རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཐེངས་གསུམ་པ་གནང་རན་པ་དང་བསྟུན་ཁ་སང་སུད་སི་ཇི་ནི་ཝ་གྲོང་ཁྱེར་དུ་འཚོགས་པའི་སྔོན་འགྲོའི་ཚོགས་འདུ་སྐབས་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང་ལྷག་དོན་རྒྱ་ནག་གི་ངོས་ནས་དེ་སྔའི་དུས་བཀག་བསྐྱར་ཞིབ་སྐབས་ཁས་ལེན་བྱས་ཀྱང་ལག་བསྟར་དོོན་འཁྱོལ་གནང་མེད་པའི་གནད་དོན་རྣམས་འབུར་བཏོན་གནང་འདུག
དེའང་ཟླ་བ་རྗེས་མའི་ནང་རྒྱལ་ཚོགས་ནས་རྒྱ་ནག་དང་མེག་སི་ཀོ། སའུ་དི་ཨ་ར་བི་ཡ། མ་ལེ་ཤི་ཡ། མོ་ན་ཀོ་ལ་སོགས་པའི་ ཚོགས་མི་རྒྱལ་ཁབ་ཁག་ཅིག་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་གནང་གི་ཡོད་ལྟར། ཇི་ནི་ཝ་གྲོང་ཁྱེར་དུ་རྟེན་གཞི་བྱས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ལྷན་ཁང་དུ་ཁ་སང་ནས་དབུ་འཛུགས་ཀྱིས་རྒྱལ་ཁབ་དེ་དག་རེ་རེ་ནང་གི་གནད་དོན་དང་འབྲེལ་བའི་སྔོན་འགྲོའི་ལས་རིམ་ཞིག་དབུ་འཛུགས་གནང་ཡོད་པ་རེད། རྒྱ་ནག་དང་འབྲེལ་བའི་ལས་རིམ་ཐོག་ Tibet Advocacy Coalition ཞེས་པའི་རྒྱལ་སྤྱིའི་བོད་དོན་ཞུ་གཏུག་ཚོགས་པ་དང་འཛམ་གླིང་ཡུ་གུར་ལྷན་ཚོགས། རྒྱལ་སྤྱིའི་སྨྱུ་གུ་ཚོགས་པ། ཉེན་ཁའི་འོག་ལྷུང་བའི་མཁས་དབང་གི་ཚོགས་པ། ཧོང་ཀོང་གི་དུས་བཀག་བསྐྱར་ཞིབ་ཚོགས་པ་བཅས་ནས་མཉམ་ཞུགས་གནང་འདུག
བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ཚེ་སྐབས་དེར་རྒྱལ་སྤྱིའི་བོད་དོན་ཞུ་གཏུག་ཚོགས་པའི་པདྨ་སྒྲོལ་མ་ལགས་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་ངོ་སྤྲོད་གནང་བ་དང་འབྲེལ། རྒྱ་ནག་གི་བོད་ཐོག་འཛིན་པའི་སྲིད་བྱུས་རྣམས་བོད་ནང་གི་བོད་མི་ཚོའི་ཐོབ་ཐང་དང་རང་དབང་སྲུང་སྐྱོབ་བྱ་རྒྱུ་ལས་ལྡོག་སྟེ་བོད་མིིར་བཏང་འཛིན་དང་བོད་མིའི་རང་དབང་བརྩི་མེད་རྡོག་རོལ་ལ་དམིགས་པ་འབའ་ཞིག་རེད་ཅེས་གསུངས་འདུག
ཁོང་གིས་ད་དུང་རྒྱ་ནག་གཞུང་ནས་དེ་སྔའི་དུས་བཀག་སྐྱར་ཞིབ་སྐབས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་གྱིས་གཙོས་པའི་རྒྱལ་ཚོགས་ཀྱི་འགྲོ་མིའི་ཐོབ་ཐང་གི་སྐུ་ཚབ་རྣམས་བོད་དང་ཤིན་ཅང་གི་ས་ཁུལ་ཁག་ཏུ་ཆེད་གཏོང་བྱ་རྒྱུའི་ལམ་སྟོན་ལ་ཁས་ལེན་བྱས་ཡོད་ཀྱང། ད་བར་ལག་ལེན་དོན་འཁྱོལ་གནང་མེད་སྟབས་རྒྱལ་ཚོགས་ཀྱི་ཚོགས་མི་རྒྱལ་ཁབ་རྣམས་ནས་རྒྱ་ནག་ཐོག་སྔར་ལས་བཞེངས་ཕྱོགས་མཁྲེགས་པ་འཛིན་དགོས་གལ་དང། བོད་ཀྱི་གནད་དོན་དང་འབྲེལ་བའི་ཞུ་སྐུལ་ཁག་ཅིག་ཟླ་བ་རྗེས་མའི་ནང་འཚོགས་རྒྱུའི་དུས་བཀག་བསྐྱར་ཞིབ་ཐོག་གླེང་དགོས་པར་འབོད་སྐུལ་ཞུས་འདུག
བོད་ཀྱི་གནད་དོན་དང་འབྲེལ་བའི་ཞུ་སྐུལ་དེ་དག་ནང་བོད་མི་ཞིང་འབྲོག་མང་ཚོགས་གཞིས་སྤོས་ཀྱི་ལས་གཞི་ཁག་འཕྲལ་མར་མཚམས་འཇོག་དགོས་པ། བོད་མིའི་འགྲུལ་བསྐྱོད་རང་དབང་ལ་དམ་དྲག་བྱེད་བཞིན་པ་རྣམས་མཚམས་འཇོག་དགོས་པ་མ་ཟད་རྒྱལ་ཚོགས་ཀྱི་འབྲུ་དོན་ལྟར་བོད་མིར་རང་ཐག་རང་གཅོད་ཀྱི་ཐོབ་ཐང་ལོངས་སུ་སྤྱོད་རྒྱུ་ཡོང་བར་དོན་དམ་གྱི་ཕྱག་ལས་གནང་དགོས་པ་བཅས་ཀྱི་འབོད་སྐུལ་ཞུས་འདུག
