སྲིད་སྐྱོང་མཇལ་འཕྲད་ཀྱི་གནད་དོན་རྐྱེན་པས་རྒྱ་གཞུང་གིས་པྲརགྷ་ཡི་རིག་གཞུང་འཁྲབ་སྟོན་ལས་རིམ་བཀག་སྡོམ།

ཉེ་ཆར་ཕྱི་ཟླ་ ༣ པའི་ཟླ་མགོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ Czech སྤྱི་མཐུན་རྒྱལ་ཁབ་ཀྱི་རྒྱལ་ས་ Prague ནང་གཞུང་འབྲེལ་ཕྱོགས་ཕེབས་སྐབས་ཅེཀ་སྤྱི་མཐུན་རྒྱལ་ཁབ་ཀྱི་ Pirate ཆབ་སྲིད་ཚོགས་པའི་ཚོགས་མི་དང་ Prague གྲོང་ཁྱེར་སྤྱི་ཁྱབ་སྐུ་ཞབས་ Zdenek Hrib མཆོག་གིས་སྲིད་སྐྱོང་མཆོག་གྲོང་ཁྱེར་དེར་ཕེབས་པར་དགའ་བསུའི་སྣེ་ལེན་གནང་བ་མ་ཟད། སྲིད་སྐྱོང་མཆོག་ལ་ཆེ་བསྟོད་མཚོན་ཆེད་ Prague གྲོང་ཁྱེར་གྱི་ལྡེ་མིག་ཞིག་གནང་ཡོད་པ་ལྟར། རྒྱ་ནག་གཞུང་གིས་པྲརགྷ་སྤྱི་ཁྱབ་མཆོག་གི་གནང་ཕྱོགས་ལ་དགག་པ་དང་འབྲེལ། པྲརགྷ་ནང་གི་ Philharmonic Orchestra གཙོས་པའི་ཅེཀ་སྤྱི་མཐུན་རྒྱལ་ཁབ་ཀྱི་རིག་གཞུང་འཁྲབ་སྟོན་ལས་རིམ་ཁག་ལ་བཀག་སྡོམ་བྱས་འདུག

ཁ་སང་ European Interest དྲྭ་གནས་ཐོག་གནས་ཚུལ་སྤེལ་བར་ Prague གྲོང་ཁྱེར་སྤྱི་ཁྱབ་སྐུ་ཞབས་  Zdenek Hrib མཆོག་གིས་ཕྱི་ཟླ་ ༣ པའི་ཟླ་མགོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ Czech སྤྱི་མཐུན་རྒྱལ་ཁབ་ཀྱི་རྒྱལ་ས་ Prague ནང་གཞུང་འབྲེལ་ཕྱོགས་ཕེབས་སྐབས་དགའ་བསུའི་སྣེ་ལེན་གནང་བ་མ་ཟད་ཆེ་བསྟོད་མཚོན་ཆེད་ Prague གྲོང་ཁྱེར་གྱི་ལྡེ་མིག་ཞིག་ཕྱག་རྟགས་སུ་གནང་བ་དང་། དེ་བཞིན་ཟླ་བ་གཅིག་གི་སྔོན་ལ་ཐེ་ཝན་ནང་གཞུང་འབྲེལ་ཕྱོགས་སྐྱོད་ཕེབས་ཡོད་པ་རེད།ལྷག་དོན་རིང་མིན་ཕྱི་ཟླ་དགུ་པ་དང་བཅུ་པའི་ནང་རྒྱ་ནག་ཏུ་སྐོར་སྐྱོད་གནང་གཏན་ཁེལ་བའི་ Prague ཡི་ Philharmonic འཁྲབ་སྟོན་རུ་ཁག་ནང་ཐེ་ཝན་གྱི་མི་སེར་གཅིག་ཡོད་པ་དེ་རྒྱ་ནག་གཞུང་གིས་བཀོད་ཁྱབ་ལྟར་ཕྱིར་འཐེན་མ་གནང་སྟབས་རྒྱ་གཞུང་གིས་གོང་དུ་བརྗོད་པའི་ Prague རིག་གཞུང་འཁྲབ་སྟོན་རུ་ཁག་གཙོས་པའི་ཅེཀ་སྤྱི་མཐུན་རྒྱལ་ཁབ་ཀྱི་རིག་གཞུང་འཁྲབ་སྟོན་ལས་རིམ་རྣམས་བཀག་སྡོམས་བྱས་ཡོད་པ་རེད།

ཡུ་རོབ་གྲོས་ཚོགས་ཀྱི་འོས་བསྡུའི་ནང་ Pirate ཆབ་སྲིད་ཚོགས་པའི་འོས་མི་ཡིན་པ་དང་། ཁྲིམས་སྒྲིག་མཁས་པ་དང་ཁྲིམས་རྩོད་པ་སྐུ་ཞབས་ Lukar Lev Cervinka ལགས་ཀྱིས་ང་ཚོའི་ངོས་ནས་ Czech སྲིད་གཞུང་ལ་དངུལ་ལས་མི་གལ་ཆེ་བ་ཡིན་པའི་བརྡ་ལན་དེ་སྤྲད་པ་དང་སྦྲགས། ང་ཚོས་རང་གི་འགྲོ་བ་མིའི་ཐོབ་ཐང་རྩོད་མཁན་རྣམས་ལ་རྒྱབ་སྐྱོར་ཞུ་རྒྱུ་ཡིན་པ་དང་། འཛམ་གླིང་ས་ཕྱོགས་གང་སར་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་གནས་ཚུལ་གང་ཞིག་བྱུང་ཡང་དེར་དོ་སྣང་ཤུགས་ཆེན་པོ་བྱེད་ཀྱི་ཡིན་ཞེས་གསུངས་འདུག

དེ་བཞིན་ཁ་སང་ TaiwanNews ཀྱིས་གནས་ཚུལ་སྤེལ་བར་པྲརགྷ་སྤྱི་ཁྱབ་སྐུ་ཞབས་  Zdenek Hrib མཆོག་གིས་རྒྱ་ནག་གཞུང་གིས་བྱེད་ཕྱོགས་ལ་དགག་ལན་དང་འབྲེལ། གལ་ཏེ་རྒྱ་ནག་གཞུང་གིས་ Prague ཡི་རིག་གཞུང་འཁྲབ་སྟོན་རུ་ཁག་ལ་རྒྱ་ནག་ནང་གཟིགས་འབུལ་ཞུ་རྒྱུར་བཀག་སྡོམ་བྱས་ཡོད་སྟབས་རིག་གཞུང་འཁྲབ་སྟོན་གྱི་སྐོར་སྐྱོད་དེ་ Taiwan གཙོས་པའི་རྒྱལ་ཁབ་གཞན་ཁག་ཏུ་གནང་རྒྱུའི་ཐག་གཅོད་གནང་འདུག

རྩ་བའི་ Czech སྤྱི་མཐུན་རྒྱལ་ཁབ་ཀྱིས་ད་བར་རྒྱ་ནག་གི་རྒྱུད་གཅིག་ལམ་གཅིག་གི་མཉམ་འབྲེལ་ལས་གཞིའི་ནང་ཞུགས་མེད་ཀྱང་། དཔྱད་ཞིབ་པ་རྣམས་ཀྱིས་ཅེཀ་གཞུང་འཛིན་པ་རྣམས་ནས་རྒྱ་ནག་དང་མཉམ་དུ་འབྲེལ་ལམ་ཡར་རྒྱས་གནང་བ་དང་འབྲེལ། རྒྱ་ནག་དང་མཉམ་འབྲེལ་ལས་གཞིར་ཞུགས་རྒྱུའི་ཐག་གཅོད་ཀྱི་ཕྱོགས་སུ་སྐྱོད་བཞིན་ཡོད་སྐོར་གསུང་མཁན་མང་དག་ཅིག་བྱུང་ཡོད་པ་རེད། དེའི་ཁྲོད་སྐུ་ཞབས་ Zdenek Hrib མཆོག་སྔ་ལོའི་ཕྱི་ཟླ་ ༡༡ ནང་ Prague གྲོང་ཁྱེར་སྤྱི་ཁྱབ་དུ་བསྐོ་གཞག་གནང་བ་ནས་བཟུང་ཁོང་གིས་བོད་མིའི་དབུ་ཁྲིད་ལ་ཕེབས་བསུ་སྣེ་ལེན་དང་མཇལ་འཕྲད་གནང་བ་མ་ཟད། ཐེ་ཝེན་ནང་ཕེབས་ཡོད་པ་དང་། དེ་བཞིན་ཟླ་བ་སྔོན་མའི་ནང་རྒྱ་གཞུང་གི་བཙོན་འཇུག་འོག་ཡུན་རིང་བཞུགས་མྱོང་ཡོད་མཁན་ནོ་སྦེལ་ཞི་བདེའི་གཟེངས་རྟགས་བཞེས་མཁན་སྐུ་ཞབས་ Liu Xiaobo ལགས་དམ་པ་དེ་ཉིད་ཀྱི་སྐུ་བརྙན་ཞིག་ Prague ནང་གི་སྒྱུ་རྩལ་ཁང་དུ་རྒྱ་ནག་གི་གནམ་སྡེ་སྒོར་མོ་ཆེ་ཐང་ཆེན་གི་དོན་རྐྱེན་བྱུང་ནས་ལོ་ངོ་ ༣༠ འཁོར་བའི་དུས་དྲན་སྲུང་བརྩི་དང་འབྲེལ་ཏེ་གཟིགས་འབུལ་ཞུས་པ་སོགས་ཀྱི་ཐོག་ནས་རྒྱ་ནག་གི་བཙན་དབང་ལ་མངོན་གསལ་དོད་པོས་གདོང་ལེན་གནང་ཡོད།