Tibetan Royal Year of 2151 | Year of the Wood Dragon

ARCHIVE

Yearly Archives: 2016

རེས་གཟའ་མིག་དམར། ༢༠༡༦།༡༢།༢༧

ཉན་པ།: Listen ཕབ་ལེན། Download ༸གོང་ས་མཆོག་གིས་ལྡི་ལིར་ཉིན་གསུམ་གྱི་ཆོས་འབྲེལ་ལེགས་གྲུབ་མཛད་པ། གྲྭ་འཇིགས་མེད་མགོ་རིལ་ལགས་ཀྱི་གཟུགས་གཞི་གནས་སྟངས་སྐྱོ་རུང་སོང་ནས་སྨན་ཁང་དུ་བསྐྱལ་འདུག རྨ་ཆུ་ནས་དགེ་འདུན་པ་ཞིག་འཛིན་བཟུང་། བོད་པ་དང་ཕྱི་རྒྱལ་ཆེད་ལས་ཉམས་ཞིབ་མི་སྣའི་ཚོགས་འདུ་བསྐོང་ཚོགས། བོད་ནང་ཆོས་ཕྱོགས་ཀྱི་བྱེད་སྒོ་སྤེལ་བར་ཆོག་མཆན་ཞུ་དགོས་པ་གསུངས་འདུག གླུ་གཞས་ལེ་ཚན། ཕ་ཡུལ་གྱི་དྲན་འཆར་རུ་ཁག་ནས་བླངས་པའི་རང་བཙན། Tuesday 27/12/2016 Dalai Lama concludes three day teaching in Delhi Recently released Tibetan political prisoner hospitalized Tibetan monk arbitrarily detained in Machu for reasons unknown China, Tibet and the Himalayas: TPI conference in Dharamsala MUSIC FEATURE: Rangzen (Acoustic) - Reborn Coalition

༸གོང་ས་མཆོག་གིས་ལྡི་ལིར་ཉིན་གསུམ་གྱི་ཆོས་འབྲེལ་ལེགས་གྲུབ་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལིའི་ལི་ལཱ་གསོལ་མགྲོན་ཁང་དུ་ཨུ་རུ་སུ་དང་སོག་ཡུལ་གྱི་ནང་པའི་དད་ལྡན་པ་ཁག་ཅིག་དང་བོད་ནས་གསར་དུ་འབྱོར་བའི་བོད་མི་རྣམས་ལ་ཉིན་གསུམ་གྱི་བཀའ་ཆོས་རེ་ཞིག་ལེགས་གྲུབ་ཀྱིས་མཇུག་སྒྲིལ་མཛད་ཡོད་པ་རེད། དེ་རིང་ཟླ་ ༡༢ ཚེས་ ༢༧ ཉིན་མགོན་པོ་༸གང་ཉིད་མཆོག་གིས་ཨུ་རུ་སུ་དང་སོག་ཡུལ་གྱི་ནང་པའི་ཡུལ་གྲུ་ཁག་ནས་གསོལ་འདེབས་ཞུས་པའི་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཀའ་ཆོས་རེ་ཞིག་ལེགས་གྲུབ་མཛད་ཡོད་པ་རེད། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་ཉིན་མཐའ་མིའི་ཐོག་ལ་དད་ལྡན་ཆོས་ཞུ་བ་ཆིག་སྟོང་སུམ་བརྒྱ་དེ་དག་ལ་སྤྱོད་འཇུག་ཆེན་མོའི་ལེའུ་དགུ་པ་ཤེས་རབ་ཀྱི་ལེའུ་ཆ་ཚང་བསྩལ་གྲུབ་བསྟུན། ཐུགས་བརྩེ་བ་ཆེན་པོས་སངས་རྒྱས་ཆོས་ཚོགས་མའི་ཆོས་འབྲེལ་བཀྲིན་བསྐྱངས་པ་དང་སྦྲགས་ཏེ་མ་ཎི་དང་ཐུབ་པའི་མཚན་སྔགས། དེ་བཞིན་འཇམ་པའི་དབྱངས་དང་སྒྲོལ་མའི་མཚན་སྔགས་སོགས་ཀྱི་བཟླས་ལུང་ཡང་བཀྲིན་སྩལ་ཡོད། དེ་བཞིན་མགོན་པོ་༸གང་ཉིད་མཆོག་གིས་རྒྱལ་ས་ལྡི་ལིར་ཉིན་གསུམ་རིང་གི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཀའ་ཆོས་ཞུ་བར་ཆེད་བཅར་ཞུས་པའི་ཨུ་རུ་སུ་དང་དེའི་ཁྱབ་ཁོངས་ཀྱི་ཁེལ་མིག་དང་། ཐུ་བ། བུར་ཡ་ཏི། ལ་ཊ་ཝི་ཡ། སོག་ཡུལ་བཅས་ཀྱི་དད་ལྡན་རྣམས་ལ་སང་ཕོད་སླར་མཇལ་རྒྱུ་ཡོང་བར་ཐུགས་སྨོན་མཛད་པ་དང་སྦྲགས། རྣམ་ཀུན་ནས་དཔེ་ཆར་དོ་སྣང་གནང་དགོས་པ་དང་དེའི་བརྒྱུད་ནས་བྱམས་སྙིང་རྗེ་དང་སྟོང་པ་ཉིད་ཀྱི་ལྟ་བར་བསམ་བློ་གཏང་ཐུབ་ཚེ་རང་ཉིད་ཀྱི་སེམས་ལ་ཞི་བདེ་ཐོབ་རྒྱུ་དང་འདི་བཞིན་སོ་སོའི་མི་ཚེ་རིང་དུ་འགྲོ་ངེས་ཡིན་པས་ཚེ་སྒྲུབ་དངོས་ནི་འདི་རེད་ཅེས་ལམ་སྟོན་བཀའ་སློབ་བསྩལ་ཡོད་པ་རེད། ཤེས་རྟོགས་བྱུང་བར་གཞིགས་ན། ༸གོང་ས་མཆོག་དེ་རིང་རྒྱལ་ས་ལྡི་ལིར་བཞུགས་ཞག་མཛད་རྒྱུ་དང་སང་ཚེས་ ༢༨ ཉིན་བྷི་ཧར་གྱི་མངའ་སྡེའི་རྒྱལ་ས་པཊ་ནཱར་ཁུལ་དུ་ཆིབས་བསྒྱུར་གྱིས་བྷི་ཧར་མངའ་སྡེ་སྤྱི་ཁྱབ་བློན་ཆེན་ Nitish Kumar མཆོག་དང་མཇའ་འཕྲད་མཛད་རྗེས་གནས་མཆོག་རྡོ་རྗེ་གདན་དུ་༸ཞབས་སོར་བདེ་བར་འཁོད་གནང་མཛད་ཀྱི་འདུག

རྨ་ཆུ་ནང་དུ་བོད་པའི་དགེ་འདུན་པ་ཞིག་འཛིན་བཟུང་བྱས་འདུག

ཉེ་ཆར་ཟླ་བ་འདིའི་ཚེས་ ༡༡ ཉིན་རྒྱ་གཞུང་གི་ཉེན་རྟོག་པས་བོད་མདོ་སྨད་རྨ་ཆུ་ནང་དུ་བོད་པའི་དགེ་འདུན་པ་འཇམ་དབྱངས་ཆོས་འཕེལ་ལགས་འཛིན་བཟུང་གིས་བཀག་ཉར་བྱས་འདུག དེའང་ཁ་སང་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་གཞིགས་ན། གྲྭ་འཇམ་དབྱངས་ཆོས་འཕེལ་ལགས་ཟླ་ ༡༢ ཚེས་ ༡༡ གི་མཚན་དཀྱིལ་ཙམ་དུ་རྒྱ་གཞུང་གི་ཉེན་རྟོག་མི་སྣས་འཛིན་བཟུང་གིས་རྨ་ཆུའི་བཀག་ཉར་ཁང་དུ་བཀག་བསྐྱིལ་བྱས་ཡོད་པ་ཤེས་རྟོགས་བྱུང་སྐོར་བཀོད་འདུག ལྟེ་གནས་ཁང་དེའི་ཉམས་ཞིབ་པ་པདྨ་ཆོས་སྒྲོན་ལགས་ཀྱིས་འགྲེལ་བརྗོད་གནང་དོན། གྲྭ་འཇམ་དབྱངས་ཆོས་འཕེལ་ལགས་ཀྱི་ཕ་ཡུལ་རྨ་ཆུ་རྫོང་གི་ཉེ་ཁྲིས་ཅོ་ནེ་རྫོང་ནང་གི་རྒྱལ་མོ་དགོན་པའི་གྲྭ་པ་ཡིན་པ་དང་། ཕྱི་ཚེས་ ༨ ཉིན་བོད་མི་བཀྲིས་རབ་བརྟན་ལགས་ཀྱིས་རང་ལུས་མེར་བསྲེགགས་གནང་རྗེས་རྒྱ་གཞུང་གིས་ས་ཁུལ་དེར་དམ་དྲགས་ཤུགས་བྱེད་བཞིན་པའི་ཁྲོད་བོད་མི་ཁག་ཅིག་འཛིན་བཟུང་བྱས་པའི་གནས་ཚུལ་ཐོན་ཡོད་སྟབས། ཁོང་གནད་དོན་དེ་དང་འབྲེལ་ནས་འཛིན་བཟུང་བྱས་པར་ཚོད་དཔག་གནང་བཞིན་ཡོད་པ་གསུངས་སོང་། གཞན་ཡང་རང་ལུས་མེར་བསྲེགས་གནང་པའི་སྐབས་དེར་བརྙན་པར་ལེན་པའི་དོགས་གཞི་འོག་བོད་མི་གཞོན་སྐྱེས་གསུམ་དང་བེུད་གཅིག་བཅས་འཛིན་བཟུང་བྱས་ཡོད་ཀྱང་། ད་ལྟའི་ཆར་ཁོང་རྣམས་གློད་གྲོལ་བཏང་ཡོད་མེད་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མེད་པ་རེད། རྩ་བའི་ད་བར་རྨ་ཆུ་ནས་གནས་ཚུལ་འབྱོར་ཟིན་ནང་དུ་ཟླ་ ༡༢ ཚེས་ ༨ ཉིན་བོད་མི་བཀྲིས་རབ་བརྟན་ལགས་ཀྱིས་བོད་དོན་ཆེད་རང་ལུས་མེར་བསྲེགས་གནང་རྗེས་ཉེན་རྟོག་ཁང་དུ་ཁོང་གི་སྐུ་ཕུང་ལེན་རུ་བསྐྱོད་མཁན་ཁོང་གི་ཕ་དང་བུ། དེ་བཞིན་ཁོང་གི་ཨ་ཁུ་བཅས་བོད་མི་ཁག་ཅིག་ལ་རྒྱ་གཞུང་གིས་བཀག་བསྐྱིལ་བྱས་ཡོད་པ་དང་། ཁོང་གི་བཟའ་ཟླ་དང་བུ་མོ་གཉིས་ལ་རྒྱ་གཞུང་གི་ཉེན་རྟོག་མི་སྣས་བཀག་ཉར་འོག་འདྲི་བརྩད་ཀྱང་བྱས་འདུག ནང་མི་ཉེ་འབྲེལ་རྣམས་འཛིན་བཟུང་བྱས་མཐར་ཉིན་གཅིག་གི་རྗེས་སུ་གློད་གྲོལ་བཏང་འདུག་པ་དང་། དེ་རྗེས་ཁོང་རྣམས་ལ་བཀྲིས་རབ་བརྟན་ལགས་ཀྱི་པུར་ཐལ་སྤྲོད་ཡོད་པའི་གནས་ཚུལ་ཐོན་ཡོད་པ་རེད།

ཆབ་སྲིད་བཙོན་ཟུར་གྲྭ་འཇིགས་མེད་མགོ་རིལ་ལགས་གཟུགས་གཞི་གནས་སྟངས་ཞན་པའི་སྨན་ཁང་དུ་བསྐྱལ་བ།

རྒྱ་གཞུང་གི་བཙོན་ཁང་ནས་བཙོན་གྲོལ་བྱུང་མ་ཐག་པའི་ཆབ་སྲིད་བཙོན་ཟུར་གྲྭ་འཇིགས་མེད་མགོ་རིལ་ལགས་ནད་གཞི་ཚབས་ཆེན་འོག་ད་ཆ་བླ་བྲང་བསང་ཆུ་རྫོང་མི་དམངས་སྨན་ཁང་ནང་བསྐྱལ་འདུག དེའང་རྒྱ་གཞུང་གི་བཙོན་ཁང་ནང་ལོ་ ༥ རིང་བཙོན་འཇུག་ཁྲིམས་ཆད་ཕོག་པའི་བོད་མདོ་སྨད་ཀན་ལྷོ་ཁུལ་བླ་བྲང་རྒྱུད་སྟོད་གྲྭ་ཚང་གི་དགེ་འདུན་པ་འཇིགས་མེད་རྒྱ་མཚོའམ་འཇིགས་མེད་མགོ་རིལ་ལགས་འདི་ལོའི་ཟླ་ ༡༠ ཚེས་ ༢༦ ཉིན་བཙོན་གྲོལ་ཐོབ་ནས་ཉི་མ་བཅུ་གྲངས་ཤིག་གི་རྗེས་སུ་གཟུགས་གཞིར་བརྟག་དཔྱད་བྱ་ཕྱིར་ལན་ཀྲུའུ་གྲོང་ཁྱེར་དུ་ཕེབས་ཡོད་པ་རེད། སྐབས་དེར་བརྟག་དཔྱད་ཁང་གིས་ཁོང་ལ་གཅིན་སྙི་དང་སྙིང་ནད། མཆིན་ནད། དེ་བཞིན་ཁྲག་ཤེད་མཐོ་བ་དང་མིག་ནད་བཅས་ཀྱི་ན་ཚ་ཁག་ཅིག་ཡོད་པ་ནད་རྟགས་མངོན་གསལ་བྱས་འདུག ཉེ་དུས་སུ་ཁོང་གི་མིག་ནས་ཁྲག་ལྷུང་ཞིང་མིག་དམར་པོ་གྱུར་བ་དང་། མགོ་བོ་ཀྱང་ན་བ་སོགས་གཟུགས་ཁམས་ཧ་ཅང་མི་བདེ་བ་བྱུང་རྐྱེན་ཁ་སང་ཚེས་ ༢༦ ཉིན་བླ་བྲང་བསང་ཆུ་རྫོང་མི་དམངས་སྨན་ཁང་དུ་སླར་ཡང་བརྟག་དཔྱད་གནང་པར་སྨན་ཁང་གིས་གྲྭ་འཇིགས་མེད་མགོ་རིལ་ལགས་ལ་ནད་གཞི་ཚབས་ཆེན་ཕོག་ཡོད་པས་སྨན་བཅོས་སླད་ངེས་པར་དུ་སྨན་ཁང་ནང་བཞུགས་དགོས་པ་བརྗོད་དོན་ལྟར་སྨན་ཁང་དུ་སྨན་བཅོས་གནང་མུས་ཡིན་འདུག འདི་ག་རླུང་འཕྲིན་ཁང་དུ་རྒྱ་གར་ལྷོ་ཕྱོགས་ནང་བཞུགས་པའི་གྲྭ་འཇིགས་མེད་རྒྱ་མཚོ་ལགས་ཀྱི་དགེ་ཕྲུག་གྲྭ་ཕུན་ཚོགས་ལགས་ཀྱིས་ངོ་སྤྲོད་གནང་དོན། གྲྭ་འཇིགས་མེད་མགོ་རིལ་ལགས་འཛིན་བཟུང་མ་བྱས་སྔོན་ནད་གཞི་ཚབས་ཆེན་སོགས་གང་ཡང་མེད་ཅིང་གཟུགས་གཞི་བདེ་ཐང་ཡིན་པ་དང་།  ཕྱི་ལོ་ ༢༠༡༡ ལོར་འཛིན་བཟུང་བྱས་པ་ནས་བཟུང་གཟུགས་གཞི་བདེ་མིན་གྱི་གནས་སྟངས་འོག་གོང་རིམ་ལ་ཡང་ཡང་སྨན་པ་བསྟེན་ཞུ་རྒྱུའི་འབོད་སྐུལ་ལན་མང་བྱས་ཀྱང་། ཟླ་བ་ ༤ ཙམ་གྱི་རྗེས་ལ་མ་གཏོགས་བརྟག་དཔྱད་གང་ཡང་མ་བྱས་པར་དེ་མུར་བཞག་ཡོད་སྐོར་གསུངས་སོང་། དེ་བཞིན་ཁོང་གིས་གྲྭ་འཛིགས་མེད་རྒྱ་མཚོ་ལགས་རྒྱ་གཞུང་གི་བཙོན་པའི་སྨན་ཁང་ནས་བརྟག་དཔྱད་བྱས་པའི་ནང་རྟགས་སུ་གཅིན་སྙི་ནད་གཞི་ཕོག་ཡོད་པ་ངོས་འཛིན་གྱིས་བཙོན་པའི་སྨན་ཁང་ནང་ཟུར་འཇོག་བྱས་དགོས་བྱུང་འདུག་ཅེས་གསུངས་ཡོད། གྲྭ་འཇིགས་མེད་མགོ་རིལ་ལགས་འདི་ལོ་ཕྱི་ཟླ་ ༡༠ ནང་རྒྱའི་བཙོན་ཁང་ནས་ལོ་ལྔ་རིང་གི་བཙོན་འཇུག་ཁྲིམས་ཆད་དུས་ཡུན་ཚང་རྗེས་བཙོན་གྲོལ་ཐོབ་ཡོད་ཀྱང་། རྒྱ་གཞུང་གིས་སྟངས་འཛིན་འོག་ཁོང་རང་ཉིད་ནས་གཟན་ཤམ་གྱོན་རྒྱུའི་རང་དབང་མེད་པར་རང་གི་དགོན་པར་སྡོད་དགོས་པ་དང་དེ་བཞིན་རྒྱ་གཞུང་གིས་དེ་སྔ་ཁོང་གི་ཐོབ་ཐང་ལག་འཁྱེར་དང་གློག་ཀླད། ཡིག་ཆ་ཁག དངུལ་ཁུག་སོགས་བཙན་འཁྱེར་བྱས་པ་དེ་དག་ཕྱིར་སྤྲོད་བྱས་མེད་སྟབས། ད་སྐབས་ཁོང་ལ་ཐོབ་ཐང་ལག་འཁྱེར་མེད་པའི་ངལ་བ་འཕྲད་བཞིན་ཡོད་པ་དང་ལྷག་དོན་དུ་རྒྱ་གཞུང་གིས་སྟངས་འཛིན་ཤུགས་ཆེ་འོག་ལན་ཀྲུའུ་གྲོང་ཁྱེར་གྱི་སྨན་ཁང་སོགས་སུ་བཙན་སྡོད་ཐོག་བཞུགས་ཐབས་མེད་པའི་གནས་སྟངས་ཆགས་ཡོད་པ་རེད་འདུག གཞི་རྩའི་ གྲྭ་འཇིགས་མེད་རྒྱ་མཚོ་ལགས་ཐོག་མ་ཕྱི་ལོ་ ༢༠༠༦ ལོར་རྒྱ་གར་ལྷོ་ཕྱོགས་ཨམྲ་བཱ་ཏིར་༸གོང་ས་མཆོག་གི་སྩལ་གནང་པའི་དུས་འཁོར་དབང་ཆེན་ཞུས་པའི་ཉེས་མིང་འོག་འཛིན་བཟུང་བྱས་འདུག་པ་དང་། དེ་རྗེས་ཕྱི་ལོ་ ༢༠༠༨ ལོར་དགེ་འདུན་པའི་སྒེར་ལངས་བརྒྱུད་སྐུལ་བྱས་པའི་ཉེས་མིང་འོག་སླར་འཛིན་བཟུང་བྱས་ཡོད་པ་རེད། དེ་བཞིན་ ༢༠༡༠ ལོར་ཁོང་རྒྱ་ནག་གི་བཀག་ཉར་འོག་བཞུགས་ཚེ་མི་སྤྱོད་ལས་འདས་པའི་མནར་གཅོད་ཚད་མེད་ཕོག་པའི་བརྙན་པར་ཞིག་འདོན་སྤེལ་བྱས་པའི་ཉེས་མིང་འོག་འཛིན་བཟུང་གིས་ཟླ་བ་ ༦ ཙམ་བཀག་ཉར་བྱས་མཐར་ཕྱི་ལོ་ ༢༠༡༡ ལོར་ཁོང་བསྐྱར་དུ་འཛིན་བཟུང་གིས་ལོ་གཉིས་ཙམ་བཀག་ཉར་འོག་བཞག་རྗེས། ༢༠༡༤ ལོར་ཁོང་ལ་ཁྲིམས་རྩོད་པའི་ཐོབ་ཐང་གང་ཡང་མེད་པའི་ཐོག་ནས་ཁྲིམས་རྭར་རྒྱལ་ཁབ་ཁ་བྲལ་གྱི་ཉེས་མིང་འོག་ལོ་ ༥ རིང་བཙོན་འཇུག་ཁྲིམས་ཐག་བཅད་དོན་ལྟར་འདི་ལོ་ཕྱི་ཟླ་ ༡༠ ཚེས་ ༢༦ ཉིན་བཙོན་གྲོལ་ཐོབ་པ་ཞིག་ཡིན་པ་རེད།

རེས་གཟའ་ཟླ་བ། ༢༠༡༦།༡༢།༢༦

ཉན་པ།: Listen ཕབ་ལེན། Download ༸གོང་ས་མཆོག་གིས་རུ་སོག་དད་ལྡན་རྣམས་ལ་སྤྱོད་འཇུག་གི་བཀའ་ཆོས་དབུ་འཛུགས་མཛད་པ། ༸གོང་ས་མཆོག་གིས་དུས་དབང་དུ་བཅར་མ་ཐུབ་མཁན་རྣམས་བློ་ཕམ་བྱ་མི་དགོས་པ་བཀའ་བསྩལ་འདུག དུས་དབང་ཚེས་༢ནས་དབུ་འཛུགས་གནང་རྒྱུ་རེད་འདུག སྲིད་སྐྱོང་མཆོག་ནས་འཛིན་རིམ་བཅུ་པའི་སློབ་མ་ཚོར་གསུང་བཤད་གནང་པ། རྒྱུད་སྟོད་མཁན་ཟུར་བློ་བཟང་རྡོ་རྗེ་མཆོག་ཤར་པ་ཆོས་རྗེར་བསྐོ་གཞག་མཛད་པ། Monday 26/12/2016 Dalai Lama begins 3 day teaching to Russian and Mongolian devotees in Delhi Don’t feel sad if you can’t attend the Kalachakra: Dalai Lama to Tibetans from Tibet Kalachakra to begin January 2nd, one extra day added to preliminary teachings Sikyong speaks to students attending leadership workshop in Dharamsala Former Abbot of Gyutoe Tsulkhang Lobsang Dorjee appointed ‘Sharpa Choeje’

དུས་འཁོར་དབང་ཆེན་ཞུ་བར་བཅར་མ་ཐུབ་ཀྱང་བློ་ཕམ་བྱེད་དགོས་ཀྱི་མ་རེད་ཅེས་བཀའ་བསྩལ་བ།

༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལིའི་ལི་ལཱ་གསོལ་མགྲོན་ཁང་དུ་ཨུ་རུ་སུ་དང་སོག་ཡུལ་གྱི་ནང་པ་ཚོར་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཀའ་ཆོས་དབུ་འཛུགས་བཀྲིན་སྐྱོང་བཞིན་པའི་ཁྲོད། དཔལ་དུས་ཀྱི་འཁོར་ལོའི་དབང་ཆེན་ཞུ་བར་བཅར་མི་ཐུབ་མཁན་བོད་ནས་གསར་དུ་འབྱོར་བའི་བོད་མི་སུམ་བརྒྱ་སྐོར་ཞིག་ལ་ཟུར་དུ་མཇལ་ཁ་དང་བཀའ་སློབ་སྩལ་ཡོད་པ་རེད། སྐབས་དེར་༸གང་ཉིད་མཆོག་གིས་བོད་ནས་གསར་དུ་འབྱོར་བ་རྣམས་ལ་ཁྱེད་རང་ཚོ་དུས་འཁོར་དབང་ཆེན་ཞུ་བར་བཅར་མི་ཐུབ་ཀྱང་། སེམས་འཁྲལ་གཏན་ནས་མ་བྱེད། བོད་ཟླ་ ༡༡ ཚེས་ ༡༣ ནས་ ༡༥ བར་དུས་འཁོར་དབང་ཆེན་དངོས་གཞི་འཁེལ་གྱི་ཡོད་སྟབས། ཁྱེད་རང་ཚོས་བོད་ནས་ཚུར་སྨོན་ལམ་ཡག་པོ་བརྒྱབ། ཁྱེད་རང་ཚོ་དད་པ་གཡོ་བ་མེད་པ་ཞིག་ཡོད་པ་རེད། ངོས་ཀྱིས་ཁྱེད་རང་ཚོ་བོད་ནང་ལ་ཡོད་པའི་རྒྱ་ཆེ་མི་མང་གི་དད་པ་དང་དམ་ཚིག་གཡོ་བ་མེད་པ་ཡོད་པ་དེ་དག་དབང་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཅེས་བཀའ་བསྩལ་བ་མ་ཟད། རྒྱ་ནག་ནང་ལ་རྒྱ་རིགས་ནང་པ་ཕོན་ཆེན་པོ་ཞེ་དྲག་ཡོད་པ་རེད། དེ་དག་གི་ནང་ནས་དབང་ཞུ་འདོད་ཡོད་མཁན་ཏན་ཏན་ཡོད་ངེས་རེད་ངོས་ཀྱིས་དེ་མཚུངས་སུ་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཅེས་བཀའ་སློབ་མཛད་འདུག ༸གོང་ས་མཆོག་གིས་སྤྱིར་བླ་མ་ཡི་དམ་གི་བྱིན་རླབས་ཞེས་པ་དེ་ཐག་ཉེ་རྒྱང་གི་ཁྱད་གང་ཡང་ཡོད་མ་རེད། བཅོམ་ལྡན་འདས་ཀྱི་མངོན་ཆོག་ནང་ལ་འཕྲིན་གྱི་སྒོ་ནས་བསྙེན་པ་རྫོགས་པ་ཞེས་བསྙེན་པ་རྫོགས་མཁན་གྱི་དགེ་འདུན་པ་རྣམས་དེར་བཞུགས་བསྒྲུབ་བྱ་དེ་དགག་བྱ་བྱས་ནས་ཕན་ཚུན་དབར་འཕྲིན་བསྐུར་བ་བྱུང་ཡོད་པ་རེད། དེས་ནས་ཁྱེད་རང་ཚོ་ལ་དབང་ཐོབ་ཀྱི་རེད། བློ་ཕམ་ཞེ་དྲག་བྱེད་ནས་སེམས་མ་སྐྱིད་པ་བྱེད་དགོས་ཀྱི་མ་རེད་ཅེས་བཀའ་བསྩལ་འདུག དེ་བཞིན་༸གོང་ས་མཆོག་གིས་ང་ཚོ་དང་བོད་རྒྱ་ཆེ་མི་མང་དབར་ཁ་བྲེལ་ནས་ལོ་ངོ་ ༦༧ ཙམ་ཕྱིན་པའི་ནང་བོད་རྒྱ་ཆེ་མི་མང་གི་སེམས་ཤུགས་འགྱུར་བ་མེད་པའི་ངང་བསྡད་ཡོད་པ་དང་། མི་རབས་བརྗེས་ཀྱི་ཡོད་ནའང་རང་མི་རིགས་ཀྱི་ལ་གཞེན་ཤུགས་ཆེ་ཡོད་པར་བརྟེན་འཛམ་བུ་གླིང་འདིའི་ཐོག་བོད་ཀྱི་བདེན་དོན་དེ་ལོ་རེ་ནས་ལོ་རེ་བཞིན་ཇི་གསལ་དུ་འགྲོ་བཞིན་ཡོད་པ་རེད། བོད་གཞིས་ལུས་རྒྱ་མི་མང་ཚོགས་རྣམས་ཀྱི་སེམས་ཤུགས་འགྱུར་བ་མེད་པར་གནས་པར་ཐུགས་རྗེ་ཆེ་ཞེས་དང་མུ་མཐུད་ཧུར་ཐག་གནང་དགོས་གལ་ཡིན་པའི་ལམ་སྟོན་བཀའ་སློབ་བསྩལ་འདུག མགོན་པོ་༸གང་ཉིད་མཆོག་གིས་བོད་ནང་ཡོད་པའི་བོད་རིགས་ན་གཞོན་རྣམས་ལ་བོད་རང་གི་རིག་གནས་བཅུ་པོ་དེ་དག་གཙོས་པའི་རྒྱ་ཡིག་དང་འདི་བཞིན་དེང་དུས་ཀྱི་ཤེས་ཡོན་སོགས་སྤྲོད་དགོས་གལ་ཡིན་པར་བཀའ་ནན་ལམ་སྟོན་མཛད་ཡོད་པ་མ་ཟད། ཁྱད་པར་དུ་བོད་ནང་གི་བོད་མི་ཚོས་ད་ལྟའི་རྒྱ་ནག་གི་དཔལ་འབྱོར་ལྷུག་པོའི་སྲིད་བྱུས་ཀྱི་གོ་སྐབས་བཟུང་ནས་དཔལ་འབྱོར་འདུ་འགོད་བྱེད་དགོས་པ་དང་། དཔལ་འབྱོར་འདུ་འགོད་བྱས་པ་དེ་ཚོ་རང་ཉིད་སྒེར་གྱི་མོ་ཊ་ཆེན་པོ་དང་ཆང་རག ཐ་མག རྒྱན་ཆ་དགོས་མེད་ཉོ་རྒྱུ་གཙོས་སྤགས་རིགས་གྱོན་པ་སོགས་མིན་པར། དངུལ་བྱུང་བ་རྣམས་ས་གནས་མང་ཚོགས་སྤྱིའི་དཔལ་འབྱོར་ཡར་རྒྱས་གཏོང་ཐབས་དང་། ཤེས་ཡོན་རང་གི་ཐོག་ལ་དམིགས་ཏེ་བསྡུ་འགོད་གནང་དགོས་གལ་ཡིན་པ་བཀའ་སྩལ་འདུག རྩ་བའི་རྒྱ་ནག་གཞུང་གིས་འདི་ལོ་ནང་བོད་ནས་རྒྱ་གར་དུ་༸གོང་ས་མཆོག་གི་དྲུང་ནས་དུས་འཁོར་དབང་ཆེན་ཞུ་བར་བཅར་མཁན་བོད་མི་རྣམས་ལ་དམ་དྲག་ཆེད་ཕྱིར་བསྐྱོད་ལག་འཁྱེར་ཕྱིར་བསྡུ་དང་། དེ་བཞིན་རྒྱ་གར་དུ་བསླེབས་ཟིན་པ་མང་པོ་ཞིག་ལ་མཐོང་མཆན་དུས་བཀག་བཟོས་པ་མ་ཟད། བོད་དུ་ཕྱིར་ལོག་བྱེད་དགོས་པའི་ཉན་བརྡ་ཡང་བཏང་བ་བཅས་ལ་བརྟེན་ནས་བོད་མི་མང་པོ་ཞིག་དུས་དབང་ཞུ་བར་བཅར་མ་ཐུབ་ནས་ཕྱིར་ལོག་དགོས་བྱུང་ཡོད་སྟབས། ༸གོང་ས་མཆོག་གིས་ཟླ་བ་སྔོན་མའི་ཟླ་མཇུག་དང་ཟླ་བ་འདིའི་ཚེས་ཤར་ལ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དམིགས་བསལ་ཟུར་མཇལ་གནང་པ་དང་སེམས་བསྐྱེད་ཀྱི་ཆོས་འབྲེལ། དུས་དབང་སྐབས་བཀའ་ཆོས་བསྩལ་གཏན་འཁེལ་བའི་ཕྱག་དཔེ་སྤྱོད་འཇུག་ཆེན་མོ་དང་སྒོམ་རིམ་བར་པའི་གཞུང་གཉིས་པོ་ངོ་སྤྲོད་སྤྱི་བཤད་ཀྱི་བཀའ་ཆོས་བཀྲིན་ཆེ་བ་བསྩལ་ཡོད་པ་མ་ཟད། ཚེས་ ༢༥ ཉིན་རྒྱལ་ས་ལྡི་ལིར་བོད་ནས་གསར་དུ་འབྱོར་ལ་རྣམས་ལ་དུས་དབང་ཞུ་བར་བཅར་མི་ཐུབ་ཀྱང་། བླཔ་ཕམ་གཏན་ནས་གནང་མི་དགོས་པར། བོད་ཟླ་ ༡༡ ཚེས་ ༡༣ ནས་ ༡༥ བར་དུས་འཁོར་དབང་ཆེན་དངོས་གཞི་སྐབས་ཁོང་རྣམས་ནས་སྨོན་ལམ་བསྐྱོན་དགོས་པ་དང་། མགོན་པོ་༸གང་ཉིད་མཆོག་གིས་རྡོ་རྗེ་གདན་ནས་བོད་ནང་བཞུགས་པའི་གཞིས་ལུས་རྒྱ་ཆེ་མང་ཚོགས་རྣམས་ལ་དབང་འོག་ཏུ་བཅུག་ནས་སྨོན་ལམ་གནང་རྒྱུ་ཡིན་པའི་བཀའ་བསྩལ་ཡོད་པ་རེད།

རྒྱུད་སྟོད་མཁན་ཟུར་ཚུལ་ཁང་བློ་བཟང་རྡོ་རྗེ་མཆོག་ཤར་པ་ཆོས་རྗེར་བསྐོ་གཞག་མཛད་པ།

༸གོང་ས་༸སྐྱབས་མགོན་ཆེན་པོ་མཆོག་གིས་ཤར་པ་ཆོས་རྗེ་རྗེ་བཙུན་བློ་བཟང་བསྟན་འཛིན་མཆོག་དགའ་ལྡན་ཁྲི་ཐོག་ ༡༠༣ པར་བསྐོ་གཞག་མཛད་པའི་ཚབ་ཏུ་བྱེས་ཀྱི་གདན་ས་དཔལ་འབྲས་སྤུངས་བློ་གསལ་གླིང་ཚུལ་ཁང་ཁང་ཚན་གྱི་རྒྱུད་སྟོད་མཁན་ཟུར་བློ་བཟང་རྡོ་རྗེ་མཆོག་ཟླ་བ་འདིའི་ཚེས་ ༡༧ ཉིན་ཤར་པ་ཆོས་རྗེར་བསྐོ་གཞག་མཛད་པའི་བཀའ་ཡིག་བསྩལ་འདུག དེའང་ཟླ་ ༡༢ ཚེས་ ༢༣ སྟེ་དགའ་ལྡན་ལྔ་མཆོད་ཀྱི་དུས་ཁྱད་ཉིན་མོར་ཤར་པ་ཆོས་རྗེ་མཆོག་གདན་ས་དགའ་ལྡན་དུ་༸གོང་ས་༸སྐྱབས་མགོན་ཆེན་པོ་མཆོག་ལ་ཤར་པ་ཆོས་རྗེའི་མཛད་འགན་བཞེས་པའི་གསར་མཇལ་ཞུས་གནང་ཡོད་པ་དང་། ༸གོང་ས་མཆོག་གིས་སྐབས་དེར་སྟོན་པ་ཐུབ་པའི་དབང་པོའི་སྐུ་བརྙན་ཞིག་ཕྱག་རྟགས་གནང་པ་དང་ཆབས་ཅིག དགའ་ལྡན་ལྔ་མཆོད་ཉིན་ཤར་པ་ཆོས་རྗེའི་གསར་མཇལ་ཞུས་པ་དེ་ཧ་ཅང་སྐལ་བ་བཟང་པོ་ཞིག་བྱུང་སོང་ཞེས་བཀའ་བསྩལ་བ་མ་ཟད། ཆོས་ཕྱོགས་ཀྱི་ལས་དོན་ཁག་ཡར་རྒྱས་གཏོང་དགོས་སྐོར་ལམ་སྟོན་བཀའ་སློབ་ཡང་བསྩལ་ཡོད་པ་རེད་འདུག འདི་ག་རླུང་འཕྲིན་ཁང་གི་གསར་འགོད་པར་ཤར་པ་ཆོས་རྗེ་མཆོག་གིས་ཁོང་རང་ཉིད་༸གོང་ས་མཆོག་གིས་ཤར་པ་ཆོས་རྗེར་བསྐོ་གཞག་མཛད་པ་དེས་ཐུགས་དགྱེས་ཚོར་ཆེན་པོ་བྱུང་སྐོར་བཀའ་ལན་བསྩལ་སོང་བ་དང་། དེ་བཞིན་ཤར་པ་ཆོས་རྗེའི་འཛད་འགན་གཙོ་བོ་ནི་རི་བོ་དགེ་ལུགས་པའི་བསྟན་པ་སྤྱི་དང་དེར་བསླབ་པ་སློབ་གཉེར་ཡར་རྒྱས་ཡོང་ཐབས་སུ་དགའ་ལྡན་ཁྲི་པ་མཆོག་དང་བྱང་རྩེ་ཆོས་རྗེ་མཆོག དེ་བཞིན་གདན་ས་ཁག་གི་མཁན་པོ་རྣམ་པར་ཕྱག་རོགས་ཞུ་རྒྱུ་སོགས་ཐུགས་འགན་གཙོ་བཞེས་གནང་དགོས་སྐོར་བཀའ་ལན་བསྩལ་ཡོད། གཞི་རྩའི་འབྲས་སྤུངས་བློ་གསལ་གླིང་ཚུལ་ཁང་རྒྱུད་སྟོད་མཁན་ཟུར་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་ནི་ད་ལྟ་དགུང་གྲངས་ ༨༠ ལ་ཕེབས་ཡོད་པ་དང་། མདོ་སྨད་ཁམས་ཚ་ལྷོ་རྫོང་དུ་ཡབ་ཚེ་འཕེལ་དང་ཡུམ་ཚེ་ལྷ་གཉིས་ཀྱི་སྲས་སུ་སྐུ་འཁྲུངས་ཡོད་པ་རེད། དགུང་ལོ་ལྔ་དྲུག་ཙམ་བར་སྐྱེས་མས་གཅེས་སྐྱོང་གནང་པ་དང་ཆུང་དུས་ཁྱིམ་ཚང་གིི་ཕྲུ་གུའི་ནང་ནས་ཡི་གེ་སྦྱོར་ཀློག་ཐོག་བཟང་ཤོས་དེ་ཡིན་པ་རེད་འདུག ཡབ་ཡུམ་གཉིས་ཀྱིས་ཐོག་མར་ཁྱིམ་ཐབས་སུ་སྦྱར་འདོད་གནང་ཡང་ཤར་པ་ཆོས་རྗེ་མཆོག་ནས་རབ་ཏུ་བྱུང་འདོད་ཁོ་ན་གནང་པར་བརྟེན་དགུང་ལོ་  ༡༦ ཐོག་ཁྱིམ་ནས་བྲོས་ཏེ་ཟླ་བ་གཉིས་ཙམ་རིང་བོད་ཀྱི་རྒྱལ་ས་ལྷ་ས་བར་སློང་མོ་རྒྱག་བཞིན་དུ་ཞབས་ཐང་ལ་ཕེབས་པ་དང་། དེ་རྗེས་གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་དུ་སྒྲིག་ཞུགས་གནང་ནས་དགེ་བའི་བཤེས་གཉེན་དུ་མའི་དྲུང་ནས་གཞུང་ཆེན་བཀའ་པོད་ལྔའི་ཐོག་བསླབ་པ་སློབ་གཉེར་མཐིལ་ཕྱིན་མཛད་འདུག སྤྱི་ལོ་ ༡༩༨༥ ལོར་དགེ་བཤེས་ལྷ་རམས་པ་ཨང་དང་པོའི་མཚན་རྟགས་བཞེས་གནང་འདུག དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དགོངས་ལྟར་དཔལ་ལྡན་རྒྱུད་སྟོད་གྲྭ་ཚང་དུ་སྒྲིག་ཞུགས་དང་འབྲེལ་སྔགས་ཀྱི་དམ་བཅའ་འཇོག་གནང་པ་མ་ཟད། སྔ་རྗེས་རྒྱུད་སྟོད་གྲྭ་ཚང་གི་དགེ་བསྐོས་དང་བླ་མ་དབུ་མཛད།  མཁན་པོ་བཅས་གནང་ཡོད་པ་རེད། ༸གོང་ས་མཆོག་གི་བཀའ་དགོངས་བཞིན་འཇིགས་བྱེད་ཀྱི་བསྙེན་ཆེན་དང་ཡི་དམ་མང་པོའི་བསྙེན་པ་བཏང་གནང་པ་དང་། གདན་སའི་དགེ་བཤེས་རྣམས་ལ་སྔགསགཞུང་གི་བཤད་ཁྲིད་གནང་མྱོང་འདུག འབྲས་སྤུངས་ལ་ཕེབས་ནས་སློབ་མ་བརྒྱ་ཕྲག་མང་པོར་གཞུང་ཆེན་བཀའ་པོད་ལྔའི་རྩ་བ་ཁག་གི་བཤད་ལུང་དང་། བཤད་ཁྲིད།  དེ་བཞིན་གསང་སྔགས་གཞུང་གི་ཟབ་ཁྲིད་སོགས་གནང་ནས་སྐུ་ཚེ་གང་པོར་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་ཐད་ཞབས་འདེགས་ཞུས་དང་ཞུ་མུས་ཡིན་པ་རེད། ཟླ་བ་འདིའི་ཚེས་ ༡༧ ༸གོང་ས་༸སྐྱབས་མགོན་ཆེན་པོ་མཆོག་གིས་ཤར་པ་ཆོས་རྗེར་བསྐོ་གཞག་མཛད་པའི་བཀའ་ཡིག་བསྩལ་དོན་ལྟར། ཤར་པ་ཆོས་རྗེའི་མཛད་འགན་བཞེས་གནང་བཞིན་ཡོད་པ་དང་། དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་གནང་གྲུབ་རྗེས་དངོས་སུ་ཤར་པ་ཆོས་རྗེའི་ཁྲི་སྟོན་མངའ་གསོལ་གྱི་མཛད་སྒོ་ཚོགས་རྒྱུ་རེད་འདུག

ཨུ་རུ་སུ་དང་སོག་པོའི་དད་ལྡན་ཆོས་ཞུ་བ་རྣམས་ལ་བཀའ་ཆོས་དབུ་འཛུགས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་གར་ལྷོ་ཕྱོགས་མོན་གྷོ་བོད་མིའི་གཞིས་ཆགས་ཁུལ་གྱི་མཛད་འཆར་ཁག་ལེགས་པར་གྲུབ་ཏེ་ཁ་སང་ཕྱི་དྲོ་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་བདེ་བར་འཁོད་ཡོད་པ་རེད། དེ་རིང་ཟླ་ ༡༢ ཚེས་ ༢༥ ཉིན་སྔ་དྲོ་མགོན་པོ་༸གང་ཉིད་མཆོག་གིས་ཨུ་རུ་སུ་དང་སོག་ཡུལ་གྱི་ནང་པ་ཡུལ་གྲུ་ཁག་ནས་ཚོས་ཇི་ལྟར་གསོལ་འདེབས་ཞུས་དོན་ལྟར། རྒྱལ་ས་ལྡི་ལིའི་ལི་ལཱ་གསོལ་མགྲོན་ཁང་དུ་ རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཀའ་ཆོས་དབུ་འཛུགས་བཀྲིན་བསྐྱངས་གནང་ཡོད་པ་རེད། ༸གང་ཉིད་མཆོག་གིས་ཆེས་ཐོག་མར་ཆོས་ཞུ་བ་ཚོར་སྔོན་འགྲོའི་ཆོས་བཤད་བསྩལ་སྐབས་ཨུ་རུ་སུའི་ཁྱབ་ཁོངས་སུ་ཡོད་པའི་ཡུལ་གྲུ་ཁག་དང་བོད་མིའི་དབར་ལོ་རྒྱུས་ཐོག་འབྲེལ་བ་ཇི་ཡོད་དང་། བོད་དུ་དུས་ལོག་བྱུང་རྗེས་འབྲེལ་ལམ་དེ་རེ་ཞིག་ཆད་ཡོད་ཀྱང་། བཙན་བྱོལ་ནང་གི་དགོན་སྡེ་ཁག་ཏུ་གྲྭ་ ༥༠༠ ལྷག་ནས་ཆོས་ཞུགས་གནང་མུས་ཡིན་པ་མ་ཟད། ནུབ་ཕྱོགས་ཀྱི་ཡུལ་གྲུ་ཁག་ཏུ་བཅའ་བཞུགས་ཨུ་རུ་སུའི་མང་ཚོགས་རྣམས་ཀྱིས་ནང་པ་སངས་རྒྱས་པའི་ཆོས་དང་ལྟ་གྲུབ་དང་ཚན་རིག་བཅས་ཀྱི་ཐོག་ལ་དོ་སྣང་གནང་གི་ཡོད་སྐོར་ངོ་སྤྲོད་གནང་པ་དང་སྦྲགས་ཏེ་དད་ལྡན་ཆོས་ཞུ་རྣམས་ལ་འཚམས་འདྲི་བསྩལ་ཡོད་པ་རེད། ༸གོང་ས་མཆོག་གིས་༸གང་ཉིད་མཆོག་གི་༸སྐུ་ཚེའི་དགོངས་གཞི་གཙོ་བོ་གསུམ་པོ་ངོ་སྤྲོད་མཛད་ཡོད་པ་དང་། འགྲོ་བ་མི་གཅིག་མཚུངས་ཡིན་པའི་ཆ་ནས་མིའི་ལྷན་སྐྱེས་སུ་ཡོད་པའི་བྱམས་བརྩེའི་ནུས་པ་དེའི་ཐོག་ནས་དོན་དངོས་དང་འཚམ་པའི་སྤྱི་ཚོགས་ནང་བྱམས་བརྩེ་གོང་འཕེལ་གནང་བཞིན་ཡོད་སྐོར་བཀའ་བསྩལ་བ་དང་ཆབས་ཅིག ལྷག་དོན་ང་ཚོ་སངས་རྒྱས་པའི་ཆོས་ཉམས་སུ་བླངས་མཁན་ཞིག་གི་ངོས་ནས་རྣམ་ཀུན་ང་ཚོས་ནམ་མཁའི་མཐའ་དང་མཉམ་པའི་སེམས་ཅན་མཐའ་ཡས་པ་དེ་དག་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག ། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག ། ཅེས་སྨོན་ལམ་འདེབས་བཞིན་ཡོད་པ་དེ་དངོས་འབྲེལ་ཡིན་ཚེ་ཁ་ཡོད་ལག་ཡོད་ཀྱི་ཕན་ཐོགས་བསྒྲུབ་དགོས་གལ་ཡིན་པའི་ལམ་སྟོན་བཀའ་སྩལ་འདུག འཛམ་གླིང་དེའི་སྟེང་ཡོད་པའི་འགྲོ་བ་མི་ཐེར་འབུམ་ ༧ ཡོད་པ་དེ་དག་ཞི་བདེ་བག་ཕེབས་ཡོང་ཐབས་ལ་འབད་པ་གནང་ཚེ་ཏན་ཏན་འཛམ་བུ་གླིང་འདི་ཞི་བདེ་ལྡན་པ་ཞིག་ཆགས་ཐུབ་ངེས་ཡིན་པ་བཀའ་སྩལ་མཛད་འདུག ད་དུང་མགོན་པོ་མཆོག་གིས་བྱམས་བརྩེ་ལྡན་པའི་འཛམ་གླིང་ཞིག་ཡོང་བར་འགྲོ་བ་མིའི་རྒྱུད་ཀྱི་ལྷན་སྐྱེས་སུ་ཡོད་པའི་བྱམས་བརྩེ་དེའི་རང་བཞིན་གོང་འཕེལ་གཏོང་དགོས་གལ་ཡིན་པ་དང་། དེ་ཡང་གཙོ་བོ་ཤེས་ཡོན་རང་གི་ཐོག་ནས་ཆོས་དང་མ་འབྲེལ་བའི་ཡ་རབས་བཟང་སྤྱོད་ཀྱི་དགེ་མཚན་ཇི་ཡོད་སྐོར་ལམ་སྟོན་གནང་མུས་ཡིན་པ་བཀའ་སྩལ་འདུག དེ་བཞིན་༸གོང་ས་མཆོག་གིས་འཛམ་གླིང་འདིའི་སྟེང་ཆོས་ལུགས་ཕན་ཚུན་དབར་གུས་ཞབས་དང་མཐུན་སྒྲིལ་གནང་དགོས་པ་དང་། དེ་ལྟར་གནང་ཐུབ་ངེས་ཡིན་ཏེ་མིའི་ཁམས་དང་མོས་པ་བག་ཉལ་མི་འདྲ་བ་ཡོད་སྐོར་བཀའ་ནན་བསྩལ་ཡོད་པ་རེད། གཞན་ཡང་༸གང་ས་མཆོག་གིས་དགོངས་བཞེས་གསུམ་པ་བོད་ཀྱི་ཆོས་རིག་འཛིན་སྐྱོང་སྤེལ་གསུམ་གནང་ཕྱོགས་དང་འབྲེལ་བའི་ངོ་སྤྲོད་ཀྱང་མཛད་འདུག གཞི་རྩའི་བཀའ་ཆོས་དེ་ཟླ་ ༡༢ ཚེས་ ༢༥ ནས་དབུ་འཛུགས་ཀྱིས་ཚེས་ ༢༧ བར་བཅས་ཉིན་གྲངས་གསུམ་རིང་བཀའ་ཆོས་བསྩལ་རྒྱུ་ཐུགས་གཏན་འཁེལ་ཡོད་པ་དང་། ཨུ་རུ་སུ་དང་དེའི་ཁྱབ་ཁོངས་ཀྱི་ཁེལ་མིག་དང་། ཐུ་བ། བུར་ཡ་ཏི། ལ་ཊ་ཝི་ཡ། སོག་ཡུལ་བཅས་ནས་ཆོས་ཞུ་བ་ཆིག་སྟོང་ཙམ་ཆེད་བཅར་ཞུས་ཡོད་པ་དང་འདི་བཞིན་བོད་ནས་གསར་དུ་འབྱོར་བའི་བོད་མི་སུམ་བརྒྱ་སྐོར་ཞིག་ཀྱང་ཆེད་བཅར་ཞུས་འདུག ཤེས་རྟོགས་བྱུང་བར་གཞིགས་ན། ཉིན་གྲངས་གསུམ་རིང་གི་བཀའ་ཆོས་དེའི་ཐོག་ལ་ཐུ་བ་དང་ཁེལ་མིག་གཉིས་ཀྱི་སྲིད་འཛིན་ཟུར་པ་མཆོག་གིས་གཙོས་པའི་ས་གནས་ཀྱི་གྲོས་ཚོགས་འཐུས་མི་ཟུར་པ་དང་གཞུང་ཞབས་གནད་ཡོད་མི་སྣ་ཁག་ཅིག་ཀྱང་ཕེབས་གནང་གི་ཡོད་པ་རེད་འདུག

Latest news