Monthly Archives: June, 2016

བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ཟླ་བ་འདིའི་ཚེས་༢༥ཉིན་བོད་གནའ་མཁར་ཟི་ལིང་གྲོང་ཁྱེར་གྱི་གནམ་ཐང་ནས་འཛིན་བཟུང་བཀག་ཉར་བྱས་ཡོད་པའི་གནས་ཚུལ་ཐོག་བོད་ཕྱི་ནང་གཉིས་ཀྱི་བོད་མི་དང་རྒྱལ་སྤྱིའི་མང་ཚོགས་ནས་སེམས་འཚབ་ཆེན་པོ་གནང་བསྟན་བཞིན་པའི་ཁྲོད། ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པ་དང་སུད་སི་ནང་གི་བོད་ཀྱི་གློག་བརྙན་ཚོགས་པས་པདྨ་ཚེ་བརྟན་ལགས་འཕྲལ་དུ་གློད་བཀྲོལ་གཏང་དགོས་པ་གསུངས་འདུག ཚོགས་པ་དེ་གཉིས་པོས་ཁ་སང་ཡོངས་ཁྱབ་གསལ་བསྒྲགས་ཤིག་སྤེལ་ཏེ་རྒྱ་གཞུང་གིས་ཉེན་རྟོག་པས་རྒྱལ་སྤྱིའི་ཆེ་མཐོང་ལྡན་པའི་བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་འཛིན་བཟུང་བཀག་ཉར་བྱེད་པའི་བྱ་སྤྱོད་ལ་སྐྱོན་བརྗོད་ཡོད་ཅེས་གསུངས་པ་དང་ཆབས་ཅིག ཁྲིམས་འགལ་གྱི་བྱ་སྤྱོད་དེའི་ཐད་སྲིད་གཞུང་གི་ཆེས་མཐོའི་དཔོན་རིགས་ཚོས་ཞིབ་འཇུག་གནང་དགོས་པ་གསུངས་འདུག ལྷག་པར་དུ་བོད་རང་བཙན་སློབ་ཕྲུག་ཚོགས་པས་བརྗོད་པར། ཐེངས་འདིའི་དོན་རྐྱེན་འདི་ནས་རྒྱ་གཞུང་གིས་བོད་ནང་གི་བོད་མི་རྣམས་ལ་གནའ་གནོན་དང་མི་རིགས་དབྱེ་འབྱེད་བྱེད་ཀྱི་ཡོད་པ་རྟགས་མཚན་གསལ་པོ་ཆགས་ཡོད་པ་ཡང་གསུངས་སྟེ་པདྨ་ཚེ་བརྟན་ལགས་འཕྲལ་དུ་གློད་བཀྲོལ་གཏང་དགོས་པ་མ་ཟད། ཁོང་ལ་སྨན་བཅོས་ཀྱི་མཐུན་རྐྱེན་ཆ་ཚང་ཞིག་སྦྱོར་དགོས་པ་གསུངས་འདུག གཞི་རྩའི་ཁ་སང་བརྒྱུད་ལམ་ཁག་ཏུ་པདྨ་པ་ཚེ་བརྟན་ལགས་འཛིན་བཟུང་བཀག་ཉར་བྱེད་དགོས་དོན་དང་རྗེས་སུ་གནས་ཚུལ་ཇི་བྱུང་སོགས་ཀྱི་སྐོར་ལ་འགྲེལ་བཤད་འགའ་ཞིག་བྱུང་ཡོད་ནའང། དོན་དངོས་སྐབས་དེར་ཟི་ལིང་གནམ་ཐང་དུ་པདྨ་ཚེ་བརྟན་ལགས་བསུ་བར་ཕེབས་མཁན་ཀི་ཀི་ཞུ་མཁན་ཞིག་གིས་རྒྱ་ནག་ནང་གི་ Sina Entertainmentབརྒྱུད་ལམ་ལ་གསུངས་པར། པདྨ་ཚེ་བརྟན་ལགས་ཀྱི་ཅ་དངོས་ཤིག་གནམ་ཐང་དུ་ལྷག་ཡོད་པ་དེ་ལེན་ཆེད་བསྐྱོད་པའི་བརྒྱུད་རིམ་ནང་། ཁོང་དང་གནམ་ཐང་གི་ཉེན་རྟོག་པའི་དབར་ལ་འཐབ་རྫིང་རིགས་གང་ཡང་བྱུང་མེད་ཅིང། སྐབས་དེར་ཉེན་རྟོག་པས་གློ་བུར་དུ་ལག་ལྕགས་དམ་པོ་རྒྱབ་པར་བརྟེན་པདྨ་ཚེ་བརྟན་ལགས་ཀྱི་ལག་པར་ཏོག་ཙམ་རྨས་སྐྱོན་བྱུང་འདུག ད་དུང་སྐབས་དེར་ཉེན་རྟོག་པས་ཁོང་ལ་ཉིན་ལྔ་རིང་བཀག་ཉར་བྱ་རྒྱུ་བཤད་རྗེས་ལུས་ཀྱི་ཁྲག་རླུང་འཕར་བའི་གནས་ཚུལ་བྱུང་ཡོད་པ་འགྲེལ་བརྗོད་གནང་འདུག གང་ལྟར་ད་ཆ་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་བཀག་ཉར་འོག་བཞག་ཡོད་པའི་དུས་མཚམས་འདིར་རྒྱལ་སྤྱི་ཁྱོན་ཡོངས་ནས་ཁོང་ལ་ཐུགས་སྣང་གནང་བཞིན་ཡོད་པ་དེ་ནི་གསར་འགྱུར་བརྒྱུད་ལམ་ཁག་དང་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་ཤེས་རྟོགས་ཐུབ་པ་མ་ཟད། ལྷག་པར་དུ་ཁ་སང་ FDGC འམ་རྒྱ་ནག་གློག་བརྙན་འཁྲབ་ཁྲིད་མཐུན་ཚོགས་ནས་པདྨ་ཚེ་བརྟན་ལགས་ཀྱི་གནད་དོན་ཐོག་ལ་ཐུགས་འཚབ་ཆེན་པོ་དང་བཅས་ཡོངས་ཁྱབ་བསྒྲགས་ཤིག་སྤེལ་ཏེ། རྒྱ་ནག་སྲིད་གཞུང་ནས་ཐེངས་འདིའི་གནས་ཚུལ་ལྷག་པའི་ཐད་གསལ་བཤད་བྱེད་དགོས་པ་དང་ཁོང་ཚོས་པདྨ་ཚེ་བརྟན་ལགས་ལ་དོ་སྣང་ཆེན་པོས་ལྟ་བཞིན་ཡོད་པ་སོགས་གསུངས་ཡོད་པ་རེད།

ཉན་པ།: Listen ཕབ་ལེན། Download པདྨ་ཚེ་བརྟན་ལ་འཕྲད་པའི་གནས་ཚུལ་དེ་མི་རིགས་དབྱེ་འབྱེད་ཀྱི་མཚོན་རྟགས་ཤིག་ཆགས་ཡོད་པ་གསུངས་འདུག ཧྥ་རིན་སི་གྲོས་ཚོགས་ནང་གཞུང་འབྲེལ་ཐོག་༸སྐུའི་འཁྲུངས་སྐར་སྲུང་བརྩི་ཞུས་འདུག བྱང་ཨ་རིའི་གཟའ་མཇུག་སློབ་གྲྭའི་བསླབ་གཞི་ཁག་གཅིག་མཚུངས་བཟོས་འདུག དགེ་ལུགས་ཡོངས་ནས་༸གོང་ས་མཆོག་གི་༸སྐུ་ཚེ་ཚེ་སྒྲུབ་ཆེན་མོ་ཚོགས་བཞིན་པ། རྒྱ་གཞུང་གི་དྲ་རྒྱ་དོ་དམ་པའི་འགན་འཛིན་འཕོ་གྱུར་སོང་ཡང་སྲིད་བྱུས་གུ་ཡངས་ཡོང་བའི་རེ་བ་གནང་རྒྱུ་མེད་པ་གསུངས་འདུག Thursday 30/06/2016 Tibet activists condemn China’s arbitrary detention and use of force against Pema Tseten Dalai Lama’s 81st birthday celebrated in French parliament DoE releases language textbooks for North America Tibetan weekend language classes Geluk monks begin long life prayer for Dalai Lama Chinese Internet head Lu Wei’s sudden resignation surprises foreign media

དེ་རིང་ཟླ་ ༦ ཚེས་ ༣༠ ཉིན་གྱི་སྔ་དྲོ་ཚོུད་ ༡༡།༠༠ སྟེང་གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་སྐུ་མགྲོན་གཙོ་བོ་སྲིང་སྐྱོང་དང་ཤེས་རིག་བཀའ་བློན་གཅིག་ལྕོགས་བློ་བཟང་སེང་གེ་མཆོག་གིས་གཙོས་ཤེས་རིག་དྲུང་ཆེ་ངག་དབང་རབ་རྒྱས་ལགས་དང། ཤེས་རིག་ཤེས་ཡོན་ལྷན་ཚོགས་ཀྱི་འགན་འཛིན་ཚེ་རིང་བསམ་གྲུབ་ལགས། གཞན་ཡང་སློབ་དེབ་རྩོམ་སྒྲིག་པ་དང་འབྲེལ་ཡོད་ལས་བྱེད་སོགས་ཆེད་ཕེབས་ཐོག་སྲིང་སྐྱོང་བློ་བཟང་སེང་གེ་མཆོག་གིས་ཨ་རི་གཟའ་མཇུག་སློབ་གྲྭའི་སྔོན་འགྲོ་ནས་འཛིན་རིམ་གཉིས་པ་བར་གྱི་བོད་ཡིག་སློབ་དེབ་དབུ་འབྱེད་གནང་སོང་། སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་རྒྱ་གཞུང་གི་ངོས་ནས་ད་བར་བོད་དེ་རྒྱ་ཡུལ་དུ་འགྱུར་རྒྱུའི་ཆེད་གཏིང་གཟབ་པའི་སྲིད་བྱུས་འདྲ་མིན་སྤེལ་བཞིན་ཡོད་རུང། བོད་ཕྱི་ནང་གཉིས་ཀྱི་བོད་མི་ཚོས་རང་མི་རིགས་ཀྱི་སྐད་ཡིག་དང་རིག་གཞུང་སྲུང་སྐྱོབ་ཐོག་སྐུ་ལས་སྐྱོན་བཞིན་པར་བརྟེན་ད་བར་རྒྱ་གཞུང་གི་སྲིད་བྱུས་དེ་དག་ལམ་ལྷོང་བྱུང་མེད་སྐོར་གསུངས་པ་དང་འབྲེལ། བོད་མིའི་འཐབ་རྩོད་ལ་བོད་མི་རིགས་ཀྱི་ངོ་བོ་དང་ཆེ་མཐོང་དེ་མ་བརླག་པར་རྒྱུན་གནས་ཐུབ་གནང་གལ་ཡིན་པ་གསུངས་ཡོད་པ་རེད། དེ་སྔ་བྱང་ཨ་མི་རི་ཀའི་ཁུལ་དུ་བཙན་བྱོལ་བོད་མི་གནས་སྡོད་བྱེད་མཁན་གྱི་གྲངས་འབོར་མང་རུ་ཕྱིན་པ་དང་དུས་མཚུངས་ས་གནས་སུ་འཚར་ལོངས་བྱུང་བཞིན་པའི་བོད་པའི་ཕྲུ་གུ་ཚོར་བོད་ཀྱི་སྐད་ཡིག་དང་རིག་གཞུང་སློབ་ཁྲིད་བྱ་རྒྱུར་གཅིག་མཚུངས་ཀྱི་སློབ་གཞི་རྩ་འཛིན་དགོས་རྒྱུ་གལ་ཆེན་པོ་མཐོང་སྟེ། ཕྱི་ལོ་༢༠༠༨ལོར་ཁུལ་དེའི་ནང་གནས་སྡོད་བོད་ཀྱི་སྐད་ཡིག་དོ་སྣང་ཡོད་མཁན་དང། གཟའ་འཇུག་སློབ་གྲྭ་དགེ་རྒན་སོགས་འདུ་སྐོང་ཀྱིས་སློབ་གཞི་རྩ་འཛིན་བཟོ་རྒྱུའི་ཚོགས་འདུ་ཞིག་ཚོགས་ཡོད་པ་རེད། དེ་རྗེས་ཕྱི་ལོ་༢༠༡༢ལོ་ནས་སྔོན་འགྲོ་ནས་འཛིན་རིམ་བརྒྱད་པ་བར་དངོས་གཞིའི་བོད་ཡིག་སློབ་དེབ་རྩོམ་སྒྲིག་གནང་འགོ་བཙུགས་ཏེ་ཕྱི་ལོ་༢༠༡༤ལོའི་ཚོགས་འདུར་སྤྱི་མོས་ཀྱི་གྲོས་ཆོད་བྱུང་དོན་ལྟར། ༢༠༡༥ལོའི་ལོ་མཇུག་ལ་བོད་མིའི་སྒྲིག་འཛུགས་ཤེས་རིག་ལས་ཁུངས་སུ་བོད་ཡིག་སློབ་དེབ་ངོ་བཤུས་ཆ་ཚང་ཞིག་མཐའ་མའི་བསྐྱར་ཞིབ་དང་ཞུ་དག་སླད་ཕུལ་རྒྱུའི་གཏན་འབེབས་བཞིན་ཕུལ་ཡོད་པ་རེད། རྩ་བའི་ད་རེས་ཤེས་རིགས་ལས་ཁུངས་ཀྱིས་བསྐྱར་ཞིབ་དང་གཏན་འབེབས་ཟིན་པའི་གཟའ་མཇུག་སློབ་གྲྭའི་བོད་ཡིག་སློབ་དེབ་དེ་ས་གནས་རང་གི་སློབ་ཕྲུག་དང་སློབ་འཁྲིད་ཀྱི་དུས་ཡུན། དེ་བཞིན་གཟའ་འཇུག་སློབ་གྲྭའི་དགེ་རྒན་ཚོའི་ཉམས་མྱོང་ལ་གཞིགས་ཏེ་རྩོམ་སྒྲིག་ཞུས་པ་ཞིག་ཆགས་ཀྱི་འདུག་པ་དང་། སློབ་དེབ་དེའི་ནང་གི་སློབ་ཚན་ཁག་ཀྱང་སློབ་ཕྲུག་ཚོའོ་ཀློག་རྩལ་རང་ལ་དམིགས་ནས་ཆེད་སྒྲིག་གནང་པ་རེད་འདུག དེ་བཞིན་འདི་གའི་གསར་འགོད་པས་བྱང་ཨ་རིའི་གཟའ་མཇུག་སློབ་གྲྭའི་བོད་ཡིག་སློབ་དེབ་ཀྱི་རྩོམ་སྒྲིག་འགན་འཛིན་དཔལ་ལྡན་རྡོ་རྗེ་ལགས་སུ་བཅར་འདྲི་ཞུས་པར་ཁོང་གིས་ད་རེས་དབུ་འབྱེད་གནང་བའི་སློབ་དེབ་དེ་དག་ས་གནས་སློབ་ཕྲུག་ཚོར་དགོས་མཁོ་ལ་གཞིགས་པའི་ཁྱད་ཆོས་དམིགས་བསལ་ཞིག་ལྡན་ཡོད་ཀྱང་།  ད་དུང་ཡར་རྒྱས་གཏོང་དགོས་པ་ཡང་འདུག་ཅེས་གསུངས་ཀྱི་འདུག གཞི་རྩའི་ཤེས་རིག་་ལས་ཁུངས་དང་བྱང་ཨ་རི་སྐུ་ཚབ་དོན་གཅོད་མཉམ་འབྲེལ་གྱིས་སྔོན་འགྲོ་ནས་འཛིན་གྲྭ་བརྒྱད་པ་བར་གྱི་སློབ་དེབ་ཁག་རྩོམ་སྒྲིག་གནང་མུས་ཡིན་པ་དང་། དེ་རིང་སྲིད་སྐྱོང་མཆོག་གིས་སྔོན་འགྲོ་ནས་འཛིན་རིམ་གཉིས་པ་བར་གྱི་བོད་ཡིག་སློབ་དེབ་ཁག་རྩོམ་སྒྲིག་དང་ཞུ་དག་ལེགས་གྲུབ་ཟིན་པར་དབུ་འབྱེད་གནང་ཡོད།  

ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་རྒོལ་ཆེན་མོ་བྱུང་བའི་སྐབས་དཀར་མཛེས་རྫོང་ཐོག་ཏུ་རྒྱ་གཞུང་ལ་ངོ་རྒོལ་སྐད་འབོད་གནང་བའི་རྐྱེན་གྱིས་རྒྱ་གཞུང་ཉེན་རྟོག་པས་བཙུན་མ་ཡེ་ཤེས་ལྷ་སྒྲོན་ལགས་འཛིན་བཟུང་བྱས་རྗེས་དུས་ད་བར་གར་སོང་ཆ་མེད་དུ་གྱུར་སྟབས། ཁོང་གི་ནང་མི་ཚོས་ཁོང་འདས་གྲོངས་སུ་གྱུར་བར་ངོས་འཛིན་གྱིས་འདས་ཆོས་ཀྱང་གནང་བསྒྲུབས་འདུག དེ་ཡང་བཙན་བྱོལ་ནང་དུ་ཡོད་པའི་བཙུན་མ་ཡེ་ཤེས་ལྷག་སྒྲོན་ལགས་ཀྱི་སྤུན་མཆེད་སྐུ་ཞབས་པདྨ་དབང་རྒྱལ་ལགས་ཀྱིས་གསུངས་པར་ ཡེ་ཤེས་ལྷག་སྒྲོན་ལགས་ནས་ཕྱི་ལོ་ ༢༠༠༨ ལོའི་ཕྱི་ཟླ་ ༥ ཚེས་ ༢༨ ཉིན་གྱི་སྔ་དྲོར་ཁོང་གི་དགོན་པ་གཅིག་པའི་བཙུན་མ་སངས་རྒྱས་ལྷ་མོ་དང་ཚེ་དབང་མཁའ་འགྲོ་གཉིས་ཀྱི་ལྷན་དུ་དཀར་མཛེས་རྫོང་ཐོག་ཏུ་༸རྒྱལ་བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག བོད་ཀྱི་བདག་པོ་བོད་མི་ཡིན། བོད་ལ་འགྲོ་བ་མིའི་ཐོབ་ཐང་དགོས་སོགས་ཀྱི་འབོད་ཚིག་སྒྲོག་བཞིན་ཞི་རྒོལ་གནང་པ་དང་། བོད་དོན་དང་འབྲེལ་བའི་ཡིག་ཆ་འགྲེམ་སྤེལ་གནང་མ་ཐག་རྒྱ་གཞུང་ཉེན་རྟོག་པས་ཁོང་གསུམ་འཛིན་བཟུང་བཙན་ཁྲིད་བྱས་ཡོད་པ་རེད་འདུག དེ་རྗེས་ཁོང་གསུམ་ལ་དྲག་པོའི་འདྲི་རྩད་བྱས་མཐར་བཙུན་མ་གཞན་གཉིས་ལ་ལོ་གཉིས་རེ་བཙོན་འཇུག་ཁྲིམས་ཐག་བཅད་ནས་ལོ་ཤས་སྔོན་བཙོན་གྲོལ་བཏང་ཡོད་ཀྱང། ཡེ་ཤེས་ལྷ་སྒྲོན་ལགས་ཀྱི་སྐོར་ལ་ཞི་ཕྲའི་གནས་ཚུལ་གང་ཡིན་ཤེས་རྟོག་གང་ཡང་མེད་པར་གར་སོང་ཆ་མེད་དུ་གྱུར་འདུག་པ་དང་། ཡེ་ཤེས་ལྷག་སྒྲོན་ལགས་ཀྱི་ནང་མི་རྣམས་ནས་དུས་ཡུན་རིང་པོའི་ནང་ཐབས་ཤེས་ཡོད་དགུ་རྩལ་སྤྲུག་གིས་ཁོང་བཙུན་ཁང་གང་དུ་ཡོད་མེད་སོགས་ཀྱི་གནས་སྟངས་ཤེས་ཕྱིར་འབད་བརྩོན་གནང་ཡང་། ཡེ་ཤེས་ལྷག་སྒྲོན་ལགས་དང་གཞན་བཙུན་མ་གཉིས་བཅས་ཁོང་གསུམ་སྨན་བཅོས་སླད་སྨན་ཁང་དུ་སྐྱེལ་ཡོད་པའི་གནས་ཚུལ་ཙམ་ལས་ཞིབ་ཕྲའི་གནས་སྟངས་ཇི་ཆགས་སོགས་ཤེས་རྟོག་ཐབ་མེད་པས་ཁོང་གི་ནང་མི་ཚོས་ཁོང་འདས་གྲོངས་སུ་གྱུར་བར་ངོས་འཛིན་གྱིས་འདས་ཆོས་ཀྱང་གནང་བསྒྲུབས་འདུག  ཡེ་ཤེས་ལྷག་སྒྲོན་ལགས་ཀྱི་ནང་མི་རྣམས་ནས་ད་ཆ་ཁོང་ཤི་གསོན་གྱི་གནས་སྟངས་གང་ཡིན་རུང་ཁོང་གིས་གང་གནང་པ་དེ་དག་ནི་བོད་རྒྱལ་ཁབ་དང་མི་རིགས་ཀྱི་ཆེད་དུ་གནང་པའི་རླབས་ཆེན་གྱི་བྱེད་རྗེས་ཤིག་ལ་ངོས་འཛིན་གྱིས་བློ་ཕམ་དེ་ཙམ་གནང་གི་མེད་སྐོར་གསུངས་སོང་། རྩ་བའི་ཡེ་ཤེས་ལྷ་སྒྲོན་ལགས་ནི་བོད་ཁམས་དཀར་མཛེས་རྫོང་མདའ་མདོ་ཡུལ་ཚོའི་གཙོ་ཆུ་སྡེ་བ་ནས་ཡིན་པ་དང། ཕ་དངོས་གྲུབ་བསོད་གནམ་དང་མ་གཡུ་མཚོ་སྒྲོལ་མ་གཉིས་ཀྱི་བུ་མོ་ཡིན་ཞིང། ཁོང་གི་ཨ་ཁུ་ལགས་ཀྱི་མཚན་ལ་དངོས་གྲུབ་ ཕུན་ཚོགས་ཡིན་འདུག་པ་དང་།  ཁོང་དཀར་མཛེས་རྫོང་ནང་ཡོད་པའི་བྲགས་དཀར་བཙུན་དགོན་དུ་སློབ་གཉེར་གནང་འདུག ཤེས་རྟོགས་བྱུང་བར་གཞིགས་ན། ཁོང་གི་ཕ་དངོས་གྲུབ་བསོད་ནམས་ལགས་དེ་སྔོན་ཕྱི་ལོ་ ༢༠༠༠ ལོར་ལྷ་ས་ནས་རྒྱ་གཞུང་ཉེན་རྟོག་པས་འཛིན་བཟུང་བཙན་ཁྲིད་ཀྱིས་ཆབ་སྲིད་ཀྱི་ཉེས་མིང་འོག་ལྷ་སའི་གྲྭ་བཞི་བཙོན་ཁང་ནང་དུ་ལོ་གསུམ་རིང་དུས་བཀག་བཙོན་འཇུག་བྱས་མྱོང་ཡོད་པ་རེད་འདུག དེ་བཞིན་ཁོང་གི་ཨ་ཁུ་དངོས་གྲུབ་ཕུན་ཚོགས་ལགས་ཀྱང་ཕྱི་ལོ་ ༢༠༠༨ ལོར་དཀར་མཛེས་རྫོང་ཐོག་ཏུ་ངོ་རྒོལ་སྣེ་འཁྲིད་གནང་མཁན་གྱི་ཉེས་འཛུགས་འོག་ལོ་ ༨ རིང་བཙོན་འཇུག་གི་དུས་བཀག་ཚང་ནས་འདི་ལོའི་ཕྱི་ཟླ་ ༣ ཚེས་ ༢༠ ཉིན་བཙོན་གྲོལ་བཏང་འདུག ཡང་དེའི་བར་ན་བོད་ཁམས་སྡེ་དགེ་རྫོང་ཁོངས་ནས་ཡིན་པའི་བོད་མི་གཡུ་འབྲུག་ཉི་མ་ལགས་ལ་རྒྱ་གཞུང་ཉེན་རྟོག་པས་གཅར་རྡུང་དྲག་པོ་བཏང་སྟེ་དམར་བསད་བཏང་བའི་གནས་ཚུལ་ཞིག་ཐོན་འདུག དེ་ཡང་བཞུགས་སྒར་དུ་བཅའ་བཞུགས་སྐུ་ཞབས་བློ་བཟང་ཐུབ་བསྟན་ལགས་ཀྱིས་གསུངས་པར་ཟླ་འདིའི་ཕྱི་ཚེས་ ༢༠ འམ་ས་ག་ཟླ་བ་ཕྱི་མའི་ཚེས་ ༡༥ ཡས་མས་ཙམ་ཞིག་ལ་སྡེ་དགེ་རྫོང་རྫ་ཁོག་ཡུལ་ཚོ། ཟམ་ཁ་སྡེ་བའི་གཡུ་འབྲུག་ཉི་མ་ལགས་དབྱར་རྩ་དགུན་འབུ་བརྐོ་རུ་ཕྱིན་ཏེ་ར་ཁོག་ཡུལ་ཚོའི་ཕྱོགས་སུ་སླེབས་སྐབས། རྫོང་གི་ཉེན་རྟོག་པས་ཁོང་ལ་མེ་མདའ་ཡོད་ཚུལ་བརྗོད་ནས་ར་གོག་ཡུལ་ཚོའི་ནང་བཙན་འཁྲིད་ཀྱིས་གཅར་རྡུང་དྲག་པོ་བཏང་སྟབས། སྡེ་དགེ་རྫོང་ཐོག་ཏུ་འཁྲིད་པའི་ལམ་བར་ན་འདས་གྲོངས་སུ་ཕྱིན་ཡོད་ཚུལ་བརྗོད་དེ། ས་གནས་རྒྱ་གཞུང་ཉེན་རྟོག་པས་ཁོང་ལ་གཅར་རྡུང་བཏང་སྟེ་དམར་བསད་བཏང་ཡོད་པ་རེད་འདུག  རྩ་བའི་གཡུ་འབྲུག་ཉི་མ་ལགས་ཀྱི་ཕ་མིང་ལ་གཡང་དགའ་དང་མ་མིང་ལ་མགོ་གྲོད་ཟེར་གྱི་འདུག་པ་དང། ཁོང་ད་ལྟ་རང་ལོ་ ༤༠ ཙམ་རེད་འདུག གཞན་ཡང་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ནང་རྔ་བ་ནང་གི་ངོ་རྒོལ་སྐད་འབོད་ནང་མཉམ་ཞུགས་བྱེད་པའི་ཉེས་མིང་འོག་ཕྱི་ལོ་ ༢༠༡༡ ལོར་འཛིན་བཟུང་བྱས་པའི་བོད་མདོ་སྨད་རྔ་བ་ནས་ཀིརྟི་དགོན་པའི་ཚེ་རིང་ལགས་ཉེ་ཆར་ཟླ་བ་འདིའི་ཚེས་ ༢༤ ཉིན་ལོ་ལྔའི་བཙོན་འཇུག་དུས་ཡུན་ཚང་སྟེ་བཙོན་གྲོལ་བཏང་ཡོད་པ་རེད།  

ཉན་པ།: Listen ཕབ་ལེན། Download རྒྱ་གཞུང་གི་ཉེན་རྟོག་པས་པདྨ་ཚེ་བརྟན་ལགས་ལ་གཅར་རྡུང་བཏང་ནས་སྨན་ཁང་དུ་སྐྱེལ་འདུག དཀར་མཛེས་ནས་བཙུན་མ་ཞིག་༢༠༠༨ནས་གར་སོང་ཆ་མེད་དུ་གྱུར་འདུག ཤེས་ཡོན་སྲིད་བྱུས་ནང་བོད་ཡིག་ཙམ་མ་ཟད་དབྱིན་ཡིག་དེ་ཡང་ཚད་ལྡན་ཞིག་དགོས་པ་གསལ་ཡོད་གསུངས་པ། ༸གོང་ས་མཆོག་འདོད་རྒུ་གླིང་གཞིས་ཆགས་སུ་ཆིབས་སྒྱུར་བསྐྱང་རྒྱུ། བོད་ཀྱི་གཞོན་ནུ་ལྷན་ཚོགས་ནས་ཁེ་ན་ཌའི་གཞུང་དང་གྲོས་ཚོགས་ནས་རྒྱ་གཞུང་ལ་སྔར་ལྷག་གནོན་ཤུགས་སྤྲོད་དགོས་པའི་ཞུས་འདུག Wednesday 29/06/2016 Prominent Tibetan filmmaker Pema Tseten arrested Tibetan nun arrested in 2008 still missing, family holds death ritual 4th Education Council and Advisory Committee Meeting held in Dharamsala Dalai Lama to bestow ordination vows to Buddhist monks in Mundgod TYC urges Canadian MPs to strengthen support to Tibet

མདོ་སྨད་མཚོ་ལྷོ་ཁུལ་ནས་ཡིན་པའི་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་ལ་རྒྱ་གཞུང་གི་ཉེན་རྟོག་མི་སྣས་གཅར་རྡུང་བཏང་སྟེ་ཁོང་སྨན་ཁང་དུ་སྐྱེལ་འདུག དེ་རིང་ཕྱི་ནང་གི་བརྒྱུད་ལམ་ཁག་ནས་གནས་ཚུལ་ཐོན་པར། ཟླ་བ་འདིའི་ཕྱི་ཚེས་༢༥ཉིན་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་མཁའ་ལམ་བརྒྱུད་རྒྱ་ནག་གི་རྒྱལ་ས་པེ་ཅིང་ནས་བོད་གནའ་མཁར་ཟི་ལིང་གྲོང་ཁྱེར་དུ་བསྐྱོད་པའི་ཁྲོད། ཟི་ལིང་གནམ་ཐང་ནས་ཁོང་གི་ཅ་དངོས་གནམ་གྲུ་ནང་ལྷག་ཡོད་པ་ཤེས་ནས་ཕྱིར་ལེན་དུ་འགྲོ་སྐབས་ཉེན་རྟོག་པས་ཁོང་ལ་གནམ་ཐང་གི་སྒྲིག་གཞིར་གཏོར་བཤིག་བཏང་བའི་ཉེས་མིང་འོག་དེ་མ་ཐག་འཛིན་བཟུང་བྱས་པ་དང་། རྗེས་སུ་ཟི་ལིང་གི་བཀག་ཉར་ཁང་ཞིག་ཏུ་ཁོང་ལ་དྲི་རྩད་སྐབས་གཅར་རྡུང་བཏང་རྐྱེན་གཟུགས་གཞི་ཛ་དྲག་ཏུ་གྱུར་ནས་ཚེས་༢༧ཉིན་ཁུལ་དེའི་སྨན་ཁང་དུ་སྐྱེལ་འདུག དེ་རིང་ཚེས་༢༩ཉིན་ FDGC འམ་རྒྱ་ནག་གི་གློག་བརྙན་འཁྲབ་ཁྲིད་པའི་མཐུན་ཚོགས་ནས་ཚོགས་པ་དེ་གའི་ཚོགས་མི་ཡིན་པ་པདྨ་ཚེ་བརྟན་ལགས་འཛིན་བཟུང་བྱས་པའི་གནད་དོན་ཐོག་ཐུགས་འཚབ་དང་སྦྲགས། ཉེན་རྟོག་པས་ཁོང་ལ་དྲག་ཐབས་བེད་སྤྱོད་བྱས་ཏེ་གནམ་ཐང་ནས་བཙན་ཁྲིད་བྱ་དགོས་དོན་དུས་ཡུན་ངེས་ཅན་ནང་ལན་ཁ་གསལ་ཤོད་དགོས་པ་གསུངས་འདུག་པ་མ་ཟད། མཐུན་ཚོགས་དེ་ནས་པདྨ་ཚེ་བརྟན་ལགས་ཀྱི་གཟུགས་གཞི་གནས་སྟངས་དེ་ཙམ་ཡག་པོ་མེད་པ་འགྲེལ་བརྗོད་དང་འབྲེལ་ཁོང་གི་གནད་དོན་ཐོག་འོས་འགན་ཡོད་པ་ལྟར་དོ་སྣང་ཆེན་པོ་བྱེད་ནས་ལྟ་བཞིན་ཡོད་ཅེས་གསུངས་འདུག པསྨ་ཚེ་བརྟན་ལགས་དང་འདྲིས་ཆེ་བའི་གློག་བརྙན་བཟོ་སྐྲུན་པ་ཟོན་ཐར་རྒྱལ་ལགས་ནས་ཀྱང་དེ་རིང་twitter དྲྭ་ཚིགས་ཐོག་མང་ཚོགས་ནས་པདྨ་ཚེ་བརྟན་ལགས་ཀྱི་གནད་དོན་ཐོག་ལ་སེམས་འཚབ་གནང་བཞིན་པར་ཐུགས་རྗ་ཆེ་གསུངས་པ་དང་ཆབས་ཅིག པདྨ་ཚེ་བརྟན་ལགས་ཁྲག་ཤེད་ཏོག་ཙམ་འཕར་ཡོད་པ་ལས་གཞན་གནས་སྟངས་ཛ་དྲག་ཆེན་པོ་མེད་པ་འགྲེལ་བརྗོད་གནང་འདུག རྩ་བའི་བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ནི་མདོ་སྨད་མཚོ་སྔོན་ཞིང་ཆེན་མཚོ་ལྷོ་ཁུལ་དུ་འཁྲུངས་ཤིང་། ཁོང་གིས་རྩོམ་རིག་རབ་འབྱམས་པའི་སློབ་སྦྱོང་ཐོན་རྗེས་རིམ་གྱིས་རྒྱ་ནག་ནུབ་བྱང་མི་རིགས་སློབ་གྲྭ་ཆེན་མོའི་ཐོན་པ་དང་། དེ་རྗེས་མཚོ་ལྷོ་ཁུལ་སྲིད་གཞུང་དུ་ཕྱག་ལས་གནང་འདུག ༢༠༠༢ནས་༢༠༠༤བར་ལ་པེ་ཅིང་གློག་བརྙན་སློབ་གླིང་དུ་གློག་བརྙན་བཟོ་སྒྲིག་གི་སློབ་གཉེར་གནང་རྗེས། རིམ་པས་རྒྱ་ནག་གི་འཁྲབ་ཁྲིད་པའི་མཐུན་ཚོགས་ཀྱི་ཚོགས་མི་དང། རྒྱ་ནག་གློག་བརྙན་མཁན་མཐུན་ཚོགས་དང་གློག་བརྙན་རྩོམ་རིག་རིག་པའི་མཐུན་ཚོགས་ཀྱི་ཚོགས་མིའི་ཁོངས་སུ་ཞུགས་འདུག པདྨ་ཚེ་བརྟན་ལགས་ནས་༢༠༠༣ནས་འགོ་བཙུགས་ཀྱིས་གློག་བརྙན་ཐོག་མར་ <ལྷིང་འཇགས་ཀྱི་མི་ཎི་རྡོ་འབུམ་>དང་། དེ་རྗེས་<རྩྭ་ཐང་>དང་། <ཁྱིན་རྒན།> དེ་བཞིན་<འཚོལ་>དང་<ཐར་ལོ་>སོགས་དུས་ཐུང་གློག་བརྙན་ཁག་ཅིག་བཟོས་ཡོད་པ་རེད། ཁོང་གིས་གློག་བརྙན་དེ་དག་ལས་ལྷིང་འཇགས་ཀྱི་མ་ཎི་རྡོ་འབུམ་ཞེས་པའི་གློག་བརྙན་ལ་རྒྱ་ནག་ནང་གི་བྱ་དགའ་མང་དག་ཅིག་ཡོད་པ་མ་ཟད། ཀོ་རི་ཡའི་ནང་ཚོགས་པའི་ཡ་ཞི་ཡའི་རྒྱལ་སྤྱིའི་གློག་བརྙན་དུས་ཆེན་སྐབས་གཉིས་པ་དང་། ༢༠༠༥ལོར་ཁེ་ན་ཌའི་གྲོང་ཁྱེར་ཝེན་ཀོ་ཝར་རྒྱལ་སྤྱིའི་གློག་བརྙན་དུས་ཆེན་སྐབས་༢༤པའི་སྟེང་སྟག་འབྲུག་ཞེས་པའི་དམིགས་བསལ་ཆེ་བསྟོད་བྱ་དགའ་སོགས་ཐོབ་ཡོད་པ་རེད། པདྨ་ཚེ་བརྟན་ལགས་ཀྱིས་༢༠༠༤ལོར་བཟོ་སྐྲུན་གནང་པའི་རྩྭ་ཐང་ཞེས་པའི་གློག་བརྙན་དེ་ནི་ད་དབར་ཧྥ་རན་སི་དང་ཉི་ཧོང་། དེ་བཞིན་ཨུ་རུ་སུ་དང་ཀོ་རི་ཡ། ཧོ་ལེནཊ་རྒྱལ་ཁབ་སོགས་སུ་ཚོགས་པའི་རྒྱལ་སྤྱིའི་གློག་བརྙན་དུས་ཆེན་མང་དག་གི་འགྲེམས་སྟོན་ཐོག་ཚུད་ཡོད་པ་རེད། པདྨ་ཚེ་བརྟན་ལགས་ནི་ད་ལྟར་རང་ལོ་ ༤༧ ལ་སོན་པའི་བོད་པའི་ཕུལ་བྱུང་གློག་བརྙན་བསྒྱུར་སྒྲིག་དང་འཁྲབ་ཁྲིད་མཁན་ཞིག་ཙམ་མ་ཟད། ཁོང་ནི་དེང་རབས་བོད་ཀྱི་གཞོན་སྐྱེས་ཤེས་ལྡན་ཞིག་སྟེ། ༡༩༩༡ལོ་ནས་བཟུང་རྩོམ་རིག་བརྩམས་ཆོས་ཀྱི་ལས་སུ་ཞུགས་ནས་བོད་ཡིག་དང་རྒྱ་ཡིག་གི་ལམ་ནས་བརྩམས་སྒྲུང་རིང་ཐུང་མང་དག་ཅིག་བྲིས་འདུག་པས་དེ་དག་ནང་ནས་ཁག་ཅིག་དབྱིན་སྐད་དང་ཧྥ་རན་སིའི་སྐད། དེ་བཞིན་འཇར་མན་སོགས་སུ་བསྒྱུར་ཡོད་པ་མ་ཟད། བརྩམས་ཆོས་ཁག་ཅིག་ལ་བོད་ཀྱི་སྦྲང་ཆར་རྩོམ་རིག་གི་བྱ་དགའ་དང། མཚོ་སྔོན་ཞིང་ཆེན་གྱི་སྐབས་བཞི་པའི་རིག་རྩལ་གསར་རྩོམ་གྱི་བྱ་དགའ་སོགས་ཕུལ་བྱུང་བྱ་དགའ་ཡང་ཐོབ་མྱོང་ཡོད་པ་རེད་འདུག  

ཉན་པ།: Listen ཕབ་ལེན། Download སེར་རྟ་ནས་བེུད་གཅིག་འཛིན་བཟུང་། ༸གོང་ས་མཆོག་དང་མཇལ་མོལ་ཞུས་རྐྱེན་གཞས་མ་གཱ་གཱ་རྒྱ་ནག་ནང་བཀག་སྡོམ། དབྱིན་ཡུལ་གཞུང་ནས་རྒྱ་ནག་གི་འབྲེལ་ལམ་ཐོག་བསྐྱར་ཞིབ་དགོས་པ་གསུངས་འདུག ༸གོང་ས་མཆོག་ལ་དྭགས་སུ་ཆིབས་སྒྱུར་བསྐྱང་རྒྱུ། སྐབས་༡༦ སྤྱི་འཐུས་རྣམ་པས་འཚམས་གཟིགས་དང་པོ་དབུ་འཛུགས་གནང་འཆར། གླུ་གཞས་ལེ་ཚན། ༸གོང་ས་མཆོག་ཐུགས་རྗེ་ཆེ་དང་ལྷ་སའི་བུ་མོ། Tuesday 28/06/2016 Tibetan woman arrested in Serta, detained up to 10 days China bans Lady Gaga after Dalai Lama meet UK should rethink China friendship over human rights, Tory group urges Dalai Lama to visit Ladakh in August 16th Tibetan Parliament to begin official visits to Tibetan settlements MUSIC FEATURE: ‘Thank You Your Holiness and Lhasae Bhumo’ by LP Tawo and Nelung Tobden

བོད་ཀྱི་བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་༡༣ ནས་ཨ་རིའི་རྒྱལ་ས་ Washington DC གཙོས་Utah དང་ California དེ་བཞིན་Colorado མངའ་སྡེ་བཅས་སུ་མང་ཚོགས་ལ་བཀའ་སློབ་དང་ཆོས་འབྲེལ་བཀྲིན་བསྩལ་བ་དུས་མཚུངས། ཨ་རིའི་སྲིད་འཛིན་ Obama མཆོག་གིས་དབུས་པའི་གྲོས་ཚོགས་འཐུས་མི་དང་། གྲོང་ཁྱེར་གྱི་སྲིད་སྐྱོང་སོགས་དང་མཇལ་འཕྲད་ཀྱིས་མཛད་འཕྲིན་ཁག་ཅིག་གྲུབ་རྗེས། ཁ་སང་མགོན་པོ་༸གང་ཉིད་མཆོག་ནས་ཨ་མི་རི་ཀའི་ Indiana མངའ་སྡེའི་རྒྱལ་ས་ Indianapolis ནང་ཚོགས་པའི་ཨ་མི་རི་ཀའི་གྲོང་སྡེ་སྤྱི་ཁྱབ་པའི་ཚོགས་ཆེན་ཐེངས་༨༤ པའི་ཐོག་དབུ་བཞུགས་མཛད་པ་མ་ཟད། གྲོང་ཁྱེར་སྤྱི་ཁྱབ་ཉིས་བརྒྱ་ལྷག་ལ་བྱམས་བརྩེ་ལྡན་པའི་གྲོང་ཁྱེར་བསྐྲུན་ཐབས་ཞེས་པའི་བརྗོད་གཞི་ཐོག་བཀའ་སློབ་བཀའ་དྲིན་སྩལ་འདུག ཚོགས་ཆེན་དེའི་ཐོག་༸གོང་ས་སྐྱབས་མགོན་ཆེན་པོ་མཆོག་གིས་ཨ་རི་ནི་འཛམ་གླིང་སྟེང་གི་རང་དབང་དང་མང་གཙོ། དེ་བཞིན་འདྲ་མཉམ་སོགས་ལ་བརྩི་སྲུང་གནང་མཁན་གྱི་རྒྱལ་ཁབ་གཙོ་གྲས་ཤིག་ཏུ་ངོས་འཛིན་གནང་བཞིན་ཡོད་སྐོར་བཀའ་སྩལ་དང་འབྲེལ། ད་བར་ཨ་རིའི་ངོས་ནས་རྒྱལ་སྤྱིའི་ཐོག་འཕྲུལ་ཆས་སོགས་ཕྱི་དངོས་པོའི་རིག་གནས་ཐོག་ཞབས་འདེགས་རླབས་ཆེན་སྒྲུབ་ཡོད་པ་ལྟར། མ་འོངས་འཛམ་གླིང་དེ་བཞིན་བྱམས་བརྩེ་ལྡན་པ་ཞིག་ཏུ་བསྐྲུན་ཆེད་ཨ་རིས་ངེས་པར་དུ་སྣེ་འཁྲིད་གནང་རྒྱུའི་འགན་ཡོད་བཀའ་སྩལ་འདུག ལྷག་པར་དུ་ཁ་སང་གི་མཛད་འཆར་དེའི་ཁྲོད་༸གོང་ས་མཆོག་གིས་རྒྱལ་སྤྱིའི་མང་ཚོགས་ས་ཡ་མང་པོས་དགའ་མོས་ཞུ་ཡུལ་ཨ་རིའི་གཞས་མ་གྲགས་ཅན་Lady Gaga ལགས་དང་མཇལ་འཕྲད་དང་དྲི་བ་དྲི་ལན་གྱི་མཛད་རིམ་ཞིག་ཀྱང་གནང་འདུག