ARCHIVE
Monthly Archives: November, 2017
ཐེ་ཝན་གྲོས་ཚོགས་ཀྱིས་མང་མོས་ཐག་གཅོད་ཐོག་བོད་སོག་ལས་ཁུངས་སྒོ་བརྒྱག་རྒྱུ་གཏན་འཁེལ་བྱུང་འདུག
vot.org -
ཐེ་ཝན་གྲོས་ཚོགས་ཀྱིས་མང་མོས་ཐག་གཅོད་ཐོག་ཁུལ་དེའི་འཛིན་སྐྱོང་ཀྱི་སྟངས་འཛིན་འོག་ཡོད་པའི་ Mongolian and Tibetan Affairs Commission འམ་ཐེ་ཝན་བོད་སོག་ལས་དོན་ལྷན་ཚོགས་ཀྱི་སྒྲིག་གཞི་རྣམས་དངོས་སུ་ཕྱིར་བསྡུ་དང་ལས་ཁུངས་དེ་སྒོ་བརྒྱག་རྒྱུ་གཏན་འཁེལ་བྱུང་འདུག
དེ་ཡང་འདི་ལོའོ་ཕྱི་ཟླ་བརྒྱད་པའི་ནང་ལ་ཐེ་ཝན་གཞུང་གི་འཛིན་སྐྱོང་ལྷན་ཚོགས་ནས་བོད་སོག་ལས་ཁུངས་དང་འབྲེལ་བའི་ལས་དོན་སྤྱི་དང་ལྷག་པར་དུ་ཐེ་ཝན་གཞུང་ནས་བོད་སོག་ལས་ཆེད་དུ་ལོ་ལྟར་ཐེ་ཝན་གྱི་སྒོར་མོ་ས་ཡ་ལྷག་འགྲོ་གྲོན་གཏང་བཞིན་པ་སོགས་ཀྱི་ཐད་གྲོས་བསྡུར་རིམ་པ་གནང་སྟེ། ཕྱི་ལོ་༢༠༡༨ ལོའི་ཐེ་ཝན་གྱི་སྔོན་རྩིས་ཁོངས་ནས་བོད་སོག་ལས་ཁུངས་ཀྱི་སྔོན་རྩིས་ཡོངས་སུ་བཀག་ཡོད་པ་མ་ཟད། ཕྱི་ཟླ་ ༩ ་ཚེས་ ༡༥ ཉིན་བོད་སོག་ལས་ཁུངས་ཀྱི་ལས་བྱེད་རྣམས་ཐེ་ཝན་རིག་གཞུང་ལས་ཁུངས་དང་རྒྱ་ནག་སྐམ་ས་ཆེན་པོའི་བློན་ཆེན་ལས་ཁུངས་སོ་སོར་འཆར་འགོད་ཀྱིས་ཟླ་སྒྲིལ་ཡོད་པ་རེད།
འོན་ཀྱང་ཐེ་ཝན་གྱི་ཁྲིམས་ལུགས་ལྟར་ན། ཐེ་ཝན་གཞུང་འཛིན་འོག་ཡོད་པའི་ལས་ཁུངས་ཤིག་ཕྱིར་བསྡུ་བྱེད་པར་གྲོས་ཚོགས་ནས་ཐེངས་གཉིས་མང་མོས་ཐོབ་དགོས་པ་དང་། གལ་སྲིད་ལས་ཁུངས་ཤིག་ཕྱིར་བསྡུ་བྱ་དགོས་པ་མ་ཟད། རྩ་ཁྲིམས་ཕུད་པའི་ལས་ཁུངས་ཀྱི་སྒྲིག་གཞི་དང་ཁྲིམས་ལུགས་སོགས་ཕྱིར་བསྡུ་བྱ་དགོས་ན་ངེས་པར་དུ་གྲོས་ཚོགས་ནང་ལ་མང་མོས་ཐེངས་གསུམ་ཐོབ་དགོས་ཀྱི་ཡོད་པ་ལྟར། ཁ་སང་ཕྱི་ཚེས་ ༢༨ ཉིན་ཐེ་ཝན་ནང་གི་སྔ་དྲོ་ཆུ་ཚོད་ ༡༡ ཐོག་ཐེ་ཝན་གྲོས་ཚོགས་ནང་བོད་དོན་རྒྱབ་སྐྱོར་གནང་མཁན་གྲོས་ཚོགས་འཐུས་མི་ལྕམ་ Kolas Yotaka ལགས་དང་སྐུ་ཞབས་ Freddy Lim ལགས་གཉིས་ནས་བོད་སོག་ལས་ཁུངས་ཀྱི་སྒྲིག་གཞི་དང་བཅས་པ་ཕྱིར་བསྡུ་དགོས་པའི་གྲོས་འཆར་རིམ་པ་གསུམ་པ་དེ་བསྣམས་ཡོད་པ་དང་། སྐབས་དེར་གྲོས་ཚོགས་ནང་དངོས་སུ་ཚོགས་ཞུགས་གནང་བའི་འཐུས་མི་གྲངས་ ༩༥ ལས་རྒྱབ་སྐྱོར་བྱེད་མཁན་མི་གྲངས་ ༦༥ དང་། ཁ་གཏད་བྱེད་མཁན་མི་གྲངས་ ༣༠ བཅས་བྱུང་མཐར་ཐེ་ཝན་གྲོས་ཚོགས་ཀྱིས་མང་མོས་ཐག་གཅོད་ཐོག་ཐེ་ཝན་བོད་སོག་ལས་དོན་ལྷན་ཚོགས་ཀྱི་སྒྲིག་གཞི་རྣམས་དངོས་སུ་ཕྱིར་བསྡུ་དང་ལས་ཁུངས་དེ་སྒོ་བརྒྱག་རྒྱུ་གཏན་འཁེལ་བྱུང་འདུག
དེའི་ཐད་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་དགའ་བསུ་དང་བོད་སོག་ལས་ཁུངས་ཟེར་བ་དེ་ནི་ཐེ་ཝན་དང་བོད་མི་རིགས་གཉིས་ཀྱི་དབར་ལ་འཁོན་འཛིན་དང་མཐོང་ཕྱོགས་མི་འདྲ་བ་བཟོ་གཞིའི་གནད་དོན་ཞིག་ཡིན་སྟབས། ད་རེས་ལས་ཁུངས་དེ་དངོས་སུ་སྒོ་བརྒྱབ་ཐུབ་པར་ཧ་ཅང་དགའ་པོ་བྱུང་ཞེས་གསུངས་འདུག
འདི་ག་རླུང་འཕྲིན་ཁང་ནས་ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་སུ་དེ་འབྲེལ་བཅར་འདྲི་ཞུས་པར་ཐེངས་འདིའི་ཐེ་ཝན་གྲོས་ཚོགས་ཀྱི་ཐག་གཅོད་དེ་ཡིས་མ་འོངས་པར་བོད་སོགས་ལས་ཁུངས་དང་འབྲེལ་བའི་གནད་དོན་ཁག་ཁྲིམས་ཐོག་ནས་བསྐྱར་ལོག་བྱེད་རྒྱུ་མེད་པ་བཟོས་པ་མ་ཟད། ལྷག་པར་དུ་བོད་སོགས་ལས་ཁུངས་དེ་ཐོག་མར་གསར་འཛུགས་བྱེད་སྐབས་ནས་བོད་འདི་རྒྱ་ནག་གི་ཆ་ཤས་ཡིན་པ་སོགས་བོད་ཀྱི་རྒྱལ་རབས་ལོ་རྒྱུས་ལོག་བཤད་བྱེད་བཞིན་པའི་རྣམ་པ་དེ་དག་ཁྲིམས་ཐོག་ནས་མེད་པ་ཆགས་ཡོད་པ་གསུངས་སོང་།
རེས་གཟའ་མིག་དམར། ༢༠༡༧།༡༡།༢༨
vot.org -
ཉན་པ།: Listen
ཕབ་ལེན། Download
འཕྲོད་བསྟེན་བཀའ་བློན་མཆོག་རྒྱ་གར་བྱང་ཤར་ཨ་རུ་ནཱ་ཅལ་བོད་མིའི་གཞིས་ཆགས་ཁག་ཅིག་ཏུ་གཞུང་འབྲེལ་ཕྱོགས་ཕེབས་གནང་བཞིན་པ།
བོད་རིགས་བེུད་གཅིག་ཁེ་ན་ཌའི་ས་གནས་གྲོས་ཚོགས་འཐུས་མིའི་འོས་མིར་མཉམ་ཞུགས་གནང་འདུག
རྒྱ་ནག་གིས་ཨ་རི་ནང་གི་སྨྲ་བརྗོད་རང་དབང་ཐོག་ཐེ་བྱུས་བྱེད་བཞིན་པར་ཐེར་བཏོན།
རྒྱ་གཞུང་གིས་འཇར་མན་ངོས་ནས་བོད་མིའི་སྨྲ་བརྗོད་རང་དབང་སྲུང་སྐྱོབ་གནང་ཕྱོགས་ལ་སྐྱོན་བརྗོད་བྱས་པ།
སྦག་ས་ཆོས་སྒར་གྱི་གནས་བརྟན་བགྲེས་པ་རྣམས་དང་དཔེ་ཁྲིད་དགེ་རྒན་ཚོར་བཀྲིན་རྗེས་གྱི་བྱེད་སྒོ་ཐེངས་དང་པོ་སྤེལ་བ།
གླུ་གཞས་ལེ་ཚན། གླིང་བུ་སྒྱུ་རྩལ་བ་ངག་དབང་མཁས་མཆོག་ལཊ་སུ་དམིགས་བསལ་བཅར་འདྲི་ཞུས་པ།
Tuesday 28/11/2017
Health Kalon visits Tibetan settlements in Arunachal Pradesh
Tibetan woman stands up for Ontario Liberal candidacy for Parkdale High
Beijing hinders free speech in America
China accused of extreme and inflammatory response to German Football Association
Ganden Jangtse Monastery holds felicitation ceremony for elderly monks
MUSIC FEATURE: Interview with Grammy Nominee & world renowned Tibetan flutist & composer Ngawang Khechog
བོད་རིགས་བེུད་གཅིག་ཁེ་ན་ཌའི་ས་གནས་གྲོས་ཚོགས་འཐུས་མིའི་འོས་མིར་མཉམ་ཞུགས་གནང་འདུག
vot.org -
ཁེ་ན་ཌ་ Ontario མངའ་ཁུལ་གྱི་ Parkdale ས་གནས་སུ་གནས་སྡོད་གནང་བཞིན་པ་བོད་རིགས་བེུད་སྐལ་བཟང་སྒྲོལ་མ་ལགས་ཕྱི་ལོ་ ༢༠༡༨ ལོའི་ Ontario མངའ་ཁུལ་གྱི་གྲོས་ཚོགས་འཐུས་མིའི་འོས་བསྡུའི་ནང་ Parkdale—High Park ས་གནས་ཀྱི་ Liberal ཆབ་སྲིད་ཚོགས་པའི་འོས་མིར་མཉམ་ཞུགས་གནང་འདུག
དེ་ཡང་སྐལ་བཟང་སྒྲོལ་མ་ལགས་ཀྱིས་རང་གི་ངོ་དེབ་ཐོག་བརྙན་ཐུང་ཞིག་འདོན་སྤེལ་གནང་བའི་ནང་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཡུལ་གྲུ་ཁག་གི་ཆབ་སྲིད་འགོ་ཁྲིད་ནང་བོད་རིགས་གཞོན་སྐྱེས་མང་ཙམ་བསླེབ་ཐུབ་པ་བྱུང་ཚེ། དེས་བོད་ཀྱི་རྩ་དོན་ལ་ཁྱད་པར་ཆེན་པོ་བཟོ་རྒྱུའི་ནུས་པ་དམིགས་བསལ་བ་ཞིག་ཡོད་པར་བཀའ་ཕེབས་པ་ལྟར་དེ་དོན་ངོས་འཛིན་ཞུ་ཐོག་ཁོ་མོ་ད་རེས་ParkdaleHigh ས་གནས་ཀྱི་ Liberal ཆབ་སྲིད་ཚོགས་པའི་འོས་མིར་མཉམ་ཞུགས་གནང་གི་ཡོད་སྟབས། མང་ཚོགས་ནས་ཁོ་མོ་ས་གནས་གྲོས་ཚོགས་འཐུས་མིའི་འོས་མིར་འདེམས་ཐོན་ཡོང་སླད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་འདུག་པ་མ་ཟད། རིང་མིན་ཕྱི་ཟླ་ ༡༢ ཚེས་ ༡༩ ཉིན་ Ontario གུ་ཡངས་ཚོགས་པའི་ཚོགས་འདུ་ཞིག་གི་ཐོག་ནས་ Parkdale ས་གནས་ནས་བཞེངས་མཁན་འོས་མི་རྣམས་འདེམས་སྒྲུག་གནང་གི་ཡོད་པས་བོད་རིགས་མང་ཚོགས་ནས་དྲ་རྒྱ་བརྒྱུད་ཟླ་བ་འདིའི་ཟླ་མཇུག་སྔོན་ཚོད་ལ་ཁོ་མོར་རྒྱབ་སྐྱོར་རྒྱ་གང་ཆེ་གནང་སྟེ་མཚན་རྟགས་བཀོད་གནང་ཡོང་བར་དགོས་འདུན་བཏོན་གནང་འདུག
སྐལ་བཟང་སྒྲོལ་མ་ལགས་ནི་རྒྱ་གར་དུ་འཁྲུངས་ཤིང་ཁུལ་འདི་ནས་འཚར་ལོངས་བྱུང་བ་ཞིག་ཡིན་པ་དང་ཁོང་ཁེ་ན་ཌར་ཐོག་མ་འབྱོར་ནས་ཁྱོན་ལོ་ངོ་ ༡༤ རིང་ས་གནས་མི་མང་གི་འཕྲོད་བསྟེན་དང་ཤེས་ཡོན། རིག་གཞུང་། སྐྱབས་བཅོལ། དེ་བཞིན་གསར་འབྱོར་གྱི་གནས་སྟངས་འོག་གནས་སྤོས་གནང་མཁན་ཚོར་རོགས་རམ། གཞན་ཡང་གཞོན་སྐྱེས་ཚོར་ལས་ཀའི་གོ་སྐབས་བསྐྲུན་རྒྱུ་སོགས་ལས་དོན་མང་དག་ཞིག་གཉེར་དང་གཉེར་མུས་ཡིན་པ་རེད།
ཉེ་བའི་ཆར་ཕྱི་ཟླ་ ༩ ནང་དུ་ Parkdale མང་གཙོ་ཚོགས་པའི་ཚོགས་འདུ་ཞིག་གི་ཐོག་ཕྱི་ལོ་ ༢༠༡༨ ལོའི་མངའ་སྡེའི་འོས་བསྡུའི་ནང་ Parkdale ས་གནས་ནས་བཞེང་མཁན་འོས་མི་བདམ་སྐབས་བོད་རིགས་བེུད་བུ་འཁྲིད་དཀར་པོ་ཆེ་ལགས་བདམས་ཐོན་བྱུང་ཡོད་པ་དང། སྐབས་དེར་བུ་འཁྲིད་ལགས་ཀྱིས་ཁོང་དེ་སྔ་ཕྱི་ལོ་ ༢༠༠༢ ལོར་ཁེ་ན་ཌ་ནང་དུ་རང་གི་ནང་མི་ལྷན་རྒྱས་ཐོག་མར་འབྱོར་སྐབས་ཁུལ་དེའི་ནང་བོད་ཆས་སྤྲས་པའི་བོད་མི་དང། གཞན་མི་རིགས་མང་དག་ཞིག་མཉམ་གནས་བྱས་པ་མཐོང་སྐབས་ས་གནས་འདིར་བློ་ཐག་ཉེ་བའི་ཚོར་བ་ཞིག་བྱུང་བ་མ་ཟད། དེའང་ཁོང་རང་ཉིད་ལྟ་བུར་ཆ་མཚོན་ན་བཙན་བྱོལ་ནང་དུ་ལྷུང་བའི་བོད་མི་མི་རབས་གསུམ་པ་ཞིག་ཡིན་པའི་ཆ་ནས་ཚོར་བ་དེ་དམིགས་བསལ་ཤུགས་ཆེ་བ་ཡོད་སྐོར་གསུངས་ཡོད་པ་རེད།
གཞི་རྩའི་ Parkdale ས་གནས་དེ་འཛམ་གླིང་ཡུལ་གྲུ་གཞན་ནས་ཁེ་ན་ཌར་སྐྱབས་བཅོལ་ཞུ་བར་ཕེབས་མཁན་རྣམས་ཀྱི་བཞུགས་གནས་གཙོ་བོ་ཞིག་ཆགས་ཀྱི་ཡོད་པ་དང་། ས་གནས་དེར་རྒྱ་བལ་འབྲུག་གསུམ་གྱི་རྗེས་སུ་བོད་མི་སྐྱབས་བཅོལ་བའི་གྲངས་འབོར་མང་ཤོས་ཆགས་ཀྱི་ཡོད་པ་རེད་འདུག
ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་ཐད་རང་དབང་ལྡན་པའི་ཞིབ་འཇུག་ཚོགས་ཆུང་ཞིག་ཆེད་འཛུགས་དགོས་པའི་ཞུ་འབོད་ཀྱི་ལས་འགུལ་སྤེལ་བ།
vot.org -
བཞུགས་སྒར་དུ་དྭང་བླངས་བོད་མི་ཁག་ཅིག་གིས་ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་ཐད་རང་དབང་ལྡན་པའི་ཞིབ་འཇུག་ཚོགས་ཆུང་ཞིག་ཆེད་འཛུགས་དགོས་པའི་ཞུ་འབོད་ཀྱི་ལས་འགུལ་སྤེལ་་གནང་སོང་།
དེ་རིང་སྔ་དྲོ་ཚོུད་ ༡༠ ཐོག་བོད་མིའི་སྒྲིག་འཛུགས་ལས་ཁུངས་ཁག་གི་གཤམ་དུ་ཆགས་པའི་བསིལ་སྤོལ་རྩེད་ཐང་དུ་བོད་མི་ ༡༠༠ མ་ཟིན་ཙམ་ཞིག་འདུ་འཛོམས་ཀྱིས་ཨ་རི་དོན་གཅོད་འཕོ་འགྱུར་གནང་བའི་གནད་དོན་དང་འབྲེལ། རང་དབང་ལྡན་པའི་ཞིབ་འཇུག་ཚོགས་ཆུང་ཞིག་ཆེད་འཛུགས་ཐོག་དོན་རྐྱེན་གང་ཡིན་གང་མགྱོགས་ཐག་གཅོད་བྱེད་དགོས་པ་དང་དབང་ཆ་བེད་སྤྱོད་ལོག་པ་གཏང་རྒྱུ་མེད་པ། མི་མང་གི་མངོན་འདོད་སྣང་མེད་གཏང་མི་ཆོག བོད་མིའི་སྒྲིག་འཛུགས་ཀྱི་ཆེ་མཐོང་སྲུང་སྐྱོབ། དྲང་ལྡན་ལ་རྒྱབ་སྐྱོར་དེ་བཞིན་༸གོང་ས་མཆོག་སྐུ་ཚེ་བསྐལ་བརྒྱར་བརྟན་པར་ཤོག་སོགས་ཀྱི་འཕྲེད་དར་འཕྱར་ནས་བོད་མིའི་སྒྲིག་འཛུགས་ལ་ཞུ་འབོད་ཀྱི་ལས་འགུལ་སྤེལ་སོང་།
ལས་འགུལ་དེའི་བརྒྱུད་ཁོང་རྣམས་ནས་འཛིན་སྐྱོང་བཀའ་ཤག་ལ་དོན་ཚན་གཉིས་ཅན་གྱི་ཕྱག་བྲིས་ཤིག་ཕུལ་འདུག་པའི་ནང་བོད་མིའི་སྒྲིག་འཛུགས་ནས་བཙན་བྱོལ་བོད་མིའི་བཅའ་ཁྲིམས་ལེའུ་དང་པོའི་དོན་ཚན་ ༡ ནང་གསེས་ ༣ འོག་དང་། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་ ༡༩ (༡) བཅས་ཀྱི་དགོངས་དོན་ཤེས་རིག་བཀའ་བློན་དངོས་གྲུབ་ཚེ་རིང་མཆོག་ཨ་རིའི་སྐུ་ཚབ་དོན་གཅོད་དུ་བསྐོ་གཞག་གནང་ཡོད་པ་དང་། དེ་རྗེས་ཚེས་ ༩ ཉིན་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་བཏང་བའི་ཁྲིམས་སྒྲིག་གི་ཆ་རྐྱེན་ཁག་འགྲེལ་བརྗོད་གནང་པར་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དང་། དེའི་ལག་བསྟར་བརྒྱུད་རིམ་གང་གི་འོག་ནས་ཐོག་མར་ཡར་སྐུ་ཚབ་དོན་གཅོད་དུ་བསྐོ་གཞག་གནང་ཡོད་པ་དེ་བཞིན་དུ་སྐུ་ཚབ་དོན་གཅོད་ཀྱི་ལས་འགན་ནས་འཕོ་འགྱུར་གཏང་རྒྱུའི་ཐག་གཅོད་ཀྱང་བཅའ་ཁྲིམས་ཀྱི་དོན་ཚན་དང་ལག་བསྟར་བརྒྱུད་རིམ་དེ་དག་རང་གི་ཐོག་ནས་གནང་ཡོད་པ་ཞིག་ཡིན་ཞེས་གསུངས་ཡོད་པ་དང་། དེ་རྗེས་ཕྱི་ཚེས་ ༡༨ ཉིན་བཀའ་ཤག་གི་དོན་ཚན་བཅུ་ཅན་གྱི་གསལ་བཤད་གནང་བ་སོགས་ལུང་འདྲེན་དང་སྦྲགས། བཀའ་ཤག་གིས་ཨ་རིའི་དོན་གཅོད་ལས་འགན་མཚམས་འཇོག་གི་ཐག་གཅོད་དེ་བཅའ་ཁྲིམས་དོན་ཚན་ ༡ པོའི་ནང་གསེས་ ༣ པ་གཞིར་བཟུང་ལག་བསྟར་གནང་བ་ཡིན་ཞེས་གསུངས་པ་དེ་༸གོང་ས་༸སྐྱབས་མགོན་ཆེན་པོ་མཆོག་གི་རང་ཆས་སུ་ཡོད་པའི་སྐུ་དབང་ལ་ལག་པ་འཆང་བ་ཞིག་ཡིན་པ་དང་། བཅའ་ཁྲིམས་ནང་དོན་གཅོད་འཕོ་འགྱུར་གཏོང་རྒྱུའི་ཆ་རྐྱེན་དང་བརྒྱུད་རིམ་གཏན་ནས་མེད་བཞིན་དུ་བཅའ་ཁྲིམས་ཀྱི་དོན་ཚན་དང་ལག་བསྟར་བརྒྱུད་རིམ་དེ་དག་རང་གི་ཐོག་ནས་བྱས་ཡོད་པ་ཞིག་ཡིན་ཞེས་གསུངས་ཚེ། བཅའ་ཁྲིམས་རིན་པོ་ཆེར་འགྲེལ་ལོག་གནང་པ་ཞིག་ཡིན་པ་དང་། དོན་གཅོད་ལས་ཐོག་པ་དེ་ཉིད་བླང་དོར་སྒྲིག་གཞི་དང་འགལ་བའི་ཆ་ནས་ལས་འགན་ཕྱིར་བསྡུ་གནང་བ་ཡིན་གསུངས་ན། འགལ་བའི་ཆ་དེ་བླང་དོར་སྒྲིག་གཞིའི་བརྒྱུད་རིམ་གཞིར་བཟུང་ཕེབས་དགོས་པ་ལས་སྒྲིག་གཞི་དང་མ་མཐུན་པའི་སྒོ་ནས་ཐག་གཅོད་གནང་བ་དེ་བརྒྱུད་རིམ་ཁྲིམས་མཐུན་ཆགས་ཀྱི་མེད་སྟབས་བཀའ་ཤག་ནས་འདིའི་ཐོག་དགོངས་པ་གཟབ་བཞེས་གནང་དགོས་གལ་ཡིན་པའི་བོད་སྐུལ་ཞུས་གནང་འདུག
སྐབས་དེར་ལས་འགུལ་བའི་ཁོངས་སུ་ཡོད་པའི་བོད་ཀྱི་བདེ་རྩ་ཚོགས་པའི་ལས་བྱེད་སྒྲོལ་མ་འབུམ་ལགས་ཀྱིས་ཁོང་གཙོས་པའི་རྡ་རམ་ས་ལ་དང་བལ་ཡུལ དེ་བཞིན་ལྡི་ལི་དང་ལྷོ་ཕྱོགས་སོགས་ནས་བོད་མི་ ༡༠༠ མ་ཟིན་ཙམ་ཞིག་དེར་སླེབས་ཡོད་པ་དང། ཁོང་རྣམས་ནས་ད་རེས་ཨ་རི་དོན་གཅོད་སྤེན་པ་ཚེ་རིང་ལགས་འཕོ་འགྱུར་བཏང་བའི་གནད་དོན་ཐད་དབུས་བོད་མིའི་སྒྲིགས་འཛུགས་ནས་དྲང་ལྡན་གནང་མེད་པ་ལྟར་ཐག་གཅོད་དེར་ངོས་ལེན་གནང་ཐུབ་ཐབས་མེད་སྟབས། འཛིན་སྐྱོང་ནས་གནད་དོན་ཐད་རང་དབང་ལྡན་པའི་ཞིབ་འཇུག་ཚོགས་ཆུང་ཞིག་ཆེད་འཛུགས་དགོས་པའི་ཞུ་འབོད་ཀྱི་ལས་འགུལ་སྤེལ་གནང་བ་ཞིག་ཡིན་པ་དང་། ལས་འགུལ་བ་དེ་དག་རང་མོས་ཐོག་ནས་ཡོང་བ་ཆགས་ཡོད་པ་གསུངས་སོང་། དེ་སྔོན་ལས་འགུལ་བ་རྣམས་ནས་བོད་མིའི་སྒྲིག་འཛུགས་བཀའ་ཤག་གི་ཉེ་འགྲམ་དུ་ལས་འགུལ་སྤེལ་རྒྱུའི་ཆོག་མཆན་ཞུས་ཡོད་པ་བཞིན་བདེ་སྲུང་ལས་ཁུངས་ཀྱིས་ཁོང་རྣམས་ལ་གངས་སྐྱིད་བསིལ་སྤོལ་རྩེད་ཐང་དུ་སྤེལ་རྒྱུར་ཆོག་མཆན་གནང་པ་ལྟར་དེ་རིང་སྔ་དྲོ་ཕྱག་ཚོད་ ༡༠ པ་ནས་ཕྱི་དྲོ་ཕྱག་ཚོད་ ༥ བར་ལས་འགུལ་སྤེལ་གནང་ཡོད་པ་རེད་འདུག
དེ་རྗེས་གསར་འགོད་པ་རྣམས་ད་རེས་ཀྱི་ལས་འགུལ་དེའི་ཐོག་འཛིན་སྐྱོང་བཀའ་ཤག་གི་ངོས་ནས་ལན་འདེབས་གང་གནང་མིན་སྐོར་བཀའ་འདྲི་ཞུས་པར་བཀའ་ཤག་གི་དྲུང་འཕར་ཕུན་ཚོགས་ཚེ་རིང་ལགས་ཀྱིས་རྩ་བའི་ང་ཚོའི་མང་གཙོའི་འགྲོ་ལུགས་འོག་མི་མང་ལ་ལས་འགུལ་སྤེལ་ཆོག་རྒྱུའི་རང་དབང་ཡོད་པ་བཞིན་དེ་ལྟར་གནང་གི་ཡོད་པར་གང་ཡང་ཞུ་རྒྱུ་མེད་ཅེས་དང་། ལས་འགུལ་བའི་དགོས་འདུན་དང་ཕྱག་བྲིས་གནང་ཁག་སང་ཉིན་བཀའ་ཤག་ལྷན་རྒྱས་ཐོག་སྤྱན་འབུལ་ཞུ་རྒྱུ་ཡིན་པ་གསུངས་ཡོད།
རྩ་བའི་ཟླ་བ་འདིའི་ཕྱི་ཚེས་ ༧ ཉིན་འཛིན་སྐྱོང་བཀའ་ཤག་གི་ངོས་ནས་ཨ་རིའི་སྐུ་ཚབ་དོན་གཅོད་འཕོ་འགྱུར་དང་འབྲེལ་བའི་གསལ་བསྒྲགས་སྤེལ་བ་དང་། དེ་རྗེས་ཚེས་ ༩ ཉིན་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ད་ལྟའི་ཨ་རིའི་སྐུ་ཚབ་དོན་གཅོད་ལས་ཐོག་སྤེན་པ་ཚེ་རིང་ལགས་ཀྱིས་ཕྱག་ལས་གནང་ཕྱོགས་དེ་བྱ་སྤུ་གནོན་གྱི་སྒྲིག་འཛུགས་བཞིན་ཚུལ་མཐུན་ཡོང་གི་མེད་པ་དང་འཐུས་ཤོར་འགྲོ་ཉེན་ཡོད་པ་བཅས་མཚོན་རྟགས་མང་པོ་བསྟན་པར་བརྟེན་ཐག་གཅོད་འདི་ལྟར་བྱེད་དགོས་བྱུང་ཞེས་གསལ་བཤད་གནང་ཡོད་པ་རེད། འོན་ཀྱང་མང་ཚོགས་ཁྲོད་འཛིན་སྐྱོང་བཀའ་ཤག་གི་ངོས་ནས་གནད་དོན་དེའི་ཐོག་གསལ་བཤད་ཞིབ་ཕྲ་དགོས་པ་སོགས་ཀྱི་ལབ་གླེང་མང་དག་ཞིག་མུ་མཐུད་ཡོང་བཞིན་པ་དང་འབྲེལ། ཚེས་ ༡༨ ཉིན་བཀའ་ཤག་གི་ངོས་ནས་དོན་ཚན་བཅུ་ཅན་གྱི་གསལ་བཤད་ཞིག་འདོན་སྤེལ་གནང་ཡོད་པའི་ནང་ཨ་རིའི་དོན་གཅོད་སྤེན་པ་ཚེ་རིང་ལགས་ཀྱིས་བཀའ་ཤག་གི་ཐུགས་རེ་བཞིན་ལས་དོན་སྒྲུབ་མ་ཐུབ་པ་དང་། ཡིད་ཆེས་བློས་འགེལ་མི་ཐུབ་པ། དེ་བཞིན་འཛིན་སྐྱོང་བྱ་སྤུ་གནོན་གྱི་གོ་རིམ་ལ་ལྟོས་མེད་གནང་ཡོད་པ་བཅས་ཀྱི་རྒྱུ་མཚན་ལ་བརྟེན་ནས་ཐག་གཅོད་དེ་ལྟར་གནང་དགོས་བྱུང་ཡོད་པ་སོགས་རྒྱུ་མཚན་གཙོ་བོ་གསུམ་གྱི་ཐོག་ནས་གསལ་བཤད་གནང་ཡོད་པ་རེད།
དེའི་བར་ན་ཉེ་ཆར་སྲིད་སྐྱོང་བློ་བཟང་སེང་གེ་མཆོག་ Canada ནང་དུ་གཞུང་འབྲེལ་ཕྱོགས་ཕེབས་ཁྲོད་ནང་སྲིད་བཀའ་བློན་མཆོག་དང་ཤེས་རིག་བཀའ་བློན་མཆོག་གི་ལྷན་དུ་ Toronto བོད་མི་རྣམས་ལ་གསུང་བཤད་གནང་སྐབས་བོད་མི་ཉུང་ཤས་ཤིག་ནས་ཁོང་ལ་ཨ་རིའི་སྐུ་ཚན་དོན་གཅོད་ཀྱི་གནད་དོན་ཐོག་དྲང་ལྡན་དགོས་པ་སོགས་ཀྱི་ཡིག་འཁོད་འཕྲེད་དར་འཕྱར་ནས་ལས་འགུལ་སྤེལ་ཡོད་པ་དང་། དེ་བཞིན་ཉེ་ཆར་ཨ་རིའི་གྲོང་ཁྱེར་ New York ནང་དུའང་བོད་མི་ཁག་ཅིག་འདུ་འཛོམས་ཀྱིས་འཛིན་སྐྱོང་བཀའ་ཤག་གི་ངོས་ནས་ཨ་རི་དོན་གཅོད་འཕོ་འགྱུར་གྱི་གནད་དོན་ཐད་འདོད་བློ་ཁེངས་པའི་གསལ་བཤད་ཞིག་ད་དུང་ཡང་བྱུང་གནང་མེད་སྟབས། གསལ་བཤད་ཁ་གསལ་དང་དྲང་ལྡན་གྱི་ཐོག་ནས་ཐག་གཅོད་གནང་དགོས་པའི་ཞུ་འབོད་ཀྱི་ལས་འགུལ་ཞིག་ཀྱང་སྤེལ་ཡོད་པ་རེད།
དོ་བདག་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་ལགས་ནས་ད་བར་འགྲེལ་བརྗོད་གནང་བའི་ནང་ཁོང་ནས་དོན་གཅོད་འཕོ་འགྱུར་ཐོག་འཛིན་སྐྱོང་གྱི་ཐག་གཅོད་གནང་བར་ངོས་ལེན་གནང་ཡོད་པ་དེ་ལྟར་ཡང། ཁོང་གི་ལས་དོན་ལ་འཐུས་ཤོར་ཕྱིན་པ་སོགས་ཀྱི་གནད་དོན་ཁག་ལ་ངོས་ལེན་ཞུ་གྱི་མེད་པ་དང། དེའང་རིང་མིན་དོན་གཅོད་ཀྱི་ལས་འགན་མཚམས་འཇོག་གནང་བའི་རྗེས་སུ་གསལ་བཤད་ཞིབ་ཕྲ་གནང་རྒྱུ་ཡོད་པ་གསུངས་ཡོད་པ་རེད།
རེས་གཟའ་ཟླ་བ། ༢༠༡༧།༡༡།༢༧
vot.org -
ཉན་པ།: Listen
ཕབ་ལེན། Download
ཨ་རིའི་དོན་གཅོད་འཕོ་འགྱུར་གྱི་གནད་དོན་ཐད་རང་དབང་ལྡན་པའི་ཞིབ་འཇུག་ཚོགས་ཆུང་ཞིག་ཆེད་འཛུགས་དགོས་པའི་ཞུ་འབོད་ལས་འགུལ་སྤེལ་སོང་།
༸གོང་ས་མཆོག་གི་བཀའ་ལན་དེའི་དགོངས་དོན་ལོག་སྒྲུབ་བྱས་པར་སེམས་འཚབ་ཡོད་པ་གསུངས་འདུག
ཁེ་ན་ཌའི་གྲོས་ཚོགས་ནང་བོད་མིའི་ཆབ་སྲིད་བཙོན་པའི་གནད་དོན་འདྲི་རྩད་གནང་པ།
ངོ་རྒོལ་རྐྱེན་པས་འཇར་མ་ནི་དང་རྒྱ་ནག་དབར་གྱི་རྐང་སྤོལ་རྩེད་འགྲན་རེ་ཞིག་ཕྱིར་འཐེན་བྱས་འདུག
བཙན་བྱོལ་ནང་ཇོ་ནང་ཆོས་བརྒྱུད་ཤེས་མཁན་ཧ་ཅང་ཉུང་ཉུང་རེད།
ཧིན་བོད་མཛའ་འབྲེལ་ཚོགས་པས་བོད་དོན་གོམ་བགྲོད་ལས་འགུལ་སྤེལ་བ།
རྒྱ་གར་གཞུང་མང་ལ་ཐུགས་རྗེ་ཆེ་ཞུ་དང་སྦྲགས་བོད་ཀྱི་དུས་སྟོན་ཚོགས་རྒྱུ་རེད་འདུག
Monday 27/11/2017
Group of Tibetans call for independent commission to resolve US Representative issue
Dalai Lama office clarifies on recent statement in Kolkata on Buddha’s birthplace
Canadian Senators launch enquiry into state of political prisoners in Tibet
Tibet row halts China U20 football team's German tour
Tibetans and Indians from different states protest against China in Mon Tawang
9th Special Conference on Jonang Tradition concludes in Dharamsala
དཔལ་ལྡན་དགའ་ལྡན་ཕོ་བྲང་གིས་སྤེལ་བའི་གསལ་བཤད།
vot.org -
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་ཟླ་ ༡༠ པའི་ནང་རྒྱ་གར་གྲོང་ཁྱེར་མེ་རཌ་ནང་སློབ་ཕྲུག་གཅིག་ནས་སྟོན་པ་ཤཱཀྱ་ཐུབ་པའི་སྐུ་ཚེའི་མཛད་རྣམ་ལས་འཕྲོས་པའི་བཀའ་འདྲི་ཞུ་བར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་བ་དེར་བསྙད་ནས་བལ་ཡུལ་གསར་ཤོག་ཁག་གཅིག་ནང་གོ་ནོར་སོང་བའི་གནས་ཚུལ་སྤེལ་བར་ཐུགས་འཚབ་ཡོད་པའི་གསལ་བཤད་གནང་འདུག
དེའང་ཟླ་ ༡༠ ཚེས་ ༡༦ ཉིན་རྒྱ་གར་གྲོང་ཁྱེར་མེ་རཌ་ནང་སློབ་ཕྲུག་གཅིག་གིས་སྟོན་པ་ཤཱཀྱ་ཐུབ་པའི་སྐུ་ཚེའི་མཛད་རྣམ་ལས་འཕྲོས་པའི་དྲི་བར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་བ་དེར་བསྙད་ནས་བལ་ཡུལ་གསར་ཤོག་ཁག་གཅིག་ནང་སྤེལ་བའི་གནས་ཚུལ་སྐོར་ང་ཚོས་ཤེས་རྟོགས་བྱུང་༸གོང་ས་ཏཱ་ལའི་བླ་མ་མཆོག་གི་བཀའ་ལན་དེའི་དགོངས་དོན་ལ་གོ་བ་ལོག་སྒྲུབ་བྱས་པ་དེར་ང་ཚོར་སེམས་འཚབ་འདུག ༸གོང་ས་ཏཱ་ལའི་བླ་མ་མཆོག་གིས་བལ་པོའི་ཆོས་གྲོགས་ཕོ་མོ་ཚོའི་ལ་རྒྱར་བརྩི་བཀུར་མ་མཛད་པ་དེ་འདྲ་རྩ་བ་ནས་མ་རེད། ཅེས་འདིར་གསལ་བཤད་ཞུ་འདོད་བྱུང་། བཀའ་ལན་དེའི་དགོངས་དོན་གཙོ་བོ། དེ་སྔ་ཨེ་ཤི་ཡའི་ཁྱོན་ཡོངས་སུ་ནང་ཆོས་ཀྱི་ཤུགས་རྐྱེན་དེས་ཁྱབ་པ་དང་། ང་ཚོས་སྟོན་པའི་གསུང་ལ་སློབ་སྦྱོང་བྱ་དགོས། ཞེས་པ་དེ་ཡིན་པ་ལས་སྟོན་པ་ཤཱཀྱ་ཐུབ་པའི་འཁྲུངས་ཡུལ་ལུམ་བྷི་ནི་ཡིན་པ་དེར་༸གོང་ས་ཏཱ་ལའི་བླ་མ་མཆོག་ནས་ནང་པ་གཞན་དང་གཅིག་མཚུངས་མཐའ་གཅིག་ཏུ་མོས་མཐུན་མཛད་བཞིན་ཡོད།
སྟོན་པ་མངོན་པར་རྫོགས་པར་སངས་རྒྱས་པའི་གནས་དང་ཆོས་འཁོར་སྐོར་ཡུལ་རྒྱ་གར་འཕགས་པའི་ཡུལ་འདི་ཉིད་ཡིན་པ་ཡོངས་སུ་གྲགས་ཡོད། གསལ་བཤད་འདིས་ཐེ་ཚོམ་དང་གོ་བ་ལོག་པ་མཐའ་དག་སེལ་ཐུབ་རྒྱུའི་རེ་བ་ཞུ་བཞིན་ཡོད་ཅེས་གསལ་བཤད་གནང་འདུག
རེས་གཟའ་ཉི་མ། ༢༠༡༧།༡༡།༢༦
vot.org -
ཉན་པ།: Listen
ཕབ་ལེན། Download
འདས་པའི་བདུན་གཅིག་ནང་གི་གལ་ཆེའི་གསར་འགྱུར་ཁག་ལ་བསྐྱར་ཞིབ།
Sunday 26/11/2017
Week review
རེས་གཟའ་སྤེན་པ། ༢༠༡༧།༡༡།༢༥
vot.org -
ཉན་པ།: Listen
ཕབ་ལེན། Download
བཙན་བྱོལ་བོད་མིའི་དྭང་བླང་དཔྱ་དངུལ་ལག་དེབ་སྐོར་བཅར་འདྲི།
Saturday 25/11/2017
Interview on Green Book related issues