ཟླ་བ་ ༡༠ ནས་འགོ་བཙུགས་ཀྱིས་བོད་ཀྱི་ཡུལ་སྲོལ་གོམས་གཤིས་དང་རིག་གཞུང་མཚོན་པར་བྱེད་པའི་འགྲེམས་སྟོན་ཞིག་ཨ་རིའི་ས་གནས་ Berkeley ནས་སྒོ་འབྱེད་བྱས་ཏེ་ལོ་རྗེས་མའི་ཟླ་བ་ལྔ་པའི་བར་དུ་འགྲེམས་སྟོན་བྱེད་རྒྱུ་རེད།
East Bay Express གསར་ཤོག་ཐོག་གནས་ཚུལ་ཐོན་པ་ལྟར་ན། མཐའ་ཡས་པ་ཞེས་པའི་ཐེངས་འདིའི་འགྲེམས་སྟོན་ཐོག བོད་ཀྱི་སྒྱུ་རྩལ་བ་བསྟན་འཛིན་རིག་གྲོལ་ལགས་ཀྱིས་གཙོ་བྱས་པའི་ཐོག་ནས་བོད་རིགས་སྒྱུ་རྩལ་བ་མང་པོ་ཞིག་གིས་སོ་སོས་བརྩམས་ཆོས་ཁག་བཤམ་སྟོན་བྱས་ཡོད་པ་དང་། ཐེངས་འདིའི་འགྲེམས་སྟོན་དེ་ནི་བོད་ཀྱི་དེང་རབས་སྒྱུ་རྩལ་བ་དག་གི་གོམས་སྟབས་ཆེན་པོ་ཞིག་རེད་ཅེས་བརྗོད་འདུག
ཐེངས་འདིའི་འགྲེམ་སྟོན་གྱི་ནང་དུ་ལོ་རབས་༨༠ ནས་བཟུང་ཕྱོགས་བསྡུས་བྱས་པའི་བརྩམས་ཆོས་ཁག་མང་པོ་ཞིག་ཡོད་པ་དང་། དེ་དག་ནི་རི་མོའི་སྒྱུ་རྩལ། བརྙན་དང་སྒྲ་རིགས། པར་རིས་སོགས་མང་པོ་ཞིག་བརྒྱུད་ནས་མི་རིགས་ཀྱི་ངོ་བོ་དང་ཆོས་ལུགས་མཚོན་པར་བྱས་ཡོད་པ་མ་ཟད། བརྩམས་ཆོས་ཁག་ཅིག་གིས་ཆབ་སྲིད་ཀྱི་གནད་དོན་མཚོན་པར་བྱེད་པའི་གཞིས་བཞུགས་བོད་མའི་རང་ལུས་མེར་སྲེག་གི་སྐོར་དང་། དེ་བཞིན་ཡུལ་གྱར་སོགས་ཀྱང་མངོན་པར་བྱས་འདུག
རྩ་བའི་ས་གནས་ Berkeley ཡི་འགྲེམས་སྟོན་ཁང་དེར་དུས་རབས་༡༢ དང་༡༩ བར་གྱི་བོད་ཀྱི་ཅ་དངོས་རིགས་ཕྱོགས་བསྡུས་བྱས་ཡོད་པ་བཞིན། འགྲེམ་སྟོན་དེ་བརྒྱུད་ནས་བོད་དོན་ལ་དོ་སྣང་བྱེད་མཁན་མང་པོ་བྱུང་བཞིན་ཡོད་པར་འགྲེལ་བརྗོད་བྱས་པ་དང་སྦྲགས། བོད་རིགས་སྒྱུ་རྩལ་བ་ཆུང་པོ་ཚེ་རིང་ཟེར་བ་ཞིག་གིས་ཀྱང་། ཕྱི་ལོ་ ༢༠༠༨ ལོར་རྒྱ་ནག་གི་ཨོ་རྩལ་འགྲན་བསྡུར་བྱས་པར་བརྟེན། རྒྱལ་སྤྱི་རང་བཞིན་གྱི་གར་སྟེགས་ཤིག་ཁྲོད། སྒྱུ་རྩལ་བ་མང་དག་ཅིག་གིས་རྒྱ་ནག་གིས་བོད་ས་བཙན་བཟུང་བྱས་པའི་གནས་ཚུལ་དེ་གླེང་སློང་ཤུགས་ཆེར་བྱེད་བཞིན་ཡོད་པར་བརྗོད་འདུག
སྐབས་དེར་ཚེ་རིང་གིས་སོལ་བ་ཡིས་བྲིས་པའི་སྒྱུ་རྩལ་རི་མོ་ཞིག་བཤམ་སྟོན་བྱས་ཡོད་པ་དང་། ཁོང་གི་བརྩམས་ཆོས་དེའི་མིང་ལ་འཚེ་མེད་ཞི་བ་བཏགས་ཏེ་བོད་ནང་གི་རང་ལུས་མེང་བསྲེགས་ཀྱི་འཐབ་རྩོད་མཚོན་པར་བྱས་འདུག གཞན་ཡང་ཕྷ་རན་སིར་གནས་བཞུགས་བུད་མེད་སྒྱུ་རྩལ་བ་སྒྲོལ་མ་ཆོས་འཕེལ་ལགས་དང་གཞིས་བཞུགས་སྒྱུ་རྩལ་བ་བདེ་སྒྲོན་ལགས་རྣམ་གཉིས་ཀྱང་འགྲེམས་སྟོན་དེར་མཉམ་ཞུགས་ཀྱིས་རང་རང་བརྩམས་ཆོས་འགྲེམས་སྟོན་བྱས་འདུག
དེ་བཞིན་སྒྱུ་རྩལ་བ་བསྟན་འཛིན་རིག་གྲོལ་གྱིས་ཀྱང་རང་ལུས་མེར་བསྲེགས་ཀྱི་མཚོན་པར་བྱེད་པའི་རི་མོ་ཞིག་འགྲེམས་སྟོན་བྱས་པ་དང་འབྲེལ་ནས། ཁོང་གིས་སྣང་བ་སྐྱིད་པོ་བྱེད་པ་ནི་དྲི་བ་ཡོད་ཚད་བརྗེད་དུ་འཇུག་སྤྱད་དེ་ཡིན་པ་དང་། སྒྱུ་རྩལ་གྱིས་ནི་དྲི་བ་ཡོད་ཚད་དྲན་དུ་འཇུག་ངེས་བ་ཞིག་ཡིན་པར་བརྗོད་དེ། རང་ལུས་མེར་བསྲེགས་ཀྱི་དོན་རྐྱེན་དེ་ནི་ནམ་ཡང་ཁོང་གིས་བརྗེད་དུ་མེད་པའི་དོན་རྐྱེན་ཞིག་ཡིན་པར་འགྲེལ་བརྗོད་བྱས་འདུག