Monthly Archives: September, 2016

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་མ་ལག་དང་བཅས་པའི་ལས་བསྡོམས་ཐོག་བགྲོ་གླེང་གནང་སྐབས་འཕྲོད་བསྟེན་བཀའ་བློན་མཆོག་གིས་བོད་མིའི་ཁྲོད་ནས་ཕྱི་ལུགས་སྨན་གྱི་བླ་སྨན་པའི་དམིགས་ཚད་གཟུང་པར་སྨན་ཁང་ཁག་ཏུ་སྨན་པ་བཞུགས་རོགས་བྱེད་ཀྱི་མེད་སྟབས་དེར་དམིགས་ཚད་ཟིན་ས་མི་འདུག་ཅེས་གསུངས་སོང་། དེའང་ཁ་སང་བོད་མི་མང་སྤྱི་འཐུས་ལྷན་ཚོགས་ཀྱིས་གྲོས་ཚོགས་ཚོགས་དུས་གཉིས་པའི་ལས་ཉིན་བརྒྱད་པའི་ཕྱི་དྲོ་ཚོགས་ཐེངས་ཐོག་གྲོས་ཚོགས་སུ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་འཕྲོད་བསྟེན་ལས་ཁུངས་ཀྱི་ལོ་འཁོར་ལས་བསྡོམས་གྲོས་ཚོགས་སུ་སྙན་སྒྲོན་ཞུས་ཡོད་པ་མ་ཟད། སྤྱི་འཐུས་རྒྱུན་ལས་ཀྱི་ལས་བསྡོམས་རྒྱས་པར་ཞིབ་འཇུག་གིས་སྨན་བཅོས་ལྟ་སྐྱོང་ལས་གཞི་དང། སྨྱོ་རྫས་ངན་གོམས་སྔོན་འགོག་ལས་འཆར། མཆིན་པའི་གཉན་ཚད་ཀྱི་བརྟག་དཔྱད་ལས་འཆར། འཕྲོད་བསྟེན་སྔོན་འགོག་སོགས་ཀྱི་ལས་འཆར་འདྲ་མིན་ཐོག་ལ་དོགས་འདྲི་ ༡༣ ཕེབས་ཡོད་པ་རེད། སྐབས་དེར་སྤྱི་འཐུས་རྒྱུན་ལས་ཀྱི་ལས་བསྡོམས་སྙན་ཐོར་ཞིབ་འཇུག་གིས་དགོས་འབུལ་དོགས་དྲིས་ཁག་ ༡༣ དང་འབྲེལ་ཏེ་སྤྱི་འཐུས་འཐུས་ ༡༢ ནས་བགྲོ་གླེང་གི་ཆ་ཤས་བླངས་སོང་བ་དང།  གྲོས་ཚོགས་འཐུས་མི་ཁག་ཅིག་གིས་དེང་སྐབས་བཙན་བྱོལ་བོད་མིའི་སྤྱི་ཚོགས་ཁྲོད་སྨན་པ་ཉུང་དྲག་པའི་དཀའ་ངལ་འཕྲད་བཞིན་པའི་དུས་སྐབས་འདིར་སྐུའི་ཕྱི་ལུགས་བླ་སྨན་པ་ཚེ་བརྟན་རྡོ་རྗེ་ལགས་དང། དེ་བཞིན་སྨན་རྩིས་ཁང་གི་སྐུའི་བོད་ལུགས་བླ་སྨན་པ་ཚེ་དབང་རྟ་མགྲིན་ལགས་རྣམ་གཉིས་ལོ་མང་རིང་རང་རེའི་སྤྱི་ཚོགས་ནང་བླ་སྨན་པའི་ཞབས་ཞུའི་མཛད་རྗེས་རླབས་པོ་ཆེ་བསྐྱངས་དང་སྐྱོང་བཞིན་ཡོད་པར་བསྔགས་བརྗོད་དང། བོད་པའི་སྨན་པ་གཞན་ཚོའི་དམིགས་དཔེ་ལྟ་ཡུལ་ཞིག་ཡིན་པ་སོགས་གསུངས་ཏེ་འཕྲོད་བསྟེན་ལས་ཁུངས་ཀྱི་ངོས་ནས་ཆེ་བསྟོད་ཀྱི་གཟེངས་རྟགས་ཕུལ་དགོས་པའི་དགོངས་ཚུལ་གནང་སོང་། སྤྱི་འཐུས་ལ་ལས་བོད་མིའི་སྤྱི་ཚོགས་ཁྲོད་ནས་ཕྱི་ལུགས་སྨན་གྱི་བླ་སྨན་པ་ཐོན་པར་དམིགས་ཚད་ཡོད་མེད་ཐད་བཀའ་འདྲི་ཞུས་པར་འཕྲོད་བསྟེན་བཀའ་བློན་མཆོག་གིས་བོད་མིའི་ཁྲོད་ནས་ཕྱི་ལུགས་སྨན་གྱི་བླ་སྨན་པའི་དམིགས་ཚད་གཟུང་པར་སྨན་ཁང་ཁག་ཏུ་སྨན་པ་བཞུགས་རོགས་བྱེད་ཀྱི་མེད་སྟབས་དེར་དམིགས་ཚད་གཟུང་ས་མི་འདུག་ཅེས་གསུངས་སོང་། གཞན་ཡང་སྤྱི་འཐུས་ཁག་ཅིག་གིས་ཉེ་སྔོན་རྒྱ་གར་གྱི་རྒྱལ་ས་ལྡི་ལིར་དབུས་སྨན་རྩིས་ཁང་གི་རིན་ཆེན་རིལ་བུ་མོ་ཊ་དང་བཅས་པ་འབོར་བརླག་ཤོར་བའི་གནད་དོན་དེ་དངོས་ཡིན་དང་ད་ལྟའི་ཆར་གནས་སྟངས་ཇི་ཆགས་ཀྱི་དོགས་འདྲི་གནང་མཁན་བྱུང་པ་རེད། ཁ་སང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལོ་འཁོར་ལས་བསྡོམས་ཐོག་སྤྱི་འཐུས་རྣམ་པས་ས་གནས་ཁག་གི་འཕྲོད་བསྟེན་སྨན་ཁང་ཚད་ལྡན་ཡོང་སླད་དང། མཆིན་པའི་གཉེན་ཚད་དང། གཉེན་ནད་རེག་དུག་གི་ནད་པར་སྨན་བཅོས་ཀྱི་མཐུན་རྐྱེན་སྦྱོར་ཕྱོགས་དང། དེ་བཞིན་བོད་མིའི་སྤྱི་ཚོགས་དེ་ NO Tobacco འམ་དུག་ཐག་མེད་པའི་ཁོར་ཡུག་བསྐྲུན་རྒྱུ་སོགས་ཀྱི་ཐད་ལའང་གཞེན་སྐུལ་ཡང་གནང་ཡོད་པ་རེད། རྩ་བའི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལས་བསྡོམས་ལ་གཞིགས་ཡིན་ན། ༢༠༡༥ ཟླ་ ༤ ནས་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་ཐོག་སྨན་བཅོས་རོགས་རམ་བརྒྱ་ཆ་ ༧༠ སྤྲོད་རྒྱུ་བྱས་རྗེས་འདས་ལོར་སྨན་བཅོས་ལྟ་སྐྱོང་ལས་གཞིའི་ནང་ཞུགས་མཁན་ ༡༩༦༤༥ བྱུང་འདུག་པ་དང་།  དེ་བཞིན་ ༢༠༡༥ ༌༌ ༡༦ བར་གཉེན་ནད་རེག་དུག་ནད་པ་གྲངས་ ༣༨ ལ་མཐུན་འགྱུར་སྦྱོར་ཐུབ་པ་བྱུང་ཡོད་པ་མ་ཟད། ནད་གཞི་དེ་སྔོན་འགོག་དང་སྨན་བཅོས་ཆེད་ཧིན་སྒོར་ ༡༤༤༦༠༥༧ འགྲོ་སོང་བཏང་འདུག གཞན་ཡང་ད་ལྟའི་ཆར་ད་བར་འཕྲོད་བསྟེན་ལས་ཁུངས་ནས་ཤེས་རྟོགས་བྱུང་བར་བོད་མིའི་སྤྱི་ཚོགས་ཁྲོད་སྨྱོས་རྫས་ངན་གོམས་ཡོད་པའི་གྲངས་ཚད་དེ་  ༢༤ ཆགས་ཀྱི་འདུག

ཁ་སང་ཟླ་ ༩ ཚེས་ ༢༨ ཉིན་ནོ་བེལ་ཞི་བདེ་གཟེགས་རྟགས་བཞེས་མྱོང་མཁན་དང་ཨི་སེ་རལ་གྱི་སྲིད་འཛིན་ཟུར་པ་སྐུ་ཞབས་ Shimon Peres མཆོག་ཀླད་རྩའི་གྲིབ་སྐྱོན་ཕོག་རྐྱེན་འདས་གྲོངས་སུ་གྱུར་ཡོད་པའི་གནས་ཚུལ་ཐོན་པར་དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ Peres ཞི་བདེའི་ཐེབས་རྩ་ཁང་གི་འགན་འཛིན་མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་འདུག མགོན་པོ་༸གང་ཉིད་མཆོག་གི་ཐུགས་གསོའི་གསུང་འཕྲིན་དེའི་ནང་ངོས་རང་སྐུ་ཞབས་པེ་རེས་དམ་པ་དེ་ཉིད་སྐུ་ཚེ་མ་ཟིན་པའི་གནས་ཚུལ་ཐོས་སྐབས་ཧ་ཅང་བློ་ཕམ་བྱུང་། ངོས་ཀྱིས་ཆེས་དཀའ་བའི་དུས་སྐབས་འདིར་དམ་པ་ཁོང་ལ་བསྔོ་སྨོན་ཞུ་རྒྱུ་དང་། དེ་བཞིན་ཤུལ་ལུས་ནང་མི་སྤུན་མཆེད་རྣམས་ལ་གདུང་སེམས་མཉམ་བསྐྱེད་དང་ཐུགས་གསོ་ཡོད་ཅེས་བཀའ་བསྩལ་འདུག ༸གོང་ས་མཆོག་གིས་ད་དུང་དེ་ཉིད་ཀྱིས་དེ་སྔ་ Israel དང་ Palestine གཉིས་དབར་ཞི་འཇམ་ཡོང་ཐབས་སུ་ཞི་བདེ་བསྐྲུན་ཐབས་ཆེད་འབད་བརྩོན་གནང་པ་དེར་ངོས་ཀྱིས་ཡི་རང་བསྔགས་བརྗོད་ཞུས་ཡོད་ལ། དམ་པ་ཁོང་གིས་འབད་པ་ཆེན་པོས་ཞི་བདེ་སྐྲུན་འབྲས་སུ་ཕྱི་ལོ་ ༡༩༩༣ ལོར་ Israel དང་ Palestine གཉིས་དབར་དེ་བྱུང་གི་རང་བཞིན་ལྡན་པའི་ཨོས་ལོ་ཞི་བདེའི་གྲོས་མཐུན་འཇོག་ཐུབ་ཡོད་པ་གསུངས་འདུག དེ་བཞིན་གསུང་འཕྲིན་དེའི་ནང་། དམ་པ་དེ་ཉིད་ནི་རྣམ་ཀུན་ནས་ནང་འགྲིགས་གནང་རྒྱུ་གནད་ཆེར་འཛིན་མཁན་ཞིག་ཡིན་པ་གསུངས་པ་དང་ཆབས་ཅིག Peres དམ་པ་ཁོང་གིས་ Israel དང་ Palestine རྒྱལ་ཁབ་གཉིས་པོ་ས་བབ་ཀྱི་ཆ་ནས་ཆེས་ཉེ་བའི་ཁྱིམ་མཚེས་རྒྱལ་ཁབ་གཅིག་ཡིན་སྟབས། མ་འོངས་པར་ཆེས་ཉེ་བའི་མཛའ་གྲོགས་ཤིག་ཡོང་བར་རེ་སྨོན་གནང་པ་ལུང་འདྲེན་གྱིས་༸གང་ཉིད་མཆོག་གིས་ཀྱང་དེ་ལྟར་ཡོང་བར་ཐུགས་སྨོན་ཡོད་པ་གསུངས་འདུག རྩ་བའི་སྐུ་ཞབས་ Shimon Peres མཆོག་ནི་ཨི་སེ་རེལ་གྱི་སྲིད་འཛིན་ཟུར་པ་དང་། ཕྱི་ལོ་ ༡༩༧༧ ལོར་ཨེ་སི་རེལ་སྲིད་བློན་ལས་ཚབ་གནང་པ་དང་། དེ་རྗེས་ཁོང་སླར་ཨེ་སི་རེལ་གྱི་སྲིད་བློན་ཐེངས་གཉིས་གནང་པ་མ་ཟད། ཁོང་གིས་ཕྱི་ལོ་ ༢༠༠༧ ནས་ ༢༠༡༤ བར་ཨེ་སི་རེལ་གྱི་སྲིད་འཛིན་གྱི་ཐུགས་འགན་བཞེས་ཡོད་པ་རེད།  དམ་པ་ཁོང་གིས་དེ་སྔོན་ ༡༩༩༤ ལོར་ནོ་བེལ་ཞི་བདེའི་གཟེངས་རྟགས་བཞེས་ཡོད་པ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལན་ཁ་ཤས་རིང་མཇལ་འཕྲད་གནང་མྱོང་པ་རེད། ༸གོང་ས་མཆོག་གིས་ངོས་རང་དམ་པ་ཁོང་དང་ས་གནས་འདྲ་མིན་ནང་ལན་ཁ་ཤས་རིང་མཇལ་མྱོང་ཡོད་པ་མ་ཟད། མཇལ་འཕྲད་མཐའ་མ་དེ་ཕྱི་ལོ་ ༢༠༠༦ ལོར་ཇོར་ཌན་དུ་ང་ཚོ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་རྣམས་ཀྱི་ཞི་བདེའི་ལྷན་ཚོགས་ཤིག་ཚོགས་པ་དང་། ལྷན་ཚོགས་དེའི་ཐོག་ཞི་བདེའི་དབུ་ཁྲིད་རྣམས་དང་། དེ་བཞིན་རྣམ་དཔྱོད་ལྡན་པའི་སྐྱེ་བོ་ཁག་ཅིག་མཉམ་ཞུགས་ཀྱིས་གོ་ལ་སྤྱིའི་ངལ་བ་སེལ་ཐབས་ཐོག་བཀའ་བསྡུར་གནང་རྒྱུ་བྱུང་ཡོད་ཅེས་གསུངས་འདུག

ཉན་པ།: Listen ཕབ་ལེན། Download སྐུ་ཞབས་ཤན་ཏ་ཀུ་མཱར་མཆོག་གྲོས་ཚོགས་སུ་ཟུར་ཉན་དུ་ཕེབས་པ། བདེ་སྲུང་ལས་ཁུངས་ཀྱི་ངོས་ནས་ད་བར་གསང་བ་གཅིག་ཀྱང་ཕྱི་ལ་ཤོར་མེད་ཅེས་གསུངས་སོང་། ༸གོང་ས་མཆོག་ ༢༠༠༠ གླེང་སྟེགས་ཀྱི་ལྷན་ཚོགས་ཐོག་ཆིབས་བསྒྱུར་བསྐྱང་གཏན་འཁེལ་བ། བལ་ཡུལ་ནང་གི་བོད་མི་སྐྱབས་བཅོལ་བ་རྣམས་ལ་དགོས་གལ་ཆེ་བའི་ངོས་འཛིན་ལག་འཁྱེར་ཁག་ཅིག་ཐོབ་གཏན་འཁེལ་འདུག ཐེ་ཝན་ཆབ་སྲིད་ཚོགས་པ་ཆེ་གྲས་ཤིག་གིས་༸གོང་ས་མཆོག་ཁུལ་དེར་གདན་ཞུ་གནང་འཆར་འདུག རྒྱ་གཞུང་གིས་ཁྲིམས་རྩོད་པའི་ཐོག་མུ་མཐུད་དྲག་གནོན་བྱེད་བཞིན་པ་ཐེར་བཏོན། Wednesday 28/09/2016 Former Himachal CM Shanta Kumar visits Tibetan Parliament Security Kalon faces questions from Tibetan MPs Nepal assures vital documents to Tibetan refugees Dalai Lama to speak at closing ceremony of Forum 2000 in Prague Major Taiwanese political party vows to invite Dalai Lama China Targets ‘Die Hard’ lawyers, Campaign to Silence Human Rights Lawyers: HRW

བོད་མིའི་སྒྲིག་འཛུགས་དང་བོད་མིའི་འཐབ་རྩོད་ཐོག་ལ་ཡུན་རིང་ནས་རྒྱབ་སྐྱོར་གནང་མཁན་རྒྱ་གར་གྲོས་ཚོགས་འོག་མའི་འཐུས་མི་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་འགན་འཛིན་སྐུ་ཞབས་ཤན་ཏ་ཀུ་མཱར་མཆོག་དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ལས་ཉིན་བརྒྱད་པའི་ཐོག་ཟུང་ཉན་དུ་ཕེབས་སོང་བ་དང་། ཁོང་གིས་གསར་འགོད་པའི་བཅར་འདྲི་དང་ལེན་གནང་སྐབས་སྤྱི་འཐུས་གྲོས་ཚོགས་དེ་བཞིན་ཁྲིམས་སྒྲིག་གཞི་ལྟར་ཞི་འཇམ་པོའི་ཐོག་ནས་སྐྱོད་བཞིན་པར་བསྔགས་བརྗོད་དང་སྦྲགས། བཙན་བྱོལ་བོད་གཞུང་དང་གྲོས་ཚོགས་ཚགས་ཚུད་ངང་སྐྱོད་བཞིན་པར་དགའ་ཚོར་ཆེན་པོ་བྱུང་སོང་ཞེས་གསུངས་གནང་སོང། སྐབས་དེར་ད་དུང་ཁོང་གིས་བཙན་བྱོལ་བོད་གཞུང་དང་གྲོས་ཚོགས་གཉིས་པོ་ཚགས་ཚུད་ལམ་ལྷོང་ལྡན་པའི་ངང་སྐྱོད་བཞིན་པ་དེ་ནི་དངོས་གནས་འཛམ་གླིང་རྒྱལ་ཁབ་གང་དུ་མེད་པ་ཐོུང་མ་ཡིན་པ་ཞིག་ཆགས་ཡོད་པ་རེད། དེ་ཡང་གཙོ་བོ་སྤྱི་ཁྱབ་འོས་བསྡུ་ལས་ཁང་དང་མང་ཚོགས་ཀྱི་འགན་འཁུར་ལ་བརྟེན་ནས་བྱུང་བ་ཡིན་སྟབས། དེ་རིང་གི་གོ་སྐབས་འདིའི་བརྒྱུད་ནས་བོད་མི་ཡོངས་ལ་འཚམས་འདྲི་ཡོད་བཅས་གསུངས་གནང་ཡོད་པ་རེད། རྩ་བའི་སྐུ་ཞབས་ཤན་ཏཱ་ཀུ་མཱར་མཆོག་དེ་རིང་ཉིན་རྒྱབ་གྲོས་ཚོགས་སུ་ཟུར་ཉན་དུ་ཕེབས་སྐབས་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དབུ་བཞུགས་སྤྱི་འཐུས་རྣམ་པ་དང་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་བཀའ་བློན་རྣམ་པ་སྐུ་བཞེངས་ཀྱིས་ཁོང་ལ་ཆེ་བསྟོད་དགའ་བསུའི་འཚམས་འདྲི་ཞུས་ཡོད་པ་རེད། བོད་མི་མང་སྤྱི་འཐུས་གྲོས་ཚོགས་ཚོགས་བཞིན་པའི་སྐབས་སུ་རྒྱ་གར་དང་ཕྱི་རྒྱལ་གྱི་གཞུང་འབྲེལ་དང་གཞུང་འབྲེལ་མིན་པའི་གནད་ཡོད་མི་སྣ་ཁག་ཅིག་ཟུར་ཉན་དུ་ཕེབས་བཞིན་པའི་གལ་གནད་སྐོར་ལ་སྤྱི་འཐུས་གཉིས་ལ་བཅར་འདྲི་ཞུས་སྐབས་དེ་ནི་བོད་མིའི་འཐབ་རྩོད་ལ་རྒྱབ་སྐྱོར་གྱི་རྣམ་པ་ཞིག་ལ་ངོས་འཛིན་གནང་གི་ཡོད་པ་གསུངས་སོང་། གཞི་རྩའི་དེ་རིང་གྲོས་ཚོགས་ཀྱི་ལས་ཉིན་བརྒྱད་པའི་དུས་ཡུན་མང་ཆེ་བ་དེ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཕྱི་ལོ་ ༢༠༡༥་༡༦ ལོའི་ལོ་འཁོར་ལས་བསྡོམས་ཐོག་ལ་བཏང་གནང་བ་དང་། དེ་ཡང་གྲོས་ཚོགས་འཐུས་མི་རྣམས་ནས་ལས་བསྡོམས་ཐོག་ལ་དོགས་འདྲི་དང་བགྲོ་གླེང་གནང་པའི་ཁྲོད་རྒྱ་རིགས་གཙོས་པའི་བོད་དོན་རྒྱབ་སྐྱོར་ཚོགས་པའི་སྐོར་དང་། དབུ་མའི་ལམ་གྱི་གོ་རྟོགས་དང་དྲིལ་བསྒྲགས་ལས་འགུལ་སྐོར། དེ་བཞིན་དྲིལ་བསྒྲགས་ལས་ཁུངས་ཀྱི་བོད་རྒྱ་དབྱིན་གསུམ་གྱི་གསར་འགྱུར་འདོན་སྤེལ་སོགས་ཀྱི་ཐད་ལ་དོགས་འདྲི་ཁག་ཅིག་ཕེབས་ཡོད། སྐབས་དེའི་བགྲོ་གླེང་གནང་སྐབས་ཕྱི་འབྲེལ་ཁྱབ་ཁོངས་སྐུ་ཚབ་དོན་གཅོད་སྐོར་དང་འབྲེལ་སྤྱི་འཐུས་གཅིག་གིས་སྐུ་ཚབ་དོན་གཅོད་བསྐོ་གཞག་གནང་རྒྱུའི་སྐུ་དབང་སུ་ལ་ཡོད་མེད་སྐོར་བཀའ་འདྲི་ཞུས་པར་ཕྱི་དྲིལ་བཀའ་བློན་གཅིག་ལྕོགས་སྲིད་སྐྱོང་བློ་བཟང་སེང་གེ་མཆོག་གིས་ད་ནས་སྐུ་ཚབ་དོན་གཅོད་བསྐོ་གཞག་གནང་རྒྱུའི་སྐུ་དབང་དེ་དཔལ་ལྡན་དགའ་ལྡན་ཕོ་བྲང་དང་བཀའ་ཤག་གཉིས་མོས་མཐུན་ཡོད་པའི་ཐོག་ནས་གནང་གི་ཡོད་པ་གསུངས་གནང་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རིང་མིན་ Latvia དང་ Swiss ནང་གི་མཛད་འཆར་ཁག་ལེགས་གྲུབ་ཟིན་རྗེས། Czech སྤྱི་མཐུན་རྒྱལ་ཁབ་ཀྱི་རྒྱལ་ས་ Prague ནང་དུ་ཚོགས་གཏན་འཁེལ་བའི་ Forum 2000 ཞེས་ ༢༠༠༠ གླེང་སྡེགས་ཀྱི་མཇུག་སྡོམ་མཛད་སྒོའི་ཚོགས་མགོན་དུ་ཆིབས་བསྒྱུར་བསྐྱང་གཏན་འཁེལ་འདུག དེ་ཡང་ཁ་སང་ཚེས་ ༢༧ ཉིན་ Prague Daily Monitor ཞེས་པའི་བརྒྱུད་ལམ་གྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། ཕྱི་ལོ་ ༢༠༡༦ ལོའི་ ༢༠༠༠ གླེང་སྟེགས་དེ་ Prague ནང་དུ་ཟླ་བ་རྗེས་མའི་ཚེས་ ༡༦ ནས་དབུ་འཛུགས་ཀྱིས་ཚེས་ ༡༩ བར་ཚོགས་གཏན་འཁེལ་ཡོད་པ་ལྟར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གླེང་སྟེགས་དེའི་ཚོགས་མགོན་དུ་ཆིབས་བསྒྱུར་བཀྲིན་བསྐྱང་གནང་གིས་གནད་ཡོད་མི་སྣ་ཁག་ཅིག་ལ་བཀའ་སློབ་བསྩལ་རྒྱུ་ཡིན་པ་རེད་འདུག གླེང་སྡེག་འདིའི་ཐོག་ལོ་ལྟར་འཛམ་གླིང་ཁྱོན་ཡོངས་ནས་ཆབ་སྲིད་དང་ཤེས་ཡོན། ཚོང་ལས་བཅས་ཀྱི་ལས་རིགས་འདྲ་མིན་གི་དབུ་ཁྲིད་གྲགས་ཅན་འདུ་འཛོམས་གནང་ཐོག་འགྲོ་བ་མིའི་ཐོབ་ཐང་གི་གནད་དོན་དང་། ལྷག་དོན་མང་གཙོ་གོང་འཕེལ་ཆེད་ཤེས་ཡོན་གྱི་གལ་གནད་བཅས་ཀྱི་སྐོར་ལ་གྲོས་བསྡུར་ལྷུག་པོ་གནང་རྒྱུ་དང་། ༸གོང་ས་མཆོག་ནས་དེ་སྔོན་གླེང་སྟེགས་དེའི་ཐོག་དབུ་བཞུགས་ཀྱིས་བཀའ་སློབ་བཀྲིན་ཆེ་བ་བསྩལ་གནང་མཛད་མྱོང་ཡོད་པ་རེད། ཟླ་ ༡༠ ཚེས་ ༡༩ ཉིན་ Oliver Adam ལགས་དང་ཁོང་གི་བཟའ་ཟླ་གཉིས་ཀྱིས་ལོ་བརྒྱད་ཙམ་རིང་ཕྱག་ལས་གནང་པའི་ཁྲོད། བོད་པའི་བཙུན་མའི་མི་ཚེའི་སྐོར་དཔར་སྐྲུན་གནང་ཞུས་པའི་ Daughters of Buddha ཞེས་པའི་པར་རིགས་འགྲེམས་སྟོན་ཞིག་ཀྱང་གནང་འཆར་འདུག འགྲེམས་སྟོན་འདི་བཞིན་ Forum 2000 གླེང་སྟེགས་ཀྱི་ར་བའི་ནང་དུ་གནང་རྒྱུ་ཡིན་པ་དང། ལོ་རྗེས་མའི་ཕྱི་ཟླ་ ༢ ཚེས་ ༢༨ བར་གནང་གཏན་འཁེལ་འདུག འགྲེམས་སྟོན་འདི་བཞིན་བོད་པའི་སློབ་ཕྲུག་དང་བགྲེས་སོང་།  དེ་བཞིན་གྲྭ་བཙུན་རྣམས་ཀྱི་ཤེས་ཡོན་དང་བདེ་དོན་ཆེད་དུ་ཕྱག་ལས་གནང་མཁན་བོད་དོན་རྒྱབ་སྐྱོར་ཚོགས་པ་གཅིག་གིས་མཐུན་འགྱུར་འོག་གནང་པ་ཞིག་དང། གཞན་ཡང་པར་རིགས་ཚོང་འགྲེམས་གནང་སྐབས་དངུལ་འབོར་ཇི་བྱུང་རྣམས་ཚོགས་པ་དེའི་ཕྱག་ལས་ཐོག་བེད་སྤྱོད་གཏང་རྒྱུ་ཡིན་པ་འཁོད་འདུག

བལ་ཡུལ་ནང་ལ་ཡོད་པའི་བོད་མི་སྐྱབས་བཅོལ་བ་རྣམས་ལ་ཉེ་བར་མཁོ་བའི་ཁྲིམས་མཐུན་གྱི་ངོས་འཛིན་ལྡན་པའི་ལག་འཁྱེར་ཁག་ཅིག་གནང་གཏན་འཁེལ་འདུག དེའང་བལ་ཡུལ་ནང་རྟེན་གཞི་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་དང་ཁོར་ཡུག་ཡར་རྒྱས་ཚོགས་པས་ཁུལ་དེར་གནས་སྡོད་བོད་མི་སྐྱབས་བཅོལ་བ་རྣམས་ལ་རང་ཉིད་ཀྱི་མི་ཚེའི་ནང་ཆེས་དགོས་གལ་ཆེ་བའི་ཁྲིམས་མཐུན་གྱི་ཡིག་ཆ་མེད་པའི་ངལ་བ་མང་དག་ཞིག་འཕྲད་བཞིན་ཡོད་སྟབས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཡན་ལག་ལས་ཁུངས་ལ་ད་བར་ཞུ་གཏུགས་ལན་མང་བྱས་ནས་ཉེ་ཆར་བལ་ཡུལ་གཞུང་གིས་ཁུལ་དེར་ཡོད་པའི་བོད་མི་སྐྱབས་བཅོལ་བ་རྣམས་ཀྱི་དཀའ་ངལ་སེལ་ཐབས་སུ་ཁྲིམས་མཐུན་གྱི་ངོས་འཛིན་ལྡན་པའི་སྐྱེས་ལོ་སྐྱེས་ཚེས་དང་། འཆི་ཚེས་ཀྱི་ལག་འཁྱེར། དེ་བཞིན་གཉེན་སྒྲིག་གི་ལག་འཁྱེར། གནས་ཡུལ་སྤོ་བཤུད་ཀྱི་ལག་འཁྱེར་བཅས་སྐྱབས་བཅོལ་བ་གཞན་དང་གཅིག་མཚུངས་ཀྱི་ཐོབ་ཐང་གནང་གཏན་འཁེལ་འདུག འདི་ག་རླུང་འཕྲིན་ཁང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་དང་ཁོར་ཡུག་ཡར་རྒྱས་ཚོགས་པའི་སྐྱབས་བཅོལ་སྡེ་ཚན་གྱི་ལས་གནས་འགོ་འཛིན་བསོད་ནམས་ལྷ་མཛེས་ལགས་སུ་དེ་འབྲེལ་བཅར་འདྲི་ཞུས་པར་ཁོང་གིས་ད་ལྟའི་ཆར་ས་གནས་བོད་མི་རྣམས་ལ་ཁྲིམས་མཐུན་གྱི་ཡིག་ཆ་བཞི་ཐོབ་ཡོད་པ་དེ་དག་གི་བརྒྱུད་ནས་ཁོང་རྣམས་ལ་སྐྱབས་བཅོལ་བའི་ཡིག་ཆ་ Refugee Card ཞེས་པ་དེ་ཐོབ་ཐབས་གནང་བཞིན་ཡོད་སྐོར་གསུངས་སོང་། རྩ་བའི་བལ་ཡུལ་གཞུང་ནས་དེ་སྔ་སྤྱི་ལོ་ ༡༩༨༩ སྔ་རོལ་དུ་བོད་ནས་སྐྱབས་བཅོལ་དུ་ཕེབས་པའི་བོད་མི་དང་ཁོང་རྣམས་པའི་བུ་ཕྲུག་རྣམས་ལ་སྐྱབས་བཅོལ་བའི་ཡིག་ཆ་ RC ཞེས་པ་དེ་སྤྲོད་ཀྱི་ཡོད་ཀྱང་། ཕྱིས་སུ་ཁུལ་དེའི་ནང་གི་ཆབ་སྲིད་གནས་སྟངས་དང་ཉེ་འཁོར་ཁྱིམ་མཚེས་རྒྱལ་ཁབ་རྒྱ་ནག་གཞུང་གིས་གནོན་ཤུགས་སོགས་ཀྱི་རྐྱེན་པས་བོད་མི་རྣམས་ལ་སྐྱབས་བཅོལ་བའི་ཡིག་ཆ་སྤྲོད་རྒྱུ་མཚམས་འཇོག་བྱས་པ་མ་ཟད། ལྷག་དོན་ ༢༠༠༣ ལོར་རྒྱལ་ཚོགས་ཀྱི་ཆེས་མཐོའི་སྐྱབས་བཅོལ་སྡེ་ཚན་གྱི་འདོན་སྤེལ་གནང་པའི་སྙན་ཐོར་གཞིགས་ན། ཁུལ་དེའི་ནང་ལ་ཡོད་པའི་བོད་མི་སྟོང་ཕྲག་ཉི་ཤུ་ལྷག་ཡོད་པ་ལས་བོད་མི་སྟོང་ཕྲག་བཅུ་བདུན་ལ་ཁྲིམས་མཐུན་གྱི་ཡིག་ཆ་གང་ཡང་མེད་སྐོར་མངོན་གསལ་གནང་ཡོད།

དེ་རིང་ཟླ་ ༩ ཚེས་ ༢༨ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་བརྒྱད་པའི་ཐོག་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་མ་ལག་དང་བཅས་པའི་ལོ་འཁོར་ལས་བསྡོམས་ཐད་བགྲོ་གླེང་གནང་སྐབས་བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་བདེ་སྲུང་ལས་ཁུངས་ཀྱི་ངོས་ནས་ད་བར་གསང་བ་གཅིག་ཀྱང་ཕྱི་ལ་ཤོར་མེད་པ་དང་། མ་འོངས་པར་ཡང་གསང་གནས་དེ་དག་ཕྱིར་མི་ཤོར་བ་ཁས་ལེན་ཞུ་རྒྱུ་ཡིན་ཅེས་གསུངས་སོང། དེའང་ཁ་སང་ནས་དེ་རིང་སྔ་དྲོའི་གྲོས་ཚོགས་བར་སྤྱི་འཐུས་རྣམ་པས་བདེ་སྲང་ལས་ཁུངས་ཀྱི་ལོ་འཁོར་ལས་བསྡོམས་ཐོག་ལ་བགྲོ་གླེང་གནང་སྐབས་སྤྱི་འཐུས་ཁག་ཅིག་གིས་སེམས་ཚོར་ཆེན་པོས་བདེ་སྲུང་ལས་ཁུངས་ཀྱི་ངོས་ནས་༸གོང་ས་མཆོག་གི་༸སྐུའི་སྲུང་བྱའི་ཐོག་སྔར་ལྷག་ཐུགས་སྣང་བཞེས་དགོས་པ་དང། རྣམ་ཀུན་༸གང་ཉིད་མཆོག་གི་མཛད་འཆར་ཉུང་འཕྲིད་གནང་དགོས་པ། དེ་བཞིན་༸གོང་ས་མཆོག་གི་མཚན་སྙན་སྲུང་སྐྱོབ་བྱ་དགོས་པ།  མགོན་པོ་མཆོག་ས་གནས་ཁག་ཏུ་ཆིབས་སྒྱུ་བསྐྱངས་སྐབས་དང་བླངས་སྐུ་སྲུང་བ་བསྡུ་རུབ་གནང་ཚེ་དེ་དག་གི་རྒྱབ་ལྗོངས་ལ་ཞིབ་འཇུག་གཟབ་ནན་གནང་དགོས་པར་གཞེན་སྐུལ་ཕུལ་བ་དང་ཆབས་ཅིག བདེ་སྲུང་ལས་ཁུངས་ཀྱི་གསང་བའི་གནས་ཚུལ་ཉར་ཕྱོགས་ཐོག་དམ་ཟབ་གནང་དགོས་གལ་ཆེ་བར་གཞེན་སྐུལ་ཡང་བྱུང་སོང་།  སྐབས་དེར་བདེ་སྲུང་བཀའ་བློན་མཆོག་གིས་བདེ་སྲུང་ལས་ཁུངས་ཀྱི་གསང་བའི་ལས་དོན་ཉར་ཚགས་གནང་ཕྱོགས་ཐད་བཀའ་ལན་གནང་པར་ད་བར་བདེ་སྲིད་ལས་ཁུངས་ཀྱི་ངོས་ནས་གསང་བ་གཅིག་ཀྱང་ཕྱི་ལ་ཤོར་མེད་ཅེས་གསུངས་ཡོད་པ་རེད། གྲོས་ཚོགས་སུ་སྤྱི་འཐུས་ལ་ལས་༸གོང་ས་མཆོག་གི་མཚན་སྙན་སྲུང་སྐྱོབ་བྱ་དགོས་གལ་གྱི་གནད་དོན་དང་འབྲེལ་ཏེ་ཉེ་བའི་ཆར་སྤྱི་ཚོགས་ཁྲོད་དྲ་རྒྱའི་མ་ལག་རྒྱ་ཁྱབ་ཏུ་འགྲོ་བཞིན་པའི་དུས་སྐབས་འདིར་མི་སྣ་ཁག་ཅིག་གིས་སྤྱི་ཚོགས་བརྒྱུད་ལམ་ཐོག་མིང་འདྲ་མིན་སྤྱོད་ནས་བཙན་བྱོལ་བོད་མིའི་སྤྱི་ཚོགས་གཏོར་བཤིག་བཏང་པ་མ་ཟད། དེ་བཞིན་རྒྱ་གཞུང་གིས་དངོས་ཤུགས་བརྒྱུད་གསུམ་གྱིས་ཐབས་བྱུས་འདྲ་མིན་བརྒྱུད་༸གོང་ས་མཆོག་ལ་མཚན་སྨད་ཞུ་བ་བཅས་ཀྱི་གནས་ཚུལ་ཡོང་གི་ཡོད་སྟབས། དེ་དག་ཐོག་མྱུལ་ཞིབ་གནང་ཕྱིར་བདེ་སྲུང་ལས་ཁུངས་ནས་དོགས་ཟོན་དང་དམིགས་བསལ་གྱི་ལས་ཁུངས་གསར་འཛུགས་གནང་དགོས་པར་འབོད་སྐུལ་ཞུས་སོང་།   ལྷག་པར་དུ་སྤྱི་འཐུས་ཁག་ཅིག་གིས་༸གོང་ས་མཆོག་ས་གནས་ཁག་ཏུ་ཆིསབ་སྒྱུར་མཛད་སྐབས་བདེ་སྲུང་ལས་ཁུངས་ཀྱི་འབྲེལ་ཡོད་ལས་བྱེད་ཚོས་ས་གནས་ཀྱི་གནད་ཡོད་མི་སྣ་ཁག་དང་མཇལ་འཕྲད་ཀྱི་གོ་སྐབས་མང་ཙམ་བྱུང་ཐུབ་ཚེ་དེ་ནི་དགེ་མཚན་ཆེན་པོ་ཡོད་སྐོར་གྱི་དགོངས་ཚུལ་གསུང་མཁན་ཡང་བྱུང་ཡོད་པ་རེད། སྤྱིར་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་ལོ་འཁོར་ལས་བསྡོམས་ཐོག་ལ་གྲོས་ཚོགས་ཀྱི་འཐུས་མི་ཚོས་ཐུགས་སྣང་གཞེན་སྐུལ་ཕུལ་བ་ལས་དམིགས་བསལ་ལས་བསྡོམས་རང་གི་ཐོག་དོགས་འདྲི་གནང་མཁན་དེ་ཙམ་བྱུང་མེད་པ་རེད། རྩ་བའི་བོད་མིའི་སྒྲིག་འཛུགས་བདེ་སྲུང་ལས་ཁུངས་ནས་གྲོས་ཚོགས་སུ་དགོས་འབུལ་ཞུས་པའི་ལོ་འཁོར་ལས་བསྡོམས་སྙིང་བསྡུས་ལ་གཞིགས་ན། འདི་ལོའི་ནང་བོད་ནས་གསར་དུ་ཕེབས་མཁན་གྲངས་ ༡༢༨༢ བྱུང་འདུག་པ་དང། དེའི་ཁོངས་ནས་བལ་ཡུལ་དང་རྒྱ་གར་གཞུང་ཚབ་ནས་དམིགས་བསལ་འཛུལ་བཞུགས་ཆོག་པའི་ལག་འཁྱེར་ཞུ་མཁན་གྲངས་ ༩༨ བྱུང་ཡོད་འདུག དེ་བཞིན་གནས་མཇལ་རྗེས་ཕྱིར་བོད་དུ་ཕེབས་མཁན་གྲངས་ ༡༡༩༤ བྱུང་ཡོད་པ་རེད།  གཞན་ཡང་ལོ་འཁོར་མོ་འདིའི་ནང་བོད་ལ་གཉེན་འཕྲད་དུ་ཕེབས་མཁན་བོད་མི་སེར་སྐྱ་གྲངས་ ༢༨༢ བྱུང་ཡོད་པ་དང་། བོད་མི་ཕྱིར་སྐྱོད་ལག་འཁྱེར་ IC ཞུ་མཁན་མི་སྐྱ་ཕོ་མོ་ ༢༧༢༣ དང་གྲྭ་བཙུན་ ༣༤༠ བཅས་ཁྱོན་བསྡོམས་ ༣༠༦༣ བྱུང་ཡོད་འདུག་པ་མ་ཟད། ནང་མི་ཟླ་སྒྲིལ་ Travel Document ཡིག་ཆ་བཟོ་མཁན་གྲངས་ ༢༢ བྱུང་ཡོད་རེད་འདུག

ཁ་སང་ཟླ་ ༩ ཚེས་ ༢༧ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་བདུན་པའི་ཐོག་བཀའ་ཤག་གིས་དམིགས་བསལ་ལས་བྱེད་ ༡༨ ལས་མ་མང་བ་ཞིག་ཐད་བསྐོ་བྱེད་ཆོག་པའི་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་བསྣམས་ཕེབས་པ་དེར་ངོ་ཡོད་སྤྱི་འཐུས་གྲངས་ ༣༡ གིས་རྒྱབ་སྐྱོར་གནང་སྟབས་དེ་མང་མོས་གཏན་འབེབས་གནང་སོང་། དེའང་བཀའ་ཤག་ནས་དམིགས་བསལ་ལས་བྱེད་ ༡༨ ལས་མ་མང་བ་ཞིག་ཐད་བསྐོ་བྱེད་ཆོག་པའི་ཁྲིམས་འཆར་ཐོག་ཁ་སང་བགྲོ་གླེང་ལྷུག་པོ་གནང་པ་མ་ཟད། ད་དུང་ཡང་སྤྱི་འཐུས་ཁག་ཅིག་གིས་དོགས་འདྲི་མང་དག་ཞིག་གནང་ཡོད་སྟབས། སྲིད་སྐྱོང་མཆོག་གིས་ཁྲིམས་འཆར་དེའི་བཟོ་བཅོས་ཁྲིམས་འཆར་བསྣམ་ཕེབས་རྒྱུ་ཡིན་ཅེས་གསུངས་ཡོད་པ་རེད། རྩ་བའི་བཀའ་ཤག་གི་ངོས་ནས་གྲོས་ཚོགས་ལས་ཉིན་བཞི་པའི་ཐོག་ལས་ཁུངས་སོ་སོའི་ལས་འཆར་ཁག་ཅིག་ལ་དགོས་གལ་ལ་གཞིགས་ཏེ་བཀའ་ཤག་ནས་དམིགས་བསལ་ལས་བྱེད་བསྐོ་གཞག་ཆོག་པའི་ཁྲིམས་འཆར་ཞིག་བསྣམས་ཡོད་པ་དང་། ཁྲིམས་འཆར་དེའི་བརྗོད་པ་དང་པོའི་ཐོག་བསྐྱོད་པར་སྤྱི་འཐུས་ལ་ལས་དེར་དགག་པ་དང་ཡང་ཁ་ཅིག་གིས་རྒྱབ་སྐྱོར་གནང་སྟབས་དེར་བགྲོ་གླེང་དང་དོགས་འདྲི་ལྷུག་པོ་བྱུང་ཡོད་པ་རེད། ཁ་སང་གྲོས་ཚོགས་ཀྱི་ལས་ཉིན་བདུན་པའི་ཐོག་ཁྲིམས་འཆར་དེའི་བརྗོད་པ་གཉིས་པའི་ཐོག་བསྐྱོད་སྐབས་སླར་ཡང་སྤྱི་འཐུས་ཁག་ཅིག་གིས་མུ་མཐུད་འགག་པ་གནང་ཏེ་ཁྲིམས་འཆར་དེ་དང་འབྲེལ་བའི་ཐོག་དོགས་འདྲི་ཁ་ཤས་ཕེབས་སོང་བ་མ་ཟད། བཀའ་ཤག་ནས་དམིགས་བསལ་ལས་བྱེད་ཐད་ཀར་བསྐོ་གཞག་གནང་པ་དེས་བཀའ་ཤག་ལ་སྐྱོན་བརྗོད་རིགས་ཡོང་ཉེན་དང་། ལས་བྱེད་འདེམས་བསྐོ་ལྷན་ཁང་གི་སྐུ་དབང་ལ་དོ་ཕོག་འགྲོ་མིན། དེ་བཞིན་ད་དུང་དེས་སྤྱིར་སྲི་ཞུ་ལས་བྱེད་དང་ལས་བྱེད་གོ་གནས་ལ་དོ་ཕོག་འགྲོ་མིན་དང་། དམིགས་བསལ་དེ་དག་རང་གི་ངོ་ཤེས་པ་ཁག་བསྐོ་འཆར་ཡོད་དམ་ཞེས་སོགས་དྲི་བ་ཡང་ཡང་ཕེབས་ཡོད་སྟབས། སྲིད་སྐྱོང་མཆོག་གིས་དམིགས་བསལ་ཐད་བསྐོ་རྣམས་རང་གི་ངོ་ཤེས་པ་བསྐོ་འཆར་མེད་པ་དང་དེས་སྤྱིར་སྲི་ཞུ་ལས་བྱེད་པ་དང་ལས་བྱེད་པའི་ས་མིག་ལ་དོ་ཕོག་ཡོང་ཉེན་མེེད་ཅེས་ཁ་གསལ་གསུངས་སོང་། ལས་བྱེད་ཐད་བསྐོ་དང་འབྲེལ་བའི་ཁྲིམས་འཆར་དེར་དོགས་འདྲི་མང་དག་ཞིག་ཕེབས་སྟབས་སྲིད་སྐྱོང་མཆོག་གིས་བཟོ་བཅོས་ཁྲིམས་འཆར་བསྣམས་ཕེབས་ཡོད་པར་བརྟེན། གྲོས་ཚོགས་སུ་ངོ་ཡོད་སྤྱི་འཐུས་གྲངས་ ༣༡ གིས་རྒྱབ་སྐྱོར་གནང་བར་བརྟེན་མང་མོས་ཐག་གཅོད་ཀྱིས་གཏན་འབེབས་བྱུང་ཡོད་པ་རེད། སྒྲིག་གཞི་བསྐྱར་བཅོས་ནང་གསལ། དམིགས་བསལ་དགོས་གལ་བྱུང་ཚེ་འབྲེལ་ཡོད་བཀའ་བློན་ལས་ཁུངས་སོ་སོའི་འཆར་འབུལ་ལྟར་བཀའ་ཤག་ནས་ལས་བྱེད་ས་མིག་རྩ་འབོར་གྱི་བརྒྱ་ཆ་ ༣ མམ་ལས་བྱེད་མི་གྲངས་ ༡༨ ལས་མ་མང་བ་ལོ་དུས་རྒྱས་བཅད་ཐོག་བཀའ་ཤག་སྐབས་སོ་སོའི་ལས་ཡུན་རིང་ལས་བྱེད་འདེམས་ལྷན་དང་གོ་བསྡུར་གྱིས་ཐད་བསྐོ་ཆོག་རྒྱུ། ལས་བྱེད་དེ་རིགས་བཀའ་ཤག་སྐབས་སོ་སོའི་ལས་ཡུན་འཁྱུར་རྗེས་ཟླ་གསུམ་ནང་ཚུན་ལས་མཚམས་འཇོག་དགོས། དེ་དག་གི་ལས་འགན་དང་གནས་རིམ། ཕོགས་ཐོབ། ཁེ་ཕན་གཞན་བཅས་བཀའ་ཤག་གིས་གཏན་འབེབས་བྱ་རྒྱུ་ཡིན་པ་འཁོད་འདུག      

ཤེས་རིག་བཀའ་བློན་མཆོག་གིས་༸གོང་ས་མཆོག་གི་བཀའ་སློབ་ལམ་སྟོན་དང་མཁས་པ་ཁག་ལ་གྲོས་བསྡུར་སྦྱང་ཤེས་གནང་རྗེས། བོད་པའི་སློབ་གྲྭ་ཁག་གི་རིགས་ལམ་འཆད་འཁྲིད་པའམ་ཆོས་དགེ་ཚོར་ལྟ་གྲུབ་དགེ་རྒན་ཞེས་གཅིག་འགྱུར་འབོད་རྒྱུ་གཏན་འཁེལ་བྱུང་ཡོད་སྐོར་གསུངས་སོང། དེ་རིང་ཟླ་ ༩ ཚེས་ ༢༨ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་བརྒྱད་པའི་ཐོག་སྤྱི་འཐུས་ཀཿ་བྲག་དོངས་གྲུབ་བསོད་ནམ་ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྔ་རྗེས་ཕེབས་པའི་ནང་། རིགས་ལམ་འཆད་འཁྲིད་པ་རྣམས་ལ་ལྟ་གྲུབ་སློབ་དཔོན་ཞེས་འབོད་ན་ལེགས་ཚུལ་གསུངས་པར་ཡོངས་ཁྱབ་ལག་ལེན་གནང་མ་ཐུབ་པའི་རྒྱུ་མཚན་ཇི་ཡིན་དང་བོད་ཁྱིམ་དང་ཤེས་རིག་ལས་ཁུངས་གཉིས་ཀྱི་ཐ་སྙད་བེད་སྤྱོད་ཐོག་ཁྱད་པར་ཡོད་པའི་སྐོར་ལ་སྐར་རྟགས་ཅན་གྱི་དྲི་བ་ཞིག་ཕུལ་ཡོད་པ་རེད། སྐབས་དེར་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་ཤེས་རིག་ལས་ཁུངས་ནས་༸གོང་ས་མཆོག་གི་བཀའ་སློབ་ལམ་སྟོན་བཞིན་༸ གང་ཉིད་ཀྱི་༸སྐུའི་གསུང་བསྒྱུར་དང་བོད་ཀྱི་དཔེ་མཛོད་ཁང་གི་འགན་འཛིན། ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དང་སློབ་དཔོན། ལྡི་ལི་བོད་ཁང་གི་འགན་འཛིན་སོགས་མཁས་དབང་མི་སྣ་བདུན་ལ་གོ་བསྡུར་གནང་དོན་ལྟར། ཆོས་དགེ་ཚོར་ལྟ་གྲུབ་དགེ་རྒན་ཞེས་འབོད་རྒྱུ་གཏན་འཁེལ་བྱུང་སྐོར་ཡོངས་ཁྱབ་གསལ་བསྒྲགས་ཞིག་སྤེལ་ཟིན་པ་དང། དེ་འབྲེལ་ཐ་སྙད་དེ་སློབ་གྲྭ་ཚང་མའི་ནང་གཅིག་འགྱུར་ཆགས་ཟིན་པ་ངོས་འཛིན་ཞུ་ཡི་ཡོད་བཅས་གསུངས་སོང། གཞི་རྩའི་ཤེས་རིག་བཀའ་བློན་མཆོག་གིས་གྲོས་ཚོགས་སུ་ཕུལ་བའི་ཤེས་རིག་ལས་ཁུངས་མ་ལག་དང་བཅས་པའི་ལས་བསྡོམས་ནང་གསལ་ལྟར། ད་ལྟའི་ཆར་བཙན་བྱོལ་བོད་མིའི་སློབ་གྲྭ་ཁག་གི་ནང་དུ་ལྟ་གྲུབ་དགེ་རྒན་ ༣༧ ཙམ་ཡོད་པ་རེད་འདུག