཞིག་ཡོང་གི་རེད་ཅེས་བཀའ་བསྩལ་འདུག གཞི་རྩའི་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་འདས་ལོའི་ཕྱི་ཟླ་ ༡༠ ཙམ་ནས་༸སྐུའི་འཕྲོད་བཞེས་བརྟག་དཔྱད་དང་ཆོས་འབྲེལ་མཛད་འཆར་སོགས་དང་འབྲེལ་ཨ་རིར་བཞུགས་ཞག་མཛད་བཞིན་ཡོད་པ་མ་ཟད། རིམ་མིན་ཟླ་བ་རྗེས་མའི་ཕྱི་ཚེས་ ༤ ཉིན་ཨ་རིའི་གྲོང་ཁྱེར་ནིའུ་ཡོག་ནང་དུ་དད་ལྡན་མང་ཚོགས་རྣམས་ལ་སྒྲོལ་ལྗང་གི་བཀའ་དབང་བཀའ་དྲིན་བསྩལ་རྒྱུ་རེད་འདུག

འཇར་མ་ནིའི་གྲོས་ཚོགས་འཐུས་མི་གཉིས་ནས་བཀྲ་ཤིས་དབང་ཕྱུག་ལགས་འཕྲལ་དུ་གློད་བཀྲོལ་གཏང་དགོས་པའི་ཞུ་འབོད་གནང་འདུག

ཡོ་རོབ་འཇར་མ་ནིའི་ Green Party འམ་ལྗང་ཁུ་ཚོགས་པའི་གྲོས་ཚོགས་འཐུས་མི་ལྕམ་ Claudia Roth ལགས་དང་ལྕམ་ Maria Klein-Schmeink ལགས་རྣམ་གཉིས་ནས་རྒྱ་གཞུང་གི་བཙུན་འཇུག་འོག་ཏུ་ཡོད་པའི་བོད་མི་སྐད་ཡིག་སྲུང་སྐྱོབ་ལས་འགུལ་བ་བཀྲིས་དབང་ཕྱུག་ལགས་འཕྲལ་མར་གློད་བཀྲོལ་དགོས་པའི་ཞུ་འབོད་གནང་འདུག དེ་ཡང་ཕྱི་ཚེས་ ༢༦ ཉིན་གྲོས་ཚོགས་འཐུས་མི་རྣམ་གཉིས་ནས་དེ་སྔ་ཕྱི་ལོ་ ༢༠༡༥ ལོར་རྒྱ་ནག་གཞུང་གིས་བཀྲ་ཤིས་དབང་ཕྱུག་ལགས་རྒྱལ་ཁབ་ཁ་བྲལ་གྱི་ནག་ཉེས་འོག་འཛིན་བཟུང་བྱས་པ་མ་ཟད། འདི་ལོ་ཟླ་ ༡ ཚེས་ ༤ ཉིན་རྒྱ་གཞུང་གིས་དབྱེ་བའི་མཚོ་སྔོན་ཞིང་ཆེན་ཡུལ་ཤུལ་འབྲིང་རིམ་མི་དམངས་ཁྲིམས་ཁང་དུ་ཁོང་གི་ནག་ཉེས་ཐོག་གཏུགས་བཤེར་གནང་བ་དང་འབྲེལ། འཇར་མ་ནིར་ཡོད་པའི་རྒྱ་ནག་གཞུང་ཚབ་པ་ Shi Mingde ལགས་ཀྱི་མཚན་ཐོག་ཏུ་ཕྱག་བྲིས་ཤིག་ཕུལ་ཐོག་རྒྱ་ནག་གཞུང་ནས་རྒྱ་ནག་རང་ཉིད་ཀྱི་རྩ་ཁྲིམས་ནང་གསལ་བའི་སྨྲ་བརྗོད་ཀྱི་རང་དབང་གཙོ་འགྱུར་གྲངས་ཉུང་མི་རིགས་ཀྱི་གཞི་རྩའི་རང་དབང་སྤྱི་དང་། ལྷག་པར་དུ་རྒྱལ་སྤྱིའི་ཁྲིམས་ལུགས་ནང་གསལ་བའི་ཆབ་སྲིད་བཙོན་པའི་རང་དབང་ཁག་ལ་གུས་བརྩི་ཞུ་ནས་བོད་ཀྱི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་འཕྲལ་དུ་གློད་བཀྲོལ་གཏང་དགོས་པ་གསུངས་འདུག དེ་བཞིན་སྔར་ལོའི་ཕྱི་ཟླ་ ༢ པའི་ནང་འཇར་མ་ནིའི་གྲོས་ཚོགས་ཀྱི་ཉེས་མེད་འཛིན་བཟུང་བཙན་ཁྲིད་བྱས་པའི་ཆབ་སྲིད་བཙོན་པའི་གནད་དོན་ཐོག་ལ་ཕྱག་ལས་གནང་མཁན་གྱི་ཚོགས་ཆུང་གཙོས་ཚོགས་ཆུང་གཞན་ཁག་ཅིག་ཐུན་མོང་ནས་བཀྲ་ཤིས་དབང་ཕྱུག་ལགས་ཀྱི་གནས་སྟངས་ཐད་སེམས་འཚབ་དང་འབྲེལ་རྒྱ་གཞུང་ནས་ཁོང་མུ་མཐུད་བཀག་ཉར་བྱེད་དོན་དཔང་རྟགས་དང་བཅས་པ་ཁ་གསལ་བཟོ་དགོས་པ་མ་ཟད། ཁོང་ལ་ཁྲིམས་རྩོད་པ་དང་ཐུག་འཕྲད་བྱ་རྒྱུའི་རང་དབང་སྤྲོད་དགོས་པ་སོགས་ཀྱི་ཞུ་འབོད་གནང་པ་དྲན་གསོ་དང་འབྲེལ། རྒྱ་གཞུང་གིས་ཁོང་ལ་གཞི་མེད་ཉེས་འཛུགས་དང་ཁྲིམས་གཅོད་བྱེད་བཞིན་པ་འཕྲལ་མར་མཚམས་འཇོག་དགོས་པ་ནན་བརྗོད་གནང་འདུག གཞི་རྩའི་རྒྱ་ནག་གཞུང་གིས་བོད་ཀྱི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་འཛིན་བཟུང་བྱས་པ་ནས་བཟུང་ད་བར་རྒྱལ་སྤྱིའི་གཞུང་དང་གཟུང་འབྲེལ་མ་ཡིན་པའི་ཚོགས་སྐྱིད་མང་དག་ཞིག་ནས་རྒྱ་ནག་གཞུང་གིས་རྒྱ་ནག་རང་ཉིད་ཀྱི་རྩ་ཁྲིམས་དང་། རྒྱལ་སྤྱིའི་ཁྲིམས་ལུགས་ཁག་ལ་བརྩི་སྲུང་ཞུ་གྱི་མེད་པར་སྐྱོན་བརྗོད་དང་སྦྲགས། བཀྲ་ཤིས་དབང་ཕྱུག་ལགས་འཕྲལ་མར་གློད་བཀྲོལ་གཏང་དགོས་པའི་ཞུ་འབོད་རིམ་པ་གནང་ཡོད་ཀྱང་རྒྱ་གཞུང་ནས་བཟང་ཕྱོགས་ཀྱི་བརྡ་ལན་གང་ཡང་མ་སྤྲདཔའི་ཁར་། ཉེ་ཆར་ཕྱི་ཚེས་ ༤ ཉིན་རྒྱ་གཞུང་གིས་དབྱེ་བའི་མཚོ་སྔོན་ཞིང་ཆེན་ཡུལ་ཤུལ་འབྲིང་རིམ་མི་དམངས་ཁྲིམས་ཁང་དུ་ཁོང་གི་ནག་ཉེས་ཐོག་ལ་གཏུགས་བཤེར་བྱས་སྐབས་ཁུལ་དེར་ཆེད་བཅར་ཞུས་པའི་འཇར་མ་ནི་དང་ཨ་རི། དབྱིན་ཡུལ། ཁེ་ན་ཌ། དེ་བཞིན་ཡུ་རོབ་མཐུན་ཚོགས་བཅས་ཀྱི་གཞུང་ཚབ་མི་སྣ་ཁྲིམས་བཤེར་དངོས་ཀྱི་ཐོག་བཅར་བཅུག་མེད་པ་མ་ཟད། སྐབས་དེའི་ཁྲིམས་བཤེར་ཐོག་ཐག་གཅོད་གང་བྱུང་ཡོད་མེད་ཁ་གསལ་བྱས་མེད། རྩ་བའི་ཉེ་དུས་སུ་འཇར་མ་ནི་གྲོས་ཚོགས་འཐུས་མི་ཙམ་མི་པར་ཧྥ་རན་སིའི་གྲོས་ཚོགས་གོང་མའི་འཐུས་མི་བཅུ་བཞིས་བཀྲིས་དབང་ཕྱུག་ལགས་ལ་དྲང་བདེན་དང་ཕྱི་གསལ་ནང་གསལ་གྱི་ཁྲིམས་བཤེར་བྱེད་དགོས་པའི་ཞུ་འབོད་གནང་ཡོད་པ་མ་ཟད། ཡོ་རོབ་གྲོས་ཚོགས་ནང་ལ་བཀྲ་ཤིས་དབང་ཕྱུག་ལགས་དང་གྲྭ་ཆོས་སྐྱིད་ལགས་གཙོས་རྒྱ་གཞུང་གི་བཙོན་འོག་ཏུ་ཡོད་པའི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏང་དགོས་པའི་གྲོས་ཆོད་ཀྱང་བཞག་ཡོད་པ་རེད།

Latest news