དེ་རིང་སྔ་དྲོ་བཞུགས་སྒར་རྡ་སར་བོད་མི་སྟོང་ཕྲག་བརྒལ་བ་ལྷན་འཛོམས་ཀྱིས་རྒྱལ་གཅེས་པ་རྡོ་རྗེ་ཚེ་རིང་ལགས་དམ་པ་དེ་ཉིད་ཀྱིས་བོད་བསྟན་སྲིད་ཆེད་རང་ལུས་མེར་སྲེག་གནང་བར་གུས་འདུད་དང་གདུང་སེམས་མཉམ་
བསྐྱེད་ཞུ་ཕྱིར་ཁོང་གི་སྐུ་ཕུང་གཟི་བརྗིད་དང་ལྡན་པའི་ངང་གདན་ཞུ་གནང་པ་དང་བསྟུན། དམ་པ་དེ་ཉིད་ཀྱི་ཨ་མ་ལགས་ཀྱིས་བོད་པའི་ན་གཞོན་ཚོས་རང་ལུས་མེར་སྲེག་མི་གནང་བར་ཐབས་ལམ་གཞན་གྱི་སྒོ་ནས་བོད་ཀྱི་རྩ་དོན་རྩོད་དགོས་པའི་འབོད་སྐུལ་གནང་ཡོད་པ་རེད།
དེ་ཡང་རྡོ་རྗེ་ཚེ་རིང་ལགས་དམ་པ་དེ་ཉིད་ལྡི་ལིར་རྟེན་གཞི་བྱས་པའི་ Safdarjung སྨན་ཁང་དུ་ཁྲིད་ནས་ཛ་དྲག་ལྟ་སྐྱོང་ཁང་དུ་སྨན་པས་མྱུར་སྐྱོབ་ཞུས་ཀྱང་། ཁ་སང་ཕྱི་ཚེས་ ༣ ཉིན་གྱི་དགོང་དྲོ་ཚོུད་ ༨།༣༠ ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་རྗེས། ཁ་སང་ཟླ་འདིའི་ཚེས་ ༤ ཉིན་རྒྱ་གར་གྱི་
རྒྱལ་ས་ལྡི་ལི་ནས་གདན་ཞུ་གནང་བ་ལྟར། དེ་རིང་ཕྱི་ཚེས་ ༥ ཉིན་གྱི་སྔ་དྲོ་ཚོུད་ ༨།༣༠ ཐོག་སྐུ་ཕུང་གདན་ཞུ་བ་ཚོས་སྦག་སྦག་དང། རླངས་འཁོར་སོགས་ཀྱི་སྟེང་བོད་ཀྱི་རྒྱལ་དར་དང་། རྡོ་རྗེ་ཚེ་རིང་ལགས་དམ་པ་དེ་ཉིད་ཀྱི་ཞལ་ཆེམས། སྐུ་པར་བཅས་སྒྲེང་འཛུགས་ཀྱིས་གདན་ཞུ་གནང་པ་མ་ཟད། བཞུགས་སྒར་རྡ་སར་གཉུག་མར་གནས་པ་དང་གློ་བུར་དུ་ལྷགས་པ་ཀུན་གྱིས་སེར་བང་སྒྲིག་ནས་གུས་བརྩི་དང་གདུང་སེམས་མཉམ་བསྐྱེད་ཀྱིས་ཕེབས་བསུ་གཟབ་རྒྱས་ཞུས་ཡོད།
དམ་པ་དེ་ཉིད་ཀྱི་ཨ་མ་ཉི་མ་གཡང་འཛོམས་ལགས་སྐྱོ་སྣང་གི་ཚོར་ཤུགས་ཆེན་པོས་གསུངས་པར། ད་ལན་བུས་རང་ལུས་མེར་སྲེག་གནང་རྗེས་བོད་མི་ཁྱོན་ཡོངས་ནས་ཚོར་ཤུགས་ཆེན་པོས་གདུང་སེམས་མཉམ་བསྐྱེད་གནང་པ་དངོས་སུ་མཐོང་སྐབས་བུས་ཚེ་སྲོག་བློས་གཏོང་གནང་པ་དེ་ཆུད་ཟོས་ཕྱིན་མི་འདུག་ཅེས་གསུངས་པ་མ་ཟད། ལྷག་དོན་ཁོང
་གིས་བོད་པའི་ན་གཞོན་ཚོས་རང་ལུས་མེར་སྲེག་མི་གནང་བར་ཐབས་ལམ
་གཞན་གྱི་སྒོ་ནས་བོད་ཀྱི་རྩ་དོན་རྩོད་དགོས་པའི་འབོད་སྐུལ་ཡང་གནང་ཡོད་པ་རེད།
དེ་བཞིན་སྐུ་ཕུང་གདན་ཞུ་གནང་མཁན་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་བོད་མི་ཚོར་རྡོ་རྗེ་ཚེ་རིང་ལགས་དམ་པ་དེ་ཉིད་མངོན་འདོད་དང་རང་ལུས་མེར་སྲེག་གནང་བའི་གནས་སྟངས་ཇི་ཡིན་རྒྱལ་སྤྱིའི་ཁྱོན་ལ་ཁྱབ་སྤེལ་བྱ་རྒྱུའི་འགན་འཁུར་ཡོད་པ་རེད་ཅེས་གསུངས་ཡོད།
རྩ་བའི་རྡོ་རྗེ་ཚེ་རིང་ལགས་དམ་པ་དེ་ཉིད་ཀྱི་སྐུ་ཕུང་རྡ་ས་དབུས་བོད་ཀྱི་གཞོན་ནུ་ལྷན་ཚོགས་སུ་བཞང་ཡོད་པ་དང། དགེ་འདུན་པས་བསྔོ་སྨོན་གསུང་འདོན་གནང་མུས་ཡིན་པ་མ་ཟད། མང་ཚོགས་ནས་རེ་མོས་ཀྱིས་ཕུང་དར་སྒྲོན་ཡོད་པ་རེད། སང་ཉིན་ཚེས་ ༦ ཉིན་གྱི་སྔ་དྲོ་ཚོུད་ ༨།༠༠ སྟེང་ལྷ་རྒྱལ་རིར་རྡ་སར་གཉུག་མར་གནས་པ་དང་གློ་བུར་དུ་ལྷགས་པ་ཀུན་འདུ་འཛོམས་ཀྱིས་གདུང་སེམས་མཉམ་བསྐྱེད་ཀྱི་མཛད་སྒོ་ཞིག་ཚོགས་རྒྱུ་དང་། དེ་རྗེས་སྐུ་པུར་ཞུགས་འབུལ་གནང་གི་འདུག
