དེ་རིང་ཟླ་ ༡༠ ཚེས་ ༡༨ ཉིན་སྔ་དྲོ་ཚོུད་ ༡༠༌༣༠ ཐོག་བཞུགས་སྒར་དུ་རྟེན་གཞི་བྱས་པའི་བོད་ཀྱི་རྒྱལ་ཡོངས་མང་གཙོ་ཚོགས་པའི་ལས་ཁུངས་སུ་ཉེ་ལམ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ཐོག་བསྐྱར་བཅོས་གཏན་འབེབས་གནང་བའི་བཙན་བྱོལ་བོད་མིའོ་འོས་བསྡུའི་སྒྲིག་གཞི་གསར་པའི་གནད་དོན་ཁག་ཅིག་དང་འབྲེལ་གསར་འགོད་ལྷན་ཚོགས་ཤིག་གནང་ཡོད་པ་དང་། སྐབས་དེར་ཚོགས་པ་དེས་སྲིད་དོན་ཚོགས་པ་མེད་པའི་ད་ཡོད་བཙན་བྱོལ་བོད་མིའི་གྲོས་ཚོགས་ཀྱི་ལམ་ལུགས་འདི་བཞིན་སྲིད་དོན་ཚོགས་པ་ལྡན་པའི་ལམ་ལུགས་ཐོག་འགྲོ་རྒྱུར་འབད་རྩོན་མུ་མཐུད་བྱེད་ཀྱི་ཡིན་ཞེས་གསུངས་སོང་།ཐོག་མར་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས་ཀྱིས་ཐེངས་འདིའི་གསར་འགོད་ལྷན་ཚོགས་ཀྱི་བསྒྲགས་གཏམ་སྒྲོག་ལྗང་གནང་བ་དང་འབྲེལ། ཚོགས་པ་དེ་ཐོག་མར་ཕྱི་ལོ་༡༩༩༠ ཟླ་ ༩ ཚེས་ ༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༢༡ པའི་ཚོགས་བཅར་བར་མང་གཙོའི་སྤྱི་ཚོགས་ནང་ཆབ་སྲིད་ལྟ་བ་འདྲ་མིན་ཡོད་པའི་ཚོགས་པ་ཟུར་འཛུགས་ཐུབ་མིན་གོ་སྡུར་དགོས་པའི་བཀའ་སློབ་ཕེབས་དོན་ལྟར། ཕྱི་ལོ་ ༡༩༩༤ ལོར་དངོས་སུ་དབུ་བརྙེས་པའི་བཙན་བྱོལ་བོད་མིའི་ཆབ་སྲིད་ཀྱི་ཚོགས་པ་གཅིག་པོ་དེ་ཡིན་པ་མ་ཟད། ཚོགས་པ་དེས་འདས་པའི་ལོ་དུས་ནང་ཆབ་སྲིད་དང་མང་གཙོ་གོ་རྟོགས་སོགས་ཀྱི་ཐད་ལ་ཕྱག་ལས་གནང་བར་བཙན་བྱོལ་བོད་མིའི་མང་ཚོགས་ནས་གདེང་འཇོག་ཆེན་པོ་ཐོབ་ཡོད་པ་སོགས་འགྲེལ་བརྗོད་དང་སྦྲགས། འོས་བསྡུའི་བརྒྱུད་རིམ་ཁྲོད་ནང་ཁུལ་ཆོལ་ཁ་དང་ཤོག་ཁག་འཐེན་འཁྱེར་གྱིས་གླེང་རྙོག་རིགས་ལ་བོད་ཀྱི་རྒྱལ་ཡོངས་མང་གཙོ་ཚོགས་པ་དང་དངོས་ཤུགས་བརྒྱུད་གསུམ་ནས་འབྲེལ་བ་རྩ་བ་ནས་མེད་པའི་དོན་ཚན་དྲུག་ཆེད་བཀོད་ཀྱིས་གསུངས་ཡོད།སྐབས་དེར་དོན་ཚན་དེ་དག་དང་འབྲེལ་ཕྱི་ནང་གི་གསར་འགོད་པས་བཀའ་འདྲི་ཁག་ཅིག་ཞུས་པར་བཙན་བྱོལ་བོད་མིའི་འོས་བསྡུའི་བརྒྱུད་རིམ་ཁྲོད་ལུང་ཚན་དང་ཤོག་ཁག་གི་གླེང་རྙོག་རིགས་བྱུང་བ་དེ་ནི་བཙན་བྱོལ་བོད་མིའི་ཆབ་སྲིད་ཀྱི་ལམ་ལུགས་ཁྲོད་སྲིད་དོན་ཚོགས་པ་མེད་རྐྱེན་བྱུང་བ་ཞིག་ཡིན་པར་འགྲེལ་བརྗོད་དང་སྦྲགས། བོད་ཀྱི་རྒྱལ་ཡོངས་མང་གཙོ་ཚོགས་པའི་ངོས་ནས་སྲིད་དོན་ཚོགས་པ་མེད་པའི་ད་ཡོད་བཙན་བྱོལ་བོད་མིའི་གྲོས་ཚོགས་ཀྱི་ལམ་ལུགས་འདི་བཞིན་སྲིད་དོན་ཚོགས་པ་ལྡན་པའི་ལམ་ལུགས་ཐོག་འགྲོ་རྒྱུར་འབད་རྩོན་མུ་མཐུད་ཞུ་ངེས་ཡིན་ཞེས་གསུངས་ཡོད།
དེ་བཞིན་ཉེ་ལམ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ཐོག་བསྐྱར་བཅོས་གཏན་འབེབས་གནང་བའི་བཙན་བྱོལ་བོད་མིའི་འོས་བསྡུའི་སྒྲིག་གཞི་གསར་པའི་ནང་མ་འོངས་པར་བཙན་བྱོལ་བོད་མིའི་འོས་བསྡུའི་སྐབས་ཆོལ་ཁ་གསུམ་གྱི་སྒྲིག་འཛུགས་དང་ཆོས་བརྒྱུད། གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་ནས་སྲིད་སྐྱོང་དང་སྤྱི་འཐུས་ཀྱི་འོས་གཞི་འདོན་མི་ཆོག་ཞེས་གཏན་འབེབས་གནང་བ་དེར་ལས་དོན་གནང་ཕྱོགས་ཀྱི་ཆ་ནས་གུས་བརྩི་ཞུ་ཡི་ཡོད་ཀྱང་། བོད་ཀྱི་རྒྱལ་ཡོངས་མང་གཙོ་ཚོགས་པ་ཐོག་མར་གསར་འཛུགས་གནང་བའི་དམིགས་ཡུལ་དང་ད་ལྟའི་གནས་བབས་ཐོག་ནས་དེར་རྒྱབ་སྐྱོར་ཞུ་ཐབས་མེད་སྐོར་གསུངས་སོང་བ་མ་ཟད། བཙན་བྱོལ་བོད་མིའི་འོས་བསྡུའི་ལས་རིམ་ནང་ཆ་ཤས་བླངས་ཕྱོགས་སོགས་ཀྱི་ཐད་ལོ་རྗེས་མ་ཚོགས་གཏན་འཁེལ་བའི་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཆེན་ཐེངས་བརྒྱད་པའི་ཐོག་གྲོས་བསྡུར་གྱིས་ཐག་གཅོད་གནང་རྒྱུ་ཡིན་པ་གསུངས་སོང་།