Tibetan Royal Year of 2151 | Year of the Wood Dragon

རྒྱ་ནག་གིས་འཁྱོགས་བཤད་སྤེལ་བའི་ཁྲོད་རྒྱ་རིགས་ནང་བོད་དོན་གོ་རྟོགས་སྤེལ་རྒྱུ་ཁག་པོ་ཆགས་བཞིན་འདུག

Tibetan News Headlines

  • ཆེས་མཐོའི་ཁྲིམས་ཞིབ་པའི་འོས་ཆོས་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ཟགས་སོང་།
  • བཅའ་ཁྲིམས་ནང་བོད་ཀྱི་རྒྱལ་དར་ལ་གུས་བརྩི་དགོས་པ་དང་གང་བྱུང་བེད་སྤྱོད་གཏང་མི་ཆོག་པ་འཁོད་དགོས་པའི་ཞུ་སྐུལ།
  • བོད་མིའི་ཆབ་སྲིད་བརྩོན་པ་གྲྭ་ཆོས་དབྱིངས་མཁས་གྲུབ་ལགས་འཕྲལ་མར་གློད་བཀྲོལ་དགོས་པ་གསུངས་འདུག
  • བསོད་ནམས་དབང་ཕྱུག་ལགས་ཀྱི་ཉིན་གྲངས་ ༢༡ གི་ཟས་བཅད་ལས་འགུལ་རེ་ཞིག་མཇུག་སྒྲིལ།
  • གློག་བརྙན་ནང་རིག་གནས་གསར་རྗེས་སྐོར་བསྟན་པར་རྒྱ་ནག་རྒྱལ་གཅེས་པ་རྣམས་ཀྱིས་སྐྱོན་བརྗོད།
  • ཨ་རིའི་གཞུང་གིས་རྒྱ་རིགས་བདུན་ལ་ལོ་བཅུ་བཞིའི་རིང་དྲ་ལམ་གཏོར་རྒོལ་གྱི་ལས་འགུལ་སྤེལ་བའི་ཉེས་འཛུགས།

Wednesday 27/03/2024

  • Charter amendment concerning appoinment of Justice Commissioners fails to obtain a majority
  • Petitioner urges MPs to propose bill to safeguard dignity of Tibetan national flag
  • US Amb. for religious freedom urges China to release prisoner of conscience Choeying Khedrub
  • Sonam Wangchuk ends 21-day fast, pledges to continue fight for Ladakh’s rights
  • Netflix’s ‘3 Body Problem’ showing ‘brutal Cultural Revolution’ draws fire in China
  • US indicts 7 Chinese nationals for cyber espionage

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དེ་རིང་རྒྱ་རིགས་དང་འབྲེལ་བའི་ལས་དོན་ཚོགས་འདུ་ཐེངས་དྲུག་པའི་ཐོག་ཆེད་ཕེབས་དང་འབྲེལ། དེང་སྐབས་རྒྱ་ནག་གཞུང་གིས་འཁྱོགས་བཤད་སྤེལ་བའི་ཁྲོད་རྒྱ་ནག་མི་མང་སྤྱི་དང་ལྷག་པར་དུ་རྒྱ་རིགས་གཞོན་སྐྱེས་ནང་བོད་དོན་གོ་རྟོགས་སྤེལ་རྒྱུ་ཁག་པོ་ཆགས་བཞིན་ཡོད་སྟབས། རྒྱ་སྐད་མཁྱེན་མཁན་ཚོར་དམིགས་བསལ་གྱི་འོས་འགན་ཡོད་པར་འགྲེལ་བརྗོད་གནང་སོང་།དེ་རིང་ཟླ་ ༡༠ ཚེས་ ༢༢ ཉིན་སྔ་དྲོ་ཆུ་ཚོད་ ༩ ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་རྒྱ་ཡིག་སྡེ་ཚན་གྱིས་གོ་སྒྲིག་འོག་བོད་མིའི་སྒྲིག་འཛུགས་ཀྱི་རྒྱ་རིགས་དང་འབྲེལ་བའི་ལས་དོན་ཚོགས་འདུ་ཐེངས་དྲུག་པ་དེ་བཞུགས་སྒར་ཉེ་འདབས་སུ་རྟེན་གཞི་བྱས་པའི་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ་དབུ་འཛུགས་གནང་ཡོད་པ་དང ། ཐེངས་འདིའི་ཚོགས་འདུའི་ཁྲོད་བོད་མིའི་སྒྲིག་འཛུགས་ཀྱི་རྒྱ་རིགས་འབྲེལ་མཐུད་པ་རྣམ་པས་གཙོས་པའི་རྒྱལ་སྤྱིའི་རྒྱལ་ཁབ་མི་འདྲ་བ་ ༡༢ ནས་ཚོགས་ཞུགས་མི་སྣ་ ༤༨ འཛུལ་ཞུགས་གནང་སྟེ་ཚོགས་འདུ་ཉིན་གཉིས་དང་ཟབ་སྦྱོང་ཉིན་གཉིས་ཀྱི་ལས་རིམ་གོ་སྒྲིག་གནང་ཡོད་པ་རེད།སྲིད་སྐྱོང་བློ་བཟང་སེང་གེ་མཆོག་གིས་སྐབས་དེར་བོད་མིའི་སྒྲིག་འཛུགས་ཀྱི་ངོས་ནས་རྒྱ་རིགས་འབྲེལ་མཐུད་ཀྱི་ཕྱག་ལས་དང་དེ་འབྲེལ་ཟབ་སྦྱོང་དང་ཚོགས་འདུ་དེ་དག་ཧ་ཅང་གལ་ཆེན་པོར་ངོས་འཛིན་གནང་གི་ཡོད་ནའང་། ཚོགས་འདུའི་ཐོག་རྒྱ་སྐད་ཤེས་མཁན་བོད་མི་ཉུང་ཤས་མ་གཏོགས་ཕེབས་ཐུབ་ཀྱི་མེད་པའི་གནད་དོན་ལ་ཐུགས་ཕམ་གྱི་རྣམ་འགྱུར་དང་འབྲེལ། དེང་སྐབས་རྒྱལ་སྤྱིའི་ཡུལ་གྲུ་ཁག་གི་དབུ་ཁྲིད་ཡན་ཆད་རྒྱ་ནག་གི་འཁྱོགས་བཤད་འོག་ཚུད་པའི་དུས་སྐབས་འདིར་བཙན་བྱོལ་དུ་ཡོད་པའི་བོད་མི་བརྒྱ་ཆ་ཉུང་ཤས་ཤིག་གིས་རྒྱ་རིགས་ས་ཡ་མང་པོར་བོད་དོན་གོ་རྟོགས་སྤེལ་རྒྱུ་ཁག་པོ་ཆགས་བཞིན་པ་དེ་གསལ་པོ་ཡིན་པར་འགྲེལ་བརྗོད་གནང་ཡོད།སྲིད་སྐྱོང་མཆོག་གིས་གནས་སྟངས་དེ་འདྲའི་ཁྲོད་བོད་མི་སྤྱི་དང་ཡང་སྒོས་རྒྱ་སྐད་ཤེས་མཁན་ཚོས་བརྒྱུད་ལམ་ཁག་ཏུ་དུས་ཐོག་ཐུགས་སྣང་གནང་སྟེ་བོད་མིའི་སྒྲིག་འཛུགས་ལ་རམ་འདེགས་ཞུ་གལ་ཡིན་པའི་ལམ་སྟོན་གནང་སོང་།རྩ་བའི་དེ་རིང་ཚོགས་འདུ་དབུ་འབྱེད་ཀྱི་མཛད་སྒོའི་ཐོག་རྒྱ་རིགས་ཀྱི་ལོ་རྒྱུས་ཆེད་མཁས་པ་སྐུ་ཞབས་ Ding Yifu ལགས་ཀྱིས་རྒྱ་ནག་གི་དངོས་ཡོད་གནས་སྟངས་དང་བོད་ཀྱི་མདུན་དུ་འཕྲད་པའི་འགྲན་སློང་དང་གོ་སྐབས་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད།བོད་དོན་ནི་བོད་ཁོ་ནའི་གནད་དོན་ཞིག་མིན་པར་རྒྱལ་སྤྱིའི་སྤྱི་ཚོགས་དང་འབྲེལ་བ་དམ་ཟབ་ཡོད་པ་ཞིག་ཆགས་ཡོད་པ་དང་། བོད་མིའི་དབུ་མའི་ལམ་གྱི་སྲིད་བྱུས་ནི་རྒྱལ་སྤྱིའི་འགྱུར་འགྲོས་དང་བསྡུར་ནས་བལྟ་ཚེ་ཧ་ཅང་གནད་འགག་རང་བཞིན་གྱི་སྲིད་བྱུས་ཤིག་དང་། རྒྱལ་སྤྱིའི་ངོས་ནས་རྒྱབ་སྐྱོར་གནང་འོས་པའི་དོན་སྙིང་ལྡན་པའི་སྲིད་བྱུས་ཤིག་ཆགས་ཡོད་སྟབས། བོད་མི་ཚོས་མུ་མཐུད་ནས་དབུ་མའི་ལམ་གྱི་ཐོག་ནས་འཐབ་རྩོད་གནང་རྒྱུ་དེ་གལ་ཆེན་ཡིན་པ་དང་།  རྒྱ་ནག་ལ་ཆ་མཚོན་ནའང་ཕྱི་ལོག་ནས་བལྟ་ཚེ་སྟོབས་འབྱོར་ལྡན་པའི་རྒྱལ་ཁབ་ཅིག་ཡིན་ནའང་དོན་དུ་སྤྱི་ཚོགས་ཁྱོན་ཡོངས་ལ་དཀའ་ངལ་མང་པོ་ཞིག་འཕྲད་བཞིན་ཡོད་པ་ནི་སྤྱི་ཚོགས་ཀྱི་དབུལ་ཕྱུག་ཆ་མི་སྙམ་པ། འཛུགས་སྐྲུན་ཐོན་སྐྱེལ་གྱི་ཐོན་ཁུངས་མེད་པ། ཁོར་ཡུག་ཉམས་ཉེས་འགྲོ་བ། དེ་བཞིན་སྤྱི་ཚོགས་ཀྱི་བཟང་སྤྱོད་ཚད་མདའ་པོར་སླེབས་པ་སོགས་ཀྱི་ནང་ཁུལ་གྱི་གནོད་ཤུགས་མང་པོ་ཞིག་ཡོད་པས་སྔ་རྗེས་ཙམ་མ་གཏོགས་རྒྱ་ནག་ནང་འགྱུར་བ་ཆེན་པོ་ཞིག་འགྲོ་ངེས་ཡིན་པར་བརྟེན་བོད་པ་ཚོའི་ངོས་ནས་དུས་འགྱུར་དང་བསྟུན་ནས་གོམ་པ་རྒྱག་ཐུབ་པའི་གྲ་སྒྲིག་དགོས་རྒྱུ་དེ་གལ་ཆེན་པོ་རེད་ཅེས་གསུང་བཤད་གནང་སོང་།

གཞི་རྩའི་བོད་མིའི་སྒྲིག་འཛུགས་ནས་རྒྱ་རིགས་དང་འབྲེལ་བའི་ཟབ་སྦྱོང་དེ་ཐོག་མར་ཕྱི་ལོ་ ༢༠༡༥ ལོ་ནས་དབུ་འཛུགས་གནང་བ་དང་། ཐེངས་འདིའི་ཟབ་སྦྱོང་ཐོག་རྒྱ་བོད་གཉིས་ཀྱི་ལོ་རྒྱུས་དང་མི་རིགས་ས་ཁོངས་རང་སྐྱོང་། གཞན་ཡང་དབུ་མའི་ལམ་གྱི་སྲིད་བྱུས། ༸གོང་ས་མཆོག་གི་ཐུགས་བསྐྱེད་དམ་བཅའ། དེ་བཞིན་བོད་ཀྱི་ཁོར་ཡུག་སོགས་ཀྱི་ཐོག་ཟབ་སྦྱོང་སྤྲོད་བཞིན་ཡོད་པ་རེད།

འབྲེལ་ཡོད་གསར་གནས།

གསར་གནས།